လါအ့ဖြ့ၣ် ၉ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဟီၣ်ကဝီၤ လ့က့ၣ်ဒီးတၤပီသုးကလၢၤတၢ်ဒုးအပူၤကဘီယူၤဟဲတ့ၢ်လီၤတၢ်ဘိၣ်လၢအပှၤ တဖၣ်အဂီၢ်ဒီး ဖဲန့ၣ် KNLA မၤန့ၢ်ဝဲအါမးအဂ့ၢ်န့ၣ် သုးက့ပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
လ့က့ၣ်သုးကလၢၤဒီးတၤပီပယီၤသုးကလၢၤလၢအိၣ်ပယၢ်ရီကရူၢ် ဘံလ့ကီၢ်ဆၣ်အပူၤအံၤ စးထီၣ်ဖဲလါအ့ဖြ့ၣ် ၇ သီအနံၤန့ၣ် ဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ထီၣ်ကဝီၤခးဝဲဒၣ်တဘျီဃီဒီး တၢ်ဒုးကဲထီၣ်ဝဲလၢခံခီခံကပၤ အဘၢၣ်စၢၤ န့ၣ်လီၤ.
လၢတၢ်ဒုးဘျီဝဲအံၤအပူၤ လၢကဘီယူၤအံၤတဆီဟဲတ့ၢ်လီၤန့ၢ်ဝဲကျိချံပှၥ်သၣ်ဃုၥ်ဒီး တၢ်အီၣ်တၢ်အီဘိၣ်တဖၣ်အါမး ဘၣ်ဆၣ် တၢ်ဘိၣ်တဖၣ်အါဒၣ်တက့ၢ်ပပှၤမၤန့ၢ်ဝဲအဂ့ၢ်န့ၣ် (သုးက့ ၁)သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံးဝဲ န့ၣ် လီၤ.
“ဖဲတနံၤအံၤကဘီယူၤဟဲတ့ၢ်လီၤတၢ်ဘိၣ်လၢလ့ၣ်က့ၣ်ဒီးတၤပီသုးကလၢၤပူၤ.ဟဲတ့ၢ်လီၤဝဲတၢ်အီၣ်တၢ်အီဘိၣ်,ကျိချံပှၥ်သၣ်အဘိၣ်.ဘၣ်ဆၣ်တတုၤလၢသုးကလၢၤကရၢၢ်ပူၤခဲလၢၥ်ဘၣ်.အါဒၣ်တက့ၢ်ပပှၤမၤန့ၢ်လီၤ.ပပှၤန့ၢ်တၢ်ဖိတၢ်လံၤလၢအရ့ဒိၣ်အိၣ်ဒီဒူၣ်. ခဲအံၤဒုပတဲလီၤတံၢ်တသ့ဒံးဘၣ်.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါလါအ့ဖြ့ၣ် ၈ သီဟါခီအခါန့ၣ်လီၤ.
ဒ်န့ၣ်အသိးတကီၢ်ခါတုၤလၢတနံၤအံၤလါအ့ဖြ့ၣ် ၉ သီ န့ၣ် လၢသုးကလၢၤ(၂)ဖျၢၣ်အံၤအခိၣ်အဃၢၤန့ၣ်ဒုးယၤတၢ်ဖ့ၣ်စၢ ဆဲးကဲထီၣ် ဒံးဝဲလၢခံခီခံကပၤအဘၢၣ်စၢၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
တချုးဟီၣ်ကဝီၤ(KNLA)သုးပၥ်ဖှိၣ်လဲၤထီၣ်ခးဝဲသုးကလၢၤအံၤဒံးဘၣ်အခါဖဲအပူၤကွံၥ်လါအ့ဖြ့ၣ် ၁ သီ , ၂ သီ, ၄ သီ ဒီး ၆ သီအနံၤ တၢ်ဒုးကဲထီၣ်တအိၣ်ပယီၤသုးကဘီယူၤလဲၤတ့ၢ်လီၤမ့ၣ်ပိၢ်လီၤတဲၥ်ပိၢ်ဖးထီၣ်ဝဲလၢ လ့က့ၣ်,တၤပီ, ထံလ့ခီၣ်သဝီပူၤ သဝီချၢအဃိ ကမျၢၢ်ဘၣ်ဒိဘၣ်ထံး,ဟံၣ်တၢ်သူၣ်ထီၣ်ဃုၥ်ဒီးသီခါဖၠၣ်တၢ်သူၣ်ထီၣ်တဖၣ်အူအီၣ် ဟးဂီၤဝဲဒၣ် အါမးန့ၣ်လီၤ.
လ့ၣ်က့ၣ်သုးလၢၤဒီးတးပီသုးကလၢၤလၢတၢ်လဲၤထီၣ်ခးဝဲခဲအံၤန့ၣ် မ့ၢ်သုးကလၢၤခံဖျၢၣ်လၢအအိၣ်ဘူးလိၥ်သး,အိၣ်ဆီလီၤသး ဖဲသဝီဃၢၤထံးလိၤလိၤလီၤဒီး သုးကလၢၤအံၤဟဲအိၣ်ဆီလီၤသးလၢဟီၣ်ကဝီၤပူၤဖဲန့ၣ်ကအိၣ်ဝဲလၢအနံၣ်(၄၀)ဘျဲၣ်လံအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါ စံးဝဲအသိး သ့ၣ်ညါဘၣ်န့ၣ်လီၤ.
ဒီးသုးကလၢၤ(၂)ဖျၢၣ်အံၤမ့ၢ်ဝဲ သုးတြိၤ(၄၄)စုတီၤဖီလၥ် ခီၣ်ချ့သုးရ့ၣ်(ခမရ-၂)မ့ၢ်သုးရ့ၣ်တရ့ၣ်ဃီလီၤအမဲၥ်ညါ သုးကလၢၤ အံၤအပူၤတၢ်တယးကွၢ်ဝဲလၢသုးနီၣ်ဂံၢ်ကအိၣ်(၁၀၀)ဘျဲၣ်အသိး သုးကလၢၤအံၤအိၣ်ဆီ လီၤအသးလၢဟီၣ်ကဝီၤ ကညီဒီကလုၥ် ဂၢၤသးကရၢ(KNDO) သုးရ့ၣ်-၂ ဟီၣ်ကဝီၤအပူၤန့ၣ်လီၤ.
ဒ်န့ၣ်အသိး သုးဟံန့ၢ်တၢ်စိတၢ်ကမီၤဝံၤလီၢ်ခံ သုးကလၢၤ(၂)ဖျၢၣ်မၤတံၥ်တၥ်ဝဲကမျၢၢ်တၢ်လဲၤတၢ်က့ၤလၢကျဲအကလုၥ် ကလုၥ် အဃိ ပယီၤသုးလၢအိၣ်သုးကလၢၤပူၤတဖၣ်ကဟးထီၣ်ကွံၥ်လၢ (၃)သီ အတီၢ်ပူၤ အဂ့ၢ်န့ၣ် အပူၤကွံၥ်(၂၀၂၂)လါအ့ဖြ့ၣ် ၂၀ သီ အခါ (KNDO) သုးရ့ၣ်-၂ ထုးထီၣ်လံၥ်ဟ့ၣ်ပလီၢ်ဒံးဝဲ အိၣ်န့ၣ်လီၤ.
