လါဖ့ၤဘြူၤအါရံၤ ၃ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)တၢ်ပၢဟီၣ်ကဝီၤအပူၤ အပူၤကွံၥ်လါယနူၤအါရံၤတလါအတီၢ်ပူၤန့ၣ် တၢ်ဒုးကဲထီၣ်ဝဲ (၁၂၀)ဘျဲၣ်ဒီး ပယီၤသုးတကပၤသံအဂၤ(၃၀)ဘျဲၣ်အကျါပၣ်ဃုၥ်ဝဲသုးရ့ၣ်ခိၣ်- ၂ တဂၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ် ပၥ်ဖျါဝဲ ဖဲတနံၤအံၤန့ၣ် လီၤ.
စးထီၣ်ဖဲလါယနူၤအါရံၤ ၁ သီတုၤ ၃၁ သီ လၢတလါအတီၢ်ပူၤ (သုးက့ ၅)ကညီဒီကလုၥ်တၢ်ထူၣ်ဖျဲး သုးမုၢ်ဒိၣ်(KNLA) သုးပၥ်ဖှိၣ် ဒီးပယီၤသုးအဘၢၣ်စၢၤ တၢ်ဒုးကဲထီၣ်ပၥ်ဖှိၣ်အိၣ်ဝဲ(၁၂၆)ဘျီအဃိ ပယီၤသုးတကပၤသံ (၃၄)ဂၤ အမဲၥ်ညါ ဘၣ်ဒိဘၣ်ထံးဝဲ (၅၈)ဂၤအဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ.
တကးဒံးဘၣ် (သုးက့ ၅)အပှၤမၤဟးဂီၤဝဲ ဒုၣ်ဒါပယီၤသုးအကျိဒိၣ်(120-MM)တခိၣ်အဂ့ၢ်န့ၣ် စံးဝဲန့ၣ်လီၤ
ဒ်န့ၣ်အသိးပယီၤသုး(Jet Fighter)ကဘီယူၤလဲၤတ့ၢ်လီၤဝဲမ့ၣ်ပိၢ်(၂၉)ဘျီ,ဒြိ(၄)ဘျီတကးဒံးဘၣ်ခးလီၤစ့ၢ်ကီးဝဲ(122-MM/120-MM/60-MM) ကျိဖးဒိၣ် (၂၀)ဘျီဆူ ကမျၢၢ်တၢ်အိၣ်တၢ်ဆိး,တၢ်ဖံးအီၣ်မၤအီၣ်လီၢ်ကျဲပူၤအဃိ ကမျၢၢ်ဘၣ်ဒိဝဲ(၁)ဂၤဒီး ဟံၣ်ဃုၥ်ဒီးတၢ်သူၣ်ထီၣ်လၢအဂၤဟးဂီၤဝဲ(၄)ဖျၢၣ်န့ၣ်လီၤ.
တကးဒံးဘၣ်သုးက့ ၅ ဟီၣ်ကဝီၤ (၂၀၂၅)လါယနူၤအါရံၤတုၤလါဒံၣ်စ့ဘၢၣ်လၢတနံၣ်အတီၢ်ပူၤန့ၣ် တၢ်ဒုးကဲထီၣ် ပၥ်ဖှိၣ်အိၣ်ဝဲ (၁,၁၁၃)ဘျီဒီး ဖဲန့ၣ်ပယီၤသုးတကပၤသံဝဲ(၂၈၄)ဂၤ,ဘၣ်ဒိ(၄၅၉)ဂၤဒီး ပှၤသံဘၣ်ဒိဘၣ်ထံး တဖၣ်အံၤအကျါ ပၣ်ဃုၥ်စ့ၢ်ကီးဝဲ G-3, သုးရ့ၣ်ခိၣ်,သုးခိၣ်ဒိၣ်ဖိ,သုးခိၣ်စိ,သုးစကီၤပြံ,သုးစကီၤ, ခိၣ်ဂီၢ်ဂ့ၢ်, သုးခိၣ်ဖိ, ကသံၣ်မူဒါခိၣ်ခဲလၢၥ် (၁၆)ဂၤအဂ့ၢ်န့ၣ် သ့ၣ်ညါဘၣ်လၢတနံၣ်တဘျီတၢ်မၤနီၣ်စရီပူၤအသိးန့ၣ်လီၤ.
အပူၤကွံၥ်လါယနူၤအါရံၤ ၃၀ သီ ခ့ၣ်အဲၣ်ယူၣ်လီၢ်ခၢၣ်ထုးထီၣ်ပၥ်ဖျါဝဲအသိးန့ၣ် ကီၢ်ရ့ၣ်/သုးက့(၇)ဘ့ၣ်တၢ်ပၢဟီၣ်ကဝီၤအပူၤ (၂၀၂၅)တနံၣ်အတီၢ်ပူၤန့ၣ် KNLA သုးပၥ်ဖှိၣ်ထီၣ်န့ၢ်ဝဲပယီၤသုးကလၢၤ(၁၇)ဖျၢၣ်ဒီး တၢ်ဒုးကဲထီၣ်(၂၃၀၅)ဘျီအဃိ ပယီၤသုး တကပၤသံဝဲ(၁၉၇၄)ဂၤဒီးဘၣ်ဒိဝဲ(၁၆၅၅)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
