လါယနူၤအါရံၤ ၃၁ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ပၢဟီၣ်ကဝီၤအပူၤ လၢ(၂၀၂၅)တနံၣ်အတီၢ်ပူၤန့ၣ် တၢ်ထီၣ်န့ၢ်ဝဲ ပယီၤသုးကလၢၤ (၁၇) ဖျၢၣ် ဒီး ပယီၤသုးတကပၤသံဝဲ(၁၉၀၀)ဘျဲၣ်အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပၥ်ဖျါဝဲ ဖဲမဟါလါယနူၤအါရံၤ ၃၀ သီ အံၤန့ၣ်လီၤ.
ခ့ၣ်အဲၣ်ယူၣ် ကီၢ်ရ့ၣ်/သုးက့ (၇)ဘ့ၣ်ဟီၣ်ကဝီၤအပူၤ စးထီၣ်လၢ(၂၀၂၅)လါယနူၤအါရံၤတုၤလါဒံၣ်စ့ဘၢၣ်လၢၥ်န့ၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA),ကညီဒီကလုၥ်ဂၢၤသးကရၢ(KNDO)ဒီးသိၣ်မှံၤတၢ်ပၢၢ်ဆၢသုးပၥ်ဖှိၣ် ကရူၢ်ထီၣ် မၤန့ၢ်ဝဲ ပယီၤသုးကလၢၤ(၁၇)ဖျၢၣ်အံၤန့ၣ်လီၤ.
ဒီးလၢဒီတနံၣ်အတီၢ်ပူၤန့ၣ် တၢ်ပၢၢ်ဆၢသုးပၥ်ဖှိၣ်ကရူၢ်ဒီးပယီၤသုးအဘၢၣ်စၢၤ တၢ်ဒုးကဲထီၣ်ဝဲခဲလၢၥ်(၂၃၀၅)ဘျီဒီးဖဲန့ၣ် ပယီၤသုးတကပၤသံဝဲ(၁၉၇၄)ဂၤ,ဘၣ်ဒိဘၣ်ထံးဝဲ(၁၆၅၅)ဂၤ န့ၣ်လီၤ. ဒီးလၢပယီၤသုးသံတဖၣ်အံၤအကျါပၣ်ဃုၥ်ဝဲ သုးရ့ၣ်ခိၣ်(၂)ဂၤ, သုးရ့ၣ်ခိၣ်-၂ (၂)ဂၤ, G-3(၁)ဂၤ, ဒီး သုးဒ့ခိၣ်(၃)ဂၤအသိး ပှၤဘၣ်ဒိဘၣ်ထံးအကျါပၣ်ဃုၥ်ဝဲ သုးရ့ၣ်ခိၣ်(၂)ဂၤအဂ့ၢ်န့ၣ် ခ့ၣ်အဲၣ်ယူၣ် လံၥ်တၢ်ပၥ်ဖျါအပူၤစံးဝဲန့ၣ်လီၤ.
တကးဒံးဘၣ်လၢတၢ်ဒုးတၢ်ယၤအပူၤတၢ်ပၢၢ်ဆၢသုးပၥ်ဖှိၣ်ကရူၢ်မၤဟးဂီၤဝဲ သုးမီၤစိရိၤအသုးသိလ့ၣ်(၄၂)ခိၣ်ဒီး ပယီၤသုးဖိသီလၢ ဘၣ်တၢ်ထၢန့ၢ်ဆူၣ်သုးအံၤတဖၣ်ဟဲက့ၤပၥ်လီၤစုကဝဲၤလၢတၢ်ပၢၢ်ဆၢကရူၢ်အအိၣ်အိၣ်ဝဲခဲလၢၥ်(၂၁၄)ဂၤ အဂ့ၢ်န့ၣ် စံးဝဲန့ၣ်လီၤ.
ဒ်န့ၣ်အသိးမ့ဘၣ်ကွၢ်လၢတၢ်ဒီတနံၣ်အတီၢ်ပူၤအံၤဒုၣ်ဒါသံဘၣ်ဒိဘၣ်ထံးအါအါဂီၢ်ဂီၢ်အမဲၥ်ညါလၢ(KNLA),(KNDO)သုးပၥ်ဖှိၣ်တကပၤ စ့ၢ်ကီး ဘၣ်ဟ့ၣ်လီၤကွံၥ်အသးသမူလၢထံကီၢ်ဒီးပှၤကလုၥ်အဂီၢ်ပၥ်ဖှိၣ်အိၣ်ဝဲ(၁၀၈)ဂၤဒီးဘၣ်ဒိဘၣ်ထံးဝဲ(၃၈၀)ဂၤအဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါဃုၥ်ဝဲန့ၣ်လီၤ.
လၢတၢ်န့ၣ်အဃိမၤထူရၤလၢအဘၣ်ဟ့ၣ်လီၤအသးသမူတဖၣ်အံၤလၢတၢ်ဒီသဒၢထံဖိကီၢ်ဖိကမျၢၢ်အတၢ်သဘျ့ဒီးအတၢ်အိၣ်မူခါဆူညါအဂီၢ် ခီဖျိအိၣ်ဒီးတၢ်သူၣ်ဒူသးဒူ တၢ်သးစွံကတုၤဒီးနုၥ်လီၤဒုးပၢၢ်ဆၢတၢ်တဲၥ်တဲၥ်ဖျုဖျုအဃိ ခ့ၣ်အဲၣ်ယူၣ်-ကညီဒီကလုၥ်စၢ ဖှိၣ်ကရၢ ပၥ်လုၢ်ပၥ်ပှ့ၤမၤလၤကပီၤဒီး ပၥ်ပနီၣ်အဝဲသ့ၣ်ထီဘိတဘိယူၢ်ဃီလီၤအဂ့ၢ်န့ၣ် ခ့ၣ်အဲၣ်ယူၣ်ပၥ်ဖျါထီၣ်ဃုၥ်အတၢ်သးအုး လၢလံၥ်တၢ် ပၥ်ဖျါအပူၤန့ၣ်လီၤ.
ခ့ၣ်အဲၣ်ယူၣ် ကီၢ်သူလ့ၤတၢ်ပၢဟီၣ်ကဝီၤအပူၤ ဒ်န့ၣ်အသိးဖဲအပူၤကွံၥ်(၂၀၂၄)တနံၣ်အတီၢ်ပူၤန့ၣ်စ့ၢ်ကီး တၢ်ပၢၢ်ဆၢသုးပၥ်ဖှိၣ်ကရူၢ် ဒီးပယီၤသုးအဘၢၣ်စၢၤတၢ်ဒုးကဲထီၣ်ဝဲ(၃၀၀၀)ဘျဲၣ်ဒီးဖဲန့ၣ်ပယီၤသုးတကပၤသံဝဲ(၃၁၀၀)ဘျဲၣ်,ဘၣ်ဒိဘၣ်ထံးစ့ၢ်ကီးဝဲ(၂၂၀၀)ဘျဲၣ် အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပၥ်ဖျါထီၣ်တ့ၢ်ဃၥ်ဝဲန့ၣ်လီၤ.