လါဖ့ၤဘြူၤအါရံၤ ၂ သီ, ၂၀၂၆ နံၣ်, ခ့ၣ်အဲးစံၣ်
ကီၢ်ပယီၤ ကလုၥ်ဒူၣ်ဟီၣ်ကဝီၤအပူၤ (၂၀၂၅)လါယနူၤအါရံၤတုၤလါဒံၣ်စ့ဘၢၣ် တနံၣ်အတီၢ်ပူၤ တၢ်မၤကမၣ်မုၣ်ခွါသွံၣ်ထံးဒီး တၢ်စုဆူၣ်ခီၣ်တကးကွီၢ်ကဲထီၣ်ဝဲခဲလၢၥ်(၂၀၉)ဘျီအဂ့ၢ်န့ၣ် ကီၢ်ပယီၤပိၥ်မုၣ်ကရၢ(Women’s League of Burma-WLB) ထုးထီၣ်ပၥ်ဖျါဝဲန့ၣ်လီၤ
ဒ်(WLB)အလံၥ်တၢ်ပၥ်ဖျါပူၤပၥ်ဖျါဝဲအသိးန့ၣ် တၢ်မၤကမၣ်မုၣ်ခွါသွံၣ်ထံးဒီးတၢ်စုဆူၣ်ခီၣ်တကးလၢတၢ်မၤ ကမၣ်ဝဲ(၂၀၉)ဘျီ အံၤန့ၣ်မ့ၢ်ဝဲ ဟံၣ်ပူၤတၢ်စုဆူၣ်ခီၣ်တကး(၁၄၅)ဘျီ, တၢ်မၤတရီတပါ(၂၈)ဘျီ, မုၣ်ခွါသွံၣ်ထံးတၢ်စုဆူၣ်ခီၣ်တကးဒီး တၢ်မၤတံၥ်တၥ် တၢ်(၃၆) ဘျီ, တၢ်မၤကၤပှၤကူပှၤကညီ(၆)ဘျီ,တၢ်ဖျီဆူၣ်ဖျီဆိး(၂)ဘျီဒီး(Cyber Bully)၁ ဘျီအဂ့ၢ်န့ၣ် စံးဝဲန့ၣ်လီၤ.
ဒီးတၢ်စုဆူၣ်ခီၣ်တကးလၢတၢ်မၤကမၣ်ဝဲသ့ၣ်တဖၣ်အံၤအါဒၣ်တက့ၢ်ကဲထီၣ်သးအါလၢဖီၣ်စုကဝဲၤတၢ်သဘံၣ်သဘုၣ်ကဲထီၣ်အါအလီၢ်အဂ့ၢ်န့ၣ် WLB ပှၤဘၣ်မူဘၣ်ဒါ ဖိဒါ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
“ဘၣ်ဃးတၢ်မၤကမၣ်မုၣ်ခွါသွံၣ်ထံးဒီးတၢ်စုခီၣ်တကးလၢအဂၤတဖၣ်ထဲဒၣ်(၂၀၂၅)တနံၣ်အတီၢ်ပူၤန့ၣ်ကဲထီၣ် ၂၀၉ ဘျီညါဒီး တၢ်ကဲထီၣ်သးသ့ၣ်တဖၣ်အံၤအါဒၣ်တက့ၢ်ကဲထီၣ်ဝဲလၢပကိကီၢ်ခီဒိၣ်,စကဲကီၢ်ခီဒိၣ်,တနီသရံၣ်ကီၢ်ခီ,တလၢၤကီၢ်စဲၣ်, ခၠီကီၢ်စဲၣ် ,ကခၠ့ၣ်ကီၢ်စဲၣ်,ကညီကီၢ်စဲၣ်,ကရ့ၣ်နံၣ်,ယိၤဒိၣ်ကီၢ်စဲၣ်သ့ၣ်တဖၣ်အပူၤလီၤ.တၢ်ကဲထီၣ်သးတဖၣ်အံၤပမ့ဘၣ်ကွၢ်န့ၣ် ကဲထီၣ်သး အါလၢဖီၣ်စုကဝဲၤတၢ်သဘံၣ်သဘုၣ်ကဲထီၣ်အလီၢ်လီၤ”အဂ့ၢ်န့ၣ် စံးဝဲန့ၣ်လီၤ.
လၢတၢ်န့ၣ်အဃိဒ်သိးတၢ်သ့ၣ်တဖၣ်အံၤသုတအိၣ်လၢၤတဂ့ၤအဂီၢ်န့ၣ် ပှၤမၤကမၣ်တၢ်ဖိသ့ၣ်တဖၣ်အံၤ တၢ်ကမၤကတၢၢ်ကွံၥ်တၢ် ဟ့ၣ်ဖျဲးထီၣ်လၢတၢ်ကမၣ်ပူၤအဂ့ၢ်န့ၣ် WLB ဃ့ထီၣ်ဝဲဒၣ်န့ၣ်လီၤ.
တကးဒံးဘၣ်လၢ(၂၀၂၅)နံၣ်အတီၢ်ပူၤအံၤစ့ၢ်ကီး ကလုၥ်ဒူၣ်ဟီၣ်ကဝီၤတၢ်လီၢ်လၢဖီၣ်စုကဝဲၤတၢ်သဘံၣ်ကဘုၣ် ကဲထီၣ်အါအလီၢ် တဖၣ်န့ၣ် တနံၣ်ဘၣ်တနံၣ်ကမျၢၢ်ထံဖိကီၢ်ဖိဘၣ်ဃ့ၢ်မှံဟးဖျိးအနီၣ်ဂံၢ်အါထီၣ်ဝဲကွ့ၢ်ကွ့ၢ်ဒီးဖဲန့ၣ်အကျါဆီၣ်ထွဲမၤစၢၤဘၣ်ဝဲ ပကိ, စကဲ,တနီသရံၣ်ကီၢ်ခီဒိၣ်,ကညီကီၢ်စဲၣ်,ကရ့ၣ်နံၣ်,တလၢၤ,ယိၤဒိၣ်ကီၢ်စဲၣ်,အ့ၤဒံၣ်ယၣ်ကီၢ်ဆၢ ပနံၣ်ပူၤရၣ်ကီၢ်စဲၣ် ဒီး ကီၢ်ကၠီၣ်တဲၣ်-ကီၢ်ပယီၤကီၢ်ဆၢကမျၢၢ်ခဲလၢၥ်(၅၄၃၁၁)ဂၤအဂ့ၢ်န့ၣ် WLB စံးဝဲန့ၣ်လီၤ.
ပှၤလၢအဘၣ်ဃ့ၢ်မှံဟးဖျိးတဖၣ်အံၤဒိးန့ၢ်တၢ်ဆီၣ်ထွဲမၤစၢၤဘၣ်ဆၣ်ခီဖျိတၢ်ဆၢကတီၢ်ယံၤဃ့ၢ်ထီၣ်အကျါပၣ်ဃုၥ်ဝဲဖိဒံဖိသၣ်, မိၢ်ဒၢ,သူၣ်က့သးပှၢ်ဒီး လၢကလဲၤစၢၤအဂီၢ်စ့ၢ်ကီးတၢ်ကီတၢ်ခဲအိၣ်အဃိ ပှၤသ့ၣ်တဖၣ်အံၤတဒိးန့ၢ်ဘၣ်ဝဲဆူၣ်ချ့တၢ်အံးထွဲ တၢ်ထွဲ လၢလၢပှဲၤပှဲၤဘၣ်အဂ့ၢ်န့ၣ် WLB ပှၤဘၣ်မူဘၣ်ဒါတဂၤဃီဝဲန့ၣ် စံးအါထီၣ်ဝဲန့ၣ်လီၤ.
“လၢတၢ်(၅)နံၣ်အတီၢ်ပူၤ ကညီကီၢ်စဲၣ်ဃုၥ်ဒီးကလုၥ်ဒူၣ်တၢ်လီၢ်လၢအဂၤတဖၣ်လီၤဆီဒၣ်တၢ်တၢ်လီၢ်လၢဖီၣ်စုကဝဲၤတၢ်သဘံၣ် သဘုၣ်ကဲထီၣ်အါအလီၢ်,ခီဖျိသုးကရူၢ်ပညိၣ်ခးလီၤတၢ်ဒီးကဘီယူၤအဃိကမျၢၢ်ဘၣ်ဃ့ၢ်မှံဟးဖျိးအါကတၢၢ်ဒီးတနံၣ်ဘၣ်တနံၣ်အါထီၣ်ကိးမုၢ်နံၤဒဲးလီၤ.အဃိလၢတၢ်(၅)နံၣ်အတီၢ်ပူၤအဝဲသ့ၣ်ဘၣ်ကွၢ်ဆၢၣ်မဲၥ်ဝဲတၢ်အီၣ်တၢ်အီ,ဆူၣ်ချ့တၢ်ဂ့ၢ်ကီလီၤဆီဒၣ်တၢ်ပှၤမိၢ်ဒၢဒီးဖိဒံဖိသၣ်လၢအဘၣ်ဆဲးကသံၣ်ဒီသဒၢတဖၣ်အံၤကဒိးန့ၢ်ဘၣ်တၢ်ဆူၣ်ချ့တၢ်အံးထွဲကွၢ်ထွဲအဂီၢ်တၢ်ကီတၢ်ခဲအိၣ်ထီၣ်.အဃိတၢ်တၤတၢ်လၢပဘၣ်ကွၢ်ဆၢၣ်မဲၥ်ခဲအံၤတဖၣ်ဒ်သိးပမၤစၢၤအဝဲသ့ၣ်ကန့ၢ်အဂီၢ်ပဒုးသ့ၣ်ညါထံဂုၤကီၢ်ဂၤတၢ်ကရၢကရိဒီးပဃ့ထီၣ်ဃၥ်လၢအဝဲသ့ၣ်အိၣ်စ့ၢ်ကီးအိၣ်ဝဲလီၤ”အဂ့ၢ်န့ၣ် စံးဝဲန့ၣ်လီၤ.
ကမျၢၢ်လၢအဘၣ်ဃ့ၢ်မှံဟးဖျိးတဖၣ်အံၤအါဒၣ်တက့ၢ်ဘၣ်သုးလီၢ်သုးကျဲခီဖျိလၢသုးမီၤစိရိၤအတၢ်ဟူးတၢ်ဂဲၤ အံၤလီၤအဃိ ထံဂုၤကီၢ်ဂၤကရူၢ်ကရၢတဖၣ်ကပတုၥ်ကွံၥ်တၢ်ဆါန့ၢ်သုးမီၤစိရိၤကဘီယူၤသိ,အကျိချံပှၥ်သၣ်,ကသမၢဝဲတၢ်ဃုထၢအယီၤအဘျၣ်လၢသုးကရူၢ်မၤဝဲအံၤ, ဒီးကဒီသဒၢဝဲပိၥ်မုၣ်ပိၥ်မၢၤအတၢ်ခွဲးတၢ်ယၥ်အဂ့ၢ်န့ၣ် (WLB)ဃ့ထီၣ်ဝဲလၢလံၥ်တၢ်ပၥ်ဖျါအပူၤန့ၣ်လီၤ.
