ခ့ၣ်အဲးစံၣ် – KIC News

လါအီကူး ၄ သီႇ ၂၀၂၂ နံၣ်ႇ ခ့ၣ်အဲးစံၣ် ကညီဒီကလုာ်စၢဖှိၣ်ကရၢ(KNU)ဒီးတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)အဘၢၣ်စၢၤ တၢ်သးလီၤပလိာ်အိၣ်ထီၣ်လၢကက့ၤပာ်ဖှိၣ်ထီၣ်သးအံၤတၢ်သးလီၤပလိာ်အိၣ်ထီၣ်၀ဲဖဲမဟါလါအီကူး ၃ သီ တၢ်မၤခံခီခံကပၤဒုးယၤခိၣ်နၢ်ဘၣ်ထွဲတၢ်ထံၣ်လိာ်အိၣ်သကိးပူၤအဂ့ၢ်န့ၣ် ခံခီခံကပၤခိၣ်နၢ်တဖၣ်ပာ်ဂၢၢ်ပာ်ကျၢၤစံး၀ဲန့ၣ်လီၤႉ ဖဲမဟါလါအီကူး ၃ သီအနံၤန့ၣ် ခ့ၣ်အဲၣ်ယူၣ်ဖီၣ်စုက၀ဲၤကရူၢ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) အသုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤကၠီၤနံၤဃုာ်ဒီး(KNLA)ခိၣ်နၢ်တနီၤဒီး(DKBA)အသုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤစတံတီခိၣ်ရိၣ်မဲ(DKBA)ခိၣ်နၢ်တဖၣ်မၤ၀ဲတၢ်ထံၣ်လိာ်အိၣ်သကိးတခါဒီး တၢ်ကစီၣ်ဟးထီၣ်လၢကက့ၤပာ်ဖှိၣ်ထီၣ်သးဃုာ်ဒီးတၢ်သးလီၤပလိာ်(၅)ထံၣ်ဟဲအိၣ်ဖျါထီၣ်၀ဲန့ၣ်လီၤႉ (DKBA)လီၢ်ခၢၣ်သးသုး၀ဲၤလီၢ်ခိၣ်သ့ၣ်ပၢဆှၢသုးမူဒါခိၣ် သုးခိၣ်ကျၢၢ်ဖိ စီၤစွ့ၤ၀ၣ်စံး၀ဲလၢ “တၢ်ကိးထံၣ်လိာ်သးဒီးၦၤန့ၣ်တၢတပတီၢ်န့ၣ်ဖုသုးခိၣ်ကျၢၢ်စီၤကၠီၤနံၤဒီးသုးခိၣ်ကျၢၢ်စီၤစတံလၢပအိၣ်တကပၤအံၤန့ၣ်အ၀ဲဆဲးလီၤ၀ဲႉသနါက့န့ၣ်တၢ်ပနီၣ်(စံ)တအိၣ်ဘၣ်ႉတၢ်ပနီၣ်(စံ)တအိၣ်ဘၣ်ဆၣ်သနါက့န့ၣ် အိၣ်၀ဲဒၣ်ဒီးတၢ်ပနီၣ်တခါလံ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ဖဲမဟါတၢ်အိၣ်ဖှိၣ်၀ံၤဒ်တၢ်သးလီၤပလိာ်လၢအဟဲအိၣ်ဖျါထီၣ်၀ဲအသိး လၢကက့ၤပာ်ဖှိၣ်ထီၣ်သးအဂီၢ် ကထီထီၣ်န့ၢ်၀ဲခံခီခံကပၤတၢ်ဖီလာ်သုးဖိသံၣ်ဖိတဖၣ်အတၢ်ပနီၣ်တခါတကးဒံးဘၣ်အမဲာ်ညါဘၣ်ဃးတၢ်ဒုးအိၣ်ထီၣ်ကီၢ်သူလ့ၤသုးမုၢ်ဒိၣ်ဖဲအပူၤကွံာ်တလါအံၤတၢ်ဂ့ၢ်န့ၣ်ခံခီခံကပၤခိၣ်နၢ်ကထိၣ်ဃူဘှါရှဲ၀ဲဒီးခံခီခံကပၤကထံၣ်လိာ်သးတလါတဘျီအဂ့ၢ်န့ၣ်ပာ်ဃုာ်၀ဲဒၣ်န့ၣ်လီၤႉ “တၢ်ပနီၣ်တခါန့ၣ်ခီဒုန့ၣ်ဒ်သိးတၢ်ဖီလာ်သုးဖိဒၣ်လဲာ်သုတတဲဆါလိာ်သးတဂ့ၤန့ၣ်ၦၤသးၦၢ်တဖၣ်ဟ့ၣ်လီၤ၀ဲမူဒါလီၤႉအကဘၣ်မၤ၀ဲတၢ်ပနီၣ်တခါႉတၢ်ပနီၣ်တခါအံၤဒ်သိးအီႉႉနၤနါက့တဒူၣ်ဃီလီၤမၢၤႉနၤခိၣ်ဖၢၣ်ဘီနၤကီၢ်သူလ့ၤအတအိၣ်လၢၤဘၣ်မီၤနီၤႉ”အဂ့ၢ်န့ၣ်သုးခိၣ်ကျၢၢ်ဖိစီၤစွ့ၤ၀ၣ်စံးအါထီၣ်၀ဲန့ၣ်လီၤႉ လၢန့ၣ်အမဲာ်ညါတၢ်ဆၢတဲာ်တၢ်သးလီၤပလိာ်အိၣ်လၢခ့ၣ်အဲၣ်ယူၣ်လီၢ်ခၢၣ်သးကထူးသံကွံာ်လံာ်လၢအထုးထီၣ်တ့ၢ်ဃာ်၀ဲလၢ(DKBA)အဖီခိၣ်(၁/၉၄)လံာ်အံၤဒီးတကီၢ်ခါခဲအံၤဒ်သိးဒုၣ်ဒါအတၢ်ထီၣ်ဒုးကကတၢၢ်ကွံာ်အဂီၢ်(DKBA)သုးရိၣ်မဲခိၣ်ကျၢၢ်တၢ်ဆၢတဲာ်အိၣ်လၢကလဲၤထံၣ်လိာ်သးဒီးသုးကီၣ်ကးဒီးတၢ်ထိၣ်ဃူမ့တလိၣ်ထီၣ်ဖးထီၣ်ဘၣ်သုးမ့ဟဲအါထီၣ်အါအါဂီၢ်ဂီၢ်န့ၣ်ကပာ်ဖှိၣ်မၤသကိးတၢ်ဃုာ်ဒီးတၢ်သးလီၤပလိာ်(၅)ထံၣ်အံၤဘၣ်သူၣ်ဘၣ်သးသးလီၤပလိာ်၀ဲအဂ့ၢ်န့ၣ်တၢ်အိၣ်ဖှိၣ်တၢ်မၤနီၣ်မၤဃါလၢအရၤလီၤလၢအီၤလါပူၤအံၤပာ်ဖျါ၀ဲန့ၣ်လီၤႉ ဘၣ်ဆၣ်တၢ်သးလီၤပလိာ်(၅)ထံၣ်အကျါလီၢ်ခံကတၢၢ်တခါလၢအမ့ၢ်ဒ်သိးဒုၣ်ဒါတၢ်ထီၣ်ဒုးကကတၢၢ်ကွံာ်အဂီၢ်(DKBA)သုးရိၣ်မဲခိၣ်ကျၢၢ်တၢ်ဆၢတဲာ်အိၣ်လၢကထံၣ်လိာ်တၢၣ်ပီၣ်တဲသကိးတၢ်ဒီးသုးမီၤစိရိၤဒီးတၢ်ထိၣ်ဃူမ့တလိၣ်ထီၣ်ဖးထီၣ်ဘၣ်ပယီၤသုးမ့ဟဲထီၣ်မၤဒုးယၤတၢ်ဟူးတၢ်ဂဲၤအါအါဂီၢ်ဂီၢ်န့ၣ်ကပာ်ဖှိၣ်မၤသကိးတၢ်အံၤလ့ၤတက့ၤတလီၤပလိာ်အသးဒီး(DKBA)အတၢ်ပာ်သးဘၣ်အဂ့ၢ်န့ၣ်(DKBA)သုးရိၣ်မဲခိၣ်ကျၢၢ်သုးခိၣ်ကျၢၢ်ဒိၣ်စိစီၤစတံက့ၤထုးထီၣ်ဘိးဘၣ်ရၤလီၤ၀ဲဖဲတနံၤအံၤန့ၣ်လီၤႉ တၢ်ဃးတၢ်ဂ့ၢ်အံၤမ့မ့ၢ်ခ့ၣ်အဲၣ်ယူၣ်လီၢ်ခၢၣ်သးဒီးၦၤဘၣ်မူဘၣ်ဒါဘၣ်ထွဲသုးဂ့ၢ်၀ီတဖၣ် တအဲၣ်ဒိးဟ့ၣ်ထီၣ်တၢ်အပဲာ်ထံနီၤဖးနီတမံၤဒံးဘၣ်အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဘၣ်ဆၣ်တၢ်က့ၤပာ်ဖှိၣ်မၤသကိးတၢ်အံၤကြၢးကဲထီၣ်သးဖးယံၤလံဒီးတၢ်ထံၣ်လိာ်တၢၣ်ပီၣ်တဲသကိးလၢတၢ်မၤ၀ဲခဲအံၤစ့ၢ်ကီးအလီၢ်အိၣ်လၢတၢ်ကဘၣ်ဆၢတဲာ်လီၤ၀ဲလီၤတံၢ်လီၤဆဲးအဂ့ၢ်န့ၣ်ကညီပိာ်မုၣ်ကရၢ(KWO)နဲၣ်ရွဲၣ်ခိၣ်ကျၢၢ် နီၢ်ကညီဖီဟ့ၣ်ထီၣ်အတၢ်ထံၣ်ဒ်အံၤန့ၣ်လီၤႉ “အကြၢးကဲထီၣ်သးဖးယံၤလံဧဲၢ်ႉမဟါကၢၤ(Statement)တဘ့ၣ်နါက့ဂ့ၤဒုဂ့ၤနါက့နမ့ဒွးလၢကျၢၤသူၣ်ကျၢၤသးဒုကျၢၤသူၣ်ကျၢၤသး၀ဲလဲၣ်နီၤႉဘၣ်မနုၤအဃိလဲၣ်န့ၣ်အကြၢးကဲထီၣ်သးဖးယံၤလံမီၤႉၦၤကညီတကြၢးအိၣ်ဒ်အံၤဘၣ်ဒီးၦၤထံၣ်လိာ်သးအိၣ်ထဲခိၣ်နၢ်လီၤဒၢးမၤတၢ်ဆၢတဲာ်သ့ခဲလၢာ်ဒုကြၢးလၢတၢ်ဆၢတဲာ်တဖၣ်န့ၣ်လီၤလၢာ်ဆီလံမီၤနီၤႉပကွၢ်တကျၢၤသူၣ်ကျၢၤသးဘၣ်စံးတၢ်ခီန့ၣ်ပထံၣ်လိာ်သးလံန့ၣ်ကက့ၤထိၣ်ဃူတဲသကိး၀ဲဒံးႉအဖီခိၣ်မးတအိၣ်နီတဂၤလၢၤဒၢးထံၣ်လိာ်သးထဲခိၣ်နၢ်လဲလဲလီၤႉအဃိန့ၣ်ယဲယထံၣ်လၢမၤန့ၢ်၀ဲလံမီၤနီၤ”အဂ့ၢ်န့ၣ်အ၀ဲစံးဘၣ်ခ့ၣ်အဲးစံၣ်န့ၣ်လီၤႉ ဖဲ(၁၉၉၄)နံၣ်အခါဘူးဒးတၢ်ဘါတၢ်ဂုၤထီၣ်ပသီထီၣ်ကညီသုးမုၢ်ဒိၣ်(DKBA)အံၤထုးဖးကွံာ်အသးလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢအပူၤဒီး လဲၤပာ်ဖှိၣ်မၤသကိးတၢ်ဒီး(နအဖ)သုးမီၤစိရိၤန့ၣ်လီၤႉ ဖဲ(၂၀၀၉)နံၣ်န့ၣ်(နအဖ)သုးမီၤစိရိၤပျိာ်လဲက့ၤအ၀ဲသ့ၣ်ဆူသုးခိးကီၢ်ဆၢ(BGF)တနီၤဒီး တနီၤန့ၣ်အိၣ်ဆၢထၢၣ်က့ၤ၀ဲဒ်တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)အသိးအံၤန့ၣ်လီၤႉ

လါအီကူး ၄ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကြုၢ်တုကီၢ်ဆၣ်အပူၤ ပယီၤသုးလၢအနုာ်လီၤအိၣ်ဖဲတီၤကၠၤအ့သ၀ီတီၤထီကၠိကရၢၢ်အပူၤတဖၣ်အံၤခီဖျိအ၀ဲသ့ၣ်ဒိးဃာ်ဟီၣ်လာ်မ့ၣ်ပိၢ်လၢကရၢၢ်ကပၤအဃိဘၣ်ဟးထီၣ်က့ၤလီၤလၢတၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီအပူၤအဂ့ၢ်န့ၣ် လီၢ်က၀ီၤသ၀ီဖိတဖၣ်စံး၀ဲန့ၣ်လီၤႉ ဘၣ်ဃးတၢ်ဒိးလီၤဃာ်ဟီၣ်လာ်မ့ၣ်ပိၢ်လၢကၠိကရၢၢ်အကပိၤကပၤတၢ်ဂ့ၢ်အံၤ ပယီၤသုးလၢအိၣ်ကၠိကရၢၢ်ပူၤတဖၣ်တဲပၠး၀ဲမးသ့ၣ်ညါဘၣ်၀ဲလီၤအဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ “ၦၤဒိးလီၤဃာ်မ့ၣ်ပိၢ်လၢကၠိကပၤအိၣ်န့ၣ်ပယီၤသုးလၢအနုာ်လီၤအိၣ်ကၠိကရၢၢ်ပူၤလၢညါတဖၣ်တဲပၠးၦၤမးပသ့ၣ်ညါဘၣ်လီၤႉပယီၤသုးလၢအဟဲအိၣ်လၢညါတဖၣ်န့ၣ်က့ၤကဒါဒီးခဲအံၤပယီၤသုးဟဲအိၣ်လၢအသီတဒူၣ်ႉအ၀ဲသ့ၣ်နါက့တဲၦၤတအိၣ်နီတမံၤဘၣ်ႉမ့ၢ်အဒိးလီၤဃာ်မ့ၣ်ပိၢ်ဒံးဧါႇက့ၤထုးထီၣ်ကွံာ်၀ဲလံဧါန့ၣ်တတဲတၢ်နီတမံၤဘၣ်ႉခဲအံၤၦၤလဲၤလၢကၠိကပၤတဘူၣ်နီတဂၤလၢာ်ဘၣ်”အဂ့ၢ်န့ၣ်လီၢ်က၀ီၤသ၀ီဖိဖဲန့ၣ်စံး၀ဲန့ၣ်လီၤႉ ဖဲအပူၤကွံာ်လါမးရှးအခါစ့ၢ်ကီးကျီၢ်တဒုဖဲအဟးဃုအီၣ်ဆၣ်လၢကၠိကရၢၢ်လီၢ်ခံအဆၢကတီၢ်ယီၢ်ဘၣ်မ့ၣ်ပိၢ်ကဲထီၣ်သးမးပယီၤသုးဒုးသ့ၣ်ညါတဲပၠး၀ဲသ၀ီဖိတဖၣ်လၢအဒိးလီၤဃာ်မ့ၣ်ပိၢ်အိၣ်အဂ့ၢ်န့ၣ် လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ပယီၤသုးလၢအနုာ်လီၤအိၣ်ဖဲကၠိကရၢၢ်ပူၤအံၤတဖၣ်အနီၣ်ဂံၢ်ကအိၣ်လၢအဂၤ(၅၀)ဃၣ်ဃၣ်ညါဒီး ဆီလီၤစ့ၢ်ကီးတြဲၤအိၣ်ခိးတၢ်လီၢ်လၢကၠိမဲာ်ညါ(ဟီၣ်သရီ)တိၤဖီခိၣ်ဒီးအိၣ်ခိးသမံသမိး၀ဲၦၤဟးထီၣ်က့ၤလီၤတဖၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ခီဖျိပယီၤသုးနုာ်လီၤအိၣ်လၢကၠိကရၢၢ်ပူၤအဃိတနံၣ်အံၤတၢ်သိၣ်လိအဂီၢ်န့ၣ်လီၢ်က၀ီၤကၠိဖိသ့ၣ်တဖၣ်ဘၣ်သုးလီၢ်လဲၤမၤလိက့ၤတၢ်လၢသီခါဖၠၣ်ကရၢၢ်ပူၤဒီးခီဖျိတၢ်ကီတၢ်ခဲအိၣ်လၢတၢ်လီၢ်တၢ်ကျဲအဃိဘၣ်သိၣ်လိနီၤဖးလီၤက့ၤအတီၤအဂ့ၢ်န့ၣ် တီၤကၠၤအ့ကၠိဖိမိၢ်ပၢ်တဂၤစံး၀ဲန့ၣ်လီၤႉ “တမၤလိဘၣ်လံာ်လၢကၠိလၢာ်ဘၣ်အဃိဘၣ်လဲၤမၤလိက့ၤ၀ဲလၢသီခါဖၠၣ်မီၤနီၤႉခီဖျိတၢ်လီၢ်တတြီၢ်ဘၣ်အဃိမ့မ့ၢ်တီၤဖုၣ်န့ၣ်ဘၣ်ထီၣ်၀ဲကၠိလၢဂီၤခီဒီးမ့မ့ၢ်တီၤထီခီန့ၣ်ဘၣ်ထီၣ်၀ဲလၢဟါခီမီၤနီၤႉတုၤလၢခဲအံၤန့ၣ်သ၀ီဖိတဖၣ်ဟဲက့ၤအိၣ်လၢမုၢ်ဆါခီလီၤႉမ့ၢ်လၢဖိသၣ်ဘၣ်ထီၣ်ကၠိအဃိဟဲက့ၤဆှၢအဖိႉလၢမုၢ်နၤခီန့ၣ်မံလၢသ၀ီပူၤတဘူၣ်ဘၣ်ႉၦှၤတနီၤန့ၣ်လဲၤမံလၢသ၀ီအဂၤႉတနီၤန့ၣ်လဲၤမံလၢသီခါဖၠၣ်ႉလၢမုၢ်နၤခီန့ၣ်ပယီၤသုးတပျဲခီဂာ်၀ဲသ၀ီဆၢခိၣ်ဒီးသ၀ီဆၢလာ်လၢာ်ဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ပယီၤသုးလၢအနုာ်လီၤအိၣ်ဖဲတီၤကၠၤအ့ကၠိကရၢၢ်အပူၤသ့ၣ်တဖၣ်အံၤခီဖျိဟီၣ်က၀ီၤတၢ်ပၢၢ်ဆၢကရူၢ်တဖၣ်လဲၤခးအ၀ဲသ့ၣ်တလီၢ်လီၢ်အဃိအ၀ဲသ့ၣ်ဆီလီၤ၀ဲမဲးထၢၣ်တဖၣ်လၢကၠိတီၤဒၢးပူၤလၢကဒီသဒၢသးအဂီၢ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ဖဲအပူၤကွံာ်လါမးရှးအခါစ့ၢ်ကီးလၢတီၤကၠၤအ့သ၀ီအပူၤတၢ်ဒုးစးထီၣ်ကဲထီၣ်၀ဲလၢဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇကညီဒီကလုာ်ဂၢၤသးကရၢ(KNDO)သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤ၀ံၤအလီၢ်ခံပယီၤသုးတဖၣ်နုာ်လီၤမၤအါထီၣ်အသုးဂံၢ်ဘါလၢကၠိကရၢၢ်ပူၤလီၤအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ လၢန့ၣ်အမဲာ်ညါခီဖျိပယီၤသုးလၢအိၣ်ကီးတရံး၀့ၢ်အံၤသ့ၣ်တဖၣ်ခးလီၤကျိဖးဒိၣ်ဆူဒူသ၀ီပူၤခဲအံၤခဲအံၤအဃိ လီၢ်က၀ီၤကမျၢၢ်ဘၣ်ဒိဘၣ်ထံးအိၣ်၀ဲအသိးဟံၣ်ဃီတၢ်သူၣ်ထီၣ်တနီၤဟးဂူာ်ဟးဂီၤအိၣ်၀ဲစ့ၢ်ကီးန့ၣ်လီၤႉ

လါအီကူး ၃ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် သၣ်တီၣ်ကၠံကီၢ်ဆၣ်အပူၤ ဖဲတနံၤအံၤလါအီကူး ၃ သီ ဂီၤခီ ၉ နၣ်ရံၣ်ဃၣ်ဃၣ်အဆၢကတီၢ်န့ၣ် တီအူ–သၣ်တီၣ်ကၠံကျဲမုၢ် ပၠါစခါ(၁၀)တၢၣ်သ၀ီပူၤ တၢ်လီၢ်လၢပယီၤသုးဟံးတ့ၢ်ဃာ်ကျဲတၢ်ဘံၣ်တၢ်ဘၢအလီၢ်န့ၣ် လီၢ်က၀ီၤကမျၢၢ်(၁)ဂၤ ယီၢ်ဘၣ်၀ဲမ့ၣ်ပိၢ်ဒီးအခီၣ်တူာ်ကွံာ်၀ဲတကပၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ၦၤလၢအယီၢ်ဘၣ်မ့ၣ်ပိၢ်န့ၣ်မ့ၢ်၀ဲကိၤန့ၤလ့(၃၈)နံၣ်အိၣ်၀ဲဒၣ်လၢပၠါစခါသ၀ီဒီး အ၀ဲဒီးအမါခံဂၤအံၤဖဲအလဲၤလၢကျီးပူၤအဆၢကတီၢ်ယီၢ်ဘၣ်၀ဲမ့ၣ်ပိၢ်အဂ့ၢ်န့ၣ် လီၢ်က၀ီၤဖိတဂၤစံးဘၣ်ခ့ၣ်အဲးစံၣ်န့ၣ်လီၤႉ အ၀ဲစံး၀ဲလၢ“တၢ်လီၢ်ဖဲန့ၣ်အဖဲအပူၤကွံာ်တသီခံသီအခါန့ၣ်ပယီၤသုးဟံးဃာ်ကျဲတၢ်ဘံၣ်တၢ်ဘၢအလီၢ်မီၤနီၤႉဖဲအကလဲၤလၢကျီးပူၤအစံၣ်လီၤဃုအီၣ်တၢ်ဒီးတၢ်လၣ်လၢကျဲကပၤအခါယီၢ်ဘၣ်၀ဲမ့ၣ်ပိၢ်မီၤနီၤႉၦၤတနီၤန့ၣ်တဲ၀ဲလၢအသံလံႇယက့ၤဆဲးကျိးကဒါန့ၣ်အတသံဒံးဘၣ်ႉတၢ်အိၣ်သးဒုတဂ့ၤအါအါဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ကိၤန့ၤလ့လၢအယီၢ်ဘၣ်မ့ၣ်ပိၢ်အံၤအခီၣ်လၢအစ့ၣ်တကပၤဘၣ်ဒီၣ်တူာ်ကွံာ်၀ဲတကးဒံးဘၣ်အမဲာ်ညါခီဖျိအသးသမူတၢ်ဘၣ်ယိၣ်အိၣ်အဃိကတီၢ်ခဲအံၤဘၣ်တၢ်လဲၤကူစါယါဘျါအီၤလၢတီအူတၢ်ဆါဟံၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ ဖဲအပူၤကွံာ်လါအီကူး ၁ သီအနံၤစ့ၢ်ကီး တၢ်လီၢ်လၢကိၤန့ၤလ့ယီၢ်ဘၣ်မ့ၣ်ကဲထီၣ်သးအလီၢ်ကပိၤကပၤန့ၣ် သၣ်တီၣ်တၢ်ဒီသဒၢကမျၢၢ်(PDF)သုးတဂၤယီၢ်ဘၣ်ဒံး၀ဲမ့ၣ်ပိၢ်လၢပယီၤသုးဒိးလီၤဃာ်၀ဲအံၤဒီးသံကွံာ်၀ဲအဂ့ၢ်န့ၣ် သၣ်တီၣ်(PDF)ထုးထီၣ်ပာ်ဖျါ၀ဲန့ၣ်လီၤႉ

လါအီကူး ၂ သီႇ ၂၀၂၂ နံၣ်ႇ ခ့ၣ်အဲးစံၣ် တနံၣ်အံၤလၢကညီကီၢ်စဲၣ်တၢ်လီၢ်အါတီၤအပူၤခီဖျိတၢ်စူၤစှၤ၀ဲအဃိ ၦၤထူစံာ်ဖိတဖၣ်သဂၢၢ်ဘၣ်၀ဲတၢ်လၢာ်ဘူၣ်လၢာ်စ့ဟဲအါထီၣ်၀ဲတၢ်အိၣ်သးတဖၣ်အဂ့ၢ်န့ၣ် န့ၣ်သ့ၣ်ညါဘၣ်န့ၣ်လီၤႉ ၦၤမၤအီၣ်ဘုလၢတၢ်စူၤခါတဖၣ်အါဒၣ်တက့ၢ်န့ၣ်ဖဲလါယူၤႇလါယူၤလံဒီးလါအီကူးအကတီၢ်န့ၣ် အ၀ဲသ့ၣ်ဖှံလီၤဘုချံ၀ံၤထဲးထီၣ်သူၣ်ကဒါ၀ဲအဆၢကတီၢ်ဘၣ်ဆၣ် တနံၣ်အံၤခီဖျိတၢ်စူၤစှၤအဃိ ၦၤတနီၤလၢတၢ်ကီတၢ်ခဲအိၣ်လၢကသူၣ်ဘုအဂီၢ်တဖၣ်ခီဖျိဘၣ်ထၢနုာ်ထံလၢစံာ်ပူၤအဃိတၢ်လၢာ်ဘူၣ်လၢာ်စ့အိၣ်၀ဲအါမးအဂ့ၢ်န့ၣ် ၦၤမၤအီၣ်ဘုဖိတဖၣ်စံး၀ဲန့ၣ်လီၤႉ ကီးတရံးကီၢ်ဆၣ်နဘူသ၀ီၦၤထူစံာ်ဖိစီၤအီၤပဲၤစံး၀ဲ“ဘၣ်သူၣ်ဘုအဆၢကတီၢ်ဒုဘၣ်လံႉခီဖျိလၢစံာ်ပူၤန့ၣ်ထံတအိၣ်ဘၣ်အဃိတၢ်ကီမီၤနီၤႉတၢ်စူၤခါနါက့လီၤဂာ်ဒ်သိးဒီးတၢ်ကိၢ်ခါအကတီၢ်လီၤထံတအိၣ်ဘၣ်ႉခဲအံၤဘၣ်နိထီၣ်စဲးဘၣ်ထၢနုာ်လီၤထံလၢစံာ်ပူၤ၀ံၤမးသူၣ်န့ၢ်မီၤနီၤႉလၢကမၤၦဲၤထံအဂီၢ်နါက့သိၦ့ၤလၢာ်ကဒီးဖဲန့ၣ်ႉသိၦ့ၤထီၣ်အဃိတဘၣ်ဂီၢ်ဘၣ်ႉၦၤကညီနါက့လီၤဘှံးႇစ့နါက့လၢာ်အါ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ၦၤထူစံာ်ဖိသ့ၣ်တဖၣ်လၢကသူၣ်ဘုအဂီၢ်န့ၣ်ဘၣ်ထၢနုာ်၀ဲထံလၢစံာ်ပူၤတနံၤန့ၣ်လၢာ်၀ဲစ့(၃၀၀၀၀)ကၠးဘျဲၣ်ညါဒီးၦၤလၢအကျိၣ်အစ့အိၣ်မၤ၀ဲန့ၢ်သ့ၣ်တဖၣ်န့ၣ်ထၢနုာ်လီၤထံသူၣ်၀ဲဘုဘၣ်ဆၣ် တနီၤန့ၣ်ခီဖျိကျိၣ်စ့တဘၣ်ဂီၢ်ဘၣ်အဃိ တသူၣ်ဖျး၀ဲဘုလၢၤဘၣ်ဒီးအိၣ်ခိး၀ဲလၢတၢ်ကစူၤလီၤအဂ့ၢ်န့ၣ် ၦၤထူစံာ်ဖိတဖၣ်စံး၀ဲန့ၣ်လီၤႉ “ထံတအိၣ်ဘၣ်အဃိသူၣ်လီၤတၢ်မုၢ်တၢ်ဘိတသ့ဘၣ်ႉကသူၣ်ဘုအဂီၢ်ထံတအိၣ်ဘၣ်အဃိၦၤမၤအီၣ်ဘုတဖၣ်ဘၣ်အိၣ်ခိး၀ဲတၢ်ကစူၤဆံးယံၤလဲၣ်လီၤမီၤနီၤႉလၢကထၢနုာ်လီၤထံလၢစံာ်ပူၤအဂီၢ်နါက့ကဘၣ်တွံၢ်ဃီၤထံစ့ၢ်ကီးယံၤႉမ့၀ံၤ(ဒးစံၣ်)နါက့အၦ့ၤထီၣ်အဃိမၤတန့ၢ်ဘၣ်ႉထံတအိၣ်ဘၣ်နမ့သူၣ်န့ၣ်ကဘၣ်က့ၤထဲၣ်ကဒါစံာ်ခံ၀ီသၢ၀ီညါလီၤႉနထဲၣ်မ့၀ံၤမးနသူၣ်သ့လီၤႉစံာ်တက့န့ၣ်နမ့ထဲၣ်အီၤန့ၣ်သိ(ဒံၤစဲၤ)လၢာ်၀ဲဒၣ်တကၤလၤညါႉထံတန့ၢ်မၢ်မၢ်ဘၣ်အဃိတနံၣ်အံၤတမ့ၢ်လၢဘုကဂ့ၤဘၣ်”အဂ့ၢ်န့ၣ် ဖၣ်အၣ်ကီၢ်ဆၣ် ကီၣ်ကူးသ၀ီဖိ စီၤဘိဘိၤလၢအသူၣ်ဖျးအီၣ်ဘုအံၤစံး၀ဲန့ၣ်လီၤႉ လၢန့ၣ်အမဲာ်ညါခီဖျိဘၣ်ထၢနုာ်လီၤထံလၢစံာ်ပူၤအဃိၦၤထူစံာ်ဖိတဖၣ်ဘၣ်အိၣ်ခိး၀ဲမုၢ်နၤမုၢ်ဆါဒီး ဘုလၢတၢ်သူၣ်ဃာ်၀ဲ၀ံၤတဖၣ်စ့ၢ်ကီးခီဖျိထံတအိၣ်လၢလၢၦဲၤၦဲၤဘၣ်အဃိဘုတဖၣ်ဒိၣ်ထီၣ်တချ့အါအါဘၣ်ဒီးဟးဂီၤ၀ဲအါမးအဂ့ၢ်န့ၣ် သ့ၣ်ညါဘၣ်လၢၦၤထူစံာ်ဖိတဖၣ်အအိၣ်န့ၣ်လီၤႉ ခီဖျိမူခိၣ်ကလံၤသီၣ်ဂီၤတၢ်အိၣ်သးဒီးတနံၣ်အံၤတၢ်ကီတၢ်ခဲအိၣ်လၢတၢ်သူၣ်ဘုအဃိဘုဟးထီၣ်ကလီၤစှၤ၀ဲအသိးခီဖျိတၢ်လၢာ်ဘူၣ်လၢာ်စ့အါထီၣ်လၢတၢ်သူၣ်ဘုအံၤအဃိနံၣ်လၢကဟဲဟုသးအၦ့ၤကထီၣ်သ့၀ဲအဂ့ၢ်န့ၣ် ၦၤထူစံာ်ဖိတဖၣ်တယးကွၢ်စံး၀ဲန့ၣ်လီၤႉ ဒ်န့ၣ်အသိးလၢကီးတရံး၀့ၢ်ကလံၤထံးဒူသ၀ီတနီၤလၢတၢ်ဒုးကဲအပူၤတဖၣ်စ့ၢ်ကီး ခီဖျိပယီၤသုးခးလီၤနါစိၤကျိဖးဒိၣ်အဃိၦၤထူစံာ်ဖိတဖၣ်လဲၤမၤၦဲၤထံလၢစံာ်ပူၤတချုးလၢာ်ဘၣ်အသိး ခီဖျိမူခိၣ်တစူၤဘၣ်အဃိဘၣ်ပာ်တ့ၢ်ကွံာ်အစံာ်လီၢ်ၦဲၤလီၢ်ဒီးဘုဟးဂူာ်ဟးဂီၤအိၣ်၀ဲအဂ့ၢ်န့ၣ် ၦၤထူစံာ်ဖိတဖၣ်စံး၀ဲန့ၣ်လီၤႉ ၦၤလၢအိၣ်ကညီကီၢ်စဲၣ်၀့ၢ်ပူၤတဖၣ်အါဒၣ်တက့ၢ်န့ၣ်ၦ့ၤအီၣ်၀ဲဟုသးလၢအိၣ်ဟဲလၢတၢ်လီၢ်အဂၤတဖၣ်ဘၣ်ဆၣ် မ့မ့ၢ်လီၢ်က၀ီၤဒူသ၀ီဖိတဖၣ်အါဒၣ်တက့ၢ်န့ၣ်အီၣ်၀ဲဟုသးလၢအအိၣ်ဟးထီၣ်ဖဲလီၢ်က၀ီၤအပူၤတဖၣ်လီၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ

လါအီကူး ၂ သီႇ ၂၀၂၂ နံၣ်ႇ ခ့ၣ်အဲးစံၣ် လၢကီးတရံးကီၢ်ဆၣ် ဆူၣ်ကလံသ၀ီကရူၢ်အပူၤ ဖဲအပူၤကွံာ်လါယူၤလံ ၃၁ သီ ဂီၤခီအဆၢကတီၢ်န့ၣ် ဖီၣ်စုက၀ဲၤကရူၢ်လၢတၢ်တသ့ၣ်ညါအမံၤဟဲခး၀ဲထံကပျၢၤသ၀ီဂၢၤကီၢ်ခိၣ်ဒီးအဘူးတံၢ်တဂၤဒီး ဘၣ်ဒိဘၣ်ထံး၀ဲနးနးကလဲာ်အဂ့ၢ်န့ၣ်ၦၤလၢအဘူးဒီးအ၀ဲသ့ၣ်တဖၣ်စံး၀ဲန့ၣ်လီၤႉ သ၀ီဂၢၤကီၢ်ခိၣ်စီၤကၠီၤမ့(၆၀)ဘျဲၣ်လၢတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ဟ့ၣ်လီၤအီၤမူဒါအံၤဒီးအဒိၣ်မုၢ်နီၢ်ပဲၣ်ဖိ(၇၀)ဘျဲၣ်ခံဂၤအံၤဖီၣ်စုက၀ဲၤကရူၢ်လၢတၢ်တသ့ၣ်ညါအမံၤ ဟဲခးအ၀ဲသ့ၣ်လၢအိၣ်ဟံၣ်ပူၤဆၢကတီၢ် အဂ့ၢ်န့ၣ်စီၤကၠီမ့လၢဘၣ်တၢ်ဟဲခးအီၤတဂၤအဖိမုၣ်အံၤစံး၀ဲဒ်အံၤန့ၣ်လီၤႉ “ဖဲမဟါန့ၣ်ယပါအိၣ်လၢကျီးပူၤအိၣ်လၢထံသၢပျၢၤလီၤအိၣ်ဒီးယမိလီၤႉယမိန့ၣ်အလဲၤလ့အီၣ်ဒ့ၣ်ႇယပါန့ၣ်အိၣ်ဒီးအဒိၣ်ခံဂၤလီၤႉအဖိဒိၣ်တဂၤန့ၣ်နါက့လဲၤလ့အီၣ်တၢ်စ့ၢ်ႉအိၣ်၀ဲလၢဒဲခံဂၤန့ၣ်ႇပယါန့ၣ်ကအီလုၢ်ထံႉမ့၀ံၤဘျီကျိသီၣ်ထီၣ်ဘျီဒုယမိန့ၣ်နၢ်ဟူကျိသီၣ်ထီၣ်ဘျီအ၀ဲကရီဟဲက့ၤလီၤႉဟဲက့ၤကွၢ်၀ဲဘျီယပါန့ၣ်လီၤဃံၢ်လံမ့၀ံၤယဒိၣ်မိၢ်ဂၤနါက့ၦၤခးဘၣ်အီၤစ့ၢ်ႉအဘၣ်တၢ်န့ၣ်ကဘၣ်ဖဲ ၈ နၣ်ရံၣ်ဘျဲၣ်ဘျဲၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ စီၤကၠီမ့လၢတၢ်ဟဲခးအီၤအံၤဘၣ်၀ဲဒၣ်အခီၣ်ခံကပၤလၢာ်ဒီးခီဖျိဘၣ်ဒိနးနးကလဲာ်အဃိဘၣ်တၢ်ဆှၢထီၣ်အီၤဆူကီၢ်ကၠီၣ်တဲၣ်မဲၢ်ဆီးတၢ်ဆါဟံၣ်ဒီးခီဖျိအဒိၣ်မုၣ်နီၢ်ပဲၣ်ဖိအံၤဘၣ်ဒိတနး၀ဲဘၣ်အဃိဘၣ်တၢ်ကူစါယါဘျါအီၤလၢအူဖၠၣ်တၢ်ဆါဟံၣ်လီၤအဂ့ၢ်န့ၣ် ၦၤလၢဘူးဒီးအ၀ဲသ့ၣ်တဖၣ်စံး၀ဲန့ၣ်လီၤႉ ဘၣ်ဃးတၢ်ဟဲခးတၢ်ဂ့ၢ်ကဲထီၣ်သးအံၤကဃုသမံသမိးၦၤလၢအဟဲခးတၢ်အံၤဒီး ဆၢကတီၢ်မ့ဘၣ်န့ၣ်ကသ့ၣ်ညါဘၣ်လီၤအဂ့ၢ်န့ၣ်(DKBA)လီၢ်ခၢၣ်သး သုးက့ခိၣ် သုးခိၣ်ကျၢၢ်ဖိစီၤစွ့ၤ၀ၣ်စံး၀ဲဒ်အံၤန့ၣ်လီၤႉ “တၢ်တခါအံၤမတဂၤလဲၣ်န့ၣ်ယတတဲလီၤတံၢ်ဘၣ်မီၤနီၤႉကမ့ၢ်၀ဲဒၣ်ကညီသုးတဂၤဂၤလီၤမီၤနီၤႉကျိ(၁၆)အဘ့ၣ်န့ၣ်မးစိာ်၀ဲတချုးဒၢးႉ၀ံၤဘျီၦၤတဂၤလၢအခး၀ဲန့ၣ်တမ့ၢ်အသံဘၣ်ႉအမ့သံမတၤဒုပကတဲဒ်လဲၣ်တၢ်ဂ့ၢ်တဖျါထီၣ်ဘၣ်မီၤနီၤႉနါက့ခီဒုခဲအံၤန့ၣ်ပဃုသ့ၣ်ညါက့ၤအမံၤလံႉသနါက့ဂ့ၤခဲကၢာ်န့ၣ်အကဖျါထီၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်ဖဲမဟါလါအီကူး ၁ သီအနံၤန့ၣ်လီၤႉ ဒူသ၀ီဂၢၤကီၢ်ခိၣ်စီၤကၠီၤမ့လၢဘၣ်တၢ်ဟဲခး၀ဲအံၤအပူၤကွံာ်န့ၣ်တၢ်ဟဲခးအီၤကဲထီၣ်သးတဘျီစ့ၢ်ကီးဒီး ၦၤလၢအဟဲခးအီၤန့ၣ်မ့ၢ်၀ဲဒၣ်ကညီဖီၣ်စုက၀ဲၤတၢ်ကရၢကရိလီၤအဂ့ၢ်န့ၣ် သုးခိၣ်ကျၢၢ်ဖိ စီၤစွ့ၤ၀ၣ်စံးအါထီၣ်၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်လါမ့ၤအခါစ့ၢ်ကီးလၢ(DKBA)ဟီၣ်က၀ီၤအပူၤတၢ်ခးသံ၀ဲအူကြ့ၣ်ထၣ်သ၀ီဖိတဂၤကဲထီၣ်တ့ၢ်အသးဒံးအသိးဖဲလါယူၤလၢာ်အခါစ့ၢ်ကီးတၢ်ခးသံကဒီးအူကြ့ၣ်ထၣ်သီခါတပါဒံးဘၣ်ဆၣ် မ့ၢ်တၢ်ကရၢကရိဖဲလဲၣ်တဒူၣ်ဟဲခး၀ဲလဲၣ်န့ၣ်တုၤလၢခဲအံၤတၢ်တသ့ၣ်ညါအီၤဒံးဘၣ်အဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ

လါအီကူး ၁ သီႇ၂၀၂၂ နံၣ်ႇ ခ့ၣ်အဲးစံၣ် လၢမၠၣ်၀တံၣ်ကလံၤထံးဂီၤလ့ၤဟီၣ်က၀ီၤစွ့ၤအ့မၠဲၤသ၀ီတကပၤန့ၣ် ခီဖျိတၢ်ဒုးကဲထီၣ်လၢပယီၤသုးကျိၤဒီးကီၢ်သူလ့ၤသုးမုၢ်ဒိၣ်(Venom)သုးကျိၤတဖၣ်အဘၢၣ်စၢၤအဃိ လီၢ်က၀ီၤဖိအဂၤ(၅၀၀)ဘျဲၣ်ဘၣ်ဃ့ၢ်ထီၣ်ကဒီးဆူကီၢ်ကၠီၣ်တဲၣ်တကပၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ စးထီၣ်လါယူၤလံ ၂၇ သီတုၤလၢလါယူၤလံ ၃၁ သီအနံၤန့ၣ် ခီဖျိတၢ်ဒုးစးထီၣ်ကဲထီၣ်ကဒါလၢ ပယီၤသုးဒီးကီၢ်သူလ့ၤသုးမုၢ်ဒိၣ်(Venom)သုးကျိၤတဖၣ်အဘၢၣ်စၢၤအဃိ အပူၤကွံာ်တနွံလီၢ်က၀ီၤၦၤဃ့ၢ်တၢ်ဒုးဖိအဂၤ(၅၀၀)ဘျဲၣ်လၢအလဲၤဃ့ၢ်ထီၣ်ဆူကီၢ်ကၠီၣ်တဲၣ်ပူၤ၀ံၤဟဲက့ၤအိၣ်ကဒါဆူသ၀ီပူၤတဖၣ်ကတီၢ်ခဲအံၤအ၀ဲသ့ၣ်ဘၣ်ဃ့ၢ်ထီၣ်ကဒီးဆူကီၢ်ကၠီၣ်တဲၣ်တကပၤလံအဂ့ၢ်န့ၣ် ၦၤဃ့ၢ်တၢ်ဒုးဖိတဖၣ်စံး၀ဲန့ၣ်လီၤႉ စွ့ၤအ့မၠဲၤသ၀ီဖိလၢအဘၣ်ဃ့ၢ်တၢ်ဒုးတဂၤစံး၀ဲ“ကၠီၣ်တဲၣ်သုးမၢၦၤက့ၤခီဃီၤလၢန့ၣ်တကပၤခဲလၢာ်ဒီးက့ၤအိၣ်န့ၢ်ခံသီ၀ံၤတၢ်ဒုးဟဲက့ၤကဲထီၣ်ကဒါအဃိဘၣ်ဟဲစံၣ်ထီၣ်ကဒါလၢကၠီၣ်တဲၣ်ပူၤအသီတဘျီကဒီးလီၤႉခဲအံၤၦၤဒုးအိၣ်ဆိၦၤလၢမီကထါသ၀ီသီခါဖၠၣ်ကရၢၢ်ပူၤႉတုၤလၢတဂီၤအံၤန့ၣ်ၦၤဟဲဃီၤလၢအံၤတကပၤအိၣ်အဂၤ(၅၀၀)ဘျဲၣ်လံႉတနီၤန့ၣ်ကွၢ်၀ဲတၢ်အိၣ်သးဒီးအိၣ်ဒံး၀ဲဖဲသူမှဲကျိကၢၢ်နံၤန့ၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါန့ၣ်လီၤႉ ခီဖျိဂီၤလ့ၤကျိဖးဒိၣ်လူၢ်ဒီးသုးကျိၤတဖၣ်ခးလီၤကျိဖးဒိၣ်လီၤတဲာ်ပိၢ်ဖးထီၣ်လၢတၢ်လီၢ်အါတီၤပူၤအဃိ အူကြ့ၣ်ထၣ်ႇစွ့ၤအ့မၠဲၤႇ၀ၣ်မံၤထၣ်ႇထံသၢပျၢၤလီၢ်က၀ီၤသ၀ီဖိတဖၣ်ဘၣ်လဲၤစံၣ်ထီၣ်ကဒီးဆူကီၢ်ကၠီၣ်တဲၣ်ပူၤန့ၣ်လီၤႉ လၢတၢ်န့ၣ်အဃိကီၢ်ကၠီၣ်တဲၣ်–ကီၢ်ပယီၤကီၢ်ဆၢသူမှဲကျိကၢၢ်ခိၣ်တၢ်လီၢ်တဖၣ်ဒီး (ဂီၤလ့ၤမီၤကိၤ)ကၠီၣ်တဲၣ်သ၀ီတကပၤန့ၣ်ၦၤဃ့ၢ်တၢ်ဒုးဖိတဖၣ်လိၣ်ဘၣ်၀ဲတၢ်အီၣ်တၢ်အီအိၣ်ဆိးလီၢ်ကျဲတဖၣ်အဂ့ၢ်န့ၣ် ၦၤလၢမၤစၢၤၦၤလီၢ်အိၣ်ကမှံဖိတဖၣ်စံး၀ဲဒ်အံၤန့ၣ်လီၤႉ “လၢပကလဲၤမၤစၢၤၦၤလီၢ်အိၣ်ကမှံဖိအဂီၢ်ဖဲ ၂၉ သီအခါန့ၣ်ဖဲပလဲၤဟ့ၣ်တၢ်အီၣ်တၢ်အီအခါန့ၣ် ခီဖျိလၢကၠီၣ်သုးမၤဃံးထီၣ်တၢ်ဟးထီၣ်က့ၤလီၤအဃိပဘၣ်လဲၤပာ်လီၤက့ၤတၢ်အီၣ်တၢ်အီတဖၣ်ဖဲဂီၤလ့ၤ–မီကထါသီခါဖၠၣ်န့ၣ်လီၤမီၤနီၤႉဖဲန့ၣ်ၦၤအဂၤ(၂၀၀)ဘျဲၣ်ခီထံကျိဟဲတုၤလံႉဟဲဃ့ၢ်အိၣ်၀ဲဖဲဖိၣ်ဖြးဒီးဂီၤလ့ၤအဘၢၣ်စၢၤမီကထါသီခါဖၠၣ်တကပၤန့ၣ်မီၤနီၤႉဒ်ပသ့ၣ်ညါဘၣ်အသိးန့ၣ်ဖဲန့ၣ်ၦၤဟဲဃ့ၢ်ထီၣ်ကဒီးအဂၤ(၅၀၀)ဘျဲၣ်မီၤနီၤႉမ့ၢ်လၢတၢ်ဒုးကဲထီၣ်လၢ၀ၣ်မံၤထၣ်သ၀ီဒီးစွ့ၤအ့မၠဲၤသ၀ီအဘၢၣ်စၢၤအဃိကတီၢ်ခဲအံၤတၢ်အီၣ်တၢ်အီတဖၣ်လိၣ်၀ဲမီၤနီၤ”အဂ့ၢ်န့ၣ်ၦၤလၢလဲၤမၤစၢၤၦၤဃ့ၢ်အိၣ်ကမှံဖိတဂၤစံးဘၣ်ခ့ၣ်အဲးစံၣ်ဖဲမဟါန့ၣ်လီၤႉ ဖဲစှၤသီအတီၢ်ပူၤအံၤပယီၤသုးကျိၤလၢအိၣ်ကျိဖးဒိၣ်လူၢ်သုးကလၢၤတဖၣ်ဟးထီၣ်က့ၤလီၤမၤ၀ဲသုးတၢ်ဟူးတၢ်ဂဲၤလၢစွ့ၤအ့မၠဲၤသ၀ီႇ၀ၣ်မံၤထၣ်ႇထံသၢပျၢၤႇအူကြ့ၣ်ထၣ်သ၀ီတကပၤတၢ်အိၣ်သးအဖီခိၣ်အံၤလါယူၤလံအတီၢ်ပူၤခီဖျိကီၢ်သူလ့ၤသုးမုၢ်ဒိၣ်(Venom)သုးကျိၤခိးခးအ၀ဲသ့ၣ်လၢတၢ်ဘၢၣ်စၢၤအဃိခံခီခံကပၤသံဘၣ်ဒိဘၣ်ထံးအိၣ်၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ ခီဖျိပယီၤသုးနုာ်လီၤမၤဒုးယၤတၢ်ဟူးတၢ်ဂဲၤလၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤပူၤအဃိ ကတီၢ်ခဲအံၤလၢကီးတရံး မီမၣ်ယွၤသ့ၣ်ကိတကပၤန့ၣ်တၢ်ဒုးကဲထီၣ်၀ဲဒီး(KNLA)သုးပာ်ဖှိၣ်(ကျားဖြူ)သုးကျိၤဒီး လၢမၠၣ်၀တံၣ်–ဖလူ–ဂီၤလ့ၤကျဲမုၢ်ခိၣ်န့ၣ်ကဲထီၣ်၀ဲဒီး(KNLA)သုးပာ်ဖှိၣ်(Cobra)သုးကျိၤအသိး လၢဂီၤလ့ၤ–အူကြ့ၣ်ထၣ်ကျဲတမုၢ်ခိၣ်န့ၣ်ကဲထီၣ်၀ဲဒီး ကီၢ်သူလ့ၤသုးမုၢ်ဒိၣ်(Venom)သုးကျိၤတဖၣ်န့ၣ်လီၤႉ လၢတၢ်န့ၣ်အဃိခီဖျိပယီၤသုးအံၤသူ၀ဲကျိဖးဒိၣ်ဟဲအါထီၣ်အဃိတုၤလၢလါယူၤလံ ၃၁ သီ ဂီၤခီအဆၢကတီၢ်န့ၣ် လီၢ်က၀ီၤဖိတဖၣ်ဘၣ်ဃ့ၢ်ထီၣ်ကဒီး၀ဲဆူကီၢ်ကၠီၣ်တဲၣ်တကပၤကဲထီၣ်သးဒ်အံၤလီၤအဂ့ၢ်န့ၣ် ဂီၤလ့ၤလီၢ်က၀ီၤဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ

လါအီကူး ၁ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲလါယူၤလံအကတၢၢ်တနွံအတီၢ်ပူၤန့ၣ်ခီဖျိပယီၤသုးခးလီၤကျိဖးဒိၣ်ဆူကီးတရံးကီၢ်ဆၣ်ကလံၤထံးတကပၤအဃိဟံၣ်ဃီႇတၢ်ဘါယွၤသရိာ်ႇသီခါဖၠၣ်တၢ်သူၣ်ထီၣ်တဖၣ်ဟးဂူာ်ဟးဂီၤ၀ဲဒီး ဟံၣ်ဆၣ်ဖိကီၢ်ဖိတဖၣ်သံဘၣ်ဒိဘၣ်ထံး၀ဲအိၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ကီးတရံးကီၢ်ဆၣ်ကလံၤထံးလီၢ်က၀ီၤဖိတဂၤစံး၀ဲ“ပယီၤသုးခးလီၤကျိဖးဒိၣ်လၢကီၢ်နွဲႇယွၤသ့ၣ်ကိႇအၤကလီာ်သ၀ီတကပၤန့ၣ်ကိးမုၢ်နံၤဒဲးလီၤႉက့ၤခးလီၤကဒီး၀ဲလၢမီမးသ၀ီသီတကပၤန့ၣ်စ့ၢ်မီၤနီၤႉခးလီၤတၢ်လၢသ၀ီပူၤအဘျီအါအဃိဘၣ်၀ဲသၢၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ စးထီၣ်ဖဲလါယူၤလံ ၂၃ သီတုၤလၢ ၂၉ သီတနွံအတီၢ်ပူၤ ခီဖျိပယီၤသုးခးလီၤကျိဖးဒိၣ်အဃိ ဟံၣ်ဃီဟးဂီၤ၀ဲ(၄၄)ဖျၢၣ်ႇတၢ်ဟးလီၢ်(၁)ဖျၢၣ်ႇၦၤဆါတၢ်ကျးစဲၢ်(၄)ဖျၢၣ်ႇတၢ်ဘါယွၤသရိာ်(၁)ဖျၢၣ်ႇသီခါဖၠၣ်(၁)ဖျၢၣ်ႇသိလ့ၣ်ဟးဂီၤ၀ဲ(၁)ခိၣ်ဒီးဘၣ်၀ဲကျီၢ်(၇)ဒုအဂ့ၢ်န့ၣ် ၦၤလၢအထံၣ်၀ဲဒီးအမဲာ်တဖၣ်စံး၀ဲန့ၣ်လီၤႉ ဒူသ၀ီလၢတၢ်ဘၣ်ဒိဘၣ်ထံးတၢ်ဟးဂူာ်ဟးဂီၤကဲထီၣ်သးတဖၣ်အံၤမ့ၢ်၀ဲဒၣ် ကီၢ်နွဲသ၀ီကရူၢ်ဒီးမီမၣ်သ၀ီကရူၢ်ပူၤ ကီၣ်နွဲသ၀ီႇယွၤသ့ၣ်ကိႇကၠီၤစှၤကိႇသၤယၤကိသ၀ီဒီးသ၀ီသီသ့ၣ်တဖၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ ဖဲအပူၤကွံာ်လါယူၤလံ ၂၆ သီအနံၤန့ၣ် ပယီၤသုးတဖၣ်ဟဲထီၣ်၀ဲဆူမီမၣ်သ၀ီကရူၢ်(သၤယၤကိ)သ၀ီတကပၤဒီး ဖဲလါယူၤလံ ၂၈ သီ ဂီၤခီ ၆ နၣ်ရံၣ်ဃၣ်ဃၣ်အဆၢကတီၢ်န့ၣ် ခီဖျိိတၢ်ခးလိာ်သးကဲထီၣ်ဒီး လီၢ်က၀ီၤတၢ်ဒီသဒၢကမျၢၢ်သုးဖဲသ၀ီပူၤအဃိ သ၀ီဖိတဖၣ်ဘၣ်ဃ့ၢ်ထီၣ်၀ဲတဘျီဃီဒီးစိာ်ဃုာ်၀ဲ တၢ်အီၣ်တၢ်အီကသံၣ်ကသီတချုးနီတမံၤဘၣ်အဂ့ၢ်န့ၣ် သ၀ီဖိလၢအဘၣ်ဃ့ၢ်ထီၣ်တဖၣ်စံး၀ဲန့ၣ်လီၤႉ သၤယၤကိသ၀ီဖိိတဂၤစံး၀ဲ“တၢ်ဒုးကဲထီၣ်လၢသ၀ီပူၤတီတီလီၤႉကဲထီၣ်န့ၣ်ဘူးဒီးယဟံၣ်လီၤႉဘၣ်စံၣ်လၢကျိချံၦာ်သၣ်အဘၢၣ်စၢၤအဃိစိာ်တၢ်တချုးနီတမံၤဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်လါယူၤလံ ၂၃ သီအနံၤန့ၣ် ခီဖျိပယီၤသုးလၢအိၣ်ဆီလီၤသးဖဲမီမၣ်သ၀ီကရူၢ် ကမဲၤကိသ၀ီပူၤတဖၣ်အံၤဟဲထီၣ်၀ဲဆူသ၀ီသီတကပၤအဃိ တၢ်ဒုးကဲထီၣ်ဒံး၀ဲတဆံးတက့ၢ်အသိး ဖဲလါယူၤလံ ၂၉ သီ...

လါယူၤလံ ၂၉ သီႇ ၂၀၂၂ နံၣ်ႇ ခ့ၣ်အဲးစံၣ် စးထီၣ်ဖဲအပူၤကွံာ်လါယူၤတုၤလၢတလါအံၤတစုလၢမၠၣ်၀တံၣ်ကလံၤထံး ဖလူ–ဂီၤလ့ၤကျဲမုၢ်ခိၣ်န့ၣ် ခီဖျိတၢ်ဒုးကဲထီၣ်လၢပယီၤသုးကလၢၤအခိၣ်အဃၢၤဒီးကဆီ၀ါလ့(သိထၣ်ကွ့ၣ်)တၢ်လီၢ်လၢပယီၤသုးကျိၤဒီး(KNLA)သုးပာ်ဖှိၣ်တဖၣ်အဘၢၣ်စၢၤခဲအံၤခဲအံၤအဃိကျဲတၢ်ဟးထီၣ်က့ၤလီၤဆိကတီၢ်အသးလၢဟီၣ်က၀ီၤအပူၤဒီးဖသ၀ီဖိလၢအိၣ်ဟီၣ်က၀ီၤအပူၤဖဲန့ၣ်သ့ၣ်တဖၣ်သဂၢၢ်ဘၣ်၀ဲတၢ်အီၣ်လီၤတူာ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ “လၢကစၢၢ်ကျဲ(သိထၣ်ကွ့ၣ်)တၢ်လီၢ်နါက့တၢ်ဒုးကဲထီၣ်စ့ၢ်ႉလၢဂီၤလ့ၤအူကြ့ၣ်ထၣ်ႇစွ့ၤအ့မၠဲၤတကပၤနါစ့ၢ်ကီးတၢ်ဒုးကဲထီၣ်အဃိခံခီခံကပၤလၢာ်ဟးထီၣ်က့ၤလီၤတသ့လၢၤဘၣ်န့ၣ်ကအိၣ်တလါဘျဲၣ်လံႉလၢကျီးပူၤတၢ်ထူၣ်တၢ်ဘိတဖၣ်နါက့မ့ၢ်မၤသးဒ်လဲၣ်န့ၣ်ပလဲၤကွၢ်တဘူၣ်ဘၣ်ႉခဲအံၤပယီၤသုးမၤအါထီၣ်အသုးဂံၢ်ဘါဒီးသုးကျိၤတဖၣ်ဟးထီၣ်က့ၤလီၤလၢကျီးကပၤအဃိတၢ်ဘံၣ်တၢ်ဘၢတအိၣ်ဘၣ်ႉဖဲအအိၣ်န့ၣ်ဘၣ်အီၣ်နါစိၤဒ်န့ၣ်လီၤ”အဂ့ၢ်န့ၣ်ကၠီးခဲးလီၢ်က၀ီၤသ၀ီဖိတဂၤစံး၀ဲန့ၣ်လီၤႉ တလါအံၤလါယူၤလံ ၂၆ တုၤလၢ ၂၈ သီအတီၢ်ပူၤ လၢအူကြ့ၣ်ထၣ်ပယီၤသုးကလၢၤစွ့ၤအ့မၠဲၤသ၀ီတကပၤန့ၣ် တၢ်ဒုးကဲထီၣ်၀ဲလၢသုးခိၣ်စးလိတီခိၣ်ရိၣ်မဲကီၢ်သူလ့ၤသုးမုၢ်ဒိၣ်သုးကျိၤဒီးပယီၤသုးတဖၣ်အဘၢၣ်စၢၤအသိး လၢဖလူ–ကဆီ၀ါလ့–သိထၣ်ကွ့ၣ်တၢ်လီၢ်တကပၤစ့ၢ်ကီးတၢ်ခးလိာ်သးကဲထီၣ်၀ဲလၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်(Cobra)သုးကျိၤဒီးပယီၤသုးအဘၢၣ်စၢၤစ့ၢ်ကီးန့ၣ်လီၤႉ (KNLA)သုးပာ်ဖှိၣ်ၦၤဟ့ၣ်တၢ်ကစီၣ်ဖိတဂၤစံး၀ဲ“လၢအူကြ့ၣ်ထၣ်ႇစွ့ၤအ့မၠဲၤတကပၤနါက့တၢ်ဒုးကဲထီၣ်ဒီးကီၢ်သူလ့ၤသုးမုၢ်ဒိၣ်စ့ၢ်မီၤနီၤႉပနၢ်ဟူတၢ်ကစီၣ်လၢပယီၤသုးကမၤၦဲၤထီၣ်အသုးဂံၢ်ဘါအဂီၢ်ဆှၢထီၣ်ကျိချံၦာ်သၣ်ႇကျိဖးဒိၣ်ႇသိလ့ၣ်ထးႇ(BGF)ဒီးပယီၤသုးတဖၣ်ဆူဖလူ–လ့က့ၣ်ကီာ်တကပၤန့ၣ်အဃိ ပအိၣ်ခိးကွၢ်ထီဘိလီၤ”အဂ့ၢ်န့ၣ်စံး၀ဲန့ၣ်လီၤႉ ခီဖျိလၢဖလူ–ဂီၤလ့ၤကစၢၢ်ကျဲအံၤတၢ်တပျဲလီၢ်က၀ီၤဖိတဖၣ်ဟးထီၣ်က့ၤလီၤဘၣ်အဃိ ကဆီ၀ါလ့ႇသယဲၣ်တပ့ၤႇကၠိခိၤနပ့ၤႇသဲဖၠူၤခီႇဘျၢၣ်ဒိၣ်ႇသ့ၣ်ဘီဘိႇကၠီးခဲးႇဆိၣ်စံမၠဲၣ်ႇတီၤနံၤလီၢ်က၀ီၤသ၀ီဖိဒီးအူကြ့ၣ်ထၣ်ႇစွ့ၤအ့မၠဲၤႇတနီထၣ်ႇစူၣ်ကလံၣ်လီၢ်က၀ီၤသ၀ီဖိတဖၣ်အံၤဟးထီၣ်က့ၤလီၤကဲခဲထီၣ်၀ဲဒီးဘၣ်အိၣ်ကခၠၢးအီၣ်ကခၠၢး၀ဲတသ့ဖဲအသ့အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ လၢန့ၣ်အမဲာ်ညါလၢဖူလူသ၀ီကျဲဟးထီၣ်န့ၣ်စ့ၢ်ကီးခီဖျိပယီၤသုးကျိၤတဖၣ်ဟူးဂဲၤဒီးအိၣ်ကတီၤထီၣ်တၢ်လီၢ်တၢ်ကျဲလၢကခးကျိဖးဒိၣ်အိၣ်အဃိၦၤလၢအိၣ်ဘူးဖဲလ့က့ၣ်ကိာ်ၦၤလီၢ်အိၣ်ကမှံတၢ်လီၢ်တဖၣ်အံၤစ့ၢ်ကီးသူၣ်ကိၢ်သးဂီၤဘၣ်ယိၣ်၀ဲလၢတၢ်ဒုးကကဲထီၣ်ကဒီးလၢအ၀ဲသ့ၣ်ကပၤအဂ့ၢ်န့ၣ်လီၢ်က၀ီၤသ၀ီဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ

လါယူၤလံ ၂၉ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)တၢ်ပၢဟီၣ်က၀ီၤအပူၤ ဖဲတနံၤအံၤဂီၤခီ ၉ နၣ်ရံၣ်တခီဃၣ်ဃၣ်အဆၢကတီၢ်န့ၣ် သုးမီၤစိရိၤအကဘီယူၤဟဲခးလီၤတၢ်လၢလၢၢ်ဒိၣ်ကီၢ်ဆၣ် ၦၤလီၢ်အိၣ်ကမှံဖိအိၣ်တၢ်လီၢ်အဂ့ၢ်န့ၣ် လီၢ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်ပာ်ဂၢၢ်ပာ်ကျၢၤစံး၀ဲန့ၣ်လီၤႉ သုးမီၤစိရိၤအကဘီယူၤဟဲတ့ၢ်လီၤမ့ၣ်ပိၢ်လၢလၢၢ်ဒိၣ်ကီၢ်ဆၣ်တစိၢ်တလီၢ်ၦၤလီၢ်အိၣ်ကမှံအိၣ်တၢ်လီၢ်တတီၤလၢအအိၣ်ဒီးတၢ်ပညိၣ်မူၤမူၤနီၢ်နီၢ်အံၤဒီးခီဖျိဟဲခးလီၤတၢ်အဃိတၢ်ဘၣ်ဒိဘၣ်ထံးအိၣ်၀ဲဒီးတၢ်ဘၣ်ဒိဘၣ်ထံးတၢ်အိၣ်သးခီတၢ်တသ့ၣ်ညါ၀ဲလီၤတံၢ်လီၤဆဲးဒံးဘၣ်အဂ့ၢ်န့ၣ်ဂံၢ်ခီၣ်ထံးၦၤဟ့ၣ်တၢ်ကစီၣ်တဂၤဃီ၀ဲန့ၣ်စံး၀ဲဒ်အံၤန့ၣ်လီၤႉ “တဲ၀ဲလၢအဟဲခးလီၤ၀ဲဖဲ ၉ နၣ်ရံၣ်တီတီန့ၣ်မီၤနီၤႉမ့မ့ၢ်တၢ်အိၣ်သးလီၤတံၢ်လီၤဆဲးခီန့ၣ်ပတသ့ၣ်ညါဒံးဘၣ်ႉ ပဆဲးကျိးသံကွၢ်ၦၤဘၣ်မူဘၣ်ဒါတဖၣ်ခီန့ၣ်တဲ၀ဲလၢတၢ်ဘၣ်ဒိဘၣ်ထံးအိၣ်ႉခီဖျိလၢအ၀ဲသ့ၣ်တၢ်မၤဘံဘူတချုးဘၣ်ဃိယတဆဲးသံကွၢ်အီၤတၢ်နီတမံၤလၢၤဘၣ်ႉဟဲခး၀ဲခီန့ၣ်ဟဲခး၀ဲဒီး(ဟဲလံခီပတၢၣ်)မီၤနီၤႉခဲအံၤကဘီယူၤတဘ့ၣ်န့ၣ်က့ၤထီၣ်ဆူတၢ်ဖီခိၣ်တကပၤမီၤနီၤႉလၢတၢ်ဖီခိၣ်တကပၤန့ၣ်နါက့အိၣ်ဒီး(IDP)လီၢ်တခါစ့ၢ်ႉမ့ၢ်ကလဲၤခးလီၤကဒီးဖဲန့ၣ်ဧါတသ့ၣ်ညါဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ သုးမီၤစိရိၤကဘီယူၤဟဲခးလီၤတၢ်လၢၦၤ(IDP)ဖိအိၣ်တၢ်လီၢ်အံၤမ့ၢ်၀ဲအဆိကတၢၢ်တဘျီဒီးဟဲခးလီၤ၀ဲ၀ံၤအလီၢ်ခံ ဒိးန့ၢ်တၢ်ကစီၣ်လၢကလံၤသုးမုၢ်လၢအိၣ်တီအူတကပၤန့ၣ်ကဘီယူၤယူၤထီၣ်ကဒီး(၃)ဘ့ၣ်လံအဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

လါယူၤလံ ၂၈ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဃိၣ်သၢဖျၢၣ်၀့ၢ်ပူၤ ဖဲမဟါလါယူၤလံ ၂၇ သီ ဟါခီ ၄ နၣ်ရံၣ်ဃၣ်ဃၣ်အဆၢကတီၢ် ၦၤတဒူၣ်လၢတၢ်တသ့ၣ်ညါအမံၤဟဲတ့ၢ်လီၤမ့ၣ်ပိၢ်လၢ(စည်ပင်)၀ဲၤဒၢးကဲထီၣ်သး၀ံၤအလီၢ်ခံ ပယီၤသုးအိၣ်ခိးသမံသမိးတၢ်ဟဲအါထီၣ်လၢတၢ်ကဲထီၣ်သးအခိၣ်အဃၢၤအဂ့ၢ်န့ၣ် သ့ၣ်ညါဘၣ်လၢၦၤအိၣ်၀့ၢ်ပူၤတဖၣ်အအိၣ်န့ၣ်လီၤႉ ဖဲမဟါဟါခီ ၄ နၣ်ရံၣ်ဃၣ်ဃၣ်အဆၢကတီၢ်န့ၣ် ဖီၣ်စုက၀ဲၤကရူၢ်လၢတၢ်တသ့ၣ်ညါအမံၤတဖၣ် ဟဲဟ့ၣ်ပလီၢ်တ့ၢ်လီၤမ့ၣ်ပိၢ်လၢဃိၣ်သၢဖျၢၣ်၀့ၢ် က၀ီၤဒ့–၃ (စည်ပင်)၀ဲၤဒၢးဒီးခီဖျိမ့ၣ်ပိၢ်ပိၢ်ဖးထီၣ်အဃိ ပယီၤသုးကးတံၢ်ကွံာ်ကျဲခံကပၤလၢာ်လၢအိၣ်ဘူးဒီးတၢ်ကဲထီၣ်သးအလီၢ်အံၤဒီးသမံသမိး၀ဲကမျၢၢ်လၢအဟးထီၣ်က့ၤလီၤတဖၣ်အထၢၣ်ပူၤတၢ်ဖိတၢ်လံၤဒီးလီတဲစိတဖၣ်အဂ့ၢ်န့ၣ် ၦၤအိၣ်၀့ၢ်ပူၤတဂၤစံး၀ဲဒ်အံၤန့ၣ်လီၤ ႉ “တၢ်ပိၢ်ဖးထီၣ်န့ၣ်ပနၢ်ဟူမီၤနီၤႉဖဲမဟါန့ၣ်ဘၣ်လၢလီဖျးတၢ်အဃိကအိၣ်ဖဲ(၄)နၣ်ရံၣ်န့ၣ်မီၤနီၤမူခိၣ်စူၤႉအိၣ်သၢသီလံနၢ်ဟူလၢတၢ်ကသမံသမိးတၢ်မီၤနီၤႉဖဲတၢ်ခိၣ်ထိးန့ၣ်အ၀ဲသ့ၣ်ကးတံၢ်ဃာ်ကျဲမီၤနီၤႉတၢ်ခိိၣ်ထိးလၢအံၤတကပၤဒီးလၢန့ၣ်တကပၤန့ၣ်တဟ့ၣ်လဲၤ၀ဲဘၣ်ႉပနၢ်ဟူလၢတၢ်တသီခံသီအတီၢ်ပူၤအံၤမၢဟးထီၣ်ဟးလီၤလၢတၢ်ပလီၢ်ပဒီအပူၤမီၤနီၤႇအ၀ဲသ့ၣ်အိၣ်ခိးသမံသမိးတၢ်လၢ၀ဲၤဒၢးမဲာ်ညါဃံးဃီၣ်ဒီၣ်လီၤ”အဂ့ၢ်န့ၣ်ၦၤ၀့ၢ်ဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ဘၣ်ဃးမ့ၣ်ပိၢ်ပိၢ်ဖးထီၣ်တၢ်ဂ့ၢ်အံၤမ့ၢ်ဖီၣ်စုက၀ဲၤကရူၢ်ကရၢဖဲလဲၣ်တဒူၣ်ဟဲမၤ၀ဲလဲၣ်န့ၣ် တထံၣ်တၢ်ထုးထီၣ်ပာ်ဖျါ၀ဲဒံးဘၣ်န့ၣ်လီၤႉဟီၣ်က၀ီၤဖဲန့ၣ်အပူၤခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢဃုာ်ဒီး မိၣ်ကီၢ်သီပၣ်တံၣ်(NMSP)ဒီးၦၤဟူးဂဲၤထီဒါသုးမီၤစရိၤကရူၢ်တဖၣ်ဟူးဂဲၤ၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံမ့ၣ်ပိၢ်ပိၢ်ဖးထီၣ်ႇတၢ်ခးလိာ်သးကဲထီၣ်ႇတၢ်ဟုၣ်တၢ်တမျာ်တၢ်ကဲထီၣ်သးလၢခူပူၤ၀့ၢ်ပူၤတၢ်လီၢ်အါတီၤတလီၢ်လီၢ်အသိးဃိၣ်သၢဖျၢၣ်၀့ၢ်ပူၤအံၤတၢ်ခးသံၦၤလၢအဆီၣ်ထွဲသုးမီၤစိရိၤဒီးမိၣ်ဃူဖိးပၣ်တံၣ်အဘျီၣ်ဒိၣ်ခၢၣ်စးမံၣ်၀့ၤသံၤဖၠိကဲထီၣ်တ့ၢ်အသးစ့ၢ်ကီးန့ၣ်လီၤႉ