(သုးက့ ၅)ဟီၣ်က၀ီၤလါဖ့ၤဘြူၤအါရံၤတလါအတီၢ်ပူၤကမျၢၢ်သံ(၃)ဂၤႇမ့ၣ်အူအီၣ်ဟးဂီၤဟံၣ်(၃၆)ဖျၢၣ်
လါမးရှး ၇ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ ခီဖျိပယီၤသုးခးလီၤ ကျိဖးဒိၣ်ဒီးကဘီယူၤဟဲတ့ၢ်လီၤမ့ၣ်ပိၢ်အဃိ လါဖ့ၤဘြူၤအါရံၤတလါအတီၢ်ပူၤန့ၣ်ကမျၢၢ်သံ(၃)ဂၤႇဘၣ်ဒိ(၄)ဂၤဒီး မ့ၣ်အူအီၣ်ဟးဂီၤ၀ဲဟံၣ်(၃၆)ဖျၢၣ်အဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲလါဖ့ၤဘြူၤအါရံၤ ၆ သီအနံၤန့ၣ်လီၤႉ လၢန့ၣ်အမဲာ်ညါခီဖျိကျိဖးဒိၣ်ဒီးကဘီယူၤဟဲတ့ၢ်လီၤမ့ၣ်ပိၢ်အဃိကမျၢၢ်အသိလ့ၣ်ဟးဂီၤတခိၣ်ႇဆဲးကဲး(၂)ခိၣ်ႇစဲးဂံာ်ဘု(၁)ဖျၢၣ်ႇစဲးထဲၣ်တၢ်(၄)ခိၣ်ႇမ့ၣ်အူစဲး(၁)ဖျၢၣ်ႇအ့ထနဲး(Wifi)တဘ့ၣ်ဒီးတၢ်ဖိတၢ်လံၤလၢအဂၤတဖၣ်စ့ၢ်ကီးဟးဂီၤ၀ဲဒၣ်အဂ့ၢ်န့ၣ် ခ့ၣ်အဲၣ်ယူၣ်–မုၢ်တြီၢ်တၢ်ကစီၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဒ်န့ၣ်အသိးလါဖ့ၤဘြူၤအါရံၤတလါအတီၢ်ပူၤန့ၣ်ပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤ တၢ်ဒုးကဲထီၣ်၀ဲ(၁၇၈)ဘျီဒီးတၢ်ဒုးအပူၤပယီၤသုးတကပၤသံ၀ဲ(၄၉)ဂၤအသိးမ့မ့ၢ်ခ့ၣ်အဲၣ်ယူၣ်(သုးက့ ၅)တကပၤ န့ၣ်ဘၣ်ဟ့ၣ်လီၤကွံာ်အသးသမူလၢထံကီၢ်ဒီးၦၤကလုာ်အဂီၢ်(၂)ဂၤႇဘၣ်ဒိ၀ဲ(၃)ဂၤအဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါပယီၤသုးကဘီယူၤဟဲခးလီၤတၢ်လၢကမျၢၢ်ဒူသ၀ီတၢ်ဖံးအီၣ်မၤအီၣ်လီၢ်ကျဲပူၤအိၣ်၀ဲ(၇)ဘျီဒီးတ့ၢ်လီၤ၀ဲမ့ၣ်ပိၢ်(၄၄)ဖျၢၣ်အသိးပယီၤသုးခးလီၤကျိဖးဒိၣ်လၢသ၀ီပူၤအိၣ်၀ဲ(၅၆)ဖျၢၣ်အဂ့ၢ်န့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်လါယနူၤအါရံၤအခါစ့ၢ်ကီးခီဖျိပယီၤသုးခးလီၤကျိဖးဒိၣ်ဒီးကဘီယူၤဟဲတ့ၢ်လီၤမ့ၣ်ပိၣ်အဃိကမျၢၢ်သံ(၁၄)ဂၤဒီးဘၣ်ဒိ(၁၁)ဂၤအသိးဘၣ်ဟးဂီၤ၀ဲတၢ်ဘါယွၤသရိာ်(၄)ဖျၢၣ်ႇတၢ်ဆါဟံၣ်(၄)ဖျၢၣ်ဒီးဟံၣ်(၂၈)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ်ထုးထီၣ်ပာ်ဖျါတ့ၢ်ဃာ်၀ဲန့ၣ်လီၤႉ
ဖယါပၠိၤသ၀ီဖိ(၁၃)ဂၤလၢပယီၤသုးဖီၣ်က့ၤကိး၀ဲအံၤတဖၣ်တုၤလၢခဲအံၤတၢ်တပျၢ်လီၤ၀ဲဒံးဘၣ်
လါမးရှး ၇ သီႇ ၂၀၂၃ နံၣ်ႇ ခ့ၣ်အဲးစံၣ် လၢပကိကီၢ်ခီဒိၣ် ၀ီကီၢ်ဆၣ်အပူၤ ဖဲလါမးရှး ၅ သီအနံၤန့ၣ် ဖယါပၠိၤသ၀ီဖိ(၁၃)ဂၤလၢပယီၤသုးဖီၣ်က့ၤကိး၀ဲအံၤ တဖၣ် တုၤလၢခဲအံၤတၢ်တပျၢ်လီၤ၀ဲဒံးဘၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ ဖဲအပူၤကွံာ်လါဖ့ၤဘြူၤအါရံၤ ၂၆ သီအနံၤ ၀ီကီၢ်ဆၣ်တၢ်ဒီသဒၢကမျၢၢ်သုးနုာ်လီၤခး၀ဲပယီၤသုးတၢ်သမံ သမိးတြဲၤလၢအိၣ်(ဘုရားပျို)သ၀ီဟးထီၣ်အံၤ၀ံၤအလီၢ်ခံန့ၣ် ပယီၤသုးအိၣ်ခိးသမံသမိးတၢ်လၢ(ဘုရားပျို)သ၀ီဒီး သ၀ီလၢအိၣ်တၢ်ခိၣ်တၢ်ဃၢၤဖဲန့ၣ်တဖၣ်ဒီးဖဲန့ၣ်တဲ၀ဲကမျၢၢ်(၁၃)ဂၤအံၤအတၢ်ဘၣ်ထွဲအိၣ်ဒီးတၢ်ဒီသဒၢကမျၢၢ်သုးအဃိဖီၣ်က့ၤကိး၀ဲဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲန့ၣ်လီၤႉ အ၀ဲစံး၀ဲလၢ“ပယီၤသုးတဲ၀ဲလၢၦၤလၢတၢ်ဆိမိၣ်လၢအပၣ်ဃုာ်လၢတၢ်ဒုးကဲထီၣ်အကျါတဂၤန့ၣ်နုာ်လီၤလၢသ၀ီပူၤဒီးဖဲန့ၣ်အ၀ဲသ့ၣ်သမံသမိးတၢ်လၢသ၀ီပူၤႉၦၤသ၀ီဖိလၢပယီၤသုးဖီၣ်အီၤ(၁၃)ဂၤန့ၣ်အတၢ်ဘျးစဲလိာ်သးဒီး(PDF)တအိၣ်နီတမံၤဘၣ်ကဲ၀ဲဒၣ်ၦၤသ၀ီဖိယိယိဖိလီၤႉတဲပျံၤၦၤသ၀ီဖိလၢကဒွဲၣ်အူအီၣ်သ၀ီဒီးမၤတဲာ်ကွံာ်၀ဲမ့ၣ်အူလီၤ”အဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ်စံး၀ဲန့ၣ်လီၤႉ လၢန့ၣ်အမဲာ်ညါဘၣ်ဃးတၢ်ခးလိာ်သးကဲထီၣ်ဖဲ(ဘုရားပျို)သ၀ီကပၤတၢ်ဂ့ၢ်အံၤတဘၣ်ဃးလိာ်သးဒီးသ၀ီ၀ဲန့ၣ်ဘၣ်ဒီးခီဖျိၦၤဟ့ၣ်ပယီၤသုးတၢ်ကစီၣ်အိၣ်အဃိတၢ်ဖီၣ်၀ဲလီၢ်က၀ီၤကမျၢၢ်ဒ်အံၤလီၤဒီးကမျၢၢ်(၁၃)ဂၤအံၤပယီၤသုးကိး၀ဲဆူပကိ၀့ၢ်ဒီး၀ီ၀့ၢ်ဘၢၣ်စၢၤ(ဘုရားကြီး)ကျိဖးဒိၣ်သုးကရၢၢ်ပူၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ဒ်န့ၣ်အသိးလၢ(ဘုရားပျို)သ၀ီကပၤ(ငှက်ပျောတစ်ပင်သောင်)ဒီး(ကွနျ်းေရွှ၀ါသောင်)တကပၤန့ၣ်စ့ၢ်ကီး ဖဲလါမးရှး ၄ သီအနံၤန့ၣ် ပယီၤသုးဒုးသ့ၣ်ညါ၀ဲလၢတၢ်ကမၤလီၤၦီၢ်ကွံာ်ၦၤမၤအီၣ်ကျီးဖိအဒဲအဖျၢၣ်(၆၀) ဃၣ်ဃၣ်အံၤဒီးခီဖျိတၢ်ကထီထီၣ်ကျိဖးဒိၣ်တဖၣ်အဃိတၢ်ကဘၣ်မၤဟးဂီၤကွံာ်(အုတ်ဖို)ကရူၢ်(ကပင်)သ၀ီအံၤ စ့ၢ်ကီးအဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤႉ ဖဲအပူၤကွံာ်လါဖ့ၤဘြူၤအါရံၤအတီၢ်ပူၤတၢ်ဒုးကဲထီၣ်အခါန့ၣ် ခီဖျိပယီၤသုးစုတီၤဖီလာ်(ဗျူစောထီး)သုးဖိသံ၀ဲ(၂)ဂၤဒီးဘၣ်ဒိ၀ဲ(၄)ဂၤအဃိ ပယီၤသုးထုးထီၣ်တၢ်ကလုၢ်လၢ ၀ီကီၢ်ဆၣ်ပူၤ စးထီၣ်ဟါခီ ၇ နၣ်ရံၣ်လီၢ်ခံန့ၣ်တၢ်တဘၣ်ဟးထီၣ်လၢဟံၣ်ချၢလၢၤဘၣ်ဒီး တုၤလၢခဲအံၤတၢ်မၤဃံးထီၣ်တၢ်သမံသမိးလၢ(၀ီကီၢ်ဆၣ်)ဒူသ၀ီတဖၣ်အပူၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ခီဖျိၦၤဟဲနု၁်လီၤမၤအီၣ်မုၢ်ကျိၤ၀ဲၤကွ၁်လၢ(စွ့ၤကိၣ်ကိၤ)ဟီၣ်က၀ီၤပူၤဟဲအါထီၣ်အဃိဟီၣ်ခိၣ်လီၢ်ၦ့ၤဒိၣ်ထီၣ်
လါမးရှး ၇ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် မၠၣ်၀တံၣ်ကလံၤထံး (စွ့ၤကိၣ်ကိၤ)၀့ၢ်သီအပူၤ ခီဖျိၦၤနုာ်လီၤမၤအီၣ်မုၢ်ကျိၤ၀ဲၤကွာ်ဟဲအါထီၣ်အဃိဟီၣ်ခိၣ်လီၢ်အၦ့ၤဒိၣ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤ ဟီၣ်ခိၣ်(ပွဲစား)အအိၣ်န့ၣ်လီၤႉ စွ့ၤကိၣ်ကိၤ၀့ၢ်သီအံၤတၢ်တၤကျိၣ်တၤစ့လီၢ်ႇကၣ်စံၣ်နိၣ်ဒီးတၢ်မုာ်လၤသးဖှံလီၢ်တဖၣ်ရၤလီၤသးအါမးဒီး ဖဲသုးဟံးန့ၢ်တၢ်စိတၢ်ကမီၤအတီၢ်ပူၤအံၤၦၤမၤအီၣ်မုၢ်ကျိၤ၀ဲၤကွာ်ဖိလၢအိၣ်ကီၢ်ပူၤဒီးယိၤဒိၣ်ကီၢ်စဲၣ်ႇတရူးကီၢ်ဆၢသ့ၣ်တဖၣ်အံၤဟဲမၤအီၣ်မုၢ်ကျိၤ၀ဲၤကွာ်ဖဲ၀့ၢ်သီအံၤဟဲအါထီၣ်အါမးအဃိ ဟီၣ်က၀ီၤပူၤဟံၣ်ဒီးဟီၣ်ခိၣ်လီၢ်အၦ့ၤဘၣ်ထီၣ် တုၤအကလီၢ်လၢအဆံညါအဂ့ၢ်န့ၣ်ဟီၣ်က၀ီၤပူၤဟီၣ်ခိၣ်(ပွဲစား)တဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“လၢညါန့ၣ်ဟီၣ်ခိၣ်အပ့ၣ်(၆၀)၀း၀းအပ့ၣ်(၂၀၀)၀း၀းဒီးဟံၣ်လီၢ်တအ့ကၢၣ်န့ၣ်အၦ့ၤကအိၣ်ထဲအကလီၢ်လီၤႉခဲအံၤဟံၣ်ၦ့ၤႇဟီၣ်ခိၣ်လီၢ်ၦ့ၤန့ၣ်ကအိၣ်စ့ယိၤအကလီၢ်လၢအဆံလံႉလၢညါၦၤငါအိၣ်ဟံၣ်ၦၤငါအိၣ်အခါန့ၣ်တလါန့ၣ်ကအိၣ်(၁၀၀၀)ႇ(၂၀၀၀)ဘးလီၤႉခဲအံၤဟံၣ်လဲဒီးကျးလဲန့ၣ်တလါန့ၣ်ကအိၣ်လၢ(၅)မၢတုၤလၢ(၁၀၀၀၀)ဘးလံႉတၢ်လီၢ်လၢၦၤဆါတၢ်န့ၢ်ႇၦၤအိးထီၣ်ကျးန့ၢ်ညါန့ၣ်အိၣ်ထဲတရူးထံဖိကီၢ်ဖိဒီးႇၦၤလၢအတဲတရူးကျိာ်ဘၣ်ၦၤလၢအကျၢတရူးလံာ်တဖၣ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ စးထီၣ်ဖဲအပူၤကွံာ်(၂၀၁၀)ကီၢ်ခိၣ်အူသ့စ့ၣ်ပၢတၢ်အစိၤခါန့ၣ်လၢ(စွ့ၤကိၣ်ကိၤ)ဟီၣ်က၀ီၤအပူၤ တၢ်လိာ်ကွဲတၢ်တၤကျိၣ်တၤစ့အလီၢ်ႇတၢ်မုာ်လၤသးဖှံအလီၢ်ႇ(အီၤလါ)တၢ်လိာ်ကွဲက့မ်တဖၣ်ရၤလီၤသးဟဲအါထီၣ်၀ဲအဂ့ၢ်န့ၣ် စွ့ၤကိၣ်ကိၤလီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ “ဖဲစွ့ၤကိၣ်ကိၤအံၤန့ၣ်ၦၤကညီဖိတအိၣ်အါအါလၢၤဘၣ်ႉၦၤတ့ထီၣ်ဟံၣ်တၢးဒီဂ့ၢ်ႇကျးဆါတၢ်လီၢ်ဒီးအ၀ဲသ့ၣ်ငါလီၤ၀ဲမီၤနီၤႉၦၤကညီတနီၤန့ၣ်ဆါလီၤကွံာ်အတၢ်လီၢ်တၢ်ကျဲဘျီလဲၤအိၣ်က့ၤလၢမၠၣ်၀တံၣ်အဘူးအတံၢ်အိၣ်သ၀ီတကပၤန့ၣ်မီၤနီၤႉခဲအံၤစွ့ၤကိၣ်ကိၤ၀့ၢ်သီအံၤၦၤအိၣ်လၢတၢ်ချၢတဖၣ်ဟဲအါထီၣ်ႇတၢ်မၤနါက့နမ့ကျၢတရူးလံာ်ႇနမၤတၢ်ဒီးတရူးမ့သ့မးနမၤန့ၢ်အဃိၦၤအိၣ်လၢယိၤဒိၣ်တရူးကီၢ်ဆၢတဖၣ်န့ၣ်ဒီးပယီၤဖိတဖၣ်ဟဲအါထီၣ်မီၤနီၤ”အဂ့ၢ်န့ၣ် ၦၤအိၣ်လၢစွ့ၤကိၣ်ကိၤက၀ီၤဒ့(၄)ပူၤတဂၤစံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံလၢကညီကီၢ်စဲၣ်ဒီးကီၢ်ကၠီၣ်တဲၣ်ကီၢ်ဆၢ မၠၣ်၀တံၣ်–မဲၢ်ဆီးႇ ဃိၣ်သၢဖျၢၣ်–စခၣ်ဘူရံႇ တနီသရံၣ်ကီၢ်ခီ–မီတီၤဒီးကၤခၠနၣ်ဘူရံတၢ်လီၢ်သ့ၣ်တဖၣ်န့ၣ် တရူးထံဖိကီၢ်ဖိဟဲအိးထီၣ်၀ဲ(ကၣ်စံၣ်နိၣ်) တၢ်တၤကျိၣ်တၤစ့လီၢ်ႇ(အီၤလါ)က့မ်ဒီးတၢ်မုာ်လၤသးဖှံလီၢ်လၢအတဖိးသဲစးသ့ၣ်တဖၣ်အံၤဟဲအါထီၣ်၀ဲအဂ့ၢ်န့ၣ် ၦၤလၢအအိၣ်ခိးကွၢ်ဟုၣ်ကွၢ်ဆူၣ်တၢ်တဖၣ်စံး၀ဲန့ၣ်လီၤႉ လၢန့ၣ်အမဲာ်ညါတၢ်ကစီၣ်ဟူထီၣ်သါလီၤလၢကီၢ်ဆၢဟီၣ်က၀ီၤတရူး(ကၣ်စံၣ်နိၣ်)ဒီးတၢ်လိာ်ကွဲက့မ်လၢအီၤလါတၢ်ဖံးတၢ်မၤလီၢ်သ့ၣ်တဖၣ်အံၤအပူၤန့ၣ်ၦၤထံဂုၤကီၢ်ဂၤဖိကူၣ်လဲၤမၤကၤဆါအီၣ်ၦၤကညီအိၣ်၀ဲဘၣ်ဆၣ် တကီၢ်ခါခဲအံၤၦၤဟဲနုာ်လီၤမၤအီၣ်မုၢ်ကျိၤ၀ဲၤကွာ်ဟဲအါထီၣ်၀ဲကွ့ၢ်ကွ့ၢ်လၢမၠၣ်၀တံၣ်(စွ့ၤကိၣ်ကိၤ)ဟီၣ်က၀ီၤပူၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ခီဖျိၦၤဟ့ၣ်တၢ်ချံတၢ်သၣ်အၦ့ၤတဂ့ၤဘၣ်အဃိၦၤသူၣ်အီၣ်ဖျးအီၣ်တၢ်ဖိလၢအိၣ်ကီၢ်ဆၢသူမှဲကျိကပၤတဖၣ်ဒွး၀ဲတကၢကီၣ်လၢၤဘၣ်
လါမးရှး ၆ သီႇ ၂၀၂၃ နံၣ်ႇ ခ့ၣ်အဲးစံၣ် လၢဖၣ်အၣ်ကီၢ်ရ့ၣ် တၢ်ကြဲၢ်ကီၢ်ဆၣ်အပူၤ ၦၤသူၣ်အီၣ်ဖျးအီၣ်တၢ်ဖိလၢအိၣ်ကီၢ်ကၠီၣ်တဲၣ်–ကီၢ်ပယီၤကီၢ်ဆၢ သူမှဲကျိဒီတကျိၤအံၤတဖၣ်န့ၣ် တလါအံၤတၢ်ချံတၢ်သၣ်ဟးထီၣ်အကတီၢ်ခီဖျိၦၤဟ့ၣ်အၦ့ၤတဂ့ၤဘၣ်အဃိ ဒွး၀ဲတကၢကီၣ်လၢၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ကီၢ်ကၠီၣ်တဲၣ်–ကီၢ်ပယီၤကီၢ်ဆၢ သူမှဲကျိကပၤ သ့ၣ်မီၤကူၣ်ကရူၢ် တၢ်လဲၢ်သ၀ီႇကါထၣ်ႇထူပညၤဒီးကၠီၤက့ၣ်ထၣ် သ၀ီဖိလၢအသူၣ်အီၣ်ဖျးအီၣ်၀ဲတၢ်ချံတၢ်သၣ်သ့ၣ်တဖၣ်အံၤ အ၀ဲသ့ၣ်ကသူၣ်လီၤတၢ်အဂီၢ်ဘၣ်လဲၤဟံလိၢ်စ့လၢ ယိၤသ့ၣ်ခိၣ်အအိၣ်ဒီးတၢ်ချံတၢ်သၣ်လၢအဟးထီၣ်တဖၣ်ဘၣ်က့ၤဆါန့ၢ်ကဒါ၀ဲသ့ၣ်ခိၣ်တဖၣ်အံၤအဂ့ၢ်န့ၣ် ၦၤသူၣ်အီၣ်ဖျးအီၣ်တၢ်ဖိတဖၣ်စံး၀ဲန့ၣ်လီၤႉ ဖဲတၢ်က့ၤဆါကဒါတၢ်ချံတၢ်သၣ်တဖၣ်အံၤအခါန့ၣ်ဘၣ်ဆါန့ၢ်အ၀ဲသ့ၣ်ဒ်တၢ်ပာ်ပနီၣ်အၦ့ၤအိၣ်အသိးလီၤအဃိ ဆါတၢ်ချံတၢ်သၣ်မ့၀ံၤန့ၣ်တၢ်ဖံးတၢ်မၤအဘူးအလဲမးတအိၣ်တ့ၢ်လၢၤဘၣ်အဂ့ၢ်န့ၣ် စီၤကြဲၢ်ထူလၢအသူၣ်အီၣ်ဖျးအီၣ်တၢ်ဖဲကီၢ်ဆၢအံၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ “ယိၤသ့ၣ်ခိၣ်န့ၣ်ဟ့ၣ်လီၤၦၤပဲအချံ၀ံၤဘျီန့ၣ်ပသူၣ်လီၤ၀ဲလီၤႉမ့ဘၣ်ဒ့တၢ်ချံတၢ်သၣ်အချံဘျီန့ၣ်ဘၣ်က့ၤဆါကဒါန့ၢ်အ၀ဲသ့ၣ်လီၤႉလၢနလိၣ်ဘၣ်အၦ့ၤအတၢန့ၣ်နတန့ၢ်ဘၣ်ဘၣ်ႉဖဲအ၀ဲသ့ၣ်ဟ့ၣ်၀ဲအသိးန့ၣ်နဘၣ်ဟံလီၤႉအ၀ဲသ့ၣ်ထုးထီၣ်န့ၢ်၀ဲအချံအဃိနဘၣ်က့ၤဆါကဒါန့ၢ်အ၀ဲသ့ၣ်လီၤႉနတဆါဘၣ်န့ၣ်တန့ၢ်ဘၣ်ႉနဆှဲစ့၀ံၤဘျီန့ၣ်လၢနစုပူၤန့ၣ်စ့တအိၣ်တ့ၢ်နီတဘးလၢၤဘၣ်”အဂ့ၢ်န့ၣ် စံး၀ဲန့ၣ်လီၤႉ တၢ်ချံတၢ်သၣ်လၢအဟးထီၣ်ဖဲသ၀ီပူၤအံၤတဖၣ်န့ၣ်တၢ်က့ၤဆါ၀ဲဆူကၠီၣ်တဲၣ်ခီပနံၣ်တဖၣ်အအိၣ်ဒီး စ့လၢနဆါတၢ်ချံတၢ်သၣ်န့ၢ်တဖၣ်အံၤခီဖျိတၢ်က့ၤထုးထီၣ်ဃုာ်၀ဲစ့လိၢ်အအ့ၣ်တဘျီဃီအဃိ ၦၤသူၣ်အီၣ်ဖျးအီၣ်တၢ်ဖိတဖၣ်လ့ၤတက့ၤဒွး၀ဲတကၢကီၣ်လၢၤဘၣ်အဂ့ၢ်န့ၣ် ၦၤသူၣ်အီၣ်ဖျးအီၣ်တၢ်ဖိ နီၢ်မုၣ်မုၣ် စ့ၢ်ကီးစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“အ၀ဲသ့ၣ်ဟ့ၣ်လီၤနၤစ့န့ၣ်အအ့ၣ်(၅)ဘးညါမီၤနီၤႉၦၤအိၣ်ဖဲသ၀ီပူၤတဖၣ်နါက့လဲၤဟံလိၢ်၀ဲႉသ့ၣ်ခိၣ်လၢနလဲၤဟံလိၢ်စ့လၢအအိၣ်တဖၣ်န့ၣ်နမ့ဆါတၢ်ချံတၢ်သၣ်ဘျီန့ၣ်အ၀ဲသ့ၣ်ထုးထီၣ်ကွံာ်၀ဲစ့လၢနလဲၤဟံလိၢ်ဆိဃာ်လၢအ၀ဲသ့ၣ်အအိၣ်ဒီးထုးကွံာ်၀ဲစ့အ့ၣ်တဘျီဃီလီၤႉအဃိန့ၣ်နဆှဲစ့မ့၀ံၤန့ၣ်တၢ်တအိၣ်တ့ၢ်နီတမံၤလၢၤဘၣ်ႉနသူၣ်အီၣ်ဖျးအီၣ်တၢ်န့ၣ်လီၤဂာ်ဒ်သိးနသူၣ်န့ၢ်တၢ်လၢသ့ၣ်ခိၣ်တဖၣ်န့ၣ်အဂီၢ်လီၤ”အဂ့ၢ်န့ၣ်စံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံထံရူၢ်ကီၢ်သဲးတၢ်အိၣ်သးတဂၢၢ်တကျၢၤလၢၤ၀ဲဘၣ်ဒီးလၢတၢ်ဂ့ၢ်အံၤအဃိ ပထံၣ်ဘၣ်လၢယိၤသ့ၣ်ခိၣ်တနီၤန့ၣ်ဟံးန့ၢ်၀ဲတၢ်ခွဲးတၢ်ယာ်ဒီးမၤလီၤစှၤၦၤမၤတၢ်ဖိအဘူးအလဲဒီးဟ့ၣ်တၢ်ချံတၢ်သၣ်အၦ့ၤတဂ့ၤလၢၤဘၣ်အိၣ်၀ဲအဂ့ၢ်န့ၣ် လီၢ်က၀ီၤခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ၦၤဘၣ်မူဘၣ်ဒါလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ “တၢ်သ့ၣ်တဖၣ်အံၤယဆိမိၣ်ကဘၣ်ဃးလိာ်သးဒီးကီၢ်ပယီၤထံရူၢ်ကီၢ်သဲးတၢ်အိၣ်သးအံၤလီၤမီၤနီၤႉသုးဟံးန့ၢ်တၢ်စိတၢ်ကမီၤအဃိကမျၢၢ်ထံဖိကီၢ်ဖိလီၤဘၣ်တၢ်ကီတၢ်ခဲႉလီၤဘၣ်တၢ်ကီတၢ်ခဲအဃိအ၀ဲသ့ၣ်ဆီၣ်ဘံၣ်ဆီၣ်ဘၢ၀ဲၦၤကီၢ်ပယီၤဖိအံၤလီၤႉၦၤသူၣ်အီၣ်ဖျးအီၣ်တၢ်ဖိတဖၣ်အံၤဂုာ်ကျဲးစၢးမၤတၢ်နါက့တန့ၢ်ဘၣ်အမၠးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လီၢ်က၀ီၤကမျၢၢ်ၦၤသူၣ်အီၣ်ဖျးအီၣ်တၢ်ဖိလၢအိၣ်ကီၢ်ကၠီၣ်တဲၣ်–ကီၢ်ပယီၤကီၢ်ဆၢ သူမှဲကျိဒီတကျိၤအံၤတဖၣ် အါဒၣ်တက့ၢ်သူၣ်အီၣ်ဖျးအီၣ်၀ဲသဘ့ဟီၣ်လာ်ႇဘုခ့ႇနံၣ်သိႇဘီးက့ၣ်ဒီးရီဘၢၣ်တဖၣ်န့ၣ်လီၤႉဒ်န့ၣ်အသိးတၢ်သ့ၣ်တဖၣ်အံၤတၢ်က့ၤဆါ၀ဲဆူကီၢ်ကၠီၣ်တဲၣ်ပူၤဒီးဘၣ်ဂီၢ်၀ဲဒၣ်န့ၣ်လီၤႉ ဘၣ်ဆၣ်ဖဲ(၂၀၂၁)လါဖ့ၤဘြူၤအါရံၤ ၁ သီ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံန့ၣ် ခီဖျိစ့ယိၤအၦ့ၤထီၣ်ဒီးကီၢ်ပယီမပူၤတၢ်လုၢ်တၢ်ၦ့ၤထီၣ်အဃိၦၤသူၣ်အီၣ်ဖျးအီၣ်တၢ်ဖိတဖၣ်ဖံးအီၣ်မၤအီၣ်တၢ်တဘၣ်ဂီၢ်၀ဲလၢၤဘၣ်အဂ့ၢ်န့ၣ် သ့ၣ်ညါဘၣ်လၢၦၤသူၣ်အီၣ်ဖျးအီၣ်တၢ်ဖိတဖၣ်အအိၣ်န့ၣ်လီၤႉ
သုးကီၣ်ကးအကူၣ်သ့ကၠိလံ၁်တၢ်မၤလိတ၀ံၤ၀ဲဘၣ်ဆၣ် ဘၣ်ဒိးစဲး၀ံၤ၀ဲတၢ်ဒိးစဲး
လါမးရှး ၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံးကီၢ်ဆၣ်အပူၤ ခီဖျိဟီၣ်က၀ီၤတၢ်အိၣ်သးတဂၢၢ်တကျၢၤဘၣ်အဃိ တနံၣ်အံၤသုးမီၤစိရိၤအကၠိတဖၣ်မၤလိလံာ်တကတၢၢ်ဒံး၀ဲဘၣ်ဆၣ်ဘၣ်ဒိးစဲး၀ံၤက့ၤ၀ဲတၢ်ဒိးစဲးဒ်န့ၣ်လီၤအဂ့ၢ်န့ၣ် ၦၤလၢအဘူးဒီးကူၣ်သ့ကၠိသရၣ်/မုၣ်တဖၣ်အအိၣ်န့ၣ်လီၤႉ လၢကီးတရံးကီၢ်ဆၣ်အပူၤခီဖျိတၢ်ဒုးကဲထီၣ်တလီၢ်လီၢ်ဒီးကၠိဘၣ်ကးတံၢ်သးခဲအံၤခဲအံၤအဃိ ၦၤကၠိဖိတဖၣ်တမၤလိဘၣ်လံာ်တၢ်မၤလိတုၤလၢအကတၢၢ်ဘၣ်ဒီးဘၣ်ဒိးစဲး၀ံၤက့ၤ၀ဲလံာ်ဒ်န့ၣ်လီၤအဂ့ၢ်န့ၣ် ၦၤကၠိဖိလၢအိၣ်သုးမီၤစိရိၤကူၣ်သ့ကၠိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“လံာ်ဒုပမၤန့ၢ်ႉကၠိခီပံးအိးထီၣ်ပံးအိးထီၣ်အဃိဘၣ်မၤဒ်အံၤလီၤမီၤနီၤႉကၠိလံာ်တၢ်မၤလိတဖၣ်န့ၣ်ပမၤလိအီၤတ၀ံၤခဲလၢာ်ဒံးဘၣ်ႉလံာ်ကိးဘ့ၣ်ဒဲးလီၤအိၣ်တ့ၢ်တဘ့ၣ်တစဲးတဘ့ၣ်တစဲးႉသရၣ်မၤလိန့ၢ်ၦၤလၢအကဟဲတၢ်ဒိးစဲးအဂီၢ်ဒ်န့ၣ်လီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါတၢ်သိၣ်လိတနံၣ်အံၤတၢ်တုၤထီၣ်ထီၣ်ဘးအိၣ်အါန့ၢ်အပူၤကွံာ်နံၣ်ဒံးဒီး ၦၤကၠိဖိတဖၣ်မၤလံာ်ဘၣ်၀ဲအဂ့ၢ်န့ၣ်သုးမီၤစိရိၤစုတီၤဖီလာ်ကူၣ်သ့ၦၤမၤတၢ်ဖိတဖၣ်စံး၀ဲန့ၣ်လီၤႉ “တနံၣ်အံၤသိၣ်လိလံာ်ဖးတုၤထီၣ်ထီၣ်ဘးညါႉၦၤဖိသၣ်တဖၣ်မၤလံာ်ဘၣ်ႉဖဲမဟိန့ၣ်ၦၤဖိသၣ်မၤလံာ်တဘၣ်ဘၣ်ႉပမၤလိဘၣ်တၢ်မၤလိ(၂)ခါလီၤႉတနံၣ်အံၤပမၤလိဘၣ်လံာ်အါန့ၢ်မဟိဒံး”အဂ့ၢ်န့ၣ် သုးမီၤစိရိၤစုတီၤဖီလာ် ကူၣ်သ့ၦၤမၤတၢ်ဖိလၢအဂၤတဂၤစ့ၢ်ကီးစံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤအဃိၦၤကၠိဖိတဖၣ်အါဒၣ်တက့ၢ်န့ၣ်တဆဲးမၤလိတၢ်လၢသုးမီၤစိရိၤအကူၣ်သ့ကၠိလၢာ်ဘၣ်ဒီးမ့မ့ၢ်တခီလဲၤထီၣ်က့ၤကၠိလၢကညီကူၣ်သ့ဆဲးလၤ၀ဲၤကျိၤ(KECD)ကၠိဒီးနီၢ်ကစၢ်တၢ်ထဲးဂံၢ်ထဲးဘါကၠိတဖၣ်ဒီးတၢ်ကီတၢ်ခဲအိၣ်၀ဲအကလုာ်ကလုာ်အဂ့ၢ်န့ၣ်သ့ၣ်ညါဘၣ်လၢ(CDM)ကၠိသရၣ်တဖၣ်အအိၣ်န့ၣ်လီၤႉ “ပ၀ဲဒၣ်စ့ၢ်ကီးတၢ်မၤလိတ၀ံၤတတဲာ်ဘၣ်ႉပမၤလိန့ၢ်ၦၤကၠိဖိလံာ်ဒ်အလူၤန့ၢ်၀ဲအသိးလီၤႉတၢ်အိၣ်သးခီကဘီယူၤဒၢးဟဲႇလၢပျီပူၤစ့ၢ်ကီးဟဲထီၣ်အဃိတၢ်ကီတၢ်ခဲအိၣ်ဒီဒူၣ်ညါ”အဂ့ၢ်န့ၣ် (CDM)ကၠိသရၣ်လၢအသိၣ်လိ(KECD)ကၠိတဂၤ စံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤကဲထီၣ်၀ံၤအလီၢ်ခံခီဖျိတၢ်ဒုးကဲထီၣ်၀ဲလၢတၢ်လီၢ်ကိးတီၤဒဲးဃၣ်ဃၣ်ပူၤအဃိ ၦၤကၠိဖိတဖၣ်အါဒၣ်တက့ၢ်န့ၣ်တၢ်ကီတၢ်ခဲအိၣ်ထီၣ်လၢကမၤလိမၤဒိးတၢ်အဂီၢ်ဒီးမၤလိလံာ်တၢ်မၤလိတကတၢၢ်ဘၣ်ဒိးစဲး၀ံၤက့ၤ၀ဲဒ်အံၤလီၤအဂ့ၢ်န့ၣ်သ့ၣ်ညါဘၣ်လၢၦၤကၠိဖိဒီးကၠိသရၣ်/မုၣ်တဖၣ်အအိၣ်န့ၣ်လီၤႉ
ဖၣ်အၣ်(ဖၠၣ်စိမိၤကၠိ)မၤ၀ဲတၢ်ဂဲၤလိာ်ကွဲထံတၢ်ရဲၣ်တၢ်ကျဲၤအံၤအဖီခိၣ်တၢ်ပဲာ်ထံနီၤဖးအိၣ်ထီၣ်လၢ(CDM)ကၠိဖိတဖၣ်အဘၢၣ်စၢၤ
လါမးရှး ၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဖၣ်အၣ်၀့ၢ်ပူၤ စးထီၣ်ဖဲလါမးရှး ၂ သီအနံၤန့ၣ် ဘၣ်ဃးတၢ်ဂီၤရၤလီၤသးလၢ(စိၤရှၢၤမံၣ်ဒံၣ်ယၢၣ်) အပူၤလၢဖၣ်အၣ်ဖၠၣ်စိမိၤကၠိဖိမၤ၀ဲတၢ်ဂဲၤလိာ်ကွဲထံတၢ်ရဲၣ်တၢ်ကျဲၤအံၤအဖီခိၣ် တၢ်ပဲာ်ထံနီၤဖးဟဲအိၣ်ထီၣ်၀ဲလၢ (CDM)ကၠိဖိတဖၣ်အဘၢၣ်စၢၤန့ၣ်လီၤႉ ဆၢကတီၢ်ခဲအံၤဘၣ်ဖဲကလုာ်ဒူၣ်ကမျၢၢ်ထံဖိကီၢ်ဖိတဖၣ်ဘၣ်ကီဘၣ်ခဲႇဘၣ်လၢၦၤဟူးဂဲၤထီဒါပၢၢ်ဆၢသုးမီၤစိရိၤအကတီၢ်ဒီးသးစၢ်အါမးဘၣ်ဟ့ၣ်လီၤကွံာ်အသးသမူအကတီၢ်အံၤၦၤလၢအမုာ်လၤသးဖှံသူၣ်ဖှံသးညီလၢသုးမီၤစိရိၤစုတီၤဖီလာ်မၤ၀ဲတၢ်ရဲၣ်တၢ်ကျဲၤဘူၣ်ပူၤတဖၣ်အံၤလီၤမဲာ်ဆှးဒိၣ်မးအဂ့ၢ်န့ၣ် ဖၣ်အၣ်ဖၠၣ်စိမိၤ(CDM)ကၠိဖိတဂၤစံး၀ဲဒ်အံၤ န့ၣ်လီၤႉ “သုးဟံးန့ၢ်တၢ်စိတၢ်ကမီၤလီၢ်ခံၦၤလၢအဆဲးထီၣ်ကၠိတဖၣ်ခဲလၢာ်ဃၣ်ဃၣ်န့ၣ်မ့ၢ်ၦၤလၢအသူ၀ဲဒၣ်(စိၤရှၢၣ်မံၣ်ဒံၣ်ယၢၣ်)သ့မူၤမူၤနီၢ်နီၢ်လီၤႉထံကီတၢ်အိၣ်သးမ့ၢ်အအိၣ်ဒ်လဲၣ်န့ၣ်အ၀ဲသ့ၣ်သ့ၣ်ညါ၀ဲခဲလၢာ်လီၤႉ၀ဲဒၣ်နါက့ပကဲ၀ဲဒၣ်ဖၠၣ်စိမိၤကၠိဖိလီၤႉဖၠၣ်စိမိၤကၠိဖိအတၢ်သူၣ်ဖှံသးညီဒုၦၤမိၢ်န့ၢ်သးလီ၀ဲလၢလၢၦဲၤၦဲၤကိးဂၤဒဲးလီၤႉဘၣ်ဆၣ်တၢ်အိၣ်သးခဲအံၤမ့မ့ၢ်ယၤန့ၣ်ယကသးခုစ့ၢ်ဧါႉၦၤလၢအဆဲးထီၣ်ကၠိတဖၣ်အံၤအ၀ဲသ့ၣ်ဒီးအကစၢ်ဒၣ်၀ဲပာ်သးမ့ဘၣ်န့ၣ်မၤဒၣ်၀ဲ”အဂ့ၢ်န့ၣ် (CDM)ကၠိဖိတဂၤဃီ၀ဲန့ၣ်စံး၀ဲန့ၣ်လီၤႉ ၦၤကၠိဖိလၢအထီၣ်ဆဲးကၠိခဲအံၤသ့ၣ်တဖၣ်ဘၣ်တၢ်သူအီၣ်အ၀ဲသ့ၣ်လၢသုးမီၤစိရိၤဒီးဖဲကီၢ်ပယီၤထံဖိကီၢ်ဖိကမျၢၢ်ဘၣ်ကီဘၣ်ခဲဘၣ်ကိၢ်ဘၣ်ဂီၤအဆၢကတီၢ်အံၤကကွၢ်ဘၣ်တၢ်လၢပှၤအိၣ်တၢ်ခိၣ်တၢ်ဃၢၤအဂီၢ်ဒီးကမုာ်လၤသးဖှံလၢတၢ်ကဒုစုပူၤအဂ့ၢ်န့ၣ် ဖၣ်အၣ်ဖၠၣ်စိမိၤ(CDM)ကၠိဖိလၢအဂၤတဂၤစ့ၢ်ကီးစံး၀ဲန့ၣ်လီၤႉ အ၀ဲစံး၀ဲလၢ“အ၀ဲသ့ၣ်မၤတၢ်ဂဲၤလိာ်ကွဲထံတၢ်ရဲၣ်တၢ်ကျဲၤအံၤတဖျါဃံဖျါလၤအါအါဘၣ်ႉမ့အဲၣ်ဒိးသူၣ်ဖှံသးညီန့ၣ်နမၤအီၤကစုဒုသ့မီၤနီၤႉတၢ်မုာ်လၤသးဖှံလၢအမ့မၤသးဖှံၦၤအိၣ်လၢတၢ်ခိၣ်တၢ်ဃၢၤတဖၣ်ခီဒုနသူၣ်ဖှံသးညီသ့လီၤမီၤနီၤႉဘၣ်ဆၣ်ဖဲၦၤလီၤဘၣ်တၢ်ကီတၢ်ခဲအကတီၢ်အံၤတကြၢးလၢပမၤတၢ်သူၣ်ဖှံသးညီဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးတနံၣ်အံၤ(၂၀၂၃)ကီၢ်ပယီၤဘူၣ်တါလါတၢ်ရဲၣ်တၢ်ကျဲၤလၢကညီကီၢ်စဲၣ်ပဒိၣ်ကတီခိၣ်ရိၣ်မဲမၤ၀ဲအံၤ လၢတၢ်ကမၤ၀ဲဘူၣ်အံၤလီၤဘီလီၤမုၢ်အဂီၢ်န့ၣ်ဖဲအပူၤကွံာ်လါမးရှး ၁ သီအနံၤ တၢ်မၤ၀ဲခံဘျီတဘျီတၢ်အိၣ်ဖှိၣ်တၢၣ်ပီၣ်တဲသကိးလၢကီၢ်စဲၣ်ပဒိၣ်၀ဲၤဒၢးတၢ်အိၣ်ဖှိၣ်ဘျီၣ်ပူၤအဂ့ၢ်န့ၣ် သုးမီၤစိရိၤစုတီၤဖီလာ်တၢ်ကစီၣ်သန့တဖၣ် ထုးထီၣ်ပာ်ဖျါ၀ဲတၢ်ကစီၣ်န့ၣ်လီၤႉ
သိလ့ၣ်တကျၢၢ်အဃိကီၢ်ပယီၤၦၤထိဖိ(ခၠၣ်ပံၣ်ယၢၣ်)လီၢ်လံၤစီၤစွ့ၤဒူၤ၀ိၤသံ၀ဲ
လါမးရှး ၄ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲတနံၤအံၤလါမးရှး ၄ သီအနံၤန့ၣ် (ဒို့ညီေနာင်)ဘၢးစ်သိလ့ၣ်လၢကီၢ်ပယီၤၦၤထိဖိ(ခၠၣ်ပံၣ်ယၢၣ်)လီၢ်လံၤ စီၤစွ့ၤဒူၤ၀ိၤဒိး၀ဲအံၤန့ၣ် ခီဖျိသိလ့ၣ်အံၤလီၤတကျၢၢ်လၢ၀့ၢ်တကူၣ်–မါတလ့ကျဲတၢ်လီၢ်တတီၤအဃိ ၦၤသံအကျါပၣ်ဃုာ်၀ဲ(စီၤစွ့ၤဒူၤဂိၤ)အဂ့ၢ်န့ၣ် ၦၤလၢဘူးဒီးအီၤတဖၣ်စံး၀ဲန့ၣ်လီၤႉ ဖဲတနံၤအံၤဂီၤခီ ၆း၃၀ ဘျဲၣ်အဆၢကတီၢ် (ဒို့ညီနောင်)ဘၢးစ်သိလ့ၣ်အံၤအိၣ်လၢန့ၣ်ပၠံၣ်တီၣ်ကလဲၤဆူ ၀့ၢ်တကူၣ်ဒီးဖဲအလဲၤတုၤလၢ(၁၆၇)တၢၣ်ကျဲကပၤအခါခီဖျိသိလ့ၣ်အံၤတကျၢၢ်အဃိ ၦၤအိၣ်လၢသိၣ်လ့ၣ်ပူၤဘၣ်ဒိ၀ဲ (၂၅)ဂၤဒီးၦၤသံ(၃)ဂၤအကျါပၣ်ဃုာ်၀ဲစီၤစွ့ၤဒူၤ၀ိၤအဂ့ၢ်န့ၣ် (လူမှူကယ်ဆယ်ရေး)ပာ်ဖျါ၀ဲအသိး သ့ၣ်ညါဘၣ်န့ၣ် လီၤႉ ကီၢ်ပယီၤၦၤထိဖိ(ခၠၤပံၣ်ယၢၣ်)လီၢ်လံၤ စီၤငမါ စံး၀ဲလၢ“သိလ့ၣ်လီၤတကျၢၢ်အဃိအသံလီၤႉ အ၀ဲပၣ်ဃုာ်လၢ(ဘၢးစ်)ကါ၀ဲန့ၣ်ပူၤမီၤနီၤႉလၢတၢ်ထိပူၤန့ၣ်အ၀ဲမ့ၢ်သရၣ်တဂၤစ့ၢ်လီၤႉၦၤထိဖိလီၢ်လံၤလီၤမၢ်ကွံာ်တဂၤဒ်အံၤဘၣ်ပသးတမုာ်ဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ စီၤစွ့ၤဒူၤ၀ိၤအံၤအသးအိၣ်၀ဲ(၅၃)နံၣ်ဒီးမၤနၢၤစ့ၢ်ကီး၀ဲစီၤစွ့ၤ၀ၤထိလၢအဟံးဃာ်၀ဲကီၢ်ပယီၤတၢ်ထိ(ခၠၣ်ပံၣ်ယၢၣ်)လၢန့ၢ်အနံၣ်တဆံအံၤအသိးစီၤစွ့ၤဒူၤ၀ိၤအံၤမ့ၢ်စ့ၢ်ကီးၦၤလၢအဒိးန့ၢ်ဘၣ်၀ဲကီၢ်ပယီၤတၢ်ထိ(ခၠၣ်ပံၣ်ယၢၣ်)ခိၣ်ဖးတဂၤစ့ၢ်ကီးန့ၣ်လီၤႉ လၢန့ၣ်အမဲာ်ညါအ၀ဲမ့ၢ်စ့ၢ်ကီးၦၤတဂၤလၢအဒုးအိၣ်ဖျဲၣ်ထီၣ်န့ၢ်၀ဲသူၣ်ဘီၣ်သးစၢ်ၦၤထိဖိတဖၣ်အါမးအဂ့ၢ်န့ၣ် သ့ၣ်ညါဘၣ်လၢၦၤထိတၢ်ဖိတဖၣ်အအိၣ်န့ၣ်လီၤႉ စီၤစွ့ၤဒူၤ၀ိၤသံအခါအမါဒီးအဖိမုၣ်တဂၤႇအဖိခွါတဂၤအိၣ်လီၤတဲာ်ကွံာ်၀ဲဒီးဖဲအတပြၢထိဒီးစီၤ၀ၤခၠဲ၀ံၤအလီၢ်ခံန့ၣ် အ၀ဲအိၣ်ဘှံးက့ၤ၀ဲလၢတၢ်ထိပူၤဒီးအိၣ်ဆိး၀ဲလၢဖၣ်အၣ်၀့ၢ်(ပၠံၣ်ထီၣ်စူၣ်)က၀ီၤဒ့ပူၤအဂ့ၢ်န့ၣ် ၦၤလၢဘူးဒီးအဟံၣ်ဖိဃီဖိတဖၣ်စံး၀ဲန့ၣ်လီၤႉ
ပယီၤသုးဖီၣ်က့ၤကိး သၣ်တီၣ်(ဘိုတဲကုန်း)သ၀ီဖိ ၂ ဂၤဒီး ပျၢ်လီၤက့ၤ၀ဲတဂၤဒံးလီၤ
လါမးရှး ၄ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် သၣ်တီၣ်(၁၃)မဲၤ၀့ၢ်ကပၤ (ဘိုတဲကုန်း)သ၀ီအပူၤ ဖဲလါမးရှး ၂ သီအနံၤန့ၣ် ပယီၤသုးဆိမိၣ်လၢတၢ်ပၢၢ်ဆၢသုးအိၣ်ခူသူၣ်လၢသ၀ီ၀ဲန့ၣ်ပူၤဒီးဖဲအနုာ်လီၤတၢ်လၢသ၀ီပူၤအံၤအခါ ဖီၣ်က့ၤကိး၀ဲကမျၢၢ်(၂)ဂၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ဖဲအပူၤကွံာ်စှၤသီအခါလၢ(၁၃)မဲၤ ပယီၤသုးခးလီၤကျိဖးဒိၣ်ကိးမုၢ်နံၤဒဲးအဃိ(ဘိုတဲကုန်း)သ၀ီဖိတဖၣ် ဃ့ၢ်ထီၣ်၀ဲဒီးကမျၢၢ်လၢပယီၤသုးဖီၣ်၀ဲ(၂)ဂၤအံၤအကျါတၢ်ပျၢ်လီၤက့ၤ၀ဲတဂၤလံဘၣ်ဆၣ် မ့မ့ၢ်အ၀ဲတဂၤန့ၣ် တုၤလၢခဲအံၤတၢ်တပျၢ်လီၤ၀ဲဒံးဘၣ်အဂ့ၢ်န့ၣ်လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ “မ့ၢ်(PDF)တကပၤဘၣ်ၦဲၤဂၤလဲၣ်ဒုပတသ့ၣ်ညါဘၣ်ႉၦၤအိၣ်ဖဲသ၀ီပူၤတဖၣ်အံၤပျံၤကျိဖးဒိၣ်အဃိအ၀ဲသ့ၣ်ဟးစံၣ်အိၣ်လၢအဂၤႇလၢအဟဲက့ၤအိၣ်လၢသ၀ီပူၤဒုအိၣ်တနီၤဟဲက့ၤဒုးအီၣ်အဆၣ်ဖိကီၢ်ဖိအဆၣ်မီၤနီၤႉဖီၣ်က့ၤကိး၀ဲသ၀ီဖိခံဂၤႉပယီၤသုးန့ၣ်မ့ထံၣ်တၢ်လီၤဆီလၢၦၤလီတဲစိပူၤတခါခါန့ၣ်ဟံ၀ဲအရ့အိၣ်အသိးလီတဲစိပူၤမ့တထံၣ်တၢ်နီတမံၤဘၣ်နါက့ၦၤမ့ဟ့ၣ်တၢ်ကစီၣ်န့ၣ်ဖီၣ်၀ဲလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါဖဲပယီၤသုးနုာ်လီၤခးတၢ်လၢသ၀ီပူၤအခါန့ၣ်ဒွဲၣ်အူအီၣ်ကွံာ်၀ဲအပူၤကွံာ်တၢ်အိၣ်ဖှိၣ်သရၣ်ဒိၣ်အဟံၣ်အံၤဒီးဟံၣ်လၢပယီၤသုးဒွဲၣ်အူအီၣ်၀ဲအံၤခီဖျိၦၤတအိၣ်လၢအပူၤနီတဂၤလၢၤဘၣ်အဃိတၢ်ဘၣ်ဒိဘၣ်ထံးတအိၣ်၀ဲနီတမံၤဘၣ်အဂ့ၢ်န့ၣ် လီၢ်က၀ီၤသ၀ီဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ဒ်န့ၣ်အသိးတုၤလၢလါမးရှး ၂ သီတစုန့ၣ် ပယီၤသုးခးလီၤဒံးကျိဖးဒိၣ်ဆူသၣ်တီၣ်(၁၃)မဲၤ၀့ၢ်ပူၤတပယူာ်ဃီဒီး ပယီၤသုးနုာ်လီၤခးတၢ်လၢ(ဘိုတဲကုန်း)သ၀ီပူၤအံၤန့ၣ်ခီဖျိၦၤဟ့ၣ်အ၀ဲသ့ၣ်တၢ်ကစီၣ်အိၣ်လီၤတံၢ်လီၤဆဲးအဃိ ပယီၤသုးနုာ်လီၤခးတၢ်လီၤအဂ့ၢ်န့ၣ် လီၢ်က၀ီၤကမျၢၢ်လၢအဂၤတဂၤစ့ၢ်ကီးစံး၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်လါဖ့ၤဘြူၤအါရံၤ ၂၁ သီအနံၤစ့ၢ်ကီးလၢ(၁၃)မဲၤန့ၣ် တၢ်ဒုးကဲထီၣ်၀ဲလၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇတၢ်ဒီသဒၢကမျၢၢ်သုး(PDF)ဒီးပယီၤသုးအဘၢၣ်စၢၤ၀ံၤအလီၢ်ခံ ပယီၤသုးခးလီၤကျိဖးဒိၣ်ဆူ၀့ၢ်ပူၤတကးဒံးဘၣ်အမဲာ်ညါဒွဲၣ်အူအီၣ်၀ဲက၀ီၤဒ့ပူၤကမျၢၢ်အဟံၣ်(၇)ဖျၢၣ်ဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကြုၢ်တုပယီၤသုး(၅၄၆)သုးရ့ၣ်ခးလီၤကျိဖးဒိၣ်ကိးမုၢ်နံၤဒဲးအဃိသ၀ီဖိက့ၤအိၣ်လၢသ၀ီပူၤတဘူၣ်ဒံးဘၣ်
လါမးရှး ၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢကီးတရံးကီၢ်ရ့ၣ် ကြုၢ်တုကီၢ်ဆၣ်အပူၤ ခီဖျိပယီၤသုးခးလီၤကျိဖးဒိၣ်ဆူ(ကြုၢ်တု)ကလံၤထံး ဒူသ၀ီတဖၣ်အပူၤတလီၢ်လီၢ်အဃိလီၢ်က၀ီၤကမျၢၢ်လၢအဘၣ်ဃ့ၢ်မှံဟးဖျိးတဖၣ်အံၤက့ၤအိၣ်လၢသ၀ီပူၤတဘူၣ်ဒံးဘၣ်ဒီးဘၣ်ဟးစံၣ်အိၣ်၀ဲတုၤလၢခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ စးထီၣ်ဖဲအပူၤကွံာ်လါဖ့ၤဘြူၤအါရံၤလၢၤတုၤလၢခဲအံၤန့ၣ်ပယီၤသုး(ခလရ–၅၄၅/၅၄၆)သုးရ့ၣ် လၢအိၣ်ကြုၢ်တုပူၤအံၤတဖၣ်ခီဖျိအ၀ဲသ့ၣ်ခးလီၤကျိဖးဒိၣ်ဆူကီၣ်ကၤႇကါမယဲၣ်ႇမံၣ်ကလိၤႇကါနံၤသ၀ီပူၤတလီၢ်လီၢ်အဃိ ဘၣ်ဟးဂီၤ၀ဲၦၤဟံၣ်ၦၤဃီအိၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ “စှၤသီအံၤပယီၤသုး(၅၄၅/၅၄၆)သုးရ့ၣ်တဖၣ်အံၤခးလီၤကျိဖးဒိၣ်ႉဖဲလါဖ့ၤဘြူၤအါရံၤ ၂၈ သီန့ၣ် ခးလီၤကျိဖးဒိၣ်လၢ(ကီၣ်ကၤ)သ၀ီပူၤအဃိၦၤဟံၣ်ဟးဂီၤႉၦၤသ၀ီဖိလၢအစံၣ်တဖၣ်န့ၣ်တုၤလၢခဲအံၤဟဲက့ၤအိၣ်လၢသ၀ီပူၤတဘူၣ်ဒံးဘၣ်ႉဖဲအပူၤကွံာ်စှၤသီအခါနါက့ခးလီၤကျိဖးဒိၣ်လၢကါမယဲၣ်ႇမံၣ်ကလိၤႇကါနံၤသ၀ီတကပၤန့ၣ်ဒံးမီၤနီၤႉအ၀ဲသ့ၣ်န့ၣ်ပျံၤ၀ဲလၢကညီသုးကဟဲခးအ၀ဲသ့ၣ်လၢ(ဒြိ)မီၤနီၤ”အဂ့ၢ်န့ၣ် လီၢ်က၀ီၤကမျၢၢ်လၢအိၣ်ဘူးဒီးကြုၢ်တု ပယီၤသုးကလၢၤအံၤတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢကီးတရံးဟီၣ်က၀ီၤအပူၤခီဖျိပယီၤသုးဒီးသုးခိးကီၢ်ဆၢ(BGF)အံၤနုာ်လီၤဟူးဂဲၤဆီလီၤသုးကလၢၤႇဖီၣ်သမံသမိးတၢ်လၢဒူသ၀ီပူၤဒီးတၢ်လီၢ်လၢ(KNLA)သုးပာ်ဖှိၣ်ဟူးဂဲၤ၀ဲအလီၢ်သ့ၣ်တဖၣ်ကိးမုၢ်နံၤဒဲးအဃိ ကီးတရံး–ကြုၢ်တုဟီၣ်က၀ီၤသ၀ီအဖျၢၣ်(၃၀)ဃၣ်ဃၣ်ကမျၢၢ်တဖၣ်က့ၤအိၣ်လၢအ၀ဲသ့ၣ်သ၀ီပူၤတဘူၣ်ဒံး၀ဲဘၣ် အဂ့ၢ်န့ၣ်ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ ၦၤမၤစၢၤၦၤဃ့ၢ်မှံဟးဖျိးတဂၤစံး၀ဲလၢ“ခဲအံၤမ့ဘၣ်တဲကီးတရံးဒီတဘ့ၣ်န့ၣ်သ၀ီအဖျၢၣ်(၃၀)န့ၣ်ၦၤအိၣ်လၢအပူၤတဘူၣ်လၢၤဘၣ်ႉအိၣ်၀ဲပယီၤသုးဒီး(BGF)န့ၣ်လီၤႉၦၤသ၀ီဖိတဖၣ်အါဒၣ်တက့ၢ်န့ၣ်လဲၤအိၣ်၀ဲလၢသ၀ီလၢအဂၤႇ သ၀ီဖိတနီၤန့ၣ်လဲၤအိၣ်၀ဲလၢအကျီးပူၤဒ်န့ၣ်လီၤႉတၢ်လီၢ်လၢအဘူးညါန့ၣ်ပလဲၤဟ့ၣ်လီၤတၢ်အီၣ်တၢ်အီၣ်အိၣ်ႉၦၤလၢအလဲၤစံၣ်အိၣ်ယံၤတဖၣ်ညါဒုပလဲၤဟ့ၣ်လီၤတတုၤဘၣ်”အဂ့ၢ်န့ၣ် စံး၀ဲန့ၣ်လီၤႉ ကီးတရံး–ကြုၢ်တုဟီၣ်က၀ီၤအပူၤ ကမျၢၢ်ၦၤဃ့ၢ်မှံဟးဖျိးအနီၣ်ဂံၢ်စရီခီန့ၣ်တၢ်တသ့ၣ်ညါ၀ဲလီၤတံၢ်လီၤဆဲးဘၣ်ဒီး ခီဖျိအ၀ဲသ့ၣ်ဟးအိၣ်လၢအံၤတဒူၣ်လၢန့ၣ်တဒူၣ်အဃိမ့က့ၤဒွးကဒါလၢသ၀ီၦၤနီၣ်ဂံၢ်အသိးန့ၣ် ၦၤတဟဲက့ၤအိၣ်ဘၣ်ဒံးလၢသ၀ီပူၤဘၣ်န့ၣ်ၦၤနီၣ်ဂံၢ်ကအိၣ်အဂၤ(၅၀၀၀)ဃၣ်ဃၣ်ဒံးညါအဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးအတၢ်မၤနီၣ်စရီပူၤန့ၣ်လီၤႉ လၢကီးတရံး–ကြုၢ်တုဟီၣ်က၀ီၤအပူၤ ခီဖျိပယီၤသုး(ခလရ–၅၄၅/၅၄၆)ႇကီးတရံး(၉၇)သုးရ့ၣ်ႇ လဲၤ၀ၣ်ကျိဖးဒိၣ်သုးဒီးကျိဖးဒိၣ်ပယီၤသုးလၢအိၣ်တီၤကၠၤအ့တီၤထီကၠိကရၢၢ်ပူၤတဖၣ်အံၤခးလီၤကျိဖးဒိၣ်ဆူဟီၣ်က၀ီၤဒူသ၀ီပူၤတလီၢ်လီၢ်အဃိဘၣ်ဟးဂီၤ၀ဲကမျၢၢ်အဟံၣ်အဃီႇကၠိႇတၢ်ဆါဟံၣ်ႇသီခါဖၠၣ်ႇတၢ်ဘါယွၤသရိာ်ႇဃိၣ်သ့ၣ်တဖၣ်အါအါဂီၢ်ဂီၢ်ဒီးၦၤနီၢ်ဒိၣ်နီၢ်ဆံးဖိဒံဖိသၣ်ဃုာ်ဒီးသီဘူၣ်သီခါတဖၣ်သံဘၣ်ဒိဘၣ်ထံး၀ဲဒၣ်အါမးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဘျံးဒ၀ဲၢ်ကီၢ်ရ့ၣ်လါဖ့ၤဘြူၤအါရံၤတလါအတီၢ်ပူၤတၢ်ဒုးကဲထီၣ်(၄)ဘျီ ပယီၤသုးသံတစှၤန့ၢ်(၄၄)ဂၤ
လါမးရှး ၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ဘျံးဒ၀ဲၢ်ကီၢ်ရ့ၣ်အပူၤ လါဖ့ၤဘြူၤအါရံၤတလါအတီၢ်ပူၤ ပယီၤသုးဒီးဟီၣ်က၀ီၤသုးပာ်ဖှိၣ်အဘၢၣ်စၢၤတၢ်ဒုးကဲထီၣ်၀ဲ(၄၄)ဘျီဒီးပယီၤသုးသံတစှၤန့ၢ်(၄၄)ဂၤဘၣ်အဂ့ၢ်န့ၣ် သ့ၣ်ညါဘၣ်လၢဘျံးဒ၀ဲၢ်ကီၢ်ရ့ၣ် သုးရ့ၣ်(၁)အအိၣ်န့ၣ်လီၤႉ လၢလၢၢ်ဒိၣ်စိကီၢ်ဆၣ် ပကၤယံၤသ၀ီႇသ့ၤကါတိႇသဘၠၤ–မဲခၠီသ၀ီအဘၢၣ်စၢၤဒီးသယဲၣ်ခၠီကီၢ်ဆၣ် စီၤဖၠါသ၀ီတၢ်ခိၣ်တၢ်ဃၢၤဖဲန့ၣ်သ့ၣ်တဖၣ်အပူၤန့ၣ်တၢ်ဒုးကဲထီၣ်၀ဲဒီးပယီၤသုးသံတစှၤန့ၢ်(၄၄)ဂၤညါဒီး ဘၣ်ဒိဘၣ်ထံး၀ဲအါမးအဂ့ၢ်န့ၣ် ဘျံးဒ၀ဲၢ်ကီၢ်ရ့ၣ် သုးရ့ၣ်(၁)တၢ်ဘိးဘၣ်ရၤလီၤမူဒါခိၣ် ဒံၤန့ၢ်ထူ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တၢ်ဒုးမ့ကဲထီၣ်တဘျီလၢ်လၢ်န့ၣ်တၢ်ကီတၢ်ခဲအိၣ်လၢပကထၢဖှိၣ်ၦၤသံစရီမီၤနီၤႉ ပယီၤသုးသံဘၣ်ဒိဘၣ်ထံးအနီၣ်ဂံၢ်တဖၣ်န့ၣ်ခဲအံၤပက့ၤထၢဖှိၣ်အီၤဒီးပအဲၣ်ဒိးပာ်ဖျါထီၣ်န့ၢ်ကမျၢၢ်သ့ၣ်တဖၣ်အံၤလၢတၢ်ကစီၣ်လၢအမ့ၢ်အတီအဃိပပာ်ဂၢၢ်ပာ်ကျၢၤထုးထီၣ်ပာ်ဖျါဒ်အံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်– ကညီတၢ်ကစီၣ် န့ၣ်လီၤႉ တချုးလၢဟီၣ်က၀ီၤတၢ်ပၢၢ်ဆၢသုးပာ်ဖှိၣ်အိးထီၣ်တၢ်ဒုးမဲာ်သၣ်ဒံးဘၣ်အခါန့ၣ် အ၀ဲသ့ၣ်လဲၤတဲဒီးဒုးသ့ၣ်ညါသ၀ီဖိကမျၢၢ်တဖၣ်လၢအနီၢ်ကစၢ်ႇထုးထီၣ်ဟ့ၣ်ပလီၢ်ဒုးသ့ၣ်ညါ၀ဲလၢ(စိၣ်ရှၢၣ်မံၣ်ဒံၣ်ယၢၣ်)အပူၤ၀ံၤမးဒုးအိၣ်ထီၣ်၀ဲတၢ်ဒုးမဲာ်သၣ်အံၤလီၤအဂ့ၢ်န့ၣ် သိၣ်မှံၤသုးပာ်ဖှိၣ်ကရူၢ်(ဥသြ)သုးကျိၤ သုးဖိတဂၤ စံး၀ဲန့ၣ်လီၤႉ အ၀ဲစံး၀ဲလၢ“ဟီၣ်က၀ီၤဖဲအံၤတက့န့ၣ်ခီဖျိၦၢ်မုၢ်သီထိႇတၢ်ဖံးအီၣ်မၤအီၣ်ကျီးအိၣ်အါအဃိသ၀ီဖိတဖၣ်တၢ်ဒုးမ့ကဲထီၣ်န့ၣ်အ၀ဲသ့ၣ်လဲၤစံၣ်အိၣ်၀ဲလၢအကျီးပူၤဒ်န့ၣ်အိၣ်မီၤနီၤႉတၢ်ဒုးကဲထီၣ်မ့၀ံၤႇပမၤရှဲလဲတၢ်လီၢ်မ့၀ံၤန့ၣ် ပဟးတဲဘၣ်က့ၤအ၀ဲသ့ၣ်လၢက့ၤအိၣ်လၢဟံၣ်သ့လံဒ်န့ၣ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ လၢၢ်ဒိၣ်စိကီၢ်ဆၣ်အပူၤစးထီၣ်(၂၀၂၂)တုၤလၢခဲအံၤတစုန့ၣ်သိၣ်မှံၤသုးပာ်ဖှိၣ်ဒီးပယီၤသုးအဘၢၣ်စၢၤတၢ်ဒုးကဲထီၣ်၀ဲ(၈)ဘျီဒီးတၢ်ဒုးကဲထီၣ်ဖဲလါဖ့ၤဘြူၤအါရံၤအခါန့ၣ် ဘျံးဒ၀ဲၢ်ကီၢ်ရ့ၣ် သိၣ်မှံၤသုးပာ်ဖှိၣ်တကပၤသံ၀ဲ(၂)ဂၤအဂ့ၢ်န့ၣ် သ့ၣ်ညါဘၣ်လၢ(ဥသြ)သုးကျိၤ တၢ်ဘိးဘၣ်ရၤလီၤကရူၢ်အအိၣ်န့ၣ်လီၤႉ