လါမ့ၤ ၁၆ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် ဃီဖိပျဲၢ်သ၀ီဃုၥ်ဒီးဒူသ၀ီကၠိလၢအိၣ်ဘူးဖဲန့ၣ် တဖၣ် တကီၢ်ခါခဲအံၤခီဖျိတၢ်ဘံၣ်တၢ်ဘၢတအိၣ်သးတဂ့ၤဒံးဘၣ်အဖီခိၣ် တနံၣ်အံၤတၢ်ကီတၢ်ခဲအိၣ်လၢကက့ၤအိးထီၣ်ကဒါ ၀ဲအဂ့ၢ်န့ၣ် လီၢ်က၀ီၤကူၣ်သ့ပှၤဘၣ်မူဘၣ်ဒါတဖၣ် စံး၀ဲန့ၣ်လီၤ.
ဃီဖိပျဲၢ်သ၀ီအပူၤ ဖဲအပူၤကွံၥ်လါအ့ဖြ့ၣ် ၁၉ သီအနံၤန့ၣ် တၢ်ဒုးတၢ်ယၤကဲထီၣ်တအိၣ်ပယီၤသုးကဘီယူၤပညိၣ်လဲၤတ့ၢ် လီၤမ့ၣ်ပိၢ်လၢသီခါဖၠၣ်တၢ်သူၣ်ထီၣ်ကရၢၢ်ပူၤအဃိ ကမျၢၢ်သံ(၃)ဂၤအကျါပၣ်ဃုၥ်၀ဲတပွဲဖိတပါဒီးသ၀ီဖိ,သီခါဘၣ်ဒိတစှၤန့ၢ်အဂၤ (၁၀)ကဲထီၣ်၀ဲန့ၣ်လီၤ.
အဃိစးထီၣ်ဖဲန့ၣ်ဃီဖိပျဲၢ်သ၀ီဃုၥ်ဒီးဒူသ၀ီကမျၢၢ်လၢအိၣ်ဘူးဖဲန့ၣ်တဖၣ်ဃ့ၢ်ထီၣ်ဟးအိၣ်လၢတၢ်ဘံၣ်တၢ်ဘၢလီၢ်န့ၣ်လီၤ. ဘၣ်ဆၣ်ခဲအံၤဟီၣ်က၀ီၤပူၤဖဲန့ၣ်ခီဖျိကဘီယူၤဟးဆှၣ်တၢ်လ့ၢ်ထီၣ်လ့ၢ်လိၤအိၣ်ဒံးအဃိ လီၤဆီဒၣ်တၢ်ထံဆံၣ်ဘီဒီးဃီဖိပျဲၢ်သ၀ီ (၂)ဖျၢၣ်အံၤကမျၢၢ်တဖၣ်အါဒၣ်တက့ၢ်က့ၤဟံၣ်တဘူၣ်ဟးပလဲၥ်ဒံးအသးလၢတၢ်ချၢအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ.
တကီၢ်ခါခဲအံၤတၢ်ဆၢကတီၢ်စ့ၢ်ကီးတုၤဃီၤကဒီး၀ဲလၢတၢ်ကက့ၤအိးထီၣ်ကဒါကၠိလံဘၣ်ဆၣ် တုၤလၢခဲအံၤခီဖျိတၢ်ဘံၣ်တၢ်ဘၢ တအိၣ်ဒံးဘၣ်အဃိ လၢကအိးထီၣ်ကဒါကၠိအဂီၢ်တၢ်ကီတၢ်ခဲအိၣ်၀ဲအဂ့ၢ်န့ၣ် ဃီဖိပျဲၢ်ကၠိခိၣ် သရၣ်စီၤဒူဒူၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
“ဃီဖိပျဲၢ်ဒီးထံဆံၣ်ဘီသ၀ီန့ၣ်ပှၤအိၣ်လၢသ၀ီပူၤကအိၣ်၀ဲသၢပူၣ်တပူၣ် လီၤ.ပှၤအိၣ်တ့ၢ်က့ၤထဲပှၤသူၣ်က့သးပှၢ်ဒ်န့ၣ်လီၤ. ကဘီယူၤဟဲမၢ်မၢ်ဘျီပှၤပျံၤတီၢ်တၢ်.ပှၤအိၣ်လၢသ၀ီပူၤတဘူၣ်ဘၣ်အဃိနကက့ၤအိးထီၣ်ကဒါကၠိဒုတၢ်တၤတၢ်အိၣ်၀ဲဒီဒူၣ်န့ၣ်.တၢ်တၤအိၣ်ဒ်လဲၣ်န့ၣ်ပှၤကၠိဖိထီၣ်ကၠိတဘူၣ်,သရၣ်/မုၣ်သိၣ်လိတၢ်တဘူၣ်ဘၣ်မ့ၢ်စ့ၢ်.ပထံၣ်ဘၣ်ဖဲအပူၤကွံၥ်ကဘီယူၤလဲၤခးတၢ်ပှၤကၠိဖိ,သရၣ်သ့ၣ်တဖၣ်သံလၢအဆံ.နကွၢ်တၢ်တခါအံၤ၀ဲဒၣ်နါက့ပပှဲၤဒီးတၢ်ဘၣ်ယိၣ်ဘၣ်ဘှီလီၤ.အဃိနကအိးထိၣ်ကၠိဒုတၢ်ဂ့ၢ်ကီအိၣ်လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးဃီဖျိပျဲၢ်ကၠိအမဲၥ်ညါကၠိလၢအိၣ်ဟီၣ်က၀ီၤပူၤဖဲန့ၣ်သ့ၣ်တဖၣ်စ့ၢ်ကီး လၢကအိးထီၣ်ကဒါကၠိမၤလိတၢ်လၢ ကၠိပူၤ လိၤလိၤအဂီၢ်န့ၣ်တမ့ၢ်လၢကသ့ဒံး၀ဲဘၣ်ဒီး မ့မ့ၢ်တခီတၢ်ကဘၣ်ဆဲးမၤလိဒံးတၢ်လၢတၢ်ဘံၣ်တၢ်လၢအလီၢ်တခါခါဒ်အပူၤကွံၥ် အသိးအဂ့ၢ်န့ၣ် ကူၣ်သ့ပှၤမၤတၢ်ဖိတဖၣ် ပဲၥ်ထံနီၤဖးစံး၀ဲန့ၣ်လီၤ.
ဃီဖိပျဲၢ်သ၀ီလၢကဘီယူၤလဲၤတ့ၢ်လီၤကဒီးမ့ၣ်ပိၢ်ဖဲအပူၤကွံၥ်လါအ့ဖြ့ၣ် ၁၉ အံၤ ဖဲအပူၤကွံၥ်နံၣ်(၂၀၂၄)လါအ့ဖြ့ၣ် ၂၄ သီအခါ စ့ၢ်ကီး အဆိကတၢၢ်တဘျီကဘီယူၤ လဲၤတ့ၢ်လီၤမ့ၣ်ပိၢ်အဃိ ဃီဖိပျဲၢ်ကၠိလီၤပှီၢ်ဟးဂီၤလီၤကရဲ(၃)ဖျၢၣ်လၢၥ်တုၤလၢခဲအံၤတစု တၢ်က့ၤဘှီထီၣ်၀ဲတအိၣ်ဒံးဘၣ်ဒီး ပှၤကၠိဖိစ့ၢ်ကီးဘၣ်သုးလီၢ် မၤလိက့ၤတၢ်လၢတၢ်ဘံၣ်တၢ်ဘၢလီၢ်တုၤခဲအံၤတစုန့ၣ်လီၤ.
တကးဒံးဘၣ်လၢန့ၣ်အမဲၥ်ညါဃီဖိပျဲၢ်ကၠိလီၤပှီၢ်ကဲထီၣ်သး၀ံၤတလါဃီဖဲလါအ့ဖြ့ၣ် ၂၈ သီအနံၤတဘျီ, (၂၀၂၅) လါယနူၤ အါရံၤ ၁၆ သီ တဘျီဒီး လါဖ့ၤဘြူၤအါရံၤ ၉ သီအနံၤ ကဘီယူၤဒီးဒြိအဃိ ထံၣ်ဆံၣ်ဘီကၠိဒီးသီခါဖၠၣ်,ဟံၣ်ဃီတၢ်သူၣ်ထီၣ်လီၤပှီၢ်ဟးဂီၤ ကဲထီၣ်အဖီခိၣ် ပှၤကၠိဖိဘၣ်သုးလီၢ်မၤလိက့ၤတၢ်လၢတၢ်ဘံၣ်တၢ်ဘၢအလီၢ်ဒီးကမျၢၢ်စ့ၢ်ကီးဘၣ်အိၣ်က့ၤလၢတၢ်ပလီၢ်ပဒီး တုၤလၢ ခဲအံၤန့ၣ်လီၤ.
သုးဟံန့ၢ်တၢ်စိတၢ်ကမီၤ၀ံၤလီၢ်ခံ ဒူသထူၣ်ကီၢ်ရ့ၣ် ကီၢ်ဆၣ်ကိးဘ့ၣ်ဒဲးအပူၤ ခီဖျိဒုးယၤတၢ်ဘံၣ်သဘုၣ်ကဲထီၣ်, ပယီၤသုးခးလီၤ ကျိဖးဒိၣ်,ကဘီယူၤလဲၤခး လီၤတၢ်အဃိ ကမျၢၢ်သံဘၣ်ဒိဘၣ်ထံးအမဲၥ်ညါတၢ်ဘူၣ်တၢ်ဘါ,ဟံၣ်ဃီတၢ်သူၣ်ထီၣ် ဟးဂီၤ၀ဲဒၣ်အါမး ဒီး တုၤလၢခဲအံၤဒုးယၤတၢ်ဖ့ၣ်ဆၢဆဲးကဲထီၣ်ဒံး၀ဲအဖၢမုၢ်န့ၣ်လီၤ..
