ပယီၤသုးဖီၣ်တ့ၢ်ဃ၁်ချၢၣ်တကူၣ်တၢၣ်ကမျၢၢ်တဖၣ်၀ံၤ မၢအဟဲက့ၤရ့ထီၣ်၀ဲလၢဟုသး
လါယူၤလံ ၂၆ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် နိၣ်တကီကီၢ်ဆၣ် ချၢၣ်တကူၣ်တၢၣ်ကရူၢ်အပူၤ ပယီၤသုးဖီၣ်က့ၤကိး၀ဲကမျၢၢ်လၢအဘုၣ်ဆၣ်ဖိကီၢ်ဖိလၢကျီးပူၤသ့ၣ်တဖၣ်အံၤ၀ံၤမၢတၢ်ဟဲက့ၤရ့ထီၣ်က့ၤ၀ဲလၢဟုသးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ ပယီၤသုးလၢအနုာ်လီၤတဖၣ်အံၤဖီၣ်၀ဲဒၣ်ချၢၣ်တကူၣ်တၢၣ်ကရူၢ်(နီဒ့)သ၀ီလီၢ်ခံ ကစၢၢ်သူခီၣ်ထံးကပိၤကပၤ ကမျၢၢ်တဖၣ်ဒီး ခီဖျိပယီၤသုးတဖၣ်အံၤတၢ်အီတၢ်အီတကူတလၢဘၣ်အဃိ ဖီၣ်ကမျၢၢ်၀ံၤမၢၦၤဟဲရ့ထီၣ်က့ၤ၀ဲလၢဟုသး အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ကမျၢၢ်လၢပယီၤသုးဖီၣ်အီၤအဟဲက့ၤထူၣ်ဖျဲးထီၣ်တဂၤစံး၀ဲ“ပယီၤသုးတဖၣ်အံၤဟဲလၢသ၀ီခိၣ်သ၀ီဃၢၤ၀ံၤႇဟးအိၣ်ခူသူၣ်ဟးအိၣ်တဒၢသးမီၤနီၤႉအ၀ဲသ့ၣ်အတၢ်အီၣ်တၢ်အီမ့လၢၤထီၣ်န့ၣ်ဖီၣ်၀ဲဒၣ်ကမျၢၢ်လၢကျီးပူၤတဖၣ်န့ၣ်ႉတနီၤန့ၣ်ဖီၣ်၀ဲဒၣ်ၦၤဒီမါ၀ၤႇအမါန့ၣ်ဖီၣ်တ့ၢ်၀ဲဒီးမ့မ့ၢ်လၢအ၀ၤခီန့ၣ်ပယီၤသုးမၢအက့ၤဟံသးဒ်န့ၣ်မီၤနီၤႉၦၤဟဲစိာ်ဟုသးမ့တုၤမးအပျၢ်လီၤက့ၤၦၤမါႉကမျၢၢ်လၢအ၀ဲသ့ၣ်ဖီၣ်ဃာ်၀ဲန့ၣ်အိၣ်ဒံး”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲအပူၤကွံာ်လါယူၤလံ ၁၄ သီအနံၤ ပယီၤသုးနုာ်လီၤ၀ဲလၢချၢၣ်ႇပလ့ၤႇတကူၣ်တၢၣ်သ၀ီဃၢၤနါမၠၣ်စ့ယၣ်ဒီး ဖဲန့ၣ်တၢ်ခးလိာ်သးကဲထီၣ်၀ဲဒိၣ်ဒိၣ်မုၢ်မုၢ်ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤဒံး န့ၣ်လီၤႉ တၢ်ဒုးကဲထီၣ်အခါပယီၤသုးခးသံ၀ဲၦၤပိာ်ခွါ(၂)ဂၤလၢသိလ့ၣ်တခိၣ်အပူၤဒံးဒီးမ့၀ံၤကမျၢၢ်အဂၤလၢအိၣ်သိၣ်လ့ၣ်တခိၣ်န့ၣ်အပူၤတဖၣ်ပယီၤသုးဖီၣ်က့ၤကိး၀ဲဒီးတုၤလၢခဲအံၤတပျၢ်လီၤ၀ဲဒံးဘၣ်အဂ့ၢ်န့ၣ် သ့ၣ်ညါဘၣ်လၢၦၤဟဲက့ၤထူၣ်ဖျဲးထီၣ် တဖၣ်အအိၣ်န့ၣ်လီၤႉ ပယီၤသုးတဖၣ်အံၤဖီၣ်ဃာ်ကမျၢၢ်တကးဒံးဘၣ်အမဲာ်ညါသူကမျၢၢ်တဖၣ်အံၤလၢကဒီသဒၢလီၤက့ၤအ၀ဲသ့ၣ်သးအဂီၢ် အသိးပယီၤသုးကျိၤတဖၣ်အံၤခီဖျိအ၀ဲသ့ၣ်အိၣ်လၢကစၢၢ်သူခီၣ်ထံးကပိၤကပၤအဃိလီၢ်က၀ီၤကမျၢၢ်တဖၣ်ဘၣ်ပာ်တ့ၢ်ကွံာ်အကျီးႇတၢ်ဖံးတၢ်မၤႇအကျီၢ်ပနၢ်ဆၣ်ဖိကီၢ်ဖိဒီးဘၣ်ဃ့ၢ်ထီၣ်၀ဲတုၤလၢခဲအံၤအဂ့ၢ်န့ၣ် သ့ၣ်ညါဘၣ်လၢ ၦၤမၤစၢၤၦၤဃ့ၢ်မှံဟးဖျိးတဖၣ်အအိၣ်န့ၣ်လီၤႉ
ၦၤဖိဒံဖိသၣ်ႇၦၤမိၢ်ဒၢဒီးမိၢ်လၢအဒုးအီဖိနုၢ်လၢအဃ့ၢ်တၢ်ဒုးတဖၣ်အံၤတၢ်ကီတၢ်ခဲအိၣ်လၢကဒိးန့ၢ်ဘၣ်တၢ်အီၣ်န့ၢ်ဂံၢ်န့ၢ်ဘါ
လါယူၤလံ ၂၅ သီႇ ၂၀၂၃ နံၣ်ႇ ခ့ၣ်အဲးစံၣ် သုးဟံးန့ၢ်တၢ်စိတၢ်ကမီၤ၀ံၤလီၢ်ခံ လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢဟီၣ်က၀ီၤတဖၣ်အပူၤ ခီဖျိစုက၀ဲၤတၢ်သဘံၣ်သဘုၣ်ဒီးတၢ်အိၣ်သးတဂၢၢ်တကျၢၤဘၣ်အဃိကမျၢၢ်ဘၣ်ဃ့ၢ်မှံဟးဖျိး၀ဲအါအါဂီၢ်ဂီၢ်န့ၣ်လီၤႉ လၢၦၤဃ့ၢ်မှံဟးဖျိးတဖၣ်အံၤအကျါပၣ်ဃုာ်၀ဲၦၤဖိဒံဖိသၣ်ႇၦၤမိၢ်ဒၢႇမိၢ်လၢအဒုးအီဖိနုၢ်သ့ၣ်တဖၣ်ဒီး ၦၤသ့ၣ်တဖၣ်အံၤအဂီၢ် တၢ်ကီတၢ်ခဲအိၣ်လၢကဒိးန့ၢ်ဘၣ်၀ဲတၢ်အီၣ်န့ၢ်ဂံၢ်န့ၢ်ဘါအဂ့ၢ်န့ၣ်သ့ၣ်ညါဘၣ်လၢကညီပိာ်မုၣ်ကရၢ(KWO)အအိၣ်န့ၣ်လီၤႉ တၢ်စူၤခါအတီၢ်ပူၤၦၤဖိဒံဖိသၣ်ႇၦၤမိၢ်ဒၢဒီးမိၢ်လၢအဒုးအီဖိနုၢ်သ့ၣ်တဖၣ်အံၤနမ့က့ၤထိၣ်သတြီၤလၢအပူၤကွံာ်အ၀ဲသ့ၣ်အိၣ်လၢအနီၢ်ကစၢ်တၢ်လီၢ်တၢ်ကျဲအခါဒီးအ၀ဲသ့ၣ်ဘၣ်ဃ့ၢ်တၢ်ဒုးအကတီၢ်အံၤလၢအ၀ဲသ့ၣ်ကဒိးန့ၢ်ဘၣ်တၢ်အီၣ်န့ၢ်ဂံၢ်န့ၢ်ဘါလၢလၢၦဲၤၦဲၤအဂီၢ်ကဲထီၣ်၀ဲတၢ်တၤတၢ်ဖးဒိၣ်တခါညါအဂ့ၢ်န့ၣ် (KWO)နဲၣ်ရွဲၣ်သဃဲၤ(၂)နီၢ်အဲၣ်တမှံၤဖီ စံး၀ဲဒ်အံၤန့ၣ်လီၤႉ “မိၢ်တနီၤန့ၣ်အနုၢ်ထံတထီၣ်အါအါဘၣ်ႉခီဖျိတၢ်ဂ့ၢ်အံၤအဃိတၢ်ကီတၢ်ခဲအိၣ်လၢပကဒိးန့ၢ်ဘၣ်တၢ်နုၢ်ထံကမူၣ်ႇ တၢ်အီၣ်န့ၢ်ဂံၢ်န့ၢ်ဘါကမူၣ်လၢၦၤဖိဒံဖိသၣ်တဖၣ်အံၤအဂီၢ်မီၤနီၤႉပမ့ဟးထီၣ်က့ၤလီၤလၢဟီၣ်က၀ီၤပူၤန့ၣ် ၦၤဟဲဃ့ၦၤလၢ တၢ်နုၢ်ထံကမူၣ်လၢၦၤဖိဒံဖိသၣ်အဂီၢ်ဒီးမိၢ်လၢအလိၣ်ဘၣ်တၢ်အီၣ်န့ၢ်ဂံၢ်န့ၢ်ဘါအဂီၢ်အံၤအိၣ်မီၤနီၤႉအဃိဒ်ပဖီၣ်တုၤပမၤတုၤအသိးန့ၣ်ပမၤစၢၤအိၣ်လီၤ”အဂ့ၢ်န့ၣ် အ၀ဲစံး၀ဲန့ၣ်လီၤႉ လၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤခီဖျိဒုးယၤတၢ်သဘံၣ်သဘုၣ်အဃိတုၤလၢတကီၢ်ခါတၢ်အိၣ်သးခဲအံၤန့ၣ် ကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၆)ကလီၢ်ဘျဲၣ်ညါဒီးမ့မ့ၢ်လၢၦၤဖိဒံဖိသၣ်ႇၦၤပိာ်မုၣ်ပိာ်မၢၤအနီၣ်ဂံၢ်ခီန့ၣ် တၢ်တသ့ၣ်ညါ၀ဲလီၤတံၢ်လီၤဆဲးဒံးဘၣ်ႇဘၣ်ဆၣ်အါဒၣ်တက့ၢ်န့ၣ်ပၣ်၀ဲဒၣ်န့ၣ်လီၤႉဖဲန့ၣ်အကျါၦၤမိၢ်ဒၢလၢအဖးထီၣ်အဖိလၢတၢ်ဒုးတၢ်ယၤအပူၤဒီးၦၤမိၢ်လၢအတဖးထီၣ်ဘၣ်ဒံးအဖိသ့ၣ်တဖၣ်အံၤစ့ၢ်ကီးပၣ်ဃု၁်၀ဲအဂ့ၢ်န့ၣ် သ့ၣ်ညါဘၣ်လၢဂံၢ် ခီၣ်ထံးကညီတၢ်ကရၢကရိဒီးၦၤမၤစၢၤၦၤဃ့ၢ်မှံဟဖျိးကရူၢ်အအိၣ်န့ၣ်လီၤႉ ၦၤမၤစၢၤၦၤဃ့ၢ်မှံဟးဖျိးတဂၤစံး၀ဲလၢ“ဒ်သိးပမၤနီၣ်ဃာ်ၦၤနီၣ်ဂံၢ်စရီအသိးန့ၣ်ပၣ်ဃုာ်၀ဲဒီးၦၤမိၢ်ဒၢတဖၣ်မီၤနီၤႉ အ၀ဲသ့ၣ်စံၣ်တခီခီအိၣ်ဖျဲၣ်ဖိတခီခီအိၣ်ဖျဲၣ်၀ဲဒီး(လက်သည်)ဒ်န့ၣ်လီၤမီၤနီၤႉခီဖျိတၢ်လီၢ်တၢ်ကျဲတအိၣ်ႇတၢ်ဂ့ၢ်အကလုာ်ကလုာ်အဃိၦၤမိၢ်ဒၢလၢအဂၤတဖၣ်န့ၣ်စ့ၢ်ကီးပဘၣ်ပာ်နီၤဖးလီၤအီၤတၢ်လီၢ်တတီၤတတီၤဒ်န့ၣ်မီၤနီၤ”အဂ့ၢ်န့ၣ် စံး၀ဲန့ၣ် လီၤႉ ဒ်န့ၣ်အသိးလၢသၣ်တီၣ်ကလံၤစိးတကပၤန့ၣ်ခီဖျိတၢ်ဒုးကဲထီၣ်တုၤလၢခဲအံၤတစုအဃိၦၤဃ့ၢ်မှံဟးဖျိး(၂)ကထိဘျဲၣ်အံၤတက့ၤဘၣ်လၢအဟံၣ်အဃီဒံးဘၣ်ဒီးလၢၦၤမိၢ်ဒၢႇမိၢ်လၢအဒုးအီအဖိနုၢ်သ့ၣ်တဖၣ်အံၤလိၣ်ဘၣ်၀ဲကသံၣ်ကသီဒီး တၢ်အီၣ်န့ၢ်ဂံၢ်န့ၢ်ဘါတဖၣ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ ဒ်န့ၣ်အသိးခီဖျိပယီၤသုးအံၤတပျဲၦၤစိာ်ထီၣ်စိာ်လီၤကသံၣ်ကသီလၢဟီၣ်က၀ီၤပူၤဘၣ်ဒီးအ၀ဲသ့ၣ်ဟးလူၤဖီၣ်၀ဲဆူၣ်ချ့ၦၤမၤတၢ်ဖိတဖၣ်အဃိတၢ်ကီတၢ်ခဲအိၣ်လၢကလဲၤဆှၢကသံၣ်ကသီအသိးတကးဒံးဘၣ်ခီဖျိၦၤသ့ၣ်တဖၣ်အံၤတဒိးန့ၢ်ဘၣ်ဆူၣ်ချ့တၢ်အံးထွဲကွၢ်ထွဲဂ့ၤဂ့ၤဘၣ်အဃိၦၤမိၢ်ဒၢသ့ၣ်တဖၣ်ဖဲအ၀ဲသ့ၣ်အိၣ်ဖျဲၣ်ဖိအဆၢကတီၢ်န့ၣ်ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် ကညီဂ့ၢ်၀ီခွဲးယာ်ကရူၢ်(KHRG)ထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ
ခီဖျိပနံ၁်တၢ်ဖိတၢ်လံၤၦ့ၤထီၣ်အဃိ(Non CDM)ၦၤမၤတၢ်ဖိတဖၣ် တၢ်ကီတၢ်ခဲအိၣ်ထီၣ်လၢကအိၣ်ဆၢထၢၣ်
လါယူၤလံ ၂၅ သီႇ ၂၀၂၃ နံၣ်ႇ ခ့ၣ်အဲးစံၣ် သုးဟံးန့ၢ်တၢ်စိတၢ်ကမီၤ၀ံၤလီၢ်ခံစ့ပယီၤအၦ့ၤလီၤ၀ဲအသိးခီဖျိပနံာ်တၢ်ဖိတၢ်လံၤစ့ၢ်ကီးအၦ့ၤထီၣ်၀ဲဒၣ်ကွ့ၢ်ကွ့ၢ်အဃိ (Non CDM)ၦၤမၤတၢ်ဖိလၢအမၤတၢ်မၤလၢသုးမီၤစိရိၤစုတီၤဖီလာ်အီၣ်လါလဲသ့ၣ်တဖၣ်အံၤ တၢ်ကီတၢ်ခဲအိၣ်ထီၣ်လၢ ကအိၣ်ဆၢထၢၣ်၀ဲအဂ့ၢ်န့ၣ် သ့ၣ်ညါဘၣ်လၢ(Non CDM)တဖၣ်အအိၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤန့ၢ်(၂)နံၣ်ဘျဲၣ်အတီၢ်ပူၤအံၤခီဖျိကီၢ်ပူၤဖီၣ်စုက၀ဲၤတၢ်သဘံၣ်သဘုၣ်အဃိ ကီၢ်ပယီၤပူၤ ကျိၣ်စ့အၦ့ၤလီၤလဲၤသးတဘၣ်ဂ့ၢ်ဘၣ်၀ီလၢၤဘၣ်ဒီးပနံာ်တၢ်ဖိတၢ်လံၤစ့ၢ်ကီးအၦ့ၤဒိၣ်ထီၣ်၀ဲဘၣ်ဆၣ် မ့မ့ၢ်ၦၤမၤတၢ်ဖိအလါလဲခီန့ၣ် တၢ်တမၤအါထီၣ်၀ဲဘၣ်အဃိတၢ်ကီတၢ်ခဲအိၣ်ထီၣ်လၢကအိၣ်ဆၢထၢၣ်အဂီၢ်အဂ့ၢ်န့ၣ် ကညီကီၢ်စဲၣ် ဖၣ်အၣ်၀့ၢ် (Non CDM)တီၤဖုၣ်ကၠိ သရၣ်မုၣ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တီၤဖုၣ်ကၠိသရၣ်/မုၣ်န့ၣ်န့ၢ်၀ဲဒၣ်(၁၈၀ႇ၀၀၀)ကၠးလီၤႉလၢကအီၣ်ကအီအဂီၢ်န့ၣ်တဘၣ်ဂီၢ်ဘၣ်ႉ ယဆိမိၣ်အ၀ဲသ့ၣ်ကမၤအါထီၣ်လါလဲအဂီၢ်စ့ၢ်ကီးတၢ်ရဲၣ်တၢ်ကျဲၤတအိၣ်ဘၣ်မီၤနီၤႉနကဘၣ်မၤတၢ်မၤခံခါသၢခါမးကဘၣ်ဂီၢ်လီၤႉနမ့ဟးသိၣ်လိ(ကၠူၤစ့ၤ)မးကဘၣ်ဂီၢ်လီၤႉမ့ထဲလါလဲတခါန့ၣ်တဘၣ်ဂီၢ်လၢၤဘၣ်ႉမ့မ့ၢ်လၢပနံာ်တၢ်ဖိတၢ်လံၤတၢ်အီၣ်တၢ်အီခီန့ၣ်အၦ့ၤလီၤတအိၣ်ဘၣ်ႉဟုသးယိယိဖိန့ၣ်မးအၦ့ၤအိၣ်လၢအကလီၢ်လံ”အဂ့ၢ်န့ၣ် စံး၀ဲန့ၣ်လီၤႉ သုးမီၤစိရိၤစုတီၤဖီလာ်(Non CDM)ကၠိသရၣ်/မုၣ်တဖၣ်အလါလဲန့ၣ် တီၤဖုၣ်ကၠိသရၣ်/မုၣ်န့ၣ်န့ၢ်၀ဲတလါ (၁၈၀ႇ၀၀၀)ႇ တီၤခၢၣ်သးကၠိသရၣ်/မုၣ်န့ၣ်န့ၢ်၀ဲတလါ(၁၉၈ႇ၀၀၀)ကၠးဒီး မ့မ့ၢ်တီၤထီကၠိကၠိသရၣ်/မုၣ်ခီန့ၣ်န့ၢ်၀ဲ(၂၀၂ႇ၀၀၀)ကၠး အဂ့ၢ်န့ၣ် တီၤဖုၣ်ကၠိသရၣ်မုၣ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤအတီၢ်ပူၤ(Non CDM)ၦၤမၤတၢ်ဖိလၢအအီၣ်လါလဲတဖၣ်အံၤ လၢကအိၣ်ဆၢထၢၣ်အဂီၢ် ထံၣ်ဘၣ်၀ဲတၢ်ကီတၢ်ခဲအါမးဒီးခီဖျိန့ၢ်ဘၣ်၀ဲလါလဲစှၤအဃိအ၀ဲသ့ၣ်ဟးထီၣ်မၤတၢ်လၢတၢ်ချၢဟဲအါထီၣ်ဒၣ်ကွ့ၢ်ကွ့ၢ်အဂ့ၢ်န့ၣ် သ့ၣ်ညါဘၣ်လၢၦၤဘူးဒီး(Non CDM)ကၠိသရၣ်/မုၣ်တဖၣ်အအိၣ်န့ၣ်လီၤႉ လၢကဟဲလါယူၤလံ ၃၁ သီအံၤ သုးမီၤစိရိၤဘိးဘၣ်ရၤလီၤ၀ဲလၢကထုးထီၣ်ရၤလီၤ၀ဲစ့ပယီၤ(၂)ကလးတၢ်ဒီး လၢတၢ်ကစီၣ်အံၤအဃိတၢ်ခီလဲစ့တၢ်ဖံးတၢ်မၤဆိကတီၢ်ကွံာ်အသးအသိးထူၦ့ၤ,ဟံၣ်ဟီၣ်ခိၣ်လီၢ်တၢ်ဆါတၢ်ၦ့ၤအံၤစ့ၢ်ကီးအိၣ်ပတုာ်ကွံာ်၀ဲန့ၣ်လီၤႉတကးဒံးဘၣ် ကညီကီၢ်စဲၣ် ကီၢ်ကၠီၣ်တဲၣ်–ကီၢ်ပယီၤကီၢ်ဆၢ စ့ၦ့ၤလီၤအဃိ တၢ်ကီတၢ်ခဲအိၣ်ထီၣ်၀ဲလၢ ၦၤခီလဲစ့ႇၦၤဆှၢလီၤစ့ဖိတဖၣ်အံၤအဂီၢ်န့ၣ်လီၤႉ (Non CDM)ကၠိသရၣ်မုၣ်လၢအဂၤတဂၤစ့ၢ်ကီးစံး၀ဲလၢ“ပန့ၢ်လါလဲနါက့လၢဟံၣ်ဖိဃီဖိအဂီၢ်န့ၣ်တကူကလၢဘၣ်ႉ ၦၤလၢပသ့ၣ်ညါလိာ်သးဒီးၦၤတဖၣ်အါဒၣ်တက့ၢ်န့ၣ်အ၀ဲသ့ၣ်ဟးထီၣ်တၢ်မၤမီၤနီၤႉအနီၣ်ဂံၢ်နီၣ်ဒွးဒုပတသ့ၣ်ညါလီၤတံၢ်လီၤဆဲးဘၣ်ဘၣ်ဆၣ်အါဒၣ်တက့ၢ်န့ၣ်ၦၤဟးထီၣ်တၢ်မၤလီၤႉနကအီၣ်ဒီးလါလဲတခါအံၤန့ၣ်တဘၣ်ဂီၢ်နီတစဲးလၢၤဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံကီၢ်ပယီၤပူၤပဒိၣ်၀ဲၤကျိၤၦၤမၤတၢ်ဖိလၢအနုာ်လီၤမၤ(CDM)တဖၣ်အံၤစ့ၢ်ကီး တၢ်ကီတၢ်ခဲအိၣ်ထီၣ်လၢတၢ်လုၢ်အီၣ်နီၢ်ခိသးသမူအဃိတနီၤန့ၣ်အ၀ဲသ့ၣ်က့ၤဆဲးလီၤလံာ်အုၣ်ကီၤလၢ၀ဲၤကျိၤအအိၣ်ဒီး က့ၤမၤကဒါတၢ်မၤလၢသုးမီၤစိရိၤစုတီၤဖီလာ်စ့ၢ်ကီးအိၣ်၀ဲဒၣ်န့ၣ်လီၤႉ (CDM)ၦၤမၤတၢ်ဖိလၢအိၣ်ကညီကီၢ်စဲၣ်ပူၤတဖၣ်အါဒၣ်တက့ၢ်န့ၣ်မ့ၢ်၀ဲကူၣ်သ့ၦၤမၤတၢ်ဖိဒီးဆူၣ်ချ့ၦၤမၤတၢ်ဖိသ့ၣ် တဖၣ်န့ၣ်လီၤႉခီဖျိတၢ်လုၢ်အီၣ်နီၢ်ခိသးသမူတၢ်ကီတၢ်ခဲအဃိတနီၤန့ၣ်ဘၣ်က့ၤဆဲးလီၤ၀ဲလံာ်အုၣ်ကီၤ၀ံၤ က့ၤမၤကဒါတၢ်မၤလၢသုးမီၤစိရိၤစုတီၤဖီလာ်အိၣ်၀ဲအသိးႇတနီၤန့ၣ်လဲၤထီၣ်ဖံးမၤက့ၤတၢ်မၤလၢထံဂုၤကီၢ်ဂၤစ့ၢ်ကီး အိၣ်၀ဲဒၣ်န့ၣ်လီၤႉ
(လဲၣ်ခၣ်တီၤ)တၢ်ဒုးအဃိ ကမျၢၢ်(၅၀၀)ဘျဲၣ်လၢအလဲၤဃ့ၢ်ထီၣ်ဆူမၠၣ်၀တံၣ်အံၤတဖၣ် တုၤလၢခဲအံၤတက့ၤဘၣ်လၢ အဟံၣ်အဃီဒံးဘၣ်
လါယူၤလံ ၂၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢမၠၣ်၀တံၣ်ကလံၤထံး(လဲၣ်ခၣ်တီၤ)န့ၣ်ခီဖျိတၢ်ဒုးကဲထီၣ်လၢတၢ်ပၢၢ်ဆၢသုးပာ်ဖှိၣ်ဒီးပယီၤသုးဘၢၣ်စၢၤအဃိ လီၢ်က၀ီၤကမျၢၢ်(၅၀၀)ဘျဲၣ်လၢအလဲၤဃ့ၢ်ထီၣ်ဆူမၠၣ်၀တံၣ်သ့ၣ်တဖၣ်အံၤတုၤလၢခဲအံၤအ၀ဲသ့ၣ်တက့ၤဘၣ်လၢအဟံၣ်အဃီဒံးဘၣ်အဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးတဖၣ်အအိၣ်န့ၣ်လီၤႉ စးထီၣ်ဖဲလါယူၤလံ ၅ သီန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်သုးကျိၤ ထီၣ်ခး၀ဲ သုးမီၤစိရိၤစုတီၤဖီလာ်သုးခိးကီၢ်ဆၢ(BGF)ကျိဖးဒိၣ်သုးကလၢၤ(လဲၣ်ခၣ်တီၤ)ဖယါကိအံၤဒီး ဖဲလါယူၤလံ ၂၁ သီအနံၤန့ၣ် ထီၣ်မၤန့ၢ်၀ဲသုကလၢၤအံၤန့ၣ်လီၤႉ ဖဲတၢ်ဒုးကဲထီၣ်အခါခီဖျိပယီၤသုးခးလီၤကျိဖးဒိၣ်လီၤတဲာ် ပိၢ်ဖးထီၣ်လၢက၀ီၤဒ့ပူၤ ၦၤဟံၣ်ခိၣ်အဃိ ကမျၢၢ်တဖၣ်ဘၣ်လဲၤဃ့ၢ်ထီၣ်၀ဲလၢမၠၣ်၀တံၣ်တကပၤဒ်အံၤလီၤအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤ စံး၀ဲဒၣ်န့ၣ်လီၤႉ အ၀ဲစံး၀ဲလၢ“ၦၤအိၣ်လၢ(ပွ့လ့အ့မၠဲၤ)ႇမၠ့ၣ်တၤလ့မၠဲၤႇမဲၢ်ကနဲပူၤႇစ့လဲၣ်မၠဲၤသိလ့ၣ်ကရၢၢ်လီၢ်ခံတဖၣ်န့ၣ် ဟဲထီၣ်သုးလီၢ် သုးကျဲလၢ၀့ၢ်ပူၤမီၤနီၤႉလၢ(တီယၣ်)သီခါဖၠၣ်တကပၤန့ၣ်အါကတၢၢ်လီၤႉတီယၣ်သီခါဖၠၣ်န့ၣ် ဟံၣ်ခိၣ်အိၣ်၀ဲ(၈၉)ဒူၣ်ႇ ၦၤနီၣ်ဂံၢ်ခီန့ၣ်အိၣ်၀ဲ(၃၁၇)ဂၤမီၤနီၤႉအန့ၣ်ပၣ်ဃုာ်ဒီးၦၤဒံဖိသၣ်ၦၤနီၢ်ဒိၣ်ခဲလၢာ်လီၤႉမၠၣ်၀တံၣ်ပၢပြးကရူၢ်ဒီးၦၤဂ့ၢ်၀ီၦၤမၤ တၢ်ဖိ၀ဲၤကျိၤကရူၢ်တဖၣ်ဟဲဆှၢ၀ဲဒၣ်ဟုသးႇသိႇအံသၣ်မီၤနီၤႉတုၤလၢခဲအံၤအ၀ဲသ့ၣ်တက့ၤဘၣ်ဒံးဘၣ်ႉနမ့ပာ်ဖှိၣ်ၦၤလၢအဟဲအိၣ်ဖဲက၀ီၤဒ့ပူၤအံၤဒီးၦၤလၢအဟဲအိၣ်ဖဲ(တီယၣ်)သီခါဖၠၣ်ခဲလၢာ်န့ၣ်အစှၤကတၢၢ်ၦၤနီၣ်ဂံၢ်ကအိၣ်အဂၤ(၅၀၀)ဘျဲၣ်ညါ”အဂ့ၢ်န့ၣ် စံး၀ဲန့ၣ်လီၤႉ တကီၢ်ခါခဲအံၤပယီၤသုးအံၤဒ်သိးအ၀ဲသ့ၣ်ကထီၣ်ဟံးန့ၢ်က့ၤ(လဲၣ်ခၣ်တီၤ)သုးကလၢၤအံၤအဂီၢ်န့ၣ် အ၀ဲသ့ၣ်ဆှၢအါထီၣ်(စစ်ကူ)ႇအိၣ်ကတီၤမၤအါထီၣ်၀ဲကျိဖးဒိၣ်အလီၢ်သ့ၣ်တဖၣ်န့ၣ်လီၤႉလၢန့ၣ်အမဲာ်ညါက၀ီၤဒ့ သုးမီၤစိရိၤသးၦၢ်ကရူၢ်တဖၣ်ဟးဒုးသ့ၣ်ညါလီၤ၀ဲလၢကမျၢၢ်လၢအအိၣ်၀့ၢ်ကပၤက၀ီၤဒ့ပူၤတဖၣ်အံၤကသုးဆိဃာ်အလီၢ် အကျဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ “ခဲအံၤလၢမၠၣ်၀တံၣ်၀့ၢ်ပူၤအံၤတၢ်အိၣ်သးဒုပိၢ်မၢ်လီၤႉမ့မ့ၢ်လၢ၀့ၢ်ချၢန့ၣ်ပယီၤသုးဟဲထီၣ်တုၤကဒီးဒီဒူၣ်ညါႉ အ၀ဲသ့ၣ်ကတဲၤကတီၤဃာ်ကျိဖးဒိၣ်လီၢ်တဖၣ်လံမီၤနီၤႉလၢ(ကၠီၣ်လိကၠံ)က၀ီၤဒ့ႇမၠၣ်စၤဒံၤသိလ့ၣ်ကရၢၢ်ႇမၠၣ်စၤဒံၤ တၢ်တီၢ်(ကီးစ်)ပျီႇပယီၤသုး(၂၇၅)တၢ်လီၢ်ႇဟ့ၤမၤအူသီခါဖၠၣ်လီၢ်ခံတကပၤန့ၣ် ပယီၤသုးဆီလီၤသးမၤထီၣ်ဃာ်၀ဲကျိ ဖးဒိၣ်လံ”အဂ့ၢ်န့ၣ် မၠၣ်၀တံၣ် ဂံၢ်ခီၣ်ထံးတၢ်ကစီၣ်တဖၣ် စံး၀ဲန့ၣ်လီၤႉ လၢန့ၣ်အမဲာ်ညါလၢကညီကီၢ်စဲၣ် နိၣ်တကီႇဃိၣ်သၢဖျၢၣ်ႇကီးတရံးႇဖၣ်ပူၣ်ႇသၣ်တီၣ်၀့ၢ်ဟီၣ်က၀ီၤတကပၤန့ၣ်စ့ၢ်ကီး တၢ်ဒုးကဲထီၣ်၀ဲလၢပယီၤသုးပာ်ဖှိၣ်ဒီး(KNLA)သုးပာ်ဖှိၣ်အဘၢၣ်စၢၤတပယူာ်ဃီအဂ့ၢ်န့ၣ် (KNLA)သုးပာ်ဖှိၣ်သုးကျိၤ ဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤႉ ခီဖျိတၢ်ဒုးတၢ်ယၤကဲထီၣ်ဒ်အံၤအဃိလီၢ်က၀ီၤကမျၢၢ်ဒူဖိသ၀ီဖိအဟံၣ်အဃီႇတၢ်ဘူၣ်တၢ်ဘါတၢ်သူၣ်ထီၣ်ႇ တၢ်ဖံးအီၣ်မၤအီၣ်လီၢ်ကျဲဟးဂူာ်ဟးဂီၤ၀ဲဒီးလီၢ်က၀ီၤကမျၢၢ်(၂)ကလီၢ်ဘျဲၣ်ဘၣ်ဃ့ၢ်မှံဟးဖျိး၀ဲအဂ့ၢ်န့ၣ် ဂံၢ်ခီၣ်ထံးကညီတၢ်ကရၢကရိထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ
လွံၢ်သီအတီၢ်ပူၤ ပယီၤသုးသံ(၁၀)ဂၤႇ ဘၣ်ဒိ(၁၁)အဂ့ၢ် KNU ထုးထီၣ်ပ၁်ဖျါ
လါယူၤလံ ၂၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၆)ဟီၣ်က၀ီၤႇ တလၢၤကီၢ်စဲၣ် ၀ီၢ်ရ့ၣ်ကီၢ်ဆၣ် ၀ီၢ်ရီဟီၣ်က၀ီၤအပူၤ စးထီၣ်လါယူၤလံ ၁၇ သီတုၤလၢ ၂၁ သီ လၢ(၄)သီအတီၢ်ပူၤ တၢ်ပၢၢ်ဆၢသုးပာ်ဖှိၣ်ဒီးပယီၤသုးအဘၢၣ်စၢၤတၢ်ဒုးကဲထီၣ် အခါ ပယီၤသုးတကပၤသံ၀ဲ(၁၀)ဂၤဒီး ဘၣ်ဒိဘၣ်ထံး(၁၁)ဂၤအကျါပၣ်ဃုာ်၀ဲသုးခိၣ်စိ(၂)ဂၤ အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပာ်ဖျါ၀ဲဖဲလါယူၤလံ ၂၄ သီအနံၤန့ၣ်လီၤႉ တၢ်ဒုးကဲထီၣ်လၢဘျီ၀ဲအံၤန့ၣ်မ့ၢ်၀ဲကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ် ၂၇ ဒီး ပၢဆှၢရဲၣ်ကျဲၤ၀ဲၤလီၢ် ခိၣ်သ့ၣ်(စကခ–၈)စုတီၤဖီလာ် ခီၣ်ချ့သုးရ့ၣ်(ခမရ–၄၀၇)ႇ သုးတြိၤ(၄၄)စုတီၤဖီလာ် ခီၣ်ချ့သုးရ့ၣ်(ခမရ–၁၀၄) တဖၣ်အံၤအဘၢၣ်စၢၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ခံခီခံကပၤတၢ်ဒုးကဲထီၣ်လၢလွံၢ်သီအတီၢ်ပူၤအံၤမ့မ့ၢ်လၢတၢ်ပၢၢ်ဆၢသုးပာ်ဖှိၣ်တကပၤန့ၣ်ဘၣ်ဟ့ၣ်လီၤကွံာ်အသးသမူ (၁)ဂၤဒီး ဘၣ်ဒိ(၄)ဂၤအဂ့ၢ်န့ၣ် (KNLA)သုးရ့ၣ် ၂၇ ထုးထီၣ်ပာ်ဖျါ၀ဲန့ၣ်လီၤႉ (KNLA)သုးရ့ၣ် ၂၇ ဒီးသုးပာ်ဖှိၣ်သ့ၣ်တဖၣ်အံၤအ၀ဲသ့ၣ်ဟူးဂဲၤ၀ဲဒၣ်လၢ၀ီၢ်ရ့ၣ်ႇသရိာ်၀ါႇလမဲဟီၣ်က၀ီၤပူၤဒီး အ၀ဲသ့ၣ်ဟံစ့ၢ်ကီး၀ဲကျဲတၢ်ဘံၣ်တၢ်ဘၢအိၣ်ခိးသမံသမိးတၢ်လၢ၀ီၢ်ရ့ၣ်–ဘျံးဒ၀ဲၢ်ကျဲမုၢ်ခိၣ်ဒီတကျိၤန့ၣ်လီၤႉ ခံခီခံကပၤတၢ်ဒုးကဲထီၣ်ဘျီ၀ဲအံၤဘၣ်ဃးတၢ်သံတၢ်ဘၣ်ဒိဘၣ်ထံးတၢ်အိၣ်သးခီန့ၣ် တၢ်ပၢၢ်ဆၢသုးပာ်ဖှိၣ်တကပၤ ထုးထီၣ်ပာ်ဖျါ၀ဲတၢ်ကစီၣ်အိၣ်ဘၣ်ဆၣ်မ့မ့ၢ်လၢပယီၤသုးတကပၤခီန့ၣ်ထုးထီၣ်ပာ်ဖျါတၢ်ကစီၣ်တအိၣ်နီတမံၤဘၣ်န့ၣ်လီၤႉ ဒ်န့ၣ်အသိးဖဲအပူၤကွံာ်လါယူၤလံ ၂၁ သီအခါစ့ၢ်ကီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇ ခီၤဘြၤသုးကျိၤ(၁)ႇ (ကျားသစ်နက်)သုးကျိၤႇ(Federal Wings)ဒြိသုးပာ်ဖှိၣ်သ့ၣ်တဖၣ်အံၤ လဲၤထီၣ်မၤန့ၢ်၀ဲမၠၣ်၀တံၣ်၀့ၢ်ဃၢၤ (လဲၣ်ခၣ်တီၤ)ပယီၤသုးကလၢၤဒံးအဂ့ၢ်န့ၣ် ခီၤဘြၤသုးကျိၤထုးထီၣ်ပာ်ဖျါ၀ဲန့ၣ်လီၤႉ
ပယီၤသုးခးလီၤကျိဖးဒိၣ်အဃိ သထူၣ်ကီၢ်ဆၣ်ပူၤ ကမျၢၢ်ဃ့ၢ်ထီၣ်(၃၀၀၀)ဘျဲၣ်
လါယူၤလံ ၂၄ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ သထူၣ်ကီၢ်ဆၣ်အပူၤ ခီဖျိပယီၤသုးခးလီၤကျိဖးဒိၣ်ကိးမုၢ်နံၤဒဲးအဃိ လီၢ်က၀ီၤကမျၢၢ်အဂၤ(၃၀၀၀)ဘျဲၣ် ဘၣ်ဃ့ၢ်မှံဟးဖျိး၀ဲအဂ့ၢ်န့ၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ထုးထီၣ်ပာ်ဖျါ၀ဲဖဲလါယူၤလံ ၂၂ သီအနံၤန့ၣ်လီၤႉ စးထီၣ်ဖဲတလါအံၤထီၣ်န့ၣ်ခီဖျိပယီၤသုးခီၣ်ချ့သုးရ့ၣ်(ခမရ–၉)သုးရ့ၣ်ဒီးမျိာ်သုးရ့ၣ်(၃၁၄)တဖၣ်အံၤ ခးလီၤကျိဖးဒိၣ်ဆူ(ခ့ၣ်အဲၣ်ယူၣ်)သထူၣ်ကီၢ်ဆၣ် စွ့ၤယီၤပၠၣ်ကရူၢ်ပူၤတပယူာ်ဃီအဃိ ဟံၣ်ခိၣ်အဖျၢၣ်(၅၀၀)ဘျဲၣ် ၦၤနီၣ်ဂံၢ်(၃၀၀၀)ဘျဲၣ်ဘၣ်ဃ့ၢ်မှံဟးဖျိး၀ဲအဂ့ၢ်န့ၣ် ဒူသထူၣ်ကီၢ်ရ့ၣ် သိၣ်မှံၤဂ့ၢ်၀ီပၢဆှၢတၢ်ကမံးတံာ်ခိၣ် စီၤကၠီၤမၠ့ၣ် စံး၀ဲန့ၣ်လီၤႉ အ၀ဲစံး၀ဲလၢ“စွ့ၤယီၤပၠၣ်ကရူၢ်ပူၤသ၀ီတဖၣ်န့ၣ်ဃ့ၢ်ထီၣ်ႉထဲစွ့ၤယီၤပၠၣ်သ၀ီတဖျၢၣ်လီၤန့ၣ်ဟံၣ်ခိၣ်အိၣ်အဖျၢၣ်(၂၀၀)ဘျဲၣ်လံႉ(အ၀့ကၠံ)သ၀ီစ့ၢ်ကီးဟံၣ်ခိၣ်အဖျၢၣ်(၁၀၀)ဘျဲၣ်ဘၣ်ဃ့ၢ်ထီၣ်စ့ၢ်လီၤႉသ၀ီလၢအိၣ်တၢ်ခိၣ်တၢ်ဃၢၤဖဲန့ၣ်တဖၣ်စ့ၢ်ကီးဘၣ်ဟးပလဲာ်သးခဲလၢာ်လီၤႉတနီၤန့ၣ်အ၀ဲသ့ၣ်လဲၤစံၣ်အိၣ်ဆိလၢအဘူးအတံၢ်ဟံၣ်မီၤနီၤႉအါဒၣ်တက့ၢ်န့ၣ်ၦၤလဲၤစံၣ်အိၣ်လၢၦၢ်ပူၤလၢအယံၤအပူၤဖျဲးဒီးကျိဖးဒိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒူသ၀ီလၢအဃ့ၢ်ထီၣ်သ့ၣ်တဖၣ်န့ၣ်မ့ၢ်၀ဲစွ့ၤယီၤပၠၣ်သ၀ီႇအ၀့ကၠံႇစံ၀ိႇပါအီၤကိႇခလီၣ်အ့ႇမယါကိႇမံၣ်ခၠီအဲၤႇ ခၠီစီၣ်ႇဒီသ၀ီသ့ၣ်တဖၣ်ဒီးသ၀ီသ့ၣ်တဖၣ်အံၤသ၀ီဖိဃ့ၢ်ထီၣ်၀ဲသ၀ီဒီတဖျၢၣ်အဂ့ၢ်န့ၣ် သ့ၣ်ညါဘၣ်လၢ(ခ့ၣ်အဲၣ်ယူၣ်)ဒူသထူၣ်ကီၢ်ရ့ၣ် ၦၤဘၣ်မူဘၣ်ဒါအအိၣ်န့ၣ်လီၤႉ လၢန့ၣ်အမဲာ်ညါဖဲအပူၤကွံာ်လါယူၤလံ ၂၁ သီအခါစ့ၢ်ကီး ခီဖျိ(ကြာပန်း)မျိာ်သုးရ့ၣ်(၂၀၆)ခးလီၤကျိဖးဒိၣ်ဆူ အံကၠုၢ်ခံကရူၢ်ပူၤ (ကဇိုင်း)သ၀ီပူၤအဃိ လီၢ်က၀ီၤၦၤပိာ်မုၣ်ဘၣ်ဒိ၀ဲ(၁)ဂၤဒံးအသိး ဖဲလါယူၤလံ ၇ သီအခါစ့ၢ်ကီး ခီဖျိပယီၤသုးခးလီၤကျိဖးဒိၣ်ဆူစွ့ၤယီၤပၠၣ်သ၀ီပူၤအဃိ ကမျၢၢ်ဘၣ်ဒိ(၅)ဂၤအကျါပၣ်ဃုာ်၀ဲၦၤဖိသၣ်(၂)ဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ ဒ်န့ၣ်အသိးစးထီၣ်ဖဲအပူၤကွံာ်လါယူၤလံ ၁၄ သီအနံၤန့ၣ် ခီဖျိပယီၤသုးတြိၤ(၄၄)အၦၤနုာ်လီၤလၢ ကၠဲၣ်ထိၤကီၢ်ဆၣ်ပူၤ အဃိ ဟံၣ်ခိၣ်အဖျၢၣ်(၆၀၀)ဘျဲၣ် ၦၤနီၣ်ဂံၢ်အဂၤ(၃၀၀၀)ဘျဲၣ်ဘၣ်ဃ့ၢ်ထီၣ်၀ဲအသိး ပယီၤသုးခးသံစ့ၢ်ကီး ကမျၢၢ်ၦၤဆါတၢ်ဖိ(၂)ဂၤလၢတၢ်ဂ့ၢ်တအိၣ်နီတမံၤဘၣ်အဂ့ၢ်န့ၣ် ခ့ၣ်အဲၣ်ယူၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ လၢခ့ၣ်အဲၣ်ယူၣ် ဒူသထူၣ်ကီၢ်ရ့ၣ်အပူၤ စးထီၣ်လါယူၤလံ ၁ သီတုၤလၢ ၂၁ သီအနံၤ...
တၢ်ကစီၣ်ရၤလီၤသးလၢၦၤကထုးထီၣ်စ့ပယီၤခံကလးတၢ်အဃိ စ့ပယီၤအၦ့ၤလီၤအဖီခိၣ် ကီၢ်ကၠီၣ်တဲၣ်–ကီၢ်ပယီၤကီၢ်ဆၢ တၢ်ဆှၢစ့တၢ်မၤအိၣ်ပတုာ်သး
လါယူၤလံ ၂၄ သီႇ ၂၀၂၃ နံၣ်ႇ ခ့ၣ်အဲးစံၣ် သုးမီၤစိရိၤထုးထီၣ်ဘိးဘၣ်ရၤလီၤ၀ဲလၢကဟဲလါယူၤလံ ၃၁ သီအနံၤန့ၣ် ကထုးထီၣ်ရၤလီၤ၀ဲစ့ပယီၤ (၂၀၀၀၀)တၢ်အံၤဒီး ဖဲန့ၣ်၀ံၤလၢအနၣ်ရံၣ်အတီၢ်ပူၤခီဖျိကီၢ်ပယီၤစ့ၦ့ၤလီၤတပယူာ်ဃီအဃိ ကီၢ်ကၠီၣ်တဲၣ်–ကီၢ်ပယီၤကီၢ်ဆၢ တၢ်ဆှၢစ့တၢ်ဖံးတၢ်မၤတဖၣ်အိၣ်ပတုာ်သးအဂ့ၢ်န့ၣ် ၦၤလၢအမၤတၢ်ခီလဲစ့ႇ တၢ်ဆှၢစ့တၢ်ဖံးတၢ်မၤတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ ဖဲလါယူၤလံ ၂၂ သီအနံၤ လၢကီၢ်ဆၢမၠၣ်၀တံၣ်၀့ၢ်ပူၤ စ့ပယီၤ(၁)ကလီၢ်န့ၣ်အၦ့ၤအိၣ်၀ဲလၢစ့ယိၤ(၁ႇ၁၁၅)ဘးဒီး ဘၣ်ဆၣ်မုၢ်ဆ့ၣ်ထီၣ်သုးမီၤစိရိၤဘိးဘၣ်ရၤလီၤ၀ဲလၢလါယူၤလံလၢာ်န့ၣ်ကထုးထီၣ်ရၤလီၤ၀ဲစ့ပယီၤ(၂၀၀၀၀)တၢ်အံၤ န့ၣ်လီၤႉဖဲန့ၣ်၀ံၤလီၢ်ခံစ့ပယီၤ(၁)ကလီၢ်န့ၣ်န့ၢ်က့ၤလၢစ့ယိၤထဲ(၁၀၀၀)ဘးလီၤအဃိတကီၢ်ခါခဲအံၤတၢ်ခီလဲစ့ႇတၢ်ဆှၢစ့တၢ်ဖံးတၢ်မၤလၢအိၣ်ကီၢ်ကၠီၣ်တဲၣ်–ကီၢ်ပယီၤကီၢ်ဆၢအံၤတဖၣ်အိၣ်ပတုာ်ကွံာ်၀ဲသးအဂ့ၢ်န့ၣ် ၦၤလၢအမၤတၢ်လၢတၢ်ခီလဲစ့ႇတၢ်ဆှၢစ့တၢ်ဖံးတၢ်မၤလၢအိၣ်ကီၢ်ဆၢတဂၤ စံး၀ဲဒ်အံၤန့ၣ်လီၤႉ ၦၤလၢအမၤတၢ်လၢတၢ်ဆှၢစ့တၢ်ဖံးတၢ်မၤလၢအိၣ်မဲၢ်ဆီး၀့ၢ်ပူၤတဂၤစံး၀ဲလၢ“ဟါခီအံၤစ့ယိၤ(၁ႇ၁၁၀)ဘးန့ၣ် အၦ့ၤထီၣ်တုၤလၢ(၁၀၀၀)ဘးညါႇစ့ပယီၤအၦ့ၤလီၤမီၤနီၤႉမ့ၢ်ကဆဲးမၤသးဒ်လဲၣ်မးပတသ့ၣ်ညါဒံးဘၣ်အဃိ ပဆိကတီၢ်ဃာ်၀ဲတၢ်ဆှၢစ့ႇတၢ်ခီလဲစ့မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါယူၤလံ ၂၃ သီအနံၤ န့ၣ်လီၤႉ ဖဲမဟါလါယူၤလံ ၂၃ သီအနံၤန့ၣ် နမ့ခီလဲစ့ပယီၤဆူစ့ယိၤန့ၣ် စ့ပယီၤ(၁)ကလီၢ်န့ၣ်န့ၢ်၀ဲလၢစ့ယိၤ(၁၀၀၀)ဘးဒီး နမ့ခီလဲစ့ယိၤဆူစ့ပယီၤန့ၣ် စ့ယိၤ(၁၁၂၀)ဘးန့ၣ်န့ၢ်၀ဲလၢစ့ပယီၤ(၁)ကလီၢ်ကၠးလီၤဘၣ်ဆၣ် မ့မ့ၢ်ၦၤခီလဲစ့ဖိႇ ၦၤဆှၢလီၤစ့ဖိတဖၣ် ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ “တနံၤအံၤတၢ်ကီဒိၣ်မးလၢကဆှၢလီၤစ့ဆူကီၢ်ပယီၤတကပၤမီၤနီၤႉနကဆှၢလီၤစ့လၢကီၢ်ပူၤတၢ်လီၢ်တဖၣ်န့ၣ်ခီဒၢး ကီၢ်ပယီၤစ့တၢးသမံသမိး၀ဲ(Bank Account)ႇနကသူစ့တၢးလၢ(Online)အဂီၢ်စ့ၢ်ကီးတၢ်ကီတၢ်ခဲအိၣ်လၢအ့တနဲး မီၤနီၤႉဆှၢလီၤစ့တန့ၢ်ႇနကဆှၢလီၤစ့လၢၦၤမံၤတဂၤန့ၣ်အအိၣ်ခီဒၢးစ့တတုၤဘၣ်ကဲထီၣ်သးဒ်န့ၣ်မီၤနီၤႉခဲအံၤပပတုာ်ဃာ်၀ဲတၢ်ဆှၢလီၤစ့လၢကီၢ်ပူၤမီၤနီၤ”အဂ့ၢ်န့ၣ် ၦၤလၢအမၤတၢ်ဆှၢလီၤစ့ ယိၤကီၢ်ဆူကီၢ်ပယီၤတဂၤ စံး၀ဲန့ၣ်လီၤႉ ဒ်န့ၣ်အသိးတၢ်အိၣ်သးခဲအံၤလၢခိၣ်၀့ၢ်ဃၢၤန့ၣ်တၢ်အိၣ်ကတီၤထီၣ်သးလၢဒုးယၤတၢ်ဟူးတၢ်ဂဲၤလံအဃိ လီၢ်က၀ီၤကမျၢၢ်လၢအဒိးသန့ၤထီၣ်သးလၢတၢ်မၤကစၢ်လၢအအိၣ်၀့ၢ်ပူၤအံၤဒီးတၢ်မၤဘူၣ်ကစၢ်အအိၣ်သ့ၣ်တဖၣ်အံၤ ဟဲအါထီၣ်၀ဲဒၣ်အဂ့ၢ်န့ၣ် ၦၤလၢအမၤတၢ်လၢမုာ်သးမၤကလီ(ပရဟိတ)တၢ်ဖံးတၢ်မၤလၢအိၣ်မၠၣ်၀တံၣ်၀့ၢ်ပူၤတဖၣ် စံး၀ဲန့ၣ်လီၤႉ
KTLA ကရူၢ်ခး၀ဲအဃိ KNLA(သုးက့ ၄) သုးခိၣ်ဒိၣ်ဖိ စီၤဖိဆံးဒီးအၦၤတဂၤသံ၀ဲ
လါယူၤလံ ၂၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဘျံး၀၀ဲၢ်ကီၢ်ရ့ၣ်(သုးက့ ၄)ဟီၣ်က၀ီၤ ကညီဒီကလုာ်တၢ်ထူၣ်ဖျဲး သုးမုၢ်ဒိၣ်(KNLA) သုးရ့ၣ် ၁၂ ဟီၣ်က၀ီၤ မဲၤ(၄၀)န့ၣ် ဖဲ(KNLA)သိလ့ၣ်ကလဲၤထီၣ်ဆဲးလီတဲစိလၢ လီတဲစိန့ၢ် အလီၢ်အံၤအခါ ခီဖျိကီၢ်သူလ့ၤသုးမုၢ်ဒိၣ်(KTLA)အၦၤအိၣ်ခိးခး၀ဲအဃိ (KNLA)သုးဒုးယၤပၢဆှၢရဲၣ်ကျဲၤမူဒါခိၣ် သုးခိၣ်ဒိၣ်ဖိ စီၤဖိဆံးဒီးအၦၤတဂၤသံ၀ဲဒီး ဘၣ်ဒိ၀ဲဒၣ်(၅)ဂၤအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ တၢ်လီၢ်လၢလီတဲစိန့ၢ်အလီၢ်အံၤန့ၣ်ခီဖျိမ့ၢ်၀ဲဒၣ်ကီၢ်သူလ့ၤသုးမုၢ်ဒိၣ်(KTLA)သုးခိၣ် စီၤအဲၣ်ကွံ တီခိၣ်ရိၣ်မဲအၦၤ ဟူးဂဲၤ၀ဲအလီၢ်အဃိ တချုးလၢ(KNLA)အၦၤလဲၤ၀ဲဒံးဘၣ်အခါန့ၣ်တဲကျၢဃာ်၀ဲဟီၣ်က၀ီၤ(KTLA)အၦၤ၀ံၤမး လဲၤ၀ဲဒၣ်လီၤဘၣ်ဆၣ် ဘၣ်တၢ်ခးသံအီၤအဂ့ၢ်န့ၣ် ခ့ၣ်အဲၣ်ယူၣ်တကပၤ စံး၀ဲန့ၣ်လီၤႉ ခ့ၣ်အဲၣ်ယူၣ် ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤစံး၀ဲလၢ“ကဘၣ်ဖဲ(၁၁း၃၀)န့ၣ်အ၀ဲဒီးအၦၤ၀ံၤဒီးသုးရ့ၣ်(၂၇)ဒီး အၦၤန့ၣ်အ၀ဲသ့ၣ်ကဟဲထီၣ်ဆဲးလီတဲစိ,ပာ်ဖှိၣ်လိာ်သးကအိၣ်သိလ့ၣ်ခံခိၣ်ႉဒီးသံကွၢ်၀ဲဒၣ်ပဒိၣ်ကးလံၣ်လါဖဲဖီၣ်တီၣ်သ၀ီန့ၣ်ႉဒီးပဒိၣ်ကးလံၣ်လါတဲအီၤလၢအဆဲးကျိးဒီး(KTLA)အၦၤလၢအအိၣ်ဖဲန့ၣ်ႉအဃိန့ၣ်တၢ်ဂ့ၢ်ကီတအိၣ်ဘၣ်ဖဲအဟဲတုၤဖဲဖီၣ်တီၣ်သ၀ီဒီးမဲၤ(၄၀)ဘၢၣ်စၢၤအခါန့ၣ်ကီၤလၤဖိအၦၤန့ၣ်ခိးခးလီၤအ၀ဲသ့ၣ်ဘျီဘၣ်ဒီးသံ၀ဲဖဲန့ၣ်လီၤမီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သိလ့ၣ်ခံခိၣ်အံၤပၣ်ဃုာ်၀ဲၦၤသုးဖိအဂၤ(၂၀)ဃၣ်ဃၣ်ဒီး ဒ်တၢ်သိၣ်တၢ်သီအိၣ်အသိးအ၀ဲသ့ၣ်တချုးလဲၤဒံးဘၣ်အခါန့ၣ်ဒုးသ့ၣ်ညါဃာ်၀ဲလံန့ၣ်လီၤႉဘၣ်ဆၣ်လၢတၢ်တပာ်သူၣ်ပာ်သးအပူၤခီဖျိကီၢ်သူလ့ၤသုးမုၢ်ဒိၣ်(KTLA)အိၣ်ခိးခး၀ဲလၢကျဲအဃိ (KNLA)တကပၤဘၣ်ဒိဘၣ်ထံးအါ၀ဲဒၣ်ဒ်အံၤ လီၤ အဂ့ၢ်န့ၣ် ပဒိၣ်စီၤအဲၣ်နၤ စံးအါထီၣ်၀ဲန့ၣ်လီၤႉ (KTLA)သုးခိၣ် စီၤအဲၣ်ကွံ(ကိး)ကီၤလၤဖိအတၢ်ဖံးတၢ်မၤသ့ၣ်တဖၣ်အံၤမ့ၢ်တၢ်က့ၤခီၣ်ဆၢကဒါက့ၤ၀ဲ(ခ့ၣ်အဲၣ်ယူၣ်)ဒီး ကဲထီၣ်စ့ၢ်ကီးတၢ်တံာ်တာ်လၢကညီဒီတကလုာ်အဂီၢ်ဒီးတၢ်ပၢၢ်ဆၢအဂီၢ်အသိးတကးဒံးဘၣ်ကဲထီၣ်စ့ၢ်ကီးတၢ်တိစၢၤမၤစၢၤလၢဒုၣ်ဒါဂီၢ်အဃိကညီဖိလၢအဆီၣ်ထွဲမၤစၢၤဟ့ၣ်ဂံၢ်ဟ့ၣ်ဘါကီၤလၤဖိဒီးအၦၤသ့ၣ်တဖၣ်အံၤ ကြၢးလၢကဘၣ်က့ၤပဲာ်ထံနီၤဖး၀ဲအဂ့ၢ်န့ၣ် ပဒိၣ်စီၤအဲၣ်နၤ စံးအါထီၣ်၀ဲန့ၣ်လီၤႉ ဘၣ်ဃးတၢ်ဂ့ၢ်အံၤပခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ် ဆဲးကျိး၀ဲ(KTLA)သုးရိၣ်မဲခိၣ်ကျၢၢ် သုးခိၣ် စီၤနၢၤဒါမၠးဒီး အ၀ဲက့ၤစံးဆၢကဒါ၀ဲလၢသါတသ့ၣ်ညါတၢ်အိၣ်သးလီၤတံၢ်လီၤဆဲးဒံးဘၣ်အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ (KTLA)သုးခိၣ် စီၤအဲၣ်ကွံ(ကိး)ကီၤလၤဖိတီခိၣ်ရိၣ်မဲအၦမအံၤအိၣ်ဆီလီၤသးဟူးဂဲၤ၀ဲဖဲတနီသရံၣ်ကီၢ်ခီဒိၣ် ဘျံးဒ၀ဲၢ်–ထံခံကျဲအံၤဒီး အ၀ဲသ့ၣ်ကရူၢ်အံၤတၢ်ဒုးကဲထီၣ်၀ဲဒီး(KNLA)အၦၤအိၣ်၀ဲတလီၢ်လီၢ်န့ၣ်လီၤႉ လၢန့ၣ်အမဲာ်ညါခီဖျိသုးခိၣ်ကီၤလၤဖိအၦၤအံၤအိၣ်ခိးသမံသမိးကမျၢၢ်သိလ့ၣ်လၢကျဲပူၤႇခးပျံၤ၀ဲ(ခ့ၣ်အဲၣ်ယူၣ်)၀ဲၤကျိၤသိလ့ၣ်အဃိဖဲလါယူၤလံ ၁၅...
ပယီၤသုးဖီၣ်ကိးသူ၀ဲကမျၢၢ်(၁၅)ဂၤဒ်တၢ်ဒီသဒၢစုက၀ဲၤအသိးဒီးတုၤလၢခဲအံၤတပျၢ်လီၤ၀ဲဒံးဘၣ်
လါယူၤလံ ၂၁ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲအပူၤကွံာ်လါယူၤလံ ၁၄ သီအခါ ပယီၤသုးကျိၤလၢအနုာ်လီၤလၢကညီကီၢ်စဲၣ် နိၣ်တကီကီၢ်ဆၣ်ပူၤတဖၣ်အံၤဒီး ကညီဒီကလု၁်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤတၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်ဒီး ဖဲန့ၣ်ပယီၤသုးတဖၣ်အံၤ ဖီၣ်ကိးသူ၀ဲကမျၢၢ်တဖၣ်ဒ်တၢ်ဒီသဒၢစုက၀ဲၤတခါအသိးအဂ့ၢ်န့ၣ် သ့ၣ်ညါဘၣ်လၢၦၤဟဲက့ၤစံၣ်ဖျိးထီၣ်တဖၣ်အအိၣ် န့ၣ်လီၤႉ ဖဲလါယူၤလံ ၁၄ သီအခါ ကမျၢၢ်သိလ့ၣ်တခိၣ်အပူၤလၢအပၣ်၀ဲဒီးပိာ်မုၣ်ပိာ်ခွါခဲလၢာ်(၁၉)ဂၤအံၤ အ၀ဲသ့ၣ်အိၣ်လၢ တလၢၤကီၢ်စဲၣ် ကက့ၤထီၣ်ဆူကညီကီၢ်စဲၣ်(ပလ့ၤ)သ၀ီဒီး ဖဲအ၀ဲသ့ၣ်က့ၤလၢကျဲအခါပယီၤသုးလၢအိၣ်ခိးတၢ် သ့ၣ်တဖၣ်အံၤခးသံကွံာ်၀ဲၦၤပိာ်ခွါ(၂)ဂၤလၢသိလ့ၣ်ပူၤ၀ံၤႇမ့မ့ၢ်ၦၤလၢအဂၤသ့ၣ်တဖၣ်ခီန့ၣ်ပယီၤသုးဖီၣ်က့ၤကိးသူ၀ဲဒ်တၢ်ဒီသဒၢစုက၀ဲၤတခါအသိးန့ၣ်လီၤႉတကးဒံးဘၣ်အမဲာ်ညါဖီၣ်ဃုာ်စ့ၢ်ကီးကမျၢၢ်မၤအီၣ်ကျီး(၄)ဂၤဒီးတုၤလၢခဲအံၤတၢ်တပျၢ်လီၤ၀ဲဒံးဘၣ်အဂ့ၢ်န့ၣ် ကမျၢၢ်လၢအဟဲက့ၤစံၣ်ဖျိးထီၣ်တဂၤ စံး၀ဲန့ၣ်လီၤႉ အ၀ဲစံး၀ဲလၢ“မ့မ့ၢ်ၦၤ(၄)ဂၤန့ၣ်ဘၣ်လၢအ၀ဲသ့ၣ်က့ၤကွၢ်ကျီၢ်လၢကျီးအခါပယီၤသုးဖီၣ်အ၀ဲသ့ၣ်ႉၦၤပိာ်မုၣ်တဂၤန့ၣ် အဟၢဖၢန့ၣ်ကျိလီၢ်အိၣ်မီၤနီၤႉအ၀ဲသ့ၣ်ခီန့ၣ်အါလၢၦၤညါၦၢ်လီၤႉ ပယီၤသုးဖီၣ်ၦၤခဲလၢာ်ကအိၣ်(၁၅)ဂၤညါႇအကျါန့ၣ်ပၣ်ဃုာ်ၦၤပိာ်မုၣ်(၄)ဂၤမီၤနီၤႉဟုသးလၢအိၣ်ဒဲပူၤတဖၣ်န့ၣ်နါက့ပယီၤသုးဟံဃုာ်၀ဲႉအိၣ်တကဲလၢၤဘၣ်အဃိပစံၣ်ဖျိးထီၣ်၀ဲဒၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါယူၤလံ ၂၀ သီအနံၤန့ၣ်လီၤႉ ပယီၤသုးသ့ၣ်တဖၣ်အံၤခီဖျိတၢ်ဖီခိၣ်တၢ်ကလုၢ်လီၤလၢကဘၣ်လဲၤပာ်ဖှိၣ်ထီၣ်သးဒီးပယီၤသုးႇသုးခိးကီၢ်ဆၢ(BGF) လၢအအိၣ်တကူၣ်တၢၣ်ပၢၤကီၢ်၀ဲၤလီၢ်အံၤအဃိပယီၤသုးတဖၣ်အံၤဒ်သိးအ၀ဲသ့ၣ်နုာ်လီၤလၢသုးကလၢၤပူၤကန့ၢ်အဂီၢ် ဖီၣ်ကိးသူ၀ဲကမျၢၢ်ဒ်တၢ်ဒီသဒၢစုက၀ဲၤအသိးလီၤအဂ့ၢ်န့ၣ် ၦၤဟဲက့ၤထူၣ်ဖျဲးထီၣ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ခီဖျိပယီၤသုးတဖၣ်အံၤအိၣ်ဆီလီၤသးလၢကညီကီၢ်စဲၣ် ကစၢၢ်သူခီၣ်ထံး ပလ့ၤသ၀ီကပၤအဃိ လီၢ်က၀ီၤသ၀ီဖိတဖၣ်အံၤ ဘၣ်ပာ်တ့ၢ်ကွံာ်အဟံၣ်အဃီအတၢ်ဖံးတၢ်မၤဒီး ချၢၣ်ႇတကူၣ်တၢၣ်ႇပလ့ၤႇနီဒ့ၣ်ဃုာ်ဒီးသ၀ီလၢအဂၤ ပာ်ဖှိၣ်ခဲလၢာ် သ၀ီ(၇)ဖျၢၣ် ကမျၢၢ်အဂၤ(၃၀၀၀)ဘျဲၣ်ဘၣ်ဃ့ၢ်ထီၣ်၀ဲတုၤလၢခဲအံၤတစုန့ၣ်လီၤႉ
တလၢၤကီၢ်စဲၣ်ပူၤ ခီဖျိတၢ်စူၤထံဒိၣ်ထီၣ်အဃိ ၦၤဖိသၣ်သံ ၃ ဂၤ
လါယူၤလံ ၂၁ သီႇ ၂၀၂၃ နံၣ်ႇ ခ့ၣ်အဲးစံၣ် စးထီၣ်ဖဲတလါအံၤလါယူၤလံ ၁၈ သီအနံၤန့ၣ် လၢတလၢၤကီၢ်စဲၣ် မီၣ်လမၠဲၣ်၀့ၢ်ပူၤ ခီဖျိတၢ်စူၤတပယူာ်ဃီဒီး ထံဒိၣ်ထီၣ်လၢက၀ီၤဒ့တဖၣ်အပူၤအဃိ ၦၤဖိသၣ်သံ၀ဲ ၃ ဂၤအဂ့ၢ်န့ၣ် မီၣ်လမၠဲၣ်၀့ၢ် သံၤရံၣ်မၠဲၤက၀ီၤဒ့ဖိတဂၤ စံး၀ဲန့ၣ်လီၤႉ ခီဖျိတၢ်စူၤထံဒိၣ်ထီၣ်လၢစ့ၤယၤမၠဲၤက၀ီၤဒ့ႇသံၤရံၣ်မၠဲၤႇစွ့ၤပၠံၤအ့ႇပကိခၠီႇၦၤကညီကၠိႇစ့ကၠိၤႇစၤယ့ကၠံကိက၀ီၤဒ့(၇)ဘ့ၣ်အံၤအပူၤအဃိ သံၤရံၣ်မၠဲၤက၀ီၤဒ့(၉)ကျဲန့ၣ် ၦၤဖိသၣ်ပိာ်ခွါ(၁၃)နံၣ် ၂ ဂၤ လီၤအုးသံ၀ဲလၢထံဒီး မ့မ့ၢ်လၢသံၤရံၣ်မ့ၤကလၤ က၀ီၤဒ့ပူၤခီန့ၣ် ဖိသၣ်ပိာ်မုၣ်ဖိတနံၣ်တဂၤစ့ၢ်ကီးလီၤတဲာ်လၢဟံၣ်ပူၤလီၤအုးသံ၀ဲအဂ့ၢ်န့ၣ် သံၤရံၣ်မၠဲၤလီၢ်က၀ီၤကမျၢၢ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ထံဒိၣ်ထီၣ်လၢက၀ီၤဒ့ပူၤ(၇)ဘ့ၣ်ပူၤႉလၢသံၤရံၣ်မ့ၤကလၤန့ၣ်ဖဲဂီၤခီန့ၣ်လၢၦၤဖိသၣ်ကအိၣ်တနံၣ်တဂၤလီၤတဲာ်လၢဟံၣ်ပူၤလီၤအုးသံထံမီၤနီၤႉဟါခီခီန့ၣ်လၢတၢ်ဆၢလာ်ၦၤဖိသၣ်(၂)ဂၤဖဲအ၀ဲသ့ၣ်ဂဲၤလိာ်ကွဲထံအခါလီၤအုးသံလၢထံစ့ၢ်လီၤႉအ၀ဲသ့ၣ်ခံဂၤလၢာ်န့ၣ်ကအိၣ်(၁၃)နံၣ်ဒံးလီၤႉထံထီၣ်တုၤလၢဃီသွါခံသွါညါႉတဂီၤညါအံၤမူခိၣ်တစူၤလၢၤဘၣ်ထံလီၤကဒါလံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါယူၤလံ ၂၀ သီအနံၤန့ၣ်လီၤႉ ဒ်န့ၣ်အသိးမီၣ်လမၠဲၣ်၀့ၢ်ပူၤတကးဒံးဘၣ်အမဲာ်ညါလၢသရိာ်၀ါဒီး၀ီၢ်ရ့ၣ်ကီၢ်ဆၣ်တဖၣ်အပူၤစ့ၢ်ကီး တၢ်စူၤထံဒိၣ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ ခီဖျိတၢ်စူၤထံဒိၣ်ထီၣ်အဃိ(လူမှုကယ်ဆယ်ရေး)ကရူၢ်ဟးနီၤလီၤမ့ၤဘိၣ်လၢဟံၣ်လၢအလီၤဘျၢသ့ၣ်တဖၣ်န့ၣ်ဒီး က၀ီၤဒ့ပူၤကမျၢၢ်တဖၣ်ဘၣ်သုးလီၢ်သုးကျဲလၢတၢ်လီၢ်အဂၤအဂ့ၢ်န့ၣ် (လူမှုကယ်ဆယ်ရေး)ကရူၢ် ၦၤဘၣ်မူဘၣ်ဒါတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးလၢကညီကီၢ်စဲၣ် နိၣ်တကီကီၢ်ဆၣ် ၀ီၢ်ရီဟီၣ်က၀ီၤန့ၣ်စ့ၢ်ကီး ခီဖျိတၢ်စူၤတပယူာ််ဃီဒီးထံကစၢၢ်လီၤအဃိ ၦၤဖိသၣ်(၃)နံၣ်လီၤအုးသံလၢထံ ၁ ဂၤ စ့ၢ်ကီးန့ၣ်လီၤႉ ခီဖျိထံဒိၣ်ထီၣ်အဃိတလၢၤကီၢ်စဲၣ်က၀ီၤဒ့ဒူသ၀ီတဖၣ်အပူၤဟံၣ်လီၤဘျၢလၢထံကျါကအိၣ်အဖျၢၣ်(၅၀၀)ဃၣ်ဃၣ်ညါဒီး တကီၢ်ခါခဲအံၤဘၣ်အိၣ်ခိးကွၢ်ထံကက့ၤလီၤကဒါတၢ်အိၣ်သးအဂ့ၢ်န့ၣ် သ့ၣ်ညါဘၣ်လၢ(လူမှုကယ်ဆယ်ရေး)ကရူၢ်အအိၣ်န့ၣ်လီၤႉ