လါယူၤ ၁၂ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဒွဲၣ်လိကီၢ်ဆၣ် ကမၤမိၢ်-ကတၢတံၥ်ကျဲ (စစ်ကူ)ပယီၤသုးကျိၤ လၢ အဟဲထီၣ်တဖၣ်အံၤ ခးသံကွံၥ်ဝဲသဝီဖိသးစၢ်ပိၥ်ခွါ(၁၈)နံၣ်တဂၤလၢသဝီပူၤအဂ့ၢ်န့ၣ် (သုးက့ ၅)ပှၤကတိၤတၢ်ပၢ ပဒိၣ်စီၤထိၣ်ရီဘ့ၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဖဲအပူၤကွံၥ်လါယူၤ ၉ သီ ဂီၤခီ ၁၀း၀၀ နၣ်ရံၣ်အဆၢကတီၢ်န့ၣ် လၢကလဲၤထီၣ်(စစ်ကူ)ဆူဖၣ်ပူၣ်အံၤအဂီၢ်ပယီၤသုးကျိၤလၢအဟဲ ထီၣ်တဖၣ်အံၤ နုၥ်လီၤဝဲလၢလ့ဖိထၣ်ကရူၢ် နိးဃဲထၣ်သဝီအပူၤဒီး ခးသံကွံၥ်ဝဲ စီၤပိပိ(၁၈)နံၣ်အံၤန့ၣ်လီၤ.
ဘၣ်ဃးပယီၤသုးခးသံသဝီဖိတၢ်ဂ့ၢ်အံၤန့ၣ် (သုးက့ ၅)ပှၤကတိၤတၢ်ပၢ ပဒိၣ်စီၤထိၣ်ရီဘ့ၤစံးဝဲလၢ “အခးသံဝဲန့ၣ်လၢသဝီပူၤလီၤ. သဝီဖိတဂၤအံၤတၢ်ခးသံအီၤလၢတၢ်ဂ့ၢ်မနုၤလဲၣ်န့ၣ်ကသံကွၢ်လီၤတံၢ်ကဒါက့ၤသဝီပှၤ ဘၣ်မူဘၣ်ဒါဝံၤမးကသ့ၣ်ညါလီၤတံၢ်က့ၤ လီၤ. ခဲအံၤမၤတၢ်ဆဲးကျိးတန့ၢ်ဒံးဘၣ်. မ့ၢ်ပယီၤသုးန့ၣ်အိၣ်လၢသဝီပူၤဒီးပှၤသဝီဖိခီန့ၣ်မ့ၢ်အစံၣ်ဒီးဘၣ်လၢဟဲက့ၤ ဟံအီၣ်တၢ်အီၣ် ခီဧါတဲလီၤတံၢ်တဘၣ်ဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ပယီၤသုးကျိၤလၢအခးသံဝဲသဝီဖိသးစၢ်လၢအတၢ်ကမၣ်တအိၣ်ဘၣ်တဖၣ်အံၤန့ၣ် လၢကလဲၤထီၣ်မၤစၢၤတၢ်လၢဖၣ်ပူၣ် တၢ်ဒုးဆူၣ်အလီၢ်အံၤအဂီၢ် ဟဲထီၣ်ဝဲဒၣ်စးထီၣ်လၢအပူၤကွံၥ်လါမ့ၤ ၇ သီအခါန့ၣ်လံဒီး ဒ်န့ၣ်အသိးဖဲအဝဲ သ့ၣ် ဟဲထီၣ်လၢကျဲဒီ တကျိၤအခါန့ၣ် တၢ်ဒုးကဲထီၣ်ဝဲဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်အဘျီတဖၣ် တဘျီ န့ၣ်လီၤ.
တကးဒံးဘၣ်လၢန့ၣ်အမဲၥ်ညါဖဲအဝဲသ့ၣ်ဟဲထီၣ်လၢကျဲအခါန့ၣ်စ့ၢ်ကီး ဒွဲၣ်အူအီၣ်ကွံၥ်ဝဲဝၣ်သိထၣ်သဝီ ဒီး လၢၢ်ကွဲဒိၣ်သဝီပူၤ ဟံၣ်သ့ၣ်တဖၣ်အါအါဂီၢ်ဂီၢ်ဘၣ်ဆၣ် လီၤဆီဒၣ်တၢ်မ့မ့ၢ်လၢဝၣ်သိထၣ်သဝီအံၤခီန့ၣ်ဒွဲၣ်အူအီၣ်ကွံၥ်ဝဲဟံၣ်တဖျၢၣ်မးတအိၣ်တ့ၢ် လၢၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးဖဲအဝဲသ့ၣ်ဟဲထီၣ်လၢကျဲအခါခီဖျိအဝဲသ့ၣ်ကျိဖးဒိၣ်,ဒြိဒီးကဘီယူၤအံၤအဃိ လီၢ်ကဝီၤကမျၢၢ်,သီခါဘၣ်ဒိဘၣ် ဒိဘၣ် ထံးအမဲၥ်ညါ ကမျၢၢ်ဟံၣ်လီၤပှီၢ်ဟးဂီၤဘၣ်ဒိဘၣ်ထံးစ့ၢ်ကီးအိၣ်အသိး ဒူသဝီကမျၢၢ်လၢအိၣ်ဖဲန့ၣ်ခဲလၢၥ်ဃၣ်ဃၣ်ဘၣ်ဃ့ၢ်ထီၣ်ဝဲ ဒီးတုၤလၢခဲအံၤအါဒၣ်တက့ၢ်ဘၣ်ဟးအိၣ်ကဒုဒံးအသးလၢတၢ်ဘံၣ်တၢ်ဘၢလီၢ်ထံၣ်ဘၣ်ဝဲတၢ်ကီတၢ်ခဲအဂ့ၢ်န့ၣ်သ့ၣ်ညါဘၣ်န့ၣ်လီၤ.
