ကီးတရံး၀့ၢ်ပူၤဒုးယၤတၢ်ဖ့ၣ်ဆၢကဲထီၣ်ဒံးအဃိၦၤကမျၢၢ်လၢအဃ့ၢ်ထီၣ်တဖၣ်တၢ်အီၣ်တၢ်အီတအိၣ်လၢၤဘၣ်
လါဒံၣ်စ့ဘၢၣ် ၁၉ သီႇ ၂၀၂၃ နံၣ်ႇ ခ့ၣ်အဲးစံၣ် ကီးတရံး၀့ၢ်ပူၤခီဖျိခံခီခံကပၤအဘၢၣ်စၢၤတၢ်ဖ့ၣ်စၢကဲထီၣ်ဒံးအဃိၦၤကမျၢၢ်လၢအဃ့ၢ်ထီၣ်သ့ၣ်တဖၣ်အံၤ သဂၢၢ်ဘၣ်၀ဲ တၢ်အီၣ်တၢ်အီတအိၣ်လၢၤဘၣ်အဂ့ၢ်န့ၣ် ၦၤကမျၢၢ်လၢအလဲၤဃ့ၢ်အိၣ်လၢသၤမညၣ်ႇတန့ခၠါဒီး နီၤတပွဲသ၀ီတကပၤတဖၣ် စံး၀ဲန့ၣ်လီၤႉ ၦၤကမျၢၢ်လၢအလဲၤဃ့ၢ်အိၣ်လၢတန့ခၠါတဂၤစံး၀ဲလၢ“ပက့ၤကွၢ်ပဟံၣ်တဘူၣ်ဘၣ်န့ၣ်ကအိၣ်လၢ(၁၅)သီဘျဲၣ်လံႉ တၢ်အီၣ်တၢ်အီနါက့တအိၣ်လၢၤဘၣ်ႉတၢ်ဒုးကဲထီၣ်ဘျီပဟဲဒိးပိာ်ၦၤအဂၤသိလ့ၣ်ခံဒ်အံၤလီၤႉခဲအံၤကအိၣ်ကအီၣ် ကအီအဂီၢ်တၢ်တအိၣ်နီမံၤလၢၤဘၣ်ႇလဲၤမၤတၢ်ဒၢးတသ့တၢ်ဖးကီညါႉၦၤဖိသၣ်တအီၣ်ဘၣ်အီဘၣ်တၢ်လၢၤဘၣ်ဘျီ ပကွၢ်န့ၣ်ဘၣ်ပသးတမုာ်စ့ၢ်ဘၣ်ႉၦၤဟဲဟ့ၣ်ဟဲနီၤလီၤၦၤတၢ်နါက့တအိၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ တကီၢ်ခါခဲအံၤလၢကီးတရံး၀့ၢ်ပူၤတၢ်လီၢ်လၢသုးကီၣ်ကးအိၣ်ဆီလီၤသးအလီၢ်သ့ၣ်တဖၣ်န့ၣ်တၢ်ဒုးကဲထီၣ်ဒံး၀ဲလၢ ခံခီခံကပၤအဘၢၣ်စၢၤကိးမုၢ်နံၤဒဲးဒီးတုၤလၢတလါအံၤလါဒံၣ်စ့ဘၢၣ် ၁၈ သီအနံၤန့ၣ် ၀့ၢ်ပူၤက၀ီၤဒ့(၇)ဘ့ၣ် ၦၤကမျၢၢ်ဃ့ၢ်ထီၣ်၀ဲဒၣ်(၁၅၀၀၀)ဘျဲၣ်လံဒီးဘၣ်ဆၣ်ၦၤကမျၢၢ်တနီၤဆဲးအိၣ်ခိးဟံၣ်ပံးဃာ်အဟံၣ်ပံးဃာ်အကျး အိၣ်၀ဲ အဂ့ၢ်န့ၣ် ကီးတရံး၀့ၢ်ပူၤကမျၢၢ်တဂၤ စံး၀ဲန့ၣ်လီၤႉ ၦၤအိၣ်လၢက၀ီၤဒ့(၅)ပူၤတဂၤစံး၀ဲလၢ“ခဲအံၤလီတဲစိအကျိၤန့ၣ်န့ၢ်တထံၣ်ထံၣ်တန့ၢ်တထံၣ်ထံၣ်ႉတၢ်ဒုးစ့ၢ်ကီး ကဲထီၣ်ခဲအံၤလီၤကယးခဲအံၤလီၤႉၦၤကညီသုးႇ(PDF)သုးဟးဆှၣ်တၢ််အိၣ်ႇပယီၤသုးစ့ၢ်ကီးဟးဆှၣ်တၢ်လီၤႉ ပယီၤသုးဒွဲၣ်အူအီၣ်ၦၤဟံၣ်လၢက၀ီၤဒ့ပူၤႇနုာ်လီၤလၢၦၤဟံၣ်ပူၤဟံၦၤတၢ်ဖိတၢ်လံၤနါက့အိၣ်ႉမ့မ့ၢ်လၢ(PDF)သုးႇ ၦၤကညီသုးခီန့ၣ်ဒွဲၣ်အူအီၣ်မၤဟးဂီၤကွံာ်(BGF)တၢ်လိာ်ကွဲက့မ်အလီၢ်ဒီးတြဲၤလၢအအိၣ်ခိးထၢစ့တဖၣ်ဒုအိၣ်မီၤနီၤႉ ကျးတအိၣ်လၢၤဘၣ်ဘျီဟးဃုအီၣ်တၢ်တဘၣ်လၢၤဘၣ်ႉၦၤမၤစၢၤၦၤဃ့ၢ်မှံဟးဖျိးတဖၣ်နါက့ဟဲလၢ၀့ၢ်ပူၤတဘူၣ်ဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢကီးတရံး၀့ၢ်ပူၤ၀့ၢ်ချၢတၢ်လီၢ်သ့ၣ်တဖၣ်န့ၣ်တၢ်ဒုးကဲထီၣ်တၢ်ဆၢကတီၢ်ယံၤထီၣ်လံဒီးဒ်န့ၣ်အသိး မၠၣ်၀တံၣ်–ကီးတရံးအ့ရှါကျဲစ့ၢ်ကီးတၢ်ပံးဃာ်၀ဲဒၣ်န့ၣ်လီၤႉဒ်န့ၣ်အသိးသုးကီၣ်ကးအကဘီယူၤဟဲဆှၣ်တၢ်ဒီးပယီၤသုးခး လီၤဒံး၀ဲကျိဖးဒိၣ်အိၣ်ဒံး၀ဲအဂ့ၢ်န့ၣ် ကီးတရံးကမျၢၢ်တဖၣ်စံး၀ဲန့ၣ်လီၤႉ
ဟီၣ်က၀ီၤပူၤတၢ်အိၣ်သးတဂၢၢ်တကျၢၤဒံးဘၣ်အဃိနၣ်သၤကွ့လီၢ်က၀ီၤကမျၢၢ်တနီၤတက့ၤဘၣ်လၢအဟံၣ်ဒံးဘၣ်
လါဒံၣ်စ့ဘၢၣ် ၁၉ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)ဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ် နၣ်သၤကွ့၀့ၢ်ပူၤ ဖဲလါဒံၣ်စ့ဘၢၣ်တၢတနွံအတီၢ်ပူၤအခါန့ၣ် တၢ်ဒုးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီး ပယီၤသုးအဘၢၣ်စၢၤဒီးခဲအံၤခီဖျိဟီၣ်က၀ီၤတၢ်အိၣ်သတဂၢၢ်တကျၢၤဒံးဘၣ်အဃိ တုၤလၢခဲအံၤၦၤကမျၢၢ်တနီၤ တက့ၤဘၣ်လၢအဟံၣ်ဒံးဘၣ်အဂ့ၢ်န့ၣ် သ့ၣ်ညါဘၣ်လၢကမျၢၢ်တဖၣ်အအိၣ်န့ၣ်လီၤႉ ဖဲအပူၤကွံာ်လါဒံၣ်စ့ဘၢၣ် ၅ သီအနံၤန့ၣ် တၢ်ပၢၢ်ဆၢသုးပာ်ဖှိၣ်နု၁်လီၤခး၀ဲဒၣ်နၣ်သၤကွ့ပၢၤကီၢ်၀ဲၤလီၢ်ဒီး တၢ်လီၢ်လၢပယီၤသုးအိၣ်ဆီလီၤသးအလီၢ်တနီၤအံၤဒီး ဖဲန့ၣ်ခီဖျိပယီၤသုးက့ၤခးလီၤကဒါကျိဖးဒိၣ်အဃိ နၣ်သၤကွ့ ၦၤကမျၢၢ်တဖၣ်ဃ့ၢ်ထီၣ်၀ဲဒီးတုၤလၢခဲအံၤၦၤကမျၢၢ်တနီၤတက့ၤဘၣ်လၢအဟံၣ်ဒံးဘၣ်အဂ့ၢ်န့ၣ် လီၢ်က၀ီၤကမျၢၢ် ပိာ်မုၣ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တၢ်ဒုးမ့ကဲထီၣ်ကဘီယူၤဟဲအဃိ(တၢ်ပၢၢ်ဆၢသုးကရူၢ်)မၢပဟးပလဲာ်ဆိသးမီၤနီၤႉဘၣ်ယိၣ်၀ဲလၢတၢ်ဘၣ်ဒိဘၣ်ထံးကအိၣ်အဃိဖဲတၢ်တနံၤန့ၣ်ပဟးပလဲာ်သးလီၤႉနီၢ်တနံၤဘျီၦၤဟဲခးကဒီးပၢၤကီၢ်၀ဲၤလီၢ်ဒံးႉ ခဲအံၤတၢ်အိၣ်သး ဂၢၢ်လံဘၣ်ဆၣ်ၦၤက့ၤတဘူၣ်ဒံးဘၣ်န့ၣ်အိၣ်ဒံးႉတနီၤခီန့ၣ်လဲၤလဲၤက့ၤက့ၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ စးထီၣ်ဖဲတလါအံၤလါဒံၣ်စ့ဘၢၣ် ၁၃ သီတုၤလၢ ၁၆ သီန့ၣ် ပယီၤသုးခးလီၤကျိဖးဒိၣ်အဖျၢၣ်(၆၀)ဘျဲၣ်ဆူ လၢၢ်ဒိၣ်ကီၢ်ဆၣ် သ၀ီတစှၤန့ၢ်အဖျၢၣ်(၁၀)လၢအပၣ်ဃုာ်၀ဲသမ့ၤအ့ကိသ၀ီႇကၠ့ၣ်ကွ့ႇခၠီၣ်သဲစူၣ်ႇအလဲၤသ၀ီပူၤအံၤ အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပာ်ဖျါ၀ဲဖဲလါဒံၣ်စ့ဘၢၣ် ၁၇ သီ အနံၤ န့ၣ်လီၤႉ ခီဖျိပယီၤသုးခးလီၤကျိဖးဒိၣ်ဆူသ၀ီပူၤအဃိနၣ်သၤကွ့ကမျၢၢ်ဃုာ်ဒီးၦၤကမျၢၢ်လၢအဂၤဘၣ်ဃ့ၢ်ထီၣ်၀ဲအါအါဂီၢ်ဂီၢ် ဒီးတကီၢ်ခါခဲအံၤၦၤကမျၢၢ်လၢအဃ့ၢ်ထီၣ်တဖၣ်အီၣ်အီအိၣ်ဆိး၀ဲဒၣ်လၢအကစၢ်တၢ်ရဲၣ်တၢ်ကျဲၤလီၤအဂ့ၢ်န့ၣ် လီၢ်က၀ီၤၦၤကမျၢၢ်စံး၀ဲန့ၣ်လီၤႉ လီၢ်က၀ီၤကမျၢၢ်တဂၤစံး၀ဲလၢ“ၦၤလၢအဃ့ၢ်ထီၣ်ခဲအံၤတဖၣ်ဒီးၦၤလၢအဟးပလဲာ်သးတဖၣ်အံၤအ၀ဲသ့ၣ် ဟးစံၣ်အိၣ်ဒၣ်လၢအကစၢ်တၢ်ရဲၣ်တၢ်ကျဲၤလီၤႉလီၢ်က၀ီၤတၢ်ကရၢကရိနါက့ကမၤစၢၤဖှိၣ်၀ဲဒ်လဲၣ်ႉပဘၣ်အိၣ်ဘၣ်အီၣ်နါစိၤဒ်အံၤလီၤမီၤနီၤႉ၀ဲဒၣ်နါက့ပအိၣ်ဒ်အံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်(၂၀၁၄)သုးကီၣ်ကးထုးထီၣ်ပာ်ဖျါ၀ဲဖးဖီမုၢ်ၦၤနီၣ်ဂံၢ်စရီအသိးန့ၣ်နၣ်သၤကွ့၀့ၢ်ပူၤအံၤၦၤနီၣ်ဂံၢ်အိၣ်၀ဲ(၉၀၀၀)ဃၣ်ဃၣ်ဒီးဖဲအပူၤကွံာ်လါယူၤအခါခီဖျိ(KNLA)နုာ်လီၤခး၀ဲသုးကီၣ်ကးအသုးကလၢၤအံၤအဃိၦၤနီၣ်ဂံၢ်တ၀ာ်ဘျဲၣ် ဘၣ်ဃ့ၢ်ထီၣ် ၀ဲဒၣ်အဂ့ၢ်န့ၣ် စံး၀ဲန့ၣ်လီၤႉ ဒ်န့ၣ်အသိးလၢလၢၢ်ဒိၣ်ကီၢ်ဆၣ်အပူၤ(၄)သီအတီၢ်ပူၤတၢ်ဒုးကဲထီၣ်အခါခီဖျိပယီၤသုးခးလီၤကျိဖးဒိၣ်အဃိ ၦၤကမျၢၣ်သံဒၣ်(၄)ဂၤအကျါပၣ်ဃု၁်၀ဲပိာ်မုၣ်တဂၤဒီးဒ်န့ၣ်အသိးဘၣ်ဒိဘၣ်ထံး(၄)ဂၤအကျါပၣ်ဃုာ်၀ဲဖိသၣ်တဂၤ အဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲဖဲလါဒံၣ်စ့ဘၢၣ် ၁၇ သီအနံၤန့ၣ်လီၤႉ
ခီဖျိသိလ့ၣ်ကတံ၁်လၢကျဲပူၤအဃိမၠၣ်၀တံၣ်–ထိၣ်ကီၤကိကျဲတၢ်ပ၁်ပနီၣ်က့ၤအီၤလၢထီၣ်တသီလီၤတသီ
လါဒံၣ်စ့ဘၢၣ် ၁၉ သီႇ ၂၀၂၃ နံၣ်ႇ ခ့ၣ်အဲးစံၣ် လၢကီးတရံး၀့ၢ်ပူၤခီဖျိတၢ်ဒုးကဲထီၣ်ဒီးမၠၣ်တ၀ံၣ်–ကီးတရံးအ့ရှါကျဲပံးအဃိ ၦၤလ့ၢ်ထီၣ်လ့ၢ်လိၤက့ၤလၢ မၠၣ်၀တံၣ်–ထိၣ်ကီၤကိကျဲဒီးခဲအံၤခီဖျိသိလ့ၣ်ကတံာ်လၢကျဲပူၤအဃိစးထီၣ်ဖဲမဟါလါဒံၣ်စ့ဘၢၣ် ၁၈ သီန့ၣ် ၦၤပျဲလ့ၢ်ထီၣ်လ့ၢ်လိၤ က့ၤ၀ဲလၢထီၣ်တသီလီၤတသီအဂ့ၢ်န့ၣ် ၦၤနီသိလ့ၣ်ဖိတဖၣ်စံး၀ဲန့ၣ်လီၤႉ စးထီၣ်လၢထိၣ်ကီၤကိ–ကၠီၤခိၣ်န့ၣ်မ့ၢ်၀ဲဒၣ်ကစၢၢ်ကျဲဒီးကျဲအံၤအိၣ်၀ဲဒၣ်လၢတၢ်မုာ်တၢ်ခုၣ်ကီၣ်ကးကရၢ (KNU/KNLA-PC)တၢ်ပၢဟီၣ်က၀ီၤအပူၤန့ၣ်လီၤႉဒ်န့ၣ်အသိးကျဲတ၀၁်န့ၣ်ကဲ၀ဲဒၣ်ဟီၣ်ခိၣ်ကမူၣ်ကျဲဒီး လၢကစၢၢ်ခိၣ်ခီန့ၣ် သိလ့ၣ်ကတံာ်လၢကျဲပူၤအဃိစးထီၣ်လါဒံၣ်စ့ဘၢၣ် ၁၈ သီ တၢ်စးထီၣ်ပာ်ပနီၣ်၀ဲလၢ ထီၣ်တသီလီၤတသီဒ်အံၤလီၤ အဂ့ၢ်န့ၣ် (PC)အၦၤလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ “ကျဲတဘိအံၤၦၤစးထီၣ်ပာ််ပနီၣ်က့ၤလၢထီၣ်တသီလီၤတသီဒ်န့ၣ်မီၤနီၤႉဘၣ်မနုၤအဃိလဲၣ်န့ၣ်ကျဲန့ၣ်အံၣ်တစဲးႇကျဲနါက့တ၀ံၤဒံးဘၣ်ႉၦၤနီသိလ့ၣ်ဖိတဖၣ်ခီန့ၣ်နၤဂုာ်လဲၤယၤဂု၁်လဲၤဘျီသိလ့ၣ်လဲၤတန့ၢ်၊တိနိၣ်လီၤသးဘျီကျဲပံး၀ဲန့ၣ်ႉ ကျဲပံးဘျီ တၢ်တဆၢကတီၢ်ယံၤထီၣ်တံာ်တာ်ထီၣ်၀ဲန့ၣ်ႉၦၤဘၣ်မံတ့ၢ်လၢကျဲပူၤနါက့အိၣ်ႉအဃိၦၤက့ၤပာ်ပနီၣ်လီၤလၢထီၣ်တသီလီၤတသီဒ်န့ၣ်လီၤ”အဂ့ၢ်န့ၣ် စံးဘၣ် ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ကျဲ၀ဲအံၤဒီတကျိၤန့ၣ်ကညီတၢ်မုာ်တၢ်ခုၣ်ကီၣ်ကး(KNU/KNLA-PC)အၦၤတဖၣ်အိၣ်ခိးတၢ်ဘံၣ်တၢ်ဘၢဒီး ဒ်န့ၣ်အသိး ဘၣ်ဟ့ၣ်လီၤကျဲအခိလၢ(PC)အအိၣ်အိၣ်စ့ၢ်ကီး၀ဲဒီးတကးဒံးဘၣ်ဘၣ်သုးခိးကီၢ်ဆၢ(BGF)စ့ၢ်ကီးခိးထၢ၀ဲဒၣ်အိၣ်စ့ၢ်ကီး အဂ့ၢ်န့ၣ် သ့ၣ်ညါဘၣ်လၢၦၤနီသိလ့ၣ်ဖိတဖၣ်အအိၣ်န့ၣ်လီၤႉ ၦၤနီသိလ့ၣ်ဖိလၢအနီလ့ၢ်လိၤသိလ့ၣ်ဖဲဖၣ်အၣ်–မၠၣ်၀တံၣ်တဂၤစံး၀ဲလၢ“ၦၤနီသိလ့ၣ်ဖိတဂၤဒီးတဂၤန့ၣ် တအိၣ်ခိးလိာ်သးဘၣ်နၤဂုာ်လဲၤယၤဂုာ်လဲၤဘျီတၢ်ဆၢကတီၢ်တံာ်တာ်ထီၣ်၀ဲန့ၣ်ႉၦၤပျဲလဲၤက့ၤထီၣ်တသီလီၤတသီ ဒ်အံၤဂ့ၤ၀ဲႉဘၣ်ဆၣ်မ့မ့ၢ်လၢၦၤကူၣ်လဲၤမၤကၤတၢ်ဖိအဂီၢ်ခီဒုတၢ်ကီတၢ်ခဲအိၣ်၀ဲမီၤနီၤႉကျဲဒၢးဟးဂီၤပဘၣ်ဟ့ၣ်လီၤ စ့ၢ်ကီးကျဲအဘူးအလဲဒီဒူၣ်ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တကီၢ်ခါခဲအံၤခီဖျိဒးဆံၣ်သိအၦ့ၤထီၣ်ဒီးကျဲတၢ်အိၣ်သးအဃိဖၣ်အၣ်တုၤလၢမၠၣ်၀တံၣ်န့ၣ် ၦၤဃ့၀ဲဒၣ်သိလ့ၣ်အဘူး အလဲ(၄၀၀၀၀)တုၤလၢ(၅၀၀၀၀)လံဒီးမ့မ့ၢ်လၢမၠၣ်၀တံၣ်တုၤလၢ၀့ၢ်တကူၣ်န့ၣ်ၦၤဃ့၀ဲဒၣ်(၆၀၀၀၀)ကၠးညါ အဂ့ၢ်န့ၣ် သ့ၣ်ညါဘၣ်လၢၦၤနီသိလ့ၣ်ဖိတဖၣ်အအိၣ်န့ၣ်လီၤႉ ခီဖျိကျဲအံၤမ့ၢ်၀ဲဒၣ်ကီၢ်ဆၢတၢ်ကူၣ်လဲၤမၤကၤကျဲအဃိမၠၣ်၀တံၣ်တုၤလၢဖၣ်အၣ်န့ၣ်သုးခိးကီၢ်ဆၢ(BGF),သုးကီၣ်ကး အၦၤႇကညီတၢ်မုာ်တၢ်ခုၣ်ကီၣ်ကးကရၢ(KNU/KNLA-PC)အတြဲၤအိၣ်ခိးထၢစ့အိၣ်၀ဲဒၣ်အါမးဒီး ဒိးသန့ၤထီၣ်သးလၢ ပနံာ်တၢ်ဖိတၢ်လံၤအဖီခိၣ်ထၢ၀ဲဒၣ်စ့အဂ့ၢ်န့ၣ် ၦၤနီသိလ့ၣ်ဖိတဖၣ်စံး၀ဲန့ၣ်လီၤႉ တကီၢ်ခါခဲအံၤလၢကီၢ်ပယီၤအပူၤဒးဆံၣ်သိကျးတဖၣ်အံၤခီဖျိဒးဆံၣ်သိတအိၣ်လၢၤဘၣ်အဃိတနီၤန့ၣ် အ၀ဲသ့ၣ်လဲၤထီၣ်ၦ့ၤဒးဆံၣ်သိလၢမၠၣ်၀တံၣ်အိၣ်၀ဲဒီးဖဲၦၤဟဲက့ၤလီၤစိာ်ဒးဆံၣ်သိလၢကျဲအံၤအခါဖီၣ်စုက၀ဲၤကရူၢ်လၢ အိၣ်ခိးတၢ်ဖဲကျဲပူၤဒီတဘိအံၤတဖၣ်ထၢ၀ဲဒၣ်တြဲၤအဘူးအလဲအါမးအဂ့ၢ်န့ၣ် ၦၤနီသိလ့ၣ်ဖိတဖၣ်စံး၀ဲန့ၣ်လီၤႉ လၢန့ၣ်အမဲာ်ညါကျဲဒီးတိၤလၢအိၣ်ထိၣ်ကီၤကိ–ကၠီၤခိၣ်ကျဲသ့ၣ်တဖၣ်အံၤဒ်သိးတၢ်သူအီၤကန့ၢ်ယံၤယံၤထၢထၢအဂီၢ် န့ၣ် မ့မ့ၢ်သိလ့ၣ်(၁၀)ပၣ်ဒီး(၁၂)ပၣ်န့ၣ်တၢ်တပျဲလဲၤ၀ဲလၢၤဘၣ်ဒီးဘၣ်ဆၣ်သိလ့ၣ်ဖိတုၤလၢ(၆)ပၣ်သိလ့ၣ်အံၤခီန့ၣ် တၢ်ပျဲလ့ၢ်ထီၣ်လ့ၢ်လိၤစိာ်၀ဲတၢ်ဖိတၢ်လံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
လၢအသီခံဆံအတီၢ်ပူၤ(KNU)ထီၣ်မၤန့ၢ်မိၣ်လိၣ်ကၠိ(ဖဲထၣ်)ပယီၤသုးကလၢၤ
လါဒံၣ်စ့ဘၢၣ် ၁၈ သီႇ ၂၀၂၃ နံၣ်ႇ ခ့ၣ်အဲးစံၣ် မိၣ်လိၣ်ကၠိ(ဖဲထၣ်)ပယီၤသုးကလၢၤလၢအိၣ်ဆီလီၤသးန့ၢ်အနံၣ်သၢဆံဃၣ်ဃၣ်လၢအအိၣ်ဆီလီၤသးဖဲခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၅)ဟီၣ်က၀ီၤအပူၤအံၤ ဖဲမဟါလါဒံၣ်စ့ဘၢၣ် ၁၇ သီ မုၢ်ဃ့ၢ်လီၤအဆၢကတီၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ထီၣ်မၤန့ၢ်၀ဲလံအဂ့ၢ်န့ၣ် (Force For Federal-FFD) ထုးထီၣ်ပာ်ဖျါတၢ်ကစီၣ်ဖဲတနံၤအံၤလါဒံၣ်စ့ဘၢၣ် ၁၈ သီအနံၤန့ၣ်လီၤႉ မိၣ်လိၣ်ကၠိ(ဖဲထၣ်)သုးကလၢၤတဖျၢၣ်အံၤအပူၤန့ၣ်ပယီၤသုးနီၣ်ဂံၢ်အိၣ်၀ဲ(၁၂၀)ဃၣ်ဃၣ်ဒီးလၢတၢ်ကထီၣ်မၤန့ၢ် သုးကလၢၤအံၤဂီၢ်(KNLA)သုးပာ်ဖှိၣ်ဟံးန့ၢ်၀ဲတၢ်ဆၢကတီၢ်အသီ(၂၀)ဃၣ်ဃၣ်ညါဒီးနုာ်လီၤခး၀ဲသုကလၢၤအံၤ(၂)ဘျီ အဃိသုးကီၣ်ကးတကပၤသံဘၣ်ဒိဘၣ်ထံး၀ဲဒၣ်အါမးဒီးဃ့ၢ်ထီၣ်လၢသုးကလၢၤပူၤအိၣ်၀ဲတနီၤအဂ့ၢ်န့ၣ် (Force For Federal-FFD) မူဒါခိၣ်–၂ ဒီၣ်ကထၢၣ် အီၣ်အီၣ် စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပလဲၤထီၣ်တၢ်ဘျီ၀ဲအံၤဘၣ်တၢ်တီခိၣ်ရိၣ်မဲအီၤလၢ(KNU),(KNLA)မီၤနီၤႉတၢ်ထီၣ်သုးကလၢၤဘျီ၀ဲ အံၤပၣ်၀ဲဒၣ်ပကရူၢ်(FFD)ဒီးကရ့ၣ်နံၣ်တၢ်ပၢၢ်ဆၢသုးကရူၢ်လီၤႉဒ်သိးပထီၣ်သုးကလၢၤကန့ၢ်အဂီၢ်န့ၣ်ပဟံး၀ဲဒၣ်တၢ်ဆၢကတီၢ်အသီခံဆံဃၣ်ဃၣ်ညါဒီးပဘၣ်ထီၣ်အီၤကီကီခဲခဲလီၤႉမ့မ့ၢ်လၢဒုၣ်ဒါတၢ်သံတၢ်ဘၣ်ဒိဘၣ်ထံးခီဒုအ၀ဲသ့ၣ်စံၣ်ဖျိးထီၣ်လၢသုးကလၢၤပူၤအိၣ်ဒီးဘၣ်ဖဲပမၤဆှဲဟီၣ်က၀ီၤအဃိအသံဘၣ်ဒိဘၣ်ထံးအိၣ်ဆံးအါလဲၣ်ခီန့ၣ်ပတသ့ၣ် ညါဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ထံထၣ်(မိၣ်လိၣ်ကၠိ)ပယီၤသုးကလၢၤလၢတၢ်ထီၣ်န့ၢ်၀ဲဒၣ်ခဲအံၤန့ၣ်မ့ၢ်၀ဲဒၣ်(KNLA)ဒီးကရ့ၣ်နံၣ်တၢ်ပၢၢ်ဆၢသုးပာ်ဖှိၣ်ႇ ဖဲၣ်ဒရၢၣ်ဒံၣ်မိၣ်ခြ့ၣ်စံၣ်သုးကရူၢ်(Force for Federal Democracy -FFD)သ့ၣ်တဖၣ်အံၤပာ်ဖှိၣ်ထီၣ်သး လဲၤထီၣ်မၤန့ၢ်၀ဲဒၣ်လီၤအဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါဖဲတၢ်လဲၤထီၣ်ခးသုးကလၢၤအံၤအခါသုးကီၣ်ကးအကဘီယူၤဟဲထီၣ်ဆှၢ၀ဲကျိချံၦာ်သၣ်သ့ၣ်တဖၣ်အါအါဂီၢ်ဂီၢ်ဒီးဒ်န့ၣ်အသိးဒုးသုးကဘီယူၤစ့ၢ်ကီးဟဲခးလီၤစၢၤတၢ်အိၣ်၀ဲဘၣ်ဆၣ်အ၀ဲသ့ၣ်ဘၣ်ဟ့ၣ်ဃၣ်ကွံာ်၀ဲဒၣ် သုးကလၢၤအံၤ န့ၣ်လီၤႉ လၢတၢ်ထီၣ်မၤန့ၢ်သုးကလၢၤဘျီ၀ဲအံၤအပူၤန့ၣ်ဘၣ်ဃးခံခီခံကပၤတၢ်သံတၢ်ဘၣ်ဒိဘၣ်ထံးတၢ်အိၣ်သးဒီး တၢ်မၤန့ၢ်ကျိချံၦာ်သၣ်တၢ်အိၣ်သးလီၤတံၢ်လီၤဆဲးခီန့ၣ်ပခ့ၣ်အဲးစံၣ်–ကညီတၢ်ကစီၣ်မၤလီၤတံၢ်ပာ်ဂၢၢ်ပာ်ကျၢၤ၀ဲ တန့ၢ်ဒံးဘၣ်န့ၣ်လီၤႉ
၁၅ သီအတီၢ်ပူၤ သုးကီၣ်ကးအၦၤသံ(၈)ဂၤ ဘၣ်ဒိ(၃၅)ဂၤအဂ့ၢ်န့ၣ် (သုးက့ ၅)ထုးထီၣ်ပ၁်ဖျါ
လါဒံၣ်စ့ဘၢၣ် ၁၈ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၅)ဟီၣ်က၀ီၤအပူၤ စးထီၣ်တလါအံၤလါဒံၣ်စ့ဘၢၣ် ၁ သီ တုၤ ၁၅ သီ တၢ်ဒုးကဲထီၣ်လၢခံခီခံကပၤအတီၢ်ပူၤန့ၣ် သုးကီၣ်ကးအၦၤသံ၀ဲဒၣ်(၈)ဂၤဒီးဘၣ်ဒိ၀ဲ(၃၅)ဂၤ အဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲလါဒံၣ်စ့ဘၢၣ် ၁၆ သီအနံၤန့ၣ်လီၤႉ ဟီၣ်က၀ီၤဖဲန့ၣ်အပူၤ KNLA(သုးက့ ၅)စုတီၤဖီလာ်သုးရ့ၣ်တဖၣ်ဒီးသုးကီၣ်ကးအဘၢၣ်စၢၤ တၢ်ဒုးကဲထီၣ်ပာ်ဖှိၣ်ခဲလၢာ် အိၣ်၀ဲ(၆၂)ဘျီ သုးကီၣ်ကးတကပၤသံ၀ဲဒၣ်(၈)ဂၤႇဘၣ်ဒိ(၃၅)ဂၤအကျါပၣ်ဃုာ် သုးစကီၤဖိတဂၤန့ၣ်လီၤႉ ဒ်န့ၣ်အသိး(KNLA)မၤဟးဂီၤကွံာ်၀ဲသုးကီၣ်ကးအတၢ်သူၣ်ထီၣ်(၁၄)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်တၢ်ကစီၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါခံခီခံကပၤတၢ်ဒုးအတီၢ်ပူၤသုးကီၣ်ကးအကဘီယူၤဟဲခးလီၤတၢ်လၢလူၤသီကီၢ်ဆၣ်ထးခီတကပၤ အိၣ်၀ဲ(၉)ဘျီညါဒီးပယီၤသုးခးလီၤကျိဖးဒိၣ်လၢကမျၢၢ်ဒူသ၀ီတၢ်ဖံးအီၣ်မၤအီၣ်လီၢ်ကျဲအိၣ်၀ဲ(၁၁)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ လၢတဆံယဲၢ်သီအတီၢ်ပူၤအံၤသုးကီၣ်ကးတကပၤသံဘၣ်ဒိဘၣ်ထံးအိၣ်၀ဲဘၣ်ဆၣ်မ့မ့ၢ်(KNLA)တကပၤန့ၣ် တၢ်သံတၢ်ဘၣ်ဒိဘၣ်ထံးတအိၣ်နီမံၤဘၣ်အဂ့ၢ်န့ၣ် ခ့ၣ်အဲၣ်ယူၣ်တကပၤစံး၀ဲန့ၣ်လီၤႉ လၢန့ၣ်အမဲာ်ညါခီဖျိသုးကီၣ်အကဘီယူၤဟဲခးလီၤတၢ်ဒီးပယီၤသုးခးလီၤကျိဖးဒိၣ်အဃိဘၣ်ဟးဂီၤ၀ဲဒၣ် ၦၤကမျၢၢ်အဟံၣ်(၄)ဖျၢၣ်ႇတၢ်ဘါယွၤသရိာ်တဖျၢၣ်ႇတၢ်ထုကဖၣ်ဒၢးတဖျၢၣ်ႇဘုဖီတဖျၢၣ်ဒီးစဲးကၢးတခိၣ်အဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ ဒ်န့ၣ်အသိးလၢ(သုးက့ ၅)ဟီၣ်က၀ီၤအပူၤ ဖဲလါဒံၣ်စ့ဘၢၣ် ၁၁ သီအနံၤန့ၣ် သုးကီၣ်ကးအကဘီယူၤဟဲဆှၢ၀ဲဒၣ် တၢ်အီၣ်တၢ်အီႇကျိချံၦာ်သၣ်တဖၣ်လၢမိၤလိၤကၠိ(ဖဲထၣ်)ဒုးယၤသုးကလၢၤအံၤဒီးဖဲန့ၣ်တၢ်ဘိၣ်တဖၣ်လီၤတဲာ်၀ဲလၢ အသုးကလၢၤပူၤတနီၤဒီးတၢ်ဘိၣ်လၢအဂၤတနီၤခီန့ၣ်လီၤတဲာ်အိၣ်တ့ၢ်လၢသုးကလၢၤအချၢအဂ့ၢ်န့ၣ် (KNLA)ဂံၢ်ခီၣ်ထံး တၢ်ကစီၣ် စံး၀ဲန့ၣ်လီၤႉ သုးကီၣ်ကးအသုးကလၢၤလၢအိၣ်ဖၣ်ပူၣ်၀့ၢ်ပူၤတဖၣ်အံၤခီဖျိကျဲတၢ်ကီတၢ်ခဲအဃိၦၤသုးဖိဟံၣ်ဖိဃီဖိတဖၣ်အံၤ တၢ်အီၣ်တၢ်အီတအိၣ်လၢၤဘၣ်ဒီးလၢတၢ်န့ၣ်အဃိအ၀ဲသ့ၣ်လဲၤလီၤလၢသ၀ီပူၤဟံန့ၢ်ဆူၣ်၀ဲၦၤကမျၢၢ်တၢ်အီၣ်တၢ်အီ တဖၣ်အဂ့ၢ်န့ၣ် ဖၣ်ပူၣ်ကမျၢၢ်တဖၣ်စံး၀ဲန့ၣ်လီၤႉ ဒ်န့ၣ်အသိးလၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤအပူၤ ခီဖျိတၢ်ဒုးကဲထီၣ်လၢ(KNLA)ဒီးပယီၤသုးအဘၢၣ်စၢၤ ခဲအံၤခဲအံၤအဃိ ဟီၣ်က၀ီၤဒူသ၀ီၦၤကမျၢၢ်သ့ၣ်တဖၣ်တုၤလၢခဲအံၤဘၣ်ဃ့ၢ်မှံဟးဖျိးဒံး၀ဲအဖၢမုၢ်အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ
တၢ်လဲၤမၤပိၢ်ဖးထီၣ်ကီးနွဲၣ်သ၀ီတိၤခံ၀ီတ၀ီအဃိ တိၤလီၤၦီၢ်ဟးဂီၤခဲလၢ၁်
လါဒံၣ်စ့ဘၢၣ် ၁၈ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံးကီၢ်ဆၣ်အပူၤ တိၤတဘိလၢအအိၣ်ဖဲကီးတရံး၀့ၢ်ဟးထီၣ် ကီးတရံး–မၠၣ်၀တံၣ် အ့ရှါကျဲမုၢ်ဖီခိၣ် ကီးနွဲၣ်သ၀ီပူၤအံၤ ဖဲလါဒံၣ်စ့ဘၢၣ် ၁၆ သီ ဟါခီ ၇း၃၀ ဃၣ်ဃၣ်အဆၢကတီၢ်န့ၣ် တၢ်ပၢၢ်ဆၢသုးပာ်ဖှိၣ် လဲၤမၤပိၢ်ဖးထီၣ်၀ဲအဃိတိၤအံၤလီၤၦီၢ်ဟးဂီၤ၀ဲခဲလၢာ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ အပူၤကွံာ်ဖဲတၢ်လဲၤမၤဟးဂီၤကီးနွဲၣ်တိၤအခိၣ်တိတဘျီအခါန့ၣ်တိၤအံၤတဟးဂီၤ၀ဲဒီတဘိဘၣ်ဒီးဘၣ်ဆၣ် တၢ်လဲၤမၤဟးဂီၤအီၤခဲအံၤတဘျီန့ၣ်ဟးဂီၤ၀ဲဒီတဘိဟးထီၣ်က့ၤလီၤတသ့နီတစဲးလၢၤဘၣ်အဂ့ၢ်န့ၣ် လီၢ်က၀ီၤကမျၢၢ် စံး၀ဲန့ၣ်လီၤႉ လီၢ်က၀ီၤၦၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲလၢ“ၦၤဟဲမၤပိၢ်ဖးထီၣ်အခီၣ်ထံးတဘျီအခါန့ၣ်တိၤအံၤ တဟးဂီၤခဲလၢာ်ဘၣ်ႉဖဲမဟါကၢာ်ၦၤဟဲမၤဟးဂီၤကဒီးဘျီလီၤၦီၢ်ဟးဂီၤခဲလၢာ်လီၤႉသိလ့ၣ်လ့ၢ်ထီၣ်လ့ၢ်လိၤတန့ၢ် နီတစဲးလၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ကီးနွဲၣ်တိၤလၢတၢ်မၤဟးဂီၤ၀ဲခဲအံၤန့ၣ်သုးကီၣ်ကးသူ၀ဲလၢတၢ်ဆှၢထီၣ်ဆှၢလီၤသုးဂံၢ်ဘါႇကျိချံၦာ်သၣ်ႇ တၢ်အီၣ်တၢ်အီတဖၣ်ဒီး သုးကီၣ်ကးအံၤပကဘၣ်မၤတဲာ်ကွံာ်အ၀ဲသ့ၣ်လၢကျဲကိးကပၤဒဲးအဂ့ၢ်န့ၣ် ကီးတရံးကီၢ်ဆၣ် ၦၤလၢဘူးဒီးတၢ်ပၢၢ်ဆၢသုးကရူၢ်တဖၣ်စံး၀ဲန့ၣ်လီၤႉ ဒ်န့ၣ်အသိးခီဖျိတၢ်ဒုးဆဲးကဲထီၣ်ဒံး၀ဲလၢတၢ်ပၢၢ်ဆၢသုးပာ်ဖှိၣ်ဒီးပယီၤသုးအဘၢၣ်စၢၤအဃိ ကီးတရံး–မၠၣ်၀တံၣ် အ့ရှါကျဲအံၤ ၦၤဟးထီၣ်က့ၤလီၤတန့ၢ်ဒံး၀ဲဘၣ်ဒီးလၢတၢ်န့ၣ်အဃိၦၤကမျၢၢ်တဖၣ်ဘၣ်လ့ၢ်လိၤလ့ၢ်ထီၣ်က့ၤ၀ဲလၢ ထိၣ်ကီၤကိကျဲတကပၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ တကးဒံးဘၣ်အမဲာ်ညါလၢတၢ်ကထီၣ်မၤန့ၢ်ဖီၣ်ဂၢၢ်က့ၤကီးတရံး၀့ၢ်အံၤအဂီၢ် စးထီၣ်ဖဲလါဒံၣ်စ့ဘၢၣ် ၁ သီန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်နုာ်လီၤမၤ၀ဲတၢ်ထီၣ်ဒုးဒီးတုၤလၢခဲအံၤလၢ၀့ၢ်ပူၤန့ၣ် တၢ်ဒုးကဲထီၣ်ဒံး၀ဲအဖၢမုၢ်န့ၣ်လီၤႉ ဖဲအပူၤကွံာ်(၂၀၂၁)လါဒံၣ်စ့ဘၢၣ် ၁၉ သီအနံၤစ့ၢ်ကီး တၢ်လဲၤမၤပိၢ်ဖးထီၣ်ဒံး၀ဲကီးနွဲၣ်တိၤအံၤဒီး အခါဖဲန့ၣ်တိၤအံၤ တလီၤၦီၢ်ဟးဂီၤခဲလၢာ်ဘၣ်ဒီးဘၣ်ဆၣ်တၢ်လဲၤမၤဟးဂီၤ၀ဲခဲအံၤတဘျီန့ၣ်တိၤလီၤၦီၢ်ဟးဂီၤ၀ဲဒၣ်ခဲလၢာ်န့ၣ်လီၤႉဘၣ်ဃး တၢ်လဲၤမၤဟးဂီၤတိၤအံၤမ့ၢ်ကရူၢ်ကရၢဖဲလဲၣ်တဒူၣ်မၤ၀ဲလဲၣ်န့ၣ်တၢ်ထုးထီၣ်ပာ်ဖျါ၀ဲတအိၣ်ဒံးဘၣ်ဒီးဒ်န့ၣ်အသိးခဲအံၤၦၤလ့ၢ်ထီၣ်လ့ၢ်လိၤတသ့နီတစဲးလၢၤဘၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
လၢကမၤဆူၣ်ထီၣ်ဒုးယၤတၢ်ဟူးတၢ်ဂဲၤအဂီၢ်(NUG)တၢ်ဒီသဒၢကိတိာ်ဒီးကလံၤထံးတၢ်ပၢၢ်ဆၢသုးကရူၢ်တဖၣ် ထံၣ်လိာ်တဲသကိးတၢ်
လါဒံၣ်စ့ဘၢၣ် ၁၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢတလၢၤကီၢ်စဲၣ် ၀ီၢ်ရ့ၣ်ကီၢ်ဆၣ်အပူၤ ဖဲအပူၤကွံာ်လါဒံၣ်စ့ဘၢၣ် ၁၁ သီအနံၤန့ၣ် ကလံၤထံးဟီၣ်က၀ီၤတၢ်ပၢၢ်ဆၢ သုးကရူၢ်တဖၣ်ဒီးဒီကလုာ်ဃူဖိးပဒိၣ်(NUG)တၢ်ဒီသဒၢကိတိာ်၀ဲၤကျိၤ ကီၢ်စၢဖှိၣ် ကိတိာ်–၂ နဲၤကီယွဲၣ် ထံၣ်လိာ်တဲသကိးတၢ်ဒီးတၢ်ထံၣ်လိာ်အိၣ်တဲသကိးအပူၤတၢ်တဲသကိးဘၣ်ဃးတၢ်ကမၤဆူၣ်ထီၣ်ဒုးယၤတၢ်ဟူး တၢ်ဂဲၤအဂ့ၢ်အကျိၤအဂ့ၢ်န့ၣ် သ့ၣ်ညါဘၣ်လၢတၢ်ပၢၢ်ဆၢသုးကရူၢ်အအိၣ်န့ၣ်လီၤႉ တၢ်ထံၣ်လိာ်အိၣ်သကိးဘျီ၀ဲအံၤအပူၤန့ၣ်တၢ်တၢၣ်ပီၣ်တဲသကိးဘၣ်ဃးဟီၣ်က၀ီၤပူၤဒုးယၤတၢ်ဟူးတၢ်ဂဲၤတၢ်အိၣ်သးဒီး တၢ်ဒုးအိၣ်ထီၣ်တၢ်ဒီသဒၢကမျၢၢ်သုး(PDF)သုးအဂ့ၢ်အကျိၤတဖၣ်ဒီးတကးဒံးဘၣ်တၢ်ပၢၢ်ဆၢသုးပာ်ဖှိၣ်အသုးဖိသံၣ်ဖိ တဖၣ်ကအိၣ်ဒီးတၢ်သူၣ်ဆူၣ်သးဂဲၤႇကရူၢ်အတၢ်ကီတၢ်ခဲတၢ်အိၣ်သးသ့ၣ်တဖၣ် တၢ်တဲသကိး၀ဲဒၣ်အဂ့ၢ်န့ၣ် တလၢၤကီၢ်စဲၣ် တၢ်ပၢၢ်ဆၢသုးကရူၢ်(MSRO)မူဒါခိၣ် ကိၤဒံကၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“ပတီၣ်ဖျါထီၣ်ဒီးပတဲသကိးဘၣ်ဃးသိၣ်မှံၤသုးပာ်ဖှိၣ်လၢအအိၣ်ဖဲပျီပူၤတဖၣ်အံၤအတၢ်လိၣ်ဘၣ်ဒီး တၢ်ပညိၣ်န့ၣ်လၢၦၤသုးဖိသံၣ်ဖိတဖၣ်အံၤကအိၣ်ဒီးတၢ်သူၣ်ဆူၣ်သးဂဲၤလၢတၢ်ပၢၢ်ဆၢပူၤမီၤနီၤႉတၢ်တဲသကိး တၢ်ဂ့ၢ်အခိၣ် သ့ၣ်န့ၣ်သိၣ်မှံၤသုးပာ်ဖှိၣ်ခဲလၢာ်ကပာ်ဖှိၣ်ထီၣ်သးမၤဆူၣ်ထီၣ်ဒုးယၤတၢ်ဟူးတၢ်ဂဲၤဒီးကမၤၦဲၤထီၣ်က့ၤတၢ်လၢအလိၣ်သ့ၣ်တဖၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်ထံၣ်လိာ်သးဘျီ၀ဲအံၤအပူၤန့ၣ်ကလံၤထံးကီၢ်ခီသုးဟီၣ်က၀ီၤၦၤဘၣ်မူဘၣ်ဒါႇတလၢၤတၢ်ပၢၢ်ဆၢသုးကရူၢ်(MSRF), တီနီၢ်သုးကျိၤႇ (ABSDF) သုးရ့ၣ် ၁ႇ ယ့ပၠီၣ်ကၠါ(YGF), (Ye Defense Force – YDF), (Mon State Revolutions Organization-MSRO) ဒီး(Ye Air Force-YAF)တၢ်ပၢၢ်ဆၢသုးကရူၢ်သ့ၣ်တဖၣ်အံၤ ဟဲထီၣ်၀ဲဒၣ်န့ၣ် လီၤႉ ဟီၣ်က၀ီၤဖဲန့ၣ်အပူၤတၢ်ပၢၢ်ဆၢသုးပာ်ဖှိၣ်ကရူၢ်တဖၣ်အိၣ်ကတီၤထီၣ်သးလၢဒုးယၤတၢ်ဟူးတၢ်ဂဲၤတကပၤလံဒီး ဒ်န့ၣ်အသိးပယီၤသုးကျိၤဟးထီၣ်က့ၤလီၤဟူးဂဲၤလၢဒူသ၀ီလၢအိၣ်ဘူးတၢ်ခိၣ်တၢ်ဃၢၤဖဲန့ၣ်တဖၣ်အိၣ်၀ဲအဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်ကရူၢ်တကပၤစံး၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်လါနိၣ်၀့ဘၢၣ် ၃၀ သီအနံၤစ့ၢ်ကီး တၢ်ပၢၢ်ဆၢသုးပာ်ဖှိၣ်လၢအအိၣ်ဆီလီၤသးဟူးဂဲၤဖဲ တလၢၤကီၢ်စဲၣ်ပူၤသ့ၣ်တဖၣ်အံၤလၢကဒုးဆီၣ်ဖျိးထီၣ်ကွံာ်သုးမီၤစိရိၤသနူအံၤအဂီၢ်န့ၣ်အ၀ဲသ့ၣ်အၢၣ်လီၤသးအီ၀ဲဒၣ် တၢ်အၢၣ်လီၤထံလၢကနုာ်လီၤပၢၢ်ဆၢတၢ်တုၤလၢတၢ်ပၢၢ်ဆၢ၀ံၤတစုအဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်တဖၣ် ထုးထီၣ်ပာ်ဖျါ၀ဲလၢအ၀ဲသ့ၣ်(page)ပူၤန့ၣ်လီၤႉ
တၢ်လဲၤမၤဟးဂီၤ(သ့ၣ်ကါညံၣ်နီၣ်)လီမ့ၣ်အူခိၣ်ဆၢၣ်၀ံၤလီၢ်ခံမၠၣ်၀တံၣ်၀့ၢ်ပူၤမ့ၣ်အူတဟဲလၢၤဘၣ်
လါဒံၣ်စ့ဘၢၣ် ၁၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ်အပူၤ သ့ၣ်ကါညံၣ်နီၣ် လီမ့ၣ်အူခိၣ်ဆၢၣ်(Transformer)လၢအအိၣ်ဖဲမၠၣ်၀တံၣ်၀့ၢ်ဃၢၤအံၤ ဖဲအပူၤကွံာ်လါဒံၣ်စ့ဘၢၣ် ၁၂ သီ ဟါခီအဆၢကတီၢ် ဖီၣ်စုက၀ဲၤကရူၢ်လၢတၢ်တသ့ၣ်ညါအမံၤတဖၣ်ဟဲမၤဟးဂီၤ၀ဲ အဃိ တကီၢ်ခါခဲအံၤလၢမၠၣ်၀တံၣ်၀့ၢ်ပူၤန့ၣ်မ့ၣ်အူတဟဲလၢၤဘၣ်အဂ့ၢ်န့ၣ် မၠၣ်၀တံၣ်ကမျၢၢ်တဂၤ စံး၀ဲန့ၣ်လီၤႉ လီမ့ၣ်အူခိၣ်ဆၢၣ်(Transformer)အံၤဖီၣ်စုက၀ဲၤလၢတၢ်တသ့ၣ်ညါအမံၤတဒူၣ်ဟဲမၤဟးဂီၤ၀ဲလၢဒြိဒီး တၢ်မၤဟီၤဂီၤ လီမ့ၣ်အူခိၣ်ဆၢၣ်ကဲထီၣ်၀ံၤလီၢ်ခံလၢမၠၣ်၀တံၣ်၀့ၢ်ဒီတ၀့ၢ်အပူၤန့ၣ်မ့ၣ်အူတဟဲလၢၤဘၣ်ဒီးလၢတၢ်န့ၣ်အဃိ ၦၤကမျၢၢ်လၢအိၣ်၀့ၢ်ပူၤက၀ီၤဒ့ပူၤတဖၣ်ဘၣ်ဆီတလဲသူက့ၤ၀ဲဒၣ်မ့ၣ်အူစဲးအဂ့ၢ်န့ၣ် မၠၣ်၀တံၣ်ကမျၢၢ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“စးထီၣ်ဖဲ ၁၂ သီ ဟါခီန့ၣ် မ့ၣ်အူတဟဲလၢၤဘၣ်ႉၦၤတဲလၢၦၤဟဲမၤဟးဂီၤသ့ၣ်ကါညံၣ်နီၣ်(Transformer) လၢဒြိအဃိမ့ၣ်အူတဟဲလၢၤဘၣ်ႉၦၤဟံၣ်လၢအမ့ၣ်အူစဲးအိၣ်ညါဒုနထၢနုာ်လီၤသိနနိထီၣ်အီၤ န့ၢ်ဒံးမီၤနီၤႉ ၦၤလၢအမ့ၣ်အူစဲးတအိၣ်ႇအၦ့ၤသိတန့ၢ်ဘၣ်တဖၣ်ညါန့ၣ်ဘၣ်လဲၤသွီ၀ဲဒၣ်တၢ်လၢၦၤလၢအစဲးအိၣ် တဖၣ်အဟံၣ်ဒ်န့ၣ်လီၤႉ နကနိထီၣ်စဲးအဂီၢ်သိစ့ၢ်ကီးအၦ့ၤထီၣ်ဘျီနးဒိၣ်ထီၣ်၀ဲန့ၣ်ႉမ့လဲၤသးဒ်အံၤဒုယဆိမိၣ်ကယံၤလၢအလါညါ”အဂ့ၢ်န့ၣ် စံးဘၣ် ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဘၣ်ဃးတၢ်လဲၤမၤဟးဂီၤလီမ့ၣ်အူခိၣ်ဆၢၣ်(Transformer)အံၤမ့ၢ်ကရူၢ်ကရၢဖဲလဲၣ်တဒူၣ်မၤ၀ဲလဲၣ်န့ၣ် တၢ်ထုးထီၣ်ပာ်ဖျါ၀ဲတအိၣ်ဘၣ်ဒီးဘၣ်ဆၣ်မ့မ့ၢ်သုးကီၣ်ကးစုတီၤဖီလာ်တၢ်ကစီၣ်တဖၣ်ခီန့ၣ်တဲ၀ဲလၢ(KNLA),(PDF) လဲၤတ့ၢ်လီၤ၀ဲဒီး(Drop Bomb)ဒြီးပ်မ့ၣ်ပိၢ်လီၤအဂ့ၢ်န့ၣ် ကွဲးဖျါ၀ဲန့ၣ်လီၤႉ လၢန့ၣ်အမဲာ်ညါလၢမၠၣ်၀တံၣ်၀့ၢ်ပူၤခီဖျိလီမ့ၣ်အူတဟဲလၢၤဘၣ်အဃိတၢ်ဖံးတၢ်မၤလီၢ်လၢအဘၣ်သူ၀ဲလီမ့ၣ်အူ သ့ၣ်တဖၣ်အံၤဘၣ်ဆိကတီၢ်ကွံာ်၀ဲတၢ်ဖံးတၢ်မၤဒီးထံၣ်ဘၣ်၀ဲဒၣ်တၢ်ကီတၢ်ခဲအဂ့ၢ်န့ၣ် ၦၤမၤတၢ်လၢ(အီၤလါ)ပူၤ တဂၤ စံး၀ဲဒ်အံၤန့ၣ်လီၤႉ “တလိၣ်တဲလၢၤဘၣ်မ့ၣ်အူဟဲဒံးအခါန့ၣ်မးနဖံးအီၣ်မၤအီၣ်တၢ်တဘၣ်ဂီၢ်ဘၣ်ႉခဲအံၤမ့ၣ်အူတဟဲလၢၤဘၣ်ဘျီ နမၤတၢ်တဘၣ်နီတမံၤလၢၤဘၣ်ႉပတၢ်မၤခီန့ၣ်ပဆါတၢ်လၢ(အီၤလါ)ပူၤအဃိမ့ၣ်အူမ့ဟဲမးနမၤတၢ်မၤသ့မီၤနီၤႉ ခဲအံၤပဘၣ်အိၣ်ဘှံးဆိဃာ်ႉသးဘၣ်ဖှီၣ်ဒိၣ်မးမၤတၢ်တဘၣ်ဂီၢ်နီတခါလၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်– ကညီတၢ်ကစီၣ်န့ၣ်လီၤႉ တကီၢ်ခါခဲအံၤသ့ၣ်ကါညံၣ်နီၣ်လီမ့ၣ်အူခိၣ်ဆၢၣ်(Transformer)လၢတၢ်လဲၤမၤဟးဂီၤ၀ဲဒၣ်အံၤတၢ်တက့ၤဘှီဂ့ၤထီၣ် ၀ဲဒံးဘၣ်ဒီးလီၢ်က၀ီၤကမျၢၢ်တဖၣ်စ့ၢ်ကီးဘၣ်ယိၣ်၀ဲလၢဖံးအီၣ်မၤအီၣ်ကကီခဲထီၣ်၀ဲအဂ့ၢ်န့ၣ် မၠၣ်၀တံၣ်ကမျၢၢ်တဖၣ် စံး၀ဲန့ၣ်လီၤႉ
ကီးတရံးတၢ်ဒုးအတီၢ်ပူၤ ၦၤကမျၢၢ်သံ(၂၀)ဘျဲၣ်အဂ့ၢ်ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲ
လါဒံၣ်စ့ဘၢၣ် ၁၅ သီႇ ၂၀၂၃ နံၣ်ႇ ခ့ၣ်အဲးစံၣ် ကီးတရံးကီၢ်ဆၣ်အပူၤ တၢ်ဒုးကဲထီၣ်ကအိၣ်၀ဲဒၣ်လၢခံနွံဃၣ်ဃၣ်လံဒီးတၢ်ဒုးကဲထီၣ်အတီၢ်ပူၤ ၦၤကမျၢၢ်သံ၀ဲဒၣ် အဂၤ(၂၀)ဘျဲၣ်ညါအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးအတၢ်မၤနီၣ်စရီအသိး သ့ၣ်ညါဘၣ်န့ၣ်လီၤႉ စးထီၣ်ဖဲလါနိၣ်၀့ဘၢၣ် ၃၀ သီအနံၤန့ၣ် လၢကီးတရံးကီၢ်ဆၣ်အပူၤသုးကလၢၤတၢ်လီၢ်လၢသုးကီၣ်ကးအၦၤ အိၣ်ဆီလီၤသးသ့ၣ်တဖၣ်အံၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်နုာ်လီၤခး၀ဲဒီး တၢ်ဒုးကဲထီၣ်အတီၢ်ပူၤန့ၣ် ၦၤကမျၢၢ်သံ၀ဲဒၣ်(၁၉)ဂၤအကျါပၣ်ဃုာ်၀ဲၦၤဖိသၣ်(၄)ဂၤအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိး တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“၀ဲဒၣ်န့ၣ်ပသံကွၢ်လီၢ်က၀ီၤၦၤဘၣ်မူဘၣ်ဒါဒီးၦၤလၢအထံၣ်တၢ်ကဲထီၣ်သးလၢအမဲာ်တဖၣ်ႇ ၦၤလၢအဃ့ၢ်ထီၣ်တဖၣ်မီၤနီၤႉဒ်ပမၤနီၣ်စရီအသိးန့ၣ်ၦၤဖိသၣ်(၁၅)နံၣ်ဆူဖီလာ်သံ၀ဲဒၣ်လၢကျိဖးဒိၣ်အက့အခီ န့ၣ် အိၣ်၀ဲ(၄)ဂၤႉမ့မ့ၢ်ၦၤနီၢ်ဒိၣ်န့ၣ်သံ၀ဲဒၣ်(၁၉)ဂၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ၦၤကမျၢၢ်လၢအသံသ့ၣ်တဖၣ်အံၤအသံတၢ်ဂ့ၢ်န့ၣ်ခီဖျိကဘီယူၤဟဲခးလီၤတၢ်လၢက၀ီၤဒ့၀့ၢ်ပူၤႇဒူသ၀ီပူၤဒီး ပယီၤသုးခးလီၤကျိဖးဒိၣ်အဃိလီၤအဂ့ၢ်န့ၣ်တၢ်ပၢၢ်ဆၢသုးပာ်ဖှိၣ်တကပၤစံး၀ဲဒၣ်န့ၣ်လီၤႉ ဒ်န့ၣ်အသိး မ့မ့ၢ်ၦၤလၢ အဟ့ၣ်ဂံၢ်ဟ့ၣ်ဘါသုးကီၣ်ကးတဖၣ်ခီန့ၣ်ကွဲးဖျါထီၣ်၀ဲလၢၦၤသံသ့ၣ်တဖၣ်အံၤခီဖျိလၢတၢ်ပၢၢ်ဆၢ သုးပာ်ဖှိၣ်အဃိလီၤ အဂ့ၢ်န့ၣ် လိာ်ဘၢလိာ်ကွီၢ်ပာ်ထီၣ်လိာ်သးတၢ်ကမၣ်န့ၣ်လီၤႉ တုၤလၢတၢ်အိၣ်သးခဲအံၤလၢကီးတရံးကီၢ်ဆၣ်အပူၤတၢ်ဒုးကဲထီၣ်ဒံး၀ဲဒီးသုးကီၣ်ကးအခီၣ်ချ့သုးရ့ၣ်(ခမရ–၅၇) အံၤ ခးလီၤကျိဖးဒိၣ်ဆူ၀့ၢ်ပူၤဒီးဒူသ၀ီလၢအိၣ်ဘူးတၢ်ခိၣ်တၢ်ဃၢၤဖဲန့ၣ်တဖၣ်အပူၤကိးမုၢ်နံၤဒဲးဒီး ခီဖျိကျိဖးဒိၣ်ချံအံၤအဃိ ဘၣ်သံ၀ဲအလံၤတဂၤ အဂ့ၢ်န့ၣ် ဖံသးပှၢ်တဂၤ စံး၀ဲဒ်အံၤန့ၣ်လီၤႉ ၦၤဖိသၣ်(၁၄)နံၣ်လၢအသံတဂၤအံၤအဖံနီၢ်မုၣ်ဒါစံး၀ဲလၢ“လၢဂီၤခီခီကျိဖးဒိၣ်လီၤတဲာ်အဃိဘၣ်၀ဲဒၣ်ယလံၤဘျီ အသံမီၤနီၤႉယသးဘၣ်ဒိဒိၣ်မးယမ့တဲန့ၣ်ယဘၣ်သးဟီၣ်လီၤႉပဟဲတုၤဖဲအံၤဘျီပမၤဘူၣ်မၤဘါတၢ်လၢအဂီၢ်မီၤနီၤႉ မ့ၢ်လၢယအိၣ်ဒီးသးတၢ်ဆါအဃိယက့ၤဆိမိၣ်တန့ၢ်အါအါဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ တုၤလၢလါဒံၣ်စ့ဘၢၣ် ၁၄ သီအနံၤ လၢကီးတရံးကီၢ်ဆၣ်အပူၤ သုးကီၣ်ကးကဘီယူၤဟဲဆှၣ်တၢ် ဒီး ပယီၤသုးခးလီၤကျိဖးဒိၣ်ဒံးအဃိလီၢ်က၀ီၤၦၤကမျၢၢ်လၢအကလးဘၣ်ဃ့ၢ်ထီၣ်၀ဲဒီး ဒ်န့ၣ်အသိး ၦၤကမျၢၢ်အိၣ်ကတာ် ထီသးလၢတၢ်ဒုးပူၤစ့ၢ်ကီးအိၣ်ဒံး၀ဲအါမးအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ ခီဖျိတၢ်ဒုးကဲထီၣ်အဃိကီးတရံး၀့ၢ်ပူၤဃုာ်ဒီးဒူသ၀ီလၢအိၣ်တၢ်ခိၣ်တၢ်ဃၢၤဖဲန့ၣ်တဖၣ်ၦၤကမျၢၢ်လၢအကလးဘၣ်ဃ့ၢ်ထီၣ်၀ဲဒီးတကီၢ်ခါခဲအံၤလိၣ်ဘၣ်ဒံး၀ဲဒၣ်ဂ့ၢ်ဂီၢ်အူတၢ်ဆီၣ်ထွဲမၤစၢၤတဖၣ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ် စံး၀ဲန့ၣ်လီၤႉ
သုးကီၣ်ကးအပၢၤကီၢ်နု၁်လီၤဖီၣ်၀ဲဒၣ်တၢ်တၤကျိၣ်တၤစ့လီၢ်လၢအအိၣ်ဖဲလူၢ်ပျဲၢ် ထံၤလိၤသ၀ီဃၢၤအံၤ
လါဒံၣ်စ့ဘၢၣ် ၁၄ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် လူၢ်ပျဲၢ်ကီၢ်ဆၣ်အပူၤ ဖဲအပူၤကွံာ်လါဒံၣ်စ့ဘၢၣ် ၁၁ သီ ဟါခီအဆၢကတီၢ်န့ၣ် သုးကီၣ်ကးစုတီၤဖီလာ် ပၢၤကီၢ်သုးနုာ်လီၤဖီၣ်၀ဲဒၣ်အၤ၀ၤဒ့တၢ်တၤကျိၣ်တၤစ့လီၢ်လၢအအိၣ်ဖဲထံၤလိၤကရူၢ် ထံလိၤသ၀ီဃၢၤအံၤအဂ့ၢ်န့ၣ် လူၢ်ပျဲၢ်ကမျၢၢ်တဖၣ်စံး၀ဲန့ၣ်လီၤႉ တၢ်တၤကျိၣ်တၤစ့လီၢ်လၢလူၢ်ပျဲၢ်ကီၢ်ဆၣ်တၢ်ထိၣ်ဟီၣ်ခိၣ်၀ဲၤကျိၤခိၣ်လီၢ်လံၤတဂၤအိးထီၣ်၀ဲဒၣ်အံၤ ပၢၤကီၢ်သုးနုာ်လီၤဖီၣ်ဒီး ဘၣ်ဆၣ်မ့မ့ၢ်အကစၢ်ခီန့ၣ်ၦၤဖီၣ်တချုးဘၣ် ၦၤဖီၣ်န့ၢ်၀ဲဒၣ်လၢလၢအမါဒီးၦၤဟဲဂဲၤလိာ်ကွဲဖိ တဖၣ်လီၤအဂ့ၢ်န့ၣ် ၀့ၢ်ပူၤကမျၢၢ်တဂၤစံး၀ဲဒ်အံၤန့ၣ်လီၤႉ “တမ့ၢ်လူၢ်ပျဲၢ်ပၢၤကီၢ်သုးဖီၣ်၀ဲဒၣ်ဘၣ်ႉလူၢ်ပျဲၢ်ပၢၤကီၢ်သုးတဖၣ်အံၤအိၣ်ဒၣ်အ၀ဲသ့ၣ်ဖီၣ်လိာ်စုမၤသကိးတၢ်လီၤႉ ခဲအံၤၦၤနုာ်လီၤဖီၣ်တၢ်န့ၣ်ကီၢ်စဲၣ်ပၢၤကီၢ်သုးဟဲလီၤဖီၣ်၀ဲႉပၣ်ဒီဒူၣ်ညါၦၤလိာ်ကွဲညၣ်ဖိတဖၣ်နါက့ပၣ်တၢ်လိာ်ကွဲလၢ အဂၤနါက့ပၣ်ဒီဒူၣ်ညါႉ၀ံၤတဘျီဃီန့ၣ်ၦၤပံးကွံာ်၀ဲဒၣ်တၢ်တၤကျိၣ်တၤစ့လီၢ်အံၤလီၤ”အဂ့ၢ်န့ၣ် စံး၀ဲန့ၣ်လီၤႉ စးထီၣ်ဖဲတနံၣ်အံၤလါယူၤန့ၣ်တၢ်စးထီၣ်ဆီလီၤ၀ဲဒၣ်(အၤ၀ၤဒ့)တၢ်တၤကျိၣ်တၤစ့လီၢ်သ့ၣ်တဖၣ်အံၤဒီး လၢကီးတရံး၀့ၢ်ပူၤဖဲတၢ်ဒုးကဲထီၣ်လၢဟီၣ်က၀ီၤတၢ်ပၢၢ်ဆၢသုးပာ်ဖှိၣ်ကရူၢ်ဒီးပယီၤသုးအဘၢၣ်စၢၤအခါန့ၣ် ၦၤဘၣ်မူဘၣ်ဒါဟ့ၣ်ပလီၢ်ဒုးသ့ၣ်ညါ၀ဲလၢတဘၣ်ဆဲးအိးထီၣ်တၢ်တၤကျိၣ်တၤစ့လီၢ်အံၤဘၣ်အိၣ်၀ဲဒီးဘၣ်ဆၣ် ၦၤတလူၤပိာ်မၤထွဲ၀ဲဘၣ်အဂ့ၢ်န့ၣ် စံး၀ဲန့ၣ်လီၤႉ လူၢ်ပျဲၢ်ကမျၢၢ်လၢအဂၤတဂၤစ့ၢ်ကီးစံး၀ဲလၢ“ၦၤဘၣ်မူဘၣ်ဒါဒုးသ့ၣ်ညါတဲ၀ဲဘျီအတဲ၀ဲလၢၦၤမ့ပံးန့ၣ်ပံးမ့မ့ၢ်သါဒုသါတပံးဘၣ်ကွၢ်လၢသုဘၣ်သးလဲၤတၢၣ်န့ၣ်တဲ၀ဲဒ်န့ၣ်ႉကီးတရံးဒီးဖၣ်အၣ်န့ၣ်အိၣ်တယံၤအါအါဘၣ်မီၤနီၤႉတၢ်အိၣ်သးတဂ့ၤဒ်သိး လၢညါခါလၢၤဘၣ်အဃိၦၤတဲလၢတဘၣ်အိးထီၣ်လၢၤဘၣ်အိၣ်ပတုာ်ဆိဃာ်ၦၤတဲနါက့အ၀ဲတပံး၀ဲဘၣ်ႉတဲ၀ဲလၢၦၤလၢအအဲၣ်ဒိးဟဲဖီၣ်န့ၣ်ဟဲဖီၣ်သါတကိၢ်ဘၣ်ႉမ့၀ံၤပနၢ်ဟူလၢအသူ၀ဲဒၣ်သုးခိၣ်ကၠၤအ့အမံၤစ့ၢ်မီၤနီၤ”အဂ့ၢ်န့ၣ် စံးဘၣ် ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါတၢ်တၤကျိၣ်တၤစ့လီၢ်လၢအိၣ်လူၢ်ပျဲၢ်၀့ၢ် ဒဲပၠၣ်သ၀ီပူၤတဖၣ်လၢသုးကီၣ်ကးအသးၦၢ်ဒီး သုးခိၣ်သုးနၢ်တီခိၣ်ရိၣ်မဲအိးထီၣ်၀ဲသ့ၣ်တဖၣ်အံၤစ့ၢ်ကီးသုးအလီၢ်လၢ(ယွၤသ့ၣ်)သ၀ီလံဒီး တၢ်တနံၤဃီဖဲ တၢ်နုာ်လီၤဖီၣ်ထံၤလိၤတၢ်တၤကျိၣ်တၤစ့လီၢ်အံၤန့ၣ်ခီဖျိတၢ်နုာ်လီၤသမံသမိးတၢ်အဃိတၢ်ပံးကွံာ်၀ဲဒၣ် တၢ်လိာ်ကွဲလီၢ်အံၤအဂ့ၢ်န့ၣ် ကမျၢၢ်တဖၣ်စံး၀ဲန့ၣ်လီၤႉ ဖဲန့ၣ်၀ံၤလီၢ်ခံတုၤလၢလါဒံၣ်စ့ဘၢၣ် ၁၂ သီအနံၤန့ၣ် ပယီၤသုးမၤဃံးထီၣ်တၢ်နုာ်လီၤဟးထီၣ်လၢလူၢ်ပျဲၢ်၀့ၢ်ပူၤ အံၤအဃိ လီၢ်က၀ီၤၦၤကမျၢၢ်တဖၣ်ဘၣ်ဟးထီၣ်က့ၤလီၤလၢတၢ်ပလီၢ်ပဒီပူၤအဂ့ၢ်န့ၣ် ကမျၢၢ်တဖၣ်စံး၀ဲန့ၣ်လီၤႉ လူၢ်ပျဲၢ်၀့ၢ်အံၤအိၣ်၀ဲဒၣ်လၢသုးခိးကီၢ်ဆၢ(BGF)ဒီးသုးကီၣ်ကးအတၢ်ပၢဟီၣ်က၀ီၤပူၤဘၣ်ဆၣ် ခီဖျိတၢ်တၤကျိၣ်တၤစ့လီၢ် အံၤအဃိလၢ၀့ၢ်ပူၤန့ၣ်တၢ်ဟုၣ်တၢ်ဘျၣ်ဟဲအါထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ