နၢ်ဟူလၢတၢ်ကလဲၤခးဝဲအဃိ (DKBA)မၤအါထီၣ်အသုးဂံၢ်ဘါလၢကရူၢ်ခံဘ့ၣ်အပူၤ
လါမးရှး ၄ သီ, ၂၀၂၆ နံၣ်, ခ့ၣ်အဲးစံၣ် ဘူးဒးကညီသုးမုၢ်ဒိၣ်(DKBA)လၢအိၣ်ဆီလီၤသးဖဲခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ်ပူၤတဖၣ် နၢ်ဟူဝဲလၢ တၢ်ကလဲၤခးဝဲအဃိ မၤအါထီၣ်အသုးဂံၢ်ဘါလၢကရူၢ်(၂)ဘ့ၣ်ပူၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါလၢအိၣ်ဘူးဖဲန့ၣ်တဖၣ်စံးဝဲ အသိး သ့ၣ်ညါဘၣ်န့ၣ်လီၤ. (DKBA)သုးခိၣ်ဘိၤဘံၣ်အပှၤလၢအိၣ်ဆီလီၤအသးဖဲနီဖးဒိၣ်ကရူၢ်ဒီးဘူၣ်ပြၢးကရူၢ်ဒူသဝီအခိၣ်အဃၢၤတဖၣ်အံၤ နၢ်ဟူဝဲလၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်-၁ အပှၤကလဲၤခးဝဲအဃိ စးထီၣ်ဖဲမဟါလါမးရှး ၃ သီအနံၤန့ၣ် အဝဲသ့ၣ် မၤအါထီၣ်အသုးဂံၢ်ဘါ,အလီၢ်အကျဲဒီးဟူးဂဲၤဟဲအါထီၣ်အါန့ၢ်အပူၤကွံၥ်အဂ့ၢ်န့ၣ် သ့ၣ်ညါဘၣ်န့ၣ်လီၤ. ဘၣ်ဃးတၢ်ဂ့ၢ်အံၤ လီၢ်ကဝီၤပှၤဘၣ်မူဘၣ်ဒါလၢအိၣ်ဘူးဖဲန့ၣ်ဒီးသ့ၣ်ညါထွဲတၢ်ဂ့ၢ်အံၤတဂၤစံးဝဲလၢ“နၢ်ဟူလၢပှၤကဟဲခးအဝဲသ့ၣ် အဃိခဲအံၤဖဲမဟါန့ၣ်အဝဲသ့ၣ်မၤအါထီၣ်အဂံၢ်အဘါ,ဟူးဂဲၤအါထီၣ်မီၤ.မ့ဝံၤဆီလီၤအါထီၣ်အလီၢ်အကျဲလၢဒူသဝီအခိၣ်အဃၢၤ,လၢတကိၤတဲၤတကပၤန့ၣ်(ဆက်သွယ်ရေး)ကျိၤမ့ၢ်ဂ့ၤ,တၢ်ပူၤမ့ၢ်ဂ့ၤခဲအံၤအဝဲသ့ၣ်မၤအါထီၣ်အတၢ်လီၢ်တၢ်ကျဲမၢ်မၢ်လီၤ.အပူၤကွံၥ်လၢညါဝၣ်မံၤပှၢ်,တကိၤတဲၤ,ထံဃီဝါ,ဝၣ်တြဲၢ်န့ၣ်အဝဲသ့ၣ်ကအိၣ်ဖဲ(၁၀)ဘျဲၣ်ဒ်န့ၣ်လီၤ.ခဲအံၤအဝဲသ့ၣ်တကရူၢ်န့ၣ်ကအိၣ်လၢ(၃၀),(၄၀)ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ. ဒ်လီၢ်ကဝီၤပှၤဘၣ်မူဘၣ်ဒါစံဒီးဝဲအသိးန့ၣ် လီၤဆီဒၣ်တၢ်တၢ်လီၢ်လၢ(DKBA)ရၤလီၤအါထီၣ်အပှၤသ့ၣ်တဖၣ်န့ၢ်မ့ၢ်ဝဲ နီဖးဒိၣ်ဒီး ဘူၣ်ပြၢးကရူၢ်ပူၤဒူသဝီလၢအမ့ၢ် ထံဃီဝါသဝီ,ဖှ့ဒူကျူ,ပြၢးကီး,ဝၣ်တရဲၢ်-,ကၠီတလူၢ်,ဝၣ်မံၤပှၢ်-တကိၤတဲၤတၢ်လီၢ်သ့ၣ်တဖၣ် အံၤန့ၣ်လီၤ. ကရူၢ်ခံဘ့ၣ်အံၤအပူၤအပူၤကွံၥ်(DKBA)သုးခိၣ်ဘိၤဘံၣ်အပှၤအိၣ်ဆီလီၤသးဟူးဂဲၤမ့အိၣ်ဘၣ်ဆၣ်လီၤဆီဒၣ်တၢ် မ့မ့ၢ်လၢ ဝၢ်မံၤပှၢ် သဝီဃၢၤ တကိၤတဲၤဒီးပြၢးကီး,ထံဃီဝါသဝီလၢအိၣ်ဘူးဝဲဒီးဘီနီၤကျိအံၤအဝဲသ့ၣ်အိၣ်ဆီလီၤသးတအိၣ်ဘၣ် ဘၣ်ဆၣ် စးထီၣ်ဖဲ အပူၤကွံၥ်(၂၀၂၅)လါအီကူးဒီးလါစဲးပထ့ဘၢၣ်အခါန့ၣ် (DKBA)နုၥ်လီၤဟံန့ၢ်အလီၢ်အကျဲအိၣ်ဆီလီၤသး ခိးထၢဝဲတၢ်ခိတၢ်သွဲလၢ သိလ့ၣ်လ့ၢ်ထီၣ်လ့ၢ်လိၤတဖၣ်အအိၣ် တုၤလၢခဲအံၤန့ၣ်လီၤ. ဟီၣ်ကဝီၤလၢ(DKBA)နုၥ်လီၤဟူးဂဲၤအိၣ်ဆီလီၤသးအံၤစ့ၢ်ကီးအိၣ်ဝဲလၢ(KNLA) သုးရ့ၣ်-၁ ဟီၣ်ကဝီၤပူၤအဃိ စးထီၣ်ဖဲ အဝဲသ့ၣ်နုၥ်လီၤဟံန့ၢ်အလီၢ်ဆ့ၣ်နီၤအိၣ်ဝဲလီၢ်ခံန့ၣ် ကရူၢ်ခံဒူၣ်အံၤအဘၢၣ်စၢၤတၢ်ဖ့ၣ်စၢကဲထီၣ်အိၣ်ဝဲတလီၢ်လီၢ် တုၤလၢ (DKBA)တၢ်သံတၢ်ဘၣ်ဒိဘၣ်ထံးညါအဂ့ၢ်န့ၣ် သ့ၣ်ညါဘၣ်န့ၣ်လီၤ. တကီၢ်ခါခဲအံၤ(DKBA)လၢအဟူးဂဲၤဖဲကရူၢ်ခံဘ့ၣ်န့ၣ်အပူၤတဖၣ် ဘၣ်တၢ်တီခိၣ်ရိၣ်မဲအီၤလၢသုးခိၣ်စီၤခၠ့ၣ်သါ,သုးခိၣ်မီၤသီမၠၣ် ဒီး သုးခိၣ် စီၤအဲၣ်ဒိၣ်သ့ၣ်တဖၣ်အံၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
ကဖီၣ်ဃၥ်ဂၢၢ်ဃၥ်ဝဲရ့ၣ်နီၣ်သိအပှ့ၤလၢ(၁၅)သီအတီၢ်ပူၤအဂ့ၢ်,ကၠီၣ်တဲၣ်ကိတိၥ်ခိၣ်နၢ်ပၥ်ဖျါဝဲ
လါမးရှး ၄သီ, ၂၀၂၆နံၣ်, ခ့ၣ်အဲးစံၣ်, ကဖီၣ်ဂၢၢ်ဃၥ်ဝဲရ့ၣ်နီၣ်ရ့ၣ်နီၣ်သိ,ဒံၢ်စဲ,သိဒွဲၣ်အကလုၥ်ကလုၥ်အပှ့ၤလၢ(၁၅)သီအတီၢ်ပူၤအဂ့ၢ်,ကီၢ်ကၠီၣ်တဲၥ်တိတိၥ်ခိၣ်ကျၢၢ်(AnutinCharnvirakul)ဒီးပဒိၣ်ခိၣ်နၢ်ဒိၣ်ထီၣ်တဖၣ်ပၥ်ဖျါဝဲအဂ့ၢ်ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါထီၣ်ဝဲဒၣ်ဖဲတနံၤအံၤလါမးရှး(၄)သီအနံၤန့ၣ်လီၤ. ဒ်ကီၢ်ကၠီၣ်တဲၥ်တိတိၥ်ခိၣ်နၢ်အတၢ်ဘိးဘၣ်ပၥ်ဖျါအသိးန့ၣ်တၢ်ရဲၣ်တၢ်ကျဲၤအံၤမ့ၢ်ဒ်သိးသိအလုၢ်ပှ့ၤသုတထီၣ်တဂ့ၤအဂီၢ်ဒီးတၢ်တဘၣ်ပှ့ၤဆိပၥ်ဝဲသိလၢ(ပနံၥ်ဒၢး)ပူၤဘၣ်အသိး,ကျးတဖၣ်ကဘၣ်ဆါဝဲရ့ၣ်နီၣ်သိတလံတၢၣ်၂၉.၉၄ဘးလီၤအဂ့ၢ်,ပာ်ဖျါဝဲဒၣ်န့ၣ်လီၤ. လၢန့ၣ်အမဲၥ်ညါ,ဒ်သိးတၢ်အီၣ်ကဘျံးအီၣ်ကဘျၣ်လၢကမျၢၢ်ပှၤသူစွဲသိတဖၣ်အဖီခိၣ်သုတအိၣ်တဂ့ၤအဂီၢ်,ဘၣ်ဃးသိအလုၢ်အပှ့ၤတၢ်ဂ့ၢ်အံၤတၢ်ပှ့ၤတၢ်ဆါတၢ်ကိတိၥ်ဝဲၤကျိၤ(MinistryofTrade)ပှၤဘၣ်မူဘၣ်ဒါတဖၣ်ကခိးကွၢ်ဝဲဘူးဘူးတံၢ်တံၢ်အဂ့ၢ်,ပၥ်ဖျါဝဲဒၣ်စ့ၢ်ကီးန့ၣ်လီၤ. ကီၢ်ကၠီၣ်တဲၣ်အပူၤဘၣ်ဃးစဲးဖီကဟၣ်ရ့ၣ်နီၣ်သိအတၢ်ရၤလီၤအသးအံၤထံဆၢကီၢ်ဆၢဟီၣ်ကဝီၤတနီၤအပူၤ,တၢ်ဃံးတၢ်စ့ၤအိၣ်ထီၣ်ဝဲဒၣ်လံအဂ့ၢ်,သ့ၣ်ညါဘၣ်ဒ်ကၠီၣ်တဲၣ်လီၢ်ကဝီၤတၢ်ကစီၣ်သန့တဖၣ်ရၤလီၤအသးအသိးန့ၣ်လီၤ. တကးဒံးဘၣ်,ကီၢ်ကၠီၣ်တဲၣ်ကီၢ်ဆၢမဲၢ်ဆီးဝ့ၢ်ဟီၣ်ကဝီၤအပူၤရ့ၣ်နီၣ်သိကျးတနီၤသိလၢၥ်ကွံၥ်ဝဲအိၣ်ဝဲအဂ့ၢ်န့ၣ်,မဲၢ်ဆီးဝ့ၢ်ကီၢ်ပယီၤခီကီၢ်ပှၤမၤတၢ်ဖိတဂၤစံးဝဲဒ်အံၤန့ၣ်လီၤ. “မဲၢ်ဆီးဝ့ၢ်ပူၤတၢ်အိၣ်သးခဲအံၤဒုပှၤလဲၤဒၢလီၤသိန့ၣ်ဒံးဒၣ်တၢ်လီၤ.ဘၣ်ဆၣ်မ့မ့ၢ်ကျးတနီၤဒုသိတအိၣ်လၢၤဘၣ်.ပှၤတနီၤဘၣ်ကိၢ်ဘၣ်ဂီၤဝဲလၢသိကလၢၥ်အဃိလဲၤပှ့ၤသိလဲၤစိၥ်ဃုၥ်ဝဲတၢ်ဒၢအိၣ်အဃိ,ကဒိးန့ၢ်ဘၣ်သိအဂီၢ်ပဘၣ်အိၣ်ခိးဖးယံၥ်ညါန့ၣ်လီၤ.”အဂ့ၢ်စံးဝဲဒၣ်န့ၣ်လီၤ. ကမျၢၢ်လီၢ်ကဝီၤဖိတဖၣ်ဘၣ်ယိၥ်ဘၣ်ဘှီတၢ်ဒီးဂုၢ်ပှ့ၤကရီဝဲရ့ၣ်နီၣ်သိအဃိ,ကီၢ်ကၠီၣ်တဲၣ်ကလံၤထံးကီၢ်ဆၢတးကီၢ်ရ့ၣ်ကီၢ်ဆၢမဲၢ်ဆီး,အိးဖၣ်,ထၣ်စီၤယါဃုၥ်ဒီးဝ့ၢ်ဟီၣ်ကဝီၤအဂၤတဖၣ်အပူၤမဟါလါမးရှး(၃)သီဒီး(၄)သီအနံၤအပူၤရ့ၣ်နီၣ်သိကျးတဖၣ်အပူၤပှဲၤကတံၥ်ဝဲထဲသိလ့ၣ်ဒီးသိလ့ၢ်ယီၢ်အသးကဲထီၣ်ဝဲဒၣ်အသးန့ၣ်လီၤ. လၢတၢ်န့ၣ်အဃိ,ကျးတနီၤဘိးဘၣ်ပၥ်ဖျါဝဲလၢတၢ်တဘၣ်ပှ့ၤပၥ်ဝဲလၢတၢ်ဒၢဖးဒိၣ်အပူၤဘၣ်ဒီးသိလ့ၣ်တခိၣ်ဒၢနုၥ်သိန့ၢ်ဒၣ်ထဲ(၅၀၀)ဘးအိၣ်ဝဲအဂ့ၢ်,ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါအိၣ်ဝဲဒၣ်န့ၣ်လီၤ. ခီဖျိမုၢ်ထီၣ်အခၢၣ်သးအမဲရကၤ-အံၣ်စရ့-အံၤရၣ်ထံကီၢ်တဖၣ်ဒုးယၤတၢ်ဖ့ၣ်ဆၢအိၣ်ထီၣ်ဝဲဒီး,ဟီၣ်ခိၣ်ဒီဖျၢၣ်ဖၠါတၢ်ဘၣ်ယိၣ်အဃိစဲးဖီကဟၣ်ရ့ၣ်နီၣ်သိအပှ့ၤတဂၢၢ်တကျၢၤကဲထီၣ်ဝဲဒၣ်သးအဂ့ၢ်,သ့ၣ်ညါဘၣ်ဒ်ထံဂုၤကီၢ်ဂၤတၢ်ကစီၣ်တဖၣ်ပၥ်ဖျါဝဲဒၣ်န့ၣ်လီၤ. ဒ်န့ၣ်အသိး,ကီၢ်ကၠီၣ်တဲၣ်ပူၤဘၣ်ဃးရ့ၣ်နီၣ်သိအံၤအါတက့ၢ်အတၢ်ဟံးန့ၢ်ဝဲအီၤလၢ(မုၢ်ထီၣ်အခၢၣ်သး)ထံကီၢ်ဒိၣ်ထီတဖၣ်အအိၣ်အဃိ,ဒုးယၤတၢ်ဖ့ၣ်ဆၢအိၣ်ထီၣ်ဝဲဒ်အံၤအဖီခိၣ်တၢ်ဒိဘၣ်အိၣ်ထီၣ်ဝဲဒၣ်ချ့သဒံးအဂ့ၢ်,သ့ၣ်ညါဘၣ်န့ၣ်လီၤ.
ကစၢၢ်ဒိၣ်ကီၢ်ဆၣ်တလါအတီၢ်ပူၤ သုးမီၤစရိၤအတၢ်မၤကမၣ်ပှၤဂ့ၢ်ဝီခွဲးယၥ်အဃိ ကမျၢၢ်သံ(၈)ဂၤ ဒီး ဘၣ်ဒိ(၁၀)ဂၤ
လါမးရှး ၄ သီ, ၂၀၂၆ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်(သုးက့ ၄) ထဲဒၣ်ကစၢၢ်ဒိၣ်ကီၢ်ဆၣ်ဟီၣ်ကဝီၤတဘ့ၣ်အပူၤ လါဖ့ၤဘြူၤအါရံၤတလါအတီၢ်ပူၤ ခီဖျိလၢသုးမီၤစိရိၤအတၢ်မၤကမၣ်ပှၤဂ့ၢ်ဝီခွဲးယၥ်အံၤအဃိ ကမျၢၢ်သံ(၈)ဂၤဒီးဘၣ်ဒိဘၣ်ထံးဝဲ(၁၀)ဂၤအဂ့ၢ်န့ၣ် ကီၢ်ရ့ၣ်တၢ် ကစီၣ် ထုးထီၣ်ပၥ်ဖျါဝဲဖဲ တနံၤအံၤန့ၣ်လီၤ. ကစၢၢ်ဒိၣ်ကီၢ်ဆၣ်ပူၤ စးထီၣ်ဖဲလါဖ့ၤဘြူၤအါရံၤ ၁ သီတုၤလၢ ၂၈ သီ သုးမီၤစိရိၤအ(Y-12)ကဘီယူၤခးလီၤတၢ်(၂၈)ဘျီ ဒီး (Jet fighter)ကဘီယူၤ ခးလီၤတၢ်(၈)ဘျီဆူ စိၤစ့ၤဖၠါ(စုံစင်ဖျား)သဝီ, မ့ဒၣ်(မင်းဒပ်)သဝီ, ကနဲၣ်သံၤရံၣ်(ကနက်သီရိ)သဝီ, ဝ့ဝၣ် (ဝင်းဝ), ပၠ့ဖၠူၣ်သါသဝီ(ပြင်းဖြူသား) ယငဲသဝီ(ရငဲ) ဒီး ခၠီၣ်ခၠီ(ချောက်ချောင်း) သဝီသ့ၣ်တဖၣ်အံၤအပူၤန့ၣ်လီၤ. ခီဖျိလၢကဘီယူၤအံၤအဃိ ကမျၢၢ်သံ(၁)ဂၤ,ဘၣ်ဒိဘၣ်ထံး(၁၀)ဂၤဒီးဟံၣ်တၢ်သူၣ်ထီၣ်ဟးဂီၤ(၁၁)ဖျၢၣ်တကးဒံးဘၣ်အမဲၥ်ညါ ပယီၤသုးအံၤဖီၣ်မၤသံဆှူၣ်မဲၥ်ကဲၤမဲၥ်ဝဲကမျၢၢ်(၇)ဂၤ စ့ၢ်ကီးဝဲန့ၣ်လီၤ. ဒ်န့ၣ်အသိးခီဖျိလၢသုးမီၤစိရိၤအကဘီယူၤဒီးပယီၤသုးကျိၤနုၥ်လီၤဟူးဂဲၤ တၢ်သံတၢ်ဘၣ်ဒိဘၣ်ထံး,တၢ်ဟးဂူၥ်ဟးဂီၤအိၣ်ထီၣ် အဖီခိၣ် လီၢ်ကဝီၤကမျၢၢ်အဂၤ(၅၀၀)ဘျဲၣ်ပျံၤတၢ်ဘၣ်ဃ့ၢ်အိၣ်ကဒုသးလၢတၢ်ဘံၣ်တၢ်ဘၢလီၢ် အဂ့ၢ်န့ၣ် ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ် စံးဝဲန့ၣ်လီၤ. တကးဒံးဘၣ်ကစၢၢ်ဒိၣ်ကီၢ်ဆၣ်အမဲၥ်ညါ လၢတနီသရံၣ်ကီၢ်ဆၣ်အပူၤစ့ၢ်ကီး ဖဲအပူၤကွံၥ်လါဖ့ၤဘြူၤအါရံၤ ၁၃ သီအနံၤ ပယီၤသုးကျိၤလၢနုၥ်လီၤဟီၣ်ကဝီၤပူၤတဖၣ် ဒွဲၣ်အူကွံၥ်ဝဲလဲၤသ့ၣ်သဝီပူၤကမျၢၢ်အဟံၣ်အဖျၢၣ်(၁၀၀)ဘျဲၣ်ကဲထီၣ်ဒံးဝဲဒၣ်န့ၣ်လီၤ.
ယပၣ်ပဒိၣ်ကမၤစၢၤဝဲတးကီၢ်ရ့ၣ်ထံဆၢကီၢ်ဆၢလီၢ်ပှၤဘၣ်ကီဘၣ်ခဲဖိတဖၣ်တၢ်အိၣ်ဆူၣ်အိၣ်ချ့ဂ့ၢ်ဝီ
လါမးရှး ၃သီ, ၂၀၂၆နံၣ်, ခ့ၣ်အဲးစံၣ်, ကီၢ်ကၠီၣ်တဲၣ်ကီၢ်ပယီၤကီၢ်ဆၢ,တးကီၢ်ရ့ၣ်ဟီၣ်ကဝီၤအပူၤပှၤစံၢ်တၢ်ဒုးလီၢ်အိၣ်ကဒုဘၣ်ကီဘၣ်ခဲဖိသ့ၣ်တဖၣ်အံၤယပၣ်ပဒိၣ်ကဆီၣ်ထွဲမၤစၢၤဝဲဒၣ်လၢဆူၣ်ချ့ဂ့ၢ်ဝီတၢ်ဆီၣ်ထွဲမၤစၢၤတကပၤအဂ့ၢ်,(Ministry of foreign Affairs of Japan)တၢ်ဘိးဘၣ်ရၤလီၤထုးထီၣ်ပၥ်ဖျါတ့ၢ်ဝဲဖဲအပူၤကွံၥ်လါဖ့ၤဘြူၤအါရံၤ(၁၇)သီအနံၤအိၣ်ဝဲဒၣ်န့ၣ်လီၤ. ဘၣ်ဃးယပၣ်ကဟ့ၣ်ဝဲတၢ်ဆီၣ်ထွဲမၤစၢၤဆူတးကီၢ်ရ့ၣ်အပူၤကီၢ်ဆၢပှၤဘၣ်ကီဘၣ်ခဲတဖၣ်အံၤန့ၣ်,အပူၤကွံၥ်လါဖ့ၤဘြူၤအါရံၤ(၁၇)သီအနံၤအပူၤယပၣ်ထံကီၢ်ခိၣ်နၢ်ဒိၣ်ထီမီၢ်သီမံးစထၢၣ်အိၤတၤကၤမၤဆၤတိၤဒီး(World HealthOrganization)WHOမၤဝဲတၢ်ထံၣ်လိၥ်တၢၣ်ပီၣ်ဒီးကီၢ်ကၠီၣ်တဲၣ်ပဒိၣ်ခၢၣ်စးဒီးကထၢၣ်(အဲၤလၤလံၤ)ဖဲဘီကီးဝ့ၢ်အပူၤမီၢ်သီမံးစထၢၣ်အိၤတၤကၤမၤဆၤတိၤဆဲးလီၤဝဲစုမုၢ်ကျၢၢ်အဂ့ၢ်,(Ministry of foreign Affairs of Japan)ပၥ်ဖျါထီၣ်ဝဲဒၣ်န့ၣ်လီၤ. (၂၀၂၁)နံၣ်သုးဟံးန့ၢ်တၢ်စိကမီၤအလီၢ်ခံ,ကီၢ်ပယီၤထံလီၢ်ကီၢ်ပူၤတၢ်အိၣ်သးတဂၢၢ်ကျၢၤဘၣ်အဃိ,ကမျၢၢ်လီၢ်ကဝီၤဖိတဖၣ်ဃ့ၢ်ထီၣ်ဝဲဆူထံဆၢကီၢ်ဆၢဒဲကဝီၤတဖၣ်အပူၤအါထီၣ်ဝဲဒၣ်အဂ့ၢ်,(Ministry of foreign Affairs of Japan)ပၥ်ဖျါစ့ၢ်ကီးဝဲဒၣ်န့ၣ်လီၤ. ဒီးတၢ်ဒုးတၢ်ယၤဒီးကမျၢၢ်ဃ့ၢ်ထီၣ်အိၣ်ကဒုဝဲအသးအံၤ,ဒုးအိၣ်ထီၣ်ဝဲဆူၣ်ချ့ဂ့ၢ်ဝီတၢ်ဆီၣ်သနံးလၢကီၢ်ကၠီၣ်တဲၣ်ထံကီၢ်အဖီခိၣ်စ့ၢ်ကီးအဂ့ၢ်,ပၥ်ဖျါဝဲဒၣ်စ့ၢ်ကီးဝဲဒၣ်န့ၣ်လီၤ. တၢ်အိၣ်ဆူၣ်အိၣ်ချ့သနၢၣ်အံၤဒုးဒိၣ်ထီၣ်ထီထီၣ်ဝဲပှၤတဝၢကံၢ်စီဒီးမ့ၢ်ဝဲတၢ်ဒုးအိၣ်ဂၢၢ်အိၣ်ကျၢၤထံဆၢကီၢ်ဆၢဟီၣ်ကဝီၤအဃိ,တၢ်ဖံးတၢ်မၤအံၤမ့ၢ်တၢ်လၢအရ့ဒိၣ်တခါအဂ့ၢ်,(Ministry of foreign Affairs of Japan) ပၥ်ဖျါဝဲဒၣ်န့ၣ်လီၤ. ဆူၣ်ချ့ဂ့ၢ်ဝီတၢ်မၤစၢၤအတၢ်ရဲၣ်တၢ်ကျဲၤအံၤနၥ်ဝဲလၢကမၤဂ့ၤထီၣ်ဝဲဆူၣ်ချ့တၢ်သူၣ်ထီၣ်ဘှီထီၣ်,တၢ်ပီးတၢ်လီ,ပှၤကညီဂံၢ်ဘါအသိးတကတီၢ်ဃီ,နၥ်ဝဲလၢကဒုးဒိၣ်ထီၣ်ထီဝဲထံဆၢကီၢ်ဆၢတၢ်အိၣ်ဂၢၢ်အိၣ်ကျၢၤဝဲအဂ့ၢ်ယပၣ်ပှၤဘၣ်မူဘၣ်ဒါတဖၣ်ကတိၤပၥ်ဖျါဝဲဒၣ်လၢတၢ်ဘိးဘၣ်ပၥ်ဖျါအပူၤန့ၣ်လီၤ. ဒ်န့ၣ်အသိး,တးကီၢ်ရ့ၣ်ဟီၣ်ကဝီၤအပူၤဆူၣ်ချ့ဂ့ၢ်ဝီတၢ်ဆီၣ်ထွဲမၤစၢၤဂံၢ်ဘါကဂ့ၤထီၣ်အဂီၢ်ယပၣ်ဒီး ကၠီၣ်တဲၣ်ပှၤဘၣ်မူဘၣ်ဒါခိၣ်နၢ်ဒိၣ်ထီတဖၣ်အံၤရဲၣ်ကျဲၤဝဲလၢကသူဝဲယပၣ်စ့(၄၅၃)ယါလၢအလီၤလၢဝဲစ့ယိၤ(၉ဝ)ဘျဲၣ်ကကွဲၢ်အဂ့ၢ်,သ့ၣ်ညါဘၣ်န့ၣ်လီၤ.
ရၤမတံဝ့ၢ်ကမျၢၢ်လီၢ်ကဝီၤဖိတဖၣ်ဂုၥ်ကရီပှ့ၤပၥ်ရ့ၣ်နီၣ်သိ
လါမးရှး ၃သီ, ၂၀၂၆နံၣ်, ခ့ၣ်အဲးစံၣ်, ကီၢ်ကၠီၣ်တဲၣ်-ကညီကီၢ်စဲၣ်ကီၢ်ဆၢ,ရၤမတံဝ့ၢ်ဟီၣ်ကဝီၤအပူၤတကီၢ်ခါခဲအံၤရ့ၣ်နီၣ်သိတဖၣ်ဘူးကလၢၥ်ထီၣ်ကွံၥ်ဝဲလံအဃိ,ကမျၢၢ်လီၢ်ကဝီၤဖိတဖၣ်ဆီရဲၣ်လီၤသးဂုၥ်ကရီပှ့ၤဝဲသိအဂ့ၢ်,သ့ၣ်ညါဘၣ်န့ၣ်လီၤ. အပူၤကွံၥ်မဟါလါမးရှး(၂)သီအနံၤအပူၤ,ရၤမတံဝ့ၢ်ပူၤရ့ၣ်နီၣ်သိကျးဖးဒိၣ်တနီၤပံးကွံၥ်ဝဲဒၣ်အသးအဃိ,ကမျၢၢ်လီၢ်ကဝီၤဖိတဖၣ်စးထီၣ်ပှ့ၤကရီဝဲဒၣ်သိလၢမုၢ်နၤခီအဂ့ၢ်,ဝ့ၢ်လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ. ဒီးတနံၤအံၤကျးဖးဒိၣ်တနီၤဝဲဒၣ်အသးဒီးသိလ့ၣ်ဒီးသိလ့ၣ်ယီၢ်(ဆဲးကၢး)ကစၢ်တဖၣ်ရဲၣ်လီၤသးအါအါဂီၢ်ဂီၢ်လၢကျးအိးထီၣ်ဒံးတဖၣ်အပူၤအဃိ,တၢ်ပၥ်ပနီၣ်ဆါလီၤက့ၤဝဲအဂ့ၢ်,ဝ့ၢ်လီၢ်ကဝီၤကမျၢၢ်တဂၤစံးဝဲဒ်အံၤန့ၣ်လီၤ. “ပှၤလဲၤဂုၥ်ကရီရဲၣ်လီၤသးပှ့ၤသိဒီဒူၣ်.ခဲအံၤသိကလၢၥ်လီၤ.ဝ့ၢ်ပူၤကျးဖးဒိၣ်တနီၤနီၤပံးကွံၥ်အသးလံ,ပံးသးကအိၣ်လၢ(၅)ဖျၢၣ်ညါလံ,လၢအိးထီၣ်တနီၤဒုအိၣ်ဒံးဒၣ်တၢ်န့ၣ်လီၤ.ပှၤလဲၤပှ့ၤတၢ်အါတလၢအဃိ,ကျးကစၢ်တဖၣ်ပၥ်ပနီၣ်ဆါလီၤက့ၤဝဲသိလ့ၣ်တခိၣ်န့ၢ်(၅)ကလးလီၤ.မ့မ့ၢ်သိလ့ၣ်ယီၢ်တခီတသ့ၣ်ညါဘၣ်ဒံးဘၣ်”အဂ့ၢ်စံးဝဲဒၣ်န့ၣ်လီၤ. ရၤမတံဝ့ၢ်ပူၤရ့ၣ်နီၣ်သိရၤလီၤတဘၣ်လီၢ်ဘၣ်စးဘၣ်အဃိ,ကမျၢၢ်လီၢ်ကဝီၤဖိတဖၣ်အိၣ်ဝဲဒီးတၢ်ဘၣ်ယိၣ်ဘၣ်ဘှီလၢကဖံးအီၣ်မၤအီၣ်တၢ်အဂီၢ်အဂ့ၢ်,အဝဲစံးအါထီၣ်ဝဲဒၣ်စ့ၢ်ကီးန့ၣ်လီၤ. လၢန့ၣ်အမဲၥ်ညါ,တကီၢ်ခါခဲအံၤဝ့ၢ်ပူၤရ့ၣ်နီၣ်သိတၢ်အိၣ်သးအဖီခိၣ်တၢ်ကီတၢ်ခဲအိၣ်လၢတၢ်ဟးထီၣ်ဟးလီၤအဂ့ၢ်,ဝ့ၢ်လီၢ်ကဝီၤပိၥ်မုၣ်တဂၤစံးစ့ၢ်ကီးဝဲဒ်အံၤန့ၣ်လီၤ. “အပူၤကွံၥ်နံၣ်လၢညါဒုပကလဲၤလၢဖၣ်အၣ်ပဟးလၢခီၣ်လီၤ.ခဲနံၣ်အံၤဒုတၢ်ဟးထီၣ်ဟးလီၤအဂီၢ်ပဘၣ်သူဝဲသိ,ပှၤဒၢးသိလ့ၣ်လီၤအဃိ,သိတအိၣ်လၢၤဘၣ်ဘျီတၢ်ကီတၢ်ခဲအိၣ်ဝဲ.ကမၤကၠါလဲၣ်တဲတဘၣ်လၢၤဘၣ်.”အဂ့ၢ်စံးဝဲဒၣ်န့ၣ်လီၤ. ကၠီၣ်တဲၣ်တကပၤပတုၥ်ကွံၥ်ဝဲတၢ်ရၤလီၤစဲးဖီကဟၣ်ရ့ၣ်နီၣ်သိတဖၣ်အလီၢ်ခံ,ရၤမတံဝ့ၢ်ပူၤဝ့ၢ်လီၢ်ကဝီၤကမျၢၢ်သ့ၣ်တဖၣ်သူက့ၤဝဲရ့ၣ်နီၣ်သိလၢအဟဲထီၣ်လၢကီၢ်ပယီၤလၥ်ခီအဂ့ၢ်,သ့ၣ်ညါဘၣ်န့ၣ်လီၤ. ဒီးပယီၤသုးကရူၢ်အံၤမၤဃံးထီၣ်ဝဲဖိးမံသဲးစးတၢ်စိၥ်ဆှၢစဲးဖီကဟၣ်ရ့ၣ်နီၣ်သိလၢကီၢ်ကီၢ်ပယီၤလၥ်ခီဆူဖၣ်အၣ်ဝ့ၢ်တကပၤဒီးရ့ၣ်နီၣ်သိတဖၣ်ရၤလီၤသးတန့ၢ်လၢၤဘၣ်အဃိ,လီၢ်ကဝီၤဖိတဖၣ်သဂၢၢ်ဘၣ်ရ့ၣ်နီၣ်သိတၢ်ဂ့ၢ်ကီခဲအံၤခဲအံၤအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ. တကတီၢ်ဃီ,ပယီၤသုးပၥ်ပနီၣ်ကးတံၥ်ဝဲဖိးသဲးစးတၢ်စိၥ်ဆှၢရ့ၣ်နီၣ်သိဒ်အံၤအဃိအပူၤကွံၥ်(၂၀၂၅)နံၣ်လါအီကူၥ်အပူၤရၤမတံဝ့ၢ်ပူၤရ့ၣ်နီၣ်သိလၢၥ်ကွံၥ်ဝဲသတူၢ်ကလၥ်ကဲထီၣ်တ့ၢ်ဝဲဒၣ်အသးယံၥ်လၢ(၃)သီဃၣ်ဃၣ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,တကီၢ်ခါခဲအံၤခီဖျိရၤမတံဝ့ၢ်ပူၤတၢ်သဂၢၢ်ဘၣ်ရ့ၣ်နီၣ်သိတၢ်ဂ့ၢ်ကီအဃိ,ကမျၢၢ်လီၢ်ကဝီၤဖိတဖၣ်နုၥ်လီၤဒၢနုၥ်ဝဲသိလ့ၣ်အသိလၢကီၢ်ကၠီၣ်တဲၣ်မဲၢ်ဆီးဝ့ၢ်တကပၤအိၣ်ဝဲအဖီခိၣ်,တနံၤအံၤလါမးရှး(၃)သီအနံၤဂီၤခီအဆၢကတီၢ်,သိလ့ၣ်တဖၣ်ပှဲၤဝဲရၤမတံ,မဲၢ်ဆီးဝ့ၢ်တၢ်ရ့လိၥ်မုၥ်လိၥ်တိၤတၢ်ဟးထီၣ်က့ၤလီၤကျဲပူၤအဂ့ၢ်,ကီၢ်ဆၢဂံၢ်ခီၣ်ထံးတၢ်ကစီၣ်သန့တဖၣ်ပၥ်ဖျါဝဲဒၣ်န့ၣ်လီၤ.
လၢကထီၣ်ဟံန့ၢ်က့ၤထံဆၢကီၢ်ဆၢသုးကလၢၤအဂီၢ်ပယီၤသုးလၢဟဲထီၣ်တုၤတီၤလိကၠီၤတဖၣ်ဂုၤကဒါလီၢ်ခံ
လါမးရှး ၂ သီ, ၂၀၂၆ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဖၣ်အၣ်ကီၢ်ရ့ၣ်(သုးက့ ၇)တၢ်ြကဲၢ်ကီၢ်ဆၣ် ထံဆၢကီၢ်ဆၢသုးကလၢၤလၢအဘၣ်ဟ့ၣ်ဆှူဝဲတဖၣ် လၢကထီၣ်ဟံ န့ၢ်က့ၤဝဲအဂီၢ် ပယီၤသုးလၢအဟဲထီၣ်တုၤဖဲတၢ်ကြဲၢ်ဝ့ၢ်ဆၢခိၣ် တီၤလိကၠီၤကစၢၢ်ခီၣ်ထံးအံၤတဖၣ် ဂုၤကဒါလီၢ်ခံအဂ့ၢ်န့ၣ် သ့ၣ်ညါ ဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ. ပယီၤသုးအံၤလၢကထီၣ်ဟံန့ၢ်က့ၤနီၣ်တယၢ်လူၢ်,တၤလဲၤ,မီၤဖိက့ၣ်သုးကလၢၤသ့ၣ်တဖၣ်အံၤအဂီၢ် တချုးအဝဲသ့ၣ်တုၤ တီၤလိကၠီၤ ဒံးဘၣ်ဖဲအပူၤကွံၥ်လါဖ့ၤဘြူၤအါရံၤ ၂၃ သီအနံၤန့ၣ် လၢတၢ်ြကဲၢ်ဝ့ၢ်အံၤတဆီပယီၤသုးနီၣ်ဂံၢ်(၂၀၀)ဃၣ်ဃၣ်လၢအ ဟဲထီၣ်တဖၣ်အံၤဒီးဟီၣ်ကဝီၤ(KNLA)သုးပၥ်ဖှိၣ်အဘၢၣ်စၢၤတၢ်ဒုးကဲထီၣ်ဝဲန့ၣ်လီၤ. တကးဒံးဘၣ်ပယီၤသုးတဖၣ်အံၤဖဲအတုၤလၢတီၤလိကၠီၤကစၢၢ်ခီၣ်ထံးအခါန့ၣ်စ့ၢ်ကီး တၢ်ဒုးဆဲးကဲထီၣ်ဒံးဝဲဒီး(KNLA)သုးပၥ်ဖှိၣ် အဘၢၣ်စၢၤဘၣ်ဆၣ်ဖဲအပူၤကွံၥ်ခံသီသၢသီအခါန့ၣ်ပယီၤသုးတဖၣ်အံၤတဆဲးထီၣ်ဆူညါဂုၤကဒါလီၢ်ခံဆူ တၢ်ြကဲၢ်ကရူၢ် နိၣ်ချၢၣ် သဝီဒီး ကမါခိၣ်သဝီတကပၤ အဂ့ၢ်န့ၣ် ကီၢ်ဆၣ်နဲၣ်ရွဲၣ်သဃဲၤ ပဒိၣ်စီၤပူလူး စံးဝဲန့ၣ်လီၤ. အဝဲစံးဝဲလၢ“ပယီၤသုးလၢအိၣ်တီၤလိကၠီၤကစၢၢ်ခီၣ်ထံးတဖၣ်န့ၣ်ခဲအံၤတအိၣ်ဖဲန့ၣ်လၢၤဘၣ်က့ၤသုးခံက့ၤအိၣ်ကဒက့ၤလၢနိၣ်ချၢၣ်သဝီဒီး ကမါခိၣ်သဝီန့ၣ်လံ.အဂုၤလီၢ်ခံကအိၣ်လၢ(၃)သၢလံ.လၢတၢ်ြကဲၢ်ဝ့ၢ်ပူၤနါက့ပယီၤသုးအိၣ်လီၤလီၤဆီဆီမီၤနီၤ. အဝဲသ့ၣ်ဂုၤကဒါလီၢ်ခံန့ၣ်လၢတၢ်ဂ့ၢ်မနုၤလဲၣ်တၢ်တသ့ၣ်ညါဝဲဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ် လီၤ. စးထီၣ်ဖဲလါဖ့ၤဘြူၤအါရံၤ ၂၃ သီ ပယီၤသုးလဲၤထီၣ်ဒီတကတီၢ်အပူၤန့ၣ် ပယီၤသုးတကပၤသံဘၣ်ဒိဘၣ်ထံးဝဲ အဂ့ၢ်န့ၣ် ဟီၣ်ကဝီၤတၢ်ကစီၣ်ပၥ်ဖျါဝဲအိၣ်ဘၣ်ဆၣ် ဒ်ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲအသိးန့ၣ် ထဲဒၣ်ဖဲတၢ် ၂၃ သီတနံၤန့ၣ် ခီဖျိလၢတၢ်ဒုးကဲထီၣ်အံၤအဃိ ပယီၤသုးတကပၤသံ(၂)ဂၤ,ဘၣ်ဒိ(၈)ဂၤအဂ့ၢ်န့ၣ် စံးဝဲန့ၣ်လီၤ. တကီၢ်ခါခဲအံၤပယီၤသုးဂုၤကဒါလီၢ်ခံလံဘၣ်ဆၣ်အိၣ်ဒံးဝဲလၢနိၣ်ချၢၣ်,ကမါခိၣ်သဝီပူၤဒီးအဝဲသ့ၣ်အံၤ တၢ်ရဲၣ်တၢ်ကျဲၤကဆဲး အိၣ် ဒ်လဲၣ်တၢ်တသ့ၣ်ညါဝဲဒံးဘၣ်အဃိကရူၢ်(၂)ဘ့ၣ်ပူၤကမျၢၢ်လၢအဃ့ၢ်ထီၣ်တဖၣ်တုၤလၢခဲအံၤက့ၤဟံၣ်က့ၤဃီတဘူၣ်ဒံးဘၣ် အဂ့ၢ် န့ၣ် ကီၢ်ဆၣ်နဲၣ်ရွဲၣ်သဃဲၤ စံးအါထီၣ်ဝဲန့ၣ်လီၤ. “ကမျၢၢ်လၢအဃ့ၢ်ထီၣ်တဖၣ်န့ၣ်က့ၤတဘူၣ်ဒံးဘၣ်.အိၣ်ဒၣ်အဝဲသ့ၣ်န့ၣ်က့ၤကွၢ်ဆူၣ်ဟံၣ်.ပှၤလၢအဘုၣ်ဃၥ်တၢ်ဖိတၢ်လံၤထိး,ကျီၢ်,ပနၢ်တဖၣ်န့ၣ် က့ၤဘုၣ်လီၤအဆၣ်ဝံၤဟဲက့ၤကဒါဒ်န့ၣ်လီၤ. က့ၤမံတ့ၢ်ဒုတဘူၣ်ဒံးဘၣ်”အဂ့ၢ်န့ၣ်...
ဒိးန့ၢ်ဘၣ်က့ၤဝဲကဆီမဲဒီးပၥ်ဝဲလၢတၢ်ဘူၣ်ထီၣ်ဘါထီၣ်လီၢ်အဂ့ၢ်လ့တီၤခိၣ်သဝီဖိစံးဝဲ
လါမးရှး ၂သီ, ၂၀၂၆နံၣ်, ခ့ၣ်အဲးစံၣ်, ဒူသဝီခိၣ်နၢ်သးပှၢ်ဃ့ထီၣ်ဝဲအူးဖၣ်(ကီၢ်ဆၣ်)ပှၤဘၣ်မူဘၣ်ဒါတဖၣ်အဖီခိၣ်,တၢ်ဟ့ၣ်လီၤက့ၤဝဲကဆီမဲလၢဒူသဝီဖိတဖၣ်အစုပူၤဒီးကဆီမဲလၢဒိးန့ၢ်ဘၣ်က့ၤဝဲသ့ၣ်တဖၣ်အံၤပၥ်ဝဲလၢတၢ်ဘူၣ်ထီၣ်ဘါထီၣ်အလီၢ်အဂ့ၢ်,လ့တီၤခိၣ်သဝီဖိတဖၣ်စံးဝဲဒၣ်န့ၣ်လီၤ. ဘၣ်ဃးဒီးလ့တီၤခိၣ်ဒူသဝီဖိတဖၣ်အကဆီမဲအံၤအပူၤကွံၥ်လါဖ့ၤဘြူၤအါရံၤ(၂၆)သီအနံၤအပူၤ,အူးဖၣ်ပှၤဘၣ်မူဘၣ်ဒါတဖၣ်ဟ့ၣ်လီၤက့ၤဝဲလၢသဝီဖိတဖၣ်အစုပူၤအဂ့ၢ်,သ့ၣ်ညါဘၣ်ဒ်ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါထီၣ်ဝဲဒၣ်အသိးန့ၣ်လီၤ. တၢ်ဒိးန့ၢ်ဘၣ်က့ၤကဆီမဲတဖၣ်အလီၢ်ခံဒူသဝီဖိသ့ၣ်တဖၣ်ကဘူၣ်ထီၣ်ဘါထီၣ်အဂီၢ်တၢ်ပၥ်ဝဲလၢတၢ်ဘူၣ်အလီၢ်ဒီး,အသုတလီၤမၢ်လၢၤတဂ့ၤအဂီၢ်တၢ်ပၥ်လီၤဝဲဒီးပှၤအိၣ်ခိးတၢ်တဖၣ်အိၣ်ဝဲဒၣ်အဂ့ၢ်,လ့တီၤခိၣ်သဝီကမျၢၢ်တဂၤစံးဝဲဒ်အံၤန့ၣ်လီၤ. “ပှၤဟဲက့ၤပၥ်ဖဲအံၤကန့ၢ်သၢသီလွံၢ်သီလံ,ကဆီမဲအံၤလ့တီၤခိၣ်သဝီကစၢ်တဖၣ်လဲၤဟံးန့ၢ်က့ၤအီၤလီၤ.ပှၤကလဲၤဘါထီၣ်တနွံတဘျီအဂီၢ်ပှၤဘၣ်လၢတၢ်ဘူၣ်လီၢ်လီၤခဲအံၤ.တလီၤမၢ်တဂ့ၤအဂီၢ်ခီကွၢ်ဟုၣ်အိၣ်,တၢ်ဘူၣ်လီၤန့ၢ်ပှၤလဲၤမံခိးတၢ်အိၣ်ဘၣ်ဆၣ်,(CCTV)တအိၣ်ဘၣ်အဃိပှၤသးမ့က့ၣ်ပှၤပမၤတဘၣ်နီတမံၤဘၣ်”အဂ့ၢ်စံးဝဲဒၣ်န့ၣ်လီၤ. ကဆီမဲသ့ၣ်တဖၣ်အံၤအပူၤကွံၥ်(၂၀၁၇)ဒီး(၂၀၂၀)နံၣ်အပူၤတၢ်အီၣ်ဟုၣ်ကွံၥ်ဝဲကဲထီၣ်တ့ၢ်အသး(၂)ဘျီအိၣ်ဝဲဘၣ်ဆၣ်,ခီဖျိလၢတၢ်ဘၣ်ဘျူးဒံၣ်မိၣ်ကရ့ၣ်စံၣ်ကညီသုးမုၢ်ဒိၣ်(DKBA)ဒီးကၠီၣ်တဲၣ်ပှၤဘၣ်မူဘၣ်ဒါတဖၣ်အတၢ်ဖီၣ်လိၥ်စုမၤသကိးတဆီတၢ်က့ၤမၤန့ၢ်က့ၤဝဲ(၂)ဘျီလၢၥ်အဂ့ၢ်,သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤစွ့ၤဝၣ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,ကဆီမဲလၢတၢ်မၤန့ၢ်က့ၤဝဲလၢပှၤအီၣ်ဟုၣ်တၢ်ဖိသ့ၣ်တဖၣ်အအိၣ်အံၤခီဖျိတၢ်ဘံၣ်တၢ်ဘၢတအိၣ်လၢကဆဲးပၥ်ဝဲအဒူသဝီပူၤဘၣ်အဃိ,အူးဖၣ်ဝ့ၢ်လီၢ်ကဝီၤပှၤဘၣ်မူဘၣ်ဒါတဖၣ်ဘၣ်ဟံမူဒါဖီၣ်ကတီၤပၥ်ဃၥ်န့ၢ်ဝဲဒၣ်လၢအနံၣ်ယံၥ်အလါအါပူၤအဂ့ၢ်,အူးဖၣ်ဝ့ၢ်လီၢ်ကဝီၤပှၤဘၣ်မူဘၣ်ဒါတဂၤစံးစ့ၢ်ကီးဝဲဒၣ်ဒ်အံၤန့ၣ်လီၤ. “တၢ်ဂၢၢ်တၢ်ကျၢၤတအိၣ်ဘၣ်အဃိ,ပှၤတဟ့ၣ်က့ၤအဝဲသ့ၣ်ဘၣ်.တၢ်ကဲထီၣ်သးအခါဘၣ်ဖဲ(ခိၤရိၤနၤ)တၢ်ဆါလီၤအဆၢကတီၢ်အဃိပှၤဘၣ်ဆဲးကတီၤဃၥ်ဝဲန့ၣ်လီၤ.အဝဲသ့ၣ်ဃ့က့ၤဒီးပှၤဟ့ၣ်လီၤဝဲလီၤ.” အဂ့ၢ်စံးဝဲဒၣ်န့ၣ်လီၤ. ကဆီမဲလၢပှၤဘၣ်မူဘၣ်ဒါတဖၣ်ဖီၣ်ကတီၤဃၥ်ဝဲအံၤလ့တီၤခိၣ်ဒူသဝီလီၢ်ကဝီၤဖိတဖၣ်ဘူၣ်ထီၣ်ဘါထီၣ်ဒီး,စူၢ်က့ၤနၥ်က့ၤဝဲလၢကွၢ်ထွဲကဟုကယၥ်ဝဲဒူသဝီဒီးမ့ၢ်တၢ်စီတၢ်ဆှံတၢ်လုၢ်ဒိၣ်ပှ့ၤဒိၣ်တခါလၢမိၢ်ပၢ်ဖံဖုအစိၤအခါလံၤလံၤအဂ့ၢ်,ဒူသဝီဖိတဖၣ်စံးဝဲဒၣ်န့ၣ်လီၤ. တကတီၢ်ဃီ,ကဆီမဲသ့ၣ်တဖၣ်အံၤ(၂)ဘိပၥ်ဖှိၣ်အထီအိၣ်ဝဲ(၁.၇၀)မံးထၢၣ်ဘျဲၣ်ဒီးအဃၢအိၣ်ဝဲ(၄၀)ကံလိကရၢၤမ်အမဲၥ်ညါ,အလိၤဘၣ်တၢ်ကွဲးလီၤဝဲဒီးဘူးဒးတၢ်ဘူၣ်တၢ်ဘါလံၥ်လဲၢ်တၢ်ဂီၤတၢ်ဖီၣ်တဖၣ်ဃံဃံလၤလၤအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ. ကဆီမဲသ့ၣ်တဖၣ်အံၤမ့ၢ်တၢ်ဖိတၢ်လံၤလၢပျၢၤသ့ၣ်တဖၣ်မ့ၢ်တၢ်လုၢ်ဒိၣ်ပှ့ၤဒိၣ်ဃံလၤသ့ၣ်တဖၣ်အဃိ,ကျိၣ်စ့တၢ်သူၣ်လီသးကွံအဖီခိၣ်အပူၤကွံၥ်ပှၤအီၣ်ဟုၣ်တၢ်ဖိတဖၣ်စိၥ်ကွံၥ်ဝဲလၢတၢ်မၤဆါအီၣ်ဝဲဒၣ်ဆူကီၢ်ပယီၤတကပၤအဂ့ၢ်,ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. ဒ်န့ၣ်အသိး,လ့တီၤခိၣ်သဝီအံၤခီဖျိအိၣ်ဝဲလၢထံဆၢကီၢ်ဆၢအဃိတဖိးမံသဲးစးတၢ်မၤကၤစုကဝဲၤ,ကသံၣ်မူၤဘှီးဒီးတၢ်စိၥ်ဆှၢတၢ်အကလုၥ်ကလုၥ်အိၣ်ဝဲဒီးတၢ်ဘံၣ်တၢ်ဘၢစှၤဝဲအဃိ,ဒူသဝီလီၢ်ကဝီၤဖိတဖၣ်မုၢ်လၢ်ဝဲလၢခိၣ်နၢ်ပှၤဘၣ်မူဘၣ်ဒါဖၣ်ကမၤဂ့ၤထီၣ်ဝဲတၢ်ဘံၣ်တၢ်ဘၢအဂ့ၢ်,ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲဒၣ်န့ၣ်လီၤ.
KTLA မၤန့ၢ်ထံဖိကီၢ်ဖိကမျၢၢ်ခိၣ်ဂီၤအဖီခိၣ် KNU စံးဝဲဒ်လဲၣ်
KTLA မၤန့ၢ်ထံဖိကီၢ်ဖိကမျၢၢ်ခိၣ်ဂီၤအဖီခိၣ် KNU စံးဝဲဒ်လဲၣ် လါမးရှး ၁ သီ, ၂၀၂၆ နံၣ်, ခ့ၣ်အဲးစံၣ် ဖဲအပူၤကွံၥ်လါယနူၤအါရံၤ ၅ သီအနံၤန့ၣ် ကီၢ်သူလ့ၤသုးမုၢ်ဒိၣ်(KTLA)လၢအဘၣ်တၢ်တီခိၣ်ရိၣ်မဲအီၤလၢသုးရိၣ်မဲခိၣ်ကျၢၢ် စီၤနၢၤဒါ အံၤ ဘိးဘၣ်ရၤလီၤဝဲထံကီၢ်တၢ်သဘျ့ဒီး ကီၢ်သူလ့ၤပဒိၣ်တဖုန့ၣ်လီၤ. ဒီးဖဲန့ၣ်ဝံၤလီၢ်ခံဒ်သိးထံဂုၤကီၢ်ဂၤကသ့ၣ်ညါပၥ်ပနီၣ်ကညီကလုၥ်အဂီၢ် တလါဃီဖဲန့ၣ် သုးရိၣ်မဲခိၣ်ကျၢၢ် စီၤနၢၤဒါ တီခိၣ်ရိၣ်မဲ မၤန့ၢ်ဝဲကမျၢၢ် ထံဖိကီၢ်ဖိခိၣ်ဂီၤ(ID card)လၢအဝဲသ့ၣ်ဟီၣ်ကဝီၤတၢ်ပၢလၢအဒိၣ်စိဝဲန့ၢ်တဖၣ် အပူၤ တကးဒံးဘၣ်လီၤဆီဒၣ် တၢ် ကမျၢၢ်လၢအတုၤအိၣ်ကီၢ်သၢဘ့ၣ်တဘ့ၣ်သ့ၣ်တဖၣ်စ့ၢ်ကီးတနီၤနုၥ်လီၤပၣ်ဃုၥ်ပၣ်ဂီၢ်ဝဲဒၣ်လၢတၢ်တ့ ခိၣ်ဂီၤဘျီဝဲအံၤအိၣ်ဝဲဒၣ်န့ၣ် လီၤ. ဘၣ်ဆၣ်လၢ(KTLA)တ့န့ၢ်ဝဲကမျၢၢ်ခိၣ်ဂီၤ(ID card)အံၤကမျၢၢ်ထံဖိကီၢ်ဖိလၢအိၣ်ကီၢ်ပူၤထံဆၢကီၢ်ဆၢဒီး ထံချၢကီၢ်ချၢအံၤတဖၣ် တနီၤန့ၣ် တူၢ်လိၥ်ဆီၣ်ထွဲဝဲအိၣ်အသိး တနီၤန့ၣ်လၢသုးရိၣ်မဲခိၣ်ကျၢၢ် စီၤနၢၤဒါ အတၢ်ဖံးတၢ်မၤအဖီခိၣ်အံၤ ကမျၢၢ်ထံဖိကီၢ်ဖိလၢ အဆီၣ်ထွဲ (ခ့ၣ်အဲၣ်ယူၣ်)အံၤတဖၣ်တူၢ်လိၥ်ဝဲတအိၣ်ဘၣ်အဃိ လၢကညီဖိအကျါတၢ်ပဲၥ်ထံနီၤဖးအိၣ်ထီၣ်ဝဲအကလုၥ် ကလုၥ်န့ၣ် လီၤ. ဒီးလၢ(KTLA)အခိၣ် သုးရိၣ်မဲခိၣ်ကျၢၢ် စီၤနၢၤဒါ အတၢ်ဘိးဘၣ်ရၤလီၤဝဲတၢ်သဘျ့ဒီးထံကီၢ်ပဒိၣ်အံၤအဖီခိၣ်စ့ၢ်ကီး အခီပညီ တအိၣ်ဒီးတခၢၣ်စးစ့ၢ်ကီးဝဲကမျၢၢ်ထံဖိကီၢ်ဖိဘၣ်အဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ထုးထီၣ်လံၥ်က့ၤခီၣ်ဆၢတ့ၢ် ကဒါ ဝဲအိၣ်စ့ၢ်ကီးန့ၣ်လီၤ. “ပနၢ်ဟူဘၣ်တၢ်တ့ခိၣ်ဂီၤအါမံၤအဖီခိၣ်ပအဲၣ်ဒိးတဲလၢတၢ်သ့ၣ်တဖၣ်အံၤပဟီၣ်ကဝီၤပူၤဒ်သိးထံလီၢ်ကီၢ်ပူၤဝဲၤကျိၤအတၢ်ရဲၣ်တၢ်ကျဲၤ,ကီၢ်ရ့ၣ်အတၢ်ရဲၣ်တၢ်ကျဲၤတဖၣ်မ့တလီၤဂၥ်ဘၣ်န့ၣ်ပတဲအဂ့ၢ်တသ့ဘၣ်ပတဲတဘၣ်စ့ၢ်ကီးဘၣ်.အဃိထံဖိကီၢ်ဖိကမျၢၢ်တဖၣ်မ့သ့ၣ်ညါတၢ်ဂ့ၢ်ဒ်အံၤန့ၣ်တၢ်တ့ခိၣ်ဂီၤန့ၣ်တမ့ၢ်တၢ်အညီဘၣ်.တၢ်ဂ့ၢ်တၢ်ကျိၤတၢ်တဒ်သိးတဖၣ်ဟဲပၢၢ်ထီၣ်အိၣ်အဖီခိၣ်ဆၢကတီၢ်မ့ဘၣ်န့ၣ်တၢ်ကဒုးသ့ၣ်ညါက့ၤပထံဖိကီၢ်ဖိလီၤတံၢ်လီၤဆဲးလၢတၢ်ဘိးဘၣ်ရၤလီၤအကျိၤအကျဲမ့ၢ်ဂ့ၤ,တၢ်ဘိၤသ့ၣ်ညါလၢတၢ်ကကွဲးတၢ်ကစီၣ်မ့ၢ်ဂ့ၤန့ၣ်ကအိၣ်ဝဲလီၤ.ခ့ခါခဲအံၤဒုပနၢ်ပၢၢ်အပတီၢ်တုၤလၢဖဲန့ၣ်တလိၣ်ဒံးဘၣ်.ဒ်သိးပထံဖိကီၢ်ဖိကမျၢၢ်မ့နၢ်ဟူပဲၥ်ထံနီၤဖးတၢ်ကသ့အဂီၢ်ဒုအလီၢ်အိၣ်သပှၢ်ကတၢၢ်လၢဆၢကတီၢ်မ့တုၤန့ၣ်ပကဒုးသ့ၣ်ညါအါထီၣ်လီၤမီၤနီၤ” အ၀ဲအံၤမ့ၢ်၀ဲ ခ့ၣ်အဲၣ်ယူၣ် ပှၤကတိၤတၢ်ပၢ ပဒိၣ်စီၤကျၢၤစ့ စံးဝဲဘၣ်ဃးတၢ်တ့န့ၢ်လံၥ်ခိၣ်ဂီၤတၢ်ဂ့ၢ်န့ၣ်လီၤ. စးထီၣ်ဖဲ(KTLA)အခိၣ်...
တၢ်မၤဃံးထီၣ်ဖိးမံသဲးစးတၢ်စိၥ်ဆှၢရ့ၣ်နီၣ်သိအဃိ,ရၤမတံဝ့ၢ်သိလၢကမျၢၢ်သူအါဝဲတဖၣ်လၢၥ်ကွံၥ်ဝဲ
လါမးရှး ၁သီ, ၂၀၂၆နံၣ်, ခ့ၣ်အဲးစံၣ်, ပယီၤသုးကရူၢ်မၤဃံးထီၣ်ဝဲဖိးမံသဲးစးတၢ်စိၥ်ဆှၢစဲးဖီကဟၣ်ရ့ၣ်နီၣ်သိလၢဖၣ်အၣ်ဝ့ၢ်ဒီးသိရၤလီၤသးတန့ၢ်လၢၤဘၣ်အဃိ,ကညီကီၢ်စဲၣ်ကီၢ်ဆၢရၤမတံဝ့ၢ်ဟီၣ်ကဝီၤအပူၤသိလၢကမျၢၢ်သူဝဲအါတဖၣ်လၢၥ်ကွံၥ်ဝဲဒၣ်အဂ့ၢ်,လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ. ခီဖျိသိလၢဖၣ်အၣ်တဖၣ်တၢ်စိၥ်ဆှၢအီၤပတုၥ်ကွံၥ်ဝဲအသးအဃိ,တကီၢ်ခါခဲအံၤဝ့ၢ်ပူၤရ့ၣ်နီၣ်သိလၢတၢ်သူဝဲအါကတၢၢ်ဒ်အမ့ၢ်(၉၅)သ့ၣ်တဖၣ်တအိၣ်လၢၤဝဲဒၣ်ဘၣ်အဂ့ၢ်,ဝ့ၢ်လီၢ်ကဝီၤကမျၢၢ်တဂၤစံးဝဲဒ်အံၤန့ၣ်လီၤ. “သိတဟဲထီၣ်ဖဲပအိၣ်ဘၣ်စးထီၣ်လၢတၢ်ခးလိၥ်သးကဲထီၣ်လၢတၢ်ြကဲၢ်အခါလံၤလံၤန့ၣ်လီၤ.အခဲအံၤပှၤကသူဂီၢ်ဝ့ၢ်ပူၤသိကျးတဖၣ်အပူၤအိၣ်တ့ၢ်ဒံးတဆံးတက့ၢ်န့ၣ်လီၤ.ဘၣ်ဆၣ်မ့မ့ၢ်လၢသိလၢပှၤသူအါဒ်သိး(၉၅)တဖၣ်န့ၣ်ဒုတအိၣ်လၢၤဘၣ်.”အဂ့ၢ်စံးဝဲန့ၣ်လီၤ. လၢန့ၣ်အမဲၥ်ညါ,တၢ်စိၥ်ဆှၢရ့ၣ်နီၣ်သိလၢရၤမတံဝ့ၢ်ပူၤအံၤပတုၥ်ကွံၥ်ဝဲအသးစးထီၣ်လၢအပူၤကွံၥ်လါဖ့ၤဘြူၤအါရံၤသၢနွံတနွံနုၥ်လီၤအခါလံၤလံၤအဂ့ၢ်,အဝဲစံးအါထီၣ်ဝဲဒၣ်န့ၣ်လီၤ. ရၤမတံဝ့ၢ်အံၤကၠီၣ်တဲၣ်တကပၤပတုၥ်ကွံၥ်ဝဲတၢ်ရၤလီၤစဲးဖီကဟၣ်ရ့ၣ်နီၣ်သိအလီၢ်ခံ,လီၢ်ကဝီၤကမျၢၢ်တဖၣ်သူက့ၤဝဲသိလၢဟဲထီၣ်ဆူကီၢ်ပယီၤလၥ်ခီတဖၣ်ဘၣ်ဆၣ်သုးကရူၢ်မၤဝဲတၢ်ပၥ်ပနီၣ်တၢ်ဝံစိၥ်တီဆှၢဒီးတၢ်ကးတံၥ်ကျဲတဖၣ်အဃိကမျၢၢ်လီၢ်ကဝီၤဖိတဖၣ်သဂၢၢ်ဘၣ်သိတၢ်ဂ့ၢ်ကီအိၣ်ဝဲတပယူၥ်ဃီအဂ့ၢ်,သ့ၣ်ညါဘၣ်န့ၣ်လီၤ. လၢတၢ်န့ၣ်အဃိ,ဒ်သိးကန့ၢ်ဘၣ်သိအဂီၢ်ဝ့ၢ်လီၢ်ကဝီၤဖိတနီၤလဲၤဒၢလီၤဝဲရ့ၣ်နီၣ်သိလၢကၠီၣ်တဲၣ်ပူၤ,လၢအနီၢ်ကစၢ်သိလ့ၣ်ဒီးက့ၤရၤလီၤဆါကဒါက့ၤဝဲလၢကျဲကပၤတဆီအိၣ်ဝဲအဖီခိၣ်,အပူၤကွံၥ်လါဖ့ၤဘြူၤအါရံၤ(၁၉)သီအနံၤအပူၤသုးကရူၢ်မၤဝဲတၢ်သမံသမိးဖီၣ်ကမျၢၢ်လီၢ်ကဝီၤဖိလၢရၤလီၤဆါတၢ်တဖၣ်ကဲထီၣ်တ့ၢ်ဝဲအသိးအိၣ်ဝဲအဂ့ၢ်,သ့ၣ်ညါစ့ၢ်ကီးန့ၣ်လီၤ. ဒီးတၢ်ရၤလီၤဆါကၠီၣ်တဲၣ်သိအံၤစံးဝဲလၢတဖိးမံသဲးစးအဃိ,မၤပျံၤမၤဖုးဝဲပှၤရၤလီၤဆါတၢ်တဖၣ်လၢကဘၣ်လီၤလၢဃိၥ်ပူၤဒီးဟံးန့ၢ်ဝဲစ့အီၣ်လိးတဖၣ်အိၣ်ဝဲအဂ့ၢ်,လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ. ရၤမတံဝ့ၢ်အံၤမ့ၢ်ဝဲမုၢ်ကျိၤဝဲၤကွၥ်တၢ်ဖံးအီၣ်မၤအီၣ်လီၢ်ဂ့ၤအဝ့ၢ်တဖျၢၣ်အသိးခီဖျိအိၣ်ဝဲဒီးကၣ်စံၣ်နိၣ်တၢ်လိၣ်ခိၣ်လိၣ်ကွဲဒီးတၢ်တၤကျိၣ်တၢ်စ့တၢ်မၤအလီၢ်တဖၣ်အဖီခိၣ်,ဘၣ်တၢ်သ့ၣ်ညါဝဲလၢအမ့ၢ်ဝ့ၢ်တဝ့ၢ်လၢအသူဝဲရ့ၣ်နီၣ်သိအါဝဲတဖျၢၣ်အဂ့ၢ်,သ့ၣ်ညါဘၣ်န့ၣ်လီၤ. ဒီးအပူၤကွံၥ်(၂၀၂၅)နံၣ်လါအီကူၥ်အပူၤရ့ၣ်နီၣ်သိလၢၥ်ကွံၥ်ဝဲသတူၢ်ကလၥ်ကဲထီၣ်တ့ၢ်ဝဲအသးအိၣ်ဝဲသးအဃိ,တကီၢ်ခါခဲအံၤတၢ်အိၣ်သးအဖီခိၣ်ကမျၢၢ်လီၢ်ကဝီၤဖိတဖၣ်ဘၣ်ယိၣ်ဘၣ်ဘှီဝဲဒၣ်တၢ်လၢသိကလၢၥ်ကွံၥ်ဝဲသတူၢ်ကလၥ်ဒ်အပူၤကွံၥ်နံၣ်အသိးအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,တကီၢ်ခါခဲအံၤတၢ်အိၣ်သးအဖီခိၣ်ဝ့ၢ်လီၢ်ကဝီၤကမျၢၢ်တဖၣ်အိၣ်ဝဲဒီးတၢ်ဘၣ်ယိၣ်လၢရ့ၣ်နီၣ်သိအပှ့ၤကထီၣ်ဝဲဒၣ်စ့ၢ်ကီးအဂ့ၢ်,လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ.
ပယီၤသုးခီၣ်ချ့သုးရ့ၣ်(၄၀၉)မၤသံကွံၥ်ဝဲကစၢၢ်ဒိၣ်ကီၢ်ဆၣ်စူၣ်စ့ၣ်ဖၠါလီၢ်ကဝီၤဖိ(၇)ဂၤ
လါဖ့ၤဘြူၤအါရံၤ ၂၈သီ, ၂၀၂၆နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢသုးက့(၆)ဘျံးဒဝဲၢ်ကီၢ်ရ့ၣ်,ကစၢၢ်ဒိၣ်ကီၢ်ဆၣ်စူၣ်စ့ၣ်ဖၠါသဝီဟီၣ်ကဝီၤအပူၤပယီၤသုးခီၣ်ချ့သုးရ့ၣ်(၄၀၉)ထိသုးကျိၤသ့ၣ်တဖၣ်မၤသံဝဲကမျၢၢ်လီၢ်ကဝီၤဖိ(၇)ဂၤအဂ့ၢ်,ခ့ၣ်အဲၣ်ယူၣ်ဘျံးဒဝဲၢ်ကီၢ်ရ့ၣ်ထုးထီၣ်ဘိးဘၣ်ပၥ်ဖျါဝဲဒၣ်ဖဲတနံၤအံၤလါဖ့ၤဘြူၤအါရံၤ(၂၈)သီအနံၤန့ၣ်လီၤ. ပယီၤသုးခီၣ်ချ့သုးရ့ၣ်(၄၀၉)ထိသုးကျိၤလၢကလဲၤမၤပှဲၤအါထီၣ်ဝဲဂံၢ်ဘါလၢဝ့ဝးသုးကလၢၤသ့ၣ်တဖၣ်အံၤအပူၤကွံၥ်လါဖ့ၤဘြူၤအါရံၤ(၂၇)သီအနံၤပူၤဖဲဟဲထီၣ်ဝဲလၢကျဲအဆၢကတီၢ်ဖီၣ်ဝဲစူၣ်စ့ၣ်ဖၠါသဝီလီၢ်ကဝီၤကမျၢၢ်ပိၥ်ခွါ(၂)ဂၤဒီးလီၢ်ကဝီၤပိၥ်မုၣ်(၅)ဂၤဝံၤအလီၢ်ခံ,မၤသံကွံၥ်ဝဲဆူၣ်မဲၥ်ကဲၤမဲၥ်အဂ့ၢ်,ခ့ၣ်အဲၣ်ယူၣ်ဘျံးဒဝဲၢ်ကီၢ်ရ့ၣ်တၢ်ဘိးဘၣ်ပၥ်ဖျါပၥ်ဖျါဝဲဒၣ်န့ၣ်လီၤ. ဒီးလီၢ်ကဝီၤဖိလၢပယီၤသုးမၤသံကွံၥ်ဝဲတဖၣ်အံၤမ့ၢ်စူၣ်စ့ၣ်ဖၠါသဝီလီၢ်ကဝီၤဖိလၢအဃ့ၢ်အိၣ်သဒၢအသးလၢကဘီယူၤတၢ်လီၤဘၣ်ယိၣ်တဖၣ်အဂ့ၢ်,ဟီၣ်ကဝီၤပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ. “ကမျၢၢ်သ့ၣ်တဖၣ်အံၤဒ်သိးပသ့ၣ်ညါန့ၣ်မ့ၢ်ပှၤသ့ၣ်တဖၣ်လၢဃ့ၢ်အိၣ်သဒၢအသးသ့ၣ်တဖၣ်န့ၣ်လီၤ.ဘၣ်မနုၤအဃိလဲၣ်န့ၣ်အသုသဝီပူၤန့ၣ်အပူၤကွံၥ်စှၤသီပယီၤသုးကဘီယူၤဟဲတ့ၢ်လီၤတၢ်တကးဘၣ်တုၤခဲအံၤတၢ်ဒုးတၢ်ယၤအိၣ်ဝဲအဃိအဝဲသ့ၣ်ဟးထီၣ်အိၣ်ကဒုဆိအသးလၢသဝီချၢန့ၣ်လီၤ.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,လီၢ်ကဝီၤကမျၢၢ်သ့ၣ်တဖၣ်အံၤမ့ၢ်ဒၣ်ပှၤမၤအီၣ်မုၢ်ဆ့ၣ်မုၢ်ဂီၤဒီးအတၢ်ဘၣ်ထွဲဒီးတၢ်ပၢၢ်ဆၢတၢ်ဖံးတၢ်မၤတအိၣ်ဝဲနီတဂၤဘၣ်အဂ့ၢ်,စံးအါထီၣ်ဝဲဒၣ်စ့ၢ်ကီးန့ၣ်လီၤ. ဘျံးဒဝဲၢ်ကီၢ်ရ့ၣ်,ကစၢၢ်ဒိၣ်ကီၢ်ဆၣ်ဟီၣ်ကဝီၤအပူၤတကီၢ်ခါခဲအံၤကညီဒီကလုၥ်တၢ်ထူၣ်ဖျဲးသုးမုၢ်(KNLA)သုးရ့ၣ်(၁၂)ဒီးတၢ်ပၢၢ်ဆၢသုးပၥ်ဖှိၣ်တဖၣ်ထီၣ်ဝဲသုးကရူၢ်(ဝ့ဝး)သုးကလၢၤအဃိ,သုးခီၣ်ချ့သုးရ့ၣ်(၄၀၉)လၢအိၣ်(သယဲၣ်ခၠီ)သ့ၣ်တဖၣ်အံၤလၢကလဲၤမၤအါထီၣ်ဝဲဒၣ်စ့ၣ်ကူၤအဂီၢ်ဟဲထီၣ်ဝဲဒၣ်အဂ့ၢ်,ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. တကတီၢ်ဃီ,လၢတၢ်ကလဲၤမၤအါထီၣ်ဝဲဂံၢ်ဘါအဂီၢ်သုးကရူၢ်အံၤမၤဝဲကဘီယူၤတၢ်ထီၣ်ဒုးလၢကမျၢၢ်လီၢ်ကဝီၤဖိအိၣ်ဆိးဟီၣ်ကဝီၤတဖၣ်တပယူၥ်ဃီအဃိ,အပူၤကွံၥ်လါဖ့ၤဘြူၤအါရံၤ(၂၃)သီအနံၤအပူၤဘၣ်ဒိဘၣ်ထံးဝဲစူၣ်စ့ၣ်ဖၠါသဝီလီၢ်ဖိတဂၤအသိး,ဘၣ်သံဝဲတဂၤအမဲၥ်ညါကမျၢၢ်ဟံၣ်(၄)ဖျၢၣ်ဘၣ်ဟးဂီၤဝဲအဂ့ၢ်,ခ့ၣ်အဲၣ်ယူၣ်ဘျံးဒဝဲၢ်ကီၢ်ရ့ၣ်ဘိးဘၣ်ပၥ်ဖျါတ့ၢ်ဝဲဒၣ်အိၣ်ဝဲဒၣ်န့ၣ်လီၤ. ဒ်န့ၣ်အသိး,ခီဖျိပယီၤသုးကရူၢ်မၤကဘီယူၤတၢ်ထီၣ်ဒုးတပယူၥ်ဃီအဃိတကတီၢ်ခါခဲအံၤ,စူၣ်စ့ၣ်ဖၠါ,မ့ဒး,ယငဲ,ဃုၥ်ဒီးခိၣ်ဃၢၤသဝီတစှၤန့ၢ်(၅)ဖျၢၣ်လီၢ်ကဝီၤသ့ၣ်တဖၣ်ဘၣ်ဃ့ၢ်ထီၣ်အိၣ်ကဒုဝဲဒၣ်အသးအဂ့ၢ်,သ့ၣ်ညါဘၣ်ဒ်ပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ.