လါယူၤလံ ၂၃ သီ, ၂၀၂၆နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤအပူၤ ပှၤလီၢ်အိၣ်ကမှံပိၥ်မုၣ်ပိၥ်မၢၤသ့ၣ်တဖၣ် မျးကယၤ(၉၀)ဘျဲၣ်ဃၣ်ဃၣ် တူၢ်ဘၣ်ဝဲ တၢ်အိၣ်မူ တၢ်အိၣ်ဆိး တၢ်ဘံၣ်တၢ်ဘၢ တအိၣ်ဝဲလၢအဂီၢ် ဘၣ်အဂ့ၢ် ကညီပှၤဂ့ၢ်ဝီခွဲးယၥ်ကရူၢ်(KHRG-Karen Human Right Group)ဘိးဘၣ်ပၥ်ဖျါဝဲန့ၣ်လီၤ.
ဒ်(KHRG)မၤတၢ်သမံသမိးဃုထံၣ်သ့ၣ်ညါတ့ၢ်ဝဲအသိးန့ၣ်, သုးဟံးန့ၢ် တၢ်စိကမီၤအလီၢ်ခံ မၤထီဒါဝဲပှၤဟီၣ်ခိၣ်ဖိ ခွဲးယၥ်လၢ ကမျၢၢ်လီၢ်ကဝီၤဖိတဖၣ်အဖီခိၣ်, မၤဝဲတၢ်ထီၣ် ဒုး အကလုၥ်ကတပယူၥ်ဃီဒီး တၢ်ဘၣ်ဃ့ၢ်ထီၣ်အိၣ် ကဒုသးခဲအံၤခဲအံၤအဃိ လီၢ်အိၣ်ကဒုတၢ်လီၢ်တဖၣ်အပူၤ ပှၤလီၢ်ကမှံပိၥ်မုၣ်ပိၥ်မၢၤ (၉၃)မျးကယၤ တဒိးန့ၢ် ဘၣ်ဝဲ တၢ်ဘံၣ်တၢ်ဘၢတၢ်ကဟုကယၥ်လၢပှဲၤဘၣ်အဂ့ၢ် (KHRG)ပၥ်ဖျါထီၣ်ဝဲဖဲမဟါ လါယူၤလံ(၂၂)သီအနံ အပူၤ န့ၣ် လီၤ.
ဘၣ်ဃးဒီးပှၤဃ့ၢ်တၢ်ဒုးလီၢ်အိၣ်ကမှံပိၥ်မုၣ်ပိၥ်မၢၤတဖၣ် တဒိးန့ၢ်ဘၣ် တၢ်ဘံၣ်တၢ်ဘၢလၢပှဲၤဘၣ် အဂ့ၢ်အကျိၤ လၢပှဲၤန့ၣ် ကညီဂ့ၢ်ဝီခွဲးယၥ်ကရူၢ် ပှၤကတိၤတၢ်ပၢ စီၤအဲလ်ဘၢး စံးဝဲဒ်အံၤန့ၣ်လီၤ.
“တၢ်ဘံၣ်တၢ်ဘၢဒုပမ့တဲလၢအဖုၣ်န့ၣ်ကမ့ၢ်ဝဲ ကဘီယူၤအတၢ်ထီၣ်ဒုး, တၢ်ခးလီၤကျိ, တၢ်သမံသမိးတြဲၤသ့ၣ် တ ဖၣ် န့ၣ်မ့ၢ်တၢ်လၢ အဒုးအိၣ်ထီၣ်ဝဲ တၢ်တဘံၣ်ဘၢလၢ ပိၥ်မုၣ်လီၢ်အိၣ်ကဒုဖိတဖၣ်အဂီၢ်န့ၣ်လီၤ.ဒီးအဂၤတမံၤ န့ၣ် ခီဖျိဟီၣ်ကဝီၤပူၤကသံၣ်မူၤဘှီးအါဒီးသဲစးတၢ်ဒိၣ်စိတအိၣ်ဝဲဘၣ်အဃိ ပိၥ်မုၣ်တဖၣ်သဂၢၢ်ဘၣ်ဝဲ တၢ်မုၥ်ဖံးမုၥ်ညၣ် အါထီၣ် ကဲထီၣ် တၢ်လီၤဘၣ် ယိၣ်လၢ ပိၥ်မုၣ်တဖၣ်အဂီၢ်န့ၣ်လီၤ.”အဂ့ၢ်စံးဝဲန့ၣ်လီၤ.
ဒ်တၢ်ဃုထံၣ်သ့ၣ်ညါဘၣ်ဝဲအသိးန့ၣ် လီၤဆီဒၣ်တၢ် လီၢ်အိၣ်ကမှံပိၥ်မုၣ်ပိၥ်မၢၤတဖၣ်အံၤ (၈၄)မျးကယၤ တဒိးန့ၢ်ဘၣ်ဝဲ ပှၤဂံၢ်ဝီတၢ်ဆီၢ်ထွဲမၤစၢၤအဖီခိၣ် သဂၢၢ်ဘၣ်ဝဲ တၢ်ဃံး တၢ်စ့ၤအဂ့ၢ် (KHRG)ပၥ်ဖျါဝဲဒၣ်စ့ၢ်ကီးန့ၣ်လီၤ.
လၢန့ၣ်အမဲၥ်ညါ, လီၢ်အိၣ်ကဒုပိၥ်မုၣ် (၇၅)မျးကယၤ သ့ၣ်တဖၣ်အံၤ သဂၢၢ်ဘၣ်ဝဲ တၢ်ဃုတၢ်အိၣ်တၢ်ဆိးလီၢ်ကျဲ တၢ်တၤတၢ်အဖၢမုၢ်အဂ့ၢ် သ့ၣ်ညါဘၣ်န့ၣ်လီၤ.
လၢတၢ်န့ၣ်အဃိ, တၢ်ထုးထီၣ်ပၥ်ဖျါအဖီခိၣ် မုၢ်လၢ်ဝဲလၢ ကရူၢ်ကရၢဘၣ်ထွဲဒီး ထံဂုၤကီၢ်ဂၤကရူၢ်ကရၢတဖၣ် ကပၥ်ပနီၣ်ဝဲ တၢ်ဂဲၤလိၥ်သ့ၣ်တဖၣ်ဒီး ဆီၣ်သခူဝဲလၢ တၢ်ကဟ့ၣ်အါထီၣ်တၢ်ဆီၣ်ထွဲမၤစၢၤကဆဲးလဲၤတၢ်တုၤလၢ အထီၣ်ဘးဆူၣ်တၢ်ပညိၣ်အဂီၢ်အဂ့ၢ်,(KHRG) ပှၤဘၣ်မူဘၣ်ဒါတဖၣ်ပၥ်ဖျါဝဲဒၣ်န့ၣ်လီၤ.
ဒ်န့ၣ်အသိး, ဃ့ထီၣ်ဝဲဒၣ်စ့ၢ်ကီးလၢ တၢ်သုတပၥ်ပနီၣ် သုးကရူၢ်အံၤလၢဖိးသဲစးတဂ့ၤ ဒီး ကဟ့ၣ် တၢ်ဆီၣ်သနံး လၢကရူၢ်ကရၢအံၤအမုၢ်ကျိၤဝဲၤကွၥ်အဖီခိၣ် ဃုၥ်ဒီးထံကီၢ်လၢအဘၣ်ထွဲဒီးအီၤတဖၣ်အဂ့ၢ် ပၥ်ဖျါဝဲ စ့ၢ်ကီးန့ၣ်လီၤ.
ကညီဂ့ၢ်ဝီခွဲးယၥ်ကရူၢ်(KHRG)အံၤ မ့ၢ်ဝဲကရူၢ်ကရၢတဖုလၢ အဟူးဂဲၤဝဲလၢကီၢ်သူလ့ၤ ဟီၣ်ကဝီၤ ကမျၢၢ်လီၢ်ကဝီၤ ဖိတဖၣ် တၢ်ခွဲးတၢ်ယၥ်အဂီၢ်ဒီး ဆီၣ်ထွဲမၤစၢၤဝဲ ပှၤလၢအတူၢ်ဘၣ်တၢ်မၤထီဒါဝဲအခွဲးအယၥ်တဖၣ် အမဲၥ်ညါ ကတိၤန့ၢ် ခဲးဝဲတၢ်လၢ ပှၤတူၢ်ဘၣ်တၢ်တဖၣ် အတၢ်တီတၢ်တြၢ် အဂီၢ်အဂ့ၢ်, သ့ၣ်ညါဘၣ်န့ၣ်လီၤ.
