လါအ့ဖြ့ၣ် ၃၀ သီ, ၂၀၂၅ နံၣ်, ခ့ၣ်အဲးစံၣ်
ဖဲမဟါလါအ့ဖြ့ၣ် ၂၉ သီ အနံၤန့ၣ် လၢခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ်(သုးက့ ၄) ဒ၀ဲၢ်-ထံခံကီၢ်ဆၢဟီၣ် က၀ီၤ အပူၤ ခီဖျိပယီၤသုးကျိၤနုၥ်လီၤအဃိ လီၢ်က၀ီၤကမျၢၢ်သ့တၣ်ဖၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် ကရူၢ်ကရၢလၢအမၤစၢၤ ပှၤဃ့ၢ်မှံဟးဖျိးတဖၣ် စံး၀ဲန့ၣ်လီၤ.
ဒ်လီၢ်က၀ီၤပှၤဘၣ်မူဘၣ်ဒါစံး၀ဲအသိးန့ၣ် ပယီၤသုးကျိၤလၢအဟဲနုၥ်လီၤသ့ၣ်တဖၣ်အံၤအနီၣ်ဂံၢ်ကအိၣ်၀ဲအဂၤ(၂၀၀)ခိၣ်ဃၢၤဒီး အ၀ဲသ့ၣ်အံၤနီၤဖးလီၤ၀ဲသုးကျိၤ(၃)ဘိအဃိ လီၢ်က၀ီၤကမျၢၢ်သ့ၣ်တဖၣ်ဘၣ်ဃ့ၢ်ထီၣ်ကဲထီၣ်၀ဲဒ်အံၤလီၤတကးဒံးဘၣ် တကီၢ်ခါခဲအံၤ ကမျၢၢ်ပှၤဃ့ၢ်မှံဟးဖျိးနီၣ်ဂံၢ်ဟဲအါထီၣ်၀ဲအဂ့ၢ်န့ၣ် သရၣ်ယီနသး စံး၀ဲန့ၣ်လီၤ.
အ၀ဲစံး၀ဲလၢ“စှၤသီအတီၢ်ပူၤအံၤပှၤကမျၢၢ်ဘၣ်ဃ့ၢ်မှံဟးဖျိးအနီၣ်ဂံၢ်အိၣ်ထီၣ်ဘးလၢအကလးလံ.ကမျၢၢ်ပှၤဃ့ၢ်မှံဟးဖျိးတဖၣ်တနီၤန့ၣ် လဲၤဃ့ၢ်ထီၣ်လၢကီၢ်ဆၢတကပၤအိၣ်.မ့၀ံၤခဲအံၤန့ၣ်ထဲဒၣ်လၢမုၢ်ထီၣ်ဟီၣ်က၀ီၤကီၢ်ဆၢတၢ်လီၢ်တခါလီၤန့ၣ်ပှၤဃ့ၢ်မှံဟးဖျိးအိၣ်အဂၤ (၅၀၀၀)ဘျဲၣ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ပယီၤသုးအံၤလၢကထီၣ်မၤန့ၢ်က့ၤ ထံထၣ်ဒုးယၤသုးကလၢၤလၢ ဟီၣ်က၀ီၤကညီဒီကလုၥ်တၢ်ပၢၢ်ဆၢသုးမုၢ်ဒိၣ်(KNLA) သုးပၥ်ဖှိၣ် ထီၣ်န့ၢ်တ့ၢ်ဃၥ်၀ဲဖဲအပူၤကွံၥ်လါအ့ဖြ့ၣ် ၁၉ သီအနံၤအံၤအဂီၢ်န့ၣ် အ၀ဲသ့ၣ်ဟဲထီၣ်မၤပှဲၤအါထီၣ်အသုးဂံၢ်ဘါအါအါဂီၢ်ဂီၢ် ဒ်အံၤလီၤ အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါတဖၣ်ပဲၥ်ထံနီၤဖးစံး၀ဲန့ၣ်လီၤ.
တကီၢ်ခါခဲအံၤခီဖျိခံခီခံကပၤဒုးယၤတၢ်ဖ့ၣ်စၢကဲထီၣ်အဃိ စးထီၣ်ဖဲတလါအံၤလါအ့ဖြ့ၣ်သၢနွံတနွံအခါန့ၣ် ဒ၀ဲၢ်-ထံခံကီၢ်ဆၢ တီၤသိလိသ၀ီဒီး ကၠီၣ်မဲတီၤသ၀ီ ကမျၢၢ်သ့ၣ်တဖၣ်ဃ့ၢ်ထီၣ်၀ဲဒၣ်အသိး ဖဲမဟါအနံၤစ့ၢ်ကီးခီဖျိပယီၤသုးကျိၤနုၥ်လီၤကဒီးအဃိ သယဲၣ်ငိၣ်(သရက်ငုတ်) သ၀ီ, သ့ၤကါတိသ၀ီဒီး၀ၣ်ကိသ၀ီဖိသ့ၣ်တဖၣ်ဘၣ်ဃ့ၢ်ထီၣ်ကဒီး၀ဲအဂ့ၢ်န့ၣ် တၢ်ပၢၢ်ဆၢသုးကရူၢ် တဖၣ်စံး၀ဲ န့ၣ်လီၤ.
တကးဒံးဘၣ်စးထီၣ်ဖဲဟီၣ်က၀ီၤ(KNLA)သုးပၥ်ဖှိၣ်ထီၣ်န့ၢ်၀ဲ ထံထၣ်ဒုးယၤသုးကလၢၤ၀ံၤလီၢ်ခံန့ၣ် ပယီၤသုးအံၤသူ၀ဲကျိဖးဒိၣ်, လဲၤတ့ၢ်၀ဲတၢ် ဒီးကဘီယူၤလၢထံခံကီၢ်ဆၢဒူသ၀ီတၢ်လီၢ်လၢတၢ်ကဲထီၣ်အခိၣ်အဃၢၤသ့ၣ်တဖၣ်တပယူၥ်ဃီန့ၣ်လီၤ.
ဒ်န့ၣ်အသိးတုၤလၢခဲအံၤခီဖျိဒုးယၤတၢ်ဖ့ၣ်စၢဆဲးကဲထီၣ်အဃိ ဒ၀ဲၢ်-ထံခံကျဲဒီတကျိၤ ဒူသ၀ီကမျၢၢ်သ့ၣ်တဖၣ် အါဒၣ်တက့ၢ် ဘၣ်ဃ့ၢ်ထီၣ်၀ဲအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါဒီးကမျၢၢ်တဖၣ်စံး၀ဲန့ၣ်လီၤ.
