လါစဲးပထ့ဘၢၣ် ၃၀သီ, ၂၀၂၄နံၣ်, ခ့ၣ်အဲးစံၣ်,
(၂၀၂၄)နံၣ်လါအီကထိဘၢၣ်(၁)သီတုၤလၢ(၁၅)သီအပူၤ,သုးကီၣ်ကးဘိးဘၣ်ရၤလီၤဝဲလၢကမၤဝဲတၢ်ထၢဟံၣ်ခိၣ်စရီတၢ်ရဲၣ်တၢ်ကျဲၤအဖီခိၣ်,သုးကီၣ်ကးအတၢ်ရဲၣ်တၢ်ကျဲၤအံၤလ့ၤတက့ၤကဲထီၣ်လိၣ်ထီၣ်ဝဲတသ့ဘၣ်အဂ့ၢ်,ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢတကပၤစံးဝဲန့ၣ်လီၤ.
တကီၢ်ခါခဲအံၤထံရုၢ်ကီၢ်သဲးတၢ်အိၣ်သးအဖီခိၣ်သုးကီၣ်ကးအတၢ်မၤအံၤတကြၢးဝဲဘၣ်ဝဲဘၣ်ဒီးခ့ၣ်အဲၣ်ယူၣ်တၢ်ပၢဟီၣ်ကဝီၤအပူၤတၢ်လီၢ်တၢ်ကျဲၤတနီၤတၢ်ပၢၢ်ဆၢသုးပၢၤဃၥ်ကွံၥ်လံဝဲအဃိသုးကီၣ်ကးအတၢ်ထၢဟံၣ်ခိၣ်စရီအံၤကဲထီၣ်ဝဲတသ့ဘၣ်အဂ့ၢ်,ခ့ၣ်အဲၣ်ယူၣ်ပှၤကတိၤတၢ်ပၢပဒိၣ်စီၤကျၢၤစ့စံးဝဲဒ်အံၤန့ၣ်လီၤ.
အဝဲစံးဝဲလၢ“သုးကီၣ်ကးတကပၤစံးဝဲလၢကမၤဝဲတၢ်ထၢဟံၣ်ခိၣ်စရီန့ၣ်ပဝဲပထံၣ်လၢကတီၢ်ခဲအံၤတၢ်တကြၢးမၤဝဲတၢ်ထၢဟံၣ်ခိၣ်စရီဘၣ်,ဘၣ်မနုၤအဃိလဲၣ်န့ၣ်,ခီဖျိထံကီၢ်ဒီတဘ့ၣ်ပတီၢ်ခဲအံၤပၢြပးတၢ်ဖံးတၢ်မၤလီၤတံၢ်လီၤဆဲးတအိၣ်နီတမံၤဘၣ်အဃိန့ၣ်လီၤ.ဒီးသုးကီၣ်ကးကမၤဝဲတၢ်ထၢစရီအံၤန့ၣ်ကလုၥ်ဒူၣ်ကိးဖုဒဲးစုၥ်စုၥ်တတူၢ်လိၥ်ဝဲဘၣ်တကးဘၣ်,ဟီၣ်ကဝီၤတဖၣ်အပူၤခဲအံၤအါတက့ၢ်တၢ်လီၢ်တၢ်ကျဲတဖၣ်န့ၣ်ဖီၣ်စုကဝဲၤတၢ်ပၢၢ်ဆၢကရူၢ်ပၢၤဃၥ်ဝဲန့ၣ်လံအဃိန့ၣ်အဝဲသ့ၣ်တၢ်မၤအံၤကဲထီၣ်လိၣ်ထီၣ်ဝဲတသ့ဘၣ်”အဂ့ၢ်စံးဝဲန့ၣ်လီၤ.
သုးကီၣ်ကးအံၤလၢတၢ်ကမၤဝဲတၢ်ထၢဟံၣ်ခိၣ်စရီအဂီၢ်,အပူၤကွံၥ်(၂၀၁၄)နံၣ်အပူၤဒိးန့ၢ်ဘၣ်ဝဲတၢ်ဆီၣ်ထွဲလၢဟီၣ်ခိၣ်ဒီဖျၢၣ်ဘီမုၢ်စၢဖှိၣ်ကရၢအအိၣ်,အိၣ်ဝဲအဃိမၤတ့ၢ်ဝဲတၢ်ထၢဟံၣ်ခိၣ်စရီအိၣ်ဝဲဒီးအခဲအံၤစ့ၢ်ကီးဆိမိၣ်ဝဲလၢကဒိးန့ၢ်ဘၣ်တၢ်ဆီၣ်ထွဲမၤစၢၤအဖီခိၣ်ရဲၣ်ကျဲၤဝဲလၢကမၤဝဲတၢ်ထၢဟံၣ်ခိၣ်စရီလီၤအဂ့ၢ်,(ပဒိၣ်စီၤကျၢၤစ့)စံးအါထီၣ်ဝဲန့ၣ်လီၤ.
လၢန့ၣ်အမဲၥ်ညါ,သုးကီၣ်ကးအတၢ်ရဲၣ်ကျဲၤဝဲအံၤအပူၤမုၢ်လၢ်ဝဲလၢကဒိးန့ၢ်ဘၣ်ဖိးမံသဲးစးတၢ်ပၥ်ပနီၣ်အသိး,လၢကဒိးန့ၢ်ဘၣ်ဖိးမံသဲးစးတၢ်ပၥ်ပနီၣ်အဂီၢ်,ဂုၢ်ကျဲးစၢးဝဲလၢထံဂုၤကီၢ်ဂၤအမဲၥ်ညါသပှၢ်ပှၢ်လၢကျဲအဘိဘိအိၣ်ဝဲအဂ့ၢ်,စံးအါထီၣ်ဝဲဒၣ်န့ၣ်လီၤ.
တကတီၢ်ဃီ,သုးကီၣ်ကးအတၢ်မၤတၢ်ထၢဟံၣ်ခိၣ်စရီတၢ်ရဲၣ်တၢ်ကျဲၤအံၤ,ခ့ၣ်အဲၣ်ယူၣ်တကပၤလ့ၤတက့ၤတတူၢ်လိၥ်ဝဲဘၣ်ဒီးထီဒါဝဲအသိး,ကလုၥ်ဒူၣ်ဖိအဂၤတဖၣ်စ့ၢ်ကီးတူၢ်လိၥ်ဝဲတသ့ဘၣ်အဖီခိၣ်,ထုးထီၣ်ပၥ်ဖျါဘိးဘၣ်ရၤလီၤဝဲလၢတၢ်တဘၣ်မၤဘၣ်ထွဲသးဒီးသုးကီၣ်ကီၣ်အတၢ်ထၢဟံၣ်ခိၣ်စရီအံၤဘၣ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
တကးဒံးဘၣ်,သုးကီၣ်ကးအတၢ်မၤဝဲဟံၣ်ခိၣ်စရီတၢ်သံကွၢ်လံၥ်လဲၢ်တၢ်ဘၣ်ကွဲးလီၤတၢ်ဂ့ၢ်တၢ်ကျိၤအပူၤ,သုးကီၣ်ကးဆီတလဲက့ၤဝဲ“ကလုၥ်ဒူၣ်”အလီၢ်ဆူ“တၢ်ကတိၤကျိၥ်လၢဟံၣ်ဃီအပူၤ”အိၣ်ဝဲဒီးတၢ်ထၢဟံၣ်ခိၣ်စရီတၢ်ရဲၣ်တၢ်ကျဲၤအံၤကမၤဝဲလၢကီၢ်ပယီၤအပူၤတၢ်လီၢ်ကိးတီၤဒဲးအပူၤအဂ့ၢ်,သ့ၣ်ညါဘၣ်န့ၣ်လီၤ
ဒ်န့ၣ်အသိး,တၢ်ထၢဝဲဟံၣ်ခိၣ်စရီတၢ်ရဲၣ်တၢ်ကျဲၤအံၤမ့ၢ်ဝဲသုးကီၣ်ကးအတၢ်ကတဲၤကတီၤဆိပၥ်ဝဲတၢ်ကမၤလီၤတံၢ်တၢ်ဖးအနီၢ်ဂံၢ်နီၢ်ဒွးလၢ(၂၀၂၅)နံၣ်လါနိၣ်ဝ့ဘၢၣ်တၢ်အယိၥ်အဘျၣ်အတၢ်ဃုထၢအဂီၢ်အဂ့ၢ်သ့ၣ်ညါဘၣ်န့ၣ်လီၤ.
လါစဲးပထ့ဘၢၣ် ၂၇သီ, ၂၀၂၄နံၣ်, ခ့ၣ်အဲးစံၣ်,
လၢကဘှါဆှဲကီၢ်ပယီၤထံရူၢ်ကီၢ်သဲးတၢ်ဂ့ၢ်ကီလၢထံရူၢ်ကီၢ်သဲးအကျဲသနူအဂီၢ်န့ၣ် သုးကီၣ်ကးကွဲမုၥ်ဝဲကလုၥ်ဒူၣ် ဖီၣ်စုကဝဲၤကရူၢ်ကရၢဒီးတၢ်ဒီသဒၢကမျၢၢ်သုး(PDF)တဖၣ်လၢကတၢၤကွံၥ်စုက၀ဲၤတၢ်စုဆူၣ်ခီၣ်တကးကျဲသနူ၀ံၤကနုၥ်လီၤဆူထံရူၢ်ကီၢ်သဲးပၣ်တံၣ်ဒီးတၢ်ဃုထၢအကျိၤအကျဲပူၤအဂ့ၢ်န့ၣ် ထုးထီၣ်ပၥ်ဖျါ၀ဲဖဲပၥ်ဖျါဝဲဖဲမဟါလါစဲးပထ့ဘၢၣ် (၂၆)သီအနံၤန့ၣ်လီၤ.
ဒ်သုးကီၣ်ကးအလံၥ်တၢ်ဘိးဘၣ်ရၤလီၤပူၤပၥ်ဖျါ၀ဲအသိးန့ၣ် ခီဖျိတၢ်သူ၀ဲဖီၣ်စုကဝဲၤကျဲဒီးတၢ်စုဆူၣ်ခီၣ်တကးကျဲသနူ အဃိကီၢ်ပယီၤထံကီၢ်ဘၣ်ကီဘၣ်ခဲ,ကမျၢၢ်တၢ်စုလီၢ်ခီၣ်ခိၣ်ဘၣ်ဟးဂီၤဘၣ်သံဝဲဒီးတကးဒံးဘၣ်တံၥ်တၥ်ဝဲထံကီၢ်တၢ်လဲၤထီၣ်လဲၤထီအဖီခိၣ်ကကွၢ်ထံက့ၤတၢ်ကဲထီၣ်သးတဖၣ်ဒီးဒ်သိးထံကီၢ်တဘ့ၣ်အံၤကအိၣ်ဒီးတၢ်မုၥ်တၢ်ခုၣ်,တၢ်လဲၤထီၣ်လဲၤထီအဂီၢ် ကွဲမုၥ်ဝဲကလုၥ်ဒူၣ်ဖီၣ်စုကဝဲၤကရူၢ်ကရၢဃုၥ်ဒီး(PDF)သ့ၣ်တဖၣ်လၢ ကပၥ်ဖှိၣ်မၤသကိးက့ၤတၢ်ဒီး ထံဖိကီၢ်ဖိအဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါ၀ဲန့ၣ်လီၤ.
လၢန့ၣ်အမဲၥ်ညါလံၥ်တၢ်ပၥ်ဖျါအပူၤ သုးကီၣ်ကးအတၢ်ကွဲမုၥ်ဝဲကလုၥ်ဒူၣ်ဖီၣ်စုကဝဲၤကရူၢ်ကရၢဒီး(PDF)သ့ၣ် တဖၣ်အိၣ်ဝဲဘၣ်ဆၣ် တၢ်ကွဲမုၥ်အပူၤအံၤထံၣ်ဘၣ်လၢဒီကလုၥ်ဃူဖိးပဒိၣ်(NUG)ကရူၢ်ကရၢအံၤ တပၣ်ဃုၥ်ဝဲဘၣ် န့ၣ်လီၤ.
ဘၣ်ဃးသုးကီၣ်ကးအတၢ်ကွဲမုၥ်ဘျီ၀ဲအံၤ တမ့ၢ်တၢ်သးအိၣ်နီၢ်နီၢ်လၢတၢ်ကဘှါဆှဲထံရူၢ်ကီၢ်သဲးတၢ်ဂ့ၢ်ကီလၢ စီၤနီၢ်ခိၣ်ဘၣ်ဒီးမ့မ့ၢ်တခီမ့ၢ်ဒၣ်တၢ်ကမၤပူၤဖျဲးထီၣ်အနီၢ်ကစၢ်သးလၢတၢ်ဂ့ၢ်ကီအပူၤလီၤအဂ့ၢ်န့ၣ် ခ့ၣ်အဲၣ်ယူၣ် ပှၤကတိၤတၢ်ပၢ ပဒိၣ်စီၤကျၢၤစ့ စံးဝဲဒ်အံၤန့ၣ်လီၤ.
အဝဲစံးဝဲလၢ“ဘၣ်ထွဲဒီးသုးကီၣ်ကးအတၢ်ဘိးဘၣ်ရၤလီၤတခါအံၤန့ၣ်,အဝဲသ့ၣ်ဆဲးကျိးဧါတဆဲးကျိးပှၤဧါဒုယတသ့ၣ်ညါဘၣ်.ဘၣ်ဆၣ်ဒ်ပတၢ်ပၥ်သးအသိးန့ၣ်အပူၤကွံၥ်ပဂုၥ်ကျဲးစၢးထံၣ်လိၥ်တဲသကိးဒီးအဝဲသ့ၣ်အဘျီတဖၣ် အဘျီလၢတၢ်ကဘှါဆှဲထံရူၢ်ကီၢ်သဲးဂ့ၢ်ဝီလၢစီၤနီၢ်ခိၣ်လိၤလိၤတီတီဘၣ်ဆၣ်ပထံၣ်ဘၣ်လၢအဝဲသ့ၣ်တအၢၣ်လီၤတူၢ်လိၥ်ဝဲဘၣ်.အဃိန့ၣ်အတၢ်ကွဲမုၥ်ဘျီဝဲအံၤသနၥ်က့မ့ၢ်ဒၣ်တၢ်အယိၥ်အဘျၣ်လီၤ.ဒီးအဝဲသ့ၣ်တၢ်ကွဲမုၥ်အံၤန့ၣ်ပနၢ်ပၢၢ်လၢ,ကတီၢ်ခဲအံၤအတၢ်ဖံးတၢ်မၤအဖီခိၣ်သဂၢၢ်ဘၣ်ဝဲထံကီၢ်တၢ်ကီတၢ်ခဲတၢ်အိၣ်သးအဖီခိၣ်အိၣ်ဒၣ်ပညိၣ်ဝဲလၢကယူထူၣ်ဖျဲးထီၣ်အသးဒ်သိးကပူၤဖျဲးလၢတၢ်ကီတၢ်ခဲအဂီၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
တကးဒံးဘၣ်လၢန့ၣ်အမဲၥ်ညါဒ်ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ အတၢ်အိၣ်ဆၢထၢၣ်အသိးန့ၣ် လ့ၤတက့ၤတဒုးအိၣ်ထီၣ်ဝဲ(ထံရူၢ်ကီၢ်သဲးပၣ်တံၣ်)ဘၣ်ဒီးမ့မ့ၢ်တခီလိၣ်ဘၣ်ဝဲဒၣ်ထဲကလုၥ်ဒူၣ်နီၢ်ကစၢ်တၢ်စံၣ်ညီၣ် ပၢလီၤသးလီၤအဂ့ၢ်န့ၣ် ပဒိၣ်စီၤကျၢၤစ့...
လါစဲးပထ့ဘၢၣ် ၂၈ သီ, ၂၀၂၄ နံၣ်, ခ့ၣ်အဲးစံၣ်
လၢဘျံးဒ၀ဲၢ်ကီၢ်ရ့ၣ် တနီသရံၣ်ကီၢ်ဆၣ်အပူၤ သ့ၤဒီ(သိန္ဓော)ပယီၤသုးကလၢၤလၢအဟဲအိၣ်ဆီလီၤသးန့ၢ်၀ဲအနံၣ်(၄၀)ဘျဲၣ်အံၤ ဖဲလါစဲးပထ့ဘၢၣ် ၂၅ သီအနံၤန့ၣ် ပယီၤသုးလၢအိၣ်ဖဲသုးကလၢၤပူၤအံၤတဖၣ်ကၢတီၢ်ကွံၥ်သုးကလၢၤဟးထီၣ်ကွံၥ်၀ဲအဂ့ၢ်န့ၣ် ဘျံးဒ၀ဲၢ်ကီၢ်ရ့ၣ် တၢ်ဒီသဒၢကမျၢၢ်သုးပၥ်ဖှိၣ်သုးကျိၤ-၂ ထုးထီၣ်ပၥ်ဖျါ၀ဲဖဲတနံၤအံၤန့ၣ်လီၤ.
သ့ၣ်ဒီ(သိန္ဓော)သုးကလၢၤအံၤ စးထီၣ်ဖဲတနံၣ်အံၤ(၂၀၂၄)လါအ့ဖြ့ၣ်လၢၤအခါန့ၣ် တၢ်ဒီသဒၢကမျၢၢ်သုးပၥ်ဖှိၣ်သုးကျိၤ(၁)ဒီး သုးကျိၤ(၂)စးထီၣ်က၀ီၤခး၀ဲဒီး အဃိဖဲအပူၤကွံၥ်လါစဲးပထ့ဘၢၣ် ၂၅ သီအနံၤန့ၣ် ပယီၤသုးလၢအိၣ်သုးကလၢၤပူၤအဂၤ(၁၅၀)ဃၣ်ဃၣ် ဟးထီၣ်ကွံၥ်လၢသုးကလၢၤပူၤအဂ့ၢ်န့ၣ် သုးကျိၤပှၤဘၣ်မူဘၣ်ဒါ စံး၀ဲအသိးသ့ၣ်ညါဘၣ်န့ၣ်လီၤ.
ဘျံးဒ၀ဲၢ်ကီၢ်ရ့ၣ် တၢ်ဒီသဒၢကမျၢၢ်သုးပၥ်ဖှိၣ် သုးကျိၤ-၂ အပှၤတဂၤစံး၀ဲလၢ “သုးကလၢၤ၀ဲန့ၣ်ပတၢ်ပၢၢ်ဆၢသုးကရူၢ်လဲၤခး၀ဲ ထီဘိလီၤ.ပလဲၤခးအီၤဒီးဒြိ,ကျိဖိကျိဖးဒိၣ်ဒ်န့ၣ်အိၣ်ထီဘိလီၤ.သုးကလၢၤ၀ဲန့ၣ်အိၣ်ယံၤဒီး(ပၠံၣ်ထီၣ်စူၣ်)ကျဲမုၢ်အဃိပယီၤသုးအပှၤဟဲထီၣ်တသ့ဘၣ်.အဃိပှၤသ့ၣ်တဖၣ်အံၤဘၣ်သ့ၣ်သ့ၣ်ကက့ၤပၥ်ဖှိၣ်ထီၣ်သးဒီးသုးကီၣ်ကးအပှၤလၢအိၣ်ဖဲကျဲမုၢ်ခိၣ်တဖၣ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကီၢ်ခါ(သ့ၣ်ဒီ)ပယီၤသုးကလၢၤအံၤတၢ်ပၢၢ်ဆၢသုးကရူၢ်ထီၣ်မၤန့ၢ်၀ဲလံဒီးတကးဒံးဘၣ်လၢသုးကလၢၤအပူၤန့ၣ် တၢ်မၤန့ၢ်ဃုၥ်၀ဲ ကျိချံပှၥ်သၣ်အိၣ်၀ဲတနီၤစ့ၢ်ကီးအဂ့ၢ်န့ၣ် သုးကျိၤအပှၤတဂၤဃီ၀ဲန့ၣ် စံးအါထီၣ်၀ဲန့ၣ်လီၤ.
(သ့ၣ်ဒီ)ပယီၤသုးကလၢၤအံၤ ဟဲအိၣ်ဆီလီၤဖဲဟီၣ်က၀ီၤပူၤ၀ဲန့ၣ်စးထီၣ်လၢ(၁၉၈၀)နံၣ် မ့ဘၣ်ဒွးတုၤလၢခဲအံၤအိၣ်ဆီလီၤသး န့ၢ်၀ဲ(၄၄)နံၣ်လံဒီး ဒ်န့ၣ်အသိးသုးကလၢၤ၀ဲအံၤမ့ၢ်တၢ်မဲၥ်ညါသုးကလၢၤတဖျၢၣ်လၢအဟ့ၣ်၀ဲတၢ်တိစၢၤမၤစၢၤဆူ(ဝါးနွယ်)သုးကလၢၤ,...
လါစဲးပထ့ဘၢၣ် ၂၇ သီ, ၂၀၂၄ နံၣ်, ခ့ၣ်အဲးစံၣ်
ဒ်သိးတၢ်ကဟ့ၣ်ပျဲသူ (ရၤမတံ-ကီးတရံး)အ့ၡါကျဲမုၢ်အဂီၢ် ဖဲလါစဲးပထ့ဘၢၣ်(၂၄)သီအနံၤ ကညီဖီၣ်စုကဝဲၤကရူၢ်မၤဝဲတၢ်ထံၣ်လိၥ် အိၣ်သကိးလၢကီၢ်သူလ့ၤဟီၣ်ကဝီၤတၢ်လီၢ်တတီၤဒီးတၢ်အိၣ်ဖှိၣ်အပူၤတၢၣ်ပီၣ်တဲသကိးဘၣ်ဃးကျဲတၢ်လဲၤထီၣ်က့ၤလီၤအဂ့ၢ်အကျိၤသ့ၣ်တဖၣ်အဂ့ၢ်န့ၣ် ခိၣ်နၢ်လၢအလဲၤထီၣ်တၢ်အိၣ်ဖှိၣ်တဂၤ စံးဝဲဒၣ်န့ၣ်လီၤ.
တကီၢ်ခါခဲအံၤ(ရၤမတံ-ကီးတရံး)ကျဲမုၢ်အံၤန့ၣ်ဘၣ်တၢ်ပၢဆှၢအီၤလၢခ့ၣ်အဲၣ်ယူၣ်-ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) ဒီးသိၣ်မှံၤသုးပၥ်ဖှိၣ်သ့ၣ်တဖၣ်ဒီး ဖဲတၢ်ကစီၣ်ဟူထီၣ်သါလီၤလၢဖီၣ်စုကဝဲၤကရူၢ်ကရၢတနီၤအဲၣ်ဒိးလၢတၢ်ကဟ့ၣ်တၢ်ပျဲအိးထီၣ် က့ၤကျဲအံၤဝံၤလီၢ်ခံ ကညီဖီၣ်စုကဝဲၤကရူၢ်ကရၢသ့ၣ်တဖၣ်မၤဝဲတၢ်ထံၣ်လိၥ်တၢၣ်ပီၣ်တဲသကိးဒ်အံၤန့ၣ်လီၤ.
"ခဲအံၤကျဲဝဲအံၤန့ၣ်တၢ်ပံၥ်ဃၥ်ဝဲလီၤ. အဃိလၢတၢ်ဝံစိၥ်တီဆှၢပနံၥ်တၢ်ဖိတၢ်လံၤမ့ၢ်ဂ့ၤ, တၢ်လဲၤတၢ်က့ၤတကပၤမ့ၢ်ဂ့ၤ ပှၤသူ ဝဲကျဲ လၢအဂၤတဘိမီၤနီၤ. ကျဲလၢပှၤသူအီၤသ့ၣ်တဖၣ်န့ၣ်စ့ၢ်ကီးတဂ့ၤဘၣ်အသိးသိၣ်လ့ၣ်ကျဲကတံၥ်အိၣ်လီၤ. ဖဲတၢ်အိၣ်ဖှိၣ်အခါန့ၣ်တၢ်တၢၣ်ပီၣ်တဲသကိးဘၣ်ဃးလၢကျဲအဂ့ၢ်အကျိၤအိၣ်မီၤနီၤ.လၢကက့ၤအိးထီၣ်အဂီၢ်ဒုသးတဆူၣ်ဘၣ်." အဂ့ၢ်န့ၣ် ကညီဖီၣ်စုကဝဲၤကရူၢ်ခိၣ်နၢ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါလါစဲးပထ့ဘၢၣ်(၂၆)သီအနံၤန့ၣ်လီၤ.
အပူၤကွံၥ်လါစဲးပထ့ဘၢၣ်(၂၄)သီအနံၤ လၢတၢ်မၤဝဲကညီဖီၣ်စုကဝဲၤကရူၢ်ကရၢတၢ်ထံၣ်လိၥ်သကိးအပူၤန့ၣ် (ခ့ၣ်အဲၣ်ယူၣ်-ကညီဒီ ကလုၥ်တၢ်ထူၣ်ဖျဲးသုးမုၢ်ဒိၣ်-KNLA သုးက့(၆) သုးက့(၇) ခိၣ်နၢ်သ့ၣ်တဖၣ်, ဒံၣ်မိၣ်ကရ့ၣ်စံၣ်တၢ်ဘၣ်ဘျုးကညီသုးမုၢ်ဒိၣ်-DKBA ခိၣ်နၢ်တဖၣ်, သုးခိးကီၢ်ဆၢ-BGF ခိၣ်နၢ်ဃုၥ်ဒီးကညီတၢ်မုၥ်တၢ်ခုၣ်ကီၣ်ကးကရၢ-PC ခိၣ်နၢ်သ့ၣ်တဖၣ်ဟဲထီၣ်...
လါစဲးပထ့ဘၢၣ် ၂၇ သီ, ၂၀၂၄ နံၣ်, ခ့ၣ်အဲးစံၣ်
ဒ်သိးတၢ်ကဟ့ၣ်ပျဲသူ (ရၤမတံ-ကီးတရံး)အ့ၡါကျဲမုၢ်အဂီၢ် ဖဲလါစဲးပထ့ဘၢၣ်(၂၄)သီအနံၤ ကညီဖီၣ်စုကဝဲၤကရူၢ်မၤဝဲတၢ်ထံၣ်လိၥ် အိၣ်သကိးလၢကီၢ်သူလ့ၤဟီၣ်ကဝီၤတၢ်လီၢ်တတီၤဒီးတၢ်အိၣ်ဖှိၣ်အပူၤတၢၣ်ပီၣ်တဲသကိးဘၣ်ဃးကျဲတၢ်လဲၤထီၣ်က့ၤလီၤအဂ့ၢ်အကျိၤသ့ၣ်တဖၣ်အဂ့ၢ်န့ၣ် ခိၣ်နၢ်လၢအလဲၤထီၣ်တၢ်အိၣ်ဖှိၣ်တဂၤ စံးဝဲဒၣ်န့ၣ်လီၤ.
တကီၢ်ခါခဲအံၤ(ရၤမတံ-ကီးတရံး)ကျဲမုၢ်အံၤန့ၣ်ဘၣ်တၢ်ပၢဆှၢအီၤလၢခ့ၣ်အဲၣ်ယူၣ်-ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) ဒီးသိၣ်မှံၤသုးပၥ်ဖှိၣ်သ့ၣ်တဖၣ်ဒီး ဖဲတၢ်ကစီၣ်ဟူထီၣ်သါလီၤလၢဖီၣ်စုကဝဲၤကရူၢ်ကရၢတနီၤအဲၣ်ဒိးလၢတၢ်ကဟ့ၣ်တၢ်ပျဲအိးထီၣ် က့ၤကျဲအံၤဝံၤလီၢ်ခံ ကညီဖီၣ်စုကဝဲၤကရူၢ်ကရၢသ့ၣ်တဖၣ်မၤဝဲတၢ်ထံၣ်လိၥ်တၢၣ်ပီၣ်တဲသကိးဒ်အံၤန့ၣ်လီၤ.
"ခဲအံၤကျဲဝဲအံၤန့ၣ်တၢ်ပံၥ်ဃၥ်ဝဲလီၤ. အဃိလၢတၢ်ဝံစိၥ်တီဆှၢပနံၥ်တၢ်ဖိတၢ်လံၤမ့ၢ်ဂ့ၤ, တၢ်လဲၤတၢ်က့ၤတကပၤမ့ၢ်ဂ့ၤ ပှၤသူ ဝဲကျဲ လၢအဂၤတဘိမီၤနီၤ. ကျဲလၢပှၤသူအီၤသ့ၣ်တဖၣ်န့ၣ်စ့ၢ်ကီးတဂ့ၤဘၣ်အသိးသိၣ်လ့ၣ်ကျဲကတံၥ်အိၣ်လီၤ. ဖဲတၢ်အိၣ်ဖှိၣ်အခါန့ၣ်တၢ်တၢၣ်ပီၣ်တဲသကိးဘၣ်ဃးလၢကျဲအဂ့ၢ်အကျိၤအိၣ်မီၤနီၤ.လၢကက့ၤအိးထီၣ်အဂီၢ်ဒုသးတဆူၣ်ဘၣ်." အဂ့ၢ်န့ၣ် ကညီဖီၣ်စုကဝဲၤကရူၢ်ခိၣ်နၢ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါလါစဲးပထ့ဘၢၣ်(၂၆)သီအနံၤန့ၣ်လီၤ.
အပူၤကွံၥ်လါစဲးပထ့ဘၢၣ်(၂၄)သီအနံၤ လၢတၢ်မၤဝဲကညီဖီၣ်စုကဝဲၤကရူၢ်ကရၢတၢ်ထံၣ်လိၥ်သကိးအပူၤန့ၣ် (ခ့ၣ်အဲၣ်ယူၣ်-ကညီဒီ ကလုၥ်တၢ်ထူၣ်ဖျဲးသုးမုၢ်ဒိၣ်-KNLA သုးက့(၆) သုးက့(၇) ခိၣ်နၢ်သ့ၣ်တဖၣ်, ဒံၣ်မိၣ်ကရ့ၣ်စံၣ်တၢ်ဘၣ်ဘျုးကညီသုးမုၢ်ဒိၣ်-DKBA ခိၣ်နၢ်တဖၣ်, သုးခိးကီၢ်ဆၢ-BGF ခိၣ်နၢ်ဃုၥ်ဒီးကညီတၢ်မုၥ်တၢ်ခုၣ်ကီၣ်ကးကရၢ-PC ခိၣ်နၢ်သ့ၣ်တဖၣ်ဟဲထီၣ်...
လါစဲးပထ့ဘၢၣ် ၂၇ သီ, ၂၀၂၄ နံၣ်, ခ့ၣ်အဲးစံၣ်
လၢခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်ဟီၣ်ကဝီၤ လၢၢ်ဒိၣ်ကီၢ်ဆၣ်ဒီးမူကီၢ်ဆၣ်ခံဘ့ၣ်အပူၤ ခီဖျိပယီၤသုးခးလီၤ ကျိဖးဒိၣ်, ဟဲတ့ၢ်လီၤဒြိမ့ၣ်ပိၢ်အဃိ ကမျၢၢ်ဘၣ်ဒိ(၄)ဂၤအကျါပၣ်ဃုၥ်တပွဲဖိ(၂)ပါအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပၥ်ဖျါဝဲဖဲမဟါလါစဲးပထ့ ဘၢၣ်(၂၆)သီအနံၤန့ၣ်လီၤ.
လၢၢ်ဒိၣ်ကီၢ်ဆၣ်အပူၤ ဖဲလါစဲးပထ့ဘၢၣ်(၁၉)သီ ဟါခီ(၃)နၣ်ရံၣ်ဘျဲၣ်အဆၢကတီၢ်န့ၣ် ပယီၤသုးခီၣ်သုးရ့ၣ်(ခလရ-၂၆၄) ခးလီၤဝဲ(၁၂၂ မမ-Howitzer)ကျိဖးဒိၣ် လီၤတဲၥ်ပိၢ်ဖးထီၣ်ဝဲဖဲ(ယီၣ်သွါကိ)သဝီပူၤအဃိ ဖဲန့ၣ်ဘၣ်ဒိတပွဲဖိ(၂)ပါအဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါ၀ဲန့ၣ်လီၤ.
ဒ်န့ၣ်အသိးမူကီၢ်ဆၣ်အပူၤ ဖဲလါစဲးပထ့ဘၢၣ်(၂၅)သီအနံၤစ့ၢ်ကီး ပယီၤသုးခီၣ်ချ့သုးရ့ၣ်(ခမရ-၅၉၉)ခးလီၤဝဲ(၈၁-မမ) ကျိဖးဒိၣ်(၇)ဖျၢၣ်လီၤတဲၥ်ပိၢ်ဖးထီၣ်ဝဲဖဲ(စဝ့)သဝီအပူၤအဃိ ဘၣ်ဒိဝဲပှၤသဝီဖိ(၆၃)နံၣ်တဂၤဒီး ပှၤသးစၢ်ဖိ(၁၈)နံၣ်တဂၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကီၢ်ခါခဲအံၤဘၣ်ဃးချၢၣ်လွံၢ်ထူၣ်ကီၢ်ရ့ၣ်ပူၤ ပယီၤသုးအတၢ်ဟူးတၢ်ဂဲၤအိၣ်ဝဲဒ်လဲၣ်န့ၣ် ကီၢ်ရ့ၣ်ပှၤကတိၤတၢ်ပၢ ပဒိၣ်စီၤဟဲဂ့ၤစံးဝဲလၢ"တကီၢ်ခါတၢ်အိၣ်သးအခဲအံၤန့ၣ်ချၢၣ်လွံၢ်ထူၣ်ကီၢ်ရ့ၣ်ဟီၣ်ကဝီၤအပူၤအါတက့ၢ်န့ၣ်သုးကီၣ်ကးဟူးဂဲၤ ခးလီၤနါစိၤဝဲကျိဖးဒိၣ်လၢဒူသဝီပူၤဒီးဟဲတ့ၢ်လီၤဒြိမ့ၣ်ပိၢ်လၢဒူသဝီအပူၤသ့ၣ်တဖၣ်န့ၣ်လီၤ." အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါပယီၤသုးအံၤလၢကီၢ်ဆၣ်ကိးဘ့ၣ်ဒဲးအဟီၣ်ကဝီၤအပူၤန့ၣ် ဟူးဂဲၤမၤအါထီၣ်ဝဲတၢ်သမံသမိး, ဆီလီၤ၀ဲ တၢ်အိၣ်ခိးတြဲၤသ့ၣ်တဖၣ်ဝံၤဃ့အီၣ်ဝဲကမျၢၢ်ကျိၣ်စ့,ဖီၣ်ပှၤသဝီဖိတကးဒံးဘၣ်အမဲၥ်ညါပယီၤသုးအံၤပညိၣ်ခးလီၤဝဲကျိဖးဒိၣ်ဆူတၢ်မၤလိကၠိ,တၢ်ဘူၣ်တၢ်ဘါတၢ်သူၣ်ထီၣ်သ့ၣ်တဖၣ်အိၣ်ဝဲအဂ့ၢ်န့ၣ် ပဒိၣ်စီၤဟဲဂ့ၤစံးအါထီၣ်ဝဲဒၣ်န့ၣ်လီၤ.
ဒ်န့ၣ်အသိးဖဲအပူၤကွံၥ်လါစဲးပထ့ဘၢၣ်(၁၉)သီအနံၤစ့ၢ်ကီး...
လါစဲးပထ့ဘၢၣ် ၂၆ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ ဖၣ်အၣ်ကီၢ်ဆၣ် နီဖးဒိၣ်ကရူၢ်လၢ(DKBA)ဆီလီၤသးအိၣ်၀ဲခဲအံၤန့ၣ် ကမျၢၢ်တူၢ်လိၥ်ဂ့ၤတတူၢ်လိၥ်ဂ့ၤကဆဲးဆ့ၣ်နီၤအိၣ်ဆီလီၤသးအဂ့ၢ်န့ၣ် ဘူးဒးတၢ်ဘါတၢ်ဂုၤထီၣ်ပသီထီၣ်ကညီသုးမုၢ်ဒိၣ်(DKBA) အခိၣ် သုးခိၣ်ဘိၤဘံၣ် စံးလီၤဖဲလါစဲးပထ့ဘၢၣ် ၂၄ သီ လၢတၢ်အိၣ်ဖှိၣ်ပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲအပူၤကွံၥ်နွံအခါ လၢဖၣ်အၣ်ကီၢ်ဆၣ် KNLA သုးရ့ၣ်(၁)ဟီၣ်က၀ီၤ နီဖးဒိၣ်ကရူၢ် ၀ၣ်တရဲၢ်သ၀ီ ကၠိမဲၥ်ညါန့ၣ် လၢ(DKBA) သုးခိၣ် ဘိၤဘံၣ်အတၢ်တီခိၣ်ရိၣ်မဲအံၤတဆီ (DKBA)ဟဲဆီလီၤသုးအလီၢ်အကျဲအဖီခိၣ် ခီဖျိပှၤကၠိဖိသ့ၣ်တဖၣ်ထီၣ်က့ၤကၠိ တဘူၣ်လၢၤဘၣ်အဃိ ဖဲလါစဲးပထ့ဘၢၣ် ၂၄ သီ မုၢ်ဃ့ၢ်လီၤ ၁း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် သုးခိၣ်ဘိၤဘံၣ်ဒီး...
လါစဲးပထ့ဘၢၣ် ၂၆သီ, ၂၀၂၄နံၣ်, ခ့ၣ်အဲးစံၣ်,
အ့ယၣ်ဝတံၣ်ကီၢ်ခီဒိၣ်,ကၠိၣ်ပၠီၣ်ဟီၣ်ကဝီၤသဝီတဖၣ်အပူၤဒ်သုးကီၣ်ကးအတၢ်ပၥ်လီၤဝဲကမျၢၢ်တၢ်ဘံၣ်တၢ်ဘၢအသိးအပူၤကွံၥ်လါအီကူးအပူၤကရၢကရိထီၣ်ဝဲသဝီလီၢ်ကဝီၤဖိဘံၣ်ဘၢကရူၢ်ဒီးတ့ထီၣ်ဘှီထီၣ်ဝဲတၢ်အိၣ်ခိးတြဲၤတဖၣ်ဝံၤမၢဝဲသဝီလီၢ်ကဝီၤဖိတဖၣ်ခိးတၢ်ဘံၣ်တၢ်ဘၢလၢမုၢ်နၤခီအဂ့ၢ်,လီၢ်ကဝီၤဖိတဖၣ်စံးဝဲန့ၣ်လီၤ.
ကၠိၣ်ပၠီၣ်ဟီၣ်ကဝီၤအပူၤ,စးထီၣ်လၢရှါစုၣ်,ခၠီစီၣ်,လဲဆ့ၣ်,မိကၠိပၠ့ၣ်သဝီတဖၣ်ဒီးတုၤလၢကၠိၣ်ပၠိၣ်ဝ့ၢ်ပူၤသဝီခိးထိးကျဲတၢ်လီၢ်တဖၣ်အပူၤဃုၥ်ဒီးသဝီခၢၣ်သးတၢ်လီၢ်တဖၣ်အပူၤသုးကီၣ်ကးဘှီထီၣ်ဝဲတၢ်အိၣ်ခိးတြဲၤတဖၣ်ဒီးသဝီတဖျၢၣ်န့ၣ်လီၢ်ကဝီၤပိၥ်ခွါ(၅)ဂၤတကရူၢ်ဘၣ်လဲၤအိၣ်ခိးဝဲတၢ်လၢမုၢ်နၤအိၣ်ဝဲအဂ့ၢ်,လဲဆ့ၣ်လီၢ်ကဝီၤပိၥ်မုၣ်တဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“သဝီတဖျၢၣ်န့ၣ်တၢ်အိၣ်ခိးတြဲၤအိၣ်ဖဲသဝီခိးထိးတတီၤဒီးသဝီဘၢၣ်စၢၤတတီၤန့ၣ်လီၤ.အခဲအံၤလၢပသဝီအပူၤတခီန့ၣ်ပၥ်လီၤဝဲလၢသဝီခၢၣ်သးတတီၤဒီးသဝီသးပှၢ်ဟံၣ်ကပၤတတီၤန့ၣ်လီၤ.ပှၤဘၣ်ခိးတၢ်န့ၣ်တဘျီန့ၣ်(၅)ဂၤ.ဘၣ်ခိးဝဲလၢအကလဲးန့ၣ်လီၤ.ဘၣ်ခိးဝဲကိးနၤလီၤ.မုၢ်ဆါခီဒုပှၤတအိၣ်ခိးနီတဂၤဘၣ်.ပှၤလၢဘၣ်လဲၤခိးတၢ်တဖၣ်မ့တလဲၤန့ၣ်ဘၣ်ဟ့ၣ်ဝဲစ့လီၤ.မ့မ့ၢ်လၢပှၤနီၢ်ကစၢ်တၢ်ဘၣ်သးဒုပှၤတအဲၣ်ဒိးလဲၤခိးတၢ်နီတဂၤဘၣ်အဂ့ၢ်,”စံးဝဲဒၣ်န့ၣ်လီၤ.
သုးကီၣ်ကးအံၤ,အပူၤကွံၥ်လါအီကူး(၁၆)သီအနံၤအပူၤစးထီၣ်မၤဝဲထံကီၢ်ဒီတဘ့ၣ်ပတီၢ်,ကီၢ်ဆၣ်ဒီးသဝီတဖၣ်အပူၤဒူသဝီကမျၢၢ်တၢ်ဘံၣ်တၢ်ဘၢဒီးတၢ်မၤလီၤမၢ်ကွံၥ်တၢ်သူတၢ်စုဆူၣ်ခီၣ်တကးတဖၣ်အသိး,ကရၢကရိထီၣ်ဝဲလီၢ်ခၢၣ်သးပှၤပၢဆှၢရဲၣ်ကျဲၤတၢ်ကရူၢ်တုၤလၢကီၢ်ခီဒိၣ်ပတီၢ်အိၣ်ဝဲဒၣ်န့ၣ်လီၤ.
ကၠိၣ်ပၠီၣ်ဟီၣ်ကဝီၤအပူၤသဝီလီၢ်ကဝီၤဖိလၢဘၣ်လဲၤအိၣ်ခိးတၢ်တဂၤစံးဝဲလၢ“သုးကီၣ်ကးအံၤမၢဝဲပှၤလဲၤအိၣ်ခိးတၢ်လၢတၢ်ပညၣ်ဒ်လဲၣ်အဂ့ၢ်န့ၣ်တသ့ၣ်ညါဝဲဘၣ်,ဘၣ်ဆၣ်ခီဖျိတၢ်မၢလီၤအီၤအဃိလဲၤခိးဝဲလီၤအဂ့ၢ်”စံးဝဲန့ၣ်လီၤ.
လၢန့ၣ်အမဲၥ်ညါ,သုးကီၣ်ကးအံၤမ့ၢ်ထံၣ်ဝဲသဝီဖိတဖၣ်တလဲၤခိးတြဲၤမၤမူဒါတလၢပှဲၤဘၣ်န့ၣ်ဃ့ဝဲစ့အီၣ်လိးအိၣ်ဝဲအသိးလူၤဖီၣ်ဝဲကမျၢၢ်လီၢ်ကဝီၤသဝီဖိလၢအဆိးကါဝဲဆဲးကဲးလၢတၢ်ဟးထီၣ်ဟးလီၤလၢဟီၣ်ကဝီၤအပူၤတဖၣ်အိၣ်ဝဲအဃိ,ကမျၢၢ်လီၢ်ကဝီၤဖိတဖၣ်ပျံၤတၢ်ဖုးတၢ်ဟးထီၣ်က့ၤလီၤတဘူၣ်လၢၤဘၣ်အိၣ်ဝဲအဂ့ၢ်,ကမျၢၢ်လီၢ်ကဝီၤဖိလၢသဂၢၢ်ဘၣ်တၢ်လၢအနီၢ်ကစၢ်တဂၤစံးဝဲန့ၣ်လီၤ.
တကးဒံးဘၣ်,သုးကီၣ်ကးအံၤမၤဝဲကမျၢၢ်တၢ်ဘၣ်ကဲသုးလၢကၠိၣ်ပၠီၣ်ဟီၣ်ကဝီၤကမျၢၢ်အိၣ်ဆိးတၢ်လီၢ်တဖၣ်အပူၤအိၣ်ဝဲတပယူၥ်ဃီဒီးကမျၢၢ်တၢ်ဘၣ်ကဲသုးအံၤအဂီၢ်,ဒ်ပၥ်ပနီၣ်ဝဲဟံၣ်တဖျၢၣ်အတၢ်ဆီၣ်ထွဲမၤစၢၤအိၣ်ဝဲအသိးလီၢ်ကဝီၤဖိတဖၣ်ဘၣ်ထဲးဂံၢ်ထဲးဘါဟ့ၣ်လီၤဝဲလၢတၢ်ကီတၢ်ခဲအပူၤအိၣ်ဝဲအဂ့ၢ်,လီၢ်ကဝီၤဖိတဖၣ်စံးဝဲန့ၣ်လီၤ.
ဒ်န့ၣ်အသိး,အ့ယၣ်ဝတံၣ်ကီၢ်ခီဒိၣ်,ပါတနီၤဟီၣ်ကဝီၤအပူၤသဝီသးပှၢ်တဖၣ်တီခိၣ်ရိၢ်မဲဟးထၢဝဲဒူသဝီဖိတဖၣ်အမံၤစရီဒီးဘှီထီၣ်ဝဲတၢ်အိၣ်ခိးတြဲၤတဖၣ်အိၣ်ဝဲဒီးသုးကီၣ်ကးထုးထီၣ်ပၥ်ဖျါဝဲတၢ်မၤကမျၢၢ်တၢ်ဘံၣ်တၢ်ဘၢဝံၤအလီၢ်ခံလါစဲးပထ့ဘၢၣ်နုၥ်လီၤအပူၤစးထီၣ်မၤဝဲတၢ်ကမျၢၢ်တၢ်ဘံၣ်တၢ်ဘၢအံၤန့ၣ်လီၤ.
လါစဲးပထ့ဘၢၣ် ၂၅သီ, ၂၀၂၄နံၣ်, ခ့ၣ်အဲးစံၣ်,
ခီကီၢ်တဖိးမံသဲစးပှၤမၤတၢ်ဖိတဖၣ်ကအိၣ်ဒီးဖိးမံသဲးစးလံၥ်လဲၢ်တၢ်အုၣ်ကီၤသးအဂီၢ်,ကၠီၣ်တဲၣ်ပှၤဘၣ်မူဘၣ်ဒါတဖၣ်ကအိးထီၣ်က့ၤဝဲတၢ်မၤန့ၢ်ထံဂုၤကီၢ်ဂၤတဖိးမံသဲးစးပှၤမၤတၢ်ဖိတဖၣ်အလံၥ်အလဲၢ်တၢ်ဂီၤတၢ်ရဲၣ်တၢ်ကျဲၤအဂ့ၢ်,ကၠီၣ်တဲၣ်ပှၤဘၣ်မူဘၣ်ဒါတဖၣ်ပၥ်ဂၢၢ်ပၥ်ကျၢၤစံးတ့ၢ်ဝဲလၢတၢ်မၤပဒိၣ်ကိတိၥ်တၢ်အိၣ်ဖှိၣ်အပူၤဖဲမဟါလါစဲးပထ့ဘၢၣ်(၂၄)သီအနံၤအဂ့ၢ်,ကၠီၣ်တဲၣ်တၢ်ကစီၣ်ပၥ်ဖျါဝဲန့ၣ်လီၤ.
တၢ်ကအိးထီၣ်က့ၤဝဲတၢ်မၤန့ၣ်ဖိးမံသဲစးလံၥ်လဲၢ်တၢ်အုၣ်ကီၤသးတၢ်ဂီၤတၢ်ရဲၣ်တၢ်ကျဲၤလၢခီကီၢ်ပှၤမၤတၢ်ဖိတဖၣ်အဂီၢ်အံၤန့ၣ်,လီၢ်ခံကတၢၢ်တၢ်အိၣ်ဖှိၣ်အပူၤကၠီၣ်တဲၣ်ခိၣ်နၢ်တဖၣ်ဆၢတဲၥ်ဝဲတၢ်ဂ့ၢ်(၃)ထံၣ်အဂ့ၢ်,ပှၤဟူးဂဲၤလၢခီကီၢ်ပှၤမၤတၢ်ဖိဂ့ၢ်ဝီ(Yaung Chi Oo Workers’ Association YCOWA)ပှၤမၤတၢ်ဖိကရူၢ်အူမိကၠီၣ်စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“တၢ်ပၥ်ဂၢၢ်ပၥ်ကျၢၢ်အံၤပဝဲပသ့ၣ်ညါထွဲလၢဖဲလီၢ်ခံကတၢၢ်တၢ်အိၣ်ဖှိၣ်ဘျီဝဲအံၤအပူၤန့ၣ်,အဝဲသ့ၣ်ဆၢတဲၥ်ဝဲတၢ်ဂ့ၢ်(၃)ထံၣ်လၢအမ့ၢ်(၁)ပှၤလၢအိၣ်ဆိးဖံးမၤတၢ်လၢတဖိးသဲစးဘၣ်တဖၣ်န့ၣ်ကအိးထီၣ်မၤန့ၢ်က့ၤဝဲလံၥ်လဲၢ်လၢအဖိးသဲစးတၢ်ရဲၣ်တၢ်ကျဲၤ(၂)ကမၤအါထီၣ်န့ၢ်ဝဲ(၂၀၂၅နံၣ်)လါဖ့ၤဘြူၤအါရံၤအပူၤခီကီၢ်ပှၤမၤတၢ်ဖိလၢအလံၥ်လဲၢ်မုၢ်နံၤမုၢ်သီကလၢၥ်တဖၣ်(၃)ဒ်သိးတၢ်ဆီတလဲတၢ်မၤအခိၣ်တၢ်မၤကစၢၢ်(သထ့)တဖၣ်ကလဲၤသးဘျ့ဘျ့ရှီရှီအဂီၢ်န့ၣ်,အပူၤကွံၥ်ဟ့ၣ်ဝဲတၢ်ဆၢကတီၢ်ထဲအသီ(၃၀)လီၤ,ဘၣ်ဆၣ်ခဲအံၤဆီတလဲမၤအါထီၣ်ဝဲလၢအသီ(၆၀)အဂ့ၢ်”စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,ကၠီၣ်တဲၣ်အတၢ်ပၥ်ဂၢၢ်ကျၢၤကတိၤဆၢတဲၥ်က့ၤဝဲတၢ်ဂ့ၢ်(၃)ထံၣ်အံၤန့ၣ်,မ့ၢ်ဝဲတၢ်ဂ့ၢ်လၢတၢ်ဆှၢနုၥ်ကတိၤတ့ၢ်ပၥ်ဝဲလၢအပူၤကွံၥ်တၢ်မၤတၢ်အိၣ်ဖှိၣ်လၢ(ပၣ်လံၣ်မဲၥ်)ဘျီၣ်ဒိၣ်အပူၤ,တၢ်ဂ့ၢ်တၢ်ကျိၤတဖၣ်အဂ့ၢ်အူမိကၠီၣ်စံးအါထီၣ်ဝဲန့ၣ်လီၤ.
ကၠီၣ်တဲၣ်အတၢ်ပၥ်ဂၢၢ်ပၥ်ကျၢၤတၢ်ဂ့ၢ်(၃)ထံၣ်အံၤလီၤဆီဒၣ်တၢ်လၢကၣ်ဘီဒံၣ်ယၣ်,လၣ်အိၤ,ဘံၣ်ယၣ်နၣ်ထံကီၢ်ဒီးကီၢ်ပယီၤထံကီၢ်(၄)ဘ့ၣ်ခီကီၢ်ပှၤမၤတၢ်ဖိလၢအနုၥ်လီၤမၤတၢ်လၢကၠီၣ်တဲၣ်ထံကီၢ်အပူၤတဖၣ်အဂီၢ်အဂ့ၢ်,သ့ၣ်ညါဘၣ်န့ၣ်လီၤ.
တကးဒံးဘၣ်,တၢ်ပၥ်ဂၢၢ်ကျၢၤအံၤတၢ်ပၥ်ဖျါထီၣ်ဃုၥ်ဝဲဒီးတၢ်ထုးထီၣ်ရၤလီၤတၢ်ရဲၣ်သဲကတီၤတဖိးမံသဲစးခီကီၢ်ပှၤမၤတၢ်ဖိတဖၣ်အတၢ်ဖံးတၢ်မၤ(၂)မံၤအဂ့ၢ်,ကၠီၣ်တဲၣ်ထုးထီၣ်ပၥ်ဖျါဝဲလံၥ်အိၣ်ဝဲဒၣ်စ့ၢ်ကီးန့ၣ်လီၤ.
တကတီၢ်ဃီ,တၢ်ပၥ်ဂၢၢ်ပၥ်ကျၢၤအံၤမ့ၢ်ဝဲတၢ်ခွဲးတၢ်ယၥ်ဂ့ၤလၢထံကီၢ်(၄)ဘ့ၣ်ခီကီၢ်ပှၤမၤတၢ်ဖိတဖၣ်အဂီၢ်ဘၣ်ဆၣ်,တကီၢ်ခါခဲအံၤကီၢ်ပယီၤထံကီၢ်အပူၤထံရူၢ်ကီၢ်သဲးတၢ်သဘံၣ်ဘုၣ်အိၣ်ဝဲဒံးအဆၢကတီၢ်,ကီၢ်ပယီၤခီကီၢ်ပှၤမၤတၢ်ဖိတဖၣ်အဂီၢ်တၢ်တၤတၢ်အိၣ်ဒံးဝဲအဖၢမုၢ်လီၤအဂ့ၢ်,ခီကီၢ်ပှၤမၤတၢ်ဖိဂ့ၢ်ဝီကရူၢ်ကရၢပှၤဘၣ်မူဘၣ်ဒါတဖၣ်ပဲၥ်ဖးနီၤဖးစံးဝဲဒၣ်န့ၣ်လီၤ.
ဒ်န့ၣ်အသိး,တၢ်ပၥ်ဂၢၢ်ပၥ်ကျၢၤ(၃)ထံၣ်အကျါကီၢ်ပယီၤခီကီၢ်ပှၤမၤတၢ်ဖိလၢကစးထီၣ်မၤလံၥ်လဲၢ်တၢ်အုၣ်ကီၤသးအသီတဖၣ်အဂီၢ်ဒီးပှၤလၢကဘၣ်မၤအါထီၣ်ဝဲလံၥ်လဲၢ်သးနံၣ်တဖၣ်အံၤအဂီၢ်အံၤတၢ်ဘၣ်ယိၣ်အိၣ်ဝဲလၢ,တၢ်ဃ့ကျိၣ်စ့တၢ်လၢၥ်ဘူၣ်လၢၥ်စ့ၤဒီးသုးကီၣ်ကးအတၢ်မၢဆူကမျၢၢ်တၢ်ဘၣ်ကဲသုးတကပၤစ့ၢ်ကီးအဂ့ၢ်,ခီကီၢ်ပှၤမၤတၢ်ဖိဂ့ၢ်ဝီပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
လါစဲးပထ့ဘၢၣ် ၂၄ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီးကလုၥ်စၢဖှိၣ်ကရၢ ဖၣ်အၣ်ကီၢ်ရ့ၣ် လူၢ်ပျဲၢ်ကီၢ်ဆၣ်ပူၤ တနံၣ်အံၤခီဖျိတၢ်စူၤထံဒိၣ်ဃိၣ်ယွၤအါဒီး ဘုသံဘုဟး ဂီၤအါအဃိ တကီၢ်ခါခဲအံၤကမျၢၢ်တဖၣ်လဲၤဂုၥ်ပှ့ၤကရီအီၣ်ဟုသးလၢလူၢ်ပျဲၢ်၀့ၢ်ပူၤဒီး၀့ၢ်ပူၤစ့ၢ်ကီးဟုသးလီၤတူၥ်ထီၣ် တအိၣ်လၢၤဘၣ် အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤ.
စးထီၣ်ဖဲလါစဲးပထ့ဘၢၣ်ထီၣ်အံၤ တၢ်စးထီၣ်က့ၤစူၤကဒါခံ၀ီတ၀ီလၢတၢ်လီၢ်သကုၤဆးဒီးဒ်န့ၣ်အသိး လူၢ်ပျဲၢ်ကီၢ်ဆၣ်ပူၤ တနံၣ်အံၤခီဖျိတၢ်စူၤထံဒိၣ်ဃိၣ်ယွၤဘုသံဘုဟးဂီၤခဲလၢၥ်ဃၣ်ဃၣ်အဃိ ခဲအံၤလီၢ်က၀ီၤကမျၢၢ်တဖၣ်လဲၤပှ့ၤကရီအီၣ် ၀ဲဒၣ်ဟုသးလၢလူပျဲၢ်၀့ၢ်ပူၤတုၤဒၣ်လဲၥ်ခဲအံၤလၢကျးပူၤန့ၣ်ဟုသးတအိၣ်လၢၤဘၣ်အဂ့ၢ်န့ၣ် လီၢ်က၀ီၤကမျၢၢ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
“ခဲအံၤဒူဖိသ၀ီဖိလဲၤလီၤပှ့ၤအီၣ်ဘုသးဒီဒူၣ်.ဘၣ်မနုၤလဲၣ်ခဲအံၤဘုသံဟုသံအဃိနၤပှ့ၤပၥ်အီၣ်ဘုယၤပှ့ၤပၥ်အီၣ်ဘုမီၤနီၤ. တဂၤဂၤလၢနးနးကျံၤကျံၤလဲလဲလီၤ,ကွၢ်လီၤဘုန့ၣ်ဘၣ်သးဟီၣ်.ခဲအံၤဘုသးတအိၣ်အါအါလၢၤဘၣ်.ယဟံၣ်ဖိဃီဖိနါက့မ့ၢ်ဂ့ၤ ဟံၣ်တဖျၢၣ်န့ၣ်လဲၤပှ့ၤအီၣ်ဃၥ်ဘုအထၢၣ်လၢအဆံ.တနံၣ်ညါအံၤပှၤတအီၣ်ဘၣ်ဘုလၢၤဘၣ်န့ၣ်ယဆိမိၣ်အါဒၣ်တက့ၢ်ကိးဂၤဒဲးလီၤ.ဖဲမဟါယလဲၤဘုသးန့ၣ်ဘုသးမးတအိၣ်လၢၤဘၣ်.မ့၀ံၤဘုသးန့ၣ်နဟဲက့ၤတီၣ်အါအါန့ၣ်ပယီၤသုးတအဲၣ်စ့ၢ်ကီးဘၣ်”အဂ့ၢ်န့ၣ် စံး၀ဲန့ၣ်လီၤ.
လၢန့ၣ်အမဲၥ်ညါလူၢ်ပျဲၢ်၀့ၢ်ပူၤအပူၤကွံၥ်ဘုသးအိၣ်သၢပိတထၢၣ်န့ၣ်အပှ့ၤအိၣ်ထဲ (၈၀၀၀၀)ကၠးခိၣ်ဃၢၤလီၤဒီး ဘၣ်ဆၣ်ခဲအံၤအပှ့ၤထီၣ်တုၤလၢအကလီၢ်လံအဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤ.
“လၢညါခါဘုသးအိၣ်သၢပိန့ၣ်ပပှ့ၤဘၣ်ထဲ(၇၀၀၀၀-၈၀၀၀၀)ကလးလီၤ.ခဲအံၤတထၢၣ်န့ၣ်အိၣ်တုၤလၢ(၁၃၀၀၀၀-၁၄၀၀၀၀)ကၠး အန့ၣ်မးတမ့ၢ်ဘုသးလၢအဂ့ၤဘၣ်ကဲ၀ဲဒၣ်ဘုသးကိၤလီၤ.ခဲအံၤပှၤကမျၢၢ်တနီၤန့ၣ်လၢကအီၣ်ကအီကလဲၤပှ့ၤဘုသးအဂီၢ်ဘၣ်လဲၤဃ့လိၢ်စိပှၤစ့,ကမၤလီးက့ၤ၀ဲနီၢ်တနံၣ်မ့မၤအီၣ်ဘၣ်ဘုမးကဟ့ၣ်လီၤက့ၤ၀ဲဘုဒ်န့ၣ်မီၤနီၤ.”အဂ့ၢ်န့ၣ် စံး၀ဲန့ၣ်လီၤ.
တကီၢ်ခါခဲအံၤခီဖျိပှၤအီၣ်စံၥ်ဖိတဖၣ်အဘုသံဘုဟးဂီၤခဲလၢၥ်အဃိထံၣ်ဘၣ်၀ဲတၢ်ကီတၢ်ခဲတကးဒံးဘၣ်ဘုသးအပှ့ၤထီၣ်ဒ်အံၤ ပှၤလၢအကျိၣ်အိၣ်စ့အိၣ်တဖၣ်အဂီၢ်တၢ်ကီတၢ်ခဲမ့တအိၣ်ဘၣ်ဆၣ်မ့မ့ၢ်ပှၤမုၢ်ဆ့ၣ်မုၢ်ဂီၤဖိတဖၣ်ထံၣ်ဘၣ်တၢ်ကီတၢ်ခဲအဂ့ၢ်န့ၣ် ကွံလ့သ၀ီဖိတဂၤ စံး၀ဲဒ်အံၤန့ၣ်လီၤ.
“ကိးနံၣ်န့ၣ်တၢ်စူၤထံဒိၣ်ဒ်အံၤလီၤ,ဘုန့ၣ်အသံတက့တခီဒ်န့ၣ်လီၤ. ကိးနံၣ်ဒဲးန့ၣ်မ့မ့ၢ်ခုးန့ၣ်တၢ်စူၤအါဒ်အံၤဂ့ၤဒၣ်ခီ. အခဲအံၤ တမ့ၢ်ဒ်န့ၣ်ဘၣ်ဘုခုးပူၤသ့ၣ်မတၤသံခဲလၢၥ်လီၤ.ပှၤကွၢ်တၢ်အိၣ်သးတဂ့ၤဘၣ်အဃိပှၤလဲၤပှ့ၤအီၣ်ဘုသးတထၢၣ်န့ၣ် (၈၀၀၀၀)ကလး...