ဖၣ်ပူၣ်ဟီၣ်က၀ီၤပူၤ ကၠိတဖၣ်ဆဲးအိးထီၣ်ကဒါက့ၤသးဒ်နီၢ်ကစၢ်တၢ်ထဲးဂံၢ်ထဲးဘါကၠိအသိး
လါစဲးပထ့ဘၢၣ် ၁၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဖၣ်ပူၣ်၀့ၢ်ဒီးကီၢ်ဆၣ် ဒူသ၀ီတဖၣ်အပူၤ ခီဖျိသုးမီၤစိရိၤစုတီၤဖီလာ်ကူၣ်သ့ၦၤမၤတၢ်ဖိတဖၣ် ဟးထီၣ်လၢမူဒါတၢ်ဖံးတၢ်မၤပူၤအါအါဂီၢ်ဂီၢ်အဃိ ကၠိတဖၣ်တၢ်ဆဲးအိးထီၣ်ကဒါက့ၤ၀ဲဒ်နီၢ်ကစၢ်တၢ်ထဲးဂံၢ် ထဲးဘါကၠိအသိးအဂ့ၢ်န့ၣ် သ့ၣ်ညါဘၣ်လၢဖၣ်ပူၣ်လီၢ်က၀ီၤကမျၢၢ်တဖၣ်အအိၣ်န့ၣ်လီၤႉ ဖဲအပူၤကွံာ်(၂၀၂၂)ဒီး(၂၀၂၃)လါအီကူးအခါ ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ထုးထီၣ်လံာ်ဟ့ၣ်ပလီၢ် သုးမီၤစိရိၤစုတီၤဖီလာ်၀ဲၤကျိၤၦၤမၤတၢ်ဖိတဖၣ်လၢကဟးထီၣ်ကွံာ်ခဲလၢာ်ဒီးဖဲန့ၣ်၀ံၤလီၢ်ခံဟီၣ်က၀ီၤဖဲန့ၣ်အပူၤ ကၠိတဖၣ်တၢ်ကသိၣ်လိန့ၢ်ဖိသၣ်လံာ်အဂီၢ်ခီဖျိကၠိသရၣ်၊မုၣ်တအိၣ်ဘၣ်အဃိၦၤဘၣ်ကိးငါက့ၤၦၤဖျိထီၣ်အတီၤတဆံဒီးၦၤဖျိထီၣ်ဖၠၣ်စိမိၤတဖၣ်ဒီးတၢ်သိၣ်လိန့ၢ်ၦၤကၠိဖိတဖၣ်ဒ်ကီၢ်ပယီၤပဒိၣ်အလံာ်ညိၣ်သိၣ်ဒိၣ်အိၣ်ပာ်အသိးအဂ့ၢ်န့ၣ် ဖၣ်ပူၣ်လီၢ်က၀ီၤကမျၢၢ်တဂၤ စံး၀ဲန့ၣ်လီၤႉ အ၀ဲစံး၀ဲလၢ“ဖဲဖၣ်ပူၣ်အံၤအါဒၣ်တက့ၢ်ၦၤမၤတၢ်ဖိတဖၣ်တအိၣ်လၢၤဘၣ်ႉဖဲဖၣ်ပူၣ်အံၤဆူၣ်ချ့ၦၤမၤတၢ်ဖိႇ ကူၣ်သ့ၦၤမၤတၢ်ဖိခဲလၢာ်အိၣ်တ့ၢ်က့ၤစှၤကိာ်ဖိလီၤႉတနီၤန့ၣ်ဟးသုးလီၢ်သုးကျဲလၢတၢ်လီၢ်အဂၤႇတနီၤခီန့ၣ် လဲၤထီၣ်ဃုဖံးဃုမၤက့ၤတၢ်လၢယိၤကီၢ်မီၤနီၤႉၦၤမၤတၢ်ဖိတဖၣ်အါဒၣ်တက့ၢ်န့ၣ်တအိၣ်လၢၤဘၣ်ႉခဲအံၤလၢဖၣ်ပူၣ်၀့ၢ်ပူၤမ့ၢ်ဂ့ၤႇသ၀ီပူၤမ့ၢ်ဂ့ၤန့ၣ်နီၢ်ကစၢ်တၢ်ထဲးဂံၢ်ထဲးဘါကၠိအိၣ်ႉဘၣ်ဆၣ်တမ့ၢ်ပဒိၣ်ကူၣ်သ့ၦၤမၤတၢ်ဖိတဖၣ်မၤလိ၀ဲလၢၤဘၣ်ႇၦၤကိးငါက့ၤကၠိသရၣ်လၢတၢ်ချၢဒ်န့ၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢဖၣ်ပူၣ်ဟီၣ်က၀ီၤအပူၤ ကိးမုၢ်နံၤဒဲးဃၣ်ဃၣ်တၢ်ဒုးကဲထီၣ်၀ဲလၢဟီၣ်က၀ီၤခ့ၣ်အဲၣ်ယူၣ်(သုးက့ ၅)အၦၤဒီး ပယီၤသုးႇသုးခိးကီၢ်ဆၢ(BGF)အဘၢၣ်စၢၤအံၤဒီး တၢ်ဒုးအံၤကဲထီၣ်တုၤ၀ဲလၢဖၣ်ပူၣ်၀့ၢ်ပူၤညါအသိး တၢ်အိၣ်သးအံၤ ကဲထီၣ်ပၢၢ်တုၤလၢသုးကီၣ်ကးအတၢ်ပၢတၢ်ပြးလဲၤတရံးသးတန့ၢ်လၢၤဘၣ်အဂ့ၢ်န့ၣ် ခ့ၣ်အဲၣ်ယူၣ်တကပၤ စံဒ၀ဲန့ၣ်လီၤႉ တၢ်အိးထီၣ်နီၢ်ကစၢ်တၢ်ထဲးဂံၢ်ထဲးဘါကၠိအံၤတသ့ဖဲအသ့လီၢ်က၀ီၤၦၤသ၀ီဖိတဖၣ်ထၢ၀ဲဒၣ်ၦၤကၠိဖိတဂၤန့ၣ် (၁)ကလးကၠးဒီးမ့၀ံၤအ၀ဲသ့ၣ်ကိးငါကဒါက့ၤကၠိသရၣ်၊မုၣ်တဖၣ်အဂ့ၢ်န့ၣ် ကၠိဖိမိၢ်ပၢ်တဂၤ စံး၀ဲဒ်အံၤန့ၣ်လီၤႉ “ဖဲပအိၣ်အံၤအါဒၣ်တက့ၢ်သ၀ီကိးဖျၢၣ်ဒဲးန့ၣ်ကၠိအိးထီၣ်လီၤႉကၠိကိးဖျၢၣ်ဒဲးန့ၣ်မၤ၀ဲဒ်လဲၣ်န့ၣ်ၦၤကၠိဖိတဂၤန့ၣ် ဘၣ်ဟ့ၣ်(၁)ကလးကၠးႉတသ့ဖဲအသ့ၦၤကိးငါသရၣ်တဖၣ်မီၤနီၤႉဘၣ်တဲဒ်လဲၣ်န့ၣ်သရၣ်၊မုၣ်တဖၣ်အံၤၦၤကိးငါအီၤ အဃိတဘၣ်ဂီၢ်ဒ်သိးသရၣ်လီၢ်လံၤတဖၣ်ဘၣ်မီၤနီၤႉတဘၣ်ဂီၢ်ဘၣ်နါက့ဖဲအအိၣ်န့ၣ်ဘၣ်မၤဒ်န့ၣ်လီၤ”အဂ့ၢ်န့ၣ် စံး၀ဲန့ၣ်လီၤႉ ဘၣ်ဃးကၠိလၢအိၣ်ခ့ၣ်အဲၣ်ယူၣ်(သုးက့ ၅)ဟီၣ်က၀ီၤပူၤတဖၣ်တၢ်ဆဲးအိးထီၣ်သိၣ်လိ၀ဲဒ်နီၢ်ကစၢ်တၢ်ထဲးဂံၢ်ထဲးဘါ ကၠိအသိးတၢ်ဂ့ၢ်အံၤန့ၣ် ကညီကူၣ်သ့ဆဲးလၤ၀ဲၤကျိၤ(KECD)လီၢ်ခၢၣ်သး ၀ဲၤကျိၤခိၣ် ပဒိၣ်စီၤလီၤအဲၣ်မူ စံးဘၣ် ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ “ပနုာ်လီၤန့ၢ်တုၤထဲဖၣ်ပူၣ်၀့ၢ် က၀ီၤ့(၅)ဘ့ၣ်အပူၤလီၤႉ ဖဲန့ၣ်ပအိးထီၣ်ကၠိန့ၢ်တုၤလၢတီၤခၢၣ်သးလီၤႉ ကၠိတနီၤန့ၣ် ဟံ၀ဲဒၣ်ပလံာ်ညိၣ်သိၣ်ဒိၣ်လီၤႉဘၣ်ဆၣ်ကၠိသရၣ်တနီၤန့ၣ်အ၀ဲသ့ၣ်တနၢ်ပၢၢ်ပလံာ်ပတၢ်ကတိၤဘၣ်ႉ မ့၀ံၤပလဲၤ ဆှၢကၠိလံာ်မိၢ်ၦၢ်တချုးဆၢချုးကတီၢ်စ့ၢ်ဘၣ်ႉအဃိပမၢအသိၣ်လိကီၢ်ပယီၤပဒိၣ်အလံာ်ညိၣ်သိၣ်ဒိၣ်န့ၣ်လီၤႉ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ စးထီၣ်လၢ(၂၀၂၁)သုးဟံးန့ၢ်တၢ်စိိတၢ်ကမီၤ၀ံၤလီၢ်ခံန့ၣ်ၦၤကၠိဖိလၢအထီၣ်ကၠိလၢကီၢ်ပယီၤပဒိၣ်စုတီၤဖီလာ် ကၠိတဖၣ် ၦၤကၠိဖိတနီၤန့ၣ်ခီဖျိအ၀ဲသ့ၣ်ဟဲထီၣ်မၤလိက့ၤတၢ်လၢ(KECD)ကၠိအဃိ (KECD)စုတီၤဖီလာ်ကၠိတနီၤန့ၣ် ၦၤကၠိဖိနီၣ်ဂံၢ်ဟဲအါထီၣ်၀ဲဒၣ်န့ၣ်လီၤႉ ကၠိသရၣ်မုၣ်တဂၤလၢအဘၣ်တၢ်ပကွံာ်အီၤလၢမူဒါပူၤအံၤစံး၀ဲလၢ“မ့မ့ၢ်လၢ၀ဲဒၣ်န့ၣ်ပတတီၣ်ထီၣ်လံာ်ဟး ထီၣ်ဘၣ်ႉ အ၀ဲသ့ၣ်မ့ဘၣ်သးထုးထီၣ်ဒၢးထုးထီၣ်၀ဲန့ၣ်ႉခ့ၣ်အဲၣ်ယူၣ်စ့ၢ်ကီးထုးထီၣ်တၢ်ကလုၢ်အဃိပတသိၣ်လိလံာ် ဘၣ်ႉ ထံကီၢ်တၢ်အိၣ်သးမ့ဂ့ၤထီၣ်မးပကက့ၤသိၣ်လိကဒါတၢ်မီၤနီၤႉခဲအံၤပတသိၣ်လိဘၣ်တၢ်န့ၣ်အိၣ်ခံနံၣ်လံႉ...
မၠၣ်၀တံၣ်–ကီးတရံးအ့ရှါကျဲဒီတကျိၤ တလါအတီၢ်ပူၤ ပယီၤသုးသံ(၃၁)ဂၤႇ ဘၣ်ဒိ(၂၆)ဂၤ
လါစဲးပထ့ဘၢၣ် ၁၅ သီႇ ၂၀၂၃ နံၣ်ႇ ခ့ၣ်အဲးစံၣ် ကီးတရံး–မၠၣ်တ၀ံၣ်အ့ရှါကျဲဒီတကျိၤ တလါအတီၢ်ပူၤ ပယီၤသုးတကပၤသံ(၃၁)ဂၤဒီး ဘၣ်ဒိ(၂၆)ဂၤအဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ထုးထီၣ်ပာ်ဖျါ၀ဲဖဲမဟါလါစဲးပထ့ဘၢၣ် ၁၄ သီ အနံၤ န့ၣ်လီၤႉ သုးကီၣ်ကးအံၤဟ့ၣ်ထီၣ်တၢ်ဂ့ၢ်လၢကဘှီဂ့ၤထီၣ်အ့ရှါကျဲအံၤဒီးအ၀ဲသ့ၣ်နုာ်လီၤမၤ၀ဲဒုးယၤတၢ်ဟူးတၢ်ဂဲၤအဃိ တၢ်ဒုးကဲထီၣ်ဒီးခ့ၣ်အဲၣ်ယူၣ်(သုးက့ ၆) သုးရ့ၣ် ၁၈ အၦၤဒီး တၢ်ခးစဲးပြဲးပယီၤသုးကဲထီၣ်ခဲလၢာ်အိၣ်၀ဲ ၁၂ ဘျီ ဖဲန့ၣ်ပယီၤသုးတကပၤသံ၀ဲ(၃၁)ဂၤႇ ဘၣ်ဒိ၂၆ ဂၤဒီး ဒ်န့ၣ်အသိးပယီၤသုးအသိလ့ၣ်ဟးဂီၤ၀ဲဒၣ်(၇)ခိၣ်အဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ လၢကီးတရံး–မၠၣ်၀တံၣ်အ့ရှါကျဲ တီနီၢ်ထံလီၤဆှူကပၤ စးထီၣ်လၢဟီၣ်ခိၣ်လာ်ကဲထီၣ်၀ံၤလီၢ်ခံ သုးကီၣ်ကးအံၤ ဟ့ၣ်ထီၣ်တၢ်ဂ့ၢ်လၢကဘှီဂ့ၤထီၣ်ကျဲဒီးခီဖျိအ၀ဲသ့ၣ်နုာ်လီၤအိၣ်လၢသ၀ီပူၤအဃိၦၤသ၀ီဖိတဖၣ်ဘၣ်ဃ့ၢ်ထီၣ်၀ဲဒီး တုၤလၢခဲအံၤၦၤက့ၤအိၣ်လၢသ၀ီပူၤတဘူၣ်ဒံးဘၣ်အဂ့ၢ်န့ၣ် ယွၤသ့ၣ်ကိသ၀ီဖိတဖၣ် စံး၀ဲန့ၣ်လီၤႉ သ၀ီဖိတဂၤစံး၀ဲလၢ“ကျဲဟးဂီၤဘျီပယီၤသုးဟဲထီၣ်ႇမ့၀ံၤတၢ်ဒုးကဲထီၣ်၀ဲဒီးတၢ်ပၢၢ်ဆၢသုးကရူၢ် လၢသ၀ီကပၤမီၤနီၤႉ အဃိၦၤသ၀ီဖိဃ့ၢ်ထီၣ်ခဲလၢာ်လီၤႉပယီၤသုးအိၣ်လၢသ၀ီပူၤတုၤလၢခဲအံၤလီၤႉၦၤသ၀ီဖိတနီၤ န့ၣ်ဟဲက့ၤအိၣ်လၢ သ၀ီပူၤတဘူၣ်ဒံးဘၣ်အ၀ဲသ့ၣ်ဟးပလဲာ်သးအဖၢမုၢ်လီၤ”အဂ့ၢ်န့ၣ် စံး၀ဲန့ၣ်လီၤႉ ကီးတရံး–မၠၣ်၀တံၣ်အ့ရှါကျဲအံၤ လၢသုးကီၣ်ကးအမုၢ်ကျိၤ၀ဲၤကွာ်အဂီၢ်မ့ၢ်ဂ့ၤႇလၢသုးဂ့ၢ်၀ီတကပၤအဂီၢ်မ့ၢ်ဂ့ၤႇ တၢ်ဆှၢထီၣ်ဆှၢလီၤတၢ်ဆဲးကျိးတကပၤမ့ၢ်ဂ့ၤ မ့ၢ်ကျဲတဘိလၢအရ့ဒိၣ်၀ဲဒိၣ်မးလၢသုးကီၣ်ကးအဂီၢ်န့ၣ်လီၤႉ လၢတၢ်န့ၣ်အဃိကမျၢၢ်လၢအလ့ၢ်ထီၣ်လ့ၢ်လိၤလၢကျဲအံၤတဖၣ်ကထီဒါသုးကီၣ်ကးအတၢ်ဖံးတၢ်မၤသနူတဖၣ် အံၤဒီးကပာ်ဖှိၣ်ဖီၣ်လိာ်စုမၤသကိးတၢ်ဒီး ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢအဂ့ၢ်န့ၣ် ဒူပျာ်ယာ်ကီၢ်ရ့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ တလါအတီၢ်ပူၤဖဲတၢ်ဒုးကဲထီၣ်လၢခံခီခံကပၤအဘၢၣ်စၢၤဒီးတၢ်ဒုးစဲးပြဲးအခါန့ၣ် (KNLA) သုးရ့ၣ် ၁၈ ဒီး တၢ်ပၢၢ်ဆၢသုးပာ်ဖှိၣ်တကပၤ ဘၣ်ဟ့ၣ်လီၤကွံာ်အသးသမူ(၄)ဂၤႇဘၣ်ဒိ(၁)ဂၤအဂ့ၢ်န့ၣ် ခ့ၣ်အဲၣ်ယူၣ်...
သဲးသၣ်ၦ့ၤတဂ့ၤဘၣ်အဃိ ၦၤသူၣ်အီၣ်သဲးဖိတဖၣ်တၢ်ကီတၢ်ခဲအိၣ်လၢတၢ်လုၢ်အီၣ်နီၢ်ခိသးသမူ
လါစဲးပထ့ဘၢၣ် ၁၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢကီၢ်ပယီၤမုၢ်ထီၣ်ကလံၤထံး တလၢၤကီၢ်စဲၣ်ႇကညီကီၢ်စဲၣ်ဒီးတနီသရံၣ်ကီၢ်ဒိၣ်တကပၤန့ၣ် သဲးသၣ်အၦ့ၤလီၤ၀ဲ တပယူာ်ဃီဒီး ခီဖျိသဲးၦ့ၤတဂ့ၤဘၣ်အဃိၦၤသူၣ်အီၣ်သဲးဖိလၢအလုၢ်အီၣ်အသးသမူလၢတၢ်သူၣ်သဲးတၢ်ဖံးတၢ်မၤ အံၤတဖၣ် အ၀ဲသ့ၣ်တၢ်ကီတၢ်ခဲအိၣ်ထီၣ်၀ဲလၢတၢ်လုၢ်အီၣ်နီၢ်ခိးသးသမူတကပၤအဂ့ၢ်န့ၣ် သဲးကျီးကစၢ်တဖၣ် စံး၀ဲန့ၣ်လီၤႉ သဲးသၣ်အၦ့ၤတဂ့ၤဘၣ်န့ၣ်ကအိၣ်လၢ(၃)နံၣ်ဃၣ်ဃၣ်လံအဃိ ကညီကီၢ်စဲၣ် ကီးတရံးကီၢ်ဆၣ် ကလံၤထံး ဟီၣ်က၀ီၤပူၤ ကမျၢၢ်လၢလုၢ်အီၣ်အသးသမူလၢတၢ်သူၣ်သဲးတၢ်ဖံးတၢ်မၤသ့ၣ်တဖၣ်အံၤ တၢ်ကိၢ်တၢ်ဂီၤအိၣ်ထီၣ်လၢ တၢ်လုၢ်အီၣ်နီၢ်ခိ သးသမူတကပၤအဂ့ၢ်န့ၣ် စံး၀ဲန့ၣ်လီၤႉ ကီးတရံးကီၢ်ဆၣ်ပူၤ သဲးကျီးကစၢ်တဂၤစံး၀ဲလၢ“သဲးၦ့ၤတဂ့ၤဘၣ်န့ၣ်ကအိၣ်လၢသၢနံၣ်လံႉခီဖျိသဲးၦ့ၤတဂ့ၤ ဘၣ်အဃိ သဲးသၣ်လၢအအိၣ်တ့ၢ်ဖဲမဟိတဖၣ်တုၤလၢခဲအံၤၦၤတဆါဘၣ်အီၤဒံးဘၣ်န့ၣ်အိၣ်ဒံးႉသဲးကျီးကစၢ်လၢ အလုၢ်အီၣ် အသးသမူလၢတၢ်ဖံးတၢ်မၤတဖၣ်အံၤတၢ်ကီတၢ်ခဲအိၣ်ထီၣ်လၢကအီၣ်ကအီအဂီၢ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ ဒ်န့ၣ်အသိးခီဖျိသဲးသၣ်ၦ့ၤတဂ့ၤဘၣ်အဃိ ၦၤတထီၣ်ဒဲးသဲးသၣ်လၢအထူၣ်ခံလၢာ်ဘၣ်ဒီး မ့မ့ၢ်တခီၦၤအိၣ်ခိးလၢ အသၣ်လီၤတဲာ်မးၦၤလဲၤထၢ၀ဲအဂ့ၢ်န့ၣ် တလၢၤကီၢ်စဲၣ်ဒီးယ့ကီၢ်ဆၣ်ပူၤ သဲးကျီးကစၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ “ပကထီၣ်ဒဲးသဲးသၣ်အဂီၢ်န့ၣ်ပဘၣ်ငါၦၤကညီႉပထီၣ်ဒဲး၀ံၤပမ့က့ၤထၢနါက့ပဘၣ်ငါစ့ၢ်ကီးၦၤကညီမီၤနီၤႉ သဲးၦ့ၤတဂ့ၤဘၣ်အဃိပငါၦၤတန့ၢ်လၢၤဘၣ်ႉပအိၣ်ခိးက့ၤလၢအမံမ့လီၤတဲာ်မးပထၢက့ၤအီၤဒ်န့ၣ်လီၤမီၤနီၤ” အဂ့ၢ်န့ၣ် စံး၀ဲန့ၣ်လီၤႉ တချုးသုးဟံးန့ၢ်တၢ်စိတၢ်ကမီၤ(၂၀၂၀)နံၣ်အခါန့ၣ်သဲးသၣ်အံၤဒိးသန့ၤထီၣ်သးလၢအကလုာ်ဒီးသဲးသၣ်တပီၢ်န့ၣ် အၦ့ၤအိၣ်၀ဲ(၅၀၀၀)ကၠးဆူဖီခိၣ်လီၤန့ၣ်လီၤႉဘၣ်ဆၣ်သုးဟံးန့ၢ်တၢ်စိတၢ်ကမီၤ၀ံၤလီၢ်ခံသဲးၦ့ၤလီၤတပယူာ်ဃီဒီး တနံၣ်အံၤသဲး၀ါခိၣ်လၢၦၤလိ၀ဲလၢမုၢ်န့ၣ်မးတပီၢ်န့ၣ်အိၣ်တ့ၢ်က့ၤထဲ(၃၀၀၀)ကၠးခိၣ်ဃၢၤလီၤဒီးမ့မ့ၢ်သဲးသၣ်လၢတၢ်ကုၢ်၀ဲလၢမ့ၣ်အူခီန့ၣ် တပီၢ်န့ၣ်အၦ့ၤအိၣ်က့ၤထဲ(၁၀၀၀)ကၠးလီၤအဂ့ၢ်န့ၣ် ၦၤသူၣ်သဲးဖိတဖၣ် စံး၀ဲန့ၣ်လီၤႉ လၢတလၢၤကီၢ်စဲၣ်ႇကညီကီၢ်စဲၣ်ႇတနီသရံၣ်ကီၢ်ဒိၣ်တဖၣ်အပူၤ သဲးသၣ်ဟးထီၣ်၀ဲအါမးဒီး ခီဖျိသဲးၦ့ၤတဂ့ၤဘၣ်အဃိ ဂံၢ်ခီၣ်ထံးၦၤမုၢ်ဆ့ၣ်မုၢ်ဂီၤဖိလၢလုၢ်အီၣ်အသးသမူလၢတၢ်သူၣ်သဲးတၢ်ဖံးတၢ်မၤအံၤတဖၣ်တၢ်ဃံးတၢ်စ့ၤအိၣ်ထီၣ်လၢတၢ်လုၢ်အီၣ်နီၢ်ခိသးသမူတကပၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ တကးဒံးဘၣ်လၢန့ၣ်အမဲာ်ညါတကီၢ်ခါခဲအံၤဂံၢ်ခီၣ်ထံးတၢ်အီၣ်တၢ်အီတၢ်ဖိတၢ်လံၤအၦ့ၤထီၣ်၀ဲခဲလၢာ်ဒီး ဒ်န့ၣ်အသိး တကီၢ်ခါခဲအံၤဃဲမ့ၤတံၢ်အၦ့ၤစ့ၢ်ကီးတဂ့ၤ၀ဲဘၣ် တပီၢ်န့ၣ်အၦ့ၤအိၣ်ထဲ(၁၀၀၀)ကၠးလီၤအဂ့ၢ်န့ၣ် သ့ၣ်ညါဘၣ်လၢ လီၢ်က၀ီၤကမျၢၢ်တဖၣ် အအိၣ်န့ၣ်လီၤႉ
KNU ထီၣ်န့ၢ် ပၢချၢပယီၤသုးကလၢၤလၢအိၣ်ဆီလီၤသးဖဲကီၢ်ကၠီၣ်တဲၣ်–ကီၢ်ပယီၤကီၢ်ဆၢအံၤ
လါစဲးပထ့ဘၢၣ် ၁၅ သီႇ ၂၀၂၃ နံၣ်ႇ ခ့ၣ်အဲးစံၣ် ယ့ၤတယီၣ်ပယီၤသုးကလၢၤလၢအိၣ်ဆီလီၤသးဖဲကီၢ်ကၠီၣ်တဲၣ်–ကီၢ်ပယီၤကီၢ်ဆၢ ပၢချၢသ၀ီပူၤအံၤ ဖဲမဟါလါစဲးပထ့ဘၢၣ် ၁၄ သီ ဂီၤခီ ၁၁း၃၀ အဆၢပတီၢ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် ထီၣ်မၤန့ၢ်၀ဲသုးကလၢၤအံၤလံ အဂ့ၢ်န့ၣ် ကမျၢၢ်ဒီး(KNLA)ဂံၢ်ခီၣ်ထံးတၢ်ကစီၣ်တဖၣ် ပာ်ဂၢၢ်ပာ်ကျၢၤစံး၀ဲန့ၣ်လီၤႉ ဒ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ အတၢ်ပာ်ပနီၣ်အသိးန့ၣ် (ယ့ၤပယီၣ်)ပယီၤသုးကလၢၤအံၤ အိၣ်၀ဲဒၣ် လၢကီးတရံးကီၢ်ဆၣ်အပူၤဒီး ဘၣ်ဆၣ်မ့မ့ၢ်လၢကီၢ်ပယီၤပဒိၣ်အတၢ်ပာ်ပနီၣ်အသိးန့ၣ် သုးကလၢၤအံၤအိၣ်၀ဲဒၣ်လၢ နိၣ်တကီကီၢ်ဆၣ်အပူၤန့ၣ်လီၤႉ စးထီၣ်ဖဲမဟါလါစဲးပထ့ဘၢၣ် ၁၄ သီ ဂီၤခီ ၆ နၣ်ရံၣ်ဘျဲၣ်န့ၣ် (KNLA)သုးပာ်ဖှိၣ် လဲၤထီၣ်၀ဲသုးကလၢၤအံၤဒီးမၤန့ၢ်၀ဲသုးကလၢၤမၤန့ၢ်ဃုာ်၀ဲကျိချံၦာ်သၣ်အါအါဂီၢ်ဂီၢ်အဂ့ၢ်န့ၣ် လီၢ်က၀ီၤကမျၢၢ်လၢ အဘူးဖဲန့ၣ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ၦၤထီၣ်န့ၢ်သုးကလၢၤန့ၣ်ကဘၣ်ဖဲမုၢ်ထူၣ် ၁၁း၃၀ အခါန့ၣ်မီၤနီၤႉၦၤမၤန့ၢ်ဘျါအ့ၣ်တၢ်ဖိတၢ်လံၤန့ၣ် ကအိၣ်လၢသိလ့ၣ်(၂)ခိၣ်ညါႉပယီၤသုးစံၣ်ဖျိးထီၣ်အိၣ်တနီၤႉခဲအံၤၦၤမၤဆှဲကွံာ်ပယီၤသုးကလၢၤလံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါစဲးပထ့ဘၢၣ် ၁၄ သီ အနံၤန့ၣ်လီၤႉ တၢ်လဲၤထီၣ်(ယ့ၤတယီၣ်)ပယီၤသုးကလၢၤဘျီ၀ဲအံၤခံခီခံကပၤတၢ်သံတၢ်ဘၣ်ဒိဘၣ်ထံးအိၣ်၀ဲဒီး တၢ်မၤန့ၢ်ကျိချံၦာ်သၣ်အါအါဂီၢ်ဂီၢ်အဂ့ၢ် ဂံၢ်ခီၣ်ထံးတၢ်ကစီၣ်လၢအဘူးဒီး(KNLA)အံၤစံး၀ဲဘၣ်ဆၣ် ပခ့ၣ်အဲးစံၣ်–ကညီတၢ်ကစီၣ် ပာ်ဂၢၢ်ပာ်ကျၢၤ၀ဲလီၤလီၤဆီဆီတန့ၢ်ဒံးဘၣ်န့ၣ်လီၤႉ တကးဒံးဘၣ်လၢန့ၣ်အမဲာ်ညါတၢ်ထီၣ်န့ၢ်(ယ့ၤတယီၣ်)ပယီၤသုးကလၢၤအံၤ၀ံၤလီၢ်ခံဖဲဟါခီန့ၣ် တၢ်ဆဲးထီၣ်ကဒီး၀ဲ (ဖိခၠံၣ်မုၢ်)ပယီၤသုးကလၢၤစ့ၢ်ကီးအဂ့ၢ်န့ၣ် ဟီၣ်က၀ီၤဂံၢ်ခီၣ်ထံးတၢ်ကစီၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်ကဲထီၣ်သးဖဲမဟါဘၣ်ဃးတၢ်လဲၤထီၣ်(ယ့ၤတယီၣ်)ပယီၤသုးကလၢၤတၢ်ဂ့ၢ်အံၤ (KNLA)ထုးထီၣ်ပာ်ဖျါ၀ဲ တအိၣ်ဒံးဘၣ်အသိး ကသ့ၣ်ညါဘၣ်တၢ်ဂ့ၢ်တၢ်ကျိၤလီၤတံၢ်လီၤဆဲးအဂီၢ်န့ၣ် ပခ့ၣ်အဲးစံၣ်–ကညီတၢ်ကစီၣ် ဂုာ်ကျဲးစၢးဆဲးကျိးၦၤဘၣ်မူဘၣ်ဒါဘၣ်ထွဲတဖၣ်အဖၢမုၢ်န့ၣ်လီၤႉ
ပယီၤသုးဟဲက့ၤပ၁်လီၤစုက၀ဲၤလၢ KNU (သုးက့ ၃)အအိၣ် ၂ ဂၤ
လါစဲးပထ့ဘၢၣ် ၁၄ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)ချၢၣ်လွံၢ်ထူၣ်ကီၢ်ရ့ၣ် ဆီထံးကီၢ်ဆၣ်အပူၤ ဖဲလါစဲးပထ့ဘၢၣ် ၁၁ သီအနံၤ သၤစ့ၣ်ပယီၤသုးကလၢၤ ခီၣ်ချ့သုးရ့ၣ်(ခလရ–၃၅၀)အၦၤ ၂ ဂၤ ဟဲက့ၤပာ်လီၤစုက၀ဲၤလၢ ကညီဒီကလုာ် တၢ်ထူၣ်ဖျဲးသုးမုၢ်ဒိၣ်(KNLA)အအိၣ်အဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သး ထုးထီၣ်ပာ်ဖျါ၀ဲ ဖဲတနံၤအံၤ လါစဲးပထ့ဘၢၣ် ၁၄ သီအနံၤန့ၣ်လီၤႉ ပယီၤသုးအၦၤလၢအဟဲက့ၤပာ်လီၤစုက၀ဲၤ(၂)ဂၤအံၤမ့ၢ်၀ဲ မီၤဒၣ်သၣ်(၂၅)နံၣ် ကစၢ်နီၣ်ဂံၢ်(တတ–၁၂၆၇၂၅)ဒီး မိၤဖၠိကိၤကိၤ(၂၁)နံၣ် ကစၢ်နီၣ်ဂံၢ်(တတ–၁၂၇၈၃၉)ဒီး ၦၤသ့ၣ်တဖၣ်အံၤဟဲက့ၤစိာ်ဃုာ်၀ဲ(MA1)တခိၣ်ႇ (MA2)တခိၣ်ဒီး ကျိချံ(၂၃၇)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ပယီၤသုးဖိလၢအဟဲက့ၤပာ်လီၤစုက၀ဲၤ ၂ ဂၤအံၤ (KNLA)ဟ့ၣ်လၤကပီၤ၀ဲ တဂၤန့ၣ်လၢစ့ပယီၤအကလီၢ်(၄၀)ကၠး အဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ ခ့ၣ်အဲၣ်ယူၣ်သုးက့(၇)ဘ့ၣ်အကျါ မ့မ့ၢ်လၢ(သုးက့ ၁),(သုးက့ ၂),(သုးက့ ၃),(သုးက့ ၄),(သုးက့ ၅)ဒီး (သုးက့ ၆) ဟီၣ်က၀ီၤအပူၤန့ၣ် တၢ်ဒုးကဲထီၣ်၀ဲကိးမုၢ်နံၤဃၣ်ဃၣ်ညါဒီး တၢ်ထီၣ်မၤန့ၢ်ပယီၤသုးကလၢၤစ့ၢ်ကီး အိၣ်၀ဲတနီၤန့ၣ် လီၤႉဒ်န့ၣ်အသိးပယီၤသုးဟဲက့ၤပာ်လီၤစုက၀ဲၤအိၣ်၀ဲတလီၢ်လီၢ်ဘၣ်ဆၣ်ဘၣ်ဃးပယီၤသုးဟဲက့ၤပာ်လီၤစုက၀ဲၤအနီၣ်ဂံၢ်နီၣ်ဒွးအိၣ်ဆံးအါလဲၣ်ခီန့ၣ်တၢ်ထုးထီၣ်ပာ်ဖျါ၀ဲတအိၣ်ဘၣ်န့ၣ်လီၤႉ ဒ်န့ၣ်အသိးသုးဟံးန့ၢ်တၢ်စိတၢ်ကမီၤ၀ံၤလီၢ်ခံ သုးမီၤစိရိၤစုတီၤဖီလာ်၀ဲၤကျိၤၦၤမၤတၢ်ဖိဟဲက့ၤ အိၣ်ကဒုသးလၢ (ခ့ၣ်အဲၣ်ယူၣ်)ဟီၣ်က၀ီၤပူၤအိၣ်၀ဲအါမးဒီးက့ၤကဒါဆူသုးမီၤစိရိၤအအိၣ်စ့ၢ်ကီးအိၣ်၀ဲတနီၤအဂ့ၢ်န့ၣ် ကရူၢ်ကရၢဘၣ်ထွဲတဖၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ
ကဘီယူၤတၢ်လီၤဘၣ်ယိၣ်အဃိ လၢၢ်ဒိၣ်ကီၢ်ဆၣ်ပူၤ ကီၢ်သူလ့ၤကၠိတဖၣ်တအိးထီၣ်ဘၣ်ဒံးဘၣ်
လါစဲးပထ့ဘၢၣ် ၁၄ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)တၢ်ပၢဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ်အပူၤ ကၠိလၢအိၣ်ကညီကူၣ်သ့ဆဲးလၤ၀ဲၤကျိၤ(KECD)တၢ်ပၢဆှၢဖီလာ်တဖၣ်အါဒၣ်တက့ၢ်န့ၣ်ခီဖျိပယီၤသုးကဘီယူၤတၢ်လီၤဘၣ်ယိၣ်အဃိတၢ်ပံးဃာ်၀ဲကၠိတဖၣ်အံၤတစိၢ်တလီၢ်ဒီးတုၤလၢခဲအံၤန့ၢ်ခံနွံဘျဲၣ်လံဘၣ်ဆၣ်တၢ်တက့ၤအိးထီၣ်၀ဲဒံးဘၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်တဖၣ်အအိၣ်န့ၣ်လီၤႉ စးထီၣ်ဖဲအပူၤကွံာ်လါအီကူးန့ၣ်ခီဖျိပယီၤသုးကဘီယူၤဟဲဆှၣ်တၢ်ကိးမုၢ်နံၤဒဲးအဃိကီၢ်သူလ့ၤကၠိလၢအိၣ် ကီၢ်ဆၣ်ပူၤတဖၣ် ဘၣ်တၢ်ပံးကွံာ်၀ဲဒီး ဒ်န့ၣ်သအိးဖဲလါစဲးပထ့ဘၢၣ် ၅ သီအခါစ့ၢ်ကီး ခီဖျိပယီၤသုးကဘီယူၤဟဲခးလီၤ တၢ်လၢလၢၢ်မုၢ်သီဒီးလၢၢ်မုၢ်ပၢၤသ၀ီ ကၠိကရၢၢ်ပူၤအဃိ တုၤလၢခဲအံၤ တၢ်တက့ၤအိးထီၣ်ဘၣ်ကၠိဒံးဘၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ “ၦၤကညီကၠိလၢအိၣ်လၢၢ်ဒိၣ်ပူၤတဖၣ်တၢ်ပံးဃာ်အီၤကအိၣ်ခဲလၢာ်ဃၣ်ဃၣ်ညါႉၦၤကိၢ်သးလၢပယီၤသုးအံၤကပညိၣ်ကၠိလၢၦၤကညီဖိအိၣ်အါတဖၣ်န့ၣ်အဃိမီၤနီၤႉၦၤတမၤလိဘၣ်လံာ်ဘၣ်ဘၣ်ဆၣ်ၦၤတီထီႇၦၤတီၤဖုၣ်န့ၣ်ၦၤဒိးစဲးန့ၢ်အ၀ဲသ့ၣ်အိၣ်လီၤႉပယီၤသုးကဘီယူၤဟဲဆှၣ်တၢ်တုၤလၢခဲအံၤလီၤႇဒြိနါက့ဟဲစ့ၢ်လီၤ”အဂ့ၢ်န့ၣ် လီၢ်က၀ီၤပိာ်မုၣ်လၢ တအဲၣ်ဒိးပာ်ဖျါ အမံၤတဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါစဲးပထ့ဘၢၣ် ၁၃ သီ အနံၤန့ၣ်လီၤႉ လၢန့ၣ်အမဲာ်ညါကီၢ်ဆၣ်၀ဲန့ၣ်အပူၤကၠိလၢအအိးထီၣ်ဒံးတဖၣ်ခီဖျိပယီၤသုးကဘီယူၤအဃိ ၦၤဘၣ်ပံးအိးထီၣ်ကၠိ တလီၢ်လီၢ်အသိးၦၤဘၣ်သိၣ်လိခူသူၣ်တၢ်ဒ်န့ၣ်စ့ၢ်ကီးအိၣ်၀ဲအဂ့ၢ်န့ၣ် လီၢ်က၀ီၤကမျၢၢ် ပိာ်ခွါတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဒ်သိးၦၤဖိဒံဖိသၣ်ကမၤလိမၤဒိးတၢ်အဂီၢ်န့ၣ်ၦၤဘၣ်သိလိခူသူၣ်န့ၢ်အ၀ဲသ့ၣ်လၢတၢ်လီၢ်လၢၦၤတသ့ၣ်ညါဘၣ်အလီၢ်ဒ်န့ၣ်အိၣ်မီၤနီၤႉကၠိလၢအအိးထီၣ်ဒံးတဖၣ်နါက့ကဘီယူၤမ့ဟဲန့ၣ်ဘၣ်ပံးကွံာ်ကၠိႇဘၣ်ဃ့ၢ်ထီၣ်မ့၀ံၤက့ၤအိးထီၣ်ဒ်န့ၣ်လီၤႉၦၤမ့ဆှၢဃီၤတၢ်ကစီၣ်လၢတၢ်အိၣ်သးတဂ့ၤဘၣ်ဘျီဘၣ်ပံးကွံာ်ကၠိလီၤ”အဂ့ၢ်န့ၣ် စံး၀ဲန့ၣ်လီၤႉ သုးပဒိၣ်အကၠိလၢအိၣ် လၢၢ်ဒိၣ်ကီၢ်ဆၣ်ပူၤတဖၣ်စ့ၢ်ကီး ခီဖျိတၢ်ဒုးတၢ်ယၤကဲထီၣ်အဃိ ဘၣ်တၢ်ပံးဃာ်အီၤအိၣ်လၢ အနံၣ်လံဒီး ဒ်သိးတၢ်သိၣ်လိမၤဒိးသုတစဲးခံတဂ့ၤအဂီၢ်န့ၣ် ကၠိသရၣ်,သရၣ်မုၣ်တဖၣ်တနီၤန့ၣ် သိၣ်လိကလီန့ၢ် ၦၤဖိဒံဖိသၣ်ဒ်န့ၣ်လီၤအဂ့ၢ်န့ၣ် ကမျၢၢ်တဖၣ်စံး၀ဲအသိးသ့ၣ်ညါဘၣ်န့ၣ်လီၤႉ ဖဲအပူၤကွံာ်လါအီကူး ၃၁ သီအနံၤ တၢ်လဲၤထီၣ်န့ၢ်(သ့ၣ်ခၠၣ်စ့ၣ်)ပယီၤသုးကလၢၤ၀ံၤလီၢ်ခံ ပယီၤသုးကဘီယူၤ ဟဲခးလီၤတၢ်လၢလၢၢ်ဒိၣ်ကီၢ်ဆၣ်ႇမူကီၢ်ဆၣ်တဖၣ်အပူၤတပယူာ်ဃီဒီးဒ်န့ၣ်အသိးခီဖျိပယီၤသုးစ့ၢ်ကီးခးလီၤကျိ ဖးဒိၣ် အဃိလီၢ်က၀ီၤကမျၢၢ်သံႇဟံၣ်ဃီဟးဂီၤတကးဘၣ်ကမျၢၢ်ဘၣ်ဃ့ၢ်ထီၣ်အနီၣ်ဂံၢ်စ့ၢ်ကီးဟဲအါထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးဖဲတလါအံၤလါစဲးပထ့ဘၢၣ် ၇ သီအခါစ့ၢ်ကီး ခီဖျိပယီၤသုးကဘီယူၤဟဲခးလီၤတၢ်လၢခ့ၣ်အဲၣ်ယူၣ် (သုးက့ ၅) တၢ်ပၢဟီၣ်က၀ီၤ မုၢ်တြီၢ်ကီၢ်ရ့ၣ် ကီၢ်ဆၣ်...
တနီသရံၣ်ကီၢ်ဒိၣ်ပူၤ ကမျၢၢ်ၦၤဃ့ၢ်မှံဟးဖျိးတဖၣ်သဂၢၢ်ဘၣ်ကသံၣ်ကသီတကူတလၢ
လါစဲးပထ့ဘၢၣ် ၁၄ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ဒိၣ်အပူၤ ကမျၢၢ်ၦၤဃ့ၢ်မှံဟးဖျိးတဖၣ်တကီၢ်ခါခဲအံၤအ၀ဲသ့ၣ်သဂၢၢ်ဘၣ်၀ဲကသံၣ်ကသီ တကူတလၢ၀ဲဘၣ်အဂ့ၢ်န့ၣ် တၢ်ကရၢကရိလၢအမၤစၢၤၦၤဃ့ၢ်မှံဟးဖျိးတဖၣ် စံး၀ဲန့ၣ်လီၤႉ လၢတနီသရံၣ်ကီၢ်ခီဒိၣ် ဒ၀ဲၢ်ဟီၣ်က၀ီၤႇယ့ၤဖၠူၤႇသယဲၣ်ခၠီႇလီလိႇပလီႇတနီသရံၣ်ဒီးကီၢ်သီကီၢ်ဆၣ်တဖၣ်အပူၤ စးထီၣ်ဖဲလါအီကူးန့ၣ်ခီဖျိပယီၤသုးနုာ်လီၤကဒီးအဃိတုၤလၢခဲအံၤကမျၢၢ်ၦၤဃ့ၢ်မှံဟးဖျိးလၢအိၣ်တၢ်လီၢ်ကိးတီၤဒဲးတဖၣ်အ၀ဲသ့ၣ်တက့ၤဘၣ်လၢအသ၀ီပူၤတၢ်ဆၢကတီၢ်ယံၤထီၣ်လံအဃိကသံၣ်ကသီတဖၣ်လိၣ်ထီၣ်၀ဲအဂ့ၢ်န့ၣ် တီနီၢ်တနီသရံၣ်ၦၤမၤစၢၤၦၤဃ့ၢ်မှံဟးဖျိးကရူၢ် ၦၤဘၣ်မူဘၣ်ဒါတဂၤ စံး၀ဲန့ၣ်လီၤႉ အ၀ဲစံး၀ဲလၢ“အ၀ဲသ့ၣ်နါက့စံၣ်တၢ်ဒုးယံၤထီၣ်လံအဃိတၢ်ကီတၢ်ခဲအိၣ်ထီၣ်လၢကသံၣ်ကသီမီၤနီၤႉ တၢ်လီၢ်လၢ ၦၤစိာ်ကသံၣ်ကသီတန့ၢ်နီတစဲးဘၣ်တဖၣ်န့ၣ်ကသံၣ်ကသီတအိၣ်လၢၤဘၣ်ႉၦၤဖိဒံဖိသၣ်အဆံးဆံးဖိ တဖၣ်န့ၣ် တၢ်နးဒိၣ်တစဲးႉခီဖျိၦၤလီၢ်အိၣ်ကဒုလီၢ်န့ၣ်အိၣ်ဒီဒူၣ်ညါအဃိဆူၣ်ချ့ၦၤမၤတၢ်ဖိလၢကလဲၤမၤစၢၤတၢ်ဖဲ ဟီၣ်က၀ီၤပူၤဖဲန့ၣ် လိၣ်ဒီဒူၣ်ညါမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ကမျၢၢ်ၦၤဃ့ၢ်မှံဟးဖျိးတဖၣ်အကျါခီဖျိပၣ်ဃုာ်ၦၤမိၢ်ဒၢႇၦၤဖိဒံဖိသၣ်တဖၣ်ဒီးလၢၦၤသ့ၣ်တဖၣ်အံၤတၢ်ဆူးတၢ်ဆါ အဂီၢ်တၢ်ကီတၢ်ခဲအိၣ်လၢကဆဲးန့ၢ်အ၀ဲသ့ၣ်ကသံၣ်ဒီသဒၢဒီးတၢ်ကီတၢ်ခဲအိၣ်လၢကျိၣ်စ့တကပၤအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ ဖဲအပူၤကွံာ်လါအီကူးအခါ တနီသရံၣ်ကီၢ်ခီဒိၣ်အပူၤ ကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၃၅ႇ၀၀၀)ဘျဲၣ်ညါဒီး တလါဘၣ်တလါၦၤဃ့ၢ်မှံဟးဖျိးအနီၣ်ဂံၢ်ဟဲအါထီၣ်၀ဲဒၣ်ကွ့ၢ်ကွ့ၢ်န့ၣ်လီၤႉစးထီၣ်ဖဲတနံၣ်အံၤလါယနူၤအါရံၤတုၤလၢ လါစဲးပထ့ဘၢၣ်ထီၣ် ၉ သီ လၢတနီသရံၣ်ကီၢ်ဒိၣ်အပူၤ ခီဖျိပယီၤသုးကဘီယူၤဟဲခးလီၤတၢ်ႇပယီၤသုးခးလီၤ ကျိဖးဒိၣ်အဃိ ကမျၢၢ်သံအဂၤ(၁၀)ဒီးဘၣ်ဒိ၀ဲ(၄၉)ဂၤအဂ့ၢ်န့ၣ် ဟီၣ်က၀ီၤတၢ်ကစီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ
လူၢ်ပျဲၢ်ဒီးတၢ်ကြဲၢ်ကီၢ်ဆၣ်အပူၤ ၦၤဆါလီၤကျီးလီၢ်ဟီၣ်ခိၣ်လီၢ်ဟဲအါထီၣ်
လါစဲးပထ့ဘၢၣ် ၁၄ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် လူၢ်ပျဲၢ်ဒီးတၢ်ကြဲၢ်ကီၢ်ဆၣ်အပူၤ တကီၢ်ခါခဲအံၤၦၤကမျၢၢ်သ၀ီဖိတဖၣ် အ၀ဲသ့ၣ်ဆါလီၤအကျီးလီၢ် ဟီၣ်ခိၣ်လီၢ်ဟဲအါထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ကမျၢၢ်လၢအိၣ်ဟီၣ်က၀ီၤဖဲန့ၣ်အပူၤတဖၣ်အ၀ဲသ့ၣ်ဆါလီၤအရီဘၢၣ်ကျီးႇဟီၣ်ခိၣ်လီၢ်လၢအိၣ်ကျဲကပၤတဖၣ်အံၤဒီး တကီၢ်ခါခဲအံၤခီဖျိတၢ်လုၢ်အီၣ်နီၢ်ခိသးသမူႇတၢ်ဖံးတၢ်မၤလီၤစှၤအဃိအ၀ဲသ့ၣ်ဘၣ်ဆါလီၤအဟီၣ်ခိၣ်လီၢ်ဒ်အံၤလီၤ အဂ့ၢ်န့ၣ် လူၢ်ပျဲၢ်ကီၢ်ဆၣ်လီၢ်က၀ီၤကမျၢၢ်လၢအဆါလီၤအဟီၣ်ခိၣ်တဂၤ စံး၀ဲဒ်အံၤန့ၣ်လီၤႉ “စးထီၣ်လၢ(မ့အီၤလဲၤ)ဟံဆူၣ်ကွံာ်တၢ်စိတၢ်ကမီၤန့ၣ်ထံဒိၣ်ႇတၢ်ၦ့ၤထီၣ်ႇတၢ်ဖံးတၢ်မၤကၤထီၣ်တၢ်ဖံးတၢ်မၤတအိၣ်လၢၤဘၣ်ႉအဃိလၢကအီၣ်ကအီအဂီၢ်ဘၣ်ဆါလီၤဟီၣ်ခိၣ်လီၢ်ဒ်အံၤလီၤမီၤနီၤႉပကစၢ်ကျီးဒုပအဲၣ်ဒိးဆါ၀ဲလဲၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံခီဖျိတၢ်သဘံၣ်သဘုၣ်အိၣ်ထီၣ်လၢဟီၣ်က၀ီၤပူၤအဃိ လီၢ်က၀ီၤၦၤကမျၢၢ်တဖၣ် တဖံးတမၤဘၣ်တၢ်လၢၤဘၣ်ႇတၢ်မၤလီၤစှၤဒီးခီဖျိပနံာ်တၢ်ဖိတၢ်လံၤစ့ၢ်ကီးအၦ့ၤဒိၣ်ထီၣ်ကွ့ၢ်ကွ့ၢ်အဃိ လၢကအီၣ်ကအီအဂီၢ်အ၀ဲသ့ၣ်ဘၣ်ဆါလီၤကျီးဟီၣ်ခိၣ်လီၢ်ဒ်အံၤလီၤအဂ့ၢ်န့ၣ် ၦၤလၢအဆါလီၤဟီၣ်ခိၣ်တဖၣ် စံး၀ဲန့ၣ်လီၤႉ ဘၣ်ဃးၦၤဆါလီၤဟီၣ်ခိၣ်လီၢ်အံၤတနီၤန့ၣ်ဆါလီၤ၀ဲလၢတၢ်မ့ၢ်တၢ်တီအိၣ်အသိးတနီၤန့ၣ်(ပွဲစား)တဖၣ်အ၀ဲသ့ၣ် ပာ်ဖှိၣ်ထီၣ်သးဒီးဟီၣ်က၀ီၤဖီၣ်စုက၀ဲၤကရူၢ်ကရၢဆါလံၣ်အီၣ်လီအီၣ်ဟီၣ်ခိၣ်လီၢ်၀ံၤ လီၢ်ခံၦၤတဲလၢဟီၣ်ခိၣ်အံၤ ကဲ၀ဲဒၣ်ပယီၤသုးဟီၣ်ခိၣ်(မ့တမ့ၢ်)ဖီၣ်စုက၀ဲၤကရူၢ်အဟီၣ်ခိၣ်ဒီးတၢ်က့ၤဟံကဒါ၀ဲစ့ၢ်ကီးအိၣ်၀ဲအဂ့ၢ်န့ၣ် ကမျၢၢ်လၢအသဂၢၢ်ဘၣ်တၢ်အံၤတဖၣ် စံး၀ဲန့ၣ်လီၤႉ “ဖဲပၦ့ၤဟီၣ်ခိၣ်လီၢ်လၢတၢ်ကြဲၢ်န့ၣ်ဘၣ်ဖဲပကရၢၢ်ထီၣ်အီၤအခါဒံးလီၤႉလီၢ်ခံဘျီၦၤတဲလၢအကဲ၀ဲဒၣ်ဖီၣ်စုက၀ဲၤကရူၢ်အဟီၣ်ခိၣ်ႉၦၤမၢပပျဲကွံာ်မီၤနီၤႉပဒုးနဲၣ်ပၠးလံာ်ဃံးဃာ်ဘၣ်ဆၣ်တဲ၀ဲလၢသူတန့ၢ်ဘၣ်ႉပသ့ၣ်ညါက့ၤလၢလီၢ်ခံဘျီ ၦၤကဲ(ပွဲစား)န့ၣ် မ့ၢ်၀ဲဒၣ်ဖီၣ်စုက၀ဲၤကရူၢ်လီၤႉဟီၣ်ခိၣ်လီၢ်လၢအဆါလီၤလၢကျဲကပၤတဖၣ်န့ၣ်ၦၤဟံကွံာ်ဒီဒူၣ်လံႉၦၤလၢအသ့ၣ်ညါအဂ့ၢ် အကျိၤတဖၣ်က့ၤတဲပၠးကဒါၦၤမးပသ့ၣ်ညါမီၤနီၤ”အဂ့ၢ်န့ၣ် လီၢ်က၀ီၤကမျၢၢ်လၢတအဲၣ်ဒိး ပာ်ဖျါအမံၤတဂၤစံး၀ဲန့ၣ်လီၤႉ လၢလူၢ်ပျဲၢ်ဒီးတၢ်ကြဲၢ်ကီၢ်ဆၣ်အပူၤၦၤလၢအကျိၣ်အိၣ်စ့အိၣ်တဖၣ်ဟးလူၤၦ့ၤ၀ဲဒၣ်ကျီးလီၢ်ဟီၣ်ခိၣ်လီၢ်တဖၣ်ဒီး ခီဖျိကျီးလီၢ်ဟီၣ်ခိၣ်လီၢ်တၢ်ဆါတၢ်ၦ့ၤဟဲဂ့ၤထီၣ်အဃိၦၤဆါလီၤဟီၣ်ခိၣ်လီၢ်အိၣ်အသိးၦၤဆါလံၣ်လီၤဟီၣ်ခိၣ်စ့ၢ်ကီးအိၣ်၀ဲအါမးအဂ့ၢ်န့ၣ် (ပွဲစား)တဖၣ်စံး၀ဲန့ၣ်လီၤႉ ဒ်န့ၣ်အသိးလၢဖၣ်အၣ်ကီၢ်ဆၣ်ပူၤစ့ၢ်ကီး တၢ်ဆါတၢ်ၦ့ၤကျီးလီၢ်ဟီၣ်ခိၣ်အိၣ်၀ဲကိးမုၢ်နံၤဒဲးဒီး တကီၢ်ခါခဲအံၤ ခီဖျိဟီၣ်ခိၣ်လီၢ်ကျီးလီၢ်အၦ့ၤဒိၣ်ထီၣ်ကွ့ၢ်ကွ့ၢ်အဃိ ၦၤဆါလီၤဟီၣ်ခိၣ်လီၢ်ကျီးလီၢ်ဟဲအါထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ကီၢ်သူလ့ၤသုးမုၢ်ဒိၣ်အၦၤဟဲက့ၤပ၁်ဖှိၣ်မၤသကိးတၢ်(၁၆)ဂၤအဂ့ၢ် KNU စံး၀ဲ
လါစဲးပထ့ဘၢၣ် ၁၃ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲလါစဲးပထ့ဘၢၣ် ၃ သီဒီး ၄ သီအနံၤ ကီၢ်သူလ့ၤသုးမုၢ်ဒိၣ်(KTLA)လၢအိၣ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ်(သုးက့ ၄)ဟီၣ်က၀ီၤပူၤ အၦၤ(၁၆)ဂၤ ဟဲက့ၤပာ်ဖှိၣ်မၤသကိးတၢ်လၢကညီဒီကလုာ်တၢ်ထူၣ်ဖျဲး သုးမုၢ်ဒိၣ်(KNLA) သုးရ့ၣ် ၁၂ အအိၣ် ဟဲက့ၤစိာ်ဃုာ်ဒီးစုက၀ဲၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၄)တကပၤ စံး၀ဲန့ၣ်လီၤ ႉ ကီၢ်သူလ့ၤသုးမုၢ်ဒိၣ်အၦၤ(၁၆)ဂၤလၢအဟဲက့ၤပာ်ဖှိၣ်မၤသကိးတၢ်အံၤမ့ၢ်၀ဲဒၣ် တနီသရံၣ် ဆၣ်ကဆီသုးတြိၤ သုးခိၣ်အဲၣ်ခွံ(ကိး)ကီၤလၤဖိ အၦၤသ့ၣ်တဖၣ်ဒီး ၦၤသ့ၣ်တဖၣ်အံၤဟဲက့ၤပာ်ဖှိၣ်မၤသကိးတၢ်ဒီးဟီၣ်က၀ီၤ(KNLA) သုးရ့ၣ် ၁၂ အဂ့ၢ်န့ၣ် KNLA(သုးက့ ၄) သုးခိၣ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“လၢညါန့ၣ်အ၀ဲသ့ၣ်ကဲ၀ဲဒၣ်သုခိၣ်အဲၣ်ခွံအၦၤႉအ၀ဲသ့ၣ်န့ၣ်အသုးရ့ၣ်ခိၣ်လၢဖိခွါလ့ႉခဲအံၤအ၀ဲသ့ၣ်ဟဲ က့ၤကဒါလၢအံၤတကပၤမီၤနီၤႉအ၀ဲသ့ၣ်ဟဲက့ၤစိာ်ဃုာ်တၢ်စုက၀ဲၤကျိာ်ချံၦာ်သၣ်လၢလၢၦဲၤၦဲၤလီၤႉလီလီစဲၤဒုၦၤ တဟ့ၣ်လီၤဘၣ်အ၀ဲသ့ၣ်မူဒါဒံးဘၣ်ႉဘၣ်ဆၣ်မ့မ့ၢ်လၢတၢ်ပနီၣ်န့ၣ်ၦၤဆီတလဲန့ၢ်အ၀ဲသ့ၣ်လၢာ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်လီၢ်လၢကီၢ်သူလ့ၤသုးမုၢ်ဒိၣ်(KTLA)နုာ်လီၤဟူးဂဲၤ၀ဲအံၤမ့ၢ်၀ဲဒၣ် ဘျံးဒ၀ဲၢ်ကီၢ်ရ့ၣ်(သုးက့ ၄) KNLA သုးရ့ၣ်(၁၀) ဒီးသုးရ့ၣ်(၁၂)အဟီၣ်က၀ီၤဒီး တကီၢ်ခါခဲအံၤလၢသုးရ့ၣ်(၁၂)ဟီၣ်က၀ီၤအပူၤန့ၣ် KTLA အၦၤ ဟူးဂဲၤတအိၣ်လၢၤဘၣ် အဂ့ၢ်န့ၣ် (KNLA)သုးခိၣ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ အ၀ဲစံး၀ဲလၢ“လၢသုးရ့ၣ်(၁၂)ဟီၣ်က၀ီၤပူၤန့ၣ် KTLA တအိၣ်လၢၤဘၣ်ႉ အိၣ်တ့ၢ်က့ၤလၢသုးရ့ၣ်(၁၀)ဟီၣ်က၀ီၤပူၤ န့ၣ်လီၤႉ ပမၤတၢ်ဟူးတၢ်ဂဲၤလၢသုးရ့ၣ်(၁၂)ဟီၣ်က၀ီၤပူၤကအိၣ်လၢတလါဘျဲၣ်ဘျဲၣ်ညါအဃိခဲအံၤဂၢၢ်ထီၣ်ဖးဒိၣ်လံ” အဂ့ၢ်န့ၣ် စံး၀ဲန့ၣ်လီၤႉ ဘၣ်ဃး(KTLA)အၦၤဟဲက့ၤပာ်ဖှိၣ်မၤသကိးတၢ်ဒီးခ့ၣ်အဲၣ်ယူၣ်(သုးက့ ၄)တၢ်ဂ့ၢ်အံၤ ပခ့ၣ်အဲးစံၣ်–ကညီတၢ်ကစီၣ် ၀ဲၤလီၢ်ခိၣ်သ့ၣ်...
ပယီၤသုးကျိၤနု၁်လီၤအဃိ ချၢၣ်တကူၣ်တၢၣ်ကမျၢၢ်ဘၣ်ဃ့ၢ်ထီၣ်ကဒီး
လါစဲးပထ့ဘၢၣ် ၁၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ် ၀ီၢ်ရီဟီၣ်က၀ီၤအပူၤ ဖဲမဟါလါစဲးပထ့ဘၢၣ် ၁၂ သီအနံၤ ခီဖျိပယီၤသုးကျိၤနုာ်လီၤလၢချၢၣ်တကူၣ်တၢၣ်သ၀ီကရူၢ်ပူၤအဃိ ကမျၢၢ်ၦၤထူလံၤဖိတဖၣ်ဘၣ်ဃ့ၢ်ထီၣ်ကဒီး၀ဲအါအါဂီၢ်ဂီၢ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤသ၀ီဖိတဖၣ်အအိၣ်န့ၣ် လီၤႉ ဖဲမဟါလါစဲးပထ့ဘၢၣ် ၁၂ သီ ဟါခီ ၃ နၣ်ရံၣ်အဆၢကတီၢ် ပယီၤသုးတဖၣ်အိၣ်ဟဲထီၣ်လၢတလၢၤကီၢ်စဲၣ် မူၣ်ဒိၤကီၢ်ဆၣ် ကစၢၢ်တၢ်လူၢ်တၢ်တြီၤတကပၤဒီး ကၠဲၣ်မယီကီၢ်ဆၣ် တီၤကလ့ ကနၤလိၤသ၀ီတကပၤဒီး ဟဲထီၣ်နုာ်လီၤ ၀ဲဒၣ်လၢ(ခ့ၣ်အဲၣ်ယူၣ်)၀ီၢ်ရ့ၣ်ကီၢ်ဆၣ် ချၢၣ်–တကူၣ်တၢၣ်သ၀ီကရူၢ် မၠိၣ်ဟီသ၀ီပူၤ၀ံၤ နုာ်လီၤအိၣ်ဆီလီၤသးလၢ ကၠိကရၢၢ်ပူၤႇၦၤဟံၣ်ပူၤအဃိကမျၢၢ်တဖၣ်ဘၣ်ယိၣ်လၢတၢ်ဒုးကကဲထီၣ်ဒီးဃ့ၢ်ထီၣ်၀ဲဒ်အံၤလီၤအဂ့ၢ်န့ၣ် ၀ီၢ်ရ့ၣ်လီၢ်က၀ီၤကမျၢၢ် စံး၀ဲန့ၣ်လီၤႉ “ဖဲမဟါကဘၣ်ဖဲဟါခီ ၃ နၣ်ရံၣ်ဘျဲၣ်န့ၣ် ပယီၤသုးဟဲတုၤလၢသ၀ီပူၤမီၤနီၤႉ အဃိၦၤပံးကွံာ်ကၠိတဘျီဃီလီၤႉ အ၀ဲသ့ၣ်နုာ်လီၤအိၣ်လၢကၠိကရၢၢ်ပူၤလၢသ၀ီပူၤႇတၢ်လီၢ်လၢအဂၤနါက့အ၀ဲသ့ၣ်နုာ်လီၤအိၣ်စ့ၢ်လီၤႉအဃိၦၤသ၀ီဖိ တဖၣ်ခီန့ၣ်ပျံၤတၢ်ဘျီဃ့ၢ်ထီၣ်၀ဲန့ၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ စးထီၣ်ဖဲတလါအံၤလါစဲးပထ့ဘၢၣ် ၉ သီအနံၤ ပယီၤသုးကျိၤနုာ်လီၤ၀ဲဒၣ်လၢ(ခ့ၣ်အဲၣ်ယူၣ်)၀ီၢ်ရ့ၣ်ကီၢ်ဆၣ် ၀ီၢ်ရီဟီၣ်က၀ီၤ ဃိၣ်သၢဖျၢၣ်–သရိာ်၀ါကျဲကပၤ သ၀ီပူၤဒီး တလၢၤ–ကညီဟီၣ်က၀ီၤအဆၢ ကစၢၢ်တၢ်လူၢ်တၢ်တြီၤ တကပၤန့ၣ်လီၤႉ ဒီးဖဲန့ၣ်တၢ်ဒုးကဲထီၣ်၀ဲလၢပယီၤသုးဒီးကညီဒီကလုာ်တၢ်ထူၣ်ဖျဲးသုၢ်ဒိၣ်(KNLA)သုးပာ်ဖှိၣ်အဘၢၣ်စၢၤဒံးအဂ့ၢ်န့ၣ် ဟီၣ်က၀ီၤဂံၢ်ခီၣ်ထံးတၢ်ကစီၣ်စံး၀ဲအသိးသ့ၣ်ညါဘၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံ ကၠၤအ့စ့ၣ်ကၠံ၀့ၢ် ခီၣ်ချ့သုးရ့ၣ်(ခလရ–၃၂)ဒီးသုးခိးကီၢ်ဆၢ(BGF) နီၣ်ဂံၢ်(၁၀၂၁)အၦၤ တဖၣ်နုာ်လီၤအိၣ်၀ဲဒၣ်လၢတကူၣ်တၢၣ်ပၢၤကီၢ်၀ဲၤလီၢ်ကရၢၢ်ပူၤအံၤန့ၣ်လီၤႉဒီးဖဲန့ၣ်ခီဖျိပၢၤကီၢ်၀ဲၤလီၢ်အံၤတၢ်အီၣ်တၢ်အီတအိၣ်လၢၤဘၣ်အဃိပယီၤသုးတဖၣ်အံၤဖီၣ်၀ဲဒၣ်ကမျၢၢ်လၢအလ့ၢ်ထီၣ်လ့ၢ်လိၤဖဲန့ၣ်တဖၣ်ဒီးမၢတၢ်ဟဲရ့ထီၣ်က့ၤ၀ဲလၢ ဟုသး၀ံၤမးပျၢ်လီၤက့ၤ၀ဲအဂ့ၢ်န့ၣ် သ့ၣ်ညါဘၣ်လၢၦၤလၢပယီၤသုးဖီၣ်အီၤတဖၣ်အအိၣ်...