ခ့ၣ်အဲးစံၣ် – KIC News

လါစဲးပထ့ဘၢၣ် ၅ သီႇ ၂၀၂၂ နံၣ်ႇ ခ့ၣ်အဲးစံၣ် ကတီၢ်ခဲအံၤလၢကညီကီၢ်စဲၣ်(ဖၣ်အၣ်)၀့ၢ်ပူၤန့ၣ်တနံၤဘၣ်တနံၤခီဖျိတၢ်ဟုၣ်တၢ်ဘျၣ်ႇတၢ်ဂုာ်ဆူၣ်ပျိဆူၣ်ႇတၢ်ဟုၣ်ဆဲးကဲးဒီးတၢ်ဟးဘုးဟုၣ်စ့ကဲထီၣ်သးဟဲအါထီၣ်၀ဲကွ့ၢ်ကွ့ၢ်အဃိတၢ်ဘၣ်ယိၣ်ဘၣ်ဘှီဟဲအိၣ်ထီၣ်၀ဲလၢတၢ်ဘံၣ်တၢ်ဘၢအဂီၢ်အဂ့ၢ်န့ၣ်ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ ဖဲၦၤလဲၤၦ့ၤတၢ်လၢဖၣ်အၣ်၀့ၢ် နထၣ်စ့(နှစ်ထပ်ေစျး)အခါတၢ်ဘုးဟုၣ်စ့ကဲထီၣ်သးအလီၢ်ခံန့ၣ် ကမျၢၢ်သ့ၣ်တဖၣ်ဘၣ်ယိၣ်ဘၣ်ဘှီတၢ်လၢအ၀ဲသ့ၣ်တၢ်ဘံၣ်တၢ်ဘၢအဂီၢ်ဟဲအါထီၣ်၀ဲအဂ့ၢ်န့ၣ် ၦၤလၢတၢ်ဘုးဟုၣ်အစ့အသကိးတဂၤစံး၀ဲဒ်အံၤန့ၣ်လီၤႉ “ဖဲၦၤဘုးအထၢၣ်အခါယကွၢ်အမဲာ်သၣ်န့ၣ်လီၤဂာ်ဒ်သိးအ၀ဲဖုးဘၣ်အသးဖးဒိၣ်ညါႉ အသူၣ်တနီးတသးတနီးႉတၢ်အိၣ်သးခဲအံၤခီဒုၦၤမ့တမျာ်ပတၢ်ဖိတၢ်လံၤတမံၤဂ့ၤတမံၤဂ့ၤမ့ၢ်ကဘၣ်လဲၤတၢၣ်မတဂၤလဲၣ်မးတသ့ၣ်ညါဘၣ်” အဂ့ၢ်န့ၣ်စံး၀ဲန့ၣ်လီၤႉ တၢ်ဃံးတၢ်စ့ၤအတီၢ်ပူၤဖၣ်အၣ်၀့ၢ်ပူၤတၢ်လီၢ်လၢၦၤဟးထီၣ်က့ၤလီၤစှၤအလီၢ်ဒီးလၢဖၣ်အၣ်၀့ၢ်(တီၤကလ့)သ၀ီတကပၤန့ၣ်စ့ၢ်ကီးတၢ်ဟုၣ်ဆဲးကဲးႇတၢ်ဂုာ်ဆူၣ်ပျိဆူၣ်ၦၤဆဲးကဲးကဲထီၣ်သးတလီၢ်လီၢ်အဂ့ၢ်န့ၣ်ကမျၢၢ်လၢအိၣ်ဖၣ်အၣ်၀့ၢ်ပူၤတဂၤစံးဘၣ်ခ့ၣ်အဲးစံၣ်န့ၣ်လီၤႉ အ၀ဲစံး၀ဲလၢ“တဘျီညါအံၤလၢတီၤကလ့တကပၤန့ၣ်နါက့ဆဲးကဲးလီၤမၢ်တလီၢ်လီၢ်လီၤႉနထံၣ်ၦၤဟံတၢ်ကစၢ်မးန့ၣ်နလဲၤလူၤတဘူၣ်ဘၣ်ႉခီဖျိအ၀ဲသ့ၣ်စိာ်ဃာ်ဒီအဃိဘၣ်ပျံၤလၢကက့ၤမၤသံကဒါနၤဒံးႉတၢ်အိၣ်သးအံၤဒံးယံၤဒံးနးထီၣ်လီၤ”အဂ့ၢ်န့ၣ်စံး၀ဲန့ၣ်လီၤႉ လီၢ်က၀ီၤပိာ်မုၣ်တဂၤလၢအိၣ်သ၀ီပူၤလဲၤမၤတၢ်လၢဖၣ်အၣ်၀့ၢ်ကိးနံၤဒဲးအံၤစ့ၢ်ကီးစံး၀ဲဘၣ်ယိၣ်လၢဆဲးကဲးကလီၤမၢ်အဃိမၤတၢ်တခီခီဘၣ်ကွၢ်ဟုၣ်ဆဲးကဲးတခီခီအဃိနီၢ်သးတၢ်ဘံၣ်တၢ်ဘၢတအိၣ်လၢၤဘၣ်အသိးတၢ်ဟုၣ်တၢ်ဘျၣ်အမဲာ်ညါဘၣ်ယိၣ်လၢတၢ်ဖီၣ်ဆူၣ်မၤတရီတပါကဟဲကဲထီၣ်သးအဂ့ၢ်န့ၣ်စံး၀ဲန့ၣ်လီၤႉ ဖဲအပူၤကွံာ်ခံလါအခါသးစၢ်တဂၤဖဲအ၀ဲလဲၤထၢနုာ်လီၤအဆဲးကဲးသိလၢဖၣ်အၣ်၀့ၢ်(Denko)သိစဲၢ်ဒီး ဖဲအ၀ဲလဲၤတၢ်ဟးလီၢ်၀ံၤဟဲက့ၤထီၣ်အခါတၢ်ဟုၣ်ကွံာ်အဆဲးကဲးကဲထီၣ်သးဒံးန့ၣ်လီၤႉ တၢ်ကဲထီၣ်သး၀ံၤအလီၢ်ခံသးစၢ်တဂၤအံၤအသကိးလဲၤတၢၣ်လၢပၢၤကီၢ်ဘၣ်ဆၣ်တလီၤဆီနီတမံၤဘၣ်အဂ့ၢ်န့ၣ်အ၀ဲစံးအါထီၣ်၀ဲန့ၣ်လီၤႉ တၢ်ဟုၣ်တၢ်ဘျၣ်ႇတၢ်ဟးဘုးဟုၣ်စ့ကဲထီၣ်သးဟဲအါထီၣ်ဒ်အံၤကမ့ၢ်လၢတၢ်ဖိတၢ်လံၤအၦ့ၤဒိၣ်ထီၣ်အဃိလီၤဒီးတကးဒံးဘၣ်တၢ်ဟုၣ်တၢ်ဘျၣ်ဟဲအါထီၣ်၀ဲအသိးၦၤဟးဃ့အီၣ်တၢ်လၢကျဲကပၤစ့ၢ်ကီးဟဲအါထီၣ်၀ဲကွ့ၢ်ကွ့ၢ်အဂ့ၢ်န့ၣ်ကမျၢၢ်လၢအိၣ်ဖၣ်အၣ်၀့ၢ်ပူၤတဖၣ်စံး၀ဲန့ၣ်လီၤႉ ဒ်န့ၣ်အသိးလၢလူၢ်ပျဲၢ်၀့ၢ်ႇကီးတရံး၀့ၢ်ဒီးမၠၣ်၀တံၣ်၀့ၢ်တကးဒံးဘၣ်လၢဒူသ၀ီတဖၣ်အပူၤစ့ၢ်ကီး တၢ်ဟုၣ်တၢ်ဘျၣ်ႇတၢ်ဂုာ်ဆူၣ်ပျိဆူၣ်တၢ်ဟဲအါထီၣ်၀ဲဒၣ်ကွ့ၢ်ကွ့ၢ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ

လါစဲးပထ့ဘၢၣ် ၅ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် လူၢ်ပျဲၢ်ကီၢ်ဆၣ်အပူၤ (BGF)ဟ့ၣ်လီၤ၀ဲဒၣ်ပယီၤသုးဒီးပၢၤကီၢ်စ့အဘူးအလဲကိးလါဒဲးဒီး စးထီၣ်ဖဲတနံၣ်အံၤလါယူၤန့ၣ်(BGF–၁၀၁၅)သုးရ့ၣ်စးထီၣ်ဆီလီၤ၀ဲဒၣ်တၢ်ဂဲၤလိာ်ကွဲတၢ်တၤကျိၣ်တၤစ့လၢ (တၤပီၤ)သ၀ီပူၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ သုးခိၣ်၀့နဲၤစ့ၤစုတီၤအဖီလာ်(BGF)သုးတဖၣ်ဆီလီၤ၀ဲဒၣ်(ကၤစံၤနိၤ)ႇတၢ်ခးညၣ်တၢ်ဂဲၤလိာ်ကွဲတကးဒံးဘၣ်အမဲာ်ညါတၢ်ဒုးတဖှံဆီဒီးတၢ်ဒိဖဲသ့ၣ်တဖၣ်အံၤလၢဟီၣ်က၀ီၤဖဲန့ၣ်အပူၤအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲ“တလါန့ၣ်ဘၣ်ဟ့ၣ်၀ဲအခိ(သၢကလီၢ်)ကၠးဒီးမၤ၀ဲလၢသ၀ီစ့ပာ်ကီၤအဂီၢ်လီၤတဲ၀ဲဒ်န့ၣ်မီၤနီၤႉအမၤ၀ဲခဲအံၤန့ၣ်ယဲယထံၣ်လၢဒ်သိးၦၤတၢ်ဆိကမိၣ်သုတလဲၤလၢထံရူၢ်ကီၢ်သဲးတၢ်အိၣ်သးအအိၣ်အံၤဘၣ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ခီဖျိ(BGF)အိးထီၣ်ဆီလီၤ၀ဲဒၣ်တၢ်ဂဲၤလိာ်ကွဲတၢ်တၤကျိၣ်တၢ်စ့ဒ်အံၤအဃိဘၣ်ယိၣ်လၢတၢ်စိာ်ဆါကသံၣ်မူၤဘှီးကဟဲအိၣ်ထီၣ်တကးဒံးဘၣ်ကတီၢ်အံၤခီဖျိထံရူၢ်ကီၢ်သဲးတၢ်အိၣ်သးတဖၣ်အဃိဘၣ်ယိၣ်လၢသူၣ်ဘီၣ်သးစၢ်တဖၣ်ကဟးဂီၤဒိၣ်ထီၣ်အဂ့ၢ်န့ၣ်လီၢ်က၀ီၤသ၀ီဖိလၢအဂၤတဂၤစံး၀ဲန့ၣ်လီၤႉ “တၢ်လၢထံကီၢ်တဘ့ၣ်န့ၣ်နမ့မၤတၢ်တၤကျိၣ်တၢ်စ့န့ၣ်တဟ့ၣ်နၤတၢ်အဘျုးနီတမံၤဘၣ်ႉ ၦၤလဲၤဂဲၤလိာ်ကွဲတဖၣ်န့ၣ်မ့ၢ်ဆှူန့ၣ်ပီၣ်လီၤအလီတဲစိႇဆဲးကဲးန့ၣ်ယထံၣ်ဘၣ်ဒီဒူၣ်ႉလၢခံန့ၣ်တၢ်ဟုၣ်ႇတၢ်တမျာ်တၢ်ကကဲထီၣ်သးန့ၣ်ပတဲတသ့ဘၣ်ႉအဆီလီၤ၀ဲတၢ်တၤကျိၣ်တၤစ့ဒ်အံၤအဃိအ၀ဲသ့ၣ်အီၣ်ဘၣ်၀ဲႉ မ့မ့ၢ်ကမျၢၢ်တခီဘၣ်လီၤဒိမီၤနီၤႉခဲအံၤၦၤမ့ဟဲကိးယၤလၢမုၢ်နၤခီန့ၣ်မးယအိးထီၣ်ပဲတြီတဘူၣ်လၢၤဘၣ်” အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ တၢ်ဂဲၤလိာ်ကွဲတၢ်တၤကျိၣ်တၤစ့အလီၢ်တဖၣ်အံၤတၢ်သူၣ်ထီၣ်အီၤလၢတၢ်လိာ်ကွဲလီၢ်ပျီပူၤဒီး မ့မ့ၢ်(အဖိတ်ေန့)ဒီး(ဥပုသ်ေန့)ခံသီအံၤန့ၣ်တၢ်ပံးဃာ်၀ဲဒီးတၢ်ဒုးတဖှံဆီန့ၣ်တၢ်အိးထီၣ်၀ဲလၢ(မုၢ်ဃုနံၤ)ဒီး(မုၢ်နွံနံၤ)အဂ့ၢ်န့ၣ်သ့ၣ်ညါဘၣ်န့ၣ်လီၤႉ ၦၤလၢအလဲၤဂဲၤလိာ်ကွဲတၢ်တၤကျိၣ်တၤစ့တဖၣ်န့ၣ်မ့ၢ်ၦၤလီၢ်က၀ီၤဖိဖဲန့ၣ်တကးဒံးဘၣ်ခီဖျိၦၤအိၣ်လၢလူၢ်ပျဲၢ်၀့ၢ်ဒီးဖၣ်အၣ်၀့ၢ်တဖၣ်ဟဲလိာ်ကွဲစ့ၢ်ကီးအိၣ်အဃိလီၢ်က၀ီၤဖိတဖၣ်တတူၢ်၀ဲဘၣ်ဘၣ်ဆၣ်ကတီၢ်ခဲအံၤခီဖျိထံရူၢ်ကီၢ်သဲးတၢၠအိၣ်သးအဃိဘၣ်ဆီၣ်လီၤသးအဂ့ၢ်န့ၣ်လီၢ်က၀ီၤသ၀ီဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ တၢ်ဂဲၤလိာ်ကွဲတၢ်တၤကျိၣ်တၤစ့သ့ၣ်တဖၣ်အံၤတၢ်ဆီလီၤ၀ဲလၢလူၢ်ပျဲၢ်ကီၢ်ဆၣ်(တၤပီၤ)သ၀ီပူၤတကးဒံးဘၣ်အမဲာ်ညါလၢတၢ်ကြဲၢ်ကီၢ်ဆၣ်(ပီၤ)သ၀ီပူၤစ့ၢ်ကီး(BGF)တီခိၣ်ရိၣ်မဲဆီလီၤ၀ဲတၢ်ဂဲၤလိာ်ကွဲတၢ်တၤကျိၣ်တၤစ့လီၢ်ဒ်အံၤစ့ၢ်ကီးအိၣ်၀ဲအဂ့ၢ်န့ၣ်ကမျၢၢ်လၢအထံၣ်၀ဲဒီးအမဲာ်တဖၣ်စံး၀ဲအသိးသ့ၣ်ညါဘၣ်န့ၣ်လီၤႉ

လါစဲးပထ့ဘၢၣ် ၂ သီႇ ၂၀၂၂ နံၣ်ႇ ခ့ၣ်အဲးစံၣ် ပယီၤသုးတဂၤလၢအဟဲက့ၤဟ့ၣ်လီၤသးဆူခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်- KNLA(သုးက့ ၅)အအိၣ်ဃုာ်ဒီးစုက၀ဲၤအံၤ (KNLA)ဟ့ၣ်လီၤအီၤစ့အကလီၢ်(၂၀)ကၠးအဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲတနံၤန့ၣ်လီၤႉ ပယီၤသုးလၢအဟဲစံၣ်ဖျိးထီၣ်တဂၤအံၤမ့ၢ်၀ဲဒၣ်ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ–၈)စုတီၤအဖီလာ် ခီၣ်ချ့သုးရ့ၣ်(ခမရ–၅၉၃)အၦၤမီၤသၣ်စ့ၤအီၣ်(၂၅)နံၣ် သုးဖိနီၣ်ဂံၢ်(တ၊၄၈၆၆၅၂)ဒီး ဖဲအ၀ဲဟဲက့ၤအခါစိာ်ဃုာ်၀ဲ(MA-3)ကျိတခိၣ်ႇကျိချံ(၁၇၀)ဖျၢၣ်ဒီးစုကွံာ်မ့ၣ်ပိၢ်တဖျၢၣ်အဂ့ၢ်န့ၣ် မုၢ်တြီၢ်တၢ်ကစီၣ်ပာ်ဖျါ၀ဲန့ၣ်လီၤႉ ခိၣ်နၢ်လၢအိၣ်သုးကလၢၤတဖၣ်အိၣ်ဒီးတၢ်ဒူၣ်တၢ်ဆၢအါမးလၢအၦၤသုးဖိတဖၣ်အဖီခိၣ်တကးဒံးဘၣ်အမဲာ်ညါအီၣ်ဘၣ်အီဘၣ်တလၢတၦဲၤဘၣ်အဃိဘၣ်စံၣ်ဖျိးထီၣ်ဒ်အံၤလီၤအဂ့ၢ်န့ၣ်မီၤသၣ်စ့ၤအီၣ်စံးဘၣ်ခ့ၣ်အဲၣ်ယူၣ်–မုၢ်တြီၢ်တၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“ကတီၢ်ဖဲမ့ၢ်ဒံးပယီၤသုးကီၣ်ကးအၦၤအခါန့ၣ်အီၣ်ဘၣ်မ့ၤတဘျဲအီၣ်ဘၣ်ႇအီၣ်မ့ၤချီတဘျီဘျီအီၣ်မ့ၤတဘျီဘျီဒီးခိၣ်နၢ်တဖၣ်အိၣ်ဒီးတၢ်ပာ်အဒူၣ်အဆၢအါမးလၢအၦၤသုးဖိတဖၣ်အဖီခိၣ်ဒီးတၢ်ကီတၢ်ခဲဒ်အံၤတဖၣ်တူၢ်တန့ၢ်လၢာ်ဘၣ်အဃိဘၣ်စံၣ်ဖျိးထီၣ်လီၤ”အဂ့ၢ်န့ၣ်စံး၀ဲန့ၣ်လီၤႉ ပယီၤသုးလၢအဟဲက့ၤဟ့ၣ်လီၤသးတဂၤအံၤအတၢ်ပညိၣ်အိၣ်လၢကလဲၤ၀ဲဆူယိၤကီၢ်လၢကလဲၤဃုတၢ်ဖံးတၢ်မၤအဂီၢ်အဃိခ့ၣ်အဲၣ်ယူၣ်(မုၢ်တြီၢ်)ကီၢ်ရ့ၣ်ခိၣ်နၢ်တဖၣ်အိၣ်ဒီးတၢ်ရဲၣ်တၢ်ကျဲၤဂ့ၤဂ့ၤဘၣ်ဘၣ်လၢကဆှၢတုၤအ၀ဲဆူအတၢ်ပညိၣ်ဖီတၢၣ်အဂ့ၢ်န့ၣ် လံာ်တၢ်ပာ်ဖျါပူၤပာ်ဖျါ၀ဲန့ၣ်လီၤႉ

လါစဲးပထ့ဘၢၣ် ၂ သီႇ ၂၀၂၂ နံၣ်ႇ ခ့ၣ်အဲးစံၣ် ပယီၤသုးနုာ်လီၤဟံးန့ၢ်လီၢ်လၢတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)တၢ်ပၢဟီၣ်က၀ီၤဂီၤလ့ၤဒီးဆိၣ်စံမၠဲၣ်တကပၤအါအါဂီၢ်ဂီၢ်ဒီးတၢ်ဒုးကဲထီၣ်သ့၀ဲအဂ့ၢ်န့ၣ်ဟီၣ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ ပယီၤသုးလၢအနီၣ်ဂံၢ်ကအိၣ်အဂၤ(၃၀၀)ဃၣ်ဃၣ်အံၤအိၣ်၀ဲဒၣ်လၢ(၀ၣ်မံၤထၣ်)မုၢ်နုာ်သုးကလၢၤဒီးနုာ်လီၤ၀ဲဒၣ်ဆူ(DKBA)တၢ်ပၢဂီၤလ့ၤႇဆိၣ်စံမၠဲၣ်တကပၤဒီးတၢ်ပညိၣ်လၢကမၤရှဲလဲခးသဂၢၢ်၀ဲ(Cobra)သုးကျိၤဒီးကဒိၣ်စိ၀ဲသ့ၣ်ဘီဘိသုးကလၢၤဒီးဖလူ–ဂီၤလ့ၤကျဲဒီတကျိၤအဂ့ၢ်န့ၣ်(Cobra)ၦၤကတိၤတၢ်ပၢသုးကျိၤခိၣ်–၂ စီၤကီၢ်စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ခဲအံၤလၢလ့ဂီၤဒုတတုၤဒံးဘၣ်ႉနါက့ယဆိမိၣ်(DKBA)မ့ပျဲန့ၢ်အီၤဒုကဟဲတုၤဧါသၢၣ်ႉအတၢ်ပညိၣ်ဒုကဟဲအိၣ်က့ၤသ့ၣ်ဘီဘိသုးကလၢၤဒီးဖလူ–ဂီၤလ့ၤကျဲတဘိအံၤကပၢဆှၢ၀ဲဒ်န့ၣ်မီၤနီၤႉ ယဆိမိၣ်မ့ဟဲတလၢလ့ဂီၤဒုကဲထီၣ်လီၤႉဟဲပာ်လီၤ၀ဲဒၣ်(၁၂၀ မမ)ႇ(၈၁ မမ)ကျိတဖၣ်လၢ သုးခိၣ်စတံ(DKBA)သုး၀ဲၤလီၢ်ခိၣ်သ့ၣ်အကပိၤကပၤန့ၣ်အိၣ်မီၤနီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ကတီၢ်ခဲအံၤဒ်ပယီၤသုးအတၢ်ဟူးတၢ်ဂဲၤအသိးန့ၣ်ဟဲထီၣ်၀ဲဒၣ်လၢ(သိထၣ်ကွ့ၣ်)ဒီးဆိၣ်စံမၠဲၣ်ကျဲခံကပၤလၢာ်ဒီးလီၤဂာ်ဒ်သိးကခးသဂၢၢ်၀ဲအဃိကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တကပၤအိၣ်ကတီၤထီၣ်သးလံအဂ့ၢ်န့ၣ်စီၤကီၢ်စံးအါထီၣ်၀ဲန့ၣ်လီၤႉ ဘၣ်ဃးပယီၤသုးကျိၤဟဲနုာ်လီၤလၢ(DKBA)ဟီၣ်က၀ီၤပူၤတၢ်ဂ့ၢ်အံၤဟီၣ်က၀ီၤခိၣ်နၢ်ဘၣ်ထွဲတဖၣ်ထံၣ်၀ဲလၢတၢ်ပာ်ဖှိၣ်မၤသကိးတၢ်ဒီး(DKBA)သုးခိၣ်သုးနၢ်အိၣ်၀ဲတနီၤဒီးခီဖျိပယီၤသုးကျိၤဟဲနုာ်လီၤအဃိလ့ဂီၤဒီးဆိၣ်စံမၠဲၣ်လီၢ်က၀ီၤဖိတနီၤဃ့ၢ်ထီၣ်၀ဲလံအဂ့ၢ်န့ၣ်(DKBA)ခိၣ်နၢ်တဂၤစံး၀ဲဒ်အံၤန့ၣ်လီၤႉ “ပအိၣ်ဖဲအံၤဒုပယီၤသုးတအိၣ်ဘၣ်ႇအိၣ်လၢတၢ်လူၢ်ခိၣ်လၢလ့ၤဂီၤမတၤဧါသၢၣ်ႉအိၣ်လ့ဂီၤစ့ၢ်ႇအိၣ်သ့ၣ်ဘီဘိစ့ၢ်အိၣ်ခဲလၢာ်လီၤႉအိၣ်၀းကၠီႇအမ့လဲၤထီၣ်ဒုၦၤခးအီၤဧါသၢၣ်ႉကခုၣ်လီၤဒုအိၣ်ပၠၤလဲၣ်ႇအိၣ်လၢကကိၢ်ထီၣ်ခီဧါသၢၣ်သ့ၣ်ညါစ့ၢ်ဘၣ်ႉယဆိမိၣ်ကကိၢ်ထီၣ်အါမီၤနီၤႉခဲအံၤလီၢ်က၀ီၤဖိတနီၤစံၣ်လၢၤလံႉ တနီၤဒုတစံၣ်ဒံးဘၣ်” အဂ့ၢ်န့ၣ် (DKBA)သုးခိၣ်စံးဘၣ်ခ့ၣ်အဲးစံၣ်န့ၣ်လီၤႉ ကျဲလၢပယီၤသုးဟဲနုာ်လီၤဒီတဘိန့ၣ်အိၣ်၀ဲဒီး(DKBA)တၢ်လီၢ်တကးဒံးဘၣ်အမဲာ်ညါ(KNLA)သုးတၢ်လီၢ်အိၣ်၀ဲတနီၤဘၣ်ဆၣ်ခီဖျိတၢ်တခးပယီၤသုးလၢအဟဲနုာ်လီၤတဖၣ်ဘၣ်အဃိ(DKBA)ခး၀ဲတသ့ဘၣ်အဂ့ၢ်န့ၣ်(DKBA)သုးခိၣ်တဂၤစံးဘါထီၣ်၀ဲန့ၣ်လီၤႉ

လါစဲးပထ့ဘၢၣ် ၁ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဖၣ်အၣ်ကီၢ်ရ့ၣ်(သုးက့ ၇)ဟီၣ်က၀ီၤအပူၤ ခီဖျိပယီၤသုးနုာ်လီၤအိၣ်လၢတန့ဆါကီၢ်ဆၣ်(နီၤနဲ)သ၀ီသီခါဖၠၣ်ကရၢၢ်ပူၤအဃိလီၢ်က၀ီၤသ၀ီဖိလၢ အိၣ်ဘူးဖဲန့ၣ်သ့ၣ်တဖၣ်ဘၣ်ယိၣ်လၢတၢ်ဒုးကကဲထီၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ ပယီၤသုးကျိၤတဖၣ်အံၤဖဲလါအီကူး ၃၁ သီအနံၤန့ၣ် ဟဲနုာ်လီၤ၀ဲဒၣ်လၢနီၤနဲသ၀ီပူၤ အဂၤ(၄၀)ဃၣ်ဃၣ်၀ံၤအလီၢ်ခံ နုာ်လီၤအိၣ်၀ဲဒၣ်လၢသီခါဖၠၣ်ကရၢၢ်ပူၤလီၤအဂ့ၢ်န့ၣ် တန့ဆါလီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ “ပယီၤသုးနုာ်လီၤအိၣ်လၢသ၀ီပူၤႇခီဖျိသ၀ီဖိတဖၣ်ပျံၤတၢ်ဖုးတၢ်အဃိကညီတၢ်မုာ်တၢ်ခုၣ်ကီၣ်ကး (KNU/KNLA-PC) အံၤလဲၤပာ်က့ၤအ၀ဲသ့ၣ်လၢသီခါဖၠၣ်မီၤနီၤႉခဲအံၤကမျၢၢ်တဖၣ်ဘၣ်ယိၣ်လၢတၢ်ဒုးကကဲထီၣ်မီၤနီၤႉ မ့ၢ်တၢ်ကကဲထီၣ်သးအခါဖဲလဲၣ်န့ၣ်သူၣ်တနီးသးတနီးဒိၣ်မး” အဂ့ၢ်န့ၣ်တန့ဆါလီၢ်က၀ီၤဖိတဂၤဃီ၀ဲန့ၣ် စ့းအါထီၣ်၀ဲန့ၣ်လီၤႉ ဘၣ်ဃးပယီၤသုးနုာ်လီၤအိၣ်လၢသီခါဖၠၣ်ကရၢၢ်ပူၤတၢ်ဂ့ၢ်အံၤလီၢ်က၀ီၤကမျၢၢ်တဖၣ်တလိၣ်သူၣ်ကိၢ်သးဂီၤဘၣ်ဒီးပယီၤသုးတမၤရှဲလဲတၢ်လၢတန့ဆါကီၢ်ဆၣ်ပူၤဘၣ်အဂ့ၢ်ဒီးပယီၤသုးကျိၤလၢအဟဲခဲအံၤတဖၣ်လၢဟီၣ်က၀ီၤတၢ်ဘံၣ်တၢ်ဘၢအဂီၢ်လီၤအဂ့ၢ်န့ၣ်(KNU/KNLA-PC)အနဲၣ်ရွဲၣ် သုးခိၣ်ဒိၣ်စိ စီၤကၠီၤညိၣ် စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ “ပယီၤသုးကမၤရှဲလဲတၢ်ဖဲအံၤဒုပတနၢ်ဟူဒံးဘၣ်ႉအ၀ဲသ့ၣ်ဟဲတုၤခဲအံၤန့ၣ်လၢတၢ်ဘံၣ်တၢ်ဘၢအဂီၢ်လီၤႉပကရူၢ်နါက့ပလဲၤဟံးန့ၢ်စၢၤကီးတရံး၀့ၢ်ခိၣ်၀့ၢ်ဃၢၤ တၢ်ဘံၣ်တၢ်ဘၢစ့ၢ်ကီးအိၣ်မီၤနီၤ” အဂ့ၢ်န့ၣ်စံး၀ဲန့ၣ်လီၤႉ ဘၣ်ဃးပယီၤသုးကျိၤနုာ်လီၤအိၣ်လၢ(နီၤနဲ)သ၀ီသီခါဖၠၣ်ကရၢၢ်ပူၤအံၤအဖီခိၣ်ခ့ၣ်အဲၣ်ယူၣ်တကပၤအိၣ်ခိးကွၢ်၀ဲအတၢ်ဟူးတၢ်ဂဲၤအဂ့ၢ်န့ၣ်ခ့ၣ်အဲၣ်ယူၣ်တန့ဆါကီၢ်ဆၣ်ခိၣ် ပဒိၣ်သးစီစံး၀ဲန့ၣ်လီၤႉ “ပယီၤသုးကျိၤဟဲနုာ်လီၤတၢ်ဂ့ၢ်အံၤလၢပ၀ဲဒၣ်တကပၤပအိၣ်ခိးကွၢ်မီၤနီၤႉတုၤလၢခဲအံၤပတနၢ်ဟူတၢ်နီတမံၤဒံးဘၣ်ႉမ့ဃုကမျၢၢ်ထံဖိကီၢ်ဖိတၢ်ဂ့ၢ်ကီဒု၀ဲဒၣ်နါက့ပတဲတဘၣ်ဘၣ်” အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤ ႉ ပယီၤသုးကျိၤလၢအနီၣ်ဂံၢ်ကအိၣ်အဂၤ(၄၀)ဃၣ်ဃၣ်အံၤမ့ၢ်မနုၤသုးရ့ၣ်လဲၣ်န့ၣ်တုၤလၢခဲအံၤတၢ်တသ့ၣ်ညါ၀ဲဒံးဘၣ်န့ၣ််လီၤႉသုးကျိၤ၀ဲအံၤဟးထီၣ်က့ၤလီၤဟူးဂဲၤလၢကီးတရံး၀့ၢ်ပူၤဃုာ်ဒီး(KNU/KNLA-PC)ဒီးသုးခိးကီၢ်ဆၢ(BGF)သုးအဂ့ၢ်န့ၣ်လီၢ်က၀ီၤဖိတဖၣ်စံးဘၣ်ခ့ၣ်အဲးစံၣ်န့ၣ်လီၤႉ

လါစဲးပထ့ဘၢၣ် ၁ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲအပူၤကွံာ်လါအီကူး ၂၉ သီ မုၢ်နၤခီ ၁၂ နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုးမီၤစိရိၤအကျိဖးဒိိၣ်လူၢ်လၢအိၣ်ကၠၤအ့စ့ၣ်ကၠံ၀့ၢ်ပူၤအံၤခးလီၤ၀ဲကျိဖးဒိၣ်ဆူ သ၀ီလၢအိၣ်ဘူးဖဲန့ၣ်တဖၣ်အပူၤတပယူာ်ဃီအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ ကျိဖးဒိၣ်လူၢ်လၢကၠၤအ့စ့ၣ်ကၠံ၀့ၢ်ပူၤအံၤခးလီၤကျိဖးဒိၣ်အထံၣ်(၅၀)ဃၣ်ဃၣ်ဆူနိၣ်တကီကီၢ်ဆၣ်ကၠၣ်ခၣ်ခၠီႇမံလီၤခၠီႇတတါအူသ၀ီတကပၤအဃိလီၢ်က၀ီၤကမျၢၢ်တၢ်ဘၣ်ဒိဘၣ်ထံးတအိၣ်နီတမံၤဘၣ်ဘၣ်ဆၣ်လီၢ်က၀ီၤဖိတဖၣ်ပျံၤတၢ်ဖုးတၢ်အဂ့ၢ်န့ၣ်လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“သုးမီၤစိရိၤကျိဖးဒိၣ်လူၢ်ခးလီၤကျိဖးဒိၣ်လီၤတဲာ်လၢ(မံလီၤခၠီ)သ၀ီပူၤႉမ့၀ံၤလီၤတဲာ်၀ဲဒၣ်လၢ(ကၠၣ်ခၣ်ခၠီ)သ၀ီခၢၣ်သးတၢ်သွၣ်ခိၣ်န့ၣ်အဖျၢၣ်(၁၀)မီၤနီၤႉတၢ်လီၢ်လၢၦၤတအိၣ်အလီၢ်ဘၣ်နါက့လီၤတဲာ်စ့ၢ်ႉခးလီၤကအိၣ်အဖျၢၣ်(၅၀)ညါႉသ၀ီဖိဘၣ်ဒိဒုတအိၣ်ဘၣ်ႉဘၣ်မနုာ်အဃိလဲၣ်န့ၣ်ကျိဖးဒိၣ်တဖၣ်န့ၣ်လီၤတဲာ်၀ဲလၢတၢ်သွၣ်ခိၣ်တကပၤန့ၣ်အဃိတၢ်ဘူၣ်ဂ့ၤႉမ့မ့ၢ်သ၀ီဖိတဖၣ်ဒုတၢ်ကဲထီၣ်သးဖဲတၢ်တနၤန့ၣ်အ၀ဲသ့ၣ်ပျံၤတၢ်ဖုးတၢ်မီၤနီၤ”အဂ့ၢ်န့ၣ်စံးဘၣခ့ၣ်အဲးစံၣ်ဖဲမဟါန့ၣ်လီၤႉ ပယီၤသုးခးလီၤကျိနါစိၤကျိဖးဒိၣ်လၢတၢ်ဂ့ၢ်တအိၣ်နီတမံၤဒ်အံၤဒီးခီဖျိခးလီၤကျိဖးဒိၣ်အဃိလီၢ်က၀ီၤကမျၢၢ်သံဘၣ်ဒိဘၣ်ထံးတအိၣ်နီတမံၤဘၣ်ဘၣ်ဆၣ်မ့ၢ်လၢလီၢ်က၀ီၤဖိပျံၤတၢ်ဖုးတၢ်အဃိကတီၢ်ခဲအံၤခူၣ်ဃာ်၀ဲတၢ်ပူၤသ့ၣ်တဖၣ်အဂ့ၢ်န့ၣ်လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ဒူသ၀ီတၢ်လီၢ်လၢပယီၤသုးခးလီၤကျိဖးဒိၣ်အံၤအိၣ်၀ဲဒၣ်လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤအပူၤန့ၣ်လီၤႉကတီၢ်ခဲအံၤလၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤအပူၤ တၢ်ပၢၢ်ဆၢသုးပာ်ဖှိၣ်ကရူၢ်ဒီးပယီၤသုးတဖၣ်အဘၢၣ်စၢၤတၢ်ဒုးကဲထီၣ်၀ဲကိးမုၢ်နံၤဒဲးဒီးတၢ်ဒုးကဆူၣ်ထီၣ်သ့၀ဲအဂ့ၢ်န့ၣ်တၢ်ပၢၢ်ဆၢကရူၢ်စံး၀ဲန့ၣ်လီၤႉ

လါစဲးပထ့ဘၢၣ် ၁ သီႇ ၂၀၂၂ နံၣ်ႇ ခ့ၣ်အဲးစံၣ် ကညီကီၢ်စဲၣ်ပဒိၣ်လၢအပူၤကွံာ်ကိတိာ်လီၢ်လံၤ(၃)ဂၤလၢအလီၤဘၣ်ဃိာ်(၂)နံၣ်လၢတၢ်ဘျၢသဲစး(၅၀၅)သ့ၣ်တဖၣ်အံၤ ဖဲတနံၤအံၤလါစဲးပထ့ဘၢၣ် ၁ သီ ဂီၤခီအဆၢကတီၢ်န့ၣ် တၢ်ပျၢ်လီၤက့ၤအ၀ဲသ့ၣ်လၢဖၣ်အၣ်(တီၤကလ့)ဃိာ်ပူၤလံအဂ့ၢ်န့ၣ် ကိတိာ်လီၢ်လံၤအသကိးတဖၣ် ပာ်ဂၢၢ်ပာ်ကျၢၤစံး၀ဲန့ၣ်လီၤႉ “ဖဲတဂီၤအံၤဂီၤခီ ၈း၃၀ န့ၣ်တၢ်ပျၢ်လီၤက့ၤအ၀ဲသ့ၣ်အဃိပလဲၤအိၣ်စိၢ်အ၀ဲသ့ၣ်မီၤနီၤႉ ဃိာ်တၢ်ခိၣ်ထိးတဲ၀ဲလၢမုၢ်နံၤမုၢ်သီၦဲၤလံအဃိတၢ်ပျၢ်လီၤအ၀ဲသ့ၣ်လီၤႉအ၀ဲသ့ၣ်န့ၣ်ဘၣ်လီၤလၢဃိာ်ပူၤတဂၤန့ၣ်(၂)နံၣ်ဒီးခဲအံၤဟဲက့ၤထူၣ်ဖျဲးထီၣ်လံမီၤနီၤႉခဲအံၤအ၀ဲသ့ၣ်ဟဲက့ၤတုၤလၢဟံၣ်လံ”အဂ့ၢ်န့ၣ်ကိတိာ်လီၢ်လံၤအသကိးလၢအလဲၤအိၣ်စိၢ်တၢ်တဂၤစံးဘၣ်ခ့ၣ်အဲးစံၣ်န့ၣ်လီၤႉ ကညီကီၢ်စဲၣ်ပဒိၣ်လၢအပူၤကွံာ်စိၤအခါပဒိၣ်ကရၢဖိကိတိာ်ခိၣ်ကျၢၢ်နါခ့ၤထွ့မၠ့ၣ်ဃုာ်ဒီး၀ဲၤကျိၤဘၣ်ထွဲကိတိာ်တဖၣ်အံၤကီၢ်စဲၣ်သုးမီၤစိရိၤတကပၤစံၣ်ညီၣ်လီၤလၢကဘၣ်လီၤလၢဃိာ်ပူၤန့ၣ်လီၤႉ ခဲအံၤကိတိာ်လီၢ်လံၤလၢတၢ်ပျၢ်လီၤက့ၤအီၤ(၃)ဂၤအံၤမ့ၢ်၀ဲအူဘိၤဘိၤ၀့ၤမီၤ(ကညီကီၢ်စဲၣ်ၦၤဂ့ၢ်၀ီကိတိာ်)ႇခိၤမၠိတ့ၣ်(ပအိၣ်ကလုာ်ဒူၣ်ဂ့ၢ်၀ီကိတိာ်)ႇအူမ့ကိၤခဲၤ(ထံလီၢ်ကီၢ်ပူၤတၢ်နုာ်လီၤဟးထီၣ်ဒီး ကမျၢၢ်ဂံၢ်ဘါကိတိာ်)သ့ၣ်တဖၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ

လါစဲးပထ့ဘၢၣ် ၁ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံး၀့ၢ်ပူၤ ဖဲလါအီကူး ၃၀ သီအနံၤန့ၣ် သုးမီၤစိရိၤၦၤဘၣ်မူဘၣ်ဒါဟးဘိးဘၣ်ရၤလီၤတၢ်ကလုၢ်ဆူကမျၢၢ်တဖၣ်အအိၣ်လၢဟါခီ ၆ နၣ်ရံၣ်တုၤဂီၤခီ ၄ နၣ်ရံၣ်န့ၣ်မၤအါထီၣ်၀ဲတၢ်ဆၢကတီၢ်လၢတဘၣ်ဟးထီၣ်တၢ်ချၢဘၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ ကမျၢၢ်လၢအိၣ်၀့ၢ်ပူၤတဂၤစံး၀ဲ“အ၀ဲသ့ၣ်ဟးတဲလီၤ၀ဲဒၣ်လၢက၀ီၤဒ့အပူၤမီၤနီၤႉဂီၤခီ ၄ နၣ်ရံၣ်တုၤဟါခီ ၆ နၣ်ရံၣ်န့ၣ်တဘၣ်ဟးထီၣ်တၢ်ချၢဘၣ်ထုးထီၣ်၀ဲတၢ်ကလုၢ်ဒ်န့ၣ်မီၤနီၤႉတဲ၀ဲလၢဘၣ်ယိၣ်လၢ(PDF)ကညီကရူၢ်ကဟဲခးကဒီးတၢ်လၢ၀့ၢ်ပူၤအဃိလၢကမျၢၢ်တၢ်ဘံၣ်တၢ်ဘၢအဂီၢ်ထုးထီၣ်၀ဲတၢ်သိၣ်တၢ်သီဒ်န့ၣ်ဟးဒုးသ့ၣ်ညါလီၤ၀ဲဒ်န့ၣ်မီၤနီၤႉအနီၢ်ကီၢ်န့ၣ်ပျံၤ၀ဲလၢတၢ်ကလဲၤခးအ၀ဲသ့ၣ်တၢ်လီၢ်ႇသုးကလၢၤႇအ၀ဲၤဒၢးတဖၣ်အဃိလီၤႉတၢ်ကလုၢ်အံၤသၢလါဂီၢ်မီၤနီၤႉတုၤလၢလါအီးကထိဘၢၣ်ဟးဒုးသ့ၣ်ညါလီၤ၀ဲဒ်န့ၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါကတီၢ်ခဲအံၤခီဖျိတၢ်ကးတံၢ်ကွံာ်၀့ၢ်ပူၤကျဲဟးထီၣ်နုာ်လီၤတဖၣ်အဃိ ကမျၢၢ်လၢအိၣ်၀့ၢ်ပူၤတဖၣ်တၢ်ကီတၢ်ခဲအိၣ်လၢကဟးထီၣ်က့ၤလီၤအဂ့ၢ်န့ၣ် ပှၤအိၣ်၀့ၢ်ပူၤတဂၤဃီ၀ဲန့ၣ် စံးအါထီၣ်၀ဲန့ၣ်လီၤ. ဖဲအပူၤကွံာ်လါအီကူး ၁၅ သီအနံၤန့ၣ်တၢ်နုာ်လီၤခးကီးတရံးပၢၤကီၢ်၀ဲၤလီၢ်တၢ်လီၢ်(၂)တီၤ ကဲထီၣ်သး၀ံၤအလီၢ်ခံတၢ်ကးတံၢ်ကွံာ်ကျဲလၢ၀့ၢ်ပူၤဒီးသ၀ီတဖၣ်အဘၢၣ်စၢၤႇတကးဒံးဘၣ်မ့ၣ်အူတဟဲလၢၤဘၣ်အဖီခိၣ်အံၤ တၢ်မၤအါထီၣ်ကဒီးတၢ်ဆၢကတီၢ်လၢမုၢ်နၤခီတဘၣ်ဟးထီၣ်တၢ်ချၢဘၣ်အံၤအဃိ ကမျၢၢ်လၢအိၣ်၀့ၢ်ပူၤက၀ီၤဒ့(၇)ဘ့ၣ်အပူၤတဖၣ်ဟးတသ့လဲၤတသ့လၢၤဘၣ်ဒီးဘၣ်ယိၣ်လၢတၢ်ဒုးကကဲထီၣ်လၢ၀့ၢ်ပူၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ “ခဲအံၤမ့ၣ်အူနါက့တဟဲဘၣ်ႇစဲၢ်နါက့အိးထီၣ်တဘူၣ်ဘၣ်ႉပယီၤသုးနါက့ဟးဆှၣ်တၢ်ကိးဆၢကတီၢ်ဒဲးလီၤႉနုာ်လီၤသမံသမိးၦၤတမှံၤစရီလၢက၀ီၤဒ့ပူၤႉၦၤအိၣ်လၢသ၀ီတဖၣ်နါက့ဟဲၦ့ၤတၢ်တဘူၣ်လၢၤဘၣ်ႉၦၤကးတံၢ်ဃာ်၀့ၢ်ပူၤကျဲနုာ်လီၤခဲလၢာ်အဃိႇတၢ်ဒုးမ့ကဲထီၣ်န့ၣ်စံၣ်ထီၣ်တညီဘၣ်”အဂ့ၢ်န့ၣ်ကီးတရံးကမျၢၢ်လၢအဂၤတဂၤစံး၀ဲန့ၣ်လီၤႉ သုးဟံးန့ၢ်တၢ်စိိတၢ်ကမီၤ၀ံၤအလီၢ်ခံလၢကညီကီၢ်စဲၣ်ကီးတရံးႇမၠၣ်၀တံၣ်ႇဖၣ်အၣ်ႇသၣ်တီၣ်ႇနိၣ်တကီကီၢ်ဆၣ်တကပၤန့ၣ်တၢ်ဒုးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤကိးမုၢ်နံၤဒဲးဒီးလၢမၠၣ်၀တံၣ်–ဂီၤလ့ၤႇကီးတရံး–နိၣ်တကီႇဖၣ်အၣ်–၀ါဘိၤတီ–ကမၤမိၢ်–ကတၢၢ်တံာ်ကျဲတဖၣ်စ့ၢ်ကီးတၢ်ဟးထီၣ်က့ၤလီၤတန့ၢ်ဒံး၀ဲဘၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ

လါအီကူး ၃၁ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤအပူၤ ၦၤလီၢ်အိၣ်ကမှံဖိလၢအိၣ်လ့ၣ်က့ၣ်ကိာ်လီၢ်က၀ီၤဃုာ်ဒီးလီၢ်အိၣ်ကဒုတၢ်လီၢ်လၢအိၣ်ဘူးဖဲန့ၣ်အဂၤ(၅၀၀၀)ဘျဲၣ်အဂီၢ် လါလၢကဟဲလါစဲးပထ့ဘၢၣ်အဂီၢ်လိၣ်ဘၣ်၀ဲဂ့ၢ်ဂီၢ်အူတၢ်အီၣ်တၢ်အီတဖၣ်အဂ့ၢ်န့ၣ် သ့ၣ်ညါဘၣ်လၢလီၢ်အိၣ်ကဒုလီၢ်ဘၣ်မူဘၣ်ဒါအအိၣ်န့ၣ်လီၤႉ ၦၤလီၢ်အိၣ်ကမှံဖိလၢအိၣ်လ့က့ၣ်ကိာ်ဃုာ်ဒီးသ့ၣ်ဘီဘိႇကၠီးခဲးလီၢ်အိၣ်ကဒုတၢ်လီၢ်တဖၣ်အံၤအဂီၢ် ကတီၢ်ခဲအံၤတၢ်အီၣ်တၢ်အီအိၣ်တ့ၢ်က့ၤတုၤလၢလါအီကူးလၢာ်အံၤလီၤအဂ့ၢ်န့ၣ်လ့က့ၣ်ကိာ်လီၢ်အိၣ်ကဒုလီၢ်ၦၤဘၣ်မူဘၣ်ဒါတဂၤစံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ “တၢ်အီၣ်တၢ်အီန့ၣ်အိၣ်တ့ၢ်က့ၤတုၤလၢလါအီကူးလၢာ်အံၤလီၤႉလၢလါစဲးပထ့ဘၢၣ်အဂီၢ်န့ၣ်ပတၢၣ်ပီၣ်တဲသကိးတၢ်ဒီးတၢ်ကရၢကရိတဖၣ်အိၣ်မီၤနီၤႉပတဲသကိးတၢ်ဒီး(CIDKP)ႇကညီဖီၣ်စုက၀ဲၤကရူၢ်လၢအိၣ်ဖဲအံၤတဖၣ်ဒီးပတီၣ်ထီၣ်ဖျါထီၣ်လၢ(DKBA)ႇ(BGF)အအိၣ်စ့ၢ်မီၤနီၤႉမ့ၢ်အ၀ဲသ့ၣ်ကဃုန့ၢ်ၦၤကျဲဒ်လဲၣ်မီၤနီၤႉခဲအံၤနါက့လါလၢာ်လံႇခဲကၢာ်တလါန့ၣ်ထံၣ်ဘၣ်တၢ်ကီတၢ်ခဲလံ”အဂ့ၢ်န့ၣ်ၦၤဘၣ်မူဘၣ်ဒါတဂၤဃီ၀ဲန့ၣ်စံး၀ဲန့ၣ်လီၤႉ ၦၤလီၢ်အိၣ်ကမှံဖိလၢအလိၣ်ဘၣ်တၢ်ဆီၣ်ထွဲမၤစၢၤလၢကတီၢ်ခဲအံၤသ့ၣ်တဖၣ်မ့ၢ်ၦၤသ့ၣ်တဖၣ်လၢအိၣ်၀ဲဖဲတၢ်အိးထီၣ်ဃာ်ၦၤလီၢ်အိၣ်ဒုတၢ်လီၢ်တဖၣ်လီၤဒီးတပၣ်ဃုာ်ၦၤလၢအလဲၤစံၣ်အိၣ်လၢအဘူးတံၢ်အသကိးအဟံၣ်တဖၣ်ဘၣ်ဒီးၦၤလီၢ်အိၣ်ကမှံဖိသ့ၣ်တဖၣ်အံၤစ့ၢ်ကီးကတီၢ်ခဲအံၤလိၣ်ဘၣ်၀ဲတၢ်ဆီၣ်ထွဲမၤစၢၤတဖၣ်အဂ့ၢ်န့ၣ်အ၀ဲစံးအါထီၣ်၀ဲန့ၣ်လီၤႉ တၢ်အီၣ်တၢ်အီလၢတၢ်ကလဲၤစိာ်န့ၢ်ၦၤလီၢ်အိၣ်ကမှံဖိလၢအိၣ်ဟီၣ်က၀ီၤအပူၤဖဲန့ၣ်သ့ၣ်တဖၣ်အဂီၢ်န့ၣ်လၢကီၢ်ပယီၤတကပၤလဲၤစိာ်တၢ်အီၣ်တၢ်အီန့ၢ်ဒ်တၢ်ပာ်ပနီၣ်၀ဲအသိးလီၤဒီးလၢကီၢ်ကၠီၣ်တဲၣ်တကပၤစ့ၢ်ကီးခီဖျိတၢ်သမံသမိးဟဲအါထီၣ်အဃိတၢ်ကီတၢ်ခဲအိၣ်လၢကလဲၤဆှၢတၢ်အီၣ်တၢ်အီအဂ့ၢ်န့ၣ်ၦၤမၤစၢၤၦၤလီၢ်အိၣ်ကမှံဖိတဖၣ်စံး၀ဲန့ၣ်လီၤႉ ၦၤလီၢ်အိၣ်ကမှံဖိလၢအိၣ်ကၠီးခဲသ၀ီလီၢ်အိၣ်ကဒုလီၢ်တဂၤစံး၀ဲ“လၢပအိၣ်အံၤတၢ်မၤစၢၤတဟဲဘၣ်န့ၢ်ဖးယံၤလံႉလၢညါတဘျီန့ၣ်ၦၤဟဲဟ့ၣ်ၦၤဟုသးထၢၣ်တ၀ာ်ႇလၢာ်ဖးယံၤလံႉခဲအံၤပဘၣ်လဲၤၦ့ၤအီၣ်တတလီးခံတလီးလၢစဲၢ်ပူၤဒ်န့ၣ်လီၤႉနးဒိၣ်မးတဘျီတခီၣ်ၦၤမ့ဟဲကိးလဲၤတ့(ကၤစံၤနိၤ)တၢ်သူၣ်ထီၣ်လီၢ်န့ၣ်မ့လဲၤန့ၣ်န့ၢ်ဘၣ်စ့ႉစ့လၢအန့ၢ်တဖၣ်န့ၣ်ပၦ့ၤအီၣ်က့ၤသိႇအံသၣ်ႇဟုသးမီၤနီၤႉတနီၤန့ၣ်လၢကအီၣ်အဂီၢ်ဘၣ်ဟံလိၢ်စိဘူတံၢ်အအိၣ်နါက့အိၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ် ၂၀၂၁ နံၣ် လါဒံၣ်စ့ဘၢၣ်အခါ တၢ်ဒုးစးထီၣ်ကဲထီၣ်၀ဲလၢတီနီၢ်မုၢ်ထီၣ်တကပၤအဃိ လ့က့ၣ်ကိာ်လီၢ်က၀ီၤဃုာ်ဒီးကၠီးခဲးႇလ့ဒ့ႇဂီၤလ့ၤႇကနဲလ့ႇသ့ၣ်ဘီဘိႇကျီၢ်ထီႇဆူၣ်ကလံၣ်လီၢ်က၀ီၤ သ၀ီအဖျၢၣ်(၂၀)ဘျဲၣ်လီၢ်က၀ီၤဖိ(၁၅ႇ၀၀၀)ဘျဲၣ်ဘၣ်ပာ်တ့ၢ်ကွံာ်အဟံၣ်အဃီဘၣ်ဃ့ၢ်မှံဟးဖျိး၀ဲဒၣ်န့ၣ်လီၤႉ ပယီၤသုးနုာ်လီၤမၤဒုးယၤတၢ်ဟူးတၢ်ဂဲၤလၢခ့ၣ်အဲၣ်ယူၣ်–ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤအပူၤတပယူာ်ဃီတကးဒံးဘၣ်အမဲာ်ညါမၤ၀ဲတၢ်ထီၣ်ဒုးလၢကဘီယူၤအဘျီတဖၣ်အဘျီအဃိ ၂၀၂၁ တုၤလၢ ၂၀၂၂ နံၣ်န့ၣ် ကမျၢၢ်ထံဖိကီၢ်ဖိဘၣ်ဃ့ၢ်မှံဟးဖျိးအနီၣ်ဂံၢ်အိၣ်၀ဲ(၉၀ႇ၂၉၁)ဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါလါအီကူး ၂၄ သီအနံၤန့ၣ်လီၤႉ

လါအီကူး ၃၁ သီႇ ၂၀၂၂ နံၣ်ႇ ခ့ၣ်အဲးစံၣ် ခီဖျိကီၢ်ပယီၤစ့အလုၢ်အၦ့ၤလီၤဒီးတၢ်ၦ့ၤထီၣ်အဃိခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤပူၤ ၦၤလီၢ်အိၣ်ကမှံဖိလၢအဘၣ်စံၣ်ဘၣ်ဃ့ၢ်ယံၤ၀ဲလၢအလါသ့ၣ်တဖၣ်အံၤအဂီၢ်တၢ်ကီတၢ်ခဲအိၣ်ထီၣ်လၢကၦ့ၤတၢ်အီၣ်တၢ်အီအဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤလီၢ်အိၣ်ကမှံဖိတဖၣ်အအိၣ်န့ၣ်လီၤႉ လၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤလီၢ်က၀ီၤကမျၢၢ်လၢအဘၣ်ဃ့ၢ်မှံဟးဖျိးတဖၣ်ကတီၢ်ခဲအံၤအ၀ဲသ့ၣ်ဒိးန့ၢ်ဘၣ်တၢ်ဆီၣ်ထွဲမၤစၢၤလီၤစှၤ၀ဲအမဲာ်ညါခီဖျိတၢ်ၦ့ၤထီၣ်အဃိၦ့ၤတၢ်အခါတၢ်ဖိတၢ်လံၤန့ၢ်စှၤလီၤဒီးသဂၢၢ်ဘၣ်၀ဲတၢ်အီၣ်တၢ်အီတကူတလၢဘၣ်အဂ့ၢ်န့ၣ်ခ့ၣ်အဲၣ်ယူၣ်ကီၢ်ရ့ၣ်ကညီၦၤဂ့ၢ်၀ီကရူၢ်ၦၤဘၣ်မူဘၣ်ဒါလၢအမၤစၢၤၦၤလီၢ်အိၣ်ကမှံဖိတဂၤစံးဘၣ်ခ့ၣ်အဲးစံၣ်န့ၣ်လိၤႉ “ခီဖျိတၢ်ၦ့ၤထီၣ်အဃိလၢညါခါနၦ့ၤဟုသးအထၢၣ်(၁၀)န့ၣ်ခဲအံၤနၦ့ၤန့ၢ်က့ၤထဲ(၅)ထၢၣ်(၆)ထၢၣ်လီၤႉမ့၀ံၤလၢညါခါန့ၣ်ပမၤစၢၤၦၤလီၢ်အိၣ်ကမှံဖိဟုသးန့ၢ်(၃)တလီးန့ၣ်ခဲအံၤမၤစၢၤန့ၢ်က့ၤထဲ(၁)တလီးလီၤႉမ့ၢ်ကယံၤဆံးယံာ်လဲၣ်တသ့ၣ်ညါဘၣ်ႉမ့ယံၤထီၣ်ယံၤထီၣ်ဒုၦၤလီၢ်အိၣ်ကမှံဖိအဂီၢ်တၢ်အီၣ်တၢ်အီကကီခဲထီၣ်ဖးဒိၣ်ညါ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ခီဖျိတၢ်ၦ့ၤထီၣ်အဃိအပူၤကွံာ်လၢညါၦၤလီၢ်အိၣ်ကမှံဖိလၢအတဟံတၢ်ဆီၣ်ထွဲမၤစၢၤတဖၣ်န့ၣ်ကတီၢ်ခဲအံၤသဂၢၢ်ဘၣ်၀ဲတၢ်ဃံးတၢ်စ့ၤဟဲအါထီၣ်၀ဲဒီးၦၤဟဲဃ့တၢ်မၤစၢၤဟဲအါထီၣ်၀ဲအဂ့ၢ်န့ၣ်ၦၤလၢမၤစၢၤၦၤလီၢ်အိၣ်ကမှံဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ “မ့မ့ၢ်ပ၀ဲဒၣ်ဒုစံၣ်တထံၣ်ထံၣ်ႇက့ၤလၢဟံၣ်တထံၣ်ထံၣ်မၤဒ်န့ၣ်ကၦဲၤထီၣ်တနံၣ်လီၤႉမၤတၢ်တသ့နီတမံၤဘၣ်ႉအခီၣ်ထံးခါန့ၣ်ဘၣ်ဂီၢ်ဒံးႉခဲအံၤတၢ်ၦ့ၤထီၣ်အဃိတဘၣ်ဂီၢ်နီတစဲးလၢၤဘၣ်ႉယံၤထီၣ်ယံၤထီၣ်ဘျီတၢ်ကီတၢ်ခဲဘၣ်ႉတမ့ၢ်လၢအိၣ်လီၢ်အိၣ်ကဒုတၢ်လီၢ်ဘၣ်အဃိကီခဲနါက့ၦၤတသ့ၣ်ညါဘၣ်မီၤနီၤႉ”အဂ့ၢ်န့ၣ်လၢၢ်ဒိၣ်ကီၢ်ဆၣ်ပူၤၦၤလီၢ်အိၣ်ကမှံဖိတဂၤစံးဘၣ်ခ့ၣ်အဲးစံၣ်န့ၣ်လီၤႉ လၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤခီဖျိတၢ်ဒုးကဲထီၣ်ကိးမုၢ်နံၤဒဲးအဃိကီၢ်ရ့ၣ်တဘ့ၣ်စုာ်စုာ်အပူၤၦၤလီၢ်အိၣ်ကမှံအနီၣ်ဂံၢ်ဟဲအါထီၣ်၀ဲကိးမုၢ်နံၤဒဲးအဂ့ၢ်န့ၣ်ကီၢ်ပူၤၦၤလီၢ်အိၣ်ကမှံဖိကမံးတံာ်(CIDKP)ကရူၢ်ၦၤဘၣ်မူဘၣ်ဒါလၢမၤစၢၤၦၤဃ့ၢ်မှံဟးဖျိးလၢအမ့ၢ်စီၤခဲလ့ၢ်စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ အ၀ဲစံး၀ဲလၢ“လၢၦၤလီၢ်အိၣ်ကမှံဖိတဖၣ်အဂီၢ်န့ၣ်ပမၤလၢအဂ့ၤကတၢၢ်လီၤႉပမၤစၢၤတၢ်န့ၣ်တၢ်လီၢ်တတီၤဒီးတတီၤန့ၣ်တဒ်သိးလိာ်အသးဘၣ်ႉတနီၤန့ၣ်ပမၤစၢၤအ၀ဲသ့ၣ်လၢစ့ႉတနီၤန့ၣ်လၢဟီၣ်က၀ီၤတၢ်အိၣ်သးအဃိပမၤစၢၤအ၀ဲသ့ၣ်လၢဟုသးဒ်န့ၣ်မီၤနီၤႉမ့မ့ၢ်(CIDKP)ဒုဆီၣ်ထွဲမၤစၢၤ၀ဲလီၢ်အိၣ်ကဒုလီၢ်(၈)တီၤလံမီၤနီၤႉခဲလၢာ်ဒုပမၤစၢၤတန့ၢ်ဒံးဘၣ်ႉဒ်သိးပမၤစၢၤအါန့ၢ်အ၀ဲအံၤကန့ၢ်အဂီၢ်န့ၣ်ပဂုာ်ကျဲးစၢးဃုတၢ်မၤစၢၤမီၤနီၤ”အဂ့ၢ်န့ၣ်စံး၀ဲန့ၣ်လီၤႉ ဖဲလါအီကူး ၁၆ သီအနံၤဒ်ခ့ၣ်အဲယူၣ်ကညီဒီကလုာ်စၢဖှိၣ်ကရၢထုးထီၣ်ပာ်ဖျါ၀ဲအသိးန့ၣ် ခီဖျိဒုးယၤတၢ်သဘံၣ်သဘုၣ်အဃိခ့ၣ်အဲၣ်ယူၣ်တၢ်ပၢဟီၣ်က၀ီၤကီၢ်ရ့ၣ်(၆)ဘ့ၣ်အပူၤၦၤလီၢ်အိၣ်ကမှံအနီၣ်ဂံၢ်အိၣ်၀ဲ(၃၅၆ႇ၆၇၄)ဂၤဒီးၦၤလီၢ်အိၣ်ကဒုသ့ၣ်တဖၣ်အံၤအဂီၢ်လိၣ်ဘၣ်၀ဲတၢ််ဆီၣ်ထွဲမၤစၢၤတဖၣ်အဂ့ၢ်န့ၣ်ပာ်ဖျါ၀ဲန့ၣ်လီၤႉ