လါယူၤလံ ၂၈ သီႇ ၂၀၂၂ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ် ၀ီၢ်ရီဟီၣ်က၀ီၤအပူၤ ဖဲလါယူၤလံ ၂၆ သီအနံၤန့ၣ် ပယီၤသုးဒီးသုးခိးကီၢ်ဆၢ(BGF–၁၀၂၁)သုးရ့ၣ်လၢအိၣ်ဆီလီၤသးဖဲချၢၣ်–တကူၣ်တၢၣ် ပၢၤကီၢ်၀ဲၤလီၢ်ကရၢၢ်ပူၤအံၤတဖၣ်ခးလီၤကျိဖးဒိၣ်ဆူသ၀ီပူၤအဃိဟံၣ်ဟးဂီၤ၀ဲ(၅)ဖျၢၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
စးထီၣ်ဖဲတလါအံၤလါယူၤလံ ၂၀ သီအလီၢ်ခံန့ၣ် ပယီၤသုးပာ်ဖှိၣ်လၢအိၣ်ပၢၤကီၢ်၀ဲၤလီၢ်ကရၢၢ်ပူၤအံၤတဖၣ် နုာ်လီၤဟူးဂဲၤ၀ဲဒၣ်လၢတကူၣ်တၢၣ်ႇချၢၣ်သ၀ီပူၤတလီၢ်လီၢ်ဒီးသမံသမိး၀ဲလီၢ်က၀ီၤကမျၢၢ်လၢအဟးထီၣ်က့ၤလီၤဖဲန့ၣ်တဖၣ်အမဲာ်ညါခးလီၤကျိဖးဒိၣ်ဆူသ၀ီပူၤခဲအံၤခဲအံၤအဂ့ၢ်န့ၣ် လီၢ်က၀ီၤဖိလၢအဘၣ်ဃ့ၢ်တၢ်ဒုးတဖၣ်စံး၀ဲန့ၣ်လီၤႉ
၀ီၢ်ရီလီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲ“ဖဲလါယူၤလံ ၂၆ သီ မုၢ်ထူၣ် ၁၂ နၣ်ရံၣ်အဆၢကတီၢ်န့ၣ် ပယီၤသုးခးလီၤကျိဖးဒိၣ်ဆူတကူၣ်တၢၣ်သ၀ီပူၤ(၄)ဖျၢၣ်အဃိဘၣ်၀ဲဒၣ်ဟံၣ်လၢကၠိတီတကပၤန့ၣ်(၁)ဖျၢၣ်ႇဃုာ်ဒီးသ၀ီခံလီၤတကပၤန့ၣ်ကအိၣ်(၅)ဖျၢၣ်ညါႉၦၤဟဲခးအ၀ဲသ့ၣ်နါက့တအိၣ်စ့ၢ်ကီးဘၣ်ႉခးလီၤကျိဖးဒိၣ်တလီၢ်လီၢ်အဃိၦၤက့ၤလၢဟံၣ်တဘူၣ်နီတဂၤဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါလါယူၤလံ ၂၇ သီအနံၤန့ၣ်လီၤႉ
လီၢ်က၀ီၤကမျၢၢ်လၢအိၣ်ဘူးဖဲချၢၣ်–တကူၣ်တၢၣ်ပၢၤကီၢ်၀ဲၤလီၢ်အခိၣ်အဃၢၤတဖၣ်အါဒၣ်တက့ၢ်န့ၣ် ဖဲအပူၤကွံာ်လါအ့ဖြ့ၣ် ၂၃ သီတၢ်ဒုးစးထီၣ်ကဲထီၣ်တုၤလၢခဲအံၤတစုအ၀ဲသ့ၣ်တက့ၤဘၣ်လၢ အဟံၣ်အဃီဒံးဘၣ်ႉခီဖျိပယီၤသုးခးလီၤကျိဖးဒိၣ်တလီၢ်လီၢ်အဖီခိၣ်လီၢ်က၀ီၤကမျၢၢ်တဖၣ်ခီဖျိတက့ၤဖံးအီၣ်မၤအီၣ်ဘၣ်တၢ်အဃိတၢ်ကီတၢ်ခဲဟဲအိၣ်ထီၣ်၀ဲလၢတၢ်လုၢ်အီၣ်နီၢ်ခိသးသမူအဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ
လၢ၀ီၢ်ရီကျဲမုၢ်ဖးဒိၣ်(ပၢၤကီၢ်၀ဲၤလီၢ်)အမဲာ်ညါန့ၣ်ပယီၤသုးသမံသမိးဖီၣ်တီၢ်၀ဲလီၢ်က၀ီၤကမျၢၢ်လၢအလ့ၢ်ထီၣ်လ့ၢ်လိၤဖဲန့ၣ်သ့ၣ်တဖၣ်ဒီးသ၀ီဖိလၢတၢ်ဖီၣ်သမံသမိး၀ဲတဖၣ်အံၤစ့ၢ်ကီးပယီၤသုးဃ့အီၣ်လီး၀ဲစ့တဂၤန့ၣ်(၅၀၀၀၀)ကၠးညါအဂ့ၢ်န့ၣ် သ၀ီဖိလၢအဟဲက့ၤထူၣ်ဖျဲးထီၣ်တဂၤစံး၀ဲန့ၣ်လီၤႉ
ခီဖျိပယီၤသုးဒီး(BGF)သုးပာ်ဖှိၣ်တဖၣ်အံၤခးလီၤကျိဖးဒိၣ်အဃိဘၣ်သံ၀ဲဒၣ်နါသဲၣ်ထိၤသ၀ီဖိ ပိာ်မုၣ်(၁)ဂၤႇတကူၣ်တၢၣ်သ၀ီဖိပိာ်ခွါ(၁)ဂၤဒီးပိာ်မုၣ်(၁)ဂၤဒီးလီၢ်က၀ီၤကမျၢၢ်တစှၤန့ၢ်အဂၤ(၁၀)ဘၣ်ဒိဘၣ်ထံး၀ဲအဂ့ၢ်န့ၣ် သ့ၣ်ညါဘၣ်လၢအဟံၣ်ဖိဃီဖိအအိၣ်န့ၣ်လီၤႉ
လါယူၤလံ ၂၇ သီႇ ၂၀၂၂ နံၣ်ႇ ခ့ၣ်အဲးစံၣ်
တၢ်ဒီသဒၢကမျၢၢ်သုး(PDF)ကဆီ၀ါသုးကျိၤလၢအဘၣ်တၢ်တီခိၣ်ရိၣ်မဲအီၤလၢသုးခိၣ်စီၤစးလိအံၤ ကပာ်ဖှိၣ်မၤသကိးတၢ်ဒီး(ကီၢ်သူလ့ၤသုးမုၢ်ဒိၣ်)လၢသုးခိၣ်ကျၢၢ်ဖိစီၤနၢၤမၠးဒုးအိၣ်ထီၣ်၀ဲအံၤအဂ့ၢ်န့ၣ် သုးခိၣ်စးလိအနီၢ်ကစၢ်ဒၣ်၀ဲဆဲးလီၤမံၤထုးဘိးဘၣ်ရၤလီၤ၀ဲဖဲလါယူၤလံ ၂၅ သီအနံၤန့ၣ်လီၤႉ
သုးခိၣ်စးလိအံၤအပူၤကွံာ်တီခိၣ်ရိၣ်မဲတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)အဂၤ(၂၀၀)ဘျဲၣ်ဟဲက့ၤပာ်ဖှိၣ်မၤသကိးတၢ်ဒီးသုးခိၣ်ကျၢၢ်ဖိစီၤနၢၤဒါမၠးတီခိၣ်ရိၣ်မဲကညီဒီကလုာ်ဂၢၤသးကရၢ(KNDO)ဒီးတၢ်ဟ့ၣ်လီၤအီၤမူဒါလၢသုးရ့ၣ်လီၤဆီအသုးရ့ၣ်ခိၣ်အသိးမ့ၢ်စ့ၢ်ကီးတၢ်ဒီသဒၢကမျၢၢ်သုး(PDF)ကဆီ၀ါသုးကျိၤအသုးရ့ၣ်ခိၣ်တဂၤစ့ၢ်ကီးန့ၣ်လီၤႉ
သုးခိၣ်စးလိစံး၀ဲလၢ“တၢ်လၢကီၢ်သူလ့ၤသုးမုၢ်ဒိၣ်န့ၣ်တဘၣ်ဃးဒီးၦၤလၢအမၤဃုာ်တၢ်ဒီးပယီၤဘၣ်ႉကီၢ်သူလ့ၤသုးမုၢ်ဒိၣ်န့ၣ်အိၣ်ဒၣ်ကဘၣ်ဒုးန့ၢ်က့ၤထံကီၢ်လီၤမီၤနီၤႉအဃိန့ၣ်ပ၀ဲဒၣ်န့ၣ်ပသးဆူၣ်လၢပကဘၣ်ဒုးန့ၢ်က့ၤပထံပကီၢ်ဒီးပထံပကီၢ်အံၤပကလဲၤတဲသကိးတၢ်ဒီးပယီၤပကလဲၤထိလဲးမးန့ၣ်တကတၢၢ်နီတဘျီဘၣ်ႉပယီၤသုးမီၤစိရိၤအံၤလံၣ်အီၣ်ၦၤတနံၣ်၀ံၤတနံၣ်အနံၣ်(၇၀)ဘျဲၣ်လံအဃိန့ၣ်ပတလိၣ်ကနၣ်လၢၤဘၣ်မီၤနီၤႉပထံကီၢ်န့ၣ်ပမ့အဲၣ်ဒိးန့န့ၣ်ပကဘၣ်ဒုးန့အီၤလီၤယဆိမိၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ
ဖဲအပူၤကွံာ်လါယူၤလံ ၁၉ သီအနံၤ တၢ်ဒုးအိၣ်ထီၣ်ကီၢ်သူလ့ၤသုးမုၢ်ဒိၣ်၀ံၤအလီၢ်ခံ သုးခိၣ်စးလိတီခိၣ်ရိၣ်ကဆီ၀ါသုးကျိၤဃုာ်ဒီးစီၤ၀့မၠ့ၣ်တီခိၣ်ရိၣ်မဲ(VENOM)သုးကျိၤႇ တနီသရံၣ်ကီၢ်ခီခ့ၣ်အဲၣ်ယူၣ်(သုးက့ ၄)ဟီၣ်က၀ီၤသုးခိၣ်အဲၣ်ကွံ(ကိး)စီၤကီၤလၤဖိတီခိၣ်ရိၣ်မ ဲ(KNDO)သုးရ့ၣ်လီၤဆီႇ စီၤအဲၣ်စ့၀ါတီခိၣ်ရိၣ်မဲ(KNDO)သုးရ့ၣ်လီၤဆီဒီး စီၤဟ့ၤနရံၤတီခိၣ်ရိၣ်မဲ(KNDO)ကရူၢ်အံၤတဖၣ်စုာ်စုာ်ထုးထီၣ်ဘိးဘၣ်ရၤလီၤ၀ဲလၢကပာ်ဖှိၣ်မၤသကိးတၢ်ဒီးကီၢ်သူလ့ၤသုးမုၢ်ဒိၣ်အံၤန့ၣ်လီၤႉ
လၢန့ၣ်အမဲာ်ညါကီၢ်သူလ့ၤသုးမုၢ်ဒိၣ်အတၢ်အိၣ်ဆၢထၢၣ်ဒီးအတၢ်ဖံးတၢ်မၤတဖၣ်တဆီတလဲကအိၣ်ဒ်အပူၤကွံာ်လၢညါအသိးလီၤဒီးကဒုးလီၤၦီၢ်ကွံာ်ပယီၤသုးမီၤစိရိၤအဃိသုးခိၣ်ဒိၣ်ဂီၢ်ဂ့ၢ်စီၤစးလိအံၤကဆဲးပာ်ဖှိၣ်မၤသကိးတၢ်န့ၣ်လီၤႉဒ်န့ၣ်အသိးတၢ်ဒုးအိၣ်ထီၣ်ကီၢ်သူလ့ၤသုးမုၢ်ဒိၣ်အဖီခိၣ်အံၤကဆီ၀ါသုးကျိၤအသုးဖိသံၣ်ဖိတဖၣ်ခဲလၢာ်စ့ၢ်ကီးတူၢ်လိာ်နာ်အီၣ်၀ဲအဃိသူၣ်အိၣ်သးအိၣ်လၢကနုာ်လီၤပၣ်ဃုာ်၀ဲအဂ့ၢ်န့ၣ်(PDF)ကဆီ၀ါသုးကျိၤအလံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ကတီၢ်ခဲအံၤဘၣ်ထွဲတၢ်ဒုးအိၣ်ထီၣ်ကီၢ်သူလ့ၤသုးမုၢ်ဒိၣ်တၢ်ဂ့ၢ်အံၤတၢ်ပဲာ်ထံနီၤဖးဟဲအိၣ်ထီၣ်၀ဲလၢကညီဖိအကျါအကလုာ်ကလုာ်အသိး(KNU)ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)လီၢ်ခၢၣ်သးသုး၀ဲၤလီၢ်ခိၣ်သ့ၣ်အံၤစ့ၢ်ကီးဘၣ်ဃးတၢ်ဒုးအိၣ်ထီၣ်တၢ်ကရၢကရိအံၤတပၣ်ဃုာ်ဒီးအ၀ဲသ့ၣ်တၢ်ပာ်သးဘၣ်ဒီး(cobra)အသုးကျိၤသုးခိၣ်ဒးဘီစ့ၢ်ကီးတတူၢ်လိာ်၀ဲဘၣ်အဂ့ၢ်န့ၣ်ထုးထီၣ်ပာ်ဖျါစံး၀ဲန့ၣ်လီၤႉ
လါယူၤလံ ၂၆ သီႇ ၂၀၂၂ နံၣ်ႇ ခ့ၣ်အဲးစံၣ်
လၢကမၤရှဲလဲ၀ဲမၠၣ်၀တံၣ်–ဂီၤလ့ၤကျဲအံၤအဂီၢ်ပယီၤသုးကျိၤလၢအဟဲထီၣ်မၤဒုးယၤတၢ်ဟူးတၢ်ဂဲၤတဖၣ်အံၤ ခီဖျိကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်က၀ီၤတံၢ်ခး၀ဲအဃိပယီၤသုးဟဲထီၣ်တတုၤလၢ(သိထၣ်ကွ့ၣ်)ဒံးဘၣ်ဒီးအ၀ဲသ့ၣ်အၦၤသံဘၣ်ဒိဘၣ်ထံးအါအဃိဘၣ်ဂုၤကဒါလီၢ်ခံအဂ့ၢ်န့ၣ် (KNLA)သုးပာ်ဖှိၣ်တကပၤစံး၀ဲန့ၣ်လီၤႉ
(KNLA)သုးပာ်ဖှိၣ်အသုးကျိၤခိၣ်တဂၤစံး၀ဲ“ပယီၤသုးကျိၤလၢအကဟဲထီၣ်တဖၣ်န့ၣ်မၤၦဲၤသုးဂံၢ်ဘါလၢဖလူသ၀ီတကပၤ၀ံၤၦၤမၢအ၀ဲသ့ၣ်ထီၣ်ဒုး(သိထၣ်ကွ့ၣ်)တကပၤန့ၣ်ခဲလၢာ်မီၤနီၤႉအ၀ဲသ့ၣ်တတလၢထီၣ်(သိထၣ်ကွ့ၣ်)ဒံးဘၣ်ႉမ့နၢ်ဟူကျိသီၣ်န့ၣ်ဆှၢထီၣ်တၢ်ကစီၣ်ဆူအ၀ဲသ့ၣ်ခိၣ်နၢ်အိၣ်မၤ၀ဲဒ်သိးဒီးတၢ်ဒုးကဲထီၣ်ဒီးသုးဖိတဖၣ်အါဒၣ်တက့ၢ်န့ၣ်ဟးစံၣ်ပလဲာ်ကွံာ်အသးမီၤနီၤႉဟဲထီၣ်ႇက့ၤဂုၤကဒါလီၢ်ခံဒ်န့ၣ်ကိးမုၢ်နံၤဒဲးဃၣ်ဃၣ်ညါႉမၤလီၤမၢ်ကးဘၢ၀ဲၦၤသံၦၤဘၣ်ဒိဘၣ်ထံးတၢ်ကစီၣ်ဒီးမၢသုးကျိၤလၢအိၣ်တၢ်လီၢ်ခံဟဲထီၣ်ကဒါမၤ၀ဲဒ်န့ၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ
စးထီၣ်လါယူၤလံ ၂ သီအနံၤန့ၣ် ပယီၤသုးတြိၤ(၂၂)ႇသုးတြိၤ(၄၄)စုတီၤသုးရ့ၣ်တဖၣ်အံၤ ပာ်ဖှိၣ်ဒုးအိၣ်၀ဲသုးကျိၤမၤအါထီၣ်သုးဂံၢ်ဘါလၢမၠၣ်၀တံၣ်–ဂီၤလ့ၤတကပၤဒီး လၢကလုၢ်ဘၢဒိၣ်စိ၀ဲဖလူ–ကဆီ၀ါလ့–ဂီၤလ့ၤကစၢၢ်ခိၣ်ကျဲအံၤအဂီၢ်န့ၣ် ပယီၤသုးကျိၤမၤ၀ဲတၢ်ထီၣ်ဒုးလၢပျီပူၤႇ ခးလီၤစၢၤ၀ဲကျိဖးဒိၣ်တဖၣ်ဘၣ်ဆၣ် ခီဖျိ(KNLA)သုးပာ်ဖှိၣ်ထီၣ်ခး၀ဲ(သိထၣ်ကွ့ၣ်)တၢ်လီၢ်အဃိပယီၤသုးသံဘၣ်ဒိဘၣ်ထံးဘၣ်ဂုၤကဒါလီၢ်ခံဒ်အံၤတုၤလၢလါယူၤလံ ၂၅ သီလံအဂ့ၢ်န့ၣ် သုးပာ်ဖှိၣ်တကပၤစံး၀ဲန့ၣ်လီၤႉ
“ခဲအံၤန့ၣ်အ၀ဲသ့ၣ်သုးဟးဂီၤဖးဒိၣ်လံႇသုးလၢအဟးဂီၤတဖၣ်က့ၤပာ်ဖှိၣ်ကဒါအၦၤဒီးက့ၤဒုးအိၣ်ထီၣ်သုးရ့ၣ်ႇမၢလဲၤထီၣ်ကဒါတၢ်မဲာ်ညါအိၣ်ဒ်န့ၣ်လံမီၤနီၤႉပယီၤသုးကျိၤတကပၤနါက့ဟဲက့ၤလၢပအိၣ်ဒီးနုာ်လီၤလၢ(CDM)ပူၤစ့ၢ်ကီးအိၣ်မီၤနီၤႉလၢခံမ့ကဟဲနုာ်လီၤလၢ(CDM)ပူၤန့ၣ်ဆဲးကျိးၦၤသ့ကိးဆၢကတီၢ်ဒဲးႇပပာ်အ၀ဲသ့ၣ်လၢတၢ်ဘံၣ်တၢ်ဘၢအလီၢ်”အဂ့ၢ်န့ၣ်(KNLA)သုးပာ်ဖှိၣ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၆)ဟီၣ်က၀ီၤအပူၤန့ၣ် တလါအံၤလါယူၤလံအတီၢ်ပူၤ လၢမၠၣ်၀တံၣ်–ဂီၤလ့ၤကျဲႇ မၠၣ်၀တံၣ်–မဲၢ်ကနဲ–အ့ရှါကျဲသီႇ ကီးတရံး–ခွံတၢၣ်–တီၤကၠၤအ့ကျဲႇ ကၠၤအ့စ့ၣ်ကၠံ–ကၠဲးဒိ–ကၠီၢ်ထၣ်ကျဲတၢ်လီၢ်တဖၣ်တုၤလၢခဲအံၤတၢ်ဒုးကဲထီၣ်ဒံး၀ဲလၢပယီၤသုးဒီး(KNLA)သုးပာ်ဖှိၣ်အဘၢၣ်စၢၤအဂ့ၢ်န့ၣ်သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ
လါယူၤလံ ၂၆ သီႇ ၂၀၂၂ နံၣ်ႇ ခ့ၣ်အဲးစံၣ်
လၢကၠၤအ့စ့ၣ်ကၠံကီၢ်ဆၣ် ချၢၣ်တကူၣ်တၢၣ်ဟီၣ်က၀ီၤအပူၤ ပယီၤသုးဒီးသုးခိးကီၢ်ဆၢ(BGF)လၢအိၣ် ပၢၤကီၢ်၀ဲၤလီၢ်ကရၢၢ်ပူၤအံၤတဖၣ် မၤပျံၤမၤဖုး၀ဲလီၢ်က၀ီၤသ၀ီဖိတဖၣ်အကလုာ်ကလုာ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
ပယီၤသုးဒီးသုးခိးကီၢ်ဆၢ(BGF–၁၀၂၁)သုးရ့ၣ် စီၤဒူစှ့ၤတီခိၣ်ရိၣ်မဲသုးပာ်ဖှိၣ်လၢ အိၣ်ပၢၤကီၢ်၀ဲၤလီၢ်ကရၢၢ်ပူၤတဖၣ်အံၤ စးထီၣ်ဖဲလါယူၤလံ ၂၀ သီအလီၢ်ခံန့ၣ် အ၀ဲသ့ၣ်ဟးထီၣ်၀ဲဆူ သုးကလၢၤအချၢဒီးလဲၤ၀ဲဆူတကူၣ်တၢၣ်ဒီးချၢၣ်သ၀ီပူၤ၀ံၤမၢ၀ဲသ၀ီဖိလဲၤၦ့ၤန့ၢ်အ၀ဲသ့ၣ်သံးဒီးမၤပျံၤမၤဖုး၀ဲအကလုာ်ကလုာ်အဂ့ၢ်န့ၣ် ၀ီၢ်ရီလီၢ်က၀ီၤသ၀ီဖိတဂၤစံး၀ဲန့ၣ်လီၤႉ
တကူၣ်တၢၣ်–ပူလ့ၤသ၀ီကျဲမုၢ်လၢလီၢ်က၀ီၤကမျၢၢ်လ့ၢ်ထီၣ်လ့ၢ်လိၤ၀ဲအံၤ ပယီၤသုးတဒူၣ်ဃီ၀ဲအံၤကိးသံဒိးသံကွၢ် သမံသမိးၦၤလဲၤက့ၤတၢ်ဖိတဖၣ်လၢကျဲပူၤခဲအံၤခဲအံၤတကးဒံးဘၣ်အမဲာ်ညါဟဲလီၤတုၤလၢချၢၣ်သ၀ီကျဲခိၣ်ထိးခးပိၢ်ထီၣ်ကျိမၤပျံၤမၤဖုးသ၀ီဖိအိၣ်၀ဲန့ၣ်လီၤႉလၢန့ၣ်အမဲာ်ညါခီဖျိအ၀ဲသ့ၣ်ခးပိၢ်ထီၣ်ကျိဖိကျိဖးဒိၣ်လၢအ၀ဲသ့ၣ်သုးကလၢၤကရၢၢ်ပူၤတလီၢ်လီၢ်အဃိလီၢ်က၀ီၤသ၀ီဖိတဖၣ်ဘၣ်ပျံၤတၢ်ဖုးတၢ်ကိးမုၢ်နံၤဒဲးအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
“သ၀ီဖိတဖၣ်ဘၣ်ဟးစံၣ်န့ၢ်ဖးယံၤလံမီၤနီၤႉၦၤကိးဂၤဒဲးန့ၣ်တၢ်လုၢ်အီၣ်နီၢ်ခိသးသမူကီခဲထီၣ်လံအဃိၦၤစးထီၣ်က့ၤမၤကဒါတၢ်မၤလၢကျီးပူၤခဲအံၤဒံးလီၤႉဖဲလါယူၤလံ ၂၄ သီန့ၣ် ပယီၤသုးဟဲနုာ်လီၤလၢချၢၣ်သ၀ီပူၤ အါအါဂီၢ်ဂီၢ်အဃိသ၀ီဒီတဖျၢၣ်ပျံၤတၢ်ဖုးတၢ်မီၤနီၤႉဟဲတုၤလၢကၠိမဲာ်ညါ၀ံၤခးပိၢ်ထီၣ်ကျိအဃိၦၤပျံၤတၢ်ခဲလၢာ်တၢ်အံၤမ့ၢ်ကဘၣ်စံၣ်ကဒီးဧါႇကဘၣ်ဒိကဒီးဧါမီၤနီၤႉလၢမုၢ်နၤခီနါက့ခးပိၢ်ထီၣ်ကျိကိးမုၢ်ဒဲးအဃိမၤတၢ်တဘူၣ်နီတမံၤလၢၤဘၣ်ဘၣ်ပျံၤတၢ်”အဂ့ၢ်န့ၣ် ချၢၣ်တကူၣ်တၢၣ်သ၀ီဖိတဂၤစံးဘၣ်ခ့ၣ်အဲးစံၣ်န့ၣ်လီၤႉ
ပယီၤသုးဒီး(BGF)သုးပာ်ဖှိၣ်လၢအိၣ်တကူၣ်တၢၣ်ပၢၤကီၢ်၀ဲၤလီၢ်ကရၢၢ်ပူၤတဖၣ်အံၤ ကိးသူ၀ဲသ၀ီဖိတဖၣ်ဒ်တၢ်ဒီသဒၢစုက၀ဲၤတခါအသိးဒီးဖီၣ်တီၢ်မၤဒၢၣ်၀ဲလီၢ်က၀ီၤဖိတဖၣ်ခဲအံၤခဲအံၤအဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ
ချၢၣ်တကူၣ်တၢၣ်တၢ်လီၢ်အံၤအိၣ်ဆီလီၤသးလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)၀ီၢ်ရ့ၣ်ကီၢ်ဆၣ်တၢ်ပၢဟီၣ်က၀ီၤအပူၤန့ၣ်လီၤႉဖဲအပူၤကွံာ်လါအ့ဖြ့ၣ်အခါ ခီဖျိတၢ်ဒုးကဲထီၣ်၀ဲလၢပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တဖၣ်အဘၢၣ်စၢၤအဃိ သ၀ီအဖျၢၣ်(၁၀)ဘျဲၣ်လီၢ်က၀ီၤကမျၢၢ်(၁၀ႇ၀၀၀)ဘျဲၣ်ဘၣ်ဃ့ၢ်ထီၣ်ဒံး၀ဲန့ၣ်လီၤႉ
ခီဖျိတၢ်ဒုးကဲထီၣ်အဃိလီၢ်က၀ီၤသ၀ီဖိတနီၤသံဘၣ်ဒိဘၣ်ထံးဒီးဟံၣ်ဃီတၢ်သူၣ်ထီၣ်ႇကျီးတဖၣ်ဟးဂူာ်ဟးဂီၤ၀ဲအါမးန့ၣ်လီၤႉလီၢ်က၀ီၤသ၀ီဖိလၢအဃ့ၢ်ထီၣ်တဖၣ်အံၤတုၤလၢခဲအံၤက့ၤဖံးအီၣ်မၤအီၣ်တၢ်တသ့ဒံးဘၣ်အဃိ တၢ်လုၢ်အီၣ်နီၢ်ခိသးသမူတၢ်ကီတၢ်ခဲတဖၣ်ဟဲအိၣ်ထီၣ်၀ဲအဂ့ၢ်န့ၣ် လီၢ်က၀ီၤသ၀ီဖိိတဖၣ်စံး၀ဲန့ၣ်လီၤႉ
လါယူၤလံ ၂၆ သီႇ ၂၀၂၂ နံၣ်ႇ ခ့ၣ်အဲးစံၣ်
လၢကဆှၢထီၣ်တၢ်အီၣ်တၢ်အီဒီးကမၤၦဲၤထီၣ်သုးဂံၢ်ဘါအဂီၢ်ယီၤသုးႇသုးခိးကီၢ်ဆၢ(BGF)သုးပာ်ဖှိၣ်တဖၣ်နုာ်လီၤဆူမၠဲၣ်ကၠံငူၣ်တကပၤအဃိလီၢ်က၀ီၤသ၀ီဖိတဖၣ်ဘၣ်ယိၣ်၀ဲလၢတၢ်ကဖီၣ်ပီၣ်တၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤသ၀ီဖိတဖၣ်အအိၣ်န့ၣ်လီၤႉ
ဖဲမဟါလါယူၤလံ ၂၅ သီ ဂီၤခီ ၇ နၣ်ရံၣ်ဃၣ်ဃၣ်အဆၢကတီၢ်န့ၣ် သိလ့ၣ်လၢအတီၣ်၀ဲဒၣ်ပယီၤသုးဒီး(BGF)သုးပာ်ဖှိၣ်အံၤဟဲထီၣ်၀ဲဆူမၠဲၣ်ကၠဲငူၣ်ကျဲမုၢ်ဖီခိၣ်အဃိ လီၢ်က၀ီၤကမျၢၢ်တဖၣ်ဘၣ်ယိၣ်လၢတၢ်ကဖီၣ်ပီၣ်တၣ်ဒီးတၢ်ကသူအ၀ဲသ့ၣ်လၢတၢ်ဒီသဒၢစုက၀ဲၤအံၤန့ၣ်လီၤႉလၢတၢ်န့ၣ်အဃိလီၢ်က၀ီၤဖိတဖၣ်ဟးထီၣ်လၢဟံၣ်ချၢတဘူၣ်လၢၤဘၣ်အဂ့ၢ်န့ၣ် နီၤကမၠဲၤသ၀ီဖိတဂၤစံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ
အ၀ဲစံး၀ဲလၢ“ဖဲဂီၤခီ ၇ နၣ်ရံၣ်ဃၣ်ဃၣ်န့ၣ်ပထံၣ်လၢပယီၤသုးဟးထီၣ်ဟးလီၤဒီးသိလ့ၣ်လၢကျဲမုၢ်ခိၣ်မီၤနီၤႉ မ့ၢ်သိလ့ၣ်ၦဲၤခိၣ်လဲၣ်ခီန့ၣ်မၤနီၣ်တဘၣ်အါအါဘၣ်ႉမ့မ့ၢ်လၢမၠၣ်ကၠံငူၣ်ပူၤန့ၣ်(BGF)အိၣ်အါႉခီဖျိအ၀ဲသ့ၣ်အိၣ်လၢ(နါအူဃိၣ်)သူမှဲကျိကၢၢ်နံၤလီၤအဃိကလဲၤထီၣ်ဆူ(သုးက့ ၅)တကပၤအါလီၤႉ အပူၤကွံာ်လၢညါခါနါက့ မ့ဟဲထီၣ်ဒီးသိလ့ၣ်ဒ်အံၤန့ၣ်လဲၤထီၣ်၀ဲလၢန့ၣ်တကပၤလီၤမီၤနီၤႉခီဖျိသုးကျိၤဟဲထီၣ်ကဒါဒ်အံၤအဃိယသ၀ီဒီးသ၀ီလၢအိၣ်ခိၣ်ဃၢၤတဖၣ်နါက့လဲၤလၢကျီးပူၤတဘူၣ်လၢၤဘၣ်ႉၦၤဘၣ်ယိၣ်လၢမ့ၢ်တၢ်ကနုာ်လီၤဖီၣ်ပီၣ်တၣ်စံာ်ယံၤလဲၣ်ႇတၢ်ကကိးသူၦၤလၢတၢ်ဒီသဒၢစုက၀ဲၤစံာ်ယံၤလဲၣ်ဒ်န့ၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါန့ၣ်လီၤႉ
စးထီၣ်ဖဲလါယူၤလံ ၂၀ သီအနံၤန့ၣ် သုးခိးကီၢ်ဆၢ(BGF –၁၀၁၄)အသုးခိၣ် သုးခိၣ်ဒိၣ်ဖိမီၤခၠ့ၣ်ထုးထီၣ်ပာ်ဖျါ၀ဲလၢကကးတံၢ်ကွံာ်ကတၢၢ်တံာ်သ၀ီချံသန့၀ံၤအလီၢ်ခံန့ၣ် တၢ်မၤၦဲၤဆှၢထီၣ်သုးဂံၢ်ဘါဟဲအိၣ်ထီၣ်၀ဲဒ်အံၤလီၤဒီးလီၢ်က၀ီၤဖိတဖၣ်တယး၀ဲလၢသုးတဖၣ်အံၤကလဲၤထီၣ်၀ဲလၢခ့ၣ်အဲၣ်ယူၣ်(သုးက့ ၅)တကပၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒ်န့ၣ်အသိးဖဲအပူၤကွံာ်စှၤလါအခါစ့ၢ်ကီးသုးခိးကီၢ်ဆၢ(BGF)နုာ်လီၤလၢခ့ၣ်အဲၣ်ယူၣ်(သုးက့ ၁)ဟီၣ်က၀ီၤသ၀ီတနီၤအပူၤဒီးဖီၣ်၀ဲလီၢ်က၀ီၤသ၀ီဖိအိၣ်လၢအကယၤညါအသိး ဖီၣ်ပီၣ်တၣ်ႇကိးသူလီၢ်က၀ီၤဖိတဖၣ်ဒ်တၢ်ဒီသဒၢစုက၀ဲၤတခါအသိးကဲထီၣ်တ့ၢ်အသးဒံးန့ၣ်လီၤႉ
သုးဟံးန့ၢ်တၢ်စိိတၢ်ကမီၤ၀ံၤအလီၢ်ခံတၢ်ဒုးစးထီၣ်ကဲထီၣ်၀ဲလၢ(ခ့ၣ်အဲၣ်ယူၣ်)သုးက့တဖၣ်အပူၤဒီးဖဲန့ၣ်မ့မ့ၢ်ခ့ၣ်အဲၣ်ယူၣ်(သုးက့ ၅)ဟီၣ်က၀ီၤအပူၤန့ၣ် ပယီၤသုးႇ(BGF)သုးပာ်ဖှိၣ်ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)တဖၣ်အဘၢၣ်စၢၤတၢ်ဒုးကဲထီၣ်အဘျီအါကတၢၢ်လီၤအသိးခ့ၣ်အဲၣ်ယူၣ်တကပၤထီၣ်မၤန့ၢ်ပယီၤသုးကလၢၤတနီၤစ့ၢ်ကီးန့ၣ်လီၤႉ
လါယူၤလံ ၂၆ သီႇ ၂၀၂၂ နံၣ်ႇ ခ့ၣ်အဲးစံၣ်
ခီဖျိပယီၤသုးလၢအိၣ်ကီးတရံး၀့ၢ်ပူၤအံၤတဖၣ်ခးလီၤကျိဖးဒိၣ်ကိးမုၢ်နံၤဒဲးဃၣ်ဃၣ်အဃိ ကီးတရံးကလံၤထံးသ၀ီတနီၤ လီၢ်က၀ီၤသ၀ီဖိတဖၣ်ဘၣ်ဃ့ၢ်ထီၣ်ကဒီး၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ
စးထီၣ်ဖဲလါယူၤလံ ၁၃ သီတုၤလၢလါယူၤလံ ၂၄ သီအနံၤန့ၣ် ခီဖျိပယီၤသုးခးလီၤကျိဖိးဒိၣ်ကိးမုၢ်နံၤဒဲးအဃိ ကီးတရံးကလံၤထံးသ၀ီတဖၣ်လၢအမ့ၢ်ကီးနွဲၢ်သ၀ီႇယွၤသ့ၣ်ကိႇအၤကလီၤဒီးမီမၣ်သ၀ီသီႇကမဲၤကိႇသၤယၤကိဒီးကၠီၤစှၤကိသ၀ီ လီၢ်က၀ီၤသ၀ီဖိခဲလၢာ်ဃၣ်ဃၣ်ဘၣ်ဃ့ၢ်ထီၣ်ကဒီး၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
ကီးနွဲၢ်လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲ“ပယီၤသုးခးလီၤကျိဖးဒိၣ်လၢသ၀ီပူၤကိးမုၢ်နံၤဒဲးလီၤႉနအိၣ်ကဘူၣ်ဒ်လဲၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ
လီၢ်က၀ီၤသ၀ီဖိတနီၤန့ၣ်လဲၤစံၣ်အိၣ်၀ဲလၢသ၀ီအဂၤလၢအဘူးအတံၢ်အဟံၣ်ဒီးတနီၤန့ၣ်လဲၤစံၣ်အိၣ်လၢၦၢ်ပူၤကစၢၢ်ကလိကျါဒီးကတီၢ်ခဲအံၤလိၣ်ဘၣ်၀ဲအိၣ်ဆိးလီၢ်ကျဲႇတၢ်အီၣ်တၢ်အီဒီးကသံၣ်ကသီတဖၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
လၢန့ၣ်အမဲာ်ညါဖဲလါယူၤလံ ၂၃ သီအနံၤန့ၣ် တၢ်ခး၀ဲသိလ့ၣ်လၢအတီၣ်သိလၢအိၣ်ဟဲက့ၤလီၤလၢမၠၣ်၀တံၣ်တကပၤကဲထီၣ်သး၀ံၤအလီၢ်ခံ ခီဖျိပယီၤသုးနုာ်လီၤမၤသုးတၢ်ဟူးတၢ်ဂဲၤလၢကီးတရံးကလံၤထံးကီးနွဲၢ်သ၀ီကရူၢ်တကပၤအဃိ လီၢ်က၀ီၤဖိတဖၣ်ဘၣ်ယိၣ်လၢတၢ်ဒုးကကဲထီၣ်ကဒါန့ၣ်လီၤႉ
“ခဲအံၤ(BGF)လၢအိၣ်သ၀ီပူၤတဖၣ်နါက့တအိၣ်လၢသုးကလၢၤပူၤလၢၤဘၣ်ႉအ၀ဲသ့ၣ်မ့အိၣ်န့ၣ်ကညီဖိကဒဲကဒဲအဃိကိညၢ်တစဲးဒံးမီၤနီၤႉပယီၤသုးမ့ဟဲအိၣ်န့ၣ်လ့ၤတက့ၤတမ့ၢ်လၢအိၣ်သ၀ီပူၤတသ့လၢၤဘၣ်”အဂ့ၢ်န့ၣ် ကီးနွဲၢ်လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ
ဖဲအပူၤကွံာ်လါမးရှးအခါစ့ၢ်ကီးခီဖျိပယီၤသုးလၢအနုာ်လီၤမၤဒုးယၤတၢ်ဟူးတၢ်ဂဲၤလၢကီးတရံးကလံၤထံးအံၤဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်အဃိဒူသ၀ီလီၢ်က၀ီၤဖိတဖၣ်အံၤဘၣ်ဃ့ၢ်ထီၣ်ဒံး၀ဲသ၀ီဒီတဖျၢၣ်ညါဒီးဘၣ်ဖဲအ၀ဲသ့ၣ်ဟဲက့ၤအိၣ်လၢသ၀ီပူၤန့ၢ်လၢအလါအံၤအကတီၢ်ဘၣ်ဃ့ၢ်ထီၣ်ကဒီး၀ဲဒ်အံၤန့ၣ်လီၤႉ
လါယူၤလံ ၂၅ သီႇ ၂၀၂၂ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်ဟီၣ်က၀ီၤ လၢၢ်ဒိၣ်၀့ၢ်ပူၤန့ၣ် ဖဲအပူၤကွံာ်လါယူၤလံ ၁၆ သီအနံၤန့ၣ် ပယီၤသုးဒီး၀ဲၤကျိၤဘၣ်ထွဲတဖၣ်နုာ်လီၤဃုခွံခွးတၢ်လၢခ့ၣ်အဲၣ်ယူၣ်(သုးက့ ၃) တၢ်ရ့လိာ်မုာ်လိာ်၀ဲၤဒၢးပူၤအဂ့ၢ်န့ၣ် တၢ်ရ့လိာ်မုာ်လိာ်၀ဲၤဒၢးၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ
ဖဲအပူၤကွံာ်လါယူၤလံ ၁၆ သီ ဂီၤခီ ၁၀ နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုး(ခလရ–၆၀) သုးခိၣ်စိစ့ၣ်ယၣ်လ့အူတီၤခိၣ်ရိၣ်မဲအၦၤဒီး၀ဲၤကျိၤဘၣ်ထွဲဃုာ်ဒီးက၀ီၤဒ့ၦၤဘၣ်မူဘၣ်ဒါတဂၤခဲလၢာ်ကအိၣ်(၄၂)ဂၤဃၣ်ဃၣ်နုာ်လီၤဃုခွံခွးတၢ်ဖိတၢ်လံၤလၢ၀ဲၤဒၢးပူၤအဂ့ၢ်န့ၣ်လၢၢဒိၣ်၀့ၢ်(ခ့ၣ်အဲၣ်ယူၣ်)တၢ်ရ့လိာ်မုာ်လိာ်၀ဲၤဒၢးမူဒါခိၣ်ပဒိၣ်၀ါယ့ၤတိစံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ
“မ့ၢ်အနုာ်လီၤလၢတၢ်ဂ့ၢ်မနုၤလဲၣ်န့ၣ်မတၤတဂၤမးတသ့ၣ်ညါဘၣ်ႉဖဲအ၀ဲသ့ၣ်ဟဲအခါန့ၣ်ဟဲကိးဃုာ်၀ဲဒီးက၀ီၤဒ့ၦၤဘၣ်မူဘၣ်ဒါတဂၤမီၤနီၤႉအ၀ဲသ့ၣ်ဟဲန့ၣ်ခီဖျိလၢ၀ဲၤဒၢးတြဲၤန့ၣ်တၢ်ခးတံၢ်အီၤဒီးသီးအဃိနုာ်လီၤ၀ဲဒၣ်လၢတြဲၤတၢ်လီၢ်ခံတကပၤလီၤႉမၤဟးဂီၤ၀ဲ၀ဲၤဒၢးတြဲၤဒီးနုာ်လီၤ၀ဲမီၤနီၤႉတီၢ်မၤဟးဂီၤကွံာ်(သ့ၣ်တၣ်)လၢအိၣ်၀ဲၤဒၢးပူၤအံၤဒီးဟးဃုခွံခွးတၢ်ဖိတၢ်လံၤလီၤႉလီတဲစိလၢအိၣ်၀ဲၤဒၢးပူၤတဖျၢၣ်နါက့ဟံဃုာ်၀ဲ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ
သုးဟံးန့ၢ်ထံကီၢ်တၢ်စိတၢ်ကမီၤ၀ံၤအလီၢ်ခံစးထီၣ်မ့ၢ်လၢဒုးယၤတၢ်ဖ့ၣ်ဆၢအိၣ်ထီၣ်လၢခ့ၣ်အဲၣ်ယူၣ်ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်က၀ီၤပူၤန့ၣ်တၢ်ကးတံၢ်ကွံာ်လၢၢ်ဒိၣ်တၢ်ရ့လိာ်မုာ်လိာ်၀ဲၤဒၢးအဃိ ဖဲပယီၤသုးနုာ်လီၤဃုတၢ်အဆၢကတီၢ်န့ၣ်၀ဲၤဒၢးၦၤမၤတၢ်ဖိတအိၣ်နီတဂၤဘၣ်အဂ့ၢ်န့ၣ်ပဒိၣ်၀ါယ့ၤတိစံးအါထီၣ်၀ဲန့ၣ်လီၤႉ
အ၀ဲစံး၀ဲလၢ“စးထီၣ်မ့ၢ်တၢ်ဒုးကဲထီၣ်ကဒါလၢလၢၢ်ဒိၣ်ပူၤလံၤလံၤန့ၣ်ပတဒုးအိၣ်ၦၤမၤတၢ်ဖိလၢ၀ဲၤဒၢးပူၤလၢၤဘၣ်ႉပမၢ၀ဲၤဒၢးၦၤမၤတၢ်ဖိတဖၣ်သုးအလီၢ်အကျဲလီၤႉအိၣ်ဒၣ်လၢပမၢၦၤအိၣ်ခိးကွၢ်ၦၤနုာ်လီၤဟးထီၣ်လၢ၀ဲၤဒၢးလၢတၢ်ချၢလီၤမီၤနီၤႉဟဲနုာ်လီၤလၢ၀ဲၤဒၢးတၢ်ဂ့ၢ်တၢ်ကျိၤခီန့ၣ်ပတသ့ၣ်ညါဘၣ်ႉဟဲဃုာ်ဒီး၀ဲၤကျိၤဘၣ်ထွဲတဖၣ်အဃိကဘၣ်မ့ၢ်ကဟဲသံကွၢ်တၢ်တမံၤမံၤလီၤမီၤနီၤ”အဂ့ၢ်န့ၣ်စံး၀ဲန့ၣ်လီၤႉ
လၢန့ၣ်အမဲာ်ညါလၢၢ်ဒိၣ်ကီၢ်ဆၣ်အပူၤဒုးယၤတၢ်ဖ့ၣ်ဆၢကဲထီၣ်ဒံး၀ဲလၢခ့ၣ်အဲၣ်ယူၣ်ဒီးပယီၤသုးတဖၣ်အဘၢၣ်စၢၤဒီးခီဖျိပယီၤသုးခးလီၤကျိဖးဒိၣ်ဆူလၢၢ်ဒိၣ်၀့ၢ်ဒူသ၀ီတဖၣ်အပူၤအဃိလီၢ်က၀ီၤကမျၢၢ်တဖၣ်အါအါဂီၢ်ဂီၢ်ဘၣ်ဃ့ၢ်ထီၣ်လဲၤစံၣ်အိၣ်၀ဲလၢတၢ်လီၢ်အဂၤအိၣ်၀ဲအသိးတနီၤန့ၣ်လဲၤစံၣ်အိၣ်တုၤလၢကီၢ်ဆၢတၢ်လီၢ်ညါအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤခ့ၣ်အဲၣ်ယူၣ်ၦၤဘၣ်မူဘၣ်ဒါအအိၣ်န့ၣ်လီၤႉ
စးထီၣ်ဖဲ(၂၀၁၂)နံၣ်န့ၣ်လၢကီၢ်ပူၤတၢ်မုာ်တၢ်ခုၣ်တၢ်မၤရဲၣ်ကျဲၤတဖၣ်အဂီၢ်ဒ်သိးကီၢ်ပယီၤပဒိၣ်ဒီးခ့ၣ်အဲၣ်ယူၣ်အဘၢၣ်စၢၤဆဲးကျိးဖံးမၤတၢ်ကသ့အဂီၢ်န့ၣ်တၢ်အိးထီၣ်၀ဲခ့ၣ်အဲၣ်ယူၣ်တၢ်ရ့လိာ်မုာ်လိာ်၀ဲၤဒၢးလၢအအိၣ်ဒီးခံခီခံကပၤတၢ်သးလီၤပလိာ်အံၤဒီး လၢၢ်ဒိၣ်၀့ၢ်ခ့ၣ်အဲၣ်ယူၣ်တၢ်ရ့လိာ်မုာ်လိာ်၀ဲၤဒၢးအံၤဘၣ်တၢ်အိးထီၣ်အီၤဖဲ(၂၀၁၂)လါအ့ဖြ့ၣ်(၉)သီဒီး မ့ၢ်စ့ၢ်ကီးခ့ၣ်အဲၣ်ယူၣ်တၢ်ရ့လိာ်မုာ်လိာ်၀ဲၤဒၢးတဖျၢၣ်လၢတၢ်အိးထီၣ်၀ဲအဆိကတၢၢ်တဖျၢၣ်လၢအဖိးသဲစးန့ၣ်လီၤႉ
ဖဲ(၂၀၂၁)လါဖ့ၤဘြူၤအါရံၤ ၁ သီ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံတယံၤတမီၢ်ဘၣ်န့ၣ် တၢ်ဒုးစးထီၣ်ကဲထီၣ်၀ဲလၢခ့ၣ်အဲၣ်ယူၣ်စုတီၤအဖီလာ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးတဖၣ်အဘၢၣ်စၢၤ၀ံၤအလီၢ်ခံ တၢ်ကးတံၢ်ကွံာ်၀ဲခ့ၣ်အဲၣ်ယူၣ်တၢ်ရ့လိာ်မုာ်လိာ်၀ဲၤဒၢးလၢမ့ၢ်တလၢၤကီၢ်စဲၣ် သထူၣ်ကီၢ်ဆၣ် နီၤဘိၤတၢ်ရ့လိာ်မုာ်လိာ်၀ဲၤဒၢးဒီး ပကိကီၢ်ခီ လၢၢ်ဒိၣ်၀့ၢ်တၢ်ရ့လိာ်မုာ်လိာ်၀ဲၤဒၢး သ့ၣ်တဖၣ်အံၤအဂ့ၢ်န့ၣ် သ့ၣ်ညါဘၣ်လၢခ့ၣ်အဲၣ်ယူၣ်ကရူၢ်ကရၢအအိၣ်န့ၣ်လီၤႉ
လါယူၤလံ ၂၂ သီႇ ၂၀၂၂ နံၣ်ႇ ခ့ၣ်အဲးစံၣ်
သုးခိၣ်ကျၢၢ်ဖိစီၤနၢၤဒါမၠးလၢအဒုးအိၣ်ထီၣ်ကီၢ်သူလ့ၤသုးမုၢ်ဒိၣ်(Kaw Thoo Lei Army) လၢအသီအံၤတၢ်ထုးထီၣ်ကွံာ်အီၤလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢအပူၤလံအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပာ်ဖျါဘိးဘၣ်ရၤလီၤ၀ဲဖဲလါယူၤလံ ၂၀ သီအနံၤန့ၣ်လီၤႉ
ဘၣ်ဃးတၢ်ဒုးအိၣ်ထီၣ်ကညီဖီၣ်စုက၀ဲၤကရူၢ်လၢအသီတၢ်ဂ့ၢ်အံၤ ဖဲအပူၤကွံာ်လါယူၤလံ ၂၀ သီအနံၤန့ၣ် ခ့ၣ်အဲၣ်ယူၣ်လီၢ်ခၢၣ်သးပၢဆှၢရဲၣ်ကျဲၤကမံးတံာ်မၤ၀ဲဂ့ၢ်ဂီၢ်အူတၢ်အိၣ်ဖှိၣ်တခါဒီးတၢ်ဆၢတဲာ်အိၣ်၀ဲလၢတၢ်ထုးထီၣ်ကွံာ်စီၤနၢၤဒါမၠးလၢ(ခ့ၣ်အဲၣ်ယူၣ်)အပူၤဒီးကယဲၢ်မ့ၢ်အတၢ်ဖံးတၢ်မၤတမံၤလၢ်လၢ်န့ၣ်တဘၣ်ထွဲဘၣ်ဃးဒီး(ခ့ၣ်အဲၣ်ယူၣ်)ဘၣ်အဂ့ၢ်န့ၣ် ခ့ၣ်အဲၣ်ယူၣ်အလံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါဘၣ်ထွဲဒီးတၢ်ဒုးအိၣ်ထီၣ်ကီၢ်သူလ့ၤသုးမုၢ်ဒိၣ်အံၤန့ၣ်တမ့ၢ်တၢ်ဘိးဘၣ်ရၤလီၤလၢဘၣ်ထွဲဘၣ်ဃးဒီး(KNU)ႇ(KNLA)ဘၣ်အဂ့ၢ်န့ၣ်ပအဲၣ်ဒိးဒုးသ့ၣ်ညါထံဂုၤကီၢ်ဂၤပဒိၣ်ဒီးကီၢ်ပဒိၣ်အတၢ်ကရၢကရိတဖၣ်ႇထံဖိကီၢ်ဖိကမျၢၢ်လၢအိၣ်ထံလီၢ်ကီၢ်ပူၤဒီးထံချၢကီၢ်ချၢလၢထီဒါသုးမီၤစိရိၤတဖၣ်ဒီးတၢ်ပၢဆၢကရူၢ်ကရၢခဲလၢာ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
စီၤနၢၤဒါမၠးလၢအဘၣ်တၢ်ထုးထီၣ်ကွံာ်အီၤလၢ(ခ့ၣ်အဲၣ်ယူၣ်)တၢ်ကရၢကရိအပူၤအံၤ အပူၤကွံာ်န့ၣ်တၢ်ဟ့ၣ်လီၤတ့ၢ်၀ဲမူဒါဒ်အမ့ၢ်(KNDO)သုးခိၣ်ကျၢၢ်တဂၤအသိးဒီးစးထီၣ်လၢအ၀ဲဟံးထီၣ်ဖီၣ်ထီၣ်တ့ၢ်၀ဲမူဒါန့ၣ်လုုၢ်သ့ၣ်ခါပတာ်၀ဲတၢ်သိၣ်တၢ်သီတၢ်ဘျၢႇမူဒါတၢ်မၤလၢတၢ်ဟ့ၣ်လီၤတ့ၢ်အီၤတဖၣ်ဒီးဘၣ်တၢ်ကျဲးစၢးဒီလိၤဒီဘၣ်က့ၤအီၤအဘျီတဖၣ်အဘျီအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ဒ်န့ၣ်အသိးဖဲအပူၤကွံာ်(၂၀၀၇)တၢ်ကဲထီၣ်သးလၢသုးက့(၇)သုးက့ခိၣ်သုးခိၣ်ကျၢၢ်ဖိထ့ၣ်မီၣ်ထုးဖးအသးဒီး(ခ့ၣ်အဲၣ်ယူၣ်)ဒီးတၢ်လဲၤထံၣ်လိာ်သးဒီး(နအဖ)အခါစ့ၢ်ကီးစီၤနၢၤဒါမၠးအံၤနုာ်လီၤပၣ်ဃုာ်ပၣ်ဂီၢ်၀ဲလၢတၢ်သူၣ်ဆူၣ်သးဂဲၤအပူၤဒီးပၣ်ဃုာ်မၤသကိးတၢ်ဒ်နဲၣ်ရွဲၣ်(၁)တဂၤအသိးန့ၣ်လီၤႉဘၣ်ထွဲအတၢ်နုာ်လီၤပၣ်ဃုာ်အံၤစ့ၢ်ကီးစီၤနၢၤဒါမၠးတထုးထီၣ်ဘိးဘၣ်ရၤလီၤတၢ်နီတမံၤလၢတဘၣ်ထွဲဘၣ်ဃးဒီးကရၢအံၤဘၣ်အသိးလုၢ်သ့ၣ်ခါပတာ်တ့ၢ်၀ဲတၢ်ဒီတဒၢ၀ဲၤကျိၤဒီး(KNLA)အတၢ်သိၣ်တၢ်သီတၢ်ဘျၢတကးဒံးဘၣ်ဒုးအိၣ်ထီၣ်တ့ၢ်၀ဲ(KNDO)တၢ်ကရၢကရိတဖၣ်လၢထံချၢကီၢ်ချၢဒီးဟ့ၣ်လီၤ၀ဲအမူအဒါဒီးထၢန့ၢ်ကျိၣ်စ့လၢတဖိးသဲစးတဖၣ်အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါဘၣ်ဃးဖဲအပူၤကွံာ်တၢ်မၤသံမၤ၀ီကဲထီၣ်သးလၢခ့ၣ်အဲၣ်ယူၣ်ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤ ကီးတရံးကီၢ်ဆၣ် ဖလူ–ဂီၤလ့ၤတၢ်လီၢ်အံၤန့ၣ် ခ့ၣ်အဲၣ်ယူၣ်မၤ၀ဲတၢ်ဃိထံသမံသမိးအတတီၢ် တၢ်ကိးထံၣ်၀ဲစီၤနၢၤဒါမၠးအဘျီတဖၣ်အဘျီဘၣ်ဆၣ်ဒ်ခိၣ်နၢ်တဂၤအသိးတၢ်ဟံးမူဒါႇတၢ်တူၢ်မူဒါတအိၣ်၀ဲဘၣ်အဂ့ၢ် ခ့ၣ်အဲၣ်ယူၣ်စံး၀ဲန့ၣ်လီၤႉ
လၢတၢ်ဂ့ၢ်၀ဲအံၤအဖီခိၣ်ဖဲတၢ်တနံၣ်န့ၣ်လါယူၤလံ(၅)သီအနံၤန့ၣ်(ခ့ၣ်အဲၣ်ယူၣ်)လီၢ်ခၢၣ်သးပၢဆှၢတၢ်ကမံးတံာ်ကိး၀ဲဂ့ၢ်ဂီၢ်အူတၢ်အိၣ်ဖှိၣ်ဒီးဖဲန့ၣ်(ခ့ၣ်အဲၣ်ယူၣ်)တၢ်ဒီတဒၢ၀ဲၤကျိၤခိၣ်ပဒိၣ်စီၤရီကၠၢၣ်ခ့ၣ်ဆဲးလီၤမံၤဆိကတီၢ်ကွံာ်စီၤနၢၤဒါမၠးလၢအမူဒါပူၤတစိၢ်တလီၢ်ဒံးန့ၣ်လီၤႉ
ဘၣ်ဃးတၢ်ဆိကတီၢ်ကွံာ်အီၤလၢမူဒါပူၤတၢ်ဂ့ၢ်အံၤဖဲလါယူၤလံ ၁၁ သီအနံၤန့ၣ် သုးခိၣ်ကျၢၢ်ဖိစီၤနၢၤဒါမၠးထုးထီၣ်ပာ်ဖျါကဒါ၀ဲလၢတတူၢ်လိာ်၀ဲတၢ်ဆိကတီၢ်ကွံာ်အီၤလၢမူဒါပူၤအံၤဘၣ်ဒီးတၢ်ဃိထံသမိး၀ံၤအလီၢ်ခံဖဲလါယနူၤအါရံၤအတီၢ်ပူၤလီၢ်ခံကတၢၢ်(ခ့ၣ်အဲၣ်ယူၣ်)ထုးထီၣ်ပာ်ဖျါ၀ဲလၢဆိကတီၢ်ကွံာ်စီၤနၢၤဒါမၠးလၢမူဒါလီၢ်လးပူၤခံခါလၢာ်လံဒီးလၢအလီၢ်န့ၣ်တၢ်ဟ့ၣ်လီၤက့ၤမူဒါဆူသုးခိၣ်ဒိၣ်စိစီၤဆှံလ့ၣ်အစုပူၤန့ၣ်လီၤ
ႉ
ဘၣ်ဆၣ်ဖဲအပူၤကွံာ်လါယူၤလံ ၁၉ သီအနံၤန့ၣ် သုးခိၣ်ကျၢၢ်ဖိစီၤနၢၤဒါမၠးစံးဘၣ်ခ့ၣ်အဲးစံၣ်လၢ တၢ်ဒုးအိၣ်ထီၣ်ကီၢ်သူလ့ၤသုးမုၢ်ဒိၣ်အံၤလၢကဒုးလီၤၦီၢ်ကွံာ်သုးမီၤစိရိၤသနူအဂီၢ်ဒီးတကဲထီၣ်တၢ်လီၤမုၢ်လီၤဖးလၢတၢ်ကရၢကရိအပူၤဘၣ်ဒီးတမ့ၢ်ထီဒါက့ၤတၢ်ကရၢကရိဘၣ်န့ၣ်လီၤႉ
ဘၣ်ဃးဒီးတၢ်ဒုးအိၣ်ထီၣ်(Kaw Thoo Lei...
လါယူၤလံ ၂၁ သီႇ ၂၀၂၂ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် ကမၤမိၢ်–ကတၢၢ်တံာ်ကျဲဒီတကျိၤန့ၣ် စးထီၣ်ဖဲမဟါလါယူၤလံ ၂၀ သီအနံၤန့ၣ် ခီဖျိသုးခိးကီၢ်ဆၢ(BGF)ကကးတံၢ်ဃာ်၀ဲခိကျဲဒီးထံကျဲအဃိဘၣ်ယိၣ်လၢတၢ်စိာ်ထီၣ်ဆှၢလီၤပနံာ်တၢ်ဖိတၢ်လံၤကနီၢ်ထီၣ်အဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ
ဒ်သုးခိးကီၢ်ဆၢ(BGF –၁၀၁၄)အသုးခိၣ်ဒိၣ်ဖိမီၤခၠ့ၣ်ဆဲးလီၤမံၤထုးထီၣ်ပာ်ဖျါ၀ဲလံာ်အသိးန့ၣ် စးထီၣ်ဖဲမဟါလါယူၤလံ ၂၀ သီန့ၣ် ကကးတံၢ်ကွံာ်ကမၤမိၢ်–ကတၢၢ်တံာ် ခိကျဲဒီးထံကျဲလၢကမျၢၢ်လ့ၢ်ထီၣ်လ့ၢ်လိၤ၀ဲအ့ၤဒီးမ့တမ့ၢ်လၢတၢ်ဘူၣ်တၢ်ဘါႇတၢ်အိၣ်ဆူၣ်အိၣ်ချ့ဘၣ်န့ၣ်လ့ၤတက့ၤတၢ်တပျဲလဲၤ၀ဲလၢာ်ဘၣ်အဂ့ၢ်န့ၣ် ထုးထီၣ်ပာ်ဖျါ၀ဲန့ၣ်လီၤႉ
ကတၢၢ်တံာ်လီၢ်က၀ီၤဖိတဂၤစံး၀ဲ“တၢ်ကးတံၢ်ချံသန့ဒ်အံၤအဃိတၢ်ကီတၢ်ခဲအိၣ်ဒီဒူၣ်ညါႉပနံာ်တၢ်ဖိတၢ်လံၤလၢတၢ်ကစိာ်ထီၣ်ဆှၢနုာ်လီၤ၀ဲတဖၣ်နီၢ်ထီၣ်၀ဲလီၤႉသွဲၣ်လးဒီးတန့သၣ်လၢတၢ်ကဘၣ်ဆှၢ၀ဲတဖၣ်န့ၣ်ဘၣ်ဆှၢဒီးချံအဃိပနံာ်တၢ်ဖိတၢ်လံၤလၢတၢ်ဆှၢလီၤအီၤတဖၣ်လီၤစှၤႉလၢသ၀ီပူၤနါက့တၢ်အီၣ်တၢ်အီတၢ်ဖိတၢ်လံၤလီၤတူာ်ထီၣ်လံ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ
ကမၤမိၢ်လီၢ်က၀ီၤအံၤမ့ၢ်တၢ်လီၢ်တခါလၢသွဲၣ်လးႇတန့သၣ်ႇတူၢ်ရ့ၣ်သၣ်ဟးထီၣ်အါအလီၢ်ဒီး ခီဖျိတၢ်ကကးတံၢ်ဃာ်ထံကျဲတကးဒံးဘၣ်ကကးတံၢ်ဃုာ်ဒီးကျဲလၢအဂၤတဖၣ်အံၤအဖီခိၣ် ဘၣ်ယိၣ်လၢတၢ်ကီတၢ်ခဲကဟဲအိၣ်ထီၣ်၀ဲလၢၦၤသူၣ်အီၣ်ဖျးအီၣ်တၢ်ဖိလၢကလဲၤစိာ်ဆါတၢ်သူတၢ်သၣ်ႇတၢ်ဖိတၢ်လံၤလၢလၢ၀့ၢ်ပူၤအံၤအဂီၢ်ဒီးပနံာ်တၢ်ဖိတၢ်လံၤကလီၤတူာ်လၢဟီၣ်က၀ီၤအပူၤန့ၣ်လီၤႉ
လၢန့ၣ်အမဲာ်ညါ(BGF)ကကးတံၢ်ဃာ်ချံသန့ဒ်အံၤန့ၣ်အ၀ဲသ့ၣ်တၢ်ရဲၣ်တၢ်ကျဲၤအိၣ်လၢကဆှၢန့ၢ်ပယီၤသုးတၢ်အီၣ်တၢ်အီလၢကျဲအဘိဘိလီၤအဂ့ၢ်န့ၣ်ကတၢၢ်တံာ်လီၢ်က၀ီၤဖိတဂၤစံးအါထီၣ်၀ဲဒ်အံၤန့ၣ်လီၤႉ
“ဖဲမဟါန့ၣ်ချံဟဲက့ၤထီၣ်အိၣ်မီၤနီၤႉနၢ်ဟူလၢချံသန့လၢအဂၤနါက့တၢ်ကကးတံၢ်၀ဲစ့ၢ်မီၤနီၤႉတၢ်ကးတံၢ်ပနံာ်တီၣ်တၢ်ဖိတၢ်လံၤကျဲအိၣ်တလါဘျဲၣ်လံႉကက့ၤအိးထီၣ်အဂီၢ်န့ၣ်ကမျၢၢ်ဃ့ထီၣ်ဃာ်၀ဲအိၣ်ႉကဘၣ်မ့ၢ်၀ဲကကးတံၢ်ဃာ်၀ဲထံကျဲဒီးကစိာ်တၢ််အီၣ်တၢ်အီလၢခိကျဲတကပၤလီၤႉဆၢကတီၢ်ဖဲန့ၣ်ကမ့ၢ်၀ဲ(BGF)ကစိာ်တၢ်အီၣ်တၢ်အီဒ်န့ၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ
ဒ်န့ၣ်အသိးတၢ်သိၣ်တၢ်သီလၢအ၀ဲသ့ၣ်ထုးထီၣ်၀ဲသ့ၣ်တဖၣ်အံၤတၢ်မ့တလူၤပိာ်မၤထွဲႇမ့လုၢ်သ့ၣ်ခါပတာ်၀ဲန့ၣ်တၢ်ကဟံးန့ၢ်အရ့တုၤလီၤတီၤလီၤဒီးဒ်သိးကမျၢၢ်ထံဖိကီၢ်ဖိကသ့ၣ်ညါဆိပာ်၀ဲအဂီၢ်ဘၣ်ထုးထီၣ်ပာ်ဖျါ၀ဲလီၤအဂ့ၢ်န့ၣ်လံာ်တၢ်ဒုးသ့ၣ်ညါအပူၤပာ်ဖျါ၀ဲန့ၣ်လီၤႉ
ဒူသ၀ီလၢအိၣ်ဖၣ်ပူၣ်–ကမၤမိၢ်ကျဲဒီတဘိအကပိၤကပၤတဖၣ်အံၤန့ၣ် တၢ်ခးလိာ်သးကဲထီၣ်၀ဲလၢပယီၤသုးႇ(BGF)သုးပာ်ဖှိၣ်ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တဖၣ်အဘၢၣ်စၢၤခဲအံၤခဲအံၤန့ၣ်လီၤႉခီဖျိ(KNLA)ကးတံၢ်ဃာ်ပယီၤသုးတၢ်အီၣ်တၢ်အီကျဲအဃိပယီၤသုးလၢအိၣ်တၢ်မဲာ်ညါတဖၣ်အတၢ်အီၣ်တၢ်အီတအိၣ်လၢၤဘၣ်ဒီးဃ့၀ဲတၢ်မၤစၢၤလၢ(BGF)အိၣ်လၢကဆှၢထီၣ်န့ၢ်အ၀ဲသ့ၣ်ကျိချံၦာ်သၣ်လၢတၢ်မဲာ်ညါလၢကျဲအဘိဘိအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
လါယူၤလံ ၂၁ သီႇ ၂၀၂၂ နံၣ်ႇ ခ့ၣ်အဲးစံၣ်
ဖဲမဟါလါယူၤလံ ၂၀ သီအနံၤန့ၣ် ခီဖျိပယီၤသုးလၢအိၣ်ကီးတရံး၀့ၢ်အံၤခးလီၤကျိးဖဒိၣ်အဃိ ကီးနွဲၢ်သ၀ီဖိဘၣ်ဒိ၀ဲ(၂)ဂၤအဂ့ၢ်န့ၣ် သ့ၣ်ညါလၢလီၢ်က၀ီၤဖိအအိၣ်န့ၣ်လီၤႉ
ဖဲမဟါလါယူၤလံ ၂၀ သီ ဟါခီအဆၢကတီၢ် ခီဖျိပယီၤသုး(ခလရ–၉၇)လၢအိၣ်ကီးတရံး၀့ၢ်အံၤ ခးလီၤကျိဖးဒိၣ်လီၤတဲာ်ပိၢ်ဖးထီၣ်၀ဲလၢကီးနွဲၢ်သ၀ီပူၤ(၂)ဖျၢၣ်အဃိ သ၀ီဖိပိာ်ခွါတဂၤဒီးပိာ်မုၣ်တဂၤဘၣ်ဒိ၀ဲတဆံးတက့ၢ်အဂ့ၢ်န့ၣ် ၦၤလၢဘူးဒီးအ၀ဲသ့ၣ်တဖၣ်စံး၀ဲန့ၣ်လီၤႉ
လီၢ်က၀ီၤဖိတဂၤစံး၀ဲ“ဖဲ ၈း၄၅ မံးနံးန့ၣ်ခးလီၤ၀ဲသၢဖျၢၣ်ႉမ့၀ံၤဖဲဂီၤခီ ၉ နၣ်ရံၣ်တခီန့ၣ်တဖျၢၣ်ဒီးဖဲအနၣ်ရံၣ် ၁၀ န့ၣ်တဖျၢၣ်မီၤနီၤႉၦၤဘၣ်တဖၣ်န့ၣ်ဘၣ်၀ဲဒၣ်လၢအစုႉဘၣ်ၦၤဟံၣ်အိၣ်တနီၤႉဘၣ်ဃုာ်ဒီးကျီၢ်တဒု”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ
ပယီၤသုးခးလီၤကျိဖးဒိၣ်ဘျီ၀ဲအံၤလီၤတဲာ်၀ဲဒၣ်လၢကီးနွဲၢ်သ၀ီပူၤတကးဒံးဘၣ်အမဲာ်ညါ လီၤတဲာ်စ့ၢ်ကီးလၢသ၀ီလၢအဂၤသ၀ီချၢတၢ်ပျီပူၤအိၣ်စ့ၢ်ကီး၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ
စးထီၣ်ဖဲလါယူၤလံ ၁၃ သီအနံၤန့ၣ် ပယီၤသုးခးလီၤကျိဖးဒိၣ်ဆူကီးတရံး၀့ၢ်ချၢသ၀ီတဖၣ်အပူၤ ကိးမုၢ်နံၤဒဲးလၢတၢ်ဂ့ၢ်တအိၣ်နီတမံၤဘၣ်ဒီးတုၤလၢခဲအံၤလီၢ်က၀ီၤသ၀ီဖိတဖၣ်ဘၣ်ဟးစံၣ်အိၣ်လၢတၢ်လီၢ်အဂၤဒီးဘၣ်အိၣ်၀ဲလၢတၢ်ပလီၢ်ပဒီအပူၤန့ၣ်လီၤႉ