လါယနူၤအါရံၤ ၂၆ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃) မူကီၢ်ဆၣ်ဒီးလၢၢ်ဒိၣ်ကီၢ်ဆၣ်(၂)ဘ့ၣ်အံၤအပူၤ စးထီၣ်လၢလါယနူၤအါရံၤ ၂၀ တုၤ ၂၄ သီ လၢ(၅)သီအတီၢ်ပူၤ ခီဖျိလၢကဘီယူၤဒီးကျိဖးဒိၣ်အံၤအဃိ ကမျၢၢ်သံဝဲ(၃)ဂၤ, ဘၣ်ဒိဝဲ(၇)ဂၤအဂ့ၢ်န့ၣ် ကီၢ်ရ့ၣ်တၢ်ကစီၣ် ထုးထီၣ်ပၥ်ဖျါဝဲအသိး သ့ၣ်ညါဘၣ်န့ၣ်လီၤ.
မူကီၢ်ဆၣ်ပူၤ ဖဲအပူၤကွံၥ်လါယနူၤအါရံၤ ၂၃ သီ ဟါခီ ၁း၃၀ နၣ်ရံၣ်ဘျဲၣ်အဆၢကတီၢ် ပယီၤသုးလၢအိၣ်သၤဘိၤ(သံဘို) သုးရ့ၣ်အံၤတဖၣ် ခးလီၤဝဲ(၆၀ မမ)ကျိဖးဒိၣ် ၆ ဖျၢၣ်ဆူ မၤနံၤကွ့(မာနီကွင်း)တၢ်လီၢ်အဃိ ဘၣ်ဒိဝဲနိၣ်တီတၤသဝီဖိ နီၢ်ဖါတြီထံး (၂၅)နံၣ်အံၤန့ၣ်လီၤ.
တကးဒံးဘၣ်တၢ်ကဲထီၣ်သးဝံၤမုၢ်ဆ့ၣ်ထီၣ် ၂၄ သီ မုၢ်ဘူးကထူၣ် ၁၁း၃၀ ဃၣ်ဃၣ်အဆၢကတီၢ် သုးမီၤစိရိၤကဘီယူၤ(Jet Fighter)တဘ့ၣ်လၢအိၣ်တီအူကဘီယူၤပျီအံၤ လဲၤတ့ၢ်လီၤဝဲမ့ၣ်ပိၢ်(၄)ဖျၢၣ်လၢ ယ့ၤလဲ(ရေလဲ)မုၢ်နုၥ်သဝီတကပၤအဃိ ဘၣ်ဒိဝဲ သဝီဖိပိၥ်မုၣ်(၂၇)နံၣ်တဂၤဒီးပိၥ်ခွါ(၅၅)နံၣ်,(၇၅)နံၣ် ၃ ဂၤအံၤအသိး ဟံၣ်စ့ၢ်ကီးဟးဂီၤဝဲ(၃)ဖျၢၣ် အဂ့ၢ်န့ၣ် စံးဝဲန့ၣ်လီၤ.
ဒ်န့ၣ်အသိးတချုးတၢ်ကဲထီၣ်သးအံၤဒံးဘၣ်အပူၤကွံၥ်လါယနူၤအါရံၤ ၂၀ သီ ဒီး ၂၁ သီအနံၤန့ၣ်စ့ၢ်ကီး ခီဖျိလၢဒြိဒီး ကဘီယူၤအံၤ အဃိ ကၣ်ကၠံစ့ၣ်(ကပ်ကြီးဆိပ်),နၣ်လီကၠံ(နတ်လောင်းကြီး)ကမျၢၢ်သံဝဲ(၃)ဂၤ ဒီး ဘၣ်ဒိ(၂)ဂၤအကျါပၣ်ဃုၥ်ဝဲဖိသၣ်ပိခွါ(၁၃)နံၣ် တဂၤ အဂ့ၢ်န့ၣ် ကီၢ်ရ့ၣ်တၢ်ကစီၣ်အပူၤ ပၥ်ဖျါဝဲ န့ၣ်လီၤ.
လၢန့ၣ်အမဲၥ်ညါ လၢၢ်ဒိၣ်ကီၢ်ဆၣ်အပူၤ ဖဲလါယနူၤအါရံၤ ၂၁ သီ မုၢ်ဃ့ၢ်လီၤ ၁း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ်စ့ၢ်ကီး ပယီၤသုးလၢအိၣ်ပဲနွဲၤကိ(ပဲနွယ်ကုန်း)တဖၣ်ခးလီၤဝဲ(၁၂၀ မမ)ကျိဖးဒိၣ် ၂ ဖျၢၣ်လီၤတဲၥ်ပိၢ်ဖးထီၣ်ဝဲလၢ စယၣ်ခ့ၤ(ဇရပ်ခင်)သဝီ ပူၤအဃိ ဘၣ်ဒိဝဲကမျၢၢ်ပိၥ်မုၣ်(၃၅)နံၣ်တဂၤဒံးန့ၣ်လီၤ.
ဒ်ကီၢ်ရ့ၣ်တၢ်မၤနီၣ်စရီပူၤအိၣ်ဝဲအသိးန့ၣ် ချၢၣ်လွံၢ်ထူၣ်ကီၢ်ရ့ၣ်ပူၤ စးထီၣ်ဖဲတလါအံၤလါယနူၤအါရံၤ ၆ သီတုၤလၢ ၂၄ သီအံၤ ခီဖျိလၢသုးမီၤစိရိၤအကဘီယူၤ,ကျိဖးဒိၣ်ဒီးဒြိ,ဟီၣ်လၥ်မ့ၣ်ပိၢ်အံၤအဃိ လီၢ်ကဝီၤကမျၢၢ်သံပၥ်ဖှိၣ်ခဲလၢၥ်အိၣ်ဝဲ(၁၁)ဂၤ, ဘၣ်ဒိ (၁၂)ဂၤလံအသိး ဟံၣ်ဟးဂီၤစ့ၢ်ကီးဝဲ(၄)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
