ခ့ၣ်အဲးစံၣ် – KIC News

လါမ့ၤ ၂၉ သီ, ၂၀၂၅ နံၣ်, ခ့ၣ်အဲးစံၣ် ဖဲရၤမတံဝ့ၢ်ဟီၣ်ကဝီၤ,ဆိၣ်စံမၠဲၣ်သဝီ,ဖဲဒံၣ်မိၣ်ကရ့ၣ်စံၣ်တၢ်ဘၣ်ဘျုးကညီသုးမုၢ်ဒိၣ်(DKBA)ဝဲၤလီၢ်ခိၣ်သ့ၣ်တၢ်လီၢ်အပူၤန့ၣ်ဖဲမဟါလါမ့ၤ(၂၈)သီအနံၤမ့ၢ်လၢပယီၤသုးကီၣ်ကးဟဲတ့ၢ်လီၤမ့ၣ်ပိၢ်အဃိဘၣ်သံဝဲပှၤပိၥ်မုၣ်(၁)ဂၤ,ဒီးဘၣ်ဒိစ့ၢ်ကီးဝဲဖိသၣ်ဖိ(၁)ဂၤအဂ့ၢ်ဒူသဝီအပှၤဘၣ်မူဘၣ်ဒါစံးဝဲန့ၣ်လီၤ. ပယီၤသုးကီၣ်ကးအံၤလၢတၢ်ကဟဲထီၣ်တိစၢၤမၤစၢၤဝဲအပှၤ(သ့ၣ်ဘီဘိ)သုးကလၢၤအဂီၢ်ဖဲလါမ့ၤ(၂၈)သီအနံၤန့ၣ်ပယီၤသုးသ့ၣ်တဖၣ်ဟဲထီၣ်ခီဃီဝဲဒၣ်လၢကီၢ်ကၠီၣ်တဲၣ်တကပၤဒီးဖဲအဝဲသ့ၣ်ဟဲတုၤဃီဝဲဖဲဆိၣ်စံမၠဲၣ်(DKBA)ဝဲၤလီၢ်ခိၣ်သ့ၣ်သုးတၢ်ဒုးနဲၣ်ပျီပူၤအဆၢကတီၢ်ဘၣ်တၢ်ခိးခးဝဲလၢတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်ဒ်အံၤန့ၣ်လီၤ. ဘၣ်တၢ်ခိးခးဝဲပယီၤသုးကျိလၢကဟဲထီၣ်တိစၢၤမၤစၢၤ(သ့ၣ်ဘီဘိ)သုးကလၢၤအံၤဒ်အဖီခိၣ်သုးကီၣ်ကးအံၤဖဲ(၂၈)သီမုၢ်ထူၣ်အဆၢကတီၢ်န့ၣ်လၢကလံၤကျါကဘီယူၤတဆီဟဲတ့ၢ်လီၤဝဲမ့ၣ်ပိၢ်ဖဲ(ဆိၣ်စံမၠဲၣ်)သဝီပူၤအဃိပှၤလီၢ်ကဝီၤဖိဘၣ်သံကွံၥ်ဝဲဒ်အံၤလီၤအဂ့ၢ်ဒူသဝီအပှၤဘၣ်မူဘၣ်ဒါစံးဝဲဒ်အံၤလီၤ. အဝဲစံးဝဲလၢ "ဖဲမဟါန့ၣ်တၢ်ခးလိၥ်သးကဲထီၣ်ဒီးသုးကီၣ်ကးဖဲသုးတၢ်ဒုၣ်နဲၣ်ပျီပူၤအဃိပှၤဘၣ်ဃ့ၢ်ထီၣ်ဝဲလီၤ. လၢသ ဝီအပူၤမုၢ်ဂါလၢအိၣ်တ့ၢ်ဃုၥ်ဒီးအဝၤဘၣ်ကလံၤတဂၤန့ၣ်ကဘီယူၤမ့ၣ်ပိၢ်အက့ဖျိးဘၣ်ဝဲအကိၥ်ဘိအဃိဘၣ်သံကွံၥ်ဝဲန့ၣ်လီၤ. မ့မ့ၢ်လၢဖိသၣ်တဂၤန့ၣ်အစုဘၣ်ဒိဝဲလီၤ. အခဲအံၤပှၤတဟဲက့ၤလၢသဝီပူၤဒံးဘၣ်အဃိပှၤကမၤစၢၤဝဲတအိၣ် ဒံးဘၣ်" အဂ့ၢ်စံးဝဲဒၣ်န့ၣ်လီၤ. လၢတၢ်ကဟဲထီၣ်မၤစၢၤဝဲ(သ့ၣ်ဘီဘိ)ပယီၤသုးကလၢၤအံၤအဂီၢ်ပယီၤသုးကျိၤလၢဟဲထီၣ်အပှၤနီၣ်ဂံၢ်(၇၂)ဂၤသ့ၣ်တဖၣ်အံၤခီဖျိလၢဘၣ်တၢ်ခိးခးဒီၣ်တဲၥ်ကွံၥ်ဝဲအဃိပယီၤသုးအပှၤ(၂၂)ဂၤအကျါဃုၥ်ဒီးအသုးရ့ၣ်ခိၣ်ခံသ့ၣ်တဖၣ်ဃ့ၢ်ဖျိးထီၣ်ဝဲဆူကီၢ်ကၠီၣ်တဲၣ်တကပၤဒီးကတီၢ်အံၤကၠီၣ်တဲၣ်သုးတကပၤဖီၣ်ဃၥ်ဝဲအဂ့ၢ်သ့ၣ်ညါဘၣ်န့ၣ်လီၤ. လၢန့ၣ်အမဲၥ်ညါပယီၤသုးကျိၤလၢဟဲထီၣ်သ့ၣ်တဖၣ်အံၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သိၣ်မှံသုးကရူၢ်ဖီၣ်မူဒံးန့ၢ်ဝဲ(၁၅)ဂၤဒီးပယီၤသုးလၢအိၣ်တ့ၢ်အဂၤသ့ၣ်တဖၣ်သံကွံၥ်ဝဲအဂ့ၢ်သိၣ်မှံတၢ်ပၢၢ်ဆၢအပှၤဘၣ်မူဘၣ်ဒါစံးဝဲန့ၣ်လီၤ.

လါမ့ၤ ၂၉ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်(သုးက့-၄),လၢၢ်မုၢ်လါကီၢ်ဆၣ်ဟီၣ်ကဝီၤအပူၤလၢတၢ်ကပၢၢ်ဆၢထီဒါသုးမီၤစိရိၤအဂီၢ်ကညီဒီကလုၥ် ဂၢၤသးကရၢ(KNDO)သုးရ့ၣ်-၇ မၤဝဲတၢ်ပျၢ်သုးဂံၢ်ခီၣ်ထံးတၢ်သိၣ်လိ(၁)တဝီဝံၤဝဲဖဲလါမ့ၤ(၂၅)သီအနံၤအဂ့ၢ်ခ့ၣ်အဲၣ်ယူၣ်-ဘျံးဒဝဲၢ် ကီၢ်ရ့ၣ်ထုးထီၣ်ပၥ်ဖျါဝဲဖဲတနံၤအံၤလါမ့ၤ(၂၉)သီအနံၤန့ၣ်လီၤ. လၢတကီၢ်ခါတၢ်ပၢၢ်ဆၢအဆၢကတီၢ်အံၤအပူၤလၢတၢ်ကဒိၣ်စိန့ၢ်ဝဲဟီၣ်ကဝီၤတၢ်လီၢ်အဂီၢ်မ့ၢ်ဂ့ၤ, လၢခါဆူမဲၥ်ညါတၢ်ပၢၢ်ဆၢတၢ်ဖံး တၢ်မၤသ့ၣ်တဖၣ်အဂီၢ်မ့ၢ်ဂ့ၤဒီးလၢတၢ်ကပၢၢ်ဆၢထီၣ်ဒါဝဲသုးမီၤစိရိအဂီၢ်သးစၢ်သနၢၣ်မ့ၢ်တၢ်လၢအရ့ဒိၣ်ဝဲလၢတၢ်ပၢၢ်ဆၢတၢ်ဖံးတၢ်မၤပူၤအဃိဘၣ်တၢ်ဒုးအိၣ်ထီၣ်ဝဲဒၣ်တၢ်သိၣ်လိအံၤလီၤအဂ့ၢ် KNDO သုးရ့ၣ်-၇, အသုးဒ့-၅ အသုးဒ့ခိၣ်(ဘးဟူၣ်)စံးဝဲဒၣ်ဒ်အံၤန့ၣ် လီၤ. "တကီၢ်ခါတၢ်ပၢၢ်ဆၢအဆၢကတီၢ်လၢတၢ်ကထီၣ်ဒိၣ်စိန့ၢ်ဟီၣ်ကဝီၤတၢ်လီၢ်အဂီၢ်ပလိၣ်ဘၣ်သုးမုၢ်သံၣ်ဘိဂံၢ်ဘါလီၤ. သုးမုၢ်သံၣ်ဘိ နီၣ်ဂံၢ်မ့ၢ်အိၣ်မးပမၤတၢ်ထီၣ်ဒိၣ်စိဟီၣ်ကဝီၤတၢ်လီၢ်ကန့ၢ်ဝဲလီၤ. ခါဆူညါပကဘၣ်မၤဝဲတၢ်ပၢၢ်ဆၢတၢ်ဖံးတၢ်မၤအိၣ်ဒံးအါမးန့ၣ်လီၤ. မ့ၢ်ဝံၤန့ၣ်လၢတၢ်ပၢၢ်ဆၢထီဒါသုးမီၤစိရိၤအဂီၢ်ကတီၢ်အံၤတၢ်ပၣ်ဃုၥ်ပၣ်ဂီၢ်လၢတၢ်ပၢၢ်ဆၢအပူၤန့ၣ်သးစၢ်သနၢၣ်မ့ၢ်တၢ်လၢအရ့ဒိၣ်ဝဲလီၤ. အဃိမ့ၢ်တၢ်လၢပဘၣ်မၤအီၤန့ၣ်လီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ....

လါမ့ၤ ၂၉သီ, ၂၀၂၅နံၣ်, ခ့ၣ်အဲးစံၣ်, ကၠီၣ်တဲၣ်ပဒိၣ်ပၥ်လီၤဝဲတၢ်ဘျၢသဲးစးလၢခီကီၢ်ပိၥ်မုၣ်ပိၥ်မၢၤပှၤမၤတၢ်ဖိတဖၣ်အဂီၢ်အံၤတၢ်လူၤပိၥ်မၤထွဲဝဲတအိၣ်ဝဲဒံးဘၣ်အဂ့ၢ်(ပှၤဟူးဂဲၤလၢခီကီၢ်ပှၤမၤတၢ်ဖိဂ့ၢ်ဝီ)ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. ပိၥ်မုၣ်ပိၥ်မၢၤပှၤမၤတၢ်ဖိတဖၣ်သွံၣ်ထံလုၢ်လၢ်ဟဲဆၢကတီၢ်တၢ်ကဘၣ်ဟ့ၣ်ဝဲတၢ်အိၣ်ဘှံးခွဲးဒီးကဒိးန့ၢ်ဘၣ်ဝဲတၢ်မၤဘူးအလဲအဂီၢ်အပူၤကွံၥ်လါမ့ၤသၢနွံတနွံအပူၤ,ကၠီၣ်တဲၣ်ပဒိၣ်ပၥ်လီၤဝဲတၢ်ဘျၢသဲးစးလၢပှၤမၤတၢ်ဖိပိၥ်မုၣ်ပိၥ်မၢၤတဖၣ်အဂီၢ်အိၣ်ဝဲဘၣ်ဆၣ်သဲစးတၢ်ဘျၢအံၤတုၤလၢခဲအံၤတၢ်မၤလီၢ်ကစၢ်ခိၣ်နၢ်တဖၣ်တစးထီၣ်မၤထွဲဝဲတအိၣ်ဒံးဘၣ်အဂ့ၢ်,(YoungCHiOo)ပှၤဟူးဂဲၤလၢခီကီၢ်ပှၤမၤတၢ်ဖိဂ့ၢ်ဝီပှၤဘၣ်မူဘၣ်ဒါ(ဒီၣ်သူၤစၣ်ကၠဲၤ)စံးဝဲဒ်အံၤန့ၣ်လီၤ. “ကၠီၣ်တဲၣ်ပဒိၣ်ထုးထီၣ်လံၥ်ဘိးဘၣ်ရၤလီၤဒုးသ့ၣ်ညါဝဲဝံၤအလီၢ်ခံတုၤလၢတကီၢ်ခါခဲအံၤပသ့ၣ်ညါဘၣ်လၢတၢ်မၤလီၢ်တဖၣ်အပူၤတၢ်လူၤပိၥ်ထွဲမၤထွဲဝဲအီၤတအိၣ်ဒံးဘၣ်.လီၤဆီဒၣ်တၢ်ဖဲမဲၢ်ဆီးဝ့ၢ်အပူၤမ့မ့ၢ်ပဒိၣ်ဝဲၤကျိၤတၢ်ဖံးတၢ်မၤလီၢ်တဖၣ်တနီၤဒုပၥ်လီၤပၥ်ဝဲတၢ်ကဘၣ်မၤအီၤအဂ့ၢ်အကျိၤန့ၣ်အိၣ်လံ,နါက့တၢ်မၤလီၢ်တဖၣ်အပူၤတၢ်မၤကစၢ်ခိၣ်နၢ်တဖၣ်တဆဲးကျိးဆဲးကျၢပှၤဒီးရၤလီၤဒုးသ့ၣ်ညါက့ၤပှၤမၤတၢ်ဖိတဖၣ်လၢအဖိးသဲစးဒံးဘၣ်”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,ဘၣ်ဃးဒီးပိၥ်မုၣ်ပိၥ်မၢၤပှၤမၤတၢ်ဖိတဖၣ်တၢ်ဘျၢသဲစးအံၤတကီၢ်ခါခဲအံၤတၢ်မၤလီၢ်တဖၣ်တၢ်အိၣ်သးအိၣ်ဝဲဒ်လဲၣ်အဂ့ၢ်န့ၣ်,မဲၢ်ဆီးဝ့ၢ်(မဲတီၤမဲၤ)ခီကီၢ်ပိၥ်မုၣ်ပှၤမၤတၢ်ဖိတဂၤစံးဝဲဒ်အံၤန့ၣ်လီၤ. “တၢ်ကန့ၢ်ဘၣ်ခွဲးအိၣ်ဘှံးဒီးတၢ်မၤဘူးလဲန့ၣ်အိၣ်ဒၣ်လၢပနီၢ်ကစၢ်ထံၣ်လၢတၢ်ကစီၣ်အပူၤဒီးပသ့ၣ်ညါထွဲဝဲလီၤ.ဖဲပတၢ်မၤလီၢ်အံၤဒုခဲအံၤတနၢ်ဟူတၢ်သီၣ်နီမံၤဒံးဘၣ်.ပှၤတဂၤမးတတဲသီၣ်တဲသဲပၥ်ဖျါဝဲဒံးဘၣ်.တၢ်မၤအပူၤယနီၢ်ကစၢ်ဒၣ်ယဲဖဲယလုၢ်လၢ်ဟဲအခါန့ၣ်,အပူၤကွံၥ်ယဃ့အိၣ်ဘှံးလၢတဒိးန့ၢ်ဘၣ်တၢ်မၤဘူးလဲဘၣ်န့ၣ်တဘျီတခီၣ်ဟ့ၣ်ယၤခွဲး.နါက့မ့ဘၣ်လၢတၢ်မၤခိၣ်နၢ်တဖၣ်အသးတဂ့ၤဘၣ်အဆၢကတီၢ်ဒုဃ့နါက့တန့ၢ်ဘၣ်.တဲဝဲတဘၣ်ဟံဒံးတဂ့ၤဟံလၢခံဒ်န့ၣ်အိၣ်မီၤ.”အဂ့ၢ်စံးဝဲဒၣ်စ့ၢ်ကီးန့ၣ်လီၤ. တၢ်ပၥ်ဂၢၢ်ကျၢၤဝဲတၢ်ဘျၢသဲစးလၢပိၥ်မုၣ်ပိၥ်မၢၤတဖၣ်အဂီၢ်အံၤ,မ့ၢ်ဒ်သိးတၢ်ကမၤဂုၤထီၣ်ပသီထီၣ်ပိၥ်မုၣ်ပိၥ်မၢၤပှၤမၤတၢ်ဖိတဖၣ်အကံၢ်အစီဒီးတၢ်ကစိၥ်ကဖီထီၣ်ပိၥ်မုၣ်တဖၣ်စၢၤသွဲၣ်(မျိုးဆက်ပွားကျန်းမာရေး)တၢ်အိၣ်ဆူၣ်အိၣ်ချ့အဂ့ၢ်,သ့ၣ်ညါဒ်ကၠီၣ်တဲၣ်ပဒိၣ်ဒီးပှၤဟူးဂဲၤလၢပှၤမၤတၢ်ဖိဂ့ၢ်ဝီတဖၣ်အတၢ်ပၥ်ဖျါအသိးန့ၣ်လီၤ. တကတီၢ်ဃီ,ကီၢ်ကၠီၣ်တဲၣ်အပူၤခီကီၢ်ပှၤမၤတၢ်ဖိသ့ၣ်တဖၣ်အံၤတၢ်ဘျၢသဲစးလၢကဘၣ်ဒိးန့ၢ်ဘၣ်ဝဲတၢ်ခွဲးတၢ်ယၥ်ဖိးသဲစးအကလုၥ်ကလုၥ်အိၣ်ဝဲဒၣ်ဘၣ်ဆၣ်,ပှၤမၤတၢ်ဖိသ့ၣ်တဖၣ်အံၤအါတက့ၢ်တူၢ်ဘၣ်ဝဲတၢ်မၤထီဒါဒီးတၢ်လုၢ်သ့ၣ်ခီပတၥ်အတၢ်ခွဲးတၢ်ယၥ်အဃိ,ဘၣ်အိၣ်ဒံးဝဲဒၣ်လၢတၢ်ပၥ်ဖျါသးဃ့န့ၢ်က့ၤတၢ်ခွဲးတၢ်ယၥ်ပူၤဒံးလီၤအဂ့ၢ်,ပှၤဟူးဂဲၤလၢခီကီၢ်ပှၤမၤတၢ်ဖိဂ့ၢ်ဝီပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. ဒ်န့ၣ်အသိး,လီၤဆီဒၣ်တၢ်တကီၢ်ခါခဲအံၤတၢ်ပၥ်ဂၢၢ်ကျၢၤဝဲပိၥ်မုၣ်ပိၥ်မၢၤသဲစးတၢ်ဘျၢအသီအံၤအိၣ်ထီၣ်ဝဲအဖီခိၣ်,ဘၣ်ဃးတၢ်ဘျၢသဲစးအံၤတၢ်မၤလီၢ်တဖၣ်အပူၤ,တၢ်မၤခိၣ်နၢ်တဖၣ်လူၤပိၥ်မၤထွဲဝဲမ့တအိၣ်ဘၣ်န့ၣ်,ပှၤဟူးဂဲၤလၢခီကီၢ်ပှၤမၤတၢ်ဖိဂ့ၢ်ဝီတဖၣ်ကဘၣ်ဂဲၤလိၥ်ဝဲလၢတၢ်ဟ့ၣ်ခီဟ့ၣ်နီၤပှၤမၤတၢ်ဖိခွဲးယၥ်တၢ်သ့ၣ်ညါနၢ်ပၢၢ်တဖၣ်အသိး,ပှၤမၤတၢ်ဖိသ့ၣ်တဖၣ်စ့ၢ်ကီးကဘၣ်ဟူးဂဲၤဝဲလၢတၢ်ဃ့ထီၣ်က့ၤအနီၢ်ကစၢ်ဒၣ်ဝဲအခွဲးအယၥ်အဂ့ၢ်,ခီကီၢ်ပှၤမၤတၢ်ဖိဂ့ၢ်ဝီပှၤဘၣ်မူဘၣ်ဒါတဖၣ်စံးစ့ၢ်ကီးဝဲဒၣ်န့ၣ်လီၤ.

လါမ့ၤ ၂၉သီ,၂၀၂၅နံၣ်,ခ့ၣ်အဲးစံၣ်. ကညီဒီကလုၥ်စၢဖှိၣ်ကရၢ,သုးက့(၆),ဒူပျၥ်ယၤကီၢ်ရ့ၣ်,ကီးတရံးကီၢ်ဆၣ် တီနီၢ်မုၢ်ထီၣ်ဟီၣ်ကဝီၤ ကီၢ်ကၠီၣ်တဲၣ်-ကီၢ်သူလ့ၤကီၢ်ဆၢ ကနဲလ့ပယီၤသုးကလၢၤန့ၣ် ကညီဒီကလုၥ်တၢ်ထူၣ်ဖျဲးသုးဒိၣ်ဒီးကညီဒီကလုၥ်ဂၢၤသးကရၢ သုးရ့ၣ်(၈)တီခိၣ်ရိၣ်မဲသုးပၥ်ဖှိၣ်တဖၣ်ထီၣ်မၤန့ၢ်ကွံၥ်ဝဲလံအဂ့ၢ် KNLA ပှၤဘၣ်မူဘၣ်ဒါပၥ်ဂၢၢ်ပၥ်ကျၢၤဝဲဒၣ်န့ၣ်လီၤ. ကနဲလ့ပယီၤသုးကလၢၤဝဲန့ၣ်န့ၣ် ဘၣ်တၢ်စးထီၣ်ဒုးအီၤဖဲ လါမ့ၤ(၂၇)သီအနံၤဒီး ဖဲလါမ့ၤ(၂၈)သီအနံၤမုၢ်နၤခီ(၆)နၣ်ရံၣ်ဘျဲၣ်အဆၢကတီၢ်န့ၣ်တၢ်ထီၣ်မၤန့ၢ်ကွံၥ်အီၤအဂ့ၢ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၂၀၁)အသုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ်စီၤဘုဖီ စံးဘၣ်ဝဲ ခ့ၣ်အဲးစံၣ် ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲဒၣ်လၢ“ကနဲလ့သုးကလၢၤန့ၣ်တၢ်ထီၣ်န့ၢ်လံ. န့ၢ် န့ၣ်ကဘၣ်ဖဲဟါလီၤခီ (၆)နၣ်ရံၣ်(၇)နၣ်ရံၣ်ဆၢကတီၢ်န့ၣ်လီၤ.ဃ့ၢ်ဖျိးတနီၤ.ဖီၣ်န့ၢ်တနီၤဒီးသံတနီၤန့ၣ်လီၤ.စရီပတီၢ်န့ၣ်တၢ်မၤလီၤတံၢ်အီၤအဖၢမုၢ်န့ၣ်လီၤ.အဝဲသ့ၣ်အိၣ်ဘူးဒီးယိၤကီၢ်ဆၢအဃိန့ၣ်ဃ့ၢ်နုၥ်ဆူယိၤကီၢ်ပူၤန့ၣ်လီၤ.ပဖီၣ်န့ၢ်,အသံဒီးအဃ့ၢ်ဖျိးန့ၣ် ပယီၤသုးခဲလၢၥ်ကအိၣ် (၆၅)ဂၤမ့တမ့ၢ်(၆၆)ဂၤဖဲန့ၣ်လီၤ.”အဂ့ၢ်စံးဝဲဒၣ်န့ၣ်လီၤ. ကနဲလ့ပယီၤသုးကလၢၤဝဲအံၤန့ၣ် မ့ၢ်ဝဲဒၣ်...

လါမ့ၤ ၂၈ သီ, ၂၀၂၅ နံၣ်, ခ့ၣ်အဲးစံၣ် မဲးပြ့ခံပယီၤသုးကလၢၤလၢအပူၤကွံၥ်ဟီၣ်က၀ီၤ(သုးက့ ၁) ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ထီၣ်န့ၢ်၀ဲအံၤ လၢကထီၣ်မၤန့ၢ်က့ၤ၀ဲအဂီၢ်ပယီၤသုးမၤအါထီၣ်အသုးဂံၢ် ဘါလၢဘံလ့ဒီးနးကၠံတကပၤအါအါဂီၢ်ဂီၢ်အဂ့ၢ်န့ၣ် သုးက့ပှၤဘၣ်မူဘၣ်ဒါ စံး၀ဲအသိးသ့ၣ်ညါဘၣ်န့ၣ်လီၤ. မဲးပြ့ခံပယီၤသုးကလၢၤအံၤဖဲတနံၣ်အံၤလါဖ့ၤဘြူၤအါရံၤ ၁ သီအနံၤန့ၣ် ဟီၣ်က၀ီၤ(KNLA)သုးပၥ်ဖှိၣ်ထီၣ်မၤန့ၢ်၀ဲဒီး တကီၢ်ခါ ခဲအံၤ ပယီၤသုးအံၤလၢကဟဲက့ၤထီၣ်ဟဲန့ၢ်က့ၤသုးကလၢၤအံၤအဂီၢ် ဖဲအပူၤကွံၥ်(၂)နွံဃၣ်ဃၣ်အခါန့ၣ် လၢနးကၠံဒီးဘံလ့တကပၤ န့ၣ် အ၀ဲသ့ၣ်မၤအါထီၣ်အသုးနီၣ်ဂံၢ်(၄၀၀)ဃၣ်ဃၣ်အဂ့ၢ်န့ၣ် သုးက့ခိၣ် သုးခိၣ်ကျၢၢ်ဖိ...

လါမ့ၤ ၂၈ သီ, ၂၀၂၅ နံၣ်, ခ့ၣ်အဲးစံၣ် ဖဲတနံၤအံၤလါမ့ၤ ၂၈ သီ ဂီၤခီအဆၢကတီၢ်န့ၣ် ပယီၤသုးလၢကဟဲထီၣ်မၤစၢၤသ့ၣ်ဘီဘိသုးကလၢၤတဖၣ် တၢ်ခိးခးအီၤလၢ ကျဲအဃိသံအါအါဂီၢ်ဂီၢ်အမဲၥ်ညါဖီၣ်သမူန့ၢ်၀ဲအဂၤ(၁၀)ဘျဲၣ်အဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိ စံး၀ဲအသိး သ့ၣ်ညါဘၣ် န့ၣ်လီၤ. လၢကဟဲထီၣ်မၤစၢၤသ့ၣ်ဘီဘိသုးကလၢၤအဂီၢ် ဂီၤလ့ၤပယီၤသုးလၢအကဟဲထီၣ်မၤစၢၤတၢ်တဖၣ်အံၤဒီး (KNLA)သုးပၥ်ဖှိၣ် အဘၢၣ်စၢၤ ဖဲတဂီၤအံၤဒီတဂီၤန့ၣ်လၢဆိၣ်စံမၠဲၣ်(DKBA)နံၣ်ထီၣ်သီပျီကပၤန့ၣ် တၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်ဒီး တၢ်ဒုးဘျီ၀ဲ အံၤ အပူၤပယီၤသုးသံအါမးအမဲၥ်ညါတၢ်ဖီၣ်န့ၢ်၀ဲပယီၤသုးအဂၤ(၁၀)ဘျဲၣ်ဒီးမၤန့ၣ်၀ဲကျိချံပှၥ်သၣ်အါမး...

လါမ့ၤ ၂၈သီ, ၂၀၂၅နံၣ်, ခ့ၣ်အဲးစံၣ်, ကီၢ်ကၠီၣ်တဲၣ်-ကညီကီၢ်စဲၣ်ကီၢ်ဆၢဘၣ်ကီဘၣ်ခဲဒဲကဝီၤတဖၣ်အပူၤ(Standard)ပှၤပတီၢ်မုၢ်ဖိကရူၢ်အဟံၣ်ဖိဃီဖိတဖၣ်အံၤစးထီၣ်ဖဲလါယူၤဒီးလါယူၤလံအပူၤကဒိးန့ၢ်ဘၣ်အါထီၣ်က့ၤဝဲတၢ်အီၣ်တၢ်အီအပှ့ၤလၢ(၂)လါအတီၢ်ပူၤအဂ့ၢ်,(TBC)ဘိးဘၣ်ရၤလီၤဝဲဖဲအပူၤကွံၥ်လါမ့ၤ(၂၆)သီအနံၤအပူၤန့ၣ်လီၤ. ဘၣ်ကီဘၣ်ခဲဒဲကဝီၤအပူၤ(Standard)ပှၤပတီၢ်မုၢ်ဖိသ့ၣ်တဖၣ်အံၤ,အပူၤကွံၥ်လါအ့ဖြ့ၣ်ဒီးလါမ့ၤအပူၤတၢ်အီၣ်တၢ်အီတၢ်မၤစၢၤလီၤစှၤကွံၥ်ဝဲအဃိသဂၢၢ်ဘၣ်ဝဲတၢ်ဃံးတၢ်စ့ၤအဖီခိၣ်,ဘၣ်ဃးဒီးတၢ်အီၣ်တၢ်အီတၢ်ဆီၣ်ထွဲမၤစၢၤအဂ့ၢ်အံၤ(TBC)ပၥ်သူၣ်ပၥ်သးဝဲအဂ့ၢ်,လံၥ်ထုးထီၣ်ပၥ်ဖျါအပူၤပၥ်ဖျါဝဲဒၣ်န့ၣ်လီၤ. ဘၣ်ဃးဒီး(TBC)အတၢ်ဒုးသ့ၣ်ညါဝဲတၢ်ကဟ့ၣ်အါထီၣ်က့ၤပှၤပတီၢ်မုၢ်ဖိအဟံၣ်ဖိဃီဖိတၢ်အီၣ်အပှ့ၤလၢဒဲကဝီၤတဖၣ်အပူၤအံၤအဖီခိၣ်,မဲၢ်လးကညီဘၣ်ကီဘၣ်ခဲဒဲကဝီၤနဲၣ်ရွဲၣ်(သရၣ်စီၤစၢဒ့)စံးဝဲဒ်အံၤန့လီၤ. “တၢ်တခါအံၤခီဒု(TBC)ဘိးဘၣ်သ့ၣ်ညါဝဲဒဲကဝီၤကိးဘ့ၣ်ဒဲးလီၤ.ဒဲကဝီၤအပူၤပှၤ(Standard)ဟံၣ်ဖိဃီဖိတဖၣ်န့ၣ်ခံလါအတီၢ်ပူၤဒုကဒိးန့ၢ်အါထီၣ်တၢ်အီၣ်ပှ့ၤကျိၣ်စ့တဆံးတက့ၢ်ကိးဂၤဒဲးလီၤ.တၢ်ဒုးသ့ၣ်ညါပှၤန့ၣ်မ့ၢ်ဒၣ်လါယူၤဒီးလါယူၤလံ(၂)လါအတီၢ်ပူၤလီၤ.ဘၣ်ဆၣ်မ့မ့ၢ်လါအီကၢးတခီတၢ်စံးဆၢတအိၣ်လီၤတံၢ်လီၤဆဲးဒံးဘၣ်.နါက့အဝဲသ့ၣ်ကမၤလၢအဂ့ၤကတၢၢ်”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,တၢ်ဟ့ၣ်အါထီၣ်ဝဲတၢ်အီၣ်ပှ့ၤစ့တၢ်မၤစၢၤအံၤမ့ၢ်ဒၣ်ထဲ(Standard)ပှၤပတီၢ်မုၢ်ဖိတဖၣ်အဂီၢ်ဒီးဒဲကဝီၤအပူၤဟံၣ်ဖိဃီဖိပတီၢ်လၢတၢ်ပၥ်ပနီၣ်အီၤအဂၤတဖၣ်တခီကဒိးန့ၢ်ဘၣ်ဝဲတၢ်အီၣ်ပှ့ၤဒ်သိးအပူၤကွံၥ်လီၢ်လီၢ်လီၤအဂ့ၢ်(TBC)ပၥ်ဖျါစ့ၢ်ကီးဝဲဒၣ်န့ၣ်လီၤ. လၢတၢ်န့ၣ်အဃိ,လါယူၤဒီးလါယူၤလံအပူၤကက့ၤဒိးန့ၢ်ဘၣ်အါထီၣ်ကဒါက့ၤဝဲတၢ်အီၣ်ပှ့ၤတဆံးတက့ၢ်အဖီခိၣ်နိၣ်ဖိဒဲကဝီၤ(Standard)ပှၤပတီၢ်မုၢ်ဖိဟံၣ်ဖိဃီဖိအကျါတဂၤစံးဝဲဒၣ်ဒ်အံၤန့ၣ်လီၤ. “တၢ်အီၣ်ပၠးသီသီခါဒုလီၤဘၣ်တၢ်ကီတၢ်ခဲညါတနီၤနီၤမၢ်လိၥ်အီၣ်က့ၤလၢပုၢ်ဝဲၢ်အိၣ်ကီၢ်ပယီၤကီၢ်ဆၢတဖၣ်န့ၣ်အအိၣ်အိၣ်ဝဲလီၤ.ဘၣ်ဆၣ်ဟုဘ့ၣ်ဟုသးနါက့ပမၢ်လိၥ်အါအါတန့ၢ်ဘၣ်,ဖဲပၢချၢတြဲၤန့ၣ်ပှၤတအဲၣ်ပစိၥ်အါအါဘၣ်.အဃိပအိၣ်ဘူးလိၥ်သးတဖၣ်န့ၣ်ပနီၤလိၥ်သးပဟ့ၣ်အီၣ်လိၥ်သးကဒဲကဒဲအံၤဒ်အံၤလီၤ.တနီၤဒုဒ့ၣ်ထီၣ်ကမၢ်ထီၣ်အိၣ်ဝဲလီၤ.အအံၤပကက့ၤန့ၢ်အါထီၣ်တၢ်အီၣ်ပှ့ၤဒုပသးခုဝဲ,ပသးခုဝဲလၢပကလိၥ်ဘၣ်က့ၤပကမၢ်,ဒီးပပှ့ၤအီၣ်က့ၤတၢ်ကန့ၢ်အါထီၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ. ဘၣ်ကီဘၣ်ခဲဒဲကဝီၤတဖၣ်အပူၤ(Standard)ပှၤပတီၢ်မုၢ်ဖိတဖၣ်အဂီၢ်တၢ်အီၣ်တၢ်မၤစၢၤလီၤစှၤကွံၥ်ဝဲအလီၢ်ခံ,(TBC)ပှၤဘၣ်မူဘၣ်ဒါသ့ၣ်တဖၣ်အံၤ,တ့ၢ်တဟီၣ်ထီၣ်အသးဒီးကျဲးစၢးမၤတၢ်ကိးဆၢကတီၢ်ဒဲးလၢကမၤပှဲၤဝဲတၢ်လီၤဟိလီၤဖျဲၣ်တဖၣ်အိၣ်ဝဲဘၣ်ဆၣ်,တဒိးန့ၢ်ဘၣ်ဝဲတၢ်တိစၢၤမၤစၢၤကျိၣ်စ့တဖၣ်ဒံးအဃိ,ရဲၣ်ကျဲၤက့ၤဝဲလၢကျိၣ်စ့လၢအိၣ်တ့ၢ်ဒံးသ့ၣ်တဖၣ်အကျါ,လၢတၢ်ကမၤစၢၤက့ၤ(Standard)ပှၤပတီၢ်မုၢ်ဟံၣ်ဖိဃီဖိသ့ၣ်တဖၣ်အဂီၢ်အဂ့ၢ်,ပၥ်ဖျါဝဲလၢလံၥ်ထုးထီၣ်ပၥ်ဖျါအပူၤန့ၣ်လီၤ. တကတီၢ်ဃီ,တၢ်အီၣ်တၢ်မၤစၢၤလၢတၢ်က့ၤဟ့ၣ်အါထီၣ်ဝဲသ့ၣ်တဖၣ်အံၤ(TBC)နၥ်ဝဲလၢကမၤကဆှၣ်လီၤကမျၢၢ်တၢ်ဆီၣ်သနံးတဖၣ်တဆံးတက့ၢ်အဂ့ၢ်,လံၥ်ပၥ်ဖျါပူၤပၥ်ဖျါဝဲဒၣ်စ့ၢ်ကီးန့ၣ်လီၤ. ဒ်န့ၣ်အသိး,ဒ်သိးကဘှါရှဲဝဲဒဲကဝီၤကမျၢၢ်တဖၣ်အတၢ်ဃံးတၢ်စ့ၤအဂီၢ်,ခါဆူညါဒ်သိးဒဲကဝီၤဖိတဖၣ်ဟးထီၣ်ဖံးအီၣ်မၤအီၣ်တၢ်လၢတၢ်ချၢလၢအဖိးသဲးစးကန့ၢ်အဂီၢ်တကီၢ်ခါခဲအံၤ(TBC)ပှၤဘၣ်မူဘၣ်ဒါဒီး(KRC)ပှၤဘၣ်မူဘၣ်ဒါတဖၣ်ဂုၥ်ကျဲးစၢးကတိၤန့ၢ်ခဲးတၢ်ဆူကၠီၣ်တဲၣ်ခိၣ်နၢ်ပှၤဘၣ်မူဘၣ်ဒါတဖၣ်အအိၣ်အဖၢမုၢ်ပူၤအသိး,ခါဆူညါအိၣ်ဝဲဒီးတၢ်တိၥ်ကျဲၤလၢတၢ်ကဒုးအိၣ်ထီၣ်တၢ်စုသ့ခီၣ်ဘၣ်တၢ်မၤလိကၠိဒီးနီၢ်ခိတၢ်လုၢ်အီၣ်သးသမူတၢ်မၤလိကၠိတဖၣ်လၢဒဲကဝီၤကမျၢၢ်တဖၣ်အဂီၢ်အိၣ်ဝဲအဂ့ၢ်,ဒဲကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ....

လါမ့ၤ ၂၇ သီ, ၂၀၂၅ နံၣ်, ခ့ၣ်အဲးစံၣ် ဒူပျယၥ်ကီၢ်ရ့ၣ်,ကီးတရံးကီၢ်ဆၣ်ဟီၣ်ကဝီၤအပူၤဖဲမဟါလါမ့ၤ(၂၆)သီအနံၤဖဲမုၢ်ထူၣ်အဆၢကတီၢ်န့ၣ်ပယီၤသုးကီၣ်ကးဟဲတ့ၢ်လီၤန့ၢ်ဝဲအပှၤဒုးယၤတၢ်ပၢဆှၢရဲၣ်ကျဲၤဝဲၤလီၢ်ခိၣ်သ့ၣ်(စကခ-၁၂), ခီၣ်သုးရ့ၣ်(ခလရ-၁၂)ဒီးမျိၥ်သုးရ့ၣ်တဖၣ် တၢ်အီၣ်တၢ်အီ, တၢ်စု ကဝဲၤကျိချံပှၥ်သၣ်သ့ၣ်တဖၣ်လၢကဘီယူၤတဆီအဂ့ၢ်လီၢ်ကဝီၤဖိလၢထံၣ်ဘၣ်တဖၣ်စံးဝဲန့ၣ်လီၤ. ပယီၤသုးကီၣ်ကးကဘီယူၤဝဲအံၤဖဲလါမ့ၤ(၂၆)သီအနံၤဖဲမုၢ်ထူၣ်ထီၣ်အဆၢကတီၢ်ဟဲတ့ၢ်လီၤန့ၢ်ဝဲအပှၤတၢ်အီၣ်တၢ်အီ,တၢ်စုကဝဲၤ,ကျိချံပှၥ်သၣ်တၢ်ဘိၣ်သ့ၣ်တဖၣ်ဒ်အံၤလီၤဒီးတၢ်ဆၢကတီၢ်တံၥ်တၥ်ဝဲလၢ(၂)နၣ်ရံၣ်အတီၢ်ပူၤအဂ့ၢ်ကမျၢၢ်လီၢ်ကဝီၤဖိလၢအထံၣ်ထွဲဝဲတဂၤစံးဝဲဒ်အံၤန့ၣ်လီၤ. "ဖဲမုၢ်ဂီၤခီအဆၢကတီၢ်န့ၣ် ပယီၤသုး (စကခ-၁၂) ခးလီၤဝဲကျိဖးဒိၣ်လၢဒူသဝီအပူၤလီၤ. ဖဲန့ၣ်ဝံၤအလီၢ်ခံ ဘၣ်ဖဲ မုၢ်ထူၣ်(၁၂)နၣ် ရံၣ်ဘျဲၣ်အဆၢကတီၢ်န့ၣ်ကဘီယူၤဟဲယူၤဝဲဖဲ(စကခ-၁၂)အိၣ်တၢ်လီၢ်,(ခလရ-၂၃၀)သုးရ့ၣ်,မျိၥ်သုးရ့ၣ်အိၣ်တၢ်လီၢ်အဖီခိၣ်ဒီးဟဲ တ့ၢ်လီၤဝဲတၢ်ဘိၣ်အါအါဂီၢ်ဂီၢ်လီၤ. ဟဲယူၤဝ့ၢ်ဝီတဘျီတ့ၢ်လီၤတဘျီဒ်န့ၣ်တံၥ်တ့ၥ်ဝဲ(၂)နၣ်ရံၣ်ဃၣ်ဃၣ်ညါလီၤ." အဂ့ၢ်စံးဝဲဒၣ်န့ၣ် လီၤ. ပယီၤသုးကဘီယူၤလၢဟဲတ့ၢ်လီၤန့ၢ်ဝဲအပှၤတၢ်အီၣ်တၢ်အီ,တၢ်စုကဝဲၤ,ကျိချံပှၥ်သၣ်တၢ်ဘိၣ်သ့ၣ်တဖၣ်အံၤဝံၤအလီၢ်ခံကဘီယူၤဝဲန့ၣ်န့ၣ်က့ၤယူၤကဒါက့ၤဝဲဆူမီၣ်လမၠဲၣ်ဝ့ၢ်တကပၤအဂ့ၢ်န့ၣ်ပှၤလီၢ်ကဝီၤဖိဝဲန့ၣ်စံးအါထီၣ်ဝဲဒၣ်န့ၣ်လီၤ. လၢန့ၣ်အမဲၥ်ညါပယီၤသုးရ့ၣ်သ့ၣ်တဖၣ်လၢအိၣ်ကီးတရံးဟီၣ်ကဝီၤအပူၤခးလီၤဝဲကျိဖးဒိၣ်ဆူ...

လါမ့ၤ ၂၇ သီ, ၂၀၂၅ နံၣ်, ခ့ၣ်အဲးစံၣ် မုၢ်တြီၢ်ကီၢ်ရ့ၣ်သုးက့နီၣ်ဂံၢ်(၅)ဟီၣ်ကဝီၤ, ဒွဲၣ်လိၣ်ကီၢ်ဆၣ်အပူၤ ဖဲအပူၤကွံၥ်စှၤသီအတီၢ်ပူၤအံၤန့ၣ်ပယီၤသုးကီၣ်ကးအသုးကျိၤဟဲ ထီၣ်မၤပှဲၤအသုးဂံၢ်ဘါဖဲ(BGF ၁၀၁၃)သုးတၢ်လီၢ်ဝံၤအလီၢ်ခံပယီၤသုးသ့ၣ်တဖၣ်အံၤမၤဝဲတၢ်ဟးတ့ၢ်လီၤဝဲဒြိမ့ၣ်ပိၢ်ဟဲအါထီၣ်ဝဲအ ဂ့ၢ်သ့ၣ်ညါဘၣ်လၢမုၢ်တြီၢ်အပှၤဘၣ်မူဘၣ်ဒါအအိၣ်န့ၣ်လီၤ. ပယီၤသုးဟဲထီၣ်မၤပှဲၤအသုးဂံၢ်ဘါဖဲ(BGF ၁၀၁၃)သုးတၢ်လီၢ်ဝံၤအလီၢ်ခံပယီၤသုးအံၤမၤဝဲတၢ်ဟးတ့ၢ်လီၤဒြိမ့ၢ်ပိၢ်ဟဲအါထီၣ်အမဲၥ် ညါပယီၤသုးဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သ့ၣ်တဖၣ်အဘၢၣ်စၢၤအံၤတကီၢ်ခါခဲအံၤအိၣ်လၢတၢ်ကွၢ်ဆၢၣ်မဲၥ်လိၥ်အသးခံခီယၢ်ဘးပူၤအဃိတၢ်ဒုးတၢ်ယၤကဲထီၣ်သ့ဝဲအဂ့ၢ်မုၢ်ြတီၢ်ကီၢ်ရ့ၣ်အပှၤကတိၤတၢ်ပၢသုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်စံးဝဲဒ်အံၤန့ၣ်လီၤ. "ခဲအံၤဆၢကတီၢ်ခီဒု အိၣ်လၢတၢ်ကွၢ်ဆၢၣ်မဲၥ်လိၥ်သးအပူၤလီၤ. ပယီၤသုးအံၤမ့ၢ်စးထီၣ်ဟူးဂဲၤဒုတၢ်ခးလိၥ်အသးအိၣ်ထီၣ်ဝဲလီၤ. ပယီၤသုးကီၣ်ကးတကပၤနါက့အဒြိသ့ၣ်တဖၣ်န့ၣ်ဟးထီၣ်လၢအသုးကလၢၤအပူၤဒီးဟးတ့ၢ်လီၤတၢ်ဖဲတၢ်ခိၣ်တၢ်ဃၢၤ, တၢ်ကပိၥ် ကပၤဒီးပၢၢ်တုၤလၢဒူသဝီအပူၤအါထီၣ်ဝဲန့ၣ်လီၤ. " အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ပယီၤသုးကျိၤလၢအဟဲထီၣ်သ့ၣ်တဖၣ်အံၤဟဲထီၣ်နုၥ်လီၤဟံးန့ၢ်က့ၤဝဲဒၣ်တၢ်လီၢ်ဖဲ(BGF ၁၀၁၃)သုးတၢ်လီၢ်အပူၤလီၤဒီးမ့မ့ၢ်လၢပ...

လါမ့ၤ ၂၆ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ချၢၣ်လွံၢ်ထူၣ်ကီၢ်ရ့ၣ်,လၢၢ်ဒိၣ်ကီၢ်ဆၣ်ဟီၣ်ကဝီၤအပူၤ ဖဲမဟါလါမ့ၤ(၂၅)သီအနံၤ,ဖဲ(ကၠိကၠံ)သဝီအပူၤန့ၣ်ခီဖျိပယီၤသုး ကီၣ်ကးကဘီယူၤဟဲတ့ၢ်လီၤပီၢ်(၅၀၀)မ့ၣ်ပိၢ်ခံဖျၢၣ်,ဘၣ်ဖဲတၢ်ဖျီမူးကတီၢ်အဃိပှၤသံဘၣ်ဒိဘၣ်ထံးခဲလၢၥ်အဂၤ(၅၀)ဃၣ်ဃၣ်အကျါပၣ်ဃုၥ်တလးမူးပိၥ်မုၣ်အဂ့ၢ်ခ့ၣ်အဲၣ်ယူၣ်ချၢၣ်လွံၢ်ထူၣ်ကီၢ်ရ့ၣ်ပၥ်ဖျါဝဲဖဲတနံၤအံၤလါမ့ၤ(၂၆)သီအနံၤန့ၣ်လီၤ. ဖဲမဟါဂီၤခီ(၉)နၣ်ရံၣ်ဃၣ်ဃၣ်အဆၢကတီၢ်န့ၣ်ခီဖျိပယီၤသုးကီၣ်ကးကဘီယူၤဟဲတ့ၢ်လီၤပီၢ်(၅၀၀)မ့ၣ်ပိၢ်ဖဲ(ကၠိကၠံ)သဝီပူၤဘၣ်ဖဲတၢ်မၤဝဲတၢ်ဖျီမူးတၢ်ရဲၣ်တၢ်ကျဲၤအတီၢ်ပူၤအဃိကမျၢၢ်ပှၤသဝီဖိဘၣ်သံ(၁၂)ဂၤအကျါပၣ်ဃုၥ်တလၤမူးပိၥ်မုၣ်တဂၤဒီးဖိသၣ်(၅)နံၣ်(၂)ဂၤဒီးပှၤဘၣ်ဒိစ့ၢ်ကီးဝဲ(၃၇)ဂၤအကျါပၣ်ဃုၥ်ဖိသၣ်လၢသးနံၣ်တပှဲၤ(၁၃)ဂၤအဂ့ၢ်ဒ်ချၢလွံၢ်ထူၣ်ကီၢ်ရ့ၣ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ. "တၢ်ကဲထီၣ်အသးအံၤဖဲဂီၤခီအဆၢကတီၢ်န့ၣ်လီၤ. ကဘီယူၤန့ၣ်ဟဲတ့ၢ်လီၤမ့ၣ်ပိၢ်ပီၣ်(၅၀၀)ခံဖျၢၣ်ဖဲ(ကၠိကၠံ)သဝီတၢ်ဖျီအလီၢ်န့ၣ်မီၤ နီၤ. ပှၤသံအကျါပၣ်ဃုၥ်တလၤမူးပိၥ်မုၣ်လီၤ." အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ပယီၤသုးကီၣ်ကးကဘီယူၤဟဲတ့ၢ်လီၤမ့ၣ်ပိၢ်တဘျီအံၤအပူၤန့ၣ်ကမျၢၢ်ပှၤလီၢ်ကဝီၤဖိလၢဘၣ်သံဝဲသ့ၣ်တဖၣ်အကျါပၣ်ဃုၥ်ဝဲဖိဒံဖိသၣ်လၢအသးနံၣ်တပှဲၤဒံးသ့ၣ်တဖၣ်ဒီးပှၤလၢဘၣ်ဒိဘၣ်ထံး(၃၇)ဂၤသ့ၣ်တဖၣ်အံၤဘၣ်ဒိဝဲနးနးကျံးကျံးအိၣ်လၢတၢ်လီၤဘၣ်ယိၣ်ပူၤအိၣ်ဝဲအဂ့ၢ်သ့ၣ်ညါဘၣ်န့ၣ်လီၤ. ဘၣ်ထွဲဒီးပယီၤသုးကီၣ်ကးကဘီယူၤဟဲတ့ၢ်လီၤမ့ၣ်ပိၢ်တၢ်ကဲထီၣ်အသးဖဲချၢၣ်လွံၢ်ထူၣ်ကီၢ်ရ့ၣ်,လၢၢ်ဒိၣ်ကီၢ်ဆၣ်,ဖဲကၠိကၠံသဝီတၢ်လီၢ်အပူၤအံၤန့ၣ်မ့ၢ်ဟီၣ်ကဝီၤတၢ်လီၢ်လၢတၢ်ဒုးတၢ်ယၤကဲထီၣ်အသးတအိၣ်နီမံၤဘၣ်ဒီးပယီၤသုးအံၤအိၣ်ဒၣ်ဟဲတ့ၢ်လီၤဝဲမ့ၣ်ပိၢ်ဒီးကဘီယူၤဒ်အံၤလီၤအဂ့ၢ်လီၢ်ကဝီၤဂံၢ်ခီၣ်ထံးတၢ်ကစီၣ်စံးဝဲန့ၣ်လီၤ. ဖဲလါမ့ၤ(၂၃)သီအနံၤစ့ၢ်ကီးန့ၣ်ပယီၤသုးခီၣ်ချ့သုးရ့ၣ်လၢအမ့ၢ်(ခမရ-၃၀၇)အံၤခးလီၤဝဲ(ဟီၤဝ့ၤစၤ)ကျိဖးဒိၣ်ဆူလၢၢ်ဒိၣ်ကီၢ်ဆၣ်,ဖဲ (တီကိ)သဝီပူၤအဃိဘၣ်သံစ့ၢ်ကီးဝဲပှၤလီၢ်ကဝီၤသဝီဖိ(၂)ဂၤအကျါပၣ်ဃုၥ်ပှၤလီၢ်အိၣ်ကမှံဖိပိၥ်မုၣ်တဂၤအဂ့ၢ်ခ့ၣ်အဲၣ်ယူၣ်ချၢၣ်ကီၢ်ရ့ၣ်စံးဝဲဒၣ်န့ၣ်လီၤ. ခ့ၣ်အဲၣ်ယူၣ်ချၢၣ်လွံၢ်ထူၣ်ကီၢ်ရ့ၣ်ဟီၣ်ကဝီၤအပူၤပယီၤသုးကီၣ်ကးသ့ၣ်တဖၣ်ပၥ်ပနီၣ်ဝဲကမျၢၢ်ပှၤလီၢ်ကဝီၤဖိသ့ၣ်တဖၣ်ဒ်တၢ်ခးပနီၣ်အသိးဒီးမၤဝဲကလံၤကျါကဘီယူၤတၢ်ဟဲခးလီၤတၢ်ဒီးခးလီၤစိကျိဖးဒိၣ်သ့ၣ်တဖၣ်အိၣ်ဝဲခဲအံၤခဲအံၤအဃိကမျၢၢ်ပှၤလီၢ်ကဝီၤဖိသ့ၣ်တဖၣ်ဘၣ်သံဘၣ်ပှၢ်,ဘၣ်ဒိဘၣ်ထံးအိၣ်ထီၣ်ဝဲဒီးဘၣ်ဃ့ၢ်ပူၤဖျဲးအသးဘၣ်လဲၤအိၣ်ကဒုအသးဆူတၢ်ဘံၣ်တၢ်ဘၢအလီၢ်န့ၣ်လီၤ.