လၢ KNU ကီၢ်ခိၣ်အတၢ်နဲၣ်လီၤအဖီခိၣ် ချၢၣ်လွံၢ်ထူၣ်ကီၢ်ရ့ၣ်ပျၢ်စ့ၢ်ကီးဝဲပှၤဃိၥ်ဖိ(၂၉)ဂၤ
လါဖ့ၤဘြူၤအါရံၤ ၂၇ သီ, ၂၀၂၆ နံၣ်, ခ့ၣ်အဲးစံၣ် ပှၤဃိၥ်ဖိလၢအလီၤဘၣ်ဃိၥ်ဖဲချၢၣ်လွံၢ်ထူၣ်ကီၢ်ရ့ၣ်(သုးက့ ၃)တၢ်ပၢဟီၣ်ကဝီၤအပူၤတဖၣ် လၢခ့ၣ်အဲၣ်ယူၣ်- ကညီဒီကလုၥ် စၢဖှိၣ်ကရၢ ကီၢ်ခိၣ်အတၢ်ကလုၢ်အဖီခိၣ် တၢ်ပျၢ်လီၤက့ၤစ့ၢ်ကီးဝဲပှၤဃိဖိ(၂၉)ဂၤအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်ပှၤဘၣ်မူ ဘၣ်ဒါ အအိၣ်န့ၣ်လီၤ. လၢတၢ်န့ၣ်အဃိ ဒ်ကီၢ်ခိၣ်အတၢ်ကလုၢ်နီၣ်ဂံၢ် ၁/၂၀၂၆ အသိးန့ၣ် ဖဲလါဖ့ၤဘြူၤအါရံၤ ၂၅ သီအနံၤ တၢ်မၤဝဲတၢ်ပျၢ်လီၤကွံၥ် ပှၤဃိၥ်ဖိမူးတၢ်ရဲၣ်တၢ်ကျဲၤတခါန့ၣ်လီၤ. ပှၤဃိၥ်ဖိ(၂၉)ဂၤလၢတၢ်ပျၢ်လီၤဝဲသ့ၣ်တဖၣ်အံၤ ပိၥ်ခွါ(၂၄)ဂၤ,ပိၥ်မုၣ်(၅)ဂၤဒီး ပှၤသ့ၣ်တဖၣ်အံၤမ့ၢ်ပှၤလၢအတၢ်ကမၣ်ဆံး တပၣ်ဃုၥ်လၢ တၢ်ဖီၣ်ဆူၣ်မၤတရီတပါ,တၢ်မၤသံမၤဝီဒီးကသံၣ်မူၤဘှီးကွီၢ်မ့ၣ်သ့ၣ်တဖၣ်အံၤအပူၤဘၣ်အဃိ ဘၣ်တၢ်ပျၢ်လီၤ က့ၤဝဲဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ. လၢတၢ်ပျၢ်လီၤက့ၤပှၤဃိၥ်ဖိဘျီဝဲအံၤ ပှၤလၢအလီၤဘၣ်ဃိၥ်(၇)နံၣ်ဆူဖီခိၣ်ဒ်အမ့ၢ် တၢ်ဖီၣ်ဆူၣ်မၤတရီတပါ, တၢ်မၤသံမၤဝီဒီး ကသံၣ်မူၤဘှီးကွီၢ်သ့ၣ်တဖၣ်အံၤတပၣ်ဃုၥ်ဝဲလၢတၢ်ပျၢ်လီၤက့ၤဘျီဝဲအံၤအပူၤဘၣ်န့ၣ်လီၤ. ဒ်န့ၣ်အသိးပှၤဃိၥ်ဖိလၢတၢ်ပျၢ်လီၤက့ၤဝဲခဲအံၤတဖၣ် တမ့ၢ်အပူၤဖျဲးထီၣ်လၢတၢ်ကမၣ်ပူၤလၢလၢပှဲၤပှဲၤလံဘၣ်ဒီး မ့မ့ၢ်တခီခီဖျိ တၢ်သိၣ်တၢ်သီတၢ်ပၥ်ပနီၣ်အဖီခိၣ် ဘၣ်တၢ်ပျၢ်လီၤက့ၤဝဲလီၤအဃိ အဝဲသ့ၣ်အံၤအလီၢ်အိၣ်လၢကဘၣ်ဟံန့ၢ်တၢ်မၤလိအသိး ဟးထီၣ်လၢတၢ်ချၢလံဘၣ်ဆၣ်ကဘၣ်အိၣ်ဂ့ၤဂ့ၤဒီးကဘၣ်ဖံးအီၣ်မၤအီၣ်လၢအတီအလိၤအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ. တကတီၢ်ဃီပှၤသ့ၣ်တဖၣ်အံၤမ့ၢ်တလူၤပိၥ်မၤထွဲဒီးမ့ဆဲးမၤကမၣ်ဒံးတၢ်န့ၣ် ကဘၣ်က့ၤတူၢ်ဝဲတၢ်ကမၣ်ခံခါလၢၥ်အဂ့ၢ်န့ၣ် စံးစ့ၢ်ကီး ဝဲန့ၣ်လီၤ. တကးဒံးဘၣ်ပှၤဃိၥ်ဖိလၢအတပၣ်ဃုၥ်လၢတၢ်ပျၢ်လီၤကွံၥ်ခဲအံၤအကျါတဖၣ်စ့ၢ်ကီး အဝဲသ့ၣ်အံၤဖဲအိၣ်လၢဃိၥ်ပူၤဆၢကတီၢ် ကဟံန့ၢ်တၢ်မၤလိဒီးမ့လူၤပိၥ်မၤထွဲတၢ်သိၣ်တၢ်သီန့ၣ်ကမၤစှၤလီၤန့ၢ်ဝဲတၢ်ကမၣ်(၃)လါန့ၣ်လီၤ. လၢန့ၣ်အမဲၥ်ညါပှၤဃိၥ်ဖိလၢအအိၣ်တ့ၢ်လၢဃိၥ်ပူၤတဖၣ်အဝဲသ့ၣ်အိၣ်မ့ၢ်ဂ့ၤမ့လူၤပိၥ်မၤထွဲတၢ်သိၣ်တၢ်သီန့ၣ် တၢ်ခွဲးတၢ်ယၥ် တၢ်သူၣ်ကညီၤသးကညီမ့ဟဲအိၣ်ထီၣ်လၢပှၤမ့ပျၢ်လီၤကွံၥ်ပှၤဃိၥ်ဖိန့ၣ် အဝဲသ့ၣ်ကဒိးန့ၢ်ဘၣ်ဝဲတၢ်ခွဲးတၢ်ယၤ အံၤအဂ့ၢ်န့ၣ် ချၢၣ်လွံၢ်ထီၣ်ကီၢ်ရ့ၣ် စံးဝဲန့ၣ်လီၤ. လၢခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ခိၣ်အတၢ်ကလုၢ်အဖီခိၣ်ဘၣ်ဃး တၢ်ပျၢ်လီၤကွံၥ်ပှၤဃိၥ်ဖိအံၤန့ၣ် ဖဲအပူၤကွံၥ် လါဖ့ၤဘြူၤအါရံၤ(၂၃)အနံၤစ့ၢ်ကီး...
တၢ်ကြဲၢ်ကီၢ်ဆၣ်ပူၤတၢ်ဒုးဆဲးကဲထီၣ်ဝဲဒီးကရူၢ်(၃)ဘ့ၣ်ပူၤကမျၢၢ်လၢဃ့ၢ်ထီၣ်တဖၣ်လိၣ်ဘၣ်တၢ်ဆီၣ်ထွဲမၤစၢၤ
လါဖ့ၤဘြူၤအါရံၤ ၂၆ သီ, ၂၀၂၆ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဖၣ်အၣ်ကီၢ်ရ့ၣ်(သုးက့ ၇)တၢ်ကြဲၢ်ကီၢ်ဆၣ်အပူၤ တၢ်ဒုးဆဲးကဲထီၣ်ဝဲလၢခံခီခံကပၤအဘၢၣ်စၢၤဒီး လၢတၢ်ဒုးတၢ်ယၤ အံၤအဃိ ကရူၢ်(၃)ဘ့ၣ်ပူၤ ကမျၢၢ်လၢအဃ့ၢ်ထီၣ်တဖၣ်တၢ်ကီတၢ်ခဲအိၣ်လၢကအီၣ်ကအီအဃိလိၣ်ဘၣ်ဝဲတၢ်ဆီၣ်ထွဲမၤစၢၤ အဂ့ၢ်န့ၣ် ကီၢ်ဆၣ်ပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ. တၢ်ကြဲၢ်ကီၢ်ဆၣ်ပူၤ လၢကထီၣ်မၤန့ၢ်က့ၤထံဆၢကီၢ်ဆၢသုးကလၢၤတၢ်လီၢ်လၢအဘၣ်ဟ့ၣ်ဆှူဝဲတဖၣ်အံၤအဂီၢ် စးထီၣ် ဖဲအပူၤ ကွံၥ် ၂၃ သီအနံၤန့ၣ် ပယီၤသုးလၢအိၣ်တၢ်ကြဲၢ်ဝ့ၢ်ခိၣ်ဝ့ၢ်ဃၢၤအံၤတဖၣ်ဖဲအဝဲသ့ၣ်ဟးထီၣ်လၢတၢ်ပၥ်ပနီၣ်လီၢ် အခါတၢ် ခးလိၥ် သးကဲထီၣ်ဝဲဒီး ဟီၣ်ကဝီၤ(KNLA)သုးပၥ်ဖှိၣ်အဘၢၣ်စၢၤတကးဒံးဘၣ်ခးလီၤစ့ၢ်ကီးဝဲကျိဖးဒိၣ်အဃိ တၢ်ြကဲၢ်ကရူၢ်, လၢၢ်ဂၢၤကရူၢ် ဒီး ဖါကၤကရူၢ်(၃)ဘ့ၣ် ပူၤ ကမျၢၢ်တဖၣ်ဃ့ၢ်ထီၣ်ဝဲန့ၣ်လီၤ. ကမျၢၢ်လၢအဃ့ၢ်ထီၣ်သ့ၣ်တဖၣ်အံၤတနီၤန့ၣ်လဲၤဃ့ၢ်ထီၣ်အိၣ်ဝဲလၢထံဆၢကီၢ်ဆၢအဘူးအတံၢ်အိၣ်ဝဲအသိးတနီၤန့ၣ် လဲၤဃ့ၢ် အိၣ်ဝဲလၢပှၢ်လၢ်ကျါတၢ်ဖံးအီၣ်မၤလီၢ်စ့ၢ်ကီးအိၣ်ဝဲအဃိ ပှၤသ့ၣ်တဖၣ်အံၤတၢ်ကီတၢ်ခဲအိၣ်ဝဲလၢတၢ်အီၣ်တၢ်အီတကပၤအဂ့ၢ်န့ၣ် တၢ်ြကဲၢ်ကီၢ်နဲၣ်ရွဲၣ်သဃဲၤ ပဒိၣ်စီၤပူလူး စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. “ကမျၢၢ်ဒုခဲအံၤဒုတၢ်ဂ့ၢ်ကီအိၣ်ဝဲလၢတၢ်အီၣ်တၢ်အီလီၤ.တနီၤခီန့ၣ်အဘူးအတံၢ်အိၣ်အဃိက့ၤထီၣ်စံၣ်ဝဲလၢထံဆၢကီၢ်ဆၢ ဘဲကျီးအိၣ်တနီၤ.တနီၤန့ၣ်လဲၤစံၣ်အိၣ်ဝဲဖဲသ့ၣ်ခီၣ်ထံးဝၣ်ခီၣ်ထံးအိၣ်တနီၤ.အဃိန့ၣ်အဝဲသ့ၣ်တၢ်ကီတၢ်ခဲအိၣ်ဝဲလၢတၢ်အီၣ်တၢ်အီတကပၤအဃိလိၣ်ဘၣ်တၢ်ဆီၣ်ထွဲမၤစၢၤမီၤ”အဂ့ၢ်န့ၣ် စံးဝဲန့ၣ်လီၤ. ဒ်ကီၢ်ဆၣ်နဲၣ်ရွဲၣ်သဃဲၤစံးဝဲအသိးန့ၣ် ခီဖျိလၢဒုးယၤတၢ်သဘံၣ်သဘုၣ်အံၤအဃိ တၢ်ြကဲၢ်ကရူၢ်,ဖါကၤ(ဖားကပ်)ကရူၢ်ဒီးလၢၢ်ဂၢၤ ကရူၢ်ပူၤ ဒူသဝီလၢအဃ့ၢ်ထီၣ်တဖၣ်န့ၣ်မ့ၢ်ဝဲ တၢ်ြကဲၢ်,ပညၤပျံ, နိၣ်ချၢၣ်သဝီ,မိနဲ,ပနွဲၢ်ကျါ,ကွံပညၣ်သဝီ,ကကၠိဃုၥ်ဒီး ဒူသဝီလၢအဂၤ ပှၤနီၣ်ဂံၢ် ပၥ်ဖှိၣ်ခဲလၢၥ်အဂၤ(၁၀၀၀၀)ဃၣ်ဃၣ်ဃ့ၢ်ထီၣ်ဝဲဒၣ်န့ၣ်လီၤ. ဒ်န့ၣ်အသိးဖဲလီၢ်ကဝီၤကမျၢၢ်သ့ၣ်တဖၣ်အံၤဃ့ၢ်ထီၣ်အခါပယီၤသုးအံၤဟံန့ၢ်ဝဲတၢ်ခွဲးတၢ်ယၥ်နုၥ်လီၤဃုတၢ်လၢကမျၢၢ်အဟံၣ်ပူၤ ဝံၤဟံက့ၤစိၥ်ဝဲတၢ်ဖိတၢ်လံၤအိၣ်ဝဲစ့ၢ်ကီးအဂ့ၢ်န့ၣ် ကမျၢၢ်လၢအိၣ်ဘူးဒီးတၢ်ကဲထီၣ်သးအံၤတဖၣ်စံးဝဲအိၣ်ဘၣ်ဆၣ် ဘၣ်ဃး တၢ်ဂ့ၢ်အံၤ မၤလီၤတံၢ်အီၤတန့ၢ်ဒံးဘၣ်အဂ့ၢ်န့ၣ် ကီၢ်ဆၣ်နဲၣ်ရွဲၣ်သဃဲၤ စံးဝဲန့ၣ်လီၤ. တကီၢ်ခါခဲအံၤလၢကထီၣ်ဟံန့ၢ်က့ၤထံဆၢကီၢ်ဆၢသုးလၢၤအဂီၢ်ပယီၤသုးလၢအဟးထီၣ်လၢအနီၣ်ဂံၢ်ကအိၣ်(၂၀၀)ဃၣ်ဃၣ်တဖၣ်အံၤ ခဲအံၤအိၣ်ဒံးဝဲဖဲတီၤလိကၠီၤ(တောင်လုံးကျော်)ကစၢၢ်ခီၣ်ထံးဒံးအသိး စးထီၣ်လၢအဝဲသ့ၣ်ဟးထီၣ်တလၢတၢ်ပၥ်ပနီၣ်အလီၢ်...
တၢ်တဘၣ်ကွဲးကါဒီးဖီၣ်ဝဲဆၣ်ဖိကီၢ်ဖိလၢအတသံဒ်န့ဆၢၣ်အသိးတဖၣ်ဘၣ်အဂ့ၢ်,ကၠီၣ်တဲၣ်ပဒိၣ်ဟ့ၣ်ပလီၢ်
လါဖ့ၤဘြူၤအါရံၤ ၂၅သီ, ၂၀၂၆နံၣ်, ခ့ၣ်အဲးစံၣ်, ဆၣ်ဖိကီၢ်ဖိလၢအသံဝဲလီၤလီၤဆီဆီလၢတမ့ၢ်ဒ်သိးန့ဆၢၣ်ဘၣ်သ့ၣ်တဖၣ်အံၤတၢ်တဘၣ်ကွဲးကါဒီးဖီၣ်ဝဲဒၣ်ဘၣ်အဂ့ၢ်,ကၠီၣ်တဲၣ်ပဒိၣ်ကမျၢၢ်တၢ်ရ့လိၥ်ဘၣ်ထွဲဝဲၤကျိၤ(The Government Public Relations Department)ပၥ်ဖျါထီၣ်ဝဲဒၣ်ဖဲလါဖ့ၤဘြူၤအါရံၤ(၂၃)သီအနံၤန့ၣ်လီၤ. ဒ်လါဖ့ၤဘြူၤအါရံၤ(၂၃)သီအနံၤ,ကၠီၣ်တဲၣ်ပဒိၣ်ကမျၢၢ်တၢ်ရ့လိၥ်ဘၣ်ထွဲဝဲၤကျိၤဘိးဘၣ်ပၥ်ဖျါဝဲအသိးန့ၣ်,ထွံၣ်ပျူၢ်တၢ်ဆါအံၤအါတက့ၢ်ကဲထီၣ်ဝဲဒၣ်အသးဒ်အပူၤကွံၥ်(၂၀၂၅)နံၣ်အသိးဒီးစးထီၣ်ဝဲဒၣ်အသးလၢဟီၣ်ကဝီၤတဖၣ်အပူၤဒီးရၤလီၤဝဲအသးလၢခိၣ်ဃၢၤဟီၣ်ကဝီၤတဖၣ်အပူၤတဆီဘၣ်တဆီအလီၢ်ခံ,ဘၣ်ကူဘၣ်ဂၥ်ဝဲဒၣ်တၢ်အဂ့ၢ်,ကၠီၣ်တဲၣ်ကိတိၥ်ဝဲၤကျိၤပှၤကတိၤတၢ်ပၢ(၂)ဂၤတဂၤလၢအမ့ၢ်(မံးအဲရံၤဖၤရံၣ်)အံၤစံးဝဲဒၣ်န့ၣ်လီၤ. လၢတၢ်န့ၣ်အဃိ,ဆၣ်ဖိကီၢ်ဖိဒ်အမ့ၢ်ကျီၢ်,ပနၢ်,ထွံၣ်,သးမံညီၤလၢအသံဝဲလၢတၢ်တသ့ၣ်ညါဂ့ၢ်ကျိၤမ့တမ့ၢ်ဘၣ်ကူဘၣ်ဂၥ်ဝဲတဖၣ်အံၤတၢ်တဘၣ်ဖီၣ်,ကွဲးကါ,အီၣ်ဝဲဒၣ်ဘၣ်အသိး,အပူၤကွံၥ်ဆၣ်ဖိကီၢ်ဖိလၢအိၣ်တဆူၣ်အိၣ်တချ့သ့ၣ်တဖၣ်စ့ၢ်ကီးတၢ်တဘၣ်အီၣ်ဒီးမၤသံဝဲဒၣ်ဘၣ်အဂ့ၢ်,ဟ့ၣ်ပလီၢ်ပၥ်ဖျါဝဲဒၣ်န့ၣ်လီၤ. ဒ်ကီၢ်ကၠီၣ်တဲၣ်ထံကီၢ်ဒီတဘ့ၣ်ပတီၢ်တၢ်မၤနီၣ်မၤဃါအိၣ်ဝဲအသိးန့ၣ်,ဆၣ်ဖိကီၢ်ဖိလၢအိၣ်မုၢ်ထီၣ်,မုၢ်ထီၣ်ကလံၤစိးဒီးကလံၤထံးသ့ၣ်တဖၣ်တၢ်သမံသမိးထံၣ်န့ၢ်ဝဲလၢအိၣ်ဒီးထွံၣ်ပျူၢ်တၢ်ဆါဒီးဆၣ်ဖိကီၢ်ဖိလၢအဘၣ်ကူဘၣ်ဂၥ်ဝဲထွံၣ်ပျူၢ်တၢ်ဆါသ့ၣ်တဖၣ်အံၤမ့ၢ်ဝဲဆၣ်ဖိကီၢ်ဖိလၢတၢ်ဘုၣ်အီၤလၢဟံၣ်တဖၣ်အဂ့ၢ်,(ကၠီၣ်တဲၣ်ပဒိၣ်ကမျၢၢ်တၢ်ရ့လိၥ်ဘၣ်ထွဲဝဲၤကျိၤ)ပၥ်ဖျါဝဲဒၣ်န့ၣ်လီၤ. လၢန့ၣ်အမဲၥ်ညါ,(၂၀၂၆)နံၣ်လါယနူၤအါရံၤ(၁)သီတုၤလၢဖ့ၤဘြူၤအါရံၤ(၂၀)သီအနံၤအပူၤဒ်ကၠီၣ်တဲၣ်ပှၤဘၣ်မူဘၣ်ဒါအတၢ်မၤနီၣ်မၤဃါအိၣ်ဝဲအသိးန့ၣ်,ကီၢ်စဲၣ်(၇၇)ဘ့ၣ်အပူၤတၢ်မၤကွၢ်ဝဲဆၣ်ဖိကီၢ်ဖိ(၅၃၂)ခါအကျါတၢ်ထံၣ်ဝဲထွံၣ်ပျူၢ်တၢ်ဆါကဲထီၣ်ဝဲအသးအိၣ်ဝဲ(၅၀)ဒီးဆၣ်ဖိကီၢ်ဖိလၢအဘၣ်ကူဘၣ်ဂၥ်တဖၣ်အံၤအါတက့ၢ်မ့ၢ်ဝဲထွံၣ်သ့ၣ်တဖၣ်အဂ့ၢ်,ပၥ်ဖျါစ့ၢ်ကီးဝဲဒၣ်န့ၣ်လီၤ. ဒီးဒ်ကမျၢၢ်ဆူၣ်ချ့ကိတိၥ်ဝဲၤကျိၤအတၢ်မၤနီၣ်မၤဃါအိၣ်ဝဲအသိးန့ၣ်,(၂၀၂၆)နံၣ်နုၥ်လီၤအပူၤခီဖျိထွံၣ်ပျူၢ်တၢ်ဆါတၢ်ဘၣ်ကူဘၣ်ဂၥ်အဃိ,ရယီကီၢ်စဲၣ်ဟီၣ်ကဝီၤအပူၤကမျၢၢ်သံကွံၥ်ဝဲဒၣ်(၁)ဂၤအိၣ်ထီၣ်အဂ့ၢ်,ပၥ်ဖျါဝဲဒၣ်န့ၣ်လီၤ. လၢတၢ်န့ၣ်အဃိလီၤဆီဒၣ်တၢ်,တၢ်မ့ထံၣ်ဝဲဆၣ်ဖိကီၢ်ဖိမ့တမ့ၢ်ထွံၣ်တဒုဒုလၢအမၤသးကၢၣ်,ဃုတၢ်အ့ၣ်လိၥ်,ထးခိၣ်ထံခၣ်သဘှဲထီၣ်ဒီးမၤအသးတမ့ၢ်ဒ်န့ဆၢၣ်အသိးဘၣ်သ့ၣ်တဖၣ်အံၤတၢ်ကဒုးသ့ၣ်ညါဝဲကမျၢၢ်ဆူၣ်ချ့ခိၣ်နၢ်တဖၣ်တဘျီဃီအဂ့ၢ်,ပၥ်ဖျါဝဲဒၣ်န့ၣ်လီၤ. တကတီၢ်ဃီ,ပှၤတဂၤလၢ်လၢ်လၢထွံၣ်မ့အ့ၣ်ဘၣ်မ့တမ့ၢ်ဝၥ်ဘၣ်အီၤသ့ၣ်တဖၣ်အံၤကဘၣ်ပၥ်ဃ့ထီထီၣ်ဝဲအတၢ်ပူၤလီၢ်ဒီးဖူလီၤဝဲကသံၣ်မၤသံတၢ်ဃၢ်အမဲၥ်ညါ,တဘၣ်အိၣ်ခိးဝဲတုၤလၢဆၣ်ဖိကီၢ်ဖိလၢအ့ၣ်ဘၣ်အီၤတဖၣ်အံၤသံဘၣ်ဒီးကဘၣ်လဲၤဆဲးဝဲတၢ်ဒီသဒၢထွံၣ်ပျူၢ်တၢ်ဆါကသံၣ်တဘျီဃီအဂ့ၢ်,ကၠီၣ်တဲၣ်ပှၤဘၣ်မူဘၣ်ဒါတဖၣ်ဟ့ၣ်ပလီၢ်ဝဲအဂ့ၢ်ပၥ်ဖျါဝဲန့ၣ်လီၤ. ဒ်န့ၣ်အသိး,ပှၤတဂၤလၢ်လၢ်လၢတူၢ်ဘၣ်ဝဲထွံၣ်ပျူၢ်တၢ်ဆါသ့ၣ်တဖၣ်အံၤသးသမူတၢ်လီၤဘၣ်ယိၣ်အိၣ်ဝဲဒၣ်အဂ့ၢ်,ကၠီၣ်တဲၣ်ပဒိၣ်ခိၣ်နၢ်ဒိၣ်ထီတဖၣ်စံးဝဲဒၣ်န့ၣ်လီၤ.
တၢ်ထုးထီၣ်လၢၢ်ဒီးမဲးလၢဃိၣ်လိၥ်ကျိပူၤအါထီၣ်ဘၣ်ဆၣ်ကမျၢၢ်ပျံၤတၢ်လဲၤတၢၣ်ဝဲတဘူၣ်ဘၣ်
လါဖ့ၤဘြူၤအါရံၤ ၂၅ သီ, ၂၀၂၆ နံၣ်, ခ့ၣ်အဲးစံၣ် စးထီၣ်ဖဲသုးဟံန့ၢ်တၢ်စိတၢ်ကမီၤဝံၤလီၢ်ခံန့ၣ် လၢကညီကီၢ်စဲၣ် ဖၣ်အၣ်ဝ့ၢ်ခိၣ်ဝ့ၢ်ဃၢၤဟီၣ်ကဝီၤအပူၤ တၢ်ထုးထီၣ်ထီၣ်ဝဲမဲး, လၢၢ်သ့ၣ် တဖၣ်အံၤလၢဃိၣ်လိၥ်ကျိပူၤအါထီၣ်ဝဲဘၣ်ဆၣ် ကမျၢၢ်သ့ၣ်တဖၣ်ပျံၤတၢ်လဲၤတၢၣ်ဝဲပှၤဘၣ်မူဘၣ်ဒါတဘူၣ်ဝဲ ဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ. ဖၣ်အၣ်ဝ့ၢ်ဆၢခိၣ်ဝ့ၢ်ဆၢလၥ်အခိၣ်အဃၢၤအံၤတဖၣ် တၢ်ထုးထီၣ်ဝဲမဲး,လၢၢ်သ့ၣ်တဖၣ်အံၤလၢဃိၣ်လိၥ်ကျိပူၤအံၤအိၣ်ဝဲကိးမုၢ် နံၤဒဲးဒီး ခီဖျိလၢတၢ်ထုးထီၣ်မဲး,လၢၢ်တၢ်ဂ့ၢ်ပိၥ်ထွဲအံၤအဃိ ကမျၢၢ်လၢအိၣ်ဘူးဖဲထံကျိကၢၢ်နံၤအခိၣ်အဃၢၤအံၤတဖၣ်အစံၥ်လီၢ်,ကျီး, တၢ်သူၣ် တၢ်ဖျးလီၢ်တဖၣ်အံၤ ကၢၢ်လၥ်အီၣ်ဝဲဟီၣ်ခိၣ်အံၤဟဲအါထီၣ်ဝဲဒၣ်အဂ့ၢ်န့ၣ် ကမျၢၢ်တဖၣ်စံးဝဲန့ၣ်လီၤ. လၢတၢ်န့ၣ်အဃိကမျၢၢ်တဖၣ်သ့ၣ်တဖၣ်အဲၣ်ဒိးဝဲလၢတၢ်ကပတုၥ်ကွံၥ်တၢ်ထုးထီၣ်လၢၢ်,မဲးလၢဃိၣ်လိၥ်ကျိပူၤအံၤဘၣ်ဆၣ် လၢကလဲၤ ပၥ်ဖျါထီၣ်ဒီးလဲၤတၢၣ်ဝဲကီၢ်စဲၣ်ကီၣ်ကးပှၤဘၣ်မူဘၣ်ဒါအဂီၢ်စ့ၢ်ကီးပျံၤတၢ်လဲၤတၢၣ်ဝဲတဘူၣ်ဘၣ်အဖီခိၣ် ဘၣ်ကွၢ်ကီဝဲဒ်န့ၣ်လီၤ အဂ့ၢ်န့ၣ် လီၢ်ကဝီၤကမျၢၢ်လၢတအဲၣ်ဒိးပၥ်ဖျါအမံၤတဂၤ စံးဝဲဒန့ၣ်လီၤ. “တၢ်ဖံးတၢ်မၤတဖၣ်အံၤဟဲအါထီၣ်မၢ်မၢ်လီၤ.အဃိကၢၢ်လၥ်ဟီၣ်ခိၣ်လၥ်ဟဲအါထီၣ်မၢ်မၢ်လီၤ.ဘၣ်ဃးပှၤထုးထီၣ်လၢၢ်မဲးတဖၣ်အံၤပှၤကမျၢၢ်တအဲၣ် ဒိးဝဲဘၣ်.အဝဲသ့ၣ်မၤလၢမုၢ်ကျိၤဝဲၤကွၥ်ဘၣ်ဆၣ်မ့မ့ၢ်လၢပဂီၢ်န့ၣ်ဖးနးညါ.လဲၤတၢၣ်ဒီးလဲၤတၢၣ်တဘူၣ်လၣ်.ဘၣ်ကွၢ်ဒီး ဒ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ. ပှၤလၢအထုးထီၣ်မဲး,လၢၢ်လၢဃိၣ်လိၥ်ကျိပူၤတဖၣ်တနီၤန့ၣ်ဖီၣ်လိၥ်စုပၥ်ဖှိၣ်မၤသကိးတၢ်ဒီးပယီၤသုးဃုၥ်ဒီးသုးမီၤစိရိၤအစုဒုၣ်စုတီၤဖီလၥ်ဖီၣ်စုကဝဲၤကရူၢ်သ့ၣ်တဖၣ်အဃိ တၢ်လီၢ်လၢအဘူးဒီးပှၤထုးထီၣ်လၢၢ်,မဲးတဖၣ်အခိၣ်အဃၢၤန့ၣ်တၢ်တပျဲဟးထီၣ်က့ၤလီၤကမျၢၢ် ဘၣ် အသိးချံစဲးလၢအလ့ၢ်ထီၣ်လ့ၢ်လိၤဖဲန့ၣ်တဖၣ် တၢ်ခးပျံၤခးဖုးဝဲအိၣ်အဂ့ၢ်န့ၣ် လီၢ်ကဝီၤကမျၢၢ်စံးဝဲန့ၣ်လီၤ. မဲး,လၢၢ်လၢတၢ်ထုးထီၣ်ဝဲဖဲဃိၣ်လိၥ်ကျိပူၤသ့ၣ်တဖၣ်အံၤတၢ်လဲၤစိၥ်ဆါဝဲဆူဖၣ်အၣ်ဝ့ၢ်ဃုၥ်ဒီးဒူသဝီလၢအိၣ်ဘူးဖဲန့ၣ်တဖၣ်အိၣ်ဝဲဒီး တနီၤန့ၣ် တၢ်လဲၤဆှၢဝဲဆူတလၢၤကီၢ်စဲၣ် မီၣ်လမၠဲၣ်ဝ့ၢ်ဒီးမိၣ်တမၣ်ဝ့ၢ်(မုတ္တမမြို့)ပှၤခိးပှ့ၤဖှိၣ်တၢ်အခိၣ်ဆၢၣ်အိၣ်စ့ၢ်ကီးဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ. ဃိၣ်လိၥ်ကျိပူၤခီဖျိလၢတၢ်ထုးထီၣ်လၢၢ်,မဲးန့ၢ်လၢနံၣ်ယံၤလါအါလံအဃိ ထံကျိကၢၢ်နံၤဒူသဝီလၢအမ့ၢ် ကီၣ်ကၠဲၣ်(ကော့ကျိုက်)ကရူၢ်, တယိၣ်လှကၠိ(တရုတ်လှကျွန်း)ကရူၢ်လၢဟံၣ်ခိၣ်ကအိၣ်ဝဲအဖျၢၣ်(၇၀)ဘျဲၣ်အံၤ ခဲအံၤကၢၢ်လၥ်ဟီၣ်ခိၥ်လီၤပှီၢ်အဃိ ဟံၣ်အိၣ်တ့ၢ်စှၤ ကိၥ်ဖိလီၤအသိး တၢ်ထူၣ်တၢ်ဘိစ့ၢ်ကီးကၢၢ်လၥ်ပၣ်ဃုၥ်ဝဲအိၣ်အဂ့ၢ်န့ၣ် သဝီဖိတဖၣ်စံးဝဲန့ၣ်လီၤ. ဘၣ်ဃးတၢ်ထုးထီၣ်မဲး,လၢၢ်လၢဃိၣ်လိၥ်ကျိပူၤတၢ်ဂ့ၢ်အံၤန့ၣ် ပှၤလၢအမၤတၢ်လၢတၢ်အိၣ်ခိးကွၢ်ဟုၣ်ကွၢ်ဆူၣ်ကညီထံကျိထံကွၥ်တဂၤ စံးဝဲလၢ“လၢတၢ်ကဟံအရ့အဂီၢ်အပူၤကွံၥ်လၢညါခါန့ၣ်ပှၤကမျၢၢ်တီၣ်ဖျါထီၣ်လံၥ်အိၣ်.ဘၣ်ဆၣ်လီၢ်ခံအံၤပှၤလၢအထုးထီၣ်လၢၢ်,မဲးတဖၣ်အဝဲသ့ၣ်ပၥ်ဖှိၣ်မၤသကိးတၢ်ဒီးခိၣ်နၢ်လၢတၢ်ဖီခိၣ်အဃိပှၤကမျၢၢ်တဲတဘူၣ်လၢၤဘၣ်.ပှၤဘၣ်ပျံၤလၢပှၤမ့တဲန့ၣ်ပှၤကဟဲမၤသံဝဲမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ၂၀၂၁ သုးဟံန့ၢ်တၢ်စိတၢ်ကမီၤဝံၤလီၢ်ခံ ခီဖျိလၢတၢ်ထုးထီၣ်လၢၢ်,မဲးလၢဃိၣ်လိၥ်ကျိပူၤဟဲအါထီၣ်အဃိ ကမျၢၢ်သ့ၣ်တဖၣ်တီၣ် ဖျါထီၣ်တၢ်ဂ့ၢ်တၢ်ကျိၤအံၤဆူကီၢ်စဲၣ်ပဒိၣ်အအိၣ်အဘျီတဖၣ်အဘျီဘၣ်ဆၣ် တၢ်ဟံထီၣ်ဖီၣ်ထီၣ်ဂ့ၢ်ဝီတအိၣ်ဝဲဘၣ်အဂ့ၢ်န့ၣ် သ့ၣ်ညါဘၣ် န့ၣ်လီၤ.
ပယီၤသုးပညိၣ်တ့ၢ်လီၤဒြိလၢကျဲပူၤအဃိ သံ(၅)ဂၤအကျါပၣ်ဃုၥ်(DKBA)အပှၤ ၃ ဂၤ
လါဖ့ၤဘြူၤအါရံၤ ၂၅ သီ, ၂၀၂၆ နံၣ်, ခ့ၣ်အဲးစံၣ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ် မၠၣ်ဝတံၣ်ဝ့ၢ်ဃၢၤ ဖလူကရူၢ် တၢ်လီၢ်တတီၤအပူၤ ဖဲမဟါအနံၤန့ၣ် ပယီၤသုးပညိၣ်တ့ၢ်လီၤဝဲဒြိလၢသိလ့ၣ်ကျဲအဃိ သံ(၅)ဂၤအကျါပၣ်ဃုၥ်ဝဲတၢ်ဘၣ်ဘျုးဒံၣ်မိၣ်ခြ့ၣ်စံၣ် ကညီ သုးမုၢ်ဒိၣ်-DKBA အပှၤ(၃)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ. ဖဲမဟါလါဖ့ၤဘြူၤအါရံၤ ၂၄ သီ ကဘၣ်ဖဲဂီၤခီ ၉း၀၀ ဃၣ်ဃၣ်အဆၢကတီၢ်န့ၣ် တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ် (DKBA)သိလ့ၣ်တခိၣ်လၢက့ၤလီၤဆူမၠၣ်ဝတံၣ်အံၤ ဖဲက့ၤတုၤလၢဖလူကရူၢ် တၢ်နၢအုၣ်ခံကျဲ (ရဲကုန်း)တၢ်လီၢ်အံၤအခါ ပယီၤသုး တ့ၢ်လီၤဝဲဒြိတဘ့ၣ်လၢကျဲမုၢ်ပူၤန့ၣ်လီၤ. ဘၣ်ဃးတၢ်ဂ့ၢ်ကဲထီၣ်သးဘျီဝဲအံၤ လီၢ်ကဝီၤကမျၢၢ်ပှၤဘၣ်မူဘၣ်ဒါလၢအသ့ၣ်ညါထွဲတၢ်ဂ့ၢ်အံၤတဂၤစံးဝဲလၢ“တၢ်န့ၣ်ဘၣ် လၢပှၤ သဝီဖိအကါန့ၣ်ဟးဂီၤလၢကျဲပူၤ.အဃိ(DKBA)ကါခီဒုတိနိၣ်ဝဲဘျီစံၣ်လီၤမၤစၢၤဝဲန့ၣ်.ပယီၤခီဒုဟးလူၤကွၢ်လၢတၢ်ဖီခိၣ်မၢ်မၢ်လီၤ.အဃိန့ၣ်ထံၣ်ဝဲဘျီပျၢ်ထီၣ်ဒြိဖးဒိၣ်လၢတၢ်ဖးဖီဝံၤတ့ၢ်လီၤဝဲဘျီဘၣ်ဝဲန့ၣ်.ပယီၤသုးန့ၣ်ဟးဆှၣ်တၢ်အိၣ်မၢ်မၢ်လီၤကွၢ်ဝဲတၢ်မ့ၢ်လီၤဆီန့ၣ်ကွံၥ်လီၤဝဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢပယီၤသုးတ့ၢ်လီၤဒြိဘျီဝဲအံၤအပူၤန့ၣ် (DKBA)အပှၤသံ(၃) ဂၤအသိးကမျၢၢ်စ့ၢ်ကီးသံဝဲ(၂)ဂၤတကးဒံးဘၣ်အမဲၥ်ညါ ဘၣ်ဒိၣ် ဘၣ်ထံးစ့ၢ်ကီးဝဲ(၅)ဂၤ အဂ့ၢ်န့ၣ် (DKBA)ပှၤကတိၤတၢ်ပၢ သုးခိၣ်ဒိၣ်စိ စီၤဖါဘျဲၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ. “တၢ်လီၢ်တခါန့ၣ်ဘၣ်လၢခံခီခံကပၤဘၣ်သဂၢၢ်လိၥ်သးအဖီခိၣ်ပပှၤခီန့ၣ်ဘၣ်လၢက့ၤလီၤဆူမၠၣ်ဝတံၣ်.က့ၤလီၤဘျီဘၣ်န့ၢ်လၢတၢ်တီၤဒ်န့ၣ်.ဘၣ်လၢအဝဲသ့ၣ်ခံဖုဖံးတၢ်မၤတၢ်တၢ်ရဲၣ်တၢ်ကျဲၤအိၣ်ဒ်န့ၣ်အဃိ ပပှၤန့ၣ်ကါဟးဂီၤဘျီဘၣ်လၢဆီၣ်ကါဆၢကတီၢ်ဒီး ပယီၤသုးန့ၣ်အဒြိလီၤအဃိပပှၤသုးဖိသံ(၃)ဂၤဒီးကမျၢၢ်သံ(၂)ဂၤမီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတဂီၤအံၤ န့ၣ်လီၤ. တၢ်နၢအုၣ်ခံကျဲ ယဲကိ(ရဲကုန်း)တၢ်လီၢ်လၢတၢ်ကဲထီၣ်သးခဲအံၤန့ၣ် အိၣ်ဝဲဖဲလ့ၣ်က့ၣ်ကိၥ် စွဲၤတီၤကိကွၢ်လီၤဒီး ဟီၣ်ကဝီၤဝဲန့ၣ် ဘၣ်လၢဒုးယၤတၢ်သဘံၣ်သဘုၣ်ဟီၣ်ကဝီၤအအဃိ တၢ်တဟ့ၣ်တၢ်ပျဲလၢတၢ်ကလ့ၢ်ထီၣ်လ့ၢ်လိၤစ့ၢ်ကီးဘၣ်ဘၣ်ဆၣ် လီၤဆီဒၣ် တၢ်(DKBA) အပှၤလ့ၢ်ထီၣ်လ့ၢ်လိၤဝဲအိၣ်အဂ့ၢ်န့ၣ် ကရူၢ်ခိၣ်နၢ်တဖၣ် စံးဝဲန့ၣ်လီၤ. ဒ်န့ၣ်အသိးဘၣ်တၢ်ဃးတၢ်ဂ့ၢ်ကဲထီၣ်ဘျီဝဲအံၤ...
သုးကရူၢ်နုၥ်လီၤဖီၣ်ရမတံဝ့ၢ်(DKBA)ခၣ်စံၣ်နိၣ်ဒီးတၢ်တၤကျိၣ်တၤတၢ်စ့တၢ်လိၢ်လီၢ်တဖၣ်အါထီၣ်
လါဖ့ၤဘြူၤအါရံၤ ၂၅သီ, ကညီကီၢ်စဲၣ်,ရၤမတံဝ့ၢ်ဟီၣ်ကဝီၤအပူၤပယီၤသုးကရူၢ်နုၥ်လီၤဖီၣ်ဝဲတၢ်ဘၣ်ဘျူးဒံၣ်မိၣ်ကရ့ၣ်စံၣ်ကညီသုးမုၢ်ဒိၣ်(DKBA)ကရူၢ်ကရၢခၣ်စံၣ်နိၣ်ဒီးတၢ်တၤကျိၣ်တၤစ့တၢ်လိၢ်ခိၣ်လိၢ်ကွဲတၢ်လီၢ်တၢ်ကျဲတဖၣ်အါထီၣ်ဝဲဒၣ်အဂ့ၢ်,ဝ့ၢ်လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ. ရၤမတံဝ့ၢ်ပယီၤသုးတြိၤ(တမ)(၂၂)ဒီးပၢၤကီၢ်ပှၤဘၣ်မူဘၣ်ဒါသ့ၣ်တဖၣ်အံၤ,စးထီၣ်ဝဲလါဖ့ၤဘြူၤအါရံၤနုၥ်လီၤအပူၤမၤဝဲတၢ်နုၥ်လီၤဖီၣ်တၢ်လၢဝ့ၢ်ကဝီၤဒိၣ်,ကဝီၤဒ့(DKBA)ကၤစံၣ်နိၣ်တၢ်လီၢ်တၢ်ကျဲဒီးအၤဝၤဒ့တၢ်တၤကျိၣ်တၤစ့တၢ်လီၢ်တၢ်ကျဲတဖၣ်တပယူၥ်ဃီအိၣ်ဝဲဒၣ်အဂ့ၢ်,လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ. ပယီၤသုးနုၥ်လီၤဖီၣ်တၢ်လၢကရူၢ်ကရၢတၢ်လီၢ်တၢ်ကျဲဒီးတၢ်ဟူထီၣ်သါလီၤဒ်အံၤအဖီခိၣ်,ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)လီၢ်ခၢၣ်သးသုးဂ့ၢ်ဝီဝဲၤကျိၤ,အဝဲၤကျိၤခိၣ်(သုးခိၣ်ဒိၣ်ဂီၢ်ဂ့ၢ်)စီၤဖါဘျဲၣ်စံးဝဲဒ်အံၤန့ၣ်လီၤ. “တၢ်ကဲထီၣ်သးလၢပကရူၢ်ကရၢတၢ်လီၢ်တၢ်ကျဲဒုအမ့ၢ်လီၤ.ဘၣ်ဆၣ်ကရူၢ်ကရၢလၢတၢ်ဖီလၥ်သ့ၣ်တဖၣ်အံၤအိၣ်အါဒံအါဂၤကလုၥ်အါဂၤ,အဖုအါဂၤအဃိ,အသုဖံးအီၣ်မၤအီၣ်တၢ်မနုၤလဲၣ်န့ၣ်တတီၣ်ဖျါထီၣ်ဝဲလၢလီၢ်ခၢၣ်သးခဲလၢၥ်ဘၣ်အဃိပတသ့ၣ်ညါထွဲတၢ်အိၣ်သးခဲလၢၥ်ဘၣ်.တၢ်ဟူထီၣ်သါလီၤမးပသ့ၣ်ညါထွဲလၢပှၤဖီၣ်လံန့ၣ်လီၤ.”အဂ့ၢ်စံးဝဲဒၣ်န့ၣ်လီၤ. ရၤမတံဝ့ၢ်ဟီၣ်ကဝီၤအပူၤဘၣ်ဃးဒီးကၣ်စံၣ်နိၣ်ဒီးအၤဝၤဒ့တၢ်လိၢ်ခိၣ်လိၢ်ကွဲတၢ်တၤကျိၣ်တၢ်စ့တၢ်ဖံးတၢ်မၤလီၢ်တဖၣ်အံၤအိၣ်ဝဲလၢကဝီၤဒိၣ်(၇)ဘ့ၣ်လၢၥ်အပူၤအဂ့ၢ်,လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ. ဒီးပယီၤသုးအံၤတလါအံၤအတီၢ်ပူၤနုၥ်လီၤဖီၣ်ဝဲဒၣ်တၢ်လၢကဝီၤဒိၣ်နီၢ်ဂံၢ်(၂)ဖျၢၣ်ထူပျီတၢ်မၤဘူၣ်ပွဲ(ဖဲ)အၤကလိၤ,ညၣ်(game)လီၢ်,ကဝီၤဒ့နီၢ်ဂံၢ်(၄)ရွ့ၣ်မၠးဝတံၤဖၠါသီဒီးတၢ်ဒုးတဖှံဆီလီၢ်,ကဝီၤဒ့နီၢ်ဂံၢ်(၅)သဖါပ့ၤတြဲၤ,ယ့ၤပူၤ,ဖျၢၣ်ဒိပျီ(ခၣ်စံၣ်နိၣ်)တၢ်တၤကျိၣ်တၤစ့တၢ်လီၢ်တၢ်ကျဲတဖၣ်အပူၤအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ. ပယီၤသုးမၤတၢ်နုၥ်လီၤဖီၣ်ဝဲတၢ်တၤကျိၣ်တၤစ့တၢ်လီၢ်တၢ်ကျဲတဖၣ်အဖီခိၣ်,ဝ့ၢ်လီၢ်ကဝီၤကမျၢၢ်တဂၤစံးဝဲဒ်အံၤန့ၣ်လီၤ. “အသုဖီၣ်ဝဲဖီၣ်စုကဝဲၤကရူၢ်ကရၢလၢမၤညၣ်(game),တၢ်တၤကျိၣ်တၤစ့,ဒီးကသံၣ်ကသီတဖၣ်န့ၣ်ခီကမျၢၢ်သ့ၣ်တဖၣ်သးမုၥ်လီၤ.ဘၣ်မနုၤအဃိလဲၣ်န့ၣ်တၢ်သ့ၣ်တဖၣ်န့ၣ်ခီတမ့ၢ်တၢ်ဖံးတၢ်မၤလၢအဂ့ၤလၢဖိဒံဖိသၣ်သူၣ်ဘီၣ်သးစၢ်အဂီၢ်ဘၣ်.ဘၣ်ဆၣ်မ့မ့ၢ်ဖီၣ်ဝဲလၢပှၤဆါရ့ၣ်နီၣ်သိဒီးသိလ့ၣ်တီဆှၢဒီးဖံးအီၣ်မၤအီၣ်တစဲးတမွဲးတဖၣ်ဒုဘၣ်နးဝဲလၢကမျၢၢ်လီၤ”အဂ့ၢ်စံးဝဲဒၣ်န့ၣ်လီၤ. ပယီၤသုးကရူၢ်နုၥ်လီၤဖီၣ်တၢ်ဒီတကတီၢ်အပူၤ,ဖီၣ်ချူးဝဲ(DKBA)ဖီၣ်စုကဝဲၤကရူၢ်ကရၢဘၣ်ဒီးလီၢ်ကဝီၤကမျၢၢ်လၢအမၤတၢ်လိၢ်ခိၣ်လိၢ်ကွဲဘၣ်ထွဲတဖၣ်တစှၤန့ၢ်(၈၀)ဂၤဘၣ်အိၣ်ဝဲအဂ့ၢ်,သ့ၣ်ညါဘၣ်ဒ်လီၢ်ကဝီၤကမျၢၢ်တဖၣ်စံးဝဲအသိးန့ၣ်လီၤ. ဒီး(DKBA)ကရူၢ်ကရၢဖိလၢတၢ်ဖီၣ်ချူးဝဲတဖၣ်တခီတၢ်ဆှၢက့ၤဝဲဆူကရူၢ်ကရၢခိၣ်နၢ်ဒိၣ်ထီတဖၣ်အစုပူၤလၢတၢ်ကဟံးထီၣ်က့ၤဝဲအရ့ဒ်အလီၢ်အိၣ်ဝဲအသိးအိၣ်ဝဲဒၣ်ဘၣ်ဆၣ်,မ့မ့ၢ်ကမျၢၢ်လီၢ်ကဝီၤဖိတဖၣ်တခီပယီၤသုးဖီၣ်ကတီၤဃၥ်ဝဲလၢ(၂၇၅)သုးကလၢၤအဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,ကမျၢၢ်လီၢ်ကဝီၤဖိလၢတၢ်ဖီၣ်ချူးဝဲသ့ၣ်တဖၣ်အံၤမ့မ့ၢ်သူၣ်ခ့သးပှၢ်တဖၣ်တၢ်ဘၣ်လဲၤထုးထီၣ်က့ၤဝဲလၢစ့ပယီၤအကလီၢ်(၆၀)ကၠးအိၣ်ဝဲဒၣ်ဘၣ်ဆၣ်,မ့မ့ၢ်သူၣ်စၢ်သးဘီၣ်သ့ၣ်တဖၣ်တခီ,တၢ်ထုးထီၣ်က့ၤဝဲတန့ၢ်ဘၣ်ဒီးတၢ်ဆဲးဖီၣ်ဃၥ်ဝဲတပယူၥ်ဃီအဂ့ၢ်,လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ.
ကဒီသဒၢကီၢ်ဆၢတၢ်မၤကမၣ်ကွီၢ်မ့ၣ်သဲးစးအဂီၢ်,ကၠီၣ်တဲၣ်မၤဃံးထီၣ်ဝဲထံဆၢကီၢ်ဆၢတၢ်ရၤလီၤပနံၥ်တၢ်ကၤ
လါဖ့ၤဘြူၤအါရံၤ ၂၅သီ, ၂၀၂၆နံၣ်, ခ့ၣ်အဲးစံၣ်, ကဒီသဒၢဝဲထံဆၢကီၢ်ဆၢတၢ်မၤကမၣ်ကွီၢ်မ့ၣ်သဲးစးအဂီၢ်,ကၠီၣ်တဲၣ်မၤဃံးထီၣ်ဝဲထံဆၢကီၢ်ဆၢတၢ်ရၤလီၤပနံၥ်တၢ်ကၤအဂ့ၢ်,ပဒိၣ်ကရူၢ်ကရၢတဖၣ်ပၥ်ဂၢၢ်ပၥ်ကျၢၤဝဲကိတိၥ်ဝဲၤကျိၤဘၣ်ထွဲတဖၣ်အတၢ်သိၣ်တၢ်သီတၢ်ဘျၢအက့ၢ်အဂီၤအဂ့ၢ်,ကၠီၣ်တဲၣ်တၢ်ကစီၣ်သန့(BangKokPost)ပၥ်ဖျါထီၣ်ဝဲဒၣ်န့ၣ်လီၤ. အပူၤကွံၥ်တၢ်မၤဝဲတၢ်အိၣ်ဖှိၣ်ရိဖှိၣ်အပူၤလၢတၢ်ကဒီသဒၢဝဲတၢ်မၤကမၣ်ကွီၢ်မ့ၣ်သဲးစးဒီးကမျၢၢ်တၢ်ဘံၣ်တၢ်ဘၢအဂီၢ်ဒ်တၢ်ပၥ်ဂၢၢ်ပၥ်ကျၢၤလီၤဝဲအသိး,ထံဆၢကီၢ်ဆၢဒီးထံနံၤဟီၣ်ကဝီၤဒိၣ်ကျိၤကျဲတဖၣ်အံၤတၢ်ကဘၣ်ဘိးဘၣ်ရၤလီၤဝဲလၢအမ့ၢ်တၢ်ပၥ်ပနီၣ်ဝဲလၢတၢ်ဖီၣ်ပျံၤကၢၤဃၥ်ဟီၣ်ကဝီၤတဖၣ်အဂ့ၢ်,ပၥ်ဖျါဝဲဒၣ်န့ၣ်လီၤ. ကီၢ်ကၠီၣ်တဲၣ်အံၤကမၤဃံးထီၣ်ဝဲကီၢ်ပယီၤကီၢ်ဆၢကီၢ်စဲၣ်(၄)တီၤ,ကၣ်ဘီဒံၣ်ယၣ်ကီၢ်ဆၢကီၢ်စဲၣ်(၇)တီၤခဲလၢၥ်ပၥ်ဖှိၣ်(၁၁)တီၤဒီးဟီၣ်ကဝီၤလီၤဆီဒ်ပီၣ်လဲၣ်ထံနံၤသ့ၣ်တဖၣ်ပၣ်ဃုၥ်ပၣ်ဂီၢ်ဝဲဒၣ်အဂ့ၢ်,ပၥ်ဖျါထီၣ်ဝဲဒၣ်န့ၣ်လီၤ. ဒီးကီၢ်ပယီၤကီၢ်ဆၢဟီၣ်ကဝီၤလၢပၥ်ပနီၣ်ဝဲသ့ၣ်တဖၣ်အံၤမ့ၢ်ဝဲ(Kanchanaburi, Chiang Rai, Tak, Mae Hong Son)ဒီးကၣ်ဘီဒံၣ်ယၣ်ကီၢ်ဆၢဟီၣ်ကဝီၤသ့ၣ်တဖၣ်တခီမ့ၢ်ဝဲ(Chanthaburi, Trat, Buri Ram, Si Sa Ket, Sa Kaeo, Surin, Ubon Ratchathani)သ့ၣ်တဖၣ်အဂ့ၢ်သ့ၣ်ညါဘၣ်န့ၣ်လီၤ. ထံဆၢကီၢ်ဆၢဟီၣ်ကဝီၤလၢတၢ်ကဘၣ်ဘိးဘၣ်ရၤလီၤဝဲတဖၣ်အံၤ,ခီဖျိပနံၥ်တၢ်ဖိတၢ်လံၤတနီၤဒုးအိၣ်ထီၣ်ဝဲဒီကလုၥ်တၢ်ဘံၣ်တၢ်ဘၢတၢ်လီၤဘၣ်ယိၣ်လၢပှၤတဂၤလၢ်လၢ်မ့တမ့ၢ်တၢ်ဘၣ်ဘျူးလၢကရူၢ်ကရၢတဖၣ်အဃိ,တၢ်ကဘၣ်မၤဃံးထီၣ်ဝဲအဂ့ၢ်,တၢ်ဒီသဒၢကိတိၥ်ဝဲၤကျိၤစံးဝဲဒၣ်အဂ့ၢ်,ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲဒၣ်န့ၣ်လီၤ. တကးဒံးဘၣ်,ခီဖျိလၢတၢ်မၤဝဲပနံၥ်တၢ်ကၤအဃိတၢ်စိၥ်ဆှၢမၤခူသူၣ်ဝဲကသံၣ်မူၤဘှီး,အိၤလဲတၢ်လံၣ်အီၣ်လီအီၣ်ကျိၣ်စ့,ကၠါဖၠၣ်ဒီးမ့ၢ်ဝဲဒ်သိးတၢ်ကမၤထီဒါဒီသဒၢဝဲတဖိးမံသဲးစးတၢ်မၤကမၣ်ကွီၢ်မ့ၣ်သဲးစးတဖၣ်အံၤအဂ့ၢ်,ပၥ်ဖျါစ့ၢ်ကီးဝဲဒၣ်န့ၣ်လီၤ. တၢ်မၤဃံးထီၣ်ထံဆၢကီၢ်ဆၢပနံၥ်တၢ်ကၤတၢ်ရၤလီၤစိၥ်ဆှၢအဂီၢ်,ဒီကလုၥ်တၢ်ဘံၣ်တၢ်ဘၢကီၣ်ကးကရၢ( National Security Council)ဆၢတဲၥ်ပၥ်လီၤဝဲလၢအပူၤကွံၥ်(၂၀၂၅)နံၣ်လါအ့ဖြ့ၣ်အခါလံၤလံၤအဂ့ၢ်,သ့ၣ်ညါဘၣ်ဒ်ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲဒၣ်အသိးန့ၣ်လီၤ. ဒ်န့ၣ်အသိး,တၢ်ဘၣ်မၤဃံးထီၣ်ဝဲပနံၥ်တၢ်ရၤလီၤစိၥ်ဆှၢတၢ်ရဲၣ်တၢ်ကျဲၤအံၤခီဖျိခိၣ်ဃၢၤထံကီၢ်တဖၣ်ဒုးအိၣ်ထီၣ်ဝဲဒီခိၣ်ဒီဖျၢၣ်တၢ်မၤကမၣ်ကွီၢ်မ့ၣ်သဲးစးပှၥ်ဘျးစဲ(international criminal networks)အါထီၣ်ဝဲလၢလၢတၢ်ဖံးဖီၣ်မၤအီၣ်တဆီအဃိအဂ့ၢ်,ကၠီၣ်တဲၣ်ပၥ်ဖျါဝဲဒၣ်န့ၣ်လီၤ.
ပယီၤသုးဒီး(KNLA)အဘၢၣ်စၢၤတၢ်ဖ့ၣ်စၢအဃိ တၢ်ကြဲၢ်ဝ့ၢ်ခိၣ်ဝ့ၢ်ဃၢၤသဝီတစှၤန့ၢ်(၂)ဖျၢၣ်ဘၣ်ဃ့ၢ်ထီၣ်
လါဖ့ၤဘြူၤအါရံၤ ၂၄ သီ, ၂၀၂၆ နံၣ်, ခ့ၣ်အဲးစံၣ် ဖဲမဟါလါဖ့ၤဘြူၤအါရံၤ ၂၃ သီ ဂီၤခီအဆၢကတီၢ်န့ၣ် လၢခ့ၣ်အဲၣ်ယူၣ် ဖၣ်အၣ်ကီၢ်ရ့ၣ်(သုးက့ ၇)တၢ်ကြဲၢ်ကီၢ်ဆၣ် တၢ်ကြဲၢ်ဝ့ၢ်ဃၢၤန့ၣ် ပယီၤသုးဒီး (KNLA)အဘၢၣ်စၢၤတၢ်ဖ့ၣ်စၢကဲထီၣ်တဆံးတက့ၢ်အဃိ ဝ့ၢ်ပူၤကမျၢၢ်ဃုၥ်ဒီးဒူသဝီလၢ အိၣ်ဘူးဖဲန့ၣ်တစှၤန့ၢ်န့ၣ်(၂)ဖျၢၣ်ဘၣ်ဃ့ၢ်ထီၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ. ပယီၤသုးလၢအနုၥ်လီၤအိၣ်ဖဲတၢ်ကြဲၢ်ဒီး, ပနွဲၢ်ကျါ, ပညၤပျံသဝီပူၤသ့တဖၣ်အံၤ ဖဲမဟါဂီၤခီ ၁၀း၀၀ ဃၣ်ဃၣ် အဆၢကတီၢ် န့ၣ် ခီဖျိအဝဲသ့ၣ်ဟးထီၣ်ဟူးဂဲၤတလၢဝဲတၢ်ပၥ်ပနီၣ်လီၢ်အဃိ တၢ်ပၢၢ်ဆၢသုးကရူၢ်လဲၤဟ့ၣ်ပလီၢ်ဝဲဒီးဒြိဝံၤ ပယီၤသုးအံၤ က့ၤခးလီၤ ကဒါ ကျိဖးဒိၣ်အဖီခိၣ်တၢ်ကြဲၢ်ဝ့ၢ်ပူၤကမျၢၢ်ဃုၥ်ဒီးသဝီ(၂)ဖျၢၣ်အံၤကမျၢၢ်တဖၣ် ဃ့ၢ်ထီၣ်ဝဲဒၣ်န့ၣ်လီၤ. ဘၣ်ဃးတၢ်ဂ့ၢ်အံၤ တၢ်ကြဲၢ်ကီၢ်ဆၣ်ခိၣ် ပဒိၣ်စီၤပလဲဒံၤဝါ စံးဝဲလၢ“မဟါတနံၤန့ၣ်လၢတၢ်အိၣ်သးတခါအဖီခိၣ်န့ၣ်အိၣ်ဒၣ်ခးစိ လီၤသးလီၤ, တမ့ၢ်တၢ်ဒုးကဲထီၣ်ဖးဒိၣ်ဘၣ်.လၢတၢ်ကဲထီၣ်သးအံၤအဃိ တၢ်ကြဲၢ်,ပနွဲၢ်ကျါ,ပညၤပျံသဝီတဖၣ်အံၤ အဝဲသ့ၣ်ပျံၤ တၢ်ဘျီဟးဃ့ၢ်အိၣ်ဝဲန့ၣ်လီၤ.အနီၢ်ကီၢ်န့ၣ်ပှၤခးစိတၢ်န့ၣ်ပယီၤလီၤ.ပှၤမၤသ့ၣ်ညါအဝဲသ့ၣ်ပှၤလဲၤတ့ၢ်လီၤဒီးဒြိဒ်န့ၣ်လီၤမီၤ.တၢ်အဝဲသ့ၣ်န့ၣ်လဲၤတလၢတၢ်ပၥ်ပနီၣ်အဃိကမ့ၢ်ဒၣ်ပှၤခးသ့ၣ်ညါအီၤဒ်န့ၣ်လီၤ.” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤ န့ၣ်လီၤ. ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် တၢ်ကြဲၢ်ဝ့ၢ်ဃုၥ်ဒီး ပနွဲၢ်ကျါ, ပညၤပျံကမျၢၢ်လၢအဃ့ၢ်ထီၣ် တဖၣ်တနီၤန့ၣ် လဲၤစံၣ်အိၣ်ဝဲ လၢဖၣ်အၣ်အိၣ်အသိးတနီၤန့ၣ်လဲၤဃ့ၢ်အိၣ်ဝဲလၢတၢ်လီၢ်အဘံၣ်အဘၢလီၢ်အိၣ်ဝဲဒၣ်န့ၣ်လီၤ. အပူၤကွံၥ်စးထီၣ်ဖဲလါယနူၤအါရံၤထီၣ်တချုးတၢ်မၤဒံးတၢ်ဃုထၢအကူၥ်-၃ ဘၣ်အခါ ပယီၤသုးသ့ၣ်တဖၣ်အံၤဟ့ၣ်ထီၣ် တၢ်ဂ့ၢ် လၢတၢ်ဖးဒၢတၢ်ဘံၣ်တၢ်ဘၢအဂီၢ်ဝံၤဟဲထီၣ်ဒီးနုၥ်လီၤအိၣ်ဟံန့ၢ်အလီၢ်အကျဲလၢဒူသဝီတၢ်လီၢ်သ့ၣ်တဖၣ်အံၤအပူၤဒီး ခဲအံၤတၢ်ဃု ထၢဝံၤလံဘၣ် တက့ၤလီၤဒံးဘၣ်အမဲၥ်ညါဆီတလဲအသုးကအိၣ်လၢ(၂)ဘျီ(၃)ဘျီလံအဂ့ၢ်န့ၣ် ပဒိၣ်စီၤပလဲဒံၤဝါ စံးဝဲန့ၣ်လီၤ. တကးဒံးဘၣ်ပယီၤသုးလၢအအိၣ်ဖဲကြုၢ်တု,ပနွဲၢ်ကျါဒီးပညၤပျံသဝီပူၤအံၤတၢ်တယးကွၢ်ဝဲလၢအသုးဂံၢ်ဘါကအိၣ်လၢ(၃၀၀)ခိၣ်ဃၢၤ...
သုးမီၤစိရိၤအပီၣ်(၅၀၀)မ့ၣ်ပိၢ်အဃိ ဘျံးဒဝဲၢ်ကီၢ်ရ့ၣ်ပူၤကမျၢၢ်သံ(၁)ဂၤဒီးဘၣ်ဒိ(၁)ဂၤ
လါဖ့ၤဘြူၤအါရံၤ ၂၄ သီ, ၂၀၂၆ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒဝဲၢ်ကီၢ်ရ့ၣ်(သုးက့ ၄)ကစၢၢ်ဒိၣ်ကီၢ်ဆၣ်အပူၤ ခီဖျိလၢသုးမီၤစိရိၤကဘီယူၤ အပီၣ်(၅၀၀)မ့ၣ်ပိၢ်အံၤအဃိ ကမျၢၢ်သံတဂၤဒီးဘၣ်ဒိဝဲ(၁)ဂၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲဖဲတနံၤအံၤ န့ၣ်လီၤ. ဖဲမဟါလါဖ့ၤဘြူၤအါရံၤ ၂၃ သီ မုၢ်ဃ့ၢ်လီၤ ၂း၃၀ ဃၣ်ဃၣ်အဆၢကတီၢ်န့ၣ် သုးမီၤစိရိၤအ(Jet Fighter)ကဘီယူၤ လဲၤတ့ၢ်လီၤ ဝဲပီၣ်(၅၀၀) မ့ၣ်ပိၢ် ၁ ဖျၢၣ် လီၤတဲၥ်ပိၢ်ဖးထီၣ်ဝဲလၢစိၤစ့ၤဖၠါ(စုံစင်ဖျား)သဝီပူၤန့ၣ်လီၤ. လၢတၢ်န့ၣ်အဃိလၢကဘီယူၤလဲၤတ့ၢ်လီၤမ့ၣ်ပိၢ်ဘျီဝဲအံၤ ကမျၢၢ်ပိၥ်မုၣ်သံ(၁)ဂၤဒီးဘၣ်ဒိဘၣ်ထံး(၁)ဂၤအမဲၥ်ညါ ဟံၣ်တၢ်သူၣ် ထီၣ်ဟးဂီၤဃုၥ်စ့ၢ်ကီးဝဲ(၄)ဖျၢၣ်အဂ့ၢ်န့ၣ် ဘျံးဒဝဲၢ်ကီၢ်ရ့ၣ်လံၥ်တၢ်ပၥ်ဖျါပူၤပၥ်ဖျါဝဲန့ၣ်လီၤ. ဒ်န့ၣ်အသိးကစၢၢ်ဒိၣ်ကီၢ်ဆၣ်လၢသုးမီၤစိရိၤကဘီယူၤလဲၤတ့ၢ်လီၤမ့ၣ်ပိၢ်ဖဲမဟါအံၤန့ၣ် အပူၤကွံၥ်တလါအံၤထီၣ် ၄ သီ ဂီၤခီအဆၢ ကတီၢ်န့ၣ်စ့ၢ်ကီး (Jet Fighter)ကဘီယူၤလဲၤတ့ၢ်လီၤဝဲပီၣ်(၃၀၀)မ့ၣ်ပိၢ် ၂ ဖျၢၣ်ဒံးလၢ ဟ့ၤဒါ(ဟိန္ဒား)သဝီ သီခါဖၠၣ်ကရၢၢ်ပူၤ အဃိ ဖဲန့ၣ်သီခါဘၣ်ဒိ(၁)ပါ ဒီးသီခါဖၠၣ်တၢ်သူၣ်ထီၣ်လီၤပှီၢ်ဟးဂူၥ်ဟးဂီၤဝဲဒၣ်ဒိၣ်ဒိၣ်မုၢ်မုၢ်ကဲထီၣ်ဒံးဝဲန့ၣ်လီၤ. တကးဒံးဘၣ်တၢ်ကဲထီၣ်သးဖဲန့ၣ်ဝံၤ ဖဲအပူၤကွံၥ်တလါအံၤလါဖ့ၤဘြူၤအါရံၤ ၁၃ သီအနံၤစ့ၢ်ကီး လၢတနီသရံၣ်ကီၢ်ဆၣ်အပူၤ ပယီၤသုးအံၤလၢတၢ်ဂ့ၢ်တအိၣ်နီမံၤနုၥ်လီၤဒွဲၣ်အူအီၣ်ဝဲလဲၤသ့ၣ်(လယ်သစ်)သဝီပူၤဟံၣ် အဖျၢၣ်(၁၀၀)ဘျဲၣ်ကဲထီၣ်ဒံးဝဲဒၣ်န့ၣ် လီၤ. ဘျံးဒဝဲၢ်ကီၢ်ရ့ၣ်ဟီၣ်ကဝီၤအပူၤ စးထီၣ်ဖဲ(၂၀၂၅)ပယီၤသုးကလၢၤလၢအိၣ်ဆီလီၤသးဖဲ ထံခံဒီးမီတီၤ(မောတောင်)ကီၢ်ဆၢ တၢ်ကူၣ် လဲၤမၤကၤကျဲ အံၤတဖၣ် ခီဖျိဟီၣ်ကဝီၤ(KNLA)သုးပၥ်ဖှိၣ်ထီၣ်န့ၢ်ဒိၣ်စိဝဲအဃိ ပယီၤသုးအံၤလၢကဆှၢထီၣ်သုးဂံၢ်ဘါအဂီၢ်...
(OKRSO)ကရူၢ်ကရၢမၤဝဲလီၢ်ခၢၣ်သးကမံးတံၥ်ခိၣ်နၢ်သီတၢ်ဃုထၢဝံၤဝဲ
လါဖ့ၤဘြူၤအါရံၤ ၂၃သီ, ၂၀၂၆နံၣ်, ခ့ၣ်အဲးစံၣ်, ၦၤဟူးဂဲၤတၢ်လၢၦၤဂ့ၢ်၀ီတၢ်ဖံးတၢ်မၤကညီဘၣ်ကီဘၣ်ခဲဒီးတၢ်အံးထွဲကွၢ်ထွဲကရၢ(OKRSO)လၢအိၣ်ဆီလီၤသးဖဲ ကီၢ်ကၠီၣ်တဲၣ်ဘီကီးဝ့ၢ်တဖုအံၤမဟါလါဖ့ၤဘြူၤအါရံၤ(၂၂)သီအနံၤအပူၤမၤဝဲလီၢ်ခၢၣ်သးကမံးတံၥ်ခိၣ်နၢ်သီတၢ်ဃုထၢဝံၤဝဲအဂ့ၢ်,ပၥ်ဖျါထီၣ်ဝဲဒၣ်လၢအစိၤရှၢၣ်မံးဒံးယၢၣ်လံၥ်တၢ်ဘိးဘၣ်ရၤလီၤအပူၤန့ၣ်လီၤ. (OKRSO)ကရူၢ်ကရၢအံၤဒ်ပၥ်လီၤဝဲတၢ်တိၤကျဲၤအိၣ်ဝဲအသိး(၂)နံၣ်တဘျီမၤဝဲတၢ်ဃုထၢခိၣ်နၢ်သီတဖၣ်အိၣ်ဝဲအဂ့ၢ်သ့ၣ်ညါဘၣ်န့ၣ်လီၤ. ဒီးတၢ်ဃုထၢခိၣ်နၢ်သီအပူၤကရၢခိၣ်အလီၢ်တၢ်ပၥ်လီၤက့ၤဝဲလၢ(စီၤသီၣ်ထီ)ဒီးမူဒါလၢအဂၤတဖၣ်အဂီၢ်တၢ်ဃုထၢထီၣ်စ့ၢ်ကီးဝဲကရူၢ်ကရၢလၢအဂၤ(၅)ဂၤစ့ၢ်ကီးအသိးကရူၢ်ကရၢတၢ်ဖံးတၢ်မၤအပူၤနုၥ်လီၤဒိးဃုထၢဝဲအသးဒီးတၢ်ဃုထၢထီၣ်အီၤလၢကရၢခိၣ်အလီၢ်အဖီခိၣ်,စီၤသီၣ်ထီစံးဝဲဒ်အံၤန့ၣ်လီၤ. “တၢ်ဃုထၢထီၣ်ယၤအဖီခိၣ်,ယသးခုဒီးသးဆံးတကဘျီဃီလီၤ.ခီၣ်ထံးဒုယတဆိကမိၣ်လၢပှၤကဃုထၢယၤဘၣ်.အပူၤကွံၥ်ခီယမၤတ့ၢ်ဒ်ကရၢဖိတဂၤအသိးလီၤ.တၢ်ဃုထၢထီၣ်ယၤအဃိမူဒါအိၣ်အါထီၣ်ဒိၣ်ထီၣ်ဝဲန့ၣ်လီၤ.အဃိဒ်မူဒါလီၤဘၣ်ယၤအသိးယကဂုၢ်ကျဲးစၢးလၢအဂ့ၤကတၢၢ်လီၤ.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,ဒ်အပူၤကွံၥ်နံၣ်တၢ်မၤရဲၣ်ကျဲၤအိၣ်ဝဲအသိးကဆဲးဟူးဂဲၤဝဲဒီးကမၤဂ့ၤထီၣ်ဝဲစ့တၢ်ပၥ်ကီၤတၢ်ရဲၣ်တၢ်ကျဲၤအိၣ်ဝဲအဂ့ၢ်,စံးအါထီၣ်ဝဲဒၣ်န့ၣ်လီၤ. (OKRSO)အံၤဘၣ်တၢ်ဒုးအိၣ်ထီၣ်ဝဲအီၤလၢ(၁၉၉၂)နံၣ်အခါလံၤလံၤဒီးအိၣ်ဆီလီၤအသးလၢကီၢ်ကၠီၣ်တဲၣ်ဝ့ၢ်ဘီကီးအပူၤအဂ့ၢ်,သ့ၣ်ညါဘၣ်န့ၣ်လီၤ. ကရူၢ်ကရၢအံၤဟူးဂဲၤဝဲလၢကီၢ်ကၠီၣ်တဲၣ်အပူၤကညီဖိလၢအဘၣ်ကီဘၣ်ခဲအဂီၢ်ဒီးဂ့ၢ်ဝီအူ,တၢ်ဘၣ်ဒိဘၣ်ထံး,တၢ်သံတၢ်ပှၢ်,တဖၣ်အဂီၢ်အသိးသိၣ်လိနဲၣ်ယုၤဝဲကညီသးစၢ်တဖၣ်လၢကညီပှိၢ်လံၥ်လဲၢ်ကျိၥ်,ဂံၢ်ခီၣ်ထံးကိၤလၤဝါကျိၥ်ဒီးခီၣ်ဖၠူထၢၣ်တၢ်သ့တၢ်ဘၣ်တဖၣ်အမဲၥ်ညါကတီၤဃၥ်ဝဲကညီလုၢ်လၢ်တၢ်ဆဲးတၢ်လၤ,တၢ်ဂဲၤကလံၣ်သ့ၣ်တဖၣ်အဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,ဒ်အလီၢ်အိၣ်ဝဲအသိးဆီၣ်ထွဲမၤစၢၤဝဲထံဆၢကီၢ်ဆၢပှၤဃ့ၢ်တၢ်ဒုးလီၢ်အိၣ်ကဒုဖိတဖၣ်တဖၣ်ဒီးဂ့ၢ်ဝီအူပှၤတူၢ်ဘၣ်န့ဆၢၣ်တၢ်တတၢၤတနါဂ့ၢ်ဝီအသိးကိးနံၣ်ဒဲးတီခိၣ်ရိၢ်မၤဝဲကညီနံၣ်ထီၣ်သီ,ဒီးလါခူးကံၢ်စုမူးတဖၣ်လၢကညီဖိလၢတုၤအိၣ်ထံဂုၤကီၢ်ဂၤတဖၣ်အဂီၢ်စ့ၢ်ကီးအဂ့ၢ်,သ့ၣ်ညါဘၣ်န့ၣ်လီၤ.