ဘံလ့ကီၢ်ဆၣ်ပူၤ ပယီၤသုးခးလီၤကျိဖးဒိၣ်အဃိ ကမျၢၢ်သံ(၃)ဂၤဒီး လီၢ်က၀ီၤကမျၢၢ်ဃ့ၢ်ထီၣ်တကထိဘျဲၣ်
လါယူၤလံ ၁၈ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၁)တၢ်ပၢဟီၣ်က၀ီၤ ဒူသထူၣ်ကီၢ်ရ့ၣ်အပူၤ ဖဲအပူၤကွံာ်လါယူၤလံ ၁၅ သီအနံၤနၣ် ပယီၤသုးကျိၤနုာ်လီၤ၀ဲလၢ(ဘံလ့ကီၢ်ဆၣ်)ဒူသ၀ီတဖၣ်အပူၤဒီး ခးလီၤကျိဖးဒိၣ်အဃိ လီၢ်က၀ီၤကမျၢၢ်သံ၀ဲ(၃)ဂၤအသိး လီၢ်က၀ီၤကမျၢၢ်ဃ့ၢ်ထီၣ်၀ဲတကထိဘျဲၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိး သ့ၣ်ညါဘၣ်န့ၣ်လီၤႉ ဖဲတၢ်တနံၤန့ၣ်ခီဖျိပယီၤသုးနုာ်လီၤ၀ဲလၢဘံလ့ကီၢ်ဆၣ် ငပၠီတီႇကယၣ်၀့စ့ၣ်ႇစှါစူၣ်ႇခၠါမၠ့ၣ်ဒီးစံကိသ၀ီပူၤအါအါ ဂီၢ်ဂီၢ်အဃိ လီၢ်က၀ီၤကမျၢၢ်တကထိဘျဲၣ်ဘၣ်ဃ့ၢ်ထီၣ်၀ဲဒီးပယီၤသုးအံၤနုာ်လီၤအိၣ်၀ဲလၢ(ကယၣ်၀့စ့ၣ်)ဒီး (စံကိ)သ၀ီပူၤ ခးလီၤကျိဖးဒိၣ်အဃိ ကမျၢၢ်သံ(၃)ဂၤအကျါပၣ်ဃုာ်၀ဲပိာ်မုၣ်တဂၤအဂ့ၢ်န့ၣ် ဘံလ့လီၢ်က၀ီၤကမျၢၢ်တဂၤ စံး၀ဲန့ၣ်လီၤႉ “ပယီၤသုးကျိၤဟဲလီၤဘျီၦၤသ၀ီဖိတဖၣ်န့ၣ်ဟးပလဲာ်သးခဲလၢာ်လီၤႉပယီၤသုးခးလီၤကျိဖးဒိၣ်အဃိၦၤဆါတၢ်ဒီမါ၀ၤခံဂၤဒီးသ၀ီဖိတဂၤသံ၀ဲဒၣ်ႉအိၣ်လၢ(စံကိ)သ၀ီကျဲမုၢ်ခိၣ်န့ၣ်တဂၤႇလၢကျးနုာ်လီၤန့ၣ်တဂၤႇမတၤတဂၤမးက့ၤကွၢ်တဘူၣ်ဒံးဘၣ်ႉ ကမျၢၢ်တဖၣ်စံၣ်ထီၣ်၀ဲလၢတၢ်စူၤကျါတနၤဃီအဃိခဲအံၤတၢ်လိၣ်တၢ်လဲးဒုအိၣ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါဖဲလါယူၤလံ ၁၆ သီအနံၤ ပယီၤသုးလၢအနုာ်လီၤတဖၣ်အံၤဖဲအ၀ဲသ့ၣ်ကဟးထီၣ်လၢသ၀ီပူၤအခါ ဖီၣ်၀ဲဒၣ်ၦၤသ၀ီဖိလၢဟဲက့ၤလၢသ၀ီပူၤတဖၣ်အံၤဒီးသ၀ီဖိလၢအစံၣ်အိၣ်ခူသူၣ်ဖဲသ၀ီပူၤတဖၣ်အံၤတနီၤ၀ံၤ ဟါခီမးပျၢ်လီၤက့ၤ၀ဲ အဂ့ၢ်န့ၣ် ဟီၣ်က၀ီၤၦၤဟ့ၣ်တၢ်ကစီၣ်ဖိစံး၀ဲအသိး သ့ၣ်ညါဘၣ်န့ၣ်လီၤႉ “အ၀ဲသ့ၣ်အိၣ်လၢ(ကယၣ်၀့စ့ၣ်)တိၤန့ၣ်အဖၢမုၢ်လီၤႉလၢန့ၣ်တကပၤန့ၣ်အ၀ဲသ့ၣ်ဆီလီၤအၦၤဒီတကျိၤလီၤႉ ၦၤလၢပယီၤသုးဖီၣ်အီၤအဟဲက့ၤထူၣ်ဖျဲးထီၣ်တဖၣ်န့ၣ်တဲ၀ဲလၢပယီၤသုးတဲ၀ဲလၢကထီၣ်ဟံန့ၢ်၀ဲတၢ်ပၢၢ်ဆၢသုးကရူၢ်အသုးကလၢၤခဲလၢာ်လီၤႉတဲ၀ဲလၢအိၣ်ခိးကွၢ်ကဒိးလီၤဟီၣ်လာ်မ့ၣ်ပိၢ်လၢကျဲဒီတဘိလီၤ”အဂ့ၢ်န့ၣ် လီၢ်က၀ီၤကမျၢၢ်လၢအဂၤတဂၤစ့ၢ်ကီး စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးဖဲအပူၤကွံာ်လါယူၤလံ ၁၁ သီအခါစ့ၢ်ကီး ခီဖျိပယီၤသုးမျိာ်သုးရ့ၣ်(အမတ–၃၁၄)ခးလီၤကျိဖးဒိၣ်ဆူ စွ့ၤယီၤပၠၣ်ကရူၢ် သ၀ီတဖၣ်အပူၤအဃိ စွ့ၤယီၤပၠၣ်သ၀ီဖိအဟံၣ်ဟးဂီၤ၀ဲ(၂)ဖျၢၣ်အသိး ဖဲလါယူၤလံ ၇ သီအခါ စ့ၢ်ကီး ခီဖျိကျိဖးဒိၣ်လီၤတဲာ်ပိၢ်ဖးထိၣ်လၢစွ့ၤယီၤပၠၣ်သ၀ီပူၤအဃိ ကမျၢၢ်ဘၣ်ဒိ(၆)ဂၤအကျါ မ့မ့ၢ်နီၢ်တ့ၤအ့အံၤအဘၣ်ဒိနးအဃိ သံကွံာ်၀ဲအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲလါယူၤလံ ၁၆ သီအနံၤန့ၣ်လီၤႉ ဒ်န့ၣ်အသိးသုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢခ့ၣ်အဲၣ်ယူၣ်(သုးက့ ၁)တၢ်ပၢဟီၣ်က၀ီၤ ဒူသထူၣ်ကီၢ်ရ့ၣ်အပူၤ ခီဖျိပယီၤသုးခးလီၤကျိဖးဒိၣ်အဃိ ကမျၢၢ်သံ၀ဲ(၃၂)ဂၤႇဘၣ်ဒိ၀ဲ(၈၃)ဂၤအဂ့ၢ်န့ၣ်...
ဖိသၣ်သံ ၁ ဂၤ ခီဖျိယီၣ်ဘၣ်ဟီၣ်လ၁်မ့ၣ်ပိၢ်လၢပယီၤသုးဒိးလီၤဃ၁်၀ဲအံၤအဃိ
လါယူၤလံ ၁၈ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၁)တၢ်ပၢဟီၣ်က၀ီၤ ဒူသထူၣ်ကီၢ်ရ့ၣ် ကၠဲၣ်ထိၤကီၢ်ဆၣ်အပူၤ ၀ါဒၣ်ကွ့သ၀ီ ဖိသၣ်(၁၃)နံၣ်တဂၤ ခီဖျိအယီၢ်ဘၣ်ဟီၣ်လာ်မ့ၣ်ပိၢ်လၢပယီၤသုးဒိးလီၤဃာ်၀ဲအံၤအဃိသံ၀ဲဒၣ်အဂ့ၢ်န့ၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ထုုးထီၣ်ပာ်ဖျါ၀ဲဖဲလါယူၤလံ ၁၇ သီအနံၤန့ၣ်လီၤႉ ဖဲအပူၤကွံာ်လါယူၤလံ ၁၃ သီအနံၤ ၀ါဒၣ်ကွ့သ၀ီ မီၤအ့ခၠါ(၁၃)နံၣ်အံၤ ခီဖျိအယီၢ်ဘၣ်၀ဲဟီၣ်လာ်မ့ၣ်ပိၢ်လၢ ပယီၤသုးတြိၤ(၄၄)စုတီၤဖီလာ်ခီၣ်သုးရ့ၣ်(ခမရ–၂၀၇)ဒိးလီၤဃာ်၀ဲအံၤအဃိ သံ၀ဲတဘျီဃီဖဲတၢ်ကဲထီၣ်သးလီၢ်အဂ့ၢ်န့ၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ဒ်န့ၣ်အသိးကၠဲၣ်ထိၤကီၢ်ဆၣ်ပူၤပယီၤသုးကျိၤ(၄၄)စုတီၤဖီလာ်သုးရ့ၣ်တၢ်သမံသမိးတြဲၤအံၤခးလီၤကျိဖးဒိၣ် လီၤတဲာ်ပိၢ်ဖးထီၣ်၀ဲလၢ(မိၣ်ပလ့ၤ)သ၀ီဃၢၤ အ့သီခါဖၠၣ်ကရၢၢ်ပူၤအဃိ တၢ်သူၣ်ထီၣ်ဟးဂီၤ၀ဲ(၂)ဖျၢၣ်ဒီး ဘၣ်၀ဲဒၣ်(ဖံ၀ါ) မၣ်စၤယံၤအစုကဲထီၣ်တ့ၢ်အသးဒံးအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ တကးဒံးဘၣ်လၢန့ၣ်အမဲာ်ညါလၢဒူသထူၣ်ႇဘံလ့ဒီးကၠဲၣ်ထိၤကီၢ်ဆၣ် ၀့ၢ်တကူၣ်–မီၣ်လမၠဲၣ်ကျဲဒီတဘိန့ၣ်စ့ၢ်ကီး တၢ်ဒုးကဲထီၣ်၀ဲလၢပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇ(တောကျီးကန်း)သုးကျိၤအဘၢၣ်စၢၤခဲအံၤခဲအံၤအသိး ပယီၤသုးခးလီၤကျိဖးဒိၣ်ဆူသ၀ီလၢအိၣ်ဘူးတၢ်ခိၣ်တၢ်ဃၢၤဖဲန့ၣ်သ့ၣ်တဖၣ်အပူၤအဂ့ၢ်န့ၣ် (တောကျီးကန်း) သုးကျိၤ အၦၤသုးဖိတဂၤ စံး၀ဲဒ်အံၤန့ၣ်လီၤႉ “ပယီၤသုးဒုခးလီၤကျိဖးဒိၣ်လၢသ၀ီပူၤအိၣ်ကိးမုၢ်နံၤဒဲးလီၤႉတၢ်လီၢ်လၢအ၀ဲသ့ၣ်ဆိမိၣ်၀ဲလၢပဟူးဂဲၤအိၣ်အလီၢ်နါက့အ၀ဲသ့ၣ်ခးလီၤ၀ဲစ့ၢ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါခီဖျိ(ကင်မွန်း)ပၢၤကီၢ်၀ဲၤလီၢ်ဒီးသုးတြိၤ(၄၄)တဖၣ်အံၤခးလီၤကျိဖးဒိၣ်ဆူကၠဲၣ်ထိၤကီၢ်ဆၣ် ငပၠီတီႇ မိၣ်ပလ့ၤသ၀ီပူၤတလီၢ်လီၢ်အဃိ သ၀ီဖိတဖၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ် ဒူသထူၣ်ကီၣ်ရ့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်လါယူၤလံ ၁၁ သီအခါစ့ၢ်ကီး ခီဖျိပယီၤသုးနီၣ်ဂံၢ်(၃၁၄)မျိာ်သုးရ့ၣ် ခးလီၤကျိဖးဒိၣ်ဆူ သထူၣ်ကီၢ်ဆၣ် စွ့ၤယီၤပၠၣ်ကရူၢ်ပူၤအဃိ ဘၣ်ဟးဂီၤ၀ဲကမျၢၢ်အဟံၣ်(၁)ဖျၢၣ်ႇကၠိႇကသံၣ်ဒၢးဒီး တၢ်သူၣ်ထီၣ်တနီၤဒံး န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢကၠဲၣ်ထိၤကီၢ်ဆၣ်အပူၤပယီၤသုးတၢ်သမံသမိးတြဲၤလီၢ်သ့ၣ်တဖၣ်အံၤဟဲအါထီၣ်၀ဲဒီးခီဖျိပယီၤသုးတဖၣ်အံၤခိးထၢအီၣ်စ့လၢကမျၢၢ်ဟးထီၣ်က့ၤလီၤတဖၣ်အအိၣ်ႇတပျဲၦၤစိာ်ထီၣ်စိာ်လီၤပနံာ်တၢ်ဖိတၢ်လံၤဘၣ်အဃိပနံာ်တၢ်ဖိတၢ်လံၤလဲၤလီၤတုၤဆဲးခံ၀ဲဒီးလီၢ်က၀ီၤကမျၢၢ်တဖၣ်စ့ၢ်ကီးတၢ်ကီတၢ်ခဲအိၣ်ထီၣ်လၢတၢ်လုၢ်အီၣ်နီၢ်ခိသးသမူတကပၤအဂ့ၢ်န့ၣ်...
ဒ်သိးပကတုၤလၢဖီတၢၣ်ချ့ချ့အဂီၢ်ကမျၢၢ်ထံဖိကီၢ်ဖိခဲလၢ၁်ကပ၁်ဖှိၣ်ဖီၣ်လိ၁်စုအဂ့ၢ်(KNDO)သုးရိၣ်မဲခိၣ်ကျၢၢ် ဆီၣ်တခူထီၣ်၀ဲ
လါယူၤလံ ၁၇ သီႇ ၂၀၂၃ နံၣ်ႇ ခ့ၣ်အဲးစံၣ် ဒ်သိးဖီတၢၣ်လၢကမျၢၢ်ထံဖိကီၢ်ဖိမုၢ်လၢ်ကွၢ်စိ၀ဲအံၤကတုၤချ့ချ့အဂီၢ်ဒီးလၢကညီဒီကလုာ်တၢ်ကရၢကရိ ကလဲၤထီၣ်လဲၤထီအဂီၢ်န့ၣ် ကမျၢၢ်ထံဖိကီၢ်ဖိခဲလၢာ်ကပာ်ဖှိၣ်ဖီၣ်လိာ်စုမၤသကိးတၢ်ဃူဃူဖိးဖိးအဂ့ၢ်န့ၣ် ကညီဒီကလုာ်ဂၢၤသးကရၢ(KNDO)သုးရိၣ်မဲခိၣ်ကျၢၢ် သုးခိၣ်ကျၢၢ်ဖိ စီၤဆှံလ့ၢ် စံးလီၤဆီၣ်တခူထီၣ်၀ဲဖဲလါယူၤလံ ၁၆ သီ ကညီဒီကလုာ်ဂၢၤသးကရၢ(KNDO)မုၢ်နံၤမူးတၢ်ရဲၣ်တၢ်ကျဲၤအပူၤန့ၣ်လီၤႉ ၇၆ ၀ီတ၀ီ ကညီဒီကလုာ်ဂၢၤသးကရၢ(KNDO)မုၢ်နံၤ တၢ်ရဲၣ်တၢ်ကျဲၤအံၤ ဘၣ်တၢ်မၤအီၤဖဲ(KNDO) လီၢ်ခၢၣ်သး၀ဲၤလီၢ်ခိၣ်သ့ၣ်ဒီးတၢ်ရဲၣ်တၢ်ကျဲၤအပူၤ(KNDO)သုးရိၣ်မဲခိၣ်ကျၢၢ် သုးခိၣ်ကျၢၢ်ဖိ စီၤဆှံလ့ၢ်စံးလီၤ၀ဲလၢ ဒ်သိးဖီတၢၣ်လၢကမျၢၢ်ထံဖိကီၢ်ဖိမိၢ်န့ၢ်သးလီ၀ဲအံၤကတုၤချ့ချ့အဂီၢ်ပကပာ်ဖှိၣ်ဖီၣ်လိာ်စုမၤသကိးတၢ်အဂ့ၢ်န့ၣ် စံး၀ဲန့ၣ်လီၤႉ “ပ၀ဲဒၣ်ကဒဲကဒဲပမ့တဃူတဖိးႇပမ့တဖီၣ်လိာ်စုမၤသကိးတၢ်ဘၣ်န့ၣ်ပဒုၣ်ပဒါလၢအမ့ၢ်သုးမီၤစိရိၤအံၤ တလိၣ်လၢကဘၣ်ဟဲမၤလီၤမုၢ်ပြံပြါၦၤလၢၤဘၣ်ဒီးပကလီၤမုၢ်ပြံပြါ၀ဲန့ၣ်လီၤႉ လၢတၢ်န့ၣ်အဃိဒ်သိးပတၢ်ကရၢကရိ ကလဲၤထီၣ်လဲၤထီအဂီၢ်ပကပာ်ဖှိၣ်ဖီၣ်လိာ်စုမၤသကိးတၢ်တပူၤဃီဃူဃူဖိးဖိး”အဂ့ၢ်န့ၣ် စံးလီၤ၀ဲလၢ တၢ်ရဲၣ်တၢ်ကျဲၤမူး အပူၤန့ၣ်လီၤႉ တၢ်မၤ၀ဲကညီဒီကလုာ်ဂၢၤသးကရၢ(KNDO) ၇၆ ၀ီတ၀ီတၢ်ရဲၣ်တၢ်ကျဲၤမူးဘျီ၀ဲအံၤအပူၤန့ၣ် ခ့ၣ်အဲၣ်ယူၣ် နဲၣ်ရွဲၣ်ခိၣ်ကျၢၢ်သဃဲၤ(၂) ပဒိၣ်စီၤလၣ်ထိ, တၢ်ပၢၢ်ဆၢခိၣ်နၢ်ဒိၣ်ထီ ပဒိၣ်စီၤသမ့ၤထိႇ (KNDO)သုးရိၣ်မဲခိၣ်ကျၢၢ် သုးခိၣ်ကျၢၢ်ဖိ စီၤဆှံလ့ၢ်ဒီး ဂၢၤသးကရၢၦၤသုးဖိႇၦၤကၠိဖိဒီးၦၤကမျၢၢ်ဟဲထီၣ်၀ဲခဲလၢာ်အဂၤ(၃၀၀)ဃၣ်ဃၣ်န့ၣ်လီၤႉ သးစၢ်လၢအဟဲထီၣ်တၢ်ရဲၣ်တၢ်ကျဲၤမူးအံၤတဂၤစံး၀ဲလၢ“(KNDO)အံၤဘၣ်ဟးထီၣ်၀ဲဒၣ်လၢအ့စ့ၣ်တၢ်ဒုးပူၤ လၢကျိချံၦာ်သၣ်တလၢတၦဲၤဘၣ်အံၤအဃိဘၣ်ဆၣ်ႇလၢကညီတၢ်ပၢၢ်ဆၢအပူၤမ့ၢ်တၢ်ကရၢကရိတဒူၣ်လၢ အမၤသီၣ်ထီၣ်ကျိအဆိကတၢၢ်လီၤႉဒ်ယမ့ၢ်ကညီသးစၢ်တဂၤအသိးယသးခုဒိၣ်မးလၢယဟဲထီၣ်မၤလၤကပီၤဘၣ် (KNDO)မုၢ်နံၤအံၤဒိၣ်မးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးတၢ်ရဲၣ်တၢ်ကျဲၤဘျီ၀ဲအံၤအပူၤ(KNDO)သုးရိၣ်မဲခိၣ်ကျၢၢ် သုးခိၣ်ကျၢၢ်ဖိ စီၤဆှံလ့ၢ် စံးကတိၤလီၤတၢ်လၢ (၇၆)၀ီတ၀ီၦဲၤထီၣ်(KNDO)မုၢ်နံၤအဂီၢ်အံၤ ၀ံၤလီၢ်ခံ ခိၣ်နၢ်လၢအဟဲထီၣ်တၢ်ရဲၣ်တၢ်ကျဲၤအံၤတဖၣ်စ့ၢ်ကီး ကတိၤဆှဲပၠးလီၤ၀ဲဒၣ်(KNDO)ဂၢၤသးကရၢဟဲကဲထီၣ်သးအဂ့ၢ်အကျိၤဒီးတကးဒံးဘၣ်အမဲာ်ညါတၢ်ဖးဖျါထီၣ်၀ဲလံာ်ဟ့ၣ်ယုၢ်သ့ၣ်တဖၣ်န့ၣ်လီၤႉ ကီၢ်ပယီၤတၢ်သဘျ့န့ၢ်၀ံၤလီၢ်ခံ ကညီကလုာ်သ့ၣ်တဖၣ်အံၤဒ်သိးအ၀ဲသ့ၣ်ကဒိးန့ၢ်ဘၣ်ကညီကီၢ်စဲၣ်အဂီၢ် အ၀ဲသ့ၣ် လဲၤပာ်ဖျါထီၣ်တၢ်ဘၣ်သးဃ့ထီၣ်၀ဲလၢ(ဖဆပလ)ပဒိၣ်အအိၣ်လၢတၢ်မုာ်တၢ်ခုၣ်အပူၤဘၣ်ဆၣ် ခီဖျိတၢ်တတူၢ်လိာ်၀ဲဘၣ်အဃိ လၢတၢ်အိၣ်ကတဲၤကတီၤထီၣ်သးဒီးတၢ်ကဒီသဒၢလီၤက့ၤကညီဖိအံၤအဂီၢ် ဖဲ(၁၉၄၇)နံၣ်ႇလါယူၤလံ(၁၆)သီအနံၤန့ၣ် တၢ်ဒုးအိၣ်ထီၣ်၀ဲ(KNDO)အံၤလၢအပၣ်ဃုာ်ဒီးတၢ်ပညိၣ်(၃)ထံၣ်အံၤ...
သုးမီၤစိရိၤမၤကမၣ်ၦၤဂ့ၢ်၀ီခွဲးယ၁်အဃိ သ၀ီ(၁၆)ဖျၢၣ် ကမျၢၢ်(၁)ကလးဘျဲၣ်ဘၣ်ဃ့ၢ်ထီၣ်
လါယူၤလံ ၁၇ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)ဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ် ဆီထံးကီၢ်ဆၣ်အပူၤ ခီဖျိသးမီၤစိရိၤမၤကမၣ်ၦၤဂ့ၢ်၀ီခွဲးယာ်ဒီးသုးကျိၤနုာ်လီၤလၢဒူသ၀ီတဖၣ်အပူၤအဃိ သ၀ီ(၁၆)ဖျၢၣ် ကမျၢၢ်(၁၄ႇ၁၁၇)ဂၤ ဘၣ်ဃ့ၢ်မှံဟးဖျိး၀ဲအဂ့ၢ်န့ၣ် (ခ့ၣ်အဲၣ်ယူၣ်)လီၢ်ခၢၣ်သးထုးထီၣ်ပာ်ဖျါ၀ဲဖဲလါယူၤလံ ၁၅ သီ အနံၤ န့ၣ်လီၤႉ ပယီၤသုးခီၣ်ချ့သုးရ့ၣ်(ခမရ–၂၀)ဒီးခီၣ်သုးရ့ၣ်(ခလရ–၂၆၄)တဖၣ်အံၤခးလီၤကျိဖးဒိၣ်လၢသ၀ီတဖၣ်ပူၤအသိး ပယီၤတဖၣ်အံၤတပျဲသ၀ီဖိကလဲၤထီၣ်ၦ့ၤတၢ်အီၣ်တၢ်အီလၢ၀့ၢ်ပူၤဘၣ်ဒီးမ့ၢ်ထံၣ်လၢၦၤစိာ်တၢ်အီၣ်တၢ်အီန့ၣ် အ၀ဲသ့ၣ်ဖီၣ်ဒီးဟံးကွံာ်၀ဲၦၤဖိတၢ်လံၤသ့ၣ်တဖၣ်အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးလံာ်တၢ်ပာ်ဖျါအပူၤ စံး၀ဲန့ၣ်လီၤႉ တကးဒံးဘၣ်လၢန့ၣ်အမဲာ်ညါခီဖျိပယီၤသုး(ခမရ–၂၀)ဒီး(ခလရ-၂၆၄)သ့ၣ်တဖၣ်အံၤခးလီၤကျိဖးဒိၣ်လၢသ၀ီပူၤ အဃိအီၣ်မိခိၤသ၀ီႇစွ့ၤခဲစူၣ်ႇအ့ကၠဲၣ်ႇအ့ပ၀ၤႇကွ့ကိႇခၠိၤအ့ဒီးကီၣ်မဲၣ်သူၤသ၀ီဖိသ့ၣ်တဖၣ်အံၤဘၣ်ဃ့ၢ်ထီၣ်၀ဲဒီး ပယီၤသုးတဖၣ်အံၤနုာ်လီၤဟံးန့ၢ်ကမျၢၢ်အတၢ်ဖိတၢ်လံၤလၢသ၀ီပူၤအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ ဒ်န့ၣ်အသိးခီဖျိတၢ်ဒုးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ် ၇ စုတီၤဖီလာ်သုးပာ်ဖှိၣ် တဖၣ်အံၤဒီးပယီၤသုးအဘၢၣ်စၢၤအဃိသ၀ီလၢအိၣ်ဘူးတၢ်ဃၢၤဖဲန့ၣ်တဖၣ်လၢအမ့ၢ်ပၠံၤယ့ၤသ၀ီႇ၀ဲၤကၠိႇသဲၣ်တူကိႇ ညီၤပ့ၤကၠံယွၤသ့ၣ်ႇညီၤပ့ၤကၠံယွၤမၣ်ႇစၣ်စူၣ်ႇသဲၣ်ကဲၤကိႇအ့ၤကနံၤႇကၠီၣ်တါႇစၤဖဲသ၀ီဖိတဖၣ်စ့ၢ်ကီးဘၣ်ဃ့ၢ်ထီၣ်၀ဲ အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်လါယူၤလံ ၁၄ သီအခါစ့ၢ်ကီး လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ် စၣ်ဟၤသ၀ီႇယ့ၤတွ့ကိလ့ဒီးကၠံယိသ၀ီပူၤ ကမျၢၢ်ခဲလၢာ်(၃ႇ၃၃၅)ဂၤ ဘၣ်ဃ့ၢ်ထီၣ်၀ဲတုၤလၢခဲအံၤတစုန့ၣ်လီၤႉ
တၢ်ဒုးကဲလၢကီးတရံး၀့ၢ်(နီၣ်ဂံၢ် ၃)တြဲၤဒီးတတါအူက၀ီၤဒ့ခိၣ်ထိးအဃိ ခံခီခံကပၤတၢ်ဘၣ်ဒိဘၣ်ထံးအိၣ်
လါယူၤလံ ၁၄ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲမဟါလါယူၤလံ ၁၃ သီ ဂီၤခီအဆၢကတီၢ် ခီဖျိကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်သုးကျိၤ နုာ်လီၤခး၀ဲတတါအူက၀ီၤဒ့ဒီးကီးတရံး(နီၣ်ဂံၢ် ၃)တၢ်သမံသမိးတြဲၤလီၢ်အံၤအဃိ ခံခီခံကပၤတၢ်ဘၣ်ဒိဘၣ်ထံး အိၣ်၀ဲအဂ့ၢ်န့ၣ် (KNLA)ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤႉ ပယီၤသုးခီၣ်သုးရ့ၣ်(ခလရ–၉၇)လၢအိၣ်ဆီလီၤသးဖဲကီးတရံးအံၤ(KNLA)သုးပာ်ဖှိၣ်လဲၤခးအ၀ဲသ့ၣ် ကအိၣ်ကိးမုၢ်နံၤဒဲး ဃၣ်ဃၣ်ညါဒီး တုၤလၢတနံၤအံၤလါယူၤလံ ၁၄ သီအနံၤ တၢ်ဒုးကဲဒံးထီၣ်၀ဲဒီး ဘၣ်ဃးတၢ်ဒုးကဲထီၣ်ဖဲမဟါခံခီခံကပၤ တၢ်ဘၣ်ဒိဘၣ်ထံးတၢ်အိၣ်သးအံၤန့ၣ် (KNLA)သုးဂ့ၢ်၀ီ ဂံၢ်ခီၣ်ထံး ၦၤဟ့ၣ်တၢ်ကစီၣ်ဖိတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲဂီၤခီန့ၣ်တၢ်ခးလိာ်သးကဲထီၣ်လၢ(နီၣ်ဂံၢ် ၃)တၢ်သမံသမိးတြဲၤဒီးတတါအူက၀ီၤဒ့ခိၣ်ထိးန့ၣ်ႉ တၢ်ပၢၢ်ဆၢသုးပာ်ဖှိၣ်တကပၤန့ၣ်ဘၣ်ဒိ(၂)ဂၤႉမ့မ့ၢ်ပယီၤသုးတကပၤခီန့ၣ်ဖဲအ၀ဲသ့ၣ်ဆၢထၢၣ်ဖဲတၢ်ကပၤလွံၢ်ဂၤန့ၣ် ၦၤခးအီၤဘၣ်လွံၢ်ဂၤလၢာ်လီၤႇယဆိမိၣ်အသံကအါမီၤနီၤႉပယီၤသုး(၉၇)သုးရ့ၣ်နါက့ခးလီၤစိကျိဖးဒိၣ်လၢယီၣ်ကိာ်ႇ ကၠီၤစှၤကိတကပၤန့ၣ်ႉခးလီၤကျိဖးဒိၣ်အဖၢမုၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲခံခီခံကပၤတၢ်ခးလိာ်သးကဲထီၣ်အခါလီၢ်က၀ီၤသ၀ီဖိတဖၣ်နုာ်လီၤစံၣ်အိၣ်လၢတၢ်ပူၤအိၣ်၀ဲအသိး လီၢ်က၀ီၤသ၀ီဖိလၢ အသူၣ်အီၣ်ဘုတဖၣ်စ့ၢ်ကီးဘၣ်ပတုာ်ကွံာ်အတၢ်ဖံးတၢ်မၤဒီးလဲၤစံၣ်ထီၣ်အိၣ်၀ဲလၢကစၢၢ်ခိၣ်အိၣ်၀ဲအသိးပျံၤ၀ဲလၢကဘီယူၤကဟဲခးလီၤတၢ်အဂ့ၢ်န့ၣ် (KNLA)ဂံၢ်ခီၣ်ထံးၦၤဟ့ၣ််တၢ်ကစီၣ်ဖိတဂၤဃီ၀ဲန့ၣ် စံးအါထီၣ်၀ဲ န့ၣ်လီၤႉ ဖဲအပူၤကွံာ်လါယူၤအခါစ့ၢ်ကီးခီဖျိပယီၤသုးမၤဟးဂီၤကွံာ်ကီးတရံးကလံၤစိးဒူသ၀ီကျဲကအိၣ်လၢ(၅)တီၤညါအဃိ လီၢ်က၀ီၤကမျၢၢ်သိလ့ၣ်တဖၣ်ကလဲၤထီၣ်လၢ၀့ၢ်ပူၤအဂီၢ်တၢ်ကီတၢ်ခဲအိၣ်ထီၣ်၀ဲဒီးဘၣ်လဲၤက့ၤ၀ဲလၢသိလ့ၣ်ယီၢ်(ဆဲးကဲး)အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ “ခဲအံၤပယီၤသုးမၤဟးဂီၤ(ကၤမရဲၣ်ကျဲ)ႇယီၣ်ကိာ်ကျဲႇတတါအူကျဲအဃိသိလ့ၣ်လဲၤတန့ၢ်လၢၤဘၣ်ႉလဲၤန့ၢ်က့ၤလၢဆဲးကဲးလီၤႉၦၤနီဆဲးကဲးဖိမ့လဲၤလၢ၀့ၢ်ပူၤန့ၣ်ပယီၤသုးသမံသမိး၀ဲမီၤနီၤႉသံကွၢ်၀ဲမ့ၢ်သုဟဲၦ့ၤန့ၢ်စုသၢဘိ(PDF)တၢ်အီၣ်တၢ်အီဧါႇသုထံၣ်အီၤဖဲလဲၣ်ႉနစံးဆၢအီၤမ့တဘၣ်ဘၣ်န့ၣ်အ၀ဲသ့ၣ်ဖီၣ်ဃာ်နၤမၢသ၀ီသးၦၢ်လဲၤရ့ထီၣ်၀ံၤမးပျၢ်လီၤက့ၤ၀ဲ”အဂ့ၢ်န့ၣ် သ၀ီဖိတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တကီၢ်ခါခဲအံၤလၢကီးတရံးကလံၤထံးတီၤကၠၤအ့သ၀ီႇကြုၢ်တုႇ(၅)တၢၣ်ဒီး(၉)တၢၣ် တကးဒံးဘၣ်အမဲာ်ညါ လၢကီးတရံးကလံၤစိး ယီၣ်ကိာ်ႇကၠီၤစှၤကိဒီးတတၤကူသ၀ီတကပၤန့ၣ် ကမျၢၢ်တဖၣ်ဘၣ်အခါလၢဘၣ်သူၣ်ဘုလံ အဃိ ဒိးသန့ၤထီၣ်သးလၢခံခီခံကပၤတၢ်အိၣ်သးဒီးဘၣ်ဖံးအီၣ်မၤအီၣ်မၤ၀ဲဒ်န့ၣ်လီၤအဂ့ၢ်န့ၣ် ၦၤမၤအီၣ်စံာ်ဖိတဖၣ် စံး၀ဲန့ၣ်လီၤႉ
ပယီၤသုးဒီး(BGF)ဟးထီၣ်က့ၤလီၤဟူးဂဲၤအါထီၣ်လၢလူၢ်ပျဲၢ်၀့ၢ်ပူၤ
လါယူၤလံ ၁၄ သီႇ ၂၀၂၃ နံၣ်ႇ ခ့ၣ်အဲးစံၣ် တလါအံၤလါယူၤလံအတီၢ်ပူၤ လၢဖၣ်အၣ်ကီၢ်ရ့ၣ် လူၢ်ပျဲၢ်၀့ၢ်ပူၤ ခီဖျိပယီၤသုးဒီးသုးခိးကီၢ်ဆၢ(BGF) ဟးထီၣ်က့ၤလီၤ ဟူးဂဲၤဟဲအါထီၣ်အဃိ လီၢ်က၀ီၤကမျၢၢ်တဖၣ်ဘၣ်ယိၣ်၀ဲလၢတၢ်ဒုးကကဲထီၣ်လၢဟီၣ်က၀ီၤပူၤ န့ၣ်လီၤႉ စးထီၣ်ဖဲတလါအံၤလါယူၤလံထီၣ်န့ၣ်လၢလူၢ်ပျဲၢ်၀့ၢ်ပူၤဒီးတၢ်ကြဲၢ်ကီၢ်ဆၣ်အပူၤ ပယီၤသုးဒီးအ၀ဲသ့ၣ်စုတီၤဖီလာ် သုးခိးကီၢ်ဆၢ(BGF)တဖၣ်အံၤဟးဆှၣ်တၢ်တနံၤန့ၣ်အိၣ်ခံဘျီညါအဂ့ၢ်န့ၣ် လူၢ်ပျဲၢ်၀့ၢ်ပူၤကမျၢၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“အ၀ဲသ့ၣ်ဟးဆှၣ်တၢ်ဖဲ၀့ၢ်ပူၤအံၤတနံၤခံဘျီညါႉသိလ့ၣ်နါက့နီ၀ဲဆူၣ်မးႉနလဲၤတဘျီန့ၣ် လွံၢ်ဂၤယဲၢ်ဂၤစိာ်ဒီး ကျိချံၦာ်သၣ်လၢလၢၦဲၤၦဲၤလီၤ”အဂ့ၢ်န့ၣ် စံး၀ဲန့ၣ်လီၤႉ ဖဲအ၀ဲသ့ၣ်ဟးဆှၣ်တၢ်အခါန့ၣ်အ၀ဲသ့ၣ်တဟးဆှၣ်တၢ်ဒီးသုးသိလ့ၣ်ဖးဒိၣ်ဘၣ်မ့မ့ၢ်တခီဟးဆှၣ်တၢ်ဒီးသုးသိလ့ၣ်ဖိအစှၤကတၢၢ်(၅)ခိၣ်လီၤအသိးအ၀ဲသ့ၣ်ကူကၤထီၣ်၀ဲသုးတၢ်ကူတၢ်ကၤ(ယူၣ်နံၣ်ဖီ)ႇစိာ်ဃုာ်၀ဲကျိချံၦာ်သၣ်လၢလၢၦဲၤၦဲၤအဂ့ၢ်န့ၣ် ကမျၢၢ်လၢအထံၣ်တၢ်အံၤဒီးအမဲာ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါယူၤလံ ၁၃ သီအနံၤ န့ၣ်လီၤႉ ဟီၣ်က၀ီၤ၀ဲန့ၣ်အပူၤအိၣ်၀ဲဒၣ်လၢခ့ၣ်အဲၣ်ယူၣ် ဖၣ်အၣ်ကီၢ်ရ့ၣ်(သုးက့ ၇)တၢ်ပၢဟီၣ်က၀ီၤပူၤဒီး ခံခီခံကပၤဒုးယၤ တၢ်ဖ့ၣ်စၢတအိၣ်၀ဲဘၣ်ဆၣ် ခီဖျိပယီၤသုးဒီး(BGF)ဟးဆှၣ်တၢ်လၢ၀့ၢ်ပူၤစိာ်ဃုာ်ကျိဒ်အံၤအဃိ တၢ်ကီတၢ်ခဲအိၣ်ထီၣ်လၢ လီၢ်က၀ီၤကမျၢၢ်ကဟးထီၣ်က့ၤလီၤအဂ့ၢ်န့ၣ် တၢ်ကြဲၢ်လီၢ်က၀ီၤကမျၢၢ် အူစါ၀့ စံး၀ဲဒ်အံၤ န့ၣ်လီၤႉ “ဖဲ၀့ၢ်ပူၤအံၤတၢ်ဒုးကဲထီၣ်တအိၣ်နီတမံၤဘၣ်ႇဒုးယၤတၢ်ဖ့ၣ်စၢစ့ၢ်ကီးကဲထီၣ်တအိၣ်ဘၣ်ႉအ၀ဲသ့ၣ်မၤထီၣ်အမဲာ်သၣ် ဒ်သိးကမၤသံကမျၢၢ်ထံဖိကီၢ်ဖိႇစိာ်ထီၣ်ကျိဟးဆှၣ်တၢ်ဒီးသိလ့ၣ်လၢ၀့ၢ်ပူၤႉအိၣ်တဘျီန့ၣ်သၢပၣ်သိလ့ၣ်တခိၣ် လဲခီတဲာ် အ၀ဲသ့ၣ်သိလ့ၣ်မဲာ်ညါဘျီဆိၣ်၀ဲထု၀ဲညါ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢ(ခ့ၣ်အဲၣ်ယူၣ်)ဖၣ်အၣ်ကီၢ်ရ့ၣ်အပူၤတၢ်ဒုးကဲထီၣ်တအိၣ်ဒံး၀ဲဘၣ်ဆၣ် လၢလူၢ်ပျဲၢ်၀့ၢ်ကျဲနုာ်လီၤဟးထီၣ်တၢ်လီၢ်တဖၣ်န့ၣ်ပယီၤသုးဆီလီၤတြဲၤအိၣ်ခိးသမံသမိးကမျၢၢ်လၢအလ့ၢ်ထီၣ်လ့ၢ်လိၤ တဖၣ်ဒီးထၢ၀ဲစ့အဂ့ၢ်န့ၣ် သ့ၣ်ညါဘၣ်လၢကမျၢၢ်လ့ၢ်ထီၣ်လ့ၢ်လိၤဖဲန့ၣ်တဖၣ်အအိၣ်န့ၣ်လီၤႉ
ကီၢ်ပယီၤထံကီၢ်ဒီတဘ့ၣ်အပူၤခီဖျိသဲစးတၢ်ဒိၣ်စိသနူဟးဂီၤအဃိ တၢ်ဟုၣ်တၢ်ဘျၣ်ဟဲအါထီၣ်
လါယူၤလံ ၁၄ သီႇ ၂၀၂၃ နံၣ်ႇ ခ့ၣ်အဲးစံၣ် ကီၢ်ပယီၤထံကီၢ်ဒီတဘ့ၣ်အပူၤသုးမီၤစိရိၤပၢတၢ်အစိၤအံၤခီဖျိသဲစးတၢ်ဒိၣ်စိသနူဟးဂီၤဒီးထံကီၢ်တဂၢၢ်တကျၢၤလၢၤဘၣ်အဃိတၢ်လုၢ်အီၣ်နီၢ်ခိသးမူတၢ်ဃံးတၢ်စ့ၤအိၣ်ထီၣ်အဖီခိၣ်တၢ်ဟုၣ်တၢ်ဘျၣ်ဟဲအါထီၣ်၀ဲဒၣ်လၢခူပူၤ၀့ၢ်ပူၤႇ သ၀ီပူၤအဂ့ၢ်န့ၣ် ကမျၢၢ်လၢအသဂၢၢ်ဘၣ်ဒီးတၢ်ကဲထီၣ်သးလၢအနီၢ်ကစၢ်အံၤတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ ဒ်တကီၢ်ခါတၢ်အိၣ်သးခဲအံၤအသိးန့ၣ်ခီဖျိတၢ်ဟုၣ်တၢ်ဘျၣ်ဟဲအါထီၣ်၀ဲလၢခူပူၤ၀့ၢ်ပူၤဒူသ၀ီပူၤအဃိ ၦၤပိာ်မုၣ်မ့ၢ်ဂ့ၤႇၦၤပိာ်ခွါမ့ၢ်ဂ့ၤမုၢ်နၤမုၢ်ဆါအ၀ဲသ့ၣ်ဘၣ်ဟးထီၣ်က့ၤလီၤလၢတၢ်ပလီၢ်ပဒီပူၤအသိး လၢတၢ်ကဟံမူဒါ ဘှါဆှဲတၢ်ဂ့ၢ်သ့ၣ်တဖၣ်အံၤအဂီၢ်စ့ၢ်ကီးတၢ်နာ်အီၣ်ပၢၤကီၢ်သုးတဖၣ်တအိၣ်လၢၤ၀ဲဘၣ်အဂ့ၢ်န့ၣ် ၀့ၢ်တကူၣ် ကမျၢၢ်တဂၤ စံး၀ဲဒ်အံၤန့ၣ်လီၤႉ “ဖဲလီၢ်ခံအံၤဟဲနးဒိၣ်ထီၣ်ကွ့ၢ်ကွ့ၢ်မီၤနီၤႉပၢၢ်တုၤလၢနဒိးအ(လိုင်းကား)မးတၢ်ဘံၣ်တၢ်ဘၢတအိၣ်လၢၤဘၣ်ႉ မုၢ်ဆါခီလံတကံၦၤဟးထီၣ်က့ၤလီၤမ့တအိၣ်ဘၣ်န့ၣ်အ၀ဲသ့ၣ်နဲၣ်ပၠးထီၣ်နၤဒီးဒီဂုာ်ဆူၣ်၀ဲနတၢ်ဖိတၢ်လံၤဒ်န့ၣ်မီၤနီၤႉ နလဲၤတၢၣ်လၢပၢၤကီၢ်၀ဲၤလီၢ်အအိၣ်နါက့အ၀ဲသ့ၣ်တဟံးထီၣ်ဖီၣ်ထီၣ်န့ၢ်နၤမူၤမူၤနီၢ်နီၢ်ဘၣ်ႉၦၤမ့ကိးပသူတၢ်ဟုၣ်တၢ်ဟုၣ်လံန့ၣ်မးၦၤအိၣ်လၢဟံၣ်ခိၣ်ဟံၣ်ဃၢၤတဖၣ်န့ၣ်တလူၤဖီၣ်စၢၤနၤဘၣ်ႉ”အဂ့ၢ်န့ၣ် စံး၀ဲန့ၣ်လီၤႉ ဒ်န့ၣ်အသိးကျးဆါတၢ်လၢအိၣ်က၀ီၤဒ့ပူၤက၀ီၤဒ့ချၢသ့ၣ်တဖၣ်စ့ၢ်ကီးခီဖျိအ၀ဲသ့ၣ်တၢ်ဖိတၢ်လံၤလီၤမၢ်ဟဲအါထီၣ်အဃိကျးကစၢ်တဖၣ်အါဒၣ်တက့ၢ်ဘၣ်အိၣ်ခိးကွၢ်အ၀ဲသ့ၣ်ကျးတပယူာ်ဃီန့ၣ်လီၤႉတၢ်ဂ့ၢ်မ့ကဲထီၣ်သးလၢတၢ်ဖိတၢ်လံၤလီၤမၢ်မ့လဲၤတၢၣ်လၢပၢၤကီၢ်၀ဲၤလီၢ်ဘၣ်ဆၣ်ႇတနၢ်ဟူတၢ်ဖိတၢ်လံၤအပရၢပစၢၢ်နီတမံၤဘၣ်အဂ့ၢ်န့ၣ် ဖၣ်အၣ်၀့ၢ် ကျးကစၢ်ပိာ်မုၣ်တဂၤ စံး၀ဲန့ၣ်လီၤႉ အ၀ဲစံး၀ဲလၢ“ယဆဲးကဲးန့ၣ်ယပာ်လၢကျးမဲာ်ညါမုၢ်ဆါခီလံတကံလီၤႉယသးပ့ၤနီၣ်သးတဘျးဖိလီၤယဆဲးကဲး လီၤမၢ်ႉ ဖဲလီၢ်ခံအံၤဆဲးကဲးလီၤမၢ်ဒ်န့ၣ်အါအဃိနဘၣ်ကွၢ်ဟုၣ်မၢ်မၢ်လီၤႇနလီၤတိၢ်တန့ၢ်နီတစဲးလၢၤဘၣ်ႉ နလဲၤတၢၣ်လၢပၢၤကီၢ်ဘၣ်ဆၣ်ယဆိမိၣ်အ၀ဲသ့ၣ်တမၤဃုာ်၀ဲဘၣ်ႉဘၣ်မနုာ်အဃိလဲၣ်န့ၣ်ၦၤဂၤဆဲးကဲးလီၤမၢ် ၦၤလဲၤတၢၣ်နါက့ပတနၢ်ဟူလၢက့ၤန့ၢ်ကဒါနီတဂၤဘၣ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ ကီၢ်ပယီၤပူၤထံရူၢ်ကီၢ်သဲးႇမုၢ်ကျိၤ၀ဲၤကွာ်မ့ဟးဂီၤန့ၣ်နကဖံးအီၣ်မၤအီၣ်တၢ်လၢတၢ်တီတၢ်လိၤပူၤတညီလၢၤဘၣ်အဃိ ကမျၢၢ်ထံဖိကီၢ်ဖိတဖၣ်တနီၤန့ၣ်မၤကမၣ်၀ဲတၢ်သ့ၣ်တဖၣ်အံၤအိၣ်ထီၣ်၀ဲအသိးပယီၤသုးအံၤပာ်ပနီၣ်၀ဲၦၤဟူးဂဲၤမၤတၢ်ပၢၢ်ဆၢဖိတဖၣ်အံၤလၢၦၤမၤကမၣ်ကွီၢ်မ့ၣ်ဖိႇဒုးလီၤ၀ဲလၢဃိာ်ပူၤဒီးမ့မ့ၢ်တခီအ၀ဲသ့ၣ်ပျၢ်လီၤကွံာ်ၦၤမၤကမၣ်ကွီၢ်မ့ၣ်ဖိစဲၤနီၢ်အံၤလၢဃိာ်ပူၤအဂ့ၢ်န့ၣ် ၦၤဃုသ့ၣ်ညါပဲာ်ထံနီၤဖးထံရူၢ်ကီၢ်သဲးဖိတနီၤ စံး၀ဲန့ၣ်လီၤႉ ဒ်န့ၣ်အသိးခီဖျိထံကီၢ်မုၢ်ကျိၤ၀ဲၤကွာ်တၢ်အိၣ်သးတဂၢၢ်တကျၢၤဘၣ်အဃိထံဂုၤကီၢ်ဂၤစ့ၦ့ၤထီၣ်၀ဲဒီး ပနံာ်တၢ်ဖိတၢ်လံၤ အၦ့ၤစ့ၢ်ကီးထီၣ်အဃိကမျၢၢ်ထံဖိကီၢ်ဖိတဖၣ်လၢအ၀ဲသ့ၣ်ကအိၣ်ဆၢထၢၣ်အဂီၢ်သဂၢၢ်ဘၣ်၀ဲတၢ်ဃံးတၢ်စ့ၤအါမးန့ၣ်လီၤႉလၢန့ၣ်အမဲာ်ညါမ့ဘၣ်လၢထံကီၢ်မုၢ်နံၤဒိၣ်မုၢ်နံၤထီန့ၣ်သုးမီၤစိရိၤပျၢ်လီၤ၀ဲ ၦၤဃိာ်ဖိအိၣ်၀ဲဒၣ်န့ၣ်လီၤႉ ဖဲတနံၣ်အံၤ(၂၀၂၃)လါယနူၤအါရံၤ ၄ သီအခါစ့ၢ်ကီး လၢအလီၤဘၣ်၀ဲကီၢ်ပယီၤတၢ်သဘျ့မုၢ်နံၤအံၤအဖီခိၣ် သုးမီၤစိရိၤပျၢ်လီၤ၀ဲထံကီၢ်ဒီတဘ့ၣ်ပူၤၦၤဃိာ်ဖိအဂၤ(၇၀၀၀)ဘျဲၣ်ဒီးဖဲန့ၣ်အကျါထံရူၢ်ကီၢ်သဲးၦၤဃိာ်ဖိပၣ်ထဲအဆံ လီၤဒီးၦၤဃိာ်ဖိလၢသုးမီၤစိရိၤပျၢ်လီၤ၀ဲလၢအဂၤတဖၣ်အါဒၣ်တက့ၢ်အ၀ဲသ့ၣ်လီၤဘၣ်ဃိာ်ပူၤလၢကသံၣ်မူၤဘှီးအဃိ ဒီးကွီၢ်မ့ၣ်သဲစးတၢ်ကမၣ်လၢအဂၤစ့ၢ်ကီးအိၣ်၀ဲအဂ့ၢ်န့ၣ် တၢ်ကစီၣ်သန့တဖၣ်ပာ်ဖျါ၀ဲန့ၣ်လီၤႉ
ကီးတရံး၀့ၢ်ပူၤခံခီခံကပၤတၢ်ဒုးကဲထီၣ်တအိၣ်၀ဲဘၣ်ဆၣ် ပယီၤသုးခးလီၤကျိဖးဒိၣ်ကိးမုၢ်နံၤဒဲး
လါယူၤလံ ၁၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံး၀့ၢ်ပူၤ ခံခီခံကပၤအဘၢၣ်စၢၤတၢ်ဒုးကဲထီၣ်တအိၣ်၀ဲဘၣ်ဆၣ် ပယီၤသုးအံၤခးလီၤကျိဖးဒိၣ်ဆူ ကီးတရံး၀့ၢ်ခိၣ်၀့ၢ်ဃၢၤကိးမုၢ်နံၤဒဲးဃၣ်ဃၣ်အဂ့ၢ်န့ၣ် ကမျၢၢ်အိၣ်၀့ၢ်ပူၤတဖၣ် စံး၀ဲန့ၣ်လီၤႉ ကီးတရံးကီၢ်ဆၣ် လီၢ်က၀ီၤကမျၢၢ်တဂၤစံး၀ဲလၢ“တနံၤန့ၣ်ပယီၤသုးခးလီၤကျိဖးဒိၣ်ကအိၣ်လၢလွံၢ်ဖျၢၣ်ယဲၢ်ဖျၢၣ်ညါ ခးလီၤ၀ဲကိးမုၢ်နံၤဒဲးလီၤႉတနံၤအံၤမးပယီၤသုးခးလီၤကျိဖးဒိၣ်ကအိၣ်အထံၣ်(၂၀)ဘျဲၣ်ညါႉတၢ်ပၢၢ်ဆၢသုးကရူၢ်ဟဲလၢ (နန်းကတိုး)အံၤအ၀ဲသ့ၣ်နၢ်ဟူတၢ်ကစီၣ်အဃိကဘၣ်မ့ၢ်အခးစိလီၤတၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲလါယူၤလံ ၁၂ သီ အနံၤန့ၣ်လီၤႉ ခီဖျိပယီၤသုးခးလီၤကျိဖးဒိၣ်သုးမီၤစိရိၤစုတီၤဖီလာ်ကၠိလၢအိၣ်ကီးတရံး၀့ၢ်ပူၤတဖၣ်အံၤဘၣ်တၢ်ပံးကွံာ်အီၤတလီၢ်လီၢ် အဃိတၢ်ကီတၢ်ခဲအိၣ်ထီၣ်လၢၦၤကၠိဖိတဖၣ်အဂီၢ်အဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဂၤ စံး၀ဲဒ်အံၤန့ၣ်လီၤႉ “တၢ်အိၣ်သးမ့တဂ့ၤဘၣ်လံန့ၣ်ပၢၢ်တုၤလၢၦၤဘၣ်ပံးကွံာ်ကၠိဒီတနံၤကျၢၤညါႉတဘျီတခီၣ်ၦၤဘၣ်ပံးကၠိနံၤတ၀ာ်နါက့အိၣ်မီၤနီၤႉကျိဖးဒိၣ်မ့လီၤတဲာ်ႇတၢ်ဒုးမ့ကဲထီၣ်လံန့ၣ်ၦၤမၢၦၤကၠိဖိမိၢ်ပၢ်ဟဲအိၣ်က့ၤအဒံၣ်အဖိဒီးဘၣ်ပံးကွံာ်ကၠိတဘျီဃီအဃိကဲထီၣ်တၢ်ကီတၢ်ခဲလၢၦၤကၠိဖိအဂီၢ်မီၤနီၤႉကၠိပံးတုၤလၢခံသီသၢသီနါက့အိၣ်လီၤ”အဂ့ၢ်န့ၣ် စံး၀ဲန့ၣ်လီၤႉ ပယီၤသုးခီၣ်သုးရ့ၣ်(ခလရ–၉၇)လၢအိၣ်ဆီလီၤသးဖဲကီးတရံး၀့ၢ်ပူၤတဖၣ်အံၤ ခးလီၤကျိဖးဒိၣ်ကိးမုၢ်နံၤဒဲးအသိး လဲၤ၀ၣ်ကျိဖးဒိၣ်လူၢ်စ့ၢ်ကီးခးလီၤကျိဖးဒိၣ်အဃိကမျၢၢ်သံဘၣ်ဒိဘၣ်ထံးကဲထီၣ်သးအိၣ်၀ဲတလီၢ်လီၢ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ ဒ်န့ၣ်အသိးခီဖျိပယီၤသုးခးလီၤကျိဖးဒိၣ်တပယူာ်ဃီအဃိကီးတရံး၀့ၢ်ကလံၤစိးဒီးကလံၤထံးဒူသ၀ီတဖၣ်လၢအမ့ၢ် ကၠီၤစှၤကိသ၀ီႇပၠါပ့ၤႇယွၤသ့ၣ်ႇကီးနွဲၣ်ႇယွၤသ့ၣ်ကိသ၀ီဖိတဖၣ်တနီၤန့ၣ်ဘၣ်ဃ့ၢ်ထီၣ်၀ဲဒီးတၢ်စူၤခါအတီၢ်ပူၤအံၤ အ၀ဲသ့ၣ်က့ၤမၤအီၣ်စံာ်တဘူၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တနံၣ်အံၤဆီကဆီအၦ့ၤဂ့ၤအဃိ တၢ်ကြဲၢ်ကီၢ်ဆၣ်ပူၤ ကမျၢၢ်တဖၣ်ဘုၣ်ဆီကဆီဟဲအါထီၣ်
လါယူၤလံ ၁၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် တၢ်ကြဲၢ်ကီၢ်ဆၣ် ဒူသ၀ီတဖၣ်အပူၤ ခီဖျိၦၤဟးၦ့ၤဆီကဆီအါမးဒီးအၦ့ၤဂ့ၤအဃိ တကီၢ်ခါခဲအံၤလီၢ်က၀ီၤကမျၢၢ်တဖၣ်ဘုၣ်၀ဲဆီကဆီဟဲအါထီၣ်၀ဲဒၣ်န့ၣ်လီၤႉ ဟီၣ်က၀ီၤဖဲန့ၣ်အပူၤ ဆီကဆီတဘ့ၣ်န့ၣ်အၦ့ၤအိၣ်တုၤလၢ(၁)ကလီၢ်ဘျဲၣ်ညါအသိး ဆီကဆီအံၤၦၤဟဲၦ့ၤ၀ဲလၢစ့ပယီၤႇ စ့ယိၤခံခါလၢာ်ဒီးအၦ့ၤစ့ၢ်ကီးဂ့ၤအဃိ ၦၤဘုၣ်ဆီကဆီဟဲအါထီၣ်၀ဲဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်နါမုဒါ စံး၀ဲဒ်အံၤန့ၣ် လီၤႉ နါမုဒါစံး၀ဲလၢ“လၢညါခါဆီကဆီတဘ့ၣ်န့ၣ်အၦ့ၤအိၣ်ထဲ(၈၀၀)ကၠးဒ်န့ၣ်လီၤႉတၢ်န့ၣ်မးအဘ့ၣ်ကဘၣ်ဒိၣ်မးန့ၢ်မီၤနီၤႉ ခဲအံၤတမ့ၢ်ဒ်န့ၣ်ဘၣ်အဘ့ၣ်မ့ဒိၣ်ထီၣ်တစဲးန့ၣ်တမၢဘျဲၣ်လံႉခဲအံၤဘၣ်လၢတၢ်ၦ့ၤထီၣ်ဆီကဆီအၦ့ၤဂ့ၤဒ်အံၤ ၦၤဘုၣ်ဆီကဆီဖဲသ၀ီပူၤတဖၣ်အံၤဘၣ်ဂီၢ်၀ဲမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တကီၢ်ခါခဲအံၤတၢ်ကြဲၢ်ကီၢ်ဆၣ် ဒူသ၀ီပူၤကမျၢၢ်တဖၣ် ဒ်သိးအ၀ဲသ့ၣ်ကျိၣ်စ့တၢ်ဟဲနုာ်လီၤကအိၣ်အဂီၢ် ဟံၣ်ကိးဖျၢၣ်ဒဲးဃၣ်ဃၣ်ဘုၣ်၀ဲဆီကဆီဟဲအါထီၣ်၀ဲအသိးဆီကဆီအံၤၦၤဘုၣ်အီၤမ့န့ၢ်တနံၣ်ဃၣ်ဃၣ်မး နဆါအီၤသ့၀ဲ အဂ့ၢ်န့ၣ် သ့ၣ်ညါဘၣ်န့ၣ်လီၤႉ ထါတပ့ၤသ၀ီဖိ ဒီၤခ့ၤအ့စံး၀ဲလၢ“ဖဲနံၣ်စးထီၣ်အခါန့ၣ်ဆီဘၣ်တၢ်ဆါဆီသံအါအဃိဖဲတၢ်တဘျီန့ၣ်ပဆှူဖးအါ ညါမီၤနီၤႉဘၣ်ဆၣ်ဒ်သိးကျိၣ်စ့တၢ်ဟဲနုာ်လၢတၢ်ချၢကအိၣ်အဂီၢ်န့ၣ်ပဘုၣ်၀ဲဒၣ်ဆီကဆီအံၤလီၤႉခဲအံၤအၦ့ၤဂ့ၤအဃိဘၣ်ဂီၢ်၀ဲန့ၣ်ႉကဲထီၣ်တၢ်မၤစၢၤလၢပဒံၣ်ပဖိကၠိတၢ်လၢာ်ဘူၣ်လၢာ်စ့ဒီးလၢတၢ်အိၣ်ဆူၣ်အိၣ်ချ့အဂီၢ်မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တကးဒံးဘၣ်လၢန့ၣ်အမဲာ်ညါမ့ၤကျးႇတၢ်အီၣ်ကျးဒီးကသံၣ်ကျးလၢအိၣ်၀့ၢ်ပူၤတဖၣ်အံၤစ့ၢ်ကီးဆါ၀ဲဒၣ်ဆီကဆီညၣ် တဖၣ်အိၣ်၀ဲအသိး မ့မ့ၢ်ၦၤဟးၦ့ၤ၀ဲလၢစ့ယိၤတဖၣ်ခီန့ၣ်လဲၤဆါက့ၤ၀ဲလၢမၠၣ်၀တံၣ် ကီၢ်ကၠီၣ်တဲၣ်–ကီၢ်ပယီၤကီၢ်ဆၢ စွ့ၤကိၣ်ကိၤသ၀ီတကပၤအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိး သ့ၣ်ညါဘၣ်န့ၣ်လီၤႉ ၦၤဟးၦ့ၤဆီကဆီဖိတဂၤစံး၀ဲလၢ“ခဲအံၤလၢ၀့ၢ်ပူၤတၢ်အီၣ်ကျးတဖၣ်န့ၣ်အပာ်လီၤဆါ၀ဲဆီကဆီညၣ်ကသူန့ၢ်အဃိ ပဟဲၦ့ၤဆီကဆီလၢသ၀ီပူၤအံၤလီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ကီၢ်ပယီၤအပူၤသုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢဟီၣ်က၀ီၤတၢ်လီၢ်ကိးတီၤဒဲးဃၣ်ဃၣ်အပူၤ ဂံၢ်ခီၣ်ထံးပနံာ် တၢ်ဖိတၢ်လံၤအၦ့ၤဒိၣ်ထီၣ်ကွ့ၢ်ကွ့ၢ်အဃိလီၢ်က၀ီၤကမျၢၢ်တဖၣ်အံၤလၢတၢ်လုၢ်အီၣ်နီၢ်ခိးသမူကဘၣ်လီၢ်ဖိးဒ့အဂီၢ် အ၀ဲသ့ၣ်ဟးဃုဒဲးဆါ၀ဲတၢ်သူတၢ်သၣ်တကးဒံးဘၣ်ဘုၣ်ဆါ၀ဲထိးဖိဆီဖိလၢဟံၣ်အံၤန့ၣ်လီၤႉ
သုးမီၤစိရိၤကဘီယူၤဟဲခးလီၤတၢ်အဃိ သၣ်တီၣ်ကလံၤစိးကမျၢၢ်(၂၀၀၀)ဘျဲၣ်ဘၣ်ဃ့ၢ်ထီၣ်
လါယူၤလံ ၁၃ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲလါယူၤလံ ၁၁ သီ ဂီၤခီအဆၢကတီၢ် လၢသၣ်တီၣ်ကၠံ၀့ၢ်ကလံၤစိး တီအူ–လ့ၣ်သိၤ–လွဲၤကီၤကျဲ ယၤဒိၣ်သ၀ီပူၤန့ၣ် တၢ်ဒုးကဲထီၣ်၀ဲလၢဟီၣ်က၀ီၤတၢ်ပၢၢ်ဆၢသုးကရူၢ်ဒီးပယီၤသုး၀ံၤလီၢ်ခံ ခီဖျိသုးမီၤစိရိၤကဘီယူၤဟဲခးလီၤကဒါတၢ်အဃိ လီၢ်က၀ီၤကမျၢၢ်အဂၤ(၂၀၀၀)ဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ ဖဲလါယူၤလံ ၁၁ သီ ဂီၤခီ ၆ နၣ်ရံၣ်ဃၣ်ဃၣ်အဆၢကတီၢ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် နုာ်လီၤခး၀ဲယၤဒိၣ်သ၀ီဆၢခိၣ်ပယီၤသုးကလၢၤအံၤ၀ံၤလီၢ်ခံ ခီဖျိသုးမီၤစိရိၤကဘီယူၤဟဲခးလီၤစၢၤတၢ်(၄)ဘျီအဃိ ယၤဒိၣ်ႇကျ့ၤထၣ်ႇ၀ၣ်သီခိၣ်ႇ(ပရယ်စို)သ၀ီဖိတဖၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်ပိာ်မုၣ်တဂၤ စံး၀ဲဒ်အံၤန့ၣ်လီၤႉ “မ့ၣ်အူအီၣ်ကွံာ်ဟံၣ်(၆)ဖျၢၣ်ႉမ့မ့ၢ်ၦၤစံၣ်ထီၣ်ခီန့ၣ်မ့ပာ်ဖှိၣ်သ၀ီ(၄)ဖျၢၣ်လၢာ်န့ၣ်ၦၤနီၣ်ဂံၢ်ကအိၣ်အဂၤခံကထိဘျဲၣ်ညါႉ တၢ်ကဲထီၣ်သးအံၤန့ၢ်သးလၢကရ့ၣ်နံၣ်ကီၢ်စဲၣ်အဆၢတကပၤအဃိကမျၢၢ်ၦၤဃ့ၢ်မှံဟးဖျိးလၢန့ၣ်တကပၤစ့ၢ်ကီးဟဲစံၣ်အိၣ်မီၤနီၤႉအ၀ဲသ့ၣ်နါက့ဘၣ်စံၣ်ဃုာ်၀ဲန့ၣ်ႉလီလီစဲၤခဲအံၤကမျၢၢ်လၢအဃ့ၢ်တၢ်ဒုးတဖၣ်အံၤဘၣ်ဟးအိၣ်နါစိၤလၢၦၢ်ပူၤဒ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ တၢ်ဒုးကဲထီၣ်၀ံၤလီၢ်ခံသုးမီၤစိရိၤကဘီယူၤအံၤဟဲခးလီၤတၢ်လၢယၤဒိၣ်သ၀ီဒီး၀ၣ်သီခိၣ်သ၀ီပူၤဘၣ်ဆၣ် ခီဖျိလီၢ်က၀ီၤကမျၢၢ်တဖၣ်အံၤဟးပလဲာ်ဆိဃာ်သးလၢတၢ်ဒုးစးထီၣ်ကဲထီၣ်အခါလံၤလံၤလံအဃိ တၢ်ဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် ၦၤလၢအမၤစၢၤကရ့ၣ်နံၣ်ၦၤဃ့ၢ်မှံဟးဖျိးဒီးသၣ်တီၣ်ကလံၤစိးၦၤဃ့ၢ်မှံဟးဖျိး တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ၦၤသ၀ီဖိခီန့ၣ်စးထီၣ်လၢအ၀ဲသ့ၣ်နၢ်ဟူကျိသီဘျီန့ၣ်အ၀ဲသ့ၣ်လဲၤစံၣ်အိၣ်ခူသူၣ်၀ဲလၢကျဲမုၢ်၀ၢ်ခီတကပၤန့ၣ်လီၤႉခဲအံၤဒ်ပသ့ၣ်ညါအသိးန့ၣ်ကမျၢၢ်ဘၣ်ဒိဘၣ်ထံးတအိၣ်ဘၣ်ႉပယီၤသုးကလၢၤတဖျၢၣ်န့ၣ်အိၣ်ဘုးတာ်ဒီးယၤဒိၣ်သ၀ီလီၤမီၤနီၤႉသုးကလၢၤ၀ဲအံၤတၢ်ပၢၢ်ဆၢသုးကရူၢ်ပညိၣ်၀ဲလၢကလဲၤခး၀ဲန့ၣ်ဖးယံၤလံႉကဘီယူၤဟဲခးလီၤစၢၤကဒါတၢ်အဃိၦၤဘၣ်ဂုာ်က့ၤလီၢ်ခံႉခဲအံၤပယီၤသုးမၤအါထီၣ်အနီၣ်ဂံၢ်လၢသုးကလၢၤ၀ဲန့ၣ်ဒီဒူၣ်ညါဒီးမ့မ့ၢ်လၢသ၀ီပူၤခီန့ၣ်ၦၤက့ၤအိၣ်တဘူၣ်နီတဂၤဒံးဘၣ်”အဂ့ၢ်န့ၣ် စံး၀ဲန့ၣ်လီၤႉ လၢကရ့ၣ်နံၣ်ကီၢ်စဲၣ်ဒီးယိၤဒိၣ်ကီၢ်စဲၣ်အဆၢကညီကီၢ်စဲၣ် သၣ်တီၣ်ကလံၤစိးဟီၣ်က၀ီၤတကပၤန့ၣ် စးထီၣ်လၢသုးဟံးန့ၢ်တၢ်စိတၢ်ကမီၤန့ၣ်တၢ်ဒုးကဲထီၣ်၀ဲလၢပယီၤသုးဒီးဟီၣ်က၀ီၤတၢ်ပၢၢ်ဆၢသုးကရူၢ်အဘၢၣ်စၢၤ အိၣ်၀ဲအဘျီ(၇၀)ဘျဲၣ်လံအသိးပယီၤသုးတကပၤသံဘၣ်ဒိဘၣ်ထံး၀ဲအါမးအဂ့ၢ်န့ၣ် တၢ်ပၢၢ်ဆၢသုးကရူၢ်စံး၀ဲအသိး သ့ၣ်ညါဘၣ်န့ၣ်လီၤႉ ဒ်န့ၣ်အသိးတၢ်ဒုးကဲထီၣ်အကတီၢ်ကမျၢၢ်လၢအဘၣ်ဃ့ၢ်မှံဟးဖျိးတဖၣ်အံၤစ့ၢ်ကီးတၢ်ဘၣ်ယိၣ်အိၣ်ထီၣ်၀ဲလၢကဘီယူၤႇကျိဖးဒိၣ်ဒီးဟီၣ်လာ်မ့ၣ်ပိၣ်တကးဒံးဘၣ်အမဲာ်ညါခီဖျိပယီၤသုးတပျဲၦၤစိာ်ထီၣ်စိာ်လီၤဟုသးလၢဟီၣ်က၀ီၤပူၤႇသမံသမိးတၢ်ဟဲအါထီၣ်အဃိတၢ်ကီတၢ်ခဲအိၣ်ထီၣ်လၢကလဲၤၦ့ၤဂံၢ်ခီၣ်ထံးတၢ်အီၣ်တၢ်အီဒီးတၢ်ဟးထီၣ်က့ၤလီၤတကပၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ