ဖဲတၢ်မၤတၢ်အိၣ်ဖှိၣ်ဖဲ(ကမၤမိၢ်)ပၢပြး၀ဲၤဒၢးအကတီၢ် တၢ်လဲၤတ့ၢ်လီၤဒြိမ့ၣ်ပိၢ်အဃိ က၀ီၤဒ့သးၦၢ်သံ
လါစဲးပထ့ဘၢၣ် ၈ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲမဟါလါစဲးပထ့ဘၢၣ် ၇ သီ ဂီၤခီအဆၢကတီၢ် ဖဲပယီၤသုးစုတီၤဖီလာ်ၦၤမၤတၢ်ဖိတဖၣ် မၤတၢ်အိၣ်ဖှိၣ် လၢကညီကီၢ်စဲၣ် ဖၣ်ပူၣ်ကီၢ်ရ့ၣ် ကမၤမိၢ်ကီၢ်ဆၣ်ဒ့ ပၢပြး၀ဲၤဒၢးဘျီၣ်ပူၤအခါ ခီဖျိတၢ်လဲၤတ့ၢ်လီၤဒြိမ့ၣ်ပိၢ်အဃိ က၀ီၤဒ့(၄)သးၦၢ် စိမ့ သံတဘျီဃီအဂ့ၢ်န့ၣ် ဖၣ်ပူၣ်တၢ်ဒီသဒၢကမျၢၢ်သုး(PPDF)ထုးထီၣ်ပာ်ဖျါတၢ်ကစီၣ်န့ၣ်လီၤႉ ၦၤလၢအပၣ်ဃုာ်လၢသုးကီၣ်ကးအတၢ်ပၢတၢ်ပြးပူၤတဖၣ်အံၤခီဖျိအတၢ်လူၤပိာ်မၤထွဲလံာ်တၢ်ကလုၢ် တအိၣ်ဘၣ်အဃိဘၣ်တၢ်ဟ့ၣ်ပလီၢ်အ၀ဲသ့ၣ်ဒ်အံၤလီၤအဂ့ၢ်န့ၣ် (PPDF)လံာ်တၢ်ပာ်ဖျါအပူၤ စံး၀ဲန့ၣ်လီၤႉ တၢ်လဲၤတ့ၢ်လီၤဒြိမ့ၣ်ပိၢ်ဘျီ၀ဲအံၤန့ၣ်မ့ၢ်၀ဲ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA), ဖၣ်ပူၣ်ကီၢ်ရ့ၣ် တၢ်ဒီသဒၢကမျၢၢ်သုး(PPDF), (Bridgade 1- Bridage Drone Force(B1BDF)သုးပာ်ဖှိၣ်လဲၤတ့ၢ်လီၤ၀ဲဒီး ၦၤလၢအဟဲထီၣ်တၢ်အိၣ်ဖှိၣ်တဖၣ်ဘၣ်ဒိဘၣ်ထံး၀ဲဒီးမ့မ့ၢ်က၀ီၤဒ့(၄)သးၦၢ်ခီန့ၣ် သံ၀ဲတဘျီဃီဖဲန့ၣ်လီၤအဂ့ၢ်န့ၣ် (PPDF)လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ဖဲအပူၤကွံာ်လါအီကူး ၈ သီအခါ ခ့ၣ်အဲၣ်ယူၣ်(မုၢ်တြီၢ်ကီၢ်ရ့ၣ်)ထုးထီၣ်တၢ်ကလုၢ်လၢသုးကီၣ်ကးစုတီၤဖီလာ် ၀ဲၤကျိၤၦၤမၤတၢ်ဖိႇက၀ီၤဒ့သးၦၢ်ႇဒူသ၀ီသးၦၢ်လၢအိၣ်(ခ့ၣ်အဲၣ်ယူၣ်)မုၢ်တြီၢ်ကီၢ်ရ့ၣ်ပူၤတဖၣ် ကဘၣ်ဟးထီၣ်ကွံာ်လၢ တၢ်မၤမူဒါပူၤခဲလၢာ်န့ၣ်လီၤႉ ဒ်န့ၣ်အသိးဖဲအပူၤကွံာ်တလါအံၤလါစဲးပထ့ဘၢၣ် ၃ သီ ဟါခီ ၆ နၣ်ရံၣ်တခီဃၣ်ဃၣ်အဆၢကတီၢ်စ့ၢ်ကီး တၢ်လဲၤတ့ၢ်လီၤဒြိမ့ၣ်ပိၢ်လၢမၠၣ်၀တံၣ် ကီၢ်ရ့ၣ်ပၢၤကီၢ်၀ဲၤလီၢ်ကရၢၢ်ပူၤအဃိ သုးကီၣ်ကးတကပၤ(၆)ဂၤအကျါ ပၣ်ဃုာ်၀ဲ မၠၣ်၀တံၣ်ဟီၣ်က၀ီၤသုးတၢ်မဲာ်ညါခိၣ်ႇကီၢ်ရ့ၣ်ပၢပြးခိၣ်ဒီး ၦၤဘၣ်ဒိအဂၤ(၁၀)အကျါပၣ်ဃုာ်၀ဲ ကီၢ်ရ့ၣ်ပၢၤကီၢ်ခိၣ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ခီဖျိရီဘၢၣ်အၦ့ၤလီၤအဃိ ၦၤကျီဆါလီၤရီဘၢၣ်ထူၣ်ဟဲအါထီၣ်
လါစဲးပထ့ဘၢၣ် ၇ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် လူၢ်ပျဲၢ်ကီၢ်ဆၣ်ဒီးတၢ်ကြဲၢ်ကီၢ်ဆၣ်အပူၤ သုးဟံးန့ၢ်တၢ်စိတၢ်ကမီၤ၀ံၤလီၢ်ခံ ခီဖျိရီဘၢၣ်ၦ့ၤလီၤအဃိ လီၢ်က၀ီၤကမျၢၢ်လၢအသူၣ်ရီဘၢၣ်ကျီးတဖၣ်တနီၤန့ၣ်ကျီဆါလီၤရီဘၢၣ်ထူၣ်ဟဲအါထီၣ် အဂ့ၢ်န့ၣ် လီၢ်က၀ီၤကမျၢၢ်စံး၀ဲ န့ၣ်လီၤႉ လီၢ်က၀ီၤကမျၢၢ်လၢအိၣ်ကီၢ်ဆၣ်သ့ၣ်တဖၣ်အံၤအပူၤတဖၣ်အါဒၣ်တက့ၢ်လုၢ်အီၣ်အသးသမူလၢတၢ်မၤအီၣ်စံာ်ႇ သူရီဘၢၣ်တၢ်ဖံးတၢ်မၤသ့ၣ်တဖၣ်အံၤဒီးအပူၤကွံာ်ရီဘၢၣ်အသွဲးအတီၣ်တပီၢ်န့ၣ်အၦ့ၤအိၣ်၀ဲ(၁၀၅၀)ကၠးခိၣ်ဃၢၤ ဘၣ်ဆၣ်တနံၣ်အံၤအၦ့ၤလီၤအိၣ်တ့ၢ်က့ၤထဲ(၈၀၀),(၇၀၀)ကၠးလီၤအသိးတကီၢ်ခါခဲအံၤခီဖျိဟီၣ်ခိၣ်စီအၦ့ၤစ့ၢ်ကီး ဒိၣ်ထီၣ်ဒီးတၢ်ကီတၢ်ခဲအိၣ်ထီၣ်လၢတၢ်ဖံးတၢ်မၤကလဲၤတရံးသးဂီၢ်အဃိၦၤကျီဆါလီၤရီဘၢၣ်ထူၣ်ဟဲအါထီၣ်၀ဲအဂ့ၢ်န့ၣ် စီၤအီၤထ့လၢအသူၣ်ရီဘၢၣ်အံၤ စံး၀ဲန့ၣ်လီၤႉ အ၀ဲစံး၀ဲလၢ“ရီဘၢၣ်တၢ်မၤအံၤမ့ၢ်တၢ်မၤလၢပမိပပါပာ်တ့ၢ်န့ၢ်ၦၤတၢ်စုလီၢ်ခီၣ်ခိၣ်တခါလီၤႉခဲအံၤတၢ်ဖံးတၢ်မၤ လဲၤတရံးသး တန့ၢ်နီတစဲးလၢၤဘၣ်ႉစးထီၣ်လၢသုးဟံးန့ၢ်တၢ်စိတၢ်ကမီၤန့ၣ်တၢ်ဖိတၢ်လံၤတၢ်အီၣ်တၢ်အီအၦ့ၤထီၣ်ႇပၦၤ့ထၢနုာ်ဟီၣ်ခိၣ်စီမးတန့ၢ်ဘၣ်ႇတၢ်ဖံးတၢ်မၤလဲၤတရံးသးတန့ၢ်နီတစဲးလၢၤဘၣ်အဃိပဃုထၢက့ၤကျဲလၢပကျီဆါလီၤက့ၤရီဘၢၣ်ထူၣ်ဒ်အံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ရီဘၢၣ်အထူၣ်ဒိၣ်တထူၣ်န့ၣ်အၦ့ၤအိၣ်၀ဲ(၂)ကလးႇ(၃)ကလးခိၣ်ဃၢၤညါဒီးရီဘၢၣ်ထူၣ်သ့ၣ်တဖၣ်အံၤ တၢ်က့ၤဆါကဒါ၀ဲလၢ တလၢၤကီၢ်စဲၣ် မူၣ်ဒိၤ၀့ၢ်ဒီးတၢ်လီၢ်လၢအဂၤသ့ၣ်တဖၣ်၀ံၤ တၢ်က့ၤထုးထီၣ်ကဒါက့ၤအီၤလၢ သ့ၣ်ပၣ်(သိထၣ်သါ)အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ “ၦၤတနီၤခီန့ၣ်ခီဖျိအရီဘၢၣ်အထုးတထီၣ်ဘၣ်အဃိကျီဆါလီၤ၀ဲဒၣ်မီၤနီၤႉတနီၤခီန့ၣ်ခီဖျိတၢ်ၦ့ၤထီၣ် အ၀ဲသ့ၣ် မၤတဂာ်လၢၤဘၣ်အဃိကျီဆါလီၤက့ၤရီဘၢၣ်ထူၣ်ဒ်န့ၣ်မီၤနီၤႉခီဖျိၦၤကျီဆါလီၤရီဘၢၣ်ထူၣ်ဒ်အံၤအဖီခိၣ် ကညီကီၢ်စဲၣ်ပူၤ ရီဘၢၣ်ဟးထီၣ်လီၤစှၤသ့၀ဲ”အဂ့ၢ်န့ၣ် ခ့ၣ်အဲၣ်ယူၣ် လူၢ်ပျဲၢ်ကီၢ်ဆၣ် ၦၤဘၣ်မူဘၣ်ဒါတဂၤ ပဲာ်ထံနီၤဖးစံး၀ဲဒ်အံၤန့ၣ်လီၤႉ လၢကီၢ်ဆၣ်သ့ၣ်တဖၣ်အံၤအပူၤလီၢ်က၀ီၤကမျၢၢ်လၢအကျီဆါရီဘၢၣ်ထူၣ်သ့ၣ်တဖၣ်အံၤတမ့ၢ်အကျီဆါလီၤထဲရီဘၢၣ်ထူၣ်တခါဘၣ်ဒီးမ့မ့ၢ်တခီဆါလီၤဃုာ်ပၢၢ်တုၤလၢရီဘၢၣ်ကျီးဟီၣ်ခိၣ်လီၢ်ညါအသိးခါဆူညါၦၤကဆဲးမၤရီဘၢၣ်တၢ်မၤအံၤစ့ၢ်ကီးတအိၣ်အါအါလၢၤဘၣ်လီၤစှၤ၀ဲအဂ့ၢ်န့ၣ် လီၢ်က၀ီၤကမျၢၢ်တဂၤ စံး၀ဲန့ၣ်လီၤႉ ဖဲအပူၤကွံာ်(၂၀၁၇–၂၀၁၈)အခါ ဒ်တၢ်သူၣ်ရီဘၢၣ်ဟးထီၣ်အစရီအသိးန့ၣ် ကညီကီၢ်စဲၣ်ပူၤ ၦၤသူၣ်ရီဘၢၣ်ကျီး အအ့ကၢၣ်ခဲလၢာ်အိၣ်၀ဲ(၂၆၉ႇ၀၅၅)အ့ကၢၣ်ႇ ရီဘၢၣ်လၢၦၤကွးအထုးန့ၣ် အအ့ကၢၣ်အိၣ်၀ဲ (၁၆၈ႇ၀၂၈)အ့ကၢၣ် ညါအဂ့ၢ်န့ၣ် သူၣ်ဖျး၀ဲၤကျိၤ ထုးထီၣ်ပာ်ဖျါတၢ်ဂ့ၢ်တၢ်ကျိၤလီၢ်ခံကတၢၢ်အသိး သ့ၣ်ညါဘၣ်န့ၣ်လီၤႉ
ခံခီခံကပၤတၢ်ဒုးတၢ်ယၤအဃိ ဖၣ်ပူၣ်ဟီၣ်က၀ီၤပူၤကမျၢၢ်တဖၣ်လဲၤလၢကျီးပူၤတဘူၣ်လၢၤဘၣ်
လါစဲးပထ့ဘၢၣ် ၇ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဖၣ်ပူၣ်၀့ၢ်ပူၤ ခီဖျိတၢ်ဒုးဆဲးကဲထီၣ်ကဒါလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီး သုးခိးကီၢ်ဆၢ(BGF)ႇပယီၤသုးတဖၣ်အဘၢၣ်စၢၤအဃိ ဟီၣ်က၀ီၤဖဲန့ၣ်အပူၤဒူသ၀ီကမျၢၢ်လၢအမၤအီၣ်စံာ်ႇ မၤအီၣ်ကျီးသ့ၣ်တဖၣ်အံၤတသူၣ်ဘၣ်တၢ်ချံတၢ်သၣ်လၢၤဘၣ်အဂ့ၢ်န့ၣ် ဖၣ်ပူၣ်လီၢ်က၀ီၤကမျၢၢ်စံး၀ဲန့ၣ်လီၤႉ ဟီၣ်က၀ီၤဖဲန့ၣ်အပူၤပယီၤသုးဒီး(BGF)ပံးဃာ်၀ဲခိကျဲထံကျဲခံဘိလၢာ်တကးဒံးဘၣ်ဖဲတၢ်ဒုးကဲထီၣ်တဘျီလၢ်လၢ် အဆၢကတီၢ်ခီဖျိပယီၤသုးခးလီၤကျိဖးဒိၣ်ႇကျိဖးဒိၣ်လီၤတဲာ်ပိၢ်ဖးထီၣ်လၢသ၀ီပူၤႇတၢ်ဖံးအီၣ်မၤအီၣ်လီၢ်ကျီးပူၤ အဃိ ကမျၢၢ်တဖၣ်လဲၤဖံးလဲၤမၤတၢ်လၢကျီးပူၤတဘူၣ်လၢၤဘၣ်အဂ့ၢ်န့ၣ် ဖၣ်ပူၣ်လီၢ်က၀ီၤကမျၢၢ်တဂၤ စံး၀ဲန့ၣ်လီၤႉ အ၀ဲစံး၀ဲလၢ“ဖဲဖၣ်ပူၣ်အံၤခ့ၣ်အဲၣ်ယူၣ်ဒီးပယီၤသုးတဖၣ်အဘၢၣ်စၢၤတၢ်ခးလိာ်သးကဲထီၣ်တလီၢ်လီၢ်လီၤႉ သုးကလၢၤ တၢ်လူၢ်ခိၣ်ပယီၤသုးတဖၣ်န့ၣ်က့ၤခးလီၤကဒါကျိဖးဒိၣ်လၢသ၀ီပူၤႇလီၤတဲာ်၀ဲဒၣ်လၢၦၤကျီးပူၤႇၦၤစံာ်လီၢ်ပူၤမီၤနီၤႉခဲအံၤတၢ်ဆၢကတီၢ်ဘၣ်လၢကဘၣ်သူၣ်သဘ့ဟီၣ်လာ်လံႉဘၣ်ဆၣ်ၦၤသ၀ီဖိတဖၣ်လဲၤလၢကျီးပူၤတဘူၣ်ဘၣ်ႉဘၣ်မနုၤအဃိလဲၣ်န့ၣ်တၢ်ဒုးမ့ကဲထီၣ်န့ၣ်ၦၤကိၢ်သးလၢၦၤကကတာ်ထီလၢတၢ်ခၢၣ်သးမီၤနီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တကီၢ်ခါခဲအံၤလၢဖၣ်ပူၣ်၀့ၢ်ပူၤဟုသးယိယိတထၢၣ်န့ၣ်အၦ့ၤထီၣ်တုၤလၢ(၂)ကလီၢ်လံဒီးစးထီၣ်ဖဲအပူၤကွံာ်လါမ့ၤ အခါန့ၣ်(BGF)ဒီးပယီၤသုးပံးဃာ်၀ဲခိကျဲထံကျဲခံဘိလၢၤအဃိဂံၢ်ခီၣ်ထံးတၢ်အီၣ်တၢ်အီတဖၣ်ၦၤဟးဃုၦ့ၤအီၣ် တဘၣ်လၢၤဘၣ်ဒီးတၢ်အီၣ်တၢ်အီလီၤတူာ်၀ဲအဂ့ၢ်န့ၣ် ဖၣ်ပူၣ်၀့ၢ် ကမျၢၢ်တဖၣ်စံး၀ဲန့ၣ်လီၤႉ “နးဒိၣ်လၢၦၤပံးကျဲမီၤနီၤႉတၢ်ဒုးကဲထီၣ်န့ၣ်ပဟးပလဲာ်သးတစိၢ်တလီၢ်သ့ဒံးႉခဲအံၤတၢ်အီၣ်တၢ်အီအၦ့ၤထီၣ် နဟးဃုၦ့ၤအီၣ်တဘၣ်နီတပူၤလၢၤဘၣ်ႉဆီဒံၣ်မးနဟးဃုၦ့ၤတဘၣ်လၢၤဘၣ်ႉခဲအံၤညၣ်ဒၢဒုနဟးဃုၦ့ၤဘၣ်ဒံးႉ ကိၣ်ကျးနါက့ကိၣ်တအိၣ်နီတမံၤလၢၤဘၣ်ႉကျဲမ့ဆဲးပံးသးဒ်အံၤဒုနီၢ်သၢလါကဒီးဒုကဘၣ်လီၤတူာ်ခဲလၢာ်လီၤ”အဂ့ၢ်န့ၣ် ဖၣ်ပူၣ်၀့ၢ်ပူၤ ကမျၢၢ်တဂၤ စံး၀ဲန့ၣ်လီၤႉ လၢန့ၣ်အမဲာ်ညါသုးမီၤစိရိၤစုတီၤဖီလာ်ပယီၤသုးဒီး၀ဲၤကျိၤဘၣ်ထွဲၦၤမၤတၢ်ဖိလၢအိၣ်ဖၣ်ပူၣ်၀့ၢ်ပူၤတဖၣ်အံၤ အ၀ဲသ့ၣ်ဟးၦၤ့အီၣ်ဟုသးလၢသ၀ီပူၤအဂ့ၢ်န့ၣ် ဖၣ်ပူၣ်၀့ၢ် ကမျၢၢ်စံး၀ဲအသိး သ့ၣ်ညါဘၣ်န့ၣ်လီၤႉ ခီဖျိတၢ်ပံးဃာ်ကျဲဒ်အံၤအဃိလီၢ်က၀ီၤကမျၢၢ်လၢအဟုသးတအိၣ်ဘၣ်တဖၣ်ဘၣ်လဲၤဟံအီၣ်ဟုသးလၢၦၤဂၤအဟံၣ်ဒီးဒ်န့ၣ်အသိးကမျၢၢ်လၢအိၣ်ဖၣ်ပူၣ်၀့ၢ်ပူၤတဖၣ်တနီၤန့ၣ်သုးလီၢ်သုးကျဲလဲၤအိၣ်လၢတၢ်လီၢ်အဂၤအိၣ်၀ဲစ့ၢ်ကီးအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ အ၀ဲစံး၀ဲလၢ“လီၤဆီဒၣ်တၢ်ၦၤအိၣ်လၢ၀့ၢ်ပူၤတဖၣ်န့ၣ်နးဒိၣ်တစဲးႉပယီၤသုးပံးဃာ်ကျဲခဲလၢာ်ဒီးခီဖျိတၢ်စူၤခါအတီၢ်ပူၤကျဲဟးဂီၤတိၤဟးဂီၤအဃိကမျၢၢ်လၢအိၣ်၀့ၢ်ပူၤတဖၣ်ဘၣ်နီၤလီၤအီၣ်လိာ်သးတဂၤဒီးတဂၤဒ်န့ၣ်လီၤႉလၢထံကျဲစ့ၢ်ကီးချံစဲးလ့ၢ်ထီၣ်လ့ၢ်လိၤတအိၣ်ဘၣ်ႉလၢဖၣ်ပူၣ်၀့ၢ်ပူၤန့ၣ်ကမျၢၢ်အိၣ်တ့ၢ်က့ၤထဲသၢပူတပူလီၤႉၦၤလၢအဂၤညါန့ၣ်လဲၤအိၣ်လၢကစၢၢ်ခိၣ်တကပၤန့ၣ်လၢာ်လံ”အဂ့ၢ်န့ၣ် စံး၀ဲန့ၣ်လီၤႉ လၢကညီကီၢ်စဲၣ် ဖၣ်အၣ်၀့ၢ် ကလဲၤဆူ ဖၣ်ပူၣ်–ကမၤမိၢ် ၀ါဘိၤတီကျဲဒီတကျိၤန့ၣ် ပယီၤသုးဒီး(BGF) ဒိးလီၤဃာ်၀ဲ ဟီၣ်လာ်မ့ၣ်ပိၢ်အိၣ်ဒီး ခီဖျိဟီၣ်လာ်မ့ၣ်ပိၢ်အံၤအဃိကမျၢၢ်တနီၤသံဘၣ်ဒိဘၣ်ထံးကဲထီၣ်သးတလီၢ်လီၢ် န့ၣ်လီၤႉ ဒ်န့ၣ်အသိးလၢဖၣ်အၣ်၀့ၢ်ႇလူၢ်ပျဲၢ်ႇနိၣ်တကီႇသၣ်တီၣ်ကၠံႇမၠၣ်၀တံၣ်ဒီးကီးတရံး၀့ၢ်တကပၤန့ၣ်စ့ၢ်ကီး ပနံာ်တၢ်ဖိတၢ်လံၤတၢ်အီၣ်တၢ်အီတဖၣ်အၦ့ၤဒိၣ်ထီၣ်စ့ၢ်ကီး၀ဲကွ့ၢ်ကွ့ၢ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ဒ်သိးကရူၢ်ကရၢသးစၢ်တဖၣ်တၢ်ဆဲးကျိးကဂ့ၤဒိၣ်ထီၣ်အဂီၢ်(KYO)တီခိၣ်ရိၣ်မဲမၤ၀ဲဒၣ်သးစၢ်တၢ်ထံၣ်လိ၁်အိၣ်သကိးလၢအပၣ်ဃု၁်ကလု၁်ဒူၣ်သိၣ်မှံၤတဖၣ်
လါစဲးပထ့ဘၢၣ် ၆ သီႇ ၂၀၂၃ နံၣ်ႇ ခ့ၣ်အဲးစံၣ် ဒ်သိးကရူၢ်ကရၢကိးဒူၣ်ဒဲးသူၣ်ဘီၣ်သးစၢ်တဖၣ်အတၢ်ဆဲးကျိးကဂ့ၤဒိၣ်ထီၣ်အဂီၢ်န့ၣ်ကညီသးစၢ်ကရၢ(KYO) လီၢ်ခၢၣ်သး တီခိၣ်ရိၣ်မဲမၤ၀ဲသးစၢ်တၢ်ထံၣ်လိာ်အိၣ်သကိးတၢ်ရဲၣ်တၢ်ကျဲၤတခါလၢအပၣ်ဃုာ်ကလုာ်ဒူၣ်သိၣ်မှံၤသးစၢ်တဖၣ်ဖဲ (ခ့ၣ်အဲၣ်ယူၣ်)တၢ်ပၢဟီၣ်က၀ီၤတၢ်လီၢ်တတီၤစးထီၣ်လါစဲးပထ့ဘၢၣ် ၄ သီတုၤလၢ ၅ သီ လၢခံသီအတီၢ်ပူၤ အဂ့ၢ်န့ၣ် သ့ၣ်ညါဘၣ်န့ၣ် လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံသူၣ်ဘီၣ်သးစၢ်လၢအနုာ်လီၤပၣ်ဃုာ်လၢတၢ်ထီဒါသုးမီၤစိရိၤတၢ်ဟူးတၢ်ဂဲၤပူၤ လၢအဟဲအိၣ်ကဒုသးဖဲ(ခ့ၣ်အဲၣ်ယူၣ်)ဟီၣ်က၀ီၤပူၤတဖၣ်အံၤဒ်သိးအ၀ဲသ့ၣ်ကရူၢ်တဒူၣ်ဒီးတဒူၣ်အဘၢၣ်စၢၤ တၢ်ဆဲးကျိးကဂ့ၤဒိၣ်ထီၣ်အဂီၢ် ဘၣ်တၢ်မၤ၀ဲတၢ်ထံၣ်လိာ်အိၣ်သကိးဒ်အံၤလီၤအဂ့ၢ်န့ၣ် (KYO)နဲၣ်ရွဲၣ်သဃဲၤ–၂ စီၤအဲၣ်ထံကီၢ် စံး၀ဲဒ်အံၤန့ၣ် လီၤႉ “သုးဟံးန့ၢ်တၢ်စိတၢ်ကမီၤ၀ံၤလီၢ်ခံန့ၣ်တၢ်လီၢ်ကိးတီၤဒဲးသူၣ်ဘီၣ်သးစၢ်လၢအနုာ်လီၤပၣ်ဃုာ်လၢတၢ်ထီဒါသုးမီၤစိရိၤတၢ်ဟူးတၢ်ဂဲၤပူၤတဖၣ်အါဒၣ်တက့ၢ်န့ၣ်အ၀ဲသ့ၣ်ဟဲအိၣ်ဖှိၣ်ဖဲအံၤႉသးစၢ်အဟဲအိၣ်ဖှိၣ်ဖဲအံၤတဖၣ်ဖဲအ၀ဲသ့ၣ်ဟဲအိၣ်ကဒုသးလၢ(ခ့ၣ်အဲၣ်ယူၣ်)ဟီၣ်က၀ီၤပူၤအကတီၢ်အံၤဒ်သိးအ၀ဲသ့ၣ်ကရူၢ်တဒူၣ်ဒီးတဒူၣ်အဘၢၣ်စၢၤတၢ်ရ့လိာ်သးကအိၣ်ႇတၢ်ပၢၢ်ဆၢအတီၢ်ပူၤအ၀ဲသ့ၣ်တၢ်ဆဲးကျိးလိာ်သးကဂ့ၤဒိၣ်ထီၣ်အဂီၢ်ဘၣ်တၢ်မၤ၀ဲတၢ်ထံၣ်လိာ်အိၣ်သကိးတၢ်ရဲၣ်တၢ်ကျဲၤအံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ အဆိကတၢၢ်တနံၤဖဲတၢ်အိးထီၣ်တၢ်ထံၣ်လိာ်အိၣ်သကိးတၢ်ရဲၣ်တၢ်ကျဲၤမူးအပူၤန့ၣ် (ခ့ၣ်အဲၣ်ယူၣ်)ခိၣ်နၢ်ဒိၣ်ထီ တဖၣ်လၢ အမ့ၢ်ပဒိၣ်စီၤသမ့ၤထိႇ(ခ့ၣ်အဲၣ်ယူၣ်)နဲၣ်ရွဲၣ်ခိၣ်ကျၢၢ်သဃဲၤ–၂ ပဒိၣ်စီၤလၣ်ထိႇ (KYO)လီၢ်ခၢၣ်သး ၦၤပၢၤလီၢ်ဆ့ၣ်နီၤ စီၤလၢၢ်နၢၤ ဃုာ်ဒီး ခိၣ်နၢ်ဘၣ်ထွဲလၢအဂၤတကးဒံးဘၣ်အမဲာ်ညါ ယိၤဒိၣ်ႇကရ့ၣ်နံၣ်ႇ ရၢၣ်ခၢၣ်ဒီးပယီၤကလုာ်ဒူၣ် သးစၢ် ခဲလၢာ် အဂၤ(၈၀)ဃၣ်ဃၣ်ဟဲထီၣ်၀ဲဒၣ်န့ၣ်လီၤႉ တၢ်ထံၣ်လိာ်အိၣ်သကိးလၢခံသီအတီၢ်ပူၤအံၤ(ခ့ၣ်အဲၣ်ယူၣ်)လီၢ်ခၢၣ်သးခိၣ်နၢ်တဖၣ်စံးကတိၤဟ့ၣ်ဂံၢ်ဟ့ၣ်ဘါလီၤ တၢ်ဒီးတၢ်ဆှဲပၠးလီၤဘၣ်ဃးတကီၢ်ခါထံရူၢ်ကီၢ်သဲးတၢ်အိၣ်သးႇတၢ်ဟူးတၢ်ဂဲၤတၢ်ဖံးတၢ်မၤတဖၣ်အသိး တၢ်တၢၣ်ပီၣ်တဲသကိးဟ့ၣ်ခီဟ့ၣ်နီၤဘၣ်ဃးသးစၢ်ဒီးတၢ်ပၢၤဃာ်ခိၣ်ဃၢၤန့ဆၢၣ်ဒီးႇသးစၢ်ကရူၢ်ကရၢအတၢ်ဟူး တၢ်ဂဲၤသ့ၣ်တဖၣ်န့ၣ်လီၤႉ “သုးဟံးန့ၢ်တၢ်စိတၢ်ကမီၤ၀ံၤလီၢ်ခံကရူၢ်ကရၢလၢအဟဲအိၣ်ကဒုသးဖဲ(ခ့ၣ်အဲၣ်ယူၣ်)ဟီၣ်က၀ီၤပူၤအံၤအိၣ်ဒီဒူၣ်ညါလီၤႉတၢ်ဖံးတၢ်မၤႇတၢ်ထံၣ်တၢ်ဆိကမိၣ်လၢအတလီၤဂာ်လိာ်သးဘၣ်န့ၣ်အိၣ်ဒီဒူၣ်ညါႉပတၢ်ဆိကမိၣ်ပတၢ်ထံၣ်မ့တဒ်သိးလိာ်သး ဘၣ်ဘၣ်ဆၣ်ပတၢ်ပညိၣ်ဖီတၢၣ်န့ၣ်မ့ၢ်ဒၣ်ဒ်သိးသိးလီၤႉပတၢ်ပညိၣ်ဖီတၢၣ်ဒ်သိးႇပတၢ်ထံၣ်တၢ်ဆိမိၣ်မ့တဒ်သိးလိာ်သးဘၣ်န့ၣ်တဂၤဒီးတဂၤကဲထီၣ်တၢ်ဖုၣ်ထံၣ်ဖုၣ်ထီသ့မီၤနီၤႉဒ်လဲၣ်ဂ့ၤဒ်လဲၣ်ဂ့ၤလၢပ၀ဲကဒဲကဒဲအဘၢၣ်စၢၤတၢ်ဂ့ၢ်ကီသုတကဲထီၣ်တဂ့ၤအဂီၢ်န့ၣ်ယထံၣ်လၢပွဲတပွဲအံၤကကဲထီၣ်တၢ်တိစၢၤမၤစၢၤမီၤနီၤ”အဂ့ၢ်န့ၣ် (KYO)လီၢ်ခၢၣ်သး ပၢဆှၢတၢ်ကမံးတံာ် တၢ်ကရၢကရိဒီးတၢ်ဘိးဘၣ်ရၤလီၤမူဒါခိၣ် စီၤခၣ်စီၣ်၀့ စံး၀ဲန့ၣ်လီၤႉ တၢ်ထံၣ်လိာ်အိၣ်သကိးဘျီ၀ဲအံၤအပူၤသိၣ်မှံၤကလုာ်ဒူၣ်သးစၢ်တဖၣ်စ့ၢ်ကီးတီၣ်ဖျါထီၣ်တၢၣ်ပီၣ်တဲသကိး အ၀ဲသ့ၣ် တၢ်ဖံးတၢ်မၤတၢ်ဟူးတၢ်ဂဲၤတဖၣ်တဒူၣ်စုာ်စုာ်ဒီးတၢ်လၢအ၀ဲသ့ၣ်ပာ်ဖှိၣ်မၤသကိး၀ဲသ့တဖၣ်စ့ၢ်ကီး တၢၣ်ပီၣ်တဲသကိး ဃုာ်၀ဲဒၣ်န့ၣ်လီၤႉ ဒ်န့ၣ်အသိးတၢ်ထံၣ်လိာ်အိၣ်သကိးဒ်အံၤ အခီၣ်ထံးအဆိကတၢၢ်တဘျီဘၣ်တၢ်မၤတ့ၢ်အီၤဖဲအပူၤကွံာ် (၂၀၁၉) ကညီတၢ်ပၢဆၢမုၢ်နံၤၦဲၤထီၣ်(၇၀)၀ီတ၀ီ တၢ်ရဲၣ်တၢ်ကျဲၤမူးအခါန့ၣ်လီၤႉ
ပယီၤသုးခးလီၤကျိဖးဒိၣ်ကိးမုၢ်နံၤဒဲးအဃိ ကမျၢၢ်တဖၣ်ဘၣ်အိၣ်လၢတၢ်ဘၣ်ယိၣ်ဘၣ်ဘှီအပူၤ
လါစဲးပထ့ဘၢၣ် ၆ သီႇ ၂၀၂၃ နံၣ်ႇ ခ့ၣ်အဲးစံၣ် ကျိဖးဒိၣ်ပယီၤသုးလၢအိၣ်ကီးတရံး၀့ၢ်ပူၤတဖၣ်အံၤ ခီဖျိအ၀ဲသ့ၣ်ခးလီၤကျိဖးဒိၣ်ဆူ ကီးတရံး၀့ၢ်ခိၣ်၀့ၢ်ဃၢၤ ဒူသ၀ီတဖၣ်အပူၤကိးမုၢ်နံၤဒဲးအဃိ လီၢ်က၀ီၤကမျၢၢ်တဖၣ်ဘၣ်အိၣ်လၢတၢ်ဘၣ်ယိၣ်ဘၣ်ဘှီ တၢ်ပျံၤတၢ်ဖုးပူၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ပယီၤသုးလၢအိၣ်ကီးတရံး၀့ၢ်ပူၤတဖၣ်အံၤခီဖျိလုၢ်ဘၢဒိၣ်စိ၀ဲဟီၣ်က၀ီၤတန့ၢ်လၢၤဘၣ်အဃိ အ၀ဲသ့ၣ်ခးလီၤကျိဖးဒိၣ် ဆူ၀့ၢ်ချၢဒူသ၀ီပူၤလၢတၢ်ပၢၢ်ဆၢသုးကရူၢ်အိၣ်ဆိးအလီၢ်တဖၣ်ကိးမုၢ်နံၤဒဲးဒီးလၢတၢ်န့ၣ်အဃိသးသမူတၢ်ဘံၣ်တၢ်ဘၢ တအိၣ်လၢကမျၢၢ်အဂီၢ်လၢၤဘၣ်အဂ့ၢ်န့ၣ် ကၠီၤစှၤကိသ၀ီဖိလၢတအဲၣ်ဒိး ပာ်ဖျါ အမံၤတဂၤ စံး၀ဲဒ်အံၤန့ၣ်လီၤႉ “ပယီၤသုးလၢအနုာ်လီၤအိၣ်ဖဲ၀့ၢ်နုာ်လီၤတဖၣ်န့ၣ်တၢ်ပၢၢ်ဆၢသုးကရူၢ်လဲၤခး၀ဲဒီးတကးဒံးဘၣ်န့ၣ်အ၀ဲသ့ၣ်နုာ်လီၤအိၣ်လၢ၀့ၢ်ကပၤသ၀ီတဖၣ်အပူၤမီၤနီၤႉပယီၤသုးအံၤခီဖျိအ၀ဲသ့ၣ်ဒိၣ်စိ၀ဲ၀့ၢ်ပူၤတန့ၢ်ဂ့ၤဂ့ၤလၢၤဘၣ်အဃိပာ်ဂံၢ်ပာ်ဘါက့ၤကျိဖးဒိၣ်ခးလီၤတၢ်ကိးမုၢ်နံၤဒဲးဒီးၦၤသ၀ီဖိတဖၣ်ဘၣ်အိၣ်လၢတၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီအပူၤဒ်အံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒူသ၀ီကမျၢၢ်လၢအိၣ်ကီးတရံး၀့ၢ်ခိၣ်၀့ၢ်ဃၢၤတဖၣ်အံၤခီဖျိကျိဖးဒိၣ်အဃိအ၀ဲသ့ၣ်ဘၣ်ဃ့ၢ်ထီၣ်ဘၣ်သုးလီၢ်သုးကျဲ အိၣ်အသိးလီၢ်က၀ီၤကမျၢၢ်တနီၤခီဖျိတၢ်ကီတၢ်ခဲအိၣ်လၢကဟးသုးလီၢ်သုးကျဲအဃိအ၀ဲသ့ၣ်တ့ၢ်လၢသ၀ီပူၤ အိၣ်၀ဲလၢတၢ်ပလီၢ်ပဒီပူၤဒ်န့ၣ်လီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ကီးနွဲၣ်လီၢ်က၀ီၤကမျၢၢ်တဂၤစံး၀ဲလၢ“ၦၤလၢအကျိၣ်အိၣ်စ့အိၣ်ႇအဘူးအတံၢ်အိၣ်တဖၣ်ညါန့ၣ်ဟးအိၣ်လၢ တၢ်လီၢ်အဂၤသ့မီၤနီၤႉမ့မ့ၢ်၀ဲဒၣ်ခီပကျိၣ်ပစ့တအိၣ်ဘၣ်အဃိပကလဲၤအိၣ်လၢၦၤဟံၣ်ယံၤယံၤန့ၣ်တဘၣ်ဂီၢ်ဘၣ်ႉ အဃိပဟဲက့ၤအိၣ်လၢသ၀ီပူၤကျိဖးဒိၣ်မ့လီၤတဲာ်မ့သံဒၢးကွၢ်လၢတၢ်ဘူၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်– ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါခီဖျိပယီၤသုးခးလီၤကျိဖးဒိၣ်ကိးမုၢ်နံၤဒဲးအဃိကမျၢၢ်အဟံၣ်အဃီဟးဂူာ်ဟးဂီၤႇ ဆၣ်ဖိကီၢ်ဖိအိၣ် သ၀ီပူၤတဖၣ်သံဘၣ်ဒိဘၣ်ထံးအိၣ်၀ဲဒီးသ၀ီဖိတဖၣ်စ့ၢ်ကီးဖံးအီၣ်မၤအီၣ်တၢ်တဘူၣ်လၢၤဘၣ်အဃိ တၢ်ကီတၢ်ခဲအိၣ် ထီၣ်လၢတၢ်လုၢ်အီၣ်နီၢ်ခိသးသမူတကပၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ပယီၤသုးသ့ၣ်တဖၣ်အံၤအပူၤကွံာ်လၢညါလံၤလံၤညီနုၢ်န့ၣ်အ၀ဲသ့ၣ်ခးလီၤကျိဖးဒိၣ်ဆူသ၀ီတဖၣ်အပူၤဒီး တကီၢ်ခဲအံၤခီဖျိတၢ်ပၢၢ်ဆၢသုးပာ်ဖှိၣ်ကရူၢ်နုာ်လီၤအိၣ်ဆိးလၢသ၀ီပူၤအဃိဘၣ်ယိၣ်လၢပယီၤသုးအံၤကပညိၣ်ခးလီၤကျိဖးဒိၣ်ဒီးကမျၢၢ်တနီၤတုၤလၢခဲအံၤက့ၤအိၣ်လၢသ၀ီပူၤတဘူၣ်ဒံးဘၣ်အဂ့ၢ်န့ၣ် သ့ၣ်ညါဘၣ်လၢၦၤမၤစၢၤ ၦၤဃ့ၢ်မှံဟးဖျိး တဖၣ်အအိၣ်န့ၣ်လီၤႉ ခီဖျိကျိဖးဒိၣ်တၢ်လီၤဘၣ်ယိၣ်အဃိဒူသ၀ီလၢအဘၣ်ဃ့ၢ်ထီၣ်ဟးပလဲာ်သးသ့ၣ်တဖၣ်န့ၣ်မ့ၢ်၀ဲကၠီၤစှၤကိသ၀ီႇ ယီၣ်ကိာ်ႇပၠါပ့ၤႇကီမူၣ်ႇနါကတိႇစ့ၤကိႇကီးနွဲၣ်သ၀ီႇယွၤသ့ၣ်ဒီးကမဲၤကိသ၀ီသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ပယီၤသုးခးလီၤကျိဖးဒိၣ်ဆူသၣ်တီၣ်–ပၠါစခါသ၀ီပူၤအဃိ ဘၣ်သံ၀ဲဒၣ်ၦၤဒီဖိပၢ် ၂ ဂၤ
လါစဲးပထ့ဘၢၣ် ၆ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ တီအူကီၢ်ရ့ၣ်(သုးက့ ၂)ဟီၣ်က၀ီၤ သၣ်တီၣ်ကၠံကီၢ်ဆၣ်အပူၤ ဖဲမဟါလါစဲးပထ့ဘၢၣ် ၅ သီ ဂီၤခီအဆၢကတီၢ် ခီဖျိပယီၤသုးခးလီၤကျိဖးဒိၣ်လီၤတဲာ်ပိၢ်ဖးထီၣ်လၢ (ပၠါစခါ)သ၀ီပူၤ ၦၤဟံၣ်ခိၣ်အဃိ ဘၣ်သံ၀ဲဒၣ်ၦၤဟံၣ်ဖိဃီဖိဒီဖိပၢ်(၂)ဂၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ၦၤဒီဖိပၢ်လၢအသံ(၂)ဂၤန့ၣ်မ့ၢ်၀ဲအပါလၢသးနံၣ်အိၣ်(၅၂)နံၣ်ႇအဖိခွါ(၉)နံၣ်ဒီး ၦၤဒီဖိပၢ်ခံဂၤအံၤဘၣ်ဖဲအ၀ဲသ့ၣ် အိၣ်လၢဟံၣ်ပူၤအဆၢကတီၢ်ခီဖျိကျိဖးဒိၣ်လီၤတဲာ်ပိၢ်ဖးထီၣ်လၢဟံၣ်ခိၣ်အဃိဘၣ်သံ၀ဲဒၣ်ဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်တဂၤ စံး၀ဲဒ်အံၤန့ၣ်လီၤႉ “ပနၢ်ဟူလၢတၢ်ခးလိာ်သးကဲထီၣ်မီၤနီၤႉအဃိပယီၤသုးခးလီၤကျိဖးဒိၣ်လီၤတဲာ်ပိၢ်ဖးထီၣ်လၢသ၀ီပူၤအဃိ ၦၤဒီဖိပၢ်သံ(၂)ဂၤႉဖဲတဂီၤညါအံၤကျိဖးဒိၣ်ကလုၢ်သီၣ်ဒံးႉတုၤလၢဂီၤခီ ၉ နၣ်ရံၣ်ဘျဲၣ်န့ၣ် နၢ်ဟူကျိသီၣ်တထံၣ်တထံၣ် ဒံးႉတၢ်လီၢ်ဖဲန့ၣ်န့ၣ်တၢ်ခးလိာ်သးတကဲထီၣ်ဘၣ်ကအိၣ်လၢအလါလံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲမဟါလါစဲးပထ့ဘၢၣ် ၅ သီအနံၤန့ၣ်လီၤႉ ဖဲမဟါလါစဲးပထ့ဘၢၣ် ၅ သီ ဂီၤခီ ၈ နၣ်ရံၣ်ဃၣ်ဃၣ်အဆၢကတီၢ် တၢ်ခးလိာ်သးကဲထီၣ်လၢသၣ်တီၣ်ကၠံကီၢ်ဆၣ် (၅ မဲၤ)တၢ်လီၢ်န့ၣ်ဒီး ခီဖျိ(၇ မဲၤ)ပယီၤသုးကလၢၤအံၤခးလီၤစၢၤကျိဖးဒိၣ်အဃိ ကျိဖးဒိၣ်လီၤတဲာ်ပိၢ်ဖးထီၣ်၀ဲလၢ ကမျၢၢ်တဂၤန့ၣ်အဟံၣ်ခိၣ်ဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ခံခီခံကပၤတၢ်ခးလိာ်သးကဲထီၣ်၀ံၤလီၢ်ခံလၢ(၄ မဲၤ)ဒီး(၇ မဲၤ)ပယီၤသုးတၢ်သမံသမိးတြဲၤလီၢ်န့ၣ် ပယီၤသုးအိၣ်ခိး သမံသမိးကမျၢၢ်လၢအလ့ၢ်ထီၣ်လ့ၢ်လိၤတဖၣ်ဟဲအါထီၣ်၀ဲဒီးတကးဒံးဒၣ်စှၤသီအတီၢ်ပူၤအံၤလၢတီအူ၀့ၢ်ပူၤန့ၣ် ပယီၤသုးသမံသမိးတၢ်ဟဲအါထီၣ်ႇကဘီယူၤစ့ၢ်ကီးစံၣ်ထီၣ်စံၣ်လီၤလၢတီအူကဘီယူၤပျီတပယူာ်ဃီအဂ့ၢ်န့ၣ် ကမျၢၢ်တဖၣ်စံး၀ဲန့ၣ်လီၤႉ လၢန့ၣ်အမဲာ်ညါစးထီၣ်ဖဲတီအူ၀့ၢ်ဟးထီၣ်တုၤလၢကညီကီၢ်စဲၣ်အဆၢတီအူ–သၣ်တီၣ်ကျဲႇတီအူ–လ့ၣ်သိၤကျဲ တဖၣ်န့ၣ် ပယီၤသုးဆီလီၤတြဲၤတၢ်သမံသမိးလီၢ်အါမးဒီးတပျဲၦၤစိာ်ထီၣ်စိာ်လီၤဟုသးႇကသံၣ်ကသီတဖၣ်လၢ ဟီၣ်က၀ီၤပူၤဘၣ် အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ သၣ်တီၣ်ကၠံကီၢ်ဆၣ်ပူၤစးထီၣ်ဖဲတနံၣ်အံၤထီၣ်အခါန့ၣ်တၢ်ဒုးဆူၣ်ထီၣ်၀ဲလၢတၢ်ပၢၢ်ဆၢသုးပာ်ဖှိၣ်ဒီးပယီၤသုး အဘၢၣ်စၢၤ၀ံၤလီၢ်ခံပယီၤသုးအံၤခးလီၤကျိဖးဒိၣ်တယူာ်ဃီတကးဒံးဘၣ်ခီဖျိအ၀ဲသ့ၣ်သုးကျိၤနုာ်လီၤလၢပျီပူၤႇ ဖီၣ်သမံသမိးတၢ်အဃိလီၢ်က၀ီၤကမျၢၢ်တဖၣ်ဘၣ်ဃ့ၢ်ထီၣ်၀ဲဒီး(၁၃ မဲၤ) သၣ်တီၣ်၀့ၢ်ဒီတ၀့ၢ်...
ခီဖျိဟုသးလီၤတူ၁်ထီၣ်အဃိ မုၢ်ထီၣ်ခိခိၣ်ဒူသ၀ီပူၤကမျၢၢ်တဖၣ် ဘၣ်အီၣ်က့ၤတကွံသၣ်
လါစဲးပထ့ဘၢၣ် ၆ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ဒ၀ဲၢ်ကီၢ်ဆၣ် မုၢ်ထီၣ်ခိခိၣ်ဟီၣ်က၀ီၤဒူသ၀ီတဖၣ်အပူၤ ခီဖျိဟုသးလီၤတူာ်ထီၣ်အဃိ ကမျၢၢ်တဖၣ်ဘၣ်အီၣ်က့ၤ၀ဲတကွံသၣ်အဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ စးထီၣ်ဖဲအပူၤကွံာ်လါယူၤလံလီၢ်ခံကတၢၢ်တနွံအခါန့ၣ်လၢမုၢ်ထီၣ်ခိခိၣ်ဟီၣ်က၀ီၤအပူၤပယီၤသုးတပျဲၦၤစိာ်ထီၣ်စိာ်လီၤဟုသးလၢၤဘၣ်အဃိစးထီၣ်ဖဲတလါအံၤန့ၣ်လၢဒူသ၀ီတဖၣ်အပူၤဟုသးလီၤတူာ်ထီၣ်အဃိကမျၢၢ်တဖၣ်ဘၣ်အီၣ်က့ၤ၀ဲတကွံသၣ်ဒီးတၢ်သူတၢ်သၣ်အဂၤလၢအိၣ်အ၀ဲသ့ၣ်ကျီးပူၤတဖၣ်အဂ့ၢ်န့ၣ် လီၢ်က၀ီၤသ၀ီဖိတဂၤစံး၀ဲဒ်အံၤ န့ၣ်လီၤႉ “ပယီၤသုးစးထီၣ်တပျဲၦၤစိာ်ထီၣ်စိာ်လီၤဟုသးဘၣ်န့ၣ်စးထီၣ်လၢမဟါတလါန့ၣ်လံႉဖဲလီၢ်ခံအံၤဟုသး တအိၣ်လၢၤဘၣ်ႇ အဃိပဘၣ်ဒဲးအီၣ်ချီအီၣ်က့ၤတကွံသၣ်ႇတၢ်သူတၢ်သၣ်လၢကျီးပူၤဒ်န့ၣ််လီၤမီၤနီၤႉခါဆူညါမ့လဲၤသးဒ်အံၤဒုတဘၣ်ဂီၢ်ဘၣ်ႉဖဲသ၀ီပူၤအံၤဟုသးအၦ့ၤအိၣ်လၢ(တကလီၢ်ခံကလး)လံႉအန့ၣ်မးကျးတဖၣ်န့ၣ်တဆါန့ၢ်နၤ လၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢမုၢ်ထီၣ်ခိခိၣ်ဟီၣ်က၀ီၤဒူသ၀ီတဖၣ်အပူၤပယီၤသုးကျိၤနုာ်လီၤ၀ဲတလီၢ်လီၢ်ဒီးဟးလူၤဃုတၢ်ဒီသဒၢကမျၢၢ်သုးကရူၢ်တဖၣ်လၢၦၢ်ပူၤအဃိတၢ်ကီတၢ်ခဲအိၣ်လၢၦၤကစိာ်ထီၣ်စိာ်လီၤဟုၣ်ဟုသးဒီးတကးဒံးဘၣ်ဟုသးအၦ့ၤစ့ၢ်ကီး အၦ့ၤဒိၣ်ထီၣ် ကွ့ၢ်ကွ့ၢ်အဃိကမျၢၢ်လၢကျိၣ်စ့တၢ်ဟဲနုာ်တအိၣ်ဘၣ်တဖၣ်အံၤထံၣ်ဘၣ်တၢ်ကီတၢ်ခဲအဂ့ၢ်န့ၣ် လီၢ်က၀ီၤကမျၢၢ်လၢအဂၤ တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“လၢမုၢ်ထီၣ်ခိၣ်ခိၣ်ဒူသ၀ီတနီၤအပူၤန့ၣ်ပယီၤသုးနု၁်လီၤမၢ်မၢ်လီၤႉအဃိၦၤတသူၣ်ဘၣ်ဘုဒ်သိးလၢညါအပူၤကွံာ်လၢၤဘၣ်ႉလၢညါတဘျီန့ၣ်အနးထဲလဲၣ်န့ၣ်ၦၤမၤန့ၢ်ဟုသးန့ၣ်တဆါန့ၢ်ၦၤသ၀ီဖိဘၣ်ႇလဲၤဆါ၀ဲလၢတၢ်လီၢ်အဂၤလၢအန့ၢ်အၦ့ၤဂ့ၤဂ့ၤဒ်န့ၣ်မီၤနီၤႉတၢ်အိၣ်သးနးပၢၢ်တုၤလၢန့ၣ်ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ဒ်န့ၣ်အသိးလၢတနီသရံၣ်ကီၢ်ခီဟီၣ်က၀ီၤ ကီၢ်ဆၣ်ဒီးဒူသ၀ီတဖၣ်အပူၤစ့ၢ်ကီး ပယီၤသုးကျိၤနုာ်လီၤတပယူာ် ဃီဒီးနုာ်လီၤဃုခွံခွးတၢ်လၢကမျၢၢ်ဟံၣ်ပူၤႇဟံၦၤတၢ်ဖိတၢ်လံၤႇဒွဲၣ်အူအီၣ်ကမျၢၢ်ဟံၣ်ဃီဟဲအါထီၣ်၀ဲဒၣ်အဂ့ၢ်န့ၣ် ဟီၣ်က၀ီၤတၢ်ဒီသဒၢကမျၢၢ်သုးစံး၀ဲအသိးသ့ၣ်ညါဘၣ်န့ၣ်လီၤႉ
ဘံၣ်ဘၢဒီးကီၢ်ဆၢဂ့ၢ်၀ီကိတိ၁်ဆီတလဲသးအဃိဟီၣ်က၀ီၤပူၤဒုးယၤတၢ်ဖ့ၣ်စၢဆူၣ်ထီၣ်သ့၀ဲအဂ့ၢ် KNU ပဲ၁်ထံနီၤဖး၀ဲ
လါစဲးပထ့ဘၢၣ် ၅ သီႇ ၂၀၂၃ နံၣ်ႇ ခ့ၣ်အဲးစံၣ် သုးကီၣ်ကးဆီတလဲတီၣ်ထီၣ် ကညီကီၢ်စဲၣ်ဃုာ်ဒီးကီၢ်စဲၣ်ဒီးကီၢ်ဒိၣ်(၄)ဘ့ၣ်ပူၤ ဘံၣ်ဘၢဒီးကီၢ်ဆၢဂ့ၢ်၀ီကိတိာ် တဖၣ်အဖီခိၣ်အံၤဒုးယၤတၢ်ဖ့ၣ်စၢဆူၣ်ထီၣ်သ့၀ဲလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤပူၤ အဂ့ၢ်န့ၣ် ကရၢၦၤကတိၤတၢ်ပၢ ပဒိၣ်စီၤကျၢၤစ့ ပဲာ်ထံနီၤဖးစံး၀ဲန့ၣ်လီၤႉ ဖဲအပူၤကွံာ်လါစဲးပထ့ဘၢၣ် ၁ သီအနံၤ သုးကီၣ်ကးထုးထီၣ်ပာ်ဖျါလံာ်တၢ်ကလုၢ်လၢ ဘံၣ်ဘၢဒီးကီၢ်ဆၢကိတိာ် လၢအလီၤဘၣ်မူဒါဖဲကခၠ့ၣ်ကီၢ်စဲၣ်ႇကရ့ၣ်နံၣ်ကီၢ်စဲၣ်ႇကညီကီၢ်စဲၣ်ႇခၠီကီၢ်စဲၣ်ဒီးမါတလ့ကီၢ်ဒိၣ်သ့ၣ်တဖၣ်အံၤ တၢ်ကဆီတလဲ၀ဲအလီၢ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဒ်သုးကီၣ်ကးထုးထီၣ်ပာ်ဖျါ၀ဲအသိးန့ၣ် ကခၠ့ၣ်ကီၢ်စဲၣ် ဘံၣ်ဘၢဒီးကီၢ်ဆၢကိတိာ် သုးခိၣ်ဒိၣ်စိ အီၤကၠံၤလ့အလီၢ်န့ၣ် တၢ်ကပာ်ထီၣ်၀ဲ သုးခိၣ်ဒိၣ်စိ ကၠီၤသူၤယၣ်ႇ ကရ့ၣ်နံၣ်ကီၢ်စဲၣ် ဘံၣ်ဘၢဒီးကီၢ်ဆၢကိတိာ် သုးခိၣ်ဒိၣ်စိ မၠ့ၣ်၀့ၤအလီၢ်န့ၣ် တၢ်ကပာ်ထီၣ်က့ၤ၀ဲ သုးခိၣ်ဒိၣ်စိ သါစိအီၤႇ ကညီကီၢ်စဲၣ် ဘံၣ်ဘၢဒီးကီၢ်ဆၢကိတိာ် သုးခိၣ်ဒိၣ်စိ မၠိမ့နီၤအလီၢ်န့ၣ် တၢ်ကပာ်ထီၣ်၀ဲ သုးခိၣ်ဒိၣ်စိ မ့သူၤကၠီၤႇ ခၠီကီၢ်စဲၣ် ဘံၣ်ဘၢဒီးကီၢ်ဆၢကိတိာ် သုးခိၣ်ဒိၣ်စိ ဟၤ၀့အီၤအလီၢ်န့ၣ် တၢ်ကတီၣ်ထီၣ်က့ၤ၀ဲ သုးခိၣ်ဒိၣ်စိ သ့ထိအီၤဒီး မါတလ့ကီၢ်ဒိၣ် ဘံၣ်ဘၢဒီးကီၢ်ဆၢကိတိာ် သုးခိၣ်ဒိၣ်စိ ကၠီၤကၠီၤမ့ အလီၢ်န့ၣ် တၢ်ကပာ်ထီၣ်က့ၤ၀ဲလၢသုးခိၣ်ဒိၣ်စိ န့ၤလ့စိသ့ၣ်တဖၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ် လီၤႉ (ခ့ၣ်အဲၣ်ယူၣ်)ၦၤကတိၤတၢ်ပၢ ပဒိၣ်စီၤကျၢၤစ့စံး၀ဲလၢ“ကိတိာ်ဆီတလဲသးဂ့ၤႇတဆီတလဲသးဂ့ၤ ခဲအံၤလၢပ...
ဘံလ့ကီၢ်ဆၣ် အလူလ့သ၀ီပူၤ တၢ်ဒုးကဲထီၣ်လၢပယီၤသုးဒီးတၢ်ပၢၢ်ဆၢသုးပ၁်ဖှိၣ်အဘၢၣ်စၢၤ
လါစဲးပထ့ဘၢၣ် ၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢတလၢၤကီၢ်စဲၣ် ဘံလ့ကီၢ်ဆၣ် အလူလ့သ၀ီ ကျဲမုၢ်ကပၤ ဖဲမဟါလါစဲးပထ့ဘၢၣ် ၄ သီ ဂီၤခီ ၈း၃၀ အဆၢကတီၢ် တၢ်ဒုးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးအဘၢၣ်စၢၤ အဂ့ၢ်န့ၣ် သ့ၣ်ညါဘၣ်လၢဘံလ့တၢ်ဒီသဒၢကမျၢၢ်သုးအအိၣ်န့ၣ်လီၤႉ ပယီၤသုးကျိၤလၢအနီၣ်ဂံၢ်ကအိၣ်အဂၤ(၁၀၀)ဃၣ်ဃၣ်အံၤဒီး(KNLA)ႇသူၤရံၣ်ယၣ်သုးကျိၤသုးပာ်ဖှိၣ်အဘၢၣ်စၢၤ တၢ်ဒုးကဲထီၣ်၀ဲဒီးတကီၢ်ခါခဲအံၤတၢ်လီၢ်လၢတၢ်ဒုးကဲထီၣ်အလီၢ်န့ၣ်ပယီၤသုးမၤအါထီၣ်တၢ်ဘံတၢ်ဘၢႇ ခးလီၤကျိဖးဒိၣ်ဆူသ၀ီတဖၣ်အပူၤအဂ့ၢ်န့ၣ် ဘံလ့တၢ်ဒီသဒၢကမျၢၢ်သုး မူဒါခိၣ် စံး၀ဲဒ်အံၤန့ၣ်လီၤႉ “ဖဲတၢ်ဒုးကဲထီၣ်အလီၢ်န့ၣ်ပယီၤသုးထီထီၣ်၀ဲဒၣ်ခံလဲးမးကျိဖးဒိၣ်အပျီတဖၣ်ဒီးမ့၀ံၤအ၀ဲသ့ၣ်အိၣ်ခိးတၢ်ဘံၣ်တၢ်ဘၢ ဖဲတၢ်ခိၣ်တၢ်ဃၢၤဖဲန့ၣ်ကအိၣ်လၢအဂၤ(၁၀၀)ဃၣ်ဃၣ်ညါႉတၢ်ဒုးန့ၣ်ကဲထီၣ်လၢအလူလ့သ၀ီပူၤအဃိ အ၀ဲသ့ၣ်ခးလီၤ ကျိဖးဒိၣ်ဆူအလူကၠံသ၀ီကပၤၦၢ်ကျဲတကပၤန့ၣ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ တကးဒံးဘၣ်အမဲာ်ညါခီဖျိပယီၤသုးအံၤခးလီၤကျိဖးဒိၣ်ဆူသ၀ီပူၤလၢအတဘၣ်ဃးတၢ်ဒုးကဲထီၣ်အလီၢ်ဘၣ်အံၤ အဃိ သ၀ီပူၤကမျၢၢ်တဖၣ်ဘၣ်ဟးစံၣ်ပလဲာ်သးအဂ့ၢ်န့ၣ် တၢ်ဒီသဒၢကမျၢၢ်သုးစံး၀ဲန့ၣ်လီၤႉ တၢ်ဒုးကဲထီၣ်လၢ(အလူလ့)သ၀ီအခါန့ၣ်ပယီၤသုးတကပၤသံဘၣ်ဒိဘၣ်ထံးအိၣ်၀ဲအသိးသူၤရံၣ်ယၣ်သုးကျိၤတကပၤ စ့ၢ်ကီးဘၣ်ဟ့ၣ်လီၤကွံာ်အသးသမူ(၃)ဂၤအဂ့ၢ်န့ၣ် သူၤရံၣ်ယၣ်သုးကျိၤ ၦၤဘၣ်မူဘၣ်ဒါတဂၤ ပာ်ဂၢၢ်ပာ်ကျၢၤ စံးဘၣ် ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“တၢ်ဒုးကဲထီၣ်လၢ(အလူလ့)သ၀ီ ကျဲကပၤန့ၣ်မီၤနီၤႉ ဒုၣ်ဒါတကပၤတၢ်သံတၢ်ဘၣ်ဒိဘၣ်ထံး အိၣ်အသိးလၢပ၀ဲဒၣ်တကပၤစ့ၢ်ကီးပၦၤဘၣ်လုၢ်ထီၣ်ကွံာ်အသးသမူလၢထံကီၢ်အဂီၢ်(၃)ဂၤစ့ၢ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ ဖဲအပူၤကွံာ်လါအ့ဖြ့ၣ် ၁၂ သီအခါစ့ၢ်ကီး ပယီၤသုးနုာ်လီၤ၀ဲလၢ(အလူလ့)သ၀ီကရူၢ်ပူၤ ဒွဲၣ်အူအီၣ်ကွံာ်၀ဲဟံၣ် (၃)ဖျၢၣ် တကးဒံးဘၣ် ဖီၣ်က့ၤကိး၀ဲကမျၢၢ်တဂၤဒီးဟံ၀ဲဒၣ်ကမျၢၢ်သိလ့ၣ်ႇသိလ့ၣ်ယီၢ်(ဆဲးကဲး) ၆ ခိၣ်ညါအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပာ်ဖျါတ့ၢ်၀ဲန့ၣ်လီၤႉ ဒ်န့ၣ်အသိးလၢတလၢၤကီၢ်စဲၣ် ဘံလ့ႇကၠဲးထိၣ်ဒီးသထူၣ်၀့ၢ်ခိၣ်၀့ၢ်ဃၢၤတၢ်လီၢ်တဖၣ်န့ၣ် ဟီၣ်က၀ီၤ(KNLA), သူၤရံၣ်ယၣ်သုးကျိၤႇ ဘံလ့တၢ်ဒီသဒၢကမျၢၢ်သုးကရူၢ်ႇ ယ့ဘလူကရူၢ်ႇ ပအိၣ်တၢ်ဒီသဒၢကမျၢၢ်သုးကရူၢ်(PPDF-KD), ကၠဲးထိၣ်တၢ်ပၢၢ်ဆၢကရူၢ်(KRF)ႇ တပ့ၤစွ့ၤထံသုးကျိၤႇသထူၣ်တၢ်ဒီသဒၢကမျၢၢ်သုးကရူၢ်သ့ၣ်တဖၣ်အံၤ ဟူးဂဲၤ၀ဲဒီး...
(သုးက့ ၅)ဟီၣ်က၀ီၤတလါအတီၢ်ပူၤပယီၤသုးသံ(၈၈)ဂၤႇဘၣ်ဒိ(၅၇)ဂၤအဂ့ၢ် KNU ထုးထီၣ်ပ၁်ဖျါ
လါစဲးပထ့ဘၢၣ် ၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)တၢ်ပၢဟီၣ်က၀ီၤပူၤ လါအီကူးတလါအတီၢ်ပူၤ ပယီၤသုးဒီးသုးခိးကီၢ်ဆၢ(BGF)တကပၤသံ၀ဲ(၈၈)ဂၤအကျါပၣ်ဃုာ်၀ဲသုးခိၣ်စိတဂၤဒီး ဘၣ်ဒိ၀ဲ(၅၇)ဂၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ထုးထီၣ်ပာ်ဖျါ၀ဲလါစဲးပထ့ဘၢၣ် ၃ သီအနံၤန့ၣ်လီၤႉ လါအီကူးတလါအတီၢ်ပူၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးႇ(BGF)သုးပာ်ဖှိၣ်အဘၢၣ်စၢၤ တၢ်ဒုးကဲထီၣ်၀ဲခဲလၢာ်(၁၄၃)ဘျီဒီး ပယီၤသုးသံဘၣ်ဒိဘၣ်ထံးအိၣ်၀ဲအါမးအသိး မ့မ့ၢ်ဟီၣ်က၀ီၤ(KNLA)တကပၤန့ၣ် ဘၣ်ဟ့ၣ်လီၤကွံာ်အသးသမူ(၅)ဂၤႇဘၣ်ဒိ(၂၆)ဂၤ အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါတၢ်လီၢ်လၢတၢ်ဒုးကဲထီၣ်အလီၢ်သ့ၣ်တဖၣ်န့ၣ်စ့ၢ်ကီး(BGF)ဒီးပယီၤသုးခးလီၤကျိဖးဒိၣ် (၉၆)ဖျၣ်ဆူ သ၀ီပူၤႇတၢ်ဖံးအီၣ်မၤအီၣ်လီၢ်ကျဲကျီးပူၤဒီးလုၢ်သ့ၣ်ခါပတာ်မၤကမၣ်၀ဲၦၤဂ့ၢ်၀ီခွဲးယာ်အါမးအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ ဘၣ်ဆၣ်တလါအတီၢ်ပူၤ ဘၣ်ဃးတၢ်ဒုးကဲထီၣ်လၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤပူၤတၢ်အိၣ်သးဒီး တၢ်သံတၢ်ဘၣ်ဒိဘၣ်ထံးတၢ်အိၣ်သးတဖၣ်န့ၣ် ပယီၤသုးကတပၤထုးထီၣ်ပာ်ဖျါ၀ဲတၢ်ကစီၣ်တအိၣ်၀ဲဘၣ်န့ၣ်လီၤႉ လၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤအပူၤ တၢ်ဒုးကဲထီၣ်လၢခံခီခံကပၤအဘၢၣ်စၢၤတကးဒံးဘၣ်အမဲာ်ညါ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးဟီၣ်က၀ီၤဒြိသုးကရူၢ် လဲၤတ့ၢ်လီၤ၀ဲဒြိမ့ၣ်ပိၢ်လၢ သုးကီၣ်ကးစုတီၤဖီလာ်ပၢပြးအ၀ဲၤကျိၤဘၣ်ထွဲ၀ဲၤဒၢးတဖၣ်အိၣ်၀ဲအဂ့ၢ်န့ၣ် ကရူၢ်ဘၣ်ထွဲတဖၣ်ထုးထီၣ်ပာ်ဖျါ တၢ်ကစီၣ်အိၣ်၀ဲန့ၣ်လီၤႉ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤခီဖျိတၢ်ဒုးကဲထီၣ်ႇပယီၤသုးပံးဃာ်၀ဲခိကျဲႇထံကျဲခံဘိလၢာ်အဃိ ဖၣ်ပူၣ်၀့ၢ်ပူၤ ဂံၢ်ခီၣ်ထံးတၢ်အီၣ်တၢ်အီတဖၣ်လီၤတူာ်လီၤကၤထီၣ်၀ဲလံအသိးဂံၢ်ခီၣ်ထံးတၢ်ဖိတၢ်လံၤစ့ၢ်ကီးအၦ့ၤဒိၣ်ထီၣ်၀ဲဒၣ်ကွ့ၢ်ကွ့ၢ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ဒ်န့ၣ်အသိး(ခ့ၣ်အဲၣ်ယူၣ်)တၢ်ပၢဟီၣ်က၀ီၤလၢအဂၤသ့ၣ်တဖၣ်စ့ၢ်ကီးတၢ်ဒုးတၢ်ယၤဆူၣ်ထီၣ်၀ဲဒီး တၢ်ထီၣ်မၤန့ၢ် ပယီၤသုးကလၢၤတဖၣ်အသိးလၢပျီပူၤတၢ်ဒုးပူၤစ့ၢ်ကီးပယီၤသုးသံဘၣ်ဒိဘၣ်ထံး၀ဲအါမးအဂ့ၢ်န့ၣ် (သုးက့)ကိးဘ့ၣ်ဒဲး ထုးထီၣ်ပာ်ဖျါတၢ်ကစီၣ်အသိးသ့ၣ်ညါဘၣ်န့ၣ်လီၤႉ