ခ့ၣ်အဲးစံၣ် – KIC News

လါအီကူး ၃၀ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံးဟီၣ်က၀ီၤအပူၤ လီမ့ၣ်အူၦၤမၤတၢ်ဖိလၢအဟဲဘှီမီၣ်လမၠဲၣ်–မၠၣ်၀တံၣ် မ့ၣ်အူတၢၣ်လၢအဟးဂီၤတဖၣ်တၢ်ဘံၣ်တၢ်ဘၢအဂီၢ်ပယီၤသုးလၢအဟဲပိာ်အ၀ဲသ့ၣ်ခံတဖၣ်အံၤဒီး တၢ်ပၢၢ်ဆၢကရူၢ်တဖၣ်အဘၢၣ်စၢၤတၢ်ဒုးကဲထီၣ်အဃိ လီမ့ၣ်အူၦၤမၤတၢ်ဖိသံ၀ဲ(၂)ဂၤဒီး ဘၣ်ဒိ(၄)ဂၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ တၢ်ဒုးကဲထီၣ်လၢကီးတရံးဟီၣ်က၀ီၤပူၤအကတီၢ်ခီဖျိမီၣ်လမၠဲၣ်–မၠၣ်၀တံၣ်(၂၃၀-kv)မ့ၣ်အူကျိၤ မ့ၣ်အူတၢၣ်ဟးဂီၤ(၂)တၢၣ်အဃိလီမ့ၣ်အူၦၤမၤတၢ်ဖိလၢအဟဲဘှီမ့ၣ်အူတၢၣ်တဖၣ်ပယီၤသုးလၢအဟံးန့ၢ်၀ဲတၢ်ဘံၣ်တၢ်ဘၢတဖၣ်အံၤဒီးတၢ်ပၢၢ်ဆၢသုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်၀ဲဖဲကီးနွဲၢ်သ၀ီကပၤဒီးဖဲန့ၣ်လီမ့ၣ်အူၦၤမၤတၢ်ဖိသံ၀ဲ(၂)ဂၤႇဘၣ်ဒိ၀ဲ(၄)ဂၤအဂ့ၢ်န့ၣ်မၠၣ်၀တံၣ်လီမ့ၣ်အူ၀ဲၤကျိၤၦၤမၤတၢ်ဖိတဂၤစံး၀ဲန့ၣ်လီၤႉ “ကဘှီမ့ၣ်အူန့ၣ်အိၣ်သၢသီလံႉတၢတနံၤန့ၣ်ခံခီခံကပၤခးလိာ်သးအဃိၦၤမၤတၢ်ဖိတဖၣ်ဘၣ်ဟဲက့ၤကဒါမီၤနီၤႉဖဲမဟါဂီၤခီန့ၣ်ၦၤခးဒီးစုဘျၢ(စနဲၤဖၤ)အဃိၦၤမၤတၢ်ဖိသံ(၁)ဂၤႉဖဲမုၢ်ဟါလီၤန့ၣ်ခးကဒီးအဃိဘၣ်ဒီး(RPG)ဘၣ်ဒိ(၅)ဂၤႉဖဲၦၤက့ၤဆှၢလၢဖၣ်အၣ်အခါသံကဒီးတဂၤအဃိဘၣ်ဒိ(၄)ဂၤႇသံ(၂)ဂၤမီၤနီၤႉၦၤဟဲဘှီမ့ၣ်အူတဖၣ်န့ၣ်မ့ၢ်၀ဲမီၣ်လမၠဲၣ်ကီၢ်စဲၣ်လီမ့ၣ်အူၦၤမၤတၢ်ဖိတဖၣ်မီၤနီၤႉ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်လါအီကူး ၂၀ သီအနံၤန့ၣ် ကီးတရံးဟီၣ်က၀ီၤပူၤ လၢကီးနွဲၢ်သ၀ီဒီးအၤကလီၤသ၀ီကပၤန့ၣ် တၢ်ဒုးကဲထီၣ်၀ဲလၢပယီၤသုးကျိၤဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်အဘၢၣ်စၢၤအဃိမ့ၣ်အူတၢၣ်ဟးဂီၤ၀ဲ(၂)တၢၣ်ဒီးကီးတရံးႇမၠၣ်၀တံၣ်ႇကြုၢ်တုႇနိၣ်တကီကီၢ်ဆၣ်ပူၤဒူသ၀ီအဖျၢၣ်(၅၀)ဃၣ်ဃၣ်မ့ၣ်အူတဟဲလၢၤဘၣ်န့ၢ်၀ဲအသီ(၁၀)ဃၣ်ဃၣ်လံအဂ့ၢ်န့ၣ်သ့ၣ်ညါဘၣ်န့ၣ်လီၤႉ “ခဲအံၤလၢမၠၣ်၀တံၣ်ၦၤလၢအဟံကီၢ်ပယီၤမ့ၣ်အူတဖၣ်တၢ်ကီတၢ်ခဲအိၣ်လၢကသူမ့ၣ်အူႇကသွီလီတဲစိဂံၢ်အဃိလီမ့ၣ်အူ၀ဲၤကျိၤဒီးၦၤ၀့ၢ်ဖိတဖၣ်ပာ်ဖှိၣ်ထီၣ်အသးပာ်လီၤ၀ဲကျဲဖးဒ့တၢ်လီၢ်(၄)တီၤလၢၦၤကဟဲသွီကလီ၀ဲအဂီၢ်မီၤနီၤႉမၤ၀ဲဒီးယိၤကီၢ်မ့ၣ်အူမီၤနီၤႉတနီၤန့ၣ်နိထီၣ်၀ဲဒၣ်မ့ၣ်အူစဲးလဲၤသွီဘၣ်ဟ့ၣ်စ့အိၣ်စ့ၢ်မီၤနီၤႉႉမ့မ့ၢ်လၢမၠၣ်၀တံၣ်၀ဲၤဒၢးဘၣ်ထွဲတဖၣ်ခီန့ၣ်ဆီတလဲသူက့ၤ၀ဲဒၣ်လၢယိၤကီၢ်မ့ၣ်အူဒီးမၤတၢ်လီၤ”အဂ့ၢ်န့ၣ်ကမျၢၢ်လၢအိၣ်မၠၣ်၀တံၣ်၀့ၢ်ပူၤတဂၤစံး၀ဲန့ၣ်လီၤႉ ခီဖျိမ့ၣ်အူတဟဲလၢၤဘၣ်အဃိလၢမၠၣ်၀တံၣ်၀့ၢ်တကပၤန့ၣ်တၢ်ဟးဟ့ၣ်မ့ၣ်အူလၢအနၣ်ရံၣ်ဆၢကတီၢ်အိၣ်အသိး လၢကီးတရံး၀့ၢ်တကပၤစ့ၢ်ကီးတၢ်တီၣ်ထီၣ်မ့ၣ်အူစဲးဖးဒိၣ်လၢသိလ့ၣ်ပူၤဟးဟ့ၣ်လီၤမ့ၣ်အူလၢက၀ီၤဒ့ပူၤလၢအကလဲးအဂ့ၢ်န့ၣ်ကမျၢၢ်လၢအိၣ်ကီးတရံး၀့ၢ်ပူၤတဖၣ်စံး၀ဲန့ၣ်လီၤႉ

လရ၁်ထံကီၢ်မ့ၢ်ဒ်အံၤ ၁.ပတၢ်အိၣ်မူကိးမုၢ်နံၤ လၢၦဲၤဒီးတၢ်ဆီၣ်သနံး အီၣ်တလၢၦဲၤမံတဘျဲ တၢ်လဲၤတၢ်က့ၤတထံၣ်ကျဲ ၂.ကဘီယူၤဝ့ၤဝီၤခိၣ်ဒီ မျိ၁်သၣ်လီၤတဲ၁်သီၣ်သတြီ ကျဲမုၢ်ကျဲဘိတၢ်အိၣ်သး ကျိပိၢ်သီၣ်တူးတူး..တးတး ၃.ဖိဒံဖိသၣ်ဟီၣ်သကုၤ မိၢ်ဒုးအီၣ်ဖိနုၢ်တချုး ပိ၁်မုၣ်ဒီးသူၣ်က့သးၦၢ် မဲ၁်ထံမဲ၁်နိယွၤသလၢ် ၄.တၢ်စူၤတၢ်ကိၢ်နံၤကတီၢ် လီၢ်ပူၤဖျဲးတအိၣ်ပဂီၢ် မုၢ်နၤတၢ်ခံးယိ၁်တ့ၢ်လံ သးသမူ ဘူးဒီးတၢ်သံ ၅.တၢ်ဆူးတၢ်ဆါဘၣ်သဂၢၢ် ...

ကီၢ်သူလ့ၤလီၢ်ခၢၣ်သး ကညီဖိလၢဒူလၢ၁်ခိၣ် ပတၢ်လီၤစၢၤဒိတဲ၁်အိၣ် ထိးမဲပၢ်ဒီးစဃ့ၣ်ချိၣ် ကျီယ၁်ပျိၢ်ဒီးဃ့ၣ်အီၣ်ချိၣ် တၢ်ကတိၤဒိစံးတ့ၢ်လံ ပယီၤက့ၤကိးနွံက့ၣ်ထံ ကိၤလၤက့ၤကိးနွံကဘီ မ့ၢ်ဝဲဒၣ်တၢ်မ့ၢ်တၢ်တီ ကိၤလၤပၢထံကီၢ်ကတီၢ် ခိၣ်လိၣ်နံၣ်သနူအီၣ်ကီၢ် ထံၣ်သၣ်ပၠၣ်ကူၣ်ထီၣ်ဖးလီၤ ဒီကလု၁်ကရၢသူၣ်လီၤ (KNA- Karen Nation Association 1881) BIA ဟူးထီၣ်ရဲၤရီၤ KCO ဘၣ်ကိၢ်ဘၣ်ဂီၤ (BIA-Burma Independence Army, KCO Karen Council Organization) KNA ဒီး BKNA ဖုၣ်ခီၣ်စိၤအိၣ်ကတီၢ်က့ၤ KYO ဂံၢ်ထံးလၢညါ မ့ၢ်ဒုၣ်ဒါတၢ်မဲ၁်ညါ KNU ကအိၣ်ထီၣ်ဂီၢ် ကရၢလွံၢ်ဖုပ၁်ဖှိၣ်ထီၣ် (KNA, BKNA, KCO, KYO -Feb.3-7.1947) KNU အလီၢ်ခၢၣ်သး ဝ့ၢ်နိၣ်တၢ်မျၢ်ႇ ခဝဲခၠး (အင်းစိန်-...

လါအီကူး ၃၀ သီႇ ၂၀၂၂ နံၣ်ႇ ခ့ၣ်အဲးစံၣ် လၢပကိကီၢ်ခီဒိၣ် လၢၢ်ဒိၣ်ကီၢ်ဆၣ် လၢၢ်ဒိၣ်၀့ၢ်ပူၤ(မၠ့ၣ်တၤ)က၀ီၤဒ့လၢကညီဖိအိၣ်ဆိး၀ဲအါကတၢၢ်အံၤ စးထီၣ်ဖဲအပူၤကွံာ်လါအီကူး ၂၄ သီတုၤလၢခဲအံၤတစု ကွၢ်ဆၢၣ်မဲာ်ဘၣ်၀ဲတၢ်မၤတဲာ်မ့ၣ်အူအဂ့ၢ်န့ၣ် သ့ၣ်ညါဘၣ်လၢကမျၢၢ်အိၣ်က၀ီၤဒ့ပူၤတဖၣ်အအိၣ်န့ၣ်လီၤႉ လၢလၢၢ်ဒိၣ်၀့ၢ်ပူၤက၀ီၤဒ့အိၣ်၀ဲ(၇)ဘ့ၣ်ဒီးတၢ်နီၤလီၤဟ့ၣ်မ့ၣ်အူလၢက၀ီၤဒ့တဖၣ်အပူၤဘၣ်ဆၣ် မ့မ့ၢ်(မၠ့ၣ်တၤ)က၀ီၤဒ့လၢကညီဖိအိၣ်ဆိး၀ဲအါကတၢၢ်အံၤမ့ၣ်အူတဟဲ၀ဲဘၣ်အဂ့ၢ်န့ၣ်ကမျၢၢ်လၢအိၣ်က၀ီၤဒ့ပူၤတဂၤစံး၀ဲဒ်အံၤန့ၣ်လီၤႉ “စးထီၣ်ကဲထီၣ်သးလၢ ၂၄ သီဟါခီန့ၣ်မီၤနီၤႉတုၤလၢခဲအံၤတဟဲဒံးဘၣ်ႉမ့၀ံၤက၀ီၤဒ့လၢအဂၤန့ၣ်ဟဲႉ ယသံကွၢ်ဘျီတဲ၀ဲလၢတၢ်ဖီခိၣ်မၢမၤတဲာ်ကွံာ်၀ဲနသ့ၣ်ညါလီၤတဲ၀ဲဒ်န့ၣ်ႉဖဲမ့ၣ်အူတဟဲလၢၤဘၣ်တနၤန့ၣ်စ့ၢ်ကီးပယီၤသုးနုာ်လီၤမၤဟးဂီၤၦၤကရၢၢ်လၢဟံၣ်ကစၢ်တအိၣ်ဘၣ်၀ံၤဒီးနုာ်လီၤမံလၢၦၤဟံၣ်ပူၤတနၤဒံး”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ခီဖျိမ့ၣ်အူတဟဲလၢၤဘၣ်အဃိကၠိဖိသ့ၣ်တဖၣ်တၢ်ကီတၢ်ခဲအိၣ်ထီၣ်လၢကဖးလံာ်ဖးလဲၢ်အသိးလၢမုၢ်နၤခီစ့ၢ်ကီးဘၣ်ယိၣ်လၢတၢ်ဘံၣ်တၢ်ဘၢအဂီၢ်တကးဒံးဘၣ်လၢကဖီအီၣ်တ့ၤအီၣ်အဂီၢ်စ့ၢ်ကီးတၢ်ကီတၢ်ခဲဟဲအိၣ်ထီၣ်၀ဲအဂ့ၢ်န့ၣ်ကမျၢၢ်လၢအိၣ်က၀ီၤဒ့ပူၤတဖၣ်စံး၀ဲန့ၣ်လီၤႉ လၢၢ်ဒိၣ်၀့ၢ်ပူၤက၀ီၤဒ့အိၣ်၀ဲ(၇)ဘ့ၣ်လၢအမ့ၢ်ပကိႇတီၤငူၤတါႇသ့ၤတါႇဆါတါႇကၣ်ကၠ့ႇမၠ့ၣ်တၤက၀ီၤဒ့တဖၣ်ဒီးမၠ့ၣ်တၤက၀ီၤဒ့အံၤဟံၣ်ခိၣ်အိၣ်၀ဲအဖျၢၣ်(၄၀၀)ဘျဲၣ်ဒီးကညီဖိအိၣ်ဆိး၀ဲအါကတၢၢ်န့ၣ်လီၤႉက၀ီၤဒ့လၢအဂၤတဖၣ်ၦၤပယီၤဖိအိၣ်၀ဲအါဒီးကလုာ်ဒူၣ်လၢအဂၤအိၣ်ဆိး၀ဲစှၤန့ၣ်လီၤႉကတီၢ်ခဲအံၤတၢ်ဒီၣ်တဲာ်ကွံာ်မ့ၣ်အူအံၤလီၤဂာ်ဒ်သိးတၢ်နီၤဖး၀ဲကလုာ်အဒူၣ်အထၢလီၤအဂ့ၢ်န့ၣ်ကမျၢၢ်လၢအိၣ်က၀ီၤဒ့ပူၤတဖၣ်စံး၀ဲန့ၣ်လီၤႉ “တၢ်အိၣ်သးလၢအကဲထီၣ်သးဖဲအံၤတဖၣ်အ၀ဲသ့ၣ်နါက့ကသူၣ်ဆှိးသးဆှိးကအိၣ်မီၤနီၤႉ ဖဲအံၤနါက့ၦၤဟဲခးတၢ်ဒီး(ဒြိ)အိၣ်ႉတၢ်အဃိန့ၣ်ကဆိမိၣ်၀ဲလၢက၀ီၤဒ့ကညီဖိဒီးၦၤသ့ၣ်တဖၣ်အံၤအတၢ်ဘၣ်ထွဲကအိၣ်မီၤနီၤႉခဲအံၤနါက့အ၀ဲသ့ၣ်ဟဲသမံသမိးၦၤတမှံၤစရီထဲပက၀ီၤဒ့တခါလီၤႉက၀ီၤဒ့လၢအဂၤန့ၣ်တသမံသမိး၀ဲဘၣ်”အဂ့ၢ်န့ၣ်ကမျၢၢ်လၢအိၣ်က၀ီၤဒ့ပူၤတဖၣ်ပဲာ်ထံနီၤဖးစံး၀ဲန့ၣ်လီၤႉ ခီဖျိတၢ်ဒီၣ်တဲာ်ကွံာ်မ့ၣ်အူဒ်အံၤအဃိကမျၢၢ်လၢအိၣ်က၀ီၤဒ့ပူၤတဖၣ်ဘၣ်ယိၣ်လၢတၢ်ကနုာ်လီၤဟုၣ်တၢ်လၢ(မၠ့ၣ်တၤ)က၀ီၤဒ့ပူၤန့ၣ်လီၤႉ ဖဲအပူၤကွံာ်စှၤလါအခါလၢၢ်ဒိၣ်၀့ၢ်ဃုာ်ဒီးသ၀ီလၢအိၣ်ဘူးဖဲန့ၣ်သ့ၣ်တဖၣ်အခိၣ်အဃၢၤန့ၣ် တၢ်ဒုးကဲထီၣ်၀ဲလၢပယီၤသုးဒီးဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤအသိး ပယီၤသုးကဘီယူၤဟဲခးလီၤစၢၤတၢ်ကဲထီၣ်တ့ၢ်အသးဒံးန့ၣ်လီၤႉ

လါအီကူး ၂၉ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ် ကလံၤထံး လီၤပၣ်သ၀ီအပူၤ ဖဲမဟါလါအီကူး ၂၈ သီအနံၤန့ၣ်တၢ်မၤ၀ဲသးစၢ်တၢ်ကူၣ်လိာ်တၢၣ်ပီၣ်တဲသကိးတၢ်ရဲၣ်တၢ်ကျဲၤအပူၤ သးစၢ်ဟဲထီၣ်၀ဲအဂၤ(၁၅၀)ဘျဲၣ်န့ၣ်လီၤႉ တၢ်ကူၣ်လိာ်တၢၣ်ပီၣ်တဲသကိးဘျီ၀ဲအံၤလါဖါသ၀ီကရူၢ်လါဖါသ၀ီႇကီၣ်စဲၤဒီးပနွဲၢ်ကျါသ၀ီသူၣ်ဘီၣ်သးစၢ်တဖၣ်ဟဲထီၣ်၀ဲဒီးဒ်သိးသူၣ်ဘီၣ်သးစၢ်တဖၣ်ကသ့ဟ့ၣ်ခီဟ့ၣ်နီၤလီၤအ၀ဲသ့ၣ်တၢ်လိၣ်ဘၣ်ဒီးတၢ်လၢကြၢးအိၣ်ကတီၤထီၣ်သးတဖၣ်ကသ့ကတီၤ၀ဲအဂီၢ်န့ၣ်ဘၣ်တၢ်မၤ၀ဲတၢ်ကူၣ်လိာ်တၢၣ်ပီၣ်တဲသကိးတၢ်ရဲၣ်တၢ်ကျဲၤအံၤလီၤအဂ့ၢ်န့ၣ်ၦၤတီခိၣ်ရိၣ်မဲတၢ်ဖိတဖၣ်စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ “တၢ်ပညိၣ်ခီန့ၣ်သူၣ်ဘီၣ်သးစၢ်တဖၣ်မ့ၢ်အ၀ဲသ့ၣ်လိၣ်ဘၣ်မနုၤလဲၣ်ႉတၢ်လၢအလိၣ်ဘၣ်သ့ၣ်တဖၣ်အံၤပကဘၣ်အိၣ်ကတီၤမၤအီၤဒ်လဲၣ်ဒီးဒ်သိးသူၣ်ဘီၣ်သးစၢ်တဖၣ်ကဒိးန့ၢ်ဘၣ်တၢ်သ့ဆိမိၣ်တၢ်တဖၣ်လၢတၢ်ကူၣ်လိာ်တၢၣ်ပီၣ်တဲသကိးပူၤအံၤအဂီၢ်န့ၣ်ပမၤ၀ဲတၢ်ရဲၣ်တၢ်ကျဲၤအံၤလီၤ”အဂ့ၢ်န့ၣ်ၦၤလၢပၣ်ဃုာ်လၢတၢ်တီခိၣ်ရိၣ်မဲဘျီ၀ဲအံၤအပူၤတဂၤစံး၀ဲန့ၣ်လီၤႉ တၢ်ကူၣ်လိာ်တၢၣ်ပီၣ်တဲသကိးလၢတၢ်မၤ၀ဲထဲတသီအတီၢ်ပူၤအံၤတၢ်ရဲၣ်တၢ်ကျဲၤအပူၤတၢ်တၢၣ်ပီၣ်တဲသကိးဘၣ်ဃးခိၣ်နၢ်လၢအဂ့ၤတဖၣ်အတၢ်ပာ်သူၣ်ပာ်သးႇသးစၢ်ဒီးထံရူၢ်ကီၢ်သဲးႇတၢ်မူၤတၢ်ဘှီးႇတၢ်ကူၣ်ဘၣ်ကူၣ်သ့ႇပိာ်မုၣ်ပိာ်မၢၤဒီးကညီတၢ်စံၣ်စိၤတဲစိၤအဂ့ၢ်အကျိၤတဖၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ

လါအီကူး ၂၉ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ မုၢ်တြီၢ်ကီၢ်ရ့ၣ် ဒွဲၣ်လိကီၢ်ဆၣ်အပူၤ သုးမီၤစိရိၤအစုတီၤဖီလာ်သုးခိးကီၢ်ဆၢ(BGF)ထုးထီၣ်တၢ်ကလုၢ်လၢၦၤလၢအဟးထီၣ်က့ၤလီၤမ့တအိၣ်ဒီးထံကီၢ်ခိၣ်ဂီၤ(မၣ်ပိၤတ့ၤ)ဘၣ်န့ၣ်ကဃ့အီၣ်လိး၀ဲစ့(၂)ကလီၢ်ကၠးအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ လီၢ်က၀ီၤကမျၢၢ်လၢအိၣ်ဒွဲၣ်လိကီၢ်ဆၣ်ပူၤမးထီသ၀ီႇလ့ဖိထၣ်ႇကတၢၢ်တံာ်ဒီးထံသဘျုၣ်ထၣ်သ၀ီတဖၣ်မ့ဟးထီၣ်က့ၤလီၤန့ၣ်ကဘၣ်စိာ်ဃုာ်၀ဲထံကီၢ်ခိၣ်ဂီၤ(မၣ်ပိၤတ့ၤ)ဒီးၦၤလၢမ့တစိာ်ခိၣ်ဂီၤတဖၣ်န့ၣ်တၢ်ကဃ့အီၣ်လိး၀ဲစ့ဒီးၦၤလၢအခိၣ်ဂီၤတအိၣ်ဒံးဘၣ်သ့ၣ်တဖၣ်မ့အဲၣ်ဒိးမၤခိၣ်ဂီၤန့ၣ်ကဘၣ်ဟ့ၣ်၀ဲစ့(၃)ကလီၢ်ကၠးန့ၣ် BGF(၁၀၁၃)သုးရ့ၣ် ထုးထီၣ်ဃာ်လံာ်တၢ်ကလုၢ်ဖဲလါအီကူး ၁၆ သီအနံၤအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ လီၢ်က၀ီၤဖိလၢအလဲၤခီတဲာ်ဘၣ်(BGF)သုးကလၢၤမဲာ်ညါလၢတၢ်ဖီၣ်အီၤတဂၤစံး၀ဲ“ဖဲတၢ်တနံၤန့ၣ်ယလဲၤဖၠးဘၣ်ဖဲအ၀ဲသ့ၣ်သုးကလၢၤမဲာ်ညါခံဘျီမီၤနီၤႉမ့ၢ်အ၀ဲသ့ၣ်ဆိမိၣ်ယၤတမံၤမံၤဧါတသ့ၣ်ညါဘၣ်ႉအဖီၣ်ယၤႇထၢနုာ်ယၤလၢတၢ်ဒုးဃာ်လီၢ်ဘျီတီၢ်ယၤ(၄)ထံၣ်ႉယမ့ၢ်ၦၤလီၢ်က၀ီၤဖိလီၤန့ၣ်ၦၤအိၣ်ဖဲအ၀ဲသ့ၣ်သုးကလၢၤအံၤတနီၤသ့ၣ်ညါ၀ဲမီၤနီၤႉ၀ံၤဘျီၦၤဟဲအုၣ်ခီၣ်ယၤအဃိအ၀ဲသ့ၣ်ပျၢ်က့ၤယၤလီၤႉလီၢ်က၀ီၤဖိလၢအဟးထီၣ်က့ၤလီၤဖဲန့ၣ်တဖၣ်တၢ်ဖီၣ်အီၤတလီၢ်လီၢ်လီၤႉတနီၤန့ၣ်မ့ဟ့ၣ်စ့မးပျၢ်လီၤ၀ဲ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ သုးခိးကီၢ်ဆၢ(BGF)တဖၣ်အံၤသမံသမိးဟီၣ်က၀ီၤပူၤလီၢ်က၀ီၤကမျၢၢ်လၢအဟးထီၣ်က့ၤလီၤတဖၣ်ဟဲအါထီၣ်၀ဲဒီး(BGF)သုးလၢအနုာ်လီၤဟူးဂဲၤဖဲ(သုးက့ ၅)ဟီၣ်က၀ီၤအပူၤတဖၣ်အံၤ မၤကမၣ်၀ဲၦၤဂ့ၢ်၀ီခွဲးယာ် ကိးမုၢ်နံၤဒဲးလီၤအဂ့ၢ်န့ၣ်ခ့ၣ်အဲၣ်ယူၣ်–မုၢ်တြီၢ်တၢ်ကစီၣ် ထုးထီၣ်ပာ်ဖျါ၀ဲဖဲအပူၤကွံာ်လါအီကူး ၁၈ သီအနံၤန့ၣ်လီၤႉ ဘၣ်ဃးတၢ်ထုးထီၣ်တၢ်ကလုၢ်လၢလီၢ်က၀ီၤကမျၢၢ်မ့ဟးထီၣ်က့ၤလီၤမ့တစိာ်ဃုာ်ခိၣ်ဂီၤ(မၣ်ပိၤတ့ၤ)ဘၣ်တၢ်ဂ့ၢ်အံၤန့ၣ်ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ်ဆဲးကျိးဒီး(BGF-၁၀၁၃)ၦၤဘၣ်မူဘၣ်ဒါတဖၣ်ဘၣ်ဆၣ် ဆဲးကျိးတန့ၢ်၀ဲဘၣ်န့ၣ်လီၤႉ သုးမီၤစိရိၤစုတီၤအဖီလာ်(BGF)သုးလၢအနုာ်လီၤဟူးဂဲၤဖဲခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤပူၤတဖၣ် ခီဖျိအ၀ဲသ့ၣ်ဒိးလီၤမ့ၣ်ပိၢ်လၢတၢ်ဖံးအီၣ်မၤအီၣ်လီၢ်ကျဲဒီးတၢ်လီၤပျီလီၢ်တဖၣ်အဃိ ဆၣ်ဖိကီၢ်ဖိလၢလီၢ်က၀ီၤကမျၢၢ်ဘုၣ်၀ဲတဖၣ်ယီၢ်ဘၣ်မ့ၣ်ပိၢ်သံ၀ဲအိၣ်အဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ တလါအံၤလါအီကူး ၁ သီတုၤလၢ ၁၅ သီအနံၤ လၢခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ (BGF)ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်အဘၢၣ်စၢၤတၢ်ခးလိာ်သးကဲထီၣ်၀ဲ(၅၃)ဘျီဒီးဖဲန့ၣ်(BGF)တကပၤသံ၀ဲ(၄၃)ဂၤႇဘၣ်ဒိ(၁၇)ဂၤအသိး မ့မ့ၢ်(KNLA)တကပၤန့ၣ် ဘၣ်ဟ့ၣ်လီၤကွံာ်အသးသမူလၢ ထံကီၢ်ဒီးၦၤကလုာ်အဂီၢ်(၁)ဂၤအဂ့ၢ်န့ၣ်ခ့ၣ်အဲၣယူၣ်ထုးထီၣ်ပာ်ဖျါ၀ဲန့ၣ်လီၤႉ

လါအီကူး ၂၆ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲလါအီကူး ၂၀ သီအနံၤလၢမၠၣ်၀တံၣ်–ကီးတရံးအ့ရှါကျဲမုၢ်ဟီၣ်က၀ီၤအပူၤ တၢ်ဒုးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤဒီး ဖဲန့ၣ်ကီၤနွဲၣ်ဒီးအၤကလီၤသ၀ီဘၢၣ်စၢၤန့ၣ်ခီဖျိမီၣ်လမၠဲၣ်–မၠၣ်၀တံၣ်မ့ၣ်အူတၢၣ်ဟးဂီၤအဃိ မၠၣ်၀တံၣ်၀့ၢ်ဃုာ်ဒီးကီၢ်ဆၣ်(၃)ဘ့ၣ်ပူၤသ၀ီအဖျၢၣ်(၅၀)ဃၣ်ဃၣ်ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ တၢ်ဒုးကဲထီၣ်အခါခီဖျိမီၣ်လမၠဲၣ်–မၠၣ်၀တံၣ်(၂၃၀ kv)မ့ၣ်အူတၢၣ်ဟးဂီၤ၀ဲ(၂)တၢၣ်ဒီး မ့ၣ်အူတဟဲဘၣ်န့ၢ်၀ဲတနွံဘျဲၣ်လံအဃိမၠၣ်၀တံၣ်ႇကီးတရံးႇကၠၤအ့စ့ၣ်ကၠံကီၢ်ဆၣ်(၃)ဘ့ၣ်ပူၤသ၀ီ(၅၀)ဖျၢၣ်ဃၣ်ဃၣ်ထံၣ်ဘၣ်၀ဲတၢ်ကီတၢ်ခဲန့ၣ်လီၤႉ ကမျၢၢ်လၢအိၣ်မၠၣ်၀တံၣ်၀့ၢ်ပူၤတဂၤစံး၀ဲ“ၦၤတဲလၢမ့ၣ်အူဟဲတညီလၢၤဘၣ်ႉမ့ၣ်အူတၢၣ်လၢကစၢၢ်ခိၣ်တဖၣ်န့ၣ်ၦၤဘှီမ့ၣ်အူဖိလၢအိၣ်မၠၣ်၀တံၣ်၀့ၢ်ပူၤတဖၣ်လဲၤဘှီ၀ဲတဘူၣ်ဘၣ်ႉၦၤဘၣ်ယိၣ်လၢၦၤကခးၦၤလဲၤဘှီမ့ၣ်အူဖိတဖၣ်ဒီးၦၤပျံၤလၢတၢ်ဒုးကကဲထီၣ်အဃိမ့ၣ်အူကဟဲကဒါအဂီၢ်တလီၤတံၢ်ဘၣ်ႉခဲအံၤလၢမၠၣ်၀တံၣ်န့ၣ်တၢ်လီၢ်လၢအသူယိၤကီၢ်မ့ၣ်အူတဖၣ်န့ၢ်ကိညၢ်ဒံးႉၦၤလၢအဟံမ့ၣ်အူလၢကီၢ်ပယီၤတဖၣ်န့ၣ်တၢ်ကီတၢ်ခဲအိၣ်လၢကသူထံႇကသူမ့ၣ်အူႇကသွီလီတဲစိဂံၢ်မီၤနီၤႉမ့မ့ၢ်လၢကီးတရံးႇကြုၢ်တုႇနိၣ်တကီသ၀ီတကပၤန့ၣ်နးဒိၣ်ဒီးတစဲးႉသူတၢ်တန့ၢ်တၢ်နီတမံၤဘၣ်”အဂ့ၢ်န့ၣ်စံး၀ဲန့ၣ်လီၤႉ မ့ၣ်အူတၢၣ်လၢအဟးဂီၤတဖၣ်အံၤသုးမီၤစိရိၤအစုတီၤဖီလာ်မၠၣ်၀တံၣ်မ့ၣ်အူ၀ဲၤကျိၤကဘှီ၀ဲဘၣ်ဆၣ်ခီဖျိတၢ်ဒုးကဲထီၣ်လၢပယီၤသုးဒီးဟီၣ်က၀ီၤ(KNLA)သုးပာ်ဖှိၣ်တဖၣ်အဘၢၣ်စၢၤအဃိတၢ်ကီတၢ်ခဲအိၣ်လၢကဘှီမ့ၣ်အူတၢၣ်အံၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ “မ့ၣ်အူတဟဲကသွီလီတဲစိအဂံၢ်နါက့တသ့ႉၦၤလၢအိၣ်ဒီးမ့ၣ်အူစဲးတဖၣ်ဒုသွီ၀ဲလီတဲစိအဂံၢ်ႇ(Power bank)ႇဒးမံလၢဟံၣ််သ့မီၤနီၤႉတၢ်လီၢ်တနီၤန့ၣ်ဟ့ၣ်ဒုးသွီကလီ၀ဲလီၤႉမ့ၢ်အဘှီမ့ၣ်အူဧါႇမ့ၢ်မ့ၣ်အူကဟဲဆံးယံာ်လဲၣ်တၢ်ကစီၣ်ဟးထီၣ်အကလုာ်ကလုာ်အဃိမ့ၣ်အူကဟဲကဒါဆံးယံာ်လဲၣ်ဒုတလီၢ်တံၢ်ဘၣ်ႉခဲအံၤနသွီလီတဲစိအဂံၢ်တဖျၢၣ်န့ၣ်ဘၣ်ဟ့ၣ်(၅၀၀)ကၠးႇ(Power bank)တဖျၢၣ်န့ၣ်(၁၀၀၀)ကၠးႇ(၂၀၀၀)ကၠးညါ”အဂ့ၢ်န့ၣ် မၠၣ်၀တံၣ်လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ဘၣ်ဃးမ့ၣ်အူဟးဂီၤလၢမၠၣ်၀တံၣ်–ကီးတရံး–နိၣ်တကီ–ကြုၢ်တုကျဲဒီတကျိၤဒီးသ၀ီတဖၣ်အပူၤအံၤ ဖဲအပူၤကွံာ်လါအီကူး ၂၀ သီ ဟါခီအဆၢကတီၢ်န့ၣ် ပယီၤသုးဒီး(KNLA)သုးပာ်ဖှိၣ်အဘၢၣ်စၢၤ တၢ်ဒုးကဲထီၣ်အကတီၢ်မ့ၣ်အူတၢၣ်ဟးဂီၤ၀ဲ(၂)တၢၣ်အံၤအဖီခိၣ် တၢ်ကစီၣ်လၢဟ့ၣ်ဂံၢ်ဟ့ၣ်ဘါသုးမီၤစိရိၤတဖၣ် ထုးထီၣ်ပာ်ဖျါတၢ်ကစီၣ်လၢဖီၣ်စုက၀ဲၤကရူၢ်ဟဲမၤပိၢ်ဖးမၤဟးဂီၤ၀ဲဒၣ်မ့ၣ်အူတၢၣ်အံၤအဂ့ၢ်န့ၣ်ထုးထီၣ်ပာ်ဖျါ၀ဲန့ၣ်လီၤႉ ဘၣ်ဆၣ်ဒ်ကီးတရံးလီၢ်က၀ီၤဖိတဖၣ်စံး၀ဲအသိးန့ၣ်ပယီၤသုးခီၣ်သုးရ့ၣ်(ခလရ–၉၇)သုးရ့ၣ်လၢအိၣ်ဆီလီၤသးဖဲကီးတရံး၀့ၢ်ပူၤအံၤခးလီၤကျိဖးဒိၣ်ဆူတၢ်ဒုးကဲထီၣ်အလီၢ်အဃိ မ့ၣ်အူတၢၣ်ဘၣ်၀ဲဒီးကျိဖးဒိၣ်ဒီးဟးဂီၤ၀ဲလီၤအဂ့ၢ်န့ၣ်စံး၀ဲန့ၣ်လီၤႉ

လါအီကူး ၂၅ သီႇ ၂၀၂၂ နံၣ်ႇ ခ့ၣ်အဲးစံၣ် လၢမၠၣ်၀တံၣ်၀့ၢ်ကလံၤထံး ဆိၣ်စံမၠဲၣ်–အူကြ့ၣ်ထၣ်–ဂီၤလ့ၤကျဲမုၢ်ခိၣ် အူကြ့ၣ်ထၣ်ကျဲဘၣ်သဂၢၢ်လိာ်သးလီၢ်န့ၣ် ပယီၤသုးနုာ်လီၤအိၣ်ကးတံၢ်ဃာ်ကျဲအိၣ်ကတီၤထီၣ်သးလၢကမၤ၀ဲဒုးယၤတၢ်ဟူးတၢ်ဂဲၤဒီး ထုးထီၣ်စ့ၢ်ကီးတၢ်ကလုၢ်လၢမ့ဟးထီၣ်က့ၤလီၤန့ၣ်ကခး၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ကျးကစၢ်လၢအိၣ်လီၢ်က၀ီၤပူၤဖဲန့ၣ်လၢတအဲၣ်ဒိးပာ်ဖျါအမံၤတဂၤစံး၀ဲ“ဂီၤလ့ၤကျဲဒီတဘိ(သိထၣ်ကွ့ၣ်)တကပၤန့ၣ်ကညီဖီၣ်စုက၀ဲၤကရူၢ်ကးတံၢ်ဃာ်၀ဲအသိးလၢသ့ၣ်ဘီဘိႇဆိၣ်စံမၠဲၣ်ႇအူကြ့ၣ်ထၣ်တုၤလၢဂီၤလ့ၤန့ၣ် သုးကလၢၤလၢအိၣ်တြဲၤအိၣ်ခိးတၢ်လီၢ်ကျဲကပၤတဖၣ်ကးတံၢ်ဃာ်၀ဲမီၤနီၤႉလဲၤလၢကျီးပူၤဘုခ့ကျီးပူၤတန့ၢ်နီတဆဲးဘၣ်ႇမ့ၢ်နါဟူၦၤကညီကလုၢ်ႇ(ထွ့ၤလၤ)ကလုၢ်န့ၣ်ခးပိၢ်ထီၣ်ကျိခးစိ၀ဲလီၤႉကျဲဒီတဘိန့ၣ်တဒုးလဲၤၦၤနီတဂၤဘၣ်”အဂ့ၢ်န့ၣ်စံး၀ဲန့ၣ်လီၤႉ ခီဖျိပယီၤသုးထုးထီၣ်တၢ်ကလုၢ်ဒ်အံၤအဃိကစၢၢ်ခိၣ်သ၀ီလီၢ်က၀ီၤဖိတဖၣ်တၢ်ကီတၢ်ခဲအိၣ်လၢကလဲၤၦ့ၤတၢ်လၢဂီၤလ့ၤတကပၤဒီးကလဲၤဖံးမၤတၢ်လၢကျီးပူၤအဂီၢ်တၢ်ကီတၢ်ခဲဟဲအိၣ်ထီၣ်၀ဲအဂ့ၢ်န့ၣ် ကျးကစၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံပယီၤသုးနုာ်လီၤမၤဒုးယၤတၢ်ဟူးတၢ်ဂဲၤလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၆)ဟီၣ်က၀ီၤအပူၤန့ၢ်၀ဲ(၈)လါဘျဲၣ်လံဒီးခီဖျိတၢ်ဒုးကဲထီၣ်အဃိ လီၢ်က၀ီၤကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၉၀ႇ၂၉၁)ဂၤလံအဂ့ၢ်န့ၣ် ကညီဂံၢ်ခီၣ်ထံးတၢ်ကရၢကရိထၢဖှိၣ်မၤနီၣ်စရီအသိးသ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါကမျၢၢ်ၦၤလီၢ်အိၣ်ကမှံဖိလၢအိၣ်သူမှဲကျိကၢၢ်နံၤဒီတကျိၤဒီးကီၢ်ဆၢတၢ်လီၢ်တဖၣ်အံၤတၢ်ကီတၢ်ခဲအိၣ်ထီၣ်လၢကဟးထီၣ်က့ၤလီၤဒီးတုၤလၢခဲအံၤလိၣ်ဘၣ်ဒံး၀ဲတၢ်အီၣ်တၢ်အီတဖၣ်အဂ့ၢ်န့ၣ် ၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ “တုၤလၢခဲအံၤပက့ၤအိၣ်လၢဂီၤလ့ၤ(ယပၣ်)ဟံၣ်တၢ်သူၣ်ထီၣ်လီၢ်တဘူၣ်ဒံးဘၣ်ႉဘၣ်အိၣ်စိဖဲဂီၤလ့ၤယိၤကီၢ်ပူၤဘုခ့ကျီးသ့ၣ်ခိၣ်အဟံၣ်တစိၢ်တလီၢ်မီၤနီၤႉခီဖျိပယီၤသုးဆီလီၤသးအိၣ်ဒံးအဃိကလဲၤမၤဘုခ့ကျီးဒီးမၤတသ့ႇစ့ဒၢးတအိၣ်ႉမ့မ့ၢ်လၢအီၣ်အီခီန့ၣ်ၦၤမ့ဟဲနီၤလီၤၦၤမးပအီၣ်ဘၣ်မီၤနီၤ”အဂ့ၢ်န့ၣ် ဂီၤလ့ၤလီၢ်က၀ီၤကမျၢၢ်လၢအဘၣ်ဃ့ၢ်အိၣ်ကမှံတဂၤစံး၀ဲန့ၣ်လီၤႉ တလါအံၤလါအီကူး ၁ သီတုၤလၢ ၂၀ သီအနံၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA(သုးက့ ၆)စုတီၤအဖီလာ်ဒီး ပယီၤသုးႇသုးခိးကီၢ်ဆၢ (BGF)သုးပာ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်၀ဲ(၃၃)ဘျီဒီးဖဲန့ၣ်ပယီၤသုးတကပၤသံ၀ဲ(၄၈)ဂၤႇဘၣ်ဒိ(၈၀)ဂၤန့ၣ်အဂ့ၢ်န့ၣ်ခ့ၣ်အဲၣ်ယူၣ်တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤကျိၤထုးထီၣ်ပာ်ဖျါ၀ဲဖဲမဟါလါအီကူး ၂၄ သီအနံၤန့ၣ်လီၤႉ

လါအီကူး ၂၅ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် လူၢ်ပျဲၢ်ကီၢ်ဆၣ် သ၀ီတနီၤအပူၤန့ၣ် ပယီၤသုးမီၤစိရိၤစုတီၤဖီအလာ် သုးခိးကီၢ်ဆၢ(BGF)ဟးကရၢကရိကမျၢၢ်လၢတၢ်ကဒုးအိၣ်ထီၣ်ဂၢၤကီၢ်သုးလၢတၢ်ကဒီသဒၢလီၤက့ၤဒူသ၀ီတၢ်ဘံၣ်တၢ်ဘၢအဂီၢ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ဖဲလါအီကူး ၂၃ သီအနံၤန့ၣ် သုးမီၤစိရိၤအစုတီၤဖီလာ်ကညီကီၢ်စဲၣ် သုးခိးကီၢ်ဆၢ(BGF)အနဲၣ်ရွဲၣ်ခိၣ်ကျၢၢ် သုးခိၣ်ဒိၣ်စိ စီၤခၠ့ၣ်သူၤ တီခိၣ်ရိၣ်မဲမၤ၀ဲတၢ်ထံၣ်လိာ်အိၣ်သကိးဒီးကမျၢၢ်ဖဲလူၢ်ပျဲၢ်ကီၢ်ဆၣ်ႇကီၣ်၀ါသ၀ီပူၤဒီး စံးလီၤဖဲတၢ်အိၣ်ဖှိၣ်ပူၤအဂ့ၢ်န့ၣ် လီၢ်က၀ီၤဖိလၢလဲၤထီၣ်တၢ်အိၣ်ဖှိၣ်အံၤတဂၤစံး၀ဲဒ်အံၤန့ၣ်လီၤႉ “တဲ၀ဲလၢကညီဖိကဒဲကဒဲကဘၣ်အိၣ်ဃူအိၣ်ဖိးကဘၣ်အဲၣ်လိာ်သးမီၤနီၤႉႇသ၀ီကိးဖျၢၣ်ဒဲးဒုးအိၣ်ထီၣ်တၢ်ဒီသဒၢသုးအံၤႉမ့လိၣ်န့ၣ်အ၀ဲသ့ၣ်ကဟ့ၣ်တၢ်သိၣ်ႇဟဲတဲ၀ဲဒ်န့ၣ်မီၤနီၤႉၦၤဟဲထီၣ်တၢ်အိၣ်ဖှိၣ်ဒီဒူၣ်ညါ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ တၢ်မၤတၢ်အိၣ်ဖှိၣ်ဘျီ၀ဲအံၤအပူၤကီၣ်၀ါသ၀ီခိၣ်ဃၢၤလၢအမ့ၢ်ကမီၣ်ကခၠူသ၀ီႇမဲလီၤကၠံႇမဲလီၤလ့ဒီးသ၀ီလၢအိၣ်ဖဲန့ၣ်ဟံၣ်တဖျၢၣ်တဂၤဟဲထီၣ်ဒိကနၣ်၀ဲဒီးတၢ်အိၣ်ဖှိၣ်အပူၤၦၤဟဲကူကၤထဲကညီကူကၤလီၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ “သုးခိၣ်ခၠ့ၣ်သူတဲလီၤ၀ဲလၢသါ(သ့ၣ်စၤဖီး)ဒီးခ့ၣ်အဲၣ်ယူၣ်န့ၣ်မ့ၢ်လီၤႇဘၣ်ဆၣ်ကညီဖိကဒဲကဒဲန့ၣ်ယတ သ့ၣ်စၤဖီး(ထီဒါ)ဘၣ်ႉတုၤလၢခဲအံၤန့ၣ်ပအိၣ်ဆၢထၢၣ်ဒ်စီၤဘးအူကၠံတၢ်ကတိၤ(၄)ထံၣ်န့ၣ်အသိးလီၤတဲ၀ဲဒ်န့ၣ်မီၤနီၤ”အဂ့ၢ်န့ၣ်လီၢ်က၀ီၤဖိလၢလဲၤထီၣ်တၢ်အိၣ်ဖှိၣ််တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ကတီၢ်ခဲအံၤ(BGF)သုးတဖၣ်မၤစၢၤ၀ဲသ၀ီဖိကမျၢၢ်လၢအိၣ်အ၀ဲသ့ၣ်တၢ်ပၢဟီၣ်က၀ီၤပူၤတဖၣ်လၢကျိၣ်စ့ဒီး ဟးလူၤကရၢကရိကမျၢၢ်တဖၣ်ဒ်သိးကကဲထီၣ်အ၀ဲသ့ၣ်ၦၤႇကကဲထီၣ်သုးဖိအိၣ်၀ဲအသိး ၦၤလၢတအဲၣ်ဒိးကဲ(BGF)သုးတဖၣ်န့ၣ်ဘၣ်ဟ့ၣ်လီၤ၀ဲစ့အဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲအသိး သ့ၣ်ညါဘၣ်န့ၣ်လီၤႉ

လါအီကူး ၂၅ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ ဖဲလါအီကူး ၂၃ သီအနံၤန့ၣ်(KNLA)သုးပာ်ဖှိၣ်ထီၣ်မၤန့ၢ်၀ဲကတၢၢ်တံာ်သုးခိးကီၢ်ဆၢ(BGF)သုးကလၢၤဖိတၢ်လီၢ်တခါဒီး မၤန့ၢ်ဃုာ်ကျိချံၦာ်သၣ်တနီၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ထုးထီၣ်ပာ်ဖျါ၀ဲဖဲမဟါလါအီကူး ၂၄ သီအနံၤန့ၣ်လီၤႉ သုးခိးကီၢ်ဆၢ(BGF)သုးကလၢၤဖိတဖျၢၣ်လၢအိၣ်ကတၢၢ်တံာ်သ၀ီကရူၢ် ဘီကၠိၣ်ထၣ်သ၀ီကပၤ ကည့ၤဒိၤတိၤ ကတၢၢ်တံာ်သ၀ီပူၤအံၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ထီၣ်ခး၀ဲယံၤတနၣ်ရံၣ်ဃၣ်ဃၣ်ဒီးဖဲတၢ်နုာ်လီၤမၤရှဲလဲတၢ်လီၢ်အခါ(BGF)သုးသံ(၄)ဂၤဒီးဘၣ်ဒိ၀ဲ(၂)ဂၤအဂ့ၢ်န့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဖဲတၢ်မၤရှဲလဲသုးကလၢၤအခါတၢ်မၤန့ၢ်၀ဲကျိ(M-16)ခံခိၣ်ႇ(AK-47)တခိၣ်ႇစဲးကတိၤတၢ်(၂)ဖျၢၣ်ႇ စုကွံာ်မ့ၣ်ပိၢ်(၆)ဖျၢၣ်ႇ(RPG-7)ချံ(၄)ဖျၢၣ်ႇ(M-16)ဆၣ်ဒၢ(၁)ဘ့ၣ်ႇ(AK-47)ဆၣ်ဒၢ(၃)ဘ့ၣ်ဒီး နးတိချံ(၉၄)ဖျၢၣ်အဂ့ၢ်န့ၣ်ခ့ၣ်အဲၣ်ယူၣ်–မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲန့ၣ်လီၤႉ တၢ်ခးလိာ်သးကဲထီၣ်၀ံၤအလီၢ်ခံလီၢ်က၀ီၤကမျၢၢ်လၢအိၣ်ဘူးဖဲကတၢၢ်တံာ်သ၀ီခိၣ်ဃၢၤတဖၣ်ဘၣ်ယိၣ်လၢတၢ်ကလူၤဖီၣ်ပီၣ်တၣ်ႇတၢ်ကကိးသူအ၀ဲသ့ၣ်ဒ်တၢ်ဒီသဒၢစုက၀ဲၤတခါအသိးအဂ့ၢ်န့ၣ် ကတၢၢ်တံာ်သ၀ီဖိတဂၤစံး၀ဲန့ၣ်လီၤႉ “ဖဲတၢ်ကဲထီၣ်သးတဂီၤန့ၣ်ၦၤခးလီၤကျိဖးဒိၣ်ဒီတနံၤလီၤႉခဲအံၤတနၢ်ဟူတၢ်နီတမံၤလၢၤဘၣ်ႉဘၣ်ဆၣ်လၢညါခါန့ၣ်ၦၤလူၤဖီၣ်ပီၣ်တၣ်လၢ၀ဲပၠၣ်သ၀ီတကပၤန့ၣ်အိၣ်မီၤနီၤႉဖဲအံၤနါက့တၢ်ဒုးကဲထီၣ်အဃိဘၣ်ယိၣ်လၢၦၤကလူၤဖီၣ်တၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါလါအီကူး ၂၄ သီအနံၤန့ၣ်လီၤႉ (KNLA)သုးပာ်ဖှိၣ်ထီၣ်ခးသုးကလၢၤဖိဒီးမၤန့ၢ်ကျိချံၦာ်သၣ်၀ံၤဟးထီၣ်က့ၤလၢသုးကလၢၤဖဲန့ၣ်အပူၤ၀ံၤအလီၢ်ခံ ဖဲမဟါလါအီကူး ၂၄ သီ ဂီၤခီအဆၢကတီၢ်န့ၣ် သုးခိးကီၢ်ဆၢ(BGF)မၤအါထီၣ်အသုးဂံၢ်ဘါလၢ သုးကလၢၤ၀ဲန့ၣ်အပူၤအဂ့ၢ်န့ၣ် ကတၢၢ်တံာ်သ၀ီဖိတဂၤစံး၀ဲဒ်အံၤန့ၣ်လီၤႉ “(BGF)သုးကလၢၤအံၤအိၣ်ဒီးၦၤဘူးဘူးလီၤအဃိပထံၣ်လၢအဟဲမၤအါထီၣ်သုးဂံၢ်ဘါမီၤနီၤႉမ့မ့ၢ်(ခ့ၣ်အဲၣ်ယူၣ်)ခီဖဲတၢ်တနံၤန့ၣ်နုာ်လီၤလၢသုးကလၢၤပူၤဒီးမၤန့ၢ်၀ဲကျိတဖၣ်၀ံၤဟးထီၣ်ကဒါလီၤအဃိဖဲတဂီၤညါအံၤဂီၤခီန့ၣ်အ၀ဲသ့ၣ်မၤအါထီၣ်အသုးဂံၢ်ဘါႉ(BGF)ဟဲက့ၤအိၣ်လၢသုးကလၢၤပူၤလံ”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါန့ၣ်လီၤႉ လၢန့ၣ်အမဲာ်ညါဖဲအပူၤကွံာ်လါအီကူး ၂၀ သီအနံၤစ့ၢ်ကီး သုးခိးကီၢ်ဆၢ(BGF–၁၀၁၃) သုးခိၣ်လၣ်ကၠဲၤအံၤမၢ၀ဲဒွဲၣ်လိကီၢ်ဆၣ် ကတၢၢ်တံာ်သ၀ီဒီးလ့ဖိထၣ်သ၀ီကရူၢ်ပူၤ ကတၢၢ်တံာ်ႇကဲတီႇဘီကၠိၣ်ထၣ်ႇတီၤသူၤကလ့ဒီးဘီကၠိၣ်လဲၤသ၀ီဖိအဂၤ(၅၀၀)ဃၣ်ဃၣ်လၢကလဲၤဒိထံကီၢ်ခိၣ်ဂီၤ(မၣ်ပိၤတ့ၤ)လၢကမးမိၢ်၀့ၢ်ပူၤဒီးဃ့၀ဲစ့တဂၤန့ၣ်(၃၀၀ႇ၀၀၀)ကလီၢ်ကၠးအဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ