ချၢၣ်လွံၢ်ထူၣ်ကီၢ်ရ့ၣ်ယဲၢ်လါအတီၢ်ပူၤကမျၢၢ်သံ(၅၃)ဂၤ ဘၣ်ဒိ(၁၀၀)ဂၤဘျဲၣ်အဂ့ၢ်
လါယူၤ ၁၄ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ် သုးက့(၃)ဟီၣ်က၀ီၤ လၢၢ်ဒိၣ်ကီၢ်ဆၣ်ႇ ဆီထံးကီၢ်ဆၣ်ဒီး မူကီၢ်ဆၣ်ကီၢ်ဆၣ်သၢဘ့ၣ်လၢၤအပူၤ စးထီၣ်လါယနူၤအါရံၤ(၂၀၂၄)နံၣ်တုၤလါမ့ၤလၢယဲၢ်လါအတီၢ်ပူၤအံၤ ခီဖျိပယီၤသုးကီၣ်ကးခးလီၤကျိဖးဒိၣ်ဒီးအကဘီယူၤဟဲတ့ၢ်လီၤမ့ၣ်ပိၢ်အဃိဘၣ်သံကမျၢၢ်(၅၃)ဂၤဒီးဘၣ်ဒိ၀ဲ(၁၀၀)ဂၤဘျဲၣ်အဂ့ၢ်ချၢၣ်လွံၢ်ထူၣ်ကီၢ်ရ့ၣ်အၦၤဘၣ်မူဘၣ်ဒါစံး၀ဲန့ၣ်လီၤႉ ပယီၤသုးကီၣ်ကးအံၤကိးနံၤဒဲးဃၣ်ဃၣ်န့ၣ်ဟူးဂဲၤခးလီၤ၀ဲကျိဖးဒိၣ်ဆူကမျၢၢ်ဒူသ၀ီတၢ်လီၢ်တၢ်ကျဲႇ တၢ်ဖံး အီၣ်မၤအီၣ်လီၢ်ပူၤဒ်အံၤအဖီခိၣ်လၢယဲၢ်လါအတီၢ်ပူၤကမျၢၢ်ဘၣ်သံ(၅၃)ဂၤအကျါပိာ်မုၣ်ပာ်ဃုာ်၀ဲ(၂၂)ဂၤအသိးကမျၢၢ်လၢဘၣ်ဒိဘၣ်ထံး(၁၅၄)ဂၤအကျါပိာ်မုၣ်ဘၣ်ဒိစ့ၢ်ကီး၀ဲ(၆၈)ဂၤအဂ့ၢ်ချၢၣ်လွံၢ်ထူၣ်ကီၢ်ရ့ၣ်ၦၤကတိၤတၢ်ပၢပဒိၣ်စီၤဟဲဂ့ၤစံးဘၣ်၀ဲခ့ၣ်အဲးစံး-ကညီတၢ်ကစီၣ်န့ၣ်လီၤႉ “ပမ့ၢ်ကွၢ်က့ၤဒုၣ်ဒါတၢ်ဟူးတၢ်ဂဲၤန့ၣ်ခးလီၤ၀ဲကျိဖးဒိၣ်ကိးနံၤဒဲးဃၣ်ဃၣ်လၢဒူသ၀ီအပူၤလီၤႉ ပမ့ၢ်ကွၢ်က့ၤ စးထီၣ်(၂၀၂၄)နံၣ်တုၤလၢလါမ့ၤအတီၢ်ပူၤန့ၣ်ဒုၣ်ဒါခးလီၤကျိဖးဒိၣ်အဃိန့ၣ်ကမျၢၢ်ဘၣ်သံ(၅၃)ဂၤအကျါန့ၣ်ပိာ်ခွါန့ၣ်(၃၁)ဂၤဒီးပိာ်မုၣ်န့ၣ်(၂၂)ဂၤမီၤနီၤႉ ကမျၢၢ်လၢအဘၣ်ဒိန့ၣ်အိၣ်၀ဲဒၣ်(၁၅၄)ဂၤအကျါန့ၣ်ပိာ်ခွါပာ်၀ဲ (၈၆)ဂၤဒီးပိာ်မုၣ်န့ၣ်(၆၈)ဂၤမီၤနီၤႉ” အဂ့ၢ်န့ၣ်စံး၀ဲဒၣ်န့ၣ်လီၤႉ လၢန့ၣ်အမဲာ်ညါပယီၤသုးကီၣ်ကးအံၤဖီၣ်၀ဲကမျၢၢ်ထံဖိကီၢ်ဖိလၢလဲၤက့ၤၦ့ၤအီၣ်ၦ့ၤအီတၢ်မ့ၢ်ဂ့ၤႇ လ့ၢ်ထီၣ် လ့ၢ်လိၤသ့ၣ်တဖၣ်မ့ၢ်ဂ့ၤခဲလၢာ်အိၣ်၀ဲ(၂၈)ဂၤဒီးၦၤသ့ၣ်တဖၣ်န့ၣ်သုးကီၣ်ကးဃ့အီၣ်လီၤ၀ဲလၢကျိၣ်စ့၀ံၤပျၢ်လီၤက့ၤ၀ဲတနီၤအိၣ်၀ဲအသိးတနီၤန့ၣ်တန့ၢ်ဘၣ်တၢ်ဆဲးကျိၤဘၣ်ဒီးဟါမၢ်ကွံာ်၀ဲဒၣ်အိၣ်၀ဲအဂ့ၢ်ပဒိၣ်စီၤဟဲဂ့ၤစံးအါထီၣ်၀ဲဒၣ်န့ၣ်လီၤႉ တကးဒံးဘၣ်လၢယဲၢ်လါအတီၢ်ပူၤခီဖျိသုးကီၣ်ကးခးလီၤကျိဖးဒိၣ်အဃိဘၣ်ဟးဂီၤကွံာ်၀ဲကမျၢၢ်ဟံၣ်ဃီမ့ၢ်ဂ့ၤႇ ပယီၤသုးကီၣ်ကးနုာ်လီၤလၢကမျၢၢ်ဒူသ၀ီအပူၤဒွဲၣ်အူကွံာ်၀ဲကမျၢၢ်ဟံၣ်ဃီမ့ၢ်ဂ့ၤခဲလၢာ်အိၣ်၀ဲ(၂၀၅)ဖျၢၣ် အဂ့ၢ်သ့ၣ်ညါဘၣ်န့ၣ်လီၤႉ ဒ်န့ၣ်အသိးဖဲပူၤကွံာ်လါမ့ၤအတီၢ်ပူၤပယီၤသုးကီၣ်ကးအသုးကလၢၤတဖျၢၣ်လၢအမ့ၢ်(ဘီကထၣ်)သုးကလၢၤအံၤဖဲလၢတၢ်လဲၤက၀ီၤတံာ်ခး၀ဲဒီးဘၣ်ဂုာ်က့ၤ၀ဲအခံ၀ံၤအလီၢ်ခံပယီၤသုးကီၣ်ကး(ကီၢ်ခီဒိၣ်အခိၣ်ခံဂၤတဂၤ)အနီၢ်ကစၢ်ဒၣ်၀ဲဟဲထီၣ်ဟူးဂဲၤမၤ၀ဲဒုးယၤတၢ်ရဲၣ်တၢ်ကျဲၤအဂ့ၢ်ပဒိၣ်စီၤဟဲဂ့ၤစံး၀ဲဒ်အံၤန့ၣ်လီၤႉ “တၢ်လဲၤက၀ီၤတံာ်ခး၀ဲသုးကီၣ်ကး(ဘီကထၣ်)သုးကလၢၤ၀ံၤဒီးသုးကီၣ်ကးဂုာ်က့ၤအခံ၀ံၤအလီၢ်ခံန့ၣ်အ၀ဲသ့ၣ်မၤအါထီၣ်အဂံၢ်ဘါဒီးမၤ၀ဲဒၣ်ဒုးယၤတၢ်ရဲၣ်တၢ်ကျဲၤသ့ၣ်တဖၣ်လီၤႉ လၢဒုးယၤတၢ်ရဲၣ်တၢ်ကျဲၤအပူၤန့ၣ် ပမ့ၢ်ကွၢ်န့ၣ်သုးကီၣ်ကးကီၢ်ခီဒိၣ်အခိၣ်ခံဂၤတဂၤအနီၢ်ကစၢ်ဒၣ်၀ဲဟဲဆ့ၣ်နီၢ်၀ဲလၢဆီထံးကီၢ်ဆၣ်ဒီးတီခိၣ်ရိၣ်မဲဒီးရဲၣ်ကျဲၤ၀ဲဒၣ်လီၤ” အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ဒ်န့ၣ်အသိးပယီၤသုးကီၣ်ကးအသုးကျိၤလၢအဟဲထီၣ်သ့ၣ်တဖၣ်တကီၢ်ခါခဲအံၤန့ၣ်ဟူးဂဲၤအိၣ်ဒံး၀ဲဒၣ်ဖဲ ကီၢ်သၣ်စ့ႇ ကိမၠ့ၣ်သါယၤႇ ရှူၣ်ခ့သါယၤ ဒူသ၀ီဖဲန့ၣ်သ့ၣ်တဖၣ်အပူၤအသိးနုာ်လီၤဒွဲၣ်အူကွံာ်ကမျၢၢ်ဒူသ၀ီ ဒီးၦၤလီၢ်အိၣ်ကမှံဖိ သ့ၣ်တဖၣ်အိၣ်တၢ်အလီၢ်အဃိတကီၢ်ခါခဲအံၤၦၤလီၢ်အိၣ်ကမှံသ့ၣ်တဖၣ်ဘၣ်ကွၢ်ဆၢ မဲာ်ဘၣ်၀ဲဒီးတၢ်အိၣ်တၢ်ဆိးႇ တၢ်အီၣ်တၢ်အီၣ်ဒီးကသံၣ်ကသီတၢ်ဂ့ၢ်ကီအဂ့ၢ်သ့ၣ်ညါဘၣ်လၢလီၢ်က၀ီၤၦၤ ဘၣ်မူဘၣ်ဒါအအိၣ်န့ၣ်လီၤႉ
ကမၤန့ၢ်တၢ်သဘျ့အဂီၢ်ကညီဖိခဲလၢာ်ကမၤသကိးတၢ်အိၣ်ဒီးတၢ်ပညိၣ်တခါဃီအဂ့ၢ် (KTLA)စံး၀ဲ
လါယူၤ ၁၄ သီႇ ၂၀၂၄ နံၣ်ႇ ခ့ၣ်အဲးစံၣ် တနံၤအံၤလါယူၤ ၁၄ သီအနံၤန့ၣ် မ့ၢ်၀ဲဒၣ်ကီၢ်သူလ့ၤမုၢ်နံၤၦဲၤထီၣ်၀ဲဒၣ်(၇၅)နံၣ်ဒီး လၢမုၢ်နံၤအံၤအဖီခိၣ် ကညီကီၢ်ကအိၣ်ဖျါထီၣ်က့ၤဒီးကမၤန့ၢ်က့ၤတၢ်သဘျ့အဂီၢ် ကညီဖိတဖၣ်အလီၢ်အိၣ်လၢကမၤသကိးတၢ် အိၣ်ဒီးတၢ်ပညိၣ်တခါဃီလၢကမၤန့ၢ်က့ၤကီၢ်သူလ့ၤအဂ့ၢ်န့ၣ် ကီၢ်သူလ့ၤသုးမုၢ်ဒိၣ်(KTLA) သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤနၢၤဒါဘိၣ်မၠး စံးလီၤ၀ဲလၢအလံာ်ဟ့ၣ်ယုၢ်ပူၤန့ၣ်လီၤႉ ဒ်သုးခိၣ်ကျၢၢ်ဒိၣ်စိ စီၤနၢၤဒါဘိၣ်မၠး အလံာ်ဟ့ၣ်ယုၢ်ပူၤပာ်ဖျါ၀ဲအသိးန့ၣ် ကီၢ်သူလ့ၤမ့ၢ်၀ဲၦၤကညီအကီၢ်လၢ မိၢ်ပၢ်ဖံဖု ဟ့ၣ်န့ၢ်သါ၀ဲကညီဖိဒီးလၢန့ၣ်အမဲာ်ညါကညီဖိအံၤအိၣ်ဒီးအထံအကီၢ်အတၢ်စံၣ်စိၤတဲစိၤအတၢ်ကွဲးနီၣ်ကွဲး ဃါသ့ၣ်တဖၣ် အဂ့ၢ်န့ၣ် လံာ်ဟ့ၣ်ယုၢ်အပူၤစံး၀ဲန့ၣ်လီၤႉ ဒ်န့ၣ်အသိးခီဖျိကလုာ်ဂၤဒီးသုးမီၤစိရိၤဟံန့ၢ်ဆူၣ်ပထံပကီၢ်ႇဆီၣ်ဘံၣ်ဆီၣ်ဘၢပၦၤကလုာ်အဃိ ၦၤတသ့ၣ်ညါ လၢၤက့ၤကညီအကီၢ်ဘၣ်ဒီးလၢတၢ်န့ၣ်အဃိဒ်သိးပၦၤကညီဖိအထံအကီၢ်ကအိၣ်ဖျါထီၣ်က့ၤႇ ကညီကဒိးန့ၢ် က့ၤ တၢ်သဘျ့အဂီၢ် ပ၀ဲပၦၤကညီဖိခဲလၢာ်ကမၤသကိးတၢ်ဃူဃူအိၣ်ဒီးတၢ်ပညိၣ်တခါဃီလၢကမၤန့ၢ်က့ၤ ပထံပကီၢ် အဂ့ၢ်န့ၣ် စီၤနၢၤဒါဘိၣ်မၠး ဟ့ၣ်သဆၣ်ထီၣ်၀ဲလၢအလံာ်ဟ့ၣ်ယုၢ်ပူၤန့ၣ်လီၤႉ လၢတၢ်န့ၣ်အဃိၦၤလၢခံတစိၤကအိၣ်မုာ်မုာ်ခုၣ်ခုၣ်ဒီးသုတဘၣ်တၢ်ဆီၣ်ဘံၣ်ဆီၣ်ဘၢအီၤတဂ့ၤအဂီၢ်န့ၣ်ကီၢ်သူလ့ၤအံၤမ့ၢ်တၢ်အရ့ဒိၣ်လၢကညီဖိခဲလၢာ်အဂီၢ်အဃိကညီဖိခဲလၢာ်ကပာ်ဖှိၣ်ထီၣ်သးမၤန့ၢ်က့ၤပကီၢ်သူလ့ၤအဂ့ၢ်န့ၣ် သုးခိၣ်ကျၢၢ်ဒိၣ်စိ စီၤနၢၤဒါမၠး စံး၀ဲန့ၣ်လီၤႉ “တနံၤညါအံၤပ၀ဲကိးဂၤဒဲးပကသ့ၣ်နီၣ်ထီၣ်က့ၤကီၢ်သူလ့ၤလၢပမိပါဖံဖုဟ့ၣ်သါၦၤဒီးပကဆိမိၣ်ထီၣ်က့ၤမ့ၢ်ကပဘၣ်မၤဘျုးက့ၤဒ်သိးပကန့ၢ်က့ၤပထံပကီၢ်အဂီၢ်ပကဘၣ်မၤဒ်လဲၣ်ပကဆိမိၣ်သကိးဒီးပာ်ဖှိၣ်ထီၣ်သးပာ်က့ၤပထံပကီၢ်လၢနီၣ်ဂံၢ်တၢလၢပသးကံၢ်ပူၤႉဘၣ်မနုၤအဃိလဲၣ်ၦၤလၢခံတစိၤကအိၣ်ဘၣ်မုာ်မုာ်ခုၣ်ခုၣ်ႇၦၤသုတဆီၣ်ဘံၣ်ဆီၣ်ဘၢ တဂ့ၤအဂီၢ်န့ၣ် ကီၢ်သူလ့ၤမ့ၢ်တၢ်အရ့ဒိၣ်လၢကညီဖိခဲလၢာ်အဂီၢ်လီၤႉလၢမုၢ်နံၤလီၤဘၣ်အဖီခိၣ်အံၤပအိၣ်လီၤမုၢ်ပြံပြါအိၣ်ယံၤနါက့ပကဆိမိၣ်ထီၣ်က့ၤပကီၢ်သူလ့ၤပထံပကီၢ်ပၦၤကလုာ်ႇပာ်ဖှိၣ်ထီၣ်လိာ်က့ၤသးလၢတၢ်သးတဖျၢၣ်ဃီဒီးမၤန့ၢ်က့ၤပကီၢ်သူလ့ၤန့ၣ် မ့ၢ်၀ဲယတၢ်ဟ့ၣ်ဂံၢ်ဟ့ၣ်ဘါက့ၤပၦၤကလုာ်လၢဟီၣ်ခိၣ်ချၢဒီတဘ့ၣ်”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါကီၢ်သူလ့ၤအံၤအိၣ်ဆီလီၤတ့ၢ်သးဖးယံၤလံဘၣ်ဆၣ်ခီဖျိကလုာ်ဒိၣ်စိသ့ၣ်တဖၣ်အတၢ်မၤအၢမၤနး အဲၣ်ဒိး ပၢဆူၣ်ပၢဆိး၀ဲအဃိတုၤလၢခဲအံၤတၢ်တသ့ၣ်ညါအီၤလၢကီၢ်သူလ့ၤဘၣ်တကးဒံးဘၣ်ကညီကမျၢၢ်ထံဖိကီၢ်ဖိစ့ၢ်ကီးဘၣ်ဃ့ၢ်မှံဟးဖျိးကဲထီၣ်က့ၤၦၤဘၣ်ကီဘၣ်ခဲလဲၤထီၣ်အိၣ်က့ၤလၢထံဂုၤကီၢ်ဂၤထံချၢကီၢ်ချၢအိၣ်၀ဲဒီးဘၣ်ဆၣ် အ၀ဲသ့ၣ်အံၤ အသးတလၢာ်တသးပ့ၤနီၣ်အထံအကီၢ်ဘၣ်အဂ့ၢ်န့ၣ် သုးခိၣ်ကျၢၢ်ဒိၣ်စိ စီၤနၢၤဒါမၠး စံးအါထီၣ်၀ဲန့ၣ်လီၤႉ လၢန့ၣ်အမဲာ်ညါကီၢ်သူလ့ၤမ့ၢ်တအိၣ်ဘၣ်န့ၣ်ကညီဖိအိၣ်မူတသ့ဘၣ်အဃိကညီဖိတဖၣ်အလီၢ်အိၣ်လၢ ကပာ်ဖှိၣ် ထီၣ်သးတဂၤလၢသနၢၣ်လၢပကဒုးန့ၢ်က့ၤကီၢ်သူလ့ၤအံၤဒီးစိာ်ကဖီထီၣ်က့ၤပၦၤကလုာ်အဂ့ၢ်န့ၣ် လံာ်ဟ့ၣ်ယုၢ်အပူၤ စံး၀ဲန့ၣ်လီၤႉ တကးဒံးဘၣ်(KTLA)မ့ၢ်သုးမုၢ်ဒိၣ်တဖုလၢအတြီဆၢကဟုကယာ်အၦၤကလုာ်ထံဖိကီၢ်ဖိလၢအဘၣ်တၢ်မၤအၢမၤသီဆီၣ်တံၢ်မၤနၢၤအီၤလၢတၢ်ပၢဆူၣ်ပၢဆိးအဖီလာ်အံၤဒီးလၢတၢ်န့ၣ်အဃိပမ့ၢ်သ့ၣ်ညါလီၤသးလၢပမ့ၢ်ကညီဒီး မ့တမၤန့ၢ်ဒုၣ်ဒါ အတၢ်ဖံးတၢ်မၤဘၣ်န့ၣ်ပၦၤကလုာ်ကပူၤဖျဲးထီၣ်လၢကုၢ်အလီၢ်သၦၢ်ကတၢၢ်လီၤအဂ့ၢ်န့ၣ် သုးခိၣ်ကျၢၢ်ဒိၣ်စိ...
လၢၢ်ဃီၤလီၢ်အိၣ်ကဒုကၠိဖိတဖၣ်လိၣ်ဘၣ်၀ဲကၠိဖိတၢ်သူတၢ်စွဲတၢ်ပီးတၢ်လီ
လါယူၤ ၁၃သီႇ ၂၀၂၄နံၣ်ႇ ခ့ၣ်အဲးစံၣ်ႇ ကီၢ်ကၠီၣ်တဲၣ်-ကီၢ်ပယီၤကီၢ်ဆၢသူမွဲကျိအနံၤႇလၢၢ်ဃီၤၦၤဃ့ၢ်တၢ်ဒုးလီၢ်အိၣ်ကဒုကၠိဖိတဖၣ်အံၤႇလၢတနံၣ်အံၤ(၂၀၂၄-၂၀၂၅)ကၠိတၢ်မၤလိနံၣ်အဂီၢ်ႇလိၣ်ဘၣ်၀ဲကၠိဖိအတၢ်သူတၢ်စွဲတၢ်ပီးတၢ်လီသ့ၣ်တဖၣ်အဂ့ၢ်ႇၦၤကွၢ်ထွဲလီၢ်အိၣ်ကဒုၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ လၢၢ်ဃီၤလီၢ်အိၣ်ကဒုဖိသၣ်တဖၣ်အံၤႇအပူၤကွံာ်တၢ်မၤလိနံၣ်အပူၤမၤလိ၀ဲတၢ်လၢအနီၢ်ကစၢ်လီၢ်အိၣ်ကဒုတၢ်အိၣ်ဆိးလီၢ်ကျဲပူၤဘၣ်ဆၣ်ႇတနံၣ်အံၤခီဖျိတၢ်သူၣ်ထီၣ်န့ၢ်၀ဲအ၀ဲသ့ၣ်တၢ်မၤလိလီၢ်တန့ၢ်လၢၤဘၣ်အဃိပာ်ဖှိၣ်သးလဲၤမၤလိက့ၤ၀ဲတၢ်လၢလၢၢ်ဃီၤသ၀ီတီၤဖုၣ်ကၠိအပူၤအဂ့ၢ်ႇၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ လီၢ်အိၣ်ကဒုကၠိဖိတဖၣ်အံၤႇပာ်ဖှိၣ်သးမၤလိတၢ်တပူၤဃီအိၣ်၀ဲဘၣ်ဆၣ်ခီဖျိကၠိတၢ်ပီးတၢ်လီတၢ်သူတၢ်စွဲတဖၣ်တကူတလၢဘၣ်အိၣ်၀ဲအဃိအ၀ဲသ့ၣ်တဖၣ်လိၣ်ဘၣ်၀ဲကၠိတၢ်သူတၢ်စွဲတၢ်ပီးတၢ်လီဒ်အမ့ၢ်လံာ်လဲၢ်တၢ်ကွဲးထိၣ်ဒံးဘိတၢ်သူတၢ်စွဲတဖၣ်အဂ့ၢ်ႇလၢၢ်ဃီၤၦၤကွၢ်ထွဲၦၤဃ့ၢ်အိၣ်ကဒုဖိမူဒါခိၣ်နီၢ်အဲၣ်၀ါစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ကိးနံၣ်ဒဲးပသိၣ်လိတၢ်လၢလီၢ်အိၣ်ကဒုတၢ်လီၢ်တၢ်ကျဲအပူၤလီၤႉတနံၣ်ညါအံၤန့ၣ်ပလီၢ်အိၣ်ကဒုဖိတဖၣ်ပတ့ထီၣ်တၢ်မၤလိလီၢ်သ့ၣ်တဖၣ်တန့ၢ်ဘၣ်အဃိပတၢၣ်ပီၣ်သကိးတၢ်ဒီးလၢၢ်ဃီၤတီၤဖုၣ်ကၠိ၀ံၤႇပဟ့ၣ်ထီၣ်အ၀ဲသ့ၣ်တဖၣ်တပူၤဃီလီၤႉဖိသၣ်သ့ၣ်တဖၣ်အံၤကထီၣ်ကၠိအဂီၢ်တၢ်ကီတၢ်ခဲအိၣ်၀ဲလၢကၠိတၢ်သူတၢ်စွဲလံာ်လဲၢ်ဒ်သိးခီပ့ၣ်ႇစၢၢ်ဘိႇထိၣ်ဒံးဘိႇပနိဘျၢသ့ၣ်တဖၣ်လီၤႉခဲအံၤစးထီၣ်ထီၣ်ကၠိလံဘၣ်ဆၣ်အလံာ်အလဲၢ်တဖၣ်န့ၣ်က၀ံထီၣ်၀ံလီၤ၀ဲမးတအိၣ်ဘၣ်ႉဒီးဘၣ်လၢတၢ်စူၤခါကတီၢ်လံဘၣ်ဆၣ်အခိၣ်မီၤသ့ၣ်တဖၣ်တအိၣ်ဘၣ်အဃိဒ်သိးကအိၣ်ဆူၣ်အိၣ်ချ့အဂီၢ်လိၣ်ဘၣ်၀ဲခိၣ်မီၤသ့ၣ်တဖၣ်လီၤ”အဂ့ၢ်စံး၀ဲဒၣ်န့ၣ်လီၤႉ လၢန့ၣ်အမဲာ်ညါႇလီၢ်အိၣ်ကဒုဖိသၣ်တဖၣ်အံၤခီဖျိတဒိးန့ၢ်ဘၣ်၀ဲတၢ်အီၣ်တၢ်အီလၢၦဲၤဘၣ်အဃိႇလိၣ်ဘၣ်၀ဲနီၢ်ခိတၢ်အီၣ်တၢ်အီလၢကအိၣ်ဆူၣ်အိၣ်ချ့ၦဲၤဂံၢ်ၦဲၤဘါစ့ၢ်ကီးအဂ့ၢ်ႇအ၀ဲစံးအါထီၣ်၀ဲဒၣ်န့ၣ်လီၤႉ တကးဒံးဘၣ်ႇဒ်သိးကၠိဖိသ့ၣ်တဖၣ်အံၤသုတဘၣ်ဟးထီၣ်ကွံာ်ကၠိႇဟးဃုဖံးဃုမၤႇမၤစၢၤက့ၤမိၢ်ပၢ်ဒံးဘၣ်အဆၢကတီၢ်မုၢ်လၢ်၀ဲလၢတၢ်ကဆီၣ်ထွဲမၤစၢၤ၀ဲလီၢ်အိၣ်ကဒုဖိသၣ်တဖၣ်အံၤအဂ့ၢ်ႇစံးစ့ၢ်ကီး၀ဲဒၣ်န့ၣ်လီၤႉ လၢၢ်ဃီၤတီၤဖုၣ်ကၠိအံၤႇတနံၣ်အံၤကၠိတၢ်မၤလိနံၣ်အပူၤကၠိဖိခဲလၢာ်ပာ်ဖှိၣ်အိၣ်၀ဲအဂၤ(၇၀)ဘျဲၣ်အကျါၦၤလီၢ်အိၣ်ကဒုဖိပာ်ဃုၣ်၀ဲအဂၤ(၃၀)ဘျဲၣ်ဒီးသရၣ်၊သရၣ်မုၣ်အိၣ်၀ဲ(၆)ဂၤအကျါႇလီၢ်အိၣ်ကဒုသရၣ်မုၣ်ပၣ်ဃုာ်၀ဲ(၂)ဂၤအဂ့ၢ်ႇၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ဒ်န့ၣ်အသိးႇလၢၢ်ဃီၤလီၢ်အိၣ်ကဒုတၢ်အိၣ်တၢ်ဆိးအပူၤလီၢ်က၀ီၤဖိလၢဟဲအိၣ်ဆိး၀ဲတဖၣ်အံၤမ့ၢ်၀ဲလ့က့ၣ်ကီၤႇအူကရ့ၣ်ထၣ်ႇလ့ဂီၤကၠိႇလီၢ်က၀ီၤဖိတဖၣ်ဒီးၦၤသ့ၣ်တဖၣ်အံၤအိၣ်ဆိး၀ဲဖဲလၢၢ်ဃီၤလီၢ်အိၣ်ကဒုတၢ်လီၢ်အပူၤယံာ်၀ဲလၢ(၂)နံၣ်လံဒီးအ၀ဲသ့ၣ်တဖၣ်အံၤအနီၢ်ဂံၢ်အိၣ်၀ဲအဂၤ(၃၀၀)ဘျဲၣ်အဂ့ၢ်ႇၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
ယါဖူကရူၢ်ဟီၣ်က၀ီၤအပူၤၦၤဃ့ၢ်တၢ်ဒုးဖိတဖၣ်သဂၢၢ်ဘၣ်ဒီးအိၣ်လီၢ်အိၣ်ဆိးတၢ်ဂ့ၢ်ကီ
လါယူၤ ၁၃ သီႇ ၂၀၂၄ နံၣ်ႇ ခ့ၣ်အဲးစံၣ် တနီသရံၣ်ကီၢ်ခီဒိၣ် ယ့ၣ်ဖၠူၣ်ကီၢ်ဆၣ် ယါဖူသ့ၣ်သ၀ီအကပိာ်ကပၤတၢ်လီၢ်သ့ၣ်တဖၣ်မ့ၢ်လၢတၢ်ဒုးတၢ်ယၤ ကဲထီၣ်၀ဲလၢခံခီခံကပၤအဘၢၣ်စၢၤအဃိၦၤလီၢ်က၀ီၤဖိလၢဘၣ်ဃ့ၢ်တၢ်ဒုးတၢ်ယၤသ့ၣ်တဖၣ်ကတီၢ်ခဲအံၤန့ၣ်မ့ၢ်လၢတၢ်စူၤခါကတီၢ်အဃိဘၣ်သဂၢၢ်၀ဲဒၣ်ဒီးတၢ်အိၣ်တၢ်ဆိးလီၢ်ကျဲၤအဂ့ၢ်ၦၤမၤစၢၤၦၤလီၢ်အိၣ်ကမှံသ့ၣ်တဖၣ်စံး၀ဲန့ၣ်လီၤႉ ယါဖူသ့ၣ်သ၀ီအကပိာ်ကပၤတၢ်လီၢ်အပူၤအံၤဖဲလါယူၤ(၇)သီအနံၤန့ၣ်ခီဖျိတၢ်ဒုးတၢ်ယၤကဲထီၣ်၀ဲလၢခံခီခံကပၤအဘၢၣ်စၢၤအမဲာ်ညါသုးကီၣ်ကး(မီရၣ်၀တံ)ထံသုးအ၀ဲၤလီၢ်ခိၣ်သ့ၣ်လၢအိၣ်(ယ့ၣ်ဖၠူၣ်)ကီၢ်ဆၣ်အပူၤအံၤခးလီၤ၀ဲကျိၣ်ဖးဒိၣ်အဃိသ၀ီဒီဖျၢၣ်ၦၤလီၢ်က၀ီၤဖိသ့ၣ်တဖၣ်ဘၣ်ဃ့ၢ်ထီၣ်၀ဲဒ်အံၤအဖီခိၣ်တကီၢ်ခါခဲအံၤန့ၣ်အ၀ဲသ့ၣ်သဂၢၢ်ဘၣ်၀ဲဒီးတၢ်အိၣ်တၢ်ဆိးတၢ်ကီတၢ်ခဲအဂ့ၢ်ယ့ၣ်ဖၠူၣ်ကီၢ်ဆၣ်ၦၤမၤစၢၤၦၤလီၢ်အိၣ်ကမှံဖိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ “စးထီၣ်လၢဘၣ်ဃ့ၢ်တုၤခဲအံၤန့ၣ်အ၀ဲသ့ၣ်ဘၣ်ကွၢ်ဆၢၣ်မဲာ်၀ဲတၢ်အိၣ်တၢ်ဆိးလီၢ်ကျဲအဖၢ မုၢ်လီၤႉ ကတီၢ် ခဲအံၤန့ၣ်မ့ၢ်လၢတၢ်စူၤခါမီၤနီၤႉ ၀ံၤဒီးအ၀ဲသ့ၣ်ဃ့ၢ်အိၣ်ကဒုသးတၢ်လီၢ်လၢအဘူးန့ၣ်အိၣ်၀ဲ ကျီးကရၢၢ်အပူၤလီၤအဃိန့ၣ်အ၀ဲသ့ၣ်ဘၣ်အိၣ်လၢကျီးကရၢၢ်တၢ်လီၢ်လၢအလီၤဟိအလီၢ်ပူၤလီၤႉ တၢ်အခိၣ်ဒု(တၤလပၣ်)သ့ၣ်တဖၣ်ဒီးကဆ့ၣ်နီၤအဂီၢ်တၢ်အဒါ(ချီၣ်)သ့ၣ်တဖၣ်လိၣ်၀ဲမီၤနီၤ”အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ပယီၤသုးကီၣ်ကးခီၣ်ချ့သုးရ့ၣ်(ခမရ-၄၁၀)လၢအိၣ်ဆီလီၤအသးဖဲ(ယ့ၣ်ဖၠူၣ်)၀့ၢ်ဟီၣ်က၀ီၤအပူၤအၦၤသ့ၣ် တဖၣ်တကီၢ်ခါခဲအံၤန့ၣ်ခီဖျိအ၀ဲသ့ၣ်နုာ်လီၤဟံန့ၢ်တၢ်လီၢ်လၢ(ယါဖူသ့ၣ်)သ၀ီပူၤအဃိၦၤလီၢ်က၀ီၤဖိသ့ၣ်တဖၣ်က့ၤအိၣ်က့ၤဆိးလၢဒူသ၀ီအပူၤတဘူၣ်ဒံးဘၣ်အဂ့ၢ်အ၀ဲစံးအါထီၣ်၀ဲဒၣ်န့ၣ်လီၤႉ တကီၢ်ခါခဲအံၤတနီသရံၣ်ကီၢ်ခီအပူၤမ့ၢ်လၢတၢ်စူၤလီၤ၀ဲတပယူာ်ဃီအဃိၦၤဃ့ၢ်တၢ်ဒုးဖိလၢလဲၤအိၣ်လဲၤဆိးလၢကျီးကရၢၢ်ပူၤသ့ၣ်တဖၣ်သဂၢၢ်ဘၣ်၀ဲဒီးတၢ်အိၣ်တဆူၣ်အိၣ်တချ့တၢ်ဂ့ၢ်ကီအမဲာ်ညါကသံၣ်ကသီတကူတလၢတၢ်ဂ့ၢ်ကီစ့ၢ်ကီးသဂၢၢ်ဘၣ်၀ဲအဂ့ၢ်ၦၤမၤစၢၤၦၤလီၢ်အိၣ်ကမှံဖိစံးအါထီၣ်၀ဲဒၣ်န့ၣ်လီၤႉ “ၦၤဃ့ၢ်တၢ်ဒုးဖိသ့ၣ်တဖၣ်န့ၣ်အနီၣ်ဂံၢ်အိၣ်၀ဲ(၅၀၀)ဂၤဘျဲၣ်မီၤနီၤႉ ၦၤဖိသၣ်သ့ၣ်တဖၣ်န့ၣ်အါကတၢၢ်လီၤႉ ၦၤဖိသၣ်အါဒၣ်တၢ်တက့ၢ်န့ၣ်တၢ်စူၤခါအဆၢကတီၢ်န့ၣ်မ့ၢ်လၢတၢ်ချံၣ်အဃိန့ၣ်ဆိက့ဆါဘီအိၣ်၀ဲလီၤႉ မ့မ့ၢ်ဆၢကတီၢ်ခဲအံၤဒုကသံၣ်ကသီလၢအိၣ်ဒီးၦၤန့ၣ်ပကူဆါယါဘျါန့ၢ်၀ဲလီၤ”အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါ(ယါဖူသ့ၣ်)သ၀ီအဃၢၤမ့ၢ်လၢခံခီခံကပၤတၢ်ဒုးတၢ်ယၤကဲထီၣ်၀ဲဒီးသုးကီၣ်ကးထံသုးစ့ၢ်ကီးခးတပျုာ်တပျီၤကျိဖးဒိၣ်အဃိဘၣ်သံ၀ဲဖိသၣ်ဆံး(၈)လါတဂၤႇ ဖိသၣ်ဖိ(၇)နံၣ်တဂၤဃုာ်ဒီးအမိၢ်အပၢ် ခဲလၢာ်(၄)ဂၤဘၣ်သံ၀ဲဒၣ်အဂ့ၢ်လီၢ်က၀ီၤဖိသ့ၣ်တဖၣ်စံး၀ဲအသိးသ့ၣ်ညါဘၣ်န့ၣ်လီၤႉ တကီၢ်ခါခဲအံၤသုးကီၣ်ကးသ့ၣ်တဖၣ်လၢတၢ်ကက့ၤထီၣ်မၤန့ၢ်က့ၤ၀ဲတၢ်ပၢၢ်ဆၢသုးပာ်ဖှိၣ်သ့ၣ်တဖၣ်ဒိၣ်စိဖီၣ်ဂၢၢ်ဃာ်၀ဲယ့-ဒ၀ဲၢ်ကျဲမုၢ်အံၤအဂီၢ်သုးကီၣ်ကးအံၤဟူးဂဲၤဟဲထီၣ်၀ဲဒၣ်ဒီးကမျၢၢ်အသိလ့ၣ်ႇ သိလ့ၣ်တီၣ်လၢၢ် သ့ၣ်တဖၣ်အဖီခိၣ်စးထီၣ်ဖဲလါယူၤ(၉)သီအနံၤန့ၣ်တၢ်ဂ့ၢ်အရ့ဒိၣ်မ့ၢ်တအိၣ်ဘၣ်န့ၣ်တဘၣ်လ့ၣ်ထီၣ်လ့ၣ်လိၤ၀ဲကျဲမုၢ်အံၤဘၣ်အဂ့ၢ်(MSRF)ဟ့ၣ်ပလီၢ်ဃာ်၀ဲဒၣ်န့ၣ်လီၤႉ
ကၠဲးထိၣ်ကီၢ်ဆၣ်တနံၤဃီအတီၢ်ပူၤပယီၤသုးခးလီၤကျိဖးဒိၣ်(၁၂)ဖျၢၣ် ဘၣ်ဒိၦၤဒီဖိပၢ်ခံဂၤႇ ဟံၣ်ဟးဂီၤ(၃)ဖျၢၣ်
လါယူၤ ၁၃ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ဖဲမဟါလါယူၤ ၁၂ သီ တနံၤဃီအတီၢ်ပူၤ ပယီၤသုးခးလီၤ၀ဲဒၣ်ကျိဖးဒိၣ်(၁၂)ဖျၢၣ်ဆူဒူသ၀ီပူၤအဃိ ကျိဖးဒိၣ်အက့အခီဘၣ်၀ဲဒၣ် ၦၤဒီဖိပၢ်ခံဂၤ ဒီး ဟံၣ်ဟးဂီၤ၀ဲဒၣ်(၃)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲမဟါလါယူၤ ၁၂ သီ ဂီၤခီ(၁၀)ဃၣ်ဃၣ်အဆၢကတီၢ် သုးကီၣ်ကးအမျိာ်သုး(၃၁၀)လၢအိၣ်သ့ၤစ့ၤယၣ်အံၤ ပညိၣ်ခးလီၤ၀ဲဒၣ်ကျိဖးဒိၣ်(၈)ဖျၢၣ်ဆူ စ့ၣ်ကွ့ဒီးအခဲၤသ၀ီပူၤအဃိ ဟံၣ်လီၤၦီၢ်ဟးဂီၤ၀ဲဒၣ်(၃)ဖျၢၣ်ဒီး တကတီၢ်ဃီ ဖဲဟါခီ(၁)နၣ်ရံၣ်အဆၢကတီၢ်ခးလီၤကဒီး၀ဲကျိဖးဒိၣ်(၄)ဖျၢၣ််ဆူပ့နဲကိသ၀ီဃၢၤအဃိ ကျိဖးဒိၣ်အက့အခီဘၣ်၀ဲ ဒၣ်ၦၤဒီဖိပၢ်(၂)ဂၤလၢအမ့ၢ် အူသါအူ(၆၄)နံၣ်ဒီးအဖိမုၣ် ညံၤညံၤ၀့(၃၁)နံၣ်သ့ၣ်တဖၣ်အံၤ အဂ့ၢ်န့ၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံး၀ဲန့ၣ်လီၤႉ အ၀ဲစံး၀ဲလၢ“အခဲၤသ၀ီနါက့ကျိဖးဒိၣ်လီၤတဲာ်ႇစ့ၣ်ကွ့သ၀ီနါက့လီၤတဲာ်စ့ၢ်လီၤႉတၢ်မၢၤဖဲဟါခီ ၁ နၣ်ရံၣ်န့ၣ် ခးလီၤ၀ဲကျိဖးဒိၣ်လွံၢ်ဖျၢၣ်ႉလၢပ့နဲကိသ၀ီခီန့ၣ်ကျိဖးဒိၣ်လီၤတဲာ်ဘျီဘၣ်၀ဲဒၣ်ၦၤဒီဖိပၢ်(၂)ဂၤႉမ့မ့ၢ်လၢဂီၤခီန့ၣ်ခးလီၤ၀ဲဒၣ်ကျိဖးဒိၣ်(၈)ဖျၢၣ်ႉလီၤတဲာ်၀ဲဒၣ်လၢစ့ၣ်ကွ့သ၀ီန့ၣ်(၅)ဖျၢၣ်ႇအပိၢ်ဖးထီၣ်န့ၣ်သၢဖျၢၣ်တပိၢ်ဖးထီၣ်ဘၣ်န့ၣ်ခံဖျၢၣ်ႉလၢအခဲၤသ၀ီသ၀ီန့ၣ် လီၤတဲာ်သၢဖျၢၣ်ႉတၢ်မၢၤတၢ်ဘၣ်ဒိဘၣ်ထံးတအိၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီ တၢ်ကစီၣ်န့ၣ်လီၤႉ လၢန့ၣ်အမဲာ်ညါဖဲအပူၤကွံာ်လါယူၤ ၂ သီအနံၤစ့ၢ်ကီး သုးကီၣ်ကးအမျိာ်သုး(၃၁၀)အံၤခီဖျိခးလီၤ၀ဲဒၣ်ကျိဖးဒိၣ်ဆူ လီၢ်က၀ီၤဒူသ၀ီပူၤအဃိ ကျိဖးဒိၣ်အက့အခီဘၣ်၀ဲဒၣ်မီၣ်ခမိၣ်သ၀ီဖိ ပိာ်မုၣ်မိၢ်ဒၢတဂၤဒီး လၢန့ၣ်အမဲာ်ညါ ဟံၣ်တၢ်သူၣ်ထီၣ်စ့ၢ်ကီးဟးဂီၤ၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးကၠဲးထိၣ်ကီၢ်ဆၣ်အမဲာ်ညါလၢသထူၣ်ကီၢ်ဆၣ်အပူၤစ့ၢ်ကီး စးထီၣ်ဖဲတၢ်ပၢၢ်ဆၢသုးပာ်ဖှိၣ်ကရူၢ် မၤဟးဂီၤ၀ဲဒၣ် ၀့ၢ်တကူၣ်-မီၣ်လမၠဲၣ် ကျဲ တပျဲကျိတိၤဒီးတီၤကလ့တိၤ၀ံၤလီၢ်ခံန့ၣ် သုးကီၣ်ကးအသုးကလၢၤ လၢအိၣ်ဟီၣ်က၀ီၤပူၤဖဲန့ၣ်...
(BCMF)တီခိၣ်ရိၣ်မဲကအိးထီၣ်ကဒီး၀ဲ(၄)ဘျီတဘျီတၢ်မၤကွၢ်သးတၢ်ဆါတၢ်ရဲၣ်တၢ်ကျဲၤလၢမဲၢ်ဆီးတၢ်ဆါဟံၣ်ဖးဒိၣ်
လါယူၤ ၁၂သီႇ ၂၀၂၄နံၣ်ႇ ခ့ၣ်အဲးစံၣ်ႇ လါလၢကဟဲလါယူၤလံ(၁၃)သီဒီး(၁၄)သီအနံၤန့ၣ်ႇ(Burma Children Medical Fund- BCMF)တီခိၣ်ရိၣ်မဲကအိးထီၣ်ကဒီး၀ဲ(၄)ဘျီတဘျီတၢ်မၤကွၢ်သးတၢ်ဆါ(Echo Screening)တၢ်ရဲၣ်တၢ်ကျဲၤလၢမဲၢ်ဆီးတၢ်ဆါဟံၣ်ဖးဒိၣ်ကရၢၢ်အပူၤအဂ့ၢ်ႇကီၢ်ပယီၤဖိသၣ်ကသံၣ်ကသီစ့ပာ်ကီၤ(BCMF)ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ဘၣ်ဃးဒီးတၢ်ကမၤ၀ဲတၢ်မၤကွၢ်သးတၢ်ဆါအတၢ်ရဲၣ်တၢ်ကျဲၤအံၤန့ၣ်ကမၤ၀ဲလၢခံသီအတီၢ်ပူၤဒီးႇအဆိတသီအနံၤအပူၤကကိးထံၣ်၀ဲၦၤဆါလီၢ်လံၤလၢအလဲၤပၠးတ့ၢ်သးဖဲအပူၤကွံာ်တဖၣ်ဒီးႇမ့မ့ၢ်လၢခံသီတသီအနံၤတခီကမၤကွၢ်၀ဲၦၤသီလၢအအိၣ်ဒီးသးတၢ်ဆါတဖၣ်အဂ့ၢ်(BCMF)ၦၤကွၢ်ထွဲၦၤဆူးၦၤဆါမူဒါခိၣ်သရၣ်မုၣ်နီၢ်ဘူ၀ါစ့စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဘၣ်ဃးလၢပမၤ၀ဲဒၣ်တၢ်မၤကွၢ်သးတၢ်ဆါအံၤလၢပကိးလၢကိၤလၤ၀ါကျိာ်လၢအမ့ၢ်၀ဲ(Echo Screening)အံၤန့ၣ်ပကမၤအီၤလၢခံသီအတီၢ်ပူၤလီၤႉအဆိကတၢၢ်တသီတခီန့ၣ်ပကိးထံၣ်၀ဲၦၤဆါအလီၢ်လံၤလၢအပူၤကွံာ်ဟဲပၠးသး၀ံၤတခွဲဘၣ်အသးဒံးဘၣ်တဖၣ်ဃုာ်ဒီးၦၤလၢအခွဲအသး၀ံၤဘၣ်ဆၣ်ကဘၣ်မၤကွၢ်ကဒီးအသးတဖၣ်န့ၣ်လီၤႉမ့မ့ၢ်လၢလီၢ်ခံကတၢၢ်တသီခီန့ၣ်ပမ့ၢ်၀ဲဒၣ်လၢၦၤလၢအတပၠးဘၣ်အသးနီတဘျီဒံးဘၣ်ႇၦၤလၢအဲၣ်ဒိးပၠးအသးသ့ၣ်တဖၣ်လီၤအဂ့ၢ်”စံး၀ဲဒၣ်န့ၣ်လီၤႉ လၢန့ၣ်အမဲာ်ညါႇၦၤလၢအကဟဲမၤကွၢ်သးအတၢ်ဆါသ့ၣ်တဖၣ်အံၤကဘၣ်မ့ၢ်၀ဲၦၤသ့ၣ်တဖၣ်လၢတၢ်ဟ့ၣ်ကသံၣ်ဒၢး(clinic)ပာ်ပနီၣ်အီၤလၢအအိၣ်ဒီးသးတၢ်ဆါနီၢ်နီၢ်(မ့တမ့ၢ်)ကဘၣ်မ့ၢ်ၦၤလၢအသ့ၣ်ညါလီၤအသးလၢအအိၣ်ဒီးသးတၢ်ဆါနီၢ်နီၢ်တဖၣ်လီၤအဂ့ၢ်ႇစံးအါထီၣ်၀ဲဒၣ်န့ၣ်လီၤႉ တကးဒံးဘၣ်ႇတၢ်မၤကွၢ်သးတၢ်ဆါတၢ်ရဲၣ်တၢ်ကျဲၤအံၤႇအပူၤကွံာ်တူၢ်လိာ်မၤကွၢ်၀ဲထဲဖိသၣ်(၁၈)နံၣ်ဆူအဖီလာ်တဖၣ်လီၤဘၣ်ဆၣ်ႇခီဖျိတၢ်ဃုထံၣ်သ့ၣ်ညါ၀ဲသးစၢ်တနီၤလၢအအိၣ်ဖျဲၣ်ပၣ်ဃုာ်၀ဲဒီးသးတၢ်ဆါတဖၣ်တဒိးန့ၢ်ကူစါယါဘျါဘၣ်အသးဘၣ်အဃိႇတကီၢ်ခါအံၤကတူၢ်လိာ်၀ဲမၤကွၢ်၀ဲတုၤလၢၦၤသးနံၣ်(၃၀)သ့ၣ်တဖၣ်အဂ့ၢ်ႇစံးစ့ၢ်ကီး၀ဲဒၣ်န့ၣ်လီၤႉ တကတီၢ်ဃီႇတၢ်မၤ၀ဲတၢ်မၤကွၢ်သးတၢ်ဆါတၢ်ရဲၣ်တၢ်ကျဲၤအံၤ(BCMF)တီခိၣ်ရိၣ်မဲဖီၣ်လိာ်စုမၤသကိး၀ဲတၢ်ဒီး Safe Blue Hearts Foundation˜မဲၢ်ဆီးတၢ်ဆါဟံၣ်ႇဃုာ်ဒီးကသံၣ်သရၣ်ဖးဒိၣ်လၢ(The Pediatric Cardiac SurgeryFoundation(PCSF)လၢအိၣ်၀ဲဟဲလၢကၠီၣ်တဲၣ်၀့ၢ်ခိၣ်ဘီကီးႇလၢအဘၣ်ထွဲဒီးတၢ်ယါဘျါသးတၢ်ဆါကရူၢ်ကရၢသ့ၣ်တဖၣ်ဒီးအ၀ဲသ့ၣ်တဖၣ်မၤ၀ဲတၢ်မၤကွၢ်သးတၢ်ဆါဖဲမဲၢ်ဆီးအံၤန့ၣ်ႇအတၢ်ပညိၣ်မ့ၢ်၀ဲဒ်သိးၦၤကိးဂၤဒဲးလၢအိၣ်ဒီးသးတၢ်ဆါတဖၣ်ကဒိးန့ၢ်ကူစါယါဘျါဘၣ်အသးတၢ်ဆါလၢအဆိအချ့အဂီၢ်အဂ့ၢ်ႇသ့ၣ်ညါဘၣ်ဒ်ၦၤဘၣ်မူဘၣ်ဒါတဖၣ်စံး၀ဲအသိးန့ၣ်လီၤႉ ဘၣ်ဃးဒီးတၢ်မၤကွၢ်သးတၢ်ဆါအံၤကျိၣ်စ့တၢ်လၢာ်ဘူၣ်လၢၤစ့ၤတအိၣ်၀ဲဘၣ်ဒီးၦၤအသီလၢအဲၣ်ဒိးမၤကွၢ်၀ဲအသးတၢ်ဆါတဖၣ်ဆဲးကျိးဆဲးကျၢ၀ဲ(BCMF)ၦၤဘၣ်မူဘၣ်ဒါတဖၣ်သ့၀ဲလၢ(BCMF Facebook Massager)အသိးႇဆဲးကျိး၀ဲလၢလီတဲစိနီၣ်ဂံၢ်သ့၀ဲဒၣ်အဂ့ၢ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ဒ်န့ၣ်အသိးႇဘၣ်ဃးဒီးတၢ်မၤကွၢ်၀ဲသးတၢ်ဆါတၢ်ရဲၣ်အကျဲၤအံၤ(BCMF)တီခိၣ်ရိၣ်မဲစးထီၣ်မၤတ့ၢ်၀ဲဖဲ(၂၀၂၃)နံၣ်အပူၤဒီးမၤကွၢ်တ့ၢ်၀ဲသၢဘျီအတီၢ်အပူၤၦၤဆါခဲလၢာ်အဂၤ(၂၈၅)ဂၤအကျါႇၦၤလၢဘၣ်ကွဲးသးအိၣ်၀ဲအဂၤ(၁၈၄)ဂၤအဂ့ၢ်သ့ၣ်ညါဘၣ်န့ၣ်လီၤႉ
လၢၢ်ဒိၣ်ကီၢ်ဆၣ်တၢ်ဒုးအိၣ်၀ဲကိးနံၤဒဲးဃၣ်ဃၣ်ဒီးသုးကီၣ်ကးနုာ်လီၤဒွဲၣ်အူကမျၢၢ်ဟံၣ်ဃီဒီးၦၤလီၢ်အိၣ်ကမှံဖိတၢ်လီၢ်
လါယူၤ ၁၂ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ်သုးက့နီၣ်ဂံၢ်(၃)ဟီၣ်က၀ီၤလၢၢ်ဒိၣ်ကီၢ်ဆၣ်အပူၤပယီၤ သုးကီၣ်ကးအသုးကျိၤလၢအဟဲထီၣ်သ့ၣ်တဖၣ်တၢ်ဒုးကဲထီၣ်၀ဲကိးနံၤဒဲးဃၣ်ဃၣ်အသိးပယီၤသုးသ့ၣ်တဖၣ်နုာ်လီၤဒွဲၣ်အူကွံာ်၀ဲကမျၢၢ်ဟံၣ်ဃီသ့ၣ်တဖၣ်အမဲာ်ညါၦၤလီၢ်အိၣ်ကမှံဖိအိၣ်တၢ်အလီၢ်စ့ၢ်ကီးဒွဲၣ်အူမၤဟးဂီၤကွံာ်၀ဲအဂ့ၢ်ကီၢ်ဆၣ်ၦၤဘၣ်မူဘၣ်ဒါစံး၀ဲန့ၣ်လီၤႉ ဖဲလါယူၤထီၣ်သီတၢတနွံအတီၢ်ပူၤန့ၣ်ပယီၤသုးကျိၤလၢအဟဲထီၣ်သ့ၣ်တဖၣ်နုာ်လီၤဒွဲၣ်အူကွံာ်၀ဲကမျၢၢ်ဟံၣ်ဃီတကးဒံးဘၣ်ဒွဲၣ်အူကွံာ်၀ဲၦၤလီၢ်အိၣ်ကမှံဖိတၢ်လီၢ်တၢ်ကျဲအသိးတကီၢ်ခါခဲအံၤစ့ၢ်ကီးတၢ်ဒုးတၢ်ယၤကဲထီၣ်ဒံး၀ဲအသးဒီးပယီၤသုးအသုးကျိၤလၢအဟဲထီၣ်သ့ၣ်တဖၣ်အဖၢမုၢ်လီၤအဂ့ၢ်လၢၢ်ဒိၣ်ကီၢ်ဆၣ်အၦၤကတိၤတၢ်ပၢပဒိၣ်စီၤ၀ါမုၢ်စံး၀ဲဒၣ်ဒ်အံၤန့ၣ်လီၤႉ “ဒုၣ်ဒါန့ၣ်နုာ်လီၤ၀ဲဒၣ်ဖဲ ကီၢ်သၣ်စ့ ဒီးဒွဲၣ်၀ဲဒၣ်ကမျၢၢ်အဟံၣ်အဃီမီၤနီၤႉ ဒ်န့ၣ်အသိးနုာ်လီၤဒွဲၣ်စ့ၢ်ကီး၀ဲက မျၢၢ်ၦၤဃ့ၢ်မှံဟးဖျိးအိၣ်ကဒုသးတၢ်လီၢ်ဒီးအဘှီထီၣ်၀ဲအသီသ့ၣ်တဖၣ်န့ၣ်ဒွဲၣ်ကွံာ်၀ဲလီၤႉ ကတီၢ်ခဲအံၤန့ၣ် ဒုးယၤတၢ်ဟူးတၢ်ဂဲၤလၢဟီၣ်ခိၣ်အမဲာ်ဖံးခိၣ်ဒု ကဲထီၣ်အသးအဖၢမုၢ်လီၤႉ”အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်မဲာ်ညါပယီၤသုးကီၣ်ကးအသုးကျိၤလၢအဟဲထီၣ်သ့ၣ်တဖၣ်တကီၢ်ခါခဲအံၤန့ၣ်ဟူးဂဲၤအိၣ်ဒံး၀ဲဒၣ်ဖဲ ကီၢ်သၣ်စ့ႇ ကိမၠ့ၣ်သါယၤႇ ရှူၣ်ခ့သါယၤ ဒူသ၀ီဖဲန့ၣ်သ့ၣ်တဖၣ်ပူၤအဃိလၢတၢ်ကထၢမၤလီၤတံၢ်၀ဲစရီ အဂီၢ်တၢ်မၤလီၢ်တံၢ်အီၤတန့ၢ်ဒံးဘၣ်အဂ့ၢ်ပဒိၣ်စီၤ၀ါမုၢ်စံးအါထီၣ်၀ဲဒၣ်န့ၣ်လီၤႉ ခီဖျိသုးကီၣ်ကးတကပၤနုာ်လီၤဒွဲၣ်အူကွံာ်၀ဲကမျၢၢ်တၢ်အိၣ်တၢ်ဆိးအလီၢ်ဒ်အံၤအဃိဒူသ၀ီတၢ်လီၢ်တၢ်ကျဲဒ်အမ့ၢ် တိၤသ့ၣ်ဖူႇ ကီၢ်သၣ်စ့ႇ ကိမၠ့ၣ်သါယၤႇ သယဲၣ်ပ့ၤႇ ငဖဲၤအ့ႇ ဘီကထၣ်ႇ ပဒဲကီ ၦၤသ၀ီဖိသ့ၣ်တဖၣ် အံၤအိၣ်ဆိးလၢဒူသ၀ီပူၤတဘူးလၢၤဘၣ်ဒီးဘၣ်ဃ့ၢ်အိၣ်ကဒုအသးဆူတၢ်လီၢ်တၢ်ကျဲၤအဂၤအဂ့ၢ်လီၢ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ ဒ်န့ၣ်အသိးပယီၤသုးအံၤဒွဲၣ်အူဃုာ်စ့ၢ်ကီး၀ဲဒၣ်ဒီးၦၤလီၢ်အိၣ်ကမှံဖိသ့ၣ်တဖၣ်အိၣ်ဆိးတၢ်လီၢ်တၢ်ကျဲအဃိတကီၢ်ခါခဲအံၤၦၤလီၢ်အိၣ်ကမှံဖိသ့ၣ်တဖၣ်ဘၣ်ကွၢ်ဆၢၣ်မဲာ်ဘၣ်၀ဲဒီးတၢ်အိၣ်တၢ်ဆိးႇ တၢ်အီၣ်တၢ်အီဒီး ကသံၣ်ကသီတၢ်ကီတၢ်ခဲသ့ၣ်တဖၣ်အဂ့ၢ်ပဒိၣ်စီၤ၀ါမုၢ်စံး၀ဲအသိးသ့ၣ်ညါဘၣ်န့ၣ်လီၤႉ စးထီၣ်ဖဲလါမ့ၤခံနွံတနွံအတီၢ်ပူၤအခါလံၤလံၤသုးကီၣ်ကးအံၤလၢတၢ်ကက့ၤထီၣ်မၤန့ၢ်၀ဲအသုးကလၢၤသ့ၣ်တဖၣ်အဂီၢ်သုးကီၣ်ကးအသုးနီၣ်ဂံၢ်(၂၀၀)ဘျဲၣ်ဟဲထီၣ်၀ဲဒၣ်လၢဆီထံးကီၢ်ဆၣ်ဟီၣ်က၀ီၤတကပၤဒီးတုၤတကီၢ်ခါခဲအံၤန့ၣ်တၢ်ဒုးတၢ်ယၤကဲထီၣ်၀ဲဒၣ်အဖၢမုၢ်လီၤအဂ့ၢ်သ့ၣ်ညါဘၣ်လၢလီၢ်က၀ီၤအၦၤဘၣ်မူဘၣ်ဒါအအိၣ်န့ၣ်လီၤႉ
ဖၣ်အၣ်ကီၢ်ဆၣ်ပူၤ ဖုသးၦၢ်ဒီမါ၀ၤခံဂၤလၢဘၣ်တၢ်ခးသံအီၤအံၤဒူၣ်ဖိထၢဖိလိၣ်ဘၣ်၀ဲလၢတၢ်တီတၢ်တြၢ်ကအိၣ်ထီၣ်
လါယူၤ ၁၂ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် တကီၤဘိကရူၢ်အပူၤ အပူၤကွံာ်လါအ့ဖြ့ၣ်အခါ ဘၣ်ဃးဖုသးၦၢ်ဒီမၤ၀ၤခံဂၤလၢအဘၣ်တၢ်လံၤခးသံအီၤအံၤ အဟံၣ်ဖိဃီဖိလိၣ်ဘၣ်၀ဲ တၢ်တီတၢ်တြၢ်ဒီးတၢ်ကဟံထီၣ်ဖီၣ်ထီၣ်ဂ့ၢ်၀ီတုၤလီၤတီၤလီၤအဂ့ၢ်န့ၣ် ဒူၣ်ဖိထၢဖိစံး၀ဲန့ၣ်လီၤႉ ဖဲအပူၤကွံာ်(၂၀၂၄)လါအ့ဖြ့ၣ်(၂၂)သီ မုၢ်နၤခီ(၁၀)နၣ်ရံၣ်ဃၣ်ဃၣ်အဆၢကတီၢ်န့ၣ် လၢတကီၤဘိကရူၢ် မဲၢ်လဲထၣ်သ၀ီအပူၤ ဖီၣ်စုက၀ဲၤလၢတၢ်တသ့ၣ်ညါအမံၤ(၂)ဂၤ ဟဲထီၣ်ခးသံ၀ဲဒၣ်ဖါတံၢ်စီၤကးကါ(၈၀)နံၣ်ဒီး မုဂါနီၢ်စ့ၤပူၣ်(၇၆)နံၣ် ခံအဂၤအံၤလၢဟံၣ်ပူၤအဂ့ၢ်န့ၣ် ဖုသးၦၢ်ဒီမါ၀ၤ(၂)ဂၤလၢအဘၣ်တၢ်မၤသံအီၤအံၤ အဖိခွါအနီၢ်ကစၢ်ဒၣ်၀ဲစံး၀ဲန့ၣ်လီၤႉ ဖုသးၦၢ်ဒီမါ၀ၤခံဂၤအဖိခွါ စီၤကိၤငဲၤ စံး၀ဲလၢ“တၢ်မၤသံတၢ်ဂ့ၢ်တၢ်ကျိၤခီန့ၣ်အ၀ဲသ့ၣ်ဟဲန့ၣ်ကဘၣ်ဖဲမုၢ်နၤခီ (၉)နၣ်ရံၣ် ဒီး(၁၀)နၣ်ရံၣ်အဘၢၣ်စၢၤန့ၣ်ႉဟဲတထံၣ်ဃီန့ၣ်တတဲတၢ်နီမံၤဘၣ်ႉဟံၣ်တဖျၢၣ်ပူၤန့ၣ်ၦၤအိၣ်ခဲလၢာ်(၃)ဂၤ လၢအ၀ဲတဂၤ န့ၣ်ၦၤကွးရီဘၢၣ်ဖိႉခးသံ၀ဲန့ၣ်ခံဂၤလီၤႉမ့မ့ၢ်လၢၦၤကွးရီဘၢၣ်ဖိန့ၣ်တခးသံ၀ဲဒၣ်ဘၣ်ႉခးသံ၀ဲလိၤလိၤၦၤသးၦၢ်ခံဂၤန့ၣ်လီၤႉယသံကွၢ်ၦၤလၢတၢ်ခိၣ်တၢ်ဃၢၤဖဲန့ၣ်ၦၤတဲယၤလၢၦၤဟဲန့ၣ်ၦၤဖိသၣ်ခံဂၤႉၦၤတဲလၢအကဲ၀ဲဒၣ် (DKBA)အၦၤႇ၀ဲဒၣ်ဒု ပတယးဒ်န့ၣ်လီၤႉမ့ၢ်ဂ့ၤတမ့ၢ်ဂ့ၤၦၤတယးဒ်န့ၣ်လီၣ်ဒုကမ့ၢ်လီၢ်ဧါသၢၣ်ႉဘၣ်မနုၤအဃိလဲၣ် ၦၤအိၣ်ဖဲန့ၣ်သၢဂၤခးသံ၀ဲခံဂၤ အ၀ဲတဂၤအိၣ်တီၢ်န့ၣ်သ့ၣ်ညါ၀ဲစ့ၢ်ႉဖဲန့ၣ်ၦၤထံၣ်တၢ်ကဲထီၣ်သး(သက်သေ)အိၣ်တဂၤစ့ၢ်မီၤနီၤ.ဘၣ်ဃးတၢ်ဂ့ၢ်အံၤပဆၢမုၢ်လၢ်လၢပှၤလၢမူဒါအိၣ်တဖၣ်ကဟံမူဒါ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ၦၤဟဲခးသံတၢ်ဘျီ၀ဲအံၤမ့့မ့ၢ်မုဂါနီၢ်စ့ၤပူၣ်န့ၣ်တၢ်ခး၀ဲအသးနါၦၢ်(၂)ထံၣ်ႇအနၢ်တကံၤထံး(၁)ထံၣ် ဒီးဖါတံၢ် စီၤကးကါခီန့ၣ်တၢ်ခး၀ဲဒၣ်အမဲာ်ချံခံဖျၢၣ်လၢာ်တကပၤတထံၣ်အသိး တၢ်ပညိၣ်အိၣ်လိၤလိၤလၢကဟဲခးသံတၢ် ဒီးခးသံ၀ဲလၢတၢ်ဂ့ၢ်မနုၤအဃိလဲၣ်န့ၣ်တသ့ၣ်ညါ၀ဲလီၤတံၢ်ဘၣ်အဂ့ၢ်န့ၣ် ဒူၣ်ဖိထၢဖိတဖၣ်စံး၀ဲန့ၣ်လီၤႉ တကးဒံးဘၣ်လၢန့ၣ်အမဲာ်ညါကရူၢ်ကရၢအၦၤလၢအဟဲခးသံတၢ်အံၤ တုၤလၢခဲအံၤတၢ်ဟံးထီၣ်ဖီၣ်ထီၣ်အရ့ တအိၣ်၀ဲဒၣ်နီမံၤဘၣ်အဃိ ဒံၣ်ဖိလၢအအိၣ်လီၤတဲာ်တဖၣ်လိၣ်ဘၣ်၀ဲတၢ်တီတၢ်တြၢ်အဲၣ်ဒိးလၢတၢ်ကဟံထီၣ်ဖီၣ် ထီၣ်ဂ့ၢ်၀ီတုၤလီၤတီၤလီၤအဂ့ၢ်န့ၣ် စီၤကိၤငဲၤ စံးအါထီၣ်၀ဲန့ၣ်လီၤႉ ဒ်န့ၣ်အသိးတၢ်လီၢ်လၢတၢ်ကဲထီၣ်သးအလီၢ်အံၤအိၣ်၀ဲဒၣ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ်အပူၤဒီး ဘၣ်ဆၣ်တၢ်လီၢ်ဖဲန့ၣ်အပူၤန့ၣ် ဖီၣ်စုက၀ဲၤကရူၢ်လၢအမ့ၢ် (ခ့ၣ်အဲၣ်ယူၣ်)အၦၤႇ(BGF),(DKBA),(PDF)အိၣ်ဆိးဟူးဂဲၤ၀ဲဒၣ်အဂ့ၢ်န့ၣ် ခ့ၣ်အဲၣ်ယူၣ်လီၢ်က၀ီၤၦၤဘၣ်မူဘၣ်ဒါအသိး သ့ၣ်ညါဘၣ်န့ၣ်လီၤ ဘၣ်ဃးတၢ်ဂ့ၢ်တၢ်ကျိၤ၀ဲအံၤန့ၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ...
ဒ်သိးကသ့တီခိၣ်ရိၣ်မဲတၢ်ဒီးမၤစၢၤက့ၤတၢ်လၢၦၤတ၀ၢပူၤအဂီၢ်တၢ်ဒုးအိၣ်ထီၣ်န့ၢ်၀ဲတၢ်သူၣ်ထီၣ်သးစၢ်ကံၢ်စီတၢ်သ့တၢ်ဘၣ်တၢ်မၤလိ
လါယူၤ ၁၁ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒ၀ဲၢ်ကီၢ်ရ့ၣ်သုးက့(၄)ဟီၣ်က၀ီၤတၢ်လီၢ်တတီၤအပူၤဒ်သိးၦၤသးစၢ်သ့ၣ် တဖၣ်ကသ့တီခိၣ်ရိၣ်မဲတၢ်ဒီးမၤစၢၤက့ၤတၢ်လၢၦၤတ၀ၢပူၤအဂီၢ်ဖဲမဟါလါယူၤ(၁၀)သီအနံၤန့ၣ်တၢ်အိးထီၣ်န့ၢ်၀ဲတၢ်သူၣ်ထီၣ်သးစၢ်ကံၢ်စီတၢ်သ့တၢ်ဘၣ်တၢ်မၤလိတၢ်ရဲၣ်တၢ်ကျဲၤမူးတခါအဂ့ၢ်ဘျံးဒ၀ဲၢ်ကီၢ်ရ့ၣ်အၦၤဘၣ်မူဘၣ်ဒါစံး၀ဲန့ၣ်လီၤႉ တၢ်သူၣ်ထီၣ်န့ၢ်၀ဲၦၤသးစၢ်သ့ၣ်တဖၣ်ကံၢ်စီတၢ်တိာ်ကျဲၤတခါအံၤန့ၣ်မ့ၢ်ဒ်သိးတၢ်ကသူၣ်ထီၣ်န့ၢ်၀ဲၦၤသးစၢ်သ့ၣ်တဖၣ်ကအိၣ်ဒီးကံၢ်စီလၢကသ့တီခိၣ်ရိၣ်မဲက့ၤအတၢ်ကရၢကရိမ့ၢ်ဂ့ၤႇ အဒူသ၀ီမ့ၢ်ဂ့ၤဒီးအၦၤတ၀ၢမ့ၢ် ဂ့ၤအဂ့ၢ်ဘျံးဒ၀ဲၢ်ကီၢ်ရ့ၣ်နဲၣ်ရွဲၣ်ပဒိၣ်စီၤအဲၣ်နၤစံးဘၣ်၀ဲခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤႉ “တၢ်သူၣ်ထီၣ်သးစၢ်ကံၢ်စီတၢ်တိာ်ကျဲၤတခါအံၤန့ၣ်ဒ်သိးကသူၣ်ထီၣ်န့ၢ်၀ဲအ၀ဲသ့ၣ်အကံၢ်အစီမီၤနီၤႉ မ့ၢ်၀ံၤန့ၣ် အ၀ဲသ့ၣ်တဖၣ်န့ၣ်မၤစၢၤက့ၤအတၢ်ကရၢကရိႇ မၤစၢၤက့ၤအဒူသ၀ီႇ မၤစၢၤက့ၤအၦၤတ၀ၢဒီးတီခိၣ်ရိၣ် မဲက့ၤတၢ်ကသ့အဂီၢ်လီၤႉ”အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါဘၣ်ဃးဒီးသးစၢ်ကံၢ်စီတၢ်သူၣ်ထီၣ်တၢ်မၤလိတခါအံၤန့ၣ်မ့ၢ်တၢ်အကါဒိၣ်၀ဲဒၣ်လၢၦၤသးစၢ်သးဖိသ့ၣ်တဖၣ်အဂီၢ်ဒီးလၢပၦၤကလုာ်တၢ်လဲၤထီၣ်လဲၤထီအဂီၢ်တၢ်တီခိၣ်ရိၣ်မဲန့ၣ်မ့ၢ်တၢ်လိၣ်၀ဲဒၣ်ထီဘိအဃိလၢတၢ်ကတဲာ်ကတီၤဒုးသ့ဒုးဘၣ်ထီၣ်ဒီးမၤအါထီၣ်သးစၢ်သ့ၣ်တဖၣ်ကံၢ်စီအံၤမ့ၢ်တၢ်လၢအရ့ဒိၣ်၀ဲဒိၣ်မးအဂ့ၢ်ဘျံးဒ၀ဲၢ်ကီၢ်ရ့ၣ်နဲၣ်ရွဲၣ်ပဒိၣ်စီၤအဲၣ်နၤစံးအါထီၣ်၀ဲန့ၣ်လီၤႉ တၢ်သူၣ်ထီၣ်သးစၢ်ကံၢ်စီတၢ်သ့တၢ်ဘၣ်တၢ်မၤလိအံၤအပူၤတၢ်ပာ်ပနီၣ်၀ဲကၠိဖိၦၤနီၣ်ဂံၢ်ထဲဒၣ်(၂၅)ဂၤဒီးၦၤကၠိဖိခဲလၢာ်ဟဲထီၣ်အိၣ်၀ဲဒၣ်ၦၤဂၤ(၁၀)ဂၤဘျဲၣ်ဒီးမ့မ့ၢ်လၢတၢ်မၤလိကတီၢ်တခီကယံာ်၀ဲဒၣ်(၈)လါအဂ့ၢ်သ့ၣ်ညါဘၣ်န့ၣ်လီၤႉ တၢ်မၤလိ၀ဲအံၤန့ၣ်ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢဘျံးဒ၀ဲၢ်ကီၢ်ရ့ၣ်အတၢ်တီခိၣ်ရိၣ်မဲအဖီလာ် ဒုးအိၣ်ထီၣ်၀ဲဒၣ်ဒီးတၢ်မၤလိအပူၤတၢ်သိၣ်လိဃုာ်၀ဲဒၣ်လံာ်လဲၢ်သ့ၣ်တဖၣ်ဒ်အမ့ၢ် ခိၣ်နၢ်တၢ်တီခိၣ်ရိၣ်မဲတၢ်ႇ တၢ်ပၢဆှၢရဲၣ်ကျဲၤတၢ်ႇ ကညီကလုၢ်လၢ်ထူသနူဒီးတၢ်ဆဲးတၢ်လၤ သ့ၣ်တဖၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ ဖဲပူၤကွံာ်လါယူၤ(၁၀)သီအနံၤတၢ်အိးထီၣ်၀ဲတၢ်သူၣ်ထီၣ်သးစၢ်ကံၢ်စီတၢ်မၤလိမူးတၢ်ရဲၣ်တၢ်ကျဲၤအပူၤအံၤဘျံးဒ၀ဲၢ်ကီၢ်ရ့ၣ်၀ဲၤကျိၤအၦၤဘၣ်မူဘၣ်ဒါႇ တၢ်မၤလိသရၣ်/သရၣ်မုၣ်ဒီးသးစၢ်သ့ၣ်တဖၣ်ၦၤနီၣ်ဂံၢ်ဟဲထီၣ် ၀ဲဒၣ်ခဲလၢာ်(၅၀)ဂၤဃၣ်ဃၣ်အသိးတၢ်ဒုးအိၣ်ထီၣ်တၢ်သူၣ်ထီၣ်သးစၢ်ကံၢ်စီတၢ်မၤလိအံၤန့ၣ်ဘၣ်မၤအီၤကိးနံၣ်ဒဲးအဂ့ၢ်သ့ၣ်ညါဘၣ်န့ၣ်လီၤႉ
မဲၢ်လးဒဲက၀ီၤပူၤ လၢကဟဲဟီၣ်ခိၣ်ဒီဘ့ၣ်ဘၣ်ကီဘၣ်ခဲမုၢ်နံၤအဂီၢ်တၢ်တီခိၣ်ရိၣ်မဲမၤ၀ဲတၢ်တ့ပြၢတၢ်ဂီၤတခါ
လါယူၤ ၁၁ သီႇ ၂၀၂၄ နံၣ်ႇ ခ့ၣ်အဲးစံၣ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်လးဘၣ်ကီဘၣ်ခဲဒဲက၀ီၤအပူၤ တလါအံၤလါယူၤလၢကလီၤဘၣ်၀ဲ ဟီၣ်ခိၣ်ဒီဘ့ၣ်ဘၣ်ကီဘၣ်ခဲမုၢ်နံၤအဖီခိၣ်အံၤန့ၣ် ၦၤကၠိဖိသူၣ်ဘီၣ်သးစၢ်ဃုာ်ဒီးၦၤအိၣ်ဒဲက၀ီၤပူၤတဖၣ်အဂီၢ် ဒဲက၀ီၤၦၤဘၣ်မူဘၣ်ဒါတီခိၣ်ရိၣ်မဲဒုးအိၣ်ထီၣ်မၤ၀ဲတၢ်တ့ပြၢတၢ်ဂီၤတၢ်ရဲၣ်တၢ်ကျဲၤတခါအဂ့ၢ်န့ၣ် သ့ၣ်ညါဘၣ်န့ၣ်လီၤႉ မဲၢ်လးဘၣ်ကီဘၣ်ခဲဒဲက၀ီၤအပူၤ လၢကဟဲတလါအံၤလါယူၤ ၂၀ သီအနံၤန့ၣ် တၢ်ကမၤ၀ဲဒၣ်(World Refugee Day) လၢက၀ီၤဒိၣ်(Zone-c)ဖုကိပျီအံၤဒီး လၢမုၢ်နံၤလီၤဘၣ်ဘျီ၀ဲအံၤအဖီခိၣ် ဒဲက၀ီၤၦၤဘၣ်မူဘၣ်ဒါတီခိၣ်ရိၣ်မဲ ဒုးအိၣ်ထီၣ်၀ဲ တၢ်တ့ပြၢတၢ်ဂီၤတခါလၢ ၦၤဒဲက၀ီၤဖိတဖၣ်အဂီၢ်အဂ့ၢ်န့ၣ် မဲၢ်လးဒဲက၀ီၤခိၣ် စီၤသးကၢ စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ အ၀ဲစံး၀ဲလၢ“တနံၣ်ညါအံၤခီန့ၣ်ၦၤမၤပြၢက့ၤ၀ဲလၢတၢ်တ့ပြၢတၢ်ဂီၤမီၤနီၤႉၦၤဟ့ၣ်ဃုာ်၀ဲဒီးတၢ်ဂ့ၢ်ခိၣ်တီႇတနံၣ်ဒီး တနံၣ်န့ၣ်တၢ်ဂ့ၢ်ခိၣ်တီတဒ်သိးလိာ်သးဘၣ်ႉတၢ်ဂ့ၢ်ခိၣ်တီခီန့ၣ်(UNHCR)ထုးထီၣ်န့ၢ်ၦၤႉမ့မ့ၢ်တၢ်မၤဖျါထီၣ်က့ၤအမိၢ်လံၤမိၢ်ၦၢ်ခီန့ၣ်အိၣ်ဒၣ်ပဒဲက၀ီၤကမံးတံာ်ဒီးၦၤဒဲက၀ီၤဖိတဖၣ်မၤ၀ဲလီၤႉဒီးၦၤလၢအဲၣ်ဒိးမၤတၢ်ဟူးတၢ်ဂဲၤ(activity) ဖဲနံၤ၀ဲန့ၣ် အ၀ဲသ့ၣ်လဲၤမၤ၀ဲတၢ်ဟူးတၢ်ဂဲၤသ့လီၤ”အဂ့ၢ်န့ၣ် စံး၀ဲန့ၣ်လီၤႉ တၢ်ပြၢဘျီ၀ဲအံၤတၢ်နီၤဖးလီၤ၀ဲဒၣ်(၃)ပတီၢ်လၢကမ့ၢ်၀ဲ ဖိသၣ်(၁၅)နံၣ်ဆူဖီလာ်တပတီၢ်ႇ ဖိသၣ်(၁၅-၁၈)နံၣ် တပတီၢ်ႇ သးစၢ်(၁၈)နံၣ်ဆူဖီခိၣ်သ့ၣ်တဖၣ်ဒီး ဒ်န့ၣ်အသိး တၢ်ဂီၤလၢတၢ်ကဘၣ်တ့အီၤတဖၣ်န့ၣ်အခီပညီ ကဘၣ်ဘၣ်ထွဲလိာ် အသးဒီးတၢ်ပြၢခိၣ်တီလၢ(UNHCR)ထုးထီၣ်၀ဲလၢအမ့ၢ် “ဟီၣ်ခိၣ်တဘ့ၣ်လၢတူၢ်လိာ်မုာ်ၦၤဘၣ်ကီဘၣ်ခဲဖိ”အဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါတၢ်ဂီၤလၢတၢ်တ့အီၤသ့ၣ်တဖၣ်တၢ်ကဘၣ်ဆှၢထီၣ်အီၤဆဲးခံကတၢၢ်ဖဲခဲမုၢ်ဆ့ၣ်လါယူၤ ၁၂ သီဒီး မ့မ့ၢ်လၢၦၤကၠိဖိန့ၣ်ဆှၢထီၣ်အီၤဆူကၠိသရၣ်/မုၣ်အအိၣ်သ့၀ဲဒီး မ့တမ့ၢ်ၦၤကၠိဖိဘၣ်ခီန့ၣ်ဆှၢထီၣ်အီၤဆူက၀ီၤဒ့ခိၣ် (မ့တမ့ၢ်) VRC ရူႇ UNHCR ရူ သ့၀ဲဒၣ်အဂ့ၢ်န့ၣ် ဒဲက၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ တကတီၢ်ဃီတၢ်ဂီၤလၢတၢ်တ့အီၤသ့ၣ်တဖၣ်အံၤ(UNHCR)ၦၤဘၣ်မူဘၣ်ဒါကဃုထၢထီၣ်ဒုးသ့ၣ်ညါဟ့ၣ်လီၤက့ၤ၀ဲ ခိၣ်ဖးဖဲလါယူၤ ၂၀ သီလၢအလီၤဘၣ်၀ဲဟီၣ်ဒီဘ့ၣ်ဘၣ်ကီဘၣ်ခဲမုၢ်နံၤတၢ်ရဲၣ်တၢ်ကျဲၤပူၤအံၤဒီးတကးဒံးဘၣ် တၢ်ဂီၤသ့ၣ်တဖၣ်အံၤတၢ်ကပာ်ဖျါဒုးနဲၣ်ဃုာ်၀ဲလၢမုၢ်နံၤတၢ်ရဲၣ်တၢ်ကျဲၤအပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ မဲၢ်လးဘၣ်ကီဘၣ်ခဲဒဲက၀ီၤအံၤကိးမုၢ်နံၣ်ဒဲးမ့တုၤဃီၤလၢဘၣ်ကီဘၣ်ခဲမုၢ်နံၤအံၤလံန့ၣ် ညီနုၢ်ဒဲက၀ီၤၦၤဘၣ်မူဘၣ်ဒါ...