ပယီၤသုးလၢနုၥ်လီၤဟူးဂဲၤကၠဲးထိၣ်ကီၢ်ဆၣ်ပူၤတဖၣ်ဒီး(KNLA)သုးပၥ်ဖှိၣ်အဘၢၣ်စၢၤတၢ်ဖ့ၣ်စၢဆဲးကဲထီၣ်ဝဲ
လါဖ့ၤဘြူၤအါရံၤ ၂၃ သီ, ၂၀၂၆ နံၣ်, ခ့ၣ်အဲးစံၣ် ပယီၤသုးကျိၤလၢအနုၥ်လီၤဟူးဂဲၤလၢခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်ဒူသဝီအပူၤတဖၣ်အံၤဒီး ဟီၣ်ကဝီၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်အဘၢၣ်စၢၤ တၢ်ဖ့ၣ်စၢဆဲးကဲထီၣ်ဝဲကိးမုၢ်နံၤဒဲးဃၣ်ဃၣ် အဂ့ၢ်န့ၣ် သ့ၣ်ညါဘၣ်လၢ တၢ်ပၢၢ်ဆၢကရူၢ်ကရၢအအိၣ်န့ၣ်လီၤ. ကၠဲးထိၣ်ကီၢ်ဆၣ် ခရၢၢ်ကရူၢ်,ဝီၢ်က့ကရူၢ်ဒီးအံလူၢ်ကရူၢ်ဒူသဝီတဖၣ်အပူၤ စးထီၣ်ဖဲတလါအံၤလါဖ့ၤဘြူၤအါရံၤထီၣ်အံၤန့ၣ် ပယီၤသုးနီၣ်ဂံၢ်လၢ(၄၀၀)ဃၣ်ဃၣ်နုၥ်လီၤဟူးဂဲၤကဒီးဝဲဒီးတုၤလၢခဲအံၤတဟးထီၣ်ဒံးဘၣ်မ့မ့ၢ်တခီရၤလီၤအသးဟဲအါထီၣ်ဝဲ အဂ့ၢ်န့ၣ် သ့ၣ်ညါဘၣ်န့ၣ်လီၤ. ဖဲပယီၤသုးနုၥ်လီၤဟူးဂဲၤလၢဟီၣ်ကဝီၤပူၤသ့ၣ်တဖၣ်အံၤအခါ ဟီၣ်ကဝီၤ(KNLA)သုးရ့ၣ်-၃ အပှၤဒီး (PDF)သုး ကရူၢ်သ့ၣ်တဖၣ် အံၤပၥ်ဖှိၣ်ထီၣ်သးလဲၤခးစဲးပြဲးဝဲလၢကျဲအဘိဘိအဃိ ဒုးယၤတၢ်ဖ့ၣ်စၢဆဲးကဲထီၣ်ဝဲလၢခံခီခံကပၤအဘၢၣ်စၢၤအဂ့ၢ်န့ၣ် တၢ်ပၢၢ်ဆၢသုးကရူၢ်အပှၤတဂၤ စံးဝဲန့ၣ်လီၤ. “ပှၤလဲၤခးစဲးပြဲးအီၤကိးမုၢ်နံၤဒဲးလီၤ.ဖဲမဟါန့ၣ်ပှၤလဲၤခးအီၤ(၆)ထံၣ်န့ၣ်အဝဲသ့ၣ်က့ၤလီၤကဒါကျိဖးဒိၣ်(၃)ဘျီ.ဘၣ်ဆၣ်အဝဲသ့ၣ်န့ၣ်အိၣ်ဖျါသးတဘူၣ်ဘၣ်,မ့အိၣ်ဖျါအသးပှၤမ့ထံၣ်အီၤန့ၣ်ပှၤခးအီၤ.လၢထံပူၤပျီတကပၤန့ၣ်ပပှၤလဲၤတ့ၢ်လီၤဝဲဒီးဒြိအိၣ်.အဝဲသ့ၣ် က့ၤခးလီၤကဒါကျိဖးဒိၣ်.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤ န့ၣ်လီၤ. ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် လီၤဆီဒၣ်တၢ်ပယီၤသုးလၢအနုၥ်လီၤဟူးဂဲၤဖဲဝီၢ်က့ကရူၢ်ဒီးခရၢၢ်ကရူၢ်အပူၤခံဒူၣ်အံၤ အသုးဂံၢ်ဘါကအိၣ်ဝဲ(၃၀၀)ခိၣ်ဃၢၤဒီး ခဲအံၤအဝဲသ့ၣ်အိၣ်ဆီလီၤအသးလၢထံပူၤပျီ(ကျောက်ရေတွင်း) သီခါဖၠၣ်ဒီး ဝီၢ်က့သီခါဖၠၣ် န့ၣ်လီၤ. ဒ်န့ၣ်အသိးပယီၤသုးသ့ၣ်တဖၣ်အံၤတဘျီလၢ်လၢ်ဖဲတၢ်လဲၤခးအဝဲသ့ၣ်အခါန့ၣ် ပညိၣ်က့ၤခးလီၤကဒါကျိဖးဒိၣ်ဆူဒူသဝီပူၤအိၣ်ဝဲ အဃိ ကမျၢၢ်တၢ်ဘၣ်ဒိဘၣ်ထံးမ့တအိၣ်ဘၣ်ဆၣ်ဟံၣ်ဃီတၢ်သူၣ်ဘၣ်ဒိဘၣ်ထံးအိၣ်ဝဲအဂ့ၢ်န့ၣ် ဒူသဝီပှၤဘၣ်မူဘၣ်ဒါစံးဝဲအသိး သ့ၣ်ညါဘၣ်န့ၣ်လီၤ. ဝီၢ်က့ကရူၢ်ဒီးခရၢၢ်ကရူၢ်အမဲၥ်ညါပယီၤသုးလၢအနုၥ်လီၤဟူးဂဲၤဖဲအံလူၢ်ကရူၢ် အပူၤလၢအပှၤနီၣ်ဂံၢ်ကအိၣ်(၁၀၀)ဘျဲၣ်ခိၣ်ဃၢၤအံၤ စ့ၢ်ကီး တဟးထီၣ်ဒံးအိၣ်ဆီလီၤဟူးဂဲၤဒံးဝဲဖဲအံလူၢ်ဖိသဝီ,တမံၤဂီၤ(သပြေနီ),ဝ့ပၠၤ(ဝင်းပျံ)သဝီတဖၣ်အံၤအပူၤ အဂ့ၢ်န့ၣ် တၢ်ပၢၢ်ဆၢကရူၢ်တကပၤ စံးဝဲန့ၣ်လီၤ. ကၠဲးထိၣ်ကီၢ်ဆၣ်ပူၤစးထီၣ်ဖဲတလါအံၤပယီၤသုးနုၥ်လီၤဟူးဂဲၤဘျီဝဲအံၤန့ၣ် အံလူၢ်ကရူၢ်,တကွံပူၤကရူၢ်,ခရၢၢ်ကရူၢ်ဒီး ဝီၢ်က့ကရူၢ် ကရူၢ်(၄)ဘ့ၣ်အံၤ အပူၤ ဒူသဝီပၥ်ဖှိၣ်(၁၉)ဖျၢၣ် ကမျၢၢ်ပှၤနီၣ်ဂံၢ် (၁၃၀၀၀)ဃၣ်ဃၣ် ဘၣ်ဃ့ၢ်ထီၣ်ဝဲဒီး တုၤလၢခဲအံၤအဝဲသ့ၣ်က့ၤ ဟံၣ်က့ၤဃီ တဘူၣ်ဒံးဘၣ်အသိး လၢအဝဲသ့ၣ်အဂီၢ်လိၣ်ဘၣ်ဒံး...
သုးမီၤစိရိၤသုးဖိသီဟဲက့ၤဟ့ၣ်လီၤကဒီးအသး(၁၀)ဂၤလၢလၢၢ်ဒိၣ်ကီၢ်ဆၣ်ပူၤ
လါဖ့ၤဘြူၤအါရံၤ ၂၁ သီ, ၂၀၂၆ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်အပူၤ သုးမီၤစိရိၤအသုးဖိသီဟဲက့ၤဟ့ၣ်လီၤကဒီးသး ၁၀ ဂၤ အဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲဖဲတနံၤအံၤလါဖ့ၤဘြူၤအါရံၤ ၂၁ သီ အနံၤ န့ၣ်လီၤ. ဖဲလါဖ့ၤဘြူၤအါရံၤ ၁၇ သီအနံၤန့ၣ် သုးမီၤစိရိၤအသုးဖိသီလၢအမ့ၢ် မီၤခၠ့ၣ်ဝ့ဖၠိ(၂၄)နံၣ်, ခၠ့ၣ်မီၤမီၤ (၂၇)နံၣ်, သဲၣ်လွ့ၤအူ (၂၈)နံၣ်, သဲၣ်လွ့ၤစိ(၃၄)နံၣ် ၄ ဂၤအံၤ ဟဲက့ၤဟ့ၣ်လီၤအသးဆူဟီၣ်ကဝီၤကညီ ဒီကလုၥ်ဂၢၤသးကရၢ(KNDO) သုးရ့ၣ်-၃ အအိၣ်န့ၣ်လီၤ. သုးဖိသီလၢအဟဲက့ၤဟ့ၣ်လီၤသး(၄)ဂၤအံၤမ့ၢ်ပှၤသ့ၣ်တဖၣ်လၢဖျိထီၣ်ဝဲ(၁၃)ဝီဒီး(၁၅)ဝီသုးတၢ်မၤလိသ့ၣ်တဖၣ်ဒီး အဝဲသ့ၣ်အံၤ ဖဲအလီၤဘၣ်မူဒါလၢခီၣ်ချ့သုးရ့ၣ်(ခမရ-၄၃၉)သုးရ့ၣ်အံၤအခါဃ့ၢ်ဖျိးထီၣ်ဝံၤဘၣ်ဟဲက့ၤပၥ်လီၤစုကဝဲၤဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ. ဒ်န့ၣ်အသိးသုးဖိသီ(၄)ဂၤအံၤအမဲၥ်ညါ ဖဲမဟါလါဖ့ၤဘြူၤအါရံၤ ၂၀ သီအနံၤစ့ၢ်ကီး သုးဖိသီလၢအဖျိထီၣ်ဝဲ(၁၆)ဝီသုးတၢ်မၤလိ အံၤ(၆)ဂၤ ဖဲအဝဲသ့ၣ်လီၤမူဒါဖဲခီၣ်ချ့သုးရ့ၣ်(ခမရ-၅၉၈)သုးရ့ၣ်အဆၢကတီၢ်ဃ့ၢ်ဖျိးထီၣ်ဟဲက့ၤပၥ်လီၤစုကဝဲၤ လၢကညီဒီကလုၥ် တၢ်ထူၣ်ဖျဲး သုးမုၢ်ဒိၣ်(KNLA) သုးရ့ၣ်-၉ အအိၣ်စ့ၢ်ကီးန့ၣ်လီၤ. သုးဖိသီလၢအဟဲက့ၤပၥ်လီၤစုကဝဲၤလၢသုးရ့ၣ်-၉ အအိၣ်(၆)ဂၤအံၤမ့ၢ်ဝဲ တ့ၤမီၤမၠၣ်(၃၀)နံၣ်, ကၠီၤလ့ထဲၣ်(၃၁)နံၣ်, သါထ့အီၤ(၃၂)နံၣ်, ဖိသါ(၃၂)နံၣ်, ယဲကၠီၤသူၤဝ့(၃၄)နံၣ် ဒီး မၠိဝ့စီၣ်(၄၈)နံၣ် သ့ၣ်တဖၣ်အံၤန့ၣ်လီၤ. ဒ်ခ့ၣ်အဲၣ်ယူၣ်စံးဝဲအသိးန့ၣ်...
တနံၤဃီအတီၢ်ပူၤ(KNLA)သိၣ်ဒူစိထီၣ်မၤန့ၢ်ကွံၥ်ဝဲပယီၤသုးတၢ်လီၢ်(၂)တီၤလၢပလီကီၢ်ဆၣ်
လါဖ့ၤဘြူၤအါရံၤ ၂၀သီ, ၂၀၂၆နံၣ်, ခ့ၣ်အဲးစံၣ်, တနီသရံးကီၢ်ခီဒိၣ်,ပလီကီၢ်ဆၣ်ဟီၣ်ကဝီၤအပူၤတနံၤဃီအတီၢ်ပူၤသုးက့(၄)(KNLA)သိၣ်ဒူစိကရူၢ်ကရၢတဖၣ်ထီၣ်မၤန့ၢ်ကွံၥ်ဝဲပယီၤသုးတၢ်လီၢ်(၂)တီၤအဂ့ၢ်,(KNLA)သုးက့(၄)သိၣ်ဒူစိထုးထီၣ်ပၥ်ဖျါဝဲဒၣ်ဖဲမဟါလါဖ့ၤဘြူၤအါ၇ံၤ(၁၉)သီအနံၤန့ၣ်လီၤ. အပူၤကွံၥ်လါဖ့ၤဘြူၤအါရံၤ(၁၇)သီအနံၤအပူၤ,(KNLA)သုးက့(၄)သိၣ်ဒူစိကရူၢ်ကရၢဒီးဒဝဲၢ်ဒီကလုၥ်တၢ်ထူၣ်ဖျဲးသုးမုၢ်ဒိၣ်(DNLA)ပၥ်ဖှိၣ်သးထီၣ်မၤန့ၢ်ကွံၥ်ဝဲပယီၤသုးကလၢၤလၢအိၣ်တီၤခီလီသဝီပူၤတဖျၢၣ်ဒီးတီၤယၤကါသဝီပူၤတဖျၢၣ်အဂ့ၢ်,သ့ၣ်ညါဘၣ်န့ၣ်လီၤ. တီၤခီလီသဝီပယီၤသုးကလၢၤအံၤပယီၤသုးဒီးအကမျၢၢ်သုးဂံၢ်ဘါဆီလီၤသးပၥ်ဖှိၣ်ကအိၣ်ဝဲ(၂၇)ဂၤဒီးမ့မ့ၢ်လၢတီၤယၤကါသဝီပယီၤကၤက့သုးကလၢၤတခီဂံၢ်ဘါခဲလၢၥ်အိၣ်ဝဲ(၄၀)ဃၣ်ဃၣ်အဂ့ၢ်,သ့ၣ်ညါဘၣ်ဒ်တၢ်ပၥ်ဖျါအိၣ်ဝဲအသိး န့ၣ်လီၤ. တၢ်ထီၣ်ဒုးဝဲပယီၤသုးတၢ်လီၢ်တၢ်ကျဲၤပူၤသိၣ်ဒူစိကရူၢ်ကရၢတဖၣ်အံၤသူဝဲဒြိ,(8kg)မ့ၢ်ပိၢ်ဒီးသုးကရူၢ်တကပၤသူဝဲကဘီယူၤဂျဲးဖဲးတၢၣ်,ထံသုးကျိဖးဒိၣ်,ဒီးပွဲၣ်ဖဲၣ်သိလ့ၣ်စ့ၣ်ကူၤတဖၣ်အိၣ်ဝဲဘၣ်ဆၣ်,ဘၣ်ဃ့ၢ်ထီၣ်ကွံၥ်ဝဲအဂ့ၢ်ပၥ်ဖျါဝဲစ့ၢ်ကီးန့ၣ်လီၤ. တကးဒံးဘၣ်,တၢ်ဒုးဒီတကတီၢ်အပူၤထီၣ်မၤန့ၢ်ဝဲပယီၤသုး(၆၀မမ)တၤဝ့ၤမ့ၢ်ပိၢ်(၁၀)ဖျၢၣ်ဒီးအံၤတၤဂၤ(၂)ဖျၢၣ်အသိးသိၣ်ဒူစိတကပၤတၢ်ဘၣ်ဒိဘၣ်ထံးတအိၣ်ဝဲနီတဂၤဘၣ်ဒီးမ့မ့ၢ်ပယီၤသုးတကပၤတခီဘၣ်ဒိဘၣ်ထံးဝဲနးနး(၃)ဂၤဒီးသံကွံၥ်ဝဲ(၆)ဂၤအဂ့ၢ်,သ့ၣ်ညါဘၣ်န့ၣ်လီၤ. (KNLA)သုးက့(၄)သိၣ်ဒူစိကရူၢ်ကရၢအံၤထီဒါဝဲသုးမီၤစိရိၤဒီးဒ်သိးတၢ်ပၢၢ်ဆၢကတုၤဆူဖီတၢၣ်အဂီၢ်မၤဝဲတၢ်ထီၣ်ဒုးပယီၤသုးကလၢၤလၢတနီသရံးကီၣ်ဆၣ်ဟီၣ်ကဝီၤပူၤဒီးတိၤလီၤပၥ်ဝဲလၢကဆဲးမၤဝဲတပယူၥ်ဃီအဂ့ၢ်ပၥ်ဖျါဝဲဒၣ်န့ၣ်လီၤ. ဒ်န့ၣ်အသိး,တၢ်ထီၣ်ဒုးတဘျီလၢ်လၢ်အပူၤကမျၢၢ်လီၢ်ကဝီၤဖိတဖၣ်သုတဘၣ်ဒိဘၣ်ထံးတဂ့ၤအဂီၢ်,ဟ့ၣ်ပလီၢ်ပၥ်ဖျါဝဲလၢတၢ်တဘၣ်အိၣ်ဘူးဒီးပယီၤသုးကရူၢ်သုးကရၢအသုးကလၢၤတဖၣ်ဘၣ်အဂ့ၢ်,သ့ၣ်ညါဘၣ်န့ၣ်လီၤ.
(KNPF)ဖီၣ်ချုးဖိသၣ်ဆါကသံၣ်မူၤဘှီး(၂)ဂၤဖဲလၢၢ်ဒိၣ်ကီၢ်ဆၣ်
လါဖ့ၤဘြူၤအါရံၤ ၂၀သီ, ၂၀၂၆နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၃)ချၢၣ်လွံၢ်ထူၣ်ကီၣ်ရ့ၣ်လၢၢ်ဒိၣ်ကီၢ်ဆၣ်ဟီၣ်ကဝီၤအပူၤ,ကညီဒီကလုၥ်ပၢၤကီၢ်သုး Karen National Police Force (KNPF)ဖီၣ်ချူးဝဲဖိသၣ်လၢအမၤဆါဝဲကသံၣ်မူၤဘှီး(၂)ဂၤအဂ့ၢ်, ချၢၣ်လွံၢ်ထူၣ်ကီၢ်ရ့ၣ်ထုးထီၣ်ပၥ်ဖျါဝဲဒၣ်န့ၣ်လီၤ. အပူၤကွံၥ်လါဖ့ၤဘြူၤအါရံၤ(၁၆)သီအနံၤအပူၤ,(KNPF)ဖီၣ်ချူးဝဲဖိသၣ်(၁၆)နံၣ်ဒီး(၁၃)နံၣ်(၂)ဂၤလၢအစိၥ်ဆါဝဲကသံၣ်မူၤဘှီး(WY)အဖျၢၣ်(၁၀၀)ဃၣ်ဃၣ်သ့ၣ်တဖၣ်အဂ့ၢ်,ချၢၣ်လွံၢ်ထူၣ်ကီၢ်ရ့ၣ်ထုးထီၣ်ပၥ်ဖျါဝဲဒၣ်ဖဲတနံၤအံၤလါဖ့ၤဘြူၤအါရံၤ(၂၀)သီအနံၤန့ၣ်လီၤ. ဒီးဖိသၣ်လၢတၢ်ဖီၣ်ချူးဝဲ(၂)ဂၤအံၤအိၣ်ဆိးဝဲဒၣ်လၢကၠီးတခါဝ့ၢ်ဖၠါဟီၣ်ကဝီၤအပူၤအဂ့ၢ်,သ့ၣ်ညါဘၣ်ဒ်တၢ်သမံသမိးတ့ၢ်အဝဲသ့ၣ်တဖၣ်အသိးအဂ့ၢ်,ပၥ်ဖျါဝဲဒၣ်န့ၣ်လီၤ. လၢန့ၣ်အမဲၥ်ညါ,ဖိသၣ်လၢတၢ်ဖီၣ်ချူးဝဲ(၂)ဂၤအံၤ,ခီဖျိလၢပယီၤသုးကရူၢ်အတၢ်မၢလီၤတဆီဟဲဃီၤဝဲဆူလၢၢ်ဒိၣ်ကီၢ်ဆၣ်ဟီၣ်ကဝီၤအပူၤလၢတၢ်ကရၤလီၤဒီးဆါဝဲကသံၣ်မူၤဘှီးတဖၣ်အံၤအဂ့ၢ်,ပၥ်ဖျါစ့ၢ်ကီးဝဲဒၣ်န့ၣ်လီၤ. ဒ်သိးတၢ်ပၢၢ်ဆၢအဂံၢ်ဘါကလီၤစှၤကွံၥ်ဝဲအဂီၢ်သုးကရူၢ်အံၤစူးကါဝဲသုးဂ့ၢ်ဝီတၢ်ရဲၣ်တၢ်ကျဲၤတပယူၥ်ဃီတကးဘၣ်,ကွဲန့ၢ်လွဲန့ၢ်ဝဲလၢတၢ်ဘၣ်ဘျူးအဂီၢ်မ့ၢ်ဂ့ၤ,ဘိးဘၣ်ရၤလီၤဝဲတၢ်ကစီၣ်လၢအမၤဟးဂီၤတၢ်ပၢၢ်ဆၢအသူးသ့ၣ်လၤကပီၤအဂီၢ်မ့ၢ်ဂ့ၤ,မၤဟးဂီၤဝဲကမျၢၢ်တၢ်သကဲၥ်ပဝၥ်တဖၣ်လၢကျဲအဘိဘိတစိၤဘၣ်တစိၤအိၣ်ဝဲအဂ့ၢ်,ခ့ၣ်အဲၣ်ယူၣ်ပၥ်ဖျါဝဲန့ၣ်လီၤ. တကးဒံးဘၣ်,ပယီၤသုးကရူၢ်အံၤကလုၥ်ဒူၣ်ဖီၣ်စုကဝဲၤဟီၣ်ကဝီၤတဖၣ်အပူၤမၤဝဲတၢ်ရၤလီၤဆါကသံၣ်မူၤဘှီးလၢကျဲၤအဘိဘိအပူၤအိၣ်ဝဲဒၣ်ဘၣ်ဆၣ်,က့ၤဆှိးကဒါက့ၤဝဲလၢဖီၣ်စုကဝဲၤကရူၢ်ကရၢတဖၣ်ထုးထီၣ်ရၤလီၤဆါဝဲကသံၣ်မူၤဘှီးအဂ့ၢ်,အပူၤကွံၥ်လါယနူၤအါရံၤအပူၤသုးကရူၢ်အပှၤကတိၤတၢ်ပၢစီမ့ထိပၥ်ဖျါထီၣ်ဝဲလၢထံဂုၤကီၢ်ဂၤတၢ်မၤရှဲလဲတၢ်ကစီၣ်အပူၤအိၣ်ဝဲဒၣ်န့ၣ်လီၤ. ခ့ၣ်အဲၣ်ယူၣ်ဟီၣ်ကဝီၤအပူၤဘၣ်ဃးဒီးတၢ်သူကသံၣ်မူၤဘှီးဒီးတၢ်မၤဆါဝဲကသံၣ်မူၤဘှီးအံၤဒ်သိးကလီၤစှၤကွံၥ်ဝဲအဂီၢ်ခိၣ်နၢ်ပှၤဘၣ်မူဘၣ်ဒါတဖၣ်မၤဝဲတၢ်ဟးဟ့ၣ်သ့ၣ်ညါနၢ်ပၢၢ်လၢဒူသဝီ,ကၠိဒီးတၢ်လီၢ်အဂၤတဖၣ်အပူၤအိၣ်ဝဲခဲအံၤခဲအံၤအဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,ဒ်ခ့ၣ်အဲၣ်ယူၣ်ပၥ်လီၤဃၥ်ဝဲအတၢ်သိၣ်တၢ်သီတၢ်ဘျၢသဲးစးအိၣ်ဝဲအသိးန့ၣ်,ပှၤတဂၤလၢ်လၢ်လၢအသူဝဲတၢ်မူၤတၢ်ဘှီးမ့တမ့ၢ်ထုးထီၣ်ရၤလီၤမၤဆါဝဲကသံၣ်မူၤဘှီးန့ၣ်,တၢ်ကဟံဝဲအရ့ဒ်ကီၢ်သူလ့ၤကွီၢ်မ့ၣ်အဆၢဖိ(၁၈၀,၁၈၁,၁၈၂,၁၈၃,၁၈၄ )တၢ်ဘျၢသဲစးအိၣ်ဝဲအသိးအဂ့ၢ်,သ့ၣ်ညါဘၣ်န့ၣ်လီၤ.
ချၢၣ်လံၢ်ထူၣ်ကီၢ်ရ့ၣ် (၂၀၂၅)တနံၣ်အတီၢ်ပူၤ ကဘီယူၤဒီးကျိဖးဒိၣ်,ဒြိအဃိ ကမျၢၢ်သံ(၇၂)ဂၤဒီးဘၣ်ဒိ(၂၄၁)ဂၤ
လါဖ့ၤဘြူၤအါရံၤ ၁၉ သီ, ၂၀၂၆ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)တၢ်ပၢဟီၣ်ကဝီၤအပူၤ ခီဖျိလၢသုးမီၤစိရိၤအကဘီယူၤဒီးကျိဖးဒိၣ်,ဒြိသ့ၣ်တဖၣ် အံၤအဃိ (၂၀၂၅)တနံၣ်အတီၢ်ပူၤ ကမျၢၢ်သံပၥ်ဖှိၣ်ခဲလၢၥ်အိၣ်ဝဲ(၇၂) ဂၤ ဒီး ဘၣ်ဒိဘၣ်ထံးဝဲ(၂၄၁)ဂၤအဂ့ၢ်န့ၣ် သ့ၣ်ညါဘၣ်လၢ ကီၢ်ရ့ၣ်တၢ်မၤနီၣ်စရီအပူၤန့ၣ်လီၤ. ဒ်ချၢၣ်လွံၢ်ထူၣ်ကီၢ်ရ့ၣ်တၢ်မၤနီၣ်စရီပူၤအိၣ်ဝဲအသိးန့ၣ် မူကီၢ်ဆၣ်,လၢၢ်ဒိၣ်ကီၢ်ဆၣ်ဒီးဆီထံးကီၢ်ဆၣ်ဟီၣ်ကဝီၤအပူၤ စးထီၣ် လၢ(၂၀၂၅)လါယနူၤအါရံၤတုၤလါဒံၣ်စ့ဘၢၣ် လၢ(၁)နံၣ်အတီၢ်ပူၤ လၢကမျၢၢ်ဒူသဝီတၢ်ဖံးအီၣ်မၤအီၣ်လီၢ်ကျဲအပူၤ သုးမီၤစိရိၤ ကဘီၤယူၤလဲတ့ၢ်လီၤမ့ၣ်ပိၢ်(၃၅၁)ဘျီ, ခးလီၤကျိဖးဒိၣ်(၅၂၄)ဘျီ,တ့ၢ်လီၤဒြိ(၂၁၉)ဘျီ ပၥ်ဖှိၣ်ခဲလၢၥ်(၁၀၉၄)ဘျီညါန့ၣ်လီၤ. တနံၣ်အတီၢ်ပူၤ ခီဖျိလၢသုးမီၤစိရိၤသူဝဲကဘီယူၤ,ကျိဖးဒိၣ်,ဒြိအဘျီလၢအကထိအါအါဂီၢ်ဂီၢ်ဒ်အံၤအဖီခိၣ် ဘၣ်သံဝဲကမျၢၢ်ပိၥ်မုၣ် (၃၅)ဂၤ,ပိၥ်ခွါ(၃၇)ဂၤအသိး ဘၣ်ဒိဘၣ်ထံးဝဲ ကမျၢၢ်ပိၥ်မုၣ်(၁၂၃)ဂၤ, ပိၥ်ခွါ(၁၁၈)ဂၤဘၣ်ဟဲအိၣ်ထီၣ်ဝဲဒ်အံၤန့ၣ်လီၤ. ဒ်န့ၣ်အသိးခီဖျိလၢကျိဖးဒိၣ်,ကဘီယူၤဒီးဒြိအံၤအဃိစ့ၢ်ကီး ကမျၢၢ်ဟံၣ်တၢ်သူၣ်ထီၣ်(၃၃၅)ဖျၢၣ်,ကၠိတၢ်သူၣ်ထီၣ်(၁၄)ဖျၢၣ်ဒီး သီခါဖၠၣ်ဒီးတၢ်ဘါ ယွၤသရိၥ်တၢ်သူၣ်ထီၣ်လီၢ်(၂၉)ဖျၢၣ်ဟးဂီၤဝဲဒီးလၢန့ၣ်အမဲၥ်ညါ သိလ့ၣ်(၂)ခိၣ်,ဆဲးကၢး(၁၁)ခိၣ်, စဲးကွးတၢ် (၃)ခိၣ်,စဲးဂံၥ်ဘု(၁)ဖျၢၣ်,တၢ်ပၥ်ကီၤတၢ်ဖိတၢ်လံၤလီၢ်(၁)ဖျၢၣ် ဘၣ်ဒိဘၣ်ထံးဟးဂီၤဝဲအသိး ကျီၢ်,ပနၢ်,မဲးတဲးလဲး,ထိး,ဆီ,ကသ့ၣ် သံဘၣ်ဒိဘၣ်ထံးဝဲ(၉၀)ဃၣ်ဃၣ်အဂ့ၢ်န့ၣ် ကီၢ်ရ့ၣ်တၢ်မၤနီၣ်စရီအပူၤပၥ်ဖျါဝဲန့ၣ်လီၤ. တကးဒံးဘၣ်လၢတၢ်ဒီတနံၣ်အတီၢ်ပူၤန့ၣ် ပယီၤသုးဖီၣ်ဝဲကမျၢၢ်ပိၥ်မုၣ်/ပိၥ်ခွါခဲလၢၥ်အိၣ်ဝဲ(၅၄)ဂၤညါအဂ့ၢ်န့ၣ် ခ့ၣ်အဲၣ်ယူၣ် စံးစ့ၢ်ကီးဝဲန့ၣ်လီၤ. ခ့ၣ်အဲၣ်ယူၣ် ကီၢ်ရ့ၣ်/သုးက့(၇)ဘ့ၣ်အကျါလီၤဆီဒၣ်တၢ်မ့ဘၣ်ကွၢ်လၢချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်ကဝီၤပူၤအံၤ ထံၣ်ဘၣ် လၢသုးမီၤစိရိၤမၤကမၣ်ဝဲပှၤဂ့ၢ်ဝီခွဲးယၥ်အါန့ၢ်ဒံးကီၢ်ရ့ၣ်/သုးက့ လၢအဂၤတဖၣ်ဒံးအသိး ကမျၢၢ်စ့ၢ်ကီးသံဘၣ်ဒိဘၣ်ထံး အါဝဲဖျိဖျိဖျါဖျါ န့ၣ်လီၤ. ဒ်န့ၣ်အသိးမ့ဘၣ်ကွၢ်ဖဲအပူၤကွံၥ်တနံၣ်အံၤစးထီၣ်(၂၀၂၆)လါယနူၤအါရံၤ ၁ သီတုၤ ၃၁ သီ ထဲဒၣ်တလါအတီၢ်ပူၤန့ၣ်...
ပယီၤသုးဖီၣ်ရၤမတံဝ့ၢ်ပှၤလၢဆါရ့ၣ်နီၣ်သိလၢကျဲကပၤတဖၣ်
လါဖ့ၤဘြူၤအါရံၤ ၁၉သီ, ၂၀၂၆နံၣ်, ခ့ၣ်အဲးစံၣ်, ကီၢ်ကၠီၣ်တဲၣ်-ကညီကီၢ်စဲၣ်ကီၢ်ဆၢရၤမတံဟီၣ်ကဝီၤအပူၤအပူၤကွံၥ်လါဖ့ၤဘြူၤအါရံၤ(၁၇)သီအနံၤအပူၤ,ပယီၤသုးကရူၢ်ကရၢဖီၣ်ဝဲတဖိးမံသဲးစးပှၤဟးဆါဝဲစဲးဖီကဟၣ်ရ့ၣ်နီၣ်သိဒီးသိၣ်လ့ၣ်ယီၢ်ဆဲးကၢးလၢကျဲတဖၣ်အဂ့ၢ်,ဝ့ၢ်လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ. ဒီးရ့ၣ်နီၣ်သိလၢပယီၤသုးကရူၢ်ဖီၣ်ဝဲသ့ၣ်တဖၣ်အံၤမ့ၢ်ရ့ၣ်နီၣ်သိလၢကမျၢၢ်လီၢ်ကဝီၤပှၤဆါတၢ်ဖိတဖၣ်နုၥ်လီၤမၤပှဲၤဝဲသိလၢအသိလ့ၣ်ဒၢပူၤလၢကီၢ်ကၠီၣ်တဲၣ်ပူၤတဆီဒီးက့ၤစိၥ်ဒၢနုၥ်ရၤလီၤဆါကဒါက့ၤဝဲလၢပလီမ့တမ့ၢ်တလါတဖၣ်အပူၤအဂ့ၢ်,ဝ့ၢ်လီၢ်ကဝီၤကမျၢၢ်တဂၤစံးဝဲဒ်အံၤန့ၣ်လီၤ. “ခဲအံၤဖီၣ်ဝဲဒီတဝ့ၢ်လီၤ,တချူးဖီၣ်ဝဲန့ၣ်ဘိးဘၣ်ပၥ်ဖျါဝဲဒၣ်လၢတၢ်ဟးကျးလီၤလံၥ်က့အိၣ်ဝဲန့ၣ်လီၤ.တဲဝဲလၢတဖိးမံသဲးစးဘၣ်ဒီးတၢ်ဘၣ်ယိၣ်လၢမ့ၣ်အူဖၣ်ဆါကအီၣ်ဝ့ၢ်န့ၣ်လီၤ.ပှၤဆါတၢ်တဖၣ်န့ၣ်ခီလၢဟံန့ၢ်ဝဲလၢကၠီၣ်တဲၣ်ပူၤဒၢနုၥ်လီၤဝဲလၢအသိလ့ၣ်ပူၤဒီးဟဲက့ၤဆါဝဲန့ၣ်လီၤ”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,ဖီၣ်ဝဲမ့ချူးဃ့ဝဲစ့အီးလိးဒ်ညီနုၢ်ဟးမၤဝဲတၢ်ဃ့စ့အီးလိးလၢဝ့ၢ်ပူၤအသိးအိၣ်ဝဲအဂ့ၢ်,တကီၢ်ခါခဲအံၤခီဖျိပယီၤသုးဖီၣ်တၢ်အဃိပှၤဆါရ့ၣ်နီၣ်သိဖိလၢကျဲကပၤတဖၣ်ဘၣ်အိၣ်ပတုၥ်ဆိဝဲအဂ့ၢ်,အဝဲစံးအါထီၣ်ဝဲဒၣ်န့ၣ်လီၤ. ရၤမတံဝ့ၢ်ပူၤကၠီၣ်တဲၣ်တကပၤပတုၥ်ကွံၥ်ဝဲတၢ်ရၤလီၤစဲးဖီကဟၣ်ရ့ၣ်နီၣ်သိတဖၣ်အလီၢ်ခံ,ဝ့ၢ်လီၢ်ကဝီၤကမျၢၢ်သ့ၣ်တဖၣ်အံၤသူက့ၤဝဲရ့ၣ်နီၣ်သိလၢအဟဲထီၣ်လၢကီၢ်ပယီၤလၥ်ခီအဂ့ၢ်,သ့ၣ်ညါဘၣ်န့ၣ်လီၤ. ဒီးပယီၤသုးကရူၢ်ကရၢတဖၣ်ပၥ်ပနီၣ်ဝဲတၢ်ဝံစိၥ်တီဆှၢရ့ၣ်နီၣ်သိဒီးကျဲတၢ်အိၣ်သးအဖီခိၣ်ရ့ၣ်နီၣ်သိကတုၤထီၣ်ဆူဝ့ၢ်ပူၤအဂီၢ်တံၥ်တၥ်ဝဲအဃိ,သိလ့ၣ်ဒီးသိလ့ၣ်ယီၢ်ဆဲးကၢးတဖၣ်အါတက့ၢ်ပှ့ၤဝဲရ့ၣ်နီၣ်သိလၢတၢ်ဆါအီၤလၢကျဲကပၤတဖၣ်အံၤလီၤအဂ့ၢ်,သ့ၣ်ညါဘၣ်ဒ်လီၢ်ကဝီၤကမျၢၢ်တဖၣ်စံးဝဲအသိးန့ၣ်လီၤ. ရၤမတံဝ့ၢ်အံၤမ့ၢ်ဝဲမုၢ်ကျိၤဝဲၤကွၥ်တၢ်ဖံးအီၣ်မၤအီၣ်လီၢ်ဂ့ၤအဝ့ၢ်တဖျၢၣ်အသိးခီဖျိအိၣ်ဝဲဒီးကၣ်စံၣ်နိၣ်တၢ်လိၣ်ခိၣ်လိၣ်ကွဲဒီးတၢ်တၤကျိၣ်တၢ်စ့တၢ်မၤအလီၢ်တဖၣ်အဖီခိၣ်,ဘၣ်တၢ်သ့ၣ်ညါဝဲလၢအမ့ၢ်ဝ့ၢ်တဝ့ၢ်လၢအသူဝဲရ့ၣ်နီၣ်သိအါဝဲတဖျၢၣ်ဒီးတၢ်ဆါရ့ၣ်နီၣ်သိအပှ့ၤဒိၣ်ဝ့ၢ်တဝ့ၢ်အဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,ခီဖျိပယီၤသုးပၥ်ပနီၣ်ကးတံၥ်ဝဲတၢ်စိၥ်ဆှၢရ့ၣ်နီၣ်သိအဃိအပူၤကွံၥ်(၂၀၂၅)နံၣ်လါအီကူၥ်အပူၤရ့ၣ်နီၣ်သိလၢၥ်ကွံၥ်ဝဲသတူၢ်ကလၥ်ကဲထီၣ်တ့ၢ်ဝဲဒၣ်အသးအဂ့ၢ်,သ့ၣ်ညါဘၣ်စ့ၢ်ကီးန့ၣ်လီၤ.
မဲၢ်ဆီးဝ့ၢ်ပူၤထွံၣ်ဒီးသၣ်မံညီၤကစၢ်တဖၣ်ကဘၣ်လဲၤဆဲးန့ၢ်အဝဲသ့ၣ်ဆၣ်ဖိကီၢ်ဖိကသံၣ်ဒီသဒၢထွံၣ်ပျုၢ်တၢ်ဆါ
လါဖ့ၤဘြူၤအါရံၤ ၁၉သီ, ၂၀၂၆နံၣ်, ခ့ၣ်အဲးစံၣ်, ကီၢ်ကၠီၣ်တဲၣ်ကီၢ်ပယီၤကီၢ်ဆၢ,တးကီၢ်ရ့ၣ်မဲၢ်ဆီးဝ့ၢ်ဟီၣ်ကဝီၤပူၤ မဲၢ်ဆီးဝ့ၢ်ပူၤ ထွံၣ်ဒီးသၣ်မံညီၤကစၢ်တဖၣ်ကဘၣ်လဲၤဆဲးန့ၢ်အဝဲသ့ၣ်ဆၣ်ဖိကီၢ်ဖိကသံၣ်ဒီသဒၢထွံၣ်ပျုၢ်တၢ်ဆါကသံၣ်အဂ့ၢ်,မဲၢ်ဆီးဝ့ၢ်တၢ်ဂုၥ်ထီၣ်ပသီထီၣ်ကရူၢ်ကရၢ,ဆူၣ်ချ့ကရူၢ်ကရၢဒီးတၢ်ကွၢ်ထွဲကတီၤခိၣ်ဃၢၤန့ဆၢၣ်ဝဲၤကျိၤကရူၢ်ကရၢတဖၣ်ရၤလီၤဘိးဘၣ်ပၥ်ဖျါထီၣ်ဝဲဒၣ်ဖဲမဟါလါဖ့ၤဘြူၤအါရံၤ(၁၈)သီအနံၤန့ၣ်လီၤ. မဲၢ်ဆီးဝ့ၢ်ကဝီၤဒ့(၂၀)ဘ့ၣ်အပူၤကမျၢၢ်လၢဘုၣ်ဝဲဆၣ်ဖိကီၢ်ဖိဒ်အမ့ၢ်ထွံၣ်ဒီးသၣ်မံၤညီၤသ့ၣ်တဖၣ်အံၤ,ကဘၣ်လဲၤဆဲးန့ၢ်ဝဲတၢ်ဒီသဒၢထွံၣ်ပျုၢ်တၢ်ဆါဒ်တၢ်ပၥ်ပနီၣ်ဝဲမုၢ်နံၤမုၢ်သီဒီးတၢ်ဆၢကတီၢ်တဖၣ်အဂ့ၢ်,မဲၢ်ဆီးကၠီၣ်တဲၣ်ပှၤဘၣ်မူဘၣ်ဒါတဖၣ်ဘိးဘၣ်ပၥ်ဖျါဝဲဒၣ်န့ၣ်လီၤ. တၢ်မၤဝဲတၢ်ဆဲးတၢ်ဒီသဒၢထွံၣ်ပျုၢ်ကသံၣ်တၢ်ဆါအတၢ်ရဲၣ်တၢ်ကျဲၤအံၤခီဖျိတကီၢ်ခါခဲအံၤတၢ်ဆါဘၣ်ကူဘၣ်ဂၥ်ကဲထီၣ်သးအတၢ်အိၣ်သးအဖီခိၣ်,တၢ်ဘိးဘၣ်ပၥ်ဖျါဝဲလၢဂ့ၢ်ဝီၢ်အူအဂ့ၢ်ပၥ်ဖျါဃုၥ်ဝဲဒၣ်စ့ၢ်ကီးန့ၣ်လီၤ. မဲၢ်ဆီးကၠီၣ်တဲၣ်ပှၤဘၣ်မူဘၣ်ဒါတဖၣ်အတၢ်ဘိးဘၣ်ပၥ်ဖျါအဖီခိၣ်,ပှၤဟူးဂဲၤလၢကီၢ်ပယီၤခီကီၢ်ပှၤမၤတၢ်ဖိဂ့ၢ်ဝီ(MigrantRightPromotionGroup-MRPWG)ကရူၢ်ကရၢတဖၣ်စ့ၢ်ကီးကျိးထံရၤလီၤပၥ်ဖျါဒုးသ့ၣ်ညါထီၣ်ဝဲဒၣ်လၢအစိၤရှၢၣ်မံးဒံးယၢၣ်အပူၤတဆီအိၣ်ဝဲဒၣ်န့ၣ်လီၤ. လၢန့ၣ်အမဲၥ်ညါ,ဘၣ်ဃးတၢ်ကဘၣ်ဆဲးဝဲတၢ်ဒီသဒၢထွံၣ်ပျုၢ်တၢ်ဆါကသံၣ်တၢ်ဂ့ၢ်အံၤပှၤဟူးဂဲၤလၢခီကီၢ်ပှၤမၤတၢ်ဖိဂ့ၢ်ဝီ(YoungChiOo)ကရူၢ်ကရၢပှၤဘၣ်မူဘၣ်ဒါအူမိကၠီၣ်စ့ၢ်ကီးစံးဝဲဒ်အံၤန့ၣ်လီၤ. “အခဲအံၤတၢ်ကိၢ်ထီၣ်လံ,တုၤဃီၤလၢထွံၣ်ပျုၢ်တၢ်ဆါကတၢထီၣ်အခါလံ,အဃိန့ၣ်မဲၢ်ဆီးတၢ်ဂုၥ်ထီၣ်ပသီထီၣ်ကရူၢ်ကရၢ,ဆူၣ်ချ့ကရူၢ်ကရၢဒီးတၢ်ကွၢ်ထွဲကတီၤခိၣ်ဃၢၤန့ဆၢၣ်ဝဲၤကျိၤကရူၢ်ကရၢတဖၣ်ပၥ်ဖှိၣ်သးဘိးဘၣ်ပၥ်ဖျါဝဲတၢ်လီၤဘၣ်ယိၥ်အံၤန့ၣ်လီၤ.မ့မ့ၢ်ပှၤဒုထွံၣ်အ့ၣ်အဃိပှၤကဲထီၣ်ထွံၣ်ပျုၢ်တၢ်ဆါအိၣ်ထီၣ်ပနီၢ်ကစၢ်ဒၣ်ဝဲပတထံၣ်ဘၣ်ဆၣ်,ပှၤထံၣ်သ့ၣ်ညါနၢ်ပၢၢ်တၢ်တဖၣ်အတၢ်သမံသမိးဃုထံၣ်တၢ်မၤနီၣ်အိၣ်ဝဲအဃိဘိးဘၣ်ပၥ်ဖျါဝဲဒၣ်န့ၣ်လီၤ”အဂ့ၢ်စံးဝဲန့ၣ်လီၤ. လၢတၢ်ကလဲၤဆဲးတၢ်ဒီသဒၢထွံၣ်ပျုၢ်ကသံၣ်တၢ်ဆါအဂီၢ်ပၥ်ပနီၣ်ဝဲမုၢ်နံၤမုၢ်သီဖဲတလါအံၤလါဖ့ၤဘြူၤအါရံၤ(၁၆,၁၇,၁၈,၁၉,၂၀)ဒီး(၂၃)သီသ့ၣ်တဖၣ်ဒီ၊တၢ်ဆၢကတီၢ်ဖဲဂီၤခီ(၉)နၣ်ရံၣ်တုၤဟါခီ(၄)နၣ်ရံၣ်သ့ၣ်တဖၣ်အပူၤအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ. တကးဒံးဘၣ်ပၥ်ပနီၣ်စ့ၢ်ကီးဝဲတၢ်လီၢ်ဖဲ(စၤတၤပ့ၤ,ဘၣ်နူၤ,ဒီခၠဲ,ပူၤဒၤ,မဲၢ်ဆီးဝံၤလး,ရိၤမ်ရၤ,မနံၤဖရဲၤစၤ,ကၠီးကၠီ,ခၠိဖးတနါ,ဝၣ်လီၤ,ဘၣ်ထိၤ,ရွိၤခၠဲ,တၤတ့ၤယိၤ,ဆၤထီ,ဆီၤခွဲ(၂),ဆီၤခွဲ(၁),အ့းစ်လၤမ်ကဝီၤဒ့,ဘိၤကွိၤ,ပရၤခၠါရၣ်,အ့သ၇ၤခံၤရံၤကဝီၤဒ့ဝဲၤဒၢးဒီးထိၤထီသဝီတၢ်အိၣ်ဆူၣ်အိၣ်ချ့တၢ်လီၢ်သ့ၣ်တဖၣ်အဂ့ၢ်,သ့ၣ်ညါဘၣ်န့ၣ်လီၤ. ပှၤလၢကလဲၤဆဲးန့ၢ်ဝဲအတၢ်ဖိတၢ်လံၤတၢ်ဒီသဒၢထွံၣ်ပျုၢ်တၢ်ဆါကသံၣ်တဖၣ်အံၤကဘၣ်လဲၤစိၥ်ဝဲအနီၢ်ကစၢ်လံၥ်လဲၢ်တၢ်မၤနီၣ်မၤဃါ(ID Card )ဒီးကဘၣ်လဲၤစိၥ်ဃုၥ်ဝဲတၢ်ဖိတၢ်လံၤတၢ်ဆဲးတၢ်ဒီသဒၢကသံၣ်လံၥ်လဲၢ်လၢအပူၤကွံၥ်ဆဲးတ့ၢ်ဝဲတဖၣ်အဂ့ၢ်,သ့ၣ်ညါဘၣ်န့ၣ်လီၤ. ဒီးမ့မ့ၢ်ပှၤလၢအဲၣ်ဒိးလဲၤဟံးန့ၢ်ကသံၣ်ဝံၤက့ၤဆဲးန့ၢ်ဝဲအတၢ်ဖိတၢ်လံၤကသံၣ်လၢအနီၢ်ကစၢ်ဟံၣ်တဖၣ်တခီကဘၣ်လဲၤစိၥ်ဃုၥ်ဝဲ(တၢ်ခုၣ်ဒၢ)တဖျၢၣ်လၢတၢ်ကဒၢနုၥ်ကသံၣ်အဂီၢ်အသိး,တၢ်ဖိတၢ်လံၤသ့ၣ်တဖၣ်အံၤတၢ်ကဘၣ်စၢဃၥ်အီၤဒီးထးပျံၤမ့တမ့ၢ်တၢ်ကဘၣ်ပၥ်အီၤလၢထးတၢ်ဒုးဃၥ်အပူၤကိးဒုစ့ၢ်ကီးန့ၣ်လီၤ. ကီၢ်ကၠီၣ်တဲၣ်-ကီၢ်ပယီၤကီၢ်ဆၢတးကီၢ်ရ့ၣ်မဲၢ်ဆီးဟီၣ်ကဝီၤအပူၤဘၣ်ဃးထွံၣ်ပျုၢ်တၢ်ဆါကဲထီၣ်အံၤတလါအတီၢ်ပူၤကဲထီၣ်ဝဲအသးလၢကဝီၤဒ့တဖၣ်(၆)ဘ့ၣ်အပူၤအိၣ်ဝဲအဂ့ၢ်,မဲၢ်ဆီးကီၢ်ဆၣ်တၢ်ပၢတၢ်ဆှၢဝဲၤဒၢးပှၤဘၣ်မူဘၣ်ဒါတဖၣ်ဘိးဘၣ်ပၥ်ဖျါတ့ၢ်ဝဲဖဲအပူၤကွံၥ်လါဖ့ၤဘြူၤအါရံၤ(၁၃)သီအနံၤန့ၣ်လီၤ. လၢတၢ်ဂ့ၢ်အံၤအဃိ,ဖဲတၢ်ပၢဆှၢရဲၣ်ကျဲၤဝဲတၢ်ဆူးတၢ်ဆါတၢ်ဘၣ်ကူဘၣ်ဂၥ်အကတီၢ်စးထီၣ်ဖဲလါဖ့ၤဘြူၤအါရံၤ(၁၃)သီအနံၤတုၤလါမးရှး(၁၄)သီအနံၤအပူၤ,ကသံၣ်သရၣ်တၢ်ပျဲမ့တအိၣ်ထွံၣ်ဒီးသၣ်မံညီၤကစၢ်တဖၣ်တဘၣ်မၤဝဲတၢ်ဆီတလဲအိၣ်ဆိးဆူတၢ်လီၢ်အဂၤတဖၣ်ဘၣ်အဂ့ၢ်,ကီၢ်ဆၣ်ပှၤခိၣ်ပှၤနၢ်တဖၣ်တြီတံၥ်ဃၥ်ဝဲဒၣ်န့ၣ်လီၤ. တကတီၢ်ဃီ,ပှၤတဂၤလၢ်လၢ်လၢအဟံၣ်တၢ်ဖိတၢ်လံၤအိၣ်တဆူၣ်အိၣ်တချ့မ့တမ့ၢ်တနွံအတီၢ်ပူၤသံဝဲတစှၤန့ၢ်တဒုဒီးသံဝဲလီၤလီၤဆီဆီသ့ၣ်တဖၣ်အံၤကဘၣ်ပၥ်ဖျါထီၣ်ဝဲတၢ်ဂ့ၢ်တၢ်ကျိၤဆူကဝီၤဒ့ခိၣ်နၢ်မ့တမ့ၢ်တၢ်ဖိတၢ်လံၤကသံၣ်ဝဲၤကျိၤတဖၣ်အအိၣ်အဂ့ၢ်,ပၥ်ဖျါဝဲဒၣ်လီၤ. ဒ်န့ၣ်အသိး,တၢ်မ့တလူၤပိၥ်ထွဲၤမၤထွဲဝဲတၢ်ဘိးဘၣ်ရၤလီၤဘၣ်န့ၣ်ဒ်ကၠီၣ်တဲၣ်သဲးစးတၢ်ဘျၢအိၣ်ဝဲအသိးတၢ်ဒုးလီၤဝဲလၢဃိၣ်ပူၤ(၁)နံၣ်သ့ဝဲဒီးကဘၣ်ဟ့ၣ်ဝဲစ့အီၣ်လိးအါန့ၢ်(၂၀၀၀၀)ဘးအိၣ်ဝဲအသိး,တၢ်ဟ့ၣ်ဝဲတၢ်ကမၣ်ခံမံၤလၢၥ်သ့ဝဲအဂ့ၢ်,ပၥ်ဖျါစ့ၢ်ကီးဝဲဒၣ်န့ၣ်လီၤ.
ကီၢ်သူလ့ၤတၢ်ပၢတၢ်ပြးအဂံၢ်ကဆူၣ်ထီၣ်အဂီၢ်တၢ်ပၥ်လီၤဝဲတၢ်မၤကျဲလၢတၢ်ကူၣ်လိၥ်တၢၣ်ပီၣ်တဲသကိးပူၤ
လါဖ့ၤဘြူၤအါရံၤ ၁၈ သီ, ၂၀၂၆ နံၣ်, ခ့ၣ်အဲးစံၣ် ကီၢ်သူလ့ၤတၢ်ပၢတၢ်ပြးဂ့ၢ်ဝီအဂံၢ်ကဆူၣ်ထီၣ်,ကမ့ၢ်တၢ်ပၢတၢ်ပြးလၢအဂ့ၤဒီးလဲၤသးဘၣ်ဂ့ၢ်ဘၣ်ဝီကန့ၢ်အဂီၢ်လိၣ်ဘၣ်ဝဲ ပှၤကညီ ဂံၢ်ဘါအဃိလၢကမၤန့ၢ်ပှၤကညီဂံၢ်ဘါအဂီၢ်န့ၣ် တၢ်ပၥ်လီၤဝဲတၢ်မၤကျဲတဖၣ်လၢကညီဒီကလုၥ်တၢ်ကူၣ်လိၥ်တၢၣ်ပီၣ်တဲသကိး ပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ. ဖဲအပူၤကွံၥ်တလါအံၤလါဖ့ၤဘြူၤအါရံၤ ၉ သီတုၤ ၁၂ သီအနံၤန့ၣ် လၢခ့ၣ်အဲၣ်ယူၣ်ကီၢ်သူလ့ၤဟီၣ်ကဝီၤတၢ်လီၢ်တတီၤအပူၤ လၢတၢ်ကသူၣ်ထီၣ်ကီၢ်သူလ့ၤအဂီၢ် KNU တီခိၣ်ရိၣ်မဲမၤဝဲကညီဒီကလုၥ်တၢ်ကူၣ်လိၥ်တၢၣ်ပီၣ်တဲသကိးတခါလၢ အပၣ်ဃုၥ်ဝဲ ခ့ၣ်အဲၣ်ယူၣ်လီၢ်ခၢၣ်သး,ထံဂုၤကီၢ်ဂၤကညီတၢ်ကရၢကရိခၢၣ်စး,ကညီပှၤတဝၢတၢ်ကရၢကရိခၢၣ်စး,ကီၢ်ရ့ၣ်ခိၣ်နၢ်, ကညီဒီ ကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ခိၣ်နၢ်ခၢၣ်စး,ကညီဒီကလုၥ်ဂၢၤသးကရၢ(KNDO)ခိၣ်နၢ်ခၢၣ်စးသ့ၣ်တဖၣ်အံၤန့ၣ်လီၤ. တၢ်ကူၣ်လိၥ်တၢၣ်ပီၣ်တဲသကိးဝံၤလီၢ်ခံဖဲမဟါလါဖ့ၤဘြူၤအါရံၤ ၁၇ သီဟါခီအဆၢကတီၢ်န့ၣ် ခ့ၣ်အဲၣ်ယူၣ်-ကညီဒီကလုၥ် စၢဖှိၣ်ကရၢ လီၢ်ခၢၣ်သးထုးထီၣ်ဘိးဘၣ်ရၤလီၤက့ၤဝဲလံၥ်တၢ်ပၥ်ဖျါတဘ့ၣ်လၢအဘၣ်ဃးဒီး တၢ်ဂ့ၢ်တၢ်ကျိၤလၢတၢ်တၢၣ်ပီၣ် တဲသကိးတ့ၢ်ဝဲဖဲတၢ်အိၣ်ဖှိၣ်ဘျီဝဲန့ၣ်အပူၤန့ၣ်လီၤ. ဒ်ခ့ၣ်အဲၣ်ယူၣ်လံၥ်တၢ်ပၥ်ဖျါပူၤပၥ်ဖျါဝဲအသိးန့ၣ် လၢတၢ်ဆၢကတီၢ်(၄)သီတၢ်ကူၣ်လိၥ်တၢၣ်ပီၣ်တဲသကိးဘျီဝဲအံၤအပူၤန့ၣ် တၢ်ပၥ်ဖျါတၢၣ်ပီၣ်တဲသကိးပဲၥ်ထံနီၤဖးက့ၤဝဲ တကီၢ်ခါထံရူၢ်ကီၢ်သဲးတၢ်အိၣ်သး, တၢ်သူၣ်ထီၣ်ကီၢ်သူလ့ၤအဂ့ၢ်အကျိၤ, တၢ်ပၢ တၢ်ပြး, ထံလီၢ်ကီၢ်ပူၤပှၤလီၢ်အိၣ်ကမှံတၢ်အိၣ်သး, သုးဂ့ၢ်ဝီတၢ်အိၣ်သး, ပှၤဂ့ၢ်ဝီတၢ်အိၣ်သး,ခီကီၢ်တၢ်မၤကမၣ်ကွီၢ်မ့ၣ်ဂ့ၢ်ဝီ တကးဒံးဘၣ်တၢ်တၢၣ်ပီၣ်တဲသကိးဃုၥ်စ့ၢ်ကီးဝဲ(ကၠါဖၠၣ်) တၢ်လံၣ်အီၣ်လီအီၣ်ကျိၣ်စ့လၢကလံၤကျါတၢ်အိၣ်သးအဂ့ၢ်အကျိၤ သ့ၣ်တဖၣ်န့ၣ်လီၤ. ဒ်န့ၣ်အသိးလၢတၢ်ရဲၣ်တၢ်ကျဲၤအံၤအပူၤ ထံဂုၤကီၢ်ဂၤကညီတၢ်ကရၢကရိတဖၣ်စ့ၢ်ကီးပၥ်ဖျါထီၣ်ဝဲကညီကလုၥ်အတၢ်အိၣ်သး, အတၢ်ဂဲၤလိၥ်တဖၣ်အမဲၥ်ညါဒ်သိးထံဂုၤကီၢ်ဂၤပဒိၣ်ကဟံဂ့ၢ်ဝီဆီၣ်သနံးဝဲသုးမီၤစိရိၤကန့ၢ်အဂီၢ် ထံဂုၤကီၢ်ဂၤကညီတၢ်ကရၢကရိ တဖၣ်ဂဲၤလိၥ်ထံၣ်လိၥ်သးဒီးထံဂုၤကီၢ်ဂၤပဒိၣ်ဃုၥ်ဒီးဘျီၣ်ဒိၣ်ခၢၣ်စးသ့ၣ်တဖၣ်အိၣ်ဝဲအဂ့ၢ်န့ၣ် ပၥ်ဖျါထီၣ်ဝဲန့ၣ်လီၤ. တကးဒံးဘၣ်(၂၀၂၁)သုးဟံန့ၢ်တၢ်စိတၢ်ကမီၤဝံၤလီၢ်ခံခီဖျိထံရူၢ်ကီၢ်သဲး,ဒုးယၤတၢ်အိၣ်သးတဖၣ်အဃိ ကမျၢၢ်လၢအဘၣ်ကွၢ်မဲၥ် တၢ်ဒုးတၢ်ယၤဘၣ်ဃ့ၢ်မှံဟးဖျိးတဖၣ်အံၤဒ်သိးတၢ်ဆီၣ်ထွဲမၤစၢၤကတုၤဆူအဝဲသ့ၣ်အိၣ်အဂီၢ် ပှၤဂ့ၢ်ဝီတၢ်ကရၢကရိ ,ထံဂုၤကီၢ်ဂၤ ပှၤမၤစၢၤတၢ်ဖိတဖၣ်ဒီးလီၢ်ကဝီၤတၢ်ကရၢကရိတဖၣ်ကြၢးပၥ်ဖှိၣ်မၤသကိးတၢ်ဒ်လဲၣ် ဃုၥ်ဒီးတၢ်ရဲၣ်သဲကတီၤခိၣ်ဃၢၤ န့ဆၢၣ် အတၢ်ဖံးတၢ်မၤအဂ့ၢ်သ့ၣ်တဖၣ်အံၤ ကညီတဝၢတၢ်ကရၢကရိခၢၣ်စးတဖၣ်ပၥ်ဖျါထီၣ်တၢၣ်ပီၣ်တဲသကိးဝဲဒၣ်န့ၣ်လီၤ. လၢန့ၣ်အမဲၥ်ညါကီၢ်သူလ့ၤတၢ်ပၢတၢ်ပြးဂ့ၢ်ဝီအဂံၢ်ကဆူၣ်ထီၣ်ဒီးကမ့ၢ်တၢ်ပၢတၢ်ပြးလၢအဂ့ၤ,လဲၤသးဘၣ်ဂ့ၢ်ဘၣ်ဝီကန့ၢ်အဂီၢ်န့ၣ် လိၣ်ဘၣ်ဝဲပှၤကညီဂံၢ်ဘါအဃိ လၢတၢ်ကမၤန့ၢ်ပှၤကညီဂံၢ်ဘါဂီၢ်ပၥ်လီၤဝဲတၢ်မၤကျဲအသိးကဂုၥ်ကျဲးစၢးမၤစၢၤစ့ၢ်ကီးဝဲသုးဂ့ၢ်ဝီ အတၢ်လိၣ်ဘၣ်ဒီးဒ်သိးတၢ်မူၤ...
သုးက့ ၁ ဟီၣ်ကဝီၤ (၂)လါအတီၢ်ပူၤတၢ်ဒုးကဲထီၣ်(၄၁)ဘျီဒီး ပယီၤသုးသံ(၃၃)ဂၤ,ဘၣ်ဒိ(၃၃)ဂၤ
လါဖ့ၤဘြူၤအရံၤ ၁၇ သီ, ၂၀၂၆ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဟီၣ်ကဝီၤ လါဒံၣ်စ့ဘၢၣ်ဒီးလါယနူၤအါရံၤလၢ(၂)လါအတီၢ်ပူၤ ဒုးယၤတၢ်ဖ့ၣ်စၢကဲထီၣ်ဝဲ (၄၁)ဘျီဒီး ဖဲန့ၣ်ပယီၤသုးတကပၤသံဝဲ(၃၃)ဂၤ,ဘၣ်ဒိဘၣ်ထံးဝဲ(၃၃)ဂၤအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ် တလါတဘျီတၢ်မၤနီၣ် စရီအပူၤန့ၣ်လီၤ. ဒီးတၢ်ဒုးတၢ်ယၤတၢ်ဖ့ၣ်စၢသ့ၣ်တဖၣ်အံၤကဲထီၣ်ဝဲလၢကၠဲးထိၣ်,ဘံလ့,သထူၣ်,ဖၣ်အၣ်ကီၢ်ဆၣ်ဟီၣ်ကဝီၤအပူၤလၢ ပယီၤသုးဒီး ဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်-၁, သုးရ့ၣ်-၂, သုးရ့ၣ်-၃, ကညီဒီကလုၥ်ဂၢၤသုးကရၢ(KNDO) သုးရ့ၣ်-၂ သ့ၣ်တဖၣ်အံၤဘၢၣ်စၢၤအဂ့ၢ်န့ၣ် သ့ၣ်ညါဘၣ်န့ၣ်လီၤ. လၢတၢ်ခံလါအတီၢ်ပူၤအံၤစ့ၢ်ကီး ပယီၤသုးသံဘၣ်ဒိၣ်ဘၣ်ထံး(၆၆)ဂၤအမဲၥ်ညါ မ့မ့ၢ်လၢဟီၣ်ကဝီၤ(KNLA)တၢ်ပၢၢ်ဆၢ သုးပၥ်ဖှိၣ် တကပၤန့ၣ် ဘၣ်ဟ့ၣ်လီၤကွံၥ်အသးသမူလၢထံကီၢ်ဒီးပှၤကလုၥ်အဂီၢ်(၃)ဂၤစ့ၢ်ကီးအဂ့ၢ်န့ၣ် ကီၢ်ရ့ၣ်တၢ်မၤစရီပူၤအသိး သ့ၣ်ညါ ဘၣ်န့ၣ်လီၤ. တကးဒံးဘၣ်လၢခံလါအတီၢ်ပူၤအံၤ သုးမီၤစိရိၤအကဘီယူၤလဲၤခးလီၤတၢ်(၂)ဘျီဒီးပယီၤသုးခးလီၤကျိဖးဒိၣ်(၃၆)ဘျီဆူ လီၢ်ကဝီၤ ကမျၢၢ်ဒူသဝီအိၣ်ဆိးလီၢ်,တၢ်ဖံးတၢ်မၤလီၢ်သ့ၣ်တဖၣ်အဃိ ကမျၢၢ်သံဝဲ(၉)ဂၤ,ဘၣ်ဒိ(၁၆)ဂၤဒီး ဟံၣ်တၢ်သူၣ်ထီၣ်(၁၃)ဖျၢၣ်, သီခါဖၠၣ်တၢ်သူၣ်ထီၣ်(၄)ဖျၢၣ်,ကၠိ(၁)ဖျၢၣ်,ဆဲးကၢး(၂)ခိၣ်ဘၣ်ဒိဘၣ်ထံးဟးဂီၤဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ. ဒ်န့ၣ်အသိးခီဖျိလၢသုးမီၤစိရိၤအကျိဖးဒိၣ်ဒီးကဘီယူၤအံၤအဃိ ကမျၢၢ်လၢအသံဘၣ်ဒိဘၣ်ထံးသ့ၣ်တဖၣ် အကျါပၣ်ဃုၥ်ဝဲ ဖိဒံဖိသၣ်လၢအသးနံၣ်တပှဲၤဒံးဘၣ်သ့ၣ်တဖၣ်န့ၣ်လီၤ. လၢန့ၣ်အမဲၥ်ညါစးထီၣ်ဖဲတလါအံၤလါဖ့ၤဘြူၤအါရံၤထီၣ်တုၤလၢခဲအံၤလီၤဆီဒၣ်တၢ်လၢကၠဲးထိၣ်ကီၢ်ဆၣ်တကပၤန့ၣ် ပယီၤသုးကျိၤနုၥ်လီၤဟူးဂဲၤဝဲလၢခရၢၢ်ကရူၢ်,ဝီၢ်က့ကရူၢ်,တကွံပူၤကရူၢ်ဒီးအံလူၢ်ကရူၢ်ဒူသဝီတဖၣ်အံၤအပူၤ အါအါဂီၢ်ဂီၢ် အဖီၣ်ခိၣ် တၢ်ဒုးကဲထီၣ်,ပယီၤသုးခးလီၤစ့ၢ်ကီးကျိဖးဒိၣ်အဃိ ကမျၢၢ်သံဘၣ်ဒိဘၣ်ထံးအိၣ်အသိး ပှၤနီၣ်ဂံၢ်(၁၃၀၀၀)ဃၣ်ဃၣ် ဘၣ်ဃ့ၢ်ထီၣ် ဝဲဒၣ်တုၤလၢခဲအံၤန့ၣ်လီၤ. တကးဒံးဘၣ်ပယီၤသုးကျိၤတဖၣ်ဖဲအဝဲသ့ၣ်နုၥ်လီၤဟူးဂဲၤလၢကရူၢ်တဖၣ်အံၤဒူသဝီပူၤအကတီၢ်စ့ၢ်ကီးခးသံဝဲကမျၢၢ်,ဖီၣ်က့ၤကိးဝဲကမျၢၢ်အိၣ်အမဲၥ်ညါ ဖဲကမျၢၢ်အိၣ်လၢဟံၣ်တဘူၣ်ဃ့ၢ်ထီၣ်အတကတီၢ်ပယီၤသုးအံၤဟံန့ၢ်ဝဲတၢ်ခွဲးတၢ်ယၥ် နုၥ်လီၤဃုခွံခွးတၢ်လၢ ပှၤဟံၣ်ပူၤဝံၤက့ၤစိၥ်ဟံဝဲကမျၢၢ်အသိလ့ၣ်,ဆဲးကၢးဃုၥ်ဒီးကျိၣ်စ့,တၢ်ဖိတၢ်လံၤလၢအလုၢ်အိၣ်ပှ့ၤအိၣ်သ့ၣ်တဖၣ်အိၣ်ဝဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ. အဃိတကီၢ်ခါခဲအံၤလီၤဆီဒၣ်တၢ်လၢကၠဲးထိၣ်ကီၢ်ဆၣ်ဟီၣ်ကဝီၤအပူၤန့ၣ် တုၤလၢခဲအံၤတၢ်ဖ့ၣ်စၢဆဲးကဲထီၣ်ဒံးဝဲလၢ ပယီၤသုး လၢအနုၥ်လီၤဟူးဂဲၤတဖၣ်အံၤဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်-၃ သုးပၥ်ဖှိၣ်သ့ၣ်တဖၣ်အံၤ...
မုၢ်တြီၢ်ကီၢ်ရ့ၣ်တၢ်ပၢဟီၣ်ကဝီၤ ၁၅ သီအတီၢ်ပူၤ တၢ်ဒုးကဲထီၣ်(၅၇)ဘျီဒီးပယီၤသုးသံဘၣ်ဒိဘၣ်ထံး(၂၀)ဘျဲၣ်
လါဖ့ၤဘြူၤအါရံၤ ၁၇ သီ, ၂၀၂၆ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)တၢ်ပၢဟီၣ်ကဝီၤလၢတၢ်ဒုးက့ၤဆူၣ်ထီၣ်ကဒါဝဲအံၤ လါဖ့ၤဘြူၤအါရံၤ ၁ သီတုၤ ၁၅ သီ လၢ(၁၅)သီအတီၢ်ပူၤ တၢ်ဒုးကဲထီၣ်ဝဲ(၅၇)ဘျီအဃိ ပယီၤသုးတကပၤသံဘၣ်ဒိဘၣ်ထံးဝဲ(၂၀)ဘျဲၣ်အဂ့ၢ်န့ၣ် ကီၢ်ရ့ၣ်တၢ်ကစီၣ် ထုးထီၣ်ပၥ်ဖျါဝဲဖဲ တနံၤအံၤန့ၣ်လီၤ. လၢပယီၤသုးဒီး(သုးက့ ၅)ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်အဘၢၣ်စၢၤတၢ်ဒုးကဲထီၣ်(၅၇)ဘျီအံၤအဃိ ပယီၤသုးသံ(၆)ဂၤဒီးဘၣ်ဒိဘၣ်ထံးဝဲ(၂၀)ဂၤအသိး လၢပှၤသံတဖၣ်အံၤအကျါပၣ်ဃုၥ်ဝဲသုးစကီၤ(၁)ဂၤအဂ့ၢ်န့ၣ် လံၥ်တၢ်ပၥ်ဖျါအပူၤ စံးဝဲန့ၣ်လီၤ. ဒ်န့ၣ်အသိးလၢ(၁၅)သီအတီၢ်ပူၤအံၤစ့ၢ်ကီး သုးမီၤစိရိၤအကဘီယူၤလဲၤခးလီၤတၢ်(၁၆)ဘျီ,တ့ၢ်လီၤဝဲဒြိမ့ၣ်ပိၢ်(၂)ဘျီဒီး ခးလီၤဝဲ (122-MM/120-MM/60-MM)ကျိဖးဒိၣ် ၇ ဘျီလၢဒူသဝီကမျၢၢ်တၢ်ဖံးအီၣ်မၤအီၣ်လီၢ်ကျဲအဃိ ကမျၢၢ်ဘၣ်ဒိဝဲ(၂)ဂၤ အဂ့ၢ်န့ၣ် သ့ၣ်ညါဘၣ်န့ၣ်လီၤ. မုၢ်တြီၢ်ကီၢ်ရ့ၣ်ဟီၣ်ကဝီၤ ဖဲအပူၤကွံၥ်လါယနူၤအါရံၤတလါအတီၢ်ပူၤန့ၣ်စ့ၢ်ကီး ဟီၣ်ကဝီၤ(KNLA)သုးပၥ်ဖှိၣ်ဒီး ပယီၤသုး အဘၢၣ် စၢၤ တၢ်ဒုးကဲထီၣ်ဝဲ(၁၂၆)ဘျီအဃိ ပယီၤသုးတကပၤသံ(၃၄)ဂၤဒီးဘၣ်ဒိဝဲ(၅၈)ဂၤအသိး သုးမီၤစိရိၤအံၤသူဝဲကဘီယူၤ, ဒြိဒီးခး လီၤ ဝဲကျိဖးဒိၣ်ပၥ်ဖှိၣ်အိၣ်လၢ(၅၂)ဘျီညါအဃိ ကမျၢၢ်ဃုၥ်ဒီးဟံၣ်တၢ်သူၣ်ထီၣ်ဟးဂီၤဘၣ်ဒိဘၣ်ထံး ဝဲစ့ၢ်ကီးန့ၣ်လီၤ. တကီၢ်ခါခဲအံၤလီၤဆီဒၣ်တၢ်ဖၣ်ပူၣ်ဒုးယၤသုးလၢၤအံၤစးထီၣ်ဖဲတလါအံၤလါဖ့ၤဘြူၤအါရံၤထီၣ်အံၤန့ၣ် လၢကထီၣ်မၤဆှဲကွံၥ် အီၤအဂီၢ် ဟီၣ်ကဝီၤတၢ်ပၢၢ်ဆၢသုးပၥ်ဖှိၣ်တဖၣ်လဲၤထီၣ်ခးဝဲဒီးဖဲန့ၣ်တၢ်ဒုးဆူၣ်ထီၣ်ဝဲလၢခံခီခံကပၤအဘၢၣ်စၢၤအဃိ ပယီၤသုး သံ ဘၣ်ဒိဘၣ်ထံးအါအသိးတၢ်ပၢၢ်ဆၢသုးပၥ်ဖှိၣ်တကပၤစ့ၢ်ကီးတၢ်ဘၣ်ဒိဘၣ်ထံးအိၣ်ဝဲအါမးအဂ့ၢ်န့ၣ် သ့ၣ်ညါဘၣ် န့ၣ် လီၤ. လၢတၢ်န့ၣ်အဃိတကီၢ်ခါခဲအံၤဟီၣ်ကဝီၤဖဲန့ၣ်အပူၤ ဒုးယၤတၢ်ဖ့ၣ်စၢဆဲးကဲထီၣ်ဒံးဝဲလၢပယီၤသုးဒီးဟီၣ်ကဝီၤတၢ်ပၢၢ်ဆၢ သုးပၥ်ဖှိၣ်ကရူၢ်အဘၢၣ်စၢၤအဖၢမုၢ် အဂ့ၢ်န့ၣ် ဟီၣ်ကဝီၤခိၣ်နၢ်ပှၤဘၣ်မူဘၣ်ဒါဘၣ်ထွဲတဖၣ်စံးဝဲန့ၣ်လီၤ.