လါယနူၤအါရံၤ ၂၆ သီ, ၂၀၂၆ နံၣ်, ခ့ၣ်အဲးစံၣ်
ဖဲလါယနူၤအါရံၤ ၂၃ သီအနံၤန့ၣ် ပယီၤသုး ၅ ဂၤ ဟဲက့ၤဟ့ၣ်လီၤကဒီးသးဆူ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒဝဲၢ်ကီၢ်ရ့ၣ်(သုးက့ ၄) ကညီဒီကလုၥ်တၢ်ထူၣ်ဖျဲးသုမုၢ်ဒိၣ်(KNLA) သုးရ့ၣ်(၁၀)အအိၣ် အဂ့ၢ်န့ၣ် ကီၢ်ရ့ၣ်တၢ်ကစီၣ် ထုးထီၣ်ပၥ်ဖျါဝဲဖဲမဟါအနံၤန့ၣ်လီၤ.
ပယီၤသုး(၅)ဂၤလၢအဟဲက့ၤဟ့ၣ်လီၤသးဆူသုးရ့ၣ်-၁၀ အအိၣ်အံၤ မ့ၢ်ဝဲဒၣ်လၢခီၣ်သုးရ့ၣ်(ခလရ-၄၀၆)သုးရ့ၣ်အပှၤဒီး အဝဲသ့ၣ် ဟဲက့ၤဘျီဝဲအံၤဟဲက့ၤစိၥ်ဃုၥ်ဝဲ ကျိ(၆)ခိၣ်လၢအမ့ၢ် (MA-1)၃ ခိၣ်, (MA-2) ၁ ခိၣ်, (MA-3) ၁ ခိၣ်, (BA-100)၁ ခိၣ် ဃုၥ်ဒီးကျိချံကျိသၣ်သုးတၢ်ပီးတၢ်လီလၢအဂၤတနီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
(သုးက့ ၄)ဟီၣ်ကဝီၤအပူၤ ပယီၤသုးသီလၢအဘၣ်တၢ်ထၢန့ၢ်ဆူၣ်သုးတဖၣ် လီၢ်ခံအံၤဟဲက့ၤပၥ်ဖှိၣ်မၤသကိးတၢ်ဒီးဟီၣ်ကဝီၤ တၢ်ပၢၢ်ဆၢသုးကရူၢ်အိၣ်ဝဲတလီၢ်လီၢ်အသိး ဖဲအပူၤကွံၥ်လါယနူၤအရံၤ ၁၀ သီ, ၁၁ သီအနံၤစ့ၢ်ကီးပယီၤသုးခီၣ်သုးရ့ၣ်(ခမရ-၂၆၅) သုးဖိ ၂ ဂၤ,(စအရ-၉၁၈)သုးရ့ၣ်အသုးဖိ ၁ ဂၤ ပၥ်ဖှိၣ်(၃)ဂၤ စိၥ်ဃုၥ်စုကဝဲၤဟဲဟ့ၣ်လီၤဒံးအသးဆူ(KNLA) သုးရ့ၣ်-၁၁ အစု ပူၤ ဒံးန့ၣ်လီၤ.
လၢတၢ်န့ၣ်အဃိလၢတၢ်ဂ့ၢ်အကလုၥ်ကလုၥ်အဖီခိၣ် ပယီၤသုးဖိသီလၢအဘၣ်တၢ်မၢဆူၣ်ကဲသုးတဖၣ်အံၤ ကဟဲက့ၤဟ့ၣ်လီၤဘၣ် အသးဆူ တၢ်ပၢၢ်ဆၢကရူၢ်ကရၢလၢအိၣ်ဘူးဒီးအဝဲသ့ၣ်တဖၣ်အဂ့ၢ်န့ၣ် ခ့ၣ်အဲၣ်ယူၣ် ဘိးဘၣ်သ့ၣ်ညါစ့ၢ်ကီးဝဲလၢလံၥ်တၢ်ပၥ်ဖျါ အပူၤ န့ၣ် လီၤ.
ကီၢ်ပယီၤပူၤသုးဟံန့ၢ်တၢ်စိတၢ်ကမီၤဝံၤ ဖဲ(၂၀၂၄)နံၣ်ထီၣ်အခါန့ၣ် သုးမီၤစိရိၤဘိးဘၣ်ရၤလီၤလၢတၢ်ကဘၣ်ကဲသုးတၢ်သိၣ် တၢ်သီ တၢ်ဘျၢ ဝံၤလီၢ်ခံန့ၣ် သူၣ်ဘီၣ်သးစၢ်လၢပယီၤသုးဖီၣ်န့ၢ်ဝဲတဖၣ်အါဒၣ်တက့ၢ် တၢ်မၢအထီၣ်ဂံၢ်ခီၣ်ထံးသုးတၢ်မၤလိလၢ ဒီး ဖဲန့ၣ်ဝံၤတၢ်ဆှၢထီၣ်ဝဲဆူတၢ်မဲၥ်ညါသုးကလၢၤတၢ်ဒုးပျီပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်ဂံၢ်ခီၣ်ထံးတၢ်ကရၢကရိဒီးဒီကလုၥ်ဃူဖိး(NUG)ပဒိၣ်အတၢ်မၤနီၣ်မၤဃါပူၤအသိးန့ၣ် သုးဟံန့ၢ်ထံကီၢ်တၢ်စိတၢ်ကမီၤလၢ (၅)နံၣ်ဃၣ်ဃၣ်အတီၢ်ပူၤအံၤ သုးမီၤစိရိၤစုတီၤဖီလၥ်ဘၣ်ထွဲပှၤမၤတၢ်ဖိတဖၣ် ဟဲက့ၤပၥ်ဖှိၣ်မၤသကိးတၢ်ဒီးကလုၥ်ဒူၣ် တၢ်ပၢၢ်ဆၢကရူၢ်ကရၢအအိၣ်ပၥ်ဖှိၣ်အိၣ်ဝဲခဲလၢၥ်(၁၄၀၀၀)တုၤ(၁၅၀၀၀)ဃၣ်ဃၣ်လံ ဒီး ဖဲန့ၣ်အကျါပၣ်ဃုၥ်ဝဲပယီၤသုးဖိ (၄၀၀၀)ဘျဲၣ်ဒီးပၢၤကီၢ်သုး (၁၀၀၀၀)ဘျဲၣ် အဂ့ၢ်န့ၣ် စံးဝဲန့ၣ်လီၤ.
