ကီၢ်ဆၢဘၣ်ကီဘၣ်ခဲဒဲက၀ီၤတဖၣ်အပူၤ ခီဖျိၦၤကၠိဖိနီၣ်ဂံၢ်ဟဲအါထီၣ်အဃိလိၣ်ဘၣ်တၢ်မၤစၢၤ
လါအီကူး ၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢကီၢ်ကၠီၣ်တဲၣ်–ကီၢ်ပယီၤကီၢ်ဆၢ ကညီဘၣ်ကီဘၣ်ခဲဒဲက၀ီၤ(၇)ဘ့ၣ်အပူၤ တနံၣ်အံၤ(၂၀၂၃–၂၀၂၄) တၢ်သိၣ်လိနံၣ် အပူၤ ခီဖျိၦၤကၠိဖိနီၣ်ဂံၢ်ဟဲအါထီၣ်အဃိ လိၣ်ဘၣ်၀ဲဒၣ်ကၠိတၢ်သူၣ်ထီၣ်တီၤဒၢးဒီး ကၠိတၢ်ပီးတၢ်လီတၢ်ဆီၣ်ထွဲမၤစၢၤတဖၣ် အဂ့ၢ်န့ၣ် သ့ၣ်ညါဘၣ်လၢကညီဘၣ်ကီဘၣ်ခဲကမံးတံာ်(KRC)အအိၣ်န့ၣ်လီၤႉ ကီၢ်ကၠီၣ်တဲၣ်–ကီၢ်ပယီၤကီၢ်ဆၢ မဲၢ်လးႇအူးဖၠၣ်ႇနိၣ်ဖိႇမဲၢ်လးအူးႇမဲၢ်ရၤမိၢ်ႇထါမ်ဟ့ၣ်ႇဘၣ်ဒိၤယါဘၣ်ကီဘၣ်ခဲ ဒဲက၀ီၤ (၇)ဘ့ၣ်အံၤအပူၤ ခီဖျိတနံၣ်အံၤၦၤကၠိဖိနီၣ်ဂံၢ်ဟဲအါထီၣ်အဃိ လံာ်လဲၢ်တကူတလၢတကးဒံးဘၣ် လၢကမၤအအါထီၣ်ကၠိတၢ်သူၣ်ထီၣ်တီၤဒၢးအံၤအဂီၢ်တၢ်မၤစၢၤတအိၣ်၀ဲဘၣ်အဂ့ၢ်န့ၣ် (KRC)ကူၣ်သ့မူဒါခိၣ် စီၤဟ့ၣ်စိ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တနံၣ်အံၤၦၤကၠိဖိနီၣ်ဂံၢ်ဒုဟဲအါထီၣ်ဖးအါညါႉလၢကၠိသရၣ်၊မုၣ်တၢ်ဆီၣ်ထွဲမၤစၢၤနါက့လိၣ်စ့ၢ်ႉ မ့၀ံၤလၢၦၤကၠိဖိအဂီၢ်စ့ၢ်ကီးလံာ်မိၢ်ၦၢ်တလၢဘၣ်ႉကဘှီဂ့ၤထီၣ်က့ၤတၢ်သူၣ်ထီၣ်အဂီၢ်စ့ၢ်ကီးတၢ်မၤစၢၤတအိၣ်ဘၣ် အဃိဘှီတသ့ဘၣ်မီၤနီၤႉမ့၀ံၤကသူၣ်အါထီၣ်ကၠိအဂီၢ်န့ၣ်ပမၤတန့ၢ်ဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ဘၣ်ကီဘၣ်ခဲဒဲက၀ီၤ(၇)ဘ့ၣ်အံၤအပူၤကွံာ်(၂၀၂၂–၂၀၂၃)တၢ်သိၣ်လိနံၣ်အခါန့ၣ် တီၤဖုၣ်တုၤလၢတီၤထီန့ၣ် ကၠိအိၣ်၀ဲခဲလၢာ်(၄၉)ဖျၢၣ်ႇၦၤကၠိဖိနီၣ်ဂံၢ်အိၣ်၀ဲ(၁၆ႇ၀၀၀)ဘျဲၣ်လီၤဒီးဘၣ်ဆၣ်တနံၣ်အံၤ(၂၀၂၃–၂၀၂၄) တၢ်သိၣ်လိနံၣ် အဂီၢ် ၦၤကၠိဖိနီၣ်ဂံၢ်ခဲလၢာ်အိၣ်၀ဲ(၂၁ႇ၂၆၇)ဂၤႇ ကၠိသရၣ်၊မုၣ်အိၣ်၀ဲ(၈၃၄)ဂၤအဂ့ၢ်န့ၣ် KRC တၢ်မၤနီၣ်စရီအသိး သ့ၣ်ညါဘၣ် န့ၣ်လီၤႉ လၢန့ၣ်အမဲာ်ညါၦၤကၠိဖိလၢအိၣ်ဘၣ်ကီဘၣ်ခဲဒဲက၀ီၤပူၤလၢအဖျိထီၣ်တီၤထီကၠိသ့ၣ်တဖၣ်အံၤ လၢအ၀ဲသ့ၣ်ကဆဲးထီၣ်ကၠိအဂီၢ် (Post-Ten)ကၠိအိၣ်၀ဲ(၉)ဖျၢၣ်ဒီး ၦၤကၠိဖိနီၣ်ဂံၢ်အိၣ်၀ဲ(၁ႇ၀၈၇)ဂၤအဂ့ၢ်န့ၣ် (KRC)စံး၀ဲန့ၣ်လီၤႉ စးထီၣ်ဖဲအပူၤကွံာ်(၂၀၀၈)နံၣ်လၢဘၣ်ကီဘၣ်ခဲဒဲက၀ီၤတဖၣ်အပူၤဘၣ်ဃးလၢကူၣ်သ့တၢ်ဆီၣ်ထွဲမၤစၢၤတကပၤန့ၣ် လီၤစှၤ၀ဲဒီးကၠိသရၣ်၊မုၣ်လၢအသိၣ်လိတၢ်(၄၆၅)ဂၤအံၤတၢ်ဆီၣ်ထွဲမၤစၢၤ၀ဲတလါန့ၣ်န့ၢ်ထဲတဂၤ(၁၀၀၀)ဘးလီၤ အဂ့ၢ်န့ၣ် သ့ၣ်ညါဘၣ်လၢ(KRCEE)အအိၣ်န့ၣ်လီၤႉ ဒ်န့ၣ်အသိးဘၣ်ကီဘၣ်ခဲဒဲက၀ီၤတဖၣ်အပူၤကတီၤဆိကၠိ(၄၇)ဖျၢၣ်အဂီၢ်စ့ၢ်ကီးဒိးန့ၢ်ဘၣ်တၢ်ဆီၣ်ထွဲမၤစၢၤစှၤလီၤ၀ဲ အဃိ ၦၤတ၀ၢတၢ်ကရၢကရိလၢအိၣ်ဟီၣ်က၀ီၤပူၤတဖၣ်ဘၣ်က့ၤဆီၣ်ထွဲမၤစၢၤက့ၤ၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ကၠိဖိမိၢ်ပၢ်နါမူလၢအဟဲသုးလီၢ်သုးကျဲဆူနိၣ်ဖိဘၣ်ကီဘၣ်ခဲဒဲက၀ီၤပူၤတဂၤစံး၀ဲလၢ“လၢပသ၀ီန့ၣ်ကၠိအိးထီၣ်မီၤနီၤႉ ဘၣ်ဆၣ်ပဘၣ်ကနၣ်တၢ်အိၣ်သးမၢ်မၢ်လီၤႉကျိဖးဒိၣ်စ့ၢ်ကီးလီၤတဲာ်ကိးမုၢ်နံၤဒဲးလီၤႇအဃိပတအဲၣ်ဒိးပာ်ပဒံၣ်ပဖိလၢာ်ဘၣ်အဃိပဟဲက့ၤပာ်လၢဒဲက၀ဲၤပူၤမီၤနီၤႉအပူၤကွံာ်လၢညါန့ၣ်ပအိၣ်လၢဒဲက၀ီၤပူၤလီၤႉပဆိမိၣ်လၢတၢ်အိၣ်သးဂ့ၤထီၣ်လံအဃိပက့ၤအိၣ်လၢပသ၀ီမီၤနီၤႇခဲအံၤတၢ်ဒုးက့ၤကဲထီၣ်ကဒါဘျီပဟဲက့ၤနုာ်လီၤအိၣ်ကဒါလၢဒဲက၀ီၤပူၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ (၂၀၂၁)သုးဟံးန့ၢ်ထံကီၢ်တၢ်စိတၢ်ကမီၤ၀ံၤလီၢ်ခံလၢ(ခ့ၣ်အဲၣ်ယူၣ်)တၢ်ပၢဟီၣ်က၀ီၤတဖၣ်အပူၤ ခီဖျိတၢ်ဒုးစးထီၣ်ကဲထီၣ်ကဒါ၀ဲဒိၣ်ဒိၣ်မုၢ်မုၢ်ကၠိတဖၣ်ဘၣ်ပံးကွံာ်သးအါအါဂီၢ်ဂီၢ်အဃိၦၤကၠိဖိတဖၣ်လဲၤစံၣ်ထီၣ်အိၣ်လၢကီၢ်ဆၢဘၣ်ကီဘၣ်ခဲဒဲက၀ီၤပူၤအါအါဂီၢ်ဂီၢ်ဒီးဆဲးမၤလိက့ၤတၢ်ဖဲန့ၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ခီဖျိခံခီခံကပၤတၢ်ဒုးကဲထီၣ်တပယူ၁်ဃီအဃိ လီၢ်က၀ီၤကမျၢၢ်တဖၣ်တၢ်ကီတၢ်ခဲအိၣ်လၢကသူၣ်ဘု
လါအီကူး ၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် တနီသရံၣ်ကီၢ်ဆၣ်ဒူသ၀ီတဖၣ်အပူၤ ဘၣ်လၢတၢ်စူၤခါအဆၢကတီၢ်ဘၣ်ဆၣ် ခီဖျိတၢ်ဒုးကဲထီၣ်လၢခံခီခံကပၤအဘၢၣ်စၢၤတပယူာ်ဃီအဃိၦၤမၤအီၣ်စံာ်ဖိတဖၣ်တၢ်ကီတၢ်ခဲအိၣ်လၢကသူၣ်ဘု အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လၢတနီသရံၣ်ကီၢ်ဆၣ်ဒူသ၀ီတဖၣ်အပူၤစးထီၣ်ဖဲအပူၤကွံာ်လါယူၤလံထီၣ်တၢတနွံအခါန့ၣ် တၢ်ဒုးကဲထီၣ်၀ဲလၢပယီၤသုးဒီးတၢ်ဒီသဒၢကမျၢၢ်သုးကရူၢ်အဘၢၣ်စၢၤဒီးခီဖျိကမျၢၢ်တဖၣ်အံၤဘၣ်ဃ့ၢ်မှံဟးဖျိး အဃိ ကမျၢၢ်ၦၤအီၣ်စံာ်ဖိတဖၣ်တၢ်စူၤခါအတီၢ်ပူၤအံၤအ၀ဲသ့ၣ်တသူၣ်ဘၣ်ဘုဘၣ်အဂ့ၢ်န့ၣ် လီၢ်က၀ီၤကမျၢၢ်တဂၤ စံး၀ဲဒ်အံၤန့ၣ် လီၤႉ အ၀ဲစံး၀ဲလၢ“တနံၣ်အံၤၦၤဘၣ်ဟးစံၣ်အါမီၤနီၤႉဖဲအံၤတၢ်စူၤခါကိးနံၣ်ဒဲးန့ၣ်ၦၤသူၣ်ဘုလီၤႉ ခဲအံၤတၢ်ဒုးကဲထီၣ်မီၤနီၤႉ အဃိၦၤသူၣ်ဘုတဂၤမးတဘူၣ်လၢၤဘၣ်ႉမ့နၢ်ဟူကျိဖးဒိၣ်သီၣ်န့ၣ်ဘၣ်စံၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ လၢန့ၣ်အမဲာ်ညါခီဖျိပယီၤသုးနုာ်လီၤအိၣ်ဆီလီၤသးလၢသ၀ီပူၤခးလီၤကျိဖးဒိၣ်တပယူာ်ဃီအဃိ ကမျၢၢ်ၦၤမၤအီၣ်စံာ်ဖိတဖၣ်အံၤ ဘၣ်ဃ့ၢ်မှံဟးဖျိး၀ဲအဂ့ၢ်န့ၣ် ၦၤမၤအီၣ်စံာ်ဖိလၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤ န့ၣ်လီၤႉ “ၦၤလၢအကျိၣ်အိၣ်စ့အိၣ်တစဲးတမွဲးညါန့ၣ်အသူၣ်အီၣ်ဘုမီၤနီၤႉဘၣ်ဆၣ်ပယီၤသုးအံၤနုာ်လီၤအိၣ်တုၤလၢသ၀ီပူၤညါႉကွၢ်လၢအ၀ဲသ့ၣ်အဲၣ်ဒိးခးလီၤ၀ဲန့ၣ်ခးလီၤ၀ဲလီၤႉအဃိၦၤလၢအသူၣ်လီၤဃာ်ဘုတဖၣ်စ့ၢ်ကီးနၤနၤယၤယၤဘၣ်စံၣ်အဃိ ပဘၣ်ပာ်တ့ၢ်ကွံာ်အီၤဒ်န့ၣ်လီၤႇအဃိကျီၢ်နုာ်လီၤယီၢ်နုာ်လီၤအီၣ်၀ဲမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤ ႉ ပယီၤသုးနုာ်လီၤလၢဟီၣ်က၀ီၤပူၤတပယူာ်ဃီဒ်အံၤခီဖျိလၢအ၀ဲသ့ၣ်လုၢ်ဘၢဒိၣ်စိ၀ဲဟီၣ်က၀ီၤတန့ၢ်လၢၤ၀ဲဘၣ်အဃိ အ၀ဲသ့ၣ်အံၤမၤဖျါအတၢ်ဟူးတၢ်ဂဲၤလၢအ၀ဲသ့ၣ်သုးကျိၤနုာ်လီၤန့ၢ်ဒံးအဂ့ၢ်န့ၣ် ဟီၣ်က၀ီၤတၢ်ဒီသဒၢကမျၢၢ်သုးကရူၢ် တကပၤ စံး၀ဲန့ၣ်လီၤႉ တနီသရံၣ်ကီၢ်ဆၣ်တကးဒံးဘၣ်အမဲာ်ညါလၢဒ၀ဲၢ်၀့ၢ်က၀ီၤဒ့တဖၣ်အပူၤစ့ၢ်ကီးခီဖျိဟုသးယိယိဖိအၦ့ၤဒိၣ်ထီၣ် ခံဆးညါအဃိလီၢ်က၀ီၤကမျၢၢ်တဖၣ်အ၀ဲသ့ၣ်ၦ့ၤအီၣ်ဟုသးဒီထၢၣ်တန့ၢ်လၢၤဘၣ်ဒီး မ့မ့ၢ်တခီၦ့ၤအီၣ်န့ၢ်က့ၤ၀ဲထဲလၢ အဘူလီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ဒ၀ဲၢ်ဃိ၁်ပူၤ တၢ်ပျၢ်လီၤၦၤဃိ၁်ဖိလၢအဘၣ်ဟးထီၣ်မုၢ်နံၤမုၢ်သီဘူးထီၣ်အဂၤ(၃၀)ဘျဲၣ်
လါအီးကူး ၂ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲမဟါလါအီကူး ၁ သီ လါဃိးလါၦဲၤအနံၤန့ၣ် လၢတနီသရံၣ်ကီၢ်ခီဒိၣ် ဒ၀ဲၢ်၀့ၢ်ဃိာ်ပူၤ တၢ်ပျၢ်လီၤၦၤဃိာ်ဖိလၢ အဘၣ်ဟးထီၣ်မုၢ်နံၤမုၢ်သီဘူးထီၣ်အဂၤ(၃၀)ဘျဲၣ်ဒီး ဘၣ်ဆၣ်ဖဲန့ၣ်အကျါ ထံရူၢ်ကီၢ်သဲးၦၤဃိာ်ဖိတပၣ်ဃုာ်နီတဂၤဘၣ် အဂ့ၢ်န့ၣ် သ့ၣ်ညါဘၣ်လၢထံရူၢ်ကီၢ်သဲးၦၤဃိာ်ဖိအဟံၣ်ဖိဃီဖိ အအိၣ်န့ၣ်လီၤႉ ဖဲလါဃိးလါၦဲၤအနံၤန့ၣ်သုးမီၤစိရိၤဘိးဘၣ်ရၤလီၤ၀ဲလၢကီၢ်ပယီၤထံကီၢ်ဒီတဘ့ၣ်အပူၤဃိာ်ကိးဖျၢၣ်ဒဲး ကပျၢ်လီၤ ၦၤဃိာ်ဖိ(၇၇၄၉)ဂၤဒီးဖဲန့ၣ်၀ံၤလီၢ်ခံဒ၀ဲၢ်ဃိာ်ပူၤတၢ်ပျၢ်လီၤၦၤဃိာ်ဖိအဂၤ(၃၀)ဘျဲၣ်အံၤအကျါ ထံရူၢ်ကီၢ်သဲးၦၤဃိာ်ဖိ တပၣ်ဃုာ်နီတဂၤဘၣ်အဂ့ၢ်န့ၣ် ထံရူၢ်ကီၢ်သဲးၦၤဃိာ်ဖိအဟံၣ်ဖိဃီဖိတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ၦၤလၢအဟဲက့ၤထီၣ်ခဲအံၤတဖၣ်န့ၣ်မုၢ်နံၤမုၢ်သီလၢအကဘၣ်ဟးထီၣ်န့ၣ်အိၣ်တ့ၢ်က့ၤထဲ(၆)လါလီၤႉ ၦၤဟဲက့ၤထီၣ်တဖၣ်အံၤအိၣ်ဒၣ်ထဲအလီၤဘၣ်တၢ်ကမၣ်လၢအတမျာ်တၢ်ႇအဟုၣ်တၢ်တၢ်မူးတၢ်ရၢ်သ့ၣ်တဖၣ်လီၤႉ မ့မ့ၢ်ထံရူၢ်ကီၢ်သဲးတၢ်မူးတၢ်ရၢ်ခီန့ၣ်တပၣ်ဘၣ်ႉယ၀ၤန့ၣ်လီၤဘၣ်လၢဃိာ်ပူၤ(၃)နံၣ်လၢထံရူၢ်ကီၢ်သဲးကွီၢ်မ့ၣ်မီၤနီၤႉ ခဲအံၤအိၣ်တ့ၢ်ဒံးတနံၣ်ဃၣ်ဃၣ်ဒံးႉမ့မ့ၢ်လၢယတံခီန့ၣ်ဘၣ်အိၣ်လၢဃိာ်ပူၤအနံၣ်တဆံဘျဲၣ်ညါႉၦၤတထုးလီၤစှၤအ၀ဲမုၢ်နံၤမုၢ်သီစ့ၢ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ၦၤဃိာ်ဖိ(၇၇၄၉)ဂၤလၢသုးမီၤစိရိၤပျၢ်ဖျဲးထီၣ်၀ဲသ့ၣ်တဖၣ်အံၤအကျါန့ၣ်ထံရူၢ်ကီၢ်သဲးၦၤဃိာ်ဖိပၣ်ဃုာ်ၦဲၤဂၤလဲၣ်န့ၣ် တၢ်ကရၢကရိလၢအဆီၣ်ထွဲမၤစၢၤထံရူၢ်ကီၢ်သဲးၦၤဃိာ်ဖိကရူၢ်(AAPP)ထၢဖှိၣ်မၤနီၣ်စရီအဖၢမုၢ်လီၤဒီး ဒ်တၢ်မၤန့ၢ်စရီအသိးန့ၣ် ၦၤဟဲက့ၤထူၣ်ဖျဲးထီၣ်အကျါပၣ်ဃုာ်၀ဲထံရူၢ်ကီၢ်သဲးၦၤဃိာ်ဖိ(၁၂၀)ဂၤအဂ့ၢ်န့ၣ် AAPP ၦၤဘၣ်မူဘၣ်ဒါတဂၤ စံး၀ဲန့ၣ်လီၤႉ အ၀ဲစံး၀ဲလၢ“စရီလီၤတံၢ်လီၤဆဲးခီန့ၣ်မၤလီၤတံၢ်အီၤအဖၢမုၢ်လီၤမီၤနီၤႉအဃိပတဲလီၤတံၢ်တသ့ဒံးဘၣ်ႉ တုၤလၢတဂီၤညါအံၤဒုၦၤပျၢ်လီၤအကျါန့ၣ်ပၣ်ဃုာ်ထံရူၢ်ကီၢ်သဲးၦၤဃိာ်ဖိ(၁၂၀)ဘျဲၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးလၢကညီကီၢ်စဲၣ် တီၣ်ကလ့ဃိာ်ပူၤန့ၣ်စ့ၢ်ကီး သုးမီၤစိရိၤပျၢ်လီၤ၀ဲၦၤဃိာ်ဖိ(၂၅၈)ဂၤဒီး ဖဲန့ၣ်အကျါပၣ်ဃုာ် ထံရူၢ်ကီၢ်သဲးၦၤဃိာ်ဖိ(၂)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒူသထူၣ်ကီၢ်ရ့ၣ်ပူၤ တၢ်ပ၁်ပနီၣ်အ့ကၢၣ်(၃)ကထိဘျဲၣ်တၢ်လီၢ်တခါလၢပျဲပူၤတၢ်မံၤလ၁်ဆၣ်ဖိကီၢ်ဖိသ့ၣ်ၦၢ်
လါအီကူး ၂ သီႇ ၂၀၂၃ နံၣ်ႇ ခ့ၣ်အဲးစံၣ် ဒ်သိးတၢ်ဒီသဒၢတၢ်ဂုၤထီၣ်ပသီထီၣ်တၢ်တိာ်ကျဲၤဖးဒိၣ်လၢအမၤဟးဂီၤန့ဆၢၣ်တၢ်အိၣ်ယၢၤတဖၣ်အံၤအဂီၢ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်အပူၤ သ့ၣ်ၦၢ်လၢအအ့ကၢၣ်အိၣ်(၃)ကထိဘျဲၣ်အံၤ တၢ်ဆၢတဲာ်ပာ်ပနီၣ်၀ဲလၢအမ့ၢ်ပျဲပူၤတၢ်မံၤလာ်ဆၣ်ဖိကီၢ်ဖိသ့ၣ်ၦၢ်အံၤဖဲအပူၤကွံာ်လါယူၤလံ ၂၈ သီ တၢ်ရဲၣ်တၢ်ကျဲၤပူၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်မံၤလာ်ဆၣ်ဖိကီၢ်ဖိသ့ၣ်ၦၢ်၀ဲအံၤတၢ်ပာ်ပနီၣ်၀ဲအမံၤလၢဒပျဲပူၤတၢ်မံၤလာ်ဆၣ်ဖိကီၢ်ဖိသ့ၣ်ၦၢ်ဒဒီးသ့ၣ်ၦၢ်အံၤ အိၣ်၀ဲဒၣ်လၢ(ခ့ၣ်အဲၣ်ယူၣ်)ကၠဲးထိၣ်ကီၢ်ဆၣ်ဒီးဘံလ့ကီၢ်ဆၣ်ဘၢၣ်စၢၤန့ၣ်လီၤႉဒီးတၢ်လီၢ်အံၤအလဲၢ်အထီအိၣ်၀ဲ(၃၃၆၀) အ့ကၢၣ်ဃၣ်ဃၣ်အဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ သ့ၣ်ၦၢ်၀ဲၤကျိၤ ထုးထီၣ်ပာ်ဖျါ၀ဲန့ၣ်လီၤႉ လၢတၢ်ကဒီသဒၢက့ၤန့ဆၢၣ်တၢ်မူတ၀ၢသ့ၣ်တဖၣ်အံၤအဂီၢ်န့ၣ်(ခ့ၣ်အဲၣ်ယူၣ်)သ့ၣ်ၦၢ်၀ဲၤကျိၤအံၤအိၣ်ဃာ်ဒီးကျဲသနူအဃိ ဖဲအပူၤကွံာ်(၂၀၁၇)အခါ တၢ်စးထီၣ်မၤ၀ဲတၢ်ဃုသ့ၣ်ညါလၢဒူသထူၣ်ကီၢ်ရ့ၣ် ထံသိခံသ့ၣ်ၦၢ်ဟီၣ်က၀ီၤအပူၤ န့ၣ်လီၤႉလၢတၢ်ဃုသ့ၣ်ညါအံၤအဖီခိၣ်တၢ်ထံၣ်န့ၢ်၀ဲန့ဆၢၣ်တၢ်မူတ၀ၢတဖၣ်ဒ်အမ့ၢ်သ့ၣ်ၦၢ်၀ၣ်ၦၢ်ႇဆၣ်ဖိကီၢ်ဖိတၢ်မံၤလာ်သ့ၣ်တဖၣ်အဃိဒ်သိးတၢ်ကဒီသဒၢလီၤက့ၤခိၣ်ဃၢၤန့ဆၢၣ်တၢ်အိၣ်ယၢၤႇဆၣ်ဖိကီၢ်ဖိလၢအကၤဒီးအစၢၤဘူးကလီၤတူာ်သ့ၣ်တဖၣ်အံၤအဂီၢ်ဘၣ်တၢ်ကပာ်ပနီၣ်၀ဲဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ်သ့ၣ်ၦၢ်၀ဲၤကျိၤ လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ပျဲပူၤတၢ်မံၤလာ်ဆၣ်ဖိကီၢ်ဖိသ့ၣ်ၦၢ်အံၤအိၣ်၀ဲဒၣ်လၢ(ခ့ၣ်အဲၣ်ယူၣ်)တၢ်ပၢဟီၣ်က၀ီၤပူၤဒီးလၢပျဲပူၤတၢ်မံၤလာ်ဆၣ်ဖိ ကီၢ်ဖိသ့ၣ်တဖၣ်အကျါမ့ၢ်သ့ၣ်ၦၢ်တဘ့ၣ်လၢအအ့ရံယၢၣ်အံၣ်ကတၢၢ်တခါဒီး မ့ၢ်စ့ၢ်ကီးသ့ၣ်ၦၢ်တဘ့ၣ်လၢအိၣ် (ခ့ၣ်အဲၣ်ယူၣ်)ဒူသထူၣ်ကီၢ်ရ့ၣ်ပူၤအဂ့ၢ်န့ၣ် ခ့ၣ်အဲၣ်ယူၣ်သ့ၣ်ၦၢ်၀ဲၤကျိၤခိၣ် ပဒိၣ်မါဘးထိ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ အ၀ဲစံး၀ဲလၢ“တၢ်လၢသ့ၣ်ၦၢ်န့ၣ်ဒ်ဒိၣ်ဒ်လဲၢ်န့ၣ်ဂ့ၤလၢတၢ်မံၤလာ်ဆၣ်ဖိကီၢ်ဖိအဂီၢ်လီၤႉမ့ဘၣ်တဲလၢကီၢ်ရ့ၣ်ပူၤအံၤ သ့ၣ်ၦၢ်၀ဲအံၤအဆံးကတၢၢ်လီၤႉခီဖျိဟီၣ်က၀ီၤတၢ်အိၣ်သးအဃိသ့ၣ်ၦၢ်တဖၣ်အံၤၦၤတ့ထီၣ်ဟံၣ်တ့ထီၣ်ဃီႇကဲထီၣ်က့ၤတၢ်ဖံးအီၣ်မၤအီၣ်ကျီးႇရီဘၢၣ်ကျီးမီၤနီၤႉခီဖျိတၢ်အိၣ်သးတဖၣ်အဃိအ၀ဲသ့ၣ်ပာ်ပနီၣ်၀ဲန့ၢ်ခဲအံၤလီၤအဃိ အလဲၢ်အထီ လီၤစှၤ ၀ဲမီၤနီၤႉတၢ်ပာ်ပနီၣ်ပျဲပူၤတၢ်မံၤလာ်ဆၣ်ဖိကီၢ်ဖိသ့ၣ်ၦၢ်ဒ်အံၤအဘျုးအိၣ်၀ဲလၢကီၢ်သူလ့ၤ ဟီၣ်က၀ီၤအဂီၢ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ လၢခ့ၣ်အဲၣ်ယူၣ်တၢ်ပၢဟီၣ်က၀ီၤတဖၣ်အပူၤပျဲပူၤဆၣ်ဖိကီၢ်ဖိသ့ၣ်ၦၢ်လၢအဒိၣ်အလဲၢ်အါကတၢၢ်န့ၣ်အိၣ်၀ဲဒၣ်လၢ ခ့ၣ်အဲၣ်ယူၣ် ဘျံးဒ၀ဲၢ်ကီၢ်ရ့ၣ် ကစၢၢ်ဒိၣ်ကီၢ်ဆၣ်ပူၤဒီးအအ့ရံယၢၣ်အဒိၣ်အလဲၢ်အိၣ်၀ဲ(၁၃၀၀၀၀)ဒီး ပျဲပူၤတၢ်မံၤလာ် ဆၣ်ဖိကီၢ်ဖိသ့ၣ်ၦၢ်လၢအအ့ရံယၢၣ်အဒိၣ်ခံခါတခါန့ၣ်မ့ၢ်၀ဲ ဒူပျာ်ယာ်ကီၢ်ရ့ၣ် မဲၢ်ကသး သ့ၣ်ၦၢ်ဒီး အအ့ရံယၢၢ်အဒိၣ်အလဲၢ် အိၣ်၀ဲ(၁)ကလီၢ်ခိၣ်ဃၢၤအဂ့ၢ်န့ၣ် ခ့ၣ်အဲၣ်ယူၣ် သ့ၣ်ၦၢ် တၢ်မၤနီၣ်စရီအသိး သ့ၣ်ညါဘၣ်န့ၣ် လီၤႉ ပျဲပူၤတၢ်မံၤလာ်ဆၣ်ဖိကီၢ်ဖိသ့ၣ်ၦၢ်လၢတၢ်ပာ်ပနီၣ်လီၤ၀ဲခဲအံၤန့ၣ်ကီၢ်ရ့ၣ်အပတီၢ်ပာ်ပနီၣ်၀ဲဒံးလီၤအဃိ တၢ်ကဘၣ်တီၣ်ဖျါထီၣ်အီၤလၢလီၢ်ခၢၣ်သးဒံးဒီး(လီၢ်ခၢၣ်သး)ကဘၣ်ပာ်ဂၢၢ်ပာ်ကျၢၤပာ်ပနီၣ်ဒံး၀ဲအဂ့ၢ်န့ၣ် သ့ၣ်ၦၢ်၀ဲၤကျိၤခိၣ် ပဒိၣ်မါဘးထိ စံး၀ဲန့ၣ်လီၤႉ လၢကကဲထီၣ်ပျဲပူၤတၢ်မံၤလာ်ဆၣ်ဖိကီၢ်ဖိသ့ၣ်ၦၢ်အံၤအဂီၢ်န့ၣ်...
ခီဖျိတၢ်စူၤတပယူ၁်ဃီအဃိ မုၢ်ထီၣ်ဟီၣ်က၀ီၤခိခိၣ်ဒူသ၀ီတဖၣ် ထံထီၣ်တုၤလၢကျဲပူၤ
လါအီကူး ၂ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ဒ၀ဲၢ်ကီၢ်ဆၣ် မုၢ်ထီၣ်ခိခိၣ်ဟီၣ်က၀ီၤဒူသ၀ီတဖၣ်အပူၤ ခီဖျိတၢ်စူၤတပယူာ်ဃီဒီး ထံသ့ၣ်တဖၣ်ထီၣ်တုၤ၀ဲလၢကျဲပူၤညါအဃိ တၢ်ကီတၢ်ခဲအိၣ်ထီၣ်လၢတၢ်ဟးထီၣ်က့ၤလီၤအဂ့ၢ်န့ၣ် လီၢ်က၀ီၤကမျၢၢ် စံး၀ဲန့ၣ်လီၤႉ လၢမုၢ်ထီၣ်ခိခိၣ်ဒူသ၀ီတဖၣ်အပူၤစးထီၣ်ဖဲလါယူၤလံ ၃၀ သီတုၤလၢခဲအံၤတစု ခီဖျိတၢ်စူၤတပယူာ်ဃီအဃိ လၢကီၢ်ကၠီၣ်တဲၣ်ကီၢ်ဆၢ ဘျံးဒ၀ဲၢ်–ထံခံကျဲဒီး ခမီသွဲၤကျဲသ့ၣ်တဖၣ်န့ၣ်ထံထီၣ်တုၤလၢကျဲပူၤညါန့ၣ်လီၤႉ လီၢ်က၀ီၤကမျၢၢ်တဂၤစံး၀ဲလၢ“စးထီၣ်ဖဲအပူၤကွံာ်စှၤသီန့ၣ်တၢ်စူၤတုၤလၢခဲအံၤလီၤႉကျဲလၢအံၤတကပၤခီန့ၣ် အိၣ်ဘူးဒီးကီၢ်ကၠီၣ်တဲၣ်ကီၢ်ဆၢမီၤနီၤႉတၢ်စူၤတပယူာ်ဃီအဃိထံထီၣ်ကျဲသ့ၣ်မတၤဘၢလၢာ်လံႉကိညၢ်ဒံးစှၤသီ အတီၢ်ပူၤအံၤတၢ်ဒုးတကဲထီၣ်ဘၣ်ႉမ့တမ့ၢ်ဘၣ်ဒုပကဘၣ်စံၣ်လၢတၢ်စူၤကျါလီၤႉကျဲပူၤထံၦဲၤၦဲၤဘျီနဟးထီၣ်က့ၤလီၤ တသ့ဘၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ခီဖျိတၢ်စူၤထံထီၣ်တုၤလၢကျဲပူၤညါအဃိသိလ့ၣ်လၢအလ့ၢ်ထီၣ်လ့ၢ်လိၤဖဲကျဲ၀ဲအံၤသ့ၣ်တဖၣ် ဘၣ်ဆိကတီၢ်ဃာ် တၢ်ဟးထီၣ်က့ၤလီၤတကးဒံးဘၣ်အမဲာ်ညါလီၢ်က၀ီၤကမျၢၢ်လၢအိၣ်တၢ်လီၢ်လီၤဖုၣ်တဖၣ်အံၤ စ့ၢ်ကီးတနီၤန့ၣ် ဘၣ်သုးလီၢ်သုးကျဲလၢတၢ်လီၢ်ထီၣ်ထီတကပၤအဂ့ၢ်န့ၣ် ၦၤနီသိလ့ၣ်ဖိတဂၤစံး၀ဲန့ၣ်လီၤႉ “နဟးနီသိလ့ၣ်တသ့ဘၣ်ဘၣ်အိၣ်ဘှံးဆိတစိၢ်ဖိလီၤႉတနီဘၣ်သိလ့ၣ်ဘၣ်အဃိတန့ၢ်စ့ဘၣ်မီၤနီၤႉတၢ်စူၤအဃိ (လီတဲစိ)ကျိၤစ့ၢ်ကီးလီၤမၢ်ႉတၢ်ဆၢကတီၢ်ခဲအံၤနမ့ဃုစ့မးကဘၣ်ဂီၢ်လီၤႉတၢ်ဖိတၢ်လံၤတၢ်အီၣ်တၢ်အီအၦ့ၤထီၣ် မၢ်မၢ်လီၤႇအလီၤတအိၣ်နီတထံၣ်ဒံးဘၣ်ႉထံနါက့ဒိၣ်ထီၣ်အဃိမၤအီၣ်တၢ်တဘၣ်ဂီၢ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးလၢဒ၀ဲၢ်၀့ၢ်က၀ီၤဒ့ပူၤကျဲသ့ၣ်တဖၣ်ဒီးတၢ်လီၢ်လီၤဖုၣ်တနီၤစ့ၢ်ကီးထံဒိၣ်ထီၣ်အဃိကမျၢၢ်တဖၣ်ဟးထီၣ် က့ၤလီၤတသ့၀ဲလၢၤဘၣ်အသိးသုးဟံးန့ၢ်တၢ်စိတၢ်ကမီၤအတီၢ်ပူၤဆီဒံၣ်တဖျၢၣ်န့ၣ်အၦ့ၤအိၣ်၀ဲ(၃၀၀)ကၠးႇမးမးဃ့တဘိၣ်န့ၣ်အၦ့ၤထီၣ်တုၤလၢ(၇၀၀)ကၠးညါလံအဃိ ကမျၢၢ်တဖၣ်ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် လီၢ်က၀ီၤကမျၢၢ် စံး၀ဲန့ၣ်လီၤႉ
ကွီၢ်အမူးအရၢ်လၢဒီၣ်အီၣ်ဆါဆူၣ်ကၠံၣ်ဒီးကီၢ်ခိၣ်အူ၀့မၠ့ၣ်ဘၣ်တူၢ်၀ဲတဖၣ်ထုးလီၤစှၤ၀ဲတနီၤအဂ့ၢ် သုးမီၤစိရိၤဘိးဘၣ်ရၤ လီၤ၀ဲ
လါအီကူး ၁ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲ(၂၀၂၁)နံၣ် ကွီၢ်အမူးအရၢ်လၢကီၢ်ခိၣ်အူ၀့မၠ့ၣ်ဒီးထံကီၢ်ၦၤဟ့ၣ်ကူၣ်ဟ့ၣ်ဖးတၢ်ဒီၣ်အီၣ်ဆါဆူၣ်ကၠံၣ်ဘၣ်တူၢ်၀ဲ သ့ၣ်တဖၣ်အံၤ ထုးလီၤစှၤ၀ဲကွီၢ်အမူးအရၢ်တနီၤအဂ့ၢ်န့ၣ် သုးမီၤစိရိၤစုတီၤဖီလာ်တၢ်ကစီၣ်တဖၣ် ထုးထီၣ်ပာ်ဖျါ၀ဲ ဖဲတနံၤအံၤ လါအီကူး ၁ သီအနံၤန့ၣ်လီၤႉ စးထီၣ်လၢသုးမီၤစိရိၤအခိၣ် မ့အီၣ်လဲၣ် ဟံးန့ၢ်ဆူၣ်ထံကီၢ်တၢ်စိတၢ်ကမီၤန့ၣ် ဒီၣ်အီၣ်ဆါဆူၣ်ကၠံၣ်အံၤ တၢ်လိာ်ဘၢလိာ်ကွီၢ်အီၤလၢကွီၣ်မ့ၣ်သဲစး(၁၉)ခါဒီးတၢ်စံၣ်ညီၣ်လီၤလၢဘၣ်လီၤဃိာ်(၃၃)နံၣ်န့ၣ်လီၤႉ ဖဲန့ၣ်အကျါ ကွီၢ်မ့ၣ်သဲစး(၅)ခါလၢတၢ်လိာ်ဘၢလိာ်ကွီၢ်အီၤဖဲ(၂၀၂၁)အတီၢ်ပူၤလၢတၢ်စံၣ်ညီၣ်လီၤ၀ဲ၀ံၤသ့ၣ်တဖၣ်အံၤ တၢ်ထုးလီၤစှၤ၀ဲမုၢ်နံၤမုၢ်သီအဂ့ၢ်န့ၣ် ထုးထီၣ်ပာ်ဖျါ၀ဲန့ၣ်လီၤႉ ဒ်န့ၣ်အသိးကီၢ်ခိၣ်အူ၀့မၠ့ၣ်စ့ၢ်ကီးတၢ်လိာ်ဘၢလိာ်ကွီၢ်အီၤလၢကွီၢ်မ့ၣ်သဲစး(၈)ခါ တၢ်စံၣ်ညီၣ်လီၤလၢဘၣ်အိၣ်ဃိာ်ပူၤ (၁၂)နံၣ်ဒီးကွီၢ်မ့ၣ်သဲစး(၂)ခါလၢတၢ်လိာ်ဘၢလိာ်ကွီၢ်အီၤဖဲ(၂၀၂၁)အတီၢ်ပူၤအံၤလၢတၢ်စံၣ်ညီၣ်လီၤအီၤ၀ံၤသ့ၣ် တဖၣ်အံၤ တၢ်ထုးလီၤစှၤ၀ဲမုၢ်နံၤမုၢ်သီအဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ တနံၣ်အံၤ(၂၀၂၃)လါဃိးလါၦဲၤမုၢ်နံၤအဂီၢ် သုးမီၤစိရိၤအံၤထုးလီၤစှၤ၀ဲကီၢ်ပူၤၦၤဃိာ်ဖိ(၇၇၄၉)ဂၤအတၢ်ကမၣ်ႇ ၦၤဃိာ်ဖိလၢတၢ်စံၣ်ညီၣ်သံအီၤအကျါလၢတၢ်ကြၢးထုးလီၤစှၤအတၢ်ကမၣ်သ့ၣ်တဖၣ်အံၤကဘၣ်လီၤက့ၤလၢဃိာ်ပူၤတစိၤသးတကးဒံးဘၣ်လၢန့ၣ်အမဲာ်ညါ ကလုာ်ဒူၣ်ဖီၣ်စုက၀ဲၤအၦၤ(၂၂)ဂၤႇ ၦၤလၢအဘၣ်ဃးဒီးၦၤလၢအထီဒါသုးမီၤ စိရိၤအံၤ(၇၂)ဂၤဒီး ၦၤထံဂုၤကီၢ်ဂၤဖိ(၁၂၅)ဂၤသ့ၣ်တဖၣ်အံၤတၢ်ထုးလီၤစှၤ၀ဲတၢ်ကမၣ်အဂ့ၢ်န့ၣ် ထုးထီၣ်ပာ်ဖျါ၀ဲန့ၣ်လီၤႉ တကီၢ်ခါခဲအံၤလၢကညီကီၢ်စဲၣ် တီၤကလ့ဃိာ်ပူၤ ၦၤဃိာ်ဖိလၢအဘၣ်ဟဲက့ၤထီၣ်မုၢ်နံၤမုၢ်သီဘူးထီၣ်တဖၣ်အံၤ တၢ်ဆှၢဖှိၣ်အ၀ဲသ့ၣ်ဆူဖၣ်အၣ်၀့ၢ်ခၢၣ်သး(ဖယါကၠံ)ကရၢၢ်ပူၤဒီး ဖဲန့ၣ်တဆီတၢ်ကပျၢ်လီၤ၀ဲတၢ်လီၢ်တတီၤဘၣ်တတီၤ အဂ့ၢ်န့ၣ် ဖၣ်အၣ်ဟီၣ်က၀ီၤ ၦၤလီၤဘၣ်ဃိာ်ပူၤအဟံၣ်ဖိဃီဖိတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ
ခီဖျိဟံၣ်လဲထီၣ်အဃိကမျၢၢ်လၢအဃ့ၢ်တၢ်ဒုးတဖၣ်အံၤတၢ်ကီတၢ်ခဲအိၣ်ထီၣ်လၢတၢ်အိၣ်တၢ်ဆိးလီၢ်ကျဲအဂီၢ်
လါအီကူး ၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်ဒီးတီအူကီၢ်ရ့ၣ်အပူၤ ခီဖျိဟီၣ်က၀ီၤပူၤတၢ်အိၣ်သး တဂၢၢ်တကျၢၤဘၣ်အဃိ ကမျၢၢ်လၢအလဲၤဃ့ၢ်အိၣ်ဆူ(စ့ၣ်တီမၠ့ၣ်)ကျိမုၢ်ထီၣ်တကပၤန့ၣ်သ့ၣ်တဖၣ် တကီၢ်ခါခဲအံၤ ခီဖျိဟံၣ်လဲထီၣ်အဃိအ၀ဲသ့ၣ်အံၤလၢကဟးအိၣ်ဆိးတၢ်လီၢ်တၢ်ကျဲအဂီၢ်ထံၣ်ဘၣ်၀ဲတၢ်ကီတၢ်ခဲ အဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးသ့ၣ်တဖၣ်အအိၣ်န့ၣ်လီၤႉ ခီဖျိတၢ်ဒုးကဲထီၣ်၀ဲလၢပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤအဃိသၣ်တီၣ်ကၠံကီၢ်ဆၣ်ဒီးလၢၢ်ဒိၣ်ႇ ဆီထံးကီၢ်ဆၣ်ပူၤ ကမျၢၢ်သ့ၣ်တဖၣ်အံၤလဲၤစံၣ်အိၣ်၀ဲလၢတီအူ၀့ၢ်(စ့ၣ်တီမၠ့ၣ်)ကျိမုၢ်ထီၣ်တကပၤန့ၣ်ဒီး ခီဖျိၦၤနီၣ်ဂံၢ်အါအဃိအ၀ဲသ့ၣ်ထံၣ်ဘၣ်၀ဲတၢ်ကီတၢ်ခဲလၢဟံၣ်လဲၦ့ၤထီၣ်အဂ့ၢ်န့ၣ် လီၢ်က၀ီၤကမျၢၢ်လၢအမၤစၢၤ ၦၤဃ့ၢ်မှံ ဟးဖျိးတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တၢ်ဒုးကဲထီၣ်ဘျီအါဒၣ်တက့ၢ်န့ၣ်ၦၤလဲၤစံၣ်အိၣ်လၢတီအူတကပၤန့ၣ်ႇအ၀ဲသ့ၣ်လဲၤအိၣ်စိ၀ဲလၢအဘူးအတံၢ်အဟံၣ်ဒ်န့ၣ်လီၤမီၤနီၤႉမ့မ့ၢ်ဟံၣ်လၢၦၤဟ့ၣ်ဒုးအိၣ်ခီလီတဖၣ်န့ၣ်စ့ၢ်ကီးၦၤကညီအိၣ်ၦဲၤၦဲၤလီၤအဃိအ၀ဲသ့ၣ်တနီၤန့ၣ်ဘၣ်ငါအိၣ်ဟံၣ်လီၤႉဟံၣ်ဒီဂ့ၢ်တနီၤန့ၣ်အၦ့ၤအိၣ်ထဲအကလးလီၤဘၣ်ဆၣ်မ့မ့ၢ်ဟံၣ်ဖးဒိၣ်ခီန့ၣ်အၦ့ၤအိၣ်လၢ(၂)ကလီၢ်ႇ (၃)ကလီၢ်ညါ”အဂ့ၢ်န့ၣ် စံး၀ဲန့ၣ်လီၤႉ ၦၤလၢအဟဲစံၣ်အိၣ်ဖဲတီအူပူၤတဖၣ်အိၣ်ဆိ၀ဲဒၣ်လၢတၢ်ဘါယွၤသရိာ်ကရၢၢ်ပူၤဒီးတနီၤန့ၣ်အိၣ်လၢအဘူးအတံၢ်ဟံၣ်အိၣ်၀ဲအသိးႇခီဖျိကတံာ်ကတူာ်အဃိၦၤဃ့ၢ်တၢ်ဒုးဖိလၢအကျိၣ်အိၣ်စ့အိၣ်တဖၣ်တနီၤန့ၣ်တၢ်ကီတၢ်ခဲအိၣ်လၢ ကဟးဃုငါအိၣ်ဟံၣ်အဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ “ဟံၣ်လဲထီၣ်အဃိအ၀ဲသ့ၣ်ဟးဃုငါအိၣ်ဟံၣ်လၢအၦ့ၤဘၣ်တစဲးမီၤနီၤႉဘၣ်ဆၣ်အ၀ဲသ့ၣ်ဟးဃု၀ဲတဘၣ်ဘၣ်အဃိ လီလီစဲၤအ၀ဲသ့ၣ်ဘၣ်အိၣ်ဆိ၀ဲလၢအဘူးအတံၢ်ဟံၣ်တစိၢ်တလီၢ်ဒ်န့ၣ်လီၤမီၤနီၤ”အဂ့ၢ်န့ၣ် ၦၤလၢအိၣ်ဃ့ၢ်ထီၣ်လၢယၤဒိၣ်သ၀ီတကပၤတဂၤ စံး၀ဲန့ၣ်လီၤႉ လၢခ့ၣ်အဲၣ်ယူၣ်(သုးက့ ၂)ဟီၣ်က၀ီၤ တီအူကီၢ်ရ့ၣ် သၣ်တီၣ်ကၠံကလံၤစိး ယၤဒိၣ်သ၀ီပူၤန့ၣ် ဖဲအပူၤကွံာ်လါယူၤလံ ၁၁ သီအခါ တၢ်ဒုးကဲထီၣ်၀ဲလၢပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤဒီး ဖဲန့ၣ်၀ံၤလီၢ်ခံခီဖျိကဘီယူၤ ဟဲခးလီၤတၢ် တပယူာ်ဃီအဃိ ကမျၢၢ်အဟံၣ်အဃီတၢ်သူၣ်ထီၣ်ဟးဂီၤ၀ဲအါအါဂီၢ်ဂီၢ်ဒီး လီၢ်က၀ီၤကမျၢၢ်အဂၤ (၂၀၀၀)ဘျဲၣ် ဘၣ်ဃ့ၢ်ထီၣ်၀ဲတုၤလၢခဲအံၤတစုန့ၣ်လီၤႉ ဒ်န့ၣ်အသိးဖဲအပူၤကွံာ်တနွံအခါန့ၣ်တၢ်ဒုးကဲထီၣ်၀ဲဒၣ်လၢခ့ၣ်အဲၣ်ယူၣ်(သုးက့ ၃) ချၢၣ်လွံၢ်ထူၣ်ကီၢ်ရ့ၣ်ပူၤဒီး ခီဖျိပယီၤသုးနုာ်လီၤလၢသ၀ီပူၤ ခးလီၤကျိဖးဒိၣ်ဆူသ၀ီပူၤအဃိ သ၀ီ(၄၁)ဖျၢၣ် လီၢ်က၀ီၤကမျၢၢ်အဂၤ(၈၀၀၀)ဃၣ်ဃၣ် ဘၣ်ဃ့ၢ်ထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲတ့ၢ်ဃာ်၀ဲဖဲလါယူၤလံ ၂၈ သီအနံၤန့ၣ်လီၤႉ
သုးမီၤစိရိၤကဘီယူၤဟဲခးလီၤတၢ်လၢယၤဒိၣ်လီၢ်က၀ီၤပူၤအိၣ်၀ဲ(၃၃)ဘျီအဂ့ၢ် KNU ထုးထီၣ်ပ၁်ဖျါ
လါအီကူး ၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် တီအူကီၢ်ရ့ၣ် သၣ်တီၣ်ကၠံကီၢ်ဆၣ် ယၤဒိၣ်ဟီၣ်က၀ီၤအပူၤ စးထီၣ်ဖဲအပူၤကွံာ်လါယူၤလံ ၁၁ သီ အနံၤန့ၣ် တၢ်ဒုးကဲထီၣ်၀ဲလၢခံခီခံကပၤအဘၢၣ်စၢၤဒီး ဖဲန့ၣ်၀ံၤလီၢ်ခံသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ ယၤဒိၣ်ဒီး သ၀ီလၢအိၣ်တၢ်ခိၣ်တၢ်ဃၢၤဖဲန့ၣ်အိၣ်၀ဲ(၃၃)ဘျီအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲဖဲလါယူၤလံ ၃၁ သီ အနံၤန့ၣ်လီၤႉ တၢ်ဒုးကဲထီၣ်လၢပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤ၀ံၤလီၢ်ခံ ဖဲလါယူၤလံ ၁၂ သီ အနံၤ ကဘီယူၤဟဲခးလီၤတၢ်အိၣ်(၂)ဘျီႇ ၁၈ သီအနံၤန့ၣ်(၇)ဘျီႇ ၂၂ သီအနံၤန့ၣ်(၁၃)ဘျီႇ ၂၃ သီအနံၤန့ၣ် ဟဲတ့ၢ်လီၤ၀ဲ(၁၁)ဘျီ ခဲလၢာ်ဟဲခးလီၤတၢ်အိၣ်(၃၃)ဘျီညါအဃိ ယၤဒိၣ်သ၀ီဒီးသ၀ီလၢအိၣ်တၢ်ခိၣ်တၢ်ဃၢၤဖဲန့ၣ် တၢ်ဘူၣ်တၢ်ဘါတၢ်သူၣ်ထီၣ်ဃုာ်ဒီးကမျၢၢ်အဟံၣ်အဃီဟးဂီၤ၀ဲဒၣ်အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ စံး၀ဲန့ၣ် လီၤႉ လၢန့ၣ်အမဲာ်ညါခီဖျိကဘီယူၤဟဲခးလီၤတၢ်အဃိလီၢ်က၀ီၤကမျၢၢ်ဘၣ်ဒိဘၣ်ထံးတအိၣ်၀ဲဘၣ်ဆၣ် လီၢ်က၀ီၤကမျၢၢ်ဃုာ်ဒီး ၦၤမိၢ်ဒၢႇၦၤဖိဒံဖိသၣ်အဂၤ(၂၀၀၀)ဘျဲၣ်ဘၣ်ဃ့ၢ်ထီၣ်၀ဲဒီးလိၣ်ဘၣ်၀ဲဒၣ်တၢ်အီၣ်တၢ်အီႇ ကသံၣ်ကသီဒီးတၢ်ခိၣ်ဒုးသ့ၣ်တဖၣ်အဂ့ၢ်န့ၣ် လံာ်တၢ်ပာ်ဖျါအပူၤဒီးၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ ၦၤလၢအမၤစၢၤၦၤဃ့ၢ်မှံဟးဖျိးတဂၤစံး၀ဲလၢ“စှၤသီအတီၢ်ပူၤအံၤပယီၤသုးနုာ်လီၤလၢယၤဒိၣ်ႇပယီၤသုးတၢ်လူၢ်တကပၤန့ၣ်မီၤနီၤႉဟံၣ်လၢအစၢ်တအိၣ်ဘၣ်တဖၣ်န့ၣ်ပယီၤသုးနုာ်လီၤဟံၦၤတၢ်ဖိတၢ်လံၤလၢဟံၣ်ပူၤႉမ့၀ံၤအ၀ဲသ့ၣ်နုာ်လီၤအိၣ်လၢ ၦၤဟံၣ်ပူၤဒ်သိးခ့ၣ်အဲၣ်ယူၣ်သုးမ့ဟဲထီၣ်န့ၣ်အ၀ဲသ့ၣ်ကဒီသဒၢလီၤသးအဂီၢ်မီၤနီၤႉဟံၣ်ခီန့ၣ်အိၣ်လၢကျဲကပၤအဃိမီၤနီၤ”အဂ့ၢ်န့ၣ် စံး၀ဲန့ၣ်လီၤႉ တကီၢ်ခါခဲအံၤပယီၤသုးတဖၣ်အံၤတၢ်ဒုးမ့ကဲထီၣ်လၢဟီၣ်က၀ီၤပူၤဒ်သိးအ၀ဲသ့ၣ်ခးလီၤစၢၤကျိဖးဒိၣ်ကသ့အဂီၢ်န့ၣ် အ၀ဲသ့ၣ်မၤအါထီၣ်အၦၤလၢ(ဘဟိ)သ၀ီပူၤအဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်စံး၀ဲအသိး သ့ၣ်ညါဘၣ်န့ၣ်လီၤႉ ဒ်ခ့ၣ်အဲၣ်ယူၣ်အလံာ်တၢ်ပာ်ဖျါပူၤအသိးန့ၣ်လၢ(သုးက့ ၂)ဟီၣ်က၀ီၤ တီအူကီၢ်ရ့ၣ်အပူၤ စးထီၣ်တနံၣ်အံၤ(၂၀၂၃) လါယနူၤအါရံၤတုၤလၢလါယူၤ လၢ(၆)လါအတီၢ်ပူၤန့ၣ် တၢ်ဒုးဖိတၢ်ဒုးဖးဒိၣ်ကဲထီၣ်၀ဲအဘျီ(၃၀၀)ဘျဲၣ်အသိး ပယီၤသုးတကပၤသံ၀ဲအဂၤ(၄၀၀)ဘျဲၣ်အကျါပၣ်ဃုာ်၀ဲ သုးရ့ၣ်ခိၣ်(၃)ဂၤႇ သုးရ့ၣ်ခိၣ်–၂...
KNU (သုးက့ ၁)လါယူၤလံအတီၢ်ပူၤ ပယီၤသုးဟဲက့ၤနု၁်လီၤမၤ(CDM)အိၣ် ၃ ဂၤ
လါအီကူး ၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)တၢ်ပၢဟီၣ်က၀ီၤအပူၤ လါယူၤလံတလါအတီၢ်ပူၤ ပယီၤသုးဟဲက့ၤနုာ်လီၤမၤ(CDM)အိၣ်၀ဲ ၃ ဂၤအဂ့ၢ်န့ၣ် ဒူသထူၣ်နဲၣ်ရွဲၣ် ပဒိၣ်စီၤအ့နဲၤ စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ပယီၤသုးလၢအဟဲက့ၤနုာ်လီၤမၤ(CDM)လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အအိၣ်သ့ၣ်တဖၣ်န့ၣ်မ့ၢ်၀ဲ (နီၣ်ဂံၢ် ၈)ဒုးယၤပၢဆၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ–၈) ပနွဲၢ်ကျါသုးကလၢၤ သုးဖိ(၃)ဂၤဒီး ဖဲအ၀ဲသ့ၣ်ဟဲက့ၤဟ့ၣ်လီၤသးအခါဟဲက့ၤစိာ်ဃုာ်၀ဲကျိ(၂)ခိၣ်အဂ့ၢ်န့ၣ် ပဒိၣ်စီၤအ့နဲၤ စံး၀ဲန့ၣ်လီၤႉ “လါယူၤလံအတီၢ်ပူၤဖဲ(သုးက့ ၁)ဟီၣ်က၀ီၤပူၤအံၤယီၤသုးဟဲက့ၤဟ့ၣ်လီၤသးအိၣ်(၃)ဂၤလီၤႉသနါက့မ့မ့ၢ်အ၀ဲသ့ၣ် လီၢ်လၤအပတီၢ်ခီန့ၣ်ပသမံသမိးအီၤအဖၢမုၢ်လီၤႉအဟဲက့ၤစိာ်ဃုာ်ဒီးကျိန့ၣ်ခံဂၤမီၤနီၤႉမ့မ့ၢ်လၢအ၀ဲတဂၤခီန့ၣ် ပသမံသမိးမၤလီၤတံၢ်က့ၤအီၤမီၤနီၤႉပယီၤသုးလၢဟဲက့ၤဟ့ၣ်လီၤသးတဖၣ်န့ၣ်မ့ၢ်၀ဲဒၣ်(စကခ–၈)အၦၤမီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ပယီၤသုးလၢအဟဲက့ၤဟ့ၣ်လီၤသးဟဲက့ၤစိာ်ဃုာ်ဒီးကျိချံၦာ်သၣ်သ့ၣ်တဖၣ်အံၤအါဒၣ်တက့ၢ်န့ၣ်အိၣ်ဟဲ၀ဲလၢ ကညီကီၢ်စဲၣ်ႇတလၢၤကီၢ်စဲၣ်ႇဒီးကရ့ၣ်နံၣ်ကီၢ်စဲၣ်ပူၤလၢတၢ်ဒုးကဲထီၣ်အလီၢ်သ့ၣ်တဖၣ်အံၤန့ၣ်လီၤႉ ပယီၤသုးဟဲက့ၤနုာ်လီၤမၤ(CDM)ဒ်အံၤမ့ၢ်လၢတၢ်ဆီၣ်ဘံၣ်ဆီၣ်ဘၢတၢ်ဆီၣ်တံၢ်မၤနၢၤအိၣ်လၢသုးကျါဒီး တၢ်လီၢ်လၢအဂၤအဃိလီၤအဂ့ၢ်န့ၣ် ပယီၤသုးအၦၤ ထံသုးဖိ စီၣ်ယဲခၠ့ၣ် လၢအက့ၤမၤ(CDM)တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ၦၤတနီၤန့ၣ်တၢ်လီၤတံၢ်လီၤမံတအိၣ်ဘၣ်မီၤနီၤႉအခဲအံၤမးအ၀ဲသ့ၣ်ဟဲက့ၤဟ့ၣ်လီၤသးန့ၣ်ကဘၣ်မ့ၢ်အ၀ဲသ့ၣ်သးသဟီၣ်လီၤဖးဒိၣ်ညါလံႉအ၀ဲသ့ၣ်န့ၣ်ၦၤကမျၢၢ်ထံဖိကီၢ်ဖိကွၢ်အီၤတမုာ်ဘၣ်ႉခဲအံၤလၢသုးပူၤန့ၣ်ၦၤဆီၣ်တံၢ်မၤနၢၤဆီၣ်ဘံၣ်ဆီၣ်ဘၢအ၀ဲသ့ၣ်ႇၦၤတပျဲဟးထီၣ်အ၀ဲသ့ၣ်လၢတၢ်ချၢဘၣ်ႇၦၤတဒုးထံၣ်အ၀ဲသ့ၣ်ဒီးအဟံၣ်ဖိဃီဖိဘၣ်အဃိ အ၀ဲသ့ၣ်သးဂီၤဒီးဟဲက့ၤဟ့ၣ်လီၤသးဒ်အံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ပယီၤသုးသ့ၣ်တဖၣ်အံၤခီဖျိခိၣ်နၢ်လၢတၢ်ဖီခိၣ်နဲၣ်လီၤတၢ်ကလုၢ်လၢဘၣ်လဲၤဆူတၢ်မဲာ်ညါတၢ်ဒုးပျီပူၤအဃိ အ၀ဲသ့ၣ်တအိၣ်လၢသုးပူၤလၢၤဘၣ်ဒီးစံၣ်ဖျိးထီၣ်၀ဲဒိၣ်အိၣ်အဂ့ၢ်န့ၣ် ပယီၤသုးလၢအဟဲက့ၤနုာ်လီၤမၤ(CDM)တဖၣ် စံး၀ဲန့ၣ်လီၤႉ တကီၢ်ခါခဲအံၤလၢကညီကီၢ်စဲၣ်ဟီၣ်က၀ီၤအပူၤဒီးတၢ်လီၢ်လၢအဂၤသ့ၣ်တဖၣ်အပူၤစ့ၢ်ကီး တၢ်ဒုးကဲထီၣ်၀ဲလၢ ပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤအိၣ်၀ဲကိးမုၢ်နံၤဒဲးန့ၣ်လီၤႉဘၣ်ဃးပယီၤသုးဟဲက့ၤ နုာ်လီၤမၤ(CDM) အနီၣ်ဂံၢ်နီၣ်ဒွးခီန့ၣ်ပခ့ၣ်အဲးစံၣ်–ကညီတၢ်ကစီၣ်မၤလီၤတံၢ်စရီအဖၢမုၢ်န့ၣ်လီၤႉ
မ့ၣ်ပိၢ်ပိၢ်ဖးထီၣ်လၢသိလ့ၣ်ပူၤလၢဃိၣ်လိ၁်တိၤႇသုးမီၤစိရိၤစုတီၤဖီလ၁်ၦၤမၤတၢ်ဖိဒီးကမျၢၢ်သံဘၣ်ဒိဘၣ်ထံး ၁၄ ဂၤ
လါယူၤလံ ၃၁ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲတနံၤအံၤလါယူၤလံ ၃၁ သီ ဂီၤခီ ၆း၄၀ အဆၢကတီၢ် မ့ၣ်ပိၢ်ပိၢ်ဖးထီၣ်၀ဲလၢသိလ့ၣ်ပူၤလၢဖၣ်အၣ်၀့ၢ်ဟးထီၣ် (တရုတ်လှ)သ၀ီတကပၤဒီး ဖဲန့ၣ်ကမျၢၢ်သံ၀ဲ(၁)ဂၤဒီးသုးမီၤစိရိၤစုတီၤဖီလာ်ၦၤမၤတၢ်ဖိဃုာ်ဒီးကမျၢၢ်ဘၣ်ဒိ၀ဲ ၁၄ ဂၤ အဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိလၢအဘူးဒီးပယီၤသုးတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ တၢ်ကဲထီၣ်သးန့ၣ်ဖဲသိလ့ၣ်ပၢၤကီၢ်(ယာဥ်ထိန်းရဲ)သမံသမိး၀ဲ(တိၣ်ယိၣ်တၣ်ဖံၣ်လၣ်)သိလ့ၣ်တခိၣ်အံၤအဆၢကတီၢ် မ့ၣ်ပိၢ်ပိၢ်ဖးထီၣ်၀ဲဒီးခီဖျိမ့ၣ်ပိၢ်ပိၢ်ဖးထီၣ်ဖးဆူၣ်ညါအဃိ တၢ်ဘၣ်ဒိဘၣ်ထံးအါ၀ဲဒ်အံၤလီၤအဂ့ၢ်န့ၣ် (တရုတ်လှ)သ၀ီဖိလၢတအဲၣ်ဒိးပာ်ဖျါအမံၤတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ အ၀ဲစံး၀ဲလၢ“ဖဲဂီၤခီ ၆း၄၀ အခါန့ၣ် မ့ၣ်ပိၢ်ပိၢ်ဖးထီၣ်လၢသိလ့ၣ်ပူၤမီၤနီၤႉ အဃိၦၤနီဆဲးကဲးသၢပၣ်တဂၤ ဖဲအဟဲဖၠးတၢ်ဖဲန့ၣ်အခါဘၣ်အီၤဘျီအသံမီၤနီၤႉၦၤပိာ်မုၣ်ဘၣ်ဒိတဂၤဒီးပိာ်ခွါဘၣ်ဒိ၀ဲတဂၤလီၤႉၦၤတဲလၢမ့မ့ၢ်ပၢၤကီၢ်ႇ ပယီၤသုးႇသိလ့ၣ်ပၢၤကီၢ်သုးတဖၣ်ခီန့ၣ်ဘၣ်ဒိအဂၤ(၁၀)ညါမီၤနီၤႉဒ်ပထံၣ်လၢတၢ်ဂီၤပူၤအသိးန့ၣ်ပယီၤသုးသံအိၣ်လီၤႉ ၦၤတီၣ်ထီၣ်အ၀ဲသ့ၣ်လၢသိလ့ၣ်ပူၤၦၤလဲၤဆှၢအီၤလၢသုးတၢ်ဆါဟံၣ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ တကီၢ်ခါခဲအံၤတၢ်ပံးဃာ်၀ဲဃိၣ်လိာ်တိၤႇတၢ်အိၣ်ခိးသမံသမိးတၢ်ဒီးလၢထီၤ၀ံၣ်သ၀ီႇမၠဲၤကလ့ႇဖါကၣ်သ၀ီႇ အ့ၤဒူၣ်တိတြဲၤဒီးစၤသပၠ့ၤတိၤႇတီၤကလ့ ထံၤလိၤသ၀ီ ပယီၤသုးတၢ်သမံသမိးတြဲၤတဖၣ်န့ၣ်စ့ၢ်ကီး ခီဖျိပယီၤသုးအိၣ်ခိးသမံသမိးတၢ်အါအါဂီၢ်ဂီၢ်အဃိသိလ့ၣ်ကတာ်၀ဲလၢကျဲပူၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ တကးဒံးဘၣ်လၢန့ၣ်အမဲာ်ညါလၢတီၤကလ့သုးတၢ်ဆါဟံၣ်န့ၣ်စ့ၢ်ကီးတၢ်ဆီလီၤအါထီၣ်၀ဲတၢ်ဘံၣ်တၢ်ဘၢအဂ့ၢ်န့ၣ် ကမျၢၢ်လၢအိၣ်ဖၣ်အၣ်၀့ၢ်ပူၤတဖၣ် စံး၀ဲအသိးသ့ၣ်ညါဘၣ်န့ၣ်လီၤႉ “အ၀ဲသ့ၣ်တၢ်သမံသမိးတြဲၤတၢ်သူၣ်ထီၣ်ဟးဂီၤမးန့ၣ်အ၀ဲသ့ၣ်ပာ်ဖျါ၀ဲလၢအၦၤဘၣ်ဒိထဲ(၇)ဂၤလီၤႉ သိလ့ၣ်လၢမ့ၣ်ပိၢ် ပိၢ်ထီၣ်လၢအပူၤတခိၣ်န့ၣ်နါက့အိၣ်တ့ၢ်က့ၤထဲထးကုာ်ထကျီလီၤႉဟးဂီၤခဲလၢာ်လီၤႉပယီၤသုးဒီးပၢၤကီၢ်သုးအသိလ့ၣ်ႇ ဆဲးကဲးတဖၣ်န့ၣ်ဟးဂီၤခဲလၢာ်လီၤႉလၢတီၤကလ့တၢ်ဆါဟံၣ်န့ၣ်ၦၤတပျဲနုာ်လီၤၦၤတၢ်ချၢဘၣ်ႉလၢ(ထောင်၀ိ)က၀ီၤဒ့ကျဲန့ၣ်အိၣ်ထဲပယီၤသုသိလ့ၣ်ႇပယီၤသုးလဲလဲလီၤႉဖၣ်အၣ်၀့ၢ်ကျဲနုာ်လီၤဟးထီၣ်(၄)ဘိလၢာ်န့ၣ်အ၀ဲသ့ၣ်ပံးဃာ်၀ဲ အိၣ်ခိးသမံသမိးတၢ်မီၤနီၤ”အဂ့ၢ်န့ၣ် ဖၣ်အၣ်၀့ၢ်ပူၤကမျၢၢ်တဂၤ စံးဘၣခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ လၢကညီကီၢ်စဲၣ်အပူၤ ဒ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် ကလံၤစိးကီၢ်ခီသုးဟီၣ်က၀ီၤ (နီၣ်ဂံၢ် ၂) ထုးထီၣ်ပာ်ဖျါ၀ဲအသိး စးထီၣ်လါယူၤလံထီၣ် ၁ သီန့ၣ် ဟါခီ ၆ နၣ်ရံၣ်တုၤလၢဂီၤခီ ၆ နၣ်ရံၣ်...