လါအီးကထိဘၢၣ် ၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,ဘျံးဒဝဲၢ်ကီၢ်ရ့ၣ်(သုးက့-၄)ဟီၣ်ကဝီၤအပူၤဖဲမဟါလါစဲးပထ့ဘၢၣ်(၃၀)သီအ နံၤန့ၣ်ပယီၤသုးမီၤစိရိၤသုးကျိၤသုးပၥ်ဖှိၣ်သ့ၣ်တဖၣ်နုၥ်လီၤဒွဲၣ်အူအီၣ်တၢ်ခံဘျီတဘျီကဒီးဖဲကစၢၢ်ဒိၣ်ကီၢ်ဆၣ်,(စီဃ့တိၢ်ပြိး)ဟီၣ်ကဝီၤအပူၤကမျၢၢ်ဟံၣ်အဖျၢၣ်(၇၀)ဘျဲၣ်အဂ့ၢ်ဘျံးဒဝဲၢ်ကီၢ်ရ့ၣ်ထုးထီၣ်ပၥ်ဖျါဝဲဖဲမဟါအနံၤန့ၣ်လီၤ.
ဘၣ်ထွဲဒီးတၢ်ကဲထီၣ်အသးအံၤဖဲလါစဲးပထ့ဘၢၣ်(၃၀)သီ,ဂီၤခီ(၇)နၣ်ရံၣ်အဆၢကတီၢ်န့ၣ်ပယီၤသုးခီၣ်သုးရ့ၣ်လၢအိၣ် (သယဲးခၠီ)ဝ့ၢ်လၢအမ့ၢ် ခလရ-၄၀၃, ၄၀၄, ၄၀၅ သ့ၣ်တဖၣ်ပၥ်ဖှိၣ်ထီၣ်အသးမၤဝဲသုးကျိၤတၢ်ထီၣ်ဒုးဆူ(စီဃ့တိၢ်ပြိး) ဟီၣ်ကဝီၤပူၤအ ဆၢကတီၢ်တၢ်ဒုးကဲထီၣ်ဒီး KNLA သုးက့နီၣ်ဂံၢ်-၄, သုးရ့ၣ်-၁၂ တၢ်ပၢၢ်ဆၢသုးပၥ်ဖှိၣ်အဘၢၣ်စၢၤအ ဂ့ၢ်ကီၢ်ရ့ၣ်တၢ်ပၥ် ဖျါပူၤအသိးသ့ၣ်ညါဘၣ်န့ၣ်လီၤ.
လၢတၢ်န့ၣ်အဃိပယီၤသုးကျိၤအံၤတၢ်ဒုးကဲထီၣ်ဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးရ့ၣ်-၁၂ အဘၢၣ်စၢၤဝံၤအ လီၢ်ခံ,နုၥ်လီၤဒွဲၣ်အူအီၣ်ကွံၥ်ဝဲ(စီဃ့တိၢ်ပြိး)ဟီၣ်ကဝီၤ,(ကၠီၣ်လ့ၤကါ)သဝီပူၤပှၤသဝီဖိဟံၣ်(၇၃)ဖျၢၣ်ဒ်အံၤလီၤအဂ့ၢ်သ့ၣ်ညါဘၣ်အသိး, (ကၠီၣ်လ့ၤကါ)သဝီအံၤတမ့ၢ်ဝဲဟီၣ်ကဝီၤလၢတၢ်ဒုးတၢ်ယၤကဲထီၣ်အလီၢ်ဘၣ်အဂ့ၢ်ပၥ်ဖျါစ့ၢ်ကီး ဝဲန့ၣ်လီၤ.
ကစၢၢ်ဒိၣ်ကီၢ်ဆၣ်အပှၤဘၣ်မူဘၣ်ဒါတဂၤစံးဝဲလၢ “တၢ်ကဲထီၣ်သးန့ၣ်မ့ၢ်လၢပယီၤသုးကျိၤဟဲထီၣ်ဝဲဒၣ်ဖဲန့ၣ်အဃိန့ၣ် လီၤ. တဘျီဃီတၢ်ဒုးကဲထီၣ်ဝဲလီၤ. တၢ်ဒုးကဲထီၣ်ဝံၤအလီၢ်ခံပယီၤသုးကျိၤန့ၣ်စးထီၣ်နုၥ်လီၤဒွဲၣ်အူကမျၢၢ်ဒ်န့ၣ်လီၤ. ကမျၢၢ်သ့ၣ်တဖၣ်ခီဒုလၢတၢ်ဒုးကဲထီၣ်သးအခါန့ၣ်ဃ့ၢ်ပဒ့ၢ်ပၥ်အသးလံမီၤနီၤ.” အဂ့ၢ်စံးဘၣ်ခ့ၣ်အဲးစံၣ်-ကညီတၢ်က စီၣ်န့ၣ်လီၤ.
လၢန့ၣ်အမဲၥ်ညါ(စီဃ့တိၢ်ပြိး)ဟီၣ်ကဝီၤအပူၤအံၤပယီၤသုးကျိၤနုၥ်လီၤဒွဲၣ်အူအီၣ်ဒံးတၢ်အခီၣ်ထံးတၢတဘျီကဲထီၣ်အသးဖဲလါစဲးပထ့ဘၢၣ်(၈)သီအနံၤဒီးနုၥ်လီၤဒွဲၣ်အူအီၣ်ကွံၥ်ဝဲဒၣ်(ယၥ်တီၢ်)သဝီဖိအဟံၣ်(၂၈)ဖျၢၣ်,တကတီၢ်ဃီနုၥ်လီၤဒွဲၣ်အူအီၣ်ကွံၥ်ကဒီးဝဲ(သ့ကၠိ)သဝီဖိအဟံၣ်(၈)ဖျၢၣ်, ခဲလၢၥ်(၃၆)ဖျၢၣ်အဂ့ၢ်ဘျံးဒဝဲၢ်ကီၢ်ရ့ၣ်ထုးထီၣ်ပၥ်ဖျါဒံးဝဲန့ၣ် လီၤ.
ဒ်န့ၣ်အသိးမ့ၢ်ကွၢ်ကဒါက့ၤဝဲခ့ၣ်အဲၣ်ယူၣ်-ကီၢ်သူလ့ၤတၢ်ပၢဟီၣ်ကဝီၤဒီတဘ့ၣ်အပူၤစးထီၣ်တနံၣ်အံၤ(၂၀၂၅)နံၣ်, လါ ယနူၤအါရံၤ(၁)သီတုၤလါအီကူး(၃၁)သီလၢ(၈)လါအတီၢ်ပူၤအံၤပယီၤသုးမီၤစိရိၤဒွဲၣ်အူအီၣ်,မၤဟးဂီၤကွံၥ်ဝဲကမျၢၢ်ဟံၣ်အိၣ်ဝဲ(၁၃၇)ဖျၢၣ်ဒီးမ့ၢ်ပၣ်ဃုၥ်ဒီးပယီၤသုးကျိဖးဒိၣ်,ဒြိ,ကဘီယူၤခဲလၢၥ်န့ၣ်ကမျၢၢ်ဟံၣ်ဘၣ်ဟးကွံၥ်ဝဲအဖျၢၣ်(၆၀၀)ဘျဲၣ်အဂ့ၢ်သ့ၣ်ညါဘၣ်ဒ်ခ့ၣ်အဲၣ်ယူၣ်-လီၢ်ခၢၣ်သးတၢ်ပၥ်ဖျါပူၤအသိးန့ၣ်လီၤ.