လါအ့ဖြ့ၣ် ၆ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် ပယၢ်ရီကရူၢ်အပူၤ သုးမိၤစိရိၤလဲၤတ့ၢ်လီၤဝဲမ့ၣ်ပိၢ်လၢသိလ့ၣ်ကျဲပှၤလ့ၢ် ထီၣ်လ့ၢ်လိၤလီၢ်အဃိ ကမျၢၢ်(၅)ဂၤဒီးသိလ့ၣ်(၃)ခိၣ်ဘၣ်ဒိဘၣ်ထံးဟးဂီၤဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲလါအ့ဖြ့ၣ် ၄ သီ ၄း၁၆ တုၤလၢ ၄း၅၀ မံးနံးအဆၢကတီၢ် တၢ်ဒုးကဲထီၣ်တအိၣ်သုးမီၤစိရိၤ(jet fighter)ကဘီယူၤ တ့ၢ်လီၤဝဲ မ့ၣ်ပိၢ် (၄)ဖျၢၣ် တကးဒံးဘၣ်ခးလီၤဃုၥ်စ့ၢ်ကီးဝဲ(အီးလံးကၢး)တဘျီလီၤတဲၥ်ပိၢ်ဖးထီၣ်ဝဲလၢထံလ့ခီၣ် ဃိၣ်ဖိခိၣ် (ဇရပ်)တၢ်အိၣ်ဘှံးလီၢ်ကျဲကပၤန့ၣ်လီၤ.
မ့ၣ်ပိၢ်လီၤတဲၥ်ဘျီဝဲအံၤ ကမျၢၢ်လၢလ့ၢ်ထီၣ်လ့ၢ်လိၤဖဲကျဲအံၤတဖၣ်ဖဲအဝဲသ့ၣ်အိၣ်ဘှံးဖဲန့ၣ်အဆၢကတီၢ် ခီဖျိမ့ၣ်ပိၢ်လီၤတဲၥ်ပိၢ် ဖးထီၣ်အဃိ ဘၣ်ဒိဘၣ်ထံးဝဲ(၅)ဂၤအသိး သိလ့ၣ်(၃)ခိၣ်ဘၣ်ဝဲဒီးမ့ၣ်ပိၢ်အက့အခီဟးဂီၤဝဲတကးဒံးဘၣ် မ့ၣ်အူအီၣ်ဃုၥ်စ့ၢ်ကီးဝဲပှၢ် အဂ့ၢ်န့ၣ် ဒူသထူၣ်ကီၢ်ရ့ၣ်ပှၤဘၣ်မူဘၣ်ဒါစံးဝဲန့ၣ်လီၤ.
ဒ်ပခ့ၣ်အဲးစံၣ်-ကညီတၢ်ကစီၣ်ဒိးန့ၢ်ဘၣ်တၢ်ဘၣ်ဒိဘၣ်ထံးတၢ်ဂီၤအသိးန့ၣ် ပှၤဘၣ်ဒိဘၣ်ထံး(၅)ဂၤအကျါ ကမျၢၢ်ပိၥ်ခွါ(၂)ဂၤ န့ၣ် မ့ၣ်ပိၢ်အက့အခီဘၣ်ဝဲအခီၣ်, အခံကိၢ်တဖၣ်န့ၣ်လီၤ.
ဒ်န့ၣ်အသိးတနံၤဃီဖဲမုၢ်နၤခီ ၁၁း၃၀ ဃၣ်ဃၣ်အဆၢကတီၢ်န့ၣ်စ့ၢ်ကီး သုးမီၤစိရိၤ(jet fighter)ကဘီယူၤလဲၤတ့ၢ်လီၤ ဒံးဝဲမ့ၣ်ပိၢ် လၢ ကမျၢၢ်ပှၤဃ့ၢ်တၢ်ဒုးဖိအိၣ်ဆိးတၢ်လီၢ်တတီၤဒံးဒီး ကဘီယူၤလဲၤခးလီၤတၢ်ဘျီဝဲအံၤတၢ်သံတၢ်ဘၣ်ဒိဘၣ်ထံး တအိၣ်ဘၣ် ဘၣ်ဆၣ် ဒဲတၢ်သူၣ်ထီၣ်တဖၣ်ဟးဂီၤဝဲဒၣ်အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
ထံလ့ခီၣ်ဃိၣ်ဖိတၢ်လီၢ်လၢကဘီယူၤလဲၤတ့ၢ်လီၤမ့ၣ်ပိၢ်အံၤအိၣ်ဝဲဒၣ်လၢပယၢ်ရီဒီးပဲၥ်ဝးထၣ်သဝီအဘၢၣ်စၢၤအသိး ဃိၣ်ဖိခိၣ် တၢ်လီၢ်အံၤ အိၣ်ဝဲလၢကစၢၢ်ကျဲမုၢ်ကပၤအဃိ လီၢ်ကဝီၤကမျၢၢ်လၢအိၣ်ဖဲန့ၣ်တဖၣ်လ့ၢ်ထီၣ်လ့ၢ်လိၤအိၣ်ဝဲထီဘိအဂ့ၢ်န့ၣ် သ့ၣ်ညါဘၣ် န့ၣ်လီၤ.
သုးမီၤစိရိၤအံၤစးထီၣ်ဖဲတလါအံၤလါအ့ဖြ့ၣ်ထီၣ် ၁ သီအနံၤန့ၣ် လၢဘံလ့ကီၢ်ဆၣ် ပယၢ်ရီကရူၢ် လ့က့ၣ်သဝီလၢပယီၤသုးကလၢၤ အိၣ်ဆီလီၤသးအံၤ သုးမီၤစိရိၤအကဘီၤယူၤဟဲတ့ၢ်လီၤဝဲပီၣ်(၃၀၀)မ့ၣ်ပိၢ် တၢ်ဘၣ်ဒိၣ်ဘၣ်ထံးတၢ်ဟးဂူၥ်ဟးဂီၤအိၣ်ထီၣ် အမဲၥ်ညါ တုၤဃီၤဝဲဒၣ်လၢမဟါ ၅ သီအနံၤတစု ကဘီယူၤလဲၤတ့ၢ်လီၤဝဲမ့ၣ်ပိၢ်,ခးလီၤဝဲကျိသၣ်ဒိၣ်လၢဒူသဝီအိၣ်ဘူးဖဲန့ၣ် တဖၣ်အပူၤန့ၣ် လီၤ.
ဒ်န့ၣ်အသိးစးထီၣ်ဖဲန့ၣ်ခီဖျိလၢကဘီယူၤအတၢ်လီၤဘၣ်ယိၣ်အံၤအဃိ ပယၢ်ရီကရူၢ်ဒီးတးပီကရူၢ်ပူၤဒူသဝီကမျၢၢ်ခဲလၢၥ်ဃၣ်ဃၣ် သ့ၣ်တဖၣ်ဃ့ၢ်ထီၣ် ဟးအိၣ်ဝဲလၢတၢ်ဘံၣ်တၢ်ဘၢလီၢ်တုၤလၢခဲအံၤန့ၣ်လီၤ.
