လါအီကူး ၆ သီ,၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ရ့ၣ်/သုးက့တၢ်ပၢဟီၣ်ကဝီၤတဖၣ်အပူၤ စှၤသီအတီၢ်ပူၤအံၤ ပယီၤသုးသူဝဲကျိဖးဒိၣ် ဒီးဟးခးလီၤတၢ်ဒီးကဘီယူၤတပယူၥ်ဃီအဃိ ကမျၢၢ်သံဘၣ်ဒိဘၣ်ထံး,တၢ်ဟးဂူၥ်ဟးဂီၤအိၣ်ဝဲအဂ့ၢ်န့ၣ် သ့ၣ်ညါဘၣ်လၢ ခ့ၣ်အဲၣ်ယူၣ်တၢ်ပၥ်ဖျါဒီးပှၤဘၣ်မူဘၣ်ဒါအအိၣ်န့ၣ်လီၤ.
ဒူသထူၣ်ကီၢ်ရ့ၣ်(သုးက့ ၁),ဘျံးဒဝဲၢ်ကီၢ်ရ့ၣ်(သုးက့ ၄),ဒူပျၥ်ယၥ်ကီၢ်ရ့ၣ်(သုးက့ ၆)ဒီးချၢၣ်လွံၢ်ထူၣ်ကီၢ်ရ့ၣ်(သုးက့ ၃) ဟီၣ်ကဝီၤ တဖၣ်အပူၤ စးထီၣ်ဖဲလါအီကူးထီၣ် ၁ သီအံၤန့ၣ် ပယီၤသုးခးလီၤဝဲကျိဖးဒိၣ်အမဲၥ်ညါကဘီယူၤစ့ၢ်ကီးလဲၤခးလီၤတၢ်တပယူၥ်ဃီ လၢ ဒူသဝီကမျၢၢ်အိၣ်ဆိးလီၢ်ကျဲ အဆၢတတဲၥ်ဝဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲလါအီကူး ၄ သီ ဟါခီ ၇း၀၀ ဘျဲၣ်အဆၢကတီၢ် လၢခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁) ကၠဲးထိၣ်ကီၢ်ဆၣ်အပူၤ တၢ်ဒုးကဲ ထီၣ်တအိၣ် ခီၣ်ချ့သုးရ့ၣ်(ခမရ-၃)ခးလီၤဝဲ(၁၂၀ မမ)ကျိဖးဒိၣ် ၅ ဖျၢၣ် ဆူ(လယ်တောင့်ကြီး) ဒီးဖုဝါသံၣ်သဝီအခိၣ် အဃၢၤ အဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံးဝဲန့ၣ်လီၤ.
တကးဒံးဘၣ်တနံၤဃီပယီၤသုးခးလီၤကျိဖးဒိၣ်ဝံၤစးထီၣ်ဖဲ ၁၁း၁၇ နၣ်ရံၣ်ဘျဲၣ်အခါ ကဘီယူၤလဲၤတ့ၢ်လီၤဝဲ ပီၣ်(၃၀၀)မ့ၣ်ပိၢ် ၂ ဖျၢၣ် လီၤတဲၥ်ပိၢ်ဖးထီၣ်ဝဲလၢဆီသုးခံကရူၢ် ဆီသုးခံသဝီဃၢၤဝံၤ မၤကဒီးဖဲ ၁၁း၂၇ မံးနံးအခါ (၃၁၀) အမျိၥ်သုးခးလီၤကဒါဝဲ(၁၂၀ မမ)ကျိဖးဒိၣ် ၂ ဖျၢၣ် ဆူပလိၥ်ခံကရူၢ် ဝါဘိခၠီဒီးစံပၠီ(၅)သဝီတကပၤဒီး လၢန့ၣ်အမဲၥ်ညါဖဲ ၁၁း၄၇ မံးနံး အခါန့ၣ် သုးတြိၤ(၄၄ ) အသုးဝဲၤလီၢ်ခိၣ်သ့ၣ် ခးလီၤဝဲ(၁၂၀ မမ)ကျိဖးဒိၣ်တဖျၢၣ်လၢ ကည့ၤတီၤ ဒီး မိဘီသဝီလီၢ်လံၤ တဖၣ်အံၤအပူၤန့ၣ်လီၤ.
ပယီၤသုးခးလီၤကျိဖးဒိၣ်ဒီးကဘီယူၤလဲၤခးလီၤတၢ်ဘျီဝဲအံၤ တလီၤတဲၥ်ပိၢ်ဖးထီၣ်လၢသဝီပူၤလိၤလိၤဘၣ် ခီဖျိလီၤတဲၥ် ပိၢ်ဖးထီၣ်လၢသဝီချၢဒီးတၢ်ဖံးတၢ်အီၣ်မၤအီၣ်လီၢ်ကျဲအဃိ ကမျၢၢ်တၢ်သံတၢ်ဘၣ်ဒိဘၣ်ထံးတအိၣ်ဝဲဘၣ်ဘၣ်ဆၣ် တၢ်ထူၣ်တၢ်ဘိ တၢ်သူၣ်တၢ်ဖျးသ့ၣ်တဖၣ်ဘၣ်ဒိဘၣ်ထံးဟးဂီၤဝဲအိၣ်အဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံးဝဲန့ၣ်လီၤ.
(သုးက့ ၁)ဟီၣ်ကဝီၤအမဲၥ်ညါဒ်န့ၣ်အသိးလၢခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်(သုးက့ ၄) လၢၢ်မုၢ်လါကီၢ်ဆၣ် တဖိၤကရူၢ် လမဲကီၣ်သဝီအပူၤ ဖဲလါအီကူး ၄ သီ ဟါခီ ၅း၀၀ ဘျဲၣ်အဆၢကတီၢ်န့ၣ်စ့ၢ်ကီး သုးမီၤစိရိၤကဘီယူၤလဲၤတ့ၢ်လီၤ ဝဲ ပီၣ်(၂၅၀)မ့ၣ်ပိၢ် ၂ ဖျၢၣ်ဒံးန့ၣ်လီၤ.
ဒီးလၢကဘီယူၤလဲၤခးလီၤတၢ်ဘျီဝဲအံၤ ကမျၢၢ်ပိၥ်မုၣ်လၢအသးနံၣ်အိၣ်ဝဲ(၆၀)အံၤတဂၤသံဝဲဒီး ဘၣ်ဒိဘၣ်ထံးဝဲ(၁)ဂၤ အကးဒံးဘၣ် ဟံၣ်ဟးဂီၤဝဲ(၃)ဖျၢၣ်အဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲဖဲမဟါလါအီကူး ၅ သီအနံၤန့ၣ်လီၤ.
ဒ်န့ၣ်အသိးတချုးတၢ်ကဲထီၣ်သးအံၤဒံးဘၣ်ဖဲလါအီကူးထီၣ် ၁ သီ ဒီး ၃ သီအနံၤန့ၣ်စ့ၢ်ကီး လၢဒူပျၥ်ယၥ်ကီၢ်ရ့ၣ်(သုးက့ ၆) ကြုၢ်တုကီၢ်ဆၣ်ဒီး ဝီၢ်ရ့ၣ်ကီၢ်ဆၣ် အပူၤ တၢ်ဒုးကဲထီၣ်တအိၣ် ပယီၤသုးခးလီၤဝဲ(၁၂၂ မမ)ကျိဖးဒိၣ်တစှၤန့ၢ်(၅)ဖျၢၣ်ဆူ လိၣ်ရှါသဝီဒီး ကီၣ်ဖီ(ကော့ဖောင်း)သဝီ ပူၤအဃိ ဟံၣ်ဟးဂီၤဝဲ(၃)ဖျၢၣ်ဒီးသဲးထူၣ်ဘၣ်ဒိဘၣ်ထံးဟးဂီၤဝဲ(၅၅)ထူၣ်အဂ့ၢ်န့ၣ် ထုးထီၣ်ပၥ်ဖျါစ့ၢ်ကီးဝဲန့ၣ်လီၤ.
တကးဒံးဘၣ်လၢချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်အပူၤ ဖဲအပူၤကွံၥ်လါအီကူး ၂ သီအနံၤန့ၣ် ခီဖျိကဘီယူၤ လဲၤတ့ၢ်လီၤပီၣ်(၅၀၀)မ့ၣ်ပိၢ်အဃိ ကမျၢၢ်ဘၣ်ဒိဘၣ်ထံး(၄)ဂၤအကျါပၣ်ဃုၥ်ဝဲ ဖိသၣ်(၈)နံၣ်တဂၤဒီး(၁၃)နံၣ်တဂၤ ကဲထီၣ်ဒံးဝဲန့ၣ် လီၤ.
မ့ဘၣ်ကွၢ်ဟီၣ်ကဝီၤတၢ်လီၢ်လၢသုးမီၤစိရိၤကဘီယူၤလဲၤခးလီၤတၢ်ဒီးခးလီၤဝဲကျိဖးဒိၣ်သ့ၣ်တဖၣ်အံၤန့ၢ် မ့ၢ်တၢ်လီၢ်လၢတၢ်ဒုးကဲ ထီၣ်တအိၣ်ဝဲဘၣ် မ့မ့ၢ်တခီပယီမသုးအံၤပညိၣ်ဝဲကမျၢၢ်လိၤလိၤဒ်သိးကမျၢၢ်ကအိၣ်ဝဲဒီးတၢ်ပျံၤတၢ်ဖုးအဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါစံးဝဲန့ၣ်လီၤ.
