လါယူၤ ၁၂သီ, ၂၀၂၆နံၣ်, ခ့ၣ်အဲးစံၣ်,
ကၠီၣ်တဲၣ်အနီၢ်ပၤမုၣ်(Bajrakitiyabha Narendiradebyavati)ဖးခၠါရၤခံးတရါဖါနရံၤဒရၤဒ့ၤဘၤပတံၤအံၤအဘူၣ်အတီၢ်ကတၢၢ်ကွံၥ်ဝဲဒၣ်ဖဲမဟါလါယူၤ(၁၁)သီအနံၤဟါခီ(၇)နၣ်ရံၣ်အဆၢကတီၢ်အဂ့ၢ်,ကၠီၣ်တဲၣ်စီၤလိၣ်စီၤပၤနူၢ်စီၤတၢ်ဘိးဘၣ်ပၥ်ဖျါထုးထီၣ်ရၤလီၤဝဲဒီးကၠီၣ်တဲၣ်တၢ်ကစီၣ်တဖၣ်ရၤလီၤပၥ်ဖျါဝဲဒၣ်န့ၣ်လီၤ.
နီၢ်ပၤမုၣ်အံၤအဘူၣ်အတီၢ်ကတၢၢ်ကွံၥ်ဝဲဒၣ်အဆၢကတီၢ်အသးနံၣ်အိၣ်ဝဲ(၄၇)နံၣ်ဒီးအသးသမူဟးထီၣ်ဝဲဒၣ်ဖဲကီၢ်ကၠီၣ်တဲၣ်ဘီကီးဝ့ၢ်(ခၠူလၤလီၤကိတၢ်ဆါဟံၣ်)အဂ့ၢ်,သ့ၣ်ညါဘၣ်ဒ်စီၤလိၣ်စီၤပၤတၢ်ဘိးဘၣ်ပၥ်ဖျါဒီးကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲဒၣ်အသိးန့ၣ်လီၤ.
တကးဒံးဘၣ်လၢတၢ်ကပၥ်လီၤက့ၤဝဲနီၢ်ပၤမုၣ်အစိၥ်အဂီၢ်တၢ်ကမၤဝဲဒ်စီၤလိၣ်စီၤပၤဒိၣ်ထီသနူအတၢ်ရဲၣ်တၢ်ကျဲၤအသိးအဂ့ၢ်,တၢ်ဘိးဘၣ်ပၥ်ဖျါအပူၤပၥ်ဖျါဃုၥ်ဝဲဒၣ်စ့ၢ်ကီးန့ၣ်လီၤ.
နီၢ်ပၤမုၣ်(ဖးခၠါရၤခံးတရါဖါနရံၤဒရၤဒ့ၤဘၤပတံၤ)အံၤအိၣ်ဖျဲၣ်ထီၣ်ဝဲဒၣ်ဖဲ(၁၉၇၈)နံၣ်လါဒံၣ်စဲဘၢၣ်(၇)သီအနံၤဒီးအဝဲမ့ၢ်ဝဲကီၢ်ကၠီၣ်တဲၣ်စီၤပၤနီၢ်ဂံၢ်(၁၀)စီၤပၤ(MahaVajiralongkorn) ဒီးနီၢ်ပၤမုၣ် Soamsawali Kitiyakara အဖိမုၣ်ဒိၣ်ကတၢၢ်အဂ့ၢ်,သ့ၣ်ညါဘၣ်န့ၣ်လီၤ.
ဒီးဖဲအပူၤကွံၥ်(၂၀၂၂)နံၣ်လါဒံၣ်စဲဘၢၣ်အပူၤတူၢ်ဘၣ်ဝဲသးတၢ်ဆါဒီးသးပံးနီၣ်ကွံၥ်ဝဲဒၣ်အသးသတူၢ်ကလၥ်အဃိဘၣ်ဟံးန့ၢ်ဝဲကသံၣ်တၢ်ကွၢ်ထွဲကဟုကယၥ်တဘျူးလါအလီၢ်ခံဖဲ(၂၀၂၆)နံၣ်လါမ့ၤအပူၤစ့ၢ်ကီးခီဖျိတူၢ်ဘၣ်စ့ၢ်ကီးဝဲပှံၥ်ညိးတၢ်ဆူၣ်တၢ်ဆါ,တၢ်ဆူးတၢ်ဆါဃၢ်နုၥ်လီၤလၢအဟၢဖၢပူၤ,သွံၣ်ဂံၢ်စၢ်,သးဟူးတမုၥ်နီၢ်,သွံၣ်ကိၣ်လိၣ်ဖံးတၢ်မၤတၢ်တဘၣ်လီၢ်ဘၣ်စးဘၣ်လၢၤဘၣ်ဒီးကသံၣ်သရၣ်ဒိၣ်ထီတဖၣ်ကျဲးစၢးဝဲဘၣ်ဆၣ်အတၢ်အိၣ်ဆူၣ်အိၣ်ချ့တၢ်အိၣ်သးတဂ့ၤထီၣ်လၢၤဘၣ်အဃိလီၢ်ခံစူးကွံၥ်ဝဲဒၣ်အသးအဂ့ၢ်,သ့ၣ်ညါဘၣ်န့ၣ်လီၤ.
ကၠီၣ်တဲၣ်အနီၢ်ပၤမုၣ်(ဖးခၠါရၤခံးတရါဖါနရံၤဒရၤဒ့ၤဘၤပတံၤ)အံၤမ့ၢ်ဝဲဒၣ်စီၤလိၣ်စီၤပၤစၢၤသွဲၣ်တဂၤတကးဘၣ်အမဲၥ်ညါ,အါတက့ၢ်အမံၤဟူသၣ်ဖျါဒီးဘၣ်တၢ်သ့ၣ်ညါဝဲအီၤလၢအမ့ၢ်ဝဲပီၢ်ရီလၢအိၣ်ဒီးတၢ်သ့တၢ်ဘၣ်လၢပှဲၤ,ထံကီၢ်အခၢၣ်စးမီၢ်သီမီၢ်လါပှၤလၢအရ့ပှၤဂၤသ့,သုးဂ့ၢ်ဝီပှၤလၢလီၢ်လးဒိၣ်ထီဒီး,ပှၤဟူးဂဲၤလၢပှၤတဝၢတၢ်ဆီတလဲတၢ်ဒိၣ်ထီၣ်ထီထီၣ်ခိၣ်နၢ်တဂၤအဂ့ၢ်,ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါထီၣ်ဝဲဒၣ်န့ၣ်လီၤ.
ဒ်န့ၣ်အသိး,နီၢ်ပၤမုၣ်အံၤလီၤဆီဒၣ်တၢ်ဟူးဂဲၤဝဲလၢပိၥ်မုၣ်ပိၥ်မၢၤပှၤဃိၥ်ဖိခွဲးယၥ်ဒီးပှၤကညီဂ့ၢ်ဝီခွဲးယၥ်တၢ်ဖံးတၢ်မၤတဖၣ်အတၢ်ဖံးတၢ်မၤတဖၣ်အပူၤအဃိ,မ့ၢ်ဝဲပှၤလၢအဒိးန့ၢ်ဘၣ်ဝဲကီၢ်ကၠီၣ်တဲၣ်ဒီးထံဂုၤကီၢ်ဂၤတၢ်ပၥ်ပနီၣ်တဂၤအဂ့ၢ်,သ့ၣ်ညါဘၣ်န့ၣ်လီၤ.
