လါယူၤလံ ၄ သီ, ၂၀၂၅ နံၣ်, ခ့ၣ်အဲးစံၣ်
ဂီၤလ့ၤဒုးယၤသုးကလၢၤလၢအိၣ်ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ် မၠၣ်၀တံၣ်မုၢ်ထီၣ်ကလံၤထံးအံၤ တၢ်လဲၤထီၣ်ခး၀ဲအဃိ လီၢ်က၀ီၤကမျၢၢ်လၢအိၣ်ဘူးတၢ်လီၢ်အခိၣ်အဃၢၤဖဲန့ၣ်ပှၤနီၣ်ဂံၢ်(၃၀၀၀)ဘျဲၣ်ဘၣ်ဃ့ၢ်ထီၣ်၀ဲ အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်ဒါလၢအိၣ်ဘူးဖဲန့ၣ်တဖၣ်အအိၣ်န့ၣ်လီၤ.
စးထီၣ်ဖဲလါယူၤလံ ၂ သီအနံၤန့ၣ် ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA),ကညီဒီကလုၥ်ဂၢၤသးကရၢ(KNDO) ဒီးသုးပၥ်ဖှိၣ်စးထီၣ်က၀ီၤခး၀ဲဂီၤလ့ၤဒုးယၤသုးကလၢၤအံၤအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်စံး၀ဲန့ၣ်လီၤ.
တၢ်ဒုးကဲထီၣ်အတီၢ်ပူၤခီဖျိသုးကလၢၤအံၤခးလီၤကဒါကျိဖးဒိၣ်အဃိ လီၢ်က၀ီၤကမျၢၢ်(၃၀၀၀)ဘျဲၣ်အံၤအကျါတနီၤန့ၣ် လဲၤစံၣ်ထီၣ်၀ဲလၢဂီၤလ့ၤထံကျိဒီးသူမှဲကျိကပၤအိၣ်၀ဲအသိးတနီၤန့ၣ်လဲၤဃ့ၢ်ထီၣ်၀ဲလၢထံ၀ၢ်ခီယိၤကီၢ်တကပၤအိၣ်၀ဲအါမး အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးဖဲမဟါလါယူၤလံ ၃ သီဒီးတနံၤအံၤ ၄ သီဂီၤခီအဆၢကတီၢ်စ့ၢ်ကီး ခီဖျိလၢကျိဖးဒိၣ်အံၤအဃိ ကမျၢၢ်ဘၣ်ဒိတစှၤန့ၢ် (၄)ဂၤလံအဂ့ၢ်န့ၣ် ပှၤမၤစၢၤပှၤလီၢ်က၀ီၤအိၣ်ကမှံဖိဘၣ်မူဘၣ်ဒါတဂၤ စံး၀ဲန့ၣ်လီၤ.
အ၀ဲစံး၀ဲလၢ“လၢမဟါဒီးခးတနံၤအံၤခးခးလဲးလိးလီၤ.ဖဲတဂီၤညါအံၤန့ၣ်ခီဖျိလၢပယီၤသုးကျိဖးဒိၣ်အဃိန့ၣ် ပှၤကမျၢၢ်ဘၣ်ဒိ (၃)ဂၤညါ.မ့ၢ်အပိၥ်မုၣ်ပှဲၤဂၤ,အပိၥ်ခွါပှဲၤဂၤလဲၣ်ဒု တသ့ၣ်ညါဒံးဘၣ်.ပှၤတဲလၢအဘၣ်ဒိနးနးကျံၤကျံၤလီၤ”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကီၢ်ခါခဲအံၤကမျၢၢ်လၢအဘၣ်ဒိဘၣ်ထံးသ့ၣ်တဖၣ်အံၤတၢ်ဆှၢထီၣ်ကူဆါယါဘျါအ၀ဲသ့ၣ်ဆူယိၤကီၢ်(ဖိဖြး)တၢ်ဆါဟံၣ် ဒီး ဒ်န့ၣ်အသိး ခဲအံၤခီဖျိတၢ်ဒုးဆူၣ်ထီၣ်လၢခံခီခံကပၤအဘၢၣ်စၢၤအဃိ လၢတၢ်ဘံၣ်တၢ်ဘၢအဂီၢ်ကၠီၣ်တဲၣ်သုးဆီလီၤ၀ဲ အသုး ဂံၢ်ဘါအါမးလၢကီၢ်ဆၢဒီတကျိၤအဂ့ၢ်န့ၣ် မဲၢ်ဆီးကၠီၣ်တဲၣ်တၢ်ကစီၣ်ပၥ်ဖျါထီၣ်၀ဲဖဲတနံၤန့ၣ်လီၤ.
ဂီၤလ့ၤသုးကလၢၤအံၤအိၣ်ဘူး၀ဲဒီးအူကြ့ၣ်ထၣ်သုးကလၢၤထဲဒၣ်(၉)တၢၣ်လီၤဒီး ဒ်န့ၣ်အသိးဂီၤလ့ၤသုးကလၢၤအမဲၥ်ညါ အူကြ့ၣ်ထၣ်သုးကလီၤအံၤစ့ၢ်ကီး တၢ်စးထီၣ်က၀ီၤခးခးစဲးပြဲး၀ဲဒီးဒြိသ့ၣ်တဖၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါ ၀ဲန့ၣ်လီၤ.
ကီးတရံးကီၢ်ဆၣ် တီနီၢ်မုၢ်ထီၣ်ဟီၣ်က၀ီၤ ကီၢ်ကၠီၣ်တဲၣ်-ကီၢ်ပယီၤဆၢဒီတကျိၤန့ၣ် စးထီၣ်ဖဲလါမ့ၤ ၂၀ ဘျဲၣ်တုၤလၢလါယူၤန့ၣ် ဟီၣ်က၀ီၤတၢ်ပၢၢ်ဆၢသုးပၥ်ဖှိၣ်ကရူၢ်ထီၣ်န့ၢ်၀ဲ ဘျၢၣ်ဒိၣ်,သ့ၣ်ဘီဘိ,ကနဲလ့,မီခံ,ထိကၠိ,ထံကပျၢၤသုးကလၢၤသ့ၣ်တဖၣ်ဒီး လီၢ်ခံကတၢၢ်ဟီၣ်က၀ီၤပူၤဖဲန့ၣ်သုးကလၢၤအိၣ်တ့ၢ်က့ၤထဲအူကြ့ၣ်ထၣ်ဒီးဂီၤလ့ၤဒုးယၤသုးကလၢၤလၢတၢ်ထီၣ်၀ဲအဖၢမုၢ်ခံ ဖျၢၣ်အံၤန့ၣ်လီၤ.