တၢ်သဘံၣ်သဘုၣ်လၢအဟဲကဲထီၣ်၀ဲလၢကညီဖိကဒဲကဒဲအဘၢၣ်စၢၤအံၤ ကြၢးတၢ်ကပတု၁်ကွံာ်အီၤလံ
တၢ်သဘံၣ်သဘုၣ်လၢအဟဲကဲထီၣ်၀ဲလၢကညီဖိကဒဲကဒဲအဘၢၣ်စၢၤအံၤ ကြၢးတၢ်ကပတု၁်ကွံာ်အီၤလံ လါယူၤလံ ၃၀ သီႇ ၂၀၂၃ နံၣ်ႇ ခ့ၣ်အဲးစံၣ် ဖီၣ်မူၤစှၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ ဘျံးဒ၀ဲၢ်ကီၢ်ရ့ၣ်(သုးက့ ၄)ဟီၣ်က၀ီၤအပူၤ တၢ်သဘံၣ်သဘုၣ်လၢအဟဲကဲထီၣ်၀ဲဒၣ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးသုးခိၣ်စီၤနၢၤဒါမၠးတီခိၣ်ရိၣ်မဲကီၢ်သူလ့ၤသုးမုၢ်ဒိၣ်(KTLA)အဘၢၣ်စၢၤသ့ၣ်တဖၣ်အံၤဟဲဒိၣ်ထီၣ်၀ဲဒၣ်ကွ့ၢ်ကွ့ၢ်အသိးတၢ်ကစီၣ်တခါအံၤကဲထီၣ်၀ဲဒၣ်တၢ်သူၣ်အုးသးအုးလၢၦၤကညီဖိအကျါန့ၣ်လီၤႉ တၢ်ဘၣ်ဂံာ်ဂူ၁်တၢ်ဖ့ၣ်စၢလၢအဟဲကဲထီၣ်၀ဲဒၣ်လၢခံခီခံကပၤအဘၢၣ်စၢၤအံၤတမ့ၢ်တၢ်က့ၤဒုးက့ၤခီၣ်ဆၢကဒါက့ၤ ဒုၣ်ဒါသုးမီၤစိရိၤအံၤလၢၤဘၣ်ႇမ့မ့ၢ်တခီမ့ၢ်ဒၣ်ကညီဖိကဒဲကဒဲတၢ်က့ၤခးလီၤကဒါသးလီၤဒီးလီၢ်ခံကတၢၢ်ကဲထီၣ်ပၢၢ်တုၤလၢကညီဖီၣ်စုက၀ဲၤကဒဲကဒဲတၢ်ဂာ်သွံၣ်ဂာ်စိာ်တၢ်သံတၢ်ၦၢ်တစုညါန့ၣ်လီၤႉ တၢ်ဂ့ၢ်စးထီၣ်ကဲထီၣ်န့ၣ်လၢဘျံးဒ၀ဲၢ်–ထံခံကီၢ်ဆၢကျဲ ခံခီခံကပၤအဘၢၣ်စၢၤတၢ်ဒုးကဲထီၣ်၀ဲဒီး ဘၣ်ဆၣ်ဖဲလါယူၤလံအတီၢ်ပူၤတၢ်ဘၣ်ဂံာ်ဂူာ်လၢအဟဲကဲထီၣ်၀ဲလၢခံခီခံကပၤအဘၢၣ်စၢၤအံၤ သူၣ်ထီၣ်က့ၤ တၢ်နာ်န့ၢ်လိာ်သးတန့ၢ်လၢၤ၀ဲဘၣ်ဒီးဖဲန့ၣ်တဆီတၢ်ဂ့ၢ်အံၤဒိၣ်ထီၣ်၀ဲဒၣ်ကွ့ၢ်ကွ့ၢ်န့ၣ်လီၤႉ ဖဲလါယူၤလံ ၁၅ သီအနံၤန့ၣ် ခ့ၣ်အဲၣ်ယူၣ်(သုးက့ ၄)ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)စုတီၤဖီလာ် သုးရ့ၣ်(၁၀)လဲၤထီၣ်ခး၀ဲကီၢ်သူလ့ၤသုးမုၢ်ဒိၣ်(KTLA)ကရူၢ်လၢအိၣ်၀့ၢ်တၢ်အဲၣ်–ထံခံကျဲအံၤဒီး ဖဲန့ၣ်တၢ်ဒုးက့ၤကဲထီၣ် ကဒါအသီတဘျီကဒီးအဂ့ၢ်န့ၣ် ဂံၢ်ခီၣ်ထံးတၢ်ကစီၣ်တဖၣ်စံး၀ဲအသိးသ့ၣ်ညါဘၣ်န့ၣ်လီၤႉ တၢ်ဒုးကဲထီၣ်တၢ်ဂ့ၢ်ခီန့ၣ်ဖဲလါယူၤလံ ၂၁ သီအနံၤ ဖဲခ့ၣ်အဲၣ်ယူၣ်ဆူၣ်ချ့မၤစၢၤ၀ဲၤကျိၤအံၤလဲၤဆှၢ၀ဲကသံၣ်ကသီဆူ ကီၢ်ဆၣ်၀ဲၤဒၢးအခါန့ၣ်(KTLA)သုးခိၣ်အဲၣ်ခွံအၦၤလၢအိၣ်၀့ၢ်တၢ်အဲၣ်–ထံခံကျဲသ့ၣ်တဖၣ်အံၤတပျဲလဲၤ၀ဲဘၣ်ဒီး ဖဲလါယူၤလံ ၁၃ သီအခါစ့ၢ်ကီး(KTLA)တပျဲလဲၤ၀ဲဒၣ်(ခ့ၣ်အဲၣ်ယူၣ်)ကစၢၢ်ဒိၣ်ကီၢ်ဆၣ် ဆူၣ်ချ့မၤစၢၤ၀ဲၤကျိၤ ၦၤဘၣ်မူဘၣ်ဒါအသိလ့ၣ်ဘၣ်ႇခး၀ဲသိလ့ၣ်ဘ့အဂ့ၢ်န့ၣ် ခ့ၣ်အဲၣ်ယူၣ် ဘျံးဒ၀ဲၢ်ကီၢ်ရ့ၣ်တကပၤ စံး၀ဲန့ၣ်လီၤႉ ကီၣ်ရ့ၣ်ၦၤဘၣ်မူဘၣ်ဒါတဖၣ်စံး၀ဲလၢ ဖီၣ်စုက၀ဲၤကရူၢ်၀ဲအံၤလၢအတအိၣ်ဒီး(ခ့ၣ်အဲၣ်ယူၣ်)တၢ်ပျဲဘၣ် အိၣ်ခိးသမံသမိးႇမၤပျံၤမၤဖုးကမျၢၢ်လၢအဟးထီၣ်က့ၤလီၤဖဲ(ခ့ၣ်အဲၣ်ယူၣ်) ဟီၣ်က၀ီၤပူၤအံၤန့ၣ်လီၤႉ ခီဖျိအ၀ဲသ့ၣ်တၢ်ဖံးတၢ်မၤအံၤအဃိ(ခ့ၣ်အဲၣ်ယူၣ်)ဘျံးဒ၀ဲၢ်အံၤတတူၢ်လိာ်၀ဲဘၣ်တြီ၀ဲဘၣ်ဆၣ်ခီဖျိအ၀ဲသ့ၣ်ဆဲးမၤဒံး၀ဲ အဃိဘၣ်တၢ်လဲၤထီၣ်ခးအီၤဒ်အံၤလီၤအဂ့ၢ်န့ၣ် စံး၀ဲန့ၣ်လီၤႉ KNLA (သုးက့ ၄)လဲၤခး(KTLA)ဘၣ်ဆၣ်မ့မ့ၢ်အ၀ဲသ့ၣ်ကရူၢ်တခီန့ၣ်က့ၤခးဆၢကဒါ၀ဲတအိၣ်ဘၣ်အဂ့ၢ် (KTLA)ထုးထီၣ်ပာ်ဖျါတ့ၢ်ဃာ်၀ဲအိၣ်အသိး ဘၣ်ဆၣ်မ့မ့ၢ်လၢခ့ၣ်အဲၣ်ယူၣ်(သုးက့ ၄)တကပၤထုးထီၣ်ပာ်ဖျါ၀ဲန့ၣ် ခီဖျိ(KTLA)ကရူၢ်က့ၤခးခီၣ်ဆၢကဒါအ၀ဲသ့ၣ်အဃိ လီၢ်က၀ီၤကမျၢၢ်ဘၣ်ဒိ(၂)ဂၤန့ၣ်လီၤႉ တၢ်ဒုးကဲထီၣ်၀ံၤလီၢ်ခံဖဲလါယူၤလံ ၁၅ သီအနံၤန့ၣ် (KTLA)ဆၣ်ကဆီသုးတြိၤ ထုးထီၣ်လံာ်တၢ်ကလုၢ်လၢ စးထီၣ်လါယူၤလံ ၁၆ သီန့ၣ် ၀့ၢ်တၢ်အဲၣ်–ထံခံကျဲ ကမျၢၢ်တဘၣ်လ့ၢ်ထီၣ်လ့ၢ်လိၤဘၣ်ဒီး ကမျၢၢ်သ့ၣ်တဖၣ်...
ကမျၢၢ်တဘၣ်လ့ၢ်ထီၣ်လိၤလၢလၢၢ်ဒိၣ်–နၣ်သၤကွ့ကျဲအံၤဘၣ်အဂ့ၢ် KNDO ထုးထီၣ်ပာ်ဖျါ
လါယူၤလံ ၂၈ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)တၢ်ပၢဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်၀့ၢ်ဒီးနၣ်သၤကွ့ဘၢၣ်ကျဲအံၤ ကမျၢၢ်တဘၣ်လ့ၢ်ထီၣ်လ့ၢ်လိၤလၢၤဘၣ်အဂ့ၢ်န့ၣ် ကညီဒီကလုာ်ဂၢၤသးကရၢ (KNDO)ထုးထီၣ်ပာ်ဖျါ၀ဲဖဲမဟါလါယူၤလံ ၂၇ သီအနံၤန့ၣ်လီၤႉ ကမျၢၢ်လၢအိၣ်ကျဲမုၢ်၀ဲန့ၣ်ဖီခိၣ်တဖၣ်ပယီၤသုးဖီၣ်သူ၀ဲလၢကဒီသဒၢလီၤက့ၤအ၀ဲသ့ၣ်ကစၢ်သးအဂီၢ်ဒီး ပယီၤသုးအံၤဟူးဂဲၤ၀ဲလၢကျဲကဘိဘိအဃိဘၣ်တၢ်ထုးထီၣ်၀ဲတၢ်ကလုၢ်ဒ်အံၤလီၤအဂ့ၢ်န့ၣ် (KNDO)လံာ်တၢ်ပာ်ဖျါအပူၤ စံး၀ဲန့ၣ်လီၤႉ (KNDO)လံာ်တၢ်ပာ်ဖျါအပူၤစံး၀ဲလၢစးထီၣ်လါယူၤလံ ၂၇ သီန့ၣ် တၢ်တဘၣ်လ့ၢ်ထီၣ်လ့ၢ်လိၤလၢ လၢၢ်ဒိၣ်–နၣ်သၤကွ့ကျဲအံၤဘၣ်ဒီးတကးဒံးဘၣ်အမဲာ်ညါစးထီၣ်ဟါခီ ၆ နၣ်ရံၣ်တုၤလၢဂီၤခီ ၆ နၣ်ရံၣ်န့ၣ် ကမျၢၢတဖၣ်တဘၣ် ဟးထီၣ်တၢ်ချၢဘၣ်အသိးဂ့ၢ်ဂီၢ်အူတၢ်ဂ့ၢ်မ့အိၣ်ထီၣ်န့ၣ်ကဘၣ်ဒုးသ့ၣ်ညါဆိ၀ဲၦၤဘၣ်မူဘၣ်ဒါ အဂ့ၢ်န့ၣ် လံာ်တၢ်ပာ်ဖျါပူၤပာ်ဖျါ၀ဲန့ၣ်လီၤႉ နၣ်သၤကွ့လီၢ်က၀ီၤကမျၢၢ်တဂၤစံး၀ဲလၢ“သုးက့ ၃ ထုးထီၣ်ပာ်ဖျါလံာ်အံၤ ခီဖျိပယီၤသုးတဖၣ်အံၤ ဟံးန့ၢ်တၢ်ခွဲးတၢ်ယာ်လၢကမျၢၢ်လၢအလ့ၢ်ထီၣ်လ့ၢ်လိၤဖဲကျဲတဖၣ်အံၤအအိၣ်အဃိလီၤ”အဂ့ၢ်န့ၣ် စံး၀ဲန့ၣ်လီၤႉ လံာ်တၢ်ကလုၢ်၀ဲအံၤၦၤလၢအမ့တလူၤပိာ်မၤထွဲ၀ဲဘၣ်ႇတၢ်ဂ့ၢ်မ့ဟဲကဲထီၣ်သးတမံၤဂ့ၤတမံၤဂ့ၤန့ၣ် တမ့ၢ်လၢကဟံးမူဒါဘှါဆှဲ၀ဲဘၣ်အဂ့ၢ်န့ၣ် (KNDO)နီၣ်ဂံၢ် ၃ သုးရ့ၣ်ခိၣ် ဆဲးလီၤမံၤထုးထီၣ်၀ဲတၢ်ကလုၢ်အံၤန့ၣ်လီၤႉ ဖဲအပူၤကွံာ်လါယူၤ ၆ သီအခါစ့ၢ်ကီး တၢ်မၤပိၢ်ဖးထီၣ်၀ဲလၢၢ်ဒိၣ်၀့ၢ်–နၣ်သၤကွ့ဘၢၣ်စၢၤ တိၤတဘိဒံးအသိး တၢ်မၤဟးဂီၤ၀ဲတိၤ(၅)ဘိဒီးခီဖျိတၢ်ထုးထီၣ်တၢ်ကလုၢ်ဒ်အံၤအဃိ ၦၤဟးထီၣ်က့ၤလီၤစှၤလီၤ၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ “လၢညါလံၤလံၤလံႇၦၤမၤဟးဂီၤတိၤကအိၣ်ခဲလၢာ််ဃၣ်ဃၣ်ညါႉသိလ့ၣ်ဒုလဲၤတန့ၢ်လၢၤဘၣ်ႉလဲၤသ့က့ၤဒၣ်ထဲလၢသိလ့ၣ်ယီၢ်(ဆဲးကဲး)လီၤႉကညီဒီကလုာ်ဂၢၤသးကရၢထုးထီၣ်တၢ်ကလုၢ်ဒ်အံၤအဃိၦၤဟးထီၣ်က့ၤလီၤကစှၤလီၤ၀ဲမီၤနီၤႉယဲဒၣ်စ့ၢ်ကီးယတလဲၤဘၣ်လၢကျဲ၀ဲန့ၣ်ဘၣ်”အဂ့ၢ်န့ၣ် နၣ်သၤကွ့လီၢ်က၀ီၤကမျၢၢ်လၢအဂၤတဂၤစ့ၢ်ကီး စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးစှၤသီအတီၢ်ပူၤအံၤတၢ်ဒုးကဲထီၣ်၀ဲဒၣ်ဒိၣ်ဒိၣ်မုၢ်မုၢ်လၢ(ကၠီၣ်တကါ)ကီၢ်ဆၣ်ပူၤဒီးပယီၤသုးအံၤဒွဲၣ်အူၦၤဟံၣ်ၦၤဃီႇဟုၣ်ကမျၢၢ်တၢ်ဖိတၢ်လံၤဒီးခးလီၤ၀ဲကျိဖးဒိၣ်လၢသ၀ီပူၤအိၣ်၀ဲအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤဂံၢ်ခီၣ်ထံး တၢ်ကစီၣ် အအိၣ်န့ၣ်လီၤႉ
ပယီၤသုးခးလီၤကျိဖးဒိၣ်အဃိအလူသ၀ီပူၤဟံၣ်ဟးဂီၤ(၂)ဖျၢၣ်ဒီးကျိဖးဒိၣ်ချံလၢအတပိၢ်ဖးထီၣ်ဒံးဘၣ်အံၤအိၣ်ဒံး၀ဲ
လါယူၤလံ ၂၈ သီႇ ၂၀၂၃ နံၣ်ႇ ခ့ၣ်အဲးစံၣ် လၢတလၢၤကီၢ်စဲၣ် ဒူသထူၣ်ကီၢ်ရ့ၣ် ဘံလ့ကီၢ်ဆၣ်အပူၤ ဖဲမဟါလါယူၤလံ ၂၇ သီ ဂီၤခီအဆၢကတီၢ် ခီဖျိ(အလိၤတီၤ)ပယီၤသုးကလၢၤအံၤခးလီၤကျိဖးဒိၣ်ဆူ အလူကရူၢ်ပူၤအဃိကမျၢၢ်အဟံၣ်ဟးဂီၤ၀ဲ ၂ ဖျၢၣ်ဒီး ကျိဖးဒိၣ်အချံလၢအလီၤတဲာ်တပိၢ်ဖးထီၣ်ဒံးဘၣ်အံၤအိၣ်ဒံးအဃိတၢ်ဘၣ်ယိၣ်အိၣ်၀ဲအဂ့ၢ်န့ၣ် သ့ၣ်ညါဘၣ်လၢ ဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ ခီဖျိပယီၤသုးခးလီၤကျိဖးဒိၣ်လီၤတဲာ်ပိၢ်ဖးထီၣ်၀ဲလၢအလူသ၀ီကရူၢ် အလဲၤသ၀ီပူၤအဃိ ကမျၢၢ်အဟံၣ်အဃီ ဟးဂီၤ၀ဲဒီးခီဖျိကမျၢၢ်တဖၣ်အံၤစးထီၣ်ဃ့ၢ်ထီၣ်၀ဲလၢကျိဖးဒိၣ်လီၤတဲာ်သီၣ်အခါလံၤလံၤလံအဃိ တၢ်ဘၣ်ဒိဘၣ်ထံး တအိၣ်၀ဲဘၣ်အဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲန့ၣ်လီၤႉ အ၀ဲစံး၀ဲလၢ“ၦၤနၢ်ဟူကျိဖးဒိၣ်လီၤတဲာ်သီၣ်လၢသ၀ီခိၣ်သ၀ီဃၢၤတကပၤန့ၣ်မီၤနီၤႉကျိဖးဒိၣ်လီၤတဲာ်သီအဃိ သ၀ီဖိတဖၣ်လဲၤစံၣ်အိၣ်ခူသူၣ်၀ဲလၢၦၢ်ပူၤႇလၢဟံၣ်ပူၤန့ၣ်ၦၤတအိၣ်နီတဂၤလၢၤဘၣ်ႇအဃိန့ၣ်ၦၤဘၣ်ဒိဘၣ်ထံးတအိၣ်ဘၣ်မီၤနီၤႉခဲအံၤၦၤလၢအက့ၤအိၣ်လၢအဟံၣ်ညါက့ၤအိၣ်ႇလၢအဟးပလဲာ်သးညါဟးပလဲာ်သးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါကျိဖးဒိၣ်လီၤတဲာ်ဘျီ၀ဲအံၤကအိၣ်လၢအဖျၢၣ်တဆံဃၣ်ဃၣ်ညါဒီးဖဲန့ၣ်အကျါကျိဖးဒိၣ်အချံလၢအတပိၢ်ဖးထီၣ်ဒံးဘၣ်အံၤအိၣ်တီၢ်ဒံး၀ဲလၢအလူသ၀ီကရူၢ် အနီၣ်သ၀ီဒီးအလဲၤသ၀ီပူၤအံၤအိၣ်၀ဲဒၣ်န့ၣ်လီၤႉ ခီဖျိမ့ၣ်ပိၢ်အံၤ ပိၢ်ဖးထီၣ်သ့ကိးဆၢကတီၢ်ဒဲးအဃိတၢ်မၤဃာ်၀ဲဒ်သိးၦၤသုတလဲၤဘၣ်ဖဲတၢ်ခိၣ်တၢ်ဃၢၤ၀ဲန့ၣ်တဂ့ၤအဂ့ၢ်န့ၣ် သ့ၣ်ညါဘၣ်လၢတၢ်ပၢၢ်ဆၢသုးကရူၢ်အအိၣ်န့ၣ်လီၤႉ “လၢကျိဖးဒိၣ်အခိၣ်ထိးန့ၣ်အိၣ်ဒီးဘျါအ့ၣ်လၢအကပိၢ်ဖးထီၣ်အဂီၢ်အံၤမီၤနီၤႉဘျါအ့ၣ်၀ဲအံၤအမ့လီၤတဲာ်လၢဟီၣ်ခိၣ်လိၤႇ နမ့ထုးထီၣ်ကွံာ်အီၤန့ၣ်နကဘၣ်ပလီၢ်သူၣ်ပလီၢ်သးလီၤႉဘၣ်မနုၤအဃိလဲၣ်န့ၣ်အခိၣ်ထိးန့ၣ်အိၣ်ဘူဘူဖိလီၤႇ အပိၢ်ဖးထီၣ်သ့အဃိတၢ်ဘၣ်ယိၣ်အိၣ်အိၣ်၀ဲအါမး”အဂ့ၢ်န့ၣ် စံး၀ဲန့ၣ်လီၤႉ တကီၢ်ခါခဲအံၤခီဖျိပယီၤသုးတခးလီၤကျိဖးဒိၣ်လၢၤဘၣ်အဃိကမျၢၢ်ဟဲက့ၤအိၣ်လၢသ၀ီပူၤအိၣ်၀ဲတနီၤလံအသိး တနီၤန့ၣ်ဆိမိၣ်၀ဲလၢပယီၤသုးအံၤခးလီၤကဒါကျိဖးဒိၣ်သ့အဃိတနီၤန့ၣ်အ၀ဲသ့ၣ်ဟးစံၣ်ပလဲာ်သးအိၣ်ဒံး၀ဲအဂ့ၢ်န့ၣ် ဂံၢ်ခီၣ်ထံးတၢ်ကစီၣ်တဖၣ်စံး၀ဲန့ၣ်လီၤႉ ဖဲတနံၣ်အံၤနံာ်တ၀ာ်အခါလၢ၀့ၢ်တကူၣ်–မီၣ်လမၠဲၣ်ကျဲကပၤ အလူသ၀ီကရူၢ်အခိၣ်အဃၢၤန့ၣ် တၢ်ဒုးကဲထီၣ်၀ဲလၢ ပယီၤသုးဒီးဟီၣ်က၀ီၤတၢ်ပၢၢ်ဆၢသုးကရူၢ်အဘၢၣ်စၢၤအိၣ်၀ဲတလီၢ်လီၢ်အသိးခီဖျိပယီၤသုးအံၤခးလီၤကျိဖးဒိၣ်ဆူ အလူသ၀ီကရူၢ်ပူၤအဘျီဘၣ်အဘျီတကးဒံးဘၣ်သ၀ီလၢအိၣ်ဘူးတၢ်ခိၣ်တၢ်ဃၢၤဖဲန့ၣ်တဖၣ်စ့ၢ်ကီးပယီၤသုးခးလီၤကျိဖးဒိၣ်အဃိ လီၢ်က၀ီၤကမျၢၢ်သံဘၣ်ဒိဘၣ်ထံးအိၣ်၀ဲဒီးကမျၢၢ်တဖၣ်ဘၣ်ဃ့ၢ်ထီၣ်ဒံး၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်လါယူၤလံ ၁၅ သီအခါစ့ၢ်ကီး ပယီၤသုးကျိၤနုာ်လီၤ၀ဲဒၣ်လၢဘ့လ့ကီၢ်ဆၣ် သ၀ီ(၅)ဖျၢၣ်ပူၤအဃိ လီၢ်က၀ီၤကမျၢၢ်အဂၤ(၁၀၀၀)ဘျဲၣ်ဘၣ်ဃ့ၢ်ထီၣ်ဒံး၀ဲအသိး ခီဖျိပယီၤသုးခးလီၤကျိဖးဒိၣ်အဃိ လီၢ်က၀ီၤကမျၢၢ်သံ၀ဲ(၃)ဂၤအကျါပၣ်ဃုာ်၀ဲပိာ်မုၣ်တဂၤအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ
ဖၣ်ပူၣ်၀့ၢ်ပူၤခိကျဲထံကျဲခံခါလၢ၁် ပယီၤသုးဒီး(BGF)တပျဲၦၤစိ၁်ထီၣ်စိ၁်လီၤတၢ်အီၣ်တၢ်အီလၢၤဘၣ်
လါယူၤလံ ၂၈ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဖၣ်ပူၣ်၀့ၢ်ပူၤ စးထီၣ်ဖဲတလါအံၤလါယူၤလံထီၣ်တ၀ာ်အခါန့ၣ် ပယီၤသုးဒီးသုးခိးကီၢ်ဆၢ(BGF) ပံးဃာ်၀ဲထံကျဲႇခိကျဲခံခါလၢာ်လံဒီးတပျဲၦၤစိာ်ထီၣ်စိာ်လီၤတၢ်အီၣ်တၢ်အီလၢၤဘၣ်အဂ့ၢ်န့ၣ် ဖၣ်ပူၣ်လီၢ်က၀ီၤကမျၢၢ်တဂၤ စံး၀ဲန့ၣ်လီၤႉ ဟီၣ်က၀ီၤဖဲန့ၣ်အပူၤလၢညါန့ၣ်တၢ်ပံးဃာ်၀ဲခိကျဲဒီးတၢ်ပျဲကမျၢၢ်စိာ်ထီၣ်စိာ်လီၤက့ၤတၢ်လၢထံကျဲဘၣ်ဆၣ် တကီၢ်ခါခဲအံၤပယီၤသုးပာ်ဖှိၣ်တဖၣ်အံၤခိကျဲမ့ၢ်ဂ့ၤႇထံကျဲမ့ၢ်ဂ့ၤပံးဃာ်၀ဲခံခါလၢာ်လံအဃိ လီၢ်က၀ီၤကမျၢၢ်တဖၣ် ဘၣ်ယိၣ်၀ဲလၢဂံၢ်ခီၣ်ထံးတၢ်အီၣ်တၢ်အီကလီၤတူာ်၀ဲအဂ့ၢ်န့ၣ် ဖၣ်ပူၣ်လီၢ်က၀ီၤကမျၢၢ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ချံသန့ႇခိကျဲတအိးထီၣ်နီတခါဒံးဘၣ်ၦၤပံာ်ဃာ်၀ဲမီၤနီၤႉမ့မ့ၢ်ဟုသးခီန့ၣ်ၦၤလဲၤဟံနီၤလီၤအီၣ်သးလၢၦၤမၤစံာ်ဖိတဖၣ်အအိၣ်န့ၣ်လီၤမီၤနီၤႉချံသန့နါက့ပံာ်၀ဲႇသိလ့ၣ်ကျဲစ့ၢ်ကီးပံာ်၀ဲလီၤႉချံတအိၣ်သိလ့ၣ်တအိၣ်ဘၣ်အဃိ တၢ်ဟဲနုာ်လီၤတအိၣ်တမံၤလၢၤဘၣ်ႉအ၀ဲသ့ၣ်မ့အိးထီၣ်ခိကျဲႇထံကျဲမးၦၤလဲၤသ့မီၤနီၤႉကိးဘျီဒဲးန့ၣ်လဲၤလၢချံန့ၢ်ဒံးႉခဲအံၤလ့ၤတက့ၤလ့ၢ်ထီၣ်လ့ၢ်လိၤတန့ၢ်လၢၤဘၣ်ႉမ့ၢ်ကပံး၀ဲတုၤဆံးယံၤလဲၣ်ဒုတသ့ၣ်ညါဒံးဘၣ်ႉမ့မ့ၢ်လၢဟုသးခီဒုတၢ်ကီတၢ်ခဲအိၣ်လီၤႉလီလီစဲၤခဲအံၤတၢ်အီၣ်တၢ်အီလၢပလဲၤထုးဃာ်လၢညါတဖၣ်န့ၣ်အိၣ်ဒံးအဃိပအီၣ်သ့ဒံးမီၤနီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါဒူသ၀ီလၢအိၣ်ဘူးဖၣ်ပူၣ်ကီၢ်ဆၣ်သ့ၣ်တဖၣ်အံၤတၢ်ပံးဃာ်၀ဲခံခါလၢာ်တကးဒံးဘၣ်အမဲာ်ညါ တၢ်ပံးဃာ်ဃုာ်စ့ၢ်ကီး၀ဲလီမ့ၣ်အူဒီးလီတဲစိအကျိၤႇအ့တနဲးအကျိၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ် အအိၣ်န့ၣ်လီၤႉ တကီၢ်ခါခဲအံၤခီဖျိတၢ်ပံာ်ဃာ်၀ဲဖၣ်ပူၣ်၀့ၢ်ပူၤကျဲခံခါလၢာ်အဃိပနံာ်တၢ်ဖိတၢ်လံၤအၦ့ၤဒိၣ်ထီၣ်၀ဲဒီး ခါဆူညါတၢ်လုၢ်အီၣ်နီၢ်ခိသးသမူအဂီၢ်တၢ်ကီတၢ်ခဲအိၣ်ထီၣ်သ့၀ဲအဂ့ၢ်န့ၣ် ဖၣ်ပူၣ်လီၢ်က၀ီၤကမျၢၢ်လၢအဂၤတဂၤစ့ၢ်ကီး စံး၀ဲဒ်အံၤန့ၣ်လီၤႉ “ခိကျဲဒၢးတန့ၢ်ႇထံကျဲဒၢးပံးဃာ်၀ဲအဃိကကဲထီၣ်တၢ်ကီတၢ်ခဲဖးဒိၣ်ညါမီၤနီၤႉလၢခံဒုကအီၣ်ဘၣ်မ့ၤအဂီၢ်ကဘၣ်ဟးဃုအီၣ်ဖးကီညါႉခဲအံၤစ့ၢ်ကီးတၢ်ၦ့ၤထီၣ်လံႉတၢ်စူၤစှၤအဃိၦၤမၤအီၣ်စံာ်ဖိတဖၣ်အံၤကသူၣ်ဘုအဂီၢ်ထံတအိၣ်ဘၣ် ဟုသး(၂၄)တလီးတထၢၣ်န့ၣ်အၦ့ၤထီၣ်တုၤလၢ(၁၄၀ႇ၀၀၀)ဘျဲၣ်လံႉလၢညါခါန့ၣ်အိၣ်ဖဲ(၈)ကလးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ခီဖျိတၢ်ပံာ်ဃာ်၀ဲဖၣ်ပူၣ်ဟီၣ်က၀ီၤတၢ်စိာ်ထီၣ်စိာ်လီၤတၢ်အီၣ်တၢ်အီကျဲဒ်အံၤအဖီခိၣ်လီၢ်က၀ီၤကမျၢၢ်လၢအိၣ် ခိခိၣ်ဒူသ၀ီပူၤတဖၣ်အံၤ ဟးထီၣ်က့ၤလီၤတသ့ဘၣ်အဃိဘၣ်ယိၣ်၀ဲလၢပနံာ်တၢ်ဖိတၢ်လံၤ တဟဲလီၤ၀ဲလၢၤဘၣ်အဂ့ၢ်န့ၣ် ဖၣ်ပူၣ်လီၢ်က၀ီၤကမျၢၢ်စံး၀ဲန့ၣ်လီၤႉ ဖၣ်ပူၣ်၀့ၢ်ကျဲလၢတၢ်ပံာ်ဃာ်၀ဲအံၤအိၣ်၀ဲဒၣ်လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅) ဟီၣ်က၀ီၤပူၤဒီးတၢ်ဒုးကဲထီၣ်၀ဲလၢပယီၤသုးဒီးဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤအိၣ်၀ဲတလီၢ်လီၢ်န့ၣ်လီၤႉဒ်န့ၣ်အသိးပယီၤသုးအံၤဒိးလီၤဃာ်၀ဲဟီၣ်လာ်မ့ၣ်ပိၢ်လၢဖၣ်ပူၣ်ႇကမၤမိၢ်ကျဲအံၤဒီတကျိၤအိၣ်စ့ၢ်ကီး၀ဲအဂ့ၢ်န့ၣ် ခ့ၣ်အဲၣ်ယူၣ်တကပၤစံး၀ဲန့ၣ်လီၤႉ ဒူသ၀ီလၢအိၣ်ဟီၣ်က၀ီၤဖဲန့ၣ်အပူၤတဖၣ်စ့ၢ်ကီးခီဖျိကဘီယူၤဟဲခးလီၤတၢ်ႇပယီၤသုးခးလီၤကျိဖးဒိၣ်အဃိ ကမျၢၢ်အဟံၣ်အဃီႇကၠိတၢ်သူၣ်ထီၣ်ႇတၢ်ယွၤသရိာ်တဖၣ်ဟးဂူာ်ဟးဂီၤ၀ဲအိၣ်ဒီးလီၢ်က၀ီၤကမျၢၢ်တဖၣ်စ့ၢ်ကီး ဘၣ်ဃ့ၢ်မှံဟးဖျိး၀ဲတုၤလၢခဲအံၤတစုအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ
တၢ်ဒုးကဲထီၣ်လၢ KNU(သုးက့ ၂) ကမျၢၢ်သံ(၁)ဂၤႇဘၣ်ဒိ(၁)ဂၤဒီးပယီၤသုးဖီၣ်ဒုးဃ၁်ကမျၢၢ်တနီၤ
လါယူၤလံ ၂၈ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၂)တီအူကီၢ်ရ့ၣ် ထီတထူၣ်ကီၢ်ဆၣ်အပူၤ ဖဲမဟါလါယူၤလံ ၂၇ သီ အနံၤ ပယီၤသုးကျိၤလၢအဟဲနုာ်လီၤလၢ(တီကိ)သ၀ီဃၢၤတဖၣ်အံၤဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ် ၆ သုးပာ်ဖှိၣ်အဘၢၣ်စၢၤတၢ်ဒုးကဲထီၣ်အဃိ လီၢ်က၀ီၤကမျၢၢ်သံ(၁)ဂၤႇဘၣ်ဒိ၀ဲ(၁)ဂၤဒီး ပယီၤသုးဖီၣ်တ့ၢ်ဃာ်၀ဲ သ၀ီဖိတနီၤ အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ ဖဲမဟါလါယူၤလံ ၂၇ သီ ဂီၤခီ ၆ နၣ်ရံၣ်ဃၣ်ဃၣ်အဆၢကတီၢ် လၢ(တီကိ)သ၀ီအပူၤ တၢ်ဒုးကဲထီၣ်၀ဲလၢပယီၤသုးကျိၤ တဖၣ်အံၤဒီး(KNLA)အဘၢၣ်စၢၤဒီးတၢ်ကဲထီၣ်သးဖဲန့ၣ်၀ံၤလီၢ်ခံပယီၤသုးဖီၣ်ဒုးဃာ်လီၢ်က၀ီၤကမျၢၢ် ၦၤပိာ်ခွါအဂၤ(၁၀) ဃၣ်ဃၣ်အံၤလၢသ၀ီတၢ်ဘါယွၤသရိာ်ကရၢၢ်ပူၤအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ “အ၀ဲသ့ၣ်ၦၤတၢ်ဘၣ်ဒိဘၣ်ထံးအိၣ်အဃိဟးလူၤဖီၣ်၀ဲဒၣ်ၦၤကမျၢၢ်မီၤနီၤႉဒ်နသ့ၣ်ညါအသိးလီၤတၢ်မၤတခါအံၤအ၀ဲသ့ၣ်မၤ၀ဲမၢ်မၢ်လီၤႉအ၀ဲသ့ၣ်မ့ဖီၣ်၀ဲလၢသ၀ီပူၤန့ၣ်ဖီၣ်ဒုးဃာ်၀ဲႉဖီၣ်၀ဲမ့န့ၢ်လၢသ၀ီဃၢၤန့ၣ်ခးသံ၀ဲလီၤႉအ၀ဲသ့ၣ်တဲဃာ်၀ဲဒ်န့ၣ်အိၣ်မီၤနီၤႉတုၤလၢခဲၤအံၤမုၢ်ဟါလံတပျၢ်လီၤ၀ဲဒံးဘၣ်ႉပယီၤသုးတဖၣ်အံၤအိၣ်လၢသ၀ီပူၤအဖၢမုၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်လီၢ်လၢတၢ်ဒုးကဲထီၣ်န့ၣ်မ့ၢ်၀ဲ(တီကိ)သ၀ီဒီးတီအူကီၢ်ရ့ၣ် ထိၣ်လွံၢ်၀ါ တီၤထီကၠိဘၢၣ်စၢၤဒီး ၦၤကၠိဖိမုၣ်လၢပယီၤသုးခးသံ၀ဲအံၤအသးနံၣ်အိၣ်ဒံးဒၣ်ထဲ(၁၄)နံၣ်လီၤဒီးဖဲအလဲၤထီၣ်ကၠိဒီးသိလ့ၣ်ယီၢ်(ဆဲးကဲး) အခါ ပယီၤသုးခးသံ၀ဲအီၤဒ်အံၤအဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ ခီဖျိတၢ်ဒုးကဲထီၣ်အဃိတၢ်ပံးဃာ်ကွံာ်၀ဲထိၣ်လွံၢ်၀ါတီၤထီကၠိအံၤဒီး စံဖၠူၤကိသ၀ီႇယ့ၤစှၤသ၀ီဃုာ်ဒီး သ၀ီလၢအိၣ်ဘူး တၢ်ခိၣ်တၢ်ဃၢၤဖဲန့ၣ်သ့ၣ်တဖၣ်ကမျၢၢ်တနီၤဘၣ်ဃ့ၢ်ထီၣ်၀ဲန့ၣ်လီၤႉခီဖျိပယီၤသုးတဖၣ်အံၤအိၣ်ဆီလီၤသးဒံးလၢ(တီကိ)သ၀ီပူၤအဃိကမျၢၢ်တဖၣ်အံၤစံၣ်ထီၣ်လၢသ၀ီချၢတဘူၣ်ဘၣ် အိၣ်ကတာ်ထီသးလၢသ၀ီပူၤအဂ့ၢ်န့ၣ် သ၀ီဖိလၢအအိၣ်ဘူးဖဲန့ၣ်သ့ၣ်တဖၣ်စံး၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်လါယူၤလံ ၁၄ သီအခါစ့ၢ်ကီး ပယီၤသုးခီၣ်သုးရ့ၣ်(ခလရ–၃၀၆)လၢအိၣ်ဆီလီၤသးဖဲ (ရေလျှံ)ဃၢၤစှါစ့ဘိၤသုးကလၢၤတဖၣ်အံၤခးလီၤကျိဖးဒိၣ်ဆူထိၣ်လွံၢ်၀ါတီၤထီကၠိကရၢၢ်ပူၤအဃိ ထိၣ်လွံၢ်၀ါတီၤခၢၣ်သးကၠိဖိမုၣ်ဘၣ်ဒိ၀ဲ(၃)ဂၤဒံးန့ၣ်လီၤႉ
ဖလူၤစိၤမုၢ်နု၁်ကမျၢၢ်ၦၤဃ့ၢ်မှံဟးဖျိးတဖၣ် လိၣ်ဘၣ်၀ဲဂ့ၢ်ဂီၢ်အူတၢ်အီၣ်တၢ်အီ
လါယူၤလံ ၂၈ သီႇ ၂၀၂၃ နံၣ်ႇ ခ့ၣ်အဲးစံၣ် လၢကရ့ၣ်ကီၢ်စဲၣ် ဖလူၤစိၤကီၢ်ဆၣ်မုၢ်နုာ်တကပၤန့ၣ် ခီဖျိကမျၢၢ်ၦၤဃ့ၢ်မှံဟးဖျိးတဖၣ်အံၤတၢ်အီၣ်တၢ်အီ လီၤတူာ်၀ဲလံအဃိ လိၣ်ဘၣ်၀ဲဒၣ်ဂ့ၢ်ဂီၢ်အူတၢ်ဆီၣ်ထွဲမၤစၢၤအဂ့ၢ်န့ၣ် ကမျၢၢ်ၦၤဃ့ၢ်မှံဟးဖျိးတဖၣ် စံး၀ဲန့ၣ်လီၤႉ ကမျၢၢ်သ့ၣ်တဖၣ်အံၤဘၣ်ဃ့ၢ်မှံဟးဖျိးတၢ်ဆၢကတီၢ်ယံၤထီၣ်လံဒီးခီဖျိတၢ်ဆီၣ်ထွဲမၤစၢၤဆိကတီၢ်သးအဃိ တကီၢ်ခါခဲအံၤအ၀ဲသ့ၣ်သဂၢၢ်ဘၣ်၀ဲတၢ်အီၣ်တၢ်အီလီၤတူာ်၀ဲအဂ့ၢ်န့ၣ် ကမျၢၢ်ၦၤဃ့ၢ်မှံဟးဖျိးပိာ်မုၣ်တဂၤ စံး၀ဲဒ်အံၤ န့ၣ်လီၤႉ “လၢဖလူၤစိၤမုၢ်နုာ်(မီၤသံဒိၣ်)သ၀ီတကပၤန့ၣ်ကမျၢၢ်ဃ့ၢ်မှံဟးဖျိးကအိၣ်(၁)ကထိညါႉအတဒိးန့ၢ်ဘၣ်တၢ်ဆီၣ်ထွဲမၤစၢၤဘၣ်န့ၣ်န့ၢ်ဖးယံၤလံႉဟံၣ်တနီၤန့ၣ်တၢ်အီၣ်တၢ်အီၣ်တအိၣ်လၢၤဘၣ်ႉၦၤဖိဒံဖိသၣ်တဖၣ်စ့ၢ်ကီးတၢ်အီၣ်လီၤထုးလၢာ်လံ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးအါဒၣ်တက့ၢ်ညီနုၢ်န့ၣ်ကဘီယူၤဟဲတ့ၢ်လီၤမ့ၣ်ပိၢ်လၢကရ့ၣ်နံၣ်ကီၢ်စဲၣ်လီၢ်အိၣ်ကမှံလီၢ်အိၣ်၀ဲအသိး ခီဖျိကဘီယူၤဟဲတ့ၢ်လီၤစ့ၢ်ကီးမ့ၣ်ပိၢ်လၢ(ဖလူၤစိၤ)ကီၢ်ဆၣ် ၦၤလီၢ်အိၣ်ကမှံလီၢ်အဃိမုၢ်နၤခီန့ၣ်ကမျၢၢ်သ့ၣ်တဖၣ်အံၤ မံလၢလီၢ်အိၣ်ကမှံလီၢ်တဘူၣ်၀ဲဘၣ်ႇဘၣ်လဲၤစံၣ်မံ၀ဲဒၣ်လၢၦၢ်ပူၤတၢ်လီၢ်အဂၤအဂ့ၢ်န့ၣ် (မိၤသံၤဒိၣ်)ကမျၢၢ်ၦၤဃ့ၢ်မှံဟးဖျိးတဖၣ် စံး၀ဲန့ၣ်လီၤႉ ကရ့ၣ်နံၣ်ကီၢ်စဲၣ်အပူၤ တနံၤဘၣ်တနံၤၦၤဃ့ၢ်မှံဟးဖျိးအနီၣ်ဂံၢ်ဟဲအါထီၣ်၀ဲဒၣ်ကွ့ၢ်ကွ့ၢ်ဒီး ၦၤမၤဘူၣ်လီၤတၢ်ဖိသ့ၣ်တဖၣ်အံၤစ့ၢ်ကီးမၤစၢၤက့ၤကမျၢၢ်လၢအဃ့ၢ်တၢ်ဒုးလီၤဘၣ်တၢ်ကီတၢ်ခဲနီၢ်နီၢ်သ့ၣ်တဖၣ်အံၤ လီၤအဂ့ၢ်န့ၣ် ကရ့ၣ်နံၣ်ဂ့ၢ်၀ီခွဲးယာ်ကရူၢ်(KnHRG) ၦၤနဲၣ်တၢ် ကိၤဘညါ စံး၀ဲန့ၣ်လီၤႉ အ၀ဲစံး၀ဲလၢ“လၢပကီၢ်စဲၣ်ပူၤအံၤတၢ်ဒုးကဲထီၣ်ကိးမုၢ်နံၤဒဲးအဃိၦၤဃ့ၢ်မှံဟးဖျိးအနီၣ်ဂံၢ်နီၣ်ဒွးဟဲအါထီၣ်၀ဲလီၤႉ မ့မ့ၢ်လၢၦၤဘၣ်ဃ့ၢ်မှံဟးဖျိးအနီၣ်ဂံၢ်ခီန့ၣ်ဟဲအါထီၣ်ဘၣ်ဆၣ်စ့မၤဘူၣ်လီၤစှၤမီၤနီၤႉ လၢတၢ်အံၤအဖီခိၣ်ပဆၢမုၢ်လၢ်လၢ တၢ်ကက့ၤကွၢ်ကဒါက့ၤ၀ဲထံထံဆးဆးဒီးမၤစၢၤဆီၣ်ထွဲဘၣ်ကမျၢၢ်လၢအဘၣ်ဃ့ၢ်တၢ်ဒုးတဖၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢကရ့ၣ်နံၣ်ကီၢ်စဲၣ်အပူၤတၢ်ဒုးဆဲးကဲထီၣ်ဒံး၀ဲဒီးကမျၢၢ်ၦၤဃ့ၢ်မှံဟးဖျိးသ့ၣ်တဖၣ်အံၤအခိၣ်သ့ၣ်န့ၣ်လိၣ်ဘၣ်၀ဲ တၢ်အီၣ်တၢ်အီႇကသံၣ်ကသီဒီးအ၀ဲသ့ၣ်ပာ်ဖှိၣ်မၤသကိးတၢ်ဒီးၦၤဂ့ၢ်၀ီတၢ်ကရိကရိလၢအိၣ်ဟီၣ်က၀ီၤပူၤတဖၣ်ဒီး တသ့ဖဲအသ့ဆီၣ်ထွဲမၤစၢၤသကိး၀ဲၦၤဃ့ၢ်မှံဟးဖျိးသ့ၣ်တဖၣ်အံၤဂ့ၢ်န့ၣ် ကရ့ၣ်နံၣ်ဂ့ၢ်၀ီခွဲးယာ်ကရူၢ်(KnHRG) ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
ခီဖျိတၢ်စူၤအါအဃိ တၢ်ကြဲၢ်ကီၢ်ဆၣ်ပူၤ ၦၤမၤအီၣ်စံ၁်ဖိတဖၣ်ဘၣ်ယိၣ်၀ဲဘုကဟးဂီၤအါထီၣ်
လါယူၤလံ ၂၇ သီႇ ၂၀၂၃ နံၣ်ႇ ခ့ၣ်အဲးစံၣ် လၢဖၣ်အၣ်ကီၢ်ရ့ၣ် တၢ်ကြဲၢ်ကီၢ်ဆၣ် ဒူသ၀ီတဖၣ်အပူၤ ဖဲအပူၤကွံာ်လါယူၤလံ ၁၉ သီ တုၤလၢခဲအံၤတစု တၢ်စူၤ၀ဲတပယူာ်ဃီဒီးထံကစၢၢ်လီၤအါအဃိ ၦၤစံာ်လီၢ်တနီၤလီၤဘျၢ၀ဲလၢထံဟးဂီၤ၀ဲအိၣ်အဖီခိၣ် ဘၣ်ယိၣ်လၢဘုကဟးဂီၤအါထီၣ်အဂ့ၢ်န့ၣ် သ့ၣ်ညါဘၣ်လၢၦၤမၤအီၣ်စံာ်ဖိတဖၣ်အအိၣ်န့ၣ်လီၤႉ လၢတၢ်ကြဲၢ်ကီၢ်ဆၣ် တၤကယါႇပၣ်တးကၠ့ႇလၣ်ကမါကရူၢ် ဒူသ၀ီတဖၣ်အပူၤန့ၣ် တၢ်စူၤတုၤလၢခဲအံၤဒီး ခီဖျိထံထီၣ်တုၤလၢစံာ်ပျီပူၤအဃိတၢ်ဆိကတီၢ်ဃာ်၀ဲတၢ်သူၣ်ဘုတစိၢ်တလီၢ်အသိးခီဖျိဘုလၢတၢ်သူၣ်လီၤ၀ံၤ၀ဲ တဖၣ်အံၤဟးဂီၤအိၣ်အဃိဘၣ်ယိၣ်လၢဘုကဟးဂီၤအါထီၣ်၀ဲအဂ့ၢ်န့ၣ် ၦၤမၤအီၣ်စံာ်ဖိတဖၣ်စံး၀ဲန့ၣ်လီၤႉ လီၢ်က၀ီၤကမျၢၢ်ၦၤမၤအီၣ်စံာ်ဖိတဂၤစံး၀ဲလၢ“မ့မ့ၢ်လၢယစံာ်လီၢ်န့ၣ်ပသူၣ်လီၤဘု၀ံၤအိၣ်(၂)အ့ကၢၣ်လံမီၤနီၤႉ ပသူၣ်လီၤဘု၀ံၤမးထံဒိၣ်ထီၣ်အဃိပဘုလီၤဘျၢ၀ဲခဲလၢာ်လီၤႉခဲအံၤပအိၣ်ခိးကွၢ်မ့ၢ်ဘုကဟးဂီၤဧါႇထံကလီၤကဒါဧါ မီၤနီၤႉထံၦဲၤခဲလၢာ်လီၤ”အဂ့ၢ်န့ၣ် စံး၀ဲန့ၣ်လီၤႉ တၢ်ကြဲၢ်ကီၢ်ဆၣ်အပူၤန့ၣ်ၦၤမၤအီၣ်စံာ်လီၢ်အိၣ်၀ဲ(၇၅)မျးကယၤညါဒီး တနံၣ်အံၤခီဖျိတၢ်စူၤအါအဃိ စံာ်လီၢ်ဟးဂီၤကအိၣ်လၢ(၂၀)မျးကယၤညါအဂ့ၢ်န့ၣ် သ့ၣ်ညါဘၣ်လၢၦၤမၤအီၣ်စံာ်ဖိတဖၣ်အအိၣ်န့ၣ်လီၤႉ “တၢ်စူၤအါအဃိထံကစၢၢ်လီၤအါမီၤနီၤႉဘုလၢပသူၣ်လီၤဃာ်အီၤတဖၣ်အံၤလီၤဘျၢဒီးဘုထူၣ်တနီၤန့ၣ်ထီၣ်ဘီမီၤနီၤ” အဂ့ၢ်န့ၣ် လၣ်ကမါသ၀ီပူၤ ၦၤမၤအီၣ်စံာ်ဖိတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးလၢလူၢ်ပျဲၢ်ကီၢ်ဆၣ်ဒီးဖၣ်အၣ်ကီၢ်ဆၣ်ပူၤဒူသ၀ီတဖၣ်အပူၤစ့ၢ်ကီး တနံၣ်အံၤတၢ်စူၤခါအကတီၢ် ခီဖျိတၢ်စူၤအါထံဒိၣ်ထီၣ်လၢစံာ်ပျီပူၤအဃိတၢ်ကီတၢ်ခဲအိၣ်လၢကသူၣ်ဘုအဂ့ၢ်န့ၣ် သ၀ီပူၤၦၤမၤအီၣ်စံာ်ဖိတဖၣ် စံး၀ဲန့ၣ်လီၤႉ တၢ်ကြဲၢ်ကီၢ်ဆၣ်ပူၤအပူၤကွံာ်မဟိ(၂၀၂၂)နံၣ်အခါစ့ၢ်ကီးတၢ်စူၤခါၦၤသူၣ်ဘုအဆၢကတီၢ် ခီဖျိတၢ်စူၤတဘၣ်ဆၢဘၣ်ကတီၢ်ဘၣ်အဃိ ဘုတဖၣ်ဟးဂီၤႇအဒိးအလၣ်ထီၣ်၀ဲဒီးစံာ်လီၢ်ဟးဂီၤ၀ဲအါမးအဖီခိၣ် ဘုဟးထီၣ်လီၤစှၤ၀ဲဒၣ်ကဲထီၣ်တ့ၢ်အသးဒံးအဂ့ၢ်န့ၣ် သ့ၣ်ညါဘၣ်လၢၦၤမၤအီၣ်စံာ်ဖိတဖၣ်အအိၣ်န့ၣ်လီၤႉ
တၢ်လိၣ်အိၣ်ဒံး၀ဲလၢထံဂုၤကီၢ်ဂၤအတၢ်ဆီၣ်ထွဲမၤစၢၤကညီၦၤဃ့ၢ်မှံဟးဖျိးတဖၣ်အဂ့ၢ် (CIDKP)စံး၀ဲ
လါယူၤလံ ၂၆ သီႇ ၂၀၂၃ နံၣ်ႇ ခ့ၣ်အဲးစံၣ် ကီၢ်ပယီၤပူၤအဂီၢ်ထံဂုၤကီၢ်ဂၤဟ့ၣ်ဒံး၀ဲတၢ်ဆီၣ်ထွဲမၤစၢၤဘၣ်ဆၣ် ခီဖျိကီၢ်ပူၤတၢ်သဘံၣ်သဘုၣ်အဃိ ကညီဖိလၢအဘၣ်ဃ့ၢ်မှံဟးဖျိးသ့ၣ်တဖၣ်အံၤအဂီၢ်န့ၣ်တဒိးန့ၢ်ဘၣ်၀ဲထံဂုၤကီၢ်ဂၤတၢ်ဆီၣ်ထွဲမၤစၢၤကူကူလၢလၢဘၣ် အဂ့ၢ်န့ၣ် (CIDKP)စံး၀ဲန့ၣ်လီၤႉ တကီၢ်ခါခဲအံၤကညီၦၤဃ့ၢ်မှံဟးဖျိးခဲလၢာ်တ၀ာ်ဘျဲၣ်ဃၣ်ဃၣ်အံၤ(CIDKP)တၢ်ကရၢကရိဆီၣ်ထွဲမၤစၢၤ၀ဲဘၣ်ဆၣ် မၤစၢၤ၀ဲတမ့ၢ်ကိးဘျီဒဲးဘၣ်အဃိတၢ်လိၣ်တၢ်လဲးအိၣ်ဒံး၀ဲအသိးတၢ်ဆီၣ်ထွဲမၤစၢၤလၢထံဂုၤကီၢ်ဂၤမၤစၢၤ၀ဲကီၢ်ပယီၤအဂီၢ်အံၤစ့ၢ်ကီးတုၤ၀ဲဒၣ်လၢကညီၦၤဃ့ၢ်မှံဟးဖျိးအအိၣ်အံၤစှၤ၀ဲဒၣ်အဂ့ၢ်န့ၣ်(CIDKP)မူဒါခိၣ်–၂ စီၤခဲလ့ၣ် စံး၀ဲန့ၣ်လီၤႉ အ၀ဲစံး၀ဲလၢ“ထံဂုၤကီၢ်ဂၤမ့တဲ၀ဲလၢအမၤစၢၤဆီၣ်ထွဲကီၢ်ပယီၤဆံးအါလဲၣ်ဘၣ်ဆၣ်ႇတၢ်ဆီၣ်ထွဲမၤစၢၤတတုၤလၢပအိၣ်ဘၣ်န့ၣ်အိၣ်မီၤနီၤႉအကလဲၤလၢကီၢ်ပယီၤကလံၤစိးတကပၤဒုအိၣ်ဧါသၢၣ်နီၤႉဘၣ်ဆၣ်တၢ်ဆီၣ်ထွဲမၤစၢၤလၢအဟဲတုၤလၢ ပ၀ဲကညီဟီၣ်က၀ီၤပူၤအံၤန့ၣ်တအိၣ်အါအဘဘၣ်ႉပတၢ်ကရၢကရိစ့ၢ်ကီးလၢပကဆီၣ်ထွဲမၤစၢၤမျးကယၤၦဲၤၦဲၤ န့ၣ် အဂံၢ်စၢ်ဒံးမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးတကီၢ်ခါခဲအံၤလၢကရ့ၣ်နံၣ်ကီၢ်စဲၣ်အပူၤ ၦၤနီၣ်ဂံၢ်အိၣ်၀ဲ(၄)ကလီၢ်ဃၣ်ဃၣ်အကျါ ကမျၢၢ်ၦၤနီၣ်ဂံၢ်တ၀ာ်ဃၣ်ဃၣ်န့ၣ်ဘၣ်ဃ့မှံဟးဖျိး၀ဲဒီးခီဖျိၦၤဂ့ၢ်၀ီမုၢ်ကျိၤ၀ဲၤကွာ်တၢ်အိၣ်ဆၢထၢၣ်ဟဲဃံးထီၣ်စ့ၤထီၣ်အဃိလိၣ်ဘၣ်၀ဲထံဂုၤကီၢ်ဂၤတၢ်ဆီၣ်ထွဲမၤစၢၤအဂ့ၢ်န့ၣ် ကရ့ၣ်နံၣ်ဂ့ၢ်၀ီခွဲးယာ်ကရူၢ်(KnHRG)ၦၤကတိၤတၢ်ပၢ အူဘညါ စံးလီၤတ့ၢ်၀ဲဖဲအပူၤကွံာ်စှၤသီတၢ်ဒုးသ့ၣ်ညါလီၤလံာ်တၢ်မၤနီၣ်မၤဃါတၢ်ရဲၣ်တၢ်ကျဲၤပူၤအခါန့ၣ်လီၤႉ ဒ်(KnHRG)စံး၀ဲအသိးန့ၣ်လၢကရ့ၣ်နံၣ်ကီၢ်စဲၣ်ပူၤၦၤသူၣ်အီၣ်ဖျးအီၣ်ဘုလီၤစှၤ၀ဲဒီးခီဖျိပယီၤသုးပံးဃာ်တၢ်လဲၤတၢ်က့ၤအဃိ တၢ်ကီတၢ်ခဲအိၣ်လၢၦၤကလဲၤၦ့ၤဟုးသးတကးဒံးဘၣ်အမဲာ်ညါ ကီၢ်ပူၤဒိးန့ၢ်ဘၣ်တၢ်ဆီၣ်ထွဲမၤစၢၤစ့ၢ်ကီးလီၤစှၤ၀ဲအဃိ အိၣ်ခိးမုၢ်လၢ်လၢထံဂုၤကီၢ်ဂၤအတၢ်ဆီၣ်ထွဲမၤစၢၤဘၣ်ဆၣ်ဒ်နဆိမိၣ်တိာ်ပာ်အသိးန့ၣ်တကဲထီၣ်၀ဲဘၣ် ခီဖျိလၢ တၢ်ဆီၣ်ထွဲမၤစၢၤတၢ်ရဲၣ်တၢ်ကျဲၤအံၤလဲၤ၀ဲဒၣ်လၢသုးမီၤစိရိၤအတၢ်ရဲၣ်တၢ်ကျဲၤဖီလာ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးခီဖျိတၢ်သဘံၣ်သဘုၣ်တဖၣ်အဃိကီၢ်ပယီၤကမျၢၢ်ထံဖိကီၢ်ဖိဒီးရိၣ်ဟ့ၣ်ကၠၣ်ဘၣ်ကီဘၣ်ခဲဖိအဂီၢ် စးထီၣ်ဖဲ(၂၀၀၇)နံၣ်တုၤလၢတကီၢ်ခါခဲအံၤတစုန့ၣ်အမဲရံၣ်ကၤဆီၣ်ထွဲမၤစၢၤ၀ဲစ့ဒီၣ်လၣ်အကကွဲၢ်(၂)ကထိဘျဲၣ်အဂ့ၢ်န့ၣ် ထုးထီၣ်ပာ်ဖျါ၀ဲဖဲအပူၤကွံာ်လါယူၤလံ ၁၄ သီ အနံၤန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံထံဂုၤကီၢ်ဂၤတၢ်ဆီၣ်ထွဲမၤစၢၤကရူၢ်ကရၢတဖၣ်အံၤဘၣ်လဲၤ၀ဲဒၣ်လၢသုးမီၤစိရိၤအတၢ်ရဲၣ်တၢ်ကျဲၤဖီလာ်အဃိတၢ်ဆီၣ်ထွဲမၤစၢၤသ့ၣ်တဖၣ်အံၤမ့မ့ၢ်တခီလဲၤတုၤ၀ဲဒၣ်ထဲလၢသုးမီၤစိရိၤဒီးအ၀ဲသ့ၣ်စုတီၤဖီလာ်ကရူၢ်ကရၢသ့ၣ်တဖၣ်အအိၣ်န့ၣ်လီၤႉလၢန့ၣ်အမဲာ်ညါအလီၢ်အိၣ်လၢတၢ်ကက့ၤပဲာ်ထံနီၤဖးကဒါက့ၤထံဂုၤကီၢ်ဂၤအတၢ်ဆီၣ်ထွဲမၤစၢၤအကျိၤအကျဲသ့ၣ်တဖၣ်အံၤအဂ့ၢ်န့ၣ် ဂံၢ်ခီၣ်ထံးတၢ်ကရၢကရိလၢအဃုသ့ၣ်ညါအိၣ်ခိးကွၢ်ဟုၣ်ကွၢ်စူၣ်တၢ်မုာ်တၢ်ခုၣ် တဖၣ် ပဲာ်ထံနီၤဖးစံး၀ဲန့ၣ်လီၤႉ
ပလီ၀့ၢ်နု၁်လီၤပယီၤသုးတၢ်သမံသမိးတြဲၤတဖၣ်အံၤ တပျဲကမျၢၢ်ဟးထီၣ်က့ၤလီၤလၢၤဘၣ်
လါယူၤလံ ၂၆ သီႇ ၂၀၂၃ နံၣ်ႇ ခ့ၣ်အဲးစံၣ် စးထီၣ်ဖဲကွံာ်စှၤသီအခါ ကျဲလၢတၢ်ကလဲၤဆူတနီသရံၣ်ကီၢ်ခီဒိၣ် ပလီ၀့ၢ်န့ၣ် ပယီၤသုးတၢ်သမံသမိးတြဲၤလၢအိၣ်ကျဲပူၤဒီတကျိၤအံၤတဖၣ် အ၀ဲသ့ၣ်တပျဲကမျၢၢ်လ့ၢ်ထီၣ်လ့ၢ်လိၤလၢၤဘၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ကျဲမုၢ်လၢကလဲၤဆူပလီ၀့ၢ်ဒီတကျိၤအံၤန့ၣ်ပယီၤသုးတၢ်သမံသမိးတြဲၤကအိၣ်အစှၤကတၢၢ်(၇)ခါညါဒီး တၢ်သမံသမိးတြဲၤတဖၣ်အကျါမ့မ့ၢ်(မီၤကၠီ)သ၀ီတၢ်သမံသမိးတြဲၤန့ၣ် စးထီၣ်ဖဲအပူၤကွံာ်လါယူၤလံ ၂၀ သီ တုၤလၢခဲအံၤ န့ၣ် တပျဲလီၢ်က၀ီၤကမျၢၢ်ဟးထီၣ်က့ၤလီၤလၢၤဘၣ်အဂ့ၢ်န့ၣ် လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤ တဂၤ စံး၀ဲဒ်အံၤန့ၣ် လီၤႉ အ၀ဲစံး၀ဲလၢ“တၢ်သမံသမိးတြဲၤ၀ဲန့ၣ်စးထီၣ်ပံး၀ဲလၢအပူၤကွံာ်စှၤသီအခါန့ၣ်လံႉယဆိမိၣ်ကအိၣ်လၢလွံၢ်သီလံႉ မ့၀ံၤနစိာ်တၢ်တန့ၢ်နီတမံၤဘၣ်ႉတၢ်ဒုးမ့ကဲထီၣ်လၢ၀့ၢ်ပူၤတၢ်လီၢ်တတီၤတီၤလံန့ၣ်တၢ်သမံသမိးတြဲၤ၀ဲန့ၣ် ပံးဃာ်ကျဲ မၢ်မၢ်လီၤႉအ၀ဲသ့ၣ်မၤ၀ဲလၢအကစၢ်သးလီၤႉလၢညါနါက့ၦၤဘၣ်ၦ့ၤဒးဆံၣ်သိလၢအိၣ်ဒီးတၢ်ပာ်ပနီၣ်လီၤႉနၦ့ၤသိအဘျဲၣ် တကိမးတန့ၢ်ဘၣ်ႉအ၀ဲသ့ၣ်ပံးဃာ်၀ဲဒ်အံၤအဃိၦၤလၢအအဲၣ်ဒိးလဲၤပၠးသးလၢတၢ်ဆါဟံၣ်တဖၣ်န့ၣ်ဘၣ်လဲၤတရံးက့ၤကျဲလၢအဂၤဘျီကျဲတၢ်လၢၤဘူၣ်လၢၤစ့နါက့အါထီၣ်စ့ၢ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါလၢပလီကီၢ်ဆၣ်တိၤတၢ်သမံသမိးတြဲၤဒီး၀့ၢ်နုာ်လီၤတၢ်သမံသမိးတြဲၤတဖၣ်န့ၣ် စးထီၣ်ဖဲအပူၤကွံာ် လါဖ့ၤဘြူၤအါရံၤန့ၣ်ပယီၤသုးအိၣ်ခိးသမံသမိးတၢ်ဟဲအါထီၣ်၀ဲဒီးလၢ၀့ၢ်ပူၤစ့ၢ်ကီးစးထီၣ်ဖဲတလါအံၤလါယူၤလံတၢတနွံန့ၣ်ပယီၤသုးတဖၣ်ဖီၣ်ထီၣ်ကျိအိၣ်ခိးဃ့အီၣ်စ့လၢကမျၢၢ်လၢအဟးထီၣ်က့ၤလီၤဒီး(ဆဲးကဲး)တဖၣ်အံၤအအိၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လီၢ်က၀ီၤကမျၢၢ်လၢအဂၤတဂၤစ့ၢ်ကီးစံး၀ဲလၢ“လီၢ်ခံအံၤ၀့ၢ်ပူၤဒုဟဲနးဒိၣ်ထီၣ်ကွ့ၢ်ကွ့ၢ်လီၤမီၤနီၤႉအ၀ဲသ့ၣ်စိာ်ထီၣ်ကျိအိၣ်ခိးဃ့အီၣ်စ့ႉဆဲးကဲးတခိၣ်န့ၣ်ဘၣ်ဟ့ၣ်(၅)ကထိကၠးမီၤနီၤႉဒ်ယံၤဒ်နးထီၣ်လီၤႉၦၤဘၣ်ပျံၤအ၀ဲသ့ၣ်ခဲလၢာ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ပလီ၀့ၢ်နုာ်လီၤပယီၤသုးတၢ်သမံသမိးတြဲၤတကးဒံးဘၣ်အမဲာ်ညါလၢပလၣ်၀့ၢ်ဒီးပလီၣ်၀့ၢ်တဖၣ်န့ၣ်စ့ၢ်ကီး စးထီၣ်ဖဲအပူၤကွံာ်လါဖ့ၤဘြူၤအါရံၤလၢာ်န့ၣ် ခီဖျိပယီၤသုးတပျဲသိလ့ၣ်ႇဆဲးကဲးႇထီၤလၤကၠံၤႇသိလ့ၣ်တဖၣ်အံၤလၢ ကတီၣ်ဒးဆံၣ်အဘျဲၣ်ဘၣ်အဃိ လီၢ်က၀ီၤကမျၢၢ်တဖၣ်တၢ်ကီတၢ်ခဲအိၣ်ထီၣ်၀ဲလၢကဟးထီၣ်က့ၤလီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ
ပယီၤသုးအံၤလၢကက့ၤမၤန့ၢ်ကဒါ(လဲၣ်ခၣ်တီၤ)သုးကလၢၤအဂီၢ်ဖဲအ၀ဲသ့ၣ်ဟဲထီၣ်အခါတၢ်ခးကဒီးအီၤ
လါယူၤလံ ၂၆ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲအပူၤကွံာ်လါယူၤလံ ၂၁ သီအနံၤန့ၣ် တၢ်ပၢၢ်ဆၢသုးပာ်ဖှိၣ်ထီၣ်မၤန့ၢ်၀ဲမၠၣ်၀တံၣ်၀့ၢ်ဃၢၤ(လဲၣ်ခၣ်တီၤ)ပယီၤသုးကလၢၤ အံၤဒီးဖဲန့ၣ်၀ံၤလီၢ်ခံပယီၤသုးအံၤလၢကမၤန့ၢ်က့ၤသုးကလၢၤ၀ဲအံၤအဂီၢ်ဖဲအ၀ဲသ့ၣ်သုးကျိၤနုာ်လီၤအခါ တၢ်ပၢၢ်ဆၢသုးပာ်ဖှိၣ်ခးကဒီးအ၀ဲသ့ၣ်အဃိတၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်လၢခံခီခံကပၤအဘၢၣ်စၢၤအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သး ထုးထီၣ်ပာ်ဖျါ၀ဲဖဲမဟါလါယူၤလံ ၂၅ သီအနံၤန့ၣ်လီၤႉ ဖဲလါယူၤလံ ၂၄ သီ ဒီး ၂၅ သီအခါန့ၣ် ပယီၤသုးကျိၤနုာ်လီၤ၀ဲလၢ(မၠ့ၣ်တၤလ့မၠဲၤ–လဲၣ်ခၣ်တီၤ)ဘၢၣ်စၢၤဒီး ဖဲန့ၣ်ဘၣ်တၢ်ခိးခးအ၀ဲသ့ၣ်လၢခီၤဘြၤသုးကျိၤတီခိၣ်ရိၣ်မဲသုးပာ်ဖှိၣ်ကရူၢ်အံၤအဃိပယီၤသုးကျိၤဂုၤကဒါလီၢ်ခံအဂ့ၢ်န့ၣ် ခ့ၣ်အဲၣ်ယူၣ်တကပၤ စံး၀ဲန့ၣ်လီၤႉ တၢ်နဲၣ်လီၤအိၣ်လၢတၢ်ကဘၣ်ထီၣ်မၤန့ၢ်က့ၤ(လဲၣ်ခၣ်တီၤ)ပယီၤသုးကလၢၤအံၤအဃိ ခီၣ်ချ့သုးရ့ၣ်(ခမရ–၂) ဒီး(ခမရ–၁၁၈)သုးပာ်ဖှိၣ်အဂၤ(၁၀၀)ဘျဲၣ်နုာ်လီၤမၤ၀ဲဒုးယၤတၢ်ဟူးတၢ်ဂဲၤအခါတၢ်ဒုးကဲထီၣ်၀ဲလၢ ခံခီခံကပၤအဘၢၣ်စၢၤဒီး ဘၣ်ဃးတၢ်သံတၢ်ဘၣ်ဒိဘၣ်ထံးတၢ်အိၣ်သးခီန့ၣ်တၢ်ထုးထီၣ်ပာ်ဖျါ၀ဲတအိၣ်ဒံးဘၣ်န့ၣ်လီၤႉ ဘၣ်ဆၣ်ဖဲတၢ်ဒုးကဲထီၣ်၀ဲလၢပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤအတီၢ်ပူၤအခါန့ၣ် ၦၤပိာ်မုၣ်လၢအိၣ်တၢ်ခိၣ်တၢ်ဃၢၤဖဲန့ၣ်သံ၀ဲ(၁)ဂၤဒီးပိာ်ခွါဘၣ်ဒိ၀ဲ(၁)ဂၤအဂ့ၢ်န့ၣ် ခီၤဘြၤသုးကျိၤ ထုးထီၣ်ပာ်ဖျါ၀ဲ န့ၣ်လီၤႉ တၢ်ဒုးကဲထီၣ်ဘျီ၀ဲအံၤဘၣ်ဃးပယီၤသုးသံဘၣ်ဒိဘၣ်ထံးတၢ်အိၣ်သးဒီးတၢ်ပၢၢ်ဆၢသုးပာ်ဖှိၣ်ကရူၢ်သံဘၣ်ဒိဘၣ်ထံးတၢ်အိၣ်သးအံၤန့ၣ် ပခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ် ဃုသ့ၣ်ညါဆဲးကျိးမၤလီၤတံၢ်၀ဲအဖၢမုၢ်န့ၣ်လီၤႉ ဖဲအပူၤကွံာ်လါယူၤလံ ၂၁ သီအနံၤန့ၣ် တၢ်ပၢၢ်ဆၢသုးပာ်ဖှိၣ်ထီၣ်မၤန့ၢ်၀ဲ(လဲၣ်ခၣ်တီၤ)ပယီၤသုးကလၢၤအံၤဒီး မၤန့ၢ်၀ဲကျိချံၦာ်သၣ်ဃုာ်ဒီးတၢ်ဖိတၢ်လံၤလၢအဂၤတဖၣ်အါအါဂီၢ်ဂီၢ်အဂ့ၢ်န့ၣ် ခီၤဘြၤသုးကျိၤ ထုးထီၣ်ပာ်ဖျါဒံး၀ဲ န့ၣ်လီၤႉ တကးဒံးဘၣ်လၢန့ၣ်အမဲာ်ညါလၢကညီကီၢ်စဲၣ် နိၣ်တကီႇမၠၣ်၀တံၣ်ဒီးကီးတရံးဟီၣ်က၀ီၤတကပၤန့ၣ်စ့ၢ်ကီး တၢ်ဒုးကဲထီၣ်၀ဲလၢပယီၤသုးကျိၤဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤခဲအံၤခဲအံၤဒီး ဒ်န့ၣ်အသိးပယီၤသုးသိလ့ၣ်လၢ အဟဲထီၣ်(စစ်ကူ)အိၣ်ဟဲလၢတလၢၤကီၢ်စဲၣ် ပကိကီၢ်ခိဒိၣ်တကပၤန့ၣ်စ့ၢ်ကီး တၢ်ခိးခးအ၀ဲသ့ၣ်သိလ့ၣ်လၢတၢ်ဘၢၣ်စၢၤ ကဲထီၣ်စ့ၢ်ကီး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ