ခီဖျိတၢ်ဒုးကဲထီၣ်လၢတနီသရံၣ်ကီၢ်ဆၣ်ပူၤကိးမုၢ်နံၤဒဲးအဃိ ၦၤဃ့ၢ်မှံဟးဖျိးနီၣ်ဂံၢ်ဟဲအါထီၣ်
လါယူၤလံ ၂၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် တနီသရံၣ်ကီၢ်ဆၣ်အပူၤ ခီဖျိတၢ်ဒုးကဲထီၣ်၀ဲလၢပယီၤသုးဒီးဟီၣ်က၀ီၤတၢ်ဒီသဒၢကမျၢၢ်သုး အဘၢၣ်စၢၤကိးမုၢ်နံၤဒဲးအဃိ ၦၤဃ့ၢ်မှံဟးဖျိးနီၣ်ဂံၢ်ဟဲအါထီၣ်၀ဲအဂ့ၢ်န့ၣ် ၦၤလၢအမၤစၢၤၦၤဃ့ၢ်မှံဟးဖျိးဘူးဘူးတံၢ်တံၢ် တဖၣ် စံး၀ဲန့ၣ်လီၤႉ စးထီၣ်ဖဲတလါအံၤလါယူၤလံ ၁၅ သီအနံၤန့ၣ် ပယီၤသုးကျိၤနုာ်လီၤလၢတနီသရံၣ်ကီၢ်ဆၣ်ပူၤအနီၣ်ဂံၢ်ကအိၣ်လၢ(၁၅၀) ဃၣ်ဃၣ်ညါဒီးခီဖျိအ၀ဲသ့ၣ်ဆီလီၤကျိဖးဒိၣ်လၢသ၀ီပူၤခးတပျုာ်တပျီာ်တၢ်အဃိတၢ်ခးလိာ်သးကဲထီၣ်၀ဲဒီးဟီၣ်က၀ီၤတၢ်ဒီသဒၢကမျၢၢ်သုးအဃိလီၢ်က၀ီၤကမျၢၢ်ဘၣ်ဃ့ၢ်မှံဟးဖျိး၀ဲအဂ့ၢ်န့ၣ် ၦၤလၢအမၤစၢၤၦၤဃ့ၢ်မှံဟးဖျိးဘူးဘူးတံၢ်တံၢ်တဂၤ စံး၀ဲအံၤန့ၣ်လီၤႉ အ၀ဲစံး၀ဲလၢ“စှၤသီအတီၢ်ပူၤအံၤတၢ်ဒုးဆူၣ်ထီၣ်မီၤနီၤႉအဃိဖဲကီၢ်ဆၣ်ပူၤအံၤသ၀ီ(၅)ဖျၢၣ်ဒီးသ၀ီလၢအိၣ်ဘူးဖဲတၢ်ခိၣ်တၢ်ဃၢၤဖဲအံၤတဖၣ်အါဒၣ်တက့ၢ်န့ၣ်ဃ့ၢ်ထီၣ်မီၤနီၤႉနမ့ကဟဲက့ၤအိၣ်လၢသ၀ီပူၤလံန့ၣ်အ၀ဲသ့ၣ်မၤအါထီၣ်သုးဂံၢ်ဘါတပယူာ်ဃီအဃိက့ၤအိၣ်တဘၣ်ဂီၢ်ဘၣ်ႉအဃိၦၤကမျၢၢ်လၢအဃ့ၢ်တၢ်ဒုးတဖၣ်တနီၤန့ၣ်အ၀ဲသ့ၣ်တ့ထီၣ်ဒဲအိၣ်၀ဲဒၣ်လၢကျီးပူၤဒ်န့ၣ်လီၤႉတၢ်လီၢ်လၢပဖီၣ်တတုၤဘၣ်ညါန့ၣ်ကီခဲ၀ဲတစဲးမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ လၢန့ၣ်အမဲာ်ညါစးထီၣ်လါယူၤလံ ၁၅ သီတုၤလၢ ၁၈ သီ လၢသၢသီအတီၢ်ပူၤ တၢ်ဒုးကဲထီၣ်ကအိၣ်လၢအဘျီ(၁၀) ဃၣ်ဃၣ်ညါဒီးခီဖျိတၢ်ဒုးတၢ်ယၤအံၤအဃိ သ့ခိၤႇသဲဖၠူၤဒီးခၠီနပီၣ်သ၀ီဃုာ်ဒီးဒူသ၀ီလၢအိၣ်ဘူးတၢ်ခိၣ်တၢ်ဃၢၤဖဲန့ၣ် သ၀ီ(၅)ဖျၢၣ်ကမျၢၢ်အဂၤ(၁၀၀၀)ဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ ပယီၤသုးနုာ်လီၤလၢဟီၣ်က၀ီၤဖဲန့ၣ်အပူၤတပယူာ်ဃီအံၤခီဖျိလၢအ၀ဲသ့ၣ်လုၢ်ဘၢဒိၣ်စိ၀ဲဟီၣ်က၀ီၤတန့ၢ်အါအါလၢၤဘၣ်အဃိမၤ၀ဲဒ်သိးအ၀ဲသ့ၣ်သုးကျိၤနုာ်လီၤ၀ဲန့ၢ်ဒံးအဂ့ၢ်န့ၣ် ဟီၣ်က၀ီၤတၢ်ဒီသဒၢကမျၢၢ်သုးတဂၤ စံး၀ဲဒ်အံၤန့ၣ် လီၤႉ အ၀ဲစံး၀ဲလၢ“ပယီၤသုးကျိၤနုာ်လီၤတပယူာ်ဃီဒ်အံၤန့ၣ်မ့ၢ်လၢအ၀ဲသ့ၣ်ဒိၣ်စိ၀ဲဟီၣ်က၀ီၤတန့ၢ်အါအါလၢၤဘၣ်မီၤနီၤႉမ့ၢ်လၢအ၀ဲသ့ၣ်ဒိၣ်စိဟီၣ်က၀ီၤတန့ၢ်လၢၤဘၣ်အဃိအ၀ဲသ့ၣ်မၤ၀ဲဒ်သိးၦၤကထံၣ်လၢအ၀ဲသ့ၣ်သုးကျိၤနုာ်န့ၢ်ဒံးဒ်န့ၣ်လီၤႉအ၀ဲသ့ၣ်န့ၣ်လီၢ်ခံအံၤကီၢ်ဆၣ်မးအ၀ဲသ့ၣ်လုၢ်ဘၢဒိၣ်စိ၀ဲတန့ၢ်လၢၤဘၣ်ႉအဃိအ၀ဲသ့ၣ်သုးကျိၤနုာ်လီၤမၤအါထီၣ်၀ဲဒုးယၤတၢ်ဟူးတၢ်ဂဲၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢတနီသရံၣ်ကီၢ်ဆၣ်အပူၤခီဖျိတၢ်ဒုးကဲထီၣ်တလီၢ်လီၢ်အဃိလီၢ်က၀ီၤကမျၢၢ်တဖၣ်ဘၣ်ဃ့ၢ်မှံဟးဖျိး၀ဲဒီး ဒုးယၤတၢ်ဖ့ၣ်စၢအိၣ်၀ဲဘၣ်ဆၣ်လၢကျဲတၢ်ဘံၣ်တၢ်ဘၢတၢ်အိၣ်သးအံၤအဃိဘၣ်တၢ်ပံးဃာ်၀ဲထိၤခၤ–မီတီၤကျဲ အံၤဒီး ဖဲမဟါလါယူၤလံ ၂၀ သီအနံၤန့ၣ် တၢ်က့ၤအိးထီၣ်ကဒါ၀ဲကျဲအံၤလံအဂ့ၢ်န့ၣ် တၢ်ကစီၣ်သန့ပာ်ဖျါ၀ဲအသိး သ့ၣ်ညါဘၣ် န့ၣ်လီၤႉ
တၢ်ဒုးကဲထီၣ်လၢကီးတရံး၀့ၢ်ဃၢၤအခါ ကမျၢၢ်ဘၣ်ဒိ(၅)ဂၤဒီးဟံၣ်ဃီတၢ်သူၣ်ထီၣ်ဟးဂီၤတနီၤ
လါယူၤလံ ၂၀ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲမဟါလါယူၤလံ ၁၉ သီ ဂီၤခီအဆၢကတီၢ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် နုာ်လီၤခး၀ဲ ပယီၤသုးကလၢၤလၢအိၣ်ကီးတရံးဃၢၤတဖၣ်အံၤဒီးခီဖျိပယီၤသုးက့ၤခးလီၤကဒါကျိဖးဒိၣ်ဆူက၀ီၤဒ့ပူၤအဃိ ကမျၢၢ်ဘၣ်ဒိ(၅)ဂၤဒီးဟံၣ်ဃီတၢ်သူၣ်ထီၣ်ဟးဂီၤ၀ဲတနီၤအဂ့ၢ်န့ၣ် ကမျၢၢ်လၢအိၣ်(ကီးတရံး၀့ၢ်)တတါအူက၀ီၤဒ့ပူၤ တဂၤ စံး၀ဲန့ၣ်လီၤႉ စးထီၣ်လၢပယီၤသုးတဲပျံၤကီးတရံး၀့ၢ်ဃၢၤက၀ီၤဒ့ပူၤကမျၢၢ်တဖၣ်လၢဘၣ်ဃး(KNLA)သုးပာ်ဖှိၣ်အတၢ်ဟူးတၢ်ဂဲၤတဖၣ်န့ၣ်ၦၤကဘၣ်ဟ့ၣ်အ၀ဲသ့ၣ်တၢ်ကစီၣ်ဒီးၦၤမ့တဟ့ၣ်အ၀ဲသ့ၣ်တၢ်ကစီၣ်ဘၣ်န့ၣ်တဲ၀ဲလၢကခးလီၤကျိဖးဒိၣ်န့ၣ်လီၤႉ စးထီၣ်ဖဲန့ၣ်၀ံၤလီၢ်ခံတၢ်ဒုးကဲထီၣ်ဖဲမဟါအခါ ခီဖျိအ၀ဲသ့ၣ်ခးလီၤကျိဖးဒိၣ်နီၢ်ကီၢ်အဃိ တၢ်ဘၣ်ဒိဘၣ်ထံး တၢ်ဟးဂူာ်ဟးဂီၤဘၣ်ဟဲကဲထီၣ်သးဒ်အံၤလီၤအဂ့ၢ်န့ၣ် ကမျၢၢ်လၢအိၣ်က၀ီၤဒ့ပူၤတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပယီၤသုး(၉၇)တဲဘၣ်က၀ီၤဒ့ပၢပြးသးၦၢ်တဖၣ်လၢၦၤ(PDF)ႇကညီတၢ်ပၢၢ်ဆၢသုးမ့ဟဲနုာ်လီၤလၢသုးက၀ီၤဒ့ပူၤန့ၣ်မၢၦၤတဲဘၣ်အ၀ဲသ့ၣ်မီၤနီၤႉၦၤမ့တဟ့ၣ်အ၀ဲသ့ၣ်တၢ်ကစီၣ်ဘၣ်န့ၣ်သါမ့ခးလီၤကျိဖးဒိၣ်န့ၣ်အ၀ဲသ့ၣ်တဟံမူဒါဘၣ်ဒ်န့ၣ်မီၤနီၤႉခဲအံၤတၢ်ဒုးကဲထီၣ်ဘျီပယီၤသုးခးလီၤကျိဖးဒိၣ်လၢက၀ီၤဒ့ပူၤၦၤဟံၣ်ၦၤဃီဟးဂီၤႉၦၤဘၣ်ဒိဘၣ်ထံးစ့ၢ်ကီးအိၣ်လီၤႉလီလီစဲၤခဲအံၤပသ့ၣ်ညါလၢၦၤဘၣ်ဒိတဖၣ်န့ၣ်မ့ၢ်၀ဲတတါအူက၀ီၤဒ့သရၣ်မုၣ်တဂၤႇၦၤမၤတၢ်မၤဖိတဂၤႇပှၤပာ်တၢ်ဖိတၢ်လံၤလီၢ်န့ၣ်တဂၤႇနါကီၤတိသ၀ီတကပၤန့ၣ်(၂)ဂၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ဖဲမဟါလါယူၤလံ ၁၉ သီအနံၤစ့ၢ်ကီး တၢ်ဒုးကဲထီၣ်ဒံး၀ဲလၢပယီၤသုးအိၣ်ဆီလီၤသးဖဲမၠၣ်၀တံၣ်အ့ရှါကျဲကပၤ ကီးနွဲၣ်သ၀ီဒီးကီးတရံးကလံၤစိးတတါအူက၀ီၤဒ့ႇခန့မူၤက၀ီၤဒ့ဒီးနါကီၤတိသ၀ီပူၤတဖၣ်အံၤဒီး(KNLA)သုးပာ်ဖှိၣ် အဘၢၣ်စၢၤဒံးဒီးတၢ်ဒုးဘျီ၀ဲအံၤအပူၤပယီၤသုးသံတၢ်ဘၣ်ဒိဘၣ်ထံးအိၣ်၀ဲအဂ့ၢ်န့ၣ် ကီးတရံးကမျၢၢ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ တၢ်ခးလိာ်သးကဲထီၣ်ဖဲန့ၣ်၀ံၤလီၢ်ခံတုၤလၢတနံၤအံၤလါယူၤလံ ၂၀ သီန့ၣ် ခံခီခံကပၤအဘၢၣ်စၢၤဒုးယၤတၢ်ဖ့ၣ်စၢ ဆဲးကဲထီၣ်ဒံး၀ဲအသိးသိလ့ၣ်တီၣ်ပနံာ်တၢ်ဖိတၢ်လံၤဒီးသိလ့ၣ်တီၣ်ဆှၢၦၤလဲၤက့ၤတၢ်ဖိလၢအလ့ၢ်ထီၣ်လ့ၢ်လိၤဖဲကြုၢ်တုႇကီးတရံးႇမၠၣ်၀တံၣ်အ့ရှါကျဲမုၢ်ဒီတကျိၤအံၤတဖၣ်အ၀ဲသ့ၣ်ဘၣ်လဲၤတခီခီကနၣ်တၢ်အိၣ်သးတခီခီအဂ့ၢ်န့ၣ် ၦၤနီပနံာ်သိလ့ၣ်ဖိတဖၣ်စံး၀ဲန့ၣ်လီၤႉ “ဖဲမဟါန့ၣ်တၢ်ခးလိာ်သးကဲထီၣ်လၢကီးတရံးတကပၤန့ၣ်ဒီတနံၤကျၢၤလီၤႉအဃိဘၣ်လဲၤတခီခီဘၣ်ကနၣ်ကျိသီၣ်တခီခီတုၤဃီၤမၢၤလၢကြုၢ်တုအံၤမီၤနီၤႉပနံာ်သိလ့ၣ်လၢအိၣ်မၠၣ်၀တံၣ်တဖၣ်န့ၣ်ဟဲလီၤတအိၣ်အါအါဘၣ်ႉ ၦၤဟးထီၣ်က့ၤလီၤန့ၣ်အိၣ်ထဲသိလ့ၣ်ယီၢ်(ဆဲးကဲး)ဒီးကမျၢၢ်အသိလ့ၣ်ဒ်န့ၣ်လီၤ”အဂ့ၢ်န့ၣ် စံး၀ဲန့ၣ်လီၤႉ တုၤလၢတလါအံၤလါယူၤလံကတၢၢ်တနွံန့ၣ် လၢကညီကီၢ်စဲၣ် မၠၣ်၀တံၣ်ႇဂီၤလ့ၤႇကီးတရံးႇကြုၢ်တုႇနိၣ်တကီႇ သၣ်တီၣ်ဒီးဖၣ်ပူၣ်ဟီၣ်က၀ီၤတကပၤန့ၣ်စ့ၢ်ကီးတၢ်ဒုးကဲထီၣ်၀ဲကိးမုၢ်နံၤဒဲးဒီး ပယီၤသုးခးလီၤကျိဖးဒိၣ်ႇ ကဘီယူၤစ့ၢ်ကီးဟဲဆှၣ်တၢ်တပယူာ်ဃီအဂ့ၢ်န့ၣ် (KNLA)ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤႉ
ဒ်သိးတၢ်ကပတု၁်ကွံာ်တၢ်ခးလီၤကျိဖးဒိၣ်ဆူသ၀ီပူၤအဂီၢ်(စွ့ၣ်ကၠ့ၣ်)ကမျၢၢ်ပ၁်ဖျါထီၣ်တၢ်ဘၣ်သး
လါယူၤလံ ၂၀ သီႇ ၂၀၂၃ နံၣ်ႇ ခ့ၣ်အဲးစံၣ် ဒ်သိးတၢ်ကပတုာ်ကွံာ်တၢ်ခးလီၤကျိဖးဒိၣ်ဆူဒူသ၀ီပူၤအဂီၢ်န့ၣ် ဖဲမဟါလါယူၤလံ ၁၉ သီအနံၤန့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ် စွ့ၣ်ကၠ့ၣ်(ဆီထံး)ကီၢ်ဆၣ်ပူၤကမျၢၢ်တဖၣ် မၤ၀ဲတၢ်ပာ်ဖျါထီၣ်တၢ်ဘၣ်သးအဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်မုာ်တၢ်ခုၣ်ကအိၣ်လၢဟီၣ်က၀ီၤပူၤဒီးခိၣ်နၢ်လၢတၢ်ဖီၣ်ဃာ်၀ဲသ့ၣ်တဖၣ်အံၤတၢ်ကပျၢ်လီၤက့ၤ၀ဲအဂီၢ်န့ၣ် လီၢ်က၀ီၤကမျၢၢ်တဖၣ်ပာ်ဖျါထီၣ်အတၢ်ဘၣ်သးဃ့ထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်လၢအပၣ်ဃုာ်လၢ တၢ်ပာ်ဖျါထီၣ်သးအကျါတဂၤ စံး၀ဒ်အံၤန့ၣ်လီၤႉ အ၀ဲစံး၀ဲလၢ“ခဲအံၤဖဲဟီၣ်က၀ီၤပူၤအံၤကွၢ်လၢအ၀ဲသ့ၣ်အဲၣ်ဒိးခးလီၤကျိဖးဒိၣ်န့ၣ်ခးလီၤ၀ဲလီၤႉ ဆၢကတီၢ်ခဲအံၤဘၣ်ဖဲ ၦၤကမျၢၢ်တဖၣ်နါက့ဘၣ်သူၣ်ဘုမီၤနီၤႉဘၣ်ဆၣ်အ၀ဲသ့ၣ်မ့ခးလီၤကျိဖးဒိၣ်န့ၣ်ပဘၣ်စံၣ်လီၤႉမ့၀ံၤခဲအံၤလၢလီၢ်က၀ီၤပူၤအံၤအ၀ဲသ့ၣ်တပျဲၦၤစိာ်ဟုသးႇတၢ်အီၣ်တၢ်အီတဖၣ်ဘၣ်ႉအ၀ဲသ့ၣ်ဟံကွံာ်၀ဲနါက့အိၣ်မီၤနီၤႉအဃိကမျၢၢ်တဖၣ်တၢ်ကီတၢ်ခဲအိၣ်ထီၣ်လီၤႉအဃိအ၀ဲသ့ၣ်သုတမၤလၢၤဒ်အံၤတဂ့ၤအဂီၢ်ပ၀ဲ(စွ့ၣ်ကၠ့ၣ်)ကမျၢၢ်တဖၣ်ပဘၣ်ပာ်ဖျါထီၣ်တၢ်ဘၣ်သးဒ်အံၤလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤ ႉ တၢ်ပာ်ဖျါထီၣ်တၢ်ဘၣ်သးဘျီ၀ဲအံၤအပူၤကမျၢၢ်တဖၣ်ကိးသတြီဃ့ထီၣ်၀ဲတၢ်ဂ့ၢ်အခိၣ်သ့ၣ်တဖၣ်လၢအမ့ၢ် ပာ်ပနီၣ်တၢ်လီၢ်လၢအပူၤဖျဲးဒီးတၢ်ဒုးတၢ်ယၤလၢကမျၢၢ်ထံဖိကီၢ်ဖိအဂီၢ်ႇပတုာ်ကွံာ်တၢ်ပညိၣ်ခးလီၤကျိဖးဒိၣ်ဆူသ၀ီပူၤဒီး ပတုာ်ကွံာ်တၢ်မၤတံာ်တာ်ကမျၢၢ်လၢအဟးထီၣ်က့ၤလီၤသ့ၣ်တဖၣ်အံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါစွ့ၣ်ကၠ့ၣ်(ဆီထံး)ကမျၢၢ်အဂၤ ၂၀၀ ဘျဲၣ် ဟဲပာ်ဖှိၣ်ပာ်ဖျါထီၣ်အတၢ်ဘၣ်သးလၢဘျီ၀ဲအံၤဒီး အ၀ဲသ့ၣ်ကိးသတြီဃ့ထီၣ်၀ဲထူးသံကွံာ်သုးမီၤစိရိၤသနူႇထူးသံကွံာ်(၂၀၀၈)တၢ်ဘျၢသဲစးႇဖဲၣ်ဒရၢၣ်တၢ်ဘျၢသဲစးတၢ်လဲၤထီၣ်လဲၤထီႇတၢ်သူၣ်ထီၣ်ကမျၢၢ်ဒိၣ်စိသနူတၢ်ဂ့ၢ်သ့ၣ်တဖၣ်အံၤအ၀ဲသ့ၣ်ဃ့ထီၣ်၀ဲဒၣ်အဂ့ၢ်န့ၣ် သ့ၣ်ညါဘၣ်လၢ လီၢ်က၀ီၤကမျၢၢ်လၢအပၣ်ဃုာ်လၢတၢ်ပာ်ဖျါထီၣ်သးအပူၤတဖၣ်အအိၣ်န့ၣ်လီၤႉ “ခဲအံၤဖိဒံဖိသၣ်တဖၣ်တထီၣ်ဘၣ်ကၠိဘျ့ဘျ့ဆှီဆှီဘၣ်ႉတၢ်ဒုးတၢ်ယၤအဃိကၠိဘၣ်ပံးႉၦၤလၢအကျိၣ်အိၣ်စ့အိၣ်ညါ အ၀ဲသ့ၣ်လဲၤပာ်အဒံၣ်အဖိကၠိလၢ၀့ၢ်ပူၤဘၣ်ဆၣ်တနီၤန့ၣ်အ၀ဲသ့ၣ်တၢ်တအိၣ်တယၢၤဘၣ်အဃိဆှၢအဒံၣ်အဖိလၢကၠိတန့ၢ်ဘၣ်မီၤနီၤႉဖိသၣ်စ့ၢ်ကီးတၢ်ကီတၢ်ခဲဘၣ်၀ဲ”အဂ့ၢ်န့ၣ် လီၢ်က၀ီၤကမျၢၢ်ပိာ်ခွါတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤ ႉ ဒ်န့ၣ်သအိးဖဲအပူၤကွံာ်တလါအံၤလါယူၤလံ ၁၆ သီ လၢအလီၤဘၣ်၀ဲ(၇၆)၀ီတ၀ီ ကညီဒီကလုာ်ဂၢၤသးကရၢ(KNDO) မုၢ်နံၤအခါန့ၣ်စ့ၢ်ကီး ဟီၣ်က၀ီၤဖဲန့ၣ်အပူၤကညီဒူဖိသ၀ီဖိတဖၣ်ပာ်ဖျါထီၣ်အ၀ဲသ့ၣ်တၢ်ဘၣ်သးဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
စ့ပယီၤအၦ့ၤလီၤတပယူ၁်ဃီႇ စ့ပယီၤတပီၢ်န့ၣ်အၦ့ၤကအိၣ်တ့ၢ်တုၤလၢစ့ယိၤတဘးသ့၀ဲ
လါယူၤလံ ၂၀ သီႇ ၂၀၂၃ နံၣ်ႇ ခ့ၣ်အဲးစံၣ် ကီၢ်ကၠီၣ်တဲၣ်–ကီၢ်ပယီၤကီၢ်ဆၢ မၠၣ်၀တံၣ်၀့ၢ်ပူၤ ကိးမုၢ်နံၤဒဲးခီဖျိကီၢ်ပယီၤစ့ခီလဲအၦ့ၤလီၤတပယူာ်ဃီအဃိ စ့ပယီၤတပီၢ်န့ၣ်အၦ့ၤကအိၣ်တ့ၢ်တုၤလၢစ့ယိၤတဘးခိၣ်ဃၢၤသ့၀ဲအဂ့ၢ်န့ၣ် ကမျၢၢ်လၢအိၣ်မၠၣ်၀တံၣ်၀့ၢ်ပူၤတဖၣ် စံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤသီသီဆၢကတီၢ်အခါန့ၣ်စ့ပယီၤတကလီၢ်န့ၣ်အၦ့ၤအိၣ်လၢစ့ယိၤ(၁၅၀၀)ကၠးဒီး ဘၣ်ဆၣ်သုးဟံးန့ၢ်တၢ်စိတၢ်ကမီၤ၀ံၤ(၂)နံၣ်ဘျဲၣ်အတီၢ်ပူၤ စ့ပယီၤတကလီၢ်န့ၣ်အၦ့ၤလီၤတုၤလၢစ့ယိၤ(၁၁၁၅)ဘး အဂ့ၢ်န့ၣ် မၠၣ်၀တံၣ်လီၢ်က၀ီၤကမျၢၢ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ခဲအံၤစ့ယိၤတကလီၢ်န့ၣ်န့ၢ်က့ၤလၢစ့ယိၤ(၁၂၀၀)ဘျဲၣ်လီၤမီၤနီၤႉမ့လဲၤသးဒ်အံၤဒုစ့ပယီၤတပီၢ်န့ၣ်အၦ့ၤ ကအိၣ်တ့ၢ်က့ၤလၢစ့ယိၤတဘးညါလီၤႉဘၣ်ဃးထံဂုၤကီၢ်ဂၤစ့ဒီၣ်လၣ်အံၤ(အမဲရံၣ်ကၤ)ဟံးဂ့ၢ်၀ီ၀ဲသုးမီၤစိရိၤအစ့တၢးခံခါ၀ံၤႇတနံၤဘၣ်တနံၤကီၢ်ပယီၤစ့ခီလဲလီၤ၀ဲဒၣ်ကွ့ၢ်ကွ့ၢ်အဃိကၠီၣ်တဲၣ်ပနံာ်တၢ်ဖိတၢ်လံၤအၦ့ၤဘၣ်ထီၣ်၀ဲဒၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ခီဖျိစ့ပယီၤအၦ့ၤလီၤဒ်အံၤအဃိမၠၣ်၀တံၣ်ပူၤကမျၢၢ်လၢအသူ၀ဲဒၣ်ကီၢ်ပယီၤစ့ဒီးစ့ယိၤခံခါလၢာ်အံၤတဖၣ်တၢ်ဆါတၢ်ၦ့ၤဒီး တၢ်အီၣ်တၢ်အီသရံးတဖၣ်အၦ့ၤထီၣ်၀ဲဒၣ်န့ၣ်လီၤႉလၢန့ၣ်အမဲာ်ညါၦၤကူၣ်လဲၤမၤကၤတၢ်ဖိတဖၣ်အံၤ လၢအ၀ဲသ့ၣ်ကဆှၢ ပနံာ်တၢ်ဖိတၢ်လံၤအဂီၢ်ကဘၣ်ဆှဲဟ့ၣ်လီၤ၀ဲလၢစ့ဒီၣ်လၣ်အဃိတၢ်ကီတၢ်ခဲအိၣ်လၢကဟးၦၤ့စ့ဒီၣ်လၣ်အဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ “မ့မ့ၢ်ၦၤကူၣ်လဲၤမၤကၤတၢ်ဖိတဖၣ်ခီန့ၣ်အ၀ဲသ့ၣ်မ့ၦ့ၤကၠီၣ်တဲၣ်တၢ်ဖိတၢ်လံၤလၢအိၣ်ဟဲမဲၢ်ဆီးႇဘီကီးတကပၤန့ၣ် ခီဖျိအ၀ဲသ့ၣ်ဘၣ်ဟ့ၣ်လီၤ၀ဲလၢစ့ဒီလၣ်မီၤနီၤႉနကၦ့ၤစ့ယိၤဆူစ့ဒီၣ်လၣ်န့ၣ်တညီဘၣ်ႉလၢ၀့ၢ်တကူၣ်န့ၣ်စ့ဒီၣ်လၣ်တဒီၣ်လၣ်န့ၣ်န့ၢ်လၢစ့ပယီၤ(၃၂၀၀)ကၠးမီၤနီၤႉၦၤၦ့ၤဆါစ့ဒီၣ်လၣ်ဖိတဖၣ်ပယီၤသုးဖီၣ်အ၀ဲသ့ၣ်ကအိၣ်လၢအဂၤ(၅၀)ဘျဲၣ်ညါအဃိတၢ်ဆါတၢ်ၦ့ၤတအိၣ်လၢၤဘၣ်လီၤမၢ်၀ဲမီၤနီၤႉၦၤလၢအဂၤခီန့ၣ်ဆါတဘူၣ်ၦ့ၤတဘူၣ်ဘၣ်အဃိစ့ယိၤအၦ့ၤထီၣ်တစဲးမီၤနီၤ”အဂ့ၢ်န့ၣ် ၦၤကူၣ်လဲၤမၤတၢ်ဖိလၢအဟံဆါကၠီၣ်တဲၣ်ပနံာ်တၢ်ဖိတၢ်လံၤလၢမဲၢ်ဆီးဆူမၠၣ်၀တံၣ်တဂၤ စံး၀ဲဒၣ်န့ၣ်လီၤႉ တကီၢ်ခါခဲအံၤလၢမၠၣ်၀တံၣ်–မဲၢ်ဆီးတကပၤန့ၣ် စ့ယိၤ(၃၂)ဘးန့ၣ်န့ၢ်၀ဲစ့ဒီၣ်လၣ်တဒီၣ်လၣ်ဒီး ခါဆူညါစ့ပယီၤအၦ့ၤ ကဆဲးလီၤဒံးသ့၀ဲအဂ့ၢ်န့ၣ် ၦၤမၤစ့တီလဲတၢ်ဖံးတၢ်မၤလၢအိၣ်မဲၢ်ဆီး၀့ၢ်ဒီးမၠၣ်၀တံၣ်ပူၤတဖၣ် ပဲာ်ထံနီၤဖးစံး၀ဲန့ၣ်လီၤႉ စ့ပယီၤအၦ့ၤလီၤ၀ဲဘၣ်ဆၣ်မ့မ့ၢ်လၢမၠၣ်၀တံၣ်(ကုန်သွယ်ရေးဇုန်)န့ၣ် လါအ့ဖြ့ၣ်(၁)သီတုၤလၢလါယူၤလံ(၁၄)သီ တစု တၢ်ဆှၢဟးထီၣ်ပနံာ်တၢ်ဖိတၢ်လံၤဆူကီၢ်ကၠီၣ်တဲၣ်ပူၤအိၣ်လၢအမဲရံၣ်ကၤစ့ဒီၣ်လၣ်(၅၃၀ႉ၆၄၃)ကကွဲၢ်ညါ အဂ့ၢ်န့ၣ် သုးမီၤစိရိၤအတၢ်ကစီၣ်(မြန်မာ့အလင်း)ထုးထီၣ်ပာ်ဖျါ၀ဲဖဲလါယူၤလံ ၁၇ သီအနံၤန့ၣ်လီၤႉ
ကဘီယူၤဟဲခးလီၤအဃိ သၣ်တီၣ်ကလံၤစိးလီၢ်က၀ီၤကမျၢၢ်ဟံၣ်ဟးဂီၤကအိၣ်လၢအဖျၢၣ်(၃၀)ဃၣ်ဃၣ်
လါယူၤလံ ၂၀ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ်ဒီးကရ့ၣ်ကီၢ်စဲၣ်အဆၢ သၣ်တီၣ်ကၠံကီၢ်ဆၣ်ကလံၤစိးအပူၤ ဖဲလါယူၤလံ ၁၉ သီအနံၤန့ၣ် ခီဖျိသုးမီၤစိရိၤကဘီယူၤဟဲခးလီၤတၢ်လၢ၀ၣ်သီခိၣ်ဒီးကျ့ၤထၣ်သ၀ီပူၤအဃိ ၀ၣ်သီခိၣ်သ၀ီဖိအဟံၣ်တၢ်သူၣ်ထီၣ်ဟးဂီၤ ကအိၣ်လၢအဖျၢၣ်(၃၀)ဃၣ်ဃၣ်ညါအဂ့ၢ်န့ၣ် သ့ၣ်ညါဘၣ်လၢ လီၢ်က၀ီၤကမျၢၢ်အအိၣ်န့ၣ်လီၤႉ သုးမီၤစိရိၤကဘီယူၤဟဲခးလီၤတၢ်ဘျီ၀ဲအံၤအခါ၀ၣ်သီခိၣ်သ၀ီပူၤဟံၣ်ဟးဂီၤအိၣ်ဘၣ်ဆၣ် မ့မ့ၢ်လီၢ်က၀ီၤကမျၢၢ်ခီန့ၣ် စးထီၣ်လၢကဘီယူၤဟဲခးလီၤတၢ်တၢတသီအခါအ၀ဲသ့ၣ်ဃ့ၢ်ထီၣ်ဃာ်အဃိ ၦၤဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် လီၢ်က၀ီၤကမျၢၢ်တဂၤ စံး၀ဲဒ်အံၤန့ၣ်လီၤႉ “ကဘီယူၤဟဲခးလီၤတၢ်ႇပယီၤသုးစ့ၢ်ကီးခးလီၤကျိဖးဒိၣ်ႉထဲ၀ၣ်သီခိၣ်သ၀ီတဖျၢၣ်န့ၣ်ဟံၣ်ဟးဂီၤကအိၣ်လၢအဖျၢၣ် (၃၀)ဃၣ်ဃၣ်ညါႉလၢကျ့ၤထၣ်သ၀ီတကပၤန့ၣ်စ့ၢ်ကီးၦၤဟံၣ်ဟးဂီၤအိၣ်စ့ၢ်လီၤႉတၢ်ဟးဂူာ်ဟးဂီၤတၢ်အိၣ်သးခီန့ၣ် ပတသ့ၣ်ညါလီၤတံၢ်ဒံးဘၣ်ႉလၢ(ယၤဒိၣ်)တကပၤန့ၣ်တၢ်ဒုးကဲထီၣ်တုၤလၢခဲအံၤတစုလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲလါယူၤလံ ၁၉ သီအနံၤန့ၣ်လီၤႉ ဖဲအပူၤကွံာ်လါယူၤလံ ၁၁ သီအနံၤ လၢယၤဒိၣ်သ၀ီပူၤ ဖဲတၢ်ဒုးကဲထီၣ်လၢဟီၣ်က၀ီၤတၢ်ပၢၢ်ဆၢသုးကရူၢ်ဒီး ပယီၤသုးအဘၢၣ်စၢၤအခါန့ၣ် အဆိကတၢၢ်တဘျီကဘီယူၤဟဲခးလီၤတၢ်လၢ၀ၣ်သီခိၣ်ႇယၤဒိၣ်သ၀ီပူၤဒီး ဖဲန့ၣ်၀ံၤလီၢ်ခံ ဖဲလါယူၤလံ ၁၈ သီ ဂီၤခီ(၄)နၣ်ရံၣ်ဃၣ်ဃၣ်အဆၢကတီၢ်စ့ၢ်ကီး သုးမီၤစိရိၤကဘီယူၤဟဲတ့ၢ်လီၤကဒီး၀ဲမ့ၣ်ပိၢ်(၆)ဘျီညါ အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ တၢ်ခးလိာ်သးကဲထီၣ်၀ံၤလီၢ်ခံလၢလ့ၣ်သိၤကျဲနုာ်လီၤဟးထီၣ်တြဲၤတၢ်သမံသမိးလီၢ်န့ၣ်ပယီၤသုးတပျဲၦၤဟးထီၣ်က့ၤလီၤလၢာ်ဘၣ်ႇမၤအါထီၣ်သုးဂံၢ်ဘါအဃိတၢ်ကီတၢ်ခဲအိၣ်လၢကလဲၤမၤစၢၤကမျၢၢ်ၦၤဃ့ၢ်မှံဟးဖျိးတဖၣ်အသိး တၢ်စူၤခါအတီၢ်ပူၤအံၤၦၢ်ပူၤကျဲစ့ၢ်ကီးဟးဂီၤပၢၢ်တုၤလၢနဟးထီၣ်က့ၤလီၤတသ့လၢၤဘၣ်အဃိတၢ်ကီတၢ်ခဲအိၣ်၀ဲ အဂ့ၢ်န့ၣ် လီၢ်က၀ီၤကမျၢၢ်လၢအမၤစၢၤၦၤဃ့ၢ်မှံဟးဖျိးတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပယီၤသုးဟဲထီၣ်ဒီးသုးသိလ့ၣ်(၅)ခိၣ်ဟဲမၤအါထီၣ်သုးဂံၢ်ဘါလၢလ့ၣ်သိၤတၢ်သမံသမိးတြဲၤန့ၣ်မီၤနီၤႉ တြဲၤလၢအိၣ်၀့ၢ်နုာ်လီၤဟးထီၣ်တဖၣ်န့ၣ်အ၀ဲသ့ၣ်တပျဲခီ၀ဲလ့ၣ်နီတခိၣ်လၢၤဘၣ်ႉလၢၦၢ်ပူၤကျဲစ့ၢ်ကီးသိလ့ၣ်လဲၤတသ့ဘၣ်ႉခဲအံၤဘၣ်လၢတၢ်စူၤခါအဃိကျဲဟးဂီၤကျဲတဂ့ၤလၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တုၤလၢတကီၢ်ခါခဲအံၤခီဖျိတၢ်ဒုးဆဲးကဲထီၣ်ဒံး၀ဲလၢသၣ်တီၣ်ကၠံ၀့ၢ်ကလံၤစိးတကပၤအဃိ လီၢ်က၀ီၤကမျၢၢ်လၢအလဲၤဃ့ၢ်အိၣ်ဆူသီၣ်ယ့ၤခၣ်သ၀ီႇခဲခၠီဒီးမၣ်ခၠီသ၀ီပူၤသ့ၣ်တဖၣ်အံၤအ၀ဲသ့ၣ်ဒိးန့ၢ်ဘၣ်တၢ်ဆီၣ်ထွဲမၤစၢၤလၢကရ့ၣ်နံၣ်ကီၢ်သီသုးမုၢ်ဒိၣ်အအိၣ်ဒီးလီၢ်က၀ီၤကမျၢၢ်လၢအအိၣ်ဖဲန့ၣ်တဖၣ်အအိၣ်ဘၣ်ဆၣ်ႇမ့မ့ၢ်ကမျၢၢ်လၢအလဲၤဃ့ၢ်ထီၣ်ဆူကရ့ၣ်နံၣ်ကီၢ်စဲၣ်(ဖရူၤစိၤ)တဖၣ်အံၤခီန့ၣ်တဒိးန့ၢ်ဘၣ်တၢ်ဆီၣ်ထွဲမၤစၢၤဒံးဘၣ်အဂ့ၢ်န့ၣ် သ့ၣ်ညါဘၣ်လၢ ၦၤမၤစၢၤၦၤဃ့ၢ်မှံဟးဖျိးတဖၣ်အအိၣ်န့ၣ်လီၤႉ လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၂)တၢ်ပၢဟီၣ်က၀ီၤ တီအူကီၢ်ရ့ၣ် သၣ်တီၣ်ကၠံကီၢ်ဆၣ်အပူၤ တၢ်ဒုးဆဲးကဲထီၣ်၀ဲလၢ(KNLA)သုးပာ်ဖှိၣ်ဒီးပယီၤသုးအဘၢၣ်စၢၤအဃိလီၢ်က၀ီၤကမျၢၢ်ဘၣ်ဃ့ၢ်မှံဟးဖျိးအါအါ ဂီၢ်ဂီၢ်အသိးခီဖျိပယီၤသုးတပျဲၦၤစိာ်ထီၣ်စိာ်လီၤတၢ်အီၣ်တၢ်အီႇကသံၣ်ကသီသ့ၣ်တဖၣ်ဘၣ်အဃိတၢ်ကီတၢ်ခဲအိၣ်ထီၣ်လၢၦၤဃ့ၢ်မှံဟးဖျိးတဖၣ်အံၤကဒိးန့ၢ်ဘၣ်တၢ်ဆီၣ်ထွဲမၤစၢၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
(လက်ခတ်တောင်)တၢ်ဒုးအပူၤ ပယီၤသုးခိၣ်သံ(၁)ဂၤႇဘၣ်ဒိ(၅)ဂၤအဂ့ၢ် Cobra ထုးထီၣ်ပ၁်ဖျါ
လါယူၤလံ ၁၉ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲမဟါလါယူၤလံ ၁၈ သီ ဂီၤခီ ၇ နၣ်ရံၣ်အဆၢကတီၢ် လၢကညီကီၢ်ဆၣ် မၠၣ်၀တံၣ်၀့ၢ်ချၢ (လက်ခတ်တောင်)ကပၤန့ၣ် တၢ်ဒုးကဲထီၣ်၀ဲလၢ(Cobra)သုးကျိၤတီခိၣ်ရိၣ်မဲတၢ်ပၢၢ်ဆၢသုးပာ်ဖှိၣ်ဒီး ပယီၤသုးအဘၢၣ်စၢၤဒီး တၢ်ဒုးဘျီ၀ဲန့ၣ်အပူၤ ပယီၤသုးခိၣ်သံ၀ဲ(၁)ဂၤႇဘၣ်ဒိ(၅)ဂၤအဂ့ၢ်န့ၣ် (Cobra)သုးကျိၤ ထုးထီၣ်ပာ်ဖျါ၀ဲဖဲမဟါလါယူၤလံ ၁၈ သီအနံၤန့ၣ်လီၤႉ ပယီၤသုးသ့ၣ်တဖၣ်အံၤဘၣ်တၢ်ခးအီၤလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) Cobra သုးကျိၤ(၁)ႇ (ကျားသစ်နက်)သုးကျိၤႇ(Federal Wings)ဒြိသုးပာ်ဖှိၣ်သ့ၣ်တဖၣ်အံၤဒီး ဖဲန့ၣ်ပယီၤသုးတကပၤ အသုးခိၣ်သံ၀ဲ(၁)ဂၤ, ခီၣ်ချ့သုးရ့ၣ်(ခမရ–၁၁၈)အၦၤဘၣ်ဒိ၀ဲ(၅)ဂၤအဂ့ၢ်န့ၣ် (Cobra)လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ တၢ်ခးလိာ်သးကဲထီၣ်ဘျီ၀ဲအံၤအခါပယီၤသုးသံဘၣ်ဒိဘၣ်ထံးတကးဒံးဘၣ်အမဲာ်ညါ တၢ်မၤန့ၢ်ဃုာ်၀ဲ(MA3)တခိၣ်ႇ(RPG)သၢဖျၢၣ်ႇ(60mm)သၢဖျၢၣ်ႇအံၤနၤကၤ(၄)ဖျၢၣ်ႇလီတဲစိ(၇)ဖျၢၣ်အဂ့ၢ်န့ၣ် (Cobra)သုးကျိၤ ထုးထီၣ်ပာ်ဖျါ၀ဲန့ၣ်လီၤႉ ဒ်န့ၣ်အသိးတၢ်ဒုးကဲထီၣ်ဘျီ၀ဲအံၤအခါမ့မ့ၢ်တၢ်ပၢၢ်ဆၢသုးပာ်ဖှိၣ်တကပၤခီန့ၣ်ဘၣ်ဒိ၀ဲ(၁)ဂၤအဂ့ၢ်န့ၣ် (Cobra)သုးကျိၤ လံာ်တၢ်ထုးထီၣ်ပာ်ဖျါအပူၤ ပာ်ဖျါ၀ဲန့ၣ်လီၤႉ ဖဲခံခီခံကပၤတၢ်ဒုးကဲထီၣ်အခါန့ၣ်ၦၤနၢ်ဟူကျိဖးဒိၣ်ကလုၢ်သီၣ်တုၤလၢမၠၣ်၀တံၣ်၀့ၢ်ႇ ကီၢ်ကၠီၣ်တဲၣ်–ကီၢ်ပယီၤကီၢ်ဆၢ ၀့ၢ်မဲၢ်ဆီးညါအဂ့ၢ်န့ၣ် မၠၣ်၀တံၣ်ကမျၢၢ်ဒီးခီကီၢ်ၦၤမၤတၢ်ဖိလၢအိၣ်မဲၢ်ဆီး၀့ၢ်ပူၤတဖၣ် စံး၀ဲန့ၣ်လီၤႉ ဘၣ်ဃးတၢ်ခးလိာ်သးကဲထီၣ်ဘျီ၀ဲအံၤပယီၤသုးသံဘၣ်ဒိဘၣ်ထံးႇတၢ်မၤန့ၢ်ကျိချံၦာ်သၣ်တၢ်အိၣ်သးအံၤန့ၣ် တၢ်ပၢၢ်ဆၢသုးပာ်ဖှိၣ်ထုးထီၣ်ပာ်ဖျါ၀ဲအိၣ်ဘၣ်ဆၣ်ႇမ့မ့ၢ်ပယီၤသုးတကပၤခီန့ၣ်ထုးထီၣ်ပာ်ဖျါ၀ဲတအိၣ်နီတမံၤဘၣ် န့ၣ်လီၤႉ ဒ်န့ၣ်အသိးဖဲအပူၤကွံာ်လါယူၤလံ ၁၀ သီအခါစ့ၢ်ကီး လၢမၠၣ်၀တံၣ်၀့ၢ်(လက်ခတ်တောင်)ကပၤန့ၣ် တၢ်ဒုးကဲထီၣ်ဒံး၀ဲလၢပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤဒံးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ဟီၣ်စီကသံၣ်အၦ့ၤထီၣ်အဃိ ချၢၣ်လွံၢ်ထူၣ်ကီၢ်ရ့ၣ်ၦၤမၤအီၣ်ကျီးဖိတဖၣ်တၢ်ကီတၢ်ခဲအိၣ်လၢဆဲးသူၣ်အီၣ်ဖျးအီၣ်တၢ်
လါယူၤလံ ၁၉ သီႇ ၂၀၂၃ နံၣ်ႇ ခ့ၣ်အဲးစံၣ် လၢပကိကီၢ်ခီဒိၣ် ချၢၣ်လွံၢ်ထူၣ်ကီၢ်ရ့ၣ်အပူၤ ခီဖျိဟီၣ်စီကသံၣ်လၢအမၤဂ့ၤထီၣ်တၢ်မုၢ်တၢ်ဘိအလၣ်အံၤဒီး ကသံၣ်မၤသံတၢ်ဃၢ်အၦ့ၤဒိၣ်ထီၣ်အဃိ ၦၤမၤအီၣ်ဘုႇၦၤမၤအီၣ်ပဲဖိသ့ၣ်တဖၣ်အံၤ တၢ်ကီတၢ်ခဲအိၣ်ထီၣ်လၢ ကဆဲးသူၣ်အီၣ်ဖျးအီၣ်တၢ်အဂ့ၢ်န့ၣ် ၦၤမၤအီၣ်ကျီးဖိတဖၣ် စံး၀ဲန့ၣ်လီၤႉ ကီၢ်ပယီၤပူၤတချုးဒံးလၢတၢ်သဘံၣ်သဘုၣ်ကဲထီၣ်ဒံးဘၣ်ၦၤဟးထီၣ်က့ၤလီၤသ့ဒံးအခါန့ၣ်ဟီၣ်ခိၣ်စီအၦ့ၤအိၣ်၀ဲ (၃)ကလးကၠးဒီးမ့မ့ၢ်ကသံၣ်မၤသံတၢ်ဃၢ်န့ၣ်အၦ့ၤအိၣ်ထဲ(၇)ကလးကၠးန့ၣ်လီၤႉဘၣ်ဆၣ်ခဲအံၤအၦ့ၤဒိၣ်ထီၣ်တ၀၁် ဃၣ်ဃၣ်ညါတကးဒံးဘၣ်တၢ်ဒုးစ့ၢ်ကီးကဲထီၣ်ၦၤဘၣ်ဟးစံၣ်အဃိၦၤသူၣ်အီၣ်ပဲသူၣ်အီၣ်ဘုလီၤစှၤ၀ဲအသိး တၢ်ကီတၢ်ခဲအိၣ်လၢကသူၣ်အီၣ်ဖျးအီၣ်တၢ်အဂ့ၢ်န့ၣ် မူကီၢ်ဆၣ် လီၢ်က၀ီၤကမျၢၢ်တဂၤ စံး၀ဲန့ၣ်လီၤႉ “နီၣ်နါက့ထီၣ်ႇတၢ်ဃၢ်စ့ၢ်ကီးလီၤလၢပဲကျီးႇဘုကျီးခဲလၢာ်လီၤႉလၢညါၦၤဟးထီၣ်က့ၤလီၤညီဒံးအခါန့ၣ် ကသံၣ်မၤသံတၢ်ဃၢ်န့ၣ်အၦ့ၤတဒိၣ်အါအါဒံးဘၣ်ႉခဲအံၤအၦ့ၤထီၣ်တဆးဘျဲၣ်ညါအဃိပထၢနုာ်လီၤတန့ၢ်လၢၤဘၣ်ႉ ပဘၣ်ဟးစံၣ်တၢ်ဒုးစ့ၢ်မီၤနီၤႉခဲမဟိမ့ၢ်ပဆဲးမၤကသ့ဒံးဧါမးပတသ့ၣ်ညါဘၣ်”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါချၢၣ်လွံၢ်ထူၣ်ကီၢ်ရ့ၣ်ဒီတဘ့ၣ်အပူၤကမျၢၢ်တဖၣ်အါဒၣ်တက့ၢ်သူၣ်အီၣ်ဖျးအီၣ်၀ဲဘုႇပဲႇ တၢ်သူတၢ်သၣ်တဖၣ်ဒီးဆါအီၣ်ကဒါက့ၤ၀ဲတဆီန့ၣ်လီၤႉဘၣ်ဆၣ်တကီၢ်ခါခဲအံၤခီဖျိကျဲတၢ်ဟးထီၣ်က့ၤလီၤကီခဲထီၣ် အဃိၦၤဟးၦ့ၤတၢ်ဖိတဖၣ်စ့ၢ်ကီးတဟဲၦ့ၤတၢ်သူတၢ်သၣ်လၢသ၀ီပူၤလၢၤဘၣ်အသိးတၢ်သူၣ်တၢ်သၣ်အၦ့ၤစ့ၢ်ကီးတဂ့ၤ၀ဲလၢၤဘၣ်အဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ လီၢ်က၀ီၤကမျၢၢ်ပိာ်မုၣ်လၢအဂၤတဂၤစ့ၢ်ကီးစံး၀ဲလၢ“လၢပအိၣ်တကပၤအံၤပသူၣ်အီၣ်ဖျးအီၣ်ဘုသ့ဘၣ်ဆၣ် နမၤကသ့ဂ့ၤဂ့ၤဒ်လဲၣ်ႉပဘၣ်စံၣ်တၢ်ဒုးအဃိပက့ၤကွၢ်ကဒါက့ၤပကျီးပူၤမးတချုးလၢၤဘၣ်ႉခီဖျိပယီၤသုးစ့ၢ်ကီး ပံးကျဲသမံသမိးတၢ်အဃိဟုသးအၦ့ၤဒိၣ်ထီၣ်မီၤနီၤႉဟုသးယိယိန့ၣ်အၦ့ၤထီၣ်တုၤလၢ(၁)ကလီၢ်ခိၣ်ဃၢၤလံ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်လၢၦၤသူၣ်ပဲသူၣ်ဘုတၢ်ဖံးတၢ်မၤအံၤမ့ၢ်တၢ်ဖံးတၢ်မၤတခါလၢတၢ်ကဘၣ်ကွၢ်ထွဲအီၤမူၤမူၤနီၢ်နီၢ်န့ၣ်လီၤႉ ဖဲဟီၣ်က၀ီၤပူၤတၢ်အိၣ်သးတဂ့ၤဘၣ်အ၀ဲသ့ၣ်ဟးစံၣ်တၢ်ဒုးအခါတကွၢ်ထွဲဘၣ်အတၢ်မုၢ်တၢ်ဘိမူၤမူၤနီၢ်နီၢ်ဘၣ်ဒီး ဖဲအ၀ဲသ့ၣ်ဟဲက့ၤအိၣ်လၢသ၀ီပူၤအခါစ့ၢ်ကီးခီဖျိဟီၣ်စီကသံၣ်အၦ့ၤထီၣ်အဃိတၢ်ကီတၢ်ခဲအိၣ်လၢကၦ့ၤသူ၀ဲအသိးလၢတၢ်လုၢ်အီၣ်နီၢ်ခိသးသူမူတကပၤစ့ၢ်ကီးတၢ်တၤတၢ်အိၣ်ထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ စးထီၣ်သုးဟံးန့ၢ်တၢ်စိတၢ်ကမီၤတုၤလၢတနံၣ်အံၤ(၂၀၂၃)လါဖ့ၤဘြူၤအါရံၤန့ၣ်လၢ(ခ့ၣ်အဲၣ်ယူၣ်)တၢ်ပၢဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ်အပူၤ ကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၁)ကလီၢ်ဘျဲၣ်ဒီး ဖဲအပူၤကွံာ်စှၤလါအခါခီဖျိခံခီခံကပၤ တၢ်ဒုးကဲထီၣ်ႇတၢ်သဘံၣ်သဘုၣ်အိၣ်ထီၣ်အဃိ တကီၢ်ခါခဲအံၤၦၤဃ့ၢ်မှံဟးဖျိးအနီၣ်ဂံၢ်အိၣ်ထီၣ်တုၤလၢ(၂)ကလီၢ်လံ အဂ့ၢ်န့ၣ် သ့ၣ်ညါဘၣ်လၢကညီဂံၢ်ခီၣ်ထံးတၢ်ကရၢကရိလၢအမၤစၢၤၦၤဃ့ၢ်မှံဟးဖျိးတဖၣ်အံၤအအိၣ်န့ၣ်လီၤႉ
ကီးတရံးကီၢ်ဆၣ်ခိခိၣ်ဒူသ၀ီတဖၣ်အပူၤ ၦၤဟးဃုၦ့ၤအီၣ်ဟုသးကီခဲထီၣ်၀ဲ
လါယူၤလံ ၁၉ သီႇ ၂၀၂၃ နံၣ်ႇ ခ့ၣ်အဲးစံၣ် လၢကီးတရံးကီၢ်ဆၣ်ခိခိၣ်ဒူသ၀ီတဖၣ်အပူၤ ၦၤဟးဃုၦ့ၤအီၣ်ဟုသးကီခဲထီၣ်၀ဲဒီး တကးဒံးဘၣ်အမဲာ်ညါ ဟုသးလၢၦၤမၤအီၣ်စံာ်ဖိတဖၣ်ပာ်ဖှိၣ်ဃာ်အံၤမးတကူတလၢ၀ဲလၢၤဘၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လၢကီးတရံးကီၢ်ဆၣ် ဒူသ၀ီတကပၤန့ၣ် ၦၤဆါလီၤဟုသးတအိၣ်အါအါလၢၤဘၣ်လီၤစှၤ၀ဲဒီး ကလဲၤၦ့ၤအီၣ်ဟုသးလၢကီးတရံး၀့ၢ်ပူၤအံၤအဂီၢ်စ့ၢ်ကီးခီဖျိကျဲတၢ်ကီတၢ်ခဲဒီးပယီၤသုးသမံသမိးတၢ်အဃိ တၢ်ကီတၢ်ခဲအိၣ်လၢကလဲၤၦ့ၤအီၣ်ဟုသးအဂ့ၢ်န့ၣ် ကီးတရံးကီၢ်ဆၣ်ကလံၤထံး လီၢ်က၀ီၤပိာ်မုၣ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တမ့ၢ်ထဲပသ၀ီတဖျၢၣ်ဘၣ်ႉၦၤအိၣ်ဖဲကီးတရံးကီၢ်ဆၣ်ကလံၤထံးအံၤခဲလၢာ်န့ၣ်တၢ်အီၣ်တၢ်အီတအိၣ်ကူကူလၢလၢလၢၤဘၣ်ႉဟုသးနါက့အၦ့ၤထီၣ်ႉၦၤသ၀ီဖိဆါန့ၢ်ၦၤနါက့တလၢဘၣ်ႉကလဲၤၦ့ၤအီၣ်လၢကီးတရံး၀့ၢ်ပူၤခီဒၢး ၦၤမၤဟးဂီၤကျဲဒီး တၢ်စူၤကျဲဟးဂီၤအဃိပဘၣ်ဟးဆှဲးကျဲတၢ်ကီတၢ်ခဲအိၣ်ဒီဒူၣ်ညါမီၤနီၤႉနမ့လဲၤၦ့ၤဟုသးလၢ၀့ၢ်ပူၤ မ့အါခီဒၢးပယီၤသုးအိၣ်သမံသမိးနၤလၢကျဲကလုာ်ကလုာ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ဒ်န့ၣ်အသိးလၢကီးတရံးကီၢ်ဆၣ်ကလံၤစိးဒူသ၀ီတဖၣ်လၢအမ့ၢ် နါကတိသ၀ီႇပၠါပ့ၤႇကၠီၤစှၤကိသ၀ီတကပၤန့ၣ်စ့ၢ်ကီး ခီဖျိတၢ်ဒုးကဲထီၣ်လၢဟီၣ်က၀ီၤပူၤအဃိလီၢ်က၀ီၤကမျၢၢ်ၦၤမၤအီၣ်စံာ်ဖိတဖၣ်တဖံးအီၣ်မၤအီၣ်ဘၣ်တၢ်ဂ့ၤဂ့ၤလၢၤဘၣ်ဒီး ၦၤဆါဟုသးစ့ၢ်ကီးတအိၣ်လၢၤ၀ဲဘၣ်အဂ့ၢ်န့ၣ် လီၢ်က၀ီၤသ၀ီဖိတဖၣ်စံး၀ဲန့ၣ်လီၤႉ “ခဲအံၤစံာ်လၢၦၤတမၤအီၣ်လၢၤဘၣ်န့ၣ်ကအိၣ်အအ့ကၢၣ်လၢအကထိအကလးညါႉဖဲမဟိန့ၣ်ပမၤအီၣ်ဃာ်စံာ်အဃိ တနံၣ်အံၤပအီၣ်သ့ဒံးႉတနံၣ်အံၤပတမၤအီၣ်စံာ်လၢၤဘၣ်အဃိနီၢ်တနံၣ်န့ၣ်လၢကအီၣ်အဂီၢ်တအိၣ်လၢၤဘၣ်ႉ လီၢ်က၀ီၤကမျၢၢ်တနီၤတဲ၀ဲဒၣ်နဟးဃုၦ့ၤအီၣ်ဟုသးမးန့ၣ်ၦၤဆါန့ၢ်နၤတအိၣ်လၢၤဘၣ်ႉခီဖျိၦၤမၤတနံၣ်အီၣ်တနံၣ်လီၤအဃိတနံၣ်ညါအံၤနမ့တမၤအီၣ်ဘၣ်န့ၣ်နီၢ်တနံၣ်ဒီးန့ၣ်နအီၣ်တအိၣ်လၢၤဘၣ်ႉအဃိၦၤဆါအီၣ်န့ၢ်လိာ်သးဟုသးတသ့လၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲအပူၤကွံာ်မဟိတနံၣ်အခါလၢကီးတရံးကီၢ်ဆၣ်အပူၤဟုသးတနာ်န့ၣ်အၦ့ၤအိၣ်၀ဲ(၂၀၀၀၀)ကၠးခိၣ်ဃၢၤလီၤဒီး ဘၣ်ဆၣ်တနံၣ်အံၤတနာ်န့ၣ်အၦ့ၤအိၣ်(၄၅ႇ၀၀၀)ကၠးတုၤလၢ(၅၀ႇ၀၀၀)ကၠးညါအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤ ကမျၢၢ်အအိၣ်န့ၣ်လီၤႉ လီၢ်က၀ီၤကမျၢၢ်လၢအိၣ်ကီးတရံးကီၢ်ဆၣ်ပူၤသ့ၣ်တဖၣ်အါဒၣ်တက့ၢ်န့ၣ်လၢတၢ်လုၢ်အီၣ်နီၢ်ခိသးသမူအဂီၢ်သူၣ်အီၣ်ဖျးအီၣ်၀ဲဘုဒီး ဘၣ်ဆၣ်ဟုသးလၢအဟးထီၣ်သ့ၣ်တဖၣ်အံၤတကူတလၢ၀ဲဘၣ်အဃိ အ၀ဲသ့ၣ်ဘၣ်လဲၤၦ့ၤအီၣ်က့ၤဟုသး လၢကီးတရံး၀့ၢ်ပူၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ တနံၣ်အံၤကီးတရံးကီၢ်ဆၣ်အပူၤတၢ်ဒုးဟဲဆူၣ်ထီၣ်၀ဲဒီးဟီၣ်ခိၣ်စံာ်လီၢ်အ့ကၢၣ်လၢၦၤတမၤအီၣ်စံာ်သူၣ်အီၣ်ဖျးအီၣ်ဘုဘၣ်အံၤအိၣ်၀ဲအါမးန့ၣ်လီၤႉတကးဒံးဘၣ်လၢန့ၣ်အမဲာ်ညါခီဖျိပနံာ်တၢ်ဖိတၢ်လံၤတၢ်အီၣ်တၢ်အီစ့ၢ်ကီးအၦ့ၤဒိၣ်ထီၣ် ကွ့ၢ်ကွ့ၢ်အဃိဂံၢ်ခီၣ်ထံးၦၤမုၢ်ဆ့ၣ်မုၢ်ဂီၤဖိတဖၣ်တၢ်ကီတၢ်ခဲအိၣ်ထီၣ်လၢတၢ်လုၢ်အီၣ်နီၢ်ခိသးသမူတကပၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ
(KTLA)အိၣ်ခိးသမံသမိးတၢ်လၢ၀့ၢ်တၢ်အဲၣ်–ထံခံကျဲအံၤ တူၢ်လိ၁်တသ့ဘၣ်အဂ့ၢ် KNU က့ၤခီၣ်ဆၢကဒါ
လါယူၤလံ ၁၈ သီႇ ၂၀၂၃ နံၣ်ႇ ခ့ၣ်အဲးစံၣ် တနီသရံၣ်ကီၢ်ခီဒိၣ် ၀့ၢ်တၢ်အဲၣ်–ထံခံကျဲအံၤ အိၣ်၀ဲဒၣ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ် (သုးက့ ၄)ဟီၣ်က၀ီၤပူၤအဃိ ကီၢ်သူလ့ၤသုးမုၢ်ဒိၣ်(KTLA)အတၢ်အိၣ်ခိးသမံသမိးမၤပျံၤမၤဖုးကမျၢၢ်လၢ အလ့ၢ်ထီၣ်လ့ၢ်လိၤအံၤ အဖီခိၣ် တူၢ်လိာ်၀ဲတသ့ဘၣ်အဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ ဖဲအပူၤကွံာ်စှၤသီအခါ(KTLA)အၦၤခး၀ဲဒၣ်ကညီဆူၣ်ချ့၀ဲၤကျိၤအသိလ့ၣ်လၢအတီၣ်၀ဲကသံၣ်ကသီအံၤအသိး ခီဖျိအ၀ဲသ့ၣ်အိၣ်ခိးသမံသမိးမၤပျံၤမၤဖုးကမျၢၢ်သိလ့ၣ်လၢအဟးထီၣ်က့ၤလီၤဖဲန့ၣ်သ့ၣ်တဖၣ်အဃိ ဖဲလါယူၤလံ ၁၅ သီ အနံၤန့ၣ် တၢ်ခးလိာ်သးကဲထီၣ်၀ဲလၢခ့ၣ်အဲၣ်ယူၣ်(သုးက့ ၄)စုတီၤဖီလာ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ် ၁၀ ဒီး(KTLA)အဘၢၣ်စၢၤအဂ့ၢ်န့ၣ် ခ့ၣ်အဲၣ်ယူၣ် ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲဒ်အံၤန့ၣ်လီၤႉ ပဒိၣ်စီၤအဲၣ်နၤစံး၀ဲလၢ“ဖဲလါယူၤလံ ၁၂ သီန့ၣ် ကီၢ်ရ့ၣ် ဆူၣ်ချ့မၤစၢၤ၀ဲၤကျိၤန့ၣ်ဆှၢလီၤ၀ဲဒၣ်ကသံၣ်ကသီဆူကီၢ်ဆၣ်မီၤႉ ကီၤလၤဖိအၦၤန့ၣ်တြီ၀ဲတပျဲလဲၤ၀ဲဘၣ်၀ံၤဘၣ်ဟဲက့ၤထီၣ်ကဒါက့ၤ၀ဲန့ၣ်ႉဆူၣ်ချ့မၤစၢၤ၀ဲၤကျိၤဟဲထီၣ်အခါန့ၣ်အ၀ဲသ့ၣ်ကိးပတုာ်၀ဲတသံကွၢ်သံဒိး၀ဲနီတမံၤဘၣ်ဒီးခးသဲၣ်ဖး၀ဲအသိလ့ၣ်ဘ့ခဲလၢာ်လီၤႉ၀ံၤဒီးမၢအက့ၤ၀ဲလၢအခီၣ်မီၤႉပာ်ဂံၢ်ပာ်ဘါ၀ဲတၢ်စုက၀ဲၤခး၀ဲဒၣ်ၦၤသ၀ီဖိအသိလ့ၣ်ႇဒွဲၣ်အူ၀ဲဒၣ်သ၀ီဖိအသိလ့ၣ်တၢ်သ့ၣ်တဖၣ်န့ၣ်ခ့ၣ်အဲၣ်ယူၣ်ဟီၣ်က၀ီၤပူၤအံၤပပျဲကဲထီၣ်သးတသ့ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲလါယူၤလံ ၁၅ သီအနံၤစ့ၢ်ကီး (KTLA)အၦၤလၢအနုာ်လီၤဟံးန့ၢ်အလီၢ်ဖဲကျဲ၀ဲန့ၣ်တဖၣ်အံၤ ခီဖျိခ့ၣ်အဲၣ်ယူၣ် (သုးက့ ၄) KNLA သုးရ့ၣ် ၁၀ အၦၤလဲၤခး၀ဲအဃိ ခံခီခံကပၤတၢ်ခးလိာ်သးကဲထီၣ်၀ဲဒီး ဖဲန့ၣ်ကမျၢၢ်ဘၣ်ဒိ၀ဲ(၂)ဂၤဒံးအဂ့ၢ်န့ၣ် ခ့ၣ်အဲၣ်ယူၣ်(သုးက့ ၄)စံး၀ဲန့ၣ်လီၤႉ ဘၣ်ဆၣ်ကျဲမုၢ်၀ဲအံၤမ့ၢ်၀ဲဒၣ်ကီၢ်ဆၢမုၢ်ကျိၤ၀ဲၤကွာ်ကျဲတဘိအသိး(ခ့ၣ်အဲၣ်ယူၣ်)အံၤစိာ်ဆှၢ၀ဲတၢ်အီၣ်တၢ်အီႇ ကျိချံၦာ်သၣ်တဖၣ်လၢပယီၤသုးအဂီၢ်အိၣ်၀ဲအဂ့ၢ်န့ၣ် (KTLA)တကပၤ က့ၤလိာ်ဘၢလိာ်ကွီၢ်ကဒါ၀ဲန့ၣ်လီၤႉ (KTLA)ဆၣ်ကဆီသုးတြိၤ ၦၤဘၣ်မူဘၣ်ဒါ စီၤကွၢ်လၢ် စံး၀ဲလၢ“အ၀ဲသ့ၣ်အဲၣ်ဒိး၀ဲလၢတၢ်လီၢ်၀ဲန့ၣ်...
တၢ်နု၁်လီၤခးပယီၤသုးကျိၤဒီး၀ဲၤကျိၤဘၣ်ထွဲ၀ဲၤဒၢးတဖၣ်အဃိ ပယီၤသုးသံ(၅)ဂၤႇဘၣ်ဒိ(၁၀)အဂ့ၢ် SOF ထုးထီၣ်ပ၁်ဖျါ
လါယူၤလံ ၁၈ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် နိၣ်တကီကီၢ်ဆၣ်အပူၤ စးထီၣ်လါယူၤလံ ၁၁ သီတုၤလၢ ၁၆ သီအနံၤ တၢ်ပၢၢ်ဆၢသုးပာ်ဖှိၣ်နုာ်လီၤခး၀ဲ သုးမီၤစိရိၤအ၀ဲၤကျိၤဘၣ်ထွဲ၀ဲၤဒၢးဒီးပယီၤသုးကျိၤတဖၣ်အဃိ ပယီၤသုးသံ၀ဲ ၅ ဂၤႇ ဘၣ်ဒိ ၁၀ ဂၤအဂ့ၢ်န့ၣ် ဒုးယၤလီၤဆီကရူၢ်(SOF)ထုးထီၣ်ပာ်ဖျါ၀ဲဖဲလါယူၤလံ ၁၇ သီအနံၤန့ၣ်လီၤႉ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇဒုးယၤလီၤဆီကရူၢ်(SOF)ႇ(Cloud Wings)ဒြိကရူၢ်ဒီး (Federal Wings) ဒြိသုးပာ်ဖှိၣ်သ့ၣ်တဖၣ်အံၤပာ်ဖှိၣ်ထီၣ်သးနုာ်လီၤခး၀ဲ နိၣ်တကီကီၢ်ဆၣ် ပၢၤကီၢ်၀ဲၤလီၢ်ႇ ပၢပြး၀ဲၤဒၢးႇ ဒီး ပယီၤသုးကျိၤ(၁), (ခမရ–၄၃၂)သုးရ့ၣ် သုးကျိၤ(၂)လၢအဟဲထီၣ်(စစ်ကူ)ဖဲကးလံၣ်ခံပယီၤသုးကလၢၤတဖၣ်အံၤ လၢဒြိမ့ၣ်ပိၢ်အဂ့ၢ်န့ၣ် ဒုးယၤလီၤဆီကရူၢ်(SOF)သုးဖိတဂၤ စံး၀ဲဒ်အံၤန့ၣ်လီၤႉ “ဖဲအ၀ဲသ့ၣ်သုးကျိၤဟဲထီၣ်အခါန့ၣ်ပ၀းတရံးတံၢ်ခးအီၤမီၤနီၤႉဖဲန့ၣ်ပယီၤသုးသံ၀ဲဒၣ်(၅)ဂၤႇဘၣ်ဒိ(၁၀)ဂၤ, အ၀ဲသ့ၣ်ဘၣ်ဒိနးအဃိဂုၤက့ၤအလီၢ်ခံႉမ့မ့ၢ်လၢအသံ(၅)ဂၤခီန့ၣ်ၦၤခူၣ်လီၤအ၀ဲသ့ၣ်လၢ(မဲၣ်ကတီၤ)သ၀ီကပၤန့ၣ် မီၤနီၤ”အဂ့ၢ်န့ၣ် စံး၀ဲန့ၣ်လီၤႉ တၢ်ဒုးကဲထီၣ်ဘျီ၀ဲအံၤဘၣ်ဃးတၢ်သံတၢ်ဘၣ်ဒိဘၣ်ထံးတၢ်အိၣ်သးခီန့ၣ်တၢ်ပၢၢ်ဆၢသုးပာ်ဖှိၣ်တကပၤ ထုးထီၣ်ပာ်ဖျါ၀ဲ တၢ်ကစီၣ်အိၣ်ဘၣ်ဆၣ်မ့မ့ၢ်လၢပယီၤသုးတကပၤခီန့ၣ်ထုးထီၣ်ပာ်ဖျါ၀ဲလီၤလီၤဆီဆီတအိၣ်နီတမံၤ ဒံးဘၣ်န့ၣ်လီၤႉ ဘၣ်ဆၣ်တၢ်ဒုးကဲထီၣ်လၢခံခီခံကပၤအတီၢ်ပူၤအံၤခီဖျိပယီၤသုးကဘီယူၤဟဲတ့ၢ်လီၤမ့ၣ်ပိၢ်ႇခးလီၤ(၁၂၀ မမ), (၆၀ မမ), (၈၁ မမ)ကျိဖးဒိၣ်အဃိ (Federal Wings)သုးပာ်ဖှိၣ်အၦၤဘၣ်ဒိ၀ဲ ၁ ဂၤအဂ့ၢ်န့ၣ် (SOF)ထုးထီၣ်ပာ်ဖျါ၀ဲန့ၣ် လီၤႉ တကးဒံးဘၣ်လၢန့ၣ်အမဲာ်ညါပယီၤသုးတဖၣ်အံၤဖီၣ်က့ၤကိး၀ဲၦၤသ၀ီဖိတဂၤလၢတၢ်နဲၣ်ပၠးကျဲအဂီၢ်ဒီး ဘၣ်ဆၣ်တုၤလၢခဲအံၤပယီၤသုးတပျၢ်လီၤအီၤဒံးဘၣ်အဂ့ၢ်န့ၣ် ဒုးယၤလီၤဆီကရူၢ်(SOF)ၦၤသုးဖိတဂၤ စံးအါထီၣ်၀ဲဒ်အံၤ န့ၣ်လီၤႉ အ၀ဲစံး၀ဲလၢ“ဖဲတၢ်တနံၤန့ၣ်တၢ်ဒုးကဲထီၣ်ဖဲဂီၤခီန့ၣ်တဘျီႇဟါခီန့ၣ်ကဲထီၣ်ကဒီးတဘျီလီၤႉမ့၀ံၤကဘီယူၤဟဲခးလီၤတၢ်တဘျီမီၤနီၤႉအ၀ဲသ့ၣ်ဖီၣ်က့ၤကိးၦၤသ၀ီဖိတဂၤသူ၀ဲလၢကနဲၣ်ပၠးကျဲအဂီၢ်ႉဒ်သိးပသ့ၣ်ညါအသိးန့ၣ်အ၀ဲသ့ၣ်က့ၤကိး၀ဲၦၤသ၀ီဖိတဂၤအံၤလၢနိၣ်တကီ(၂၈၄)သုးကလၢၤညါမီၤနီၤႉတုၤလၢခဲအံၤတပျၢ်လီၤ၀ဲဒံးဘၣ်”အဂ့ၢ်န့ၣ် စံး၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်လါယူၤ...