ကနု၁်လီၤပၣ်ဃု၁်လၢနံၣ်ထီၣ်သီတၢ်ထုးထီၣ်ကညီနီၢ်တယၢ်တၢ်ရဲၣ်တၢ်ကျဲၤပူၤအဂ့ၢ်အ့ၣ်ယၣ်၀တံၣ်ကညီသးစၢ်ဆီၣ်တခူ ထီၣ်၀ဲ
လါယနူၤအါရံၤ ၃ သီႇ ၂၀၂၄ နံၣ်ႇ ခ့ၣ်အဲးစံၣ် လၢကဟဲတလါအံၤလါယနူၤအါရံၤထီၣ် ၁၁ သီ သလ့ၤလါထီၣ် ၁ သီလၢအလီၤဘၣ်၀ဲကညီနံၣ်ထီၣ်သီမုၢ်နံၤ တၢ်ရဲၣ်တၢ်ကျဲၤအံၤ ခီဖျိဟီၣ်က၀ီၤတၢ်အိၣ်သးအဃိမ့တမၤဘၣ်၀ဲမူးတၢ်ရဲၣ်တၢ်ကျဲၤအံၤဘၣ်ဘၣ်ဆၣ် ကညီဖိတဖၣ် အစှၤကတၢၢ်ကထုးထီၣ်နီၣ်တယၢ်လၢဟံၣ်မဲာ်ညါအဂ့ၢ်န့ၣ် အ့ၣ်ယၣ်၀တံၣ်ကညီသးစၢ်ကရူၢ် (Ayeyarwaddy Karen Youth) ဆီၣ်တခူထီၣ်၀ဲဒၣ်န့ၣ်လီၤႉ ဘၣ်ဃးအ့ၣ်ယၣ်၀တံၣ်ကညီသးစၢ်ကရူၢ်မၤ၀ဲ(၂၇၆၃)၀ီတ၀ီ ကညီနံၣ်ထီၣ်သီမုၢ်နံၤတၢ်ဟူးတၢ်ဂဲၤအံၤန့ၣ် ကမံးတံာ်ဖိ စီၤဒူတီစံး၀ဲလၢ“ကညီနံၣ်ထီၣ်သီအံၤမ့ၢ်၀ဲမုၢ်နံၤဒိၣ်မုၢ်နံၤထီလီၤႉခိၣ်နၢ်တဖၣ်ဂုာ်ကျဲးစၢးဟံးဃာ်ပၢၤဃာ်ကျၢၤ၀ဲမုၢ်နံၤဒိၣ်မုၢ်နံၤထီအံၤလီၤႉဆၢကတီၢ်ခဲအံၤတၢ်အိၣ်သးမ့အိၣ်ဒ်လဲၣ်ဂ့ၤဒ်လဲၣ်ဂ့ၤဘၣ်ဆၣ်ဒ်သိးတၢ်ကယူးထီၣ်ကညီနီၢ်တယၢ်အံၤလၢထံထၣ်စွ့ကီၢ်ခီပူၤကသ့အဂီၢ်မီၤနီၤႉမုၢ်နံၤဒိၣ်နံၤထီ၀ဲအံၤပကမၤလၤကပီၤအီၤလၢလၢၦဲၤဒီးအလၤကပီၤမီၤနီၤႉအဂၤတခါခီန့ၣ်ဒ်သိးကသ့ၣ်ညါနၢ်ပၢၢ်က့ၤ၀ဲကညီနံၣ်ထီၣ်သီအရူၢ်အသဲးအတၢ်ဃံတၢ်လၤသ့ၣ်တဖၣ်မီၤနီၤႉလၢခံကတၢၢ်တခါခီန့ၣ်ကညီကလုာ်လၢဟီၣ်ခိၣ်ဒီဘ့ၣ်ကအိၣ်က့ၤလၢနီၣ်တယၢ်တဘ့ၣ်ဃီအဖီလာ်ၦဲၤဒီးတၢ်ဃူတၢ် ဖိးအဂီၢ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ အ့ၣ်ယၣ်၀တံၣ်ကီၢ်ခီ ကညီသးစၢ်တီခိၣ်ရိၣ်မဲမၤ၀ဲဒၣ်ကညီနံၣ်ထီၣ်သီတၢ်ဟူးတၢ်ဂဲၤအတၢ်ပညိၣ်န့ၣ် ဒ်သိးကညီဖိတဖၣ် ကသ့သ့ၣ်ပာ်လုၢ်ပာ်ၦ့ၤပာ်ကဲကညီဒီကလုာ်အနီၣ်တယၢ်ႇကဟံးဃာ်ပၢၤဃာ်စိာ်ကဖီထီၣ်လုၢ်လၢ်တၢ်ဆဲးတၢ်လၤအဂီၢ်ဒီးတချုးကညီနံၣ်ထီၣ်သီတုၤဒံးဘၣ်န့ၣ်ကညီဖိတဖၣ်ကထုးထီၣ်စိဃာ်နီၣ်တယၢ်ဒီးလၢတၢ်န့ၣ်အဃိဘၣ်တၢ်မၤ၀ဲနီၣ် တယၢ်တၢ်ဟူးတၢ်ဂဲၤအံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်ဟူးတၢ်ဂဲၤတၢ်ဆၢကတီၢ်ခီန့ၣ်တၢ်ပာ်ပနီၣ်၀ဲစးထီၣ်လါဒံၣ်စ့ဘၢၣ် ၂၆ သီ တုၤလၢလါယနူၤအါရံၤ ၉ သီဒီး တၢ်တိာ်ပာ်ပညိၣ်ဃာ်၀ဲလၢကနီၤလီၤနီၣ်တယၢ်ခဲလၢာ်(၂၇၆၄)ဘ့ၣ်ဒီးဘၣ်ဆၣ်ခဲအံၤဒိးန့ၢ်ဘၣ်နီၣ်တယၢ်အိၣ်ဒံး ထဲအဘ့ၣ်(၅၀၀)ဃၣ်ဃၣ်ဒံးလီၤအဂ့ၢ်န့ၣ် ကမံးတံာ်ဖိ စီၤဒူတီ စံးအါထီၣ်၀ဲန့ၣ်လီၤႉ အ၀ဲစံး၀ဲလၢ“ပ၀ဲထံထၣ်စွ့ကညီသးစၢ်တဖၣ်ခီန့ၣ်အိၣ်ဒီးတၢ်တိာ်ပာ်လၢပကဟ့ၣ်နီၤလီၤ၀ဲကညီဒီကလုာ်နီၣ်တယၢ် (၂၇၆၃)ဘ့ၣ်မီၤနီၤႉပကဟ့ၣ်လီၤဆူထံထၣ်စွ့ကီၢ်ခီႇကီၢ်ရ့ၣ်ကီၢ်ဆၣ်ဒူသ၀ီအပတီၢ်မီၤနီၤႉပပညိၣ်ဃာ်ဒ်န့ၣ်ဒုအိၣ်မီၤနီၤႉလီလီစဲၤခဲအံၤန့ၣ်ပန့ၢ်၀ဲဒၣ်နီၣ်တယၢ်ကအိၣ်ထဲအဘ့ၣ်(၅၀၀)ဒံးလီၤႉခဲအံၤတၢ်ဆၢကတီၢ်ခံနွံမးတအိၣ်တ့ၢ်လၢၤဘၣ်အဃိနီၣ်တယၢ်လၢအလိၣ်ဒံးသ့ၣ်တဖၣ်အံၤပကဘၣ်ဂုာ်ကျဲးစၢးဃုအါထီၣ်ဒံး”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ နီၣ်တယၢ်သ့ၣ်တဖၣ်အံၤတၢ်ရဲၣ်တၢ်ကျဲၤအိၣ်လၢတၢ်ကနီၤလီၤ၀ဲဒၣ်ဆူအ့ၣ်ယၣ်၀တံၣ်ကီၢ်ခီ ကီၢ်ဆၣ်(၂၆)ဘ့ၣ်အပူၤဒီး ဒ်န့ၣ်အသိးထံဖိကီၢ်ဖိကမျၢၢ်တဖၣ်ဆဲးကျိးအ့ၣ်ယၣ်၀တံၣ်ကညီသးစၢ်ကရူၢ်ဒီးဟ့ၣ်လီၤဆီၣ်ထွဲမၤစၢၤကညီနီၣ်တယၢ်သ့၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မီတီၤ၀့ၢ်ပူၤ သုးကီၣ်ကးမၤဃံးထီၣ်တၢ်စိ၁်ထီၣ်စိ၁်လီၤဂံၢ်ခီၣ်ထံးတၢ်အီၣ်တၢ်အီ
လါယနူၤအါရံၤ ၃ သီႇ ၂၀၂၄ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် တနီသရံၣ်ကီၢ်ဆၣ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မီတီၤ၀့ၢ်ပူၤန့ၣ် စးထီၣ်ဖဲတနံၣ်အံၤထီၣ်န့ၣ် သုးကီၣ်ကးမၤဃံးထီၣ်၀ဲတၢ်စိာ်ထီၣ်စိာ်လီၤဟုသးႇသိဂံၢ်ခီၣ်ထံးတၢ်အီၣ်တၢ်အီတဖၣ် အဂ့ၢ်န့ၣ် ၦၤနီပနံာ်သိလ့ၣ်ဖိတဖၣ် စံး၀ဲန့ၣ်လီၤႉ အပူၤကွံာ်လၢညါမီတီၤ၀့ၢ်ပူၤန့ၣ်တၢ်စိာ်ထီၣ်စိာ်လီၤသိႇဟုသးတၢ်အီၣ်တၢ်အီသ့ၣ်တဖၣ်အံၤန့ၢ်၀ဲဒၣ်ညီညီကဒၣ်လီၤဒီး ဘၣ်ဆၣ်စးထီၣ်ဖဲတနံၣ်အံၤလါယနူၤအါရံၤအံၤနမ့ကစိာ်ထီၣ်စိာ်လီၤဂံၢ်ခီၣ်ထံးတၢ်အီၣ်တၢ်အီတဖၣ်န့ၣ် နကဘၣ်လဲၤကွဲး၀ဲဒၣ်လံာ်အုၣ်သးလၢက၀ီၤဒ့သးၦၢ်အအိၣ်ဒီးသုးဂ့ၢ်၀ီဘံၣ်ဘၢကရူၢ်တဖၣ်အအိၣ်အဂ့ၢ်န့ၣ် ၦၤနီသိလ့ၣ်ဖိတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲမဟိန့ၣ်တလိၣ်လံာ်အုၣ်သးနီမံၤဘၣ်အဃိနတီၣ်ထီၣ်တီၣ်လီၤတၢ်အ့အ့ဆ့ဆ့လီၤႉခဲအံၤဘျီန့ၣ် လၢတနီသရံၣ်ကီၢ်ဆၣ်ပူၤစ့ၢ်ကီးတၢ်ဒုးကဲထီၣ်ဒံးအဃိသုးကီၣ်ကးအံၤမၤ၀ဲဒ်သိးတၢ်အီၣ်တၢ်အီသုတလဲၤတုၤလၢ (PDF)အအိၣ်တဂ့ၤဒ်န့ၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ဖဲနလဲၤကွဲးလံာ်အုၣ်သးအခါန့ၣ်နကဘၣ်ဟ့ၣ်လီၤနမံၤႇတၢ်ဂီၤ(မၣ်ပိၤတ့ၤ),အိၣ်ဆိးတၢ်လီၢ်ဒီးတၢ်ဖိတၢ်လံၤလၢ နကတီၣ်အီၤအနီၣ်ဂံၢ်နီၣ်ဒွးတဖၣ်လီၤတံၢ်လီၤဆဲးအဃိၦၤနီပနံာ်သိလ့ၣ်သ့ၣ်တဖၣ်အံၤထံၣ်ဘၣ်တၢ်ကီတၢ်ခဲဖဲအ၀ဲသ့ၣ်တီၣ်တၢ်ဖိတၢ်လံၤအခါအဂ့ၢ်န့ၣ် ၦၤနီပနံာ်သိလ့ၣ်ဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ သုးကီၣ်ကးမၤဃံးထီၣ်တၢ်စိာ်ထီၣ်စိာ်လီၤဂံၢ်ခီၣ်ထံးတၢ်အီၣ်တၢ်အီဒ်အံၤအဖီခိၣ် မ့ၢ်ဒ်သိးတၢ်အီၣ်တၢ်အီတဖၣ် သုတတုၤလၢတၢ်ဒီသဒၢကမျၢၢ်သုးကရူၢ်အအိၣ်လၢအဟူးဂဲၤဖဲမၠ့း၀့ၢ်-မီတီၤ၀့ၢ်ကျဲဒီတကျိၤအံၤသ့ၣ်တဖၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ဖဲအပူၤကွံာ်(၂၀၁၉)ခိး၀ံးကဲထီၣ်အခါန့ၣ်တၢ်စးထီၣ်ပံးကွံာ်၀ဲဒၣ်မီတီၤကီၢ်ဆၢ တၢ်ကူၣ်လဲၤမၤကၤတြဲၤအံၤဒီး လၢတၢ်န့ၣ်အဃိမီတီၤ၀့ၢ်ပူၤၦၤကမျၢၢ်တဖၣ်ဘၣ်လဲၤၦ့ၤအီၣ်က့ၤဟုသးဒီးဂံၢ်ခီၣ်ထံးတၢ်အီၣ်တၢ်အီသ့ၣ်တဖၣ်ဆူမၠ့း၀့ၢ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ
လၢတၢ်ကထုးထီၣ်ရၤလီၤကဒါက့ၤသူလ့ၤဖီ(သူၤလဲၤဖီၤ)လံ၁်မဲးကစံအံၤအဂီၢ်တၢ်ကွဲမု၁်ၦၤကွဲးလံ၁်ဖိတဖၣ်
လါယနူၤအါရံၤ ၃ သီႇ ၂၀၂၄ နံၣ်ႇ ခ့ၣ်အဲးစံၣ် အပူၤကွံာ်ခီဖျိခိ၀ံးတၢ်စူးတၢ်ဆါဒီးထံရူၢ်ကီၢ်သဲးတၢ်အိၣ်သးတဂၢၢ်တကျၢၤဘၣ်အဃိသူလ့ၤဖီ(သူၤလဲၤဖီၤ) မဲးကစံအံၤ ဘၣ်ဆိကတီၢ်ကွံာ်သးန့ၢ်၀ဲဒၣ်(၃)နံၣ်လံဒီးတကီၢ်ခါခဲအံၤလၢတၢ်ကက့ၤထုးထီၣ်ရၤလီၤကဒါအီၤအဂီၢ်န့ၣ် တၢ်မၤ၀ဲတၢ်အိၣ်ဖှိၣ်တၢၣ်ပီၣ်တဲသကိးတခါဒီးတၢ်ကွဲမုာ်၀ဲဒၣ်ၦၤကွဲးလံာ်ဖိသ့ၣ်တဖၣ်အဂ့ၢ်န့ၣ် မဲးကစံကကဲထီၣ်လိၣ်ထီၣ် အဂီၢ်ကမံးတံာ်ဖိတဖၣ်စံး၀ဲန့ၣ်လီၤႉ လၢအ့ၣ်ယၣ်၀တံၣ်ကီၢ်ခီ ကီၢ်ဆၣ်ကိးဘ့ၣ်ဒဲးအပူၤ ကညီလံာ်လဲၢ်တၢ်ဆဲးတၢ်လၤကမံးတံာ်ကရူၢ်ဒီး ကညီသးစၢ်တဖၣ် တီခိၣ်ရိၣ်မဲ၀ဲလၢကက့ၤထုးထီၣ်ရၤလီၤကဒါက့ၤသလ့ၤဖီ(သူၤလဲၤဖီၤ)မဲးကစံအံၤဒီးလၢတၢ်န့ၣ်အဃိ ဖဲအပူၤကွံာ်လါဒံၣ်စ့ဘၢၣ် ၃၀ သီအနံၤန့ၣ် ကမံးတံာ်ဘၣ်ထွဲတဖၣ်မၤ၀ဲတၢ်အိၣ်ဖှိၣ်တၢၣ်ပီၣ်တဲသကိးတခါ လၢကၠီကိကီၢ်ဆၣ်ပူၤ အဂ့ၢ်န့ၣ် ကမံးတံာ်ဖိ မါ၀့ထ့ စံး၀ဲန့ၣ်လီၤႉ အ၀ဲစံး၀ဲလၢ“လၢပကထုးထီၣ်ရၤလီၤက့ၤလံာ်အံၤအဂီၢ်န့ၣ်ပကွဲမုာ်၀ဲဒၣ်ၦၤကွဲးလံာ်ဖိကိးဂၤဒဲးလီၤႉ ကဘၣ်ဟ့ၣ်ထီၣ် တၢ်ကွဲးဆံးယံၤလဲၣ်န့ၣ်စးထီၣ်ဖဲကညီဒီကလုာ်မုၢ်နံၤန့ၣ်စးထီၣ်ဟ့ၣ်သ့၀ဲလံဒီးလၢကဟဲ(၂၀၂၄)လါယူၤန့ၣ်ပကပံး ကွံာ်အီၤလီၤႉၦၤကွဲးလံာ်ဖိတဖၣ်ဟ့ၣ်ထီၣ်တၢ်ကွဲးလၢၦိၢ်ကျိာ်ႇစှီၤကျိာ်သ့၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ် န့ၣ်လီၤႉ ဒ်သိးတၢ်ရၤလီၤလံာ်မဲးကစံအံၤကကဲထီၣ်လိၣ်ထီၣ်ဖးထီၣ်အဂီၢ်န့ၣ်ဖဲလါဒံၣ်စ့ဘၢၣ် ၃၀ သီ တၢ်အိၣ်ဖှိၣ်အပူၤန့ၣ် ကီၢ်ဆၣ်အဘ့ၣ်(၁၀)ဟ့ၣ်ထီၣ်အ၀ဲသ့ၣ်တၢ်ပာ်သးလံဒီးလၢကဟဲစှၤသီအတီၢ်ပူၤအံၤစ့ၢ်ကီးတၢ်ကထံၣ်လိာ်ကဒါသးကဒီးအဂ့ၢ်န့ၣ် မါ၀့ထ့ စံးအါထီၣ်၀ဲန့ၣ်လီၤႉ အပူၤကွံာ်လၢညါန့ၣ်သူလ့ၤဖီ(သူၤလဲၤဖီၤ)လံာ်မဲးကစံအံၤတၢ်ထုးထီၣ်ရၤလီၤအီၤလၢၦိၢ်မုၢ်နုာ်အကျိာ်ဒီးဘၣ်ဆၣ်တၢ်ကက့ၤ ထုးထီၣ်ရၤလီၤကဒါအီၤခဲအံၤန့ၣ်တၢ်ကထၢနုာ်လီၤပၣ်ဃုာ်၀ဲပှိၢ်ကျိ၁်,စှီၤကျိ၁် ဒီး ပယီၤကျိ၁်အဂ့ၢ်န့ၣ် တၢ်အိၣ်ဖှိၣ်တၢ်ဆၢတဲာ်ပူၤအသိး သ့ၣ်ညါဘၣ်န့ၣ်လီၤႉ သူလ့ၤဖီ(သူၤလဲၤဖီၤ)လံာ်မဲးကစံအံၤတၢ်စးထီၣ်ထုးထီၣ်ရၤလီၤအီၤဖဲ(၂၀၁၂)နံၣ်အခါဒီးမ့ၢ်၀ဲဒၣ် ပါတနီၤႇအံၤမဲႇကၠီကိ ဒီး ကၠိၤပၠီၤ ကီၢ်ဆၣ်(၄)ဘ့ၣ် ကညီလံာ်လဲၢ်တၢ်ဆဲးတၢ်လၤကရူၢ်တဖၣ်ထုးထီၣ်ရၤလီၤ၀ဲန့ၣ်လီၤႉ ဒ်န့ၣ်အသိးတၢ်ထုးထီၣ် ရၤလီၤအီၤ၀ဲ လံာ်မဲးကစံႇလံာ်တၢ်ကစီၣ်ခံကလုာ်ဒီးတၢ်ထုးထီၣ်တ့ၢ်၀ဲလံာ်မဲးကစံကတြူၢ် (၄)ဘ့ၣ်ဒီးလံာ်တၢ်ကစီၣ် ကတြူၢ်(၄)ဘ့ၣ် န့ၣ်လီၤႉ ဖဲန့ၣ်၀ံၤလီၢ်ခံစးထီၣ်ဖဲခိ၀ံးတၢ်ဆါရၤလီၤသး(၂၀၂၀)န့ၣ်တၢ်ဆိကတီၢ်ကွံာ်၀ဲတၢ်ထုးထီၣ်ရၤလီၤလံာ်မဲးကစံအံၤဒီး တကီၢ်ခါခဲအံၤတၢ်ဂုာ်ကျဲးစၢး၀ဲလၢကထုးထီၣ်ရၤလီၤက့ၤမဲးကစံအံၤဒီးကီၢ်ဆၣ်ကညီလံာ်လဲၢ်တၢ်ဆဲးတၢ်လၤ ကရူၢ်ကရၢ နုာ်လီၤပၣ်ဃုာ်ပၣ်ဂီၢ်အါန့ၢ်အပူၤကွံာ်ဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကီးတရံးကမျၢၢ်ၦၤဃ့ၢ်မှံဟးဖျိးရၤလီၤသးသကုၤဆးဒးဒီးတၢ်ကီတၢ်ခဲအိၣ်ထီၣ်လၢကအီၣ်ကအီအဂီၢ်
လါယနူၤအါရံၤ ၂ သီႇ ၂၀၂၄ နံၣ်ႇ ခ့ၣ်အဲးစံၣ် ကီးတရံးကီၢ်ဆၣ်အပူၤခီဖျိတၢ်ဒုးတၢ်ယၤကဲထီၣ်အဃိ၀့ၢ်ပူၤက၀ီၤဒ့ဒီးသ၀ီအဖျၢၣ်(၃၀)ဃၣ်ဃၣ် ကမျၢၢ်တဖၣ် စံၣ်ထီၣ်ဟးအိၣ်ရၤလီၤသးလၢတၢ်လီၢ်သကုၤဆးဒးဒီးၦၤသ့ၣ်တဖၣ်အံၤတၢ်ကီတၢ်ခဲအိၣ်ထီၣ်လၢကအီၣ်ကအီအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ ကီၢ်တရံးကီၢ်ဆၣ်ပူၤပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သိၣ်မှံၤသုးပာ်ဖှိၣ်အဘၢၣ်စၢၤတၢ်ဒုးကဲထီၣ်ကအိၣ်လၢတလါဃၣ်ဃၣ်လံဒီးလၢတၢ်န့ၣ်အဃိၦၤကမျၢၢ်လၢအဃ့ၢ်ထီၣ်သ့ၣ်တဖၣ်အံၤလၢခ့ၣ်အဲၣ်ယူၣ်-ကညီဒီကလုာ် စၢဖှိၣ်ကရၢတၢ်ရဲၣ်တၢ်ကျဲၤအံၤတဆီတၢ်လဲၤဆီၣ်ထွဲမၤစၢၤ၀ဲတၢ်အီၣ်တၢ်အီအိၣ်ဘၣ်ဆၣ်မ့မ့ၢ်ၦၤကမျၢၢ်လၢအလဲၤစံၣ်အိၣ်လၢလီတဲကျိၤတန့ၢ်ဘၣ်တဖၣ်အံၤညါန့ၣ်ခီဖျိတၢ်ဆဲးကျိးအ၀ဲသ့ၣ်တန့ၢ်ဘၣ်အဃိတၢ်ကီတၢ်ခဲအိၣ်ထီၣ်လၢကအီၣ်ကအီ အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ် စံး၀ဲန့ၣ်လီၤႉ ကီးတရံးကမျၢၢ်ၦၤဃ့ၢ်တၢ်ဒုးတဂၤစံး၀ဲလၢ“ၦၤကမျၢၢ်လၢအဃ့ၢ်တဖၣ်န့ၣ်ဟးစံၣ်အိၣ်လၢတၢ်လီၢ်သကုၤဆးဒးလီၤႉ မ့မ့ၢ်လၢတန့ခၠါတကပၤခီန့ၣ်ခီဖျိ(ခ့ၣ်အဲၣ်ယူၣ်)လဲၤမၤစၢၤ၀ဲအဃိအ၀ဲသ့ၣ်ဒိးန့ၢ်ဘၣ်တၢ်အီၣ်တၢ်အီဒံးမီၤနီၤႉကမျၢၢ်ၦၤဃ့ၢ်တၢ်ဒုးလၢအိၣ်ကြုၢ်တုတကပၤခီန့ၣ်တနီၤန့ၣ်တဒိးန့ၢ်ဘၣ်၀ဲဘၣ်ႉခီဖျိလီတဲစိကျိၤဟးဂီၤအဃိပဆဲးကျိးအ၀ဲသ့ၣ်တန့ၢ်ဘၣ်ႉကမျၢၢ်ၦၤဃ့ၢ်တၢ်ဒုးဖိလၢအိၣ်ကါမရဲၣ်ႇကါနံၤတကပၤတဖၣ်ခီန့ၣ်တၢ်ကီတၢ်ခဲအိၣ်လီၤႉမ့မ့ၢ်လၢဖၣ်အၣ်ႇသၤမညၣ် တကပၤခီဒုခီဖျိဖၣ်အၣ်(နာရေးကူညီမှုအသင်း)ကရူၢ်လဲၤနီၤလီၤ၀ဲဒၣ်တၢ်အီၣ်တၢ်အီအဃိအ၀ဲသ့ၣ်ဒိးန့ၢ်ဘၣ်၀ဲလီၤႉ သ၀ီလၢအိၣ်ကီးတရံးကလံၤစိးဒီးကလံၤထံးဘၢၣ်စၢၤတဖၣ်န့ၣ်သ၀ီဒီတဖျၢၣ်အပူၤန့ၣ်ၦၤဃ့ၢ်မှံဟးဖျိး ကအိၣ်လၢအဂၤ သၢကယၤႇယဲၢ်ကယၤညါႉဆဲးကျိးတန့ၢ်ဘၣ်လ့ၢ်ထီၣ်လ့ၢ်လိၤစ့ၢ်ကီးတသ့ဘၣ်အဃိတၢ်ကီတၢ်ခဲအိၣ်လၢကအီၣ်ကအီအဂီၢ်”အဂ့ၢ်န့ၣ် စံး၀ဲန့ၣ်လီၤႉ တကီၢ်ခါခဲအံၤလၢကီးတရံးကမျၢၢ်ၦၤဃ့ၢ်တၢ်ဒုးဖိတဖၣ်အံၤအဂီၢ်န့ၣ် ကီၢ်ပူၤကညီၦၤလီၢ်အိၣ်ကမှံကမံးတံာ် (CIDKP),ကညီပိာ်မုၣ်ကရၢ(KWO),ကညီသးစၢ်ကရၢ(KYO)တီခိၣ်ရိၣ်မဲဆဲးကျိး၀ဲဒၣ်ၦၤမၤဘူၣ်လီၤတၢ်ကစၢ်ႇ ကရူၢ်လၢအဆီၣ်ထွဲမၤစၢၤၦၤဃ့ၢ်မှံဟးဖျိးလၢအိၣ်ကီၢ်ပူၤကီၢ်ချၢတဖၣ်ဒီး လဲၤနီၤလီၤဟ့ၣ်၀ဲဒၣ်တၢ်အီၣ်တၢ်အီအဂ့ၢ်န့ၣ် သ့ၣ်ညါဘၣ်န့ၣ်လီၤႉ ကီးတရံးကီၢ်ဆၣ်ပူၤခီဖျိတၢ်ဒုးကဲထီၣ်အဃိ၀့ၢ်ပူၤက၀ီၤဒ့ဒီးသ၀ီအဖျၢၣ်(၃၀)ဃၣ်ဃၣ်ၦၤကမျၢၢ်အဂၤ(၅၀၀၀၀) ဃၣ်ဃၣ်ဘၣ်ဃ့ၢ်ထီၣ်၀ဲဒၣ်ဒီးခီဖျိဟံၣ်ဖိဃီဖိဒူၣ်ဖိထၢဖိလၢအဃ့ၢ်ထီၣ်သ့ၣ်တဖၣ်အံၤဟးစံၣ်အိၣ်တမ့ၢ်တၢ်လီၢ် တပူၤဃီဘၣ်အဃိကဆဲးကျိးဘၣ်ကရူၢ်လၢအဆီၣ်ထွဲမၤစၢမနီၤလီၤတၢ်အီၣ်တၢ်အီတဖၣ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ ကမျၢၢ်လၢအလဲၤဃ့ၢ်အိၣ်လၢဖၣ်အၣ်တကပၤစံး၀ဲလၢ“ခဲအံၤၦၤကမျၢၢ်ဟးစံၣ်အိၣ်တၢ်လီၢ်တဘျုးတီၤညါႉအလဲၤစံၣ်အိၣ်လၢမီၣ်လမၠဲၣ်ႇဖၣ်အၣ်ႇသၤမညၣ်ႇတန့ခၠါႇအ့ၤဒူၣ်ႇထိၣ်ကီၤကိတကပၤန့ၣ်အိၣ်ႉတနီၤန့ၣ်လဲၤအိၣ်၀ဲဒၣ်လၢအဘူးအတံၢ်အသမူသကိးအဟံၣ်ႇတနီၤန့ၣ်လဲၤအိၣ်၀ဲလၢသီခါဖၠၣ်ႇတနီၤန့ၣ်ငါအိၣ်၀ဲဒၣ်ဟံၣ်ငါအိၣ်၀ဲဒၣ်ကရၢၢ်ႇတနီၤခီန့ၣ်အိၣ်၀ဲဒၣ်လၢကျဲကပၤရီဘၢၣ်ကျီးပူၤမီၤနီၤႉတၢ်ကီဒိၣ်မးလၢက့ၤနုာ်လီၤလၢ၀့ၢ်ပူၤသ၀ီပူၤတန့ၢ်ဘၣ်”အဂ့ၢ်န့ၣ် စံး၀ဲန့ၣ်လီၤႉ တကီၢ်ခါခဲအံၤလၢကီးတရံး၀့ၢ်ခိၣ်၀့ၢ်ဃၢၤန့ၣ်ဒုးယၤတၢ်ဖ့ၣ်စၢကဲထီၣ်ဒံး၀ဲလၢပယီၤသုးဒီး(KNLA)သိၣ်မှံၤသုးပာ်ဖှိၣ် (PDF)တဖၣ်အံၤအဘၢၣ်စၢၤဒံးဒီးဒ်န့ၣ်အသိးလၢတီၤကၠၤအ့ႇခွံတၢၣ်(ကိတဲၤ),ယ့ၤပူၤႇကြုၢ်တုတကပၤန့ၣ်စ့ၢ်ကီး တၢ်ဒုးစဲးပြဲးကဲထီၣ်ဒံး၀ဲလၢခံခီခံကပၤအဘၢၣ်စၢၤအဂ့ၢ်န့ၣ် ဟီၣ်က၀ီၤၦၤဂ့ၢ်တၢ်ကစီၣ်ဖိတဖၣ်စံး၀ဲန့ၣ်လီၤႉ
သုးဟံးန့ၢ်တၢ်စိတၢ်ကမီၤအတီၢ်ပူၤဟီၣ်လ၁်မ့ၣ်ပိၢ်အဃိၦၤသံၦၤဘၣ်ဒိဘၣ်ထံး(၁၃၀၀)ဘျဲၣ်
လါယနူၤအါရံၤ ၂ သီႇ ၂၀၂၄ နံၣ်ႇ ခ့ၣ်အဲးစံၣ် ကီၢ်ပယီၤအပူၤသုးဟံးန့ၢ်ထံကီၢ်တၢ်စိတၢ်ကမီၤအတီၢ်ပူၤခီဖျိဟီၣ်လာ်မ့ၣ်ပိၢ်ဒီးသုးတၢ်စုက၀ဲၤလၢအပိၢ်ဖးထီၣ်သ့ သ့ၣ်တဖၣ်အံၤအဃိၦၤသံၦၤဘၣ်ဒိဘၣ်ထံးအနီၣ်ဂံၢ်ခဲလၢာ်အိၣ်၀ဲအဂၤ(၁၃၀၀)ဘျဲၣ်အဂ့ၢ်န့ၣ် ၂၀၂၃ ဒံၣ်စ့ဘၢၣ်အဂီၢ် တၢ်အိၣ်ခိးဃုသ့ၣ်ညါတၢ်ကရူၢ်(Landmine & Cluster Munition Monitor)အတၢ်အိၣ်ခိးဃုသ့ၣ်ညါကီၢ်ပယီၤဘၣ်ထွဲ လံာ်တၢ်ပာ်ဖျါပူၤအသိး သ့ၣ်ညါဘၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤစးထီၣ်(၂၀၂၁)န့ၣ်လၢကီၢ်ပယီၤအပူၤခီဖျိဟီၣ်လာ်မ့ၣ်ပိၢ်ဒီးတၢ်ဖိတၢ်လံၤလၢအအိၣ်တ့ၢ် ပိၢ်ဖးထီၣ်သ့သ့ၣ်တဖၣ်အံၤအဃိ (၂၀၂၁)အတီၢ်ပူၤန့ၣ်ၦၤသံ၀ဲဒၣ်(၁၀၈)ဂၤဒီးဘၣ်ဒိ၀ဲဒၣ်(၂၅၇)ဂၤန့ၣ်လီၤႉ လၢန့ၣ်အမဲာ်ညါခီဖျိဟီၣ်လာ်မ့ၣ်ပိၢ်ဒီးတၢ်ဖိတၢ်လံၤလၢအအိၣ်တ့ၢ်ပိၢ်ဖးထီၣ်သ့သ့ၣ်တဖၣ်အံၤအဃိ(၂၀၂၂)အတီၢ်ပူၤၦၤသံ၀ဲဒၣ်(၃၈၄)ဂၤႇဘၣ်ဒိဘၣ်ထံး၀ဲဒၣ်(၁၆၁)ဂၤန့ၣ်လီၤႉဒ်န့ၣ်အသိးဒ်(UNICEF)ကီၢ်ပယီၤထုးထီၣ်ပာ်ဖျါစရီအသိးန့ၣ် (၂၀၂၃)တုၤလၢလါအ့ဖြ့ၣ်န့ၣ်ၦၤသံ၀ဲဒၣ်(၃၈၈)ဂၤဒီးကိးမုၢ်နံၣ်ဒဲးၦၤသံလၢဟီၣ်လာ်မ့ၣ်ပိၢ်အံၤအဃိဟဲအါထီၣ်၀ဲဒၣ် အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲတၢ်ဂ့ၢ်တၢ်ကျိၤလီၤတံၢ်လီၤဆဲးန့ၣ်လီၤႉ တၢ်ဂ့ၢ်တၢ်ကျိၤလၢအိၣ်ဖျါလံာ်တၢ်ပာ်ဖျါပူၤသ့ၣ်တဖၣ်အံၤမ့ဘၣ်ထိၣ်သတြီၤအီၤဒီးတၢ်အိၣ်သးလၢအကဲထီၣ်လၢ ပျီပူၤခဲအံၤသ့ၣ်တဖၣ်န့ၣ်ၦၤသံၦၤဘၣ်ဒိဘၣ်ထံးနီၣ်ဂ့ၢ်စှၤ၀ဲဒၣ်သ့၀ဲဒီးခီဖျိကရူၢ်လၢအထီဒါကီၢ်ပယီၤသုးတဖၣ်အံၤ အတၢ်သူဟီၣ်လာ်မ့ၣ်ပိၢ်အဃိဘၣ်ဃးၦၤသံၦၤဘၣ်ဒိဘၣ်ထံးႇလၢတၢ်ဒုးပူၤတၢ်သူ၀ဲအဃိၦၤသံဘၣ်ဒိဘၣ်ထံးအံၤ တၢ်နီၤဖးလီၤ၀ဲအသနၢၣ်လွံၢ်ခါအဂ့ၢ်န့ၣ် ဖဲကရူၢ်မၤတၢ်မၤဆှဲလဲလီၤတၢ်ကစီၣ်တၢ်ရဲၣ်တၢ်ကျဲၤအပူၤ ကရူၢ်ၦၤဘၣ်မူဘၣ်ဒါတဂၤ စံး၀ဲန့ၣ်လီၤႉ အ၀ဲစံး၀ဲလၢ“တၢ်ဂ့ၢ်တၢ်ကျိၤသ့ၣ်တဖၣ်အံၤပမ့ထိၣ်သတြီၤအီၤဒီးပျီပူၤတၢ်ကဲထီၣ်သးခဲအံၤန့ၣ်အနီၣ်ဂံၢ်ကစှၤ၀ဲ ဒီဒူၣ်ညါႉ လၢပလံာ်တၢ်ပာ်ဖျါအပူၤန့ၣ်ပနီၤဖးလီၤအီၤအသနၢၣ်လွံၢ်ခါမီၤနီၤႉတၢ်သ့ၣ်တဖၣ်န့ၣ်မ့ၢ်၀ဲတၢ်ဖိတၢ်လံၤလၢသုးကီၣ်ကးသူ၀ဲဒီးကရူၢ်လၢအထီဒါသုးကီၣ်ကးသူ၀ဲတဖၣ်ႇကရူၢ်လၢအထီဒါသုးကီၣ်ကးသူ၀ဲလၢတၢ်ဒုးပူၤတဖၣ်ဒီးမ့ၢ်မတၤသူ၀ဲဒၣ်လဲၣ်သ့ၣ်တဖၣ်လီၤႉၦၤကမျၢၢ်ဒုတဲ၀ဲအိၣ်မီၤနီၤလၢပယီၤသုးသူ၀ဲဒၣ်န့ၣ်ႉမ့မ့ၢ်ကရူၢ်လၢအထီဒါသုးကီၣ်ကးတဖၣ်ခီဒုဒုးသ့ၣ်ညါပာ်ဖျါ၀ဲထီၣ်၀ဲလၢအ၀ဲသ့ၣ်သူ၀ဲဟီၣ်လာ်မ့ၣ်ပိၢ်အံၤန့ၣ်အိၣ်၀ဲဘၣ်ဆၣ်ပထံၣ်ဘၣ်လၢတၢ်ဘၣ်ဒိဘၣ်ထံးဒုအိၣ်ဒံးအဖၢမုၢ်လီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါ(၂၀၂၂)အတီၢ်ပူၤခီဖျိဟီၣ်လာ်မ့ၣ်ပိၢ်အံၤအဃိၦၤသံဘၣ်ဒိဘၣ်ထံးတဖၣ်အကျါပၣ်ဃုာ်၀ဲၦၤကမျၢၢ် (၄၁၀)ဂၤႇၦၤသုးဖိ(၁၃၅)ဂၤဒီးဒ်န့ၣ်အသိးၦၤကမျၢၢ်သံဘၣ်ဒိဘၣ်ထံးတၢ်ဂ့ၢ်ကဲထီၣ်အါကတၢၢ််အခိၣ်သ့ၣ်ခီန့ၣ် ခီဖျိအ၀ဲသ့ၣ်လ့ၢ်ထီၣ်လ့ၢ်လိၤလၢဟီၣ်လာ်မ့ၣ်ပိၢ်အိၣ်အလီၢ်ဒီးဟးဃုအီၣ်ဃုအီတၢ်လၢဟီၣ်လာ်မ့ၣ်ပိၢ်အိၣ်အလီၢ်သ့ၣ်တဖၣ်အဃိလီၤအဂ့ၢ်န့ၣ် ပာ်ဖျါ၀ဲန့ၣ်လီၤႉ ခီဖျိသုးကီၣ်ကးအသုးကျိၤနုာ်လီၤအိၣ်ဆီလီၤသးလၢဒူသ၀ီပူၤ၀ံၤဖဲအ၀ဲသ့ၣ်ဟးထီၣ်အခါဒိးလီၤဃာ်၀ဲဟီၣ်လာ် မ့ၣ်ပိၣ်လၢလီၢ်ခံအဃိၦၤသံၦၤဘၣ်ဒိဘၣ်ထံးတဖၣ်အကျါပၣ်ဃုာ်၀ဲၦၤကမျၢၢ်လၢအိၣ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤအပူၤတဖၣ်စ့ၢ်ကီးအဂ့ၢ်န့ၣ် လံာ်တၢ်ပာ်ဖျါပူၤဒီးၦၤကမျၢၢ်စံး၀ဲအသိး သ့ၣ်ညါဘၣ်န့ၣ်လီၤႉ ဘၣ်ဃးတၢ်ဂ့ၢ်အိၣ်ဖျါလၢတၢ်ဖီခိၣ်သ့ၣ်တဖၣ်အံၤန့ၣ်တၢ်အိၣ်ခိးကွၢ်ဟုၣ်ကွၢ်ဆူၣ်ဟီၣ်လာ်မ့ၣ်ပိၢ်ကရူၢ် ၦၤဘၣ်မူဘၣ်ဒါ တဂၤစံး၀ဲလၢ“ဘၣ်မနုၤအဃိအ၀ဲသ့ၣ်ဘၣ်ဒိးလီၤဃာ်၀ဲဟီၣ်လာ်မ့ၣ်ပိၢ်သ့ၣ်တဖၣ်အံၤလဲၣ်မီၤနီၤႉမ့ၢ်အ၀ဲသ့ၣ်န့ၣ်ခီဖျိ တၢ်ဒုးကဲထီၣ်အဃိဘၣ်ယိၣ်၀ဲလၢကရူၢ်လၢအဂၤကဟဲဒီးဒိးလီၤဃာ်၀ဲဒ်န့ၣ်ဧါန့ၣ်ပဃုသ့ၣ်ညါလီၤတံၢ်တန့ၢ်ဒံးဘၣ်ႉညီနုၢ်န့ၣ်တၢ်လီၢ်လၢဖီၣ်စုက၀ဲၤတၢ်သဘံၣ်သဘုၣ်ကဲထီၣ်အလီၢ်န့ၣ်တၢ်သူ၀ဲဒၣ်ဟီၣ်လာ်မ့ၣ်ပိၢ်လီၤႉတၢ်ဒုးကဲထီၣ်မ့၀ံၤလံန့ၣ်ဖဲၦၤကမျၢၢ်ဟဲက့ၤကဒါလၢဟံၣ်အခါပထံၣ်ဘၣ်လၢမ့ၣ်ပိၢ်ပိၢ်ဖးထီၣ်မီၤနီၤႉတၢ်သ့ၣ်တဖၣ်အံၤကရ့ၣ်နံၣ်ကီၢ်စဲၣ် န့ၣ်ကဲထီၣ်သးအါန့ၣ်ကညီကီၢ်စဲၣ်ဒံးႉခါဆူညါစ့ၢ်ကီးပဘၣ်ယိၣ်လၢတၢ်ကကဲထီၣ်သးဒ်အံၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်အ၀ဲသ့ၣ်လံာ်တၢ်ပာ်ဖျါအသိးန့ၣ်စးထီၣ်(၂၀၀၀)တုၤလၢ(၂၀၂၂)လါဒံၣ်စ့ဘၢၣ်န့ၣ် ခီဖိဟီၣ်လာ်မ့ၣ်ပိၢ်ဒီး သုးတၢ်စုက၀ဲၤလၢအပိၢ်ဖးထီၣ်သ့သ့ၣ်တဖၣ်အံၤအဃိကီၢ်ပယီၤအပူၤ ၦၤသံၦၤဘၣ်ဒိဘၣ်ထံးအိၣ်၀ဲဒၣ်ခဲလၢာ် (၆၁၇၄)ဂၤလံအဂ့ၢ်န့ၣ် လံာ်တၢ်ပာ်ဖျါပူၤအသိးသ့ၣ်ညါဘၣ်န့ၣ်လီၤႉ
ကၠဲးထိၣ်ကီၢ်ဆၣ်ပူၤၦၤဟဲၦ့ၤတယီလီၤစှၤအဃိအမၠးတအိၣ်တ့ၢ်လၢၦၤသူၣ်တယီဖိတဖၣ်အဂီၢ်လၢၤဘၣ်
လါဒံၣ်စ့ဘၢၣ် ၂၉ သီႇ ၂၀၂၃ နံၣ်ႇ ခ့ၣ်အဲးစံၣ် လၢတလၢၤကီၢ်စဲၣ် ကၠဲးထိၣ်ကီၢ်ဆၣ်အပူၤ တနံၣ်အံၤခီဖျိၦၤဟဲၦ့ၤတယီတအိၣ်အါအါလၢာ်ဘၣ်လီၤစှၤအဃိ ၦၤလၢအသူၣ်အီၣ်ဖျးအီၣ်တယီလၢမုၢ်ကျိၤ၀ဲၤကွာ်တဖၣ်အံၤတအီၣ်ဘၣ်အမၠးႇအမၠးတအိၣ်တ့ၢ်လၢအ၀ဲသ့ၣ်အဂီၢ် လၢၤဘၣ်အဂ့ၢ်န့ၣ် သ့ၣ်ညါဘၣ်လၢၦၤသူၣ်တယီဖိတဖၣ်အအိၣ်န့ၣ်လီၤႉ ဖဲအပူၤကွံာ်မဟိတနံၣ်အခါန့ၣ်ၦၤဟဲၦ့ၤတယီအိၣ်ဒၣ်၀ဲအါမးဒီးၦၤအီၣ်ဘၣ်၀ဲဒၣ်အမၠးအါမးအဃိ တနံၣ်အံၤ ၦၤသူၣ်ၦၤဖျးတယီအိၣ်၀ဲဒၣ်အါမးန့ၣ်လီၤႉဘၣ်ဆၣ်တနံၣ်အံၤမ့ၢ်လၢတယီဖိဒီးၦၤမၤတၢ်ဖိအဘူးအလဲလၢာ်အါႇ ၦၤဟဲၦ့ၤတယီစ့ၢ်ကီးလီၤစှၤထီၣ်အဃိတအီၣ်ဘၣ်အမၠးလၢၤဘၣ်အဂ့ၢ်န့ၣ် လီၢ်က၀ီၤပိာ်မုၣ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ အ၀ဲစံး၀ဲလၢ“ဖဲမဟိန့ၣ်ၦၤဟဲၦ့ၤတယီအိၣ်ဒီဒူၣ်ညါႉခဲအံၤအၦ့ၤအိၣ်ဒ်သိးမဟိတနံၣ်လီၤဘၣ်ဆၣ် တၢ်လၢၤဘူၣ်လၢၤစ့ လၢၤအါကဒါက့ၤလၢတယီဖိမီၤနီၤႉၦၤမၤတၢ်ဖိအဘူးအလဲနါက့လၢညါန့ၣ်(၇၀၀၀)ခဲအံၤ ပဘၣ်ဟ့ၣ်လၢ(၈၀၀၀)လံႉ အဘူးအလဲထီၣ်၀ဲတစဲးန့ၣ်ႉဖဲမဟိကၢာ်န့ၣ်အမၠးအိၣ်အဃိတနံၣ်အံၤၦၤသူၣ်တယီအါထီၣ်မီၤနီၤႉၦၤဟဲၦ့ၤတၢ်ဖိနါက့လီၤစှၤအဃိကဲထီၣ်အသးဒ်အံၤလီၤ”အဂ့ၢ်န့ၣ် စံး၀ဲန့ၣ်လီၤႉ တယီအံၤတၢ်ၦ့ၤအီၤလၢအသံသိဒီးအဃ့ခံကလုာ်အံၤန့ၣ်လီၤႉမ့မ့ၢ်တယီအသံသိတပီၢ်န့ၣ်အၦ့ၤအိၣ်ထဲ(၅၀၀)ကၠး လီၤဒီးဘၣ်ဆၣ်မ့မ့ၢ်လၢတယီဃ့ခီန့ၣ်အၦ့ၤဂ့ၤအမဲာ်ညါဘၣ်ဟ့ၣ်စ့ၢ်ကီးတၢ်ဆၢကတီၢ်အါ၀ဲအဂ့ၢ်န့ၣ် လီၢ်က၀ီၤကမျၢၢ်ပိာ်မုၣ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ ခီဖျိတၢ်အိၣ်သးအံၤအဃိအ၀ဲသ့ၣ်တကိးငါ၀ဲဒၣ်ၦၤမၤတၢ်ဖိလၢၤဘၣ်မၤက့ၤလၢအ၀ဲသ့ၣ်သ့ၣ်နီၢ်ကစၢ်လီၤအဃိ က့ၤန့ၢ်ကဒါက့ၤအယ့(အရင်း)ဘၣ်ဆၣ်မ့မ့ၢ်ၦၤလၢအတယီတံၢ်ဟးထီၣ်တအါဘၣ်ညါတနီၤန့ၣ်ဆှူ၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ၦၤသူၣ်တယီလၢအဂၤတဂၤစ့ၢ်ကီးစံး၀ဲလၢ“မ့မ့ၢ်၀ဲဒၣ်န့ၣ်ယတကိးငါၦၤမၤတၢ်ဖိဘၣ်ႉပမၤလၢပကစၢ်အဃိန့ၢ်က့ၤ အယ့ဒံးမီၤနီၤႉၦၤတနီၤအဆှူခီန့ၣ်မ့ၢ်လၢအ၀ဲသ့ၣ်ဘၣ်ဟ့ၣ်ၦၤမၤတၢ်ဖိအဘူးအလဲဒ်န့ၣ်ဒုကပၣ်လီၤႉနမ့က့ၤကွၢ်ကဒါလၢၦၤတူၢ်ငါတၢ်ဖိတဖၣ်အဂီၢ်ခီန့ၣ်တဲ၀ဲလၢမးတန့ၢ်က့ၤထီးညၣ်တပီၢ်ၦ့ၤလၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ လၢတလၢၤကီၢ်စဲၣ်အပူၤအပူၤကွံာ်မဟိတနံၣ်န့ၣ်တယီသံသိတပီၢ်န့ၣ်အၦ့ၤအိၣ်၀ဲ(၅၀၀)ဒီးမ့မ့ၢ်တယီအဃ့တပီၢ်ခီ န့ၣ် အၦ့ၤအိၣ်၀ဲ(၇၀၀၀)ကၠးအၦ့ၤအိၣ်ဒ်သိးမဟိလီၤဘၣ်ဆၣ်တနံၣ်အံၤအမၠးတအိၣ်တ့ၢ်လၢၦၤသူၣ်တယီဖိတဖၣ် အဂီၢ်လၢၤဘၣ်ဆှူ၀ဲဒၣ်န့ၣ်လီၤႉ ကီၢ်ပယီၤပူၤကိးမုၢ်နံၣ်ဒံးကယဲၢ်မ့ၢ်တၢ်အီၣ်တၢ်အီလၢတၢ်ဆှၢထီၣ်ဆါအီၤဆူတရူးကီၢ်ႇယပၣ်ကီၢ်ႇ ကလံၤထံးခိရံယါထံကီၢ် ဃုာ်ဒီးထံကီၢ်လၢအဂၤသ့ၣ်တဖၣ်န့ၣ်အကျါတယီအံၤပၣ်ဃုာ်စ့ၢ်ကီး၀ဲဒၣ်တခါအဂ့ၢ်န့ၣ် ကီၢ်ပယီၤ ထံဂုၤကီၢ်ဂၤပနံာ်တၢ်ကူၣ်လဲၤမၤကၤစရီအသိး သ့ၣ်ညါဘၣ်န့ၣ်လီၤႉ
တၢ်လဲၤမၤစၢၤကီးတရံးကီၢ်ဆၣ်ကမျၢၢ်ၦၤဃ့ၢ်တၢ်ဒုးတဖၣ်လၢဂ့ၢ်ဂီၢ်အူတၢ်အီၣ်တၢ်အီၣ်
လါဒံၣ်စ့ဘၢၣ် ၂၉ သီႇ ၂၀၂၃ နံၣ်ႇ ခ့ၣ်အဲးစံၣ် ကမျၢၢ်ၦၤဃ့ၢ်မှံဟးဖျိးလၢအိၣ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ်အပူၤ တဖၣ် ဖဲလါဒံၣ်စ့ဘၢၣ် ၂၆ သီဒီး ၂၇ သီအနံၤန့ၣ် တၢ်လဲၤဟ့ၣ်ဆီၣ်ထွဲမၤစၢၤ၀ဲဂ့ၢ်ဂီၢ်အူတၢ်အီၣ်တၢ်အီအဂ့ၢ်န့ၣ် ကီၢ်ဆၣ်ခိၣ်နၢ်တဖၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဂ့ၢ်ဂီၢ်အူတၢ်ဆီၣ်ထွဲမၤစၢၤဘျီ၀ဲအံၤတၢ်မၤစၢၤ၀ဲၦၤကမျၢၢ်လၢအအိၣ်ဟဲဃ့ၢ်ထီၣ်လၢကီးတရံး၀့ၢ်ပူၤတဖၣ်ဒီး လၢပကီၢ်ဆၣ်ပူၤကမျၢၢ်ၦၤဃ့ၢ်မှံဟးဖျိးလၢကဘၣ်မၤစၢၤအိၣ်ဒံး၀ဲအါမးအဃိပကဘၣ်ပာ်ဖှိၣ်ထီၣ်သးမၤစၢၤသကိး အ၀ဲသ့ၣ်အဂ့ၢ်န့ၣ် ခ့ၣ်အဲၣ်ယူၣ် ကီးတရံးကီၢ်ဆၣ် နဲၣ်ရွဲၣ် ပဒိၣ်မါမၠၣ်အ့ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပမၤစၢၤၦၤဃ့ၢ်မှံဟးဖျိးအနီၣ်ဂံၢ်စရီလၢပထၢန့ၢ်အဂၤ(၆၀၀)ဃၣ်ဃၣ်အံၤမ့ၢ်၀ဲဒၣ်ၦၤအိၣ်လၢကီးတရံး တကပၤလီၤႉဖဲပကီၢ်ဆၣ်ပူၤအံၤၦၤဃ့ၢ်မှံဟးဖျိးအနီၣ်ဂံၢ်ဒီးပမၤစၢၤတၢ်န့ၣ်တကဲးလိာ်သးဘၣ်ႉၦၤဃ့ၢ်မှံဟးဖျိးနီၣ်ဂံၢ် န့ၣ်အိၣ်လၢ(၃)ကလးဘျဲၣ်ညါပမၤစၢၤန့ၢ်ထံတစဲးလီၤႉအဃိကီၢ်ပူၤကီၢ်ချၢၦၤမၤစၢၤတၢ်ဖိတဖၣ်ပကဘၣ်ပာ်ဖှိၣ်ထီၣ် သးမၤစၢၤသကိးအီၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးဃ့ၢ်တၢ်ဒုးန့ၢ်လၢအနံၣ်လံဒီးတန့ၢ်ဘၣ်တၢ်ဆီၣ်ထွဲမၤစၢၤဘၣ်စ့ၢ်ကီးအိၣ်လၢအလါလံအဃိ ထံၣ်ဘၣ်တၢ်ကီတၢ်ခဲလၢတၢ်အီၣ်တၢ်အီတကပၤအဂ့ၢ်န့ၣ် ကီးတရံးကလံၤထံး ယွၤသ့ၣ်ကိသ၀ီဖိတဖၣ်စံး၀ဲန့ၣ်လီၤႉ လီၢ်က၀ီၤသ၀ီဖိတဂၤစံး၀ဲလၢ“မ့မ့ၢ်ပသ၀ီကရူၢ်န့ၣ်ဘၣ်ဒိဆါကတၢၢ်လီၤႉဟံၣ်ဃီတၢ်သူၣ်ထီၣ်ႇဆၣ်ဖိကီၢ်ဖိသံဘၣ်ဒိ ဘၣ်ထံးဒီဒူၣ်ညါႉပစံၣ်ထီၣ်စ့ၢ်ကီးန့ၢ်တနံၣ်ဘျဲၣ်လံပတန့ၢ်ဘၣ်တၢ်ဆီၣ်ထွဲမၤစၢၤဘၣ်န့ၣ်န့ၢ်ဖးယံၤလံႉလၢတၢ်အီၣ်တၢ်အီတၢ်မၤစၢၤတကပၤဒုလိၣ်ဖးအါညါဒံး”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ကီးတရံးကီၢ်ဆၣ်ကမျၢၢ်ၦၤဃ့ၢ်မှံဟးဖျိးတဖၣ်အံၤခီဖျိတၢ်ဆီၣ်ထွဲမၤစၢၤအ၀ဲသ့ၣ်တန့ၢ်လၢလၢၦဲၤၦဲၤဘၣ်အဃိ ကမျၢၢ်ၦၤဃ့ၢ်မှံဟးဖျိးသ့ၣ်တဖၣ်အံၤဘၣ်ပာ်အ၀ဲသ့ၣ်ဒ်တၢ်ပၢၢ်ဆၢအဟံၣ်ဖိဃီဖိအသိးဒီးပကဘၣ်ဘှါဆှဲလီၤသကိး တၢ်ကီတၢ်ခဲအံၤအဂ့ၢ်န့ၣ် ကီးတရံးကီၢ်ဆၣ်ခိၣ်နၢ်တဖၣ် စံး၀ဲန့ၣ်လီၤႉ လၢန့ၣ်အမဲာ်ညါကမျၢၢ်ၦၤဃ့ၢ်မှံဟးဖျိးလၢအိၣ်ခ့ၣ်အဲၣ်ယူၣ် ကီးတရံးကီၢ်ပူၤသ့ၣ်တဖၣ်အံၤ ဒ်သိးတၢ်ဆီၣ်ထွဲ မၤစၢၤအ၀ဲသ့ၣ်ကန့ၢ်အဂီၢ်န့ၣ် တၢ်ဃ့ထီၣ်တီၣ်ဖျါထီၣ်၀ဲဆူကီၢ်ဆၣ်ႇကီၢ်ရ့ၣ်ႇလီၢ်ခၢၣ်သးအပတီၢ်လံအဂ့ၢ်န့ၣ် ကီၢ်ဆၣ်ခိၣ်နၢ် တဖၣ်စံး၀ဲန့ၣ်လီၤႉ တၢ်လဲၤဆီၣ်ထွဲမၤစၢၤတၢ်ခဲအံၤန့ၣ်မ့ၢ်၀ဲကီးတရံးခိၣ်နၢ်တဖၣ်တီခိၣ်ရိၣ်မဲ၀ဲ ကညီသးစၢ်ကရၢ(KYO), ကညီပိာ်မုၣ်ကရၢ(KWO),ကီၢ်ပူၤကညီၦၤလီၢ်အိၣ်ကမှံကမံးတံာ်(CIDKP),(Free Burma Rangers-FBR)ဒီး ကီၢ်ဆၣ်ဂ့ၢ်ဂီၢ်အူတၢ်တိစၢၤမၤစၢၤဒီးၦၤဂ့ၢ်၀ီတၢ်ဆီၣ်ထွဲမၤစၢၤကမံးတံာ်တဖၣ်ပာ်ဖှိၣ်ထီၣ်သး လဲၤမၤစၢၤ၀ဲဒၣ်န့ၣ်လီၤႉ တကီၢ်ခါခဲအံၤလၢကီးတရံးကီၢ်ဆၣ်ဒီတဘ့ၣ်အပူၤန့ၣ်ကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၃၀၀၀၀)ဘျဲၣ်လံဒီး လၢၦၤသ့ၣ်တဖၣ်အံၤအဂီၢ်လိၣ်ဘၣ်ဒံး၀ဲဒၣ်တၢ်အီၣ်တၢ်အီအဂ့ၢ်န့ၣ် ခ့ၣ်အဲၣ်ယူၣ်–ဒူပျာ်ယာ်ကီၢ်ရ့ၣ် ထုးထီၣ်ပာ်ဖျါ၀ဲဖဲ လါဒံၣ်စ့ဘၢၣ် ၂၇ သီအနံၤန့ၣ်လီၤႉ
ကီးတရံးႇကြုၢ်တုႇတီၤကၠၤအ့ တၢ်ဒုးဆဲးကဲထီၣ်ဒံးလၢပယီၤသုးဒီး(KNLA)သုးပ၁်ဖှိၣ်သုးကျိၤအဘၢၣ်စၢၤ
လါဒံၣ်စ့ဘၢၣ် ၂၉ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံးႇကြုၢ်တုဒီးတီၤကၠၤအ့တကပၤန့ၣ် တၢ်ဒုးဆဲးကဲထီၣ်ဒံး၀ဲလၢပယီၤသုးဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤအဂ့ၢ်န့ၣ် သုးဂ့ၢ်၀ီဟီၣ်က၀ီၤဂံၢ်ခီၣ်ထံးၦၤဟ့ၣ် တၢ်ကစီၣ်ဖိတဖၣ် စံး၀ဲန့ၣ်လီၤႉ “တနံၤညါအံၤလၢကီးတရံးန့ၣ်တၢ်ဒုးကဲထီၣ်ဒံးႉ(KNLA)သုးပာ်ဖှိၣ်သိၣ်မှံၤ(PDF)တီၢ်နီၢ်သုးကျိၤၦၤဘၣ်မူဘၣ်ဒါ တဖၣ်န့ၣ် ဟးလူၤရဲၣ်ကျဲၤတၢ်လၢကီးတရံးတၢ်မဲာ်ညါတၢ်ဒုးပျီပူၤန့ၣ်ႉလၢကြုၢ်တုတကပၤန့ၣ်စ့ၢ်ကီး(၅၄၅၊၅၄၆) သုးတဖၣ်န့ၣ် နါက့ပျံၤ၀ဲလၢၦၤကညီသုးကဟဲဘူးထီၣ်လၢကြုၢ်တုအဃိအ၀ဲသ့ၣ်ခးလီၤကျိဖးဒိၣ်လၢယ့ၤပူၤကၠံသ၀ီ တကပၤ”အဂ့ၢ်န့ၣ် ဒုးယၤဟီၣ်က၀ီၤဂံၢ်ခီၣ်ထံးတၢ်ကစီၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါဒံၣ်စ့ဘၢၣ် ၂၈ သီ အနံၤန့ၣ်လီၤႉ လၢန့ၣ်အမဲာ်ညါတီၤကၠၤအ့တၢ်ဒုးအပူၤန့ၣ်စ့ၢ်ကီးသုးကီၣ်ကးအၦၤဟဲက့ၤပာ်လီၤစုက၀ဲၤအိၣ်၀ဲဒီး ဘၣ်ဃးတၢ်ဂ့ၢ်တၢ်ကျိၤ လီၤတံၢ်လီၤဆဲးန့ၣ်ကထုးထီၣ်ပာ်ဖျါ၀ဲအဂ့ၢ်န့ၣ် ဟီၣ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိ တဂၤဃီ၀ဲန့ၣ် စံးအါထီၣ်၀ဲ န့ၣ်လီၤႉ တၢ်ဒုးကဲထီၣ်ရၤလီၤသးအတီၢ်ပူၤသုးကီၣ်ကးအံၤဒ်သိးအ၀ဲသ့ၣ်သုးကလၢၤသုတလီၤတဂ့ၤအဂီၢ်န့ၣ် ကညီသုးခိးကီၢ်ဆၢ(BGF)တဖၣ်လၢဖၣ်အၣ်ႇတန့ခၠါကျဲအံၤတဆီဆှၢထီၣ်၀ဲဒၣ်သုး(စစ်ကူ)ဒီး ကျိချံၦာ်သၣ်သ့ၣ်တဖၣ် လၢကီးတရံး၀့ၢ်ခၢၣ်သးတၢ်လူၢ်ခိၣ်သီခါဖၠၣ်ဃိၣ်လူၢ်တကပၤအဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်လၢအဘူးဒီး (BGF)တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပယီၤသုးန့ၣ်နုာ်လီၤဆ့ၣ်နီၤအိၣ်လၢ၀့ၢ်ပူၤပၢၤကီၢ်၀ဲၤလီၢ်ႇစံၣ်နၣ်သူၣ်ခၣ်ဃိၣ်ႇခၠီတီၤႇနီၣ်ဂံၢ်(၃)တြဲၤႇ ကီၢ်ရ့ၣ်ပၢၤကီၢ်၀ဲၤလီၢ်တၢ်လီၢ်သ့ၣ်တဖၣ်န့ၣ်မီၤနီၤႉမ့မ့ၢ်လၢ၀့ၢ်ခၢၣ်သးတၢ်လူၢ်ခိၣ်သီခါဖၠၣ်တၢ်လီၢ်ခီန့ၣ် ပယီၤသုးဒီး (BGF)ဆ့ၣ်နီၤအိၣ်ႉလၢဖဲန့ၣ်တဆီအ၀ဲသ့ၣ်သူ၀ဲသိလ့ၣ်ဟံၣ်ဆှၢထီၣ်၀ဲသုး(စစ်ကူ), ကျိချံၦာ်သၣ်တဖၣ်လၢ တန့ခၠါႇ ဖၣ်အါၣ်ကျဲအံၤတဆီမီၤနီၤ”အဂ့ၢ်န့ၣ် စံး၀ဲန့ၣ်လီၤႉ ခီဖျိတၢ်ဒုးတၢ်အိၣ်သးအဃိတကီၢ်ခါခဲအံၤကီးတရံးၦၤကမျၢၢ်အဂၤ(၅၀၀၀)ဘျဲၣ်လဲၤဃ့ၢ်ထီၣ်အိၣ်၀ဲဒၣ်လၢ ထံဖိစီႇ နီၤကဲႇနီၤတပွဲသ၀ီတကပၤဒီးၦၤသ့ၣ်တဖၣ်အံၤအဂီၢ်လိၣ်ဘၣ်၀ဲဂ့ၢ်ဂီၢ်အူတၢ်အီၣ်တၢ်အီႇကသံၣ်ကသီသ့ၣ်တဖၣ် အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ ပယီၤသုးဒီး(BGF)သ့ၣ်တဖၣ်အံၤလၢကီးတရံး၀့ၢ်ကလံၤစိး(သုးက့ ၇)ဟီၣ်က၀ီၤကျဲအံၤတဆီ အ၀ဲသ့ၣ်မၤၦဲၤထီၣ်၀ဲ သုးဂံၢ်ဘါတပယူာ်ဃီဒီးလၢတၢ်န့ၣ်အဃိကီးတရံး၀့ၢ်အံၤတၢ်ဒုးကဲထီၣ်တၢ်ဆၢကတီၢ်ကယံၤသ့၀ဲအဃိ တၢ်အိၣ်သးအံၤ အိၣ်လၢလီၢ်က၀ီၤၦၤကမျၢၢ်လၢအဘၣ်ဃ့ၢ်ထီၣ်တဖၣ်အံၤကဘၣ်ဟးစံၣ်အိၣ်ဖးယံၤဒံးညါအဂ့ၢ်န့ၣ် ကမျၢၢ်ၦၤဃ့ၢ်တၢ်ဒုး တဖၣ်စံး၀ဲန့ၣ်လီၤႉ
ကီးတရံး၀့ၢ်ပူၤၦၤကမျၢၢ်လၢအဃ့ၢ်ထီၣ်တဖၣ်အဟံၣ်အဃီအူအီၣ်တစှၤန့ၢ်(၃၀)ဖျၢၣ်
လါဒံၣ်စ့ဘၢၣ် ၂၈ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံး၀့ၢ်က၀ီၤဒ့တဖၣ်အပူၤ ၦၤကမျၢၢ်လၢအဃ့ၢ်ထီၣ်တဖၣ်အံၤမ့ၣ်အူအီၣ်အဟံၣ်အဃီ အိၣ်၀ဲခဲလၢာ်တစှၤန့ၢ်အဖျၢၣ်(၃၀)ညါအဂ့ၢ်န့ၣ် ဟီၣ်က၀ီၤဂံၢ်ခီၣ်ထံးတၢ်ကစီၣ်စံး၀ဲအသိး စံး၀ဲန့ၣ်လီၤႉ ဟံၣ်ဃီလၢအိၣ်ကီးတရံး၀့ၢ်ပူၤတဖၣ်တနီၤန့ၣ်ခီဖျိကျိဖးဒိၣ်အဃိမ့ၣ်အူအီၣ်၀ဲဒၣ်အိၣ်၀ဲအသိး ဟံၣ်တနီၤန့ၣ်မ့ၣ်အူအီၣ်၀ဲ လၢတၢ်တသ့ၣ်တၢ်ဂ့ၢ်တၢ်ကျိၤနီမံၤဘၣ်စ့ၢ်ကီးအိၣ်၀ဲအဂ့ၢ်န့ၣ် ကီးတရံးကမျၢၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ အ၀ဲစံး၀ဲလၢ“ဖဲ၀့ၢ်ပူၤအံၤဟံၣ်အူအီၣ်တလီၢ်လီၢ်လီၤႉဟံၣ်တနီၤအအူအီၣ်န့ၣ်တမ့ၢ်အကဲထီၣ်သးယိယိဘၣ်ႉ ကဲထီၣ်အါလၢၦၤဒွဲၣ်အူအီၣ်၀ဲလီၤႉဘၣ်မနုၤအဃိဟံၣ်အူအီၣ်န့ၣ်ကျိဖးဒိၣ်လီၤတဲာ်မးတအိၣ်ဘၣ်န့ၣ်ႉ ဖဲမဟါတသီ ခံသီန့ၣ်တၢ်လီၢ်လၢမ့ၣ်အူအီၣ်ဟံၣ်တကပၤန့ၣ်အိၣ်ဒၣ်ပယီၤသုးအၦၤဟူးဂဲၤလ့ၢ်ထီၣ်လ့ၢ်လိၤ၀ဲလီၤႉ ခဲအံၤဒ်ယသ့ၣ်ညါ အသိးန့ၣ်ၦၤဟံၣ်အူအီၣ်ကအိၣ်အဖျၢၣ်(၃၀)ဘျဲၣ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ဖဲအပူၤကွံာ်လါဒံၣ်စ့ဘၢၣ် ၂၅ သီ ဟါခီအဆၢကတီၢ်န့ၣ်စ့ၢ်ကီး မ့ၣ်အူအီၣ်ကဒီး၀ဲဟံၣ်(၁၅)ဖျၢၣ်လၢကီးတရံး က၀ီၤဒ့(၅)ပူၤဒီးဘၣ်ဃးတၢ်ကဲထီၣ်သးအဂ့ၢ်အကျိၤလီၤတံၢ်လီၤဆဲးန့ၣ်အံၤပခ့ၣ်အဲးစံၣ်–ကညီတၢ်ကစီၣ်ပာ်ဂၢၢ် ပာ်ကျၢၤ၀ဲတန့ၢ်ဒံးဘၣ်န့ၣ်လီၤႉ ဖဲမဟါလါဒံၣ်စ့ဘၢၣ် ၂၇ သီဂီၤခီအဆၢကတီၢ်စ့ၢ်ကီး လၢကီးတရံး၀့ၢ်ပူၤၦၤနၢ်ဟူဒံး၀ဲကျိဖးဒိၣ်ကျိဖိအကလုၢ်သီၣ် ဒံး၀ဲဒီးဒ်န့ၣ်အသိးၦၤကမျၢၢ်လၢအဃ့ၢ်တၢ်ထီၣ်တဖၣ်တနီၤန့ၣ်အ၀ဲသ့ၣ်က့ၤဟံအတၢ်ဖိတၢ်လံၤလၢအဟံၣ်အိၣ်၀ဲဒၣ် စ့ၢ်ကီးအဂ့ၢ်န့ၣ် ကီးတရံးကမျၢၢ်တဂၤ စံး၀ဲဒ်အံၤန့ၣ်လီၤႉ “ၦၤက့ၤဟံတၢ်ဖိတၢ်လံၤလၢက၀ီၤဒ့ပူၤအိၣ်တနီၤမီၤနီၤႉလၢတတါအူလၢ၀့ၢ်ပူၤတကပၤန့ၣ်ၦၤက့ၤကွၢ်ၦၤဟံၣ်ၦၤဃီ အိၣ်မီၤဘၣ်က့ၤ၀ဲလၢတၢ်ပလီၢ်ပဒီအပူၤန့ၣ်ႉမ့မ့ၢ်လၢပအိၣ်ခၠီတီၤတကပၤန့ၣ်ဒုက့ၤနုာ်လီၤတန့ၢ်နီတစဲးဘၣ်ႉ ပဟံၣ်ဒုကဲထီၣ်တၢ်ဟုၣ်အခီၣ်လီၢ်လၢာ်လံ”အဂ့ၢ်န့ၣ် စံး၀ဲန့ၣ်လီၤႉ ကီးတရံး၀့ၢ်ပူၤစးထီၣ်ဖဲလါဒံၣ်စ့ဘၢၣ်ထီၣ် ၁ သီန့ၣ် တၢ်ဒုးက့ၤကဲထီၣ်ကဒါ၀ဲလၢသုးကီၣ်ကးအၦၤဒီး ကညီဒီကလုာ် တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤဒီးလၢတၢ်န့ၣ်အဃိ၀့ၢ်ပူၤၦၤကမျၢၢ်လၢကလးဘၣ် ဃ့ၢ်ထီၣ်၀ဲဒၣ်န့ၣ်လီၤႉ လၢန့ၣ်အမဲာ်ညါခီဖျိတၢ်ဒုးကဲထီၣ်အဃိၦၤကမျၢၢ်လၢအဃ့ၢ်တဖၣ်တဖၣ်တနီၤန့ၣ်မ့ၣ်အူအီၣ်အ၀ဲသ့ၣ်အဟံၣ်အဃီ တကးဒံးဘၣ်ခီဖျိပယီၤသုးခးလီၤကျိဖးဒိၣ်ကျိဖိႇကဘီယူၤစ့ၢ်ကီးဟဲခးလီၤတၢ်အဃိ ဟံၣ်ဒီးကျးဟးဂီၤအိၣ်လၢ အကယၤညါလံအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လၢန့ၣ်အမဲာ်ညါၦၤကမျၢၢ်လၢအဃ့ၢ်ထီၣ်သ့ၣ်တဖၣ်အံၤခီဖျိအ၀ဲသ့ၣ်ဃ့ၢ်ထီၣ်ကအိၣ်လၢတလါဃၣ်ဃၣ်လံဒီး တကးဒံးဘၣ်ခီဖျိတၢ်ၦ့ၤထီၣ်ႇၦၤဟဲမၤစၢၤတၢ်စ့ၢ်ကီးလီၤစှၤ၀ဲဒၣ်အဃိၦၤလီၢ်အိၣ်ကဒုလီၢ်လၢအိၣ်ဘူးဖဲတန့ခၠါဒီး သၤမညၣ်အခိၣ်အဃၢၤတဖၣ်တနီၤန့ၣ်တၢ်အီၣ်တၢ်အီလီၤတူာ်ထီၣ်၀ဲလံအဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤဃ့ၢ် မှံဟးဖျိးတဖၣ်အအိၣ်န့ၣ်လီၤႉ
ကီၢ်သူလ့ၤသုးမုၢ်ဒိၣ်(KTLA)အသုးကျိၤခံကျိၤဟဲက့ၤပ၁်ဖှိၣ်ထီၣ်သးဒီး(KNLA)
လါဒံၣ်စ့ဘၢၣ် ၂၈ သီႇ ၂၀၂၃ နံၣ်ႇ ခ့ၣ်အဲးစံၣ် ကီၢ်သူလ့ၤသုးမုၢ်ဒိၣ်(KTLA)အသုးကျိၤခံကျိၤဟဲက့ၤပာ်ဖှိၣ်ထီၣ်သးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) အဂ့ၢ်န့ၣ် ကရူၢ်ဘၣ်ထွဲထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ ဖဲတနံၣ်အံၤလါအ့ဖြ့ၣ် ၆ သီအနံၤန့ၣ် (KTLA)ပၢဆှၢရဲၣ်ကျဲၤဖီဃာ် သုးခိၣ်စီၤ၀့မၠ့ၣ် တီခိၣ်ရိၣ်မဲ(Venom)သုးကျိၤ ဟဲက့ၤပာ်ဖှိၣ်ထီၣ်သးလၢ(KNLA) သုးက့(၆)အအိၣ်ဒီးဒ်န့ၣ်အသိးဖဲလါနိၣ်၀့ဘၢၣ် ၆ သီအနံၤစ့ၢ်ကီး သုးခိၣ် အဲၣ်စ့၀ါ တီခိၣ်ရိၣ်မဲ(Lion Battalion Commando)သုးကျိၤအံၤစ့ၢ်ကီးဟဲက့ၤပာ်ဖှိၣ်ထီၣ်သးဒီး(KNLA) သုးက့(၆) အဂ့ၢ်န့ၣ် အ၀ဲသ့ၣ်ကရူၢ်ထုးထီၣ်ပာ်ဖျါ၀ဲန့ၣ်လီၤႉ ဘၣ်ဃးတၢ်ဂ့ၢ်အိၣ်ဖျါလၢတၢ်ဖီခိၣ်သ့ၣ်တဖၣ်အံၤန့ၣ်(ခ့ၣ်အဲၣ်ယူၣ်)ၦၤကတိၤတၢ်ပၢ ပဒိၣ်စီၤတိနံ စံး၀ဲလၢ “မ့မ့ၢ်ယၤဒုယထံၣ်လၢပကဒုးဖျိးထီၣ်ကွံာ်သုးမီၤစိရိၤတဒူၣ်လီၤလီၤဆီဆီအမဲာ်ညါန့ၣ်ပာ်ဖှိၣ်ထီၣ်သးဖီၣ်လိာ်စု ဒုးသကိးတပူၤဃီဒီး(KNLA)န့ၣ်အဘျုးကအိၣ်ဒိၣ်၀ဲလီၤႉအဃိ(Lion Battalion)သုးကျိၤဟဲက့ၤဖီၣ်လိာ်စုဟူးဂဲၤ ကဒါလၢကရူၢ်တဒူၣ်ဃီဒ်အံၤမ့ၢ်တၢ်လၢအဂ့ၤတခါလီၤႉပသးခုဒိၣ်မးဒီးပအိၣ်ခိးသဂၢၢ်လီၤအ၀ဲသ့ၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ဒ်(KNLA)အတၢ်သိၣ်တၢ်သီတၢ်ဘျၢအိၣ်အသိးန့ၣ်(Lion Battalion Commando)သုးကျိၤအံၤ ကပာ်ဖှိၣ်ဖီၣ်လိာ်စု မၤသကိးဒုးဖျိးထီၣ်ကွံာ်သုးမီၤစိရိၤအဂ့ၢ်န့ၣ် သုးခိၣ်အဲၣ်စ့၀ါ အသုးကျိၤလံာ်တၢ်ထုးထီၣ်ပာ်ဖျါအပူၤ စံး၀ဲန့ၣ်လီၤႉ ဘၣ်ဃးသုးခိၣ်အဲၣ်စ့၀ါတီခိၣ်ရိၣ်မဲ(Lion Battalion Commando)သုးကျိၤအတၢ်ဟဲက့ၤပာ်ဖှိၣ်မၤသကိးတၢ်ဒီး (KNLA)တၢ်ဂ့ၢ်အံၤအဖီခိၣ် ဖဲလါဒံၣ်စ့ဘၢၣ် ၂၅ သီအနံၤ ဒ်(KTLA)လီၢ်ခၢၣ်သးထုးထီၣ်ပာ်ဖျါ၀ဲလံာ်တၢ်ပာ်ဖျါပူၤ အသိးန့ၣ် ခီဖျိစီၤအဲၣ်စ့၀ါ ဒီး စီၤဖါသီခါ တဖၣ်အံၤ ဃုထၢတၢ်ရၢကရိလၢအဂၤတဒူၣ်လံအဃိ စးထီၣ်(၂၅ႉ၁၂ႉ၂၀၂၃)န့ၣ် အ၀ဲသ့ၣ်တမ့ၢ်(KTLA)အၦၤလၢၤဘၣ်အဂ့ၢ်န့ၣ် လံာ်တၢ်ပာ်ဖျါပူၤပာ်ဖျါ၀ဲန့ၣ်လီၤႉ ဘၣ်ဃးသုးခိၣ်အဲၣ်စ့၀ါကရူၢ်လဲၤပာ်ဖှိၣ်မၤသကိးတၢ်ဒီး(KNLA)န့ၣ်သ့ၣ်ညါဃာ်လၢညါလံၤလံၤလံဒီးဘၣ်ဆၣ်မ့ၢ်လၢအက့ၤဒုးခီၣ်ဆၢကဒါသုးမီၤစိရိၤလီၤအဃိပျၢ်အ၀ဲသ့ၣ်လံအဂ့ၢ်န့ၣ် (KTLA)သုးရိၣ်မဲခိၣ်ကျၢၢ်...