ခီကီၢ်ဆၣ်သူလ့ၤတီၤထီကၠိမၤ၀ဲ(၂၀၂၃-၂၀၂၄)နံၣ်ကတၢၢ်တၢ်ပျၢ်ကၠိမူးတၢ်ရဲၣ်တၢ်ကျဲၤ
လါမးရှး ၂၃ သီႇ ၂၀၂၄ နံၣ်ႇ ခ့ၣ်အဲးစံၣ် လၢကီၢ်ကၠီၣ်တဲၣ်-ကီၢ်ပယီၤကီၢ်ဆၢ ၀့ၢ်မဲၢ်ဆီးအပူၤ ဖဲတနံၤအံၤလါမးရှး ၂၃ သီ ဂီၤခီ ၉း၀၀ နၣ်ရံၣ်အဆၢ ကတီၢ်န့ၣ် ခီကီၢ်ဆၣ်သူလ့ၤတီၤထီကၠိမၤ၀ဲဒၣ်(၂၀၂၃-၂၀၂၄)နံၣ်ကတၢၢ်တၢ်ပျၢ်ကၠိမူးတၢ်ရဲၣ်တၢ်ကျဲၤန့ၣ်လီၤႉ တၢ်ပျၢ်ကၠိမူးတၢ်ရဲၣ်တၢ်ကျဲၤအပူၤ (BMWEC)ၦၤပၢၤလီၢ်ဆ့ၣ်နီၤ သရၣ်မုၣ် နီၢ်ဆၣ်အဲၣ် ကတိၤအိးထီၣ်၀ဲ တၢ်ရဲၣ်တၢ်ကျဲၤမူးဒီး ဆၣ်သူလ့ၤကၠိ ၦၤနဲၣ်တၢ် သရၣ်မုၣ် နီၢ်ဖီရ့ၣ် ဖးဖျါထီၣ်၀ဲ(၂၀၂၃-၂၀၂၄) နံၣ်ကတၢၢ် တၢ်ပာ်ဖျါဒီးခိၣ်နၢ်ၦၤဘၣ်မူဘၣ်ဒါကတိၤဟ့ၣ်ဂ့ၢ်ဟ့ၣ်ဘါလီၤ၀ဲတၢ်န့ၣ်လီၤႉ တနံၣ်အံၤ(၂၀၂၃-၂၀၂၄)တၢ်သိၣ်လိနံၣ်အဂီၢ်ခီဖျိကၠိဖိမိၢ်ပၢ်အတၢ်ဆီၣ်ထွဲမၤစၢၤကၠိတၢ်လိၣ်ဘၣ်သ့ၣ်တဖၣ်အဃိ ပမၤဘၣ်၀ဲဒၣ်ကၠိတၢ်ရဲၣ်တၢ်ကျဲၤသ့ၣ်တဖၣ်၀ံၤ၀ဲဂ့ၤဂ့ၤဘၣ်ဘၣ်လီၤအဂ့ၢ်န့ၣ် ဆၣ်သူလ့ၤကၠိ ၦၤနဲၣ်တၢ် သရၣ်မုၣ် နီၢ်ဖီရ့ၣ် စံး၀ဲန့ၣ်လီၤႉ အ၀ဲစံး၀ဲလၢ“တနံၣ်အံၤ(၂၀၂၃-၂၀၄)တၢ်မၤလိနံၣ် ပဘၣ်လဲၤခီဖျိတၢ်တၤဒီးၦၤအါမးႉ တဘျီတခီၣ်ပသးလီၤဘှံး လီၤတီၤလၢပတၢ်ဖံးတၢ်မၤလၢပကဘၣ်ရဲၣ်ကျဲၤအီၤဒ်သိးကလဲၤသးလၢအဂ့ၢ်အ၀ီႉဘၣ်ဆၣ်ပအိၣ်ဒီးကၠိဖိမိၢ်ပၢ်လၢ အသူၣ်ဆူၣ်သးဂဲၤလၢအဆီၣ်ထွဲမၤစၢၤပကၠိတၢ်လိၣ်ဘၣ်သ့ၣ်တဖၣ်ႉခီဖျိအ၀ဲသ့ၣ်အတၢ်ဆီၣ်ထွဲမၤစၢၤၦၤအဃိ တၢ်ကီတၢ်ခဲပမ့ဘၣ်ကွၢ်ဆၢၣ်မဲာ်သနါက့န့ၣ်ပလဲၤခီဖျိအီၤသ့ဒီးပမၤဘၣ်၀ဲကၠိတၢ်ရဲၣ်တၢ်ကျဲၤတဖၣ်၀ံၤ၀ဲဂ့ၤဂ့ၤဘၣ်ဘၣ်လီၤမီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါနံၣ်လၢကဟဲ(၂၀၂၄-၂၀၂၅)တၢ်သိၣ်လိနံၣ်အဂီၢ်စ့ၢ်ကီးဆၣ်သူလ့ၤကၠိ ကဘၣ်ကွၢ်ဆၢၣ်မဲာ်၀ဲ ကၠိတၢ်မၤလိတီၤဒၢးတကူတလၢဒီးတကးဒံးဘၣ်လၢကၠိတၢ်လဲၤတရံးသးအဂီၢ်စ့ၢ်ကီးတၢ်ဆီၣ်ထွဲမၤစၢၤလီၤစှၤ၀ဲဒၣ်အါန့ၢ် အလီၢ်အဂ့ၢ်န့ၣ် သရၣ်မုၣ် နီၢ်ဖီရ့ၣ် စံးအါထီၣ်၀ဲန့ၣ်လီၤႉ တၢ်ပျၢ်ကၠိမူးတၢ်ရဲၣ်တၢ်ကျဲၤအပူၤန့ၣ်တၢ်ဟ့ၣ်လီၤက့ၤကတီၤဆိကၠိဖိဒီး(၁၂)တီၤကၠိဖိႇ(GED)ကၠိဖိလၢအဖျိထီၣ် သ့ၣ်တဖၣ်အလံာ်အုၣ်သး(Certificate)ဒီးတကးဒံးဘၣ်တၢ်ဟ့ၣ်လီၤ၀ဲၦၤကၠိဖိလၢအဒိးန့ၢ်ဘၣ်ခိၣ်ဖးနီၣ်ဂံၢ်တၢႇခံႇသၢ သ့ၣ်တဖၣ်အံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢတၢ်စံၣ်လီၤကၠိဘျီ၀ဲအံၤသးခုဒိၣ်မးလၢကၤဘၣ်ဆ့ကၤသူတဘ့ၣ်အံၤဒီးခါဆူညါတၢ်ရဲၣ်တၢ်ကျဲၤအိၣ်လၢ ကဆဲးထီၣ်ဖၠၣ်စိမိၤကၠိ(University)လၢအီၤလါပူၤအဂ့ၢ်န့ၣ် နီၢ်ကရ့ၣ်စ်ထူကဲ လၢအဖျိထီၣ်(GED)တနံၣ်ညါအံၤတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ “တနံၤညါအံၤယသးခုဒိၣ်မးဘၣ်မနုၤလဲၣ်န့ၣ်လၢယတၢ်အိၣ်မူပူၤန့ၣ်(graduation)ဒ်အံၤတအိၣ်နီတဘျီဒံးဘၣ်ႉ လၢမဟိတနံၣ်န့ၣ်ယစံၣ်လီၤ၀ဲ(၁၂)တီၤႇမ့မ့ၢ်တနံၣ်ညါအံၤခီန့ၣ်ယစံၣ်လီၤ၀ဲ(GED)ႉယသးခုဒိၣ်မးခီဖျိလၢယကၤဘၣ်၀ဲဆ့ကၤအသူတဘ့ၣ်အံၤလီၤႉခါဆူညါယတၢ်အိၣ်မူတၢ်ရဲၣ်တၢ်ကျဲၤဒုအကီတစဲးႉဘၣ်မနုၤအဃိလဲၣ်န့ၣ်ခဲအံၤပက့ၤလၢကီၢ်ပယီၤတန့ၢ်ဘၣ်ႉယ(ဖးစ်ပိး)တအိၣ်စ့ၢ်ကီးဘၣ်အဃိယကမၤ(volunteer)က့ၤလၢဆၣ်သူလ့ၤကၠိအံၤဒီး ယကထီၣ်ကၠိမၤလိတၢ်လၢ(အီၤလါ) University...
ပယီၤသုးခးလီၤကျိဖးဒိၣ်အဃိ ခံလါအတီၢ်ပူၤ ကမျၢၢ်ဘၣ်သံ(၂၉)ဂၤ ဘၣ်ဒိ(၇၆)ဂၤ
လါမးရှး ၂၂ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် သုးက့(၃)ဟီၣ်က၀ီၤအပူၤ ခီဖျိပယီၤ သုးခးလီၤ ကျိဖးဒိၣ်ႇ ဟဲတ့ၢ်လီၤဒြိမ့ၣ်ပိၢ်ႇ ခးလီၤတၢ်ဒီးကဘီယူၤအဃိ စးထီၣ်(၂၀၂၄)လါယနူၤအါရံၤ တုၤလၢ လါဖ့ၤဘြူၤအါရံၤ ခံလါအတီၢ်ပူၤန့ၣ် ကမျၢၢ်သံခဲလၢာ်(၂၉)ဂၤႇ ဘၣ်ဒိ(၇၆)ဂၤအဂ့ၢ် ချၢၣ်လွံၢ်ထူၣ် ကီၢ်ရ့ၣ် ၦၤကတိၤတၢ်ပၢ ပဒိၣ်စီၤဟဲဂ့ၤ စံး၀ဲန့ၣ်လီၤႉ ဘၣ်ဃးပယီၤသုးအတၢ်မၤအၢမၤသီဒ်အံၤသ့ၣ်တဖၣ်မ့ၢ်တၢ်လၢအမၤဘၣ်ဒိ၀ဲၦၤဂ့ၢ်၀ီခွဲးယာ်ထီဘိတပယူာ်ဃီအသိးသုးကီၣ်ကးအံၤတလူၤပိာ်မၤထွဲသုးတၢ်သိၣ်တၢ်သီတၢ်ဘျၢတလူၤပိာ်မၤထွဲစ့ၢ်ကီးထံဂုၤကီၢ်ဂၤၦၤဂ့ၢ်၀ီတၢ်ဒိသူၣ်ဒိသးသဲးစးတၢ်ဘျၢဘၣ်အဂ့ၢ်န့ၣ် ပဒိၣ်စီၤဟဲဂ့ၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ “ပမ့ၢ်ကွၢ်က့ၤမုၢ်မဆါတနံၤအံၤန့ၣ်သုးကီၣ်ကးအံၤဘၣ်ဃးဒီးတၢ်မၤဘၣ်ဒိၦၤဂ့ၢ်၀ီခွဲးယာ်သ့ၣ် တဖၣ်န့ၣ် ထီဘိတပယူာ်ဃီန့ၣ်မၤ၀ဲဒၣ်ႉ မ့ၢ်၀ံၤန့ၣ်အ၀ဲသ့ၣ်တလူၤပိာ်မၤထွဲ၀ဲဒၣ်သုးမုၢ်ဒိၣ်အတၢ်သိၣ်တၢ်သီ တၢ်ဘျၢဘၣ်ဒီး တကးဒံးဘၣ်ထံဂုၤကီၢ်ဂၤအတၢ်ပာ်လီၤပာ်၀ဲဒၣ်ဟီၣ်ခိၣ်ဒီဘ့ၣ်ၦၤဂ့ၢ်၀ီတၢ်ဒိသူၣ်ဒိသးသဲးစး တၢ်ဘျၢသ့ၣ်တဖၣ်အံၤန့ၣ်တလူၤပိာ်မၤထွဲ၀ဲဘၣ်န့ၣ်လီၤႉဘၣ်မနုၤအဃိလဲၣ်န့ၣ်သုးကီၣ်ကးအံၤခးလီၤကျိၤဖးဒိၣ်လၢကမျၢၢ်အသိးအကျါႇ မၤပျံၤမၤဖုးကမျၢၢ်ႇ မၤဘၣ်ဒိဘၣ်ထံးကမျၢၢ်တၢ်သ့ၣ်တဖၣ်အံၤန့ၣ်ထီဘိတပ ယူာ်ဃီန့ၣ်မၤ၀ဲလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါချၢၣ်လွံၢ်ထူၣ်ကီၢ်ရ့ၣ်ခံလါအတီၢ်ပူၤ ခီဖျိပယီၤသုးခးလီၤကျိဖးဒိၣ်အဖီခိၣ် ကမျၢၢ်ဘၣ်သံ (၂၉)ဂၤ အကျါပာ်ဃုာ်ပိာ်မုၣ်(၉)ဂၤဒီးဒ်န့ၣ်အသိးၦၤကမျၢၢ်ဘၣ်ဒိ(၇၆)ဂၤအကျါစ့ၢ်ကီးပၣ်ဃုာ်၀ဲပိာ်မုၣ်(၂၇) ဂၤအဂ့ၢ် ချၢၣ်လွံၢ်ထူၣ် ၦၤကတိၤတၢ်ပၢ ပဒိၣ်စီၤဟဲဂ့ၤ စံး၀ဲအသိးသ့ၣ်ညါဘၣ်န့ၣ်လီၤႉ တကးဒံးဘၣ်ခံလါအတီၢ်ပူၤအံၤကမျၢၢ်ဟံၣ်ဟးဂီၤ၀ဲ(၅၂)ဖျၢၣ်ႇ တၢ်ဆါဟံၣ်တဖျၢၣ်ဒီး ဒ်န့ၣ်အသိးလီၢ်က၀ီၤ ကမျၢၢ် လၢဘၣ်ဃ့ၢ်မှံဟးဖျိးတဖၣ်စ့ၢ်ကီးဘၣ်ကွၢ်ဆၢၣ်မဲာ်၀ဲတၢ်အီၣ်တၢ်အီတၢ်ဃံးတၢ်စ့ၤဒီးဆူၣ်ချ့တၢ်ကီ တၢ်ခဲအကလုာ် ကလုာ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ စးထီၣ် ၂၀၂၁ သုးဟံးန့ၢ်တၢ်စိတၢ်ကမီၤလီၢ်ခံ ကီၢ်ပယီၤထံကီၢ်ဒီတဘ့ၣ်အပူၤ ခီဖျိဒုးယၤတၢ်သဘံၣ်သဘုၣ် အဃိ...
ဒီၣ်ဖးခိၣ်ကီၢ်ဆၣ်ႇသုးကီၣ်ကးတဲပျံၤတဲဖုးလၢကမၤကီမၤခဲၦၤလၢအဃ့ၢ်တၢ်ဘၣ်ကဲသုးအဟံၣ်ဖိဃီဖိ
လါမးရှး ၂၂သီႇ၂၀၂၄နံၣ်ႇ ခ့ၣ်အဲးစံၣ်ႇ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢသုးက့(၂)တီအူကီၢ်ရ့ၣ်ႇဒီၣ်ဖးခိၣ်ကီၢ်ဆၣ်ႇ(ကၠီးတဲၤ)(ရှါ၀ါတံ)ကရူၢ်ဟီၣ်က၀ီၤအပူၤသုးကီၣ်ကးတဲပျံၤတဲဖုး၀ဲလီၢ်က၀ီၤဖိလၢ“ၦၤလၢအဃ့ၢ်ပူၤဖျဲးအသးလၢတၢ်ဘၣ်ကဲသုးတဖၣ်အံၤႇတၢ်ကမၤကီမၤခဲ၀ဲအဟံၣ်ဖိဃီဖိ”အဂ့ၢ်လီၢ်က၀ီၤဖိတဖၣ်စံး၀ဲန့ၣ်လီၤႉ တလါအံၤလါမးရှးအဆိကတၢၢ်တနွံဒီးခံနွံတနွံအပူၤႇသုးကီၣ်ကးဟးထၢ၀ဲကမျၢၢ်တၢ်ဘၣ်ကဲသုးလၢ(ကၠီၤတဲၤ)ဟီၣ်က၀ီၤပူၤတဖၣ်အိၣ်၀ဲဒီးၦၤလၢအဖီၣ်မဲပီးမ့တဒုးသ့ၣ်ညါသ၀ီသးၦၢ်ဒီးဃ့ၢ်ပူၤဖျဲးသးတဖၣ်သုးကီၣ်ကးစံး၀ဲလၢကဖီၣ်၀ဲအမိအပါဒီးဒုးနုာ်လီၤဃိာ်ပူၤအဂ့ၢ်လီၢ်က၀ီၤၦၤဘၣ်မူဘၣ်ဒါလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲပဟီၣ်က၀ီၤအပူၤန့ၣ်စးထီၣ်လၢ(၄)တၢၣ်(၅)တၢၣ်တုၤလၢ(၁၃)တၢၣ်ဒီး(ကၠီးတဲၤ)တၢ်လီၢ်တဖၣ်အပူၤသုးကီၣ်ကးဟးတဲ၀ဲဘၣ်ဃးကမျၢၢ်တၢ်ဘၣ်ကဲသုးအဂ့ၢ်အကျိၤဒီးထၢ၀ဲၦၤကညီနီၢ်ဂံၢ်လၢကလဲၤကဲသုးမီၤနီၤႇသ၀ီတဖၣ်အပူၤန့ၣ်ဟ့ၣ်ဖီၣ်၀ဲကမျၢၢ်တၢ်ဖးႇၦၤလၢဖီၣ်တၢ်ဖးပီးမဲသ့ၣ်တဖၣ်န့ၣ်ကဘၣ်လဲၤကဲ၀ဲသုးႇဒီးၦၤတဂၤလၢ်လၢ်လၢအဖီၣ်မဲပီးမ့တလဲၤကဲသုးမ့ဃ့ၢ်ပူၤဖျဲးအသးန့ၣ်တဲ၀ဲလၢကမၤကီမၤခဲ၀ဲအဟံၣ်ဖိဃီဖိႇကဖီၣ်၀ဲအမိအပါသ့ၣ်တဖၣ်မီၤႇဖီၣ်၀ဲအမိမ့တန့ၢ်န့ၣ်ကဖီၣ်၀ဲအပါ၀ံၤကဒုးလီၤ၀ဲလၢဃိာ်ပူၤ(၅)နံၣ်မီၤႇအခဲအံၤပသ့ၣ်ညါဘၣ်န့ၣ်ၦၤလၢအဖီၣ်မဲအပီးအိၣ်တနီၤလံ”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါသုးကီၣ်ကးထၢ၀ဲကမျၢၢ်သုးလၢဒီၣ်ဖးခိၣ်ကီၢ်ဆၣ်ပူၤ၀ံၤအလီၢ်ခံႇအပူၤကွံာ်စှၤသီအတီၢ်ပူၤႇတၢ်ထၢ၀ဲကမျၢၢ်သုးလၢထီတထူၣ်ကီၢ်ဆၣ်ကမျၢၢ်ဒူသ၀ီတဖၣ်အပူၤတကပၤအိၣ်စ့ၢ်ကီး၀ဲအဂ့ၢ်အ၀ဲစံးအါထီၣ်၀ဲဒၣ်န့ၣ်လီၤႉ တကတီၢ်ဃီတၢ်ဟးထၢ၀ဲကမျၢၢ်တၢ်ဘၣ်ကဲသုးအံၤႇအပူၤကွံာ်လါယနူၤအါရံၤအပူၤသုးကီၣ်ကးဟးထၢပဲကမျၢၢ်စရီႇဒုးဖီၣ်တၢ်ဖးလၢ(ရှါ၀ါတံ)သ၀ီကရူၢ်ဒီးခိၣ်ဃၢၤသ၀ီဖဲအဘူးတဖၣ်အပူၤအိၣ်၀ဲဒီး၀ံၤၦၤလၢအဖီၣ်မဲပီးဒီးကဘၣ်ကဲသုးဘၣ်ဆၣ်တအဲၣ်ဒိးလဲၤကဲပယီၤသုးဘၣ်တဖၣ်အံၤဘၣ်ဟ့ၣ်၀ဲစ့လၢ(အကလးတုၤလၢကလီၢ်)အိၣ်၀ဲအဂ့ၢ်ဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤႉ ဒ်န့ၣ်အသိးႇသုးကီၣ်ကးဟးထၢ၀ဲကမျၢၢ်တၢ်ဘၣ်ကဲသုးအံၤႇတနံၣ်အတီၢ်ပူၤပာ်ပနီၣ်၀ဲသုးဂံၢ်ဘါနီၢ်ဂံၢ်(၅၀၀၀၀)မျးကယၤအိၣ်၀ဲဒီးတၢ်ဟ့ၣ်သုးတၢ်သိၣ်လိတဘျီလၢ်လၢ်အပူၤပာ်ပနီၣ်၀ဲသုးနီၣ်ဂံၢ်(၅၀၀)ဂၤအိၣ်၀ဲအဂ့ၢ်ဘိးဘၣ်ရၤလီၤတ့ၢ်၀ဲလၢအစုတီၤဖီလာ်စိၤရှၢၣ်မံၤဒံၣ်ယၢၣ်ပူၤအိၣ်၀ဲအမဲာ်ညါတၢ်ထၢကမျၢၢ်သုးအံၤစံး၀ဲလၢကစးထီၣ်မၤ၀ဲလၢလါလၢကဟဲလါအ့ဖြ့ၣ်အပူၤအိၣ်၀ဲဘၣ်ဆၣ်တချူးလါအ့ဖြ့ၣ်အပူၤမၤန့ၢ်ဆူၣ်၀ဲကမျၢၢ်လီၢ်က၀ီၤဖိလၢတၢ်လီၢ်ကိးတီၤဒဲးအပူၤအိၣ်၀ဲအဂ့ၢ်သ့ၣ်ညါဘၣ်န့ၣ်လီၤႉ ဘၣ်ဃးဒီးသုးကီၣ်ကးထၢ၀ဲကမျၢၢ်တၢ်ဘၣ်ကဲသုးအံၤအဖီခိၣ်န့ၣ်မ့ၢ်ဒ်သိးတၢ်ကဒီသဒၢ၀ဲနီၢ်ကစၢ်မုၢ်ကျိာ်၀ဲၤကွာ်ဒီးမၤအါထီၣ်သုးဖိလၢပျီပူၤအဂီၢ်သူ၀ဲကမျၢၢ်တဖၣ်လၢကကဲ၀ဲၦၤကညီတၢ်ဒီသဒၢ(လူသားဒိုင်း)အဂီၢ်လီၤအဂ့ၢ်အဂ့ၢ်တၢ်ပၢၢ်ဆၢသုးပာ်ဖှိၣ်တကပၤစံး၀ဲန့ၣ်လီၤႉ
ကဘီယူၤဒုးသုးဟဲတ့ၢ်လီၤမ့ၣ်ပိၢ်အဃိၦၤကမျၢၢ်ဟံၣ်ဟးဂီၤ(၇)ဖျၢၣ်ႇသံဃုာ်ဒီးဆၣ်ဖိကီၢ်ဖိ
လါမးရှး ၂၂ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅) လူၤသီကီၢ်ဆၣ်အပူၤ ခီဖျိပယီၤသုး ကဘီယူၤဒုးသုးဟဲတ့ၢ်လီၤမ့ၣ်ပိၢ်လၢ ဘီသ့ၣ်ထၣ်ကရူၢ် ပနီကျဲသ၀ီပူၤအဃိ ကမျၢၢ်ဟံၣ်ဟးဂီၤ၀ဲဒၣ်(၇)ဖျၢၣ်ဒီး ဆၣ်ဖိကီၢ်ဖိသံ၀ဲဒၣ်အိၣ်အဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲမဟါလါမးရှး ၂၁ သီအနံၤန့ၣ်လီၤႉ လၢ(သုးက့ ၅) လူၤသီကီၢ်ဆၣ်အပူၤ ဖဲလါမးရှး ၂၁ သီ ဂီၤခီ ၁ နၣ်ရံၣ်ဃၣ်ဃၣ်အဆၢကတီၢ်န့ၣ် ခီဖျိပယီၤသုးကဘီယူၤ ဟဲတ့ၢ်လီၤမ့ၣ်ပိၢ်လၢ ပနီကျဲသ၀ီပူၤ(၂)ဖျၢၣ်အဃိ ကမျၢၢ်အဟံၣ်အဃီဟးဂီၤတကးဒံးဘၣ် ဘၣ်သံစ့ၢ်ကီး၀ဲထိး (၈)ဒုႇ မဲးတဲးလဲး(၆)ဒုအဂ့ၢ်န့ၣ် မုၢ်တြီၢ်တၢ်ကစီၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ဘၣ်ဃးကဘီယူၤဟဲတ့ၢ်လီၤမ့ၣ်ပိၢ်ဘျီ၀ဲအံၤန့ၣ်(သုးက့ ၅)ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲလၢ “ဖဲမဂီၤ ၁၂း၄၀ မံးနံး အခါန့ၣ် ကဘီယူၤဒုးသုးဟဲကဒီးခံဘ့ၣ်ႉဟဲခးလီၤတၢ်လၢဘီသ့ၣ်ထၣ်ဆၢခိၣ် ဖဲပနီကျဲသ၀ီပူၤန့ၣ်ႉ သ၀ီဖိဟံၣ် ဟးဂီၤ၀ဲ(၇)ဖျၢၣ်သံဃုာ်ထိးႇဆီႇမဲးတဲးလဲးႇကျီၢ်ႇပနၢ်နါက့ဘၣ်ဒိအိၣ်စ့ၢ်ႉမ့မ့ၢ်ဒူဖိသ၀ီဖိၦၤကညီခီဒု တၢ်ဘၣ်ဒိဘၣ်ထံး တၢ်သံတၢ်ၦၢ်တအိၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါလါမးရှး ၂၁ သီ အနံၤန့ၣ်လီၤႉ တကးဒံးဘၣ်လၢန့ၣ်အမဲာ်ညါဖဲတၢ်တနံၤဃီ၀ဲန့ၣ် ပယီၤသုးကဘီယူၤဟဲတ့ၢ်လီၤကဒီး၀ဲဒၣ်မ့ၣ်ပိၢ်လၢ(သုးက့ ၅) ဒွဲၣ်လိသ၀ီပူၤတဖျၢၣ်ဒီးဒ်န့ၣ်အသိးဖဲဟါခီ ၁၂ နၣ်ရံၣ် တုၤလၢ...
ထီၣ်တထူၣ်ကီၢ်ဆၣ် ပယီၤသုးဖီၣ်ဒွဲၣ်အူအီၣ်ကမျၢၢ်တဂၤလၢတၢ်ကမၣ်တအိၣ်နီၤမံၤဘၣ်
လါမးရှး ၂၁ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ် တီအူကီၢ်ရ့ၣ် သုးက့(၂) ထီတထူၣ်ကီၢ်ဆၣ် စယၣ်ကၠံတီၤခၠါကရူၢ်(ဂွါၣ်အဲၤ)အပူၤ ဖဲပူၤကွံာ်လါမးရှး(၁၈)သီအနံၤန့ၣ် ပယီၤသုးကျိၤနုာ်လီၤလၢ(ဂွါၣ်အဲၤ)သ၀ီပူၤ၀ံၤ ဖီၣ်မၤသံဒွဲၣ်အူအီၣ် ၀ဲၦၤကမျၢၢ်တဂၤလၢတၢ်ကမၣ်တအိၣ်နီၤတမံၤဘၣ်အဂ့ၢ်န့ၣ်ခ့ၣ်အဲၣ်ယူၣ်ပာ်ဖျါ၀ဲဖဲတနံၤလါမးရှး(၂၁)သီအနံၤန့ၣ်လီၤႉ ပယီၤသုးၦၤနီၣ်ဂံၢ်ကအိၣ်(၁၂၀)ဂၤဘျဲၣ်ဖဲအ၀ဲသ့ၣ်ကလဲၤဆှၢတၢ်အီၣ်ဆူ(သုးက့ ၂)ဒီး(သုးက့ ၃)အဆၢ (သပၠ့ၤညိၣ်)သုးကလၢၤအဆၢကတီၢ်န့ၣ်ခီဖျိကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ခိးခး၀ဲလၢတၢ်ဘၢၣ်စၢၤ ဒီး ဖဲန့ၣ်၀ံၤပယီၤသုးတဖၣ်အံၤက့ၤနုာ်လီၤလၢ(ဂွါၣ်အဲၤ)သ၀ီပူၤဒီးဖီၣ်၀ဲသ၀ီဖိ အူတ့ၤစီၣ်(၇၀)နံၣ်တဂၤ ၀ံၤဒွဲၣ်အူအီၣ်ကွံာ်၀ဲဒၣ်ဒ်အံၤလီၤအဂ့ၢ်န့ၣ် ထီၣ်တထူၣ် ၦၤဘၣ်မူဘၣ်ဒါတဂၤစံး၀ဲန့ၣ်လီၤႉ ဘၣ်ဃးပယီၤသုးနုာ်လီၤဖီၣ်မၤသံဒွဲၣ်အူအီၣ်ကမျၢၢ်ကဲထီၣ်သးအံၤန့ၣ် ထီၣ်တထူၣ် ၦၤဘၣ်မူဘၣ်ဒါတဂၤ စံး၀ဲလၢ “တၢ်ဂ့ၢ်န့ၣ်ကဲထီၣ်သးဒ်အံၤခီၣ်ချ့သုးရ့ၣ်(ခမရ-၇၃)စယၣ်ကၠံသုးႇ (ခမရ-၃၀၆)ဘိၣ်မတံၣ်သုးက လၢၤဒီး တီအူ-၀ံစိာ်တီဆှၢသုးသ့ၣ်တဖၣ် ပာ်ဖှိၣ်ထီၣ်ဂံၢ်ဘါအိၣ်လၢ(၁၂၀)ဂၤဘျဲၣ်န့ၣ် အ၀ဲသ့ၣ်ကလဲၤဆှၢ တၢ်အီၣ်ဆူ တီအူကီၢ်ရ့ၣ်ဒီးချၢၣ်လွံၢ်ထူၣ်ကီၢ်ရ့ၣ်အဆၢလၢအမ့ၢ်၀ဲ (သပၠ့ၣ်ညိၣ်)သုးကလၢၤပူၤႉ မ့ၢ်လၢ(သပၠ့ၣ်ညိၣ်) သုးကလၢၤအံၤတၢ်အီၣ်တအိၣ်လၢၤဘၣ်အဃိအ၀ဲသ့ၣ်ဘၣ်ဆှၢ၀ဲလၢအတုၤမီၤနီၤႉ ဖဲလၢအ၀ဲသ့ၣ်ဟဲဆှၢတၢ်အီၣ် အခါန့ၣ်ပတြီတံၢ်ဃာ်အီၤလၢကျဲဖီခိၣ်အဃိအ၀ဲသ့ၣ်အၦၤသံဘၣ်ဒိဘၣ်ထံး ကအိၣ်၀ဲဒၣ်သၢဆံလွံၢ်ဆံညါလီၤႉ အဃိပယီၤသုးအံၤဆှၢတၢ်အီၣ်လဲၤတုၤ၀ဲ၀ံၤဒီးဖဲလၢဟဲက့ၤရှဲက့ၤတၢ်လီၢ် အခါန့ၣ်ထံၣ်၀ဲ(ဂွါအဲၤ)သ၀ီဖိတဂၤဘျီန့ၣ်အ၀ဲသ့ၣ်ဒွဲၣ်အူမၤသံကွံာ်၀ဲမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါပယီၤသုးအံၤဖဲအ၀ဲသ့ၣ်လဲၤဆှၢတၢ်အီၣ်အခါခီဖျိတၢ်ပၢၢ်ဆၢသုးကရူၢ်မၤတံာ်တာ်အ၀ဲသ့ၣ်လၢ ကျဲအဃိဖဲအ၀ဲသ့ၣ်ဟဲက့ၤနုာ်လီၤ၀ဲလၢသ၀ီပူၤအဆၢကတီၢ်မ့ၢ်လၢၦၤသ၀ီဖိအဂၤတဖၣ်ဃ့ၢ်အိၣ်ကဒုအ သးလၢတၢ်လီၢ်အဂုၤအဂၤအဃိတထံၣ်ၦၤသ၀ီဖိဘၣ်ထံၣ်၀ဲဖုသးၦၢ်တဂၤအံၤဒီးဖီၣ်ဆၢတံၢ်ဒွဲၣ်အူကွံာ်၀ဲအဂ့ၢ် လီၢ်က၀ီၤၦၤဘၣ်မူဘၣ်ဒါ စံး၀ဲအသိးသ့ၣ်ညါဘၣ်န့ၣ်လီၤႉ ဒ်န့ၣ်အသိးခ့ၣ်အဲၣ်ယူၣ်-ကီၢ်သူလ့ၤတၢ်ပၢ တီအူကီၢ်ရ့ၣ် သုးက့(၂) ထီတထူၣ်ကီၢ်ဆၣ် စယၣ်ကၠံတီၤခၠါက ရူၢ်ဒူသ၀ီကရူၢ်အပူၤဖဲပူၤကွံာ်လါမးရှး(၈)သီအခါန့ၣ်စ့ၢ်ကီး ခီဖျိပယီၤသုးခးလီၤကျိဖးဒိၣ်ဆူ(လၣ်မ့သၤ) သ၀ီပူၤအဃိ ဘၣ်သံ၀ဲ အူသ့မၠ့ၣ် ၆၅ နံၣ်တဂၤကဲထီၣ်တ့ၢ်အသးဒံးအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲ ဖဲတနံၤအံၤ...
(KNA)တိာ်ပာ်လၢလါလၢာ်ကထီထီၣ်ဖံဘၣ်ခိၣ်တၢ်ပနီၣ်
လါမးရှး ၂၁သီႇ ၂၀၂၄ နံၣ်ႇ ခ့ၣ်အဲးစံၣ် (KNA)ကညီဒီကလုာ်သုးမုၢ်ဒိၣ် တိာ်ပာ်၀ဲလၢလါမ့ၢ်လၢာ်န့ၣ်ကထီထီၣ်၀ဲအ၀ဲသ့ၣ်ဖံဘၣ်ခိၣ်တၢ်ပနီၣ်လၢအမ့ၢ်(ု္ဒဗ)အဂ့ၢ်သ့ၣ်ညါဘၣ်လၢၦၤဘၣ်မူဘၣ်ဒါအအိၣ်န့ၣ်လီၤႉ (KNA)ဖံဘၣ်ခိၣ်တၢ်ပနီၣ်န့ၣ်တၢ်စးအီၤအဖၢမုၢ်ဒီးတယး၀ဲလၢလါမ့ၢ်လၢာ်န့ၣ်က၀ံၤဒီးကထီထီၣ်ဘၣ်၀ဲဖဲလါလၢာ်အဂ့ၢ်(KNA)ကညီဒီကလုာ်သုးမုၢ်ဒိၣ်သုးဟီၣ်က၀ီၤနီၣ်ဂံၢ်(၂)အဒုးယာ်ခိၣ် သုးခိၣ်ဒိၣ်စိစီၤတ့ၤ၀့စံးဘၣ်၀ဲဒၣ် ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲဒၣ်လၢ“ပအိၣ်ခိးလၢတ၀ံၤခဲလၢာ်ဒံးဘၣ်ႉလါလၢာ်မ့ၢ်၀ံၤန့ၣ်ပဆိမိၣ်လၢပထီသ့လီၤႉပဒွးလီၤလၢလါလၢာ်န့ၣ်က၀ံၤႇလါလၢာ်မ့ၢ်၀ံၤဒီးပကထီလီၤအဂ့ၢ်”စံး၀ဲဒၣ်န့ၣ်လီၤႉ ဒ်န့ၣ်အသိး တကီၢ်ခါခဲအံၤတၢ်ဒုးကဲထီၣ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်သုးပာ်ဖှိၣ်ဒီးပယီၤသုးအဘၢၣ်စၢၤအဆၢကတီၢ်(KNA)တကပၤခးစၢၤ၀ဲပယီၤသုးကီၣ်ကးအဂ့ၢ်တၢ်ကစီၣ်ဟးထီၣ်အဖီခိၣ်အ၀ဲသ့ၣ်အၦၤတပၣ်ဘၣ်အဂ့ၢ်သုးခိၣ်ဒိၣ်စိစီၤတ့ၤ၀့စံးဒၣ်န့ၣ်လီၤႉ အ၀ဲစံး၀ဲလၢ“ယကနၣ်တၢ်ကစီၣ်န့ၣ်ယနၢ်ဟူႇ(BGF)လၢကပၣ်ဃုာ်လၢပယီၤကျါတအိၣ်နီတဒူၣ်ဘၣ်ႉသနာ်က့ပအိၣ်ခိးတၢ်ဘံၣ်တၢ်ဘၢလၢထံဖိကီၢ်ဖိကမျၢၢ်ဂီၢ်ဖဲရၤမတံပူၤန့ၣ်အိၣ်ဒံးလီၤႉပအိၣ်ဒၣ်ဒံးလၢအပူၤကွံာ်လီၤႉလၢကပာ်ဖှိၣ်လိာ်သးဒီးပယီၤကခးတၢ်န့ၣ် တအိၣ်ဘၣ်ႉမ့ၢ်အိၣ်န့ၣ်ဒုးနဲၣ်ၦၤသ့လီၤႉ”အဂ့ၢ်စံး၀ဲဒၣ်န့ၣ်လီၤႉ လၢန့ၣ်အမဲာ်ညါ လၢအပူၤကွံာ်တၢ်ဒုးတၢ်ယာ်အကတီၢ်ပယီၤသုးတကပၤဟဲဃ့အ၀ဲသ့ၣ်တၢ်မၤစၢၤဒ်အမ့ၢ်ဆှၢစၢၤတၢ်အီၣ်ႇဆှၢစၢၤသုးဂံၢ်ဘါအိၣ်၀ဲဒၣ်ဘၣ်ဆၣ်အ၀ဲသ့ၣ်ဂ့ၢ်လိာ်၀ဲမၤစၢၤတသ့လၢၤဘၣ်ခီဖျိအ၀ဲသ့ၣ်ပျိာ်လဲက့ၤသးလၢ( KNA)အဂ့ၢ်အ၀ဲတဲအါထီၣ်၀ဲဒၣ်စ့ၢ်ကီးန့ၣ်လီၤႉ (KNA)အံၤအိၣ်၀ဲဒီးသုးဟီၣ်က၀ီၤနီၢ်ဂံၢ်(၄)ဘ့ၣ်ဒီးသုးဟီၣ်က၀ီၤနီၢ်ဂံၢ်(၁)န့ၣ်ဟံးန့ၢ်၀ဲဟီၣ်၀ီၤလၢမၠဲၣ်ကၠံငူၣ်ႇ သုးဟီၣ်က၀ီၤ(၂)လူၢ်ပျဲၢ်ႇတန့ခၠါႇသုးဟီၣ်က၀ီၤနီၢ်ဂံၢ်(၃)တီနီၢ်မုၢ်ထီၣ်ရၤမတံသူမွဲနံၤႇဒီးသုးဟီၣ်က၀ီၤနီၣ်ဂံၢ်(၄)တခီလၢကၠဲးဒိဒီးကၠးအ့ဆ့ၣ်ကၠံတကပၤ ဒီး( KNA)အံၤအသုးရ့ၣ်ခဲလၢာ်အိၣ်၀ဲ(၂၈)ရ့ၣ်အဂ့ၢ်သ့ၣ်ညါဘၣ်န့ၣ်လီၤႉ
မုၢ်တြီၢ်ကီၢ်ရ့ၣ် ခံသီအတီၢ်အပူၤ ပယီၤသုးသူဒြိတ့ၢ်လီၤမ့ၣ်ပိၢ်(၂၀၀)ဘျဲၣ် သ၀ီ(၃)ဖျၢၣ်ဘၣ်ဃ့ၢ်ထီၣ်
လါမးရှး ၂၁ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)အပူၤ ခံသီအတီၢ်ပူၤ ပယီၤသုးသူ၀ဲဒြိတ့ၢ်လီၤ၀ဲဒၣ်မ့ၣ်ပိၢ်လၢကမျၢၢ် အိၣ်ဆိးလီၢ်ကျဲတၢ်ဖံးအီၣ်မၤအီၣ်လီၢ်ပူၤအိၣ်၀ဲအဖျၢၣ်(၂၀၀)ဘျဲၣ်ဒီး သ၀ီ(၃)ဖျၢၣ်ၦၤကမျၢၢ်ဘၣ်ဃ့ၢ်ထီၣ်၀ဲအဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲမဟါလါမးရှး ၂၀ သီအနံၤန့ၣ်လီၤႉ (သုးက့ ၅)ဟီၣ်က၀ီၤအပူၤ လါမးရှး ၁၉ သီ ဒီး ၂၀ သီ လၢခံသီအတီၢ်ပူၤ ပယီၤသုးသူ၀ဲဒြိတ့ၢ်လီၤ၀ဲဒၣ်မ့ၣ်ပိၢ် လၢဘုသိၣ်ကီၢ်ဆၣ်ႇဒွဲၣ်လိကီၢ်ဆၣ်ႇလူၤသီကီၢ်ဆၣ် ဒူသ၀ီကမျၢၢ်တၢ်ဖံးအီၣ်မၤအီၣ်လီၢ်ကျဲပူၤ ခဲလၢာ်အိၣ်၀ဲ(၂၂၂)ဘျီ ဒီးလၢန့ၣ်အမဲာ်ညါသ၀ီ(၃)ဖျၢၣ် ဟံၣ်ဒူၣ်(၁၀၂)ဖျၢၣ် ၦၤနီၣ်ဂံၢ်(၁၂၅၁)ဂၤဘၣ်ဃ့ၢ်ထီၣ်၀ဲအဂ့ၢ်န့ၣ် မုၢ်တြီၢ်ကီၢ်ရ့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ဒ်မုၢ်တြီၢ်တၢ်ကစီၣ်လံာ်တၢ်ဖျါပူၤပာ်ဖျါ၀ဲအသိးန့ၣ်ဖဲလါမးရှး ၂၀ သီအနံၤန့ၣ် ပယီၤသုးသူ၀ဲဒြိတ့ၢ်လီၤ၀ဲဒၣ်မ့ၣ်ပိၢ် လၢဘုသိၣ်ကီၢ်ဆၣ် မဲၤကျီကရူၢ် ဘီးထၣ်သ၀ီဃၢၤ(၂၇)ဖျၢၣ်ဒီး ဒွဲၣ်လိကီၢ်ဆၣ် မးထီကရူၢ် စီၤချ့လိာ်သ၀ီဃၢၤန့ၣ် တ့ၢ်လီၤ၀ဲဒြိမ့ၣ်ပိၢ်(၈)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါတၢ်တနံၤဃီအံၤန့ၣ်ပယီၤသုးသူ၀ဲဒြိတ့ၢ်လီၤ၀ဲမ့ၣ်ပိၢ်လၢလူၤသီကီၢ်ဆၣ် ဘီသ့ၣ်ထၣ်ကရူၢ် ထူၣ်မီဒၢသ၀ီႇ တၤဒိၣ်ထၣ်သ၀ီႇနံဒိးထၣ်သ၀ီပူၤအိၣ်၀ဲ(၁၃၇)ဖျၢၣ်အဂ့ၢ်န့ၣ် မုၢ်တြီၢ်တၢ်ကစီၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ တကးဒံးဘၣ်ဖဲလါမးရှး ၁၉ သီ အနံၤန့ၣ်စ့ၢ်ကီး ပယီၤသုးသူ၀ဲဒြိတ့ၢ်လီၤ၀ဲမ့ၣ်ပိၢ်လၢ လူၤသီကီၢ်ဆၣ် ဘီသ့ၣ်ထၣ်ကရူၢ် ထူၣ်မီဒၢသ၀ီႇတၤဒိၣ်ထၣ်သ၀ီဒီးနံဒိးထၣ်သ၀ီအိၣ်၀ဲ(၅၀)ဖျၢၣ်န့ၣ်လီၤႉ ခီဖျိလၢပယီၤသုးသူဒြိ ဟးခးလီၤတၢ်လၢ...
ယ့ၤတယီၣ်ပယီၤသုးကလၢၤသုးဖိ(၂၀)ဘျဲၣ်ဃ့ၢ်နုာ်ဆူကၠီၣ်တဲၣ်ဃုာ်ဒီးတၢ်စုက၀ဲၤ
လါမးရှး ၂၁သီႇ ၂၀၂၄နံၣ်ႇ ခ့ၣ်အဲးစံၣ်ႇ ခ့ၣ်အဲၣ်ယူၤ-ကညီဒီကလုာ်စၢဖှိၣ်ကရၢသုးက့(၆)ဒူပျာ်ယာ်ကီၢ်ရ့ၣ်ႇကီးတရံးကီၢ်ဆၣ်အပူၤတနံၤအံၤလါမးရှး(၂၁)ဂီၤခီ(၆)နၣ်ရံၣ်ဘျဲၣ်အဆၢကတီၢ်ႇယ့ၣ်တယီၣ်ပယီၤသုးကလၢၤသုးဖိ(၂၆)ဂၤဃ့ၢ်နုာ်ဆူကီၠၣ်တဲာ်အပူၤဃုာ်ဒီးဃုာ်ဒီးတၢ်စုက၀ဲၤတဖၣ်အဂ့ၢ်လီၢ်ၦၤဘၣ်မူဘၣ်ဒါစံး၀ဲန့ၣ်လီၤႉ ယ့ၤတယီၣ်ပယီၤသုးကလၢၤသုးဖိ(၂၆)ဂၤအံၤဃ့ၢ်နုာ်၀ဲဆူကၠီၣ်တဲၣ်အပူၤဖဲတဂီၤအံၤဒီးဟဲနုာ်လီၤ၀ဲကျဲဖဲလဲၣ်တဘိလဲၣ်အဂ့ၢ်န့ၣ်ႇတၢ်တသ့ၣ်ညါ၀ဲဘၣ်ဆၣ်တကီၢ်ခါခဲအံၤကၠီၣ်တဲၣ်ၦၤဘၣ်မူဘၣ်ဒါတဖၣ်ရဲၣ်ကျဲၤ၀ဲလၢကဆှၢထီၣ်၀ဲဆူမဲၢ်ဆီးဒီးက့ၤဆှၢက့ၤအ၀ဲသ့ၣ်ဆူရၤမတံအိၣ်၀ဲအဂ့ၢ်လီၢ်က၀ီၤၦၤဘၣ်မူဘၣ်ဒါလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဒ်သိးၦၤသ၀ီဖိတဲန့ၣ်ဖဲမဂီၤ(၆)နၣ်ရံၣ်ဘျဲၣ်(၇)န့ၣ်ရံၣ်အဆၢကတီၢ်န့ၣ်အသုဟဲနုာ်လီၤမီၤနီႉတၢ်ဒုးတၢ်ယာ်တအိၣ်ဘၣ်အ၀ဲသ့ၣ်ဟဲစံၢ်နုာ်လီၤကၠါန့ၣ်လီၤႉခဲလၢာ်(၂၆)ဂၤႇတဲတဘၣ်ဘၣ်မ့ၢ်ဟဲထီၣ်ကစၢၢ်ဖဲလဲၣ်တပၤလဲၣ်န့ၣ်တယးမးတဘၣ်ဘၣ်ႇအသုတၢ်န့ၣ်ၦၤပံးကျဲနါက့ယိၤသုးအိၣ်ခိးတၢ်တ၀းခဲလၢာ်ဘၣ်မီၤတၢ်လီၢ်ကိးတီၤတီၤန့ၣ်ႇအပူၤကွံာ်တၢ်(၄၈)ဂၤန့ၣ်တၢ်ရဲၣ်ကျဲၤလၢတၢ်ကက့ၤဆှၢက့ၤလၢကီၢ်ပယီၤအဃိႇအခဲအံၤတၢ်(၂၆)ဂၤအံၤနါက့တနံၤအံၤအတီၢ်ပူၤဒုယိၤသုးကလဲၤပာ်ဖဲလဲၣ်တသ့ၣ်ညါဘၣ်ႇဘၣ်ဆၣ်ၦၤကတဲသကိးတၢ်ဒီး(ထံၣ်ဖံၣ်စံၣ်)မတၤမ့ၢ်၀ံၤဘျီၦၤကဆှၢထီၣ်လၢမဲၢ်ဆီး၀ံၤၦၤကက့ၤဆှၢက့ၤလၢကီၢ်ပယီၤတကပၤလီၤမီၤႉ”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါပယီၤသုး(၂၆)ဂၤအံၤတၢ်သမံသမိးအ၀ဲသ့ၣ်အဆၢကတီၢ်စံး၀ဲလၢယ့ၤတယီၣ်သုးကလၢၤအပူၤအ၀ဲသ့ၣ်အၦၤတအိၣ်နီတဂၤလၢၤဘၣ်ဒီးၦၤ(၂၆)ဂၤအံၤအကျါပၣ်ဃုာ်၀ဲဒီးအခိၣ်အနၢ်(၃)ဂၤအဂ့ၢ်အ၀ဲစံးအါထီၣ်ကဒီး၀ဲဒၣ်စ့ၢ်ကီးန့ၣ်လီၤႉ တကတီၢ်ဃီတကီၢ်ခါခဲအံၤမဲၢ်သရီခံႇယ့ၤတယီၣ်ႇကွံလၢၢ်တၢသုးကလၢၤတဖၣ်အပူၤပယီၤသုးအၦၤတဖၣ်တအိၣ်၀ဲနီတဂၤလၢၤဘၣ်ဘၣ်ဆၣ်ႇမ့မ့ၢ်လၢဖိခၠံၣ်မုၢ်သုးကလၢၤန့ၣ်သုးကီၣ်ကးအၦၤအိၣ်ဒံး၀ဲအဃိတၢ်ပၢၢ်ဆၢသုးပာ်ဖှိၣ်တဖၣ်က၀ီၤဃာ်၀ဲအိၣ်၀ဲအဂ့ၢ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ဒ်န့ၣ်အသိးႇဖဲအပူၤကွံာ်လါမးရှး(၁၉)သီအနံၤန့ၣ်ႇသုးကီၣ်ကးအၦၤသုးဖိလၢအိၣ်မဲၢ်သရီခံသုးကလၢၤ(၄၈)ဂၤဟဲဃ့ၢ်နုာ်လီၤ၀ဲဆူကီၢ်ကၠီၣ်တဲၣ်-ကီၢ်ပယီၤကီၢ်ဆၢႇအူးဖၣ်ကီၢ်ဆၣ်ပၢချၢသ၀ီအပူၤဒီးသုးကီၣ်ကးအၦၤသ့ၣ်တဖၣ်အံၤကၠီၣ်တဲၣ်အၦၤဘၣ်မူဘၣ်ဒါတဖၣ်ဆှၢထီၣ်၀ဲဆူမဲၢ်ဆီး၀့ၢ်ပူၤလၢကဆှၢက့ၤ၀ဲဆူကီၢ်ပယီၤရၤမတံတကပၤအဂီၢ်အိၣ်၀ဲအဂ့ၢ်သ့ၣ်ညါဘၣ်စ့ၢ်ကီးန့ၣ်လီၤႉ
မုၢ်တြီၢ်ကီၢ်ရ့ၣ် သုးဟံးန့ၢ်တၢ်စိတၢ်ကမီၤသၢနံၣ်ဘျဲၣ်အတီၢ်ပူၤ တၢ်ထီၣ်န့ၢ်ပယီၤသုးလၢၤ(၂၄)ဖျၢၣ်
လါမးရှး ၂၀ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)အပူၤ သုးဟံးန့ၢ်တၢ်စိတၢ်ကမီၤ (၃)နံၣ်ဘျဲၣ် အတီၢ်ပူၤအံၤ တၢ်ထီၣ်မၤန့ၢ်၀ဲပယီၤသုးကလၢၤ(၂၄)ဖျၢၣ်အဂ့ၢ်န့ၣ် (ခဲၤဖ့)သီသံၣ်ခိၣ် ထုးထီၣ်ပာ်ဖျါ၀ဲဖဲလါမးရှး ၁၇ သီ အနံၤ န့ၣ်လီၤႉ စးထီၣ်(၂၀၂၁)သုဟံးန့ၢ်ထံကီၢ်တၢ်စိတၢ်ကမီၤ၀ံၤလီၢ်ခံန့ၣ် သုးကီၣ်ကးအသုးကလၢၤလၢအိၣ်မုၢ်တြီၢ်ကီၢ်ရ့ၣ် (သုးက့ ၅) ဟီၣ်က၀ီၤပူၤတဖၣ် ခီဖျိတၢ်ပၢၢ်ဆၢသုးပာ်ဖှိၣ်ကရူၢ်ထီၣ်ခးႇသူ၀ဲဒၣ်ဒြိဒီးဒီၣ်တဲာ်ကွံာ်တၢ်အီၣ်တၢ်အီ ကျဲလၢကျဲအကပၤ ကပၤအဃိ သုးကီၣ်ကးအသုးကလၢၤဘၣ်လီၤကွံာ်အါအါဂီၢ်ဂီၢ်ဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ. ဘၣ်ဃးတၢ်ထီၣ်န့ၢ်သုးကီၣ်ကးအသုးအဂ့ၢ်အကျိၤန့ၣ်(သုးက့ ၅) ၦၤဘၣ်မူဘၣ်ဒါလၢတအဲၣ်ဒိးပာ်ဖျါအမံၤတဂၤစံး၀ဲ လၢ“၂၀၂၁ သုးဟံးန့ၢ်တၢ်စိိတၢ်ကမီၤ၀ံၤလီၢ်ခံတကတီၢ်ဃီစးထီၣ်ဖဲ(၂၀၂၃-၂၀၂၄)ထီၣ်အံၤန့ၣ် ပယီၤသုးထုး ကွံာ်၀ဲသုးကလၢၤႉအပူၤကွံာ်တၢ်မ့ထီၣ်ဒုးအ၀ဲသ့ၣ်န့ၣ်အ၀ဲသ့ၣ်ဆှၢထီၣ်၀ဲဒၣ်အၦၤဂံၢ်ဘါအိၣ်ဘၣ်ဆၣ်စးထီၣ်ဖဲ သုးဟံးန့ၢ်တၢ်စိတၢ်ကမီၤ၀ံၤလီၢ်ခံခီဖျိတၢ်ဒုးအမဲာ်သၣ်အတကွီၢ်လဲၢ်ထီၣ်အဃိဆှၢအါထီၣ်အၦၤတန့ၢ်လၢၤဘၣ်ႉ လၢအတၢ်ထုးကဒါက့ၤသုးကလၢၤအံၤန့ၣ်မ့ၢ်ဒၣ်လၢအဂံၢ်အဘါလီၤစှၤႇတၢ်လဲၤခးအီၤဒီးဒြိႇစနဲးဖၢးအါထီၣ် အဃိ အၦၤလီၤစှၤအဖီခိၣ်က့ၤပာ်ဖှိၣ်ထီၣ်က့ၤသးတပူၤဃီမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ပယီၤသုးကလၢၤလၢ(သုးက့ ၅)အၦၤထီၣ်မၤန့ၢ်၀ဲသ့ၣ်တဖၣ်န့ၣ်မ့ၢ်၀ဲ ပဟီထၣ်(တဃီၤထၣ်)သုးကလၢၤႇ မိၣ်လိၣ်ကၠိ(ထံထၣ်), တဖံၣ်ခံ(၀ၣ်သိထၣ်),ဆၣ်လီၤကၠိႇမဲၢ်ရၤထၣ်ႇမဲၢ်တရံးထၣ်ႇသံမုၢ်ထၣ်ႇ မဲၢ်ပရံးဒိၣ်ႇလၢၢ်စ့ဒီခိၣ် (ကၠီၤထၣ်),စီၤဖိထၣ်ႇရံကၠၤထၣ်ႇထံထီၣ်ပၢၢ်ႇဃီၣ်ဒီခိၣ်ႇမဲၢ်ပီမုၢ်ထၣ်ႇပိာ်မုၣ်ကၠိႇသံရိၣ်ထၣ်ႇအူသူၣ်ထၣ်ႇ၀ီၢ်မုၢ်ႇမဲၤ၀့ၤႇ ဖါခဲးကၠိႇက့ၣ်ကီၣ်ႇမၠ့ၣ်နံၣ်ကိႇကၠူၣ်လူၢ်ႇလၢၢ်ကျ့ကၠိသုးကလၢၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ သုးကလၢၤလၢ(သုးက့ ၅)အၦၤထီၣ်န့ၢ်၀ဲသ့ၣ်တဖၣ်အံၤမ့ၢ်အရ့ဒိၣ်လၢသုးကီၣ်ကးအဂီၢ်ထဲလဲၣ်ဒီးသုကလၢၤ သ့ၣ်တဖၣ်အံၤမ့ၢ်သုးကလၢၤဒ်လဲၣ်တကလုာ်လဲၣ်အဂ့ၢ်န့ၣ် (သုးက့ ၅) ၦၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲ ဒ်အံၤန့ၣ်လီၤႉ အ၀ဲစံး၀ဲလၢ“သုးကလၢၤလၢၦၤထီၣ်န့ၢ်ခဲအံၤတဖၣ်န့ၣ်တမ့ၢ်သုးကလၢၤလၢၦၤထီၣ်န့ၢ်အီၤညီညီဘၣ်ႉ မ့ၢ်သုးကလၢၤ လၢတၢ်ထီၣ်န့ၢ်အီၤကီသုးကလၢၤတဖၣ်အံၤကဲ၀ဲဒၣ်(မ့န်)အကါဒိၣ်၀ဲဒၣ်လၢအ၀ဲသ့ၣ်အဂီၢ်ႉ အဒိဒ်သိးသီလဲၤထၣ်ႇ မဲၤခါထၣ်တၢ်လီၢ်အံၤန့ၣ်အကါဒိၣ်မးလၢထံဆၢကီၢ်ဆၢတၢ်ကူၣ်လဲၤမၤကၤမ့ၢ်ဂ့ၤႇတၢ်ဆှၢန့ၢ်ပယီၤသုးတၢ်အီၣ်တၢ်အီ...
ကရိကရၢထီၣ်သိၣ်မှံၤဒီးကမၤတၢ်လၢ ဖဲၣ်ဒၢၣ်ရၢၣ်ဒီးတၢ်မုာ်တၢ်ခုၣ်အဂီၢ်အဂ့ၢ် တၢ်ပတုာ်တၢ်ခးကရူၢ်(NCA)စံး၀ဲ
လါမးရှး ၂၀သီႇ ၂၀၂၄နံၣ်ႇ ခ့ၣ်အဲးစံၣ် ကလုာ်ဒူၣ်ဖီၣ်စုက၀ဲၤကရူၢ်(၇)ဒူၣ်လၢအဆဲးလီၤဃာ်၀ဲထံကီၢ်ဒီဘ့ၣ်တၢ်ပတုာ်တၢ်ခးအလံာ်ဃံးဃာ်(NCA)သ့ၣ်တဖၣ်ကရၢကရိထီၣ်၀ဲ ကလုာ်ဒူၣ်ဖီၣ်စုက၀ဲၤ(၇)ဒူၣ်သိၣ်မှံၤ (7 EAO Alliance) ၀ံၤကမၤတၢ်လၢ တၢ်ကသူၣ်ထီၣ်ဖဲၣ်ဒၢၣ်ရၢၣ်ဒံၣ်မိၣ်ကရ့ၣ်စံၣ်ကီၢ်စၢဖှိၣ်အဂီၢ်ဒီးကသူၣ်ထီၣ်၀ဲတၢ်မုာ်တၢ်ခုၣ်လၢ အပၣ်ဃုာ်ဒီးကရူၢ်ကရၢခဲာ်လၢာ်တၢ်တၢၣ်ပီၣ်တဲကိးထံရူၢ်ကီၢ်သဲးအဂ့ၢ်ထုးထီၣ်ပာ်ဖျါ၀ဲလါမရှး(၁၈)သီအနံၤန့ၣ်လီၤႉ တၢ်ပတုာ်တၢ်ခး(၇)ဒူၣ်တၢ်အိၣ်ဖှိၣ်ဘျီ၀ဲန့ၣ် န့ၣ်ဘၣ်တၢ်မၤအီၤလၢကီၢ်ကၠီၣ်တဲၣ်၊၀့ၢ်ကံၢ်မဲ ဖဲအပူၤကွံာ် လါမးရှး(၁၇)ဒီး(၁၈)လၢ၂သီအတီၢ်ပူၤဒီး ကရၢကရိထီၣ်၀ဲ ကလုာ်ဒူၣ်ဖီၣ်စုက၀ဲၤ(၇)ဒူၣ်သိၣ်မှံၤ၀ံၤပာ်လီၤ၀ဲဒၣ်အတၢ်ပညိၣ်တိာ်ပာ်သၢထံၣ်လၢအမ့ၢ် ကသူၣ်ထီၣ်၀ဲဖဲၣ်ဒၢၣ်ရၢၣ်ကီၢ်ဆၢဖှိၣ်လၢအအိၣ်ဒီးတၢ်တုၤသိးထဲသိးႇနီၢ်ကစၢ်တၢ်ပၢလီၤသးလၢၦဲၤဒီးတၢ်မုာ်တၢ်ခုၣ်လၢအတူၢ်ယံာ်ခိးကျၢၤအဂ့ၢ်ႇကလုာ်ဒူၣ်ဖီၣ်စုက၀ဲၤ(၇)ဒူၣ်တၢ်ထံာ်လိာ်အိၣ်ဖှိၣ်တဆီ တၢ်မုာ်တၢ်ခုၣ်အဆၢကဖျါထီၣ်အဂီၢ် ကဒုးအိၣ်ထီၣ်တၢ်မၤလၢတၢ်ထုးဖျါထီၣ်ကမျၢၢ်တၢ်ဘၣ်သးဒီးထံရူၢ်ကီၢ်သဲးတၢ်ဆီတလဲကလဲၤထီၣ်လဲၤထီအဂီၢ် ကထံၣ်လိာ်အိၣ်ဖှိၣ်ဒီးကရူၢ်ကရၢလၢအဘၣ်ထွဲဘၣ်ဃးတဖၣ်ခဲအံၤခဲအံၤဒီးပာ်လီၤ၀ဲအဖီတၢၣ်လၢအမ့ၢ် ထံရူၢ်ကီၢ်သဲးတၢ်ဆီတလဲလၢၦဲၤကလဲၤထီၣ်လဲၤထီအဂီၢ်ႇကမၤထံရူၢ်ကီၢ်သဲးထံၣ်လိာ်အိၣ်ဖှိၣ်ဒီးကရူၢ်ကရၢလၢအဘၣ်ထွဲဘၣ်ဃးသ့ၣ်တဖၣ်လၢအဆၢတဲာ်ႇလၢတၢ်ကဘှါရှဲတကီၢ်ခါတၢ်သဘံၣ်သဘုၣ်အဂီၢ် ၦၤလၢအဲၣ်ဒိးဘှါရှဲလၢတၢ်မုာ်တၢ်ခုၣ်သ့ၣ်တဖၣ်န့ၣ်ကပာ်ဖျါထီၣ်န့ၢ်၀ဲအတၢ်ပာ်သးဒီးကဃုန့ၢ်၀ဲကျဲဃုာ်ဒီးတၢ်ဒီသဒၢကမျၢၢ်အဂ့ၢ်၀ီသ့ၣ်တဖၣ်ပၣ်ဃုာ်၀ဲဒၣ်အဂ့ၢ်ပာ်ဖျါ၀ဲဒၣ်လၢအလံာ်ပာ်ဖျါအပူၤန့ၣ်လီၤႉ လၢတၢ်န့ၣ်အဃိတကီၢ်ခါခဲအံၤကီၢ်ပယီၤတၢ်အိၣ်သးအဖီခိၣ်ဒီးလၢကမၤဖျါထီၣ်၀ဲအ၀ဲသ့ၣ်အတၢ်ပညိၣ်ဖီတၢၣ်အမိၢ်လံၤမိၢ်ၦၢ်အဂီၢ်တၢ်ကီတၢ်ခဲအိၣ်အ၀ဲဘၣ်ဆၣ်အ၀ဲသ့ၣ်ကမၤ၀ဲလၢအဂ့ၤကတၢၢ်လီၤအဂ့ၢ်(7 EAO Alliance)အၦၤကတိၤတၢ်ပၢ သုးခိၣ်ဒိၣ်စိစီၤကၠီၤညိၣ် စံးဘၣ်၀ဲဒၣ် ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“တၢ်ဆၢကတီၢ်ခဲအံၤပမ့ၢ်ကွၢ်က့ၤလၢထံကီၢ်ဒီတဘ့ၣ်တၢ်တဘၣ်ဘျီးဘၣ်ဒါႇတၢ်ဒုးတၢ်ယာ်အသကွီၢ်လဲၢ်ထီၣ်ကွ့ၢ်ကွ့ၢ်န့ၣ်လီၤႉဒ်သိးတၢ်ဖံးတၢ်မၤသ့ၣ်တဖၣ်အံၤအမိၢ်လံၤမိၢ်ၦၢ်ကဖျါထီၣ်အဂီၢ်န့ၣ် ဖဲ(7 EAO Alliance)အပူၤန့ၣ်အိၣ်ဒီးတၢ်တီခိၣ်ရိၣ်မဲကမံးတံာ်ႇနဲၣ်ရွဲၣ်ကရူၢ်ႇတၢ်မၤကမံးတံာ်တခါဘၣ်တခါဃုာ်ဒီးထံဂုာ်ကီၢ်ဂၤႇထံရူၢ်ကီၢ်သဲးဒီးသုးဂ့ၢ်၀ီတၢ်ဘံၣ်တၢ်ဘၢအိၣ်ခဲလၢာ်ဘၣ်ဆၣ်အိၣ်ဒံးဒၣ်လၢတၢ်ရဲၣ်ကျဲၤပာ်လီၤအီၤဒံးလီၤႉလၢတၢ်ကမၤဖျါထီၣ်တၢ်ဖံးတၢ်မၤအမိၢ်လံၤမိၢ်ၦၢ်ကန့ၢ်အဂီၢ် တၢ်ဖံးတၢ်မၤလၢပကဘၣ်ကျဲးစၢမၤသ့ၣ်တဖၣ်လၢတၢ်ကီတၢ်ခဲအါမံၤအကျါအဖီဃိၣ်ပကဘၣ်အိၣ်ခိးကွၢ်ဒံးအဂ့ၢ်”စံး၀ဲဒၣ်န့ၣ်လီၤႉ (7 EAO Alliance)လၢအပူၤကွံာ်န့ၣ်မ့ၢ်၀ဲ တၢ်ကွၢ်ဟုၣ်ကွၢ်စုၣ်တၢ်မုာ်တၢ်ခုၣ်ကရူၢ်(PPST)ဒီးပယီၤသုးကီၣ်ကးဟံးန့ၢ်ဆူၣ်ကွံာ်ထံကီၢ်တၢ်စိတၢ်ကမီၤ၀ံၤအလီၢ်ခံကရူၢ်တဖုဒီးတဖုတၢ်အိၣ်သးအဖီခိၣ် ကရၢကရိထီၣ်က့ၤ၀ဲ(7 EAO Alliance)ဒီးလၢ(7 EAO Alliance )အပူၤန့ၣ်ပၣ်ဃုာ်၀ဲ(RCSS)ႇ(MNSP)ႇ(ALP)ႇ(PNLO)ႇ(LUD)ႇ(KNU/KNLA-PC)ဒီး DKBA)သ့ၣ်တဖၣ်အဂ့ၢ်သ့ၣ်ညါဘၣ်န့ၣ်လီၤႉ