လါယူၤ ၂ သီ, ၂၀၂၆ နံၣ်, ခ့ၣ်အဲးစံၣ်
လၢခ့ၣ်အဲၣ်ယူၣ် (သုးက့ ၅)ဟီၣ်ကဝီၤ ဖၣ်ပူၣ်ဒုးယၤသုးကလၢၤဒီး (သုးက့ ၆)ဟီၣ်ကဝီၤ ဂီၤလ့ၤဒုးယၤသုးကလၢၤန့ၣ် စးထီၣ် ဖဲတဂီၤအံၤတၢ်ဒုးက့ၤဆူၣ်ထီၣ်ကဒါဝဲဒိၣ်ဒိၣ်မုၢ်မုၢ်ဒီး ပယီၤသုးအံၤသုတဘၣ်ဟ့ၣ်ဆှူကွံၥ်သုးကလၢၤအံၤတဂ့ၤအဂီၢ် ခီၣ်ဆၢ ဒီသဒၢအသး သူဝဲဒၣ်ဒြိ,ကျိဖးဒိၣ်,ကဘီယူၤဟဲခးလီၤဝဲတၢ်အဆၢတတဲၥ်ဝဲဘၣ်အဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံး ပှၤဟ့ၣ် တၢ်ကစီၣ်ဖိအအိၣ်န့ၣ်လီၤ.
ဖဲတနံၤအံၤလါယူၤ ၂ သီ ဂီၤခီဂီၤဂီၤအဆၢကတီၢ်န့ၣ် လၢကထီၣ်မၤန့ၢ်ဝဲဂီၤလ့ၤသုးကလၢၤအံၤအဂီၢ် ဟီၣ်ကဝီၤ(KNLA) သုးပၥ်ဖှိၣ်ထီၣ်သဖှိခးဝဲအဃိ တၢ်ဒုးကဲထီၣ်ဝဲလၢခံခီခံကပၤအဘၢၣ်စၢၤဒိၣ်ဒိၣ်မုၢ်မုၢ်ဒီး လၢတၢ်ဒုးဘျီဝဲအံၤအပူၤ တၢ်ပၢၢ်ဆၢ သုးပၥ်ဖှိၣ်ကရူၢ်တကပၤ တၢ်ဘၣ်ဒိဘၣ်ထံးအိၣ်ဝဲအဂ့ၢ်န့ၣ် ပှၤလၢအဘူးဒီးတၢ်ပၢၢ်ဆၢသုးကရူၢ်တဂၤ စံးဝဲန့ၣ်လီၤ.
“ဂီၤလ့ၤသုးကလၢၤန့ၣ်ပှၤစးထီၣ်က့ၤထီၣ်ကဒါအီၤဖဲတဂီၤအံၤဂီၤခီ ၄ နၣ်ရံၣ်ခိၣ်ဃၢၤန့ၣ်လီၤ.ပနၢ်ဟူလၢတနံၤအံၤပှၤကထီၣ် တုၤအန့ၢ်လီၤ.ပယီၤသုးတကပၤနါက့သုးကလၢၤအံၤသုတလီၤတဂ့ၤအဂီၢ်န့ၣ် လၢ(၂၇၅)အံၤတဆီန့ၣ် ပယီၤသုးပျၢ်လီၤဝဲ ကၤမံၤကၤစံၤဒြိအါမးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီ တၢ်ကစီၣ် ဖဲတဂီၤအံၤန့ၣ်လီၤ.
လၢတၢ်န့ၣ်အဃိစးထီၣ်ဖဲမနၤတုၤလၢတဂီၤအံၤလၢဂီၤလ့ၤသုးကလၢၤအခိၣ်အဃၢၤန့ၣ် ပယီၤသုးကဘီယူၤဟဲခးလီၤဝဲတၢ် အဆၢတတဲၥ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးတကီၢ်ခါခဲအံၤပယီၤသုးလၢအိၣ်ဖၣ်ပူၣ်သုးကလၢၤပူၤသ့ၣ်တဖၣ်စ့ၢ်ကီးခီဖျိဟီၣ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ် လဲၤသဖှိထီၣ်ဝဲအဃိ အဝဲသ့ၣ်ဘၣ်အိၣ်ဝဲလၢတၢ်ဘၣ်ယိၣ်ဘၣ်ဘှီပူၤဒီးလၢတၢ်ဒီသဒၢလီၤက့ၤသးအဂီၢ် ပၥ်ဂံၢ်ပၥ်ဘါခးနၢၤ လီၤဝဲ တၢ်ဒီးကျိဖးဒိၣ်,ဒြိ,ကဘီယူၤအဂ့ၢ်န့ၣ် (သုးက့ ၅)ပှၤကတိၤတၢ်ပၢ ပဒိၣ်စီၤရီဘ့ၤမူ စံးဘၣ်စ့ၢ်ကီးခ့ၣ်အဲးစံၣ်-ကညီတၢ် ကစီၣ်ဖဲတဂီၤအံၤဒ်အံၤန့ၣ်လီၤ.
“လၢဖၣ်ပူၣ်တကပၤန့ၣ်ပယီၤသုးဒုတၢ်အိၣ်သးတဂ့ၤအါလၢၤဘၣ်.နါက့အဝဲသ့ၣ်န့ၣ်ခီဖျိအအိၣ်ဒီးတၢ်ပီးတၢ်လီမ့ဝံၤအသကိးစ့ၢ်ကီးဟဲထီၣ်လူၤထီၣ်အီၤအဖီခိၣ် ပၥ်ဆူၣ်ဃၥ်အသးဒ်န့ၣ်လီၤ.အဝဲသ့ၣ်န့ၣ်အိၣ်ဒီးတၢ်ပျံၤတၢ်ဖုးတၢ်ဘၣ်ယိၣ်မ့ဝံၤအိၣ်ဒီးတၢ်ဆၢ ကတီၢ်လၢအကဘၣ်ယူထူၣ်ဖျဲးထီၣ်အသးဒ်န့ၣ်အဖီခိၣ်အဃိအဝဲသ့ၣ်ဂဲၤပျုၢ်ဂဲၤဆှးခးဝဲကျိဒိၣ်,ခးဝဲဒၣ်ဒြိဟးတ့ၢ်လီၤဝဲကျိးဖးဒိၣ် ဒီးကဘီယူၤစ့ၢ်ကီးဟဲခးလီၤတၢ်”အဂ့ၢ်န့ၣ် စံးဝဲန့ၣ်လီၤ.
တကးဒံးဘၣ်လၢအတကပၤစ့ၢ်ကီးသုးကလၢၤအံၤသုတဂီၤတဂ့ၤအဂီၢ်ပယီၤသုးကျိၤလၢအဟဲထီၣ်(စစ်ကူ)လၢအပူၤကွံၥ် ဟဲထီၣ်တုၤကဟံလူၢ်သ့ၣ်တဖၣ်အံၤတအိၣ်ဖဲန့ၣ်လၢၤဘၣ် မ့မ့ၢ်တခီခဲအံၤသုးထီၣ်သးလၢတၢ်ဖီခိၣ် ဟဲထီၣ်တုၤဝဲဒၣ်လၢ ကဟံလူၢ်ဒီးကတၢတံၥ်ဘၢၣ်စၢၤတၢ်လီၢ်တတီၤလံအဂ့ၢ်န့ၣ် ပဒိၣ်စီၤရီဘ့ၤမူ စံးအါထီၣ်ဝဲန့ၣ်လီၤ.
တကီၢ်ခါခဲအံၤလၢကထီၣ်မၤန့ၢ်ဝဲဖၣ်ပူၣ်သုးကလၢၤဒီးဂီၤလ့ၤသုးကလၢၤလၢအဟဲအိၣ်ဆီလီၤသးလၢခ့ၣ်အဲၣ်ယူၣ် တၢ်ပၢ ဟီၣ်ကဝီၤပူၤသ့ၣ်တဖၣ်အံၤအဂီၢ် ဟီၣ်ကဝီၤ(KNLA)သုးပၥ်ဖှိၣ်လဲၤထီၣ်ကဝီၤခးဝဲအဃိ စှၤသီအတီၢ်ပူၤပယီၤသုးကလၢၤ (၂)ဖျၢၣ်အံၤကလီၤဝဲဒၣ်သ့အဂ့ၢ်န့ၣ် တၢ်ပဲၥ်ထံနီၤဖးစံးဝဲအိၣ်လီၤ.
ပယီၤသုးကလၢၤ(၂)ဖျၢၣ်လၢတၢ်ဒုးက့ၤဆူၣ်ထီၣ်ဒိၣ်ဒိၣ်မုၢ်မုၢ်ခဲအံၤန့ၣ် မ့မ့ၢ်ဖၣ်ပူၣ်သုးကလၢၤအံၤခီန့ၣ် ဘၣ်တၢ်ကဝီၤတံၢ် ခးအီၤတၢ်ဆၢကတီၢ်အိၣ်လံလၢခံနံၣ်ဃၣ်ဃၣ်လံအသိး ဂီၤလ့ၤသုးကလၢၤအံၤစ့ၢ်ကီးဘၣ်တၢ်ထီၣ်ကဝီၤခးအီၤတၢ်ဆၢ ကတီၢ်ထီၣ်ဘးဝဲလၢတနံၣ်ဃၣ်ဃၣ်လံန့ၣ်လီၤ.
ဖဲတဂီၤအံၤတၢ်ဒုးက့ၤကဲထီၣ်ကဒါအတီၢ်ပူၤန့ၣ် ခီဖျိပယီၤသုးအံၤသူဝဲဒြိ,ကျိဖးဒိၣ်,ကဘီယူၤဒိၣ်ဒိၣ်မုၢ်မုၢ်ဟဲခးလီၤ တၢ်အဃိ ဂီၤလ့ၤမ့ၢ်ဂ့ၤ,ဖၣ်ပူၣ်တကပၤမ့ၢ်ဂ့ၤ ဟီၣ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ်တၢ်ဘၣ်ထံးအိၣ်ဝဲအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ် ကစီၣ် ဖိစံးဝဲအိၣ်ဘၣ်ဆၣ် ဘၣ်ဃးတၢ်ဂ့ၢ်အံၤဒ်သိးကသ့ၣ်ညါဘၣ်တၢ်အိၣ်သးလီၤတံၢ်လီၤဆဲးအဂီၢ် ပခ့ၣ်အဲးစံၣ်-ကညီ တၢ်ကစီၣ်ဃုသ့ၣ်ညါမၤလီၤတံၢ်အီၤအဖၢမုၢ်န့ၣ်လီၤ.
