လါယူၤ ၁၂ သီ, ၂၀၂၆ နံၣ်, ခ့ၣ်အဲးစံၣ်
ပယီၤသုးဂံၢ်ဘါအဂၤ(၁၀၀)ဘျဲၣ်လၢအိၣ်ဟဲက့ၤလီၤလၢဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် တးပီသဝီအံၤတဖၣ် ခီဖျိ(KNLA)သုးပၥ်ဖှိၣ်ခိးခးဝဲလၢကစၢၢ်ကျါတၢ်ဒ့ၣ်စၢၤအဃိ တၢ်ဘၣ်ဒိဘၣ်ထံးအိၣ်ဝဲဒီး လၢကက့ၤလီၤဆူတရိၥ်ကၢ်ပျိၢ် တကပၤအဂီၢ် (DKBA)ကိးမၢဝဲကမျၢၢ်သိလ့ၣ်,ဟံန့ၢ်ဝဲတၢ်ဘံၣ်တၢ်ဘၢအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤကမျၢၢ်တဖၣ် အအိၣ် န့ၣ် လီၤ.
ပယီၤသုးတဖၣ်အံၤဖဲလါယူၤ ၁၀ သီအနံၤန့ၣ်ဟဲက့ၤလီၤတုၤလၢဝဲလၢပနွဲၢ်ကျါသုးကလၢၤဒီးဖဲန့ၣ်တဆီဒိးထီၣ်ဝဲချံခီဃီၤဝဲ ဘီနီၤကျိ စံၣ်လီၤဝဲဒၣ်ဖဲဖၣ်အၣ်ကီၢ်ဆၣ် ပြၢးကီးသဝီချံသန့လီၢ်အံၤဝံၤ ဘူးဒးကညီသုးမုၢ်ဒိၣ်(DKBA)သုးခိၣ်ဘိၤဘံၣ်အပှၤဟဲဒီး ဟံန့ၢ်ဝဲ တၢ်ဘံၣ်တၢ်ဘၢအါမးန့ၣ်လီၤ.
ဒ်န့ၣ်အသိးပယီၤသုးလၢအအိၣ်ဟဲက့ၤလီၤဆူတးပီသဝီတဖၣ်အံၤလၢကတုၤဆူပနွဲၢ်ကျါသုးကလၢၤအံၤအဂီၢ် ဖဲအဝဲသ့ၣ် ဟဲက့ၤ လီၤလၢကစၢၢ်ကျဲဒီတကျိၤအခါ ခီဖျိတၢ်ခိးထုးဝဲဒီးမ့ၣ်ပိၢ်,တၢ်ခိးခးဝဲလၢလၢတၢ်ဒ့ၣ်စၢၤအဃိ တၢ်သံတၢ်ဘၣ်ဒိဘၣ်ထံး အိၣ်ဝဲ အဂ့ၢ်န့ၣ် ပှၤလၢဘူးဒီးတၢ်ပၢၢ်ဆၢကရူၢ်အံၤတဖၣ် စံးဝဲအသိးသ့ၣ်ညါဘၣ်န့ၣ်လီၤ.
တကးဒံးဘၣ်ပယီၤသုးလၢအဟဲက့ၤလီၤတဖၣ်အံၤအကျါပၣ်ဃုၥ်ဝဲပှၤလၢအဘၣ်ဒိတ့ၢ်ဖဲအပူၤကွံၥ်လါအ့ဖြ့ၣ်တးပီသုးကလၢၤ တၢ်ဒုးအံၤအခါဒီး အဝဲသ့ၣ်အံၤလၢကက့ၤကူစါယါဘျါသးလၢဝ့ၢ်ပူၤအဂီၢ်ဂုၥ်ကျဲးစၢးဃုကျဲဘၣ်ဆၣ် ကျဲလၢအဝဲသ့ၣ်ကက့ၤလီၤ အံၤဒီတကျိၤန့ၣ်(KNLA)ခိးလီၤဝဲအဃိ အိၣ်ကတးထီအသးဖဲတးပီသဝီန့ၣ်တၢ်ဆၢကတီၢ်အိၣ်လၢ(၁)လါဃၣ်ဃၣ် ညါ န့ၣ်လီၤ.
ဘၣ်ဃးပယီၤသုးဟဲက့ၤလီၤဘျီဝဲအံၤန့ၣ် ပှၤလၢဘူးဒီးတၢ်ပၢၢ်ဆၢကရူၢ်တဂၤစံးဝဲလၢ“ပယီၤသုးန့ၣ် ဟဲက့ၤမံဖဲပနွဲၢ်ကျါသုးကလၢၤ တနၤဝံၤမုၢ်ဆ့ၣ်ထီၣ်ဘျီဟဲက့ၤခီဃီၤလၢြပၢးကီးတကပၤလီၤ.ဖဲအဝဲသ့ၣ်ဟဲက့ၤခီဘီနီၤကျိအခါ န့ၣ်ပှၤခးစိအဝဲသ့ၣ်ဒီးကျိဒိၣ်ဒံး. ပှၤသဝီဖိတဲဝဲလၢအထံၣ်ပှၤဟဲက့ၤယိးလီၤသးန့ၣ်ကအိၣ်(၁၁)ယိး.မ့မ့ၢ်လၢအခီၣ်တူးခံကပၤလၢၥ်န့ၣ်အိၣ်ဝဲ(၂)ဂၤ.အခီၣ်တူၥ် တကပၤန့ၣ်အိၣ်(၃)ဂၤ.မ့ဝံၤကျိအဘျဲၣ်(အပို)လၢတၢ်ဟဲက့ၤစိၥ်ဝဲန့ၣ်ကအိၣ်လၢအခိၣ်(၂၀)ဘျဲၣ်ညါ. ကျိတဖၣ်အံၤအကစၢ် န့ၣ်မ့ၢ် အသံလၢကျဲပူၤဧါဒုတဲလီၤတံၢ်တဘၣ်ဘၣ်.ဘၣ်မနုၤအဃိလဲၣ်န့ၣ်ဖဲအဝဲသ့ၣ်ဟဲက့ၤလၢကျဲအခါန့ၣ် ပှၤခးအဝဲသ့ၣ်ဘၣ်ဒိဘၣ် ထံး အိၣ်ဒီဒူၣ်ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဖဲမဟါလါယူၤ ၁၁ သီ ဂီၤခီအဆၢကတီၢ်န့ၣ် ပယီၤသုးသ့ၣ်တဖၣ်အံၤ ကက့ၤလီၤဆူလၥ်လၢဝ့ၢ်ပူၤတကပၤအဂီၢ် ကိးမၢဝဲ တကိၤတဲၤ,ဝၣ်တရဲၢ်သဝီဃုၥ်ဒီးသဝီဖိလၢအိၣ်ဘူးဖဲန့ၣ်တဖၣ်အသိလ့ၣ်ဃုၥ်ဒီး(၆)ဘ့ကါ,(၁၀)ဘ့ကါ လၢအဂၤသ့ၣ်တဖၣ်အံၤဝံၤ (DKBA)ဟံန့ၢ်ဝဲတၢ်ဘံၣ်တၢ်ဘၢက့ၤလီၤဆှၢဝဲဆူတရိၥ်ကၢ်ပျိၢ်တကပၤအဂ့ၢ်န့ၣ် သ့ၣ်ညါဘၣ်လၢကမျၢၢ်အအိၣ်န့ၣ်လီၤ.
တကီၢ်ခါခဲအံၤတးပီဒီးလ့က့ၣ်သဝီလၢပယီၤသုးနုၥ်လီၤအိၣ်ဆီလီၤသးလၢအပူၤအံၤ ဒုးယၤတၢ်ဖ့ၣ်ဆၢဆဲးကဲထီၣ်ဒံးဝဲဒီး တၢ်တယးကွၢ်ဝဲလၢတးပီသဝီန့ၣ်ပယီၤသုးဂံၢ်ဘါကအိၣ်ဝဲအဂၤ(၁၀၀)ဘျဲၣ်ဒီး မ့မ့ၢ်လၢလ့က့ၣ်တကပၤန့ၣ်ပယီၤသုးဂံၢ် ဘါကအိၣ် တ့ၢ်က့ၤဝဲအဂၤ(၇၀)ခိၣ်ဃၢၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
