KNU ဃ့ထီၣ်ထံကီၢ်လၢဟ့ၣ်မၤစၢၤတၢ်တဖၣ်လၢကထိၣ်ဃူဒီးဂံၢ်ခီၣ်ထံးကရူၢ်ကရၢ၀ံၤမးကဆိကမိၣ်သကိး တၢ်တိစၢၤမၤစၢၤ
လါမးရှး ၂၉ သီႇ ၂၀၂၄ နံၣ်ႇ ခ့ၣ်အဲၣ်စံၣ်ႇ ကီၢ်ကၠီၣ်တဲၣ်ကီၢ်ပဒိၣ်ဟ့ၣ်ခီ၀ဲတၢ်တိစၢၤမၤစၢၤဆူကညီကီၢ်စဲၣ်ပူၤလီၢ်အိၣ်ကမှံဖိအဂၤ(၂၀၀၀၀)အဂီၢ်အံၤအဖီခိၣ် အံၤခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဃ့ထီၣ်၀ဲထံကီၢ်လၢဟ့ၣ်တၢ်မၤစၢၤတဖၣ်ကကူၣ်လိာ်ထိၣ်ဃူလိာ်သးဒီး ဂံၢ်ထီၣ်ထံးကရူၢ်ကရၢ၀ံၤမးကဆိမိၣ်သကိးတၢ်တိစၢၤမၤစၢၤအဂ့ၢ်န့ၣ် ထုးထီၣ်ပာ်ဖျါ၀ဲလံာ်ဖဲမဟါလါမးရှး (၂၈)သီ အနံၤန့ၣ်လီၤႉ ကၠီၣ်တဲၣ်ပဒိၣ်အတၢ်ဟ့ၣ်တၢ်တိစၢၤမၤစၢၤအကျိၤအကျဲအံၤခီဖျိတၢ်ဒုးသ့ၣ်ညါ၀ဲဂံၢ်ခီၣ်ထံးတၢ်ကရၢကရိ တအိၣ် နီတမံၤဘၣ်အဃိဆူမဲာ်ညါတၢ်မၤစၢၤဒ်အံၤမ့ၢ်အိၣ်န့ၣ်ဒ်သိးတၢ်တၢၣ်ပီၣ်တဲသကိးတၢ်ဒီးဂံၢ်ခီၣ်ထံးကရူၢ်ကရၢကအိၣ်ဖျိဖျိဖျါဖျါအဂီၢ်ခ့ၣ်အဲၣ်ယူၣ်ဘၣ်ထုးထီၣ်ပာ်ဖျါ၀ဲအတၢ်ပာ်သးဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ်ၦၤကတိၤတၢ်ပၢ ပဒိၣ်စီၤကျၢၤစ့ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တၢ်ဟ့ၣ်တၢ်ဒိသူၣ်ဒိသးတၢ်မၤစၢၤအံၤန့ၣ်ခီဖျိတၢ်တၢၣ်ပီၣ်တၢၣ်ပီတအိၣ်ဘၣ်အဃိခါဆူညါဒ်သိး တၢ်ကဒုးသ့ၣ်ညါဆဲးကျိးဆဲးကျၢ၀ဲဂံၢ်ခီၣ်ထံးၦၤဘၣ်မူဘၣ်ဒါတဖၣ်အဂီၢ်(ခ့ၣ်အဲၣ်ယူၣ်)ထုးထီၣ်ပာ်ဖျါ၀ဲအတၢ်ပာ်သးတဖၣ်လီၤဒီးပတၢ်ပာ်သးန့ၣ်မ့ၢ်ဒ်သိးပကွဲးဖျါထီၣ်လၢလံာ်ပူၤ(၆)ထံၣ်အသိးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါကၠီၣ်တဲၣ်ပဒိၣ်တၢ်ဟ့ၣ်တၢ်တိစၢၤမၤစၢၤအံၤခီဖျိပညိၣ်မၤသကိး၀ဲတၢ်ဒီးသုးကီၣ်ကး(MRCS)ကရူၢ်ကရၢလၢအဟ့ၣ်ဂံၢ်ဟ့ၣ်ဘါ(SAC)ဒီးတကးဒံးဘၣ်တၢ်တၢၣ်ပီၣ်ဒီးဂံၢ်ခီၣ်ထံးတၢ်ကရၢကရိတအိၣ်ဘၣ်အဃိ တၢ်မၤစၢၤအံၤကဲထီၣ်က့ၤတၢ်လၢတလဲၤအသးဘၣ်ဘျီးဘၣ်ဒါဘၣ်အဂ့ၢ်န့ၣ် (CIDKP-Community for Internally Displace Karen People )ကညီၦၤလီၢ်အိၣ်ကမှံကမံတံာ်ၦၤဘၣ်မူဘၣ်ဒါ စီၤခဲလ့ၣ် စံးစ့ၢ်ကီး၀ဲဒ်အံၤန့ၣ်လီၤႉ အ၀ဲစံး၀ဲလၢ“တၢ်နီၢ်နီၢ်န့ၣ်တၢ်လၢတၢ်ဟ့ၣ်လီၤအနီၢ်ကီၢ်န့ၣ်ကဘၣ်မ့ၢ်၀ဲတၢ်မၤသကိးလၢၦၤကိးဂၤဒဲးထံၣ်ဃုာ်၀ဲတထံၣ်ဃုာ်၀ဲမီၤနီၤႉတၢ်ဂ့ၢ်ကီမတၤဒုအိၣ်လဲၣ်န့ၣ်ၦၤကိးဂၤဒဲးကဘၣ်သ့ၣ်ညါထွဲ၀ဲဒၣ်အစှၤကတၢၢ်ကဘၣ်သံကွၢ်၀ဲဒၣ်တၢ်တခါအံၤမ့ၢ်အလိၣ်ဧါတလိၣ်ဧါန့ၣ်ကဘၣ်တၢၣ်ပီမၤသကိး၀ဲမီၤနီၤႉခဲအံၤခီန့ၣ်တဲ၀ဲလၢမၤ၀ဲဒီး(CIDKP)လၢကီၢ်ရ့ၣ်ပူၤဘၣ်ဆၣ်ပ၀ဲပအိၣ်ဖဲအံၤန့ၣ်ပတသ့ၣ်ညါတၢ်ကစီၣ်ခဲလၢာ်ခဲဆ့ဘၣ်အဖီခိၣ်န့ၣ်လီၤဂာ်ဒ်သိးၦၤမၤ(Humanitarian)လီၤ တံၢ်လီၤဆဲးန့ၣ်တပၣ်ဃုာ်၀ဲဘၣ်ႇအ၀ဲသ့ၣ်န့ၣ်(Focus)၀ဲလၢသုးကီၣ်ကးအၦၤ(MRCS)ဒီးဃု၀ဲကျဲလၢအမၤ၀ဲန့ၢ်ညီ အဃိန့ၣ်လဲၤ၀ဲသးဒ်အံၤမီၤႉလၢတၢ်န့ၣ်အဃိတၢ်တၢၣ်ပီၣ်မ့တအိၣ်ဘၣ်ကၠါဒုတၢ်မၤစၢၤအံၤတမ့ၢ်တၢ်ကဲထီၣ်သး ဘၣ်ဘျီးဘၣ်ဒါဘၣ်ဒီးတမ့ၢ်တၢ်လၢၦၤအါဂၤထံၣ်ဃုာ်ပၣ်ဃုာ်မၤသကိးတၢ်ဘၣ်အသိးတမ့ၢ်တၢ်မၤစၢၤဒ်သိးပမၤညီနုၢ်ဘၣ်မီၤ”အဂ့ၢ်န့ၣ် စံး၀ဲန့ၣ်လီၤႉ တကးဒံးဘၣ်ခါဆူညါတၢ်မၤစၢၤအံၤတၢ်တၢၣ်ပီၣ်တဲသကိးမ့တအိၣ်ဘၣ်မ့လဲၤအသးဒ်အလီၢ်လီၢ်န့ၣ် ကကဲထီၣ်၀ဲတၢ်ဖုၣ်ထံၣ်ဖုၣ်ထီလၢတၢ်ကရၢကရိအကျါသ့၀ဲအသိးကဲထီၣ်စ့ၢ်ကီးတၢ်ထံၣ်ကမၣ်လၢကမျၢၢ်အကျါ သ့၀ဲအဂ့ၢ်န့ၣ် စီၤခဲလ့ၣ် စံးအါထီၣ်၀ဲန့ၣ်လီၤႉ အပူၤကွံာ်လါမးရှး(၂၅)သီအနံၤန့ၣ် ကၠီၣ်တဲၣ်တၢ်တိစၢၤမၤစၢၤတၢ်ဖိတၢ်လံၤတဖၣ် တၢ်စိာ်ခီ၀ဲဆူရၤမတံ၀့ၢ် သုးကီၣ်ကးဂာ်တဲာ်ဂီၤတဖၣ်အစုပူၤ၀ံၤသုးခိးကီၢ်ဆၢ(BGF)ဟံးန့ၢ်၀ဲမူဒါတီဆှၢဃီၤ၀ဲဆူကၢၢ်ဂီၤ-သ့ၣ်ကတ့ၣ်အကျဲ တဆီဆူတန့ခၠါဒီးဖဲန့ၣ်ခ့ၣ်အဲၣ်ယူၣ်ကီၢ်ရ့ၣ်ၦၤဘၣ်မူဘၣ်ဒါတူၢ်လိာ်က့ၤ၀ဲကၠီၣ်တဲၣ်အတၢ်ဘိၣ်တၢ်မၤစၢၤ(၃၈၇၄)ဘိၣ်အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ...
KNLA (သုးက့ ၅)အၦၤနုာ်လီၤဖီၣ်ဂၢၢ် ဖၣ်ပူၣ် ၀့ၢ်န့ၢ်လံ
လါမးရှး ၂၉ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ် သုးက့(၅)ဟီၣ်က၀ီၤအပူၤ ဖဲမဟါလါမးရှး(၂၈)သီအနံၤန့ၣ် KNLA သုးက့(၅)တၢ်ပၢၢ်ဆၢသုးပာ်ဖှိၣ်ကရူၢ် နုာ်လီၤဖီၣ်ဂၢၢ်၀ဲ(ဖၣ်ပူၣ်)၀့ၢ်န့ၢ်လံ အဂ့ၢ်န့ၣ် မုၢ်တြီၢ်ကီၢ်အရ့ၣ် ၦၤဘၣ်မူဘၣ်ဒါ စံး၀ဲန့ၣ်လီၤႉ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(သုးက့ ၅)အၦၤနုာ်လီၤဖီၣ်ဂၢၢ်၀ဲဖၣ်ပူၣ်၀့ၢ်န့ၢ်လံဒီး တကီၢ်ခါခဲအံၤ ပယီၤသုးကလၢၤလၢအိၣ်ဖၣ်ပူၣ်၀့ၢ်ပူၤတဖၣ်ဟးထီၣ်ကွံာ်ခဲလၢာ်လံအဂ့ၢ်န့ၣ် (သုးက့ ၅)ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ အ၀ဲစံး၀ဲလၢ“ဖၣ်ပူၣ်၀့ၢ်ပူၤန့ၣ်ဘၣ်ဃးပယီၤသုးကလၢၤသ့ၣ်တဖၣ်န့ၣ်ဟးထီၣ်ကွံာ်၀ဲလၢာ်လံမီၤနီၤႉ အ၀ဲသ့ၣ်က့ၤ နုာ်လီၤပာ်ဖှိၣ်က့ၤအသးလၢအသုးကလၢၤဖးဒိၣ်အဒုးယၤသုးအိၣ်တၢ်လီၢ်အပူၤလီၤႉ မ့မ့ၢ်လၢ၀့ၢ်ပူၤဒုအိၣ်လၢ(KNLA)အၦၤလီၤမီၤနီၤႉ မ့မ့ၢ်(စကစ)အၦၤခီန့ၣ်တအိၣ်လၢၤဘၣ်အိၣ်က့ၤ(KNLA)အၦၤလီၤ” အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါပယီၤသုးလၢအိၣ်၀့ၢ်ပူၤတဖၣ်ဟးထီၣ်သုးက့ၤအသးလၢတၢ်လီၢ်အဂၤလံဘၣ်ဆၣ် အ၀ဲသ့ၣ်ကဘီယူၤဟဲခးလီၤကျိဖးဒိၣ်လၢက၀ီၤဒ့၀့ၢ်ပူၤဒီးဒူသ၀ီလၢအိၣ်တၢ်ခိၣ်တၢ်ဃၢၤဖဲန့ၣ်သ့ၣ်တဖၣ်အပူၤ အိၣ်၀ဲကိးနံၤဒဲးဃၣ်ဃၣ်အဂ့ၢ်န့ၣ် (သုးက့ ၅) ၦၤကတိၤတၢ်ပၢ စီၤကျၢၤဒိၣ်စံးအါထီၣ်စ့ၢ်ကီး၀ဲန့ၣ်လီၤႉ “လၢဖၣ်ပူၣ်၀့ၢ်ပူၤတၢ်အိၣ်သးခီဒုန့ၣ်ထံဖိကီၢ်ဖိကမျၢၢ်သ့ၣ်တဖၣ်ဟးထီၣ်ကွံာ် တအိၣ်လၢၤဘၣ်မီၤနီၤႉ ပယီၤသုးသ့ၣ်တဖၣ်န့ၣ်သုးလီၤက့ၤအသးလၢအဒုးယၤသုးကလၢၤအိၣ်တၢ်အလီၢ်မီၤနီၤႉ အ၀ဲသ့ၣ်သုးလီၤက့ၤအသးဘၣ်ဆၣ်ဟဲခးလီၤတၢ်ဒီးကဘီယူၤမုၢ်နၤမုၢ်ဆါလၢ၀့ၢ်က၀ီၤဒ့အပူၤဒီးဒူသ၀ီခိၣ်ဃၢၤဖဲန့ၣ်သ့ၣ်တဖၣ်ကိးနံၤဒဲးလီၤႉ ဖဲတဂီၤညါအံၤစ့ၢ်ကီးတၢ်သီၣ်ဖါရးညါႉ လၢတၢ်န့ၣ်အဃိကမျၢၢ်အိၣ်တဘူးလၢၤဘၣ်ဒီးဃ့ၢ်ထီၣ်ကွံာ်၀ဲလၢ၀့ၢ်ပူၤဒ်အံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီ တၢ်ကစီၣ်န့ၣ်လီၤႉ တကီၢ်ခါခဲအံၤခီဖျိဒုးယၤတၢ်သဘံၣ်သဘုၣ်အဃိဖၣ်ပူၣ်၀့ၢ်ပူၤၦၤကမျၢၢ်လၢအဃ့ၢ်ထီၣ်တဖၣ်လၢအ၀ဲသ့ၣ်အဂီၢ် လိၣ်ဘၣ်၀ဲတၢ်အီၣ်တၢ်အီႇကသံၣ်ကသီဒီးလၢကအိၣ်ကဆိးအဂီၢ်လိၣ်ဘၣ်၀ဲတၢ်ခိၣ်ဒုးသ့ၣ်တဖၣ်အဂ့ၢ်န့ၣ် ဟီၣ်က၀ီၤၦၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤႉ ဒ်န့ၣ်အသိးစှၤသီအတီၢ်ပူၤအံၤခီဖျိပယီၤသုးကဘီယူၤဟဲခးလီၤတၢ်လၢဖၣ်ပူၣ်၀့ၢ်ပူၤအဃိ ၦၤကမျၢၢ်သံဘၣ်ဒိဘၣ်ထံးအိၣ်၀ဲဒီးတကးဒံဘၣ် ၀့ၢ်ပူၤက၀ီၤဒ့ဟံၣ်ဃီတၢ်သူၣ်ထီၣ်တဖၣ်အူအီၣ်ဟးဂီၤကွံာ်၀ဲဒၣ် အါအါဂီၢ်ဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ စးထီၣ်ဖဲအပူၤကွံာ်လါမးရှး(၁၉)သီအနံၤန့ၣ် KNLA သုးက့(၅)ဒြိကရူၢ်အၦၤနုာ်လီၤခး၀ဲဒၣ် ဖၣ်ပူၣ်၀့ၢ်ပူၤ ပယီၤသုးကလၢၤတၢ်လီၢ်သ့ၣ်တဖၣ်ဒြိမ့ၣ်ပိၢ်တပယူာ်ဃီဒီးလၢတၢ်န့ၣ်အဃိပယီၤသုးတကပၤသံဘၣ်ဒိဘၣ်ထံး၀ဲဒၣ်အါမးအဂ့ၢ်န့ၣ်...
သုးကီၣ်ကးကဘီလၢအိၣ်(ဂျိုင်း)ကျိပူၤတဖၣ်ခးလီၤကျိဖးဒိၣ်အဃိဒမၣ်သၣ်သ၀ီပူၤကမျၢၢ်ဟံၣ်အူအီၣ်အါအါဂီၢ်ဂီၢ်
လါမးရှး ၂၈ သီႇ ၂၀၂၄ နံၣ်ႇ ခ့ၣ်အဲးစံၣ် တလၢၤကီၢ်စဲၣ် ကၠဲၣ်မယီကီၢ်ဆၣ်အပူၤ (ဒမၣ်သၤ)သ၀ီအပူၤ ဖဲပူၤကွံာ်လါမးရှး(၂၇)သီအနံၤန့ၣ် ခီဖျိသုးကီၣ်ကးအကဘီသုးလၢအိၣ်(ဂျိုင်း)ထံကျိပူၤတဖၣ်အံၤခးလီၤကျိဖးဒိၣ်ဒီးလီၤတဲာ်ပိၢ်ဖးထီၣ်လၢသ၀ီပူၤအဃိမ့ၣ်အူအီၣ်ခီဂာ်၀ဲဟံၣ်အါအါဂီၢ်ဂီၢ် အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ “ဖဲဟါခီအဆၢကတီၢ်ပယီၤသုးကျိၤနုာ်လီၤႇ တၢ်ဒုးစ့ၢ်ကီးကဲထီၣ်အဆၢကတီၢ်န့ၣ်သုးကီၣ်ကးကဘီသုးလၢအိၣ် (ဂျိုင်း)ကျိပူၤတဖၣ်ခးလီၤကျိဖးဒိၣ်လီၤတဲာ်လၢသ၀ီပူၤဘျီန့ၣ်သ၀ီဖိအဟံၣ်လွံၢ်ပူအကျါသၢပူန့ၣ်မ့ၣ်အူအီၣ်ကွံာ်ခဲလၢာ်လီၤႉ ကျဲမုၢ်အိၣ် ၅ ဘိန့ၣ် အကျါ ၄ ဘိ န့ၣ်မ့ၣ်အူအီၣ်ခဲလၢာ်လီၤႉ မ့မ့ၢ်လၢ(သယၣ်နၤ)သ၀ီတကပၤန့ၣ် တၢ်ခးလိာ်သးကဲထီၣ်လၢပယီၤသုးဒီးကညီသုးႇ တလၢၤသုးႇ (PDF)သ့ၣ်တဖၣ်အဘၢၣ်စၢၤမီၤနီၤ” အဂ့ၢ်(ကီၣ်ပီၣ်)သ၀ီဖိတဂၤ စံး၀ဲန့ၣ်လီၤႉ ဖဲပူၤကွံာ်လါမးရှး(၂၄)သီအနံၤန့ၣ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သိၣ်မှံတၢ်ပၢၢ်ဆၢသုးပာ်ဖှိၣ် ထီၣ်မၤန့ၢ်၀ဲ(ကီၣ်ဘ့)ပၢၤကီၢ်၀ဲၤလီၢ်၀ံၤအလီၢ်ခံပယီၤသုးကျိၤဟဲနုာ်လီၤလၢ သယၣ်နၤႇ ဒမၣ်သၣ််ႇ ကီၢ်ပီၣ် သ၀ီအပူၤဒီးဖဲမဟါလါမးရှး(၂၇)သီအနံၤန့ၣ်တၢ်ဒုးကဲထီၣ်၀ဲလၢခံခီခံကပၤအဘၢၣ်စၢၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ မ့ သ၀ီဖိတဂၤစ့ၢ်ကီးစံး၀ဲလၢ “ပယီၤသုးန့ၣ်လၢကဟဲဟံက့ၤ(ကီၢ်ဘ့)ပၢၤကီၢ်၀ဲၤလီၢ်အဂီၢ် န့ၣ်အသုးကျိၤဟဲထီၣ်၀ဲ ခံကျိၤမီၤနီၤႉ ပယီၤသုးကျိၤတကျိၤလၢအဟဲထီၣ်လၢဖၣ်အၣ်-ခလါ သၤလဲၤသ၀ီတကပၤန့ၣ်ဟဲခီဃီၤ၀ဲ(ဂျိုင်း)ကျိအံၤဒီးသုးကျိၤလၢအိၣ်ဟဲထီၣ်လၢ မီၣ်လမၠဲၣ် သယၣ်နၤ သ၀ီကျဲတဖၣ်န့ၣ် ကပံး၀ဲခံကပၤအဃိ တၢ်ဒုးကဲထီၣ်၀ဲဒီး(PDF)မီၤနီၤႉအ၀ဲသ့ၣ်ဟဲခးလီၤတၢ်ဒီးကဘီယူၤႇ ကဘီသုးလၢအိၣ်(ဂျိုင်း)ထံကျိတဖၣ်န့ၣ်နါက့ခးလီၤတၢ်စ့ၢ်” အဂ့ၢ်န့ၣ်စံး၀ဲန့ၣ်လီၤႉ ဒ်န့ၣ်အသိး(ကီၣ်ဘ့)ပၢၤကီၢ်၀ဲၤလီၢ်တၢ်ဒုးအပူၤန့ၣ်သုးကီၣ်ကးတကပၤသံ(၅)ဂၤ ပာ်လီၤစုက၀ဲၤအိၣ်၀ဲ(၂၃)ဂၤႇ မ့မ့ၢ်လၢတၢ်ပၢၢ်ဆၢသုးကရူၢ်တကပၤန့ၣ် ကီးတရံး သီသံၣ်သုးကျိၤ ၦၤသုးဖိသံ၀ဲဒၣ်(၂)ဂၤ အဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်သုးကျိၤထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ
(KNDO)ဒုးသ့ၣ်ညါစူးကလံပယီၤသုးတဖၣ်လၢကဟဲက့ၤပာ်ဖှိၣ်မၤသကိးတၢ်ဒီးအ၀ဲသ့ၣ်
လါမးရှး ၂၈ သီႇ ၂၀၂၄ နံၣ်ႇ ခ့ၣ်အဲးစံၣ်ႇ ပယီၤသုးကလၢၤလၢအိၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် သုးက့(၆) ကီးတရံးကီၢ်ဆၣ် ရၤမတံ၀့ၢ်ကလံၤစိး ဂီၤလ့ၤဟီၣ်က၀ီၤ စူးကလံသုးကလၢၤတဖၣ်အံၤ (KNDO)ကွဲးဒုးသ့ၣ်ညါအ၀ဲသ့ၣ်လၢကဟဲ ပာ်ဖှိၣ်မၤသကိးတၢ်ဒီးအ၀ဲသ့ၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘၣ်ဃးလံာ်ဒုးသ့ၣ်ညါတဘ့ၣ်အံၤန့ၣ် ဟီၣ်က၀ီၤၦၤဘၣ်မူဘၣ်ဒါလၢတအဲၣ်ဒိးပာ်ဖျါအမံၤတဂၤ စံး၀ဲလၢ “ၦဲၤသိးယသ့ၣ်ညါန့ၣ်တၢ်လီၢ်ဖဲန့ၣ်သုးရ့ၣ်ခိၣ်အဲၣ်မၠးထူဒီးအၦၤတဖၣ်န့ၣ်အကစးထီၣ်ဟူးဂဲၤ၀ဲအဃိကဟ့ၣ်ဆိ၀ဲလံာ်ဒီးဟ့ၣ်၀ဲလံာ်ဒုးသ့ၣ်ညါဆိ၀ဲ၀ံၤပယီၤသုးတကပၤမ့ဟဲမၤသိကိးတၢ်ခီန့ၣ်တခး၀ဲဘၣ်မီၤႉနါက့အတၢ်မ့တဟဲပာ်ဖှိၣ်မၤသကိးတၢ်ဘၣ်ခီန့ၣ်ကထီၣ်ခးမီၤလဲၤသးကၠါန့ၣ်ႇစူးကလံသုးကလၢၤဒုအိၣ်ဆီလီၤ သးဖးယံၤလံဒီးအသုးလၢအိၣ်ဖဲန့ၣ်သ့ၣ်တဖၣ်ခီန့ၣ်အပူၤကွံာ်န့ၣ်အိၣ်၀ဲသုးရ့ၣ်ခိၣ်တဂၤလီၤမ့မ့ၢ်အဒုးယၤခိၣ်န့ၣ်အိၣ်လၢကၠဲးဒိလီၤမီၤအဃိန့ၣ်ယကနၣ်ဒုမ့မ့ၢ်လၢအသုးနီၣ်ဂံၢ်န့ၣ်ဒုယဆိမိၣ်ကအိၣ်အဂၤလွံၢ်ဆံဘျဲၣ်ယဲၢ်ဆံညါမီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ လၢန့ၣ်အမဲာ်ညါဒ်(ု္ဒီO)လံာ်တၢ်ဒုးသ့ၣ်ညါအပူၤန့ၣ််ပာ်ဖျါ၀ဲအသိးန့ၣ် စူးကလံပယီၤသုးကလၢၤ ခီၣ်ချ့သုးရ့ၣ်(ခမရ-၅၆၀)သုးရ့ၣ်ခိၣ် သုးခိၣ်ဒိၣ်၀ီၢ်ဂ့ၢ် သူရ့ၤအူ ဒီး ခီၣ်သုးရ့ၣ်(ခလရ-၃၂)သုးရ့ၣ်ဃုာ်ဒီး သုးကလၢၤခိၣ်နၢ်တဖၣ် လၢဒ်သိးအဟံၣ်ဖိဃီဖိအပျဲၢ်အဘီၣ်တဖၣ်တၢ်ဘၣ်ဒိဘၣ်ထံးသုတအိၣ်ထီၣ်တဂ့ၤအဂီၢ်ဆၢမုၢ်လၢ်လၢခိၣ်နၢ်ကဆိမိၣ်ဃုထၢကျဲ ဆၢတဲာ်တၢ်လၢအဂ့ၤကတၢၢ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ တကးဒံးဘၣ်သုးကီၣ်ကးအၦၤတဖၣ်အံၤမ့ၢ်ဟဲပာ်ဖှိၣ်မၤသကိးတၢ်န့ၣ်တၢ်အုၣ်ကီၤသးလၢအဟံၣ်ဖိဃီဖိအဂီၢ်ကအိၣ်၀ဲဒီး မ့ၢ်တဟဲပာ်ဖှိၣ်မၤသကိးတၢ်ဘၣ်န့ၣ်တၢ်ပၢၢ်ဆၢသုးပာ်ဖှိၣ်ကထီၣ်ဒုး၀ဲအသုးကလၢၤအံၤတုၤလၢအန့ၢ်လီၤအဃိ မ့ၢ်ဆၢတဲာ်လၢကဟဲပာ်ဖှိၣ်မၤသကိးတၢ်န့ၣ်ကဒုးသ့ၣ်ညါဘၣ်က့ၤတၢ်ပၢၢ်ဆၢကရူၢ်တဖၣ်လၢတၢ်ခးသီၣ်ထီၣ်ကျိဖိကလုၢ်ဒီး ကိးပသူသီၣ်ထီၣ်ကလုၢ်အဂ့ၢ်န့ၣ် ပာ်ဖျါ၀ဲစ့ၢ်ကီးန့ၣ်လီၤႉ ဂီၤလ့ၤဟီၣ်က၀ီၤအပူၤသုးကီၣ်ကးအသုးကလၢၤခဲလၢာ်အကျါဂီၤလ့ၤသုးကလၢၤဒီးစူးကလံသုးကလၢၤအံၤ မ့ၢ်သုးကလၢၤတဖၣ်လၢအအိၣ်ဆီလီၤသးအနံၣ်ယံၤကတၢၢ်ဒီးအိၣ်ဆီလီၤသးအိၣ်၀ဲအနံၣ်(၃၀)ဃၣ်ဃၣ်လံအဂ့ၢ်န့ၣ် ၦၤဘၣ်မူဘၣ်ဒါတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ ဒ်န့ၣ်အသိးထံကပျၢၤသုးကလၢၤလၢအိၣ်ဆီလီၤသးဖဲဂီၤလ့ၤဟီၣ်က၀ီၤအပူၤအံၤစ့ၢ်ကီး စးထီၣ်ဖဲလါမးရှး (၁၂ )သီအနံၤန့ၣ် တၢ်ပၢၢ်ဆၢသုးပာ်ဖှိၣ်လဲၤထီၣ်ခး၀ဲဒီးတုၤလၢခဲအံၤတၢ်ဒုးဆဲးကဲထီၣ်ဒံး၀ဲအဖၢမုၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
စ့တိာ်ပာ်နီၣ်ဂံၢ်ကၦဲၤထီၣ်ချ့ချ့အဂီၢ်လိၣ်ဘၣ်၀ဲကမျၢၢ်ဂံၢ်ဘါအဂ့ၢ် ခဲၤဖ့သီသံၣ်ခိၣ်ၦၤဘၣ်မူဘၣ်ဒါစံး၀ဲ
လါမးရှး ၂၈ သီႇ ၂၀၂၄ နံၣ်ႇ ခ့ၣ်အဲးစံၣ် လၢတၢ်ကဒုးဖျိးကွံာ်သုးမီၤစရိၤသုးကလၢၤအဂီၢ်ဖဲအပူၤကွံာ်လါဖ့ၤဘြူၤအါရံၤအခါန့ၣ်ကလံၤစိးဟီၣ်က၀ီၤ သုးက့(၄)ဘ့ၣ်ပာ်ဖှိၣ်ထီၣ်သးဒုးအိၣ်ထီၣ်၀ဲ(ခဲၤဖ့)တခါဒီးတကီၢ်ခါခဲအံၤခီဖျိစ့လၢတၢ်တိာ်ပာ်၀ဲအနီၣ်ဂံၢ်တၦဲၤဒံးဘၣ်အဃိဒ်သိးစ့နီၣ်ဂံၢ်ကၦဲၤချ့ချ့ အဂီၢ် လိၣ်ဘၣ်၀ဲဒၣ်ကမျၢၢ်အဂံၢ်အဘါအဂ့ၢ်န့ၣ် ခဲၤဖ့သီသံၣ်ခိၣ်ၦၤဘၣ်မူဘၣ်ဒါစံး၀ဲန့ၣ်လီၤႉ ခဲၤဖ့တၢ်ဟူးတၢ်ဂဲၤဘျီ၀ဲအံၤတၢ်စးထီၣ်အီၤဖဲလါဖ့ၤဘြူၤအါရံၤ ၂၀ သီတုၤလၢ လါမးရှး ၃၁ သီဒီး ဘၣ်ဆၣ်ခဲအံၤ ခီဖျိစ့လၢတၢ်ပာ်ပနီၣ်အနီၣ်ဂံၢ်နီၣ်ဒွးမျးကယၤအံၤန့ၢ်ဒံးဒၣ်ထဲ(၃၆)မျးကယၤဒံးလီၤစ့တိာ်ပာ်လိၣ်ဒံး၀ဲ(၆၄)မျးကယၤ အဃိ ကမျၢၢ်ထံဖိကီၢ်ဖိလၢအိၣ်တ့ၢ်ဒံးသ့ၣ်တဖၣ် ကဆီၣ်ထွဲမၤစၢၤသကိး(ခဲၤဖ့)တၢ်ဟူးတၢ်ဂဲၤဘျီ၀ဲအံၤအဂ့ၢ်န့ၣ် (ခဲၤဖ့)သီသံၣ်ခိၣ် ဆီၣ်တခူထီၣ်၀ဲန့ၣ်လီၤႉ (ခဲၤဖ့)သီသံၣ်ခိၣ်တၢ်ဟူးတၢ်ဂဲၤဘျီ၀ဲအံၤတၢ်တိာ်ပာ်၀ဲအစ့ပယီၤအကလီၢ်(၁၀၀)ဒီးစ့အံၤတမ့ၢ်လၢမုၢ်ကျိၤ၀ဲၤ ကွာ်အဂီၢ်ဘၣ်အဃိလိၣ်ဘၣ်၀ဲကမျၢၢ်အတၢ်ဆီၣ်ထွဲမၤစၢၤအဂ့ၢ်န့ၣ် (ခဲၤဖ့)သီသံၣ်ခိၣ် ၦၤဘၣ်မူဘၣ်ဒါ စီၤအဲလ်ဘၢၣ်ခၠိၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ အ၀ဲစံး၀ဲလၢ“ဘၣ်ဃးလၢခဲၤဖ့သီသံၣ်ခိၣ်န့ၣ်ပတၢ်တိာ်ပာ်န့ၣ်အကလီၢ်(၁၀၀)မီၤနီၤႉဘၣ်ဆၣ်ခဲအံၤအတထီၣ်ဘးဒံးဘၣ်ႉလိၣ်ဒံး၀ဲဒၣ်(၆၄)မျးကယၤဒံးအဃိပအဲၣ်ဒိးတဲကမျၢၢ်လၢခဲဖ့အံၤတမ့ၢ်လၢမုၢ်ကျိၤ၀ဲၤကွာ်အဂီၢ်ဘၣ်ႉခဲဖ့အံၤလၢပကမၤဆူၣ်ထီၣ်က့ၤတၢ်ဟူးတၢ်ဂဲၤခွဲပျီခွဲဆှဲက့ၤဒုၣ်ဒါလီၤႉအဃိပလိၣ်ဘၣ်၀ဲဒၣ်ကမျၢၢ်အဂံၢ်အဘါပလိၣ်ဘၣ်လၢ ကမျၢၢ်ကဆီၣ်ထွဲၦၤႉ ခံမံၤတမံၤန့ၣ်ကျိၣ်စ့လၢအဟဲနုာ်လီၤတဖၣ်န့ၣ်လဲၤ၀ဲဒၣ်လိၤလိၤလၢသုးမုၢ်ဒိၣ်အတၢ်လိၣ်အဃိပအဲၣ်ဒိးဒုးသ့ၣ်ညါကမျၢၢ်လၢပမ့အဲၣ်ဘၣ်ပၦၤကလုာ်သုးမုၢ်သံၣ်ဘိန့ၣ်ပၣ်ဃုာ်ပၣ်ဂီၢ်မၤသကိးမီၤနီၤ”အဂ့ၢ်န့ၣ် စံး၀ဲ န့ၣ်လီၤႉ လၢန့ၣ်အမဲာ်ညါခဲအံၤခီဖျိတၢ်ပာ်ပနီၣ်(ခဲၤဖ့)အမုၢ်နံၤမုၢ်သီကၦဲၤထီၣ်အိၣ်ဒံးဒၣ်ထဲစှၤသီအတီၢ်ပူၤလီၤဒီး ဘၣ်ဆၣ်ခီဖျိစ့လၢတၢ်တိာ်ပာ်အီၤအံၤတၦဲၤထီၣ်ဒံးဘၣ်အဃိလၢကဆဲးဒိးန့ၢ်ဘၣ်တၢ်ဆီၣ်ထွဲမၤစၢၤအါထီၣ်အဂီၢ် တၢ်ရဲၣ်တၢ်ကျဲၤအိၣ်လၢကမၤအါထီၣ်၀ဲမုၢ်နံၤမုၢ်သီအဂ့ၢ်န့ၣ် သရၣ်စီၤအဲလ်ဘၢၣ်ခၠိၤ စံးအါထီၣ်၀ဲန့ၣ်လီၤႉ “စ့နီၣ်ဂံၢ်ဒုတၦဲၤဒံးဘၣ်ဘၣ်ဆၣ်သနါက့ပမ့သုးအါထီၣ်မုၢ်နံၤမုၢ်သီန့ၣ်ပကသုးအါထီၣ်ဒၣ်လၢအနွံလီၤမီၤႉပတသုးထီထီလၢၤဘၣ်ႉစ့နီၣ်ဂံၢ်မ့တၦဲၤဘၣ်နါက့တဘၣ်နီမံၤဘၣ်ႉတၢ်လၢသုးမုၢ်ဒိၣ်ခီန့ၣ်အတၢ်ဖံးတၢ်မၤအိၣ်န့ၣ်အမၤ၀ဲလီၤႉ တမ့ၢ်လၢစ့ၦဲၤမးမၤ၀ဲသ့ဘၣ်မီၤနီၤႉအိၣ်ဒၣ်တခါလၢခီဖျိတၢ်ဟဲနုာ်လီၤအဃိန့ၣ်ကဲထီၣ်၀ဲဒၣ်တၢ်ဂံၢ်တၢ်ဘါလၢတၢ်ဟူးတၢ်ဂဲၤအဂီၢ်မီၤနီၤႉအဃိစ့နီၣ်ဂံၢ်မ့တၦဲၤဘၣ်နါက့ပမ့မၤအါထီၣ်မုၢ်နံၤန့ၣ်ပကမၤအါထီၣ်ဒၣ်တနွံဒ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ တကးဒံးဘၣ်ဒ်သိးခဲၤဖ့သီၣ်သံၣ်ခိၣ်စ့နီၣ်ဂံၢ်ကၦဲၤထီၣ်ချ့ချ့အဂီၢ်န့ၣ်တၢ်ဆၢကတီၢ်ဒီတကတီၢ်အပူၤပထံၣ်ဘၣ်လၢ သုးက့(၄)ဘ့ၣ်လၢာ်ၦၤဘၣ်မူဘၣ်ဒါခိၣ်နၢ်တဖၣ်ကတိၤဆီၣ်တခူကမျၢၢ်ထံဖိကီၢ်ဖိလၢကနုာ်လီၤပၣ်ဃုာ်ပၣ်ဂီၢ်လၢ (ခဲၤဖ့)သီသံၣ်ခိၣ်တၢ်ဟူးတၢ်ဂဲၤဘျီ၀ဲအံၤအပူၤန့ၣ်လီၤႉ (ခဲၤဖ့)သီသံၣ်ခိၣ်အံၤဘၣ်တၢ်ပာ်ဖှိၣ်ဒုးအိၣ်ထီၣ်အီၤ၀ဲလၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးက့(၁)ႇ (သုးက့ ၂)ႇ (သုးက့ ၃)ႇ(သုးက့ ၅)ဒီးခဲၤဖ့အတၢ်ပညိၣ်န့ၣ်ဒ်သိးတၢ်ကထီၣ်ဒုးဖျိးကွံာ်ဒုၣ်ဒါအဂီၢ်ဒီး သုးမုၢ်သံၣ်ဘိ တၢ်ဘၣ်ဒိဘၣ်ထံးကလီၤစှၤအဂီၢ်ဒီးတၢ်သူကျိချံၦာ်သၣ်ဒြိသ့ၣ်တဖၣ်ကန့ၢ်အါထီၣ်၀ဲအဂီၢ်လီၤအဂ့ၢ်န့ၣ် ခဲၤဖ့သီသံၣ်ခိၣ် ပာ်ဖျါတ့ၢ်ဃာ်၀ဲလၢအ(ဖ့းစ်ဘူး)ပူၤန့ၣ်လီၤႉ
တၢ်ဆၢကတီၢ်တုၤဃီလံလၢပကဘၣ်ရိဖှိၣ်ဃူဖိးဒီးလဲၤထီၣ်ဆူတၢ်မၤနၢၤဖီတၢၣ်အဂ့ၢ် တၢ်ဒီတဒၢ၀ဲၤကျိၤခိၣ် စံး၀ဲ
လါမးရှး ၂၇ သီႇ၂၀၂၄နံၣ်ႇခ့ၣ်အဲးစံၣ်ႇ ကတီၢ်ခဲအံၤတၢ်ဆၢကတီၢ်တုၤဃီၤလံလၢပဘၣ်ရိဖှိၣ်ဃူဖိးဒီးဒုးသကိးတၢ်လၢတၢ်မၤနၢၤဖီတၢၣ်အဂီၢ်အဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ တၢ်ဒီတဒၢ၀ဲၤကျိၤခိၣ် ပဒိၣ်စီၤဆၢဂ့ၤဆီၣ်တခူထုးထီၣ်ပာ်ဖျါ၀ဲဖဲမဟါလါမးရှး(၂၆)သီ အနံၤန့ၣ်လီၤႉ တၢ်ပၢၢ်ဆၢတၢ်ဖံးတၢ်မၤဒီတကတီၢ်အပူၤခီဖျိတၢ်ဂ့ၢ်အါမံၤအဃိသုးမုၢ်သံၣ်ဘိဒီးတၢ်ကရၢကရိတဖၣ်ဘၣ်လီၤမုၢ်လီၤဖးအိၣ်ထီၣ်၀ဲဒီးဘၣ်ကွၢ်ဆၢၣ်မဲာ်တ့ၢ်၀ဲတၢ်အါမံၤအသိးလဲၤခီဖျိတ့ၢ်လၢတၢ်မၤနၢၤအဃိမ်ကပဟံန့ၢ်က့ၤတၢ်မၤလိလၢပတၢ်လဲၤခီဖျိသ့ၣ်တဖၣ်အဖီခိၣ်ဒီးအိၣ်ဆၢထၢၣ်သကိးက့ၤဂၢၢ်ဂၢၢ်ကျၢၤကျၢၤလၢပၦၤကလုာ်တဖၣ်အဂီၢ်အဂ့ၢ်န့ၣ် လံာ်ထုးထီၣ်ပာ်ဖျါအပူၤ ပဒိၣ် စီၤဆၢဂ့ၤ စံး၀ဲန့ၣ်လီၤႉ အပူၤကွံာ်တၢ်ပၢၢ်ဆၢတၢ်ဖံးတၢ်မၤအပူၤပတၢ်ဂံၢ်စၢ်ဘါစၢ်အိၣ်၀ဲအါမံၤဘၣ်ဆၣ်ပတၢ်မုၢ်လၢ်တၢ်ကွၢ်စိမ့ၢ်ဒၣ်ထဲလၢ ပၦၤကလုာ်ႇပကီၢ်သူလ့ၤအဂီၢ်ဒီးကီၢ်စၢဖှိၣ်တဘ့ၣ်အပူၤကလုာ်ဒူၣ်ကိးဖုဒဲးကဒိးန့ၢ်ဘၣ်တၢ်ထဲသိးတုၤသိးတၢ်စံၣ်ညီၣ်ပၢလီၤသးခွဲးယာ်လီၤအဃိကတီၢ်ခဲအံၤပကပာ်ဖှိၣ်ထီၣ်သးဂဲၤလိာ်ဒုးသကိးတၢ်လၢတၢ်သးတဖျၢၣ်ဃီပူၤ အဂ့ၢ်န့ၣ် လံာ်တၢ်ပာ်ဖျါအပူၤ စံး၀ဲန့ၣ်လီၤႉ ဒ်န့ၣ်အသိးႇလၢတၢ်ကသူၣ်ထီၣ်ခါဆူညါဖဲၣ်ဒရဲၣ်ဒံၣ်မိၣ်ကရ့ၣ်စံၣ်ကီၢ်စၢဖှိၣ်ႇပၦၤကညီကလုာ်ဒီးကလုာ်ဒူၣ်ခဲလၢာ် တၢ်မုာ်တၢ်ခုၣ်တၢ်သဘျ့အဂီၢ်အဲၣ်ကလုာ်သိၣ်ဒူဒီးခိၣ်နၢ်တဖၣ်ဘၣ်ဟ့ၣ်လီၤတ့ၢ်၀ဲအသးသမူႇအကပၢၤက၀ါႇအသွံၣ်ထံႇနီၢ်ခိက့ၢ်ဂီၤအိၣ်၀ဲအါမးအဖီခိၣ်ႇပာ်လၤပာ်ကပီၤဟ့ၣ်၀ဲသိၣ်ဒူတဖၣ်တၢ်ယူၣ်ယီၣ်ကိးဂၤန့ၣ်လီၤႉဒီးလၢန့ၣ်အမဲာ်ညါ အဲၣ်ကလုာ်ၦၤပၢၢ်ဆၢတၢ်သိၣ်ဒူတဖၣ်အံၤမ့ၢ်၀ဲၦၤတဖၣ်လၢအဒီသဒၢမၤပူၤဖျဲး၀ဲထံဖိကီၢ်ဖိကမျၢၢ်လၢသုးမီၤစိရိၤ အတၢ်မၤအၢမၤသီမၤတရီတပါအဃိစံးဘျုးဘၣ်သိၣ်ဒူကိးဂၤဒဲးဒီးလၢ“တၢ်စံၣ်စိၤတဲစိၤအမ့ၢ်အတီအသီအပူၤတၢ်ကပာ်ပနီၣ်ကွဲးအီၤ”အဂ့ၢ်န့ၣ် ပာ်ဖျါစ့ၢ်ကီး၀ဲဒၣ်န့ၣ်လီၤႉ တကးဒံးဘၣ်ခီဖျိသိၣ်ဒူတဖၣ်အတၢ်ဂုာ်ကျဲးစၢးတၢ်ဟ့ၣ်လီၤသးအံၤမ့ၢ်၀ဲတၢ်မၤဖျါထီၣ်က့ၤထံဖိကီၢ်ဖိကမျၢၢ်ကိးဂၤဒဲးအဘူၣ်အတီၢ်အဃိနာ်၀ဲလၢသိၣ်ဒူတဖၣ်အတၢ်တူၢ်ဆါသးအံၤကဟဲစိာ်န့ၢ်၀ဲစၢၤသွဲၣ်သီတဖၣ်အဂီၢ်လၢတၢ်သဘျ့ တၢ်ကပီၤအဂ့ၢ်န့ၣ် ပဒိၣ် စီၤဆၢဂ့ၤ စံး၀ဲဒၣ်န့ၣ်လီၤႉ လၢန့ၣ်အမဲာ်ညါလၢတၢ်ပၢၢ်ဆၢတၢ်ဖံးတၢ်မၤအပူၤအံၤႇသိၣ်ဒူတဖၣ်ကဘၣ်အိၣ်ဒီးတၢ်သူၣ်ဆူၣ်သးဆူၣ်လၢတၢ်ဒုးပူၤ၊ကဘၣ်လူၤပိာ်မၤထွဲခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢအထံရူၢ်ကီၢ်သဲးကျဲသနူႇတၢ်သိၣ်တၢ်သီတၢ်ဘျၢတုၤလီၤတီၤလီၤဒီးတကးဒံးဘၣ်ကဘၣ်ပဒ့ၣ်ဟးဆှဲး၀ဲတၢ်မၤထီဒါကမျၢၢ်ႇတၢ်မၤဘၣ်ဒိသုးဂ့ၢ်၀ီတၢ်ဘံၣ်တၢ်ဘၢႇကဘၣ်ကဟုကယာ်ကွၢ်ထွဲဒီသဒၢကမျၢၢ်လၢဘၣ်သုးလီၢ်သုးကျဲတဖၣ်အဂ့ၢ်န့ၣ် လံာ်တၢ်ပာ်ဖျါအပူၤ ဆီၣ်တခူထီၣ်၀ဲန့ၣ်လီၤႉ ဒ်အသိးန့ၣ် ဒ်သိးတၢ်ပၢၢ်ဆၢတၢ်ဖံးတၢ်မၤကတုၤဆူတၢ်ပညိၣ်တၢ်မၤနၢၤဖီတၢၣ်လၢအဆိအချ့အဂီၢ်န့ၣ် တၢ်လိၣ်နီၢ်နီၢ်မ့ၢ်၀ဲတၢ်ကဖီၣ်လိာ်စုပာ်ဖှိၣ်မၤသကိးတၢ်လီၤအဂ့ၢ်န့ၣ် ဟ့ၣ်ဂံၢ်ဟ့ၣ်ဘါဆီၣ်တခူစံး၀ဲလၢလံာ်တၢ်ပာ်ဖျါ အပူၤန့ၣ်လီၤႉ
ကၠီၣ်တဲၣ်ပဒိၣ်စိာ်ခီ၀ဲတၢ်မၤစၢၤအကျဲအံၤတမ့ၢ်ကျိၤကျဲလၢအဂ့ၤဘၣ်အဂ့ၢ် ကညီပိာ်မုၣ်ကရၢစံး၀ဲ
လါမးရှး ၂၆ သီႇ ၂၀၂၄နံၣ်ႇ ခ့ၣ်အဲးစံၣ်ႇ ဖဲမဟါလါမးရှး(၂၅)သီအနံၤ ကီၢ်ကၠီၣ်တဲၣ်ပဒိၣ်စိာ်ခီဆှၢ၀ဲ(AHACenter)ဂံၢ်ခီၣ်ထံးတၢ်ဒိသူၣ်ဒိသးတၢ်တိစၢၤမၤစၢၤလၢ ကီၢ်ပယီၤအပူၤလၢကီၢ်ဆၢၦၤလီၢ်အိၣ်ကမှံဖိ(၂၀၀၀၀)ခံကလးအဂီၢ်ဒီးတၢ်ရဲၣ်တၢ်ကျဲၤအံၤတမ့ၢ်ကျိၤကျဲလၢအဂ့ၤဘၣ် အဂ့ၢ်န့ၣ် ကညီပိာ်မုၣ်ကရၢ(KWO )စံး၀ဲန့ၣ်လီၤႉ ကၠီၣ်တဲၣ်ပဒိၣ်အတၢ်စိာ်ခီဆှၢ၀ဲတၢ်ဒိသူၣ်ဒိၣ်သးတၢ်တိစၢၤမၤစၢၤလၢကညီကီၢ်စဲၣ်ၦၤလီၢ်အိၣ်ကမှံဖိအဂၤ(၂၀၀၀၀)အဂီၢ်အံၤ ခီဖျိလဲၤ၀ဲလၢသုးကီၣ်ကးစုတီၤဖီလာ်ကရူၢ်ကရၢအအိၣ်ဒီးတကးဒံးဘၣ်တၢ်တဲၣ်ပီၣ်တၢၣ်ပီၣ်ဒီးဂံၢ်ခီၣ်ထံးကညီတၢ်ကရၢကရိ တအိၣ်၀ဲနီတမံၤဘၣ်အဃိတမ့ၢ်တၢ်စိာ်ခီဆှၢအကျိၤအကျဲလၢအတဂ့ၤဘၣ်အဂ့ၢ်န့ၣ် ကညီပိာ်မုၣ်ကရၢ(KWO) ၦၤနဲၣ်တၢ်သရၣ်မုၣ်နီၢ်ကညီဖီစံး၀ဲဒ်အံၤန့ၣ်လီၤႉ အ၀ဲစံး၀ဲလၢ “ ဘၣ်ဃးလၢကီၢ်ကၠီၣ်တဲၣ်အဆှၢဃီၤ၀ဲဒၣ်တၢ်ဒိသူၣ်ဒိသးတၢ်ဆီၣ်ထွဲမၤစၢၤဆူကညီကီၢ်စဲၣ်အပူၤအံၤန့ၣ်တၢ်တဲသကိးတၢ်ဒီးဂံၢ်ခီၣ်ထံးတၢ်ကရၢကရိတအိၣ်နီတမံၤဘၣ်ႇပတသ့ၣ်ညါနီတမံၤဘၣ်ႇနီၢ်ကီၢ်တၢ်ဆီၣ်ထွဲမၤစၢၤၦၤကူၦၤကညီန့ၣ်အ၀ဲသ့ၣ်ခီမ့မၤန့ၣ်ကဘၣ်ဟဲတၢၣ်ပီၣ်တၢၣ်ပီဒီဂံၢ်ခီၣ်ထံးတၢ်ကရၢကရိလီၢ်က၀ီၤၦၤဘၣ်မူဘၣ်ဒါသ့ၣ်တဖၣ်ဂ့ၢ်ဂီၢ်အူၦၤဘၣ်မူဘၣ်ဒါသ့ၣ်တဖၣ်မီၤဘၣ်မနုၤအဃိလဲၣ်န့ၣ်ပသ့ၣ်ညါလၢကီၢ်ရ့ၣ်ကိးဘ့ၣ်ဒဲးန့ၣ်အိၣ်၀ဲဒၣ်ဒီးတၢ်ဆီၣ်ထွဲမၤစၢၤႇဂံၢ်ခီၣ်ထံးတၢ်ကရၢကရိသနာ်က့အိၣ်ဒီးပတၢ်မၤသကိးတၢ်ႇတၢ်လီၢ်ဖဲလဲၣ်န့ၣ်တၢ်အိၣ်သးတဖၣ်န့ၣ်ပကဲ၀ဲၦၤလၢအဘၣ်တၢ်ဒုးသ့ၣ်ညါၦၤမီၤအဃိန့ၣ်တၢ်လိၣ်အိၣ်ဖဲလဲၣ်န့ၣ်ပသ့ၣ်ညါအဒိၣ်ကတၢၢ်လီၤႉခဲခဲအံၤခီန့ၣ်အ၀ဲသ့ၣ်ဆၢတဲာ်၀ဲဃုထၢ၀ဲတၢ်လီၢ်သ့ၣ်တဖၣ်န့ၣ်ခီန့ၣ်တကဲ၀ဲတၢ်လီၢ်လၢၦၤတူၢ်ဘၣ်တၢ်အဒိၣ်ကတၢၢ်ဒီးတလဲၤ၀ဲတုၤလၢၦၤလိၣ်ဘၣ်တၢ်နီၢ်နီၢ်အိၣ်အလီၢ်ဘၣ်အဃိကဲ၀ဲတၢ်မၤစၢၤလၢအလဲၤခီတဲာ်အကျိၤအကျဲဘၣ်ဘၣ်”အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ လၢန့ၣ်အမဲာ်ညါကၠီၣ်တဲၣ်ပဒိၣ်ဒီးသုးကီၣ်ကးကရူၢ်ကရၢလၢအဖီၣ်လိာ်စုမၤသကိးတၢ်ခံဖုအံၤမ့ၢ်ဒၣ်ၦၤသ့ၣ်တဖၣ်လၢအပာ်ဖျါထီၣ် အတၢ်ဖံးတၢ်မၤလၢကမျၢၢ်မဲာ်ညါတစိၢ်တလီၢ်လီၤဒီးဒ်န့ၣ်အသိးအ၀ဲသ့ၣ်မၤတၢ်လၢအနီၢ်ကစၢ်မုၢ်ကျိၤ၀ဲၤကွာ်အတၢ်ဘၣ်ဘျူးအဂီၢ်န့ၣ်လီၤႉတကးဒံးဘၣ်ကၠီၣ်တဲၣ်ပဒိၣ်အံၤပာ်ဖျါထီၣ်အသးလၢအဟံၣ်ဂံၢ်ဟ့ၣ်ဘါဆီၣ်ထွဲ၀ဲသုးမီၤစိရိၤလၢအမၤကမၣ်ၦၤကညီဂ့ၢ်၀ီခွဲးယာ်သ့ၣ်တဖၣ်အံၤလီၤအဂ့ၢ် သရၣ်မုၣ်နီၢ်ကညီဖီ စံးအါထီၣ်၀ဲန့ၣ်လီၤႉ တကးဒံးဘၣ်ကၠီၣ်တဲၣ်ပဒိၣ်လၢအမၤသကိးတၢ်ဒီးသုးကီၣ်ကးတဖၣ်အံၤတမ့ၢ်ၦၤသ့ၣ်တဖၣ်လၢအတိစၢၤမၤစၢၤဘှါရှဲ ကီၢ်ပယီၤတၢ်ဂ့ၢ်ကီဘၣ်ဒီးမ့မ့ၢ်တခီမ့ၢ်ၦၤသ့ၣ်တဖၣ်လၢအမၤကဲထီၣ်တၢ်ဂံၢ်တၢ်ဘါလၢသုးကီၣ်ကးတဖၣ်အဂီၢ် အဂ့ၢ် (ကညီပိာ်မုၣ်ကရၢအၦၤနဲၣ်တၢ်သရၣ်မုၣ်နီၢ်ကညီဖီ)စံးစ့ၢ်ကီး၀ဲန့ၣ်လီၤႉ ဘၣ်ဃးတၢ်စိာ်ခီ၀ဲတၢ်ဒိသူၣ်ဒိသးလၢကညီကီၢ်စဲၣ်ၦၤလီၢ်အိၣ်ကမှံအဂၤ(၂၀၀၀၀)ခံကလးအဂီၢ်အံၤလၢတၢ်ကဟ့ၣ်ခီ၀ဲဆူရၤမတံ၀့ၢ်ပူၤသုးကီၣ်ကးအစုတီၤဖီလာ်-ဂာ်တဲာ်ဂီၤၦၤဘၣ်မူဘၣ်ဒါအစုပူၤအဂီၢ်ဖဲမဟါလါမးရှး(၂၅)သီအနံၤန့ၣ်ကၠီၣ်တဲၣ်ၦၤဘၣ်မူဘၣ်ဒါတဖၣ်ဆှၢခီဃီၤ၀ဲဆူကီၢ်ကၠီၣ်တဲၣ်-ကီၢ်ပယီၤကီၢ်ဆၢႇမဲဆီး၀့ၢ်ႇနီၢ်ဂံၢ်(၂)တၢ်ရ့လိာ်မုာ်လိာ်တိၤတကပၤအဂ့ၢ်ကၠီၣ်တဲၣ်ထံဂုၤကီၢ်ဂၤကိာ်တိာ်ခိၣ်နၢ်တဖၣ်ထုးထီၣ်ပာ်ဖျါ၀ဲန့ၣ်လီၤႉ ဒီးလၢတၢ်မၤ၀ဲတၢ်စိာ်ခီဆှၢတၢ်ဒိသူၣ်ဒိသးတၢ်တိစၢၤမၤစၢၤအရဲၣ်တၢ်ကျဲၤအဂီၢ်အံၤန့ၣ်(ဗံဗဃနညအနမ)ကရူၢ်ကရၢၦၤဘၣ်မူဘၣ်ဒါတဖၣ်တီခိၣ်ရိၣ်မဲရဲၣ်ကျဲၤမၤ၀ဲဒီးဖဲမဟါတၢ်စိာ်ခီဆှၢ၀ဲတၢ်မၤစၢၤတဖၣ်န့ၣ်ပၣ်ဃုာ်၀ဲဂံၢ်ခီၣ်ထံးတၢ်အီၣ်တၢ်အီဟုသးဒီးဂ့ၢ်ဂီၢ်အူ ထၢၣ်အဖျၢၣ်(၄၀၀၀)အသိးတၢ်မၤစၢၤသ့ၣ်တဖၣ်အံၤစံး၀ဲလၢကလဲၤဟ့ၣ်လီၤ၀ဲကညီကီၢ်စဲၣ်အပူၤၦၤလီၢ်အိၣ်ကမှံတၢ်လီၢ်(၃)တီၤအဂ့ၢ်ပာ်ဖျါ၀ဲစ့ၢ်ကီးန့ၣ်လီၤႉ ဒ်န့ၣ်အသိးဖဲတၢ်မၤ၀ဲတၢ်ဒိသူၣ်ဒိသးတၢ်ဟ့ၣ်ခီတၢ်တိစၢၤမၤစၢၤတၢ်စိာ်ခီဆှၢအတၢ်ရဲၣ်တၢ်ကျဲၤဆူကီၢ်ပယီၤအပူၤအခါန့ၣ် ကၠီၣ်တဲၣ်ကိာ်တိာ်ခိၣ်ခံ (Mr.SihasakPhuangketkeowi ) တးကီၢ်ရ့ၣ်ခိၣ်နၢ်ၦၤဘၣ်မူဘၣ်ဒါႇ ရၤမတံ၀့ၢ်ခၢၣ်စးၦၤဘၣ်မူဘၣ်ဒါတဖၣ်ဒီး အၣ်စံၣ်ယၣ်ကရူၢ်ကရၢဃုာ်ဒီး(AHACenter)အၦၤနဲၣ်တဖၣ်ပၣ်ဃုာ်ပၣ်ဂီၢ်၀ဲအဂ့ၢ်ပာ်ဖျါ၀ဲလၢလံာ်ထုးထီၣ်ပာ်ဖျါအပူၤစ့ၢ်ကီးန့ၣ်လီၤႉ ဘၣ်ဃးတၢ်ကဟ့ၣ်၀ဲတၢ်ဒိသူၣ်ဒိသးတၢ်တိစၢၤမၤစၢၤအတၢ်ရဲၣ်တၢ်ကျဲၤအံၤကီၢ်ကၠီၣ်တဲၣ်ဒီးသုးကီၣ်ကးအစုတီၤဖီလာ်ကီၢ်ပယီၤဂာ်တဲာ်ဂီၤကရူၢ်ကရၢတဖၣ်ပာ်ဖှိၣ်မၤသကိးတၢ်ဒီးဒ်သိးတၢ်ဟ့ၣ်တၢ်ဆီၣ်ထွဲမၤစၢၤတၢ်ရဲၣ်တၢ်ကျဲၤကကဲထီၣ်၀ဲအဂီၢ်ဘၣ်တၢ်ပာ်ဂၢၢ်ပာ်ကျၢၤအီၤဖဲအပူၤကွံာ်လါယနူၤအါရံၤ ဖဲတၢ်မၤ၀ဲ(အၣ်စံၣ်ယၣ်)ထံဂုၤကီၢ်ဂၤကိာ်တိာ်ခိၣ်နၢ်တၢ်အိၣ်ဖှိၣ်လၢလါအိၤကီၢ်ပူၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒူယီၢ်ကီၢ်ဆၣ်ပူၤ ဖိသၣ်တဖၣ်ကသ့ၣ်ညါပာ်လုၢ်ပာ်ၦ့ၤတၢ်ကူၣ်ဘၣ်ကူၣ်သ့အဂီၢ်တၢ်အိးထီၣ်န့ၢ်၀ဲတၢ်ကိၢ်ခါတၢ်မၤလိတခါ
လါမးရှး ၂၆ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဖၣ်အၣ်ကီၢ်ရ့ၣ် ဒူယီၢ်ကီၢ်ဆၣ်အပူၤ ဖဲတၢ်ကိၢ်ခါကၠိပံးအဆၢကတီၢ်အံၤ ဒ်သိးၦၤကၠိဖိႇဖိဒံဖိသၣ်သူၣ်ဘီၣ်သးစၢ်သ့ၣ်တဖၣ်သုတဟးကဒံကဒါဒီးကသ့ၣ်ညါပာ်လုၢ်ပာ်ၦ့ၤတၢ်ကူၣ်တၢ်ကူၣ်သ့အဂီၢ်န့ၣ် တၢ်အိးထီၣ်န့ၢ်၀ဲတၢ်ကိၢ်ခါတၢ်မၤလိတခါအဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်ကိၢ်ခါတၢ်မၤလိဘျီ၀ဲအံၤန့ၣ်မ့ၢ်၀ဲ ဒူယီၢ်ကီၢ်ဆၣ် ကညီသးစၢ်ကရၢ(KYO)တီခိၣ်ရိၣ်မဲအိးထီၣ်၀ဲဒီး ၦၤကၠိဖိသူၣ်ဘီၣ် သးစၢ်လၢအိၣ်ဟီၣ်က၀ီၤပူၤတဖၣ်အံၤဖဲကၠိပျၢ်အခါဒ်သိးအ၀ဲသ့ၣ်သုကဟးကဒံကဒါကလီကလီ တဂ့ၤဒီး ကသ့ၣ်ညါဘၣ် အါထီၣ်လုၢ်လၢ်တၢ်ဆဲးတၢ်လၤအဂီၢ်ဘၣ်တၢ်အိးထီၣ်၀ဲတၢ်ကိၢ်ခါတၢ်မၤလိဒ်အံၤလီၤအဂ့ၢ်န့ၣ် (KYO)ၦၤဘၣ်မူဘၣ်ဒါလၢ အတီခိၣ်ရိၣ်မဲအိးထီၣ်တၢ်မၤလိအံၤတဖၣ် စံး၀ဲန့ၣ်လီၤႉ ဘၣ်ဃးတၢ်အိးထီၣ်တၢ်ကိၢ်ခါတၢ်မၤလိအတၢ်ပညိၣ်အဂ့ၢ်အကျိၤလၢလၢၦဲၤၦဲၤန့ၣ် ဒူယီၢ်ကီၢ်ဆၣ် (KYO)ကရၢခိၣ် စီၤစိၤပဲၤ စံး၀ဲလၢ “တၢ်အိးထီၣ်တၢ်ကိၢ်ခါတၢ်မၤလိပတၢ်ပညိၣ်ခီန့ၣ်ဒ်သိးဖိဒံဖိသၣ်သ့ၣ်တဖၣ်သုတဟးကြီဟးကြး တဂ့ၤအဂီၢ်ႉခံထံၣ်တထံၣ်န့ၣ်ဒ်သိးအ၀ဲသ့ၣ်ကသ့ၣ်ညါတၢ်ကူၣ်ဘၣ်ကူၣ်သ့အဂ့ၢ်အကျိၤအါန့ၢ်ကလုာ်အဂၤအဂီၢ်ဒီး အဂၤတခါန့ၣ်ဒ်သိးအ၀ဲသ့ၣ်ကထိၣ်အဖံဘၣ်ခိၣ်ဒီးထံဂုၤကီၢ်ဂၤကန့ၢ်အဂီၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ် န့ၣ်လီၤႉ တၢ်ကိၢ်ခါတၢ်မၤလိဘျီ၀ဲအံၤဘၣ်တၢ်အိးထီၣ်သိလိအီၤတၢ်လီၢ်ခံတီၤလၢအမ့ၢ် နီၤလိၤကၠိကရၢၢ်ပူၤ တၢ်လီၢ်တတီၤဒီး လၢနိၣ်ထိၣ်ဒံၣ်သီခါဖၠၣ်တၢ်လီၢ်တတီၤန့ၣ်လီၤႉ ဒ်န့ၣ်အသိးတၢ်မၤလိအပူၤတၢ်သိၣ်လိန့ၢ်၀ဲကီၤလၤ၀ါ(English speaking) ႇ ခီၣ်ဖၠူထၢၣ်ဒီး လံာ်လဲၢ်တၢ်ဆဲးတၢ်လၤအဂ့ၢ်အကျိၤသ့ၣ်တဖၣ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါတၢ်မၤလိဘျီ၀ဲအံၤဘၣ်တၢ်စးထီၣ်အီၤဖဲတလါအံၤလါမးရှး ၈ သီ ကတုၤ၀ဲဒၣ်လၢလါမ့ၤ ၈ သီ တၢ်ဆၢကတီၢ်လၢခံလါအတီၢ်ပူၤအဂ့ၢ်န့ၣ် ၦၤဘၣ်မူဘၣ်ဒါလၢအတီခိၣ်ရိၣ်မဲအိးထီၣ်တၢ်မၤလိအံၤ စံး၀ဲဒၣ်အသိး သ့ၣ်ညါဘၣ်န့ၣ်လီၤႉ (KYO)တီခိၣ်ရိၣ်မဲအိးထီၣ်တၢ်ကိၢ်ခါတၢ်မၤလိလၢတၢ်လီၢ်ခံတီၤလၢာ်ဘျီ၀ဲအံၤန့ၣ် လီၢ်က၀ီၤၦၤသူၣ်စၢ်သးဘီၣ် ဖိဒံဖိသၣ်ၦၤကၠိဖိပာ်ဖှိၣ်ခဲလၢာ်ဟဲထီၣ်၀ဲဒၣ်အဂၤ(၁၀၀)ဘျဲၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးတၢ်အိးထီၣ်တၢ်ကိၢ်ခါတၢ်မၤလိအံၤတမ့ၢ်ထဲလၢဒူယီၢ်ကီၢ်ဆၣ်ပူၤတခါဧတိၤဘၣ်ဒီး မ့မ့ၢ်တခီ ခ့ၣ်အဲၣ်ယူၣ် ကီၢ်ရ့ၣ်ႇကီၢ်ဆၣ်တၢ်လီၢ်လၢအဂၤစ့ၢ်ကီးတၢ်တီခိၣ်ရိၣ်မဲအိးထီၣ်၀ဲတၢ်ကိၢ်ခါတၢ်မၤလိလၢၦၤကၠိဖိၦၤဖိဒံဖိသၣ်အဂီၢ်...
ဒ်သိးတၢ်ကသ့ၣ်ညါအါထီၣ်၀ဲကညီဖိလၢအိၣ်ထံထၣ်စွ့ပူၤတဖၣ်အဂီၢ် သးစၢ်တီခိၣ်ရိၣ်မဲမၤ၀ဲတၢ်သး၀ံၣ်တၢ်ပြၢ
လါမးရှး ၂၅ သီႇ ၂၀၂၄ နံၣ်ႇ ခ့ၣ်အဲးစံၣ်ႇ ဒ်သိးတၢ်ကသ့ၣ်ညါအါထီၣ်၀ဲကညီဖိလၢအိၣ်ထံထၣ်စွ့ပူၤအဂီၢ် လါလၢကဟဲလါအ့ဖြ့ၣ်အံၤ ထံထၣ်စွ့ကညီသးစၢ်ဒီးကီၢ်သူလ့ၤကညီသးစၢ်ပာ်ဖှိၣ်သး တီခိၣ်ရိၣ်မဲကမၤ၀ဲ တၢ်သး၀ံၣ်တၢ်ပြၢတၢ်ရဲၣ်တၢ်ကျဲၤ တခါလၢ(ONLINE)ပူၤအဂ့ၢ် ၦၤလၢအတီခိၣ်ရိၣ်မဲ ဒုးအိၣ်ထီၣ်တၢ်ပြၢတၢ်ရဲၣ်တၢ်ကျဲၤ ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ တၢ်သး၀ံၣ်တၢ်ပၢအံၤအခိၣ်တီန့ၣ်တၢ်ဟ့ၣ်၀ဲအမံၤလၢ“ထံထၣ်စွ့ကီၢ်ခီဒိၣ်အထါ”ဒီးတၢ်သး၀ံၣ်တၢ်ပြၢတၢ်ရဲၣ်တၢ်ကျဲၤအံၤအတၢ်ပညိၣ်ကွၢ်စိန့ၣ်မ့ၢ်၀ဲဒ်သိးကညီဖိလၢအိၣ်တၢ်လီၢ်အဂၤသ့ၣ်တဖၣ်ကသ့ၣ်ညါ၀ဲထံထၣ်စွ့ကီၢ်ခီဒိၣ်အံၤမ့ၢ်ကီၢ်သူလ့ၤဟီၣ်က၀ီၤဒီးတကးဒံးဘၣ်မိၢ်ထံးပၢ်ထံးကညီဖိလၢအိၣ်ထံထၣ်စွ့တဖၣ်ကအိၣ်ဒီးတၢ်ရ့လိာ်မုာ်လိာ်သးဒီးကညီဖိလၢအိၣ်တၢ်လီၢ်ကိးတီၤဒဲးတဖၣ်အဂီၢ်လီၤအဂ့ၢ်န့ၣ် ၦၤလၢအဒုးအိၣ်ထီၣ်တၢ်ရဲၣ်တၢ်ကျဲၤ စီၤသီမၢၣ်ထူ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တၢ်သး၀ံၣ်သတြီၤတဘျီညါအံၤန့ၣ်အတၢ်မုၢ်လၢ်ကွၢ်စိမ့ၢ်၀ဲဒ်သိးပတၢ်ထံၣ်တၢ်ကွၢ်စိလၢပပာ်လီၤဃာ်လီၤႉပတၢ်ထံၣ်စိန့ၣ်မ့ၢ်၀ဲ“ထံၣ်ထၣ်စွ့ဘၣ်ထွဲဒီးကီၢ်သူလ့ၤႇကီၢ်သူလ့ၤနါက့ဘၣ်ထွဲဒီးထံထၣ်စွ့”မီၤနီၤႉထံထၣ်စွ့မ့တအိၣ်ဘၣ်န့ၣ်ကီၢ်သူလ့ၤလၢၦဲၤတသ့ဘၣ်ႇအခီအညီန့ၣ်(Without Htee Htar Sway, Kaw Thoo Lei is not complete)မီၤႉဒ်န့ၣ်အသိးန့ၣ်တၢ်သး၀ံၣ်ပြၢအံၤန့ၣ်ပအိၣ်စ့ၢ်ကီးဒီးတၢ်တိာ်ပာ်လၢပၦၤကညီဖိတဂၤလၢ်လၢ်လၢနၢ်ဟူဘၣ်တၢ်သး၀ံၣ်တဖၣ်န့ၣ်ကသ့ၣ်ညါ၀ဲထံထၣ်စွ့ဟီၣ်က၀ီၤအံၤမ့ၢ်၀ဲကီၢ်သူလ့ၤဟီၣ်က၀ီၤဒီးမိၢ်ထံးပၢ်ထံးကညီဖိလၢအိၣ်ထံထၣ်စွ့တဖၣ်သနာ်က့ကအိၣ်ဒီးတၢ်ရ့လိာ်မုာ်လိာ်သးဒီးကညီဖိလၢအိၣ်လၢတၢ်လီၢ်အါတီၤအမဲာ်ညါ ပတိာ်ပာ်လၢခီဖျိလၢတၢ်သး၀ံၣ်ပြၢအံၤအဃိထံထၣ်စွ့အဂ့ၢ်အကျိၤတၢ်စံၣ်စိၤတဲစိၤကအိၣ်ဖျါထီၣ်၀ဲဒီးတၢ်ကသ့ၣ်ညါ၀ဲလၢထံထၣ်စွ့အံၤမ့ၢ်၀ဲထူလံၤကညီဖိအဟီၣ်က၀ီၤလီၤဒဒ အဂ့ၢ်အ၀ဲစံး၀ဲန့ၣ်လီၤႉ လၢန့ၣ်အမဲာ်ညါႇဖဲတၢ်သး၀ံၣ်ပြၢဘျီ၀ဲအံၤအပူၤန့ၣ်ႇၦၤလၢကနုာ်လီၤပြၢတၢ်သး၀ံၣ်တဖၣ်အဂီၢ် တၢ်လၢာ်ဘူၣ်လၢၤစ့တအိၣ်၀ဲနီတမံၤဘၣ်ဒီးတကးဒံးဘၣ်ဘၣ်ကညီသးစၢ်လၢပာ်ဖှိၣ်မၤသကိးတၢ်တဖၣ် ကတဲာ်ကတီၤဃာ်၀ဲခိၣ်ဖးလၤကပီၤလၢၦၤမၤနၢၤတၢ်ဖိအဂီၢ်အိၣ်၀ဲအဂ့ၢ်န့ၣ် စီၤသီမၢၣ်ထူ စံးအါထီၣ်၀ဲန့ၣ်လီၤႉ တကးဒံးဘၣ်တၢ်ပြၢတၢ်ရဲၣ်တၢ်ကျဲၤဘျီ၀ဲအံၤမ့ၢ်ဒ်သိးတၢ်ကစိာ်ကဖီထီၣ်က့ၤထံထၣ်စွ့အဂ့ၢ်အကျိၤလၢအလီၤဘၢ တဖၣ်ဒီးကမ့ၢ်တၢ်ဟ့ၣ်ဂံၢ်ဟ့ၣ်ဘါကညီဖိလၢအဟူးဂဲၤလၢတၢ်ပၢၢ်ဆၢဟီၣ်က၀ီၤပူၤတဖၣ်အဃိကွဲမုာ်ဘၣ် ကညီဖိလၢအသးစၢၢ်ဆၢလၢတၢ်သူၣ်၀ံၣ်သးဆၢတဖၣ်ကနုာ်လီၤပၣ်ဃုာ်ပၣ်ဂီၢ်သကိး၀ဲအဂ့ၢ်န့ၣ် ၦၤဘၣ်မူဘၣ်ဒါလၢအပၣ်ဃုာ်လၢတၢ်တီခိၣ်ရိၣ်မဲအံၤအပူၤတဖၣ် ဆီၣ်တခူထီၣ်၀ဲန့ၣ်လီၤႉ တကတီၢ်ဃီဖဲတၢ်သး၀ံၣ်သတြီၤတၢ်ပြၢဘျီ၀ဲအံၤန့ၣ်ႇကတူၢ်လိာ်၀ဲၦၤနုာ်လီၤပြၢတၢ်ဖိ(၁၅၀)ဂၤဒီးတၢ်ပြၢအတီၢ်ပူၤ ဒ်တၢ်သိၣ်တၢ်သီအိၣ်အသိးၦၤနုာ်လီၤပြၢတၢ်ဖိတဖၣ်ကဘၣ်လူၤထွဲမၤထွဲ၀ဲတၢ်သိၣ်တၢ်သီန့ၣ်လီၤႉတကးဒံးဘၣ် လၢတၢ်သး၀ံၣ်တၢ်ပြၢဘျီ၀ဲအံၤၦၤလၢအကဲစံၣ်ညီၣ်ကွီၢ်တဖၣ်န့ၣ်ကမ့ၢ်၀ဲထံထၣ်စွ့ကညီၦၤသး၀ံၣ်တၢ်ဖိစဲၤနီၢ်လၢအမံၤဟူသၣ်ဖျါတဖၣ်အဂ့ၢ်န့ၣ် ၦၤတီခိၣ်ရိၣ်မဲတၢ်တဖၣ်စံး၀ဲန့ၣ်လီၤ တၢ်ပြၢဘျီ၀ဲအံၤတၢ်ကစးထီၣ်သမံသမိးၦၤသး၀ံၣ်တၢ်ဖိအကလုၢ်ဖဲလါအ့ဖြ့ၣ် (၁)သီ ဒီး တၢ်သး၀ံၣ်ပြၢတၢ်ရဲၣ်တၢ်ကျဲၤအံၤ တုၤလၢလါအီးကၢးစ် ၁၂ သီ...
ကဘီယူၤဟဲခးလီၤတၢ်အဃိဃီဖိပျဲၢ်သ၀ီပူၤတၢ်သူၣ်ထီၣ်ဟးဂီၤ(၁၇)ဖျၢၣ်အကျါပၣ်ဃုာ်ကၠိတၢ်သူၣ်ထီၣ်(၃)ဖျၢၣ်
လါမးရှး ၂၅ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ဘံလ့ကီၢ်ဆၣ်အပူၤ ဖဲလါမးရှး ၂၃ သီ မုၢ်နၤခီအဆၢကတီၢ်န့ၣ် ခီဖျိကဘီယူၤ ဟဲခးလီၤတၢ်လၢဃီဖိပျဲၢ်သ၀ီပူၤအဃိ တၢ်သူၣ်ထီၣ်ဟးဂီၤ၀ဲဒၣ်(၁၇)ဖျၢၣ်အကျါပၣ်ဃုာ်၀ဲကၠိတၢ်သူၣ်ထီၣ်(၃)ဖျၢၣ်ဒီး သ၀ီဖိဘၣ်ဒိ၀ဲဒၣ်တဂၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ ဖဲမုၢ်နၤခီ ၁၀း၀၀ ဘျဲၣ်အဆၢကတီၢ်န့ၣ် ပယီၤသုးကဘီယူၤဟဲခးလီၤတၢ်(၃)ဘျီ ခးလီၤ၀ဲကျိဖးဒိၣ်ကျိဖိ (၁၂)ဖျၢၣ်ဆူ ဃီဖိပျဲၢ်သ၀ီပူၤဒီးလၢတၢ်န့ၣ်အဃိ ကီၢ်သူလ့ၤတီၤခၢၣ်သးကၠိတၢ်သူၣ်ထီၣ်ဃုာ်ဒီးဟံၣ်ဃီတၢ်သူၣ်ထီၣ် ဟးဂီၤတကးဒံးဘၣ် ဘၣ်ဒိဘၣ်ထံး၀ဲဒၣ်တံကဲၤ(၅၆)နံၣ် အစုထွဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘၣ်ဃးကဘီယူၤဟဲခးလီၤတၢ်လၢဃီဖျိပျဲၢ်သ၀ီပူၤအံၤန့ၣ် ဒူသထူၣ်ကီၢ်ရ့ၣ်ခိၣ် ပဒိၣ်စီၤစိမၠ့ၣ် စံး၀ဲလၢ “ဘၣ်မနုၤအဟဲခး လီၤ၀ဲန့ၣ်ပတဲတဘၣ်ဘၣ်ႉဖဲအံၤတၢ်ဒုးတၢ်ယၤကဲထီၣ်တအိၣ်နီမံၤဘၣ်ႉကဘီယူၤန့ၣ်အိၣ်ဟဲလၢမီၤဘံၣ်တကပၤမီၤနီၤႉဖဲ ၁၀း၂၀ န့ၣ်ဟဲတ့ၢ်လီၤမ့ၣ်ပိၢ် ၂ ဖျၢၣ်ႉ ဖဲ ၁၀း၃၅ န့ၣ်ဟဲတ့ၢ်လီၤကဒီး၀ဲ ၄ ဖျၢၣ်ႉ ၁၀း၃၉ န့ၣ်ကွံာ်လီၤကဒီး၀ဲ(၆)ဖျၢၣ် ဟဲကွံာ်လီၤ၀ဲဒၣ်ဖဲဃီဖိပျဲၢ်သ၀ီန့ၣ်လီၤမီၤနီၤႉတီၤခၢၣ်သးကၠိဟးဂီၤတဖျၢၣ်ႇကၠိလၢ အဘၣ်ဟးဂီၤလၢကျိချံ ၦာ်သၣ်ချံန့ၣ် (၂)ဖျၢၣ်ႉၦၤသ၀ီဖိန့ၣ်ဘၣ်ဒိတဂၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ ကဘီယူၤဟဲခးလီၤတၢ်လၢဃီဖျိပျဲၢ်သ၀ီပူၤဘျီ၀ဲအံၤန့ၣ်တ့ၢ်လီၤ၀ဲကျိဖးဒိၣ်(၅)ဖျၢၣ်ႇကျိဖိ(၇)ဖျၢၣ်ဒီး လီၤတဲာ်ပိၢ်ဖးထီၣ်၀ဲ လၢကၠိကရၢၢ်ပူၤ(၃)ဖျၢၣ်ႇလၢသ၀ီပူၤ(၉)ဖျၢၣ်န့ၣ်လီၤႉ ဘၣ်ဆၣ်ကျိဖိဒီးကျိဖးဒိၣ်(၉)ဖျၢၣ်လၢ အလီၤတဲာ်လၢသ၀ီပူၤ တဖၣ်အံၤအကျါ တပိၢ်ဖးထီၣ်ဒံးဘၣ်အိၣ်၀ဲ(၃)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ်...