လါအီကူး ၃ သီ, ၂၀၂၆ နံၣ်, ခ့ၣ်အဲးစံၣ်
လၢခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်အပူၤ ပယီၤသုးခးလီၤကျိဖးဒိၣ်ဒီးကဘီယူၤလဲၤခးလီၤ တၢ်အဃိ ကမျၢၢ်သံဝဲ(၁)ဂၤဒီး ပှၤလီၢ်အိၣ်ကမှံဖိဃုၥ်ဒီးဖိဒံဖိသၣ်ဘၣ်ဒိဘၣ်ထံးဝဲ(၄)ဂၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပၥ်ဖျါဝဲဖဲ တနံၤအံၤ လါအီးကူး ၃ သီအံၤန့ၣ်လီၤ.
ဒ်လံၥ်တၢ်ပၥ်ဖျါပူၤပၥ်ဖျါဝဲအသိးန့ၣ် ဖဲမဟါလါအီကူး ၂ သီအနံၤ ကဘီယူၤလဲၤတ့ၢ်လီၤဝဲပီၣ်(၅၀၀)မ့ၣ်ပိၢ်တဖျၢၣ်လၢ လၢၢ်ဒိၣ်ကီၢ်ဆၣ် လီၢ်မုၥ်သီသဝီပူၤအဃိ သဝီဖိ နီၢ်အ့မ့ၤခၠီ(၁၈)နံၣ်, စီၤသဲလ့(၃၂)နံၣ်ဒီး ဖယါကၠံသဝီဖိ ဖိသၣ် စီၤအဲၣ်တၢ်ခုၣ် (၈)နံၣ်, နီၢ်မုၥ်ဂ့ၤဖီ(၁၃)နံၣ်လၢအဟဲစံၣ်အိၣ်ကဒုသးဖဲန့ၣ်သ့ၣ်တဖၣ်ဘၣ်ဒိဘၣ်ထံးဝဲဒၣ်န့ၣ်လီၤ.
လၢန့ၣ်အမဲၥ်ညါကဘီယူၤဟဲခးလီၤတၢ်ဘျီဝဲအံၤ ဟံၣ်တၢ်သူၣ်ထီၣ်ဟးဂီၤစ့ၢ်ကီးဝဲ(၃)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
တချုးတၢ်ကဲထီၣ်သးအံၤဒံးဘၣ် ဖဲအပူၤကွံၥ်လါယူၤလံ ၃၁ သီအနံၤန့ၣ်စ့ၢ်ကီး ပယီၤသုးလၢအိၣ်နၣ်သၤကွ့ သုးကလၢၤ သ့ၣ်တဖၣ်အံၤ ခးစိဃီၤဝဲ(၁၂၀ မမ) ကျိဖးဒိၣ်တဖျၢၣ်လီၤတဲၥ်ပိၢ်ဖးထီၣ်ဝဲလၢ (တောင်ကြောင်ပေါက်)သဝီပူၤအဃိ စီၤဝ့ထ့ၤ လၢအသးနံၣ်အိၣ်ဝဲ(၆၀)နံၣ်အံၤ သံဝဲတဘျီဃီဖဲတၢ်ကဲထီၣ်သးအလီၢ်အဂ့ၢ်န့ၣ် ခ့ၣ်အဲၣ်ယူၣ် အလံၥ်တၢ်ပၥ်ဖျါအပူၤ ပၥ်ဖျါဝဲဃုၥ်ဝဲ န့ၣ်လီၤ.
လၢၢ်ဒိၣ်ကီၢ်ဆၣ်အမဲၥ်ညါ မူကီၢ်ဆၣ်အပူၤ ဖဲအပူၤကွံၥ်လါယူၤလံ ၁၃ သီအနံၤစ့ၢ်ကီး တၢ်ဒုးကဲထီၣ်တအိၣ် သုးမီၤစိရိၤ(Y-12) ကဘီယူၤ လဲၤတ့ၢ်လီၤမ့ၣ်ပိၢ်တစှၤန့ၢ်အဖျၢၣ်(၂၀)လၢဟံၣ်အူသဝီ, ရှဲဒ့သဝီ ဒီး မံယထါသဝီပူၤအဃိ ကမျၢၢ်ပိၥ်မုၣ်အနံၣ် (၅၀)ဘျဲၣ်အံၤသံဝဲ ၂ ဂၤ တကးဒံးဘၣ် ကျးဆါတၢ် တၢ်သူၣ်ထီၣ်ဟးဂီၤစ့ၢ်ကီးဝဲ(၂)ဖျၢၣ်ကဲထီၣ်ဒံးဝဲန့ၣ်လီၤ.
တၢ်မၤအၢမၤသီလၢသုးမီၤစိရိၤမၤဝဲလၢအတအိၣ်ဒီးပှၤဟီၣ်ခိၣ်ဖိတၢ်ဒိသူၣ်ဒိသးဘၣ်အံၤ ကမျၢၢ်ဃုၥ်ဒီးဖိဒံဖိသၣ်သ့ၣ်တဖၣ် ဘၣ်အိၣ်လၢတၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီ,တဖံးလိမၤဒိးဘၣ်တၢ်လၢအပူၤဖျဲးဒီးတၢ်ဘၣ်ယိၣ်ဘၣ်ဘှီလၢတၢ်ဆၢကတီၢ်န့ၢ်ဝဲ(၅)နံၣ်ဘျဲၣ်အံၤ တုၤလၢခဲအံၤဘၣ်ကွၢ်ဆၢၣ်မဲၥ်ဒံးဝဲတၢ်သံတၢ်ပှၢ်,တၢ်ဘၣ်ဒိဘၣ်ထံးဒီးဘၣ်ဃ့ၢ်မှံဟးဖျိးဒံးဝဲအဖၢမုၢ်အဂ့ၢ်န့ၣ် ခ့ၣ်အဲၣ်ယူၣ် စံးဝဲ န့ၣ်လီၤ.
