လါစဲးပထ့ဘၢၣ် ၂၈ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် လါစဲးပထ့ဘၢၣ် ၂၄ တုၤ ၂၆ လၢသၢသီ အတီၢ်ပူၤ သုးမီၤစိရိၤအံၤသူဝဲကဘီယူၤ,ခးလီၤဝဲကျိဖးဒိၣ်တပယူၥ်ဃီအဃိ ကမျၢၢ်သံကဒီးဝဲ(၁)ဂၤဒီးဘၣ်ဒိဘၣ်ထံးဝဲ(၂)ဂၤ အဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ဒီးမ့ဘၣ်ကွၢ်ဖဲလၢသုးမီၤစိရိၤသူဝဲကျိဖးဒိၣ်ဒီးမၤဝဲတၢ်ထီၣ်ဒုးလၢကလံၤကျါဆူၣ်ဆူၣ်ကိၤကိၤအကတီၢ်အံၤန့ၣ် လၢတကပၤ ဘၣ်ဝဲဒၣ်လၢကီၢ်စဲၣ်သုးမီၤစိရိၤပဒိၣ်ဒီး ဖီၣ်စုကဝဲၤကရူၢ်လၢအထုးဖးသးဒီး KNU ကရၢမိၢ်ပှၢ်အံၤတဖၣ် မၤဝဲတၢ်မုၥ်တၢ်ခုၣ်ဒီး တၢ်ဒိၣ်ထီၣ်ထီထီၣ် (Forum)တၢ်ကူၣ်လိၥ်တၢၣ်ပီၣ်တဲသကိးတၢ်ရဲၣ်တၢ်ကျဲၤအံၤလၢဖၣ်အၣ်ဝ့ၢ်အံၤန့ၣ်လီၤ.
ဖဲလါစဲးပထ့ဘၢၣ် ၂၄ သီ ဟါခီ ၉း၀၀ နၣ်ရံၣ်အဆၢကတီၢ် တၢ်ဒုးကဲထီၣ်တအိၣ် သုးမီၤစိရိၤ(၄၄)ခီၣ်ချ့အသုးဝဲၤလီၢ်ခိၣ်သ့ၣ်အံၤ ခးလီၤ(၁၂၀ မမ)ကျိဖးဒိၣ် (၆)ဖျၢၣ်ဆူဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် တကွံပူၤ(ငှက်ပျောတော)ကရူၢ် စံကိ(ဇီးကုန်း) သဝီဃၢၤ ကမျၢၢ်တၢ်ဖံးအီၣ်မၤအီၣ်လီၢ်ကျီးပူၤအံၤဒီး ဖဲန့ၣ်တၢ်ထူၣ်တၢ်ဘိဟးဂီၤဘၣ်ဒိဘၣ်ထံးဝဲဒၣ်န့ၣ်လီၤ.
ပယီၤသုးခးလီၤကျိဖးဒိၣ်ဖဲန့ၣ်ဝံၤမုၢ်ဆ့ၣ်ထီၣ်လါစဲးပထ့ဘၢၣ် ၂၅ သီ မုၢ်နၤခီ ၁၂း၀၀ နၣ်ရံၣ်ဃၣ်ဃၣ်အဆၢကတီၢ် သုးမီၤစိရိၤ အ(Jet fighter)ကဘီယူၤတဘ့ၣ်လဲၤတ့ၢ်လီၤဝဲပီၣ်(၃၀၀)မ့ၣ်ပိၢ် ၂ ဖျၢၣ် ဆူကၠဲးထိၣ်ကီၢ်ဆၣ် ဆီသုးခံ(ကျောက်ဖျာ)ကရူၢ် အမဲၥ်ညါ (၄၄)ခီၣ်ချ့အဝဲၤလီၢ်ခိၣ်သ့ၣ်အံၤခးလီၤဃုၥ်စ့ၢ်ကီးဝဲ(၁၂၂ မမ)ကျိဖးဒိၣ် ၁ ဖျၢၣ်အဃိ ကီၤကၣ်သဝီ(ကော်ကပ်)သဝီ ပူၤ ကမျၢၢ်ဟံၣ်(၁)ဖျၢၣ်,ကျးဆါတၢ်(၁)ဖျၢၣ်ဒီးသိလ့ၣ်ဟးဂီၤဝဲ(၁)ခိၣ်ဘၣ်ဒိဘၣ်ထံးဟးဂူၥ်ဟးဂီၤဝဲဒၣ်န့ၣ်လီၤ.
တကးဒံးဘၣ်အမဲၥ်ညါမၤကဒီးဖဲလါစဲးပထ့ဘၢၣ် ၂၆ သီ ဂီၤခီ ၉း၄၇ မံးနံးတုၤဃီၤလၢ ၁း၀၈ မံးနံးတစု သုးမီၤစိရိၤအ(Jet fighter) ကဘီယူၤ ၃ ဘ့ၣ် ဒီး (Y-12)ကဘီယူၤ ၁ ဘ့ၣ် လဲၤတ့ၢ်လီၤဝဲမ့ၣ်ပိၢ်ဒီးအီးလံၤကၢၤအသၣ်သ့ၣ်တဖၣ်အံၤဆူ မိဘီ (မိုးဘော), နၣ်စ့ၤ(နတ်စင်)သဝီ ဒီး ခမီၣ်ခွ့ၤ(ခမောက်ခွေ)သဝီဘၢၣ်စၢၤ ဆီသုးခံသဝီဒီး ခၠီစီၣ်(ချောင်းစောက်)သဝီဘၢၣ်စၢၤ ကမျၢၢ်တၢ်ဖံးအီၣ် မၤလီၢ်ကျီးပူၤ န့ၣ်လီၤ.
တကတီၢ်ဃီတၢ်တနံၤဃီဝဲန့ၣ်စ့ၢ်ကီး ၃၁၀ အမျိၥ်သုးအံၤဒီး(၄၄)ခီၣ်ချ့အဝဲၤလီၢ်ခိၣ်သ့ၣ်တဖၣ်အံၤ ခးလီၤဃုၥ်စ့ၢ်ကီးဝဲ(၁၂၀ မမ) , (၁၂၂ မမ)ကျိဖးဒိၣ် ၅ ဖျၢၣ် ဆူဆီသုးခံသဝီဒီး ကၠီၣ်ပိၤကစၢၢ်(ကျောက်ပုံတောင်)တကပၤ ဒံးဒီး မၤကဒီးဖဲဟါခီ ၇း၃၇ မံးနံးန့ၣ် စ့ၢ်ကီး ၄၄ ခီၣ်ချ့အသုးဝဲၤလီၢ်ခိၣ်သ့ၣ်အံၤ ခးလီၤကဒီးဝဲ(၆၀ မမ)ကျိဖးဒိၣ် ၂ ဖျၢၣ် လီၤတဲၥ်ပိၢ်ဖးထီၣ်ဝဲလၢ တကွံပူၤကရူၢ် တကွံပူၤသဝီ လ့နိၣ်ကိ(လင်းနို့ကုန်း)တၢ်ဖံးအီၣ်မၤလီၢ်ကျီးပူၤန့ၣ်လီၤ.
ဒီးပယီၤသုးခးလီၤကျိဖးဒိၣ်ဘျီဝဲအံၤ ကမျၢၢ်ဒီၤမၣ်အဲၤသံၤခဲၤ(၅၈)နံၣ်လၢအမ့ၢ်ဝဲပှၤမၤတၢ်ဖိလၢအိၣ်ဟဲလၢ ဆီထံးဝ့ၢ်အံၤသံဝဲဒီး အူဝ့ၤယၤ(၄၀)နံၣ်, မၣ်စၤဒၤမၠ့ၣ်မိၤ(၂၅)နံၣ်သ့ၣ်တဖၣ်အံၤဘၣ်ဒိဘၣ်ထံးဝဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်လီၢ်ကဝီၤကမျၢၢ်စံးဝဲအသိးန့ၣ် ဟီၣ်ကဝီၤပူၤလၢကဘီယူၤဒီးပယီၤသုးခးလီၤကျိဖးဒိၣ်အံၤန့ၣ် ဖဲမဟါ လါစဲးပထ့ဘၢၣ် ၂၇ သီအံၤ စ့ၢ်ကီး ပယီၤသုးခးလီၤဒံးဝဲကျိဖးဒိၣ်အိၣ်ဘၣ်ဆၣ် ဘၣ်ဃးတၢ်ဂ့ၢ်အံၤ ပခ့ၣ်အဲးစံၣ်-ကညီတၢ်ကစီၣ် ပၥ်ဂၢၢ်ပၥ်ကျၢၤဝဲတန့ၢ်ဒံးဘၣ် န့ၣ်လီၤ.
တချုးတၢ်ကဲထီၣ်သးအံၤဒံးဘၣ်တနံၤဃီဖဲလါစဲးပထ့ဘၢၣ် ၂၄ သီအနံၤစ့ၢ်ကီး ဒီကလုၥ်ဃူဖိးပဒိၣ်(NUG)တၢ်ဒီသဒၢစုတီၤဖီၥ်လၥ် ကီၢ်ခီဟီၣ်ကဝီၤလီၤဆီသုးဝဲၤလီၢ်ခိၣ်သ့ၣ်လၢအအိၣ်ဆီလီၤသးဖဲကၠဲးထိၣ်ကီၢ်ဆၣ်ဒီးဆီထံးကီၢ်ဆၣ်အဆၢအံၤန့ၣ် သုးမီၤစိရိၤကဘီ ယူၤလဲၤတ့ၢ်လီၤဒံးဝဲပီၣ်(၅၀၀)မ့ၣ်ပိၢ် ၆ ဖျၢၣ်ဒံးဒီး ဖဲန့ၣ်(CDM)ကလံၤသုးပှၤဘၣ်မူဘၣ်ဒါဃုၥ်ဒီးတၢ်ပၢၢ်ဆၢကရူၢ်(PDF)ဖိတဖၣ် သံတစှၤန့ၢ်ဝဲ (၆)ဂၤကဲထီၣ်ဒံးဝဲန့ၣ်လီၤ.
လၢတၢ်န့ၣ်အဃိစးထီၣ်ဖဲန့ၣ်တၢ်ပၢၢ်ဆၢကရူၢ်ကရၢလၢအိၣ်ဆီလီၤသးဖဲကၠဲးထိၣ်ဟီၣ်ကဝီၤအပူၤတဖၣ် သုးမီၤစရိၤအံၤသူဝဲကျိဖး ဒိၣ်,ကဘီယူၤ ပညိၣ်လဲၤတ့ၢ်လီၤဝဲမ့ၣ်ပိၢ်တယူၥ်ဃီကိးမုၢ်နံၤဒဲးဃၣ်ဃၣ်ဘၣ်ဟဲအိၣ်ထီၣ်ဝဲအဂ့ၢ်န့ၣ် ပှၤလၢဘူးဒီးတၢ်ပၢၢ်ဆၢ ကရူၢ်အံၤတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
“ခဲအံၤလၢကၠဲးထိၣ်တကပၤန့ၣ်ပယီၤသုးခးလီၤကျိဖးဒိၣ်တလီၢ်လီၢ်လီၤ.( PDF)မ့လဲၤတုၤတၢ်လီၢ်ဖဲလဲၣ်န့ၣ်အဝဲသ့ၣ်သ့ၣ်ညါဝဲလီၤ ဘၣ်မနုၤအဃိလဲၣ်န့ၣ်အဝဲသ့ၣ်တၢ်ပညိၣ်အိၣ်လၢကမၤလီၤမၢ်(PDF)မီၤနီၤ.ဖဲမဟါန့ၣ်ပနၢ်ဟူလၢကဘီယူၤဟဲခးလီၤတၢ်ဒံးဘၣ်ဆၣ် ပတသ့ၣ်ညါလီၤတံၢ်ဒံးဘၣ်.”အဂ့ၢ်န့ၣ် ပဲၥ်ထံနီၤဖးစံးဝဲန့ၣ်လီၤ.
လၢကမျၢၢ်ထံဖိကီၢ်ဖိအဖီခိၣ်သုးမီၤစိရိၤသူဝဲကျိဖးဒိၣ်,ကဘီယူၤဟးခးလီၤတၢ်ဆူၣ်ဆူၣ်ကိၤကိၤအကတီၢ်အံၤန့ၣ် ဖဲလါစဲးပထ့ဘၢၣ် ၂၆ သီ ဒီး ၂၇ သီ လၢဖၣ်အၣ်ဝ့ၢ် ကွဲၢ်ကဘီဘျီၣ်အပူၤန့ၣ် ကညီကီၢ်စဲၣ်သုးမီၤစိရိၤပဒိၣ်တီခိၣ်ရိၣ်မဲမၤဝဲ တၢ်မုၥ်တၢ်ခုၣ်ဒီး တၢ်ဒိၣ် ထီၣ်ထီထီၣ်(Forum)တၢ်ကူၣ်လိၥ်တၢၣ်ပီၣ်တဲသကိးအံၤန့ၣ်လီၤ.
ဒီးဖဲလၢတၢ်ကူၣ်လိၥ်တၢၣ်ပီၣ်တဲသကိးပူၤအခါန့ၣ် KNPC ကမံးတံၥ်လၢ အပၣ်ဃုၥ်ဝဲ ကညီတၢ်မုၥ်တၢ်မုၣ်ကီၣ်ကး (KNU/KNLA-PC), တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ် (DKBA)ဒီး ကညီပၣ်တံၣ်ခိၣ်နၢ်ပှၤဘၣ်မူဘၣ်ဒါ, တၢ်ဘူၣ်တၢ်ဘါခိၣ်နၢ်တကးဒံးဘၣ် ခ့ၣ်အဲၣ်ယူၣ် ကရၢခိၣ်လီၢ်လံၤ စီၤမူၤတူစ့ဖိ, စီၤစွ့ၤမီ, မါည့မီၤ ဃုၥ်ဒီးခိၣ်နၢ်ဘၣ်ထွဲလၢအဂၤ တဖၣ် လဲၤထီၣ်ဝဲဒၣ်န့ၣ်လီၤ.
လၢလီၢ်ကဝီၤတၢ်မုၥ်တၢ်ခုၣ်အဂီၢ်ဖဲသုးမီၤစိရိၤပဒိၣ်မၤဝဲတၢ်ကူၣ်လိၥ်တၢၣ်ပီၣ်တဲသကိးအတီၢ်ပူၤအံၤ တကတီၢ်ဃီလၢအတကပၤ သူဝဲဒၣ်ကျိဖးဒိၣ်,ကဘီယူၤခးလီၤတၢ်လၢကမျၢၢ်ဒူသဝီ,တၢ်ဖံးအီၣ်မၤအီၣ်လီၢ်ကျဲဒ်အံၤအဖီခိၣ် တၢ်ပဲၥ်ထံနီၤဖးတၢ်သံကွၢ်ဟဲ အိၣ်ထီၣ်ဝဲလၢ ကမျၢၢ်ဃုၥ်ဒီးတၢ်ပၢၢ်ဆၢကရူၢ်ကရၢဖိတဖၣ်အဘၢၣ်စၢၤန့ၣ်လီၤ.
