လါနိၣ်ဝ့ဘၢၣ် ၁၂သီ, ၂၀၂၅နံၣ်, ခ့ၣ်အဲးစံၣ်.
ကီၢ်ကၠီၣ်တဲၣ်-ကီၢ်ပယီၤ ကီၢ်ဆၢ ကညီကီၢ်စဲၣ် ရၤမတံဝ့ၢ်ကလံၤစိး ပှၤလၢအသူၣ်ထီၣ် စွ့ၣ်ကိၣ်ကိၤကၠါဖၠၣ်ဝ့ၢ်သီ ဒီးမ့ၢ်စ့ၢ်ကီးဝဲ ပှၤတဂၤလၢသုးခိၣ် ခၠံၣ်သူၣ်ပၥ်ဒိၣ်ပၥ်ကဲ လၢအမ့ၢ် ရှံကၠ့ၤကၠါအံၤန့ၣ် ဖဲတနံၤအံၤလါနိၣ်ဝ့ဘၢၣ်(၁၂)သီအနံၤအံၤ န့ၣ်ကီၢ်ကၠီၣ်တဲၣ် ကဟ့ၣ်လီၤက့ၤအီၤဆူတရူးအစုပူၤအဂ့ၢ် ကၠီၢ်တဲၣ် တၢ်ကစီၣ်သန့The Reportersပၥ်ဖျါဝဲဖဲတနံၤန့ၣ်လီၤ.
ဖဲအပူၤကွံၥ်လါနိၣ်ဝ့ဘၢၣ်(၁၀)သီအဆၢကတီၢ်န့ၣ်ကီၢ်ကၠီၣ်တဲၣ်ကွီၢ်ဘျီၣ်ဆၢတဲၥ်ဝဲလၢ ကၠါဖၠၣ်အခိၣ် ရှံကၠ့ၤကၠါအံၤ လၢအသီ(၉၀)တီၢ်ပူၤ ကဟ့ၣ်လီၤက့ၤဝဲဒၣ်ဆူ တရူးစုပူၤအဂ့ၢ် ကၠီၣ်တဲၣ်တၢ်ကစီၣ်သန့တနီၤပၥ်ဖျါအိၣ်ဝဲဒီးဖဲတနံၤ မုၢ်ဃ့ၢ်လီၤ (၄)နၣ်ရံၣ် အမံး(၂၀)အဆၢကတီၢ်န့ၣ် တၢ်ဟ့ၣ်လီၤက့ၤဆူတရူးအစုပူၤအဂီၢ် တၢ်အိၣ်ကတဲၥ်ကတီၤထီၣ်သးလံအဂ့ၢ် The Reporters တၢ်ကစီၣ်ပၥ်ဖျါဝဲဒၣ်န့ၣ်လီၤ.
ရှံကၠ့ၤကၠါအံၤန့ၣ် မ့ၢ်ဝဲဒၣ် ပှၤသူၣ်ထီၣ်စွ့ၣ်ကိၣ်ကိၤကၠါဖၠၣ်ဝ့ၢ်သီ အခိၣ်,ရမၤတံဟီၣ်ကဝီၤပူၤ ခၣ်စံၣ်နိၣ်ဒီးonlineတၢ်ဖံးတၢ်မၤအဂီၢ်အ ဝဲမ့ၢ်ပှၤအရ့ဒိၣ်တဂၤလၢဘျၢလီၤကျိၣ်စ့ဒီးမ့ၢ်စ့ၢ်ကီးဝဲ Yatai International Holding Group (Yatai IHG) အပှၤပၢၤလီၢ်ဆ့ၣ်နီၤတဂၤန့ၣ်လီၤ.
ရှံကၠ့ၤကၠါအံၤန့ၣ် လၢတၢ်လံၣ်အီၣ်လီအီၣ်ကျိၣ်စ့လၢ(online)ပူၤအဂီၢ် အိးထီၣ်ဝဲဒၣ် Website (၂၃၉)ခါဒီး လံၣ်အီၣ်ဝဲဒၣ်ကျိၣ်စ့ လၢရူးစ့ယွၤမ်(၂၇၇၅)ဘံလံၣ်ယၢၣ်ဒီးပညိၣ်လံၣ်အီၣ်ဝဲပှၤအါတက့ၢ်န့ၣ်မ့ၢ်ဝဲပှၤတရူးဖိအဃိ ရှံကၠ့ၤကၠါန့ၣ် မ့ၢ်ပှၤတဂၤလၢတရူးကီၢ်လိၣ်ဘၣ်တဂၤန့ၣ်လီၤ.
လၢန့ၣ်အမဲၥ်ညါရှံကၠ့ၤကၠါအံၤန့ၣ် မ့ၢ်ဝဲပှၤတရူးဖိ တဂၤလၢ ဖီၣ်ဝဲခၣ်ဘီဒံယါထံဖိကီၢ်ဖိခိၣ်အဂီၤဒီး မ့ၢ်ပှၤတဂၤလၢဟးသူၣ်ထီၣ်ဝဲဒၣ် တၢ်လံၣ်အီၣ်လီအီၣ်ကျိၣ်စ့လၢ onlineဒီးတၢ်တၢ်ကျိၣ်တၤစ့အလီၢ်သ့ၣ်တဖၣ် လၢ ကီၢ်ခၣ်ဘီဒံယါဒီး ကီၢ်ပယီၤပူၤသ့ၣ်တဖၣ်သ့ၣ်တဖၣ်န့ၣ်လီၤ.
ခီဖျိတရူးပဒိၣ်အတၢ်ဃ့ထီၣ်တဆီအဃိ ရှံကၠ့ၤကၠါအံၤ ကီၢ်ကၠီၣ်တဲၣ်ဖီၣ်န့ၢ်အီၤလၢဝ့ၢ်ဘီကီးပူၤ ဖဲအပူၤကွံၥ် ၂၀၂၂နံၣ်လါအီကူးအဆၢကတီၢ်ဒီးတနံၣ်ဃီ အတီၢ်ပူၤဖဲလါနိၣ်ဝ့ဘၢၣ်န့ၣ် တရူးကီၢ်ဃ့က့ၤဝဲဒၣ်ဒ်သိးကၠီၣ်တဲၣ်ကဟ့ၣ်က့ၤအဝဲသ့ၣ်အဂီၢ်န့ၣ်လီၤ.
ကညီကီၢ်စဲၣ် သုးခိးကီၢ်ဆၢ BGF လၢအမၤသကိးတၢ်ဒီးသုးကရူၢ်ခဲအံၤ အနဲၣ်ရွဲၣ်သုးခိၣ်ခၠံၣ်သူၣ်အနီၢ်ကစၢ်ဒၣ်ဝဲတီခိၣ်ရိၣ်မဲဝဲဒီးဒ်သိး ရှံကၠ့ၤကၠါအံၤကဟးထီၣ်ဘၣ်လၢ တၢ်ဒုးဃၥ်ပူၤအဂီၢ်ဖဲအပူၤကွံၥ်၂၀၂၄နံၣ်လါအီးကူးအဆၢကတီၢ်န့ၣ်မၤဝဲတၢ်ထုကဖၣ်တၢ်ရဲၣ်တၢ်ကျဲၤတခါဒီးပှၤကညီလၢကယၤဟဲထီၣ်ဝဲအိၣ်န့ၣ်လီၤ.
