လါအီးကထိဘၢၣ် ၁၀သီ, ၂၀၂၆နံၣ်, ခ့ၣ်အဲးစံၣ်,
ကီၢ်ပယီၤအပူၤ အဲၣ်နံၤညိၣ်တၢ်ဒိဘၣ်အဃိ တၢ်ကိၢ်ဒိၣ်န့ၢ်ဒံး အပူၤကွံၥ်နံၣ် အဖီခိၣ် မိၢ်ဒီး ကညီကီၢ်စဲၣ်ဟီၣ်ကဝီၤအပူၤ ပှၤသူၣ်ဖျးတၢ်ဖိတဖၣ် ဘၣ်ယိၣ်ဘၣ်ဘှီဝဲလၢ တနံၣ်အံၤ ရီဘၢၣ်အထုး ဟးထီၣ်ကစှၤလီၤဝဲအဂ့ၢ်, သ့ၣ်ညါဘၣ်န့ၣ်လီၤ.
(၂၀၂၆-၂၇)နံၣ် အပူၤ အဲၣ်နံၤညိၣ်တၢ်ဒိဘၣ်အဃိ, ဟီၣ်ကဝီၤလၢတၢ်ကိၢ်ဒိၣ်ဆူၣ်ဝဲတၢ်လီၢ်တဖၣ်အကျါ ကီၢ်ပယီၤ ကလံၤထံး, ကညီ,မိၢ်ဒီး တနီသရံး တၢ်လီၢ်တဖၣ် ပၣ်ဃုၥ်ဝဲဒၣ်အဂ့ၢ် မူခိၣ်ကလံၤသီၣ်ဂီၤပှၤသ့ပှၤဘၣ်တဖၣ် ထိၣ်ဒွးကွၢ်ဝဲဒၣ်န့ၣ်လီၤ.
တကီၢ်ခါခဲအံၤ ဘၣ်ဖဲ မူခိၣ်စူၤလၢၥ်ဒီး တၢ်စးထီၣ် ကွးဝဲ ရီဘၢၣ်ထုး အဆၢကတီၢ်ဒီး ရီဘၢၣ်ထုးဟးထီၣ်စှၤဝဲဒ်ညီနုၢ် အသိးဘၣ်ဆၣ်, တၢ်ကိၢ်ဆူၣ်ဒိၣ်န့ၢ်ဒံး နံၣ်လၢ အပူၤကွံၥ် အဃိ ပှၤသူၣ်ဖျးတၢ်ဖိတဖၣ် ဘၣ်ယိၣ်ဝဲလၢ အထုးဟးထီၣ် ကစှၤန့ၢ်ဒံးအလီၢ်န့ၣ်လီၤ.
ကီးတရံး ပှၤမၤအီၣ်ရီဘၢၣ် တၢ်ဖံးတၢ်မၤတဂၤ စံးဝဲဒၣ်လၢ “အခဲအံၤ တၢ်စးထီၣ်ကွးရီဘၢၣ်ထုး သီသီဒံးလီၤအဃိ အန့ၢ်စှၤန့ၢ် မ့ၢ်ဒၣ်ညီနုၢ်လီၤ. ဘၣ်ဆၣ် တၢ်မ့ၢ်ဆဲးကိၢ်ဒ်အံၤန့ၣ် ရီဘၢၣ်ထုး ကလီၤစှၤအါန့ၢ်အလီၢ်တစဲး, ဘၣ်မနုၤအဃိလဲၣ်န့ၣ် ရီဘၢၣ်န့ၣ်တၢ်ဒ်ခုၣ်ဒ်လီၤန့ၣ်လီၤ. အခဲအံၤ တၢ်ခုၣ်စှၤဒီး တၢ်ကိၢ်အါအဃိ ရီဘၢၣ် ဃ့ထီ အထုးလီၤစှၤဝဲန့ၣ်လီၤ.”အဂ့ၢ် စံးဝဲန့ၣ်လီၤ.
အဂၤတကပၤ ခီဖျိလၢ တၢ်လုၢ်တၢ်ပှ့ၤထီၣ်ဝဲဒီး ဟီၣ်စီတထၢၣ်အပှ့ၤ အိၣ်ဝဲလၢ (၂၀၀၀၀) ကၠးအဃိ ပှၤသူၣ်ဖျးတၢ်ဖိတနီၤ ပှ့ၤသူဝဲ ဟီၣ်စီတန့ၢ် အိၣ်ဝဲန့ၣ်လီၤ.
လၢတၢ်န့ၣ်အဃိ, ခီဖျိလၢ တၢ်ပှ့ၤသူဝဲ ဟီၣ်စီတန့ၢ်လၢၤဘၣ်အဖီခိၣ် ရီဘၢၣ်ထုး ဟးထီၣ် စှၤတၢ်အိၣ်သး ကဲထီၣ်သ့ဝဲအဂ့ၢ် မိၢ်ကီၢ်စဲၣ် ကၠဲးမယီကီၢ်ဆၣ် မယ့ကိ သဝီ ပှၤမၤရီဘၢၣ်တၢ်ဖံးတၢ်မၤတဂၤ စံးဝဲန့ၣ်လီၤ.
ကီၢ်ပယီၤအပူၤ ရီဘၢၣ်ဟးထီၣ်အါတၢ်လီၢ်တဖၣ်အံၤ မ့ၢ်ဝဲ မိၢ်ကီၢ်စဲၣ် ဒီး တနီသရံးကီၢ်ခီဒိၣ် အမဲၥ်ညါ ကညီကီၢ်စဲၣ်, ပကိဒီး ဝ့ၢ်တကူၣ် သ့ၣ်တဖၣ်အံၤ တၢ်သူၣ်ဝဲ ရီဘၢၣ် အိၣ်အါဝဲဘၣ်ဆၣ်, တၢ်စူၤခါကတီၢ် တၢ်ဘၣ်ပတုၥ်ဃုၥ်ဝဲ တၢ်ကွးရီဘၢၣ်ထုးတၢ်ဖံးတၢ်မၤအိၣ်ဝဲန့ၣ်လီၤ.
လၢတၢ်န့ၣ်အဃိ, ရီဘၢၣ်ဟးထီၣ်အါကတၢၣ် မိၢ်ကီၢ်စဲၣ်အပူၤ အပူၤကွံၥ် (၂၀၂၆)နံၣ် လါယနူၤအါရံၤ-လါဖ့ၤဘြူၤအါရံၤ အပူၤ ရီဘၢၣ် တပီၢ်န့ၣ် အပှ့ၤ အိၣ်ဝဲ (၂၈၀၀)ကၠး အသိး, နံၣ်ဘူးကလၢၥ် တၢ်စးထီၣ်က့ၤကွး ရီဘၢၣ်ထုး ကတီၢ် အပှ့ၤအိးထီၣ်အိၣ်ဝဲလၢ တပီၢ်န့ၣ် (၃၈၀၀)ကၠး အဂ့ၢ် မုၢ်ကျိၤဝဲၤကွၥ် ဒီး ပှၤကူၣ်လဲၤမၤကၤတၢ်ဝဲၤကျိၤတဖၣ် ထုးထီၣ်ပၥ်ဖျါဝဲဒၣ်န့ၣ်လီၤ.
ဒ်န့ၣ်အသိး, ကီၢ်ပယီၤ ရီဘၢၣ် (၇၅) မျးကယၤ သ့ၣ်တဖၣ်အံၤ ဘၣ်တၢ်ဆှၢဝဲဆူ တရူးထံကီၢ် တဆီဆူ မလ့ရှါ, အ့ၣ်ဒိၣ်နံရှါ, စ့ကဖိ, ခိရံယါ အ့ဒံၣ်ယၣ် ဒီး ယပၣ် ထံကီၢ် တဖၣ်အဂ့ၢ်, သ့ၣ်ညါဘၣ်န့ၣ်လီၤ.
