လါမ့ၤ ၂၆ သီ, ၂၀၂၅ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ် တီနီၢ်မုၢ်ထီၣ် သ့ၣ်ဘီဘိကရူၢ်ပူၤ ကမျၢၢ်လၢအဃ့ၢ်ထီၣ်တဖၣ်လိၣ်ဘၣ်၀ဲဂ့ၢ်ဂီၢ်အူကသံၣ်ကသီတကးဒံးဘၣ်လိၣ်ဘၣ်စ့ၢ်ကီး၀ဲဂံၢ်ခီၣ်ထံးတၢ်အီၣ်တၢ်အီ ဃုၥ်ဒီး တၢ်ခိၣ်ဒုးသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲအပူၤကွံၥ်လါမ့ၤ ၂၁ သီအနံၤ ခီဖျိတၢ်လဲၤထီၣ်ခး၀ဲဘျၢၣ်ဒိၣ်ပယီၤသုးကလၢၤတၢ်ဒုးကဲထီၣ်,ပယီၤသုးခးလီၤကျိဖးဒိၣ်အဃိ ဘျီၣ်ဒိၣ်ဃုၥ်ဒီးသ့ၣ်ဘီဘိသ၀ီတဖၣ် ဃ့ၢ်ထီၣ်၀ဲဒၣ်န့ၣ်လီၤ.အဃိပှၤသ့ၣ်တဖၣ်အံၤအဂီၢ်ခီဖျိကသံၣ်ကသီတအိၣ် တကူတလၢဒံး၀ဲ ဘၣ် အဖီခိၣ်လိၣ်ဘၣ်အါထီၣ်၀ဲဂ့ၢ်ဂီၢ်အူကသံၣ်ကသီဒ်အံၤလီၤအဂ့ၢ်န့ၣ် သ့ၣ်ဘီဘိလီၢ်အိၣ်ကမှံတၢ်ဆါဟံၣ်မူဒါခိၣ် သရၣ်စီၤလါ၀ါ စံး၀ဲန့ၣ်လီၤ.
“အခဲအံၤပမ့ကွၢ်န့ၣ်ပသံၣ်န့ၣ်တအိၣ်တဘျုးမံၤညါ.အဒိဒ်သိးပှၤမ့ဘၣ်ဒိဘၣ်ထံးန့ၣ်ဘၣ်ဃး(မ့ခဲၤ)ကသံၣ်ဒီသဒၢန့ၣ်တအိၣ်နီတမံၤဘၣ်.၀ဲဒၣ်န့ၣ်(KDHW)ဆီၣ်ထွဲမၤစၢၤပှၤလီၤ.ခဲအံၤပတီၣ်ထီၣ်ဃ့ဃၥ်ပၥ်စၢၤအိၣ်ဘၣ်ဆၣ်ဟဲတတုၤဒံးဘၣ်.တဂီၤအံၤဟဲလၢအခီၣ်ဘၣ်ဆဲး,လၢသၣ်မံညီၤအ့ၣ်၀ဲန့ၣ်အိၣ်လီၤ.ခဲအံၤပမၤတဘၣ်နီမံၤဘၣ်ဘၣ်ဆၣ်ခဲအံၤပပဲလီၤန့ၢ်အီၤတၢ်ပူၤလီၢ်ဒ်န့ၣ်လီၤ.ကသံၣ်မ့တုၤမးပဆဲးန့ၢ်အ၀ဲသ့ၣ်မီၤနီၤ.ခဲအံၤပအိၣ်ကတဲၤကတီၤသးတချုးခံဘၣ်ခီဖျိပှၤဆါဟဲတုၤဆိအဃိပကသံၣ်တစိၢ်ဒံးဘၣ်လိၣ်ဒီဒူၣ်ဒံး”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကးဒံးဘၣ်လၢန့ၣ်အမဲၥ်ညါကမျၢၢ်လၢအဃ့ၢ်ထီၣ်သ့ၣ်တဖၣ်အံၤစးထီၣ်လၢအဃ့ၢ်ထီၣ်န့ၣ်အီၣ်ဒၣ်အကစၢ်တၢ်အီၣ်တၢ်အီလီၤဒီး ခဲအံၤခီဖျိတၢ်စူၤလီၤလံအဃိလၢအ၀ဲသ့ၣ်အဂီၢ်လိၣ်ဘၣ်စ့ၢ်ကီး၀ဲဂံၢ်ခီၣ်ထံးတၢ်အီၣ်တၢ်အီ,တၢ်ခိၣ်ဒုး,ပ့ၢ်ပီၤ,ယၣ်လုး,ချီၣ်,တၢ်ခိၣ်ဒုးဒီးတၢ်ဟးလီၢ်သ့ၣ်တဖၣ်အဂ့ၢ်န့ၣ် သရၣ်စီၤလါအါ စံးအါထီၣ်၀ဲန့ၣ်လီၤ.
“ပဟဲဆီလီၤသးခဲအံၤန့ၣ်ပှၤဃ့ၢ်မှံဟးဖျိးတဖၣ်တၢတခါန့ၣ်အတၢ်ဟးလီၢ်တအိၣ်ဒံးဘၣ်.၀ံၤဘျီတၢ်စူၤဟီၣ်ခိၣ်ဘၣ်စီၣ်,ပစိၤအ့ၣ် မ့ၢ်အ၀ဲသ့ၣ်ပ့ၢ်ပီၤပၣ်ဧါပတသ့ၣ်ညါဘၣ်.ပှၤဒဲက၀ီၤဖိအမဲၥ်ညါပကသံၣ်သရၣ်/မုၣ်စ့ၢ်ကီးတၢ်အီၣ်တၢ်အီတအိၣ်ဘၣ်.ပစံၣ်လီၤအံၤမနုၤမးတအိၣ်ဘၣ်.အပူၤကွံၥ်တၢ်ကဲထီၣ်သးလၢလၥ်တကပၤန့ၣ်အဃိဖဲအံၤတၢ်ဆီၣ်ထွဲမၤစၢၤတဟဲလၢၤဘၣ်ကအိၣ်တနံၣ်ဃၣ်ဃၣ်လံ.ခဲအံၤပှၤလၢအစံၣ်ထီၣ်တဖၣ်အိၣ်ဒၣ်ဟဲစိၥ်လီၤအကစၢ်တဘိၣ်ဟဲအိၣ်ဟဲအီၣ်၀ဲဒ်န့ၣ်လီၤ.”အဂ့ၢ်န့ၣ် စံး၀ဲန့ၣ်လီၤ.
ဒ်န့ၣ်အသိးတကီၢ်ခါခဲအံၤလၢကကွၢ်ထွဲပှၤစူးပှၤဆါအဂီၢ်ခီဖျိကသံၣ်ကသီတကူတလၢဒံးဘၣ်အဃိ ဂ့ၢ်ဂီၢ်အူပှၤဆါလၢကသံၣ်ကသီ မ့တအိၣ်လၢအဂီၢ်သ့ၣ် တဖၣ်န့ၣ် တၢ်ဆှၢထီၣ်၀ဲဆူထံ၀ၢ်ခီ ကီၢ်ကၠီၣ်တဲၣ် ဖိဖြးတၢ်ဆါဟံၣ်ဖးဒိၣ်အဂ့ၢ်န့ၣ် ကသံၣ်ပှၤဘၣ်မူဘၣ်ဒါ စံး၀ဲအသိးသ့ၣ်ညါဘၣ်န့ၣ်လီၤ.
သ့ၣ်ဘီဘိသ၀ီလၢအိၣ်ဘူး၀ဲဒီးဘျၢၣ်ဒိၣ်သုးကလၢၤအံၤဖဲလါမ့ၤ ၂၃ သီ မုၢ်ဃ့ၢ်လီၤအဆၢကတီၢ်န့ၣ် ဟီၣ်က၀ီၤကညီဒီ ကလုၥ် တၢ်ထူၣ်ဖျဲးးသုးမုၢ်ဒိၣ်(KNLA)သုးပၥ်ဖှိၣ်ထီၣ်မၤန့ၢ်က့ၤ၀ဲသုးကလၢၤအံၤလံဘၣ်ဆၣ်ခဲအံၤတၢ်ရဲၣ်တၢ်ကျဲၤအိၣ်လၢ တၢ်ကဆဲး ထီၣ်၀ဲ သ့ၣ်ဘီဘိပယီၤသုးကလၢၤအဃိ သ၀ီဖိခဲလၢၥ်ဃၣ်ဃၣ်ဃ့ၢ်ထီၣ်၀ဲတုၤလၢခဲအံၤန့ၣ်လီၤ.
တကးဒံးဘၣ်သ့ၣ်ဘီဘိသုးကလၢၤအံၤအိၣ်ဆီလီၤအသးလၢသ၀ီပူၤတီတီလီၤဒီးတၢ်တယးကွၢ်၀ဲသုးကလၢၤအပူၤန့ၣ် သုးဂံၢ်ဘါကအိၣ်၀ဲ(၁၀၀)ဘျဲၣ်န့ၣ်လီၤ. ဒ်န့ၣ်အသိးတချုးဘျီၣ်ဒိၣ်သုးကလၢၤလီၤတုၤလၢတၢ်ထီၣ်န့ၢ်၀ဲတစုန့ၣ် သ့ၣ်ဘီဘိ ပယီၤသုးကလၢၤအံၤခးလီၤစၢၤ၀ဲကျိဖးဒိၣ်တပယူၥ်ဃီအဂ့ၢ်န့ၣ် သ့ၣ်ညါဘၣ်န့ၣ်လီၤ.
