ဖၣ်ပူၣ်၀့ၢ်ပူၤ ပယီၤသုးဟံၣ်ဖိဃီဖိဒူၣ်ဖိထၢဖိတဖၣ်သဂၢၢ်ဘၣ်တၢ်အီၣ်တၢ်အီလီၤတူ၁်
လါစဲးပထ့ဘၢၣ် ၂၂ သီႇ ၂၀၂၃ နံၣ်ႇ ခ့ၣ်အဲးစံၣ် ပယီၤသုးဟံၣ်ဖိဃီဖိဒူၣ်ဖိထၢဖိလၢအိၣ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅) ဟီၣ်က၀ီၤ ဖၣ်ပူၣ်၀့ၢ်ပူၤတဖၣ်အံၤ ခီဖျိတၢ်ပံးဃာ်၀ဲခိကျဲထံကျဲခံဘိလၢာ်အဃိ အ၀ဲသ့ၣ်သဂၢၢ်ဘၣ်၀ဲတၢ်အီၣ်တၢ်အီ လီၤတူာ်အဂ့ၢ်န့ၣ် သ့ၣ်ညါဘၣ်လၢၦၤဘူးဒီးပယီၤသုးဒူၣ်ဖိထၢဖိအအိၣ်န့ၣ်လီၤႉ စးထီၣ်ဖဲအပူၤကွံာ်(၂၀၂၂)နံၣ်လၢာ်အခါန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ပံးဃာ်ပယီၤသုးအတၢ်စိာ် ဆှၢထီၣ်ဆှၢလီၤတၢ်အီၣ်တၢ်အီအကျဲဒီးလၢတၢ်န့ၣ်အဃိအ၀ဲသ့ၣ်တၢ်အီၣ်တၢ်အီလီၤတူာ်ထီၣ်၀ဲဒီး ဟးလူၤဃုၦ့ၤအီၣ် က့ၤဟုသးလၢကမျၢၢ်အအိၣ်အဂ့ၢ်န့ၣ် ၦၤလၢဘူးဒီးပယီၤသုးဒူၣ်ဖိထၢဖိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲ(၈)လါတလါအခါန့ၣ်အ၀ဲသ့ၣ်စးထီၣ်ဟးလူၤၦ့ၤအီၣ်ဟုသးကယီကယီလံႉ ဘၣ်မနုၤအဃိလဲၣ်န့ၣ် အ၀ဲသ့ၣ်ဟံၣ်ဖိဃီဖိတၢ်အီၣ်တၢ်အီလီၤတူာ်လံမီၤႉမ့န့ၢ်တထၢၣ်ဒီးၦ့ၤ၀ဲတထၢၣ်ႇမ့န့ၢ်အထၢၣ်တဆံဒီးၦ့ၤ၀ဲအထၢၣ် တဆံဒ်န့ၣ်မီၤနီၤႉဟုသးတထၢၣ်န့ၣ်အၦ့ၤမ့အိၣ်(၁)ကလီၢ်န့ၣ်အ၀ဲသ့ၣ်ၦ့ၤ၀ဲဒၣ်(၁၃၀၀၀)ကၠးဒ်န့ၣ်ႉညီနုၢ်ကိးဘျီဒဲး ဖဲလါမ့ၤန့ၣ်သိလ့ၣ်ဟဲထီၣ်ဆှၢတၢ်အီၣ်တၢ်အီတုၤလီၤႉတနံၣ်အံၤတုၤလၢ(၉)လါတလါ လါစဲးပထ့ဘၢၣ်လံ သိလ့ၣ်ဟဲထီၣ် ဆှၢတၢ်အီၣ်တဖၣ်ဟဲတတုၤဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ခီဖျိပယီၤသုးတဖၣ်အံၤဟးလူၤၦ့ၤဟုသးဟ့ၣ်ဟုသးၦ့ၤဂ့ၤအဃိဟီၣ်က၀ီၤဖဲန့ၣ်အပူၤဟုသးအၦၤ့ဒိၣ်ထီၣ်၀ဲခံဆးညါ ဒီးအပူၤကွံာ်ဟုသးယိယိတထၢၣ်န့ၣ်အၦ့ၤအိၣ်ဒၣ်ထဲ(၁၈၀၀၀၀)ကၠးဘျဲၣ်လီၤဒီးဘၣ်ဆၣ်ခဲအံၤဟုသးယိယိတထၢၣ် န့ၣ် အၦ့ၤထီၣ်တုၤလၢ(၂၃၀၀၀၀)လံအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ တကီၢ်ခါခဲအံၤလၢဖၣ်ပူၣ်၀့ၢ်ပူၤဒီး၀့ၢ်ခိၣ်၀့ၢ်ဃၢၤဒူသ၀ီတဖၣ်အပူၤတၢ်ဒုးကဲထီၣ်၀ဲလၢဟီၣ်က၀ီၤ(KNLA)ဒီး သုးခိးကီၢ်ဆၢ(BGF),ပယီၤသုးတဖၣ်အဘၢၣ်စၢၤတပယူာ်ဃီအဃိ ဟီၣ်က၀ီၤဖဲန့ၣ်အပူၤၦၤသ၀ီဖိတဖၣ်တဖံးအီၣ် မၤအီၣ်ဘၣ်လၢၤကျီးႇတမၤအီၣ်ဘၣ်စံာ်လၢၤဘၣ်အဂ့ၢ်န့ၣ် ဖၣ်ပူၣ်လီၢ်က၀ီၤကမျၢၢ်စံး၀ဲန့ၣ်လီၤႉ ခီဖျိတၢ်တဆှၢထီၣ်ဟုသးတၢ်အီၣ်တၢ်အီလၢၤဘၣ်အဃိလါလၢကဟဲစးထီၣ်လါအီးကထိဘၢၣ်န့ၣ် တၢ်ကဟ့ၣ်ဆီၣ်ထွဲ မၤစၢၤက့ၤသုးဟံၣ်ဖိဃီဖိတဖၣ်လၢစ့လီၤအဂ့ၢ်န့ၣ် ၦၤလၢဘူးဒီးပယီၤသုးဟံၣ်ဖိဃီဖိတဂၤ စံးအါထီၣ်၀ဲဒ်အံၤန့ၣ်လီၤႉ “ပနၢ်ဟူလၢခဲကၢာ်တလါအလါတဆံ(လါအီးကထိဘၢၣ်)န့ၣ်ၦၤတဟ့ၣ်နီၤလီၤသုးဟံၣ်ဖိဃီဖိဟုသးလၢၤဘၣ်ႉ ကဟ့ၣ်က့ၤ၀ဲလၢစ့လီၤႉဟ့ၣ်စ့မ့၀ံၤဘျီန့ၣ်ကစၢ်ဒၣ်၀ဲဘၣ်ဟးၦ့ၤအီၣ်ဟုသးမီၤနီၤႉလီလီစဲၤခဲအံၤဒုအ၀ဲသ့ၣ်ထုးထီၣ် ဟးဃုန့ၢ်၀ဲဒံးႉဟုသးနါက့ဟးဃုၦ့ၤတဘၣ်လၢၤဘၣ်”အဂ့ၢ်န့ၣ် စံး၀ဲန့ၣ်လီၤႉ ဖၣ်ပူၣ်၀့ၢ်ပူၤပယီၤသုးဒီးအ၀ဲသ့ၣ်ဟံၣ်ဖိဃီဖိဒူၣ်ဖိထၢဖိတဖၣ်သဂၢၢ်ဘၣ်၀ဲဟုသးလီၤတူာ်တကးဒံးဘၣ် ဒ်န့ၣ်အသိး လီၢ်က၀ီၤကမျၢၢ်လၢအိၣ်ဟီၣ်က၀ီၤပူၤဖဲန့ၣ်တဖၣ်စ့ၢ်ကီးသဂၢၢ်ဘၣ်၀ဲဟုသးလီၤတူာ်တၢ်ဂ့ၢ်ကီဒ်အံၤစ့ၢ်ကီးအဂ့ၢ်န့ၣ် ဖၣ်ပူၣ်လီၢ်က၀ီၤကမျၢၢ်စံး၀ဲန့ၣ်လီၤႉ ဖၣ်ပူၣ်လီၢ်က၀ီၤကမျၢၢ်တဂၤစံး၀ဲလၢ“ချံစဲးတအိးထီၣ်ဒံးဘၣ်ႇကျဲတအိးထီၣ်ဒံးဘၣ်ႉခဲအံၤလၢဆဲးကဲးန့ၣ်အ၀ဲသ့ၣ်ဟ့ၣ်ဒုးစိာ်ဒံး၀ဲတစဲးတမွဲးဒံးႉပသဲသၣ်ဂီၤႇကိၣ်ႇသိတဖၣ်န့ၣ်ဟ့ၣ်ဒုးစိာ်၀ဲဒံးမီၤနီၤႉဘၣ်ဆၣ်လၢကျဲပူၤန့ၣ်ၦၤဒိးလီၤဃာ်မ့ၣ်ပိၢ်အဃိဘၣ်ပျံၤတၢ်စ့ၢ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးခ့ၣ်အဲၣ်ယူၣ်(သုးက့ ၅)တၢ်ပၢဟီၣ်က၀ီၤအပူၤ တၢ်ထီၣ်မၤန့ၢ်၀ဲသုးကီၣ်ကးအသုးကလၢၤတနီၤဒီး ဒ်န့ၣ်အသိး သုးကီၣ်ကးအသုးကလၢၤႇပၢပြး၀ဲၤဒၢးႇ၀ဲၤကျိၤဘၣ်ထွဲရူလၢအိၣ်ဖၣ်ပူၣ်၀့ၢ်ပူၤတဖၣ်စ့ၢ်ကီး(KNLA)သုးပာ်ဖှိၣ် နုာ်လီၤခး၀ဲ တလီၢ်လီၢ်န့ၣ်လီၤႉခီဖျိတၢ်ထုးထီၣ်တၢ်ကလုၢ်လၢပယီၤသုးကီၣ်ကးၦၤမၤတၢ်ဖိလၢအိၣ်ဖၣ်ပူၣ်၀့ၢ်ပူၤတဖၣ်ကဟးထီၣ်ကွံာ် လၢတၢ်ဖံးတၢ်မၤမူဒါပူၤအဃိဖၣ်ပူၣ်၀့ၢ်ပူၤသုးကီၣ်ကးအတၢ်ပၢတၢ်ပြးဆိကတီၢ်လဲၤတရံးသးတန့ၢ်လၢၤဘၣ်အဂ့ၢ်န့ၣ် ခ့ၣ်အဲၣ်ယူၣ်တကပၤစံး၀ဲန့ၣ်လီၤႉ
ပယီၤသုးနု၁်လီၤဟံ(ချၢၣ်သ၀ီ)ကမျၢၢ်တၢ်ဖိတၢ်လံၤလၢဟံၣ်ပူၤႇကျးပူၤတကးဒံးဘၣ်ဖီၣ်မၤဒၢၣ်ၦၤသ၀ီဖိ
လါစဲးပထ့ဘၢၣ် ၂၂ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲလါစဲးပထ့ဘၢၣ် ၁၈ သီအနံၤ ပယီၤသုးကျိၤနုာ်လီၤအိၣ်ဆီလီၤသးလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် နိၣ်တကီကီၢ်ဆၣ် ၀ီၢ်ရီဟီၣ်က၀ီၤ ချၢၣ်သ၀ီပူၤဒီး ဖဲန့ၣ်၀ံၤလီၢ်ခံအ၀ဲသ့ၣ်နုာ်လီၤဟံၦၤဃ့ၢ်တၢ်ဒုးဖိ အတၢ်ဖိတၢ်လံၤလၢဟံၣ်ပူၤလၢကျးပူၤတကးဒံးဘၣ်ဖီၣ်မၤဒၢၣ်စ့ၢ်ကီး၀ဲၦၤသ၀ီဖိတဖၣ်အဂ့ၢ်န့ၣ် သ့ၣ်ညါဘၣ်လၢ လီၢ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ ချၢၣ်သ၀ီအံၤဟံၣ်ခိၣ်၀ဲအဖျၢၣ်(၁၀၀၀)ဘျဲၣ် ၦၤနီၣ်ဂံၢ်အိၣ်၀ဲခဲလၢာ်အဂၤ(၅၀၀၀)ဘျဲၣ်ဒီးဖဲအပူၤကွံာ်လါစဲးပထ့ဘၢၣ် ၁၄ သီအခါ ခီဖျိပယီၤသုးကဘီယူၤဟဲခးလီၤတၢ်ႇပယီၤသုးခးလီၤကျိဖးဒိၣ်ဆူသ၀ီပူၤအဃိ ချၢၣ်သ၀ီဖိဘၣ်ဃ့ၢ်ထီၣ် သ၀ီဒီတဖျၢၣ်ညါဒီးပယီၤသုးနုာ်လီၤဟံၦၤတၢ်ဖိတၢ်လံၤလၢဟံၣ်ပူၤက့ၤတီၣ်၀ဲဒီးသိလ့ၣ်အဂ့ၢ်န့ၣ် ၀ီၢ်ရီလီၢ်က၀ီၤ ကမျၢၢ်တဖၣ်စံး၀ဲန့ၣ်လီၤႉ “ၦၤမ့ၣ်အူစဲးႇၦၤဆဲးကဲးလၢအိၣ်တ့ၢ်သ၀ီပူၤတဖၣ်န့ၣ်အ၀ဲသ့ၣ်ဟံနီ၀ဲခဲလၢာ်လီၤႉနုာ်လီၤထီၣ်အိၣ်စ့ၢ်ကီးလၢၦၤဟံၣ်ပူၤႉ ဟးဃုတၢ်လၢၦၤဟံၣ်ပူၤဟံၦၤထူၦၤစ့ႉမ့၀ံၤအ၀ဲသ့ၣ်မၤဟးဂီၤၦၤသီး၀ံၤဟံၦၤတၢ်ဖိတၢ်လံၤက့ၤတီၣ်၀ဲလၢသိလ့ၣ်ပူၤႉ ၦၤသ၀ီဖိလၢအက့ၤဒုးအီၣ်ထိးဆၣ်တဖၣ်န့ၣ်အ၀ဲသ့ၣ်သံဒိးသံကွၢ်တီၢ်မၤဒၢၣ်၀ဲ”အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ် လီၤႉ ခီဖျိပယီၤသုးခးလီၤကျိဖးဒိၣ်ဆူသ၀ီပူၤကိးမုၢ်နံၤဒဲးအဃိၦၤဃ့ၢ်တၢ်ဒုးဖိအဟံၣ်ဟးဂီၤအိၣ်၀ဲအဖျၢၣ်(၁၀၀)ဃၣ်ဃၣ်ညါဒီးခီဖျိၦၤသ၀ီဖိတဖၣ်အံၤအ၀ဲသ့ၣ်ဘၣ်ပာ်တ့ၢ်အတၢ်ဖံးတၢ်မၤစံာ်လီၢ်ကျီးလီၢ်အဃိ တၢ်ကီတၢ်ခဲအိၣ်ထီၣ်လၢကအီၣ်ကအီ အဂီၢ် အဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးတဖၣ်အအိၣ်န့ၣ်လီၤႉ ကမျၢၢ်ၦၤဃ့ၢ်တၢ်ဒုးပိာ်မုၣ်လၢပယီၤသုးနုာ်လီၤဟံအတၢ်ဖိတၢ်လံၤတဂၤစံး၀ဲလၢ“ကဘီယူၤဟဲခးလီၤတၢ်လၢသ၀ီပူၤသတူၢ်ကလာ်အဃိပက့ၤဖီၣ်န့ၢ်ပစ့ပထူတချုးဘၣ်မီၤနီၤႉခဲအံၤအ၀ဲသ့ၣ်မၤဟးဂီၤသီးဘျီဟံက့ၤစိာ်၀ဲခဲလၢာ်လီၤႉ ဘၣ်တ့ၢ်ကျီၢ်ပနၢ်ႇထိးဒ်န့ၣ်လီၤႉနက့ၤလၢသ၀ီပူၤခီဒၢးအ၀ဲသ့ၣ်ထီၣ်အိၣ်လၢနဟံၣ်ပူၤႉအ၀ဲသ့ၣ်တဲၦၤလၢသုဟံတၢ်ဖိတၢ်လံၤမ့၀ံၤန့ၣ်ဟးကွံာ်အ၀ဲသ့ၣ်နီဟးထီၣ်ၦၤမီၤနီၤႉမ့မ့ၢ်ၦၤပိာ်ခွါန့ၣ်အ၀ဲသ့ၣ်သံဒိးသံကွၢ်မၤဒၢၣ်၀ဲမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါစဲးပထ့ဘၢၣ် ၂၀ သီအနံၤန့ၣ်လီၤႉ ပယီၤသုးတြိၤ(၄၄)စုတီၤဖီလာ် ခီၣ်သုးရ့ၣ်(ခလရ–၂)ဒီး သုးခိးကီၢ်ဆၢ(BGF) နီၣ်ဂံၢ် ၁၀၂၁ သုးရ့ၣ် သ့ၣ်တဖၣ်အံၤ ခီဖျိအ၀ဲသ့ၣ်နုာ်လီၤဟံန့ၢ်အလီၢ်အကျဲလၢ ခ့ၣ်အဲၣ်ယူၣ် ၀ီၢ်ရ့ၣ်ကီၢ်ဆၣ်တၢ်ပၢဟီၣ်က၀ီၤ လၣ်ကစဲႇတီၣ်ပလီၣ်ႇ ဖယါငါစူၤႇချၢၣ်သ၀ီဖိႇမၠိၣ်ဟီႇချၢၣ်သ၀ီဖးဒိၣ်ဒီးတကူၣ်တၢၣ်သ၀ီပူၤအဃိ ၦၤသ၀ီဖိတဖၣ်တုၤလၢခဲအံၤအ၀ဲသ့ၣ် က့ၤအိၣ်လၢအဟံၣ်တဘူၣ်ဒံးဘၣ်န့ၣ်လီၤႉ လၢန့ၣ်အမဲာ်ညါလၢ(ဖယါငါစူၤ)သ၀ီ ကၠိကပၤန့ၣ်စ့ၢ်ကီး ပယီၤသုးဟဲဆီလီၤကျိဖးဒိၣ်တဖၣ်အါမးဒီး ကျိဖးဒိၣ်အံၤ ပညိၣ်လီၤ၀ဲလိၤလိၤဆူ၀ီၢ်ရီဒူသ၀ီတဖၣ်အပူၤအဃိ ကမျၢၢ်ၦၤဃ့ၢ်တၢ်ဒုးအဂၤ(၁)ကလးဘျဲၣ်ဘၣ်သုးလီၢ်သုးကျဲ ကိးမုၢ်နံၤဒဲးအဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးတဖၣ်အအိၣ်န့ၣ်လီၤႉ
သယဲၣ်ခၠီကီၢ်ဆၣ်ပူၤ တၢ်လဲၤခးသံ ကၠီၣ်စဲၤသ၀ီ ဂၢၤကီၢ်ခိၣ်ဒီးအမါ
လါစဲးပထ့ဘၢၣ် ၂၂ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ် သယဲၣ်ခၠီကီၢ်ဆၣ် ကၠီၣ်စဲၤသ၀ီအပူၤ ဖဲလါစဲးပထ့ဘၢၣ် ၂၀ သီ ဟါခီ ၈ နၣ်ရံၣ်ဃၣ်ဃၣ် အဆၢကတီၢ် တၢ်လဲၤမၤဆှဲလဲခးသံ ဂၢၤကီၢ်ခိၣ် အူတိ၀့ဒီးအမါအဂ့ၢ်န့ၣ် သ့ၣ်ညါဘၣ်န့ၣ်လီၤႉ အူတိ၀့အံၤပာ်ဖှိၣ်မၤသကိးတၢ်ဒီးသုးကီၣ်ကးႇထၢဆူၣ်စ့လၢကမျၢၢ်အိၣ်တကးဒံးဘၣ်အမဲာ်ညါ ခီဖျိအမၤတၢ်ဖံးတၢ်မၤ လၢအတဖိးသဲစးဘၣ်အိၣ်အဃိဘၣ်တၢ်မၤဆှဲလဲကွံာ်အီၤဒ်အံၤလီၤအဂ့ၢ်န့ၣ် (သိန်းငှက်ပြောက်ကျား)ကရူၢ် ၦၤဘၣ်မူဘၣ်ဒါတဂၤ စံး၀ဲဒ်အံၤန့ၣ်လီၤႉ (သိန်းငှက်ပြောက်ကျား)ကရူၢ် ၦၤဘၣ်မူဘၣ်ဒါတဂၤစံး၀ဲလၢ“အ၀ဲန့ၣ်အအိးထီၣ်တၢ်တၤကျိၣ်တၤစ့လီၢ်ႇ ထၢစ့လၢသ၀ီပူၤႇမၤဆါကသံၣ်မူးဘှီးအဃိပလဲၤမၤဆှဲလဲကွံာ်အီၤဒ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးဂၢၤကီၢ်သုးဒီးဘၠူၣ်စီထံကရူၢ်သ့ၣ်တဖၣ်အံၤမ့ၢ်၀ဲဒၣ်သုးကီၣ်ကးအၦၤစ့ၢ်ကီးလီၤဒီး ကယဲၢ်မ့ၢ်ကရူၢ်လၢ အကဲထီၣ်တၢ်တံာ်တာ်လၢတၢ်ပၢၢ်ဆၢကရူၢ်အဂီၢ်တဖၣ်ကမၤဆှဲကွံာ်၀ဲခဲလၢာ်လီၤအဂ့ၢ်န့ၣ် ခ့ၣ်အဲၣ်ယူၣ် ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲန့ၣ်လီၤႉ “သုးရ့ၣ် ၁၂ ဒီး ဟီၣ်က၀ီၤ(PDF)ပာ်ဖှိၣ်ထီၣ်သး လဲၤမၤဆှဲ၀ဲဒၣ်ဘၠူၣ်စီထံအခိၣ်မီၤနီၤႉအမါနါက့သံဃုာ်စ့ၢ်ႉ ဂၢၤကီၢ်သုးဘၠူၣ်စီထံအံၤမ့ၢ်၀ဲဒၣ်သုးကီၣ်ကးအၦၤလီၤႉအဃိမ့ၢ်၀ဲဒၣ်တၢ်ပၢၢ်ဆၢအဒုၣ်ဒါလီၤႉပအဲၣ်ဒိးဒုးသ့ၣ်ညါလၢ ၦၤလၢအမ့ဆီၣ်ထွဲသုးကီၣ်ကးႇမ့ပာ်ဖှိၣ်ထီၣ်သးဒီးသုးကီၣ်ကးန့ၣ်မ့ၢ်၀ဲဒၣ်တၢ်ပၢၢ်ဆၢအဒုၣ်အဒါလီၤႉပကဘၣ်မၤဆှဲလဲခဲလၢာ်လီၤ”အဂ့ၢ်န့ၣ် ပဒိၣ်စီၤအဲၣ်နၤ စံး၀ဲန့ၣ်လီၤႉ ဖဲတၢ်လဲၤဖီၣ်အူတိ၀့အခါတၢ်ခးလိာ်သးကဲထီၣ်ဒံး၀ဲဒီးဖဲတၢ်ခးလိာ်သးကဲထီၣ်အခါအူတိ၀့အမါသံဃုာ်၀ဲအဂ့ၢ်န့ၣ် (သိန်းငှက်ပြောက်ကျား)ကရူၢ် စံး၀ဲန့ၣ်လီၤႉ လၢန့ၣ်အမဲာ်ညါတၢ်မၤန့ၢ်ဃုာ်၀ဲတၢ်စုက၀ဲၤလၢဘၠူၣ်စီထံခိၣ်အူတိ၀့အအိၣ်ဒ်အမ့ၢ် (AK)ကျိတခိၣ်ႇ ကျိဒၢ ၂ ခါႇ ကျိချံ ၈၄ ဖျၢၣ်ႇ (၃၆)မ့ၣ်ပိၢ် ၂ ဖျၢၣ်ႇ စဲးကတိၤတၢ် ၁ ဖျၢၣ်ႇ ဆ့ကၤဒီသဒၢကျိချံ ၁...
(Federal Wings)ဒြိကရူၢ် စးထီၣ်မၤတၢ်ထီၣ်ဒုးအဆိကတၢၢ်တဘျီလၢဒူသထူၣ်ကီၢ်ရ့ၣ်ဟီၣ်က၀ီၤပူၤ
လါစဲးပထ့ဘၢၣ် ၂၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)တၢ်ပၢဟီၣ်က၀ီၤအပူၤ အဆိကတၢၢ်တဘျီ (Federal Wings)ဒြိကရူၢ် စးထီၣ်မၤတၢ်ထီၣ်ဒုးလံအဂ့ၢ်န့ၣ် ထုးထီၣ်ပာ်ဖျါ၀ဲဖဲမဟါလါစဲးပထ့ဘၢၣ် ၂၀ သီအနံၤ န့ၣ်လီၤႉ ဒူသထူၣ်ကီၢ်ရ့ၣ်အပူၤ အဆိကတၢၢ်တဘျီ(Federal Wings)ဒြိကရူၢ် စးထီၣ်မၤ၀ဲဒြိတၢ်ထီၣ်ဒုးအံၤလၢနးကၠံ သုးခိးကီၢ်ဆၢ(BGF)သုးကလၢၤဒီး ဖဲန့ၣ်(BGF)အၦၤသံ ၁ ဂၤႇ ဘၣ်ဒိ(၈)ဂၤအဂ့ၢ်န့ၣ် (Federal Wings)ထုးထီၣ် ပာ်ဖျါ၀ဲန့ၣ်လီၤႉ ဒြိကရူၢ်သုးဖိတဂၤစံး၀ဲလၢ“ဖဲ(သုးက့ ၁)အံၤပဒုးအိၣ်ထီၣ်(Federal Wings)န့ၣ်ကအိၣ်၀ဲဒၣ်တနံၣ်ဘျဲၣ်လံမီၤနီၤႉ သုးက့ဒြိကရူၢ်စ့ၢ်ကီးဆဲးကျိးဒီး(Federal Wings) စးထီၣ်မၤဒြိဖးဒိၣ်အံၤကအိၣ်ဒၣ်ဖဲတလၢကွံာ်တလါဘျဲၣ်ဒံးလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်လဲၤထီၣ်ခးနးကၠံ(BGF)သုးကလၢၤအံၤန့ၣ်မ့ၢ်၀ဲ(Federal Wings)ဒြိကရူၢ်ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)ပာ်ဖှိၣ်ထီၣ်သး လဲၤတ့ၢ်လီၤ၀ဲဒြိမ့ၣ်ပိၢ်(၂)ဘျီဒီး ဖဲန့ၣ်(BGF)တကပၤသံဘၣ်ဒိဘၣ်ထံးအိၣ်၀ဲဒီး မ့မ့ၢ်ဒြိကရူၢ်တကပၤတၢ်သံဘၣ်ဒိဘၣ်ထံးတအိၣ်နီတမံၤဘၣ်အဂ့ၢ်န့ၣ် (Federal Wings) ထုးထီၣ်ပာ်ဖျါ၀ဲန့ၣ်လီၤႉ (Federal Wings)ဒြိကရူၢ်၀ဲအံၤ ပာ်ဖှိၣ်မၤသကိးတၢ်ဒီး(သုးက့ ၆) KNLA တကးဒံးဘၣ်အမဲာ်ညါ ပာ်ဖှိၣ်ဒုးသကိးဃုာ်တၢ်ဒီးကညီဒီကလုာ်ဂၢၤသးကရၢ(KNDO)စ့ၢ်ကီးန့ၣ်လီၤႉ ဒ်န့ၣ်အသိးလၢဒြိတၢ်ထီၣ်ဒုးအဂီၢ်တၢ်တီၣ်ဖျါထီၣ်ဃာ်ဒြိ(၅)ခိၣ်ဆူဒီကလုာ်ဃူဖိး(NUG)စုတီၤဖီလာ် တၢ်ဒီသဒၢကိတိာ် ၀ဲၤကျိၤ(MOD)အအိၣ်အိၣ်စ့ၢ်ကီး၀ဲဒၣ်အဂ့ၢ်န့ၣ် (သုးက့ ၁)ဟီၣ်က၀ီၤ တၢ်ဒီသဒၢကမျၢၢ်သုးကရူၢ် အၦၤတဖၣ် စံး၀ဲန့ၣ်လီၤႉ
ခ့ၣ်အဲၣ်ယူၣ်(သုးက့ ၆)ဟီၣ်က၀ီၤ ၂ သီအတီၢ်ပူၤ ပယီၤသုးဟဲက့ၤပ၁်လီၤစုက၀ဲၤ ၃ ဂၤ
လါစဲးပထ့ဘၢၣ် ၂၁ သီႇ ၂၀၂၃ နံၣ်ႇ ခ့ၣ်အဲးစံၣ် တလါအံၤအတီၢ်ပူၤပယီၤသုးလၢအိၣ်ဆီလီၤသးဖဲခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ် ဂီၤလ့ၤဟီၣ်က၀ီၤပူၤလၢအမ့ၢ်သုးတြိၤ(၄၄)စုတီၤဖီလာ်ခီၣ်ချ့သုးရ့ၣ်(ခမရ–၅၅၆)အၦၤ ၂ ဂၤဒီး ခီၣ်ချ့သုးရ့ၣ်(ခမရ–၉)အၦၤတဂၤ ဟဲက့ၤပာ်လီၤစုက၀ဲၤလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အအိၣ် အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပာ်ဖျါတၢ်ကစီၣ်န့ၣ်လီၤႉ ဖဲအပူၤကွံာ်လါစဲးပထ့ဘၢၣ် ၆ သီအနံၤ ပယီၤသုး(ခမရ–၅၅၆)သုးရ့ၣ်အၦၤ ကိၤကိၤနဲၤဒီးအဲၣ်စှါ(၂၀)နံၣ် ၂ ဂၤ အံၤ ဃုာ်ဒီးလါစဲးပထ့ဘၢၣ် ၈ သီအနံၤ (ခမရ–၉) စီၤသဲၣ်နဲၤထိ(၃၃)နံၣ် ၦၤသၢဂၤအံၤဟဲက့ၤပာ်လီၤစုက၀ဲၤလၢ (KNLA) အအိၣ်န့ၣ်လီၤႉ ပယီၤသုးဖိလၢအဟဲက့ၤပာ်လီၤစုက၀ဲၤ ၃ ဂၤအံၤ အ၀ဲသ့ၣ်ဟဲက့ၤစိာ်ဃုာ်၀ဲ(MA-1)ကျိတခိၣ်ႇအဒၢ(၄)ခါႇ (၅ႉ၅၆)အချံ (၂၃၉)ဖျၢၣ်ဒီး အံၣ်ကွ့မဲၣ်တစိၣ်ႇ (338)စနဲးဖၢး ၁ ခိၣ်ဒီး အချံ(၅၀)ဖျၢၣ်န့ၣ်လီၤႉ ဒ်န့ၣ်အသိး ပယီၤသုးဖိလၢအ၀ဲခံဂၤန့ၣ် တၢ်ဟ့ၣ်လၤကပီၤ၀ဲလၢစ့ယိၤတဂၤန့ၣ်(၅)ကလးဒီး မ့မ့ၢ်လၢအ၀ဲတဂၤန့ၣ်တၢ်ဟ့ၣ်လၤ ကပီၤ၀ဲ(၁)ကလီၢ်ဘးအဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သးလံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ မ့မ့ၢ်ပယီၤသုး(ခမရ–၅၅၆)သုးရ့ၣ်အၦၤ ၂ ဂၤအံၤန့ၣ် ဟဲက့ၤပာ်လီၤစုက၀ဲၤလၢ(KNLA) သုးရ့ၣ် ၁၀၃ သုးဒ့(၁)အအိၣ်ဒီး မ့မ့ၢ်ပယီၤသုး(ခမရ–၉)အၦၤတဂၤခီန့ၣ် ဟဲက့ၤပာ်လီၤစုက၀ဲၤလၢသုးခိၣ်ဒးဘီတီခိၣ်ရိၣ်မဲ(Cobra)သုးကျိၤအအိၣ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ သုးကီၣ်ကးစုတီၤဖီလာ်အၦၤလၢအိၣ်တ့ၢ်ဒံးလၢ(ခ့ၣ်အဲၣ်ယူၣ်)သုးက့ဟီၣ်က၀ီၤပူၤတဖၣ်အံၤ မ့ဟဲက့ၤပာ်လီၤ စုက၀ဲၤလၢ...
ပလီကီၢ်ဆၣ်ပူၤ ပယီၤသုးဒွဲၣ်အူအီၣ်ကမျၢၢ်ဟံၣ် ၂၂ ဖျၢၣ်ႇ ကမျၢၢ်တနီၤဘၣ်တၢ်မၤသံမၤ၀ီအီၤ
လါစဲးပထ့ဘၢၣ် ၂၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၄)ဟီၣ်က၀ီၤ ဘျံးဒ၀ဲၢ်ကီၢ်ရ့ၣ် ပလီဟီၣ်က၀ီၤအပူၤ ဖဲအပူၤကွံာ်လါစဲးပထ့ဘၢၣ် ၁၆ သီအနံၤ ပယီၤသုးကျိၤလၢအဟဲနုာ်လီၤတဖၣ်အံၤ ဒွဲၣ်အူအီၣ်၀ဲ(လဲၣ်ကူ)သ၀ီဒီး (ပၠ့ဖၠူၤ)သ၀ီပူၤဟံၣ်(၂၂)ဖျၢၣ်တကးဒံးဘၣ် ဖီၣ်မၤသံ၀ဲကမျၢၢ်တနီၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ် န့ၣ်လီၤႉ ဟီၣ်က၀ီၤဖဲန့ၣ်အပူၤဖဲအပူၤကွံာ်လါစဲးပထ့ဘၢၣ် ၁၅ သီအနံၤ ပယီၤသုးလၢအဟဲနုာ်လီၤလၢ(မီၤကၠီ)တဖၣ်အံၤဒီး ဟီၣ်က၀ီၤတၢ်ဒီသဒၢကမျၢၢ်သုး(PDF)အဘၢၣ်စၢၤတၢ်ဒုးကဲထီၣ်၀ဲဒီး ဖဲန့ၣ်ပယီၤသုးတကပၤသံ(၅)ဂၤန့ၣ်လီၤႉ တၢ်ကဲထီၣ်သး၀ံၤလီၢ်ခံပယီၤသုးကျိၤနုာ်လီၤလၢ(လဲၣ်ကူ)သ၀ီပူၤကအိၣ်လၢအဂၤ(၁၀၀)ဘျဲၣ်ညါဒီး ဒွဲၣ်အူအီၣ်၀ဲ (လဲၣ်ကူ)သ၀ီပူၤဟံၣ်(၁၇)ဖျၢၣ်ႇ ပၠ့ဖၠူၤသ၀ီပူၤဟံၣ်(၅)ဖျၢၣ်အဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤ န့ၣ်လီၤႉ အ၀ဲစံး၀ဲလၢ“(လဲၣ်ကူ)သ၀ီဒုအါဒၣ်တက့ၢ်ပယီၤသုးဒွဲၣ်အူအီၣ်ၦၤဟံၣ်ၦၤဃီလီၤႉမ့၀ံၤပယီၤသုးခးလီၤကျိဖးဒိၣ်အဃိ ကမျၢၢ်သံဘၣ်ဒိဘၣ်ထံးအိၣ်ႇပယီၤသုးမၤသံ၀ဲနါက့အိၣ်လီၤႉ မ့၀ံၤပယီၤသုးနုာ်လီၤလၢသ၀ီပူၤဒီဒူၣ်ညါအဃိ သ၀ီလၢအိၣ် တၢ်ခိၣ်တၢ်ဃၢၤဖဲအံၤတဖၣ်ဘၣ်စံၣ်မှံဟးဖျိးအိၣ်ဒီဒူၣ်ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ လၢန့ၣ်အမဲာ်ညါဖဲလါစဲးပထ့ဘၢၣ် ၁၇ သီအနံၤစ့ၢ်ကီး ပယီၤသုးကျိၤလၢအနုာ်လီၤသ့ၣ်တဖၣ်အံၤဖီၣ်မၤသံ၀ဲ ကမျၢၢ် ဟံၣ်ဒူၣ်ဖိထၢဖိ ၄ ဂၤ အဂ့ၢ်န့ၣ် ခ့ၣ်အဲၣ်ယူၣ်(သုးက့ ၄)ကွဲၤကလုၢ်ပာ်ဖျါ၀ဲလၢအ(facbebook page)ပူၤန့ၣ်လီၤႉ ဒ်န့ၣ်အသိးစးထီၣ်ဖဲအပူၤကွံာ်လါစဲးပထ့ဘၢၣ် ၉ သီအနံၤန့ၣ် ခီဖျိပယီၤသုးခီၣ်သုးရ့ၣ်(ခလရ–၂၈၅)ခးလီၤ ကျိဖးဒိၣ်ဆူ (လဲၣ်ကူ)သ၀ီပူၤအဃိ ၦၤဖိသၣ်(၆)နံၣ်တဂၤႇၦၤပိာ်မုၣ်တဂၤဒီးၦၤပိာ်ခွါတဂၤဘၣ်ဒိဘၣ်ထံး၀ဲဒၣ်န့ၣ်လီၤႉ ဒ်န့ၣ်အသိးပယီၤသုး(ခလရ–၂၈၅)လၢအဟဲနုာ်လီၤသ့ၣ်တဖၣ်အံၤဖီၣ်မၤသံစ့ၢ်ကီး၀ဲ(ပံၣ်တၣ်)သ၀ီဖိတဂၤဒီး တကးဒံးဘၣ်အမဲာ်ညါဖဲအပူၤကွံာ်လါစဲးပထ့ဘၢၣ် ၁၁ သီအနံၤ တၢ်ဒုးကဲထီၣ်စ့ၢ်ကီး၀ဲလၢပယီၤသုးဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ် ၇ႇတၢ်ဒီသဒၢကမျၢၢ်သုးပာ်ဖှိၣ်အဘၢၣ်စၢၤဒံးန့ၣ်လီၤႉ ခီဖျိခံခီခံကပၤတၢ်ဒုးကဲထီၣ်အဃိပယီၤသုးတကပၤသံဘၣ်ဒိဘၣ်ထံးအိၣ်အသိးတၢ်ဒီသဒၢကမျၢၢ်သုးပာ်ဖှိၣ်...
ကၠဲးထိၣ်၀့ၢ်ဃၢၤဒူသ၀ီပူၤခီဖျိယုၢ်နု၁်လီၤမၤဟးဂီၤတၢ်လၢသဘ့ဟီၣ်လ၁်ကျီးပူၤအဃိ ၦၤသူၣ်သဘ့ဟီၣ်လ၁်ဖိတဖၣ် ထံၣ်ဘၣ်တၢ်ကီတၢ်ခဲ
လါစဲးပထ့ဘၢၣ် ၂၀ သီႇ ၂၀၂၃ နံၣ်ႇ ခ့ၣ်အဲးစံၣ် လၢတလၢၤကီၢ်စဲၣ် ကၠဲးထိၣ်၀့ၢ် လၢၢ်ချီၣ်ႇခၠီစီၣ်(သ၀ီသီ)ဒူသ၀ီတဖၣ်အပူၤ ခီဖျိယုၢ်နုာ်လီၤမၤဟးဂီၤတၢ်လၢသဘ့ဟီၣ်လာ် ကျီးပူၤအဃိ တၢ်ဘၣ်ထဲးဆိကွံာ်သဘ့ဟီၣ်လာ်အဂ့ၢ်န့ၣ် သ့ၣ်ညါဘၣ်လၢၦၤသူၣ်သဘ့ဟီၣ်လာ်ဖိ တဖၣ်အအိၣ်န့ၣ်လီၤႉ ကိးမုၢ်နံၣ်ဒဲးသဘ့ဟီၣ်လာ်အံၤတၢ်စးထီၣ်သူၣ်အီၤဖဲတၢ်စူၤခါလါမ့ၤႇလါယူၤအကတီၢ်ဒီးတၢ်က့ၤထဲးကဒါအီၤဖဲ လါစဲးပထ့ဘၢၣ်န့ၣ်လီၤႉတနံၣ်အံၤခီဖျိယုၢ်နုာ်လီၤမၤဟးဂီၤတၢ်အဃိသဘ့ဟီၣ်လာ်ကျီးတဖၣ်အါဒၣ်တက့ၢ်တၢ်ထဲးဆိအီၤဒီးတန့ၢ်ဘၣ်အချံၦၢ်ဂ့ၤဂ့ၤဘၣ်အဂ့ၢ်န့ၣ် ၦၤသူၣ်သဘ့ဟီၣ်လာ်ဖိတဂၤ စံး၀ဲဒ်အံၤန့ၣ်လီၤႉ “ယုၢ်နုာ်လီၤအီၣ်သဘ့ဟီၣ်လာ်အဃိပတက့ၤန့ၢ်ကဒါနီတစဲးဘၣ်ႉပထဲးအီၤခဲအံၤပၣ်ဃုာ်အချံဘီၣ်ဒီဒူၣ်ညါအဃိ အတဂ့ၤအါအါဘၣ်ႉသဘ့ဟီၣ်လာ်ကျီးတနီၤန့ၣ်န့ၢ်ဒံးအချံၦၢ်အဃိကိညၢ်တစဲးႉကျီးတဖၣ်အါဒၣ်တက့ၢ် ယုၢ်နုာ်လီၤမၤဂီၤ၀ဲလီၤႉ၀ဲဒၣ်နါက့ပဘၣ်က့ၤသူၣ်ကဒါတဘျီဒံး”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ သဘ့ဟီၣ်လာ်အံၤတၢ်မ့စးထီၣ်သူၣ်အီၤဖဲတနံၣ်အံၤလါစဲးပထ့ဘၢၣ်ဒီးလါအီးကထိဘၢၣ်လါန့ၣ် တၢ်ကဘၣ်က့ၤထဲး ကဒါအီၤလၢနီၢ်တနံၣ်လါယနူၤအါရံၤႇလါဖ့ၤဘြူၤအါရံၤဒီးလါမးရှးသ့ၣ်တဖၣ်အဂ့ၢ်န့ၣ် ၦၤသူၣ်သဘ့ဟီၣ်လာ်ဖိ တဖၣ်စံး၀ဲန့ၣ်လီၤႉ ၦၤသူၣ်သဘ့ဟီၣ်လာ်ဖိလၢအဂၤတဂၤစ့ၢ်ကီးစံး၀ဲလၢ“ၦၤတနီၤန့ၣ်အကစၢ်သူၣ်အီၣ်၀ဲႇက့ၤဂံာ်အီၣ်က့ၤ၀ဲအသိႉ တနီၤန့ၣ်သူၣ်၀ဲလၢကဆါ၀ဲအဂီၢ်ႉတနီၤခီန့ၣ်မၤ၀ဲတန့ၢ်နီတစဲးဘၣ်အဃိအ၀ဲသ့ၣ်ပာ်ဖှိၣ်ဃာ်၀ဲ၀ံၤမးဆါကဒါ၀ဲႉ ခဲအံၤဘျီခီဖျိယုၢ်နုာ်လီၤအ့ၣ်၀ဲအဃိပဘၣ်ဟးလူၤထဲးကဒါအီၤဖးနးညါႉပမ့က့ၤသူၣ်ကဒါခဲအံၤတ၀ီန့ၣ်မ့တုၤလၢတၢ်ဂိၢ်ခါမးပကဘၣ်ထဲးအီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ သဘ့ဟီၣ်လာ်အံၤတၢ်က့ၤထုးထီၣ်ကဒါအီၤလၢသိဒီးတကးဒံးဘၣ်တၢ်က့ၤထုးထီၣ်စ့ၢ်ကီးအီၤလၢသဘ့ဟီၣ်လာ်အကၠီၣ်ႇအ၀ဲာ်ဃ့ႇကိၣ်အကလုာ်ကလုာ်န့ၣ်လီၤႉဒ်န့ၣ်အသိးသဘ့ဟီၣ်လာ်အံၤတၢ်ဆှၢထီၣ်ဆါအီၤဆူကီၢ်ကၠီၣ်တဲၣ်ဒီး တရူးထံကီၢ် အိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲတနံၣ်အံၤလါစဲးပထ့ဘၢၣ်ထီၣ်တၢတနွံအခါ မီၣ်လမၠဲၣ်၀့ၢ် ဒ်ပနံာ်ခီၣ်ထံးအတၢ်ဆါလီၤပဲအကလုာ်ကလုာ်အၦ့ၤ အသိးန့ၣ် သဘ့ဟီၣ်လာ်အပီၢ်(၂၀)တနာ်န့ၣ်အၦ့ၤအိၣ်၀ဲ(၇၀၀၀၀)ကၠးခိၣ်ဃၢၤညါဒီး ဒ်န့ၣ်အသိးသဘ့ဟီၣ်လာ်သိ တပီၢ်န့ၣ်အၦ့ၤအိၣ်၀ဲ(၁၅ႇ၀၀၀)ကၠးခိၣ်ဃၢၤဒီးမ့မ့ၢ်သိယိယိတပီၢ်န့ၣ်အၦ့ၤအိၣ်၀ဲ(၅၀၀၀)ကၠးအဂ့ၢ်န့ၣ် သ့ၣ်ညါဘၣ် န့ၣ်လီၤႉ
ခီဖျိထိးမံၤနု၁်လီၤမၤဟးဂီၤတၢ်လၢဘီးက့ၣ်ကျီးပူၤအဃိဘီးက့ၣ်ဟးဂီၤဆှူအါအါဂီၢ်ဂီၢ်
လါစဲးပထ့ဘၢၣ် ၂၀ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ် ကလံၤထံးဒူသ၀ီတဖၣ်အပူၤ ခီဖျိထိးမံၤနုာ်လီၤမၤဟးဂီၤတၢ်လၢဘီးက့ၣ်ကျီးပူၤအဃိ ဘီးက့ၣ်ကျီးဟးဂီၤဆှူ၀ဲဒၣ်အါမးအဂ့ၢ်န့ၣ် ကမျၢၢ်လၢအသူၣ်ဘီးက့ၣ်တဖၣ်စံး၀ဲန့ၣ်လီၤႉ ခီဖျိဘီးက့ၣ်တံၢ်အၦ့ၤဂ့ၤအဃိတနံၣ်အံၤလီၢ်က၀ီၤကမျၢၢ်တဖၣ်သူၣ်ဆီတလဲက့ၤ၀ဲဘီးက့ၣ်အိၣ်အါမးဒီး ခီဖျိထိးမံၤနုာ်လီၤ မၤဟးဂီၤတၢ်လၢဘီက့ၣ်ကျီးပူၤအဃိဘီးက့ၣ်ဟးဂီၤဆှူ၀ဲဒၣ်အါအါဂီၢ်ဂီၢ်အဂ့ၢ်န့ၣ် မံၣ်တၤသ၀ီဖိလၢအသူၣ်ဘီးက့ၣ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဘီးက့ၣ်ၦ့ၤဂ့ၤအဃိတနံၣ်အံၤၦၤသ၀ီဖိတဖၣ်အါဒၣ်တက့ၢ်န့ၣ်အ၀ဲသ့ၣ်စးထီၣ်သူၣ်၀ဲဘီးက့ၣ်မီၤနီၤႉ ကၠီၢ်ထၣ်သ၀ီဆၢခိၣ်သ၀ီတဖၣ်န့ၣ်သူၣ်ဘီးက့ၣ်ဒီဒူၣ်ညါႉအ၀ဲသ့ၣ်သူၣ်ဘီးက့ၣ်အလီၢ်န့ၣ်လဲၢ်မီၤနီၤႉထိးမံၤနုာ်လီၤအီၣ် တၢ်န့ၣ်ၦၤဟးကွၢ်မးတလၢၤလၢာ်ဘၣ်ႉအဟးဂီၤအိၣ်ဒီဒူၣ်ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ၦၤတဲလၢဘီးက့ၣ်တံၢ်အံၤတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ကၦ့ၤ၀ဲဒီးလၢတၢ်န့ၣ်အဃိ ကမျၢၢ်ၦၤသ၀ီဖိတဖၣ်စးထီၣ်သူၣ်ဖျး၀ဲဘီးက့ၣ်အံၤအါအါဂီၢ်ဂီၢ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လီၢ်က၀ီၤကမျၢၢ်လၢအဂၤတဂၤစ့ၢ်ကီးစံး၀ဲလၢ“ၦၤတဲလၢသုးခိၣ်(အ့ၤ၀ါ)ကၦ့ၤ၀ဲအဃိၦၤသ၀ီဖိတဖၣ်လဲၤၦ့ၤဘီးက့ၣ်ထူၣ်ဒီဒူၣ်ဒီထၢဘျီဟဲက့ၤသူၣ်၀ဲန့ၣ်ႉသ၀ီအိၣ်ဖဲအံၤအါဒၣ်တက့ၢ်န့ၣ်သူၣ်ဘီးက့ၣ်လီၤႉလၢဟီၣ်သရီကျိ၀ၢ်ခီတကပၤန့ၣ်နါက့ ၦၤသူၣ်ဘီးက့ၣ်ဒီဒူၣ်ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ၦၤသူၣ်ဘီးက့ၣ်အံၤတမ့ၢ်ၦၤသူၣ်အီၤထဲလၢသ၀ီခိၣ်သ၀ီဃၢၤဘၣ်ဒီးမ့မ့ၢ်တခီတၢ်လဲၤသူၣ်၀ဲတုၤလၢကစၢၢ်ခီၣ်ထံးညါအဃိ ကဘၣ်မ့ၢ်ထိးမံၤနုာ်လီၤမၤဟးဂီၤတၢ်ဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်တနီၤစံး၀ဲအိၣ်န့ၣ်လီၤႉ အပူၤကွံာ်မဟိအခါဘီက့ၣ်တံၢ်လၢတၢ်လိ၀ဲလၢမုၢ်တတၣ်န့ၣ်အၦ့ၤအိၣ်၀ဲ(၅၀၀ႇ၀၀၀)ကၠးဘျဲၣ်ဒီး တပီၢ်န့ၣ်အၦ့ၤ အိၣ်၀ဲ(၉၀၀)ကၠးန့ၣ်လီၤႉ ဘီက့ၣ်အံၤတၢ်သူၣ်အီၤအါလၢကီးတရံးႇနိၣ်တကီႇကၠဲးဒိဒီး ဃိၣ်သၢဖျၢၣ်ကီၢ်ဆၣ်သ့ၣ်တဖၣ် အပူၤ န့ၣ်လီၤႉ
မူကီၢ်ဆၣ်ပူၤ ပယီၤသုးခးလီၤကျိဖးဒိၣ်ဒီးပယီၤသုးကဘီယူၤဟဲခးလီၤတၢ်အိၣ်အဘျီ(၅၀၀)ဘျဲၣ်
လါစဲးပထ့ဘၢၣ် ၂၀ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)တၢ်ပၢဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ်အပူၤ စးထီၣ်ဖဲလါအီကူးလၢာ်တုၤလၢတလါအံၤလါစဲးပထ့ဘၢၣ် ၁၆ သီအနံၤ ပယီၤသုးကဘီယူၤဟဲခးလီၤတၢ်ဒီး ပယီၤသုးခးလီၤကျိဖးဒိၣ်လၢဒူသ၀ီတဖၣ်အပူၤခဲလၢာ်အိၣ်၀ဲအဘျီ(၅၀၀)ဘျဲၣ်အဂ့ၢ်န့ၣ် မူကီၢ်ဆၣ် ကညီဂ့ၢ်ဂီၢ်အူ တၢ်တိစၢၤမၤစၢၤကမံးတံာ် ထုးထီၣ်ပာ်ဖျါ၀ဲဖဲမဟါလါစဲးပထ့ဘၢၣ် ၁၉ သီအနံၤန့ၣ်လီၤႉ ပယီၤသုးကဘီယူၤဟဲခးလီၤတၢ်လၢကီၢ်ဆၣ်ဒူသ၀ီတဖၣ်အပူၤအိၣ်၀ဲအဘျီ(၁၀၀),ပယီၤသုးခးလီၤကျိဖးဒိၣ် (၄၅၁)ဘျီဒီး ဒ်န့ၣ်အသိးခီဖျိပယီၤသုးကျိၤနုာ်လီၤဒွဲၣ်အူအီၣ်မၤဟးဂီၤကမျၢၢ်တၢ်ဖိတၢ်လံၤႇဒိးလီၤဃာ်မ့ၣ်ပိၢ်လၢသ၀ီပူၤအဃိ သ၀ီ(၁၅)ဖျၢၣ် ကမျၢၢ်အဂၤတကလးဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ “ခဲအံၤသ၀ီအဖျၢၣ်(၁၀)န့ၣ်လ့ၤတက့ၤက့ၤတဘူၣ်ဒံးဘၣ်ႉၦၤသ့ၣ်တဖၣ်အံၤပဟးထၢအနီၣ်ဂံၢ်စရီလၢသ၀ီကိးဖျၢၣ်ဒဲးတန့ၢ်ဒံးဘၣ်ဘၣ်ဆၣ်အ၀ဲသ့ၣ်ဘၣ်ဟးစံၣ်ကအိၣ်အဂၤတလးဘျဲၣ်ညါႉလီလီစဲၤခဲအံၤအါဒၣ်တက့ၢ်ပယီၤသုးပံးဃာ် ကျဲလီၤ” အဂ့ၢ်န့ၣ် ကမံးတံာ်ဖိတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ခီဖျိပယီၤသုးအတၢ်ဖံးတၢ်မၤတၢ်ဟူးတၢ်ဂဲၤသ့ၣ်တဖၣ်အံၤအဃိလီၢ်က၀ီၤကမျၢၢ်ပိာ်ခွါ(၂)ဂၤႇပိာ်မုၣ်(၂)ဂၤသံ၀ဲဒီး ဘၣ်ဒိဘၣ်ထံး၀ဲအဂၤ(၁၀),တၢ်ဖီၣ်ဒုးဃာ်၀ဲ(၃)ဂၤန့ၣ်လီၤႉ ဒ်န့ၣ်အသိးလီၢ်က၀ီၤကမျၢၢ်သ့ၣ်တဖၣ်အံၤခီဖျိဘၣ်ဟးစံၣ် ဟးဃ့ၢ်တဖံးတမၤဘၣ်တၢ်ဂ့ၤဂ့ၤဘၣ်အဃိ အ၀ဲသ့ၣ်အစံာ်လီၢ်ဟီၣ်ခိၣ်ဟးဂီၤ၀ဲအိၣ်အဂ့ၢ်န့ၣ် (ခ့ၣ်အဲၣ်ယူၣ်) ထုးထီၣ်ပာ်ဖျါ၀ဲဖဲလါစဲးပထ့ဘၢၣ် ၁၈ သီအနံၤန့ၣ်လီၤႉ ကညီဂ့ၢ်ဂီၢ်အူတၢ်တိစၢၤမၤစၢၤကမံးတံာ်ဖိစံး၀ဲလၢ“တၢ်စူၤအါအဃိၦၤဃ့ၢ်မှံဟးဖျိးတဖၣ်အိၣ်တဆူၣ်အိၣ်တချ့ဘၣ်ႇ အဃိကသံၣ်ကသီတကူတလၢဘၣ်ဒ်န့ၣ်အိၣ်မီၤနီၤႉၦၤကလဲၤစိာ်ဆှၢတၢ်အီၣ်တၢ်အီအဂီၢ်စ့ၢ်ကီးကျဲတၢ်ကီတၢ်ခဲအိၣ်အသိးတၢ်ၦ့ၤစ့ၢ်ကီးထီၣ်အဃိကမျၢၢ်တဖၣ်ထံၣ်ဘၣ်တၢ်ကီတၢ်ခဲ”အဂ့ၢ်န့ၣ် စံး၀ဲန့ၣ်လီၤႉ ဒ်ကမံးတံာ်လံာ်တၢ်ပာ်ဖျါပူၤအသိးန့ၣ် ပကတုာ်ကွံာ်တၢ်ပညိၣ်ထီၣ်ဒုးကမျၢၢ်ထံဖိကီၢ်ဖိတဖၣ်ဒီး ကရူၢ်ကရၢဘၣ်ထွဲ, ထံဂုၤကီၢ်ဂၤတဖၣ်ကဟ့ၣ်ၦၤဃ့ၢ်မှံဟးဖျိးသ့ၣ်တဖၣ်အံၤလၢကူၣ်သ့ႇဆူၣ်ချ့ႇတၢ်လုၢ်အီၣ်နီၢ်ခိသးသမူတၢ်ဆီၣ်ထွဲမၤစၢၤ တဖၣ်န့ၣ်လီၤႉ ချၢၣ်လွံၢ်ထူၣ်ကီၢ်ရ့ၣ်အပူၤတနံၣ်အံၤ(၂၀၂၃)အတီၢ်ပူၤတၢ်ဒုးဟဲဆူၣ်ထီၣ်၀ဲလၢပယီၤသုးဒီးတၢ်ပၢၢ်ဆၢသုးကရူၢ်အဘၢၣ်စၢၤအသိးမူကီၢ်ဆၣ်ဒီတဘ့ၣ်အပူၤတုၤလၢလါယူၤလံန့ၣ်ကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲအဂၤသၢကလးဘျဲၣ်လံဒီးကီၢ်ရ့ၣ်ဒီတဘ့ၣ်အပူၤၦၤဃ့ၢ်မှံဟးဖျိးအနီၣ်ဂံၢ်အိၣ်ထီၣ်တုၤလၢ(ခံကလီၢ်ဘျဲၣ်)လံအဂ့ၢ်န့ၣ် ဂံၢ်ခီၣ်ထံးကညီတၢ်ကရၢကရိ စံး၀ဲအသိး သ့ၣ်ညါဘၣ်န့ၣ်လီၤႉ
ပယီၤသုးနု၁်လီၤဟံးန့ၢ်အလီၢ်အကျဲလၢ(ယ့ၤတယီၣ်)သုးကလၢၤအခိၣ်အဃၢၤ
လါစဲးပထ့ဘၢၣ် ၂၀ သီႇ ၂၀၂၃ နံၣ်ႇ ခ့ၣ်အဲးစံၣ် ယ့ၤတယီၣ်ပယီၤသုးကလၢၤလၢအိၣ်ကီၢ်ကၠီၣ်တဲၣ်–ကီၢ်ပယီၤကီၢ်ဆၢ(ပၢချၢ)သ၀ီပူၤအံၤ ဖဲလါစဲးပထ့ဘၢၣ် ၁၄ သီ အနံၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)လဲၤထီၣ်န့ၢ်၀ဲဒီး တကီၢ်ခါခဲအံၤပယီၤသုးနုာ်လီၤဟံးန့ၢ် အလီၢ်အကျဲ ဖဲသုးကလၢၤ၀ဲန့ၣ်အခိၣ်အဃၢၤအဂ့ၢ်န့ၣ် (KNLA)ဂံၢ်ခီၣ်ထံးတၢ်ကစီၣ်ပာ်ဂၢၢ်ပာ်ကျၢၤစံး၀ဲန့ၣ်လီၤႉ (ယ့ၤတယီၣ်)ပယီၤသုးကလၢၤအံၤ KNLA သုးရ့ၣ်(၁၈)ဒီးတၢ်ပၢၢ်ဆၢသုးပာ်ဖှိၣ်လဲၤထီၣ်မၤန့ၢ်၀ဲဒီး တၢ်လဲၤထီၣ်သုးကလၢၤ ဘျီ၀ဲအံၤ တၢ်မၤန့ၢ်ဃုာ်၀ဲကျိချံၦာ်သၣ်အါအါဂီၢ်ဂီၢ်ဒီး ဖဲလါစဲးပထ့ဘၢၣ် ၁၇ သီအနံၤန့ၣ် ပယီၤသုးဟဲနုာ်လီၤဟံးန့ၢ် အလီၢ်အကျဲကအိၣ်လၢအဂၤ(၁၀၀)ဃၣ်ဃၣ်ညါအဂ့ၢ်န့ၣ် (KNLA)ၦၤဘၣ်မူဘၣ်ဒါလၢ တအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပယီၤသုးလၢအိၣ်ယိၤကီၢ်တဖၣ်န့ၣ်ဟဲက့ၤကွၢ်အတၢ်လီၢ်တၢ်ကျဲမီၤနီၤႉဟဲက့ၤကွၢ်ၦၤသုးဖိလၢအသံ တဖၣ်န့ၣ်ႉအ၀ဲသ့ၣ်လဲၤလၢ(ကွံၤလိၤတဲၤ)သုးကလၢၤတန့ၢ်ဘၣ်အဃိဒ်သိးအ၀ဲသ့ၣ်ဟဲက့ၤကွၢ်အသုးကလၢၤလီၢ်လံၤ ဒ်န့ၣ်လီၤႉအနီၣ်ဂံၢ်ကအိၣ်အဂၤ(၁၀၀)ဘျဲၣ်ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ပယီၤသုးတဖၣ်အံၤအ၀ဲသ့ၣ်တနုာ်လီၤအိၣ်လၢ(ယ့ၤတယီၣ်)သုးကလၢၤတၢ်လူၢ်ခိၣ်ဘၣ်မ့မ့ၢ်တခီနုာ်လီၤဟံးန့ၢ်အလီၢ်အကျဲလၢအကအိၣ်စီၤစုၤဒီးအ၀ဲသ့ၣ်သုးကလၢၤအကဲး(၂၀၀)လၢထိၣ်လွံၢ်၀ါသ၀ီပူၤ ၦၤဟံၣ်ႇကၠိကရၢၢ်ပူၤအဂ့ၢ်န့ၣ် (KNLA)ၦၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ ပယီၤသုးလၢအဟဲနုာ်လီၤဟံးန့ၢ်အလီၢ်အကျဲတဖၣ်အံၤလၢကမၤၦဲၤထီၣ်အနီၣ်ဂံၢ်လၢ(ကွံၤလိၤတဲၤ)သုးကလၢၤအဂီၢ် လီၤဒီးတကီၢ်ခါခဲအံၤခံခီခံကပၤတၢ်ခးလိာ်သးကဲထီၣ်တအိၣ်ဒံးဘၣ်အဂ့ၢ်န့ၣ် ဟီၣ်က၀ီၤဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤႉ (ယ့ၤတယီၣ်)ပယီၤသုးကလၢၤအံၤ(KNLA)သုးပာ်ဖှိၣ်လဲၤထီၣ်မၤန့ၢ်၀ဲဖဲလါစဲးပထ့ဘၢၣ် ၁၄ သီ ဂီၤခီ အဆၢကတီၢ် န့ၣ်ဒီး တၢ်လဲၤထီၣ်သုးကလၢၤဘျီ၀ဲအံၤပယီၤသုးတကပၤသံ(၉)ဂၤႇစံၣ်ဖျိးအိၣ်၀ဲဒၣ်န့ၣ်လီၤႉ ဒ်န့ၣ်အသိးမ့မ့ၢ် (KNLA) သုးပာ်ဖှိၣ်တကပၤန့ၣ် ဘၣ်ဟ့ၣ်လီၤကွံာ်အသးသမူ(၁)ဂၤဒီးဘၣ်ဒိ၀ဲ(၃)ဂၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ တၢ်ကစီၣ်န့ၣ်လီၤႉ လၢန့ၣ်အမဲာ်ညါတၢ်လဲၤထီၣ်(ယ့ၤတယီၣ်)ပယီၤသုးကလၢၤဘျီ၀ဲအံၤတၢ်မၤန့ၢ်၀ဲ(MA-1)တခိၣ်ႇ(MA-2)ခံခိၣ်ႇ (MA-3) တခိၣ်ႇ (MA-4) ခံခိၣ်ႇ(RPG-7)တခိၣ်ႇ(60mm)ကျိခံခိၣ်ႇ ကျိဖုၣ် ၂ ခိၣ်ႇ စဲးလး(၁)ခိၣ်ႇ(RPG-7)အချံ ၇၀ ဖျၢၣ်ႇ...