လါယူၤ ၁၉ သီ, ၂၀၂၆ နံၣ်, ခ့အဲးစံၣ်
ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် ဆီသုးခံကရူၢ် သဝီသီအပူၤ ဖဲမဟါသုးမီၤစိရိၤကဘီယူၤအတၢ်လဲၤခးလီၤတၢ် ဘျီဝဲန့ၣ်အပူၤ ကမျၢၢ်သံအိၣ်ထီၣ်တုၤဝဲလၢ(၄)ဂၤဒီးဘၣ်ဒိဘၣ်ထံးဝဲ(၅)ဂၤအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူ ဘၣ်ဒါအအိၣ်န့ၣ်လီၤ.
ဖဲမဟါလါယူၤ ၁၈ သီ မုၢ်ထူၣ် ၁၂း၃၀ အဆၢကတီၢ်န့ၣ် လၢသဝီသီအပူၤ သုးမီၤစိရိၤအ(jet fighter)ကဘီယူၤလဲၤတ့ၢ်လီၤ ဝဲပီၣ် (၅၀၀)မ့ၣ်ပိၢ်တဖျၢၣ် လီၤတဲၥ်လိၤလိၤဝဲသဝီခိၣ်ထိးကျးဆါတၢ်တဖျၢၣ်အဃိ ဖဲန့ၣ်ကျးဆါတၢ်ဟံၣ်အံၤအူအီၣ်ဝဲခဲလၢၥ် န့ၣ်လီၤ.
လၢကဘီယူၤလဲၤခးလီၤတၢ်ဘျီဝဲအံၤ ကျးကစၢ် သဝီသီဖိ စီၤကၠီၤတ့ၣ်(၃၈)နံၣ်အံၤဃုၥ်ဒီးသဝီဖိလၢအလဲၤပှ့ၤအီၣ်တၢ်ဖဲ အကျးအံၤ(၃)ဂၤ ပၥ်ဖှိၣ်ခဲလၢၥ်(၄)ဂၤသံဝဲတဘျီဃီဖဲတၢ်ကဲထီၣ်သးအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်သဝီဖိသံအမဲၥ်ညါဘၣ်ဒိဘၣ်ထံးဝဲ(၅)ဂၤအကျါပၣ်ဃုၥ်ဝဲကျးကစၢ် စီၤကၠီၤတ့ၣ် အမါဘၣ်ဒိဘၣ်ထံးဝဲ နးနးကလဲၥ်ဒီး ခဲအံၤပှၤလၢအဘၣ်ဒိဘၣ်ထံးတဖၣ်တၢ်ကူစါယါဘျါအီၤလၢခ့ၣ်အဲၣ်ယူၣ်ဆူၣ်ချ့တၢ်အံးထွဲကွၢ်ထွဲအလီၢ် အဂ့ၢ်န့ၣ် သ့ၣ်ညါဘၣ်လၢကမျၢၢ်အအိၣ်န့ၣ်လီၤ.
ဘၣ်ဃးတၢ်ဂ့ၢ်အံၤ ကျးကစၢ်လၢအသံတဂၤအံၤအမါဒ့ဖိစံးဝဲလၢ“ယနီန့ၣ်အဘၣ်ဒိ ဘၣ်ဝဲဒၣ်အခံကိၢ်, အယီၢ်ဒ့,အဟၢဖၢ ခဲအံၤ အိၣ်လၢတၢ်ဆါဟံၣ်လီၤ. ခဲအံၤယနီန့ၣ်အဘၣ်ဒိနး အတနီၣ်သးကိးထံၣ်ဒဲးဘၣ် နီၣ်သးတထံၣ်,တနီၣ်သးတထံၣ်ဒ်န့ၣ်. ကဘီယူၤဟဲခးလီၤတၢ်န့ၣ် အအိၣ်လၢကျး(ဆိုင်)ပူၤလီၤ ဘၣ်ဆၣ်ကဘၣ်မ့ၢ်အအိၣ်စီၤစုၤတစဲးဖိဧါတသ့ၣ်ညါဘၣ်. မ့မ့ၢ်လၢ အဝၤဃုၥ်ဒီးပှၤလၢအဂၤ တဖၣ်န့ၣ်သံတဘျီဃီဖဲန့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တၢ်ဒုးကဲထီၣ်တအိၣ်သုးမီၤစိရိၤအံၤပညိၣ်လဲၤခးလီၤဝဲတၢ်လၢဆီသုးခံကရူၢ် သဝီသီခိၣ်ထိး ကျးဆါတၢ်အံၤအဃိ ကယဲၢ်မ့ၢ် တၢ်ဖိတၢ်လံၤကိၣ်ဖိနီဖိလၢအိၣ်ကျးပူၤအံၤတဖၣ် မ့ၣ်အူအီၣ်ပၣ်ဃုၥ်ဝဲခဲလၢၥ်ဒီး တကီၢ်ခါခဲအံၤကမျၢၢ်လၢအိၣ် ဘူးဖဲန့ၣ်တဖၣ် ဘၣ်ယိၣ်ဝဲလၢကဘီယူၤကဟဲခးလီၤကဒီးတၢ်အဃိ တနီၤန့ၣ်ဟးစံၣ်ပလဲၥ်သးလၢတၢ်ပူၤဖျဲးအလီၢ်အိၣ်ဝဲ အဂ့ၢ်န့ၣ် သ့ၣ်ညါဘၣ် န့ၣ်လီၤ.
