လါအ့ဖြ့ၣ် ၃၀ သီႇ ၂၀၂၃ နံၣ်ႇ ခ့ၣ်အဲးစံၣ်
လၢတလၢၤကီၢ်စဲၣ် ဒူသထူၣ်ကီၢ်ရ့ၣ် ကၠဲၣ်ထိၤကီၢ်ဆၣ်အပူၤ ဖဲလါအ့ဖြ့ၣ် ၂၇ သီဒီး ၂၉ သီအနံၤန့ၣ် ကညီဒီကလုာ် တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်လဲၤတ့ၢ်လီၤမ့ၣ်ပိၢ်လၢ(ကင်မွန်း)ဟီၣ်က၀ီၤပၢၤကီၢ်၀ဲၤလီၢ်အံၤလၢဒြိအဂ့ၢ်န့ၣ် သ့ၣ်ညါဘၣ်လၢတၢ်ဒီသဒၢကမျၢၢ်သုးအအိၣ်န့ၣ်လီၤႉ
ဖဲအပူၤကွံာ်လါအ့ဖြ့ၣ် ၂၇ သီအနံၤ တၢ်လဲၤတ့ၢ်လီၤ၀ဲမ့ၣ်ပိၢ်အဖျၢၣ်(၁၀)ဃၣ်ဃၣ်အံၤဆူပၢၤကီၢ်၀ဲၤလီၢ်ကရၢၢ်ပူၤအဃိ ပၢၤကီၢ်ဘၣ်ဒိ၀ဲ(၃)ဂၤဒီးမ့ၣ်အူအီၣ်၀ဲဟးဂီၤ၀ဲပၢၤကီၢ်၀ဲၤလီၢ်တၢ်သူၣ်ထီၣ်တနီၤအဂ့ၢ်န့ၣ် သထူၣ်ကီၢ်ဆၣ် တၢ်ဒီသဒၢကမျၢၢ်သုး(TPDF)တၢ်ဘိးဘၣ်ရၤလီၤမူဒါခိၣ် စံး၀ဲန့ၣ်လီၤႉ
အ၀ဲစံး၀ဲလၢ“အခိၣ်တီတဘျီန့ၣ်ပသ့ၣ်ညါဘၣ်လၢပၢၤကီၢ်ဘၣ်ဒိ(၃)ဂၤႉလၢပၢၤကီၢ်၀ဲၤလီၢ်န့ၣ်ပနၢ်ဟူလၢၦၤခိၣ်ၦၤနၢ်ဟဲတုၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤ
ႉ
တၢ်လဲၤတ့ၢ်လီၤပၢၤကီၢ်၀ဲၤလီၢ်အံၤလၢဒြိမ့ၣ်ပိၢ်၀ံၤလီၢ်ခံအ၀ဲသ့ၣ်မၤအါထီၣ်တၢ်ဘံၣ်တၢ်ဘၢလၢပၢၤကီၢ်၀ဲၤလီၢ်ကရၢၢ်ပူၤဒီး ခီဖျိအ၀ဲသ့ၣ်မၤအါထီၣ်ကဒီးသုးဂံၢ်ဘါအဃိဖဲမဟါမုၢ်ထူၣ်န့ၣ်လဲၤတ့ၢ်လီၤကဒီးမ့ၣ်ပိၢ်အဖျၢၣ်(၁၀)လၢဒြိအဂ့ၢ်န့ၣ် (TPDF)ထုးထီၣ်ပာ်ဖျါထီၣ်၀ဲဖဲလါအ့ဖြ့ၣ် ၂၉ သီအနံၤန့ၣ်လီၤႉ
တၢ်ဟဲတ့ၢ်လီၤမ့ၣ်ပိၢ်လၢပၢၤကီၢ်၀ဲၤလီၢ်အံၤအဖီခိၣ်ဘၣ်ယိၣ်လၢပယီၤသုးကခးလီၤကျိဖးဒိၣ်အဃိ လီၢ်က၀ီၤကမျၢၢ်လၢအိၣ်(က့ၤမိ)ပၢၤကီၢ်၀ဲၤလီၢ်အခိၣ်အဃၢၤတဖၣ်အံၤဟးပလဲးသးလၢတၢ်လီၢ်အဂၤအိၣ်၀ဲအဂ့ၢ်န့ၣ် ကမျၢၢ်လၢအိၣ်ကၠဲၣ်ထိၤ၀့ၢ်ပူၤတဂၤ စံး၀ဲဒ်အံၤန့ၣ်လီၤႉ
“လၢညါနါက့ၦၤဟဲခး(က့ၤမိ)ပၢၤကီၢ်၀ဲၤလီၢ်အံၤစ့ၢ်မီၤနီၤႉတၢ်တဘျီန့ၣ်ခီဖျိ(မောင်းတောင်)ပယီၤသုးကလၢၤအံၤ ခးလီၤကျိဖးဒိၣ်အဃိပဘၣ်စံၣ်ဒံးႉခဲအံၤနါက့ၦၤဘၣ်ယိၣ်လၢကကဲထီၣ်သးဒ်န့ၣ်အဃိၦၤဟးစံၣ်ပလဲာ်သးတနီၤလံ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
တၢ်လဲၤထီၣ်ခးပၢၤကီၢ်၀ဲၤလီၢ်အံၤန့ၣ်မ့ၢ်၀ဲကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA (သုးက့ ၁)ဒီး ကၠဲၣ်ထိၤတၢ်ဒီသဒၢကမျၢၢ်သုးႇဘံလ့တၢ်ဒီသဒၢကမျၢၢ်သုးႇကၠဲၣ်ထိၤတၢ်ပၢၢ်ဆၢကရူၢ်(KRF)ႇ ပအိၣ်တၢ်ဒီသဒၢကမျၢၢ်သုး(PPDF-KD)တဖၣ်ဒီးတၢ်ပၢၢ်ဆၢသုးပာ်ဖှိၣ်တကပၤတၢ်ဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်ထုးထီၣ်ပာ်ဖျါ၀ဲန့ၣ်လီၤႉ
ဒ်န့ၣ်အသိးဖဲအပူၤကွံာ်လါအ့ဖြ့ၣ်(၂၅)သီအနံၤစ့ၢ်ကီး...
လါအ့ဖြ့ၣ် ၃၀ သီႇ ၂၀၂၃ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ခီကရဲး(၁၇)ဘျီတဘျီ တၢ်ဃုထၢထီၣ်လီၢ်ခၢၣ်သးထီဘိကမံးတံာ်ခိၣ်နၢ်အံၤ ဘၣ်တၢ်မၤ၀ဲလၢ(အီၣ်လါ)ပူၤဒီးခီဖျိတၢ်နုာ်လီၤမၤတံာ်တာ်တၢ်အိၣ်အဃိ တၢ်ဃုထၢတကဲထီၣ်၀ဲလၢ၁်ဘၣ်ဒီး တၢ်ဆိကတီၢ်ကွံ၁်၀ဲအဂ့ၢ်န့ၣ် သ့ၣ်ညါဘၣ်လၢၦၤဘူးဒီးခ့ၣ်အဲၣ်ယူၣ်ခိၣ်နၢ်တဖၣ်အအိၣ်န့ၣ်လီၤႉ
ခီကရဲးအပူၤဖဲတၢ်ဃုထၢထီၣ်ခ့ၣ်အဲၣ်ယူၣ်လီၢ်ခၢၣ်သးကတီၤဆိ ထီဘိကမံးတံာ်ခၢၣ်စး(၄၅)ဂၤအခါန့ၣ် တၢ်ဖးနီၣ်ဂံၢ်နီၣ်ဒွးကွၣ်၀ဲဒီးၦၤကညီနီၣ်ဂံၢ်လၢအဟ့ၣ်တၢ်ဖးအံၤအဃိဘၣ်ဆိကတီၢ်ကွံာ်ခီကရဲးတစိၢ်တလီၢ်အဂ့ၢ်န့ၣ် ခ့ၣ်အဲၣ်ယူၣ်ခၢၣ်စးလၢအထီၣ်ခီကရဲးတၢ်ဃုထၢတဂၤအံၤစံး၀ဲန့ၣ်လီၤႉ
“ၦၤဘၣ်ဆိကတီၢ်ကွံ၁်ခီကရဲးတၢ်ဃုထၢႉခီဖျိၦၤနုာ်လီၤမၤတံာ်တာ်တၢ်လၢ(အီၣ်လါ)ပူၤအိၣ်အဃိမီၤနီၤႉခၢၣ်စးလၢအဟ့ၣ်တၢ်ဖးတဖၣ်န့ၣ်အိၣ်ထဲ(၁၃၉)ဂၤလီၤႉဘၣ်ဆၣ်ၦၤက့ၤသမံသမိးက့ၤတၢ်ဖးဘျီၦၤဟ့ၣ်တၢ်ဖးအိၣ်အဘျီ(၂၀၀)ဘျဲၣ်ညါႉ အဃိတနံၤအံၤၦၤဆိကတီၢ်ကွံာ်တၢ်ဃုထၢလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါအ့ဖြ့ၣ် ၂၉ သီအနံၤ န့ၣ်လီၤႉ
ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ခီကရဲး(၁၇)ဘျီတဘျီအံၤ ဘၣ်တၢ်စးထီၣ်မၤအီၤဖဲလါအ့ဖြ့ၣ်(၂၄)သီအခါဒီး ခ့ၣ်အဲၣ်ယူၣ် တီအူကီၢ်ရ့ၣ်(သုးက့ ၂)ဒီးမုၢ်တြီၢ်ကီၢ်ရ့ၣ်(သုးက့ ၅)အခၢၣ်စးဟဲထီၣ်၀ဲခီကရဲးဘၣ်ဆၣ်ႇ တနုာ်လီၤဟ့ၣ်၀ဲတၢ်ဖးႇတနုာ်လီၤဃုထၢအသးဘၣ်ဘၣ်ဆၣ်ကီၢ်ရ့ၣ်ခၢၣ်စးလၢအဂၤသ့ၣ်တဖၣ်ဟဲထီၣ်၀ဲခီကရဲးအံၤန့ၣ်လီၤႉဒ်ခ့ၣ်အဲၣ်ယူၣ်တၢ်သူၣ်ထီၣ်ဆီလီၤအိၣ်ပာ်အသိးန့ၣ်ခီဖျိၦၤဟဲထီၣ်တၢ်ဃုထၢအိၣ်လၢ(၇၅)မျးကယၤညါအဃိတၢ်မၤ၀ဲတၢ်ဃုထၢအံၤန့ၣ်လီၤႉ
ခီကရဲးဘျီ၀ဲအံၤအပူၤန့ၣ်တၢ်ဃုထၢထီၣ်၀ဲခ့ၣ်အဲၣ်ယူၣ် ကရၢခိၣ်ႇ ကရၢခိၣ်–၂ႇ နဲၣ်ရွဲၣ်ခိၣ်ကျၢၢ်ႇ နဲၣ်ရွဲၣ်ခိၣ်ကျၢၢ်သဃဲၤ(၁)ဒီး(၂)တကးဒံးဘၣ်အမဲာ်ညါတၢ်ဃုထၢထီၣ်ဃု၁်၀ဲ လီၢ်ခၢၣ်သးကတီၤဆိ ထီဘိကမံးတံာ်ႇ လီၢ်ခၢၣ်သးထီဘိကမံးတံာ်ႇပၢဆှၢတၢ်ကမံးတံာ်တဖၣ်ဘၣ်ဆၣ်ဖဲတၢ်ဃုထၢဟ့ၣ်တၢ်ဖးဆူလီၢ်ခၢၣ်သးကတီၤဆိ ထီဘိကမံးအံၤအခါတၢ်မၤတံာ်တာ်တၢ်လၢ(အီၤလါ)ပူၤဟဲအိၣ်ထီၣ်၀ဲဒၣ်န့ၣ်လီၤႉ
ခ့ၣ်အဲၣ်ယူၣ်ခီကရဲးအံၤဘၣ်တၢ်မၤအီၤလၢခ့ၣ်အဲၣ်ယူၣ်တၢ်ပၢဟီၣ်က၀ီၤတၢ်လီၢ်တတီၤဒီးခၢၣ်စးဟဲတီၣ်တၢၣ်ပီၣ်တဲသကိးတၢ်အိၣ်၀ဲအဂၤ(၁၀၀)ဘျဲၣ်ဒီး ခ့ၣ်အဲၣ်ယူၣ်ကရၢခိၣ် သုးခိၣ်ကျၢၢ်ဒိၣ်စိ စီၤမူၤတူစ့ဖိအံၤ တနုာ်လီၤဒိးဃုထၢသးလၢ...
လါအ့ဖြ့ၣ် ၂၉ သီႇ ၂၀၂၃ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် ဖၣ်အၣ်၀့ၢ်ပူၤ တၢ်ပျၢ်လီၤၦၤဃိာ်ဖိတနီၤ၀ံၤလီၢ်ခံ လၢ၀့ၢ်ပူၤက၀ီၤဒ့ဒီးၦၤအါတၢ်လီၢ်သ့ၣ်တဖၣ်န့ၣ် သိလ့ၣ်ယီၢ်(ဆဲးကဲး)လီၤမၢ်ဟဲအါထီၣ်ဒိၣ်န့ၢ်အပူၤကွံာ်အဂ့ၢ်န့ၣ် ကမျၢၢ်လၢအိၣ်ဖၣ်အၣ်၀့ၢ်ပူၤတဖၣ်စံး၀ဲန့ၣ်လီၤႉ
အပူၤကွံာ်လၢညါ၀့ၢ်ပူၤသိလ့ၣ်ယီၢ်(ဆဲးကဲး)လီၤမၢ်ကဲထီၣ်သးခဲအံၤခဲအံၤအိၣ်၀ဲဘၣ်ဆၣ်စးထီၣ်ဖဲၦၤပျၢ်လီၤ ၦၤဃိာ်ဖိန့ၣ်လၢမုၢ်နၤခီအမဲာ်ညါမုၢ်ဆါခီတၢ်လီၢ်လၢၦၤအိၣ်အါအလီၢ်တဖၣ်န့ၣ်တသီအတီၢ်ပူၤဆဲးကဲးလီၤမၢ်ကအိၣ်လၢ(၃)ခိၣ် ဃၣ်ဃၣ်ညါအဂ့ၢ်န့ၣ် ကမျၢၢ်လၢအဘူးဒီးၦၤဆဲးကဲးလီၤမၢ်တဂၤ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ဖဲစှၤသီအံၤတနံၤန့ၣ်ၦၤဆဲးကဲးလီၤမၢ်ကအိၣ်လၢခံခိၣ်သၢခိၣ်ညါႉၦၤပာ်လၢဟံၣ်မဲာ်ညါခဲအံၤႇၦၤက့ၤလီၤလၢဟ့ၣ်ပူၤတစိၢ်ဖိလီၤဟဲက့ၤထီၣ်ဘျီဆဲးကဲးတအိၣ်လၢၤဘၣ်ႉၦၤဆိမိၣ်လၢကက့ၤန့ၢ်ကဒါအဃိၦၤတီၣ်ထီၣ်လၢ(အီၣ်လဲ)ပူၤနါက့တလီၤဆီနီတမံၤဘၣ်ႉၦၤထီထီၣ်ဃာ်(CCTV)နါက့မ့ၣ်အူခီန့ၣ်တနံၤမးဟဲခံနၣ်ရံၣ်အအါကတၢၢ်လီၤအဃိ မၤတဘၣ်နီမံၤဘၣ်ႉမ့၀ံၤဆဲးကဲးလီၤမၢ်အံၤလၢၦၤအိၣ်အါအလီၢ်ႉလၢညါခါန့ၣ်အါဒၣ်တက့ၢ်အလီၤမၢ်လၢမုၢ်နၤခီလီၤႉ ခဲအံၤလီၤမၢ်တုၤလၢမုၢ်ဆါခီညါ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါဆဲးကဲးလီၤမၢ်၀ံၤလီၢ်ခံၦၤလဲၤတီၣ်ဖျါထီၣ်တၢ်ဂ့ၢ်လၢပၢၤကီၢ်၀ဲၤလီၢ်အအိၣ်ဘၣ်ဆၣ်ပၢၤကီၢ်တဟံးမူဒါဘှါရှဲ၀ဲတအိၣ်နီတမံၤဘၣ်အသိးတၢ်ပာ်လီၤတၢ်ဘံၣ်တၢ်ဘၢဃံးဃီၣ်ဒီၣ်လၢ၀့ၢ်ပူၤဘၣ်ဆၣ်ဆဲးကဲးလီၤမၢ်ဟဲအါထီၣ်အဖီခိၣ်အံၤကဲထီၣ်တၢ်လီၤဆိမိၣ်ဆိမးအဂ့ၢ်န့ၣ် လီၢ်က၀ီၤကမျၢၢ်ပဲာ်ထံနီၤဖးစံး၀ဲန့ၣ်လီၤႉ
ဖၣ်အၣ်၀့ၢ်ပူၤ ကမျၢၢ်လၢအသဂၢၢ်ဘၣ်တၢ်ကဲထီၣ်သးလၢအနီၢ်ကစၢ်တဂၤစံး၀ဲလၢ “ဆဲးကဲးလီၤမၢ်လၢက၀ီၤဒ့ပူၤ အဃိၦၤဆဲးဃီၤလီတဲစိလၢပၢၤကီၢ်၀ဲၤလီၢ်အအိၣ်မီၤနီၤႉအ၀ဲသ့ၣ်တဲ၀ဲအုးအုးဘျီပာ်လီၤအလီတဲစိလီၤႉမ့၀ံၤဘၣ်ဖဲအ၀ဲသ့ၣ်ဟဲလၢက၀ီၤဒ့ပူၤႇၦၤဖီၣ်န့ၢ်တၢ်ဟုၣ်ဘျီပၢၤကီၢ်တဲ၀ဲလၢကွၢ်လၢသုအဲၣ်ဒိးမၤန့ၣ်မၤႉမ့၀ံၤခဲအံၤၦၤပျၢ်လီၤၦၤဃိာ်ဖိအကျါန့ၣ်ထံရူၢ်ကီၢ်သဲးၦၤဃိာ်ဖိတပၣ်နီတဂၤဘၣ်ႉဖဲ၀့ၢ်ပူၤအံၤၦၤဆီလီၤတၢ်ဘံၣ်တၢ်ဘၢထဲထဲအံၤညါန့ၣ်ၦၤဟုၣ်တၢ်ဖိတဖၣ်ဟုၣ်တၢ်ဘူၣ်ညါႉတၢ်အံၤယဆိမိၣ်ကဘၣ်မ့ၢ်အ၀ဲသ့ၣ်ၦၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဖဲကီၢ်ပယီၤတါလီၤ၀ံၤနံၣ်ထီၣ်တသီအခါန့ၣ်ထံကီၢ်ဒီတဘ့ၣ်အပူၤသုးမီၤစိရိၤပျၢ်လီၤ၀ဲၦၤဃိာ်ဖိအဂၤတကထိဘျဲၣ်ညါဒီးဖဲန့ၣ်အကျါကညီကီၢ်စဲၣ်(တီၣ်ကလ့)ဃိာ်ပူၤန့ၣ်ပျၢ်လီၤ၀ဲၦၤဃိၣ်ဖိအဂၤ(၃၀)ဃၣ်ဃၣ်န့ၣ်လီၤႉဖဲၦၤအဂၤ(၃၀)အကျါန့ၣ်ပၣ်၀ဲထံရူၢ်ကီၢ်သဲးၦၤဃိာ်ဖိ(၂)ဂၤလီၤဒီးၦၤဃိာ်ဖိလၢအဂၤတဖၣ်အါဒၣ်တက့ၢ်လီၤဘၣ်ဃိာ်ပူၤလၢကသံၣ်မူၤဘှီးတၢ်မူးတၢ်ရၢ်လီၤအဃိဘၣ်ဃးဆဲးကဲးလီၤမၢ်တၢ်ဂ့ၢ်အံၤတၢ်ဆိမိၣ်တယး၀ဲလၢၦၤသ့ၣ်တဖၣ်အံၤန့ၣ်လီၤႉ
လၢန့ၣ်အမဲာ်ညါလၢကညီကီၢ်စဲၣ် ဖၣ်အၣ်၀့ၢ်ပူၤ၀့ၢ်ချၢတၢ်လီၢ်သ့ၣ််တဖၣ်န့ၣ်သုးမီၤစိရိၤဆီလီၤတၢ်ဘံၣ်တၢ်ဘၢ ဃံးဃီၣ်ဒီၣ်ဘၣ်ဆၣ်ႇတနံၤဘၣ်တနံၤဆဲးကဲးလီၤမၢ်ဟဲအါဒိၣ်ထီၣ်၀ဲကွ့ၢ်ကွ့ၢ်အသိးတကီၢ်ခါခဲအံၤလၢသုးမီၤစိရိၤတၢ်ပၢဆှၢဖီလာ်အံၤလီၢ်က၀ီၤကမျၢၢ်တၢ်ဘံၣ်တၢ်ဘၢတအိၣ်၀ဲလၢၤဘၣ်အဂ့ၢ်န့ၣ် တၢ်ပဲာ်ထံနီၤဖးစံး၀ဲန့ၣ်လီၤႉ
ဒ်န့ၣ်အသိးဘၣ်ဃးဆဲးကဲးလီၤမၢ်တၢ်ဂ့ၢ်အံၤသုးမီၤစိရိၤစုတီၤဖီလာ်ပၢကီၢ်သုးဖီၣ်ၦၤဟုၣ်တၢ်ဖိတန့ၢ်၀ဲဘၣ်ဒီး ဘၣ်ဆၣ်မ့မ့ၢ်လၢမုၢ်နၤခီန့ၣ်အ၀ဲသ့ၣ်ဖီၣ်သူၣ်ဘီၣ်သးစၢ်လၢအဟးထီၣ်လၢတၢ်ချၢတဖၣ်ဒီးဃ့အီၣ်၀ဲစ့ကဲထီၣ်သးအိၣ်၀ဲတလီၢ်လီၢ်အဂ့ၢ်န့ၣ် သူၣ်ဘီၣ်သးစၢ်လၢအိၣ်၀့ၢ်ပူၤတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ
လါအ့ဖြ့ၣ် ၂၉ သီႇ၂၀၂၃ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် သၣ်တီၣ်၀့ၢ်ပူၤ ဒ်သိးပယီၤသုးသုတခးလီၤကျိဖးဒိၣ်တဂ့ၤအဂီၢ်န့ၣ် ဖဲအပူၤကွံာ်လါမးရှးအခါ တၢ်ဘူၣ်တၢ်ဘါခိၣ်နၢ်လၢအိၣ်သၣ်တီၣ်၀့ၢ်ပူၤတဖၣ်အံၤလဲၤထိၣ်ဃူထိၣ်ဖိးဒီးပယီၤသုးအိၣ်၀ဲဘၣ်ဆၣ် ပယီၤသုးခးလီၤကျိဖးဒိၣ်တုၤလၢခဲအံၤတစုအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ
ဖဲအပူၤကွံာ်လါယနူၤအါရံၤ ၂၇ သီအခါ တၢ်ဒုးကဲထီၣ်၀ဲလၢပယီၤသုးဒီးတၢ်ဒီသဒၢကမျၢၢ်သုးအဘၢၣ်စၢၤ၀ံၤလီၢ်ခံ ခီဖျိပယီၤသုးခးလီၤကျိဖးဒိၣ်ဆူသၣ်တီၣ်၀့ၢ်ပူၤတပယူာ်ဃီအဃိ လီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲဒီးဖဲန့ၣ်၀ံၤလီၢ်ခံ ဒ်သိးကမျၢၢ်တဖၣ်ကက့ၤအိၣ်ဘၣ်ဘံၣ်ဘံၣ်ဘၢဘၢအဂီၢ်န့ၣ်တၢ်ဘူၣ်တၢ်ဘါကမံးတံာ်ထံၣ်လိာ်တဲသကိးတၢ်ဒီးပယီၤသုးဘၣ်ဆၣ် ပယီၤသုးခးလီၤကျိဖးဒိၣ်တုၤလၢခဲအံၤလီၤအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ
“အ၀ဲသ့ၣ်ထုးထီၣ်ဒံးလံာ်လၢဟဲက့ၤအိၣ်န့ၢ်လံႉ(လ၀က)ခိၣ်လီၢ်လံၤတီၣ်ထီၣ်ဒံး၀ဲလၢအ(ဖ့းစ်ဘူး)ပူၤဒံးႇခဲအံၤအက့ၤဖၠဲးကဒါ၀ဲလံႉၦၤတဲလၢက့ၤအိၣ်န့ၢ်လံအဃိၦၤက့ၤအိၣ်ဒီဒူၣ်ညါႉပယီၤသုးဟးတဲနါစိၤတၢ်တဲ၀ဲလၢၦၤဟဲက့ၤအိၣ်အကျါန့ၣ်ပၣ်ဃုာ်ၦၤ(PDF)ဖိႉဖဲ၀့ၢ်ပူၤအံၤ(PDF)တအိၣ်ဘၣ်ႉခီဖျိကျိဖးဒိၣ်အဃိန့ၣ်(ဒ့မုၢ်လီ)သ၀ီပူၤန့ၣ်ဟံၣ်ခိၣ်လီၤၦီၢ်ခံဖျၢၣ်ညါႉလၢရီဘၢၣ်ကျီးပူၤနါက့ကျိဖးဒိၣ်လီၤတဲာ်စ့ၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
တၢ်ဘူၣ်တၢ်ဘါခိၣ်နၢ်လၢအလဲၤထံၣ်လိာ်တဲသကိးတၢ်ဒီးပယီၤသုးတဖၣ်န့ၣ်မ့ၢ်၀ဲ(သၣ်တီၣ်၀့ၢ်)ခရံာ်ဖိတၢ်ဘါယွၤသရိာ် ၉ ဖျၢၣ် သရၣ်ဒိၣ်တဖၣ်ႇ ဘူးဒးသီခါဖၠၣ်(၂)ဖျၢၣ်သီခါတဖၣ်ႇၦၤဘၣ်မူဘၣ်ဒါတဖၣ်ဒီး ဖဲအ၀ဲသ့ၣ်တၢၣ်ပီၣ်တဲသကိးတၢ်ဒီးဟီၣ်က၀ီၤပယီၤသုးအခါန့ၣ်ပယီၤသုးအုၣ်ကီၤ၀ဲလၢကျိဖးဒိၣ်တဘၣ်လီၤတဲာ်လၢ၀့ၢ်ပူၤနီတဖျၢၣ်အဂ့ၢ်န့ၣ် ကမံးတံာ်ဖိတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ပယီၤသုးတဲဃာ်၀ဲလၢၦၤဟဲခးအ၀ဲသ့ၣ်မ့တအိၣ်ဘၣ်န့ၣ်ကျိချံတဘၣ်လီၤတဲာ်လၢ၀့ၢ်ပူၤနီတဖျၢၣ်ဘၣ်ႉ ဘၣ်ဆၣ်ခဲအံၤတၢ်ဒုးကဲထီၣ်တအိၣ်ဘၣ်ႇဘၣ်မနုၤအဃိဘၣ်ခးလီၤ၀ဲဒ်အံၤလဲၣ်န့ၣ်ပတသ့ၣ်ညါဘၣ်ႉအ၀ဲသ့ၣ်န့ၣ်ၦၤဟ့ၣ်အီၤတၢ်ကစီၣ်အိၣ်အဃိခးလီၤ၀ဲဧါန့ၣ်လီၤဆိမိၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါကမံးတံာ်အံၤဒ်သိးလီၢ်က၀ီၤကမျၢၢ်လၢအဘၣ်ဃ့ၢ်ဘၣ်စံၣ်တဖၣ်အံၤတၢ်ဘၣ်ဂီၢ်ဘၣ်ဒွါတအိၣ်ဘၣ်အဃိဘၣ်ရဲၣ်ကျဲၤန့ၢ်၀ဲဒ်အံၤဒီးတမ့ၢ်မၢဟဲက့ၤအိၣ်န့ၢ်ဆူၣ်ဘၣ်အဂ့ၢ်န့ၣ် ကမံးတံာ်ဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ
“ၦၤကိးဂၤဒဲးန့ၣ်တၢ်မုာ်ဘၣ်အ၀ဲသ့ၣ်လၢအကစၢ်၀့ၢ်အကစၢ်ဒူသ၀ီပူၤလီၤမီၤနီၤႉတမ့ၢ်ပမၢအဟဲက့ၤအိၣ်န့ၢ်ဆူၣ်ဘၣ်ႉၦၤတနီၤသံကွၢ်၀ဲလၢမ့က့ၤအိၣ်န့ၣ်ၦၤဟံမူဒါလၢတၢ်ဘံၣ်တၢ်ဘၢအဂီၢ်ဧါဒ်န့ၣ်အိၣ်မီၤနီၤႉပကစၢ်တၢ်ဘံၣ်တၢ်ဘၢခီန့ၣ်ပကစၢ်ဘၣ်ဟံမူဒါလီၤႉတဲ၀ဲလၢၦၤလၢအဲၣ်ဒိးဟဲက့ၤအိၣ်န့ၣ်ဟဲက့ၤအိၣ်သ့လီၤႉပတဆိကမိၣ်လၢအကဟဲကဲထီၣ်သးဒ်အံၤဘၣ်ႉ ပတဆၢမုၢ်လၢ်လၢအကကဲထီၣ်စ့ၢ်ကီးဘၣ်ႉအကဲထီၣ်ဘျီဒုလၢကမျၢၢ်အဂီၢ်န့ၣ်ပသးတမုာ်စ့ၢ်ကီးဘၣ်”အဂ့ၢ်န့ၣ် ကမံးတံာ်ဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ
တကီၢ်ခါခဲအံၤလၢသၣ်တီၣ်၀့ၢ်ခိၣ်၀့ၢ်ဃၢၤန့ၣ်ပယီၤသုးခးလီၤကျိဖးဒိၣ်တအိၣ်လၢၤ၀ဲဘၣ်ဆၣ် ပယီၤသုးကလၢၤလၢအိၣ်(၇)မဲၤတဖၣ်အံၤအိၣ်ခိးသမံသမိး၀ဲပၢၢ်တုၤလၢၦၤဖိသၣ်ႇသူၣ်က့သးၦၢ်လၢအဟးထီၣ်က့ၤလီၤတဖၣ်အံၤဒီးလီၤဆီဒၣ်တၢ်သမံသမိးအါ၀ဲလၢၦၤပိာ်ခွါတဖၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
လါအ့ဖြ့ၣ် ၂၈ သီႇ ၂၀၂၃ နံၣ်ႇ ခ့ၣ်အဲးစံၣ်
လၢဖၣ်အၣ်ကီၢ်ရ့ၣ် တၢ်ကြဲၢ်ကီၢ်ဆၣ် မံၣ်ခၠီကရူၢ် ဒူသ၀ီတဖၣ်အပူၤ ထံကျိလၢလီၢ်က၀ီၤကမျၢၢ်သူ၀ဲအံၤ ခီဖျိသိလ့ၣ်တီၣ်သ့ၣ်တဖၣ်လ့ၢ်ထီၣ်လ့ၢ်လိၤကိးမုၢ်နံၤဒဲးအဃိထံဒုထီၣ်၀ဲဒီးတၢ်ကီတၢ်ခဲအိၣ်ထီၣ်လၢကသူထံသူနိ အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
လီၢ်က၀ီၤကမျၢၢ်တဖၣ်အံၤသူ၀ဲထံကျိထံႇကစၢၢ်ထံအံၤလီၤဒီးခီဖျိသိလ့ၣ်တီၣ်သ့ၣ်လၢအဘၣ်ထွဲဒီးသုးခိးကီၢ်ဆၢ(BGF)ဖီၣ်စုက၀ဲၤကရူၢ်အံၤလ့ၢ်ထီၣ်လ့ၢ်လိၤဖၠး၀ဲထံကျိအံၤအဃိထံဒုထီၣ်သူတသ့လၢၤဘၣ်ဒီးသ၀ီဖိတဖၣ်အံၤဘၣ်လဲၤထုးန့ၢ်က့ၤထံလၢထံကျိဆၢခိၣ်လၢအအိၣ်ယံၤဒီးသ၀ီအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲလၢ“ပသ၀ီအံၤတၢ်မ့ကိၢ်ထီၣ်နါက့ထံကျိအံၤတလီၤသံးဘၣ်ႉ ပသူထံဖဲထံကျိတဘိအံၤလီၤႉသိလ့ၣ်တဖၣ်လ့ၢ်ထီၣ်လ့ၢ်လိၤဖဲထံကျိတဘိအံၤလီၤႉထံဒုထီၣ်အဃိၦၤသူထံတသ့လၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ထံကျိအံၤတုၤလၢတၢ်ကိၢ်ခါခဲအံၤန့ၣ်အထံတလီၤသံး၀ဲဘၣ်လီၤယွၤဒံးအဃိလီၢ်က၀ီၤကမျၢၢ်တဘၣ်ကိၢ်ဘၣ်ဂီၤ လၢကသူထံအဂီၢ်ဘၣ်ႇဘၣ်ဆၣ်တနံၣ်အံၤသိလ့ၣ်ထုးသ့ၣ်လ့ၢ်ထီၣ်လ့ၢ်လိၤလၢထံကျိပူၤအံၤအဃိထံဒုထီၣ်၀ဲဒီးထံပဲးလိတဖၣ်စ့ၢ်ကီးဒုထီၣ်၀ဲအသိးထံ(ပဲးလိ)တဖၣ်စ့ၢ်ကီးဟးဂီၤ၀ဲအါမးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
မံၣ်ခၠီကရူၢ် ဒူသ၀ီတဖၣ်အံၤအပူၤန့ၣ် ခီဖျိၦၤခူၣ်ထံပူၤႇၦၤထုးထီၣ်ထံလၢဟီၣ်ခိၣ်ဖီလာ်(အ၀ီစိတွင်း)တန့ၢ်ဘၣ်အဃိ အ၀ဲသ့ၣ်ဘၣ်ဟံန့ၢ်၀ဲထံလၢတီၢ်နီၢ်ကစၢၢ်ထံတွံၢ်လီၤ၀ဲဒီး(ပဲးလိ)လၢသ၀ီပူၤအိၣ်၀ဲအသိး ဒူသ၀ီလၢ(ပဲးလိ)တတုၤဘၣ်သ့ၣ်တဖၣ်ခီန့ၣ်ဘၣ်သူ၀ဲထံကျိအံၤန့ၣ်လီၤႉ
တကီၢ်ခါခဲအံၤခီဖျိထံဒုထီၣ်အဃိလီၢ်က၀ီၤကမျၢၢ်ဘၣ်လဲၤထုးန့ၢ်ထံလၢကစၢၢ်ထံလၢအအိၣ်ယံၤ၀ဲဒီးသ၀ီအံၤလၢကျဲအဘိဘိဒီးကျဲစ့ၢ်ကီးတဂ့ၤ၀ဲဘၣ်အဂ့ၢ်န့ၣ် လီၢ်က၀ီၤကမျၢၢ်လၢအဂၤတဂၤစ့ၢ်ကီးစံး၀ဲန့ၣ်လီၤႉ
အ၀ဲစံး၀ဲလၢ“ၦၤလၢအအိၣ်ဒီး(ထီၣ်လၤကၠံၤ)တဖၣ်ခီန့ၣ်လဲၤထုးန့ၢ်ထံဒီး(ထီၤလၤကၠံၤ)မီၤနီၤႉလၢဆဲးကဲးနါက့ၦၤလဲၤထုးအိၣ်စ့ၢ်ႉပဘၣ်လဲၤထုးထံလၢထံကျိဆၢခိၣ်,ဘၣ်လဲၤထုးလၢထံအိၣ်အလီၢ်န့ၣ်မီၤနီၤႉကျဲနါက့တဂ့ၤဘၣ်ႉ နဘၣ်လဲၤခံဂၤမးန့ၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဒ်န့ၣ်အသိးဖဲအပူၤကွံာ်(၂၀၂၂)လါဒံၣ်စ့ဘၢၣ်အခါန့ၣ် လၢမံၣ်ခၠီကရူၢ် တမိးလါခံသ၀ီအပူၤ ခီဖျိသိလ့ၣ်တီၣ်သ့ၣ်တဖၣ်အံၤလ့ၢ်ထီၣ်လ့ၢ်လိၤလၢထံ(ပဲးလိ)ဖီခိၣ်အဃိထံပဲးလိဟးဂီၤသူတန့ၢ်လၢၤဘၣ်ဒီး သ၀ီဖိတဖၣ်ဘၣ်လဲၤထုးသူက့ၤထံလၢထံကျိအဂၤကဲထီၣ်တ့ၢ်အသးဒံးန့ၣ်လီၤႉ
လါအ့ဖြ့ၣ် ၂၈ သီ, ၂၀၂၃ နံၣ်, ခ့ၣ်အဲးစံၣ်
လၢကညီကီၢ်စဲၣ် ကီးတရံး၀့ၢ်ပူၤ ခီဖျိမ့ၣ်အူတဟဲဘၣ်တၢ်ဆၢကတီၢ်ယံၤထီၣ်လံအဃိ ထံခုၣ်ကိၣ်လိၣ်(ယ့ၤကဲ)အၦ့ၤဒိၣ်ထီၣ်၀ဲအဂ့ၢ်န့ၣ် ကမျၢၢ်လၢအိၣ်ကီးတရံး၀့ၢ်ပူၤတဖၣ်စံး၀ဲန့ၣ်လီၤႉ
ကီးတရံး၀့ၢ်ပူၤ မ့ၣ်အူတဟဲဘၣ်၀ံၤလီၢ်ခံန့ၣ် ၦၤဘၣ်လဲၤၦ့ၤထံခုၣ်ကိၣ်လိၣ်(ယ့ၤကဲ)အံၤလၢဖၣ်အၣ်၀့ၢ်ႇတလၢၤကီၢ်စဲၣ် မီၣ်လမၠဲၣ်၀့ၢ်ပူၤဒီး ခီဖျိကျဲတၢ်လၢာ်ဘူၣ်လၢာ်စ့လၢာ်အါအဃိ အၦ့ၤဘၣ်ထီၣ်၀ဲဒ်အံၤလီၤအဂ့ၢ်န့ၣ် ကီးတရံး၀့ၢ်ပူၤ ကမျၢၢ်လၢအလဲၤၦ့ၤဆါထံခုၣ်ကိၣ်လိၣ်(ယ့ၤကဲ)တဂၤစံး၀ဲဒ်အံၤန့ၣ်လီၤႉ
“ဖဲကီးတရံးအံၤမ့ၣ်အူတဟဲဘၣ်အဃိ(ယ့ၤကဲ)တၢ်မၤလီၢ်ပံးမီၤနီၤႉခဲအံၤယ့ၤကဲန့ၣ်ပဘၣ်မၢ်လီၤအီၤလၢမီၣ်လမၠဲၣ်ႇ လၢဖၣ်အၣ်၀့ၢ်ညါႉနလဲၤၦ့ၤယ့ၤကဲန့ၣ်ဘၣ်ဟ့ၣ်ကါလဲၦ့ၤဒိၣ်အဃိယ့ၤကဲနါက့အၦ့ၤဘၣ်ထီၣ်၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ခီဖျိတၢ်ကိၢ်ဒိၣ်အဃိပၦ့ၤယ့ၤကဲအါ၀ဲဒီးယ့ၤကဲအံၤတၢ်ထၢနုာ်သူစ့ၢ်ကီး၀ဲလၢတၢ်ဖံးတၢ်ညၣ်သံသိကျါအသိး တကီၢ်ခါခဲအံၤထံခုၣ်ကိၣ်လိၣ်(ယ့ၤကဲ)အၦ့ၤထီၣ်အဃိတၢ်ကီတၢ်ခဲအိၣ်ထီၣ်၀ဲအဂ့ၢ်န့ၣ် ၦၤၦ့ၤဆါညၣ်ဒီးၦၤၦ့ၤဆါတၢ်ခုၣ်ထံတဖၣ်စံး၀ဲန့ၣ်လီၤႉ
ၦၤၦ့ၤဆါတၢ်ဖံးတၢ်ညၣ်တဂၤစံး၀ဲလၢ“ယ့ၤကဲအၦ့ၤထီၣ်ဖးဒိၣ်ညါႉယ့ၤကဲန့ၣ်ပဘၣ်သူအီၤထီဘိလီၤႉယ့ၤကဲမ့တအိၣ်ဘၣ်န့ၣ်တၢ်ဖံးတၢ်ညၣ်တဖၣ်အံၤအုၣ်လၢာ်လီၤႉအၦ့ၤထီၣ်နါက့ပဘၣ်ၦ့ၤလီၤႉတဘျီတခီၣ်ဖဲကီးတရံး၀့ၢ်ပူၤအံၤ ယ့ၤကဲလၢာ်ဒီတ၀့ၢ်ညါ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
အပူၤကွံာ်လၢကီးတရံး၀့ၢ်ပူၤအံၤခီဖျိမ့ၣ်အူဟဲဒီးယ့ၤကဲတၢ်မၤလီၢ်တပံးဒံးဘၣ်အခါန့ၣ် ယ့ၤကဲဃၢအပီၢ်(၄၀၀)တလိၣ်န့ၣ်အၦ့ၤအိၣ်၀ဲ(၈၀၀၀)ကၠးလီၤဒီးဘၣ်ဆၣ်တကီၢ်ခါခဲအံၤအဃၢအပီၢ်(၁၀၀)တလိၣ်န့ၣ် အၦ့ၤအိၣ်(၇၀၀၀)တုၤလၢ(၁၀၀၀၀)ဘျဲၣ်ညါဒီးအၦ့ၤဒိၣ်ထီၣ်၀ဲသၢဆးညါအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ဒ်န့ၣ်အသိးလၢကီးတရံးႇမၠၣ်၀တံၣ်ႇနိၣ်တကီကီၢ်ဆၣ်အပူၤစ့ၢ်ကီးမ့ၣ်အူတဟဲဘၣ်ဒီးယ့ၤကဲအၦ့ၤဒိၣ်ထီၣ်စ့ၢ်ကီး၀ဲအသိးကီၢ်ဆၣ်လၢအဂၤသ့ၣ်တဖၣ်အပူၤမ့ၣ်အူဟဲဘၣ်ဆၣ်ယ့ၤကဲအၦ့ၤဒိၣ်ထီၣ်အါန့ၢ်အပူၤကွံာ်နံၣ်ဒံးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ
သုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢကီးတရံးကီၢ်ဆၣ်အပူၤတၢ်ဒုးဆူၣ်ထီၣ်၀ဲလၢပယီၤသုးဒီးဟီၣ်က၀ီၤကညီဒီကလု၁်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤဒီးတၢ်လဲၤခးမၤဟးဂီၤ၀ဲတၢ်ဟ့ၣ်မ့ၣ်အူအခိၣ်ခၠၢၣ်အသိး တုၤလၢခဲအံၤခီဖျိတၢ်တက့ၤဘှီဂ့ၤထီၣ်အီၤဒံးဘၣ်အဃိကီၢ်ဆၣ်သ့ၣ်တဖၣ်အံၤအပူၤန့ၣ်မ့ၣ်အူတဟဲ၀ဲဘၣ်န့ၣ်လီၤႉ
လါအ့ဖြ့ၣ် ၂၇ သီႇ ၂၀၂၃ နံၣ်ႇ ခ့ၣ်အဲးစံၣ်
ဖဲလါအ့ဖြ့ၣ် ၂၆ သီ ဟါခီ ၄ နၣ်ရံၣ်ဃၣ်ဃၣ်အဆၢကတီၢ် ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်ဆူမၠၣ်၀တံၣ်ကီၢ်ဆၣ် ကလံၤထံး (ကွ့ကလ့)အချၢတကပၤန့ၣ်အဃိ ဟံၣ်ဖိဃီဖိ(၄)ဂၤဘၣ်ဒိဘၣ်ထံး၀ဲအဂ့ၢ်န့ၣ် ကွ့ကလ့သ၀ီဖိတဖၣ်စံး၀ဲန့ၣ်လီၤႉ
လၢကွ့ကလ့သ၀ီအပူၤတၢ်ခးလိာ်သးကဲထီၣ်တအိၣ်၀ဲလၢပယီၤသုးဒီးဟီၣ်က၀ီၤတၢ်ပၢၢ်ဆၢသုးအဘၢၣ်အံၤဘၣ် ဘၣ်ဆၣ်ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်အဃိလီၢ်က၀ီၤသ၀ီဖိဟံၣ်ဖိဃီဖိ(၄)ဂၤဘၣ်ဒိဘၣ်ထံး၀ဲဒၣ်အဂ့ၢ်န့ၣ် ကွ့ကလ့လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ဖဲအံၤန့ၣ်သုးတအိၣ်ဘၣ်တၢ်ဒုးကဲထီၣ်တအိၣ်ဘၣ်ႇတၢ်တအိၣ်နီတမံၤဘၣ်ႉ သဲးသဲးဟဲခးလီၤတၢ်ဒီးကဘီယူၤဒ်အံၤလီၤႉၦၤဟံၣ်ဖိဃီဖိ(၄)ဂၤန့ၣ်ဘၣ်ဒိဘၣ်ထံးႉအဟဲကွံာ်လီၤ၀ဲန့ၣ်ခံဖျၢၣ်ႇ အပိၢ်ထီၣ်တဖျၢၣ်လီၤႉမ့ပိၢ်ထီၣ်ခံဖျၢၣ်လၢာ်ဒုၦၤဟံၣ်ဖိဃီဖိတဒူၣ်န့ၣ်ကဘၣ်သံခဲလၢာ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ၦၤဟံၣ်ဖိဃီဖိလၢအဘၣ်ဒိဘၣ်ထံး(၄)ဂၤသ့ၣ်န့ၣ်မ့ၢ်၀ဲစီၤဖါကနိး(၅၀)နံၣ်ဒီးအမါနီၢ်တၢ်လ့ၤခိၣ်ခံဂၤအံၤဒီး အဒဲၣ်မုၣ်တဂၤ,အဖိဒိၣ်ခွါတဂၤန့ၣ်လီၤႉၦၤသ့ၣ်တဖၣ်အံၤဘၣ်၀ဲဒၣ်အခိၣ်ႇအစုႇအခီၣ်ဒီး ဘၣ်ဆၣ်မ့မ့ၢ်လၢနီၢ်တၢ်လ့ၤခိၣ်အံၤခီန့ၣ်အဘၣ်ဒိနးအဃိတၢ်လဲၤဆှၢအီၤဆူကီၢ်ကၠီၣ်တဲၣ်မဲၢ်ဆီးတၢ်ဆါဟံၣ်အဂ့ၢ်န့ၣ် ကွ့ကလ့သ၀ီဖိတဂၤစံး၀ဲန့ၣ်လီၤႉ
“မ့မ့ၢ်ၦၤလၢအဘၣ်ဒိနးတဂၤခီန့ၣ်တဂီၤညါအံၤၦၤဆှၢအီၤမဲၢ်ဆီးတၢ်ဆါဟံၣ်လံႉၦၤအဂၤတဖၣ်ခီန့ၣ်ၦၤယါဘျါအီၤလၢသ၀ီပူၤအံၤလီၤႉကဘီယူၤဟဲခးလီၤတၢ်ဒ်အံၤၦၤလဲၤဆှၢမးတဘူၣ်ဘၣ်ႇၦၤဘၣ်လဲၤဆှၢအီၤလၢကစၢၢ်ကျဲလီၤႉတုၤလၢခဲအံၤမ့ၢ်အတုၤလံဧါ,တတုၤဒံးဘၣ်ဧါန့ၣ်ပတသ့ၣ်ညါဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါအ့ဖြ့ၣ် ၂၆ သီအနံၤ န့ၣ်လီၤႉ
ဒ်န့ၣ်အသိးဖဲအပူၤကွံာ်စှၤသီအခါစ့ၢ်ကီးသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢမဲၢ်ကနဲသ၀ီကပၤ ကၠီၣ်မဲႇကၠီၣ်တီၤတကပၤဒံးန့ၣ်လီၤႉ
လါအ့ဖြ့ၣ် ၂၇ သီႇ ၂၀၂၃ နံၣ်ႇ ခ့ၣ်အဲးစံၣ်
လၢမၠၣ်၀တံၣ်ကလံၤစိး သုးခိးကီၢ်ဆၢ(BGF)တၢ်ပၢဟီၣ်က၀ီၤ စွ့ၤကိၣ်ကိၤလီၢ်က၀ီၤအပူၤန့ၣ် စးထီၣ်ဖဲတလါအံၤလါအ့ဖြ့ၣ် ၂၀ သီအနံၤန့ၣ် လီၢ်က၀ီၤကမျၢၢ်အတၢ်အုၣ်ကီၤမ့တအိၣ်ဘၣ်န့ၣ် သုးခိးကီၢ်ဆၢတၢ်သမံသမိးတြဲၤတပျဲဟးထီၣ်က့ၤလီၤ၀ဲ လၢၤဘၣ်အဂ့ၢ်န့ၣ် စွ့ၤကိၣ်ကိၤလီၢ်က၀ီၤကမျၢၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
သိလ့ၣ်ဒီးၦၤကညီလၢအဟဲလၢစွ့ၤကိၣ်ကိၤဟီၣ်က၀ီၤပူၤတဖၣ်အံၤကဘၣ်ဒိးသမံသမိးသးလၢ(BGF)တၢ်သမံသမိးတြဲၤလီၢ်ဒီးၦၤစွ့ၤကိၣ်ကိၤလီၢ်က၀ီၤဖိမ့ဟဲအုၣ်ကီၤ၀ဲမးတၢ်ပျဲနုာ်လီၤ၀ဲလၢစွ့ၤကိၣ်ကိၤသ၀ီပူၤအဂ့ၢ်န့ၣ် သ၀ီဖိတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“စးထီၣ်ဖဲအပူၤကွံာ်အသီ(၂၀)န့ၣ်ၦၤဃၣ်ဃၢၤမ့ဟဲန့ၣ်နကဘၣ်လဲၤတဲစိၦၤအိၣ်ခိးတၢ်လၢတြဲၤတဖၣ်န့ၣ်ႇ ၀ံၤ မးနုာ်လီၤန့ၢ်လီၤႉၦၤလဲၤအုၣ်ကီၤနၤမ့တအိၣ်ဘၣ်န့ၣ်အ၀ဲသ့ၣ်တဟ့ၣ်နုာ်၀ဲဘၣ်ႉဘၣ်လဲၤအုၣ်ကီၤဒ်လဲၣ်န့ၣ်နဘၣ်လဲၤတဲပၠးၦၤအိၣ်ခိးတၢ်တဖၣ်လၢၦၤတဂၤအံၤကဟဲဟးလၢယဟံၣ်ႇအကဲ၀ဲဒၣ်ယဖိဒိၣ်ခွါႇယဖိခွါဒ်န့ၣ်မီၤနီၤႉနမ့လဲၤအုၣ်ကီၤဒ်န့ၣ်မးအ၀ဲသ့ၣ်ပျဲနုာ်လီၤ၀ဲ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
စွ့ၤကိၣ်ကိၤ၀့ၢ်သီဃၢၤတၢ်ဒုးကဲထီၣ်တအိၣ်လၢာ်၀ဲဘၣ်ဆၣ်လၢစွ့ၣ်ကိၣ်ကိၤကျဲနုာ်လီၤဟးထီၣ်တၢ်လီၢ်သ့ၣ်တဖၣ်န့ၣ် (BGF)ဆီလီၤတၢ်ဘံၣ်တၢ်ဘၢဃံးဃီၣ်ဒီၣ်အဂ့ၢ်န့ၣ် ၦၤဟးထီၣ်က့ၤလီၤဖဲန့ၣ်တဖၣ်စံး၀ဲန့ၣ်လီၤႉ
ဒ်န့ၣ်အသိးခီဖျိတၢ်ဆီလီၤတြဲၤတၢ်အိၣ်ခိးသမံသမိးတၢ်ဟဲအါထီၣ်အဃိသိလ့ၣ်လၢအစံၣ်ဖဲမၠၣ်၀တံၣ်–စွ့ၤကိၣ်ကိၤ၀့ၢ်သီတဖၣ်အံၤစ့ၢ်ကီးလဲၤလၢစွ့ၤကိၣ်ကိၤတအိၣ်အါအါလၢၤဘၣ်အဂ့ၢ်န့ၣ် ၦၤနီသိလ့ၣ်ဖိလၢအိၣ်မၠၣ်၀တံၣ်၀့ၢ်ပူၤတဂၤစံး၀ဲန့ၣ်လီၤႉ
လၢန့ၣ်အမဲာ်ညါဖဲအပူၤကွံာ်လါအ့ဖြ့ၣ် ၅ သီဒီး ၆ သီအခါန့ၣ် လၢစွ့ၤကိၣ်ကိၤ၀့ၢ်သီကပၤ တၢ်ဒုးကဲထီၣ်၀ဲလၢ သုးခိၣ်အဲၣ်စ့၀ါတီခိၣ်ရိၣ်မဲကီၢ်သူလ့ၤသုးမုၢ်ဒိၣ်(KTLA)ဒီး(BGF)အဘၢၣ်စၢၤ၀ံၤလီၢ်ခံ (BGF)ဘၣ်ယိၣ်၀ဲလၢကဘီယူၤ(ဒြိ) ကဟဲလၢစွ့ၤကိၣ်ကိၤဟီၣ်က၀ီၤပူၤအဃိတၢ်မၤတဲာ်ကွံာ်၀ဲ(အ့ထနဲး)အကျိၤတဖၣ်အဂ့ၢ်န့ၣ် စွ့ၤကိၣ်ကိၤလီၢ်က၀ီၤကမျၢၢ်လၢအဂၤတဂၤစံး၀ဲဒ်အံၤန့ၣ်လီၤႉ
“စးထီၣ်လၢတၢ်ဒုးကဲထီၣ်တုၤလၢခဲအံၤန့ၣ်ၦၤမၤတဲာ်ကွံာ်(အ့ထနဲး)ခဲလၢာ်လီၤႉနသူ(လိုင်း)တန့ၢ်ခီတခါလၢၤဘၣ်ႉ ယိၤကီၢ်(True Move)နါက့သူတန့ၢ်ဘၣ်ႉ(12 call)နါက့တန့ၢ်ဘၣ်ႉ ကဘၣ်မ့ၢ်သုးခိၣ်ခၠ့ၣ်သူၤအၦၤတဖၣ်န့ၣ်ပံးဃာ်၀ဲလီၤႉ နသူန့ၢ်တထံၣ်ႇတန့ၢ်တထံၣ်ဒ်န့ၣ်ႉဘၣ်ယိၣ်၀ဲလၢကဘီယူၤဒြိကဟဲလၢအ၀ဲသ့ၣ်အိၣ်အဃိအ၀ဲသ့ၣ်ပံးဃာ်၀ဲ(လိုင်း)ခဲလၢာ်လီၤႉနသူန့ၢ်(Wi-fi) တခါလီၤ”အဂ့ၢ်န့ၣ်...
လါအ့ဖြ့ၣ် ၂၆ သီႇ ၂၀၂၃ နံၣ်ႇ ခ့ၣ်အဲးစံၣ်
လၢဖၣ်အၣ်ကီၢ်ရ့ၣ် တၢ်ကြဲၢ်ကီၢ်ဆၣ် ဒူသ၀ီတဖၣ်အပူၤ တနံၣ်အံၤတဃီၤဆံၣ်သၣ်ဃ့အၦ့ၤဂ့ၤဒိၣ်န့ၢ်ဒံးအပူၤကွံာ်နံၣ်အဃိ ကဲထီၣ်တၢ်တိစၢၤမၤစၢၤလၢၦၤမၤဃ့တဃီၤဆံၣ်သၣ်ဖိလၢအိၣ်ဟီၣ်က၀ီၤပူၤတဖၣ်အဂီၢ်ဒိၣ်မးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ
လၢတၢ်ကြဲၢ်ကီၢ်ဆၣ် ပၣ်တၣ်ႇပံၣ်တခးဒီးမံၣ်ခၠီသ၀ီတကပၤန့ၣ် အပူၤကွံာ်မဟိတနံၣ်တဃီၤဆံၣ်သၣ်ဃ့တပီၢ်န့ၣ် အၦ့ၤအိၣ်၀ဲ(၂၅၀၀)တုၤလၢ(၃၅၀၀)ကၠးလီၤဘၣ်ဆၣ်ႇတနံၣ်အံၤတပီၢ်န့ၣ်အၦ့ၤအိၣ်၀ဲ(၅၀၀၀)တုၤလၢ(၆၀၀၀)ကၠးညါအဃိ ကမျၢၢ်လၢအမၤဃ့တဃီၤဆံၣ်သၣ်လၢအိၣ်ဟီၣ်က၀ီၤပူၤတဖၣ်အံၤဘၣ်ဂီၢ်၀ဲဒၣ်အဂ့ၢ်န့ၣ် လီၢ်က၀ီၤကမျၢၢ်လၢအမၤဃ့တဃီၤဆံၣ်သၣ်တဂၤ စံး၀ဲဒ်အံၤန့ၣ်လီၤႉ
“ခဲအံၤတဃီၤဆံၣ်သၣ်ဃ့အၦ့ၤထီၣ်အဃိပသးခုဒိၣ်မးႉအၦ့ၤထီၣ်အံၤခီဖျိအစးထီၣ်ပၢၢ်ထီၣ်သီအဃိလီၤႉပဘၣ်ယိၣ်လၢခံန့ၣ်အၦ့ၤကက့ၤလီၤကဒါလီၤႉဖဲမဟိနါန့ၣ်ဒ်အံၤလီၤႇတနံၣ်ညါအံၤနါက့ကမၤ၀ဲဒ်သိးမဟိန့ၣ်လီၤႉမ့၀ံၤပဘၣ်ယိၣ်လၢၦၤတဟဲၦ့ၤဘၣ်လီၤႉလၢခံန့ၣ်ခီဖျိမူခိၣ်ကလံၤသီၣ်ဂီၤတၢ်အိၣ်သးအဃိပလိဃ့အီၤတညီလၢၤဘၣ်ႉအဃိအၦ့ၤလီၤသ့၀ဲ”အဂ့ၢ်န့ၣ် စံး၀ဲန့ၣ်လီၤႉ
တနံၣ်အံၤတဃီၤဆံၣ်သၣ်ဃ့အၦ့ၤဂ့ၤ၀ဲဘၣ်ဆၣ်မ့မ့ၢ်အသၣ်ခီန့ၣ်သၣ်စှၤဒိၣ်န့ၢ်အပူၤကွံာ်နံၣ်ဒံးအသိး ၦၤကညီလၢအကျီးပူၤတဃီၤဆံၣ်သၣ်ထူၣ်တအိၣ်ဘၣ်ဒီးၦၤလၢအတဃီၤဆံၣ်ထူၣ်တသၣ်ဘၣ်တဖၣ်န့ၣ် အ၀ဲသ့ၣ်ဘၣ်လဲၤၦ့ၤ၀ဲဒၣ်အထူၣ်အံၤလၢၦၤဂၤအအိၣ်ဒဲး၀ဲအသၣ်လိဃ့၀ဲ၀ံၤက့ၤဆါကဒါ၀ဲဒ်န့ၣ်စ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တၢ်ကြဲၢ်လီၢ်က၀ီၤကမျၢၢ် နီၢ်တၤယွဲ စံး၀ဲလၢ“ခဲအံၤတၢ်ၦ့ၤထီၣ်ခဲလၢာ်လီၤအဃိတဃီၤဆံၣ်သၣ်ဃ့နါက့အၦ့ၤထီၣ်၀ဲလီၤႉ အၦ့ၤထီၣ်ဒ်အံၤအဃိပဆါ၀ဲလီၤႉစ့လၢပဆါန့ၢ်သ့ၣ်တဖၣ်န့ၣ်ပက့ၤၦ့ၤအီၣ်က့ၤ၀ဲတၢ်ဆၢကမူၣ်(အချိုမှုန့်)ႇအံသၣ်ဒီးတၢ်အီၣ်တၢ်အီလၢအဂၤတဖၣ်လီၤႉၦၤတနီၤခီန့ၣ်လဲၤမၤဘူၣ်လီၤသိအီၣ်ႇအံသၣ်ဒီးပသၢသၣ်လၢသီခါဖၠၣ်ပူၤဘျီၦၤထီၣ်ဒဲးန့ၢ်အ၀ဲသ့ၣ်ဒ်န့ၣ်အိၣ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ
လၢတၢ်ကြဲၢ်ကီၢ်ဆၣ်အပူၤတဃီၤဆံၣ်ထူၣ်တဖၣ်တၢ်တသူၣ်ဆါ၀ဲဒ်မုၢ်ကျိၤ၀ဲၤကွာ်တခါအသိးဘၣ်ႇဘၣ်ဆၣ်သနါက့ တဃီၤဆံၣ်ထူၣ်လၢအိၣ်အ၀ဲသ့ၣ်ကရၢၢ်ပူၤတဖၣ်အံၤအ၀ဲသ့ၣ်ဒဲးလိဃ့၀ဲဒီးက့ၤဆါကဒါ၀ဲအဃိ ကဲထီၣ်ကျိၣ်စ့တၢ်ဟဲနုာ်လၢဟံၣ်ဖိဃီဖိအဂီၢ်တဘိန့ၣ်လီၤႉ
ဒ်န့ၣ်အသိးလၢဖၣ်အၣ်ကီၢ်ဆၣ်ဒီးလူၢ်ပျဲၢ်ကီၢ်ဆၣ်အပူၤစ့ၢ်ကီးတနံၣ်အံၤတဃီၤဆံၣ်သၣ်ဃ့အၦ့ၤဂ့ၤ၀ဲဒီး ဘၣ်ဆၣ်မ့မ့ၢ်လၢတလၢၤကီၢ်စဲၣ်တကပၤခီန့ၣ်တဃီၤဆံၣ်သၣ်ဃ့အၦ့ၤတဂ့ၤဘၣ်အဃိအ၀ဲသ့ၣ်မၤက့ၤ၀ဲလၢတဃီၤဆံၣ်သၣ်ယိၣ်ႇတဃီၤဆံၣ်သၣ်ပၠါ၀ံၤဘၣ်ဆါအီၣ်၀ဲဒ်န့ၣ်လီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
လါအ့ဖြ့ၣ် ၂၆ သီႇ ၂၀၂၃ နံၣ်ႇ ခ့ၣ်အဲးစံၣ်
ကီးတရံး–မၠၣ်၀တံၣ်အ့ရှါကျဲ တုၤလၢတလါအံၤလါအ့ဖြ့ၣ် ၂၁ သီအနံၤ တၢ်ပၢၢ်ဆၢသုးပာ်ဖှိၣ်ထုးထီၣ်၀ဲလၢ တၢ်တဘၣ်ဟးထီၣ်က့ၤလီၤ၀ဲဘၣ်ဒီး ဘၣ်ဆၣ်ခဲအံၤခီဖျိတၢ်ပာ်ပနီၣ်အသီၦဲၤထီၣ်လံအဃိ သိလ့ၣ်တဖၣ်ဟးထီၣ်က့ၤလီၤဒ်ညီနုၢ်အသိးလံဒီးပယီၤသုးႇသုးခိးကီၢ်ဆၢ(BGF)တၢ်သမံသမိးတြဲၤတဖၣ်အံၤထၢ၀ဲဒၣ်စ့အဂ့ၢ်န့ၣ် ၦၤနီသိလ့ၣ်ဖိလၢအိၣ်ကီးတရံး၀့ၢ်ပူၤတဖၣ်စံး၀ဲန့ၣ်လီၤႉ
ဖဲအပူၤကွံာ်လါအ့ဖြ့ၣ် ၇ သီတုၤလၢလါအ့ဖြ့ၣ် ၂၁ သီန့ၣ် တၢ်ပၢၢ်ဆၢသုးပာ်ဖှိၣ်ထုးထီၣ်တၢ်ကလုၢ်လၢကမျၢၢ်တဘၣ် ဟးထီၣ်က့ၤလီၤလၢကျဲအံၤဘၣ်ဒီး ဘၣ်ဆၣ်ခဲအံၤခီဖျိတၢ်ပာ်ပနီၣ်အိၣ်အသီၦဲၤထီၣ်လံအဃိ ဖဲလီၢ်ခံအံၤသိလ့ၣ်ဟးထီၣ်က့ၤလီၤကဒါ၀ဲလံဘၣ်ဆၣ်ပယီၤသုးစုတီၤဖီလာ်တၢ်သမံသမိးတြဲၤတဖၣ်ထၢ၀ဲစ့အဂ့ၢ်န့ၣ် ၦၤနီပနံာ်တၢ်ဖိတၢ်လံၤဖိတဂၤ စံး၀ဲဒ်အံၤန့ၣ်လီၤႉ
“သိလ့ၣ်ဟးထီၣ်က့ၤလီၤဒီဒူၣ်လံလီၤႉတၢ်အိၣ်ခိးသမံသမိးတြဲၤနါက့ဟဲအါထီၣ်ႉလၢနကဟးထီၣ်မၠၣ်၀တံၣ်၀့ၢ်ဘျီန့ၣ်တြဲၤလၢအိၣ်ခိးထၢစ့န့ၣ်အိၣ်ဒီဒူၣ်ႉဘၣ်ဟ့ၣ်ဒီတကျဲလီၤႉလၢပနံာ်တၢ်ကူၣ်လဲၤမၤကၤလီၢ်(ဇုန်)န့ၣ်အါကတၢၢ်လီၤႉနဘၣ်ဟ့ၣ်လီၤပယီၤသုးႇပၢၤကီၢ်ႇ(BGF)စ့န့ၣ်ဘူးဘူးဖိလီၤႉအ၀ဲသ့ၣ်န့ၣ်မၤ၀ဲဒ်ဘၣ်ဟံးန့ၢ်၀ဲတၢ်ဘံၣ်တၢ်ဘၢဃ့အီၣ်စ့လဲလဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါတၢ်ပၢၢ်ဆၢသုးပာ်ဖှိၣ်ထုးထီၣ်တၢ်ကလုၢ်လၢတၢ်တဘၣ်ဟးထီၣ်က့ၤလီၤလၢကီးတရံး–မၠၣ်၀တံၣ်အ့ရှါကျဲဘၣ်အံၤမုၢ်နံၤမုၢ်သီၦဲၤ၀ဲလံဘၣ်ဆၣ်ကမျၢၢ်တဖၣ်ကကွၢ်တၢ်အိၣ်သးဒီးကလ့ၢ်ထီၣ်လ့ၢ်လိၤလၢတၢ်ပလီၢ်ပဒီပူၤအဂ့ၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် ဘီသိၣ်၀ါသုးကျိၤခိၣ် သုးခိၣ်စီၤကၠီၤသဲၣ် စံး၀ဲဒ်အံၤ န့ၣ်လီၤႉ
အ၀ဲစံး၀ဲလၢ“လီလီစဲၤဒုၦၤပံးကျဲအသီၦဲၤထီၣ်လံမီၤနီၤႉနါက့ကမျၢၢ်လ့ၢ်လိၤလ့ၢ်ထီၣ်အိၣ်ႉနါက့တၢ်ဒုးမ့တ၀ံၤဘၣ်ဒုတၢ်သူၣ်ကိၢ်သးကိၢ်အိၣ်လီၤႉတၢ်ဒုၣ်ဒါအိၣ်လၢကျဲပူၤဒံးမီၤနီၤႉခီဖျိတၢ်ဒုးတၢ်ယၤတ၀ံၤတတဲာ်ဒံးဘၣ်အဃိဘၣ်လဲၤကနၣ်လဲၤကနၣ်ဒ်န့ၣ်လီၤႉခါဆူညါတၢ်ကမၤသးခီဒုပတယးတဘၣ်ဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ကီးတရံး–မၠၣ်၀တံၣ်အ့ရှါကျဲဒီတကျိၤအံၤတၢ်ဒုးကဲထီၣ်၀ဲတလီၢ်လီၢ်ဒီး ခီဖျိတၢ်ဒုးကဲထီၣ်အဃိ ကျဲႇတိၤသ့ၣ်တဖၣ်ဟးဂူာ်ဟးဂီၤအိၣ်၀ဲအသိးကျဲတိၤလၢအဟးဂီၤတဖၣ်အံၤတၢ်က့ၤဘှီဂ့ၤထီၣ်ကဒါ၀ဲဒီးတၢ်ပျဲဟးထီၣ်က့ၤလီၤ၀ဲဘၣ်ဆၣ်ၦၤလၢအလ့ၢ်လိၤလ့ၢ်ထီၣ်လၢကျဲသ့ၣ်တဖၣ်အံၤန့ၣ်ဘၣ်ဟးထီၣ်က့ၤလီၤ၀ဲလၢတၢ်ဘၣ်ယိၣ်ဘၣ်ဘှီအပူၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ