လါယူၤလံ ၁၁သီ, ၂၀၂၅နံၣ်, ခ့ၣ်အဲးစံၣ်,
တၢ်ကမၤစှၤလီၤတၢ်ကသုၣ်ကသံးတၢ်ဆီတလဲလၢကီၢ်သူလ့ၤတၢ်ပၢဟီၣ်ကဝီၤအပူၤအဂီၢ်,အနံၣ်(၁၀)အတီၢ်ပူၤခ့ၣ်အဲၣ်ယူၣ်တီခိၣ်ရိၢ်မဲတိၤလီၤဝဲလၢ,ကသူၣ်ဝဲသ့ၣ်ထူၣ်ဝၣ်ဘိအ့ကၢၣ်(၅၀၀၀၀၀)ယဲၢ်ကလီၢ်ဃၣ်ဃၣ်အဂ့ၢ်,ဘိးဘၣ်ရၤတ့ၢ်ဝဲဖဲတလါအံၤလါယူၤလံ(၁)သီအနံၤန့ၣ်လီၤ.
ကသူၣ်လီၤဝဲသ့ၣ်ထူၣ်ဝၣ်ဘိအတၢ်တိၤကျဲၤအံၤစးထီၣ်ပၥ်ပနီၣ်ဝဲဖဲ(၂၀၂၅)နံၣ်တုၤလၢ(၂၀၃၅)နံၣ်လၢၥ်လၢအနံၣ်(၁၀)အတီၢ်ပူၤဒီးသ့ၣ်ထူၣ်ဝၣ်ဘိလၢကသူၣ်လီၤဝဲသ့ၣ်တဖၣ်အံၤကသူၣ်ဝဲတၢ်လီၢ်(၂၀၀,၀၀၀)ဟဲးထၢၣ်(၄၉၄,၂၁၀)အ့ကၢၣ်လၢကီၢ်သူလ့ၤတၢ်ပၢဟီၣ်ကဝီၤ,သ့ၣ်တမဲထီၣ်အလီၢ်ဒီးတၢ်လီၢ်လၢသ့ၣ်ပှၢ်လီၤဟိလီၤပျီတဖၣ်အတၢ်လီၢ်အပူၤအဂ့ၢ်,လံၥ်ဘိးဘၣ်ရၤလီၤအပူၤ,ပၥ်ဖျါတ့ၢ်ဝဲဒၣ်န့ၣ်လီၤ.
အနံၣ်(၁၀)အတီၢ်ပူၤပၥ်လီၤဝဲတၢ်တိၤကျဲၤအံၤအဖီခိၣ်,ကီၢ်သူလ့ၤတၢ်ရဲၣ်သဲကတီၤန့ဆၢၣ်ခိၣ်ဃၢၤ,န့ဆၢၣ်တၢ်အိၣ်ယၢၤကမံးတံၥ်(KNRECC)ပှၤကတိၤတၢ်ပၢစီၤပီလ်စ့ၤထွါစံးဝဲဒ်အံၤန့ၣ်လီၤ.
“ပပၥ်လီၤတၢ်ဆၢကတီၢ်အနံၣ်(၁၀)န့ၣ်,မ့ၢ်ဒၣ်ခီဖျိပခ့ၣ်အဲၣ်ယူၣ်အိၣ်ဝဲဒီးတၢ်ပညိၣ်လၢကမၤစှၤလီၤဝဲခိၣ်ဃၢၤန့ဆၢၣ်တၢ်ဘၣ်ဒိဘၣ်ထံးလၢပပှၤတဝၢအဖီခိၣ်,လၢအဟဲခီဖျိသးလၢတၢ်ကသုၣ်ကသံၣ်တၢ်ဆီတလဲတဖၣ်န့ၣ်အဃိန့ၣ်လီၤ.တၢ်မၤဟးဂီၤသ့ၣ်ပှၢ်လ့ၤမုၢ်လ့ၤဘိသ့ၣ်တဖၣ်အဃိ,တၢ်စူၤတဘၣ်တၢ်ယီၤတသ့သ့ၣ်တဖၣ်ဟဲကဲထီၣ်သး,ပလိၣ်ဘၣ်သူသ့ၣ်,ပကူၥ်သ့ၣ်သနၥ်က့,ပမ့က့ၤသူၣ်လီၤက့ၤအီၤန့ၣ်,တၢ်ထုးကွံၥ်ဒီးတၢ်ပၥ်ဖှိၣ်ကဖိးမံလိၥ်သးဝဲအသးလီၤအဃိ,ဆူမဲၥ်ညါအနံၣ်တဆံအတီၢ်ပူၤ,တၢ်မၤဟးဂီၤသ့ၣ်ကလီၤစှၤကွံၥ်ဝဲ(၅၀)မျးကယၤအဂီၢ်မ့ၢ်ပတၢ်တိၥ်ပၥ်လၢပကမၤကဲထီၣ်အီၤလီၤ”အဂ့ၢ်စံးဝဲဒၣ်န့ၣ်လီၤ.
သ့ၣ်ထူၣ်ဝၣ်ဘိကအါထီၣ်အဂီၢ်ကီၢ်သူလ့ၤတၢ်ပၢဟီၣ်ကဝီၤအပူၤတၢ်မၤဝဲတၢ်သူၣ်သ့ၣ်အတၢ်ရဲၣ်တၢ်ကျဲၤအံၤတနံၣ်အံၤ(၂၀၂၅)နံၣ်အပူၤပှဲၤထီၣ်ဝဲ(၈)ဝီတဝီလံဒီးတၢ်သူၣ်သ့ၣ်မုၢ်နံၤတဖၣ်အပူၤသ့ၣ်ထူၣ်ဝၣ်ဘိသ့ၣ်တဖၣ်အံၤတၢ်သူၣ်လီၤတ့ၢ်ဝဲလၢ,ကၠိကရၢၢ်,သီခါဖၠၣ်ကရၢၢ်,တၢ်သွၣ်ခိၣ်,ဒူသဝီတဖျၢၣ်ဒီးတဖျၢၣ်အဘၢၣ်စၢၤကျဲတဖၣ်အပူၤဒီးသ့ၣ်ပှၢ်ပူၤတၢ်လီၢ်လီၤဟိလီၤဖျဲၣ်တဖၣ်အပူၤအဂ့ၢ်,သ့ၣ်ပှၢ်ဝဲၤကျိၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဘၣ်ဃးဒီးသ့ၣ်ပှၢ်အံၤတၢ်ကဲဘျူးအိၣ်ဝဲလၢပှၤကညီအဖီခိၣ်ဒ်လဲၣ်အဂ့ၢ်န့ၣ်,ခ့ၣ်အဲၣ်ယူၣ်လီၢ်ခၢၣ်သးသ့ၣ်ပှၢ်ဝဲၤကျိၤခိၣ်(ပဒိၣ်မါဘၣ်ထိ)စံးဝဲဒ်အံၤန့ၣ်လီၤ.
“တၢ်လၢသ့ၣ်န့ၣ်,ဒီသဒၢဝဲထံကျိထံကွၥ်တၢ်ဟးဂုၤဟးဂီၤဒီးမၤဂ့ၤထီၣ်ဝဲမူခိၣ်ကလံၤသီၣ်ဂီၤတကးဘၣ်ဟ့ၣ်ပှၤတၢ်ကဒုအမဲၥ်ညါ,မၤဂ့ၤထီၣ်ဝဲပတၢ်သူၣ်အီၣ်ဖျးအီၣ်သ့ၣ်တဖၣ်န့ၣ်လီၤ.သ့ၣ်ပှၢ်မ့လီၤဟိလီၤပျီန့ၣ်,ပတၢ်သူၣ်အီၣ်ဖျးအီၣ်တဖၣ်ကဟးဂုၤဟးဂီၤဝဲပဘုပဟုပတၢ်သူတၢ်သၣ်တဖၣ်တဂ့ၤဝဲဘၣ်.သ့ၣ်ပှၢ်မ့ဂ့ၤန့ၣ်ကဲဘျူးဝဲလၢပှၤကညီအတၢ်အိၣ်ဆိးဖံးအီၣ်မၤအီၣ်မၤအီသ့ၣ်တဖၣ်ကအိၣ်ဝဲအကလုၥ်ကလုၥ်အမၠိမၠိတုၤဒၣ်ပတဲက့ၤမးတလၢၥ်လၢၤဘၣ်”အဂ့ၢ်စံးဝဲဒၣ်န့ၣ်လီၤ.
တကီၢ်ခါခဲအံၤခီဖျိမူခိၣ်ကလံၤသီၣ်ဂီၤတၢ်ကသုၣ်ကသံးတၢ်ဆီတလဲဒိၣ်ဒိၣ်မုၢ်မုၢ်ဒီးထံလီၢ်ကီၢ်ပူၤတၢ်ဒုးတၢ်ယၤဆူၣ်ဆူၣ်ကိၤကိၤအဃိ,မၤဘၣ်ဒိဝဲသ့ၣ်ပှၢ်,ထံကျိထံကွၥ်,ဟီၣ်ခိၣ်ကပံၥ်ဒီးကမျၢၢ်တၢ်အိၣ်ဆိးလီၢ်ကျဲတဖၣ်အဂ့ၢ်,လံၥ်ထုးထီၣ်ပၥ်ဖျါအပူၤပၥ်ဖျါဝဲဒၣ်န့ၣ်လီၤ.
ဒ်န့ၣ်အသိး,မ့ၣ်အူအီၣ်လဲးတၢ်,တၢ်မၤဟးဂီၤသ့ၣ်ပှၢ်,ကဘီယူၤတၢ်ခးလီၤတၢ်ဃုၥ်ဒီးတၢ်တ့ၢ်လီၤမ့ၣ်ပိၢ်တဖၣ်အဃိ,မၤဟးဂီၤဝဲဟီၣ်ခိၣ်ကပံၥ်အမဲၥ်ဖံးခိၣ်န့ဆၢၣ်တၢ်အိၣ်ယၢၤတဖၣ်နးနးကလဲၥ်အဃိ,ဒ်သိးကဘှီဘၣ်မၤပှဲၤထီၣ်က့ၤတၢ်လၢအဟးဂုၤဟးဂီၤဒီးလီၤဟိလီၤပျီကွံၥ်သ့ၣ်တဖၣ်အံၤအဂီၢ်,ကပၣ်ဃုၥ်မၤသကိးတၢ်လၢတၢ်သူၣ်လီၤအါထီၣ်သ့ၣ်တၢ်တိၤကျဲၤပူၤအဂ့ၢ်,ဆီၣ်တခူပၥ်ဖျါဝဲလၢလံၥ်ဘိးဘၣ်ရၤလီၤအပူၤစ့ၢ်ကီးန့ၣ်လီၤ.
