လါအီးကထိဘၢၣ် ၃ သီ, ၂၀၂၅ နံၣ်, ခ့ၣ်အဲးစံၣ်
ဖဲမဟါလါအီးကထိဘၢၣ် ၂ သီအနံၤန့ၣ် လၢကီၢ်ကၠီၣ်တဲၣ် ဝ့ၢ်မဲၢ်ဆီးဟီၣ်ကဝီၤအပူၤ တၢ်စုကဝဲၤလၢတၢ်ကဆှၢဝဲဆူကီၢ်ပယီၤအံၤ တဖၣ်တၢ်ဖီၣ်န့ၢ်ကဒီးဝဲလၢသိလ့ၣ်တခိၣ်အပူၤအဂ့ၢ်န့ၣ် သ့ၣ်ညါဘၣ်လၢကၠီၣ်တဲၣ်တၢ်ကစီၣ်ထုးထီၣ်ပၥ်ဖျါဝဲအသိးန့ၣ်လီၤ.
ဖဲမဟါဟါခီအဆၢကတီၢ်န့ၣ် တချုးတၢ်နုၥ်လီၤမဲၢ်ဆီးဝ့ၢ် တး-မဲၢ်ဆီးကျဲ ဟွ့ၣ်ယးအူး တၢ်သမံသမိးတြဲၤလီၢ်န့ၣ် ဖဲကၠီၣ်တဲၣ်သုး အိၣ်ခိး သမံသမိးတၢ်အခါထံၣ်န့ၢ်ဝဲတၢ်စုကဝဲၤကျိချံပှၥ်သၣ်သ့ၣ်တဖၣ်အါအါဂီၢ်ဂီၢ်လၢသိလ့ၣ်လီၢ်ခံဟုသးထၢၣ်(၉)ဖျၢၣ် အပူၤအံၤလၢ ကၠီၣ်တဲၣ်ထံဖိကီၢ်ဖိပိၥ်ခွါ(၂)ဂၤ အသိလ့ၣ်တခိၣ်ပူၤန့ၣ်လီၤ.
ဒ်ကၠီၣ်တဲၣ်တၢ်ကစီၣ်ပူၤပၥ်ဖျါဝဲအသိးန့ၣ် တၢ်စုကဝဲၤကျိချံပှၥ်သၣ်လၢတၢ်ဖီၣ်န့ၢ်ဝဲသ့ၣ်တဖၣ်န့ၣ်မ့ၢ်ဝဲ (၈၁ မမ)အချံ ၄၀ ဖျၢၣ်, (RPG)အချံ ၂၅ ဖျၢၣ်, (၅.၅၆ မမ)အချံအဖျၢၣ်(၁၀၀၀)ဘျဲၣ်ဒီး တၢ်စုကဝဲၤကျိချံပှၥ်သၣ်သ့ၣ်တဖၣ်အံၤတၢ်သ့ၣ်ညါဘၣ်ဝဲလၢ တၢ်ကဆှၢလီၤဝဲဆူကီၢ်ပယီၤတကပၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
တၢ်စုကဝဲၤသ့ၣ်တဖၣ်အံၤခီဖျိတၢ်ထံၣ်န့ၢ်ဝဲလၢကၠီၣ်တဲၣ်ထံဖိကီၢ်ဖိ(၂)ဂၤအံၤအသိလ့ၣ်ပူၤအဃိ ဒ်တၢ်သိၣ်တၢ်သီအိၣ်အသိး တၢ်ဖီၣ်က့ၤကိးဝဲဒၣ်ဆူမဲၢ်ဆီးပၢၤကီၢ်ဝဲၤလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ကီၢ်ပယီၤပူၤ ၂၀၂၁ သုးဟံန့ၢ်တၢ်စိတၢ်ကမီၤဝံၤလီၢ်ခံ တၢ်ဒုးတၢ်ယၤအိၣ်ထီၣ်ဝဲလၢတၢ်ပၢၢ်ဆၢကရူၢ်ကရၢတဖၣ် ဒီးပယီၤသုး အဘၢၣ်စၢၤဒီး စးထီၣ်ဖဲန့ၣ်ကီၢ်ကၠီၣ်တဲၣ် မဲၢ်ဆီးဝ့ၢ်လၢအိၣ်တခီတဝၢ်ဝၢ်ဒီးကီၢ်ပယီၤမၠၣ်ဝတံၣ်ဝ့ၢ်အံၤ တၢ်ဖီၣ်န့ၢ်ဝဲကျိချံပှၥ်သၣ် ကဲထီၣ်ဝဲတလီၢ်လီၢ်န့ၣ်လီၤ.
တကးဒံးဘၣ်မဲၢ်ဆီးဟီၣ်ကဝီၤအမဲၥ်ညါ ကီၢ်ကၠီၣ်တဲၣ်-ကီၢ်ပယီၤထံဆၢကီၢ်ဆၢတၢ်လီၢ်လၢအဂၤသ့ၣ်တဖၣ်စ့ၢ်ကီး ကျိချံပှၥ်သၣ်လၢတၢ်ကဆှၢဝဲဆူကီၢ်ပယီၤပူၤအံၤတဖၣ် ကၠီၣ်တဲၣ်သုး,ပၢၤကီၢ်ပှၤဘၣ်မူဘၣ်ဒါဖီၣ်ချုးန့ၢ်ဝဲတလီၢ်လီၢ်န့ၣ်လီၤ.
ဒ်န့ၣ်အသိးလၢတၢ်စိၥ်တီဆှၢဝဲတၢ်စုကဝဲၤကျိချံပှၥ်သၣ်သ့ၣ်တဖၣ်အံၤအကျါန့ၣ် ကီၢ်ပယီၤထံဖိကီၢ်ဖိအမဲၥ်ညါ ကၠီၣ်တဲၣ်ထံဖိ ကီၢ်ဖိအနီၢ်ကစၢ်စ့ၢ်ကီး ပၣ်ဃုၥ်ပၣ်ဂီၢ်ဝဲလၢတၢ်ဖံးတၢ်မၤအံၤအပူၤအိၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
