ဒ်သိးတၢ်သုတဟဲခးအ၀ဲသ့ၣ်ပၢပြးတၢ်လီၢ်တဖၣ်တဂ့ၤအဂီၢ်သုးကီၣ်ကးမၤအါထီၣ်တၢ်ဘံၣ်တၢ်ဘၢလၢဖၣ်အၣ်၀့ၢ်ပူၤ
လါစဲးပထ့ဘၢၣ် ၁၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဖၣ်အၣ်၀့ၢ်ပူၤ ပယီၤသုးကီၣ်ကးတဖၣ်ဒ်သိးတၢ်သုတဟဲထီၣ်ခးအ၀ဲသ့ၣ်ပၢပြးတၢ်လီၢ်တဖၣ် တဂ့ၤအဂီၢ်န့ၣ်အ၀ဲသ့ၣ်ဆီလီၤမၤအါထီၣ်တၢ်ဘံၣ်တၢ်ဘၢလၢ၀့ၢ်ပူၤႇအိၣ်ခိးသမံသမိးတၢ်ဟဲအါထီၣ်၀ဲအဂ့ၢ်န့ၣ် ဖၣ်အၣ်သုးကီၣ်ကး၀ဲၤကျိၤၦၤမၤတၢ်ဖိအဟံၣ်ဖိဃီဖိတဖၣ်စံး၀ဲန့ၣ်လီၤႉ တၢ်လဲၤခးဃိၣ်လိာ်တိၤႇမၠၣ်၀တံၣ်ပၢၤကီၢ်၀ဲၤလီၢ်ကဲထီၣ်သး၀ံၤလီၢ်ခံလီၤဆီဒၣ်တၢ်လၢသုးကီၣ်၀ဲၤကျိၤဘၣ်ထွဲ၀ဲၤဒၢး တၢ်မၤလီၢ်တဖၣ်တၢ်မၤအါထီၣ်တၢ်ဘံၣ်တၢ်ဘၢဒီးဒ်န့ၣ်အသိးလၢက၀ီၤဒ့ပူၤႇတၢ်ဆါတၢ်ၦ့ၤလီၢ်ဒီးကယဲၢ်မ့ၢ်တၢ်လီၢ်လၢကမျၢၢ်ဟးထီၣ်က့ၤလီၤအလီၢ်တဖၣ်ပယီၤသုးတၢ်မဲာ်ချံအိၣ်ခိးကွၢ်ဟုၣ်တၢ်ကိးမုၢ်နံၤဒဲးအဃိကမျၢၢ်ဒီးၦၤမၤတၢ်ဖိဟံၣ်ဖိဃီဖိတဖၣ်ဘၣ်ယိၣ်လၢတၢ်ကဖီၣ်သမံသမိးကမၣ်အ၀ဲသ့ၣ်အဂ့ၢ်န့ၣ် သုးကီၣ်ကးၦၤမၤတၢ်ဖိအဟံၣ်ဖိဃီဖိတဂၤ စံး၀ဲန့ၣ်လီၤႉ သုးကီၣ်ကးၦၤမၤတၢ်ဖိဟံၣ်ဖိဃီဖိတဂၤစံး၀ဲလၢ“လၢသုးကီၣ်ကးအ၀ဲၤဒၢးတၢ်လီၢ်တဖၣ်န့ၣ်ၦၤတပျဲနု၁်လီၤၦၤတၢ်ချၢ လၢၤဘၣ်ႉအ၀ဲသ့ၣ်သမံသမိးတၢ်ရးမးႉနကလဲၤန့ၣ်ကဘၣ်ဒုးသ့ၣ်ညါဆိႇနဘၣ်ဃ့ဆိအခွဲး၀ံၤမးနနုာ်လီၤမၤရူတၢ်ဖံးတၢ်မၤသ့မီၤနီၤ”အဂ့ၢ်န့ၣ်် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တကီၢ်ခါခဲအံၤကမျၢၢ်လၢအိၣ်ဖၣ်အၣ်၀့ၢ်ပူၤတဖၣ်အ၀ဲသ့ၣ်မ့ဟးထီၣ်လၢတၢ်ချၢန့ၣ်ဘၣ်ဟးဆှဲးဟးယံၤဒီးသုးကီၣ်ကးအၦၤအိၣ်တၢ်လီၢ်တဖၣ်အသိးႇတၢ်လီၢ်လၢၦၤဟးထီၣ်က့ၤလီၤအါအလီၢ်တဖၣ်စ့ၢ်ကီးခီဖျိပယီၤသုးတၢ်မဲာ်ချံအိၣ်ခိး ကွၢ်ဟုၣ် တၢ်အိၣ်အဃိနကဟးထီၣ်တၢ်ချၢအဂီၢ်ဘၣ်လဲၤက့ၤလၢတၢ်ပလီၢ်ပဒီပူၤအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဂၤ စံး၀ဲန့ၣ်လီၤႉ “ယဲယဟံၣ်န့ၣ်အိၣ်လၢကျဲပူၤလီၤအဃိယထံၣ်ပယီၤသုးကရူၢ်ဟးဆှၣ်တၢ်ႇဆ့ၣ်နီၤလၢကျးပူၤအိၣ်ခိးကွၢ်ဟုၣ်တၢ်မီၤနီၤႉဖဲမနၤနါက့ဟးဆှၣ်တၢ်ဒံးႇသမံသမိးတၢ်ဒံးအဃိပတဟးထီၣ်လၢတၢ်ချၢအါအါလၢၤဘၣ်ႉခဲအံၤအ၀ဲသ့ၣ်မ့ဆ့ၣ်နီၤအိၣ်လၢထံချီဆၢကျးႇကျးဆါတၢ်ပူၤလံန့ၣ်ၦၤဟဲလၢကျးတအိၣ်လၢၤဘၣ်ႉၦၤလဲၤအီၣ်တၢ်လၢမုၢ်နၤခီန့ၣ်အိၣ်ဒၣ်ၦၤအိၣ်ဟဲလၢတၢ်လီၢ်အဂၤတဖၣ်လီၤ”အဂ့ၢ်န့ၣ် ဖၣ်အၣ်၀့ၢ်ပူၤ ကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ လၢကညီကီၢ်စဲၣ်ပူၤ ဒ်သိးသုးမီၤစိရိၤသနူကလီၤၦီၢ်ကွံာ်အဂီၢ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးပာ်ဖှိၣ်ႇ သုးကျိၤတဖၣ် လဲၤထီၣ်ခးစဲးပြဲး၀ဲပယီၤသုးသ့ၣ်တဖၣ်အံၤလၢဒြိႇကျိဖးဒိၣ်ကိးမုၢ်နံၤဒဲးအဃိ ပယီၤသုးတကပၤ သံဘၣ်ဒိဘၣ်ထံးအါ၀ဲအဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်ကရူၢ် စံး၀ဲန့ၣ်လီၤႉ လၢတၢ်န့ၣ်အဃိဖၣ်အၣ်၀့ၢ်ပူၤသုးကီၣ်ကးအံၤဒ်သိးတၢ်သုတဟဲခးအ၀ဲသ့ၣ်၀ဲၤကျိၤဘၣ်ထွဲပၢပြးတၢ်လီၢ် တဂ့ၤအဂီၢ်န့ၣ် အ၀ဲသ့ၣ်မၤအါထီၣ်၀ဲတၢ်ဘံၣ်တၢ်ဘၢဒ်အံၤလီၤအဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်ကရူၢ်တကပၤ စံး၀ဲန့ၣ်လီၤႉ
ပယီၤသုးလၢအဟဲအိၣ်ဆီလီၤသးဖဲ(ပံၣ်တၣ်)သ၀ီပူၤတဖၣ်အံၤဒီးပလီ(PDF)အဘၢၣ်စၢၤတၢ်ဒုးကဲထီၣ်
လါစဲးပထ့ဘၢၣ် ၁၂ သီႇ ၂၀၂၃ နံၣ်ႇ ခ့ၣ်အဲးစံၣ် ပယီၤသုးလၢအဟဲအိၣ်ဆီလီၤသးဖဲတနီသရံၣ်ကီၢ်ခီဒိၣ် ပလီကီၢ်ဆၣ်(ပံၣ်တၣ်)သ၀ီပူၤတဖၣ်အံၤဒီး ယ့တၢ်ဒီသဒၢကမျၢၢ်သုးမုၢ်ဒိၣ် မၠ့ၣ်ကီၢ်ရ့ၣ် နီၣ်ဂံၢ်(၁)သုးရ့ၣ် (Palaw People’s Defence Force-PPDF)အဘၢၣ်စၢၤ တၢ်ဒုးကဲထီၣ်လၢ(၈)နၣ်ရံၣ်အတီၢ်ပူၤအဂ့ၢ်န့ၣ် (PPDF)ထုးထီၣ်ပာ်ဖျါတၢ်ကစီၣ်ဖဲမဟါလါစဲးပထ့ဘၢၣ် ၁၁ သီအနံၤ န့ၣ်လီၤႉ ဖဲအပူၤကွံာ်လါစဲးပထ့ဘၢၣ် ၁၁ သီ ဂီၤခီ ၅ နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုးလၢအဟဲနုာ်လီၤဖဲ (ပံၣ်တၣ်) သ၀ီပူၤလၢအနီၣ်ဂံၢ်ကအိၣ်အဂၤ(၃၀)ဃၣ်ဃၣ်အံၤဒီး(PPDF)အဘၢၣ်စၢၤတၢ်ဒုးကဲထီၣ်၀ဲဒီး ဖဲန့ၣ်ပယီၤသုးခိၣ် သံ(၁)ဂၤႇ ဘၣ်ဒိ(၄)ဂၤအဂ့ၢ်န့ၣ် (PPDF)တၢ်ဘိးဘၣ်ရၤလီၤမူဒါခိၣ် စံး၀ဲဒ်အံၤန့ၣ်လီၤႉ “(ပံၣ်တၣ်)သ၀ီန့ၣ်မ့ၢ်ဟီၣ်က၀ီၤလၢအ၀ဲသ့ၣ်လုၢ်ဘၢဒိၣ်စိ၀ဲတန့ၢ်ဘၣ်မီၤနီၤႉပ၀ဲဒၣ်စ့ၢ်ကီးတမ့ၢ်လၢပလုၢ်ဘၢဒိၣ်စိန့ၢ်အမျးကယၤၦဲၤဒံးဘၣ်ႉပအဲၣ်ဒိၣ်ဒုးသ့ၣ်ညါကမျၢၢ်တဖၣ်လၢကအိၣ်လၢတၢ်ပလီၢ်ပဒီပူၤႉကအိၣ်ခိးကနၣ်တၢ်ကစီၣ်ထီဘိႉတၢ်ဒုးမ့ကဲထီၣ်န့ၣ်ဒ်သိးကစံၣ်ထီၣ်စံၣ်လီၤကညီအဂီၢ်န့ၣ်မၤဃာ်ဂ့ၢ်ဂီၢ်အူတၢ်အီၣ်တၢ်အီတဖၣ်မီၤနီၤ”အဂ့ၢ်န့ၣ် စံးဘၣ် ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တကးဒံးဘၣ်လၢန့ၣ်အမဲာ်ညါပယီၤသုးလၢအနုာ်လီၤအိၣ်လၢ(ပံၣ်တၣ်)သ၀ီပူၤတဖၣ်အံၤနုာ်လီၤဃုဟုၣ်တၢ်လၢ ကမျၢၢ်အဟံၣ်ပူၤဃီပူၤစ့ၢ်ကီးအိၣ်၀ဲအဂ့ၢ်န့ၣ် (PPDF)တၢ်ဘိးဘၣ်ရၤလီၤမူဒါခိၣ် စံး၀ဲန့ၣ်လီၤႉ (ပံၣ်တၣ်)သ၀ီပူၤအံၤခီဖျိအိၣ်ဘူး၀ဲဒီးပီၣ်လဲၣ်နံၤအဃိတၢ်ဒုးမ့ကဲထီၣ်တဘျီလၢ်လၢ်အခါန့ၣ်ပယီၤသုးခးလီၤ ကျိဖးဒိၣ် တကးဒံးဘၣ်အမဲာ်ညါထံသုးကဘီတဖၣ်စ့ၢ်ကီးခးလီၤစၢၤ၀ဲကျိဖးဒိၣ်အိၣ်၀ဲအဂ့ၢ်န့ၣ် (PPDF)လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ပယီၤသုးအံၤခးလီၤကျိဖးဒိၣ်တုၤလၢမုၢ်နၤခီညါဒီးခီဖျိကျိဖးဒိၣ်လီၤတဲာ်ပိၢ်ဖးထီၣ်လၢသ၀ီပူၤၦၤဟံၣ်ခိၣ်အဃိ တၢ်ဒီသဒၢကမျၢၢ်သုးသံ၀ဲ(၁)ဂၤအဂ့ၢ်န့ၣ် (PPDF)ၦၤကတိၤတၢ်ပၢ စံး၀ဲန့ၣ်လီၤႉ
KNU ဃ့ထီၣ်ထံဂုၤကီၢ်ဂၤလၢ ကဖီၣ်ဃံးအါထီၣ်သုးမီၤစိရိၤလၢအထီၣ်ဒုးကၠိတဖၣ်အံၤ
လါစဲးပထ့ဘၢၣ် ၁၂ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ သုးကီၣ်ကးအံၤ သူ၀ဲကဘီယူၤ ပညိၣ်ဟဲခးလီၤတၢ်လၢကမျၢၢ်အဟံၣ်အဃီႇကၠိတၢ်သူၣ်ထီၣ်အပူၤဒီးလၢတၢ်န့ၣ်အဃိထံဂုၤကီၢ်ဂၤတၢ်ကရၢကရိတဖၣ် ကဖီၣ်ဃံးဆူၣ်ထီၣ်သုးကီၣ်ကးအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါဃ့ထီၣ်၀ဲ ဖဲလါစဲးပထ့ဘၢၣ် ၁၁ သီအနံၤန့ၣ်လီၤႉ ဖဲအပူၤကွံာ်လါစဲးပထ့ဘၢၣ် ၇ သီအနံၤ လၢတသီအတီၢ်ပူၤ ပယီၤသုးကဘီယူၤဟဲခးလီၤတၢ်လၢမုၢ်တြီၢ်ကီၢ်ရ့ၣ် လူၤသီကီၢ်ဆၣ်ဒီးဒွဲၣ်လိကီၢ်ဆၣ်ပူၤ တၢ်လီၢ်(၃)တီၤဒီး ဖဲန့ၣ်ကမျၢၢ်အဟံၣ်အဃီႇကၠိႇတၢ်ဘူၣ်တၢ်ဘါတၢ်သူၣ်ထီၣ် တဖၣ်ဟးဂီၤ၀ဲဒီးဘၣ်သံ၀ဲဒၣ်ကၠိသရၣ်(၁)ဂၤဒီးၦၤကၠိဖိ(၄)ဂၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲန့ၣ်လီၤႉ ဘၣ်ဃးပယီၤသုးကဘီယူၤဟဲခးလီၤတၢ်လၢ(ခ့ၣ်အဲၣ်ယူၣ်)ဟီၣ်က၀ီၤကၠိတၢ်ဂ့ၢ်အံၤ ခ့ၣ်အဲၣ်ယူၣ် ၦၤကတိၤတၢ်ပၢ ပဒိၣ်စီၤကျၢၤစ့ စံး၀ဲလၢ“ပမ့ကွၢ်ကဒါက့ၤလိၤလိၤန့ၣ်တၢတထံၣ်န့ၣ်အဲၣ်ဒိးမၤဟးဂီၤ၀ဲဒၣ် ပဖိပလံၤတၢ်ကူၣ်ဘၣ် ကူၣ်သ့ဒီးတၢ်ရဲၣ်တၢ်ကျဲၤလၢ(KECD)တၢ်ကူၣ်ဘၣ်ကူၣ်သ့အကျိၤအကျဲသ့ၣ်တဖၣ်န့ၣ်မီၤနီၤႉခီဖျိအ၀ဲသ့ၣ်မၤ၀ဲဒ်အံၤအဃိသ၀ီ(၆)ဖျၢၣ်ၦၤသ၀ီဖိဘၣ်ဃ့ၢ်ထီၣ်၀ဲ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်လီၢ်(၃)တီၤလၢကဘီယူၤဟဲခးလီၤတၢ်အံၤန့ၣ်မ့ၢ်၀ဲ လူၤသၤကီၢ်ဆၣ် ခ့ပူၤကရူၢ် သ့ၣ်သူခံသ၀ီႇ လၢၢ်မုၢ်ပျီကရူၢ် ကီာ်ရီၤဘီသ၀ီႇ ဒွဲၣ်လိကီၢ်ဆၣ် နါကိၢ်ခံကရူၢ် ထံကီာ်ထၣ်သ၀ီတဖၣ်ဒီး ခီဖျိပယီၤသုးအံၤပညိၣ်ခးလီၤတၢ်လိၤလိၤ လီၤအဃိကၠိသရၣ်ဒီးၦၤကၠိဖိသံ၀ဲခဲလၢာ်(၅)ဂၤတကးဒံးဘၣ်ကၠိသရၣ်မုၣ်(၁)ဂၤဒီးၦၤကၠိဖိ(၅)ဂၤဘၣ်ဒိဘၣ်ထံး၀ဲ အဂ့ၢ်န့ၣ် ခ့ၣ်အဲၣ်ယူၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ လါစဲးပထ့ဘၢၣ် ၇ သီအခါ ခီဖျိပယီၤသုးကဘီယူၤဟဲခးလီၤတၢ်အဃိ ကၠိ(၁)ဖျၢၣ်ႇဟံၣ်ဒွဲ(၁)ဖျၢၣ်ႇ တၢ်ဘါယွၤသရိာ်(၁)ဖျၢၣ်ႇ တၢ်ထုကဖၣ်ဒၢး(၁)ဖျၢၣ်ဒီးကမျၢၢ်အဟံၣ်အဖျၢၣ်(၁၀)ဟးဂီၤ၀ဲအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ လၢန့ၣ်အမဲာ်ညါသုးကီၣ်ကးအံၤလုၢ်သ့ၣ်ခါပတာ်မၤကမၣ်၀ဲဒုးယၤကွီၢ်မ့ၣ်ဒီးထီၣ်ဒုးကမျၢၢ်လၢကဘီယူၤဒ်အံၤ မ့ၢ်တၢ်လုၢ်သ့ၣ်ခါပတာ်တၢ်သိၣ်တၢ်သီအဃိဟီၣ်ခိၣ်ဒီဘ့ၣ်ဘီမုၢ်စၢဖှိၣ်ကရၢႇဘီမုၢ်စၢဖှိၣ်ကရၢ ထံကီၢ်တဖၣ်မ့ၢ်ဂ့ၤႇ ထံဂုၤကီၢ်ဂၤကျဲသနူမ့ၢ်ဂ့ၤႇဟီၣ်က၀ီၤပူၤတၢ်ကရၢကရိတဖၣ်လၢအမ့ၢ်(အၣ်စံၣ်ယၣ်)ဒီးအ၀ဲသ့ၣ်ကရၢဖိထံကီၢ်တဖၣ်ႇ...
တၢ်ဆီတလဲ KNU သုးက့(၃)ဘ့ၣ် သုးက့ခိၣ် ဒီး ဒုးယၤခိၣ်လီၢ်လၤတဖၣ်
လါစဲးပထ့ဘၢၣ် ၁၂ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲအပူၤကွံာ်စှၤသီအခါ လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤတၢ်လီၢ်တတီၤအပူၤ တၢ်မၤ၀ဲ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးခိၣ်သုးနၢ်တၢ်ထံၣ်လိာ်အိၣ်သကိးတခါဒီးလၢတၢ်အိၣ်ဖှိၣ်ဘျီ၀ဲအံၤအပူၤ တၢ်ဆီတလဲ၀ဲ KNU သုးက့(၃)ဘ့ၣ် သုးက့ခိၣ်ဒီးဒုးယၤခိၣ်လီၢ်လၤတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်မၤသုးခိၣ်သုးနၢ်တၢ်ထံၣ်လိာ်အိၣ်သကိးဘျီ၀ဲအံၤအပူၤန့ၣ် ခ့ၣ်အဲၣ်ယူၣ်(သုးက့ ၄)သုးက့ခိၣ် သုးခိၣ်ကျၢၢ်ဖိ စီၤလ့မုၢ်အလီၢ်န့ၣ် တၢ်တီၣ်ထီၣ်က့ၤ၀ဲ သုးခိၣ်ဒိၣ်ဂီၢ်ဂ့ၢ် စီၤဖိလ့ႇ (သုးက့ ၆)သုးက့ခိၣ် သုးခိၣ်ကျၢၢ်ဖိ စီၤဆးမံၣ်စ့ဖိ အလီၢ်န့ၣ် တၢ်တီၣ်ထီၣ်က့ၤ၀ဲ သုးခိၣ်ဒိၣ်စိ စီၤကိၢ်ထူဒီး (သုးက့ ၇)သုးက့ခိၣ် သုးခိၣ်ကျၢၢ်ဖိ စီၤဖီဒိၣ် အလီၢ်ခီန့ၣ် တၢ်တီၣ်ထီၣ်က့ၤ၀ဲ သုးခိၣ်ဒိၣ်စိ စီၤဒံၣ်ကွဲၤထူသ့ၣ်တဖၣ်အံၤန့ၣ်လီၤႉ လၢန့ၣ်အမဲာ်ညါမ့မ့ၢ်(သုးက့ ၄)ဒုးယၤခိၣ်အလီၢ်န့ၣ် တၢ်တီၣ်က့ၤ၀ဲလၢ သုးရ့ၣ်(၂၀၃)သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤလ့သ့ႇ (သုးက့ ၆)န့ၣ် တၢ်တီၣ်ထီၣ်က့ၤ၀ဲသုးရ့ၣ်(၂၇)သုးရ့ၣ်ခိၣ် သုးခိၣ်ဒိၣ်စိ စီၤယၤနဲၤ(ကိး)စီၤနၢၤဒါထူ ဒီး (သုးက့ ၇) ဒုးယၤခိၣ်အလီၢ်န့ၣ် တၢ်တီၣ်ထီၣ်က့ၤ၀ဲလၢသုးရ့ၣ်(၁၀၁)သုးရ့ၣ်ခိၣ် သုးခိၣ်ဒိၣ်စိ စီၤဖိဒူသ့ၣ်တဖၣ်အံၤ န့ၣ်လီၤႉ ဘၣ်ဃးတၢ်ဆီတလဲသုးက့ခိၣ်ႇဒုးယၤခိၣ်အလီၢ်အကျဲတၢ်ဂ့ၢ်အံၤ(KNLA)လီၢ်ခၢၣ်သး သုးရိၣ်မဲခိၣ်–၁ သုးခိၣ်ကျၢၢ်ဖိ စီၤတၢ်မျၢ်သီ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ “တၢ်ဆီတလဲန့ၣ်အိၣ်ဒၣ်လၢခိၣ်နၢ်တဖၣ်တၢၣ်ပီၣ်လိာ်သးဒၢးဆီတလဲ၀ဲလီၤႉတမ့ၢ်လၢတၢ်အိၣ်ဖှိၣ်တၢ်ဆၢတဲာ်ဘၣ်ႉ...
ပယီၤသုးကဘီယူၤဟဲခးလီၤတၢ်အဃိ(လ့ၣ်သိၤ)လီၢ်က၀ီၤကမျၢၢ်သံ ၁ ဂၤႇ ဖိသၣ်ဘၣ်ဒိ ၄ ဂၤ
လါစဲးပထ့ဘၢၣ် ၁၂ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် သၣ်တီၣ်ကၠံ၀့ၢ်ကလံၤစိး လ့ၣ်သိၤကီၢ်ဆၣ် ထံသၤစီသ၀ီအပူၤ ဖဲလါစဲးပထ့ဘၢၣ် ၁၀ သီအနံၤ ခီဖျိပယီၤသုးကဘီယူၤဟဲခးလီၤတၢ်အဃိ ကမျၢၢ်သံ ၁ ဂၤဒီး ၦၤဖိသၣ်ဘၣ်ဒိ၀ဲ ၄ ဂၤအဂ့ၢ်န့ၣ် လီၢ်က၀ီၤကမျၢၢ် စံး၀ဲအသိးသ့ၣ်ညါဘၣ်န့ၣ်လီၤႉ ဒူသ၀ီခိၣ်ဃၢၤဖဲန့ၣ်တဖၣ်တၢ်ဒုးကဲထီၣ်တအိၣ်၀ဲဒၣ်ဘၣ်ဒီးခီဖျိပယီၤသုးကဘီယူၤဟဲခးလီၤတၢ်အဃိ လီၢ်က၀ီၤကမျၢၢ်သံ၀ဲ ၁ ဂၤအသိး ၦၤဖိသၣ်ဘၣ်ဒိ ၄ ဂၤအကျါ မ့မ့ၢ်လၢအ၀ဲခံဂၤန့ၣ်ဘၣ်ဒိနး၀ဲအဂ့ၢ်န့ၣ် လီၢ်က၀ီၤကမျၢၢ်တဂၤ စံး၀ဲဒ်အံၤန့ၣ်လီၤႉ “တၢ်ဒုးကဲထီၣ်တအိၣ်နီတမံၤဘၣ်ႇဘၣ်မနုၤအဃိဟဲခးလီၤ၀ဲလဲၣ်န့ၣ်ပတသ့ၣ်ညါဘၣ်ႉၦၤဖိသၣ်လၢအဘၣ်ဒိ(၄)ဂၤ လၢာ်န့ၣ်အိၣ်ဖဲသ၀ီ၀ဲအံၤလီၤႉသီခါဖၠၣ်နါက့ဘၣ်ဒီးမ့ၣ်ပိၢ်အက့အဃိဟးဂီၤအိၣ်စ့ၢ်ႉလၢန့ၣ်တကပၤန့ၣ်လီတဲစိအကျိၤ တန့ၢ်ဘၣ်ႇအဃိတၢ်မ့ကဲထီၣ်သးတမံၤမံၤန့ၣ်ပဆဲးကျိးဘၣ်ၦၤကီမီၤနီၤႉ”အဂ့ၢ်န့ၣ် စံး၀ဲန့ၣ်လီၤႉ ခီဖျိပယီၤသုးကဘီယူၤဟဲခးလီၤတၢ်အဃိသ၀ီပူၤသီခါဖၠၣ်စ့ၢ်ကီးဟးဂီၤ၀ဲအသိး တီၤဖုၣ်ကၠိႇၦၤဟံၣ်ၦၤဃီဟးဂီၤ၀ဲဒီး ကမျၢၢ်စ့ၢ်ကီးဘၣ်ဃ့ၢ်ထီၣ်၀ဲဒၣ်အဂ့ၢ်န့ၣ် လီၢ်က၀ီၤကမျၢၢ်ပိာ်ခွါတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ လ့ၣ်သိၤ၀့ၢ် ဒူသ၀ီတဖၣ်အံၤ အိၣ်၀ဲဒၣ်လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၂)ဟီၣ်က၀ီၤ တီအူကီၢ်ရ့ၣ်အပူၤဒီးတၢ်ဒုးကဲထီၣ်စ့ၢ်ကီးလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီး ပယီၤသုး အဘၢၣ်စၢၤခဲအံၤခဲအံၤန့ၣ်လီၤႉ ဖဲအပူၤကွံာ်လါစဲးပထ့ဘၢၣ် ၇ သီအခါစ့ၢ်ကီး လၢ(စ့ၣ်တီကျိ)မုၢ်ထီၣ် ယ့ၤတၤစှ့ၤကီၢ်ဆၣ် သ၀ီတဖၣ်အပူၤ တၢ်ဒုးကဲထီၣ်၀ဲလၢပယီၤသုးဒီး(KNLA)သုးပာ်ဖှိၣ်အဘၢၣ်စၢၤအဃိ ပယီၤသုးတကပၤသံအဂၤ(၂၀)ဘျဲၣ်ဒီး ကဘီယူၤဟဲခးလီၤစၢၤတၢ်ဒံးအဂ့ၢ်န့ၣ် ဒီကလုာ်ဃူဖိးပဒိၣ်(NUG)တၢ်ဒီသဒၢကိတိာ်၀ဲၤကျိၤ ထုးထီၣ်ပာ်ဖျါတ့ၢ်ဃာ် တၢ်ကစီၣ်ဒံးန့ၣ်လီၤႉ ခီဖျိပယီၤသုးကဘီယူၤဟဲခးလီၤတၢ်အဃိ စွ့ၤသီၤသ၀ီဒီးသ၀ီလၢအိၣ်တၢ်ခိၣ်တၢ်ဃၢၤဖဲန့ၣ်ကမျၢၢ်တဖၣ် ဘၣ်ဃ့ၢ်ထီၣ် ဟးပလဲာ်အသးဒီးခီဖျိပယီၤသုးနုာ်လီၤမၤၦဲၤထီၣ်အဂံၢ်အဘါလၢပျီပူၤအဃိကမျၢၢ်တဖၣ်ပျံၤတၢ်ဖုးတၢ် အဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ
ပယီၤသုးပျိ၁်လဲထီၣ်သးဒ်တၢ်ဒီသဒၢကမျၢၢ်သုးကရူၢ်အသိး၀ံၤ အိၣ်ခိးဃ့အီၣ်စ့လၢကမျၢၢ်အအိၣ်
လါစဲးပထ့ဘၢၣ် ၁၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် သယဲၣ်ခၠီကီၢ်ဆၣ် ဒူသ၀ီတဖၣ်အပူၤ ပယီၤသုးသ့ၣ်တဖၣ်ပျိာ်လဲထီၣ်အသးဒ်တၢ်ဒီသဒၢ ကမျၢၢ်သုးကရူၢ် ဆီလီၤတြဲၤတၢ်သမံသမိးလီၢ်ဒီး အိၣ်ခိးဃ့အီၣ်စ့လၢကမျၢၢ်လ့ၢ်ထီၣ်လ့ၢ်လိၤဖဲန့ၣ်တဖၣ်အအိၣ် အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ သယဲၣ်ခၠီကီၢ်ဆၣ် သယဲၣ်ခၠီဃုာ်ဒီးဒူသ၀ီလၢအိၣ်တၢ်ခိၣ်တၢ်ဃၢၤဖဲန့ၣ်သ့ၣ်တဖၣ်အပူၤ စးထီၣ်ဖဲအပူၤကွံာ် လါစဲးပထ့ဘၢၣ် ၅ သီအနံၤ ပယီၤသုးတဖၣ်ပျိာ်လဲထီၣ်အသးဒ်တၢ်ဒီသဒၢကမျၢၢ်သုးဒီးအိၣ်ခိးဃ့အီၣ်စ့လၢကျဲပူၤ အဂ့ၢ်န့ၣ် လီၢ်က၀ီၤကမျၢၢ်လၢအသဂၢၢ်ဘၣ်တၢ်ကဲထီၣ်သးအံၤတဂၤ စံး၀ဲဒ်အံၤန့ၣ်လီၤႉ “ယမိနါက့ၦၤဖီၣ်အီၤဖဲကျဲ၀ဲန့ၣ်လီၤႉအတဲ၀ဲလၢ(PDF)ဖီၣ်ႇဃ့၀ဲစ့အကလီၢ်(၃၀၀)ကၠးႉခဲအံၤဃ့၀ဲ(၁၅၀)လံႉ ယတဲအီၤလၢကဟ့ၣ်အကလီၢ်(၅၀)မးတန့ၢ်ဘၣ်ႉအ၀ဲသ့ၣ်ဃ့အီၣ်စ့တလၢန့ၢ်အခၢးႉ(PDF)ဃ့တၢ်ဒ်အံၤတနၢ်ဟူနီတဘျီဘၣ်ႉအဃိပဘၣ်သးကိၢ်ဒိၣ်မီၤနီၤႉခဲအံၤၦၤဟဲက့ၤထူၣ်ဖျဲးထီၣ်ထဲၦၤနီသိလ့ၣ်ဖိ(၂)ဂၤဒံးလီၤႉအ၀ဲသ့ၣ်ဆီလီၤ တြဲၤ ကယဲၢ်မ့ၢ်ၦၤလ့ၢ်ထီၣ်လ့ၢ်လိၤဖဲန့ၣ်တဖၣ်န့ၣ်ဖဲအ၀ဲသ့ၣ်အဲၣ်ဒိးဃ့န့ၣ်ဃ့၀ဲလီၤ”အဂ့ၢ်န့ၣ် လီၢ်က၀ီၤကမျၢၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ လၢန့ၣ်အမဲာ်ညါပယီၤသုးအိၣ်ခိးဃ့အီၣ်စ့တကးဒံးဘၣ်အမဲာ်ညါ လၢသယဲၣ်ခၠီကီၢ်ဆၣ် ပၢၤကီၢ်၀ဲၤလီၢ်မဲာ်ညါ န့ၣ်စ့ၢ်ကီးအ၀ဲသ့ၣ်ဆီလီၤတြဲၤတၢ်သမံသမိးလီၢ် စးထီၣ်လၢဂီၤခီ ၆ နၣ်ရံၣ်န့ၣ် ခီဖျိအ၀ဲသ့ၣ်ဃ့အီၣ်စ့လၢကမျၢၢ်လၢ အဟးထီၣ်က့ၤလီၤဖဲန့ၣ်သ့ၣ်တဖၣ်အအိၣ်အဃိတၢ်ကီတၢ်ခဲအိၣ်ထီၣ်လၢတၢ်ဟးထီၣ်က့ၤလီၤတကပၤအဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ဘၣ်ဃးပယီၤသုးဆီလီၤတြဲၤအိၣ်ခိးသမံသမိးဃ့အီၣ်စ့ဒ်အံၤအဖီခိၣ်ကဟးထီၣ်က့ၤလီၤလၢတၢ်ပလီၢ်ပဒီပူၤႇ ကအိၣ်ယံၤဒီးပယီၤသုးအတၢ်လီၢ်တၢ်ကျဲအဂ့ၢ်န့ၣ် တနီသရံၣ်တၢ်ဒီသဒၢကမျၢၢ်သုးကရူၢ် တၢ်ဘိးဘၣ်ရၤလီၤမူဒါခိၣ် တဂၤ ဟ့ၣ်ပလီၢ်စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ခဲအံၤန့ၣ်ပယီၤသုးမၤထီၣ်အသးဒ်သိးၦၤ(PDF)တဖၣ်မီၤနီၤႉမ့၀ံၤအိၣ်ခိးဃ့အီၣ်စ့လၢကျဲပူၤဒ်အံၤအိၣ်န့ၣ်တၢ်လီၢ်ကိးတီၤဒဲးလီၤႉအဃိကမျၢၢ်တဖၣ်ကအိၣ်လၢတၢ်ပလီၢ်ပဒီပူၤႉပအဲၣ်ဒိးဒုးသ့ၣ်ညါကမျၢၢ်လၢဟးထီၣ်က့ၤလီၤလၢတၢ်ပလီၢ်ပဒီပူၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးဖဲအပူၤကွံာ်လါမ့ၤထီၣ် ၁ သီအခါန့ၣ်စ့ၢ်ကီး လၢတနီသရံၣ်ကီၢ်ခီဒိၣ် ပလီကီၢ်ဆၣ် တိၤတြဲၤတၢ်မံသမိးလီၢ်ဒီး တၢ်သမံသမိးတြဲၤသ့ၣ်တဖၣ်န့ၣ်ပယီၤသုးတဖၣ်ပျိာ်လဲထီၣ်အသးဒ်တၢ်ဒီသဒၢကမျၢၢ်သုးႇကူကၤထီၣ်ကမျၢၢ်ကူကၤ အိၣ်ခိးသမံသမိးတၢ်ဃ့အီၣ်စ့တုၤလၢခဲအံၤတစုအဂ့ၢ်န့ၣ် လီၢ်က၀ီၤကမျၢၢ်လၢအသဂၢၢ် တၢ်ကဲထီၣ်သးအံၤတဖၣ်စံး၀ဲ အသိးသ့ၣ်ညါဘၣ်န့ၣ်လီၤႉ
တၢ်ဟ့ၣ်လီၤထီထီၣ်န့ၢ် ကညီဒီကလု၁်ပၢၤကီၢ်သုး(၈)ဂၤလၢလီၢ်လၤမူဒါ
လါစဲးပထ့ဘၢၣ် ၈ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲမဟါလါစဲးပထ့ဘၢၣ် ၇ သီအနံၤ လၢခ့ၣ်အဲၣ်ယူၣ်(သုးက့ ၇)ဟီၣ်က၀ီၤ ဖၣ်အၣ်ကီၢ်ရ့ၣ်အပူၤ တၢ်မၤ၀ဲတၢ်ဟ့ၣ်လီၤ ထီထီၣ်န့ၢ်ကညီဒီကလုာ်ပၢၤကီၢ်သုး(KNPF)လီၢ်ခၢၣ်သးဒီး ဖၣ်အၣ်ကီၢ်ရ့ၣ် ကီၢ်ဆၣ်ကိးဘ့ၣ်ဒဲး ကညီဒီကလုာ် ပၢၤကီၢ်သုး(၈)ဂၤလၢလီၢ်လၤမူဒါတၢ်ရဲၣ်တၢ်ကျဲၤမူးတခါန့ၣ်လီၤႉ (KNPF)လီၢခၢၣ်သး ပၢၤကီၢ်လၢအမၤတ့ၢ်တၢ်မၤယံၤ(၃)ဂၤအံၤဃုာ်ဒီး ဖၣ်အၣ်ကီၢ်ရ့ၣ် ကီၢ်ဆၣ်ကိးဘ့ၣ်ဒဲး ပၢၤကီၢ်သုး(၅)ဂၤလၢအဖျိထီၣ်ပၢၤကီၢ်တၢ်သိၣ်လိအံၤ ပာ်ဖှိၣ်ခဲလၢာ်(၈)ဂၤ တၢ်ဟ့ၣ်လီၤထီထီၣ်န့ၢ်၀ဲလၢ ကီၢ်ဆၣ်ပၢၤကီၢ်ခိၣ် ပၢၤကီၢ်ခိၣ်–၂ လီၢ်လၤ အဂ့ၢ်န့ၣ် ဖၣ်အၣ်ကီၢ်ရ့ၣ် ပၢၤကီၢ်ခိၣ် သုးခိၣ်ဒိၣ်စိ–၂ စီၤမီၤကၠံၤ စံး၀ဲန့ၣ်လီၤႉ အ၀ဲစံး၀ဲလၢ“ပထီထီၣ်န့ၢ်အ၀ဲသ့ၣ်ဆၣ်လီၢ်လၤဒ်အံၤတမ့ၢ်ပထီထီၣ်အီၤယိယိဒ်န့ၣ်ဘၣ်ႉပကွၢ်အကပၤကပၤ၀ံၤမးပထီထီၣ်န့ၢ်အ၀ဲသ့ၣ်မီၤနီၤႉၦၤလၢအမၤန့ၢ်လီၢ်လၤတဖၣ်အံၤတမ့ၢ်အဒိးန့ၢ်၀ဲညီညီဘၣ်ႉပကွၢ်အ၀ဲသ့ၣ်တၢ်အိၣ်တၢ်ဆိးႇလုၢ်လၢ်တၢ်သကဲးပ၀းတဖၣ်မီၤနီၤႉဘၣ်မနုၤအဃိလဲၣ်န့ၣ်ၦၤတဂၤလၢကကဲပၢၤကီၢ်ကပၢတၢ်ပြးတၢ်န့ၣ်အသကဲးပ၀းကဘၣ်ဂ့ၤမီၤနီၤႉကဘၣ်ဟးဆှဲး၀ဲတၢ်မူၤတၢ်ဘှီးတၢ်တၤကျိၣ်တၤစ့မီၤနီၤႉဘၣ်မနုၤလဲၣ်န့ၣ်ပၢၤကီၢ်န့ၣ်မ့ၢ်ၦၤတဖုလၢအရ့ဒိၣ်ဒ်သိးထံဖိကီၢ်ဖိကနာ်န့ၢ်အီၤႇဒ်န့ၣ်အသိးပၢၤကီၢ်စ့ၢ်ကီးကဘၣ်ပာ်လုၢ်ပာ်ၦ့ၤကမျၢၢ်မီၤနီၤႉဒ်န့ၣ်မးကမျၢၢ်ကနာ်န့ၢ်ၦၤလီၤ”အဂ့ၢ်န့ၣ် စံးဘၣ် ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်မၤတၢ်ဟ့ၣ်လီၤထီထီၣ်န့ၢ်ပၢၤကီၢ်သုးလီၢ်လၤတၢ်ရဲၣ်တၢ်ကျဲၤဘျီ၀ဲအံၤအပူၤန့ၣ် (KNPF)လီၢ်ခၢၣ်သး ပၢၤကီၢ်သုးကရူၢ် ပၢၤကီၢ်ခိၣ်ကျၢၢ် သုးခိၣ်ဒိၣ်စိ စီၤကၠံနိၤႇ ဖၣ်အၣ်ကီၢ်ရ့ၣ် ပၢၤကီၢ်ခိၣ်ကျၢၢ် သုးခိၣ်ဒိၣ်စိ–၂ စီၤမီၤကၠံၤႇ ဖၣ်အၣ်ကီၢ်ရ့ၣ် စံၣ်ညီၣ်ကွီၢ် ပဒိၣ်မါပၤသံၤႇ (သုးက့ ၇)သုးၦၤဘၣ်မူဘၣ်ဒါဒီးဟီၣ်က၀ီၤခ့ၣ်အဲၣ်ယူၣ်ၦၤဘၣ်မူဘၣ်ဒါႇ ကညီဒီကလုာ် ပၢၤကီၢ်သုးကရူၢ် ပၢၤကီၢ်သုးဖိတဖၣ်ဒီးကမျၢၢ်ခဲလၢာ်ဟဲထီၣ်၀ဲအဂၤ(၄၀)ဘျဲၣ်န့ၣ်လီၤႉ တၢ်ကြဲၢ်ကီၢ်ဆၣ် ပၢၤကီၢ်ခိၣ် စီၤထူကိၣ်လိၣ်လၢတၢ်ဟ့ၣ်လီၤထီထီၣ်န့ၢ်အလီၢ်လၤအံၤ စံး၀ဲလၢ “တနံၤအံၤၦၤဟ့ၣ်လီၤၦၤ လီၢ်လၤအံၤအဖီခိၣ်ပမူဒါအိၣ်ထီၣ်မီၤနီၤႉအဃိတၢ်လၢပကဘၣ်မၤအီၤစ့ၢ်ကီးဟဲအါထီၣ်ႉၦၤအိၣ်လၢကီၢ်ဆၣ်ပူၤႇကီၢ်ရ့ၣ်ပူၤတဖၣ်ဒ်သိးအ၀ဲသ့ၣ်ကလူၤပိာ်မၤထွဲကီၢ်သူလ့ၤတၢ်သိၣ်တၢ်သီတၢ်ဘျၢအဂီၢ်န့ၣ်ပကဘၣ်မၤဒ်သိးတၢ်သိၣ်တၢ်သီတၢ်ဘျၢ ကဒိၣ်စိအဂီၢ်မီၤနီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်ကီၢ်သူလ့ၤတၢ်သိၣ်တၢ်သီလၢခ့ၣ်အဲၣ်ယူၣ်ပာ်လီၤဃာ်၀ဲလၢ(ခ့ၣ်အဲၣ်ယူၣ်)တၢ်ပၢဟီၣ်က၀ီၤ ကီၢ်ရ့ၣ်(၇)ဘ့ၣ်...
ကီးတရံးကီၢ်ဆၣ်အပူၤ ဟုသးအၦ့ၤထီၣ်တကးဘၣ် တၢ်ကီတၢ်ခဲအိၣ်လၢကဟးဃုၦ့ၤအီၣ်ဟုသး
လါစဲးပထ့ဘၢၣ် ၈ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံးကီၢ်ဆၣ်အပူၤ ဟုသးအၦ့ၤဒိၣ်ထီၣ်ကွ့ၢ်ကွ့ၢ်တကးဒံးဘၣ်အမဲာ်ညါ ခီဖျိတၢ်ဒုးတၢ်ယၤ ကဲထီၣ်အဃိလီၢ်က၀ီၤၦၤသ၀ီဖိတဖၣ်အံၤတၢ်ကီတၢ်ခဲအိၣ်လၢကဟးဃုၦ့ၤအီၣ်ဟုသးအဂ့ၢ်န့ၣ် ကီးတရံးကမျၢၢ်တဖၣ် စံး၀ဲန့ၣ်လီၤႉ ကီးတရံးကီၢ်ဆၣ် ဒူသ၀ီတဖၣ်အပူၤ ခီဖျိတၢ်ဒုးတၢ်ယၤကဲထီၣ် တၢ်ကီတၢ်ခဲအိၣ်လၢၦၤကမၤအီၣ်စံာ်အဃိ ကမျၢၢ်တဖၣ်ဘၣ်လဲၤၦ့ၤအီၣ်ဟုသးလၢ၀့ၢ်ပူၤညါအသိးခီဖျိဟုသးၦ့ၤထီၣ်အဃိလၢဒူပူၤသ၀ီပူၤၦၤဆါဟုသးတအိၣ်အါအါလၢၤဘၣ်ဒီးခီဖျိတၢ်ဒုးကဲထီၣ်ခဲအံၤခဲအံၤအဃိတၢ်ကီတၢ်ခဲအိၣ်လၢၦၤကဟးဃုၦ့ၤအီၣ်ဟုသးအဂ့ၢ်န့ၣ် လီၢ်က၀ီၤကမျၢၢ် စံး၀ဲန့ၣ်လီၤႉ သၤယၤကိကမျၢၢ်တဂၤစံး၀ဲလၢ“ဖဲသ၀ီပူၤအံၤအါဒၣ်တက့ၢ်ၦၤမၤအီၣ်စံာ်န့ၣ်ၦၤမၤအီၣ်လၢၦၤကစၢ်ဟံၣ်ဖိဃီဖိကအီၣ်အဂီၢ်လီၤႉၦၤဘုမ့ပိၣ်မးၦၤဆါအီၤဒ်န့ၣ်မီၤနီၤႉခဲအံၤတၢ်အိၣ်သးတဂ့ၤဘၣ်ဘျီၦၤတဆါအါအါလၢၤဘၣ်ႉမ့မ့ၢ်ၦၤလၢ တမၤအီၣ်စံာ်ဘၣ်တဖၣ်ခီန့ၣ်လဲၤၦ့ၤအီၣ်ဟုသးလၢကီးတရံးလီၤမီၤနီၤႉတၢ်ဒုးဒၢးကဲထီၣ်ႇတၢ်စူၤကျဲစ့ၢ်ကီးတဂ့ၤဘၣ် အဃိဟးၦ့ၤအီၣ်ဟုသးကီခဲဒိၣ်မးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ(၂)ဘျဲၣ်အတီၢ်ပူၤဂံၢ်ခီၣ်ထံးတၢ်အီၣ်တၢ်အီႇပနံာ်တၢ်ဖိတၢ်လံၤအၦ့ၤဒိၣ်ထီၣ်၀ဲကွ့ၢ်ကွ့ၢ်အသိးကီးတရံးဟီၣ်က၀ီၤပူၤတၢ်ဒုးကဲထီၣ်၀ဲတလီၢ်လီၢ်အဃိလီၢ်က၀ီၤကမျၢၢ်ၦၤသ၀ီဖိတဖၣ်အံၤတၢ်ကီတၢ်ခဲအိၣ်ထီၣ်လၢတၢ်လုၢ်အီၣ်နီၢ်ခိသးသမူတကပၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ “စးထီၣ်လၢသုးဟံးန့ၢ်တၢ်စိတၢ်ကမီၤန့ၣ်တၢ်အီၣ်တၢ်အီတၢ်ဖိတၢ်လံၤအၦ့ၤထီၣ်မၢ်မၢ်လီၤႉအပူၤကွံာ်လၢညါဟုသးတနာ်ဘျဲၣ်တထၢၣ်န့ၣ်အၦ့ၤအိၣ်(၂)ကလးဘျဲၣ် ခဲအံၤထီၣ်တုၤလၢ(၇)ကလးဘျဲၣ်လံႉတၢ်ဒုးစ့ၢ်ကီးကဲထီၣ်မၢ်မၢ်ဘျီ တဖံးအီၣ်မၤအီၣ်ဘၣ်တၢ်လၢၤဘၣ်ႉလၢကအီၣ်ကအီအဂီၢ်တၢ်ကီတၢ်ခဲအိၣ်ထီၣ်မီၤနီၤ”အဂ့ၢ်န့ၣ် ကီးတရံး ကမျၢၢ်တဂၤ စံး၀ဲန့ၣ်လီၤႉ လၢန့ၣ်အမဲာ်ညါကီးတရံးဟီၣ်က၀ီၤအပူၤပယီၤသုးအံၤတပျဲၦၤစိာ်ဟုသးအါန့ၢ်(၂)ထၢၣ်ဘၣ်ဒီး အ၀ဲသ့ၣ်မ့ထံၣ်ၦၤစိာ် အါန့ၢ်ဒံး(၂)ထၢၣ်န့ၣ်ဟံကွံာ်၀ဲဟုသးထၢၣ်တဖၣ်န့ၣ်ခဲလၢာ်လီၤအဂ့ၢ်န့ၣ် လီၢ်က၀ီၤကမျၢၢ် စံး၀ဲန့ၣ်လီၤႉ ဒ်န့ၣ်အသိးမၠၣ်၀တံၣ်၀့ၢ်ခိၣ်၀့ၢ်ဃၢၤဒူသ၀ီတဖၣ်အပူၤတၢ်ဒုးကဲထီၣ်၀ဲလၢဟီၣ်က၀ီၤတၢ်ပၢၢ်ဆၢသုးပာ်ဖှိၣ်ဒီး ပယီၤသုးႇသုးခိးကီၢ်ဆၢ(BGF)အဘၢၣ်စၢၤတလီၢ်လီၢ်အသိးခီဖျိပယီၤသုးအံၤခးလီၤကျိဖးဒိၣ်ဆူ၀့ၢ်ခိၣ်၀့ၢ်ဃၢၤဒူသ၀ီတဖၣ်အပူၤထီဘိအဃိကမျၢၢ်တဖၣ်တနီၤတမၤအီၣ်ဘၣ်စံာ်လၢၤဘၣ်ဟးစံၣ်ပလဲာ်သးတုၤလၢခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ တကီၢ်ခါခဲအံၤတၢ်ဒုးကဲထီၣ်၀ဲတလီၢ်လီၢ်တကးဒံးဘၣ်ခီဖျိပယီၤသုးမၤဟးဂီၤကွံာ်၀့ၢ်နုာ်လီၤကျဲတဖၣ်ႇပံးဃာ်၀ဲတၢ်ဟးထီၣ်က့ၤလီၤကျဲႇသမံသမိးကမျၢၢ်လၢအဟးထီၣ်က့ၤလီၤတဖၣ်အဃိဖဲလဲၤၦ့ၤတၢ်ဖိတၢ်လံၤလၢကီးတရံး၀့ၢ်ပူၤအခါဘၣ်လဲၤလၢတၢ်ပျံၤတၢ်ဖုးပူၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
KNU(သုးက့ ၅)ထီၣ်မၤန့ၢ် ခ့ပူၤကရူၢ် ဆၣ်လီၤကၠိ ပယီၤသုးကလၢၤ
လါစဲးပထ့ဘၢၣ် ၈ သီႇ ၂၀၂၃ နံၣ်ႇ ခ့ၣ်အဲးစံၣ် ဆၣ်လီၤကၠိပယီၤသုးကလၢၤလၢအိၣ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤ လူၤသီကီၢ်ဆၣ် ခ့ပူၤကရူၢ်ပူၤအံၤ ဖဲလါစဲးပထ့ဘၢၣ် ၆ သီ ဂီၤခီအဆၢကတီၢ် ကညီဒီကလုာ်တၢ်ထူၣ်ဖျဲးသမုၢ်ဒိၣ် (KNLA)သုးပာ်ဖှိၣ်ထီၣ်မၤန့ၢ်၀ဲလံအဂ့ၢ်န့ၣ် မုၢ်တြီၢ်ကီၢ်ရ့ၣ်တၢ်ကစီၣ်ထုးထီၣ်ပာ်ဖျါ၀ဲန့ၣ်လီၤႉ ဆၣ်လီၤကၠိပယီၤသုးကလၢၤအံၤသုးနီၣ်ဂံၢ်ကအိၣ်၀ဲအဂၤ(၅၀)ဘျဲၣ်ဒီးမ့ၢ်သုးကလၢၤတဖျၢၣ်လၢအိၣ်ဘူး၀ဲဒီးကမျၢၢ် တၢ်အိၣ်တၢ်ဆိးလီၢ်ကျဲႇတၢ်ဖံးအီၣ်မၤအီၣ်လီၢ်ကျဲအသိးတကးဒံးဘၣ်ပယီၤသုးတဖၣ်အံၤသမံသမိးကမျၢၢ် ထံဖိကီၢ်ဖိႇၦၤကၠိဖိလၢအဟးထီၣ်က့ၤလီၤတဖၣ်ဒီးခးလီၤပျံၤကျိဖးဒိၣ်လၢသ၀ီပူၤအိၣ်၀ဲအဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)စံး၀ဲန့ၣ်လီၤႉ ခ့ၣ်အဲၣ်ယူၣ်(သုးက့ ၅)ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ်စံး၀ဲလၢ“အခိၣ်တီန့ၣ်ၦၤလဲၤထီၣ်ခးအ၀ဲသ့ၣ် သုးကလၢၤမီၤနီၤႉမ့ၢ်လၢသုးကီၣ်ကးတကပၤဘၣ်ဒိဘၣ်ထံးအါႇစံၣ်ထီၣ်လၢတၢ်ချၢဘျီၦၤက၀ီၤအ၀ဲသ့ၣ်ဒီး ၦၤထီၣ်န့ၢ်သုးကလၢၤအံၤလီၤႉၦၤထီၣ်န့ၢ်သုးကလၢၤ၀ံၤလီၢ်ခံဖဲမဟါန့ၣ်ပယီၤသုးကဘီယူၤဟဲခးလီၤဒံးတၢ်လၢ သုးကလၢၤ ၀ဲန့ၣ်အခိၣ်အဃၢၤဒံးႉကမျၢၢ်ဘၣ်ဒိအိၣ်ႇလီၤတံၢ်လီၤဆဲးခီန့ၣ်တပသ့ၣ်ညါဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ဆၣ်လီၤကၠိပယီၤသုးကလၢၤအံၤမ့ၢ်သုးကလၢၤတဖျၢၣ်လၢတၢ်ဟဲတ့ထီၣ်အီၤဖဲအပူၤကွံာ်(၂၀၀၇)နံၣ်အခါန့ၣ်ဒီး ဖဲတၢ်လဲၤထီၣ်မၤန့ၢ်ပယီၤသုးကလၢၤအံၤအခါပယီၤသုးတကပၤသံဘၣ်ဒိဘၣ်ထံး၀ဲအါမးဒီးတၢ်မၤန့ၢ်ဃုာ်၀ဲကျိဆံး ကျိဒိၣ်ဃုာ်ဒီးအချံအသၣ်တဖၣ်အါမးန့ၣ်လီၤႉဒ်န့ၣ်အသိးတၢ်လဲၤထီၣ်သုးကလၢၤဘျီ၀ဲအံၤအပူၤမ့မ့ၢ်လၢ(KNLA)သုးပာ်ဖှိၣ်တကပၤတၢ်ဘၣ်ဒိဘၣ်ထံးတအိၣ်နီတမံၤဘၣ်အဂ့ၢ်န့ၣ် မုၢ်တြီၢ်ကီၢ်ရ့ၣ် စံး၀ဲန့ၣ်လီၤႉ တၢ်ထီၣ်န့ၢ်သုးကလၢၤအံၤ၀ံၤလီၢ်ခံဖဲမဟါလါစဲးပထ့ဘၢၣ် ၇ သီအနံၤ သုးမီၤစိရိၤအကဘီယူၤ(၂)ဘ့ၣ် ဟဲတ့ၢ်လီၤမ့ၣ်ပိၢ်လၢလူၤသီကီၢ်ဆၣ် ကီၤရိၢ်ဘီထၣ်သ၀ီႇသ့ၣ်သူခံသ၀ီဒီးဒ့ၣ်ဘူးနိၣ်သ၀ီကရူၢ်ပူၤအဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ဒ်န့ၣ်အသိးဖဲမဟါလါစဲးပထ့ဘၢၣ် ၇ သီ ဂီၤခီအဆၢကတီၢ် လၢမုၢ်တြီၢ်ကီၢ်ရ့ၣ်အပူၤ ဖဲပယီၤသုးစုတီၤဖီလာ် ၦၤမၤတၢ်ဖိတဖၣ်မၤ၀ဲတၢ်အိၣ်ဖှိၣ်ဖဲကမၤမိၢ်ကီၢ်ဆၣ်ဒ့ ပၢပြး၀ဲၤဒၢးတၢ်အိၣ်ဖှိၣ်ဘျီၣ်ပူၤအခါ ခီဖျိတၢ်လဲၤတ့ၢ်လီၤ၀ဲ ဒြိမ့ၣ်ပိၢ်အဃိ က၀ီၤဒ့(၄)သးၦၢ် စိမ့ သံ၀ဲတဘျီဃီဖဲတၢ်ကဲထီၣ်သးအဂ့ၢ်န့ၣ် ဖၣ်ပူၣ်...
ပယီၤသုးဟဲက့ၤဟ့ၣ်လီၤသးဆူ(KNU)အအိၣ်တဂၤႇတၢ်ဟ့ၣ်လၤကပီၤအီၤစ့အကလီၢ်(၅၀)ကၠး
လါစဲးပထ့ဘၢၣ် ၈ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤအပူၤ ပယီၤသုးအၦၤ ဟဲက့ၤဟ့ၣ်လီၤသးဆူ(KNLA) သုးရ့ၣ် ၁၇ သုးဒ့ ၂ အအိၣ်တဂၤဒီး တၢ်ဟ့ၣ်လၤကပီၤအီၤစ့အကလီၢ်(၅၀)ကၠး အဂ့ၢ်န့ၣ် ခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ် ထုးထီၣ်ပာ်ဖျါ၀ဲဖဲမဟါလါစဲးပထ့ဘၢၣ် ၇ သီ အနံၤန့ၣ်လီၤႉ ပယီၤသုးလၢအဟဲက့ၤဟ့ၣ်လီၤသးတဂၤအံၤမ့ၢ်၀ဲ ကၠၤအ့စ့ၣ်ကၠံ၀့ၢ် ခီၣ်သုးရ့ၣ်(ခလရ–၃၂)သုးရ့ၣ်အၦၤ စဲဖၠိအီၤ (၂၂)နံၣ်အံၤဒီး အ၀ဲဟဲက့ၤစိာ်ဃုာ်(MA-1)တခိၣ်ႇ ကျိဒၢ(၅)ခါႇ (၅ႉ၅၆)ကျိချံ ၇၅ ဖျၢၣ်ဒီး အံၣ်ကွ့မဲၣ်(၁)စိၢ်အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ကယဲၢ်မ့ၢ်သုးကီၣ်ကးအၦၤလၢအဟဲက့ၤဟ့ၣ်လီၤသးဆူခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢအအိၣ်တဖၣ် ကွဲမုာ်တူၢ်လိာ်သဂၢၢ်၀ဲဂ့ၤဂ့ၤလီၤဒီးခါဆူညါအ၀ဲသ့ၣ်ကအိၣ်ဆၢထၢၣ်အဂီၢ်စ့ၢ်ကီးကဆီၣ်ထွဲမၤစၢၤ၀ဲအဂ့ၢ်န့ၣ် ခ့ၣ်အဲၣ်ယူၣ် လံာ်တၢ်ပာ်ဖျါအပူၤစံး၀ဲန့ၣ်လီၤႉ လၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤအပူၤ ပၢၤကီၢ်သုးဒီးပယီၤသုးလၢအနုာ်လီၤမၤ(CDM)တဖၣ်ဃုာ်ဒီးအ၀ဲသ့ၣ် ဟံၣ်ဖိဃီဖိတဖၣ် တၢ်ဆီၣ်ထွဲမၤစၢၤအ၀ဲသ့ၣ်စ့ကိးလါဒဲးလီၤအဂ့ၢ်န့ၣ် နိၣ်တကီကီၢ်ဆၣ်(ပအဖ)စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ